Yana eMahlweni U ‘Tikarhatela Ku Va Ni Vuxaka Ni Xikwembu’

1. Yehovha u hi tumbuluxe hi ri ni swilaveko swihi? (Matewu 5:3)

YEHOVHA u hi vumbe hi ri ni swilaveko swo karhi. Hi xikombiso, hi lava swakudya, swiambalo ni ndhawu yo tshama leswaku hi kota ku hanya. Loko hi nga ri na swona swilo leswi swa nkoka hambi ko va swa xinkarhana, vutomi byi nga tika. Ku engetela eka swilo leswi, Yehovha u hi vumbe hi ri ni xilaveko xo va ni vuxaka lebyinene na yena. (Hlaya Matewu 5:3.) Loko hi lava ku va ni ntsako wa xiviri, hi fanele hi va ni vuxaka lebyinene na yena ni ku tlhela hi ya emahlweni hi tirhisa nkongomiso wakwe.

2. Xana xiyimo xa hina xi fana njhani ni xa wanuna luya wa xisiwana?

² Xana swi vula yini ku ‘tikarhatela ku va ni vuxaka ni Xikwembu’? Hi Xigriki, xiga lexi xi hlamusela munhu loyi a lavaka ku pfuniwa ku va ni vuxaka ni Xikwembu. Ehleketa hi wanuna loyi a nga xisiwana. Swiambalo swakwe swi hlakarile swi tlhela swi thyaka naswona u tshame exitarateni. A nga na matimba hileswi a pfumalaka swakudya, vanhu a va na mhaka na yena hikwalaho ka ndlela leyi a langutekaka hayona naswona dyambu ni xirhami swi tlanga hi yena. Wanuna loyi wa swi tiva leswaku u lava ku pfuniwa leswaku a antswisa xiyimo xa yena. Hilaha ku fanaka, munhu loyi a nga ha riki ni vuxaka lebyinene na Yehovha u fanele a pfuniwa leswaku a tlhela a va ni vuxaka lebyinene na yena, ku fana ni wanuna luya wa xisiwana. Hikwalaho, u tikarhatela ku tirhisa nkongomiso lowu Yehovha a wu nyikaka lava N’wi rhandzaka hi ku tirhisa tindlela to hambanahambana.

3. Hi ta bula hi yini eka nhlokomhaka leyi?

³ Eka nhlokomhaka leyi, hi ta rhanga hi kambisisa leswi hi nga swi dyondzaka eka wansati wa Mufenikiya, loyi a kombeleke Yesu leswaku a n’wi pfuna. Naswona eka xikombiso xakwe, hi ta bula hi swilo swinharhu leswi lava lavaka ku ya emahlweni va kongomisiwa hi Yehovha va nga swi tekelelaka. Nakambe hi ta bula hi xikombiso xa muapostola Petro, Pawulo ni xa Hosi Davhida, lava mikarhi hinkwayo a va titshega hi Yehovha leswaku a va pfuna.

WANSATI LOYI A A TITSONGAHATA, A A PHIKELELA NI KU TLHELA A VA NI RIPFUMELO

4. Xana wansati wa Mufenikiya a a lava yini eka Yesu?

⁴ Siku rin’wana wansati wa Mufenikiya u ye eka Yesu. N’wana wakwe wa nhwanyana a ‘xaniseka swinene hileswi a a ri ni dimona.’ (Mat. 15:​21-28) Wansati loyi u fike a khinsama, a kombela Yesu leswaku a n’wi pfuna. Nakambe u fike a kombisa vumunhu bya nkoka swinene loko a ya eka Yesu. A hi kambisiseni byin’wana bya byona.

5. I vumunhu byihi lebyi wansati wa Mufenikiya a byi kombiseke naswona Yesu u angule njhani? (Nakambe vona xifaniso.)

⁵ Wansati wa Mufenikiya u kombise leswaku wa titsongahata. Hikwalahokayini hi vula sweswo? Hikuva a nga kwatanga hambileswi Yesu a tirhiseke xifaniso lexi a xi twala onge u n’wi fanisa ni ximbyanyana, lexi kumbexana a ku ri xifuwo lexi a xi tala ku fuyiwa emakaya ya vanhu lava nga riki Vayuda. Loko a ku ri wena, xana marito ni swiendlo swa Yesu a swi ta va swi ku khome njhani? Xana a wu ta va u khunguvanyekile ni ku tlhela u tshika ku kombela ku pfuniwa hi yena? Wansati wa Mufenikiya a nga endlanga tano. U titsongahatile ni ku tlhela a phikelela. Leswi swi vonake eka ndlela leyi a yeke emahlweni a kombela Yesu leswaku a n’wi pfuna. I yini lexi n’wi pfuneke leswaku a endla tano? I ripfumelo leri a ri na rona eka Yesu. Entiyisweni, loko Yesu a vona ripfumelo leri wansati loyi a a ri na rona, u endle nchumu wo hlamarisa. Hambileswi a vuleke leswaku a a rhumiwe ku ta pfuna ntsena “tinyimpfu leti lahlekeke ta yindlu ya Israyele,” Yesu u suse dimona leri n’wana wa wansati yoloye loyi a a nga ri Muyuda a a ri na rona.

6. Hi dyondza yini eka mhaka ya wansati wa Mufenikiya?

⁶ Leswaku hi vuyeriwa eka nkongomiso lowu humaka eka Yehovha, hi fanele hi tekelela wansati wa Mufenikiya. Hi fanele hi titsongahata, hi phikelela ni ku va ni ripfumelo leri tiyeke. I munhu loyi a titsongahataka ntsena loyi a nga kombelaka Xikwembu leswaku xi n’wi pfuna hi ku phindhaphindha. Hi fanele hi tlhela hi va ni ripfumelo leri tiyeke eka Kreste Yesu ni ku tshemba lava a va tirhisaka leswaku a kongomisa vadyondzisiwa vakwe. (Mat. 24:​45-47) Yehovha na Yesu va swi lava ku pfuna vanhu lava kombisaka vumunhu lebyi. (Ringanisa Yakobo 1:​5-7.) Sweswi a hi kambisiseni ndlela leyi Yehovha a hi kongomisaka, a hi sirhelelaka hayona ni ku hi nyika leswi hi swi lavaka leswaku hi tsaka. Hi ta vona leswi hi faneleke hi swi endla leswaku hi vuyeriwa eka nkongomiso lowu, hi ku va hi kambisisa xikombiso lexi muapostola Petro, Pawulo ku katsa na Hosi Davhida va hi vekeleke xona.

KU FANA NA PETRO, YANA EMAHLWENI U DYONDZA RITO RA XIKWEMBU

7. Xana Petro a a byeriwe ku endla yini kambe a a fanele a tlhela a endla yini? Hlamusela. (Vaheveru 5:14–6:1)

⁷ Ehleketa hi muapostola Petro. A a ri un’wana wa Vayuda vo sungula lava xiyeke leswaku Yesu i Mesiya, loyi Yehovha a n’wi tirhiseke ku dyondzisa vanhu Vakwe “marito lama nga ni vutomi lebyi nga heriki.” (Yoh. 6:​66-68) Loko Yesu la pfuxiweke a nga si ya etilweni, u byele Petro a ku: “Phamela swinyimpfana swa mina.” (Yoh. 21:17) Petro u endle sweswo hi ku tshembeka naswona Yehovha u n’wi tirhisile leswaku a tsala mapapila mambirhi lama katsiweke eBibeleni. Kambe Petro a a fanele a dyondza Rito ra Xikwembu. Hi xikombiso, u dyondze mapapila mambirhi lawa muapostola Pawulo a huhuteriweke ku ma tsala. Petro u xiye leswaku swin’wana swa swilo leswi Pawulo a swi tsaleke a swi “tika ku swi twisisa.” (2 Pet. 3:​15, 16) Kambe Petro u ye emahlweni a dyondza hi swilo leswi, a ri karhi a tshemba leswaku Yehovha u ta n’wi pfuna a twisisa ni ku tirhisa “swakudya leswi tiyeke” leswi Pawulo a huhuteriweke ku swi tsala eka mapapila yakwe.—Hlaya Vaheveru 5:14–6:1.

8. Xana Petro u angule njhani loko a nyikiwa nkongomiso lowu humaka eka muyimeri wa Xikwembu?

⁸ Petro u kombise leswaku u tshemba Yehovha hi ku va a yingisa nkongomiso lowu a wu kumeke. Hi xikombiso, loko a ri emutini wa Yopa laha swikepe a swi yima kona, Petro u vone xivono laha muyimeri wa Xikwembu a n’wi byeleke leswaku a tlhava ni ku dya swiharhi leswi hi ku ya hi Nawu wa Muxe a swi nga basanga. Eka Vayuda, nkongomiso wolowo a wu hoxile. Eku sunguleni Petro u te: “A ndzi nge swi koti, Hosi, hikuva a ndzi si tshama ndzi dya nchumu lowu nyameke ni lowu nga basangiki.” Endzhaku u byeriwe leswi: “Tshika ku vula leswaku swilo leswi Xikwembu xi swi basiseke swi nyamile.” (Mit. 10:​9-15) Eku heteleleni Petro u yi twisisile yinhla. Hi swi tiva njhani? Hikuva endzhakunyana ka xivono xexo, vavanuna vanharhu lava a va rhumiwe hi Korneliyo loyi a a nga ri Muyuda, va fikile kutani va n’wi rhamba leswaku a famba na vona a ya vulavula ni n’wini wa vona. Hi ntolovelo, Petro a a ta va a nga pfumelanga ku ya emutini wa munhu loyi a a nga ri Muyuda. Vayuda a va teka vanhu va rixaka rin’wana va nga basanga. (Mit. 10:​28, 29) Kambe Petro u hatle a yingisa nkongomiso lowu Yehovha a n’wi nyikeke wona. (Swiv. 4:18) U chumayele Korneliyo ni ndyangu wakwe naswona swi n’wi tsakisile ku va vona va amukela ntiyiso, va kuma moya wo kwetsima ni ku tlhela va khuvuriwa.—Mit. 10:​44-48.

9. Hi tihi tindlela timbirhi leti hi vuyeriwaka hatona loko hi dyondza hi swilo leswi nga ha tikaka ku swi twisisa?

⁹ Ku fana na Petro, nkarhi ni nkarhi hi fanele hi dyondza tidyondzo ta masungulo eRitweni ra Xikwembu. Nakambe hi fanele hi navela ku dyondza tidyondzo leti dzikeke, leti swi nga ha tikaka ku ti twisisa. I swa nkoka ku tivekela nkarhi etlhelo ni ku endla matshalatshala leswaku hi ri twisisa kahle Rito ra Xikwembu. Hikwalahokayini? Hikuva ha vuyeriwa hi tindlela timbirhi: Yo sungula, hi dyondza swilo hi Yehovha leswi endlaka leswaku hi ya hi n’wi rhandza ni ku n’wi xixima; ya vumbirhi, hi susumeteleka ku byela van’wana hi swilo swo tsakisa hi Tata wa hina wa le tilweni. (Rhom. 11:33; Nhlav. 4:11) Xikombiso xa Petro xi tlhela xi hi dyondzisa dyondzo yin’wana: Loko ku va ni ku antswisiwa ka ndlela leyi hi twisisaka Rito ra Xikwembu hayona, hi fanele hi hatla hi fambisana na kona. Loko hi endla tano, hi ta ya emahlweni hi kongomisiwa hi Yehovha ni ku n’wi tirhela hi ku tshembeka.

KU FANA NA PAWULO, U NGA TSHIKI KU AMBALA VUMUNHU LEBYINTSHWA

10. Xana swi vula yini ku ambala swiambalo swa moya? (Vakolosa 3:​8-10)

¹⁰ Leswaku hi tsakisa Xikwembu, hi fanele hi ambala swiambalo swa moya. Xana sweswo swi vula yini? Muapostola Pawulo u tsale leswaku hi fanele hi ‘hluvula vumunhu bya khale’ ivi hi “ambala vumunhu lebyintshwa.” (Hlaya Vakolosa 3:​8-10.) Nilokoswiritano, ku ambala vumunhu byebyo swi nga ha tika. Ehleketa hi xikombiso xa Pawulo. Loko a ha ri ntsongo, u tirhe hi matimba leswaku a rhandziwa hi Xikwembu. (Gal. 1:14; Filp. 3:​4, 5) Kambe a a nga yi twisisi hi ku helela ndlela leyi a a fanele a xi gandzela hayona naswona hikwalaho ka sweswo a a nga ri na vuxaka lebyi tiyeke na xona. Leswi a a tikukumuxa naswona a a nga ti tekeli enhlokweni tidyondzo ta Kreste, swi endle leswaku a va “murhuketeri” loyi a ri ni mahanyelo lawa a ma nga xi tsakisi Xikwembu.—1 Tim. 1:13.

11. I xiphiqo xihi lexi Pawulo a a fanele a tirha hi matimba leswaku a xi hlula? Hlamusela.

¹¹ Loko Pawulo a nga si va Mukreste, a a ri ni ximbilwambilwana. Mhaka leyi kumekaka eka Mitirho yi vula leswaku Pawulo a a hlundzukele vadyondzisiwa va Yesu lerova a a “tiyimisele ku [va] xanisa ni ku [va] dlaya.” (Mit. 9:1) A swi kanakanisi leswaku endzhaku ka loko Pawulo a ve Mukreste u tirhe hi matimba leswaku a hluvula vumunhu bya khale. (Efe. 4:​22, 31) Hambiswiritano, loko Pawulo na Barnaba va holovile, Pawulo u dye makala. (Mit. 15:​37-39) Leswi swi n’wi tlherisele endzhaku Pawulo kambe a nga lan’wanga. U ye emahlweni a ‘ba miri wakwe’ a lwisana ni ku tsana kakwe leswaku a ta tshama a rhandziwa hi Yehovha.—1 Kor. 9:27.

12. I yini leswi pfuneke Pawulo leswaku a hluvula vumunhu bya khale?

¹² Pawulo u swi kotile ku tshika vumunhu byo biha ni ku ambala vumunhu lebyintshwa, hikwalaho ka leswi a a titshega hi matimba lama humaka eka Xikwembu. (Filp. 4:13) Ku fana na Petro, Pawulo u titshege hi “matimba lama humaka eka Xikwembu.” (1 Pet. 4:11) Nilokoswiritano, mikarhi yin’wana Pawulo a a titwa a ri mutsandzeki. Kambe loko a titwa hi ndlela yoleyo, u ehlekete hi swilo leswinene leswi Tata wakwe wa le tilweni a n’wi endleleke swona naswona sweswo swi n’wi pfunile leswaku a ya emahlweni a lwisana ni ku tsana kakwe.—Rhom. 7:​21-25.

13. Hi nga n’wi tekelela njhani Pawulo?

¹³ Hi nga tekelela Pawulo hi ku ya emahlweni hi tirha hi matimba leswaku hi hluvula vumunhu bya khale swi nga ri na mhaka leswaku hi ni malembe mangani hi tirhela Yehovha ivi hi ambala vumunhu lebyintshwa lebyi Xikwembu xi hi dyondzisaka ku byi ambala. Loko hi pfa hi tlhelela eka vumunhu bya khale, ku fana ni ku va ni ximbilwambilwana kumbe ku tlhava un’wana hi marito, a hi fanelanga hi titeka hi ri vatsandzeki. Ku ri na sweswo, hi fanele hi ya emahlweni hi cinca ndlela leyi hi ehleketaka ni ku endla swilo hayona. (Rhom. 12:​1, 2; Efe. 4:24) Hambiswiritano, loko hi ri karhi hi endla sweswo, hi fanele hi tsundzuka leswi: Ku hambana ni swiambalo leswi hi swi hungutaka kumbe ku swi engetela leswaku swi hi ringana, loko swi ta eka vumunhu lebyintshwa hi hina hi faneleke hi cinca mahanyelo leswaku hi kota ku byi ambala. Nakambe swa twala leswaku hi hina lava hi faneleke hi cinca, leswaku hi kota ku fikelela leswi Xikwembu xi swi languteleke eka hina.

TEKELELA DAVHIDA HI KU PFUMELELA YEHOVHA A KU SIRHELELA

14-15. Xana Yehovha u sirhelela vanhu vakwe hi tindlela tihi? (Pisalema 27:5) (Nakambe vona xifaniso .)

¹⁴ Ku engetela eka swakudya leswi hi swi kumaka eRitweni ra Xikwembu ni ku ambala vumunhu lebyintshwa, hi fanele hi sirheleriwa hi Yehovha leswaku hi kuma ntsako wa xiviri. Hi nga endla yini leswaku hi tshama hi ri karhi hi sirheleriwa hi Yehovha?

¹⁵ Hosi Davhida u vulavule hi ndhawu yo tumbela leyi Yehovha a hi nyikaka yona. (Hlaya Pisalema 27:5.) Yehovha u sirhelela vanhu vakwe eka munhu kumbe nchumu wun’wana ni wun’wana lowu nga dlayaka ripfumelo leri va nga na rona eka Yena. Xana Yehovha u ma sirhelela njhani malandza yakwe eka makhombo? U tshembisa leswaku a ku na tlhari leri nga ta va hlasela ri va hlula. (Ps. 34:7; Esa. 54:17) Hambileswi Sathana ni lava n’wi seketelaka va nga ni matimba, a va nge swi koti ku hi vavisa hilaha ku nga heriki. Hambiloko vo hi dlaya, Yehovha u ta hi pfuxa enkarhini lowu taka. (1 Kor. 15:​55-57; Nhlav. 21:​3, 4) Yehovha u tlhela a hi pfuna leswaku hi langutana ni swilo leswi hi vilerisaka, leswi nga hi vavisaka hilaha ku nga heriki. (Swiv. 12:25; Mat. 6:​27-29) Tata wa hina la nga ni rirhandzu u tlhela a hi nyika vamakwerhu lava hi seketelaka ni vakulu lava hi kongomisaka. (Esa. 32:​1, 2) Nakambe loko hi hlangana swin’we etidyondzweni, mikarhi yo tala hi tsundzuxiwa hi tindlela leti hi nga ti tirhisaka leswaku hi tshama hi ri karhi hi sirheleriwa hi Yehovha.—Hev. 10:​24, 25.

16. Xana Yehovha u n’wi sirhelele njhani Davhida?

¹⁶ Loko Davhida a yingise Yehovha, u n’wi sirhelerile eka khombo leri welaka vanhu lava dyohaka hi vomu. (Ringanisa Swivuriso 5:​1, 2.) Kambe loko se Davhida a nga ha yingisi milawu ya Xikwembu, a xi n’wi sirhelelanga eka vuyelo bya swiendlo swakwe. (2 Sam. 12:​9, 10) Ku vuriwa yini hi mikarhi leyi Davhida a xanisekeke hambileswi a a nga dyohanga? U khongerile, a phofulela Yehovha ta le mbilwini naswona Yehovha u endle leswaku a nga ha vileli ngopfu, hi ku va A n’wi tiyisekisa leswaku Wa n’wi rhandza swinene ni leswaku U ta n’wi khathalela.—Ps. 23:​1-6.

17. Hi nga n’wi tekelela njhani Davhida?

¹⁷ Hi nga tekelela Davhida hi ku va hi lavisisa switsundzuxo swa Yehovha loko hi endla swiboho. Nakambe hi fanele hi tsundzuka leswaku mikarhi yin’wana hi nga ha xaniseka ku nga ri hileswi Yehovha a tsandzekeke ku hi sirhelela kambe hikwalaho ka leswi hi endleke swiboho leswi nga riki swa vutlhari. (Gal. 6:​7, 8) Nakambe loko hi langutana ni miringo hambiloko hi nga dyohanga, hi nga khongela hi phofulela Yehovha ta le mbilwini hi ri karhi hi tshemba leswaku u ta rindza timbilu ni mianakanyo ya hina.—Filp. 4:​6, 7.

YANA EMAHLWENI U TIKARHATELA KU VA NI VUXAKA NI XIKWEMBU

18. Hi langutane ni tlhontlho wihi naswona hi nga endla yini leswaku hi ya emahlweni hi tikarhatela ku va ni vuxaka ni Xikwembu? (Nakambe vona swifaniso.)

¹⁸ Ndzimana ya hina ya lembe ya 2026 yi ri: “Va tsaka lava tikarhatelaka ku va ni vuxaka ni Xikwembu.” Sweswo i ntiyiso namuntlha ku tlula rini na rini. Hikwalahokayini? Hikuva hi hanya ni vanhu lava nga tsakangiki hileswi va alaka leswaku va fanele va va ni vuxaka ni Xikwembu. Kasi lava nga aliki va endla tano hi ku tirhisa tindlela ta vona vini to tanihi vukhongeri bya mavunwa kumbe mavonelo ya vanhu. I yini leswi nga hi pfunaka leswaku hi papalata langutelo ra vona? Hi ku va hi tiwundla hi swakudya leswi Yehovha a hi nyikaka swona leswi humaka eRitweni rakwe, hi ambala vumunhu lebyintshwa ni ku va hi lava vutumbelo eka Yena.