Yehovha A Nga Ku Pfuna Loko U Heleriwe Hi Ntsako

1-2. Xana Pawulo a a titwa njhani mikarhi yin’wana naswona ndlela leyi a a titwa hayona yi fana njhani ni leyi hina hi pfaka hi titwa hayona? (Varhoma 7:​21-24)

KU TA yini emiehleketweni ya wena loko u ehleketa hi muapostola Pawulo? Xana u ehleketa hi murhumiwa loyi a a ri na xivindzi, mudyondzisi loyi a nga ni vuswikoti kumbe wanuna loyi a tsaleke tibuku to tala ta Bibele? Loko ku ve u ehleketa hi sweswo, u be kona. Nilokoswiritano, mikarhi yin’wana Pawulo a a nga tsakanga, a a tivona nandzu ni ku tlhela a heleriwa hi matimba ku fana ni vo tala va hina.

² Hlaya Varhoma 7:​21-24. Eka papila leri Pawulo a ri tsaleleke Varhoma, u hlamusele ndlela leyi a a titwa hayona, ku nga leyi vo tala va hina hi titwaka hayona. Hambileswi a a ri Mukreste wo tshembeka, a ku ri ni tinyimpi leti a a ti lwa, ku nga ku lwisana ni ku endla swilo swo biha leswaku a ta endla ku rhandza ka Xikwembu. Ku engetela eka swilo leswi a swi n’wi karhata, Pawulo a a fanele a lwisana ni ku tivona nandzu hikwalaho ka swilo swo biha leswi a tshameke a swi endla ni hikwalaho ka xiphiqo lexi a xi tshamela ku n’wi karhata.

3. Hi ta bula hi yini eka nhlokomhaka leyi? (Nakambe vona “Nhlamuselo Ya Xiga.”)

³ Hambileswi a ku ri ni swilo leswi Pawulo a a fanele a lwisana na swona,a a nga swi pfumelelanga swi n’wi lawula. Eka nhlokomhaka leyi, hi ta bula hi swivutiso leswi: I yini leswi endleke Pawulo mikarhi yin’wana a tivula munhu wa “maxangu”? I yini leswi n’wi pfuneke a tshika ku ehleketa hi swilo leswi a swi n’wi heta matimba? Nakambe i yini leswi nga hi pfunaka loko hi heleriwe hi ntsako?

LESWI ENDLEKE PAWULO A KARHATEKA

4. I yini leswi endleke leswaku Pawulo a tisola?

⁴ Swilo leswi a tshameke a swi endla khale. Loko Pawulo a nga si va Mukreste, a a vitaniwa Sawulo naswona u endle swilo leswi hi ku famba ka nkarhi a tisoleke. Hi xikombiso, loko ku dlayiwa Stefano loyi a a tshembekile, Pawulo a a ri kona naswona u swi seketerile. (Mit. 7:58; 8:1) Nakambe u tlhele a rhangela eka tsima ro xanisa Vakreste hi tihanyi.—Mit. 8:3; 26:​9-11.

5. Xana Pawulo u titwe njhani hikwalaho ka swilo leswi a tshameke a swi endla?

⁵ Endzhaku ka loko muapostola Pawulo a ve Mukreste, mikarhi yin’wana a a tisola hikwalaho ka swilo leswi a tshameke a swi endla. Leswi a a xanisa Vakreste hi tihanyi, hi ku famba ka nkarhi sweswo swi nga endleka swi sungule ku n’wi karhata. Hi xikombiso, loko a tsalela Vakorinto papila ro sungula hi va-55 C.E, u te: “A swi ndzi faneli ku vuriwa muapostola, hikuva ndzi xanise vandlha ra Xikwembu.” (1 Kor. 15:9) Nakambe eka malembe ya ntlhanu lama landzeleke, loko a tsalela Vaefesa, u vule leswaku hi yena “lontsongo eka vakwetsimi hinkwavo.” (Efe. 3:8) Kasi loko a tsalela Timotiya, u vule leswaku khale “a [a] ri musandzi ni muxanisi ni murhuketeri.” (1 Tim. 1:13) Ehleketa ndlela leyi Pawulo a nga vaka a titwe hayona loko a vhakela vandlha leri ku nga na vanhu lava a tshameke a va xanisa kumbe maxaka ya vanhu lava a tshameke a va xanisa.

6. I yini swin’wana leswi a swi karhata Pawulo? (Nakambe vona nhlamuselo ya le hansi.)

⁶ Mutwa enyameni. Pawulo u fanise nchumu lowu a wu n’wi twisa ku vava swinene ni “mutwa enyameni.” (2 Kor. 12:7) Hambileswi muapostola loyi a nga swi boxangiki swilo leswi a swi n’wi karhata kambe xifaniso lexi a xi tirhiseke xi kombisa leswaku swilo leswi a swi n’wi twisa ku vava swi nga endleka a ku ri mavabyi kumbe swiphiqo swin’wana.b

7. Xana xidyoho lexi Pawulo a velekiweke na xona a xi n’wi endlisa yini? (Varhoma 7:​18, 19)

⁷ Swihoxo swakwe. Pawulo a a endla swihoxo. (Hlaya Varhoma 7:​18, 19.) Hambileswi Pawulo a a lava ku endla leswinene, mikarhi yin’wana a a nga swi koti ku endla tano hikwalaho ka xidyoho lexi a tswariweke na xona. U pfumerile leswaku nkarhi ni nkarhi a a endla swilo leswi a a nga lavi ku swi endla naswona leswi a a lava ku swi endla, a a nga swi endli. Nilokoswiritano, Pawulo u tirhe hi matimba leswaku a antswisa. (1 Kor. 9: 27) A swi kanakanisi leswaku a swi n’wi heta matimba loko a tlhela a endla swilo leswi a a nga lavi ku swi endla.

LESWI PFUNEKE PAWULO A TSHIKA KU TITWA A KARHATEKILE

8. Mapapila ya Pawulo ma kombisa yini hi ndlela leyi a swi lulamiseke hayona swihoxo swakwe?

⁸ Hilaha mapapila yakwe ma swi kombisaka hakona, Pawulo u anakanyisise hi ndlela leyi yena ku katsa ni vapfumerikulobye va nga lwisanaka ni xidyoho hi ku pfuniwa hi moya wa Xikwembu. (Rhom. 8:13; Gal. 5:​16, 17) Mikarhi yo tala, Pawulo a a hlamusela mikhuva kumbe ku navela ko biha loku Vakreste va faneleke va ku papalata. (Gal. 5:​19-21, 26) A swi kanakanisi leswaku Pawulo u anakanyisise hi ku tsana kakwe, a lava switsundzuxo eMatsalweni ni ku tlhela a kuma swilo leswi nga ta n’wi pfuna a lulamisa swihoxo swakwe. Hi nga tiyiseka leswaku Pawulo u xi tirhisile xitsundzuxo lexi a xi nyikeke van’wana.

9-10. I yini leswi pfuneke Pawulo leswaku a tlhela a tsaka? (Vaefesa 1:7) (Nakambe vona xifaniso.)

⁹ Hambileswi mikarhi yin’wana Pawulo a a hela matimba, a nga heleriwanga hi ntsako. Hi xikombiso, a swi n’wi tsakisa ku twa swiviko leswinene leswi humaka eka vanhu lava a a fambafamba na vona. (2 Kor. 7: 6, 7) A a tsaka loko a ri na vapfumerikulobye lava a va ri vanghana vakwe. (2 Tim. 1:4) Nakambe a a swi tiva leswaku Yehovha wa n’wi amukela. Sweswo a swi n’wi tsakisa ngopfu hikuva a a kota ku tirhela Xikwembu a ri na “ripfalo leri baseke.” (2 Tim. 1:3) Hambiloko a ha khomiwile eRhoma, Pawulo u khutaze vapfumerikulobye leswaku va ‘tsaka eHosini.’ (Filp. 4:4) Marito yakwe a ma nga swi kombisi leswaku u hetiwe matimba hikwalaho ka ndlela leyi a a titwa hayona. Swi le rivaleni leswaku loko Pawulo a heleriwa hi ntsako, a nga swi pfumelelanga sweswo swi n’wi lawula.

¹⁰ Pawulo u kote ku tlhela a va ni ntsako hikwalaho ka leswi a a tshemba leswaku nkutsulo a ku ri nyiko leyi a a nyikiwe yona hi ku kongoma. (Gal. 2:20; hlaya Vaefesa 1:7.) Hikwalaho ka sweswo, Pawulo a a tiyiseka leswaku Yehovha u n’wi rivalerile hi ku tirhisa Yesu Kreste. (Rhom. 7:​24, 25) Pawulo u kote ku endlela Xikwembu “ntirho wo kwetsima” a tsakile hambileswi a a endla swihoxo.—Hev. 9:​12-14.

11. Hikwalahokayini xikombiso xa Pawulo xi hi khutaza?

¹¹ Ku fana na Pawulo, na hina hi nga ha vona onge mikarhi hinkwayo ku ni swo karhi leswi hi lwisanaka na swona. Ku nga ha va leswi hi swi ehleketaka, hi swi endlaka kumbe hi swi vulaka. Na hina hi nga titwa hi hele matimba hikwalaho ka sweswo! Makwerhu waxisati Elizac loyi a ha riki muntshwa, u vula leswi hi swiphiqo swakwe: “Ndza khutazeka loko ndzi ehleketa hi xiyimo xa Pawulo. Swa ndzi chavelela ku tiva leswaku a hi mina ntsena ndzi titwaka hi ndlela leyi. Lexi i xitiyisekiso xa leswaku Yehovha wa swi tiva leswi vanhu vakwe va langutanaka na swona.” Ku fana na Pawulo, hi nga endla yini leswaku hi va na ripfalo leri baseke ni ku tlhela hi tsaka hambiloko hi hele matimba?

LESWI HI NGA SWI ENDLAKA LOKO HI HELE MATIMBA

12. Hi fanele hi endla yini nkarhi na nkarhi leswaku hi tsaka?

¹² U nga tshiki ku endla swilo leswi ku tshinetaka ekusuhi na Xikwembu. Loko hi endla tano, hi ta swi kota ku tshama hi tsakile. Ku fana ni leswi hi titwaka kahle emirini loko hi titoloveta ku dya swakudya leswi nga ni rihanyo, hi endla vutiolori nkarhi na nkarhi ni ku etlela tiawara leti ringaneke, hi ya hi tsaka loko nkarhi na nkarhi hi hlaya Rito ra Xikwembu, hi ya ensin’wini, hi lunghiselela, hi va kona etidyondzweni ni ku tlhela hi hlamula. Mitirho leyi, leyi khutazaka ya hi pfuna leswaku hi tsaka.—Rhom. 12:​11, 12.

13-14. Xana Vakreste van’wana vo tshembeka va vuyeriwe njhani hi ku va va nga tshiki ku endla swilo leswi va tshinetaka ekusuhi na Yehovha?

¹³ Twana ntokoto wa John, loyi ku kumekeke leswaku u ni muxaka wo karhi wa khensa leyi nga tolovelekangiki loko a ri ni malembe ya 39. Eku sunguleni, a a chuhile ni ku tlhela a karhateka swinene. A a tivutisa leswi: ‘Hikwalahokayini ndzi vabya ndza ha ri ntsongo?’ Hi nkarhi wolowo, xifanyetana xakwe a xo va ni malembe manharhu ntsena. I yini leswi n’wi pfuneke leswaku a titwa a antswa? U ri: “Hambileswi a ndzi karhele, a ndzi tiyiseka leswaku ndyangu wa hina wu tshama wu ri na vuxaka lebyinene na Yehovha. A hi nga xwi etidyondzweni, a hi ya ensin’wini vhiki ni vhiki, hi khoma vugandzeri bya ndyangu nkarhi na nkarhi hambiloko swi ndzi tikela ku hlela leswi hi nga ta swi endla.” Loko a ehleketa hileswi swi endlekeke, John u ri: “Endzhaku ka loko ku chuha ku herile, Yehovha u siva ku vilela loku u nga na kona, hi ku ku nyika matimba ni ku tlhela a ku rhandza. Yehovha u ta ku tiyisa hilaha a ndzi tiyiseke hakona.”

¹⁴ Eliza loyi hi buleke ha yena u ri: “Mikarhi hinkwayo loko ndzi ya etidyondzweni ni ku endla dyondzo ya munhu hi yexe, swi ndzi tsundzuxa leswaku Yehovha wa ndzi twa naswona wa ndzi rhandza swinene. Sweswo swi endla leswaku ndzi tsaka.” Nolan loyi a nga mulanguteri wa muganga eAfrika, u hlamusela leswi pfunaka yena ni nsati wakwe Diane, loko a ku: “A hi tshiki ku endla swilo leswi hi tshinetaka ekusuhi na Yehovha hambiloko hi hele matimba. Mikarhi hinkwayo Yehovha u swi veka erivaleni leswaku wa hi pfuna hi va ni langutelo lerinene. Hi titsundzuxa leswaku Yehovha u ta hi pfuna ni ku tlhela a hi katekisa hambileswi hi nga swi tiviki leswaku u ta swi endla njhani sweswo kambe ha swi tiva leswaku u ta swi endla.”

15. Swi nga lava hi endla yini leswaku hi tshika ku ehleketa hi swilo leswi nga tsakisiki? Kombisa.

¹⁵ Swi nga lava leswaku hi endla leswi engetelekeke leswaku hi tshika ku ehleketa hi swilo leswi nga tsakisiki. Hi xikombiso, a hi nge nhlana wa wena wa vava. I ntiyiso leswaku u fanele u fambafamba leswaku wu hola kambe u fanele u endla ni swin’wana swo tlula sweswo. Leswaku u tiva leswi endlaka nhlana wa wena wu vava, swi nga lava u endla ndzavisiso hambi ku ri ku vulavula na dokodela. Hilaha ku fanaka, swi nga lava hi endla ndzavisiso eBibeleni ni le ka minkandziyiso ya hina ni ku tlhela hi vulavula na Mukreste loyi a wupfeke leswaku hi ta tshika ku ehleketa hi swilo leswi nga tsakisiki. Xiya swiringanyeto swin’wana leswi engetelekeke leswi nga ku pfunaka.

16. U nga endla yini leswaku u tiva swilo leswi endlaka u karhateka? (Pisalema 139:​1-4, 23, 24)

¹⁶ Khongela eka Yehovha leswaku a ku pfuna u tiva leswi u swi lavaka. Hosi Davhida a a swi tiva leswaku Yehovha u n’wi tiva kahle. Hikwalaho, u kombele Yehovha leswaku a n’wi pfuna a tiva leswi a swi endla leswaku ‘miehleketo ya yena yi karhateka.’ (Hlaya Pisalema 139:​1-4, 23, 24.) Na wena u nga kombela Yehovha a ku pfuna u tiva leswi ku endlaka u karhateka ni ku twisisa ndlela leyi u nga swi hlulaka hayona sweswo. U nga tivutisa swivutiso swo fana ni leswi: ‘I yini leswi endlaka ndzi karhateka? Xana ndzi tshamela ku anakanya hi swilo leswi ndzi karhataka ematshan’weni yo hatla ndzi swi bakanya?’

17. U nga dyondza hi yini eka dyondzo ya munhu hi yexe leswaku u ehleketa hi swilo leswi khutazaka? (Nakambe vona xifaniso.)

¹⁷ Eka dyondzo ya wena ya Bibele ya munhu hi yexe, dyondza hi tinhlokomhaka leti fambisanaka ni xiyimo xa wena. Nkarhi ni nkarhi, swi ta ku pfuna ku dyondza hi vumunhu byin’wana bya Yehovha. Hi xikombiso, Muapostola Pawulo u vuyeriwile swinene hi ku va a anakanyisisa hi nkutsulo ni hi ndlela leyi Yehovha a rivalelaka hayona. Na wena u nga endla hilaha ku fanaka. Tirhisa Nkongomiso Wo Endla Ndzavisiso Wa Timbhoni Ta Yehovha, Watch Tower Publications Index kumbe minkandziyiso yin’wana leyi sekeriweke eBibeleni leyi nga kona hi ririmi ra wena leswaku u dyondza swo tala hi tintswalo ta Xikwembu, ku rivalela ni rirhandzu ra xona lerikulu. Loko u kume tinhlokomhaka leti ku pfunaka, ti tsale ehansi. Endzhaku ti veke endhawini leyi u nga ta ti vona naswona ti hlaye loko u titwa u nga tsakanga. Nakambe ringeta ku tirhisa leswi u swi hlayaka eka xiyimo xa wena.—Filp. 4:8.

18. I yini leswi vamakwerhu van’wana va dyondzaka ha swona leswi va voneke swi va pfuna?

¹⁸ Eliza loyi hi buleke ha yena u dyondze hi Yobo wa le Bibeleni eka dyondzo ya munhu hi yexe. U ri: “Xiyimo xa mina xa fana swinene ni xa Yobo. U langutane ni miringo hi ku landzelelana. Kambe a nga tshikanga ku tshemba Yehovha hambiloko swilo swi n’wi fambela ximatsi naswona a a nga swi tivi leswaku hikwalahokayini a weriwa hi maxangu.” (Yobo 42:​1-6) Diane loyi hi buleke hi yena, u ri: “Mina na nuna wa mina, eka dyondzo ya hina ya ndyangu hi dyondza buku leyi nge, Tshinela Eka Yehovha. Ha yi tlangela ndlela leyi Yehovha a hi vumbaka hayona ku fana ni vumba. Ematshan’wini yo hetiwa matimba hi swihoxo swa hina, hi ringeta ku vona Yehovha a ri karhi a hi vumba ni ku hi pfuna leswaku hi va vanhu vo antswa. Sweswo swi endla leswaku hi ya hi tshinela eka yena.”—Esa. 64:8.

LANGUTELA VUMUNDZUKU LEBYINENE

19. Xana mikarhi yin’wana hi nga titwa njhani kambe hi nga tiyiseka hi yini?

¹⁹ Hambiloko ho tirhisa swiringanyeto hinkwaswo leswi nga eka nhlokomhaka leyi, mikarhi yin’wana hi ta ti twa hi nga tsakanga ni ku tlhela hi karhateka. Hambiswiritano, hi ku pfuniwa hi Yehovha hi nga swi kota ku tshika ku titwa hi ndlela yoleyo. Hi nga tiyiseka leswaku hi ta tiphina hi ku va ni ripfalo leri baseke ni ku tlhela hi tiphina hi vutomi bya hina ni ku tirhela Yehovha hi tsakile.

20. Xana u tiyimisele ku endla yini?

²⁰ A hi tiyimiseleni ku ka hi nga lawuriwi hi swihoxo leswi hi tshameke hi swi endla khale, swiphiqo leswi hi langutanaka na swona kumbe ku tsana ka hina. Hi nga swi kota ku va ni ku rhula hi ku pfuniwa hi Yehovha. (Ps. 143:10) Hi wu langutele emahlweni nkarhi lowu hi nga ta tshama hi tsakile hi nga ha vilerisiwi hi nchumu ni ku tiphina hi ku tirhela Xikwembu xa hina Yehovha lexi nga ni rirhandzu!