Swi Vone Hi Tihlo Ra Mianakanyo Swilo Leswi U Hlayaka Ha Swona eBibeleni

Bibele yi vulavula hi timhaka to tala ta khale leti hi dyondzisaka timhaka ta nkoka. Loko hi vona swilo leswi hi hlayaka hi swona hi tihlo ra mianakanyo, hi ta kota ku swi twisisa kahle ni ku tlhela hi vuyeriwa. Xiya swiringanyeto swin’wana leswi nga ku pfunaka u vona leswi u swi hlayaka eBibeleni hi tihlo ra mianakanyo.

• Hlayela ehenhla. Loko u yi hlayela ehenhla Bibele u ta kota ku swi vona kahle hi mahlo ya mianakanyo swilo leswi u hlayaka ha swona. Loko mi hlaya Bibele mi ri hi ndyangu, mi nga endla leswaku mhaka leyi mi hlayaka hayona yi hanya hi ku va mi avelana swimunhuhatwa leswi mi hlayaka ha swona eka rungula rero.

• Swi vone hi tihlo ra mianakanyo swilo leswi u hlayaka ha swona. Ringeta ku twisisa ndlela leyi lava u hlayaka ha vona a va ehleketa ni ku titwa hayona. Hi xikombiso, tivutise leswi: ‘Hikwalahokayini munhu loyi a vulavule ni ku endla swilo hi ndlela leyi? Loko a ku ri mina a ndzi ta va ndzi ehlekete ni ku titwa njhani eka xiyimo xexo?’

• Dirowa. Ku dirowa swilo leswi u hlayaka ha swona eBibeleni swi ta ku pfuna leswaku u swi vona hi tihlo ra mianakanyo ni ku tlhela u swi tsundzuka, hambiloko leswi u swi dirohaka swi nga sasekanga.