Rungula Leri Humaka eRitweni Ra Xikwembu—Ntshembo Eka Lava Bohekeke Ku Baleka Emakaya Ya Vona!

Lembe ni lembe, vanhu va timiliyoni va boheka ku baleka emakaya ya vona. Xana na wena u langutane ni xiyimo lexi fanaka? Loko swi ri tano, a wu boheki ku langutana na swona u ri wexe. Xikwembu xi hi nyika ntshembo wa vumundzuku byo antswa naswona u nga dyondza swo tala ha wona eka Matswala yo Kwetsima.

Christos Stylianides ku nga murhangeri wa Nhlangano wa tiko ra Yuropaa u ri, “Vahlapfa ni vanhu lava bohekeke ku suka emakaya, a vo lava mpfuno wa hina wa xihatla ntsena kambe va lava ni ntshembo hi vumundzuku.”b Loko va ri ni ntshembo, swi ta va pfuna leswaku va va ni langutelo lerinene hi vumundzuku. A vo lava ntshembo ntsena kambe va tlhela va lava ni nchavelelo leswaku va kota ku hlakarhela.

“Loko ndzi boheka ku baleka etikweni ra ka hina ndzi siya ndyangu wa ka hina, ndzi titwe onge ndzi lahlekile. Ndzi titwe ndzi taleriwe hi ku chava, gome ni ku vilela.”— ku vula Emmanuel, wa le Haiti.

Xana u titwa hi ndlela leyi fanaka ni ya Emmanuel? Loko u baleke ekaya, a swi kanakanisi leswaku u lava ndhawu leyi u nga kumaka nchavelelo ni ntshembo. Xana Rito ra Xikwembu ku nga Bibele ri nga ku pfuna njhani?

Nchavelelo lowu humaka eRitweni ra Xikwembu

Bibele yi ri: “Yehovhac . . . u rhandza muluveri.”—Deteronoma 10:17, 18.

Bibele yi ri: “Yehovha u le kusuhi ni hinkwavo lava n’wi vitanaka.”—Pisalema 145:18.

Bibele yi ri: “Xikwembu xa ntiyiso a xi nge pfuki xi endle leswo homboloka . . . Lowa Matimba Hinkwawo a nga avanyisi hi ndlela yo biha.”—Yobo 34:10, 12.

Leswi swi vula ku Xikwembu a hi xona xi ku vangelaka maxangu. A xi nge ku xupuli kumbe ku ku ringa hi ku ku tikisela vutomi.

Ntshembo lowu humaka eRitweni ra Xikwembu

Bibele yi hi byela leswi Xikwembu xi nga ta hi endlela swona enkarhini lowu taka. Xiya ndlela leyi ntshembo lowu wu pfunaka vanhu lava balekeke emakaya ya vona.

Bibele yi ri: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona.”—Nhlavutelo 21:4.

Leswi swi vula leswaku ku xaniseka ku ta hela. Xikwembu xi tshembisa ku herisa swiphiqo hinkwaswo leswi nga kona namuntlha leswi nga endlaka hi heleriwa hi ntshembo.

“Ku nga ri khale Xikwembu xi ta herisa ku pfumaleka ka vululami ni swilo hinkwaswo swo homboloka leswi humelelaka sweswi. Ntshembo wu ndzi pfuna ku anakanyisisa hi nkarhi lowu maxangu hinkwawo ma nga ta hela.”— ku vula Karla, wa le El Salvador.

Bibele yi ri: “Swilo swa khale swi ta rivariwa, Naswona a swi nge he ti emiehleketweni.”—Esaya 65:17.

Leswi swi vula ku swilo swo vava leswi hi humeleleke khale a swi nge he ti emiehleketweni. Xikwembu xi ta tiyisekisa leswaku a wu nge he pfuki u karhatekile hi swilo swa khale leswi ku humeleleke.

“Bibele yi tshembisa leswaku a hi nge he tsundzuki ku vava ni ku lahlekeriwa loku hi tshameke hi langutana na kona. Ntshembo wu ndzi pfuna ku langutana ni swiyimo swo tika hikuva ndza swi tiva leswaku ku nga ri khale swilo hinkwaswo swi ta cinca.”—ku vula Natalia, wa le Ukraine.

Bibele yi ri: “Xikwembu xa le tilweni xi ta simeka mfumo . . . wu ta pfotlosa wu herisa mifumo leyi hinkwayo”—Daniyele 2:44.

Leswi swi vula ku mfumo wa le matilweni wu ta fuma laha emisaveni. Ku nga ri khale Xikwembu xi ta siva mimfumo hinkwayo ya vanhu hi mfumo wa xona wa le matilweni. Ehansi ka mfumo wa xona, vanhu hinkwavo va ta va va sirhelelekile, va ri ni ku rhula, ku ta va ni vululami naswona vanhu a va nge pfumali nchumu.—Mikiya 4:3, 4.

“Swa ndzi khutaza ku tiva ku swiphiqo swo fana ni ku khomiwa hi voko ra nsimbhi, xihlawuhlawu ni ku ehleketeleriwa swilo swo biha i swa nkarhinyana hikuva mfumo wa Xikwembu wu ta swi herisela makumu swiphiqo leswi.”—ku vula Mustafa, wa le Middle East.

Vutlhari lebyi humaka eRitweni ra Xikwembu

Vutlhari lebyi nga eBibeleni byi nga ku pfuna loko u ri karhi u langutana ni swilo swo biha leswi ku humeleleke. Byi nga tlhela byi ku pfuna u langutana ni ku cinca ka swiyimo swo fana ni ku lahlekeriwa hi nhundzu ya wena. Xiya ndlela leyi misinya ya milawu leyi landzelaka yi va pfunaka hayona lava bohekeke ku siya makaya ya vona:

Bibele yi ri: “Hikuva hambiloko munhu a ri ni swilo swo tala, vutomi byakwe a byi humi eka swona.”—Luka 12:15.

Ndlela leyi marito lawa ya vutlhari ma nga ku pfunaka hayona: Kumbexana u karhatekile swinene naswona wa vilela hikwalaho ka swilo swa wena leswi u swi siyeke endzhaku. Kambe loko u tinyika nkarhi u ehleketa, u ta swi xiya leswaku vutomi bya wena i bya nkoka ku tlula xin’wana ni xin’wana lexi ku lahlekeleke.

“Vutomi i bya nkoka ku tlula nchumu un’wana ni un’wana. Eka swiyimo swin’wana, mali kumbe swilo leswi u nga na swona a swi nge ku pfuni.”—ku vula Natalia, wa le Ukraine.

Bibele yi ri: “U nga vuli u ku, “Hikwalaho ka yini mikarhi ya khale a yi antswa ku tlula ya sweswi?””—Eklesiasta 7:10.

Ndlela leyi marito lawa ya vutlhari ma nga ku pfunaka hayona: Loko ku ve u langutane ni xiyimo xo tika swinene sweswi, papalata ku pimanisa xiyimo xa wena xa nkarhi wa sweswi ni xa nkarhi lowu hundzeke hikuva loko u endla tano swi ta ku tekela ntsako.

“Loko ndzi amukela xiyimo lexi ndzi nga eka xona sweswi, swi ta ndzi pfuna leswaku ndzi tshama ndzi ri ni langutelo lerinene.”— ku vula Eli, wa le Rwanda.

Bibele yi ri: “Loko hi ri ni swakudya ni swiambalo hi ta eneriseka hi swilo leswi.”—1 Timotiya 6:8.

Ndlela leyi marito lawa ya vutlhari ma nga ku pfunaka hayona: Ringeta ku eneriseka hi swilo leswi u nga na swona evuton’wini. Loko u eneriseka swi ta endla leswaku u nga vileli ku tlula mpimo.

“Bibele yi ndzi pfuna ndzi languta swilo hi ndlela leyinene naswona ndzi papalata ku dzikisa miehleketo ya mina eka swilo leswi ndzi lahlekeleke. Mina ni nsati wa mina hi tsakile hileswi hi nga endhawini leyi hlayisekeke naswona vutomi bya hina byi sirhelelekeke.”—ku vuka Ivan, wa le Ukraine.

Bibele yi ri: “Hikwalaho, swilo hinkwaswo leswi mi lavaka van’wana va mi endlela swona na n’wina mi fanele mi va endlela swona”—Matewu 7:12.

Ndlela leyi marito lawa ya vutlhari ma nga ku pfunaka hayona: Swi ta ku olovela ku hanyisana ni vanhu van’wana kahle loko u tikarhatela ku lehisa mbilu ni ku kombisa musa. Loko u endla tano swi ta endla leswaku vanhu va ku amukela naswona va ta papalata ku va ni xihlawuhlawu.

“Vanhu vo tala va tsaka loko u va komba xichavo, tintswalo ni rirhandzu. Loko u endla tano swi ta ku pfuna leswaku u hanyisana kahle ni vanhu va ndhawu leyi u balekeleke eka yona.”—ku vula Angelo, wa le Sri Lanka.

Bibele yi ri: “Kombelani Xikwembu hi xikhongelo leswaku xi mi pfuna, kutani ku rhula ka Xikwembu . . . ku ta rindza timbilu ta n’wina ni mianakanyo ya n’wina”—Vafilipiya 4:6, 7.

Ndlela leyi marito lawa ya vutlhari ma nga ku pfunaka hayona: Khongela eka Xikwembu u xi byela ndlela leyi u titwaka hayona, leswi u swi lavaka, leswi ku chavisaka ni leswi ku vilerisaka. Loko u endla tano swi ta ku pfuna leswaku u nga karhateki ngopfu naswona u ta tolovela kaya ra wena lerintshwa hi ku hatlisa.

“Ndzi khongela eka Xikwembu loko ndzi ri ni swiphiqo naswona xa ndzi hlamula. Leswi ndzi swi dyondzeke eBibeleni swi ndzi endle ndzi va ni ku rhula ka miehleketo.”—ku vula Yol, wa le South Sudan.

“Switsundzuxo leswinene leswi ndzi swi kumaka eBibeleni swi ndzi pfuna leswaku ndzi va ni ku rhula ka miehleketo leswi ndzi pfunaka leswaku ndzi kota ku langutana ni xiyimo lexi xo tika.”—ku vula Valentina, wa le Ukraine.

“Swa ndzi tiyisa ku tiva leswaku Yehovha Xikwembu u ndzi tshembisa vumundzuku lebyinene.”—ku vula Emmanuel, wa le Haiti

Xana u nga tsakela ku dyondza swo tala hi switshembiso swa le Bibeleni leswi nga ku chavelelaka swi tlhela swi ku nyika ntshembo ni leswaku hikwalaho ka yini hi fanele hi swi tshemba? Kombela ku endzeriwa mahala hi Timbhoni ta Yehovha. Va nga swi tsakela ku ku pfuna.