Vatirheli Va Mfumo Va Hlangavetana Ni Mphika-Makaneta

“Apolosi i ncini? Na Pawulo i ncini? I malandza ntsena lawa mi pfumeleke hi mhaka ya wona.”—1 VAKORINTO 3:5.

1. (a) Hi tlhelo ra vukhongeri, i yini lexi soriwaka namuntlha, naswona ha yini? (b) I mfumo wihi lowu xungetiwaka, naswona ku ta endleka yini ha wona?

MATIMBA ya vafundhisi va vukhongeri ma tlhontlhiwile namuntlha. Nkarhi na nkarhi, swi va hi ndlela leyi loko xirho xa politiki ya misava leyi xi Iwisana ni vukhongeri, ku katsa ni “Vukhongeri” bya Vukriste, xi byi languta tanihi bindzu ro lava ku vuyeriwa. Hambi ya ri mathwasani ya swikolo swa vukhongeri ma languteriwa ehansi tanihi vatirheli lava fanelekaka naswona ma yirisiwa ematikweni lama lwisanaka ni vukhongeri. Ina, mfumo wa misava wa vukhongeri byo hemba wa hohloka naswona wu xungetiwa hi nhlaselo wa misava hinkwayo lowu wu nga ta vula ku lovisiwa ka byona. Musunguri lonkulu wa vukhongeri bya ntiyiso u vhumbe leswi ivi a veka nkarhi wakwe lowu faneleke wa ku hetiseka ka vuprofeta byakwe. Swivumbiwa leswi hanyaka emisaveni hinkwayo swi ta pfuneka eka xiendlakalo lexi xo hlamarisa!

2. Malunghana ni vukhongeri, i yini lexi nga ta ya emahlweni naswona i yini lexi nga ta hela?

² Hambi swi ri tano, vuhedeni byi nga ka byi nga hambeti byi fuma misava, kambe Muvumbi la tlakusiweke wa misava hinkwayo u ta endla tano! Ina, naswona vukhongeri bya ntiyiso bya Xikwembu lexi nga fiki ni lexi Tlakukeke byi ta tshama byi ri kona! Hikwalaho ka mhaka yoleyo, hambi leswi tibiliyoni ta misava ti landzulaka timhaka teto, sweswi lava tirhisaka vugandzeri lebyi tengeke bya Xikwembu va hanya naswona va gingiriteka emisaveni. Naswona nhlamuselo leyi landzelaka ya malembe xidzana lama hundzeke i ya ntiyiso namuntlha: “Hikuva hi mpfhuka misava yi tumbuluka, leswi nga vonakiki swa Xikwembu, i matimba ya xona lama nga heriki ni vukwembu bya xona, swa vonaka swinene loko ku anakanyiwa mintirho ya xona; hikwalaho, va hava xo tilandzula hi xona.”—Varhoma 1:20.

3, 4. (a) Swi kombisiwa njhani leswaku Yehova u ni vatirheli emisaveni? (b) Hi swi tivisa ku yini leswaku vafundhisi va vukhongeri bya Babilona Lonkulu va ta heleriwa hi ntirho ku nga ri khale ke?

³ Loko marito wolawo ya tsariwa eka lembe xidzana ro sungula ra Nguva ya hina leyi Tolovelekeke, Yehova Xikwembu a a ri ni vatirheli vakwe emisaveni. Xisweswo muapostola Pawulo u swi kotile ku tsala a ku: “Apolosi i ncini? Na Pawulo i ncini? I malandza ntsena lawa mi pfumeleke hi mhaka ya wona; un’wana ni un’wana wa hina u tirha leswi Hosi yi n’wi nyikeke ku swi tirha. Mina ndzi byarile, Apolosi u cheletile; kambe Xikwembu hi xona xi miriseke.”—1 Vakorinto 3:5-9.

⁴ Nakambe Yehova u fanele ku va ni vatirheli emisaveni namuntlha. Kambe a nga tirhisi vafundhisi va vukhongeri bya Babilona Lonkulu, mfumo wa misava wa vukhongeri byo hemba. Entiyisweni, ku nga ri khale va ta heleriwa hi ntirho. Sweswo swi ta endleka loko Babilona Lonkulu hi byakwe a herisiwile. Loko yi vhumba leswi, Nhlavutelo 16:19 yi ri: “Muti lowukulu wu handzuka wu huma swivandla swinharhu, kutani miti ya vamatiko yi hindzimuka. Xikwembu xi tsundzuka Babilona, muti lowukulu, ku wu nwisa xinwelo xa vhinyo ya vukarhi lebyikulu bya xona.”

5. I yini lexi humeleleke eBabilona ya khale hi 539 B.C.E., naswona ku vuriwa yini hi vafundhisi ni vaseketeri van’wana va vukhongeri bya Babilona Lonkulu?

⁵ Manuku ke, ku vuriwa yini hi vanhu lava tshamaka va ri vanamarheli lava tshembekaka va mafambiselo ya vukhongeri lebyi tirheriwaka hi vafundhisi lava nga ni vuswikoti va Babilona Lonkulu ke? Kavula, xiya leswi humeleleke evusikwini byebyo bya 539 B.C.E. loko Hosi Belšatsar ni tihosana takwe leti rhambiweke va dzunisa swikwembu swa Babilona eka nkhuvo lowukulu wo Iwisana ni Vameda ni Vapersia lava va va rhendzeleke. Xo sungula, xitsundzuxo xi nyikiwe varhandzi va ntsako loko va vone voko leri tsalaka hi hlori erirhangwini ra holo ya nkhuvo naswona va twile nhlamuselo leyi nyikiweke hi Daniyele muprofeta wa Yehova. Manuku ke, loko Babilona yi wa evusikwini byebyo, hosi ni varhambiwa van’wana lava a va dzunisa swikwembu swa mavunwa va dlayiwile hi vahluri lava va va hlaseleke. (Daniel, Ndzima 5) Khombo leri fanaka ri rindzele vafundhisi ni lava va tshamaka va tshembekile eka mafambiselo ya vukhongeri bya Babilona Lonkulu.

Vatirheli Va Xikwembu Va Laveke Hi Xihatla

6. (a) Enkarhini lowu wo nonon’hwa, i yini lexi Xikwembu xi faneleke ku xi nyika ndyangu wa vanhu? (b) Minkarhi ya Vamatiko yi hele rini, naswona Yesu u vule yini ehenhleni ka leswi?

⁶ Ku hava ni un’we loyi hi laha ku twalaka a nga solaka mhaka ya leswaku sweswi hi hanya enkarhini lowu nonon’hwaka swinene wa matimu ya vanhu ku sukela eka Ndhambi ya misava hinkwayo ya siku ra Nowa. (2 Timotiya 3:1-5) Hikwalaho i swa nkoka leswaku sweswi ku va ni vatirheli va ntiyiso va Xikwembu xa Nowa. Hakunene, tanihi leswi Yehova a nyikeke vanhu va le nkarhini wa Nowa ni varhandzi va ntsako enkhubyeni wa Belšatsar exitsundzuxo, u fanele a vile ni rungula ra xihatla eka ndyangu wa vanhu ku sukela hi 1914, loko nyimpi yo sungula ya misava yi tlhekeka. Kahle-kahle, eka ndzinganyeto lowukulu wa le rivaleni, hi mune wa makume ya malembe malandza ya Xikwembu ya kombe eka lembe rolero tanihi leri funghaka ku hela ka Minkarhi ya Vamatiko, leyi Yesu a vulavuleke ha yona a ku: “Yerusalema u ta kandziyeriwa hi vamatiko ku kondza loko minkarhi ya vamatiko yi ta va yi herile.”—Luka 21:24, King James Version

7. (a) Yerusalema wa laha misaveni u kandziyeriwe ku fikela rini hi matiko lama nga riki ya Vayuda ke? (b) Eku heteleleni Yesu a a vula yini loko a vulavula hi ku ‘kandziyeriwa ka Yerusalema hi Vamatiko’ ke?

⁷ Malembe lama nga vaka 53 endzhaku ka 1914, kumbe ku fikela eka Nyimpi ya Masiku ya Tsevu ya 1967, Yerusalema wa laha misaveni u hambetile a kandziyeriwa hi matiko lama nga riki ya Vayuda. Hambi swi ri tano, swi le rivaleni leswaku eku heteleleni Yesu a a nga vulavuli hi Yerusalema wa Vayuda wa namuntlha kambe hi leswi muti wolowo wu swi yimeleke ku sukela hi 607 B.C.E. Kutani a wu yimela yini xana? Kunene, Mfumo wa Yehova Xikwembu ha Hosi yakwe leyi totiweke ya yindlu ya vuhosi ya Davhida!—Luka 1:32; 1 Tikronika 29:11.

8. I mani loyi Yehova a a ta n’wi nyika mfumo wa Davhida, naswona hikwalaho ka yini vanhu a va nga ta swi kota ku vona ku vekiwa loku vhumbiweke ka le xiluvelweni?

⁸ Yesu Kriste a a ri yena loyi Yehova Xikwembu a a ta n’wi nyika mfumo wa kokwa wakwe Davhida wa khale. Loko a ri emahlweni ka Pilato tanihi muavanyisi, Yesu u vule leswaku Mfumo Wakwe a wu nga ri wa misava leyi, leswi swi vulaka leswaku a wu ta va wa le tilweni. (Yohane 18:36) Manuku ke, entiyisweni ku vekiwa ka nkarhi lowu taka ka Yesu eMfun’weni eku heleni ka Minkarhi ya Vamatiko a ku ta endleka ematilweni lama nga vonakiki. Xisweswo ku vekiwa kakwe exiluvelweni a ku nga ta vonaka ematihlweni ya vanhu, naswona hi yona mhaka leyi hina kumbe matiko ya Vamatiko hi nga n’wi vonangiki hi ku kongoma loko a vekiwa eMfun’weni wakwe lowu n’wi kongomeke, lowu a wu nyikiweke hi Xikwembu hi 1914. Matiko wolawo hakunene a ya swi pfumelanga leswaku xiendlakalo lexi xi humelerile, ku nga khathariseki mhaka ya leswi xi huweleriweke hi vanhu va Yehova ku sukela hi va-1870.

9. (a) I yini lexi matiko ya xi endleke handle ko khathalela rungula ra Mfumo? (b) Hikwalaho ka leswi matiko ya swi endleke hi 1914, i yini lexi xi veke xa nkoka?

⁹ Handle ko khathalela rungula ra Mfumo, hi xixikana xa 1914 matiko ma sungule ku himpfilitana enyimpini. Hi laha swi vhumbiweke eka Psalma 2:1-12, ya tikombise ya ri valala va Yesu, ya ala ku “tswontswa” Hosi leyintshwa leya ha ku vekiwaka tanihi xikombiso xa ku titsongahata ni ku tshembeka ka wona. Kutani ke, swi ve swa nkoka ku hetisisa Psalma 110:1, 2, laha hi hlayaka leswi: “Yehova u te ka hosi ya mina: ‘Ṭhamisa e v̌okweni ra mina ra šinene, Nḍi ko nḍi endla la’v̌a nga v̌alala e ka wena e v̌unav̌elo bya mikonḍo ya wena.’ Yehova o ta ṭhambuluta hi le Sion e nhonga ya matimba ya wena: Tlhoma ku fuma ka wena e šikari ka v̌alala v̌a wena.”

10. (a) Yesu u sungule ku fuma hi 1914 ehansi ka swiyimo swihi xana? (b) I vamani lava a va yimela Yehova eka lembe xidzana ra vu-20?

¹⁰ Vakaneti va Vayuda va kombisile vulala bya vona eka vaapostola va Yesu loko Yesu a tshame evokweni ra xinene ra Xikwembu leswaku a rindzela nkarhi wo sungula ku fuma exikarhi ka valala va yena. (Mintirho 4:24-26) Hi ku fanana, a ku ri exikarhi ka valala laha Yesu la kwetsimisiweke a sunguleke ku fuma ka yena eku heleni ka Minkarhi ya Vamatiko hi 1914. Xisweswo eka lembe xidzana leri ra vu-20, tanihi le ka nkarhi lowu hundzeke, ku vile exikarhi ka valala laha Yehova a veke ni vatwarisi va rungula ra yena, vatirheli vakwe va ntiyiso va Mfumo. I timbhoni ta yena.—Esaya 43:10-12.

Ku Lwela Ku Faneleka Ka Hina Tanihi Vatirheli

11. I vamani lava soleke ku simekiwa ka Timbhoni ta Yehova tanihi vatirheli va Mfumo lava vekiweke hi Xikwembu xana?

¹¹ Nkarhi hinkwawo, swi vile swa nkoka eka vatirheli va ntiyiso va Mfumo lava vekiweke hi Xikwembu ku Iwela ku fanelekela ka vona vutirheli. Hakunene sweswo swi vile ntiyiso hi Timbhoni ta Yehova eka lembe xidzana leri ra vu-20. Ku faneleka ka vona tanihi vatirheli lava vekiweke va Xikwembu ku soriwile ni ku languteriwa ehansi. Hi vamani xana? Ngopfu-ngopfu hi mathwasani ya xikolo xa vufundhisi xa Vujagana lava amukelaka papila ra vumbhoni ra ku vekiwa ni ku va vafundhisi lava hakeriwaka. Va tivona va ri lava dyondzekeke khwatsi ni lava va faneriwaka hi ku va vatirheli lava nga ni vuswikoti lebyi heleleke va Xikwembu xa Bibele.

12. I ku vekiwa ka Mukriste wihi la tivekaka wa lembe xidzana ro sungula loku soriweke, naswona munhu loyi a tisaka mahungu lamanene lama hambaneke a a fanele ku langutiwa njhani?

¹² Xiyimo a xi ri lexi fanaka eka lembe xidzana ro sungula C.E. Eka xifundza-nkulu xa Rhoma xa Galatiya, hambi a ri mutsari la huhuteriweke wa hafu ya tibuku ta Matsalwa ta Xigriki ya Vukriste u hlangavetane ni xiendlakalo lexi soleke ku faneleka ka yena tanihi muapostola wa Yesu Kriste, hikuva xi sorile ntiyiso wa leswi a swi dyondzisa tanihi Vukriste. Hikwalaho u boheke ku byela Vagalatiya a ku: “Ma ndzi hlamarisa: Hi nkarhinyana wu nga ri wungani, mi fularhele loyi a mi vitaneke hi tintswalo ta Kriste, kutani mi tsutsumela eka Evangel! yin’wana. Kasi Evangel! yin’wana ku hava. Ndzi vula leswi hikuva ku na van’wana lava mi pfilunganyisaka tinhloko, lava ringetaka ku soholota Evangeli ya Kriste. Kambe hambi loko hina kumbe ntsumi yo huma etilweni yi nga tshuka yi mi dyondzisa evangeli yin’wana ehandle ka leyi hi tshamaka hi mi dyondzisa yona, mudyondzisi wo tano a a rhukaniwe.”—Vagalatiya 1:6-9.

13. Hikwalaho ka yini Vagalatiya va fanele va nga ma solanga matimba ya Pawulo?

¹³ I ntiyiso, mutsari yoloye, muapostola Pawulo, eku sunguleni tidyondzo ta Vukriste a nga ti dyondzanga hi ku kongoma eka Yesu Kriste kumbe vaapostola Vakwe va 12. Endzhakunyana, Pawulo u hetile nkarhinyana na muapostola Petro, kumbe Kefa. (Yohane 1:42; Vagalatiya 1:18, 19) Kambe ku lwela ku faneleka ka yena tanihi mutirheli wa mahungu lamanene lama humaka eka Xikwembu ha Kriste, Pawulo u swi kotile ku byela Vakriste lava nga tiyangiki va Galatiya a ku: “Hikokwalaho, Yakobo, na Kefa, na Yohane, lava langutiwaka va ri vona vafambisi va kereke, va wu vonile nkateko lowu Xikwembu xi ndzi nyikeke wona, kutani va hi khome hi xandla, mina na Barnaba, ku fungha ku tirhisana ka vona na hina: Hina hi ta ya eka vamatiko, vona va ya eka lava yimbeke.” (Vagalatiya 2:9) Hikwalaho Vagalatiya volavo va fanele va tivutisile va ku: Loko vaapostola va Yesu, ku nga Petro, Yakobo, na Yohane va xiyile Pawulo tanihi mutwarisi wa mahungu lamanene ya ntiyiso, hi xihi xisekelo lexi hi nga na xona xo sola rungula rakwe ni ku ri sukela ke?

14. Hikwalaho ka yini swi nga hlamarisi leswi xiyimo xa ntirho wa Timbhoni ta Yehova xi soriwaka?

¹⁴ Kambe xana ku vuriwa yini hi vanhu va Yehova namuntlha? Ee, tanihi leswi munhu wo fana na Pawulo a bohekeke ku Iwela timfanelo takwe tanihi mutirheli wa Xikwembu na Kriste, hikwalaho ka yini hi fanele ku hlamarisiwa loko hina, tanihi timbhoni leti ti tinyiketeke, leti khuvuriweke ta Yehova, hi soriwa naswona hi fanela ku lwela xiyimo xa hina tanihi vatirheli va Mfumo ke? Kavula, tanihi le mhakeni ya Pawulo, ku soriwa ko tano ka hina loku nga hava xisekelo a ku kombi nchumu.

Hambi A Ri Yesu U Soriwile

15. I mani, loyi a tlakukeke ku tlula vaapostola, loyi na yena a soriweke malunghana ni matimba yakwe ya ku dyondzisa, naswona xana u te matimba yakwe a ya huma eka mani?

¹⁵ Hosi Yesu Kriste hi byakwe u soriwile naswona u kongomane ni ku ala ka vanhu va ka vona ku n’wi amukela tanihi mutirheli la fanelekaka wa Xikwembu. Hi xikombiso, ha hlaya: “Loko nkhuvo [wa mitsonga] wu ri xikarhi, Yesu a tlhandlukela eTempeleni a sungula ku dyondzisa. Vayuda va hlamala, va ku: “Xana munhu loyi u byi kuma kwihi vutivi, kasi a nga dyondzanga?” Yesu u hlangavetane ni mphika-makaneta yoleyo hi ku kongoma, a ku: “Dyondzo leyi ndzi mi dyondzisaka a hi ya mina, kambe i ya Loyi a ndzi rhumeke. Loko munhu a navela ku endla ku rhandza ka Xikwembu, u tiva loko dyondzo leyi yi huma eka Xikwembu, kumbe loko ndzi tivulavulela swa mina ntsena? Loyi a vulavulaka hi ku tisungulela, u tilavela ku dzunisiwa, kasi loyi a lavaka ku dzunisa loyi a n’wi rhumeke, u tshembekile, kutani ku hava ku homboloka eka yena.”—Yohane 7:14-18.

16. Hikwalaho ka yini varhangeri va vukhongeri bya Vayuda va titwe va ri ni xisekelo xo sola vuswikoti bya Yesu byo dyondzisa?

¹⁶ Varhangeri va vukhongeri va Vayuda va langute Yesu Kriste tanihi Mugaleliya la nga pfuniki nchumu. Kavula, a va swi ehleketangi leswaku a a nga ta swi kota ku hlaya hikwalaho ka leswi a a nga dyondzangi xikolo, ngopfu-ngopfu swin’wana swo fana ni xikolo xa vufundhisi. Tsundzuka, Yesu ana se a a kombise leswaku a nga swi kota ku hlaya ndzima ya Matsalwa ya Xiheveru. (Luka 4:16-21) Lexi xi tikombeke xi nga amukeleki eka Vayuda vo tano va le Yudiya ni va le Yerusalema a ku ri leswaku khale ka muvatli loyi a a nga ri mufundhisi naswona a a nga ta xaxametiwa na vona vatsari, Vafarisi, ni Vasaduki va tiko ra vona. Manuku ke, hikwalaho ka yini a tiendla onge u tiva leswi Matsalwa ya Xiheveru ya vulaka swona ni ndlela leyi ya tirheke ha yona, a vulavula hi matimba yo tano hi laha a endleke ha kona ke? Leswi hi swona leswi endleke leswaku Vayuda lavaya va pfala tindleve etlhelweni ra swa moya leswaku va nga twi mpfumawulo wa ntiyiso wa Xikwembu. A va tikurisa ngopfu lerova va nga amukela leswi humaka eka munhu loyi a nga yangiki exikolweni xa vufundhisi.

‘A a Dyondzisiwe Hi Yehova’

17. Mayelana na Yesu Kriste, varhangeri va vukhongeri bya Vayuda va honise Mudyondzisi wihi, naswona Yesu a ri mudyondzi wa muxaka muni?

¹⁷ Vayuda volavo va tlhariheke va misava va honise Munhu loyi hakunene a a dyondzisa Yesu Kriste. Ee, vutshila bya Yesu Kriste hi byakwe tanihi mudyondzisi a byi huma eka Yehova Xikwembu, “mudyondzisi lonkulu eka hinkwavo!” (Yobo 36:22, Today’s English Version) Loko a vulavula hi Xikwembu exivandleni lexi, Yesu u te: “Loko mi ta va mi tlakusile N’wana-wa-Munhu, hi kona mi nga ta tiva leswaku ‘Mina ndzi yena.’ Naswona mi ta tiva leswaku a ndzi endli nchumu hi ku tirhandzela ka mina, kambe ndzi vula swilo leswi hi laha Tatana a ndzi dyondziseke ha kona.” (Yohane 8:28) Hikwalaho Yesu u tikombe a ri munhu lonene exikolweni xa misava hinkwayo xa Mudyondzisi la tlakukeke loyi a nga kona. Loku a ku ri ku dzuneka loku yaka eka Munhu loyi a n’wi dyondziseke. A swi hlamarisi leswi Vanazareta va vulavuleke hi khale ka munhu wa doroba ra ka vona va ku: “Xana vutlhari lebyi ni mintirho ya matimba u swi kume kwihi ke?”—Matewu 13:54.

18. (a) I mudyondzisi wa njhani loyi hi fanelaka ku n’wi lava? (b) Yesu u te yini malunghana ni Mudyondzisi lonkulu ni lava va dyondzisiweke hi Yena?

¹⁸ Leswaku hi twisisa Bibele, hi lava mudyondzisi la antswaka swinene. Naswona mudyondzisi yoloye i Muhuhuteri wa Buku yoleyo leyi nga ringanisiwiki. Loko a vulavula ni lava a va ri swirho swa nhlengeletano leyi vonekaka, ya laha misaveni ya Mudyondzisi yoloye enkarhini wa vutomi byakwe emisaveni, Yesu u te: “A ku na munhu la nga taka ka mina, loko a nga kokeriwi hi Tatana la ndzi rhumeke, kutani mina ndzi ta n’wi pfuxa hi siku ra makumu. Ku tsariwile etibukwini ta vuprofeta, va ku: ‘Hinkwavo va ta dyondzisiwa hi [Yehova].’ Un’wana ni un’wana la tweke Tatana ni ku dyondza eka yena, wa ta eka mina.” (Yohane 6:44, 45) Kwalaho Yesu a a tshaha Esaya 54:13, leyi nge: “V̌ana v̌va wena v̌va šinuna hikwav̌o v̌a ta v̌a vadyonḍisiwa v̌a Yehova, ku rula ka v̌ona ku ta v̌a lo’kukulu.”

19. I ‘vana va mani va xinuna’ lava a va ta dyondzisiwa hi Yehova?

¹⁹ Hambi swi ri tano, hi nga vutisa hi ku: I ‘vana va mani va xinuna’ lava a va ta va “v̌adyonḍisiwa v̌a Yehova” ke? Xitshembiso xexo xa vuprofeta a xi endliwe eka “wansati” wo fanekisela, loyi a a ta va mana wa ‘vana vo karhi va xinuna,’ kumbe vana. ‘Wansati loyi’ hi yena loyi ku vulavuriwaka ha yena eka Esaya 54:1, laha ku vuriweke leswi: “Huwelela hi ku ṭaka, wena mhika l’a nga v̌elekangiki. Ṭaka, u ṭaka ngopfu, wena l’a nga siki lumiwaka e ku v̌elekeni! Hikuv̌a v̌ana v̌a l’a ṭhikiweke v̌a tele ku tlula v̌ana v̌a l’a tekiweke, ku v̌ula Yehova.”

20. Hikwalaho ka 2 Vakorinto 13:5, Vakriste lava tinyiketeke va fanele ku hambeta va endla yini, naswona i ndzhwalo wihi lowu leswi swi nga na wona eku fanelekeni ka vona tanihi vatirheli va Mfumo?

²⁰ Leswi Yehova a nga Yena la vulavulaka ni ‘wansati loyi’ ni leswi a faneleke ku va Mudyondzisi wa ‘vana vakwe va xinuna,’ u fanele a ri Nuna wakwe wo fanekisela, naswona yena u fanele ku va nhlengeletano yakwe ya le tilweni leyi fanaka ni wansati. ‘Vana vakwe va xinuna,’ kumbe vana, i swichudeni swa “mudyondzisi lonkulu eka hinkwavo.” Kavula, i swa nkoka leswaku ‘vana volavo va xinuna,’ valandzeri lava totiweke va Yesu, ni vanghana va vona va “ntshungu lowukulu,” va hambeta va tirhisa dyondzo leyi nyikeriweke hi Yehova. (Nhlavutelo 7:9) Yoleyo hakunene i ndlela yin’we yo khathalela xitsundzuxo xa Pawulo lexi nge: “Yanani emahlweni mi tikamba, ku vona loko ma ha ri eku pfumeleni; yanani mahlweni mi tikamba.” (2 Vakorinto 13:5) Loko Vakriste lava tinyiketeke, lava khuvuriweke va hambeta va endla leswi ni ku tshama va ri swichudeni leswi gingiritekaka swa Mudyondzisi lonkulu, va fanele ku va ni mfanelo leyi lavekaka tanihi vatirheli va Mfumo lava vekiweke hi Yehova. Nkarhi lowu taka hi ta vona ndlela leyi vatirheli va Xikwembu va kombisaka ku faneleka ka vona ha yona.

U Nga Ku Yini?

◻ U nga kombisa njhani leswaku Yehova u ni vatirheli emisaveni?

◻ l yini lexi a xi yimeriwa hi Yerusalema loyi a ‘kandziyeriweke hi Vamatiko’?

◻ Hikwalaho ka leswi matiko ya honiseke Mfumo, i yini lexi Yesu a a fanele ku xi endla?

◻ Hikwalaho ka yini swi nga hlamarisi leswi xiyimo xa ntirho wa Timbhoni ta Yehova xi soriwaka?

◻ I yini lexi honisiweke hi varhangeri va vukhongeri bya Vayuda lava soleke vuswikoti bya Yesu byo dyondzisa?

[Xifaniso eka tluka 9]

Hi laha Yehova a n’wi tirhiseke ha kona Daniyele ku tsundzuxa varhandzi va ntsako enkhubyeni wa Belšatsar, hikwalaho U ni vatirheli lava nyikelaka rungula ra xihatla namuntlha

[Xifaniso eka tluka 11]

Varhangeri va vukhongeri a va tikurisa ngopfu lerova va nga n’wi amukeli Yesu Kriste tanihi mutirheli wa Xikwembu