Malandza Ya Vutirheli I Nkateko Eka Vanhu Va Yehova
“Naswona, a va rhange hi ku kambiwa, kutani loko va tikomba leswaku va hava xisandzu, va nga tirha ntirho wa vona wa vatirheli ekerekeni.”—1 TIMOTIYA 3:10.
1. I vamani lava pfunetaka ku tiyisa ntsako ni vun’we bya bandlha?
YEHOVA i ‘Xikwembu lexi tsakeke,’ naswona u lava leswaku malandza ya yena ya va lama tsakeke. (1 Timotiya 1:11) Emhakeni leyi, u lunghiselele vakulu ni malandza ya vutirheli leswaku va va nkateko eka vanhu vakwe. Vavanuna lava va nga ni vutihlamuleri va hetisisa swikombelo leswi pfunaka naswona va pfuna ku tiyisa ntsako, vun’we, ni ku tirha lokunene ka bandlha ra Vukriste. Timbhoni ta Yehova ti wu tlangela swonghasi ntirho wa rirhandzu ni lowu pfunaka lowu nyikeriwaka hi vahlawuriwa lava exikarhi ka nhlengeletano ya Xikwembu ya le tilweni!
2. I langutelo rihi leri vakulu ni malandza ya vutirheli va faneleke ku va na rona, kambe i yini lexi nga fanelangiki ku va lahlekela?
2 Hambi swi ri tano, ku nga khathariseki munyikelo wa nkoka lowu vakulu ni malandza ya vutirheli va wu endlaka ebandlheni, a va fanelanga ku kurisa ntikelo wa vona vini. Va fanele ku tsundzuka leswaku Yesu Kriste u khutaze valandzeri vakwe leswaku va titsongahata. U tshama a va byela a ku: “Loyi a titsongahataka ku kotisa n’wana loyi, hi yena la nga lonkulu eMfun’weni wa matilo.” (Matewu 18:4) Mudyondzisiwa Yakobo na yena u tsarile: “Titsongahateni emahlweni ka [Yehova], kutani [yena u] ta mi tlakusa.” (Yakobo 4:10; Varhoma 12:3) Kambe ku va ni langutelo ro titsongahata a swi lavi swona leswaku vavanuna lava va langutela ntikelo wa ntirho wa vona ehansi tanihi vakulu ni malandza ya vutirheli. Va nga titsongahata ivi va tama va ha rhangela etimhakeni ta ntirho. A va fanelanga ku lahlekeriwa hi swikongomelo leswi pfunaka leswi hetisisiwaka hi ntirho wa vona, kambe minkarhi hinkwayo va fanele va tsundzuka ndzhwalo wa vona, eka Yehova kun’we ni le ka vamakwavo va Vukriste, wo endla leswi va nga swi kotaka leswaku va hetisisa mindzhwalo ya vona.
3. Ntirho lowu hlanganeke exikarhi ka Timbhoni ta Yehova wu nga ringanisiwa na yini, naswona vavanuna lava tinyiketeke va nga kurisa vun’we byo tano ni ku ya emahlweni ka timhaka ta Mfumo hi ndlela yihi?
3 Ntirho lowu hlanganeke exikarhi ka Timbhoni ta Yehova namuntlha wu nga ringanisiwa ni vun’we lebyi nga kona emirini wa munhu. Entiyisweni, muapostola Pawulo u fanise miri wa Kriste wa moya ni miri wa munhu lowu endliweke hi swirho swo tala. Hambi swi ri tano, swirho hinkwaswo swa miri swa tirhelana. (1 Vakorinto 12:12-31) Naswona, hakunene vakulu ni malandza ya vutirheli lama hlawuriweke i nkateko eka vanhu va Yehova, hikuva vavanuna lava va yisa ntirho wa vun’we wa bandlha ra Vukriste emahlweni namuntlha. (Ringanisa Vakolosa 2:18, 19.) Swirho swa xinuna leswi tinyiketeke swa bandlha leswi tikarhatelaka ku seketela lunghiselelo ra nhlengeletano ya Yehova hi ku ‘fanelekela xikhundla xa mulanguteri’ swi endla munyikelo wa nkoka eka vun’we bya Vukriste ni ku ya emahlweni ka timhaka ta Mfumo. (1 Timotiya 3:1) Xo sungula, kasi wanuna wa Mukriste u faneleka njhani ku va nandza wa vutirheli?
“Va Rhange Hi Ku Kambiwa”
4. (a) Hikwalaho ka yini malandza ya vutirheli ya nkarhi lowu taka ya fanele ku ‘rhanga hi ku kambiwa’ ke? (b) Vavanuna lava va fanele ku tsakela ku endla yini?
4 Muapostola Pawulo u byele Timotiya mutirhi-kulobye leswi a swi laveka emahlweni ka ku va vavanuna va hlawuriwa tanihi malandza ya vutirheli. Exikarhi ka swilo swin’wana, Pawulo u tsarile a ku: “Naswona, a va rhange hi ku kambiwa, kutani loko va tikomba leswaku va hava xisandzu, va nga tirha ntirho wa vona wa vatirheli.” (1 Timotiya 3:10) Leswi a swi ta sivela ku hlawuriwa ka vavanuna lava nga fanelekiki, lava va nga fikeleriki swilaveko swo karhi swa masungulo swa Matsalwa. A swi ta tlhela swi pfumelela nkarhi wo kambisisa minsusumeto ya malandza ya vutirheli ya nkarhi lowu taka. Hakunene, vavanuna lava a va fanelanga ku susumetiwa hi ku navela ku kuma xikhundla, hikuva sweswo a swi ta kombisa ku kayivela ka vutitsongahati. Kambe ke, hi ku xiya mhaka ya leswaku ku tinyikela ka Mukriste eka Xikwembu a ku tiseketelanga hi swiyimo ni hinkwaswo leswi katsekaka, makwerhu wa xinuna u fanele ku rhandza ku tirha exivandleni xihi ni xihi lexi Yehova a vonaka swi fanela ku n’wi tirhisa eka xona enhlengeletanweni Yakwe. Ina, malandza ya vutirheli ya nkarhi lowu taka ya fanele ku rhandza ku tirhela hi laha Esaya la tshembekaka a endleke ha kona, la nga te: “Hi mina loyi, nḍi rume.”—Esaya 6:8.
5. (a) I swilaveko swihi swa malandza ya vutirheii leswi andlariweke eka 1 Timotiya 3:8? (b) Xana swi vula yini ku va la “chavisekaka”? (c) Pawulo a a vula yini loko a ku malandza ya vutirheli a ya fanelanga ku va ni “milomu mimbirhi” ke?
5 “Vatirheli ekerekeni na vona va fanela ku va lava chavisekaka, va nga vi na milomu mimbirhi, va nga tinyiketi ebyalweni, va nga vi na makwanga yo lava ku vuyeriwa,” ku hlamusele Pawulo. (1 Timotiya 3:8) Hambi leswi hi xiringaniso malandza man’wana ya vutirheii ma nga ha vaka ya ha ri mantsongo, a hi vantshwa naswona ya fanele ku va lama “chavisekaka.” Ya fanele ya dyondze ku languta timhaka ta nkoka hi vukheta. (Ringanisa Swivuriso 22:15.) Va fanele ku va lava tshembekaka ni lava va nga ni vukheta, va nga vi vavanuna lava voyameleke eku tekeni ka vutihlamuleri hi ku olova. Kunene, va fanele ku va lava tshembekaka, lava tekaka mindzhwalo ya vona hi matimba. Hikwalaho ke, i yini lexi nga vaka xa nkoka swinene ku tlula ntirho lowu hlawulekeke lowu yaka eka Yehova ke? I mhaka ya vutomi ni rifu—eka vona ni le ka van’wana. (Ringanisa 1 Timotiya 4:16.) Ku tlula kwalaho, loko a vula leswaku malandza ya vutirheli a ya fanelanga ku va ni “milomu mimbirhi,” Pawulo a vula leswaku a va fanele ku va lava kongomeke ni lava va nga ni ntiyiso, va nga hlevi, va nga kanganyisi, kumbe ku xisa.—Swivuriso 3:32.
6. Hi tihi tindlela tin’wana leti malandza ya vutirheli ya faneleke ku kombisa ku ringanisela ha tona?
6 Ku ringanisela lokunene ka boha evuton’wini bya munhu hi xiyexe bya vavanuna lava fanekelaka ku va malandza ya vutirheli. Swi le rivaleni leswaku Pawulo a vula leswaku va fanele ku papalata vudakwa, makwanga, ni ku nga tshembeki loko a vula leswaku a va fanelanga ‘ku tinyiketela ebyalweni’ kumbe ku va ni “makwanga yo lava ku vuyeriwa.” Vavanuna lava va Vukriste va fanele ku tlhela va papalata ku nyika miehleketo ya leswaku va tsakela mintsako kumbe swilo leswi vonekaka ku tlula mpimo. Minkarhi hinkwayo va fanele ku tikarhatela ku rhangisa timhaka ta moya evuton’wini. Leswi swi ta va pfuna ku hlayisa “ripfalo leri tengeke” emahlweni ka vanhu-kulobye, nchumu wa nkoka swinene, emahlweni ka Xikwembu.—1 Timotiya 3:8, 9.
7. (a) Hikwalaho ka yini ku nga vuriwaka leswaku mindzhwalo ya malandza ya vutirheli a yi nyikiwi swihlangi? (b) Mhaka ya ku va nandza wa vutirheli a nga tekanga yi nga hlavutela yini ha yena?
7 Mindzhwalo yo tika leyi rhwexiwaka malandza ya vutirheli a yi nyikiwi swihlangi. Vavanuna lava ku vulavuriwaka hi vona eMatsalweni tanihi lava va nga ni malembe lawa ha wona va nga kotaka ku teka ni ku va ni ndyangu. Ehansi ka swiyimo swo tano, va fanele ku “fambisa vana va vona ni ndyangu wa vona swinene.” (1 Timotiya 3:12) Kambe xana leswi swi vula leswaku jaha ri nga ka ri nga hlawuriwi ku va nandza wa vutirheli ku fikela loko ri rhange ri teka ni ku va ni ndyangu ke? Doo, a swi tano ni kantsongo. Entiyisweni, ku nyenya ka rona ku tsutsumela vukati handle ka lunghiselelo lerinene kumbe emahlweni ko kuma munghana la fanelekaka loyi a khuvuriweke wa Mukriste ku nga ha hlavutela mpimo wa ku vupfa loku lavekaka leswaku ri angarha timhaka ta munhu hi xiyexe khwatsi ni mindzhwalo ya ntikelo swinene ya bandlha.
8. Mayelana na 1 Timotiya 3:13 na Matewu 24:14, i ndzhwalo wihi lowu rhwexiwaka malandza ya vutirheli?
8 Pawulo u vule leswaku “lava va endlaka ntirho wa vatirheli ekerekeni hi nawu wa kona, va tinyika ndzhuti evanhwini, naswona va tiyisiwa swinene eku pfumeleni ka vona eka Kriste Yesu.” (1 Timotiya 3:13) Ndlela yin’wana leyi va nga kombisaka ‘ku tiyisiwa swinene eku vulavuleni’ loku lavekaka ha yona i ku hlanganyela hi ku gingiriteka eku chumayeleni ka “mahungu lamanene ya mfumo.” (Matewu 24:14, NW) Va fanele ku swi xiya leswaku va avelana ni vakulu ndzhwalo wo rhangela eku chumayeleni hi yindlu na yindlu ni ku hlanganyela eka swivumbeko swin’wana swa vutirheli. (Mintirho 5:42; 20:20, 21) Leswi mafambiselo layo biha ya Sathana ya tshinelelaka makumo ya wona hi xihatla, ntirho wo chumayela i wa xihatla swinene. Hikwalaho ke, malandza ya vutirheli ya fanele ku hlayisa xihatla xa ntirho wo chumayela hi ta Mfumo emahlweni ka bandlha hi ku veka xikombiso lexinene xa munhu hi xiyexe evutirhelini bya nsimu.
Va Pfuniwe Hi Vutirheli Bya Nkarhi Hinkwawo
9. Hikwalaho ka xihatla xa minkarhi ya hina, i ntirho wihi lowu Vakriste vo tala va wu tekeke?
9 Hikwalaho ka xihatla xa minkarhi ya hina leyi nonon’hwaka, vavanuna ni vavasati vo tala va Vukriste va tekile vutirheli bya nkarhi hinkwawo. Vo tala, lava va vuriwaka maphayona, va heta ndzinganyeto wa siku na siku wa maawara lama nga exikarhi ka mambirhi ni ntlhanu entirhweni wo chumayela, van’wana va vona tanihi varhumiwa ematikweni mambe. Van’wana va tirha nkarhi hinkwawo eyindlu-nkulu ya Sosayiti ya Watch Tower kumbe etihofisini ta yona ta marhavi emisaveni hinkwayo. Ntirho wa vona i xihlovo xa ntsako ni ku aneriseka eka vona ni le ka lava va va tirhelaka. Naswona etimhakeni to tala ntokoto entirhweni wa nkarhi hinkwawo wu pfune vavanuna ku antswisa timfanelo leti lavekaka leswaku va tirhela bandlha hi ndlela leyi pfunaka tanihi malandza ya vutirheli.
10, 11. Hi laha swi kombisiweke hi tinhlamuselo ta munhu hi xiyexe leti tshahiweke laha, vavanuna lava navelaka ku va malandza ya vutirheli va nga pfuniwa njhani hi ntirho wa nkarhi hinkwawo?
10 Khale ka nandza un’wana wa vutirheli, loyi sweswi a nga nkulu ebandlheni ra Berlin, eJarimani, u vulavula hi ntirho wa vuphayona lowu a wu tekeke malembe lama hundzeke a ha ri jaha a ku: “Ndzi nga vula leswaku i goza leri ndzi nga ri honisangiki. Yehova u ndzi katekisile. Xinakulorhi xa mina na yena xi vile lexikulu swinene.” Ee, ku fana ni magidi ya van’wana, makwerhu loyi wa xinuna u xiye leswaku vutirheli bya nkarhi hinkwawo byi nga entisa xinakulobye xa munhu na Yehova ivi byi hatlisisa nhluvuko lowu yaka eku vupfeni ka Vukriste.
11 Phayona rin’wana ra nkarhi wo leha ri hlamusela ndlela leyi ntirho wa nkarhi hinkwawo wu ri pfuneke ha yona. Ri ri: “Ndzi tshikile ivi ndzi va la ringaniselaka malunghana ni ku endla ku avanyisa ka xihatla. A ndzi tsake ngopfu naswona ndzi ve la olovaka emhakeni yo tirhisana ni vanhu vo hambanahambana.” Xana leti a ti kona exikarhi ka timfanelo leti laviwaka hi vavanuna lava navelaka ku tirha tanihi malandza ya vutirheli ke?
12. (a) I minkarhi yihi leyi nga kona yo hlanganyela evutirhelini bya nkarhi hinkwawo? (b) Ku hlanganyela evutirhelini bya nkarhi hinkwawo swi lava vuswikoti byihi lebyi nga pfunaka nandza wa vutirheli ku hetisisa mindzhwalo yakwe?
12 Ku hlanganyela evutirhelini bya nkarhi hinkwawo, loko mindzhwalo ya Matsalwa yi pfumela, ku nga tirha tanihi nkarhi lowu hlamarisaka eka vavanuna va Vukriste lava nga ta ‘rhanga hi ku kambiwa.’ Van’wana va nga teka vutirheli byo tano nkarhi hinkwawo, van’wana nkarhi na nkarhi. Vantshwa va nga ha endla tano enkarhini wa ku pfala ka swikolo, naswona vanhu lavakulu eminkarhini ya livhi kumbe eminkarhini yin’wana leyi faneleke elembeni hinkwaro. Kavula, ku hlanganyela entirhweni wa nkarhi hinkwawo swi lava ku ringanisela ni ku kunguhata hi vukheta. Vuswikoti lebyi bya laveka eka nandza wa vutirheli naswona byi ta n’wi pfuna ku hetisisa mindzhwalo yakwe. Hi yihi mindzhwalo ya kona?
Mindzhwalo Ya Malandza Ya Vutirheli
13. Mintirho 6:1-6 yi tsundzuxa yini malunghana ni muxaka wa ntirho lowu averiwaka malandza ya vutirheli ke?
13 Hambi leswi Mintirho 6:1-6 yi nga tirheki hi ku kongoma eku hlawuriweni ka malandza ya vutirheli, leswi swi vuriweke eka yona swi ringanyeta muxaka wa ntirho kumbe xivumbeko xa mindzhwalo leyi hi ntolovelo a yi ta averiwa malandza ya vutirheli. Hayi hi ku letela vapfumeri-kulobye kambe hi ku phakela swakudya, “vavanuna va 7” lava hlawuriweke enkarhini wolowo va tshunxe vaapostola leswaku va ‘tinyikela eku khongeleni ni le vutirhelini bya rito.’ Hi ku khathalela mindzhwalo leyi fanaka namuntlha, malandza ya vutirheli ya nyika vakulu nkarhi lowu engetelekeke wo risa ni ku dyondzisa “ntlhambi wa Xikwembu.”—1 Petro 5:2, 3.
14. I mintirho yihi yo hambana-hambana leyi nga averiwaka malandza ya vutirheli?
14 Malunghana ni mintirho ya malandza ya vutirheli, buku leyi nge Organized to Accomplish Our Ministry yi ri: “Nandza un’we wa vutirheli a nga ha averiwa ku khathalela tibuku ta bandlha, a endla leswaku swi koteka eka hina hinkwerhu ku kuma tibuku leti hi ti lavaka leswaku hi ti tirhisa hina vini ni ta ntirho wa nsimu. Un’wana a nga ha khathalela timagazini ebandlheni. Van’wana va averiwa mintirho yo hlayisa tirhekhodo to fana ni ta timali ta bandlha kumbe ku ava nsimu, kumbe va tirhisiwa ku khathalela swikurisamarito, va tirhisa xilawula-mpfumawulo, va khathalela pulatifomo kumbexana va pfuna vakulu hi tindlela tin’wana. Ku na ntirho wo tala lowu fanelaka ku endliwa eku hlayiseni ka Holo ya Mfumo ni ku yi basisa, hikwalaho malandza ya vutirheii hakanyingi ya rhambiwa leswaku ya pfuneta ku khathalela mindzhwalo yo tano. Nakambe malandza ya vutirheli ya averiwa ku tirha tanihi vahlayi va vanhu, ya amukela lavantshwa ni ku pfuneta ku endla leswaku ku va ni ku rhula eminhlanganweni ya bandlha.”—Matluka 57-8.
15. (a) Ku tirha hi laha ku humelelaka tanihi nandza wa vutirheli, i yini lexi lavekaka handle ka vuswikoti lebyi tirhaka? (b) Hambi leswi malandza ya vutirheli ya khathalelaka swilo swo hambana-hambana, xikongomelo-nkulu xa wona ku fanele ku va xihi?
15 Xana makwerhu wihi na wihi wa xinuna la nga ni vuswikoti lebyinene a nga endla ntirho wo tano ke? Doo, hikuva “vavanuna lava tivekaka” lava hlawuriweke eka lembe xidzana ro sungula eYerusalema a va ‘tele moya wa vutlhari,’ kumbe hinkwavo ‘a va ri ni vuswikoti naswona a va khathalela swa moya.’ (Mintirho 6:3, Phillips) Hambi loko ku ri leswaku ana se a va ri vakulukumba exikarhi ka vanhu va Yehova, a va averiwa ntirho lowu fanaka ni lowu enkarhini wolowo a wu endliwa hi malandza ya vutirheli. Hikwalaho loko malandza ya vutirheli ya namuntlha ya ta hetisisa mindzhwalo ya wona hi ndlela leyi humelelaka, ya fanele ku ‘va ni vuswikoti ni ku khathalela swa moya.’ Loko va khomekile hi vuxokoxoko bya nhlengeletano, mhaka ya vona leyikulu ku fanele ku va ku tirhela vanhu hi tindlela leti pfunaka ta moya.
16. Loko ku ri hava vakulu lava ringaneke abandlheni, malandza ya vutirheli ya nga ha averiwa mintirho yihi?
16 Leswi malandza ya vutirheli ya faneleke ku khathalela swa moya, minkarhi yin’wana ya nga tirhisiwa entirhweni lowu hi ntolovelo wu endliwaka hi vakulu. Organized to Accomplish Our Ministry, (matluka 58-9) ya hlamusela: “Loko ku ri hava vakulu lava ringaneke lava nga fambisaka Tidyondzo ta Buku ya Bandlha, van’wana va malandza ya vutirheii lama fanelekaka va tirhisiwa tanihi vafambisi va dyondzo leswaku va khathalela mintlawa leyi va yi averiweke. Va nga ha averiwa ku khathalela swiphemu swa Nhlangano wa Ntirho ni Xikolo xa Vutirheli bya le Tilweni ni ku nyikela tinkulumo ta le rivaleni ebandlheni ra ka vona. Malunghelo man’wana ya nga ha nyikiwa van’wana va malandza ya vutirheli laha ku nga ni xilaveko xo karhi naswona ya fikelela swilaveko swa xiavelo xa kona.—Ringanisa 1 Petro 4:10.”
17. Stefano a ri wanuna wa njhani, naswona i xivutiso xihi lexi leswi swi xi tlakusaka ehenhleni ka malandza ya vutirheli?
17 Un’wana wa ‘vavanuna lava tivekaka va 7’ va minkarhi ya Bibele a a ri “Stefano, wanuna la teleke ku pfumela ni Moya Lowo kwetsima.” (Mintirho 6:5) Loko a nga si fa tanihi mudlawela ku pfumela la tshembekaka, Stefano u nyikele vumbhoni lebyi nyanyulaka emahlweni ka Hosi leyi tlakukeke ya Vayuda. Hlaya mhaka ya kona, kutani u ta khorwiseka leswaku a a khathalela swa moya, ku nga vumbhoni lebyi hlawulekeke lebyi amukeriwaka hi vuleteri bya moya lowo kwetsima wa Xikwembu ni ku rhandza ku nyikela vutomi byakwe entirhweni wa Yehova. (Mintirho 6:8-7:60) Loko u ri nandza wa vutirheli, xana u teka mindzhwalo ya wena ya bandlha ni vutirheli bya nsimu swi ri swa ntikelo hi laha Stefano handle ko kanakana a tekeke mindzhwalo yakwe ni lunghelo rakwe ro vulavula ntiyiso ha kona ke?
Va Faneleka Njhani?
18. I yini lexi nga vuriwaka malunghana ni ntirho wa malandza yo tala ya vutirheli, naswona i yini lexi nga va tiyisekisaka?
18 Malandza yo tala ya vutirheli ya veka xikombiso lexinene evuton’wini bya Vukriste, ya khathalela khwatsi mindzhwalo ya wona ya bandlha, naswona ya rhangela kahle evutirhelini bya nsimu. Ntirho wa vona wu tlangeriwa swinene hi vagandzeri-kulobye naswona wu ta hakeriwa hi Yehova, hikuva Vakriste va Vaheveru va tiyisekisiwile: “Xikwembu a xi na mona, xi nga ka xi nga rivali ntirho wa n’wina ni rirhandzu leri mi ri kombeke hi vito ra xona, hi ku tirhela vahlawuriwa va xona, hi laha mi swi endlaka ha kona ni sweswi.”—Vaheveru 6:10.
19. (a) I swivutiso swihi leswi nandza un’wana ni un’wana wa vutirheli a nga tivutisaka swona? (b) Hikwalaho ka yini swi ta va leswi pfunaka ku vulavula hi swiphiqo leswi hlangavetaneke ni van’wana va malandza ya vutirheli?
19 Hambi swi ri tano, nandza un’wana ni un’wana wa vutirheli a nga ha tivutisa khwatsi a ku: Xana ndzi faneleka njhani eka swilaveko swa Matsalwa? Xana hakunene ndzi seketela vun’we bya bandlha? Xana ndzi khathalela mindzhwalo leyi ndzi yi averiweke khwatsi nakona hi ku gingiriteka ke? Naswona xana ndzi veka xikombiso lexinene evutirhelini bya nsimu? Malandza man’wana ya vutirheli ya hlangavetane ni swiphiqo emhakeni yo faneleka eka leswi swi lavekaka eka wona. Hikwalaho a hi vulavuleni hi swin’wana swa swiphiqo leswi. Ku endla tano swi nga pfuna nandza wihi na wihi wa vutirheli ku ‘kambisisa ntirho wa yena.’ (Vagalatiya 6:4) Ku fanele ku tlhela ku engetela ku tlangela loku van’wana va nga na kona hi mintirho ya rirhandzu leyi endliweke hi vavanuna lava va hetisisaka swikongomelo leswi pfunaka exikarhi ka Timbhoni ta Yehova naswona hakunene i nkateko eka vanhu va Yehova.
Xana U Nga Hlamusela?
◻ Malandza ya vutirheli i nkateko eka vanhu va Yehova hi ndlela yihi?
◻ Vutirheli bya nkarhi hinkwawo byi nga pfuna vamakwerhu lava lavaka ku va malandza ya vutirheli hi ndlela yihi?
◻ Hikwalaho ka yini malandza ya vutirheli ya fanele ku va ‘lama swi kotaka ni lama khathalelaka swa moya?
◻ Stefano la tshembekaka a a ri xikombiso lexinene xa malandza ya vutirheli namuntlha hi ndlela yihi?
[Xifaniso eka tluka 20]
Vakulu ni malandza ya vutirheli i nkateko ebandlheni
[Xifaniso eka tluka 22]
Ntirho wa vuphayona i vuleteri lebyinene eka lava va navelaka ku va malandza ya vutirheli kumbe vakulu