Ku Phikelela Pakani Ya Vutomi Hi Vun’we

“Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.”—YOHANE 17:3.

1. (a) Hi le ka xiendlakalo xihi laha Yesu a vulavuleke ro sungula hi “vutomi lebyi nga heriki”? (b) I vamani lava nga fikelelaka pakani leyi?

U TA hi ku ngungumela, a nga voniwi, emunyameni wa vusiku. I Nikodema. U nyanyuriwe hi swikombiso leswi Yesu a swi endleke eYerusalema hi nkarhi wa Paseka ya 30 C.E. Eka Mufarisi loyi, N’wana wa Xikwembu u phofula xiga xakwe xo sungula lexi rhekhodiweke xa “Vutomi lebyi nga heriki,” a engetela hi marito lama chavelelaka lama nge: “Hikuva Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:15, 16) Mawaku nkarhi lowunene swonghasi lowu sweswi wu pfulekelaka misava ya vanhu lava kutsulekaka! Kavula, hambi a ri Mufarisi loyi a tikurisaka a nga ha titsongahata leswaku a fikelela pakani leyi.

2. (a) Hi le hansi ka swiyimo swihi laha Yesu a tlheleke a vulavula hi “vutomi lebyi nga heriki”? (b) Mati lama nyikaka vutomi ma kumeka eka vamani?

² Hi ku anghwetla endzhaku ka kwalaho, Yesu u suka eYerusalema u ya eGaleliya. A wisa exihlobyeni eSamariya loko vadyondzisiwa va yena va ya xava swakudya. Wansati hi loyi a taka ku ta ka mati. Yesu a ku ka yena, “Kambe un’wana ni un’wana la nwaka mati lawa ndzi nga ta n’wi nyika wona, a nga ka a nga ha tlheli a twa torha ni siku ni rin’we; kambe mati lawa ndzi nga ta n’wi nyika wona, ma ta va eka yena xihlovo xa mati lama pfelelaka ku yisa evutomini lebyi nga heriki.” (Yohane 4:14) Leswi Vasamariya va languteriwaka ehansi hi Vayuda, hikwalaho ka yini Yesu a nyike nsati loyi ntshembo wo tano wa nkoka ke? Nakambe, hi laha Yesu a tivaka ha kona, nsati loyi a a ri ni vanuna va ntlhanu naswona se a a hanya hi vunghwavava ni nuna loyi a nga riki wa yena. Kambe ke, hi laha Yesu a hlamuselaka ha kona laha, mati lama nyikaka vutomi ya ntiyiso ya fanele ku kumeka ni le ka lava languteriwaka ehansi hi misava loko ntsena va hundzuka ni ku basisa vutomi bya vona.—Ringanisa Vakolosa 3:5-7.

3. (a) I “swakudya” swa njhani leswi Yesu a vulavuleke ha swona? (b) Xana Yohane 4:34-36 yi hetisekise ku yini?

³ “Vutomi lebyi nga heriki”! Yesu u ya emahlweni a kurisa nhloko-mhaka leyi loko vadyondzisiwa va yena va vuya kutani va n’wi khutaza leswaku a dya. U ri eka vona: “Swakudya swa mina, i ku endla ku rhandza ka Loyi a ndzi rhumeke, ni ku heta ntirho wa yena swinene.” Hi wihi ntirho wolowo xana? Yesu u ri: “Tlakusani mahlo mi languta masimu: Ma vupfele ku tshoveriwa. Ni sweswi, la tshovelaka u kuma hakelo, kutani u hlengeleta mavele, a ma hlengeletela ku kuma vutomi lebyi nga heriki.” Ntshovelo wo tano a wu languteriwa, hambi ku ri exikarhi ka Vasamariya lava languteriwaka ehansi, naswona wu ve ntsako wa xiviri, hi laha rhekhodo yi kombaka ha kona. (Yohane 4:34-36; Mintirho 8:1, 14-17) Ntshovelo wa vutomi lebyi nga heriki wu ya emahlweni ku ta fika namuntlha, kambe sweswi nsimu i misava. Vadyondzisiwa va Yesu Kriste a va ha ri na swo tala ku swi endla entirhweni lowu wa Hosi.—Matewu 13:37, 38; 1 Vakorinto 15:58.

“Nyiko Ya Vutomi”

4. Yesu u va hlamurise ku yini Vayuda malunghana ni ku hlayisa Savata?

⁴ Lembe ra hundza. Se i nkarhi wa Paseka ya 31 C.E. Leswi wu nga ntolovelo wa yena, Yesu u kona eYerusalema enkhubyeni. Kambe Vayuda va ya eku n’wi xaniseni hikwalaho ka leswi a endlaka swiendlo swa rirhandzu swo horisa hi Savata. Yesu u va hlamurisa ku yini xana? U ri: “Ku fikela sweswi, Tatana wa mina a nga si tshika ku tirha, kutani na mina, tanihi yena, ndza tirha.” Hikwalaho va lava ku n’wi dlaya.—Yohane 5:17, 18.

5, 6. (a) Xana i ntirhisano wihi wa nkoka lowu Yesu sweswi a wu hlamuselaka? (b) Hi le mhakeni yihi laha Yesu a nga ni ‘vutomi eka yena’?

⁵ Hambi swi ri tano, Yesu u hambeta a hlamusela ntwanano wa nkoka swinene—vun’we, kumbe ntirhisano, lowu nga kona exikarhi ka yena na Tatana. U byela Vayuda volavo a ku: “Hikuva Tatana u rhandza N’wana; wa n’wi komba hinkwaswo leswi a swi endlaka, kutani u ta n’wi komba ni mintirho leyikulu leyi tlulaka ni leyi, ku endlela leswaku n’wina mi ta hlamala.” U komba leswaku Tatana u n’wi nyike matimba lawa makulu swinene, a ku: “La yingisaka rito ra mina, a va a pfumela eka Loyi a ndzi rhumeke, u ni vutomi lebyi nga heriki; kutani a nga ka a nga avanyisiwi, kambe u humile eku feni a ya nghena evutomini.”—Yohane 5:20, 24.

⁶ Ina, hambi va ri lava “feke” emahlweni ka Xikwembu hikwalaho ka xidyoho xa vona xa ndzhaka va nga ha “twa rito ra N’wana wa Xikwembu” ivi va hanya. Kambe njhani? Yesu wa hlamusela: “Tanihi leswi Tatana a nga na vutomi eka yena, hi mukhuva wolowo u nyikile N’wana ku va na vutomi eka yena.” Marito wolawo, ‘vutomi eka Yena’ ma nga tlhela ma hundzuluxeriwa ma ku “nyiko ya vutomi eka yena.” (Yohane 5:25, 26, nhlamuselo ya Ref. Bi.) Hikwalaho, Yesu wa swi kota ku nyika vanhu xiyimo lexinene emahlweni ka Xikwembu. Tlhandla-kambirhi, wa swi kota ku pfuxa ni ku nghenisa vutomi eka lava etleleke eku feni.—Yohane 11:25; Nhlavutelo 1:18.

7. (a) Xana Psalma 36:5, 9 yi hi byela yini hi Xikwembu? (b) Yehova u hakele N’wana wa yena loyi a hlayisaka vutshembeki hi ndlela yihi?

⁷ Minkarhi hinkwayo Yehova a a ri ni vutomi eka yena. Ku tsariwe leswi ha yena: “Hikuva nseledyana ya vutomi yi na wena.” (Psalma 36:5, 9) Kambe sweswi Tatana u pfuxe N’wana wakwe la hlayisaka vutshembeki eku feni tanihi “xirhangana xa lava etleleke.” Hi ku va ni “nyiko ya vutomi eka yena,” Yesu u nyikiwe matimba yo rivalela swidyoho, yo avanyisa ni ya ku pfuxa vafi, va ri ni ku langutela ka vutomi lebyi nga heriki.—1 Vakorinto 15:20-22; Yohane 5:27-29; Mintirho 17:31.

Ntirhisano Lowu Tsakisaka

8, 9. (a) Hi nga hlayisa pakani ya vutomi lebyi nga heriki hi ndlela yihi? (b) Xikwembu xi lunghiselela yini ehenhleni ka vutomi lebyi nga heriki? (c) I vamani lava hlanganyelaka eka minkateko leyi, naswona hi ndlela yihi?

⁸ Xisweswo, Yuda mudyondzisiwa wa Yesu wa hi tsundzuxa: “Tshamani erirhandzwini ra Xikwembu. Langutelani musa wa Hosi ya hina Yesu Kriste lowu yisaka evutomini lebyi nga heriki.” (Yuda 21) Mawaku pakani leyi vangamaka swonghasi—vutomi lebyi nga heriki! Kutani leswi i ku hanya eku hetisekeni, hi ku ya hi ku rhandza ka Muvumbi wa hina la hetisekeke ni lunghiselelo leri a ri endlaka hi ku tirhisa N’wana wa yena. A ku nga vi na ntshikilelo lowu hakanyingi wu funghaka ku Iwela ku pona eka mafambiselo lawa ya swilo. Emafambiselweni lamantshwa ya swilo lama taka, gome, vuvabyi, vuhomboloki, nthyakiso hambi ri ri rifu, a swi nga ha vi kona!—Mikea 4:3, 4; 1 Vakorinto 15:26.

⁹ I vamani lava nga ta hlanganyela eku hetisekeni ka switshembiso leswi, naswona kwihi? Hi lava va kombisaka ripfumelo egandzeIweni ra Yesu ni lava va engetelaka mintirho ya vukwembu eka ripfumelo rero. Lava va hlanganisiwaka kun’we ni Vakriste-kulobye hi ku twanana emisaveni hinkwayo evun’weni bya ripfumelo.—Yakobo 2:24; Vaefesa 4:16.

10. (a) Eka “vulawuri” bya Xikwembu, i yini xo sungula enxaxamelweni xana? (b) Xana “vulawuri” byi hambeta byi kongoma kwihi?

¹⁰ Hi ku ya hi ntsako wa xona lowunene, Xikwembu xi kunguhate “[vulawuri] . . . ku hlanganisa swivumbiwa hinkwaswo, swa le matilweni ni swa la misaveni, nhloko ya swona a va Kriste.” (Vaefesa 1:8-10) Leri i lunghiselelo ra ndyangu wa Xikwembu leri sungulaka hi ku hlengeletiwa ka vadyandzhaka-kulobye na Kriste va 144 000. Lava hi “lava va kutsuriweke exikarhi ka vanhu leswaku va va mihandzu yo sungula leyi humeseriwaka Xikwembu ni Xinyimpfana [Yesu Kriste].” Va hlanganyela eka “ku pfuka loko rhanga [ka le matilweni]” leswaku va ta tirha na Kriste tanihi tihosi na vaprista hi gidi ra malembe. Ku ya emahlweni, vulawuri bya Xikwembu byi hambeta byi hlengeleta “swilo swa la misaveni,” byi sungula hi nhlayo leyi nga hlayekiki ya “ntshungu lowukulu . . . [lowu humaka] hi le matikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Malandza lawa ya Xikwembu ma ta huma eku “xanisekeni lokukulu” hi langutelo ro kuma vutomi lebyi nga heriki “emisaveni leyintshwa.”—Nhlavutelo 14:1, 4; 20:4, 6; 7:4, 9-17; 21:1, 4.

11. (a) I ‘ntirhisano’ wihi wa nkoka lowu Vaefesa 1:11 yi vulavulaka ha wona? (b) Yohane 15:4, 5 yi tirha njhani eka lava nga eka ‘ntirhisano’ lowu ke?

¹¹ Vana lava totiweke hi moya va Xikwembu, lava va nga “swivumbiwa swa le matiIweni,” va tsakela vuxaka lebyikulu na Yesu kun’we na Tatana. Va ‘averiwe ku va vadyandzhaka’ va Mfumo kun’we na Yesu. (Vaefesa 1:11) Yesu u va khutazile leswaku va tshama eka yena, hi laha marhavi ya tshamaka ensinyeni wa vhinya ha kona, leswaku ma veka mihandzu leyo tala. Loko ntirhisano lowu wu vangamaka na Yesu Kriste wu nga hlayisiwi, marhavi “ma nga ka ma nga koti ku endla nchumu.”—Yohane 14:10, 11, 20; 15:4, 5; 1 Yohane 2:27.

“Tinyimpfu Tin’wana” Sweswi Ta Hlanganyela

12. (a) Vuxaka bya “tinyimpfu tin’wana” eka ntlhambinyana hi byihi? (b) I ku tirha kwihi loku 1 Yohane 2:1-6 yi nga na kona malunghana ni wun’wana ni wun’wana wa mintlawa leyi xana?

¹² Hambi swi ri tano, xana ku vuriwa yini hi timiliyoni ta vanhu van’wana lava fanaka ni tinyimpfu lava hambanisiweke ni “timbuti” ta misava eka malembe lama tlulaka 50 lama hundzeke? (Matewu 25:31-40) Lava i “ntlhambinyana” wa Yesu lowu nyikiweke Mfumo, kambe tanihi “tinyimpfu tin’wana,” va tihlanganisa na wona tanihi xiphemu xa ntlhambi lowukulu lowu tirhaka hi vun’we na Tatana kun’we ni N’wana. (Luka 12:32; Yohane 10:16) Muapostola Yohane u nyika xitshembiso xa leswaku Yesu Kriste “hi yena mhamba ya swidyoho swa hina [hi leswaku, leswiya swa “ntlhambinyana”], na swona ku nga ri ya swidyoho swa hina ntsena, kambe ni swa misava hinkwayo.” Kutani ‘tinyimpfu leti tin’wana,’ leti hlengeletiweke emisaveni, na tona ti nga ha tsakela ntirhisano lowu vangamaka, kumbe ntwanano, na Xikwembu na Kriste. Swi fana ni leswi Yohane a hambetaka a swi vula: “Un’wana ni un’wana la hlayisaka Rito ra Xikwembu, hakunene rirhandzu ra yena eka xona ri hetisekile. Hi ndlela yoleyo hi nga tiva swinene leswaku hi le ka xona.” Ku sungula “ntlhambinyana” ivi ku landzela “tinyimpfu tin’wana” ku nghena ehansi ka ndzhwalo wa ku famba hi laha Yesu a fambeke ha kona.—1 Yohane 2:1-6.

13. (a) Eka Yohane 17:20, 21, Yesu u khongelela yini ke? (b) I yini lexi kombaka leswaku xikombelo lexi a xi hikeriwanga vadyandzhaka-kulobye na Kriste ntsena?

¹³ Kutani namuntlha, mintlawa leyi mimbirhi, wa le matilweni ni wa la misaveni, yi ‘tirhisana na Tatana ni N’wana’—hi ku pfumelelana loku heleleke na vona eku hetisiseni ka ntirho wa Xikwembu. Yesu u khongerile a ku, “Ndzi navela leswaku hinkwavo va va [ni vun’we], ku fana ni leswi wena Tatana u nga ka mina, na mina ndzi nga ka wena, leswaku na vona va va eka hina.” Vun’we lebyi a byi hikeriwanga ku vula ku dya ndzhaka swin’we, hikuva swi le rivaleni leswaku vadyondzisiwa va Yesu a va vi xiphemu xa ‘miri wa Yehova’ kumbe ‘vadyandzhaka-kulobye na Yehova.’ Va ‘tirhisana’ hi mhaka ya leswi va kombisaka vun’we hi ku twanana, va va mbilu yin’we ni ku anakanya kun’we na Yehova na Kriste, loko va karhi va nyikela vumbhoni emisaveni.—Yohane 17:20, 21.

14. I ndlela yihi yo hlawuleka leyi ntlawa wa le matilweni wu tirhisanaka na Kriste ha yona, kutani i yini lexi va endlaka leswaku va vona leswi?

¹⁴ Hambi swi ri tano, lava va ntlawa wa vatotiwa va le tilweni va tsakela ntwanano wolowo sweswi hi ndlela leyi hlawulekeke, tanihi leswi va hlayiweke lava lulameke malunghana ni vutomi, hi ku tirhisiwa ka mfanelo ya gandzelo ra Kriste. Kutani ke, va nga totiwa hi moya hi langutelo ra ku va vadyandzhaka-kulobye na Kriste Yesu. Va xiya ku amukeriwa ka vona tanihi vana, va ku: “Moya lowu [matimba lama tirhaka ya Xikwembu yo tota] wu yima ni mimoya ya hina [mboyamelo wa mianakanyo leyi lawulaka] ku tiyisa leswaku hi vana va Xikwembu.”—Varhoma 3:23, 24; 5:1; 8:15-18

15. Xana nkarhi wa sweswi ni lowu taka wu va khomele yini lava nga ni mintshembo ya vutomi bya laha misaveni?

¹⁵ Mayelana ni lava va nga ni mintshembo ya vutomi bya laha misaveni, sweswi va hlayiwa lavo lulama malunghana ni xinakulobye na Xikwembu, hi laha Abrahama, Rahava ni van’wana va minkarhi ya khale a va ri ha kona. Enkarhini wa ku fuma ka Kriste ka Gidi ra Malembe, va ta yisiwa eku hetisekeni ka vanhu hakantsongo-ntsongo, leswaku endzhaku ka ndzingo wo hetelela “swivumbiwa leswi swi ta ntshunxiwa na swona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.” (Varhoma 8:19-21; Yakobo 2:21-26) Xisweswo, vanhu lava yingisaka va ta hlayiwa lava lulamelaka vutomi lebyi nga heriki emisaveni.—Ringanisa Yohane 10:10; Esaya 9:7; 11:1-9; 35:1-6; 65:17-25.

16. (a) Hi le timhakeni tihi laha “ntlhambinyana” ni “tinyimpfu tin’wana” ti kombaka ku ‘tirhisana?’ (b) Kambe hikwalaho ka yini Yohane 3:3-5 yi tirha eka “ntlhambinyana” ntsena?

¹⁶ Tanihi vanhu, lava va “ntlhambinyana” ni vunyingi lebyikulu bya “tinyimpfu tin’wana” va kombisa ku hisekela ntirho wa Xikwembu loku tsakisaka ni loku ringanisiwaka. (Luka 12:32; Yohane 10:16; Tito 2:13, 14) Vo tala va vatotiwa lava ha riki kona va nga ha va va kurile hi malembe na hi ntokoto wa Vukriste, kambe mintlawa leyi hinkwayo yi kombisa vumunhu bya Vukriste ni mihandzu ya moya. (Vaefesa 4:24; Vagalatiya 5:22, 23) Hambi swi ri tano, ku ni ku hambana, tanihi leswi Yesu a kombiseke Nikodema emahlweni ka ku vulavula hi vutomi lebyi nga heriki. U te: “A ku na munhu la nga vonaka Mfumo wa Xikwembu, loko a nga tlhelanga a tswariwa ravumbirhi kambe.” (Yohane 3:3-5) Hikwalaho ku tswariwa ra vumbirhi hi moya ku voniwa hi Vakriste lava khuvuriweke lava Xikwembu xi va vulaka vadyandzhaka-kulobye na Yesu eMfun’weni wa yena. (1 Vakorinto 1:9, 26-30) “Tinyimpfu tin’wana” a ti kali ti ku lava ku tswariwa ko tano ravumbirhi, hikuva pakani ya tona i vutomi lebyi nga heriki emisaveni ya Paradeyisi leyi pfuxetiweke, tanihi vafumiwa va Mfumo.—Matewu 25:34, 46b; Luka 23:42, 43.

Xitsundzuxo—Ni Ntwanano Lowuntshwa

17. (a) Hikwalaho ka yini hinkwavo lava nga ni pakani ya vutomi va fanele ku hlangana ni vanhu va Xikwembu hi March 24? (b) Xana hi xiya yini hi nkhuvo wa Xilalelo xa 1985?

¹⁷ Hi March 24, endzhaku ka ku pela ka dyambu i nkarhi wa leswaku Timbhoni ta Yehova emisaveni hinkwayo ti hlayisa Xitsundzuxo xa rifu ra Yesu xa 1986. Mianakanyo yi ta yisiwa eku nyikeleni ka Yesu ka miri wakwe lowu hetisekeke wa munhu ni ngati ya vutomi eku kurisiweni ka vito ni xikongomelo xa Tata wa yena ni hikwalaho ka vanhu lava dyohaka. (1 Vakorinto 11:23-26) Kutani ke, hinkwavo lava nga ni pakani ya vutomi (ematilweni kumbe emisaveni) va ta lava ku hlangana ni vanhu va Xikwembu emisaveni hinkwayo hikwalaho ka xiendlakalo lexi xi tsakisaka. Hi 1985 ntsengo wa vanhu va 7 792 109 wu tsundzuke rifu ra Yesu. Hambi swi ri tano, lava va dyaka xinkwa ni vhinyo ya Xilalelo, leswi fanekiselaka miri ni ngati ya Yesu, a va ri 9 051 ntsena. Hikwalaho ka yini va ri vantsongo?

18, 19. (a) I ntwanano wihi lowu Yesu a vulavulaka ha wona eka Luka ndzima ya 22 ke? (b) Ntwanano wun’wana ni wun’wana wu hetisisa xikongomelo xihi? (c) Hi laha swi fanekiseriweke ha kona hi Muxe, Yesu u tirhisa ku yini tanihi “Muyimeri un’we” xana?

¹⁸ Kunene, xana Yesu u te yini emadyambyini wolawo ya ku simekiwa ka Xitsundzuxo xa rifu ra yena ke? Endzhaku ka loko a fambisele vadyondzisiwa va yena xinkwa, u tlhele a va nyika vhinyo hi ndlela leyi fanaka, a ku: “Xinwelo lexi i ntwanano lowuntshwa engatini ya mina leyi halatiwaka hikwalaho ka n’wina.” Endzhakunyana, u hambetile a twarisa xivangelo xo va nghenisa eka ntwanano lowuntshwa, a ku: “Hi n’wina lava mi tiyiseleke na mina emiringweni ya mina. Hi laha Tata wa mina a ndzi nyikeke Mfumo ha kona, na mina ndzi mi nyika wona; mi ta dya ni ku nwa etafuleni ra mina, eMfun’weni wa mina; kutani mi ta tshama eswiluvelweni, mi avanyisa tinxaka leta 12 ta Israyele.”—Luka 22:19, 20, 28-30.

¹⁹ Muprofeta Yeremiya u vhumbe ntwanano lowuntshwa, a vula leswaku ha wona Yehova a a ta rivalela xihoxo ni xidyoho xa vanhu va yena leswaku va ta “tiv̌a Yehova” evuxakeni lebyikulu. (Yeremia 31:31, 34) Tanihi leswi Muxe a a ri ‘muhlanganisi’ wa ntwanano wa Nawu na Israyele wa nyama, kutani Yesu u va ‘muhlanganisi wa [wona] ntwanano lowu pfumelelanaka ku antswa’ lowu Xikwembu xi wu endleke na “Israyele wa Xikwembu” wa moya. Lowu i wa ku kutsula lava vitaneriweke ku va vadyandzhaka va Mfumo na Kriste. Xisweswo va “nyikiwa ndzhaka leyi nga heriki, leyi va yi tshembisiweke.” (Vagalatiya 3:19, 20; 6:16; Vaheveru 8:6; 9:15; 12:24) Ngopfu-ngopfu hi le ku twisisekeni loku ka Bibele laha Yesu Kriste a a tirha tanihi “Muyimeri un’we loyi a hlanganisaka Xikwembu ni vanhu.”—1 Timotiya 2:5, 6.

20. (a) Xana i vamani lava dyaka swifanekiselo swa Xilalelo hi laha ku fanelaka? (b) Hikwalaho ka yini leswi swi ri tano?

²⁰ Manuku ke, i vamani lava nga dyaka swifanekiselo swa Xitsundzuxo swa xinkwa ni vhinya hi laha ku fanelaka ke? I ntlawa lowu Xikwembu xi wu nghenisaka entwananweni lowuntshwa ntsena lowu hetisisaka gandzelo ra Yesu. (Psalma 50:5) Xikongomelo xa ntwanano lowu i ku hlayiwa ka vadyandzaka-kulobye lava 144 000 va Yesu lava lulameriwaka hi vutomi ku sungula, leswaku va ta nyikela lunghelo leri ra vutomi kutani va nghenisiwa eMfun’weni wa le tilweni. (Varhoma 4:25; 2 Timotiya 2:10, 12) Kambe ku vuriwa yini hi “tinyimpfu tin’wana” xana?

21. (a) “Tinyimpfu tin’wana” ti pfunekisa ku yini tanihi vaxiyi eXilalelweni ke? (b) Nkhuvo wa Xilalelo wu kombisa yini, naswona i xivutiso xihi lexi tlakukaka?

²¹ Lava va ntlawa wa “tinyimpfu tin’wana” a va kona eka ntwanano lowuntshwa kutani a va dyi. Hambi swi ri tano, hinkwavo ka vona va pfuneka swinene hi ku va kona eka nkhuvo wa Xilalelo tanihi vaxiyi lava xiximekaka. Ku tlangela ka vona timhaka ta moya ka tiyisiwa ku pfumelelana ni marito ya xikhongelo xa Yesu eka Tata wa yena lama nge: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” (Yohane 17:3) Tsundzuka, nkhuvo wa Xilalelo wu kokela mianakanyo eka miri ni ngati ya Yesu. Miri ni ngati ya Kriste leyi nyikeriweke i swa nkoka swinene eka hinkwavo lava phikelelaka pakani ya vutomi lebyi nga heriki. Leswi i ntiyiso malunghana ni “tinyimpfu tin’wana” leti nga nghenisiwangiki eka ntwanano lowuntshwa naswona ti nga dyiki swifanekiselo swa Xilalelo hi ndlela yihi ke? A hi kambisiseni leswi eka xihloko lexi landzelaka.

A Wu Ta Hlamula Njhani Xana?

◻ Xana Yesu u hambetile a nghenisa ku twisisa ehenhleni ka ku langutela ka vutomi lebyi nga heriki hi ndlela yihi?

◻ Xikwembu xi yise ku yini emahlweni na ‘vulawuri’ bya xona ke?

◻ Hikwalaho ka yini ku nga vuriwaka leswaku “tinyimpfu tin’wana” ti ‘tirhisana’ na Tatana, N’wana ni vamakwavo va Kriste?

◻ Hikwalaho ka yini ku ri Vakriste lava totiweke ntsena lava dyaka swifanekiselo swa Xilalelo ke?

[Xifaniso eka tluka 13]

“Ntlhambinyana” ni “tinyimpfu tin’wana” ta ‘tirhisana’—ti endla ntirho wa Xikwembu hi laha Yesu a endleke ha kona