Ku Tirhisana Ni Vahlayisi Va Vutshembeki Va Yehova

“Loko nḍi ri mina, nḍi famba hi ku lulama ka mina. . . . Nḍi ta ḍunisa Yehova e tinhlengeletanweni.”—PSALMA 26:11, 12.

1, 2. (a) Xana vukhongeri byin’wana eVujaganini byi fikelele ku landzelerisisa hi ndlela yihi? (b) I endlelo rihi ra ku dyondzisa leri Yesu a ri tirhiseke? (Matewu 11:28-30)

HI 1985 a ku ri ni vanhu va 189 800 lava khuvuriweke ku kombisa ku tinyiketela ka vona eka Yehova tanihi timbhoni takwe ta Vukriste. Yoleyo i avhareji ya 520 hi siku. Xana vanhu lava hinkwavo va ku endlise ku yini ku kanela ka vona ka ku khuvuriwa? Xana va hlanganyele eka mintlawa ya vunyingi, va yingisa muchumayeri la nyanyukeke kutani va kanela hi Kriste hi ku nyanyuka? Leyo i ndlela leyi vukhongeri bya Maprotestente ni Maevhangelist byi tirhaka ha yona. Kambe yoleyo hi yona ndlela leyi Kriste a kumaka valandzeri ha yona xana?

² Loko hi kambela hi vukheta ku chumayela ka le rivaleni ka Yesu, a hi n’wi kumi a ri loyi a nyanyukaka. Hi xikombiso, xana u koke vayingiseri vakwe hi tikhwayere ni vuyimbeleri? Kumbe u tirhise vutlhari bya ntivo-miehleketo ku endla leswaku vayingiseri vakwe va titwa va ri na nandzu ivi a va vangela ku nyikela timali? Hi laha ku hambanaka, mukhuva wa yena wo dyondzisa wu endle leswaku vanhu va ehleketa ni ku anakanyisisa. Leswi vunyingi bya vayingiseri va yena a ku ri Vayuda, a va se va ri na vutivi eMatsalweni ya Xiheveru. U swi kotile ku endla leswaku va anakanyisisa eka xisekelo xa vutivi bya vona bya khale leswaku va ta n’wi vona tanihi Mesiya.—Matewu, tindzima 5-7; Luka 13:10-21.

3. Hi swi tivisa ku yini leswaku Pawulo a a nga tlhontlhi minyanyuko eku dyondziseni kakwe ke?

³ Hi laha ku fananaka, Pawulo, hambi leswi a langutiweke hi van’wana tanihi loyi a kayivelaka eka vuswikoti byo vulavula, a a ri la kokelaka eka vuswikoti byo anakanya.(Mintirho 20:7-9; 2 Vakorinto 10:10; 11:6) U tsarile: “Loko swi ri tano vamakwerhu, ndza mi khongotela hikwalaho ka tintswalo ta Xikwembu, leswaku mi nyiketa vutomi bya n’wina hinkwabyo, mi va mhamba leyi hanyaka, leyi hlawulekeke, leyi amukelekaka eka Xikwembu; hi wona magandzelele ya n’wina ya xiviri. . . . Mi pfumela ku hundzuka mi va vantshwa emiehleketweni ya n’wina [“leswaku malangutelo ya n’wina hinkwawo ya mianakanyo ma cinciwa,” Phillips], mi ta kota ku twisisa leswi ku rhandza lokunene ka Xikwembu, loku nkhensekaka ni ku hetiseka, ku nga swona.”—Varhoma 12:1, 2.

4. Loko munhu a nga si khuvuriwa tanihi un’wana wa Timbhoni ta Yehova, i magoza wahi lama a faneleke ku ma teka?

⁴ Hi ku fanana namuntlha, lava va khuvuriwaka i vanhu lava dyondzeke Matsalwa ni ku anakanyisisa ha wona hi vukheta va nga si teka goza lerikulu ra nkhuvulo, kumbe ku khuvuriwa hi laha ku heleleke ematini. (Mintirho 17:11, 12) Ka vona a ku nga ri ku kanela ka mathatha, ka nyanyuko. Hi laha ku hambaneke, va nga si pfumeleriwa ku khuvuriwa, a va hlanganyela nkarhi na nkarhi eminhlanganweni ya Vukriste hi malangutelo yo kuma vutivi lebyi kongomeke bya Yehova Xikwembu ni swikongomelo swa yena ha Kriste Yesu. (Vaheveru 10:25) Nakambe va hlanganyele nkarhi na nkarhi evutirhelini bya Vukriste, va avelana mahungu lamanene ya Mfumo ni van’wana. (Mintirho 5:42; 1 Vakorinto 9:16) Kutani, emavhikini yo hetelela va nga si khuvuriwa, va pfuxete swivutiso swo tlula 120 hi ta dyondzo ni mahanyelo ya Vukriste hi vukheta ni vakulu va bandlha vo hambana-hambana, kun’we ni timhaka ta magidi leti seketelaka matsalwa ya Bibele—hinkwaswo leswi ku ri ku endlela leswaku va ta va vahlayisi va vutshembeki lava amukelekaka emahlweni ka nkhuvulo wa vona.—Mintirho 8:34-36.a

Ku Hambana Loku Nkhuvulo Wu Ku Endlaka

5. I ndlela yihi ya mahanyelo leyi munhu a tikombisaka ha yona hi nkhuvulo?

⁵ Xana munhu u hetisisa yini hi ku khuvuriwa? Xo sungula, u tihlanganisa ni muhlayisi lonkulu wa vutshembeki loyi a tshameke a va kona emisaveni—Kriste Yesu. Yena ha yexe u veke xikombiso hi ku khuvuriwa loko a ri na malembe ya 30 hi vukhale. (Luka 3:21-23) Endzhaku u lerise valandzeri vakwe ku dyondzisa ni ku khuvula emisaveni hinkwayo. (Matewu 28:19, 20) Kambe xana a a vula leswaku vadyondzisiwa vakwe va fanele ku hlota ku khuvula vanhu, va nga ri na mhaka ni mahanyelo ya vona ya nkarhi wolowo ke?

6, 7. (a) Ku laveka yini eka mulandzeri wa ntiyiso wa Kriste? (b) Xana ku kwetsima ku katsa yini?

⁶ Muapostola Petro u hlamusela malangutelo lamanene loko a tsala a ku: “Hlawulekani na n’wina emahanyelweni hinkwawo ya n’wina. Hikuva ku tsariwile va ku: ‘Hlawulekani, hikuva mina ndzi hlawulekile.’” (1 Petro 1:15, 16) Sweswi, eka Mukriste la tinyiketeke, swi vula yini ku ‘hlawuleka’?

⁷ Ku ya hi Expository Dictionary of New Testament Words, ya W. E. Vine rito ra Xigriki haʹgi·os (leri hundzuluxeriweke va ku “ku hlawuleka”) “kahle-kahle ri komba ku hambanisiwa . . . kutani ke, hi Matsalwa na hi vunene na hi nkoka wa rona wa moya, ku hambanisiwa ni xidyoho ivi xisweswo munhu a nyiketiwa eka Xikwembu.” Mudyondzi un’wana wa Mugriki u vula leswaku “i ku fana swinene-nene ni Xikwembu.” Ku twisisa loku ku humesa mpimo lowu tlakukeke eka lava va nga ta khuvuriwa tanihi Vakriste va ntiyiso. I mpimo wa vutshembeki, naswona vutshembeki i ‘ku namarhela loku tiyeke emilawini ya mahanyelo lamanene’—emhakeni ya Mukriste, milawu ya Kriste.—Yohane 17:17-19; 18:36, 37.

8. (a) I milawu yihi leyi a yi ri ni matimba eka bandlha ro sungula ra Vukriste malunghana ni mahanyelo? (b) Xana Vujagana byi landzerile milawu yoleyo? Nyika swikombiso swa swiendlakalo swa kwalaho.

⁸ Bandlha ra Vukriste ra ntiyiso minkarhi hinkwayo ri namarhele vutshembeki, ku hlayisa nhlengeletano leyi tengeke. Xisweswo Pawulo u lerise Vakriste vo sungula a ku “mi nga tolovelani ni loyi a vuriwaka ‘makwerhu’ kasi i muoswi, kumbe i munhu wa makwanga, kumbe i muphahli wa swikwembu swa hava, kumbe i murhukani, kumbe i xidakwa, kumbe i muxisi, munhu lowo tano, hambi ku ri ku dya mi nga dyi na yena. . . . Hlongolani lowo biha exikarhi ka n’wina.” (1 Vakorinto 5:9-13; 2 Yohane 10, 11) Xana vafundhisi va Vujagana va tirhise mpimanyeto wolowo wu tlakukeke wa vutshembeki eka mintlhambi ya vona? Vujagana byi amukela vanhu lava minkarhi hinkwayo va endlaka xidyoho xin’wana ni xin’wana lexikulu ni vugevenga tanihi swirho leswi nga hisekiki kumbe leswi hisekaka. Milawu ya Bibele a yi byi pfumeleli vutilawuri byo tano.—Ringanisa Yeremia 8:5, 6, 10.

9. I yini leswi kokelaka vanhu vo tala eka ku tinyiketela ni ku khuvuriwa?

⁹ Kahle-kahle hikwalaho ka mpimanyeto lowu tlakukeke exikarhi ka Timbhoni ta Yehova, lava va rhandzaka ntiyiso ni vutshembeki va susumeteriwa ku tinyiketela eka Hosi Leyi Tlakukeke ya misava hinkwayo, Yehova Xikwembu. (Habakuk 3:18, 19) Va vona ku hambana lokukulu exikarhi ka mahanyelo ya vukhongeri bya misava ni lawaya ya Timbhoni ta Yehova. I ntiyiso, vunyingi bya vanhu byi nyenya vugandzeri lebyi tengeke. (1 Petro 4:3, 4) Kambe varhandzi va vutshembeki va hundzukela entiyisweni hi magidi. Va kombisa rirhandzu ra vona ra Xikwembu ni milawu ya xona loko va tinyiketa hi nkhuvulo wa mati.—Ringanisa Marka 1:10; Yohane 3:23; Mintirho 8:36.

Vutshembeki Lebyi Sekeriweke eRirhandzwini Ni Le Ku Tiyiseleni

10. Ku laveka yini eka Mukriste leswaku a hlayisa vutshembeki bya yena?

¹⁰ Vutshembeki byi na hakelo. Yesu u endle leswaku sweswo swi twisiseka loko a rhambe vanhu ku va valandzeri vakwe. “Loko munhu a lava ku ndzi landza, a a titshike [“a nga tikhathali,” The New English Bible] a tirhwexa xihambano xa yena, kutani a ndzi landza.” (Marka 8:34) Ndlela ya vutshembeki bya Vukriste yi katsa miringo ni ku tinyiketela naswona hikwalaho ka xivangelo lexi fanaka ni lexi yi xi endleke eka Kriste—hi na nala la tolovelekeke, Sathana. (Vaefesa 6:11, 12) Xisweswo ku tiyisela ka laveka leswaku u ‘hambeta’ u landza Yesu. Hikwalaho ka sweswo, ku tinyiketela a ku katsi kungu rintsongo, a ku fanelanga ku va nyanyuko lowu hundzaka. Kambe va nga ri vangani va fularhele ntiyiso eka tin’hweti kumbe malembe ma nga ri mangani ya ku khuvuriwa ka vona. Xana hi nga swi hlamusela hi ndlela yihi sweswo?

11. Hikwalaho ka yini, kumbexana, van’wana va nga hambetanga endleleni ya vutshembeki?

¹¹ Kumbexana van’wana va tshinelele nkhuvulo hi nyanyuko ematshan’wini ya xiyimo lexi twisisekaka xa mianakanyo. Van’wana va nga ha va va lave mimbuyelo ya xihatla kutani va endla ku tinyiketela ka vona vini, ka xinkarhana. Ku nga khathariseki leswi xivangelo xi nga vaka swona, va lahlekeriwe hi vuxaka bya vona lebyi tiyeke na Yehova. A va langutanga swinene eka xikombiso xa vona, Yesu Kriste. (Vaheveru 12:1, 2) Tanihi vuyelo, rirhandzu ra vona ra Xikwembu ri hungutekile naswona leswi a nga na swona, vutshembeki bya vona byi ve bya nkarhinyana. Kutani hikwalaho ka yini rirhandzu ri ri mhaka yo tano ya nkoka? Hikuva hi rona ntsena ri nga xisekelo lexi tiyeke xa ku tinyiketela loku nga heriki eka Yehova.—Marka 12:30, 31; 1 Yohane 4:7, 8, 16; 5:3.

Ku Hlayela Nxavo Wa Vutshembeki

12. Hi yihi ndlela ya vutlhari ku yi teka u nga si khuvuriwa?

¹² Yesu a nga va khutazanga vadyondzisiwa vakwe ku n’wi landzela handle ko hlayela nxavo. U tsundzuxile: “Hikuva i mani exikarhi ka n’wina, la nga rhangiki hi ku tshama ehansi loko a lava ku aka xihondzo, a hlaya leswi a nga ta humesa swona, ku vona loko mali ya yena yi ta ringana ku heta ntirho xana?” Ina, munhu la tlhariheke u pima ndlela yakwe ya vumundzuku hi vukheta. U fanele ku tiyiseka hi nsusumeto wa yena a nga si amukela vutihlamuleri lebyi heleleke bya ku tinyiketela ni ku khuvuriwa ka Mukriste. Kutani Yesu u kombe leswi sweswo a swi ta vula swona loko a hetelele hi ku: “Kutani ke un’wana ni un’wana exikarhi ka n’wina la nga tshikiki leswi a nga na swona, a nga ka a nga koti ku va mudyondzisiwa wa mina.”—Luka 14:28-33.

13. Loko mongo wa dyondzo ya Yesu ku ri rirhandzu, xana a a vula yini loko a vulavule hi ‘ku venga’ swirho swa ndyangu wa munhu? (Matewu 22:37-40)

¹³ Ku tinyiketela eka Yehova ku lava vutshembeki bya moya hinkwawo eku endleni ka ku rhandza ka Xikwembu. Ku hava vanhu kumbe rifuwo leswi nga pfumeleriwaka ku tsanisa rirhandzu ra munhu eka Xikwembu. Hi yona mhaka leyi Yesu a hlamuseleke a ku: “Loko un’wana a ta ka mina, kambe a nga ri la vengaka tata wa yena, ni mana wa yena, ni nsati, ni vana, ni vamakwavo, hambi byi ri vutomi bya yena, a nga ka a nga koti ku va mudyondzisiwa wa mina.” (Luka 14:26) Kutani xana Yesu a a vula yini loko a vulavula hi ku venga swirho swa ndyangu wa munhu hambi a ri yena n’wini? Leswi a dyondziseke valandzeri vakwe ku rhandza hambi valala va vona, i langutelo rihi leri a tirhiseke rito leri nge ku venga laha ha rona? (Luka 6:27, 35) Laha rivengo a ri na mianakanyo yo rhandza swintsongo.—Ringanisa Matewu 12:40-50.

14. Xana vanghana ni maxaka man’wana ya endla hi ndlela yihi loko un’wana a va mbhoni ya Yehova? (Yohane 15:18, 19)

¹⁴ Kahle-kahle loko munhu a va mbhoni ya Mukriste ya Yehova, hi ku hatlisa u kuma lava nga vanghana vakwe va ntiyiso. Kumbexana van’wana va ta n’wi papalata kumbe va n’wi sandza hikuva u tshike vukhongeri byihi na byihi hi laha ku fanelaka. Kambe Yesu u tshembise leswaku a ku ta va ni hakelo ya ku lahlekeriwa kwihi na kwihi ko tano, a ku: “Un’wana ni un’wana la tshikeke yindlu, kumbe makwavo wa xinuna kumbe wa xisati, kumbe mana wa yena, hambi a ri tata wa yena, kumbe vana, kumbe masimu, hikwalaho ka mina ni hikwalaho ka Evangeli, ú ta nyikiwa swilo leswi ka dzana eminkarhini ya sweswi . . . kutani eminkarhini leyi taka, ú ta nyikiwa vutomi lebyi nga heriki.”—Marka 10:29, 30.

15. Hikwalaho ka yini van’wana va nga ha langutelaka Timbhoni ta Yehova ehansi?

¹⁵ Etimhakeni tin’wana ndlela yo tinyiketela ni vutshembeki swi nga ha vula ku lahlekeriwa hi ku tshemba emahlweni ka vanhu van’wana. (1 Vakorinto 4:12, 13) Hikwalaho ka yini sweswo swi fanele ku va tano? Hikuva se u wa vukhongeri lebyi nga xiyiwiki byi ri lebyi ‘xiximekaka.’ (Ringanisa Marka 2:15, 16.) Phela, a swi hlonipheki ku ‘karhata vanhu van’wana hi vukhongeri bya wena hi yindlu na yindlu.’ A hi swinene ku ya ekhotsweni ku tlula ku tshova vukala-tlhelo bya munhu etimhakeni ta vutiko ni ta vurhandza-tiko. (Yohane 18:36) A hi swinene ku ala mimpopelo ya ngati hikwalaho ka ripfalo leri leteriweke hi Bibele—hambi leswi ntungu lowu nga kona wa AIDS wu nyikaka vanhu van’wana miehleketo ya vumbirhi eka yinhla yoleyo.—Ringanisa Mintirho 15:28, 29; 17:6, 7; 24:5.

16. Xana hi pfunisiwa ku yini leswaku hi hlayisa vutshembeki bya hina?

¹⁶ Hambi leswi ndlela ya vutshembeki bya Vukriste yi laleke ni ku va leyi ringaka, hi na mpfuno lowu kumekaka minkarhi hinkwayo. (Matewu 7:13, 14) Hikwalaho Pawulo a nga te: “Ndzi nga endla hinkwaswo hi matimba ya Loyi a ndzi tiyisaka.” (Vafilipiya 4:13) Kutani hi nga kuma matimba wolawo hi xikhongelo xa nkarhi na nkarhi, hi ku dyondza Rito ra Xikwembu na hi xinakulobye xa bandlha ra Vukriste. Tanihi vahlayisi va vutshembeki lava khuvuriweke, hi nga tshama hi tshembekile naswona minkhenso leyi tshembekaka yi ya eka matimba lawa Xikwembu xi hi nyikaka wona.—Vaefesa 4:11-13; 6:18; Psalma 119:105.

Mimpfuno Ya Ndlela Ya Vahlayisi Va Vutshembeki

17. Xana nkhuvulo wu nga yisa eka mikateko yihi?

¹⁷ Goza ra ku tinyiketela ni ku khuvuriwa ri yisa eka mikateko yo tala. Hi xikombiso, ri nga vula vutirheli lebyi anameke ni lebyi anerisaka swinene. Ku na langutelo ra ntirho wa vumundzuku tanihi phayona leri pfunaka, lowu nkarhi wun’wana wu nga yisaka eka ntirho wa vuphayona bya nkarhi hinkwawo ni byo hlawuleka, ntirho wa vurhumiwa, ntirho wa xifundza ni wa muganga ni ntirho wa Bethele. (Vona Bokisi leri nga eka tlula 26.) Eka vamakwerhu lava khuvuriweke ndlela yi pfulekela ku tirhela van’wana ebandlheni tanihi nandza wa vutirheli, naswona hi nkarhi lowu faneleke, tanihi nkulu. Kambe eka mikateko leyi hinkwayo, ku na xilaveko lexi fanaka xa xisekelo—vutshembeki.—1 Timotiya 3:1-10.

18. Xana vutomi bya hina bya ku tinyiketela byi fanele ku khumba van’wana lava hi hlanganaka na vona hi ndlela yihi?

¹⁸ Mimpfuno ya vutomi ya ku tinyiketela ni vutshembeki ya hangalaka leswaku yi khumba van’wana. Hikwalaho ka ku landza xikombiso xa Kriste swinene, munhu u va wanuna kumbe wansati, tatana kumbe manana la antswaka. (1 Petro 2:21; Vaefesa 5:21-33; 6:4) Vantshwa va kurisa vuxaka lebyi akaka ni vatswari va vona, vadyondzisi ni vakulu va bandlha. (Tito 2:6, 7) Mukriste un’wana ni un’wana la khuvuriweke u va muakelani, muthori, kumbe muthoriwa la antswaka. (Matewu 22:39; Vaefesa 6:5-9; Tito 2:9, 10) Kutani ku fana na Kriste, Mukriste un’wana ni un’wana u fanele ku va ni xinghana lexi phyuphyisaka van’wana, tanihi leswi Yesu a vuleke a ku: “Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’wina yi ta kuma ku wisa.”—Matewu 11:29.

19. Xana mpfuno wun’wana lowukulu lowu vaka kona hi ku teka goza ra ku tinyiketela i yini?

¹⁹ Mpfuno lowukulu wa ku teka goza ra ku tinyiketela ni ku khuvuriwa i ku kuma vuxaka byo rhula ni Muvumbi. Leswi swi yisa eku rhuleni ka mianakanyo. Tanihi loko Pawulo a tsundzuxile u te: “Mi nga vileli ha nchumu; kambe etimhakeni hinkwato, tivisani eka Xikwembu, hi ku khongela, leswi mi swi pfumalaka, mi kombela mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.”—Vafilipiya 4:6, 7.

20. (a) “Ku rhula ka Xikwembu” ku sekeriwe eka yini? (b) I nkarhi wihi lowu pfulekelaka munhu la khuvuriweke?

²⁰ “Ku rhula ka Xikwembu” ku sekeriwe eku twisiseni loku enteke ka xikombiso ni gandzelo ra Yesu. Vutivi lebyi bya Kriste byi yisa vo tala eku hundzukeni ka xiviri ni ku cinca ka ntiyiso ka mahanyelo, kumbe ku ‘hundzuka’ exidyohweni. (Mintirho 3:19, 20) Hikwalaho, vanhu lava tinyiketeke va vula leswi mupisalema a swi vuleka a ku: “Loko nḍi ri mina, nḍi famba hi ku lulama ka mina. . . . Nḍi ta ḍunisa Yehova e tinhlengeletanweni.” (Psalma 26:11, 12) Munhu loyi a khuvuriwaka ematini tanihi xikombiso xa ku tinyiketela ka yena eka Xikwembu u fambisana ni vahlayisi va vutshembeki va Yehova emisaveni hinkwayo. (1 Petro 2:17) Nakambe u ‘namarhela vutomi bya ntiyiso,’ vutomi lebyi nga heriki, lebyi Yehova a byi tshembiseke ha Kriste Yesu.—1 Timotiya 6:19; Tito 1:2.

[Nhlayo wa lehansi]

A Wu Ta Hlamula Njhani?

◻ Xana Vakriste vo sungula va nyanyuriwe hi ntiyiso lowu dyondzisiweke hi Kriste ni vaapostola ro sungula hi ndlela yihi?

◻ Xana ku kwetsima ku yelanisa ku yini ni Mukriste un’wana ni un’wana ni bandlha ke?

◻ Xana vutshembeki byi fanele ku sekeriwa eka yini?

◻ Ku katseka yini eku hlayeleni ka nxavo wa vutshembeki?

◻ Mimpfuno ya ku hlayisa vutshembeki i yini?

[Bokisi eka tluka 26]

Malunghelo eVutirhelini Bya Nkarhi Hinkwawo

Phayona Ro Pfuna: Mutirheli la khuvuriweke loyi a hetaka ntsengo wa maawara ya 60 entirhweni wo chumayela hi n’hweti.

Phayona Ra Nkarhi Hinkwawo: Mutirheli la khuvuriweke loyi a hetaka avhareji ya maawara ya 90 hi n’hweti entirhweni wo chumayela.

Phayona Ro Hlawuleka: Mutirheli la khuvuriweke la hetaka maawara yo ringana 140 hi n’hweti naswona u kuma xipfuno xintsongo xa ku lahlekeriwa ka xisekelo. Maphayona lawa hakanyigi ya averiwa eka mintlawa leyi nga etlhelweni ni mabandlha lamantsongo.

Mutirheli Wa Gilead: Mutirheli la khuvuriweke loyi a leteriweke ntirho wa le handle eXikolweni xa Bibele xa Watchtower xa Gilead naswona na yena u heta ntsengo wa maawara ya 140 hi n’hweti evutirhelini.

Valanguteri Va Xifundza Ni Muganga: Vakulu lava famba-fambaka lava endzelaka mabandlha ni swifundza hi langutelo ro aka vamakwerhu evutirhelini bya vona ni minhlangano. Va heta maawara yo tala evutirhelini bya nsimu.

Ntirho Wa Bethele: Wu endliwa hi vatirheli va nkarhi hinkwawo eka rhavi ra hofisi yin’wana ni yin’wana ya Sosayiti ya Watch Tower ni vugandliselo emisaveni hinkwayo.

[Xifaniso eka tluka 24]

Nkhuvulo wu pfula ndlela . . .

[Xifaniso eka tluka 25]

. . . yo ya evutirhelini bya ku hlayisa vutshembeki