Hambetani Mi Famba Eku Vonakaleni Ka Xikwembu

Enkarhini wa dyondzo ya Bandlha ya xihloko lexi ni swimbirhi leswi landzelaka, mufambisi u fanele ku hlaya swiyenge leswi tshahiweke swa Yohane wo Sungula loko nkarhi wu pfumela

“Xikwembu i ku vonakala”—1 YOHANE 1:5.

1, 2. [Buku ya] Yohane wo Sungula yi tsariwe rini naswona kwihi, naswona yi tirha eka vamani?

TIMBHONI TA YEHOVA ti tlangela ku vonakala ka Xikwembu naswona ti lava ku hambeta ti famba ha kona. Hambi swi ri tano, ku endla tano a swi olovi, hikuva hambi va ri vadyondzisiwa vo sungula va Yesu Kriste va kongomane ni vugwinehi. Kambe vaapostola lava tshembekaka va Yesu va sivele ku hangalaka ka byona, naswona un’wana ‘loyi a lwisaneke na byona’ a ku ri muapostola Yohane. (2 Vatesalonika 2:1-12) Tanihi mukhalabye loyi a dyuhaleke swinene loyi a a tshama aEfesa ekusuhi na kona hi 98 C.E., u tsale papila ra yena ro sungula leri huhuteriweke hi Xikwembu. Xitsundzuxo xa rona xi pfune Vakriste va lembe xidzana ro sungula ku hambeta va famba eku vonakaleni ka Xikwembu. Kambe ku vuriwa yini hi hina?

² Marito ya Yohane ma ha pfuna hi laha ku fanaka eka Vakriste va lembe xidzana ra vu-20. Kutani edyondzweni ya munhu hi xiyexe ya xihloko lexi ni swimbirhi leswi landzelaka, tiyiseka leswaku u hlaya swiyenge hinkwaswo leswi funghiweke swa papila ra yena ro sungula hi laha swi xiyisisiweke ha kona. Eka papila ra muapostola ni switsundzuxo leswi nga eka rona, risivi ro fana ni leri nge “hina” ri kongomise ngopfu eka Yesu ni valandzeri va yena lava totiweke. Kambe milawu ya xisekelo leyi yelanaka ni ku lulama, rirhandzu, ripfumelo ni leyi fanaka na yona, yi tirha ni le ka Vakriste lava nga ni mintshembo ya la misaveni.

Ku Avelana Loku Tisaka Ntsako

3. I vumbhoni byihi lebyi nga kona bya leswaku N’wana wa Xikwembu u hanyile, a xaniseka ni ku fa tanihi munhu, naswona hikwalaho ka yini a vuriwa “Rito ra vutomi”?

³ Eku sunguleni Yohane u vulavula hi ‘ku avelana’ loku tsakisaka. (Hlaya 1 Yohane 1:1-4.) Yesu, “Rito ra vutomi,” a a ri na Yehova “ku sukela eku sunguleni” tanihi xivumbiwa xo sungula xa Xikwembu, lexi ha xona “xi [tumbuluxeke] swilo hinkwaswo.” (Vakolosa 1:15, 16) Vagwinehi van’wana va lembe xidzana ro sungula va tivule lava nga riki na xidyoho ivi va landzula xivandla lexi fanelekaka xa Kriste elunghiselelweni ra Xikwembu. Kambe vaapostola va Yesu va n’wi twile a vulavula, va n’wi yingisa hi rixaladza, ni ku n’wi khumba. Va swi twile leswaku matimba ya Xikwembu a ma tirha ha yena. Kutani a ku ri ni vumbhoni lebyi voniweke hi mahlo bya leswaku a a ri N’wana wa Xikwembu loyi a hanyeke, la xanisekeke ni ku fa tanihi munhu. I “Rito ra vutomi” hikuva ‘vutomi lebyi nga heriki byi kombisiwile’ hi ku tirhisa Yesu, loyi Xikwembu xi lunghiseleleke nkutsulo ha yena.—Varhoma 6:23; 2 Timotiya 1:9, 10.

4. I yini lexi vuriwaka hi ku ‘avelana’ loku vatotiwa va nga na kona?

⁴ Hi leswi vaapostola va swi vuleke ni ku swi tsala, va ‘veka vumbhoni’ hi munhu la nga hava xidyoho Yesu Kriste. Yohane u ‘vike’ timhaka to tano leswaku lava totiweke va ‘avelana,’ kumbe ku va na xinakulobye, ni vadyandzhaka van’wana va Mfumo, na Tatana kun’we ni N’wana wa Yena. Ku ‘avelana’ loku ku vula vun’we naswona ku vanga ku tsaka lokukulu. (Psalma 133:1-3; Yohane 17:20, 21) Vagwinehi lava vengaka khale ka vanakulobye entirhweni wa Yehova a va ha ri na xona xinakulobye xo tano ni Xikwembu na Kriste.

“Xikwembu I Ku Vonakala”

5. I “mahungu” wahi lawa vaapostola va ma amukeleke eka Yesu, naswona ya ma khumba njhani mahanyelo ya Timbhoni ta Yehova?

⁵ Lexi landzelaka i “mahungu” lawa vaapostola va ma amukeleke eka Yesu. (Hlaya 1 Yohane 1:5-7.) Hi lawa: “Xikwembu i ku vonakala, kutani eka xona ku hava munyama ni kuntsongo [ku hava lexi nga kwetsimiki, lexi nga riki na mahanyelo lamanene, lexi nga riki na ntiyiso kumbe lexo biha].” Kutani Timbhoni ta Yehova ti papalata mikhuva hinkwayo leyo biha leyi fambisanaka ni munyama. (Yobo 24:14-16; Yohane 3:19-21; Varhoma 13:11-14; 2 Vakorinto 6:14; 1 Vatesalonika 5:6-9) Tanihi leswi vagwinehi van’wana va nga tshembangiki leswaku ku ni mintirho leyo biha, a va ri emunyamenl wa moya. Va tivule lava nga ni vutivi bya le xihundleni, kambe Xikwembu i ku vonakala, hayi xihundla xa munyama. Xi nyika ku vonakala ka moya eka Timbhoni ta xona leti tshembekaka.—Matewu 5:14-16; 1 Petro 2:9.

6. Loko hi ‘kombisa ntiyiso,’ i nkateko wihi lowu nga wa hina?

⁶ Loko hi vula leswaku hi na ‘ku avelana’ ni Xikwembu kambe “hi ri karhi hi famba emunyameni,” hi hanya vutomi lebyo biha, “ha hemba, kutani a hi hanyi hi ku landza ntiyiso,” kumbe ku hanya hi ku pfumelelana na wona. Kambe loko hi landzelela ndlela leyi pfumelelanaka ni ntiyiso, hi le ku vonakaleni, tanihi leswi Xikwembu xi nga ha kona. Hi ni ‘ku avelana’ ni Vakriste-kulorhi, lava hinkwerhu hi hlanganeke kun’we edyondzweni, elangutelweni ra moya, entirhweni wo endla vadyondzisiwa ni le ka timhaka tin’wana ta vugandzeri lebyi tengeke.

7. Hikwalaho ka yini ngati ya Yesu yi nga hi ‘basisaka exidyohweni hinkwaxo ke’?

⁷ Ku hambana ni vagwinehi van’wana vo sungula, hina lava hi ‘fambaka eku vonakaleni’ hi pfumela leswaku xidyoho a xi basanga. Ngati ya Yesu yi ‘hi rivalela xidyoho xihi na xihi’ hikuva a hi vadyohi va hi vomu. (Matewu 12:31, 32) Hakunene, ha tsaka leswi Xikwembu xi hi kombisaka musa hambi ku ri eka Vakriste lava hoxaka kambe va ri lava hundzukaka.—Psalma 103:8-14; Mikea 7:18, 19.

Xisekelo Xa Gandzelo

8, 9. (a) Hi le ka xisekelo xihi laha Yehova a nga ta hi rivalela? (b) Mayelana ni xidyoho, vagwinehi van’wana a va vula yini, naswona hikwalaho ka yini a va hoxile?

⁸ Yohane u ya emahlweni a tshaha xisekelo xa ku basisiwa exidyohweni. (Hlaya 1 Yohane 1:8–2:2.) Loko hi ku, “a hi dyohi,” hi landzula mhaka ya leswaku vanhu hinkwavo lava nga hetisekangiki va dyoha, naswona “Rito ra xona a ri kona eka hina.” (Varhoma 5:12) Kambe Xikwembu xa “tshembeka” naswona xa hi rivalela “loko hi tivula swidyoho swa hina” eka xona hi langutelo ro hundzuka leri hi susumetelaka ku tshika xiendlo lexo biha. (Swivuriso 28:13) Xikwembu xi vulavule hi lava va nga eka ntwanano lowuntshwa xi ku: “A nḍi nga ha anakanyi šidyoho ša v̌ona.” (Yeremia 31:31-34; Vaheveru 8:7-12) Loko xi va rivalela, xa tshembeka eka xitshembiso xexo.

⁹ Nakambe, Xikwembu xi “lulamile,” minkarhi hinkwayo xi namarhela milawu ya xona leyo lulama. Xi anerise ku lulama hi nkutsulo naswona xi nga ‘rivalela swidyoho swa hina ivi xi hi hlantswa ku homboloka ka hina hinkwako’ loko hi tivula swidyoho swa hina hi ku tshemba gandzelo ra Yesu. (Vaheveru 9:11-15) Hi rifu ra yena Mesiya u suse swidyoho, hi laha xiphongo lexi rhwalaka swidyoho a xi rhumeriwa mananga ha kona hi siku ro Phahlelana Mariyeta. (Levitika 16:20-22; Esaya 53:5, 8, 11, 12; 1 Petro 2:24) Vagwinehi van’wana va te: “A hi dyohanga,” xisweswo ‘va endla Yehova muhembi.’ Kambe i “Xikwembu lexi nga riki na ku hemba,” naswona Rito ra xona ri komba leswaku vanhu hinkwavo lava nga hetisekangiki va dyoha. (Tito 1:2; Eklesiasta 7:20; Varhoma 3:23) Kunene, ku vula leswaku “a hi dyohanga” a swi ta vula leswaku Rito ra Xikwembu a ri kona “eka hina,” a ri kona etimbilwini ta hina!—Ringanisa Vaheveru 8:10.

10. Yesu i “mhamba ya swidyoho” hi ndlela yihi?

¹⁰ Yohane u tsala “swilo leswi” malunghana ni xidyoho, ku rivaleriwa ni ku basisiwa leswaku hi nga endli xidyoho. Marito ya yena ma fanele ku hi susumetela ku ringeta hi matimba leswaku hi nga dyohi. (1 Vakorinto 15:34) Kambe loko hi endla “xidyoho” ivi hi hundzuka, hi ni “muyimeri eka Tatana”—“Yesu Kriste, la lulameke,” loyi a yimelaka swidyoho swa hina eka Xikwembu. (Vaheveru 7:26; ringanisa Yohane 17:9, 15, 20.) Yesu i “mhamba ya swidyoho.” Rifu ra yena ri khorwise vunene naswona ri endle leswaku swi koteka eka Xikwembu ku kombisa musa ivi xi susa xighwevo xa xidyoho eka Vaisrayele va moya ni ‘misava hinkwayo,’ ku katsa ni “ntshungu lowukulu.” (Varhoma 6:23; Vagalatiya 6:16; Nhlavutelo 7:4-14) Hi ri tlangela swonghasi gandzelo rero!

Yingisa Xikwembu Ivi U Kombisa Rirhandzu

11. I vumbhoni byihi lebyi hi tivaka ha byona leswaku hi “tshama” ni Xikwembu?

¹¹ Leswaku hi hambeta hi famba eku vonakaleni ka Xikwembu, hi fanele ku yingisa Yehova. (Hlaya 1 Yohane 2:3-6.) Ha swi xiya leswaku “hi tiva” Xikwembu, hi twisisa xona ni timfanelo ta xona, loko “hi hlayisa milawu ya [xona].” Un’wana ni un’wana la vulaka leswaku u tiva Yehova kambe a tsandzeka ku n’wi yingisa i “muhembi.” Entiyisweni, “rirhandzu ra [Xikwembu] ri hetisekile,” kumbe ri helerile, loko hi xiya Rito ra xona. Hi vumbhoni “lebyi” bya ku yingisa ni ku rhandza Xikwembu, ha swi tiva leswaku hi “tshame eka xona.” Naswona hi fanele ku famba hi laha N’wana wa xona a fambeke ha kona, entirhweni wo endla vadyondzisiwa, swinakulobye swa hina ni van’wana ni swin’wana.

12. I ‘nawu wihi wa khale’ lowu Vakriste va nga na wona, naswona wu tlhela wu va “lowuntshwa” hi ndlela yihi?

¹² Rirhandzu ra vamakwerhu na rona i ra nkoka. (Hlaya 1 Yohane 2:7, 8.) Yohane u tsala “nawu wa khale” lowu lava tshembekaka a va ri na wona “ku sukela eku sunguleni” ka vutomi bya vona tanihi Vakriste. I “wa khale” hikuva Yesu u wu nyikile eka malembenyana lama hundzeke loko a byela valandzeri vakwe ku ‘rhandzana kukotisa leswi yena a va rhandzeke.’ (Yohane 13:34) Nakambe hi “lowuntshwa” hikuva wu tlula rirhandzu ra muakelani leri a ri laviwa hi Nawu naswona wu lava ku rhandza ku nyiketela moya wa munhu hikwalaho ka vapfumeri-kulobye. (Levitika 19:18; Yohane 15:12, 13) Tanihi leswi rirhandzu ra hina ro tinyikela ri kombaka leswaku ku pfumelelana ni ‘nawu lowuntshwa i ka ntiyiso emhakeni ya Kriste kun’we ni ya hina, munyama wa hundza naswona ku vonakala ka ntiyiso ana se ka voninga’ exikarhi ka hina.

13. Hi ku ya hi 1 Yohane 2:9-11, i vamani lava nga “eku vonakaleni” ni lava va nga riki kona?

¹³ Kambe ke, i vamani hakunene va nga “ku vonakaleni”? (Hlaya 1 Yohane 2:9-11.) Ina, “loyi a vulaka leswaku u le ku vonakaleni, kambe a venga makwavo, u le munyameni wa moya ni sweswi.” Kambe “loyi a rhandzaka makwavo, u tshama eku vonakaleni,” naswona emhakeni ya yena a ku na “xilo lexi khunguvanyisaka.” Laha rito ra Xigriki ri kombetela eka ntlhamu lowu rhiyiweke wa swiharhi naswona ri vula xin’wana lexi nga vangaka ku wela exidyohweni. Kahle-kahle, loyi a tivulaka Mukriste a ri la vengaka makwavo “a nga tivi lomu a yaka kona, hikuva munyama wu dlele mahlo ya yena.” (Matewu 13:13-15) Xana xitsundzuxo lexi xi ta ku susumetela ku papalata munyama wa moya hi ku alela ku hambana ka munhu hi xiyexe, mavunwa ya vagwinehi, kumbe nchumu wun’wana wu onha rirhandzu ra wena ra vamakwenu?

Xisekelo Xa Ntshembo

14. “Lavantsongo” ni “vatatana” lava vuriweke hi Yohane i vamani xana?

¹⁴ Yohane u ya emahlweni a phofula ntshembo eka “vana lavantshwa,” entiyisweni u vula bandlha hinkwaro. (Hlaya 1 Yohane 2:12-14.) Swidyoho swa hina hi tsetseleriwe swona ‘hikwalaho ka vito ra Kriste,’ hikuva Xikwembu xi endle leswaku ku pona ku koteka ha yena ntsena. (Mintirho 4:12) Lava totiweke va “tiva Tatana” hikuva u va tswale hi moya wa yena. Van’wana i “vatatana”—lava dyuhaleke, lava nga ni ntokoto ni vapfumeri lava kuleke emoyeni. Va n’wi tiva Yesu, loyi a humeleleke “ku sukela eku sunguleni” hi mhaka ya leswi Xikwembu xi vumbeke yena emahlweni ka swilo hinkwaswo.

15. (a) ‘Vavanuna lavantshwa’ lava Yohane a vulavulaka na vona i vamani, naswona va n’wi ‘hlule njhani lowo biha’? (b) Nyika xikombiso xa ndlela leyi hi nga n’wi ‘hlulaka’ ha yona Sathana namuntlha.

¹⁵ ‘Vavanuna lavantshwa’ lava Yohane a vulavulaka na vona va nga ha va va ri vantsongo, Vakriste lava nga ni ntokoto wuntsongo. Va “hlurile lowo biha,” Sathana, hi ku ka va nga yimi ‘emakungwini ya yena.’ (2 Vakorinto 2:11) Hi xikombiso, leswi namuntlha swi nga katsa ku papalata ku tirivatisa loku nga basangiki, vuyimbeleri lebyi hlohlotelaka rimbewu ni swifaniso swa vanhu lava nga ambalangiki nchumu, leswi nga herisaka misinya ya milawu ya Vukriste ivi swi hetelela hi ku wela evunghwavaveni. ‘Vavanuna lavantshwa’ va hlula Sathana hikuva va “tiyile” emoyeni naswona “Rito ra Xikwembu” ri tshama eka vona. Onge hi nga fana na vona eku amukeleni ka malunghiselelo ya Xikwembu ya moya, hi lwisana ni vugwinehi, kutani hi hambeta hi famba eku vonakaleni ka Xikwembu.

Rirhandzu Leri Hi Nga Fanelangiki Ku Va Na Rona

16. I rirhandzu rihi leri hi nga fanelangiki ku va na rona, kambe i yini lexi faneleke ku va ntiyiso hi hina loko hi ri ni malangutelo ni maendlelo ya misava?

¹⁶ Hambi hi ri Vakriste lavantsongo kumbe lava kuleke, ku na rirhandzu leri hi nga fanelangiki ku va na rona. (Hlaya 1 Yohane 2:15-17.) A hi ‘fanelanga ku rhandza misava kumbe xin’wana ni xin’wana lexi nga eka yona.’ Kambe, hi fanele ku tihlayisa hi nga thyakisiwi hi vunjanganja bya vandla lero biha ra vanhu naswona a hi fanelanga ku hefemula ‘moya’ wa rona, kumbe hi kuceteriwa hi langutelo ra rona lerikulu ra xidyoho. (Vaefesa 2:1, 2; Yakobo 1:27) Loko a ho va ni malangutelo ni maendlelo ya misava, “rirhandzu ro rhandza Tatana” a ri nga ta va kona eka hina. (Yakobo 4:4) Sweswo i swakudya leswi faneleke ku anakanyisisiwa hi xikhongelo hakunene, a hi swona xana?

17. Vakriste a va fanelanga ku anerisa ku navela kwihi ka misava?

¹⁷ “Hinkwaswo leswi nge misaveni” a hi leswi Xikwembu xi swi tsakelaka. Leswi swi katsa “ku navela ka miri,” loku ku anerisa swi vulaka ku tsakisa minyanyuko yo tano ya xidyoho tanihi ku navela loko biha ka rimbewu. (1 Vakorinto 6:15-20; Vagalatiya 5:19-21) Nakambe lexi faneleke ku papalatiwa i ku namarhela “ku navela ka mahlo.” Muhandzu lowu vonekaka wu navetisa lowu siveriweke wu kanganyise Evha, naswona ku va Davhida a hlalela Batseba loko a hlamba swi yise exidyohweni lexikulu. (Genesa 3:6; 2 Samuel 11:2-17) Kutani ke, leswaku hi hambeta hi famba eku vonakaleni ka Xikwembu, hi fanele ku papalata ku tirivatisa loku thyakeke ni swilo swin’wana leswi yisaka eku naveleni loko biha ivi swi onha mbilu.—Swivuriso 2:10-22; 4:20-27.

18. Hikwalaho ka yini “ku tikurisa hi swa vutomi lebyi” ku nga ri ka nkoka, naswona ku tsandzeka ku tisa yini?

¹⁸ Swin’wana leswi tsakeriwaka hi va misava i “ku tikurisa hi swa vutomi lebyi.” Munhu la tikukumuxaka a nga ha tinyungubyisa hi rifuwo ra yena, bokisi rakwe ro hayeka mpahla ni leswi fanaka, leswi hinkwaswo ka swona swi nga lahlekaka. ‘Ku tikurisa ka yena’ ku nga ha nyanyula vanhu van’wana ivi ku tisa ku dzunisiwa ka xihatla kambe hayi nkateko wa Xikwembu.—Matewu 6:2, 5, 16, 19-21; Yakobo 4:16.

19. I yini lexi nga ta endleka eka misava leyi, naswona mhaka leyi yi fanele ku hi khumba njhani?

¹⁹ Tsundzuka leswaku “misava ya hundza” naswona yi ta lovisiwa. (2 Petro 3:6) Ku navela ni mintshembo ya yona swi ta herisiwa na yona, tanihi leswi vanhu lava va yi rhandzaka va nga ta lovisiwa. Yohane u ri: “Kambe loyi a endlaka ku rhandza ka Xikwembu, u tshama hi laha ku nga heriki.” Kutani a hi hlayiseni vutomi lebyi nga heriki emiehleketweni hi ku ‘tshika ku navela ka misava’ ivi hi hambeta hi famba eku vonakaleni ka Xikwembu.—Tito 2:11-14.

Tivoneleni Eka Vugwinehi

20. Lava ‘Iwisanaka na Kriste’ a va vuriwa yini, naswona ku vonakala ka vona ku kombise leswaku ku fike yini?

²⁰ Sweswi Yohane u tsundzuxa hi ta nala wa Kriste. (Hlaya 1 Yohane 2:18, 19.) U tsundzuxa vapfumeri-kulobye leswaku ‘va swi twile eka vaapostola leswaku nala wa Kriste wa ta.’ Ku humelela ka “valala vo tala va Kriste” swi kombe leswaku a ku ri “nkarhi wa mukumu,” xiphemu xo hetelela xa nkarhi wa vaapostola. Hambi leswi lava ‘lwisanaka na Kriste’ va vumbeke “nala wa Kriste” la hlanganeke, valala vo tala va Kriste va endle onge va gandzela Xikwembu ha un’we-un’we kambe “a va nga ri va hina” naswona va fularhele Vukriste bya ntiyiso. Ha tsaka leswi ku famba kumbe ku hlongoriwa ka vanhu vo tano namuntlha ku sivelaka ku thyakisiwa ka bandlha.

21. Hikwalaho ka yini Vakriste lava tswariweke hi moya va ri ni “vutivi,” naswona i “ntiyiso wihi lowu va wu tivaka?

²¹ Malangutelo ya vagwinehi ya soriwa hi Vakriste lava tshembekaka lava tswariweke hi moya. Leswi ku ‘cheriwa Moya hi loyi a kwetsimaka,’ Yehova, swi va pfunaka ku twisisa Rito ra yena, ‘hinkwavo va ni vutivi.’ (Hlaya 1 Yohane 2:20, 21.) Hakunene va tiva “ntiyiso” hi laha wu nga ha kona ha Yesu Kriste, kasi vagwinehi va mianakanyo leyi hoxeke ha yena. Tanihi leswi ku nga “hava vunwa lebyi humaka entiyisweni,” varhandzi hinkwavo va Yehova va Iwisana ni malangutelo yo tano ya mavunwa ni lava va ma seketelaka.

22. Xana C. T. Russell u endle yini loko un’wana wa vanghana va yena vo sungula a landzule nkutsulo?

²² Entiyisweni, “Munhu wa vunwa i mani xana, loko a nga ri loyi a kanetaka leswaku Yesu i Mesiya,” Mutotiwa wa Xikwembu? (Hlaya 1 Yohane 2:22-25.) Kunene, ‘loyi a landzulaka Tatana ni N’wana i nala wa Kriste!’ Lexi tsakisaka, loko munghana wo sungula wa Charles T. Russell xichudeni xa Bibele, a landzule nkutsulo, Russell u tshike ku endla xinakulobye na yena ivi a sungula ku kandziyisa magazini lowu, lowu minkarhi hinkwayo wu twariseke ntiyiso ehenhleni ka masungulo ya Kriste, ntirho wa Vumesiya ni ntirho wa rirhandzu tanihi “mhamba ya swidyoho.”

23. ‘Ku vula N’wana’ ku khumba xinakulobye xa hina na Xikwembu ni malangutelo ya hina hi ndlela yihi?

²³ Vagwinehi lava landzulaka Kriste a va na yena Yehova tanihi Munghana wa vona. (Yohane 5:23) Kambe hina lava hi ‘vulaka N’wana erivaleni hi na yena Tatana,’ hi le ka xinakulobye lexi amukelekaka ni Xikwembu. (Matewu 10:32, 33) Valandzeri vo sungula lava tshembekaka va Yesu va namarhele leswi va swi tweke malunghana ni N’wana wa Xikwembu “ku sukela eku sunguleni” ka vutomi bya vona tanihi Vakriste. Naswona loko ntiyiso lowu fanaka wu ri etimbilwini ta hina, hi ta “tshama” kun’we ni Xikwembu na Kriste naswona hi ta amukela ‘leswi a nga hi tshembisa swona,’ vutomi lebyi nga heriki.—Yohane 17:3.

Ku Dyondzisiwa Hi Yehova Xikwembu

24. I vamani lava ‘totiweke’ hi moya lowo kwetsima, naswona hikwalaho ka yini va nga “faneli ku dyondzisiwa hi munhu”?

²⁴ Leswaku hi famba eku vonakaleni ka Xikwembu naswona hi nga hambukisiwi hi vagwinehi, hi lava xiletelo lexinene xa moya. (Hlaya 1 Yohane 2:26-29.) Lava va tswariweke hi moya va “totiwe” hi moya lowo kwetsima, va tive Xikwembu ni N’wana wa xona, naswona a va “faneli ku dyondzisiwa hi munhu [mugwinehi].” Hi moya wa xona lowu totaka, Xikwembu xi “dyondzisa” Vaisrayele va moya “ehenhla ka hinkwaswo” leswi lavekaka leswaku va xi gandzela hi laha ku amukelekaka. (Yohane 4:23, 24; 6:45) Ha tsaka leswi tanihi Timbhoni ta Yehova hi amukeleke xitsundzuxo xo tano xa moya eka Xikwembu hi “nandza lowo tshembeka, lowa vutlhari.”—Matewu 24:45-47.

25, 26. (a) Hikwalaho ka yini lava totiweke va ‘vulavula hi ku ntshunxeka’? (b) Swi vula yini ku ‘endla leswo lulama’?

²⁵ Yohane u khongotela vatotiwa lava leteriweke kahle leswaku va “tshama” ni Xikwembu. Lava va ‘tshamaka’ na Yehova hi ku fanana va ni vun’we ni N’wana wa yena. (Yohane 14:19-21) Vun’we byo tano bya khongoteriwa leswaku “loko a humelela, hi tiya nhlana hi nga tumbeli hi mhaka ya tingana, eku fikeni ka yena,” hi leswaku, enkarhini wa Vukona bya Yena.

²⁶ Tanihi leswi sweswi hi hanyaka enkarhini wa ‘vukona’ bya Yesu, hi nga tiyiseka njhani leswaku a hi na leswi swi nga hi khomisaka tingana ni leswaku hakunene hi famba eku vonakaleni ka Xikwembu ke? Hi ku ‘endla leswo lulama.’ Yohane u anakanyisisile a ku; ‘Loko hi tiva leswaku Xikwembu xi lulamile, ha swi xiya leswaku un’wana ni un’wana loyi a endlaka leswo lulama, u tswariwe hi xona.’ ‘Ku endla leswo lulama’ swi vula ku yingisa milawu ya Xikwembu, ku papalata leswi nga lulamangiki ni ku hlanganyela eka mintirho yo tano leyinene tanihi ku endla vadyondzisiwa ni ku pfuna vapfumeri-kulorhi. (Marka 13:10; Vafilipiya 4:14-19; 1 Timotiya 6:17, 18) Ku va la ‘tswariweke’ hi Xikwembu swi vula ku ‘tswariwa nakambe’ tanihi vana va moya.—Yohane 3:3-8.

27. Xana muapostola Yohane u ta ya emahlweni a hi kombisa yini?

²⁷ Kutani Yohane u kombisile ndlela yo hambeta u famba eku vonakaleni ka Xikwembu. U ye emahlweni a kombisa ndlela yo hanya tanihi vana va Xikwembu. Xana leswi swi lava yini?

Tinhlamulo Ta Wena Hi Tihi?

◻ I vumbhoni byihi lebyi Yohane a byi nyikeke bya leswaku N’wana wa Xikwembu u hanyile, a xaniseka ni ku fa tanihi munhu?

◻ Yesu Kriste i “mhamba ya swidyoho” hi ndlela yihi?

◻ I nawu wihi lowu Vakriste va nga na wona lowu nga wa “khale” ni “lowuntshwa”?

◻ Ku ta endleka yini eka misava leyi, naswona hikwalaho ka yini mhaka leyi yi fanele ku hi khumba tanihi Vakriste?

◻ Lava totiweke va nga tiyiseka njhani leswaku va famba eku vonakaleni ka Xikwembu?

[Rito leri tshahiweke eka tluka 12]

Xana u kombisa ku tlangela gandzelo ra Yesu?