Ku Tirhisiwa Loko Biha Ka Matimba Ku Ta Hela Hakunene

HOSI ya khale Solomoni yi vulavule hi ku tirhisiwa ka matimba hi ndlela yo biha esikwini ra yona yi ku: “Nḍi engeta kambe nḍi ṭunḍuka mašangu hikwawo [ku tirhisa ka matimba hi ndlela yo biha] la’ma humelelaka e hansi ka dyambu, nḍi v̌ona mihloti ya la’v̌a šanisiwaka, kambe ku nga ri na loyi a v̌a miyetaka. E tlhelo ra v̌ašanisi v̌a v̌ona, nḍi v̌ona ku nonoṅhwa. Kambe ku nga ri na mumiyeti wa v̌ona.”—Eklesiasta 4:1.

U nga ha vutisa, ‘Leswi ku tirhisiwa ka matimba hi ndlela yo biha ku nga khale ku ri kona, xana ku ta tshama eka hina hi laha ku nga heriki?’ E-e, a ku nga vi kona. Hikuva, tanihi loko Solomoni hi yexe a tsarile ehansi ko huhuteriwa, ku na Loyi a swi xiyaka hinkwaswo: “Loko [wena] u nga v̌ona e tikweni rinwana e šisiwana ši šanisiwa, ni ku lulama ni ku av̌anyisa loko ŝi hombolokisiwa, u nga ṭhuki u hlamala ha ŝona, hikuv̌a l’a tlakukeke henhla ka uṅwana l’a tlakukeke o kona l’a langutelaka, ni Muungameri o kona l’a nge henhla ka v̌ona.”—Eklesiasta 5:8.

Rito ra Xikwembu, Bibele leyo Kwetsima, ri komba leswaku Yehova, La Tlakukeke, u ni vutlhari ni matimba hi laha ku nga heriki, kun’we ni ku hetiseka eka vululami, naswona hi yena xikombiso xa rirhandzu. Hikwalaho ka ku va Xikwembu xo tano, a nga ka a nga pfumeleli swiyimo leswi swi nga lulamangiki hi laha ku nga heriki. Mupisalema Davhida u tsarile: “U nga hlunḍuki, ŝi nga ku dyohisa ntsena, Hikuv̌a la’v̌o biha v̌a ta susiwa, Kambe la’v̌a ṭhembaka Yehova v̌a ta fuma misav̌a.”—Psalma 37:8, 9.

Hi kuma ku tiyisekisiwa kun’wana eka marito ya muprofeta Esaya: “Nḍi ta ba . . . ŝidyohi hikwalaho ka ku dyoha ka ŝona; nḍi ta herisa v̌ukulu bya v̌atiarisi, ndzi ṭongahata la’v̌a tikurisaka [vatirhisi va matimba hi ndlela yo biha].”—Esaya 13:11.

Kambe ku hundze malembe xidzana yo tala marito wolawo ya tsariwile, kutani hikwalaho ka yini hi tshemba leswaku Yehova Xikwembu u ta hetisisa xitshembiso xa yena xo herisa ku tirhisiwa hinkwako ka matimba hi ndlela yo biha? Hikwalaho ka ku va eminkarhini leyi hundzeke u kombisile ku tiyimisela kakwe ko endla tano. Emahlweni ka Ndhambi ya siku ra Nowa, a ku ri na ku tirhisiwa lokukulu ka matimba hi ndlela yo biha. Hi hlaya leswaku “misav̌a a yi onhakile.” (Genesa 6:5, 11) Kutani i yini ku onhaka loko ku nga ri ku tirhisiwa ka matimba hi ndlela yo biha? A swi ri tano na hi miti yo biha ya Sodoma na Gomora esikwini ra Lota. (Genesa 18:20, 21; 19:4-29) Etimhakeni hinkwato Yehova u herise ku tirhisiwa loku ko biha. Kutani ha swi vona leswaku Yehova Xikwembu a hi loyi a pfumelelaka ku tirhisiwa loko biha ka matimba hi laha ku nga heriki.

Tanihi xisekelo lexi engetelekeke eka hina xo hi tiyisekisa leswaku Yehova u ta teka goza hi leswi a nga na mavondzo hi vito rakwe, naswona ku tirhisiwa hinkwako ka matimba hi ndlela yo biha i ndzhukano eka vukulukumba byakwe. Xiya ku hlangana loku eka matsalwa lama: “L’a šanisaka šisiwana o sanḍa muendli wa šona.” “L’a hlekaka šisiwana o sola l’a nwi v̌umbeke.”—Swivuriso 14:31; 17:5.

Kutani hi nga tiyiseka, leswaku la Tlakukeke a nga ka a nga pfumeleli ku rhukaniwa minkarhi hinkwayo. Swoleswo swi siya xivutiso xin’we ntsena: Xana ku tirhisiwa ka matimba hi ndlela yo biha ku ta hela rini?

Ku Ta Hela Rini?

Rito ra Xikwembu ri hi byela leswaku “šilo šiṅwana ni šiṅwana ši ni nkari wa šona, kutani nkari wu kona wa hikwaŝo leŝi endliwaka e hansi ka tilo.” (Eklesiasta 3:1) Van’wana va nga ha helela nkarhi wa Xikwembu mbilu, kambe ha byeriwa: “Hosi a yi hlweli ku endla leswi yi nga tshembisa swona, . . . kambe yi lehisa mbilu hikwalaho ka n’wina; a yi lavi leswaku ni un’we wa n’wina a lova.” —2 Petro 3:9.

Ku hetiseka ka vuprofeta bya Bibele ku komba leswaku hi hanya emasikwini ya makumu ya misava leyi yo biha, kumbe mafambiselo ya swilo. Rixaka leri ri vone ku hetiseka ka vuprofeta lebyikulu bya Yesu mayelana ni vukona bya yena ni ku hela ka mafambiselo lawa ya swilo: tinyimpi, ku tsekatseka ka misava, tindlala, mintungu, ku andza ka vuhomboloki ni ku twarisiwa ka mahungu lamanene ya Mfumo wa Xikwembu. (Matewu 24:1-35; Luka 21:10, 11) Swoleswo swi kombetela nkarhi wa hina tanihi masiku ya makumu ya misava leyi yo biha.

Hikuva lawa ya ri masiku ya makumu, hi nga tshemba ku byi vona hi ku hatlisa vuprofeta bya Sofonia 3:8 byi hetiseka: “Hikwalaho, nḍi languteleni, ku v̌ula Yehova, e sikwini le’ri nḍi nga ta yima ha rona e ku phanga, hikuv̌a nḍi kanerile ku hlengeleta matiko ni ku hlanganisa ku fuma, nḍi ta tšhela henhla ka wona e v̌ukari bya mina, ni ku pfura hikwako ka v̌ukari bya mina; Hikuv̌a misav̌a hikwayo yi ta hisiwa hi nḍilo wa rilonḍo ra mina.”

Hakunene, marito wolawo i xitiyisekiso xa leswaku Yehova Xikwembu u ta herisa ku tirhisiwa ka matimba hi ndlela yo biha.