Vatsundzuxi Lava Nga Ni Vutshila—I Nkateko Eka Vamakwavo

“Nḍi ta ku tlherisela v̌aav̌anyisi la’v̌a fanaka ni v̌a khale, ni v̌aṭunḍuši la’v̌a fanaka ni la’v̌o ranga.”—ESAYA 1:26.

1, 2. (a) Xana Swivuriso 12:15 na 19:20 swi wu kombisa njhani nkoka wa xitsundzuxo ke? (b) I yini lexi lavekaka ku sungula loko hi ta amukela xitsundzuxo, naswona i ntokoto wihi lowu kombisaka leswi?

TERRI i wanhwana wa vatswari va Vukriste. Exikolweni a a ri ni munghana lontsongo loyi na yena a a “ri entiyisweni.” Hambi swi ri tano, Terri u xiye leswaku eku heleni ka xikolo xo sungula nakulobye a a nga ha chivirikeli ripfumelo ra yena tanihi le ku sunguleni. Loko va ya emahlweni kun’we ekholichini, munghana wa yena u ve loyi a nga ha hlanganyeriki minkarhi hinkwayo minhlangano ya bandlha naswona u sungule ku xopa swihoxo eka Sosayiti ya Watch Tower ni le bandlheni. Hambi swi ri tano, Terri u khongele hi matimba a khongelela munghana wa yena naswona u n’wi tsundzuxe minkarhi hinkwayo leswaku a ringeta ku tshama a tiyile tanihi Mukriste. Eku heteleleni, matshalatshala ya Terri ma hakeriwile. Loko a ri eka ntangha ya nhungu, munghana wa yena u tlhele a va kona minkarhi hinkwayo eminhlanganweni naswona eku heteleleni a khuvuriwa. Mawaku nkateko wa yena! Naswona mayana hakelo ya Terri munghana wakwe lontsongo la tshembekaka!

² Hikwalaho ka ntokoto lowu, xana u kona loyi a nga solaka xilaveko xa Vakriste xo tsundzuxana hi rirhandzu nkarhi na nkarhi? Bibele ya hi khutaza: “Yingisela ku byeriwa, u amukela ku laya, U ta tlhariha munḍuku.” (Swivuriso 19:20; 12:15) Munghana wa Terri u landzelele xitsundzuxo xexo. Kambe ku vuriwa yini hi loko Terri a a nga vanga na rirhandzu, ku phikelela ni xivindzi xo hambeta a nyikela mpfuno hi malembe yo tala? Ina, leswaku hinkwerhu ka hina hi “yingisela ku byeriwa,” ku fanele ku va ni mutsundzuxi. Loyi u ta va mani xana?

Xitsundzuxo—Lexi Humaka Eka Mani?

3. I vamani lava lunghiseleriweke hi Yehova ku nyika xitsundzuxo hi nkarhi lowu faneleke ebandlheni ra Vukriste?

³ Yehova Xikwembu u tshembise ku nyika vanhu va yena vatsundzuxi enkarhini wa hina. U te: “Nḍi ta ku tlherisela . . . v̌aav̌anyisi la’v̌a fanaka ni v̌a khale.” (Esaya 1:26) Ngopfu-ngopfu xitshembiso lexi xi hetiseke eka vakulu lava vekiweke ebandlheni ra Vukriste. Ku tsundzuxa i xivumbeko xin’wana xo dyondzisa, naswona vakulu ngopfu-ngopfu va “kota ku dyondzisa.” (1 Timotiya 3:2) Kumbexana muapostola Pawulo a a ehleketa ngopfu-ngopfu hi vakulu loko a ku: “Na loko un’wana a kumiwa a ri karhi a endla xihoxo, n’wina lava mi nga va Moya, n’wi vuyiseni hi moya wa musa.” (Vagalatiya 6:1) Kambe xana vakulu hi vona ntsena lava nga nyikaka xitsundzuxo ke?

4, 5. (a) I swikombiso swihi swa Matsalwa leswi kombisaka leswaku a hi vakulu ntsena lava faneleke ku nyikela xitsundzuxo? (b) Hi swihi swiyimo swin’wana swo fanekisela swa manguva lawa leswi eka swona Vakriste va nyikelaka xitsundzuxo ematshan’wini ya vakulu?

⁴ E-e. Terri a a nga ri nkulu, kambe xitsundzuxo xa yena xi tise mimbuyelo leyinene eku heteleleni. Nakambe, tsundzuka Naaman murhangeri wa vuthu ra le Siriya. U amukele xitsundzuxo lexinene lexi humaka eka wanhwana lontsongo wa Muisrayele ivi endzhaku a amukela xitsundzuxo lexi humaka eka malandza ya yena. Davhida u ponisiwe enandzwini wa ngati hi xitsundzuxo xa nkarhi lowu faneleke xa Abigail, nkata Nabal. Naswona jaha Elihu ri ve ni xitsundzuxo xa vutlhari eka Yobo ni “v̌anakulobye” vanharhu.—1 Samuel 25:23-35; 2 Tihosi 5:1-4, 13, 14; Yobo 32:1-6.

⁵ Hi ku fanana namuntlha, ku tsundzuxa a hi mfanelo ya vakulu ntsena. Vatswari va tsundzuxa vana va vona nkarhi na nkarhi. Vantshwa vo fana na Terri va tala ku humelela eku tsundzuxeni ka tintangha ta vona. Naswona Bibele yi khutaza vamakwerhu va xisati lava kuleke hi ku kongoma leswaku va “dyondzisa leswo lulama,” ngopfu-ngopfu eka vavasati lavantsongo ebandlheni. (Tito 2:3-5) Entiyisweni, hi ku twisiseka hinkwerhu hi na wona ndzhwalo wo pfunana hi ndlela leyi. Muapostola Pawulo u te: “Chavelelanani, mi akisana, hi laha mi swi endlaka ha kona ni sweswi.”—1 Vatesalonika 5:11.

Tipakani Ta Xitsundzuxo Xa Vukriste

6. Hi tihi tipakani tin’wana ta ku tsundzuxa ka Vukriste?

⁶ Xana hi tihi tipakani ta ku tsundzuxa ka Vukriste ke? Tona i ku pfuna ku endla nhluvuko ni ku hambeta endleleni leyinene, ku tlhantlha swiphiqo, ku hlula swihinga, kumbexana ni ku lunghisa mahanyelo yo biha. Pawulo u kombetele eka swivumbeko swin’wana swa ku tsundzuxa loko a khutaze Timotiya ku ‘khorwisa, ku laya ni ku khongotela; a nga tsandzeki hi tlhelo ro lehisa mbilu ni le ku dyondziseni.’ (2 Timotiya 4:1, 2) Hakunene i vutshila ku tsundzuxa un’wana hi ndlela leyi a nga twisisaka handle ko twa ku vava.

7, 8. (a) Hi swihi swiyimo swin’wana leswi eka swona xitsundzuxo xi languteriwaka ebandlheni ra Vukriste? (b) Hi le ka swiendlakalo swihi laha Mukriste a nga ha vaka a nga languteli ndzayo kambe a yi lava ke?

⁷ Xana xitsundzuxo xi fanele xi nyikeriwa rini ke? Vatswari va ni nkarhi wo tsundzuxa vana va vona nkarhi na nkarhi, naswona vana hakanyingi va langutela leswi. (Swivuriso 6:20; Vaefesa 6:4) Ebandlheni, xichudeni xi rindzela xitsundzuxo loko xi nyikela nkulumo eka Xikolo xa Vutirheli bya le Tilweni. Naswona muhuweleri lontshwa wa Mfumo u rindzela mpfuno ni xitsundzuxo loko a ri karhi a vupfa a va mutirheli wa Mukriste. (1 Timotiya 4:15) Minkarhi yin’wana vanhu van’wana lava va lavaka mpfuno va ta tshinelela vakulu kumbe van’wana ebandlheni.

⁸ Hambi swi ri tano, nkarhi wun’wana xitsundzuxo xi fanele ku nyikeriwa eka lava va nga xi langutelangiki kumbe lava nga xi laviki. Kumbexana un’wana u heleriwa hi ku chivirika ka yena entirhweni wa Yehova, ‘a hambuka’ tanihi munghana wa Terri. (Vaheveru 2:1) Munhu a nga ha va a ri na ku hambana ka xiviri ka munhu hi xiyexe ni munhu un’wana ebandlheni. (Vafilipiya 4:2) Kumbe un’wana a nga ha va a lava mpfuno emhakeni ya ku tibombisa lokunene ka misisi kumbe ku ambala, kumbe eku hlawuleni ka vanghana kumbe vuyimbeleri.—1 Vakorinto 15:33; 1 Timotiya 2:9.

9, 10. (a) Hikwalaho ka yini ku nyikela ndzayo ya Vukriste swi nga lavaka xivindzi ke? (b) Hambi swi ri tano, hikwalaho ka yini Mukriste a fanele ku nyika ndzayo loko yi laveka?

⁹ Loko muprofeta Hanani a tsundzuxe Hosi Asa wa Yuda, Asa u karihile ngopfu lerova a “ṅwi nghenisa khoṭweni”! (2 Tikronika 16:7-10) Munhu a a fanele ku va ni xivindzi leswaku a tsundzuxa hosi emasikwini wolawo. Namuntlha, vatsundzuxi na vona va nga ha fanela ku va ni xivindzi, tanihi leswi ku nyikela ndzayo ku nga ha sungulaka hi ku hlundzukisa. Mukriste un’wana la nga ni ntokoto u tshike ku laya nakulobye loyi a ha riki muntshwa. Xivangelo xa kona? U hlamuserile: “Hi vanghana lavanene sweswi, naswona ndzi lava ku byi tshika hi ndlela yoleyo!” Hambi swi ri tano, hakunene ku byi tshika ku nyika mpfuno loko wu laveka a hi mfungho wa munghana lonene.—Swivuriso 27:6; ringanisa Yakobo 4:17.

¹⁰ Kahle-kahle, ntokoto wu kombise leswaku loko mutsundzuxi a ri ni vutshila, hakanyingi ku vaviseka ku nga hungutiwa, naswona pakani ya ndzayo hakanyingi yi nga fikeleriwa. I yini lexi lavekaka leswaku u va mutsundzuxi la nga ni vutshila? Leswaku hi hlamula leswi, a hi xiyisiseni swikombiso swimbirhi, xin’we lexinene ni xin’we lexo biha.

Pawulo—Mutsundzuxi La Nga Ni Vutshila

11. Hikwalaho ka yini Vakorinto vo tala va amukele ndzayo ya Pawulo hambi leswi a a tala ku vulavula hi ku tiyisa?

¹¹ Muapostola Pawulo u ve ni minkarhi yo tala yo nyikela ndzayo, naswona minkarhi yin’wana u ve ni swilo leswi vavisaka leswaku a swi vula. (1 Vakorinto 1:10-13; 3:1-4; Vagalatiya 1:6; 3:1) Hambi swi ri tano, xitsundzuxo xa yena a xi tirha hikuva lava a xi kongomisiwe eka vona a va swi tiva leswaku Pawulo a a va rhandza. Tanihi leswi a byeleke Vakorinto a ku: “Ndzi mi tsalerile, ndzi ri karhi ndzi twa ku vava ngopfu, hi mbilu leyi karhatekaka swinene, ni mihloti leyo tala; a ku nga ri ku mi tlhava mbilu, kambe a ku ri ku endlela leswaku mi tiva rirhandzu lerikulu ngopfu leri ndzi mi rhandzaka ha rona.” (2 Vakorinto 2:4) Vo tala va Vakorinto va amukele ndzayo ya Pawulo hikuva a va swi tiva leswaku yi nyikiwe handle ka minsusumeto ya vutianakanyi, tanihi leswi ‘rirhandzu . . . ri nga tilaveriki swa rona.’ Nakambe, a va tshemba leswaku a nga vulavuli hi ku hlundzuka hikuva “rirhandzu . . . a ri na ximbilwa-mbilwana; rirhandzu a ri na xiveketela xa leswo biha.”—1 Vakorinto 13:4, 5.

12. I mfanelo yihi leyi nga ta endla leswaku mutsundzuxi wa Mukriste a kuma mimbuyelo leyinene hi ku olova? Kombisa

¹² Ni namuntlha, swi olova ngopfu ku amukela hambi yi ri ndzayo yo vavisa loko hi tiva leswaku loyi a hi tsundzuxaka wa hi rhandza, a nga vulavuli hikwalaho ko hlundzuka, naswona a nga na minsusumeto ya vutianakanyi. Hi xikombiso, loko nkarhi lowu nkulu a vulavulaka ni vantshwa ebandlheni ku ri loko a va sola ntsena, vantshwa va nga titwa va hlundzukisiwa hi ku olova. Kambe ku vuriwa yini loko nkulu a ri ni vuxaka lebyinene ni vantshwa ke? Ku vuriwa yini loko a famba na vona entirhweni wa nsimu, a tshineleleka eHolweni ya Mfumo, naswona a va khutaza leswaku va vulavula na yena ehenhleni ka swiphiqo swa vona, mintshembo ni minkanakano, kumbexana hambi ku ri ku va rhambela ekaya ra yena nkarhi na nkarhi (hi mpfumelelo wa vatswari va vona)? Kutani, loko a fanele ku va nyikela xitsundzuxo, vantshwa va ta xi amukela, va tiva leswaku xi huma eka nakulobye.

Musa Ni Ku Titsongahata

13. (a) Ndzayo ya Vukriste yi fanele kahle-kahle yi seketeriwa eka yini? (b) Kutani ke, i yini lexi lava va nyikelaka ndzayo ebandlheni ra Vukriste va faneleke va papalata ku xi endla?

¹³ A ku ri ni xivangelo xin’wana xa ku humelela ka ndzayo ya Pawulo. A a tiseketela hi vutlhari bya Xikwembu, ku nga ri emiehleketweni ya yena n’wini. Tanihi leswi a tsundzuxeke mutsundzuxi Timotiya a ku: “Matsalwa hinkwawo ma huhutiwile hi Xikwembu, ma pfuna ku dyondzisa, ni ku laya, ni ku ololoxa, ni ku tolovetisa leswo lulama.” (2 Timotiya 3:16; ringanisa 1 Vakorinto 2:1, 2) Hi ku fanana namuntlha vatsundzuxi va Vukriste va seketela leswi va swi vulaka eMatsalweni. I ntiyiso leswaku, endyangwini, vatswari a va tshahi Bibele minkarhi hinkwayo loko va tsundzuxa vana va vona. Hambi swi ri tano, hambi vatswari va Vukriste va khutaza ku yingisa, ku basa, ku khathalela van’wana, ku hlayisa nkarhi kumbe nchumu wun’wana, minkarhi hinkwayo ku fanele ku va ni xisekelo xa Matsalwa xa leswi va swi vulaka. (Vaefesa 6:1; 2 Vakorinto 7:1; Matewu 7:12; Eklesiasta 3:1-8) Ebandlheni, hi fanele ku xiya leswaku hi nga ringeti ku veka malangutelo ya hina ya munhu hi xiyexe hi matimba kumbe matshalatshala ehenhla ka van’wana. Naswona vakulu va fanele ku papalata ku voyamisa MatsaIwa ku ma endla leswaku ma seketela mianakanyo yin’wana ya leswi va voyameleke eka swona hi matimba. (Ringanisa Matewu 4:5, 6.) Minkarhi hinkwayo ku fanele ku va ni xivangelo xa ntiyiso xa Bibele xa ndzayo yin’wana ni yin’wana leyi va yi nyikelaka.—Psalma 119:105.

14, 15. (a) Vula mfanelo leyi endlaka leswaku swi olova ku amukela ndzayo. (b) Hikwalaho ka yini swi ri swa nkoka eka mutsundzuxi ku hlakulela mfanelo leyi?

¹⁴ Nakambe, ndzayo yi tirha ngopfu loko yi nyikeriwa hi moya wa musa. Pawulo a a swi tiva leswi. Hi yona mhaka leyi, loko a vulavula hi loyi a endlaka xihoxo a nga si swi tiva, Pawulo a khutazeke lava nga ni moya leswaku “va n’wi vuyisa hi moya wa musa.” (Vagalatiya 6:1) U tlhele a laya Tito ku tsundzuxa van’wana leswaku “va nga tshuki va onha van’wana mavito, kambe va va lavo rhula, va va ni vuxaka, masiku hinkwawo va va ni musa eka vanhu hinkwavo.”—Tito 3:1, 2; 1 Timotiya 6:11.

¹⁵ Hikwalaho ka yini ku laveka musa ke? Hikuva mintlhaveko leyi nga lawulekiki ya onha. Marito lama hlundzukeke ya tlhontlha marito yo tala yo hlundzuka, naswona swa nonon’hwa ku ehleketa loko ku hlundzuka ku tinyikile matimba ngopfu. Hambi loko loyi a tsundzuxiwaka a hlundzuka, leswi a swi vangeli mutsundzuxi ku endla leswi fanaka. Kambe, langutelo ra musa ra mutsundzuxi ri nga ha pfuna ku antswisa swilo. “Ku hlamula lo’kunene ka releta v̌ukari.” (Swivuriso 15:1) Leswi i ntiyiso hambi loko mutsundzuxi ku ri mutswari, nkulu kumbe un’wana.

16. Hikwalaho ka yini munhu a fanele a xixima minkarhi hinkwayo loko a nyikela ndzayo?

¹⁶ Eku heteleleni, xiya leswi Pawulo a swi vuleke eka nkulu lontsongo Timotiya: “U nga holoveli munhu nkulukumba, kambe n’wi khongotele tani hi tata wa wena; vavanuna lavantshwa u fanele ku va khoma tani hi vamakwenu va xinuna. Vavasati lavakulu u va languta tani hi vamanana, ni vavasati lavantshwa tani hi vamakwenu va xisati, hi ndlela ya ku tenga matlhelo hinkwawo.” (1 Timotiya 5:1, 2) Mawaku xitsundzuxo lexinene! Anakanya ndlela leyi wansati lonkulu a a ta titwa ha yona loko nkulu lontshwa, kumbe a ri la ringanaka ku va n’wana wa yena, a n’wi tsundzuxa hi ndlela yo n’wi holovela kumbe yo n’wi delela. A swi ta antswa ngopfu loko mutsundzuxi a a lo yimanyana a ehleketa: ‘Hi ku xiya vumunhu ni malembe ya munhu loyi, ku nga va ndlela ya rirhandzu ni ya matimba ya ku nyikela yinhla leyi ya xitsundzuxo? Loko a ku ri mina a ndzi ta lava ku tshineleriwa hi ndlela yihi ke?’—Luka 6:31; Vakolosa 4:6.

Xitsundzuxo Xa Vafarisi

17, 18. Hi xihi xin’wana lexi endleke leswaku xitsundzuxo lexi a xi nyikeriwa hi Vafarisi xi nga pfuni?

¹⁷ Manuku tshika xikombiso lexinene xa Pawulo kutani u xiya xikombiso xo biha—lexiya xa varhangeri va vukhongeri va Vayuda va siku ra Yesu. Va nyikile xitsundzuxo swinene, kambe hakanyingi tiko a ri pfunekanga eka xona. Hikwalaho ka yini?

¹⁸ A ku ri ni swivangelo swo tala. Xo sungula, xiya nkarhi lowu Vafarisi va tshinyeke Yesu hikwalaho ka leswi vadyondzisiwa va yena va nga hlambangiki mavoko ya vona emahlweni ka swakudya. Kavula, vamanana vo tala va tsundzuxa vana va vona ku hlamba mavoko ya vona emahlweni ko dya, naswona tanihi leswi ku nga xiendlo xa nsivela-mavabyi, ku na swo tala swo bumabumela leswi. Kambe Vafarisi ngopfu-ngopfu a va nga khathaleli nsivela-mavabyi. Eka vona, ku hlamba mavoko a ko va mukhuva, kutani a va hlundzukisiwa hi leswi vadyondzisiwa va Yesu a va nga wu landzeli mukhuva lowu. Hambi swi ri tano, hi laha Yesu a hambeteke ku va kombisa ha kona, a ku ri na swiphiqo leswikulu swo tala elsrayele leswi a swi ta lava nkhathalo wa vona. Hi xikombiso, van’wana a va tirhisa mukhuva wa Vafarisi tanihi ndlela yo papalata ku yingisa nawu wa vuntlhanu eka Milawu ya Khume: “Šišima tata wa wena ni mana wa wena.” (Eksoda 20:12; Matewu 15:1-11) Lexi vavisaka, vatsari ni Vafarisi a va yengiwa hi vuxokoxoko lerova “va nga vi na mhaka ni leswikulu swa Nawu, ku nga ku lulama, ni tintswalo ni ku pfumela.”—Matewu 23:23.

19. Xana Vakriste va manguva lawa va nga ku papalatisa ku yini ku wela entlhan’wini wa ku va ni xivangelo xa vona vini xa vutianakanyi?

¹⁹ Vatsundzuxi namuntlha va fanele ku tivonela leswaku va nga endli xihoxo lexi fanaka. Kavula, va fanele ku papalata ku va ni xivangelo xa vona vini xa vutianakanyi, va katseka swinene eka vuxokoxoko lerova va rivala “leswikulu.” Eka timhaka letintsongo, hi khutaziwa ku “amukelana” hi rirhandzu. (Vakolosa 3:12, 13) Vuswikoti byo xiya nkarhi wo papalata ku kanetana hi nchumu wun’wana ni loko ndzayo yi laveka hakunene i xilo xin’wana lexi vangelaka munhu ku va ni ‘timfanelo ta moya.’—Vagalatiya 6:1.

20. Hikwalaho ka yini xikombiso xa munhu hi xiyexe xi ri xa nkoka swinene emhakeni ya ku nyika xitsundzuxo?

²⁰ Xin’wana xi endle leswaku vatsundzuxi volavo va lembe xidzana ro sungula va nga humeleli. Va landzelele mukhuva wa ku “endla hi laha ndzi vulaka ha kona, ku nga ri hi laha ndzi endlaka ha kona.” Yesu u te eka vona: “Mi ni khombo na n’wina vadyondzisi va Nawu, hikuva mi rhwexa vanhu mindzhwalo leyo tika, kasi n’wina a mi khumbi mindzhwalo yoleyo hi ritiho hambi ri ri rin’we!” (Luka 11:46) Vona tihanyi ta kona! Namuntlha, vatswari, vakulu, kumbe van’wana lava va nyikelaka ndzayo va fanele ku tiyiseka leswaku vona vini va swi endla leswi va byelaka van’wana ku swi endla. Xana hi nga khutaza van’wana leswaku va gingiriteka evutirhelini bya nsimu hi ndlela yihi loko hi nga veki xikombiso lexinene ke? Kumbe, xana hi nga tsundzuxa ku Iwisana ni swilo leswi vonekaka hi ndlela yihi loko swilo leswi vonekaka swi fuma evuton’wini bya hina?—Varhoma 2:21, 22; Vaheveru 13:7.

21. (a) Xana Vafarisi va vavise vanhu hi marito hi ndlela yihi ke? (b) Xana marhengu ya Vafarisi ma nga tirha hi ndlela yihi tanihi xitsundzuxo eka vatsundzuxi va Vukriste?

²¹ Varhangeri va Vayuda nakambe va tsandzekile tanihi vatsundzuxi hikuva a va tirhisa marhengu yo karhata. Hi nkarhi wun’wana, va rhumele vanhu leswaku va ya khoma Yesu. Loko vanhu lava, hi ku tsakisiwa ngopfu hi mukhuva wa Yesu wo dyondzisa, va tlhelele va nga ri na yena, Vafarisi va va tshinya, va ku: “Xana na n’wina mi xiseteriwile xana? I mani eka vakulukumba ni le ka Vafarisi loyi a tshamaka a pfumela eka yena xana? Kambe loko va ri vanhu va ntshungu wolowo, lava nga tiviki Nawu, va rhukaniwile.” (Yohane 7:45-49) Xana lexi a ku ri xisekelo lexinene xo tshinya—vulawuri bya nsindziso ni ku duvulelana? Onge vatsundzuxi va Vukriste va nga va lava nga riki na nandzu wa ku tsundzuxa ko tano! Va fanele ku ku papalata swinene ku vavisa van’wana hi marito kumbe ku hundzisela miehleketo leyi nge: ‘U fanele ku ndzi yingisa hikuva ndzi nkulu!’ Kumbe loko va vulavula ni makwerhu wa xisati, a va fanelanga va ku: ‘U fanele ku ndzi yingisa hikuva ndzi makwenu wa xinuna.’

22. (a) Xana Vakriste va fanele va nyikela xitsundzuxo hi ndlela yihi naswona hikwalaho ka yini? (b) Hi xihi xivutiso xin’wana lexi lavaka ku kaneriwa?

²² Ina, ku tsundzuxa i xiendlo xa rirhandzu lexi hinkwerhu—ngopfu-ngopfu vakulu lava vekiweke—va xi kolotaka Vakriste-kulobye nkarhi na nkarhi. Ndzayo a yi fanelanga yi nyikeriwa hi ku kanganyisa kun’wana ni kun’wana. Kambe loko yi laveka, yi fanele yi nyikeriwa hi xivindzi. Yi fanele yi va ni xisekelo xa Matsalwa naswona yi nyikeriwa hi moya wa musa. Ku tlula kwalaho, swi olova ngopfu ku amukela xitsundzuxo lexi humaka eka un’wana loyi a hi rhandzaka. Hambi swi ri tano, minkarhi yin’wana swi nga nonon’hwa ku tiva leswi hi nga swi vulaka loko hi nyikela ndzayo. Kutani xana hi nga nyikela xitsundzuxo hi ndlela leyi xi nga ta tirha hi mukhuva wihi ke? Leswi swi ta xiyiwa eka xihloko lexi landzelaka.

U Nga Hlamusela Xana?

◻ I vamani lava nga ni lunghelo ni vutihlamuleri byo nyikela xitsundzuxo xa Vukriste?

◻ Hikwalaho ka yini xivindzi xi laveka leswaku u nyikela xitsundzuxo?

◻ Ha yini ntiyiso wa leswaku Pawulo a a rhandza Vakriste va le Korinto wu endle leswaku swi olova eka vona ku amukela xitsundzuxo xa yena?

◻ Hikwalaho ka yini mutsundzuxi wa Mukriste a fanele ku va ni musa ni ku titsongahata?

◻ Xana Mukriste a nga ku papalatisa ku yini ku endla leswaku ndzayo yakwe yi vonaka yi tshikilela ke?

[Xifaniso eka tluka 13]

Pawulo u khutaze Tito leswaku a tsundzuxa van’wana leswaku “va va ni vuxaka, masiku hinkwawo va va ni musa eka vanhu hinkwavo”