Ku Rhula Loku Humaka Eka Xikwembu Rini?

“Xikwembu lexi nyikaka ku rhula, xi ta hatla xi pfotlosela Sathana ehansi ka milenge ya n’wina.”—VARHOMA 16:20.

1, 2. (a) Xana ntlhari ya Muhindu yi vule yini hi ta nyimpi ni ku rhula? (b) I vamani lava tsakeke lava tiphinaka hi ku rhula loku humaka eka Xikwembu?

“LOKO mphikizano lowu hlanyaka wa switlhavana wu ya emahlweni, swa boha leswaku wu vanga ku dlaya loku nga si tshamaka ku humelela evurungurwini. Loko ku ri na muhluri la saleke eku hluleni ku ta va ku kayakaya ka tiko leri hluleke.” Ku profeta koloko loku endliweke hi 1938 hi Mohandas Gandhi entiyisweni a ku famba ku tlula ni le nkarhini wa yena.

² Endzhaku, hi 1931, Gandhi u byele mufumi wa Manghezi a ku: “Loko tiko ra wena ni ra mina ma ta twana etidyondzweni leti andlariweke hi Kriste eka Dyondzo leyi ya le Ntshaveni, hi ta va hi nga tlhantlhanga swiphiqo swa matiko ya hina ntsena kambe ni leswi swa misava hinkwayo.” Hi laha ntlhari ya Muhindu yi kombeke ha kona, dyondzo ya Yesu yi komba ndlela ya ku rhula loku nga heriki. Edyondzweni yoleyo Kriste u te, “Ku katekile lava lamulaka, hikuva va ta thyiwa vana va Xikwembu.” (Matewu 5:9) “Vana” vo tala sweswi va tsakela ku rhula loku humaka eka Xikwembu. Hi ku famba ka nkarhi, lavo rhula hinkwavo va misava va ta “tiṭakela e ku ruleni lo’kukulu ka vona.” (Psalma 37:11) Kambe hi nga tiyiseka hi vuyelo lebyi ke?

3. Hikwalaho ka yini ku ri hava ku rhula ka xiviri emisaveni namuntlha ke?

³ Namuntlha, xirhalanganya xa ku lovisiwa ka misava xi xungeta vanhu. Dyondzo ya sweswinyana yi ri: “Leswi nga twisisekiki hi ku helela i [R7,5-10 000 000 000 000 (7,5-10 wa tibiliyoni ta tirhandi)] leti tirhisiweke ku sukela eka Nyimpi ya Vumbirhi ya Misava ku vumba vuhlayiselo bya matlhari ya nyutliya lawa, loko ya tirhisiwa, ma nga ta vula ku tihinga ka misava hinkwayo. . .. Mpimo wa ku pakelana ka matlhari ya misava ya nyutliya ku ringene ku dlaya vanhu va tibiliyoni ta 58, kumbe ku dlaya munhu wihi na wihi loyi sweswi a hanyaka hi minkarhi ya 12.”a Kambe mphikizano lowu hlanyaka wu hambetile wu tinyika matimba. Mianakanyo leyi nga tiyangiki leyi mimfumo leyikulu yi seketelaka ku rhula ka yona ka nomu eka yona hi laha ku fanelaka yi vitaniwa MAD hi Xinghezi, tanihi leswi tinhlanga teto ti yimelaka Mutually Assured Destruction. Loku hakunene a hi ku rhula loku humaka eka Xikwembu.

4. (a) I xihlamariso xihi lexi misava yi xi humesaka sweswi? (b) Kambe i ntshembo wihi wa matimba lowu vagandzeri va Yehova va nga na wona?

⁴ Hi tindlela hinkwato, misava leyi yi humesa xivono lexi solekaka. Nikan’we emahlweni ka kwalaho ndyangu wa vanhu a wu si tshama wu boheka ku tiyisela ku onhaka lokukulu ka politiki, vuhomboloki lebyikulu bya vugevenga, ku karhatiwa lokukulu hi ikhonomi, kumbe ku pfumaleka lokukulu ka xichavo xa Xikwembu ni mpfilumpfilu wa vukhongeri ku tlula enguveni leyi. A ku si tshama ku va ntiyiso swinene eka vanhu leswaku “swivumbiwa hinkwaswo swa konya hi ku vaviseka loku fanaka ni ku vaviseka ka ku veleka.” Kambe Xikwembu xi tshembisa leswaku swivumbiwa swa xona swa vanhu “swi ta ntshunxiwa na swona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.” (Varhoma 8:21, 22) Varhandzi volavo va ku rhula lava gandzelaka Xikwembu xa Bibele, Hosi Leyikulu Yehova, va tiyisekisiwa hi ku nghena eku ntshunxekeni koloko. Ku ta va ku ntshunxeka loku yimeke ku tiya eku rhuleni ka ntiyiso, ku rhula loku nga heriki. (Ezekiel 37:26-28) Kambe ku rhula koloko ku ta ta rini naswona hi ndlela yihi ke?

Malangutelo Ya Xikwembu Ya ‘Minkarhi Ni Tinguva’

5. I xivutiso xihi lexi tlakukaka malunghana na 1 Vatesalonika 5:1?

⁵ Muapostola Pawulo u chavelele Vakriste eTesalonika hi ku hlamusela hi laha ku pfuxiwa eku feni ku yelanaka ha kona ni ‘vukona bya Hosi’ Yesu. Masala-ndzhaku u ri: “Loko ti ri ta minkarhi ni ta tinguva ta kona, vamakwerhu, a mi faneli ku tsaleriwa nchumu hi tona.”—1 Vatesalonika 4:15; 5:1.

6. Hi swi tivisa ku yini leswaku ‘minkarhi ni tinguva’ i swa risima eka Xikwembu?

⁶ Xana marito ya muapostola ma komba leswaku ‘minkarhi ni tinguva’ a hi swa nkoka eka Xikwembu ke? A swi tano! (Eklesiasta 3:1) A ku ri “loko nkarhi wu fikile swinene,” eku heleni ka mavhiki ya 69 ya malembe, laha ‘Xikwembu xi rhumeke N’wana wa xona.’ Naswona vutirheli bya Yesu byi hete malembe manharhu ni hafu—ku sukela hi 29 C.E. ku ya eka 33 C.E.—tanihi laha a swi profetiwe ha kona. (Vagalatiya 4:4; Daniel 9:24-27) A ku ri eku heleni hi koxe ka “Minkarhi ya vamatiko” hi 1914 laha Yesu a yimisiweke tanihi Hosi ‘eYerusalema wa le tilweni.’ (Luka 21:24; Vaheveru 12:22; Ezekiel 21:27; Daniel 4:31, 32) ‘Nhlomulo Lowukulu,’ na wona wu ta ta hi “siku ra kona ni nkarhi wa kona” lowu vekiweke hi Yehova. “Yi nga ka yi nga hlweri.”—Matewu 24:21, 36; Habakuk 2:3.

7. Hikwalaho ka yini Pawulo a a ri hava xilaveko xo tsalela Vatesalonika hi ta ‘minkarhi ni tinguva’?

⁷ Hambi swi ri tano, emhakeni yoleyo Pawulo a a nga ri na xilaveko xo tsala hi ta ‘minkarhi ni tinguva.’ Vakriste volavo va le Tesalonika a va se va khorwisiwile leswaku a yi ri ‘nguva’ ya makumu ya mafambiselo ya Xiyuda ya swilo, lawa a ma ta hela eka malembenyana ya 20 endzhaku, hi 70 C.E. Ku hiseka ka vona ni ku “tsaka loku nyikiwaka hi Moya lowo Kwetsima” swi tikombe swi ri xikombiso. (1 Vatesalonika 1:4-7) Hi ku fanana, Timbhoni ta Yehova namuntlha ti swi vona hi xitalo leswaku tinyimpi ta misava ni swiendlakalo swin’wana leswi dyisaka mbitsi ku sukela hi 1914 i “xikombiso” xa vukona lebyi nga vonekiki bya Yesu ematimbeni ya Mfumo ni ku kwetsima.—Matewu 24:3-8; 25:31.

8. Hikwalaho ka yini hi fanele ku tshama hi hitekile ni ku gingiriteka?

⁸ Masala-ndzhaku, muapostola u tlhela a tiyisekisa Vakriste-kulobye, a ku: “Hikuva n’wina hi xiviri, ma swi tiva swinene leswaku Siku ra Hosi ri ta fika kukota khamba leri taka ni vusiku.” (1 Vatesalonika 5:2) Hambi leswi hi nga tiveki nkarhi lowu kongomeke, siku rero ro tisa ku avanyisa ri ya ri tshinela. Ri ta sungula ku nga ri khale, hi xitshuketa, hi nkarhi lowu vekiweke hi Xikwembu. Kutani ke, hi fanele ku tshama hi phaphamile ni ku va lava chivirikaka.—Luka 21:34-36.

Ku Huwelela Ko Hetelela Ka Ku Rhula

9. (a) I ku huwelela kwihi loku tlakukaka, naswona hikwalaho ka yini Vakriste va ntiyiso va nga hlanganyeli kona? (b) I vamani va baka hungu leri, naswona va fanisa ku yini ni vafumi esikwini ra Yeremiya?

⁹ “Ku Rhula ni nsirhelelo!” Laha Pawulo u hi phaphamisela xiviko lexi nga ta twiwa eku heleni ka “vukona” bya Kriste! (1 Vatesalonika 5:3, NW) Xana sweswinyana hi ta twa ku huwelela ko tano? Xana ku huwelela ko tano ka ku rhula ka misava ni nsirhelelo swi ta va swi sungule kwihi? Kahle-kahle hayi exikarhi ka valandzeri va Kriste, hikuva Yesu u vule leswaku vona hambi ku ri Mfumo wakwe a hi “va misava.” (Yohane 15:19; 17:14, 16; 18:36) Lava huwelelaka mhaka leyi hikwalaho va fanele ku va vanhu va misava lava Iwisanaka ni Mfumo lowu taka wa Xikwembu. I xiphemu xa misava lexi ‘nga ehansi ka lowo biha,’ Sathana Diyavulosi. (1 Yohane 5:19) Tanihi varhangeri va politiki ni va vukhongeri va siku ra Yeremiya, vona lava va ta vula “leŝi v̌a ŝi v̌onaka e timbilwini ta v̌ona,” va ku, “Ku ṭaka ku ta v̌a kona e ka ṅwina,” hi ku hoxisa va vula leswaku ku rhula ko tano ku huma eka Xikwembu. Oho vunwa lebyi ku vula ka vona ku nga ta tikomba ku ri byona!—Yeremia 23:16, 17, 19, 20.

10. I nxaxamelo wihi wa swiendlakalo lowu yiseke eka xiyimo xa namuntlha xa misava?

¹⁰ Nxaxamelo wa swiendlakalo wu yisa eku huweleriweni loku ka “ku Rhula ni nsirhelelo!” A ku ri hi 1920 laha Ntwanano wa Matiko wu humelerisiweke eku tlhekekeni ka Nyimpi Leyikulu, leyi sweswi yi tivekaka tanihi Nyimpi yo Sungula ya Misava. Xikongomelo xa Ntwanano lowu a ku ri ku herisa nyimpi emisaveni hi laha ku nga heriki. Kambe Nyimpi ya Vumbirhi ya Misava yi nghenise Ntwanano lowu ekheleni. Hi October 24, 1945, huvo leyi yi pfuxetiwile, yi suka enkumeni yi ri na vito lerintshwa, Nhlangano wa Matiko. (Ringanisa Nhlavutelo 17:8.) Xikongomelo lexikulu xa yona i ku “hlayisa ku rhula ni nsirhelelo wa misava.” Vasimeki va yona va kombise ku tiyimisela “ku ponisa tinxaka leti landzelaka eka maxangu ya nyimpi.” Xana UN yi swi kotile ku tiyisekisa ku rhula ko tano ni nsirhelelo ke?

11. Xana maxangu lama langutaneke ni misava ma kule ku fikela kwihi?

¹¹ Ku nga khathariseki leswaku vasimeki va UN va ve lava tiyisekeke ku fikela kwihi, huvo yoleyo, tanihi Ntwanano lowu sunguleke wu va kona, yi hlulekile ku hetisisa xikongomelo xa yona lexi tiyisiweke. Misava sweswi yi tshame exivandleni xa khombo lerikulu ra switlhavani swa nyutliya. Khombo ra le Chernobyl, U.S.S.R., hi April 1986, ni minkuma ya rona ya swibuluki leyi weleke exiphen’wini lexikulu xa Yuropa, swi komba leswaku hambi loko yi tirhiseriwa swikongomelo swa ku rhula, matimba ya nyutliya ma ni vuyelo lebyi chavisaka. Matiko man’wana ePacific Dzonga ma ringeta ku hlayisa rivala ra wona tanihi ndhawu leyi pfumalaka nyutliya. Kambe loko nyimpi ya nyutliya ya mpimo lowu teleke yi khwexuka, ku hava laha ku nga ta va ni lava poneke.

Xana “Ku Rhula Ni Nsirhelelo” Swi Nga Va Kona Ke?

12. I xiviko xihi lexi UN yi xi endleke xa 1986, naswona xi vile ni ku amukeriwa kwihi exikarhi ka matiko?

¹² Hi ku xiya maxangu lama yaka ma kula hi xitalo, Nhlangano wa Matiko wu tivise 1986 tanihi Lembe ra ku Rhula ka Matiko Hinkwawo. Leswi swi amukeriwe hi ku nyanyuka exikarhi ka matiko. Vunyingi bya wona byi seketerile Lembe ra ku Rhula ra UN hi ndlela yo karhi, kambe byi kombetela eka nyimpi ya nyutliya tanihi ku xungeta loku funengetaka ku rhula. Enkarhini wa sweswi, tinyimpi letintsongo ti ya emahlweni ti lwiwa emisaveni, 150 wa tona ku sukela eka Nyimpi ya Vumbirhi ya Misava, ni ntsengo wa mafu lama tlulaka 30 000 000. Xana ku nga vuriwa leswaku tiko ro karhi hakunene ri teke goza eku tirhiseni ka marito wolawo yo tiveka ya Esaya 2:4 lama tsariweke erirhangwini ra UN?

13. Xana varhangeri va vukhongeri va byi nyikele hi ndlela yihi vuseketeri?

¹³ Vukhongeri bya misava a byi tshikanga ku seketela Lembe ra ku Rhula ra UN. Phophu John Paul II u tivise January 1 tanihi Siku ra Misava ra ku Rhula ivi a khutaza varhangeri va misava ku nyikela vurhangeri lebyi lavekaka byo yimisa masungulo ya ku rhula ka misava hinkwayo. Nakambe u rhambele vupfumeri bya misava ku hlangana byi khongela eAssisi, Italy, hi nkarhi wa Lembe ra ku Rhula ra Matiko Hinkwawo. Bixopo-nkulu wa Canterbury, murhangeri wa Kereke ya Nghilandhi, ni mintlawa ya Mabudha va amukerile xirhambo lexi hi ku tsaka. Huvo ya Tikereke ta Misava yi humese xitiviso ehenhleni ka Lembe ra ku Rhula ra Matiko Hinkwawo, yi khutaza leswaku ku vekiwa ehansi ka matlhari ku sungula hi xihatla.

14. Ntirho wo tisa ku rhula wu nga humelela hi ndlela yihi ntsena ke?

¹⁴ Hambi swi ri tano, emhakeni leyi yo yimisa “ku rhula ni nsirhelelo,” xana ku rhandza ka “Xikwembu lexi nyikaka ku rhula” i yini? Xana Rito ra Xikwembu ra vuprofeta ri komba leswaku vanhu lava nga hetisekangiki ni matiko va nga swi kota ku tisa ku rhula ni nsirhelelo emisaveni leyi? Nikantsongo! ‘Ku endleka loku tiyeke’ ku tiseketele hi ku tamela ka Yehova ka timhaka hi ku pfumelelana ni vululami byakwe ni ku n’wi dzunisa.—Esaya 55:11; 61:11.

‘Ndzoviso Wa Xihatla’ Lowu Tshinelaka

15. I xitiviso xihi lexi hlamarisaka lexi Pawulo a yaka emahlweni a xi endla?

¹⁵ Muapostola Pawulo u hi byela leswi swi nga ekusuhi ni ku endleka. U ri: “Siku vanhu va nga ta ku: ‘Ku rhulile, ku hava xo karhata,’ hi wona nkarhi lowu ku onhaka ku nga ta va wela henhla hi xitshuketa, tani hi ku lumiwa ka wansati la nga kusuhi ni ku kuma n’wana; va nga ka va nga poni.”—1 Vatesalonika 5:3.

16. Hikwalaho ka yini tindlela ta matiko ti nga ri tindlela ta Xikwembu?

¹⁶ Hi ku ma hlaya ro sungula, marito wolawo ma nga twakala ma tsema nhlana. Kambe Bibele yi hlamusela timhaka. Tindlela ta matiko namuntlha a hi tindlela ta Xikwembu. (Esaya 55:8, 9) Xivangelo xa xona xo pfumelela swivumbeko swo hambana-hambana swa vulawuri bya vanhu swi ya emahlweni i ku hlamula mphikamakaneta leyi Nyoka ya mano, Sathana Diyavulosi, a yi pfuxeke malembe lama nga vaka 6 000 lama hundzeke. Loko Sathana a sindzise vatswari va hina vo sungula ku hlawula ntshunxeko eka Xikwembu, u kanete loko swi laveka hakunene leswaku vanhu va va ni vulawuri bya Xikwembu.—Genesa 3:4, 5.

17. I rhekhodo muni leyi vulawuri bya vanhu byi yi endleke, naswona leswi swi kombisa yini?

¹⁷ Hi magidi ya malembe lama landzeleke, Xikwembu xi pfumelele vanhu ku ringeta xivumbeko xihi na xihi lexi anakanyiwaka xa hulumendhe ya vanhu. Hambi loko yi tshame malembe ma nga ri mangani kumbe madzana ya malembe, muxaka wun’wana ni wun’wana wa vulawuri bya vanhu wu hluleke swinene ku tisa ku rhula ka ntiyiso ni nsirhelelo. Nyimpi, vugevenga, nxungeto ni rifu swi vile tshamelo leri hambetaka ra vanhu ehansi ka muxaka wihi na wihi wa hulumendhe ya vanhu. Eka matimu hinkwawo, ‘munhu u fume ehenhla ka un’wana ku n’wi endla swo biha.’ (Eklesiasta 8:9) A swi hambani namuntlha. Un’wana ni un’wana la tivaka mphikamakaneta leyi sweswi a nga vula, hi laha muprofeta wa Xikwembu a vuleke ha kona a ku: “Nḍa ŝi tiv̌a, ndlela ya munhu a yi le matimbeni ya yena, kambe munhu l’a fambaka a nga ka a nga lulamisi renḍo ra yena.”—Yeremia 10:23.

18. Hikwalaho ka yini ku huwelela ka matiko ka “ku Rhula ni nsirhelelo!” swi ri swa hava?

¹⁸ Sweswi nkarhi wu íikile wo lulamisa mphikamakaneta kan’we swi hela kwalaho. Vulawuri bya Xikwembu byi ri byoxe hi byona byi nga tisaka ku rhula ka ntiyiso ni nsirhelelo eka vanhu. Kambe, a hi vulawuri bya Xikwembu lebyi matiko ya byi rhandzaka loko ma ku “ku Rhula ni nsirhelelo!” Va lava ku ya emahlweni va lawula hi ku landza maendlelo ya vona ya vutikukumuxi. Kambe nkarhi wu herile! Matiko ma swi twa leswaku nchumu wun’wana lowukulu wu fanele ku endliwa. Handle ka swona, hinkwavo va ta lova eka khombo ra nyutliya. Kutani va ta endla leswi Yeremiya a swi vhumbeke a ku: “Kutani v̌a ongola hi ku v̌ev̌uka e mbanga ya ṅwana wa tiko ra mina. V̌a ku: Ku rurile, ku rurile! kasi a ku na ku rula.” Kambe a swi nga pfuni nchumu!—Yeremia 6:14; 8:11, 15.

Makumu Lama Profetiweke

19. Xana ‘siku ra Yehova’ ri ta humelela hi ndlela yihi?

¹⁹ “Ku onhaka . . . hi xitshuketa,” ku vula muapostola Pawulo. Muprofeta wa Xikwembu Esaya wa engetela: “V̌onani, tinhenha ta v̌vona ti kolola e handle; tinṭumi ta ku rula ti rila hi ku v̌av̌iseka.” (Esaya 33:7) Eswivandleni swo tala, Bibele yi komba leswaku ku tisa ka Yehova ka ku avanyisa ehenhla ka matiko layo biha ni vanhu ku ta ta hi xihatla, ku nga languteriwanga—kunene “tanihi khamba leri taka nivusiku.” (1 Vatesalonika 5:2, 3; Yeremia 25:32, 33; Sofonia 1:14-18; 2 Petro 3:10) Enkarhini lowu misava yi baka huwa yo tivisa leswaku yi fikelela mpimo lowukulu wa ku rhula ni nsirhelelo, ‘siku ra Yehova’ ri ta humelela hi xihatla lexi tsemaka nhlana. Vanhu va Xikwembu va ta va va swi xiyile leswi ku huweleriwa koloko ka “ku Rhula ni nsirhelelo!” ku nga swona naswona va ta ponisiwa exichavelweni lexi lunghiseleriweke hi Yehova.—Psalma 37:39, 40; 46:1, 2; Yoel 3:16.

20. (a) UN i muxaka muni wa “xivandzana”? (b) Xana Yehova u byi languta njhani vukhongeri bya mavunwa, naswona ha yini ke?

²⁰ ERitweni ra Xikwembu, ndlela ya Ntwanano wa Matiko ni mulandzeri wa wona, Nhlangano wa Matiko, yi fanisiwa ni liya ya “xivandzana xa ribungu” lexi nga ni tinhloko ta 7 (leti yimelaka mimfumo ya misava leyi xi humaka eka yona) ni timhondzo ta khume (leti yimelaka mimfumo ya hulumendhe leyi sweswi yi xi seketelaka). Bibele yi xi kombisa xi ri “xivandzana” xa politiki, lexi fambelanaka ni “nghala” ya Manghezi ni “bere” ya Marussia. Enhlaneni wa xona ku tshame wansati, “Babilona lonkulu, mana wa vuoswi ni wa manyala ya misava.” (Nhlavutelo 17:3-8) Leswi swi kombisa langutelo ra Xikwembu kahle ra vukhongeri bya mavunwa, lebyi nga yimeriki yena ni Mfumo wakwe wo lulama. U endla vunghwavava bya moya hi ku katseka eka tipolitiki. Ku tirhisana ka vukhongeri na UN eka tsima ra misava ra ku rhula ni nsirhelelo i xikombiso xa leswi. Nakambe byi ta lava ku va ni ku rhula ni nsirhelelo leswi humaka eka mahungu ya ku avanyisa ka Xikwembu lama twarisiwaka hi Timbhoni ta Yehova. Ku endla sweswo, byi kucetele tihulumendhe tin’wana ku yirisa ntirho wa Vukriste wa Timbhoni.—Psalma 2:1-3.

21. (a) I xiendlo xihi lexi funghaka ku sungula ka ‘siku ra Yehova’? (b) Xana “siku” leri ri hundzela eka makumu wahi ke?

²¹ Xana ‘siku ra Yehova’ ri ta humelerisa ku yini? Evusikwini lebyi bya munyama lowukulu wa matimu ya vanhu, kunene ri ta ta “kukota khamba”! Sweswo swi ta endleka loko Xikwembu xi susumetela matiko ya xivandzana xa UN leswaku hi ku anghwetla ma hundzulukela eka vukhongeri bya mavunwa. Ma kombisa rivengo ra wona leri tifihleke ra Babilona lonkulu, ma ta paluxa leswi a nga xiswona ivi ma n’wi lovisa hi ku helela. Ku avanyisa loku ku ta ta hi xihatla lerova khale ka varhandzi va politiki va ta hlamala: “Yo! Yo! wena muti lowukulu, wena Babilona muti wa matimba, hikuva ku avanyisiwa ku ku fikele hi nkarhinyana ntsena!” Kambe matiko ni mavandla ya wona ma ta tlhela ma hlasela vanhu va Xikwembu. Masuku, Hosi ya tihosi, Yesu Kriste, u ta lovisa valala volavo hinkwavo ni ku hoxa mukaneti lonkulu, Sathana Diyavulosi ekheleni.—Nhlavutelo 17:16, 17; 18:10; 19:11-21; 20:1-3; ringanisa Ezekiel 38:11, 16, 18-23.

22. (a) I ku langutela kwihi lokunene loku vanhu lava pfumelaka va nga na kona namuntlha? (b) Xana u nga va la tiphinaka hi ku rhula loku humaka eka Xikwembu hi ndlela yihi?

²² Eku heteleleni, ku rhula ka ntiyiso ni nsirhelelo swi ta va kona ehansi ka Mfumo wa Xikwembu! (Psalma 72:1, 7; Esaya 9:6, 7) Hi ntsako, vo tala namuntlha lava tshamaka va ‘hitekile ni ku tlhariha’ va ta swi vona hi mahlo. (1 Vatesalonika 5:4-6) “Ntshungu lowukulu wa vanhu lava . . . a va huma hi le matikweni hinkwawo,” lava tirhisaka ripfumelo eka lunghiselelo ra nkutsulo wa Yehova ha Kriste, va ta ponisiwa eka “nhlomulo lowukulu,” leswaku va tsakela ku rhula loku nga heriki ka Xikwembu. (Nhlavutelo 7:9-17; 21:3, 4) Onge u nga va un’wana wa vona!

[Nhlamuselo ya le hansi]

U Nga Hlamula Njhani?

◻ Hikwalaho ka yini ‘minkarhi ni tinguva’ swi ri swa risima eka Xikwembu ni le ka hina?

◻ Xana hi fanele ku ku languta njhani ku tshinela ka ‘siku ra Yehova’?

◻ I vamani lava hlanganyelaka eku beni ka hungu ra 1 Vatesalonika 5:3, naswona rini?

◻ I swiendlakalo swihi swa nkoka leswi khwexuriwaka hi ku huwelela koloko xana?