Ku Hundzuka Ka Vuhosi Hi Ku Anghwetla!
VANHU vo tala va honise mhaka ya nkoka lowukulu. Hi leyi: Eku Iweleni ka vona ko lawula misava, matiko lama phikizanaka ma hlulekile ku xiya leswaku ku na hosi leyikulu ni mfumo lowu tlulaka ya vona. Va honisa mhaka ya leswaku “L’ange-henhla-henhla o ni ku fuma e henhla ka v̌uhosi bya v̌anhu, ni leŝaku a nga byi nyika loyi a ranḍaka ku nwi nyika byona.” (Daniel 4:25) I mani loyi Xikwembu xa Matimba Hinkwawo xi n’wi hlawulaka tanihi Hosi ehenhla ka misava hinkwayo? Xana u ku amukele rini ku lawula misava?
Hosi Yin’wana Nakambe
A nga si profeta hi ‘hosi ya n’walungu ni hosi ya dzonga,’ Daniyele u vile ni xivono lexi xa vuprofeta mayelana ni hosi leyi hlawuriweke: “Uṅwana l’a fanaka ni ṅwana wa munhu a humelela hi mapapa ya le henhla, a fika eka Nkulukumba wa masiku [Yehova Xikwembu], a tisiwa e mahlweni ka yena . . . Kutani a nyikiwa ku fuma, ni ku kwetsima, ni v̌uhosi leŝaku v̌a tinšaka hikwato, ni v̌a matiko hikwawo, ni v̌a tinḍimi hikwato v̌a ta ṅwi tirela. Ku fuma ka yena . . . ku nga ka ku nga hunḍi, kutani v̌uhosi bya yena . . . byi nga ka byi nga herisiwi.”—Daniel 7:13, 14.
Xivono xolexo xi ye emahlweni xi fanekisela tihulumendhe ta misava leti landzelelanaka tanihi swivandzana. Kutani, hakunene, ‘vanhu va fuma ehenhla ka van’wana ku va endla swo biha’ ni tihanyi to fana ni ta xivandzana. (Eklesiasta 8:9) Nakambe vanhu va fume ehansi ka ku lawula ka xivandzana ka tihosana ta moya ta ku tiarisa, leti hosi ya tona ku nga Sathana hi yexe. (Daniel 7:17; 10:13; ringanisa Nhlavutelo 12:9; 13:2-4.) Hi laha ku hambanaka, “uṅwana l’a fanaka ni ṅwana wa munhu” u kuma matimba yo fuma eka Yehova Xikwembu. Mufumi loyi a hlawuleke hi Xikwembu u na timfanelo letinene ta mufumi wa vanhu lava eku sunguleni a va endliwe hi ‘xifaniso xa Xikwembu.’ (Genesa 1:27) Kambe i mani xana?
Yesu u tirhise marito lama nge “N’wana wa Munhu” eka yena n’wini loko a ri laha misaveni malembe ya 1 900 lama hundzeke. Hi ku va hi nkarhi wolowo a ri munhu, hi xiviri a a ri “n’wana wa munhu,” naswona hi ku hetiseka u kombise timfanelo letinene, tanihi rirhandzu, ntwelo-vusiwana ni vululami. Nakambe u nyikele vutomi byakwe ku kutsula vanhu, xisweswo a endla ntirho wa xaka lerikulu ra vanhu—hakunene “N’wana-wa-Munhu.”—Matewu 20:28; Vaheveru 2:11-17.
Loko a tirhisa vuprofeta bya Daniyele ku ya emahlweni, Yesu u te: “Va ta vona N’wana-wa-Munhu a ta emapapeni ya le tilweni, hi matimba ni ku kwetsima lokukulu.” Endzhaku u tiveke eka xiyimo lexi fanaka, a ku: “Siku N’wana-wa-Munhu a taka hi ku kwetsima ka yena, . . . u ta tshamisa exiluvelweni xa yena xo kwetsima.” (Matewu 24:30; 25:31) Namuntlha Yesu a hi munhu ntsena emisaveni. Ku sukela eka rifu rakwe ni ku pfuxiwa hi 33 C.E., u vile moya wa le tilweni hi xifaniso xa Xikwembu. Hi ku hambana ni vafumi va vanhu, hi yena ntsena Hosi leyi “nga riki na ku fa, loyi a akeke eku vonakaleni loku nga tshinelelekiki; ku hava munhu ni un’we loyi a tshamaka a n’wi vona, kumbe loyi a kotaka ku n’wi vona.” (1 Timotiya 6:16) Mfumo wakwe a wu nge vi na timfanelo ta xivandzana ta mimoya leyo biha leyi kuceteleke tihulumendhe ta vanhu.
Xisweswo Yesu hi yena ntsena Hosi leyi hlawuriweke hi Xikwembu tanihi Mesiya wa Xona, kumbe Kriste, naswona u nyikiwe matimba yo fuma misava hinkwayo. (Daniel 7:14) Leswi swi vula leswaku tihulumendhe hinkwato ta vanhu, ku katsa ni “hosi ya le ṅwalungwini” ni “hosi ya le ḍongeni,” ti ta hela kutani ti siviwa hi Mfumo wa Xikwembu ehansi ka vuhosi bya Kriste.—Daniel 2:44; ringanisa Psalma 2:7, 8, 12.
“Ndhuna Leyikulu” Yi Teka Mfumo
Hambi swi ri tano, Yesu a nga sungulanga mfumo wakwe ehenhla ka vanhu hi 33 C.E. A a ri ni nkarhi wo rindza. A ku ri ntsena endzhaku ka sweswo laha Yehova a n’wi nyikaka matimba yo ‘tlhoma ku fuma exikarhi ka valala va [yena].’ (Psalma 110:1, 2; Mintirho 2:32-36) Loko a vhumba leswi, Daniyele u te: “E nkarini wolowo, Mikael, nḍuna le’yikulu, . . . o ta humelela, kutani masiku ya mapfalo ma ta v̌a kona mpfhuka matiko ma ri kona, ku fikela nkarini wolowo.”—Daniel 12:1.
Vuprofeta lebyi byi landzele ku kombisa ka Daniyele ka leswaku ku lwa exikarhi ka “hosi ya le ṅwalungwini” ni “hosi ya le ḍongeni” ‘enkarhini wa sweswi wa makumu’ ku ta fikelela nhlohlorhi ya kona. Eyinhleni leyi, yin’wana ya ‘tihosi’ leti yi ta ‘kariha’ leswaku yi dlaya vanhu vo tala. (Daniel 11:40, 44, 45) Ku ta va kwalaho laha Mikayele ‘loyi a yimelaka’ vanhu va Xikwembu a nga ta endla hi matimba leswaku va ponisiwa.—Ringanisa Daniel 11:2, 3, 7, 20, 21; 12:1.
Hambi swi ri tano, xana leswi swi hlangana njhani na Yesu? Tsundzuka leswaku u katse vuprofeta bya Daniyele ni ku tivula kakwe ko va Hosi enkarhini lowu taka. Nakambe mayelana ni leswi u vulavule hi “nhlomulo lowukulu” lowu nga ringanisiwiki. (Matewu 24:21, 29-31) Hi ku twakala a a kombetela eka “masiku ya mapfalo” lama Daniyele a ma hlamuseleke mayelana na Mikayele. (Ringanisa Matewu 24:15; Daniel 11:31.) Xisweswo Yesu u tihlamusele tanihi Mikayele loyi a a ta fuma.
Yesu na Daniyele va nyikela vuprofeta lebyi eka tinhlamuselo ta vona ta swiendlakalo ‘enkarhini wa makumu.’ Swiendlakalo leswi swi hetiseke hi xitalo ku sukela hi 1914. Kutani Yesu u teke mfumo etilweni tanihi Hosi, naswona a a fuma exikarhi ka valala va yena.—Matewu 24:3, 7-12.
Paradeyisi Ya Misava Hinkwayo—Hi Ku Anghwetla!
Kumbexana wa swi vona leswaku matiko ya hlulekile ku xiya Mfumo wa Kriste. Va ala mahungu ya ku tlhomiwa ka wona kutani va hambeta va tlhoma mimfumo ya vona vini. Mahungu wolawo i vuphukuphuku eka vona. Xisweswo “a ku na un’we wa tihosi ta minkarhi leyi, loyi a byi twisiseke” vutlhari bya Xikwembu eku hlawuleni ka Kriste tanihi Hosi. Va dlayiwe mahlo hi mafambiselo lama lawuriwaka hi Sathana ni tindhuna takwe ta moya wa vutiarisi, va tikuma va kaneta Mfumo wa Vumesiya.—1 Vakorinto 2:8; ringanisa Luka 4:5, 6; 2 Vakorinto 4:4.
Kutani, hi laha Yesu a vhumbeke ha kona, lava hi ku tshembeka va twarisaka Mfumo wakwe va xanisiwa. Va ha ta hlaseriwa swinene. (Matewu 24:9, 14; Daniel 11:44, 45; ringanisa Ezekiel 38:14-16.) Kambe, Yesu u ta ta tanihi “Hosi ya tihosi ni Mufumi wa vafumi” ku Iwela vanhu va yena. Ku lwa loku ku ta hela hi ku hlula loku heleleke ka Hosi leyi hlawuriweke hi Xikwembu. Vahlaseri va vanhu va xona va ta ‘fika emakun’wini ya vona, naswona a ku nge vi na mupfuni eka vona.’ ‘Tihosi’ letin’wana hinkwato ti ta va ti herisiwile.—Nhlavutelo 11:15, 18; 19:11, 16, 19-21; Psalma 2:1-3, 6-9.
Hi ku va wu sungule hi 1914, ‘nkarhi wa makumu’ sweswi wu fambe swinene. Yesu u vule leswaku rixaka leri voneke ku sungula ka nkarhi wolowo nakambe ri ta vona makumu ya wona. (Matewu 24:32-34) Hikokwalaho, hi ku hatlisa hi tshinelela nkarhi wolowo wo vangama loko Kriste Yesu a ta teka mimfumo ya timhaka ta misava kutani a hlanganisa vanhu hinkwavo lava yingisaka ehansi ka hulumendhe yakwe yin’we.
Ina, ku ta va ni ku hundzuka ka vuhosi hi ku anghwetla. Kambe xana leswi swi ta vula yini eka wena? Swi ta vula leswaku vumundzuku bya wena byi ta hela xikan’we ni tihulumendhe ta sweswi ta vanhu ni vaseketeri va tona. Kumbe, hi ku ya hi ndlela leyi u endlaka ha yona, swi nga vula vutomi lebyi nga heriki ni nsirhelelo emisaveni ya paradeyisi, leyi hlayisiweke ni ku lawuriwa hi Mfumo wa Xikwembu. Leswi swi nga tikomba ku ri ntiyiso loko hi ku tshembeka u seketela vuhosi bya Kriste xikan’we ni timiliyoni ta Timbhoni ta Yehova emisaveni hinkwayo.