Xana Hi Hanya ‘eNkarhini Wa Makumu’?

“Kutani wena, Daniel, funengeta timhaka leto, u lemela buku leyi e kuyisa nkarini wa makumu.”—Daniel 12:4.

SWAKUDYA swa ninhlikanhi a swi pfilunganile. Loko a langutile ehandle hi fasitere ra khefi ya Manhattan-xikarhi a languta Times Square, eMutini wa New York, mahlo yakwe ya ye emahlweni ni le ndzhaku hi ku hatlisa exikarhi ka tiwachi tinharhu to hambana ta tinomboro, hinkwato ti komba nkarhi hi maletere lamakulu. Wachi yin’wana a yi ku 11:28. Yin’wana, onge hi loko yi kanakana hi ku famba ka nkarhi, yi salele endzhaku eka 11:26, kasi ya vunharhu a yi tsutsumele eka 11:29.

U nga ha ku, ‘minete yin’we kumbe timbirhi a ti vuli nchumu.’ Hambi swi ri tano, ringeta ku khorwisa munhu hi swoleswo, loyi a ha ku siyiwaka hi bazi, xitimele kumbe xihaha-mpfhuka, hayi hi timinete, kambe hi tisekene ntsena! Ku tiva nkarhi lowunene i swa nkoka. Ku tiva laha hi nga kona eka xiyimiso xa Xikwembu i swa nkoka ku tlula sweswo.

Ku Tiyiseka Ka Siku Ra Ku Avanyisa

Kavula, tanihi laha u nga swi tivaka ha kona, vanhu a va vulavula hi ‘nkarhi wa makumu’—van’wana va ku ‘makumu ya misava’ kumbe ‘siku ra ku avanyisa’—hi malembe xidzana yo tala. Muprofeta Daniyele u vulavule hi rona hi malembe xidzana ya 25 lama hundzeke. (Daniel 12:4) Kambe namuntlha, ku ya hi mutsari la ntshunxekeke James David Besser, “a swa ha lavi vukhongeri kumbe ripfumelo leri tlurisaka ku amukela ku tiyiseka ka siku ra ku avanyisa; swi lava ntsena ku tirhisa mahungu ya thelevhixini.” Xana a wu pfumeli?

Handle ko kanakana, thelevhixini yi endla mahungu ya misava ya amukeleka hi ku nghenisa xiendlo xa kona etindlwini ta hina. Yi endla swiphiqo swi tikomba swi ri swa xihatla ni swa munhu hi xiyexe. Yi hi tsundzuxa leswaku muti kumbe doroba ri nghene eka khombo leri tiyeke ra nyutliya, mufana kumbe wanhwana u xanisiwile hi gandlati leri tiyeke ra vugevenga, manana kumbe tatana u hlangavetane ni ku hlaseriwa hi nhlaselo lowu tiyeke wa matherorisi—kahle-kahle, swiphiqo hinkwaswo swi nga hi wela. Nakambe, ku tiyiseka loku hi koxe a ku kombi leswaku siku ra ku avanyisa ri ta hi wela hi ku anghwetla. Kambe ku swi endla swi vonaka swi ta endleka, swi endla leswaku xivutiso lexi nge, Xana hi hanya ‘enkarhini wa makumu’? xi va xa xihatla.

Yesu, Daniyele Ni Makumu Ya Misava

Ku tlula malembe xidzana ya 19 lama hundzeke, vadyondzisiwa va Yesu va n’wi vutisile: “Xikombiso xa ku vuya ka wena ni xa ku hela ka minkarhi [“makumu ya misava,” King James Version] xi ta va xihi ke?” (Matewu 24:3) Eku va nyikeni ka xikombiso, Yesu u vulavule hi vumbhoni byo tala, lebyi hinkwabyo ka byona loko byi hlanganile a byi ta komba leswaku hi fikelerile “ku hela ka minkarhi.” Pfula Bibele ya wena eka Matewu tindzima 24 na 25, Marka ndzima 13, na Luka ndzima 21, kutani u hlaya ha byona hi wexe.

U nga ha hlamala ku tshubula leswaku leswi u swi hlayaka swi fanana ni xikatsakanyo xa mahungu ya namuntlha ya thelevhixini. U ta hlaya hi tinyimpi, ku tsekatseka lokukulu ka misava, mintungu ni tindlala—hinkwaswo swi humelela hi xiringaniso xa misava hinkwayo. Nakambe u ta hlaya hi ‘ku hela ntamu ka matiko, ma tshukisiwa’ na hi vanhu lava ‘va titivalaka hi ku chava ni ku ehleketa leswi nga ta humelela la misaveni.’ Xana u nga kuma marito lama fanelaka yo hlamusela xiyimo xa misava, leyi minongonoko ya namuntlha ya thelevhixini yi hi byelaka swo tala ha yona?—Luka 21:10, 11, 25, 26.

Vumbhoni lebyi bya matimba bya xiyimo bya leswaku hi hanya ‘enkarhini wa makumu’ a hi lebyi heleleke. Hi laha hi xiyeke ha kona laha henhla hi kuma vumbhoni lebyi tiyeke hi ku tlhelela endzhaku malembe man’wana ya 500 eka masiku ya muprofeta wa Muyuda Daniyele. Yesu u n’wi vule hi vito, ivi a kombetela eku hetisekeni ka vuprofeta byakwe. (Ringanisa Matewu 24:3, 15, 21 na Daniel 11:31; 12:1, 4.) Hi ku endla leswi, Yesu u kombe leswaku a nga xiyanga marito ya “Testamente ya Khale” ya Daniyele ku ri lama heleleke hi nkarhi kumbe ya nga ri ya nkoka. Na hina a hi fanelanga.

Xiya ku fana ka marito ya Daniyele ni lawa ya Yesu tanihi laha ma kombiweke ha kona la henhla. Kutani tivutise, ‘Xana a va nga vulavuli hi nchumu lowu fananaka?’

Swi le rivaleni leswaku hinkwavo Daniyele na Yesu va vhumbe nchumu lowu fanaka, ‘nkarhi wa makumu,’ nkarhi lowu ha wona Yesu a a ta va kona ematimbeni ya mfumo. Eku heleni ka nkarhi wolowo, a a ta herisa hinkwavo valala vakwe laha misaveni eka nhlomulo lowukulu. Kambe vanhu va Xikwembu a va ta pona.

Xana wa swi lava ku va exikarhi ka lava nga ta pona? Kutani xiya vumbhoni lebyi Daniyele a byi nyikaka hi ta ‘nkarhi wa makumu.’ Byi hi pfuna ku tiva hi laha ku kongomeke laha hi nga kona eka xiyimiso xa Xikwembu.

[Bokisi eka tluka 4]

DANIYELE

“E mikarini ya makumu . . . Mikael [Yesu Kriste] o ta humelela . . . kutani masiku ya mapfalo ma ta v̌a kona, la’yonghasi ma nga siki v̌aka kona mpfhuka matiko ma ri kona. . . . Ntsena e mikarini yoleyo, tiko ra wena ri ta ponisiwa.”—Daniel 11:40; 12:1

YESU

“Xikombiso xa ku vuya ka wena ni xa ku hela ka minkarhi xi ta va xihi ke? . . .

“Nhlomulo wu ta va lowukulu enkarhini wolowo; nhlomulo lowo tano a wu si va kona hi mpfhuka misava yi tumbuluka . . .

“Loko masiku walawo a ma nga hungutiwanga, a ku nga ta pona munhu, kambe . . . masiku ya kona ma ta hungutiwa.”—Matewu 24:3, 21, 22.