U Nga Endla Yini Ku Kombisa Leswaku Wa Wu Tlangela Nkutsulo?

1-2. Gandzelo ra nkutsulo ra Yesu ri fanele ri hi susumetela ku endla yini naswona hikwalahokayini? (2 Vakorinto 5:​14, 15) (Nakambe vona xifaniso.)

HI XIKOMBISO, a hi nge ku na munhu wo karhi loyi a ku poniseke eka yindlu leyi ku weleke, a swi kanakanisi leswaku a wu ta titwa u boheka ku n’wi khensa. Hambiloko ku nga ri wena ntsena loyi a ponisiweke, a wu ta lava ku n’wi khensa hi ku kongoma munhu loyi a ku poniseke, ku kombisa leswaku a wu swi tekeli ehansi leswi a ku endleleke swona.

² Hilaha hi dyondzeke hakona eka nhlokomhaka leyi hundzeke, a hi nge swi koti ku tiponisa eka switandzhaku swa xidyoho lexi hi velekiweke na xona. Hambiswiritano, gandzelo ra nkutsulo ra Yesu Kreste ri nga hi pfuna leswaku hi kota ku (1) rivaleriwa swidyoho swa hina, (2) hi va ni ntshembo wa leswaku hi ta tlhela hi hetiseka ni (3) ku tlhela hi va ni vuxaka lebyinene na Xikwembu. Hikwalaho ka rona, hi na ntshembo wo hanya hilaha ku nga heriki emisaveni leyintshwa ya Yehovha. Entiyisweni, nkutsulo wu kombisa ndlela leyi Yesu a va rhandzaka hayona vanhu, ku nga rirhandzu leri a a ri na rona ku sukela khale a nga si ta emisaveni a ri munhu la hetisekeke. (Swiv. 8:​30, 31) Muapostola Pawulo u tsale leswaku “rirhandzu leri Kreste a nga na rona ra hi lawula.” (Hlaya 2 Vakorinto 5:​14, 15.) Leswi swi vula leswaku ndlela leyi Yesu a hi rhandzaka hayona yi fanele yi hi susumetela ku endla swo karhi ku kombisa leswaku hi ri teka ri ri ra nkoka gandzelo rakwe ra nkutsulo.

3. Hikwalahokayini vanhu va nga ha kombisaka ku tlangela nkutsulo hi tindlela to hambana?

³ U ta endla yini ku kombisa leswaku wa wu tlangela nkutsulo? Nhlamulo ya wena yi nga hambana ni ya munhu un’wana. Hi lexi xikombiso xa mhaka leyi, ehleketa hi vanhu vanharhu lava yaka endhawini yin’we kambe va sukaka eka tindhawu to hambanahambana. Va ta famba hi tindlela to hambana. Hilaha ku fanaka, “ndlela” leyi u yi tekaka kumbe swilo leswi u swi endlaka ku kombisa leswaku wa wu tlangela nkutsulo, swi titshege hileswaku u na vuxaka bya njhani na Yehovha sweswi. Loko wa ha ri na sweswo emiehleketweni, eka nhlokomhaka leyi hi ta bula hi mitlawa yinharhu ya vanhu ku nga: (1) Swichudeni swa Bibele, (2) Vakreste lava khuvuriweke ni (3) tinyimpfu leti hambukeke entlhambini.

SWICHUDENI SWA BIBELE

4. Yehovha u titwa njhani hi swichudeni swa Bibele?

⁴ Loko ku ve u le ku dyondzeni ka Bibele, ehleketa hileswi: Ku navela ka wena ko lava ku twa mahungu lamanene, swi kombisa leswaku u un’wana wa vanhu lava Yehovha a va kokelaka eka yena leswaku va va na vuxaka na yena. (Yoh. 6:44; Mit. 13:48) “Yehovha i mukambisisi wa timbilu.” Leswi swi vula leswaku wa ma vona matshalatshala lawa u ma endlaka yo dyondza hi yena naswona wa tsaka ku vona nhluvuko lowu u wu endlaka, loko u ri karhi u ringeta ku cinca mahanyelo ya wena leswaku u kota ku hanya hi milawu yakwe. (Swiv. 17:3; 27:11) Nkutsulo wu endla swi koteka leswaku u va ni vuxaka lebyikulu na Yehovha. (Rhom. 5:​10, 11) U nga tshuki u swi tekele ehansi sweswo.

5. Xana swichudeni swa Bibele swi nga xi tirhisa njhani xileriso lexi nga eka Vafilipiya 3:16?

⁵ Tanihi xichudeni xa Bibele, u nga endla yini ku kombisa leswaku wa wu tlangela nkutsulo? Ndlela yin’wana i ku endla leswi muapostola Pawulo a swi byeleke Vafilipiya loko a ku: “Eka leswi se hi swi fikeleleke, a hi yeni emahlweni hi endla hi ndlela yoleyo.” (Filp. 3:16) Bibele yin’wana yi hundzuluxele ndzimana leyi hi ndlela leyi: “Hi fanele hi ya emahlweni hi famba hi tlhelo leri hi kongomeke eka rona.” Hi ku pfumelelana ni xitsundzuxo lexi, u nga pfumeleli nchumu xi ku sivela ku famba endleleni leyi yisaka evuton’wini.—Mat. 7:14; Luka 9:62.

6. Swichudeni swa Bibele swi nga endla yini loko swi swi tikela ku cinca mahanyelo? (Deteronoma 30:​11-14) (Nakambe vona xifaniso.)

⁶ Ku vuriwa yini loko swi ku tikela ku tshemba swilo swo karhi leswi wa ha ku swi dyondzaka eBibeleni? Endla ndzavisiso hi swona ivi u khongela eka Yehovha leswaku a ku pfuna u swi twisisa. (Ps. 86:11) Loko na sweswi swa ha ku tikela ku swi twisisa, pfana u swi tshikile kambe u nga tshiki ku dyondza Bibele. Kambe ku vuriwa yini loko swi ku tikela ku tshika mukhuva lowu Bibele yi wu solaka? Tsundzuka leswaku Yehovha a nge pfuki a kombele vanhu lava nga ni xidyoho leswaku va endla nchumu lowu va nga taka va nga koti ku wu endla. U nga swi kota ku hanya hi milawu yakwe. (Hlaya Deteronoma 30:​11-14.) Nakambe Yehovha u tshembisa ku ku pfuna. (Esa. 41:​10, 13; 1 Kor. 10:13) Hikwalaho, u nga lahleli thawula. Ematshan’weni yo ehleketisisa ngopfu hi xiphiqo lexi u langutaneke na xona, tlangela leswi Yehovha a ku nyikeke swona ku katsa ni lunghiselelo ra nkutsulo. Loko ndlela leyi u rhandzaka Yehovha hayona yi ya yi kula, u ta swi vona leswaku ‘swileriso swa yena a swi tiki.’—1 Yoh. 5:3.a

7. Vantshwa lava kurisiwaka entiyisweni va nga anakanyisisa hi yini?

⁷ Ku vuriwa hi n’wina vantshwa lava kurisiwaka entiyisweni? Na n’wina ma ha ri swichudeni swa Bibele. Entiyisweni, mi swichudeni swa nkoka swinene swa Bibele swa vatswari va n’wina. Bibele yi ri: “Tshinelani eka Xikwembu, kutani xi ta tshinela eka n’wina.” (Yak. 4:8; 1 Tikr. 28:9) Loko u va wo rhanga ku tshinela eka Yehovha, na yena wa tshinela eka wena. Yehovha a ngo ku teka u ri xiphemu xa ntlawa ntsena. Kambe u koka un’wana ni un’wana, ku katsa ni lava va kuriseriweke entiyisweni. I yini lexi endlaka swi koteka leswaku u kota ku va na vuxaka na Yehovha? I nkutsulo naswona u nga pfuki u wu tekele ehansi. (Rhom. 5:​1, 2) Hikwalaho, loko u nga si ya eXitsundzuxweni xa lembe leri, swi nga va kahle ku anakanyisisa hileswi rifu ra Yesu ri vulaka swona eka wena. Kutani u ehleketa hileswi u lavaka ku swi fikelela entirhweni wa Yehovha, leswi nga ta kombisa leswaku wa wu tlangela nkutsulo lowu Yehovha a wu nyikeleke hi ku tirhisa N’wana wakwe.b

VAKRESTE LAVA KHUVURIWEKE

8. Vakreste lava khuvuriweke va swi kombise njhani leswaku va wu tlangela nkutsulo?

⁸ Loko ku ve u Mukreste la khuvuriweke, se u swi kombisile leswaku wa wu tlangela nkutsulo hi tindlela to hlayanyana. Hi xikombiso, u endle swo karhi leswaku u tshinela ekusuhi na Yehovha ni ku tlhela u hanya hi milawu yakwe. U yingise xileriso xa Yesu xo endla vadyondzisiwa hi ku va u byela van’wana leswi u pfumelaka eka swona. U tinyiketele eka Yehovha ni ku tlhela u khuvuriwa. Kambe xana u kanetiwile hikwalaho ka leswi u seketelaka vugandzeri bya ntiyiso? (2 Tim. 3:12) Hambiswiritano, u ye emahlweni u tirhela Yehovha hi ku tshembeka naswona sweswo swi kombise ndlela leyi u n’wi rhandzaka hayona ni ndlela leyi u wu tlangelaka hayona nkutsulo lowu a hi nyikeke wona hi ku tirhisa N’wana wakwe.—Hev. 12:​2, 3.

9. Hi rihi khombo leri lava khuvuriweke va faneleke va tivonela eka rona?

⁹ Ku ni khombo rin’wana leri hina lava khuvuriweke hi faneleke hi ri tekela enhlokweni. Hi ku famba ka nkarhi, hi nga ha sungula ku ka hi nga ha wu tlangeli nkutsulo. Swi nga endleka njhani sweswo? Ehleketa leswi endlekeleke Vakreste vo sungula va le Efesa. Yesu la pfuxiweke u va bumabumerile hikwalaho ka leswi va tiyiseleke. Hambiswiritano, u va byele a ku: “Lexi ndzi [mi] solaka eka xona hi lexi, [mi] tshike rirhandzu leri a [mi] ri na rona eku sunguleni.” (Nhlav. 2:​3, 4) Hilaha marito ya Yesu ma swi kombisaka hakona, hakatsongotsongo Mukreste a nga sungula ku ka a nga ha gandzeli Yehovha hi mbilu hinkwayo. Munhu wo tano a nga ya emahlweni a khongela, a ya etidyondzweni ni le nsin’wini kambe a swi endlela ku hetisisa nawu, ku nga ri hileswi a rhandzaka Yehovha. U nga endla yini loko u vona onge a wa ha n’wi rhandzi Yehovha ku fana ni le ku sunguleni?

10. U nga swi tirhisa njhani leswi Pawulo a swi byeleke Timotiya leswaku a swi endla? (1 Timotiya 4:​13, 15)

¹⁰ Muapostola Pawulo u byele Timotiya leswaku a “anakanyisisa” ni ku tlhela a “dzika” eka mitirho leyi a a yi endla tanihi Mukreste. (Hlaya 1 Timotiya 4:​13, 15.) Hi ku pfumelelana ni ndzayo yoleyo, ehleketa hi tindlela leti u nga antswisaka ndlela leyi u gandzelaka hayona leswaku u tshama u ri karhi u “hiseka hi ku pfuniwa hi moya lowo kwetsima.” (Rhom. 12:11) Hi xikombiso, lunghiselela kahle leswaku u kota ku vuyeriwa loko u ri etidyondzweni. Kumbe u nga endla leswaku dyondzo ya wena ya munhu hi yexe yi ku vuyerisa hi ku tinyika nkarhi wo va wexe leswaku u kota ku anakanyisisa hileswi u swi dyondzeke. Ku fana ni leswi u hlanganyetaka ndzilo leswaku wu nga timeki, u nga endla hilaha ku fanaka eka swilo leswi leswaku u ya u tlangela leswi Yehovha a hi nyikaka swona ku katsa ni nkutsulo. Nakambe loko Xitsundzuxo xi ya xi tshinela, anakanyisisa hi mikateko yo hlawuleka leyi hina Timbhoni ta Yehovha hi tiphinaka hayona. A swi kanakanisi leswaku sweswo swi ta ku pfuna leswaku u ya u wu tlangela swinene nkutsulo, ku nga wona wu endlaka swi koteka leswaku u va na vuxaka na Yehovha.

11-12. Xana mikarhi yin’wana loko u titwa u nga ha hiseki swi vula leswaku a wa ha ri na moya wa Xikwembu? Hlamusela. (Nakambe vona xifaniso.)

¹¹ U nga heli matimba kumbe u tibyela leswaku a wa ha ri na moya wa Xikwembu loko ku ringana nkarhi wo karhi u titwa u nga ha byi hisekeli vugandzeri bya ntiyiso hilaha a wu ta lava ku endla hakona. Tsundzuka leswi muapostola Pawulo a swi tsaleleke Vakorinto mayelana ni ntirho wakwe, u te: “Niloko ndzi swi endla ku nga ri hi ku swi rhandza, ndza ha nyikiwe vutihlamuleri.” (1 Kor. 9:17) Xana a a vula yini?

¹² Mikarhi yin’wana Pawulo a a titwa a nga swi naveli ku chumayela. Kambe a a tiyimiserile ku ya emahlweni a chumayela hambileswi a a titwa hi ndlela yoleyo. Na wena u nga tiyimisela ku endla leswi fanaka. Tiyimisele ku endla swilo leswinene hambiloko mikarhi yin’wana u titwa u nga swi tsakeli. Hikwalaho, khongelela “matimba yo navela ni ku endla swilo hinkwaswo leswi [Xikwembu] xi swi lavaka.” (Filp. 2:13) Tshama u khomekile hi ku tirhela Yehovha. Nakambe tiyiseka leswaku hi ku famba ka nkarhi, u ta ya u n’wi rhandza swinene.

13. Hi nga endla yini leswaku hi tikambela ku vona loko ha ha ri “eripfumelweni”?

¹³ Hi endla kahle loko nkarhi na nkarhi hi tikambisisa hilaha 2 Vakorinto 13:5 yi vulaka hakona loko yi ku: “Tshamani mi ri karhi mi tikambela ku vona loko ma ha ri eripfumelweni; tshamani mi ri karhi mi tikombisa leswi mi nga swona.” Hi xikombiso, u nga tivutisa leswi: ‘Xana ndza ha rhangisa Mfumo ku sungula evuton’wini bya mina?’ (Mat. 6:33) ‘Xana leswi ndzi hlawulaka ku tihungasa ha swona swi kombisa leswaku ndza swi venga leswo biha?’ (Ps. 97:10) ‘Xana ndzi endla leswaku evandlheni ku va ni ku rhula ni vun’we?’ (Efe. 4:​2, 3) Hi nkarhi wa Xitsundzuxo, hi kuma nkarhi lowu hi kotaka ku anakanyisisa swinene hi nkutsulo lowu Yehovha a hi nyikeke wona ni ku tlhela hi kota ku tikambela loko ha ha hanyela Kreste ku nga ri hina vini.c

TINYIMPFU LETI HAMBUKEKE

14. I yini leswi endlaka Vakreste van’wana va hambuka entlhambini?

¹⁴ Vakreste van’wana lava a va tirhela Yehovha hi ku tshembeka, va ni tin’hweti va tshike ku ya etidyondzweni kasi van’wana va ni malembe va tshikile. Hikwalahokayini? Van’wana va tshikileriwa hi “ku vilela hi vutomi.” (Luka 21:34) Kasi van’wana va khunguvanyisiwe hi marito kumbe hi swiendlo swa makwerhu. (Yak. 3:2) Van’wana va endle swidyoho leswikulu naswona va chava ku kombela mpfuno. Swi nga ri na mhaka xivangelo xa kona, i yini leswi u nga swi endlaka loko u hambukile entlhambini? Xana lunghiselelo ra nkutsulo leri Yehovha a hi endleleke rona hikwalaho ka leswi a hi rhandzaka, ri nga ku susumetela leswaku u endla yini?

15. Yehovha u swi kombisa njhani leswaku wa khathala hi tinyimpfu leti hambukeke? (Ezekiyele 34:​11, 12, 16)

¹⁵ Anakanyisisa hi ndlela leyi Yehovha a titwaka hayona hi vanhu lava tshikeke ku ta etidyondzweni. A nga va rivalanga. Hikwalaho ka sweswo, u lavisisa tinyimpfu leti lahlekeke. Wa khathala hatona naswona u ti pfuna leswaku ti tlhelela eka yena. (Hlaya Ezekiyele 34:​11, 12, 16.) Xana Yehovha u endla leswi fanaka ni le ka wena? Ina! Leswi u nga eku hlayeni ka nhlokomhaka leyi, swi kombisa leswaku wa ha khathala hi Yehovha. Leswi Yehovha a voneke mbilu ya wena ivi a ku kokela entiyisweni, xana sweswi a nga ku tshika?

16. I yini leswi nga pfunaka nyimpfu leyi lahlekeke leswaku yi tlhelela eka Yehovha? (Nakambe vona xifaniso.)

¹⁶ Broxara leyi nge, Tlhelela Eka Yehovha yi ni marito lawa lama khutazaka: “Tiyiseka leswaku Yehovha u ta ku pfuna loko u tlhelela eka yena. U ta ku pfuna leswaku u langutana ni ku karhateka, ku twisiwa ku vava loku u nga na kona ni leswaku u va ni ku rhula ka mianakanyo loku munhu a vaka na kona hi ku va ni ripfalo leri baseke. Kutani u nga ha tlhela u susumeteleka ku tirhela Yehovha swin’we ni vagandzerikulobye.” Tsundzuka leswaku ni vakulu va tiyimisele ku ku pfuna. Va nga fana ni “ndhawu yo tumbela eka yona loko ku ri ni moya, ndhawu yo tifihla loko ku ri ni xidzedze.” (Esa. 32:2) Leswaku u kombisa ku wa wu tlangela nkutsulo, tivutise leswi: ‘Ndzi nga endla yini sweswi leswaku ndzi “lulamisa timhaka” na Yehovha?’ (Esa. 1:18; 1 Pet. 2:25) Hi xikombiso, xana u nga ya etidyondzweni? Xana u nga vulavula ni nkulu wo karhi leswaku a ku pfuna u lunghisa vuxaka bya wena na Yehovha, leswi nga katsaka ku va u dyondzeriwa Bibele ku ringana nkarhi wo karhi? U nga tiyiseka leswaku Yehovha u ta ma katekisa matshalatshala ya wena yo kombisa ku tlangela nkutsulo wa N’wana wakwe.

U TA ENDLA YINI?

17-18. Hi nga wu tirhisa njhani nkarhi wa hina hi vutlhari loko Xitsundzuxo xa lembe leri xi ri karhi xi tshinela?

¹⁷ Yesu u vule leswaku nkutsulo wu nyikeriwile “leswaku loyi a pfumelaka eka yena a nga lovisiwi kambe a kuma vutomi lebyi nga heriki.” (Yoh. 3:16) Nkutsulo i ndlela leyi Yehovha a yi tirhisaka leswaku a hi ponisa eka switandzhaku swa xidyoho ni rifu. Hinkwerhu a hi fanelanga hi wu tekela ehansi. (Rhom. 3:​23, 24; 2 Kor. 6:1) Loko Xitsundzuxo xi ya xi tshinela, hi fanele hi tinyika nkarhi wa ku anakanyisisa hi rirhandzu leri Yehovha na Yesu va ri kombiseke naswona rirhandzu rero ri fanele ri hi susumetela ku endla swo karhi ku kombisa leswaku ha swi tlangela leswi va hi endleleke swona.

¹⁸ U nga swi kombisa njhani leswaku wa wu tlangela nkutsulo? Ndlela leyi u nga ta swi kombisa hayona, yi nga ha hambana ni ya un’wana. Kambe u nga tiyiseka leswaku Yehovha u ta katekisa matshalatshala lawa u ma endlaka loko u ri karhi u joyina vagandzeri van’wana va timiliyoni lava nga ha ‘tihanyeliki, kambe va hanyelaka loyi a va feleke a tlhela a pfuxiwa.’—2 Kor. 5:15.