“Nuna La Tsakeke La Nga Ni Nsati La Rhandzekaka”

MINKARHI yin’wana, vanhu van’wana va hehla Timbhoni ta Yehovha hi ku kongoma va vula leswaku ti hahlula vukati. Hambiswiritano, vukati byo tala lebyi humelelaka laha ku ngo va munghana un’we ntsena la nga Mbhoni ya Yehovha byi kombisa leswaku a swi tano. Ku yingisa ndzayo ya Bibele evuton’wini bya ndyangu swi endla leswaku vukati byi tsakisa, hilaha swi kombisiwaka hakona hi papila leri landzelaka leri tsariweke eka phepha-hungu ra Xifurwa.

“Se swi endla malembe ya kwalomu ka 28 ndzi ri nuna la tsakeke la nga ni nsati la rhandzekaka loyi a nga Mbhoni ya Yehovha. U kurise vana va mina va ntlhanu, lava vambirhi va vona a ku nga ri va yena, a va khathalela hi ndlela leyi ringanaka ni hi rirhandzu. Leswi sweswi ndzi nga mukongomisi wa khampani leyi nga ni vatirhi va 45, ndzi nga mi tiyisekisa leswaku u hoxe xandla swinene leswaku ndzi humelela entirhweni. Hi yona mhaka leyi loko ndzi vone xihloko eka phepha-hungu leri ndzi talaka ku hlaya rona xi vula leswaku Timbhoni ta Yehovha i nxungeto exifundzheni xa Lot-et-Garonne, ndzi anakanyeke ku mi nyika vumbhoni lebyi tshembekaka.”

Papila leri ri tlhela ri ku: “A ti dzahi kumbe ku pyopyiwa. Xana lowu i nxungeto? I Vakreste lava amukelaka langutelo ra van’wana lava nga sindzisiki munhu ku landzela milawu leyi va yi landzelaka. Ku ri na sweswo, i xikombiso hi tindlela to tala. . . . A va katseki eku yiveni ka timali kumbe eku xaviseni ka swidzidzirisi. A va tibohi ku va tinghwendza, naswona ndzi nga mi tiyisekisa leswaku va hanya vutomi lebyi tolovelekeke. . . .

“U nga ha ndzi vutisa: Kutani ha yini wena u nga ri Mbhoni ya Yehovha? Hikuva ku laveka ripfumelo ra Vukreste ni ku hanya hi ku tshembeka, naswona leswi swi tsandza vo tala.”

Xana U Nga Ri Amukela Riendzo?

Hambi ku ri emisaveni leyi yi nga ni maxangu, u nga wu kuma ntsako hi ku va ni vutivi lebyi kongomeke bya Bibele mayelana ni Xikwembu, Mfumo wa xona ni xikongomelo xa xona lexi hlamarisaka hi vanhu. Loko u ta lava ku kuma rungula leri engetelekeke, kumbe u swi tsakela leswaku un’wana a ku endzela ekaya a ta dyondza Bibele na wena mahala, hi kombela u tsalela eka Watch Tower, Private Bag X2067, Krugersdorp, 1740, South Africa, kumbe eka adirese leyi faneleke eka leti xaxametiweke eka tluka 2.