1 Yoh. 5:19: “Misava hinkwayo yi le hansi ka matimba ya Lowo biha.” (Ringanisa Yohane 14:30; Nhlavutelo 13:1, 2; Daniyele 2:44.)

Tiholideyi tin’wana ta tindhawu ni ta matiko

Ti tele. A hi nge ti hlamuseli hinkwato laha. Kambe rungula ra matimu leri nyikeriweke laha henhla ri kombisa leswi hi faneleke hi swi xiya malunghana ni holideyi yin’wana ni yin’wana, naswona misinya ya milawu ya Bibele leyi se ku buriweke ha yona yi nyika nkongomiso lowu ringaneke eka lava va navelaka swinene leswaku va endla leswi tsakisaka Yehovha Xikwembu.

Tilo

Nhlamuselo: I vutshamo bya Yehovha Xikwembu ni bya swivumbiwa swa moya leswi tshembekeke; i xivandla lexi nga voniwiki hi mahlo ya vanhu. Bibele nakambe yi tirhisa rito “(ma-)tilo” hi tindlela to hambana-hambana; hi xikombiso: ri nga ha yimela Xikwembu hi xoxe, nhlengeletano ya xona ya swivumbiwa swa moya swo tshembeka, xiyimo xa ku tsakeriwa hi Xikwembu, xibakabaka hi xoxe handle ka misava, mpfhuka lowu rhendzeleke planete ya Misava, tihulumendhe ta vanhu leti fumiwaka hi Sathana, ni hulumendhe leyintshwa yo lulama ya le matilweni leyi Yesu Kreste ni vadyandzhaka-kulobye va nyikiwaka matimba hi Yehovha leswaku va yi fuma.

Xana hinkwerhu a hi hanya exivandleni xa moya hi nga si tswariwa tanihi vanhu?

Yoh. 8:23: “[Yesu Kreste u te:] ‘N’wina mi huma kwala hansi; mina ndzi huma le henhla; n’wina mi va misava leyi; mina a ndzi wa misava leyi.’” (Yesu a a huma exivandleni xa moya. Kambe, hi laha Yesu a vuleke ha kona, vanhu van’wana a va nga humi kona.)

Rhom. 9:10-12: “Raveka na yena, ú velekile [mahahlwa] . . . Loko vana lava va nga si velekiwa, ni loko va nga si endla xo saseka kumbe xo biha, Raveka ú byeriwile leswaku: ‘Lowa hosi ú ta tirhela lowa ndzisana.’ A ku ri ku endlela leswaku makungu ya Xikwembu ya ku tihlawulela loyi xi n’wi lavaka, ma yisiwa emahlweni, ku nga ri hi ku vona mintirho ya munhu, kambe hikwalaho ka ku vitana ka Xikwembu.” (Ina, loko mahahlwa lawa Yakobo na Esawu a ma rhange ma hanya exivandleni xa moya a ma ta va ni matimu lama sekeriweke emahanyelweni ya wona ya le ka xivandla xexo, a swi tano ke? Kambe matimu yo tano a va nga ri na wona ku kondza va tswariwa tanihi vanhu.)

Xana vanhu hinkwavo lavanene va ya etilweni?

Mint. 2:34: “Davhida [loyi Bibele yi n’wi vitanaka ‘munhu la amukelekaka embilwini ya Yehovha’] a nga tlhandlukelanga etilweni.”

Mt. 11:11: “Ndzi tiyisile ndzi ri ka n’wina: Exikarhi ka vanhu lava tswariweke hi vavasati, a ku humelelanga loyi a tlulaka Yohane Mukhuvuri; kasi la nga lontsongo eka hinkwavo eMfun’weni wa matilo i nkulukumba eka yena.” (Xisweswo Yohane a nga yanga etilweni loko a fa.)

Ps. 37:9, 11, 29: “La’v̌o biha v̌a ta susiwa, kambe la’v̌a ṭhembaka Yehova v̌a ta fuma misav̌a . . . V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona. La’v̌o lulama v̌a ta fuma misav̌a, v̌a ta ṭhama ka yona hi masiku.”