Benihadadi, hosi ya le Siriya a a tshamela ku hlasela Vaisrayele. Kambe nkarhi ni nkarhi, muprofeta Elixa a a byela hosi ya Israyele hi mhaka yoleyo kutani yi kota ku pona. Hiloko Benihadadi a anakanya ku khoma Elixa. U kume leswaku Elixa a a ri emutini wa Dotani, kutani a rhumela masocha ya Vasiriya leswaku ma ya n’wi khoma.

Vasiriya va fike eDotani nivusiku. Hi xa mundzuku xa kona, nandza wa Elixa u humele ehandle kutani a kuma leswaku muti wu rhendzeriwe hi masocha yo tala. U sungule ku chava kutani a huwelela a ku: ‘Elixa, hi fanele hi endla yini?’ Elixa u te: ‘Hina hi ni vo tala ku tlula lava va nga na vona.’ Hi nkarhi wolowo, Yehovha u endle leswaku nandza wa Elixa a vona leswaku tintshava hinkwato leti rhendzeleke muti ti tele hi tihanci ni makalichi ya nyimpi lama pfurhaka ndzilo.

Loko masocha ya Vasiriya ma ringeta ku khoma Elixa, u khongele a ku: ‘Yehovha, ndzi kombela u endla leswaku va nga ha voni.’ Hambileswi masocha a ma ha kota ku vona, a ma nga ku tivi laha a ma ri kona. Elixa u te: ‘Mi te emutini lowu nga riki wona. Ndzi landzeleni, ndzi ta mi yisa eka wanuna loyi mi n’wi lavaka.’ Ma fambe na Elixa ma ya eSamariya, laha hosi ya Israyele a yi tshama kona.

Loko se ku ri khale, Vasiriya va sungule ku swi xiya leswaku va le kwihi. Hosi ya Israyele yi vutise Elixa yi ku: ‘Xana ndzi nga va dlaya?’ Xana Elixa u tirhise nkarhi wolowo leswaku a tirihisela eka vanhu lava ringeteke ku n’wi vavisa? Doo! Elixa u te: ‘U nga va dlayi. Va nyike swakudya kutani u va tshika va famba.’ Kutani hosi yi va endlele nkhuvo lowukulu, loko va dyile yi va tshike va muka.

Yezabele a a ri ni n’wana wa xisati loyi a a vuriwa Ataliya, loyi na yena a homboloke ku fana ni mana wakwe. Ataliya a a tekiwe hi hosi ya le Yuda. Loko nuna wakwe a fa, n’wana wakwe u sungule ku fuma. Kambe loko n’wana wakwe a fa, Ataliya u tiendle mufumi wa le Yuda. Kutani u ringete ku herisa rixaka hinkwaro ra vuhosi, a dlaya munhu un’wana ni un’wana loyi a a ta va hosi ematshan’weni ya yena, hambi ku ri vatukulu vakwe. A a chaviwa hi vanhu hinkwavo.

Muprista Lonkulu Yoyada ni nsati wakwe Yehoxeba, a va swi tiva leswaku leswi Ataliya a a swi endla a swi bihile swinene. Va veke vutomi bya vona ekhombyeni hi ku tumbeta un’wana wa vatukulu va Ataliya, loyi a a vuriwa Yehowaxi. Va n’wi kurisele etempeleni.

Loko Yehowaxi a ri ni malembe ya nkombo, Yoyada u hlengelete tindhuna ni Valevhi hinkwavo kutani a ku: ‘Rindzani tinyangwa ta tempele, mi nga pfumeleli munhu leswaku a nghena.’ Kutani Yoyada u endle Yehowaxi hosi ya Yuda ivi a n’wi ambarisa harhi enhlokweni. Vanhu va le Yuda va huwelele va ku: ‘Hosi a yi hanye hilaha ku nga heriki!’

Hosi ya xisati Ataliya u twe huwa ya ntshungu kutani a tsutsumela etempeleni. Loko a vona hosi leyintshwa, u huwelerile a ku: “Vaxengi! Vaxengi!” Tindhuna ti khome hosi leyi yo homboloka, ti famba na yona ivi ti ya yi dlaya. Kambe ku vuriwa yini hi nkucetelo wo biha lowu yi veke na wona etikweni?

Yoyada u pfune tiko leswaku ri endla ntwanano na Yehovha, laha eka wona ri tshembiseke ku gandzela Yena ntsena. Yoyada u endle leswaku va wisa tempele ya Bali ni ku tlhela va faya swifaniso swi va swipetlupetlu. U hlawule vaprista ni Valevhi leswaku va tirha etempeleni leswaku vanhu va ta tlhela va gandzela eka yona. U avele vatirhi va le tinyangweni ku rindza tempele leswaku ku nga ngheni ni munhu ni un’we loyi a nga basangiki. Kutani Yoyada ni tindhuna va teke Yehowaxi va n’wi yisa endlwini ya vuhosi kutani va n’wi veka exitulwini xa vuhosi. Vanhu va le Yuda a va tsakile. A va ta tirhela Yehovha va nga ha kavanyetiwi hi Ataliya lowo homboloka ni hi vugandzeri bya Bali. Xana wa yi vona ndlela leyi xivindzi xa Yoyada xi pfuneke vanhu vo tala ha yona?