Vanhu va le mutini wa Vaasiriya wa Ninivha a va hombolokile. Yehovha u byele muprofeta wakwe Yonasi leswaku a ya eNinivha a ya va lemukisa leswaku va cinca mahanyelo ya vona. Kambe Yonasi u balekele endhawini yin’wana. U khandziye xikepe lexi yaka eTaraxixi kutani a baleka.

Loko xikepe xi ri elwandle, ku sungule xidzedze lexikulu naswona vatluti a va chuhile swinene. Va khongele eka swikwembu swa vona kutani va vutisa va ku: ‘Ha yini leswi swi humelela?’ Eku heteleleni, Yonasi u te: ‘Hi mina ndzi faneleke ku soriwa. Ndzi balekela leswi Yehovha a ndzi byeleke leswaku ndzi swi endla. Ndzi hoxeni elwandle kutani xidzedze xi ta miyela.’ Vatluti a va nga swi lavi ku n’wi hoxa, kambe u va sindzisile. Loko va n’wi hoxile elwandle, xidzedze xi miyerile.

Yonasi a a ehleketa leswaku u ta fa. Loko a ri karhi a nyupela elwandle, u khongele eka Yehovha. Hiloko Yehovha a rhumela nhlampfi leyikulu. Yi mite Yonasi, kambe a yi n’wi dlayanga. Yonasi u khongele eka Yehovha a ri endzeni ka yona a ku: ‘Ndza ku tshembisa leswaku ndzi ta ku yingisa mikarhi hinkwayo.’ Yehovha u sirhelele Yonasi endzeni ka nhlampfi ku ringana masiku manharhu hiloko a endla leswaku yi n’wi hlanta endhawini leyi omeke.

Leswi Yehovha a poniseke Yonasi, xana leswi a swi vula leswaku a swi nga ha bohi leswaku a ya eNinivha? Doo! Yehovha u tlhele a rhuma Yonasi leswaku a ya kona. Yonasi u yingisile. U yile kutani a fika a byela vanhu volavo vo homboloka a ku: ‘Ku sele masiku ya 40 leswaku Ninivha wu lovisiwa.’ Kutani ku humelele nchumu lowu a wu nga languteriwanga—vanhu va le Ninivha va yingisile kutani va hundzuka. Hosi ya le Ninivha yi byele vanhu va yona yi ku: ‘Huwelelani Xikwembu kutani mi hundzuka. Kumbexana a xi nge hi lovisi.’ Loko Yehovha a vona leswaku vanhu va le Ninivha va hundzukile, a nga va lovisanga.

Yonasi u hlundzuke swinene leswi muti lowu wu nga lovisiwangiki. Anakanya hi mhaka leyi: Yehovha u lehisele Yonasi mbilu a tlhela a n’wi komba tintswalo, kambe Yonasi a nga vanga ni tintswalo eka vanhu va le Ninivha. Ematshan’weni ya sweswo, u tshame ehandle ka muti endzhutini wa ximilana xin’wana a hlundzukile swinene. Kutani ximilana xexo xi file hiloko Yonasi a tlhela a hlundzuka. Yehovha u te: ‘U khathala ngopfu hi ximilana ku tlula vanhu va le Ninivha. Ndzi va kombe tintswalo naswona va ponile.’ A a n’wi dyondzisa yini? Vanhu va le Ninivha a va ri va nkoka swinene ku tlula ximilana xin’wana ni xin’wana.

Mfumo wa Asiriya a wu teke mfumo wa Israyele wa tinxaka ta khume. Sweswi Senakeribi hosi ya Asiriya a a lava ku teka mfumo wa Yuda wa tinxaka timbirhi. U sungule ku teka miti ya Yuda hi wun’we wun’we. Kambe muti lowu a a wu lava swinene a ku ri wa Yerusalema. Senakeribi a a nga swi tivi leswaku Yehovha a a sirhelela Yerusalema.

Hezekiya, hosi ya Yuda, u hakele Senakeribi mali yo tala leswaku a tshika ku hlasela Yerusalema. Hambileswi Senakeribi a tekeke mali yoleyo, u rhumele masocha yakwe ya matimba leswaku ma hlasela Yerusalema. Vanhu va le mutini wa Yerusalema a va chuhile, hikuva Vaasiriya a va ya va tshinela. Kutani Hezekiya u te: ‘Mi nga chavi. Vaasiriya va ni matimba kambe Yehovha u ta endla leswaku hi va ni matimba swinene ku va tlula.’

Senakeribi u rhume murhumiwa wakwe Rabuxake eYerusalema leswaku a ya endla xihlekiso hi vanhu va kwalaho. Rabuxake u yime ehandle ka muti kutani a huwelela a ku: ‘Yehovha a nge mi pfuni. Mi nga pfumeli ku xisiwa hi Hezekiya. Ku hava xikwembu lexi nga mi ponisaka eka hina.’

Hezekiya u vutise Yehovha leswi a faneleke a swi endla. Yehovha u te: ‘U nga chavisiwi hileswi Rabuxake a swi vulaka. Senakeribi a nge wu teki Yerusalema.’ Endzhaku ka sweswo, Hezekiya u kume mapapila lama humaka eka Senakeribi. Mapapila lawa ma te: ‘Tinyikete. Yehovha a nge ku ponisi.’ Hezekiya u khongele a ku: ‘Yehovha, hi kombela u hi ponisa leswaku un’wana ni un’wana a ta swi tiva leswaku hi wena Xikwembu xi ri xin’we xa ntiyiso.’ Yehovha u te: ‘Hosi ya Asiriya a yi nge ti eYerusalema. Ndzi ta sirhelela muti wa mina.’

Senakeribi a a tiyiseka leswaku ku nga ri khale Yerusalema a wu ta va wa yena. Kambe hi vusiku byin’we, Yehovha u rhume ntsumi laha masocha a ma tshama kona ehandle ka muti. Yi dlaye masocha ya 185 000! Hosi Senakeribi u lahlekeriwe hi masocha yakwe ya matimba. A ku ri hava lexi a ta xi endla, handle ko ya ekaya a hluriwile. Yehovha u sirhelele Hezekiya na Yerusalema, hilaha a tshembiseke hakona. Loko a wu ri eYerusalema, xana a wu ta va u n’wi tshembile Yehovha?