Vayuda va tshike ku tirhela Yehovha hi ku phindhaphindha, va gandzela swikwembu swa mavunwa. Yehovha u ringete ku va pfuna ku ringana malembe yo tala. U rhumele vaprofeta vo tala leswaku va va tsundzuxa kambe a va va yingisanga. Ku ri na sweswo, va endle xihlekiso hi vaprofeta volavo. Yehovha u wu herise njhani mukhuva wa vona wo gandzela swikwembu swa mavunwa?

Hi nkarhi wolowo, Nebukadnetsara hosi ya Babilona a a ri eku hluleni ka matiko yo hambanahambana. Loko a hlula Yerusalema ro sungula u khome Hosi Yoyakini, tihosana, tinhenha ni vavatli a va yisa eBabilona. U tlhele a teka swilo hinkwaswo swa nkoka leswi a swi ri etempeleni ya Yehovha. Endzhaku ka sweswo, Nebukadnetsara u veke Sedekiyasi leswaku a va hosi ya Yuda.

Eku sunguleni, Sedekiyasi a a yingisa Nebukadnetsara. Kambe matiko lawa a va akelane na wona ni vaprofeta va mavunwa va byele Sedekiyasi leswaku a nga ha n’wi yingisi Nebukadnetsara. Yeremiya u tsundzuxe Sedekiyasi a ku: ‘Loko wo xandzuka, vanhu vo tala va ta dlayiwa naswona ku ta va ni ndlala ni ntungu eYuda.’

Endzhaku ko fuma malembe ya nhungu, Sedekiyasi u sungule ku ka a nga ha n’wi yingisi Nebukadnetsara. U kombele mpfuno eka masocha ya Vaegipta. Hikwalaho ka sweswo Nebukadnetsara u rhumele masocha yakwe leswaku ma ya hlasela muti wa Yerusalema, kutani ma fike ma wu rhendzela. Yeremiya u byele Sedekiyasi a ku: ‘Yehovha u vule leswaku loko wena ni vanhu hinkwavo mo tinyikela eka hosi ya Babilona a mi nge lovisiwi. Kambe loko mi nga swi endli leswi, Vababilona va ta hisa muti wa Yerusalema kutani wena va ta ku endla mubohiwa.’ Sedekiyasi u te: ‘A ndzi nge tinyikeli!’

Endzhaku ka lembe ni hafu, masocha ya Babilona ma wise makhumbi ya muti wa Yerusalema kutani ma hisa muti. Ma hise tempele, ma dlaya vanhu vo tala naswona vanhu va magidi ma va endle vabohiwa.

Sedekiyasi u balekile eYerusalema kambe Vababilona va n’wi hlongorisile. Va n’wi khome ekusuhi ni le Yeriko kutani va n’wi yisa eka Nebukadnetsara. Hosi ya Babilona yi endle leswaku vana va Sedekiyasi va dlayiwa a ri karhi a swi vona. Kutani Nebukadnetsara u xokole matihlo ya Sedekiyasi ivi a n’wi pfalela ekhotsweni laha hi ku famba ka nkarhi a feleke kona. Kambe Yehovha u tshembise Vayuda a ku: ‘Endzhaku ka malembe ya 70 ndzi ta endla leswaku mi tlhelela eYerusalema.’

Xana a ku ta endleka yini hi vantshwa lava yisiweke eBabilona va ri vabohiwa? Xana a va ta tshama va tshembekile eka Yehovha?

Loko Nebukadnetsara a teke tihosana ta le Yuda a ti yisa eBabilona, u veke Axipenazi ndhuna ya le hubyeni leswaku a ti langutela. Nebukadnetsara u byele Axipenazi leswaku a hlawula majaha lama hanyeke kahle ma tlhela ma tlhariha, exikarhi ka tihosana teto. Majaha lawa a ma ta leteriwa malembe manharhu. Ndlela leyi a ma ta leteriwa ha yona a yi ta endla leswaku ma va tindhuna leti xiximekaka eBabilona. Majaha lawa a ma fanele ma dyondza ku hlaya, ku tsala ni ku vulavula Xiakkad, ku nga ririmi ra le Babilona. A ma fanele ma tlhela ma dya swakudya leswi a swi dyiwa hi hosi ni malandza ya yona. Majaha lawa ya mune a ku ri Daniyele, Hananiya, Mixayele na Azariya. Axipenazi u ma nyike mavito ya le Babilona ku nga: Beltexatsara, Xadraka, Mixaka na Abedinigo. Xana dyondzo yoleyo a yi ta ma endla ma tshika ku tirhela Yehovha?

Majaha lawa ya mune a ma tiyimisele ku yingisa Yehovha. A ma swi tiva leswaku a ma nga fanelanga ma dya swakudya swa hosi hikuva Nawu wa Yehovha a wu vula leswaku swin’wana swa swakudya sweswo a swi nga basanga. Kutani ma byele Axipenazi ma ku: ‘Hi kombela leswaku u nga hi nyiki swakudya swa hosi.’ Axipenazi u te: ‘Loko mi nga dyi kutani hosi yi mi vona mi languteka onge ma vabya, yi ta ndzi dlaya!’

Daniyele u te ni rhengu ro karhi. U byele murindzi wa vona a ku: ‘Hi kombela u hi nyika matsavu ni mati ntsena ku ringana masiku ya khume. Kutani u vona ku hambana exikarhi ka hina ni majaha lama dyaka swakudya swa hosi.’ Murindzi wa vona u pfumerile.

Endzhaku ka masiku ya khume, Daniyele ni vanghana va yena vanharhu a va languteka va hanye kahle ku tlula majaha laman’wana. Yehovha a a tsake ngopfu hikwalaho ka leswi va n’wi yingiseke. U tlhele a nyika Daniyele vutlhari byo twisisa swivono ni milorho.

Loko va hete ku leteriwa, Axipenazi u tise majaha lawa eka Nebukadnetsara. Hosi yi vulavule na wona kutani yi xiya leswaku Daniyele, Hananiya, Mixayele na Azariya a va tlharihe ku tlula majaha laman’wana hinkwawo. Yi hlawule majaha lawa ya mune leswaku ma tirha ehubyeni ya yona. Loko yi fanele yi endla swiboho swa nkoka, hosi a yi tala ku lava switsundzuxo eka majaha lawa. Yehovha u endle leswaku ma tlhariha ku tlula vavanuna hinkwavo va hosi lava a va ri ni vutlhari ni lava a va kota ku endla masalamusi.

Hambileswi a va nga ri etikweni ra rikwavo, Daniyele, Hananiya, Mixayele na Azariya a va rivalanga leswaku a va ri vanhu va Yehovha. Xana na wena u ta tshama u ri karhi u tsundzuka Yehovha, hambiloko vatswari va wena va nga ri na wena?