Siku rin’wana Nebukadnetsara u lorhe norho wo chavisa swinene. U vitane vavanuna vakwe vo tlhariha leswaku va n’wi hlamusela leswi wu vulaka swona. Kambe a nga kona ni un’we loyi a koteke ku n’wi hlamusela. Eku heteleleni, hosi yi vulavule na Daniyele.

Nebukadnetsara u byele Daniyele a ku: ‘Enorhweni wa mina ndzi vone murhi. Wu ye wu kula swinene wu kala wu fika etilweni. A wu vonaka emisaveni hinkwayo. A wu ri ni makamba yo saseka ni mihandzu yo tala. Swiharhi a swi wisa eka wona naswona tinyenyana a ti endla swisaka emarhavini ya wona. Kutani ntsumi yi ta yi huma hi le tilweni. Yi huwelele yi ku: “Tsemani murhi lowu, mi tsema marhavi ya wona. Kambe siyani xikundzu ni timitsu ta xona xi bohiwe hi nsimbi ni koporo. Mbilu ya murhi yi ta hundzuka yi nga ha vi ya munhu kambe yi ta va ya xivandzana, kutani ku ta hundza malembe ya nkombo. Vanhu hinkwavo va ta swi tiva leswaku Xikwembu i Mufumi naswona xi nyika mfumo eka un’wana ni un’wana loyi xi n’wi lavaka.”’

Yehovha u kombise Daniyele leswi norho lowu a wu vula swona. Loko Daniyele a twisise leswi norho lowu a wu vula swona u sungule ku chava. U te: ‘Hosi, ndzi navela onge norho lowu a wu vulavula hi valala va wena kambe wu vulavula hi wena. Murhi lowukulu lowu tsemiweke wu fanekisela wena. Mfumo wa wena wu ta wa naswona wena u ta dya byanyi enhoveni ku fana ni swiharhi swa nhova. Kambe leswi ntsumi yi vuleke leswaku ku fanele ku siyiwa xikundzu ni timitsu ta xona, u ta tlhela u va hosi.’

Endzhaku ka lembe, Nebukadnetsara a a ri karhi a fambafamba ehenhla ka yindlu yakwe a langute muti wa Babilona. U te: ‘Vona muti lowu kulukumba lowu ndzi wu akeke. Hakunene ndzi hosi ya matimba!’ Loko a ha vulavula, ku hume rito etilweni ri ku eka yena: ‘Nebukadnetsara! Sweswi a wa ha ri hosi.’

Hi nkarhi wolowo, Nebukadnetsara u lahlekeriwe hi miehleketo kutani a sungula ku hanya ku fana ni xiharhi. U boheke ku suka endlwini yakwe ya vuhosi a ya tshama ni swiharhi swa nhova. Misisi ya Nebukadnetsara yi kule yi leha yi fana ni tinsiva ta gama naswona minwala yakwe a yi lehe ku fana ni ya tinyenyana.

Endzhaku ka malembe ya nkombo, miehleketo ya Nebukadnetsara yi tlhele yi vuya kutani Yehovha a tlhela a n’wi endla hosi ya Babilona. Kutani Nebukadnetsara a ku: ‘Ndzi dzunisa Yehovha Hosi ya le tilweni. Sweswi ndza swi tiva leswaku Yehovha i Mufumi. U tsongahata lava tikukumuxaka naswona u nyika mfumo eka loyi a n’wi lavaka.’

Hi ku famba ka nkarhi Belxatsara u ve hosi ya Babilona. Hi vusiku byin’wana, u rhambe vanhu vo tala lava xiximekaka leswaku va ta enkhubyeni. U byele vatirhi vakwe leswaku va tisa swinwelo swa nsuku leswi tata wakwe Nebukadnetsara a swi tekeke etempeleni ya Yehovha. Belxatsara ni vaendzi vakwe va tirhise swinwelo leswi ku nwa vhinyo va ri karhi va dzunisa swikwembu swa vona. Va nga ehleketanga nchumu, ku humelele voko ri sungula ku tsala marito lawa a va nga koti ku ma hlaya, ekhumbini ra laha a va dyela kona.

Belxatsara a a chuhile swinene. U vitane vanhu vakwe va masalamusi a va tshembisa a ku: ‘Loyi a nga ta kota ku ndzi hlamusela marito lawa, ndzi ta n’wi endla a va wa vunharhu emfun’weni wa Babilona.’ Va ringetile kambe a nga kona ni un’we loyi a koteke ku n’wi hlamusela. Nsati wa hosi u tile kutani a fika a ku: ‘Ku ni wanuna la vuriwaka Daniyele, loyi a tshameke a hlamusela Nebukadnetsara milorho yakwe. A nga swi kota ku ku hlamusela marito lawa.’

Daniyele u tile eka hosi. Belxatsara u te: ‘Loko wo swi kota ku hlaya marito lawa u tlhela u ndzi hlamusela wona, ndzi ta ku hakarhisa vuhlalu bya nsuku enhan’wini naswona ndzi ta ku endla wa vunharhu emfun’weni wa Babilona.’ Daniyele u te: ‘A ndzi ti lavi tinyiko ta wena, kambe ndzi ta ku hlamusela leswi marito lawa ma vulaka swona. Nebukadnetsara tata wa wena a a tikukumuxa kambe Yehovha u n’wi tsongahatile. Wa swi tiva hinkwaswo leswi n’wi humeleleke kambe u delele Yehovha hi ku nwela vhinyo eswinwelweni swa nsuku leswi tekiweke etempeleni Yakwe. Kutani Xikwembu xi tsale marito lawa: Mene, Mene, Tekele na Parisini. Marito lawa ma vula leswaku Vameda ni Vaperesiya va ta hlula Babilona kutani wena a wu nge he vi hosi.’

A swi tikomba onge a ku nge vi na mfumo lowu nga hlulaka Babilona. Muti lowu a wu rhendzeriwe hi makhumbi lamakulu yo tiya ni nambu lowu a wu entile swinene. Kambe vusiku byebyo, Vameda ni Vaperesiya va hlasele muti lowu. Hosi Korexe wa le Peresiya u hambukise mati ya nambu wolowo leswaku masocha ya yena ma ta kota ku nghena etinyangweni ta muti. Loko ma fika ma kume tinyangwa ti nga pfariwanga! Masocha ma nghene endzeni, ma hlula muti ma tlhela ma dlaya hosi ya wona. Kutani Korexe u ve hosi ya Babilona.

Ku nga si hela ni lembe, Korexe u tivise vanhu a ku: ‘Yehovha u ndzi byele leswaku ndzi ya pfuxa tempele yakwe eYerusalema. Vanhu vakwe lava lavaka ku ya pfuna va tshunxekile ku famba.’ Kutani hilaha Yehovha a tshembiseke hakona, Vayuda vo tala va tlhelele eYerusalema endzhaku ka malembe ya 70 muti wa vona wu lovisiwile. Korexe u tlherise swinwelo swa nsuku ni swa silivhere ni swibye swin’wana leswi Nebukadnetsara a swi tekeke etempeleni. Xana wa yi vona ndlela leyi Yehovha a tirhiseke Korexe ha yona leswaku a pfuna vanhu Vakwe?