Hosi yin’wana ya Babilona a ku ri Dariyosi wa Mumeda. Dariyosi u swi vonile leswaku Daniyele a a hlawulekile. U n’wi veke leswaku a rhangela vavanuna hinkwavo lava xiximekaka etikweni. Vavanuna lava a va vondzoka Daniyele naswona a va lava ku n’wi dlaya. A va swi tiva leswaku Daniyele a a khongela eka Yehovha kanharhu hi siku kutani va byele Dariyosi va ku: ‘Hosi ku fanele ku va ni nawu lowu vulaka leswaku vanhu hinkwavo va fanele va khongela eka wena ntsena. Loyi a nga wu yingisiki nawu lowu, u fanele a hoxiwa ekheleni ra tinghala.’ Mhaka leyi yi tsakise Dariyosi, kutani a pasisa nawu lowu.

Loko Daniyele a heta ku twa hi ta nawu lowu lowuntshwa u ye endlwini yakwe. U fike a khinsama emahlweni ka fasitere leri pfuriweke a khongela eka Yehovha. Vavanuna lava a va n’wi vondzoka va fike endlwini yakwe va n’wi kuma a ha ri eku khongeleni. Va tsutsumele eka Dariyosi va fika va ku: ‘Daniyele a nga wu yingisi nawu lowu u wu vekeke. U khongela eka Xikwembu xakwe kanharhu hi siku.’ Dariyosi a a rhandza Daniyele naswona a a nga swi lavi leswaku a fa. U hete siku hinkwaro a ri karhi a lava ndlela yo ponisa Daniyele. Kambe hambi ku ri hosi a yi nga ta wu cinca nawu lowu yi wu pasiseke. U boheke ku lerisa vavanuna vakwe leswaku va hoxa Daniyele ekheleni ra tinghala leti karihaka.

Vusiku byebyo, Dariyosi a a karhatekile swinene hi Daniyele lerova a heleriwa hi vurhongo. Loko ri xa, u tsutsumele ekheleni ra tinghala kutani a fika a vitana Daniyele a ku: ‘Xana Xikwembu xa wena xi ku ponisile?’

Dariyosi u twe rito. A ku ri ra Daniyele. U byele Dariyosi a ku: ‘Ntsumi ya Yehovha yi pfale milomu ya tinghala. A ti ndzi dyanga.’ Dariyosi a a tsake ngopfu! U lerise leswaku Daniyele a humesiwa ekheleni ra tinghala. Daniyele u hume a nga vavisekanga nikatsongo. Kutani hosi yi lerise yi ku: ‘Va lahleleni ekheleni ra tinghala vavanuna lava a va lava leswaku Daniyele a fa.’ Loko vavanuna lava va lahleriwa ekheleni, tinghala ti lo namba ti va kakatlula.

Kutani Dariyosi u vule xileriso lexi eka vanhu vakwe: ‘Vanhu hinkwavo va fanele va chava Xikwembu xa Daniyele. Xi n’wi ponise ekheleni ra tinghala.’

Xana na wena u khongela eka Yehovha siku ni siku ku fana na Daniyele?

Estere a a ri nhwanyana wa Muyuda loyi a a tshama ePeresiya emutini wa Xuxani. Malembe yo tala emahlweni ka kwalaho, ndyangu wa ka vona wu tekiwe eYerusalema hi Nebukadnetsara. U kurisiwe hi buti wakwe Mordekayi loyi a a ri nandza wa Hosi Ahasuwerusi wa le Peresiya.

Hosi Ahasuwerusi a a lava nsati lontshwa. Malandza yakwe ma n’wi tisele vavasati vo saseka swinene lava a va ri kona etikweni ku katsa na Estere. Eka vavasati volavo hinkwavo, hosi yi hlawule Estere leswaku a va nsati wa yona. Mordekayi u byele Estere leswaku a nga vuli leswaku yena i Muyuda.

Hamani wanuna loyi a a tikukumuxa a a vekiwe leswaku a va holobyenkulu. A a lava leswaku vanhu hinkwavo va n’wi khinsamela. Mordekayi a nga pfumelanga ku endla tano, kutani sweswo swi hlundzukise Hamani lerova a lava ku n’wi dlaya. Loko Hamani a kuma leswaku Mordekayi i Muyuda, u endle kungu ro dlaya Vayuda hinkwavo etikweni. U byele hosi a ku: ‘Vayuda va ni khombo; u fanele u va herisa.’ Ahasuwerusi u te: ‘Endla leswi u lavaka ku swi endla,’ a tlhela a n’wi nyika vulawuri byo veka nawu. Hamani u veke nawu wa leswaku Vayuda hinkwavo va fanele va dlayiwa hi siku ra vu-13 ra n’hweti ya Adara. Yehovha a a ri ku swi voneni hinkwaswo leswi a swi endleka.

Estere a a nga tivi nchumu hi nawu wolowo. Kutani Mordekayi u n’wi rhumele kopi ya wona ivi a ku: ‘Famba u ya vulavula ni hosi hi mhaka leyi.’ Estere u te: ‘Munhu un’wana ni un’wana loyi a yaka eka hosi yi nga n’wi vitananga u ta dlayiwa. Ndzi ni masiku ya 30 hosi yi nga si ndzi vitana! Hambiswiritano ndzi ta ya. Loko yo ndzi tlakusela nhonga ya vuhosi a ndzi nge dlayiwi. Kambe loko yo ka yi nga yi tlakusi ndzi ta dlayiwa.’

Estere u ye endhawini leyi nga rivala ya hosi. Loko hosi yi n’wi vona, yi tlakusele nhonga ya yona ya vuhosi ehenhla. Estere u ye eka yona ivi hosi yi n’wi vutisa yi ku: ‘I yini lexi u lavaka ndzi ku endlela xona, Estere?’ Hiloko a ku: ‘Ndza ku rhamba wena na Hamani leswaku mi ta enkhubyeni.’ Loko va ri enkhubyeni wolowo, Estere u tlhele a va rhamba eka nkhuvo wun’wana. Enkhubyeni wa vumbirhi, hosi yi tlhele yi n’wi vutisa yi ku: ‘I yini lexi u lavaka ndzi ku endlela xona?’ U te: ‘Ku ni loyi a lavaka ku dlaya mina ni varikwerhu. Ndzi kombela u hi ponisa.’ Hiloko hosi yi vutisa yi ku: ‘I mani loyi a lavaka ku mi dlaya?’ Estere u te: ‘I Hamani loyi wo homboloka.’ Sweswo swi hlundzukise Ahasuwerusi lerova a lerisa leswaku Hamani a dlayiwa hi nkarhi wolowo.

Kambe a ku nga ri na loyi a a ta cinca nawu lowu Hamani a wu vekile, hambi ku ri hosi hi yoxe. Kutani hosi yi veke Mordekayi leswaku a va holobyenkulu yi tlhela yi n’wi nyika matimba yo veka nawu lowuntshwa. Mordekayi u veke nawu lowu a wu pfumelela Vayuda leswaku va tilwela loko va hlaseriwa. Hi siku ra vu-13 ra n’hweti ya Adara, Vayuda va hlule valala va vona. Ku sukela kwalaho va ye emahlweni va tlangela ku hlula koloko lembe ni lembe.