Se a swi endla malembe ya 70 Vaisrayele vo tala va tlhelele eYerusalema, kambe van’wana a va ha tshama etindhawini to hambanahambana leti a ti lawuriwa hi Mfumo wa Peresiya. Un’wana wa vona a ku ri muprista la vuriwaka Ezra, loyi a a dyondzisa vanhu Nawu wa Yehovha. Ezra u twe leswaku vanhu va le Yerusalema va tshike ku hanya hi ku pfumelelana ni Nawu, kutani a a lava ku ya va pfuna. Hosi Atazekiseki wa le Peresiya u te: ‘Xikwembu xi ku nyike vutlhari leswaku u ta kota ku dyondzisa Nawu wa xona. Famba ni vanhu hinkwavo lava lavaka ku famba na wena.’ Ezra u hlangane ni vanhu hinkwavo lava a va lava ku tlhelela eYerusalema. Va khongele eka Yehovha leswaku a va sirhelela eriendzweni ra vona, kutani va famba.

Va fike eYerusalema endzhaku ka tin’hweti ta mune. Loko va fika, tihosana ti byele Ezra ti ku: ‘Vaisrayele va tshike ku yingisa Yehovha naswona va teke vavasati lava gandzelaka swikwembu swa mavunwa.’ Xana Ezra u endle yini? U khinsame emahlweni ka vanhu ivi a khongela a ku: ‘Yehovha, u hi endlele swilo swo tala swinene, kambe hi ku dyoherile.’ Vanhu va hundzukile kambe a va ha endla swilo leswi a swi nga xi tsakisi Xikwembu. Ezra u hlawule vakulukumba ni vaavanyisi leswaku va lulamisa timhaka teto. Endzhaku ka tin’hweti tinharhu, vanhu hinkwavo lava a va nga gandzeli Yehovha va hlongoriwile.

Ku hundze malembe ya 12. Makhumbi ya muti wa Yerusalema ma pfuxiwile. Kutani Ezra u hlengelete vanhu endhawini leyi nga rivala leswaku a ta va hlayela Nawu wa Xikwembu. Loko Ezra a pfula buku, vanhu va suke va yima. U dzunise Yehovha ivi vanhu va yimisa mavoko ku kombisa leswaku va pfumelelana ni leswi a swi vulaka. Kutani Ezra u hlayele vanhu Nawu a tlhela a va hlamusela wona naswona a va yingiserisisile. Va pfumerile leswaku a va tlhele va hambuka eka Yehovha, hiloko va sungula ku rila. Hi siku leri landzeleke, Ezra u tlhele a va hlayela Nawu. Va kume leswaku ku nga ri khale, a va fanele va tlangela Nkhuvo wa Mitsonga. Xikan’wekan’we va sungule ku lunghiselela nkhuvo wolowo.

Eka masiku wolawo ya nkombo ya nkhuvo, vanhu a va tsakile naswona va khense Yehovha hikwalaho ka ntshovelo lowu va wu kumeke. Nkhuvo wa Mitsonga wo tsakisa ku fana ni wolowo a wu hetelele ku va kona hi nkarhi wa Yoxuwa. Endzhaku ka nkhuvo, vanhu va hlengeletanile ivi va khongela va ku: ‘Yehovha, u hi humese evuhlongeni, u hi nyika swakudya loko hi ri emananga u tlhela u hi nyika tiko leri ro saseka swinene. Kambe hi tlule nawu wa wena hi ku phindhaphindha. U rhumele vaprofeta leswaku va ta hi tsundzuxa, kambe a hi va yingisanga. Kambe u hi lehisele mbilu. U hlayise xitshembiso lexi u xi tshembiseke Abrahama. Sweswi ha ku tshembisa leswaku hi ta ku yingisa.’ Va tsale xitshembiso xa vona ehansi ivi tihosana, Valevhi ni vaprista va xi fungha hi ku ba xigandlu.

A hi tweni leswi endlekeke eka malembe ma nga ri mangani loko makhumbi ya muti wa Yerusalema ma nga si pfuxiwa. Nehemiya, nandza wa Hosi Atazekiseki, a a ri Muisrayele loyi a a tshama le Peresiya emutini wa Xuxani. Makwavo wa Nehemiya u te ni mahungu yo biha hi le Yuda lawa a ma ku: ‘Vanhu lava tlheleleke eYerusalema a va sirhelelekanga. Makhumbi ni tinyangwa ta muti leswi Vababilona va swi onheke a swi si lunghisiwa.’ Mahungu wolawo a ma n’wi tsakisanga Nehemiya. A a lava ku ya eYerusalema a ya pfuna, kutani u khongele eka Yehovha a kombela leswaku hosi yi n’wi tshunxa.

Hi ku famba ka nkarhi, hosi yi swi xiyile leswaku Nehemiya a a nga tsakanga. Yi te: ‘A ndzi si tshama ndzi ku vona u ri hi ndlela leyi. U vilerisiwa hi yini?’ Nehemiya u te: ‘Ndzi vilerisiwa hileswi Yerusalema, muti wa rikwerhu wu nga marhumbi.’ Hosi yi te: ‘Xana u lava ndzi ku pfuna hi yini?’ Hi ku hatlisa Nehemiya u khongele hi mbilu. Kutani a ku: ‘Ndzi kombela u ndzi pfumelela ndzi tlhelela eYerusalema leswaku ndzi ya pfuxa makhumbi ya muti.’ Hosi Atazekiseki u pfumelele Nehemiya leswaku a famba naswona hosi yi tlhele yi tiyiseka leswaku Nehemiya wa sirheleleka eka riendzo rakwe ro leha. Hosi yi tlhele yi veka Nehemiya leswaku a va ndhunankulu ya Yuda ni ku n’wi nyika timhandzi leswaku a endla tinyangwa ta muti.

Loko Nehemiya a fika eYerusalema u fike a kambela makhumbi ya muti. Kutani u hlengelete vaprista ni valawuri ivi a ku eka vona: ‘Swilo swi onhakile. Hi fanele hi sungula ku tirha.’ Vanhu va pfumerile naswona va nambe va sungula ku pfuxa makhumbi.

Kambe valala van’wana va Vaisrayele va sungule ku va hleka va ku: ‘Mhungubye yi nga wisa khumbi leri mi ri akaka.’ Vatirhi va swi be hi makatla sweswo kutani va ya emahlweni ni ku aka. Khumbi ri tlakukile ri tlhela ri tiya.

Valala va anakanye ku ta hi le matlhelo yo hambanahambana leswaku va ta hlasela muti wa Yerusalema swi nga languteriwanga. Loko Vayuda va twa hi kungu rero, va sungule ku chava. Kambe Nehemiya u te: ‘Mi nga chavi. Yehovha u na hina.’ Nehemiya u veke varindzi leswaku va sirhelela vatirhi, kutani valala va tsandzekile ku va hlasela.

Makhumbi ni tinyangwa swi hetiwe endzhaku ka masiku ya 52 ntsena. Nehemiya u lerise Valevhi leswaku va vuya eYerusalema leswaku ku ta va ni nkhuvo wo khangula. U va hlele va va mitlawa yimbirhi yo yimbelela. Va khandziye khumbi hi ku tirhisa switepisi leswi nga eNyangweni ya Xihlovo kutani va rhendzeleka ni muti, va ya ematlhelo lama hambaneke. Va chaye timhalamhala, swiphambati ni tiharipa va dzunisa Yehovha. Ezra u fambe ni ntlawa wun’we kasi Nehemiya u fambe ni ntlawa lowun’wana, va fike va hlangana etempeleni. Vanhu hinkwavo, ku katsa vavanuna, vavasati ni vana a va endlela Yehovha magandzelo va tlhela va tiphina hi nkhuvo. Mpfumawulo wa ku yimbelela ka vona va tsakile a wu twala ni le kule.