Swi fanele swi va hlamarisile vavasati loko va vona sirha leri va lahleke Yesu eka rona ri nga ha ri na nchumu. Mariya Magadala u tsutsumela eka “Simoni Petro loyi a a ri ni mudyondzisiwa loyi Yesu a a n’wi rhandza ngopfu” ku nga muapostola Yohane. (Yohane 20:2) Kambe vavasati lavan’wana lava saleke esirheni, va vona ntsumi esirheni. Naswona endzeni ka sirha ra xitsundzuxo ku ni ntsumi yin’wana, yi “ambale xiambalo xo leha xo basa.”—Marka 16:5.

Yin’wana ya tintsumi teto yi ri eka vona: “Mi nga hlamali. Mi lava Yesu wa le Nazareta loyi a dlayiweke emhandzini. U pfuxiwile. A nga kona laha. Vonani, hi leyi ndhawu leyi a a vekiwe eka yona. Fambani mi ya byela vadyondzisiwa vakwe swin’we na Petro mi ku, ‘Mi ta ya n’wi kuma eGaleliya.” (Matewu 28:5-7) Leswi Vavasati a “va rhurhumela hi ku chava naswona a va hlamarile swinene,” va tsutsuma va ya byela vadyondzisiwa.—Marka 16:8.

Sweswi, Mariya u kume Petro na Yohane. U va byela a ri karhi a hefemuteka, a ku: “Va suse Hosi esirheni naswona a hi swi tivi leswaku va yi veke kwihi.” (Yohane 20:2) Hiloko Petro na Yohane va tsutsumela kona. Leswi Yohane a nga ni rivilo, u hatla a fika esirheni. U fika a hlometela ivi a vona malapi kambe a nga ngheni endzeni.

Loko Petro a fika, u nghena endzeni. U vona malapi ni lapi leri tirhisiweke ku tsondzela nhloko ya Yesu. Sweswi Yohane wa nghena naswona se wa swi tshemba leswi Mariya a swi vuleke. Hambileswi Yesu a a va byerile eku sunguleni, a nga kona loyi a swi twisisaka leswaku u pfuxiwile eku feni. (Matewu 16:21) Leswi va nga pfilunganyeka, va muka. Kambe Mariya loyi a tlheleleke esirheni, u sala kwalaho.

Hi nkarhi lowu fanaka, vavasati lavan’wana va ya byela vadyondzisiwa leswaku Yesu u pfuxiwile eku feni. Loko va ha tsutsumela kwalaho, Yesu u hlangana na vona ivi a ku: “Xewani!” Va khinsama emahlweni kakwe ivi va ‘n’wi khoma milenge.’ Kutani Yesu a ku: “Mi nga chavi! Fambani mi ya tivisa vamakwerhu leswaku va ya eGaleliya, va ta ndzi vona kwale.”—Matewu 28:9, 10.

Hi nkarhi lowu ku tsekatseka ka misava ku endlekeke ha wona ivi ku humelela tintsumi, masocha lama a ma ri esirheni a ma “chava ngopfu lerova [ma] ku whii, [ma] fana ni vanhu lava feke.” Loko se ma xalamukile, ma nghena emutini ma “ya vikela vaprista lavakulu swilo hinkwaswo leswi endlekeke.” Kutani vaprista lavakulu va ya byela vakulukumba va Vayuda. Va teke xiboho xo fumbarherisa masocha leswaku ma tumbeta mhaka yoleyo ivi va ma byela ku vula leswi: “Vadyondzisiwa vakwe va te nivusiku va ta n’wi yiva loko ha ha etlele.”—Matewu 28:4, 11, 13.

Loko masocha ya Rhoma ma etlela entirhweni ma nga dlayiwa, kutani vaprista va tshembisa va ku: “Loko mhaka [ya leswaku a mi etlele] yo fika etindleveni ta ndhunankulu, hi ta yi hlamusela, mi nga karhateki.” (Matewu 28:14) Masocha wolawo ma teka xifumbarheriso ivi ma endla leswi vaprista va swi vulaka. Xisweswo, mavunwa ya leswaku ntsumbu wa Yesu wu yiviwile ma hangalaka exikarhi ka Vayuda vo tala.

Mariya Magadala wa ha ri eku rileni esirheni. Loko a korhama a hlometela eka rona u vona tintsumi timbirhi ti ambale swo basa! Yin’wana a yi tshame hi le nhlokweni ya laha ntsumbu wa Yesu a wu etlerisiwe kona, kasi leyin’wana a yi tshame hi le milengeni. Ti n’wi vutisa ti ku: “Wansati, u rilela yini?” Mariya a hlamula a ku: “Va teke Hosi ya mina naswona a ndzi swi tivi leswaku va yi veke kwihi.” Loko a hundzuluka, Mariya u vona munhu un’wana. U phindha xivutiso xa tintsumi ivi a ku: “U lava mani?” Leswi a a ehleketa leswaku i mutirhi wa le xirhapeni xa vafi, u ri: “Nkulukumba, loko u n’wi tekile ndzi byele laha u nga n’wi veka kona, ndzi ta ya ndzi ya n’wi teka.”—Yohane 20:13-15.

Entiyisweni, Mariya u vulavula na Yesu loyi a pfuxiweke kambe hi nkarhi wolowo a nga n’wi tivi. Hambiswiritano, loko Yesu a ku, “Mariya!” wa swi xiya leswaku i Yesu hikuva u tsundzuka ndlela leyi a a vulavula na yena hayona. Hikwalaho ko tsaka, Mariya u ri: “Raboni!” (leswi vulaka “Mudyondzisi!”) Kambe leswi a chavaka leswaku Yesu u ta tlhandlukela etilweni, wa n’wi khoma. Hikwalaho, Yesu wa n’wi khongotela a ku: “Tshika ku ndzi namarhela hikuva a ndzi si tlhandlukela eka Tatana. Kambe famba u ya byela vamakwerhu u ku, ‘Ndzi tlhandlukela eka Tata wa mina loyi a nga Tata wa n’wina ni le ka Xikwembu xa mina lexi nga Xikwembu xa n’wina.’”—Yohane 20:16, 17.

Mariya u tsutsumela laha vaapostola ni vadyondzisiwa van’wana va hlengeletaneke kona. U fika a ku eka vona: “Ndzi vone Hosi!” ku nga leswi va swi tweke eka vavasati lavan’wana. (Yohane 20:18) Hambiswiritano, a va ehleketa leswaku vavasati lava ‘va jamuka.’—Luka 24:11.

Hi Sonto wa Nisani 16, vadyondzisiwa va ni gome. A va swi twisisi leswaku hikwalahokayini sirha ri nga ri na munhu. (Matewu 28:9, 10; Luka 24:11) Nindzhenga, Kleyopasi ni mudyondzisiwa un’wana va suka eYerusalema va ya Emawusi, leyi nga kwalomu ka 11 wa tikhilomitara.

Loko va ri karhi va famba, va vulavula hi leswi swi humeleleke. Munhu loyi va nga n’wi tiviki u famba na vona. U vutisa a ku: “Xana mi vulavula hi yini?” Kleyopasi a hlamula a ku: “Swi tisa ku yini leswaku ku va wena ntsena loyi a nga swi tiviki leswa ha ku endlekaka eYerusalema?” Hiloko a va vutisa a ku: “Ku endleke yini?”—Luka 24:17-19.

Va n’wi hlamula va ku: “Xana a wu swi tivi swilo leswi humeleleke eka Yesu wa le Nazareta? . . . A hi tshemba leswaku hi yena loyi a hlawuriweke leswaku a kutsula Israyele.”—Luka 24:19-21.

Kleyopasi ni munghana wakwe va ya emahlweni va hlamusela swilo leswi endlekeke siku rero. Va vula leswaku vavasati van’wana lava yeke esirheni leri ntsumbu wa Yesu a wu lahliwe eka rona, va kume ku nga ri na munhu naswona va ve timbhoni leti voneke xiendlakalo xo hlamarisa, ku nga ku humelela ka tintsumi leti vuleke leswaku Yesu wa hanya. Va vula leswaku van’wana na vona va yile esirheni ivi va “kuma ri nga ri na nchumu hilaha vavasati va vuleke hakona.”—Luka 24:24.

Vadyondzisiwa lavambirhi a va swi twisisi leswaku leswi swa ha ku humelelaka swi vula yini. Wanuna loyi, u va hlamula hi ndlela leyi kombisaka vulawuri leswaku a lulamisa langutelo ra vona leri hoxeke, u ri: “N’wina vanhu lava nga twisisiki, lava hlwelaka ku tshemba swilo hinkwaswo leswi vuriweke hi vaprofeta! Xana a swi nga fanelanga leswaku Kreste a langutana ni swilo leswi a tlhela a vangamisiwa?” (Luka 24:25, 26) Wanuna loyi u ya emahlweni a va hlamusela tindzima to tala ta le Matsalweni leti vulavulaka hi Kreste.

Eku heteleleni vavanuna lava vanharhu va fika ekusuhi na Emawusi. Vadyondzisiwa vambirhi va lava ku tiva swo tala, kutani va kombela munhu loyi a nga tiviwiki va ku: “Tshama na hina hikuva se ri perile.” U pfumela ku tshama na vona kutani va dya swakudya. Loko wanuna loyi a khongela, a phema xinkwa ivi a va nyika xona, va swi xiya leswaku hi yena Yesu kutani a nyamalala. (Luka 24:29-31) Se va swi tiva leswaku Yesu wa hanya hakunene!

Vadyondzisiwa lava vambirhi va hlamusela leswi va swi voneke va tsakile va ku: “Hi yona mhaka swi hi khumbeke timbilu leswi a hi byeleke swona loko hi ri endleleni, loko a ri karhi a hi hlamusela Matsalwa!” (Luka 24:32) Va tlhelela eYerusalema hi ku hatlisa, laha va kumaka vaapostola va ri ni vanhu van’wana. Loko Kleyopasi ni munghana wakwe va nga si hlamusela xiviko, va twa vanhu van’wana va ku: “I ntiyiso Hosi yi pfuxiwile naswona yi humelele eka Simoni!” (Luka 24:34) Hiloko va hlamusela ndlela leyi Yesu a humeleleke eka vona hayona. Hakunene na vona i timbhoni.

Sweswi se va chuhile kutani hiloko Yesu a humelela endlwini! Leswi swi tikomba ku ri singita hikuva minyangwa yi lotleriwile hileswi a va chava Vayuda. Hambiswiritano, Yesu u yime exikarhi ka vona. Hi rito leri chavelelaka, a ku eka vona: “Onge mi nga va ni ku rhula.” Kambe va chuhile. Hilaha va tshameke va endla hakona, va ‘ehleketa leswaku va vona xivumbiwa xa moya.’—Luka 24:36, 37; Matewu 14:25-27.

Ku kombisa leswaku a ngo va xipuku kumbe nchumu wun’wana lowu ngo ehleketiwa kunene kambe u ni miri wa nyama, Yesu u va komba mavoko ni milenge yakwe ivi a ku: “Hikwalaho ka yini mi karhatekile, naswona i yini lexi endlaka mi kanakana etimbilwini ta n’wina? Vonani mavoko ni milenge ya mina, hi mina hi xiviri; ndzi khumbeni, hikuva xivumbiwa xa moya a xi na nyama ni marhambu kambe mina ndzi na swona.” (Luka 24:36-39) Hiloko va khapakhapa hi ntsako kambe swa ha va tikela ku swi tshemba.

Loko a ringeta ku va pfuna va vona leswaku i wa xiviri u va vutisa a ku: “Xana mi ni swakudya?” U teka nhlampfi leyi oxiweke leyi va n’wi nyikaka yona kutani a yi dya. Hiloko a ku: “Lawa i marito lawa ndzi mi byeleke wona loko ndza ha ri na n’wina, leswaku swilo hinkwaswo leswi tsariweke ha mina eNawini wa Muxe ni hi Vaprofeta ni le ka Tipisalema, swi fanele swi endleka.”—Luka 24:41-44.

Yesu u pfune Kleyopasi ni munghana wakwe leswaku va twisisa Matsalwa naswona sweswi u pfuna hinkwavo lava hlengeletaneke kwalaho, u ri: “Ku tsariwe leswi: Kreste u ta xaniseka kutani a pfuka eka lava feke hi siku ra vunharhu, naswona mahungu lamanene ma ta chumayeriwa ematikweni hinkwawo hi vito ra yena ku sukela eYerusalema, leswaku vanhu va ta hundzuka eswidyohweni swa vona kutani va rivaleriwa. Mi ta va timbhoni ta swilo leswi.”—Luka 24:46-48.

Hikwalaho ka swivangelo swo karhi, muapostola Tomasi a nga kona kwalaho. Hi masiku lama landzelaka, van’wana va n’wi byela va tsakile va ku: “Hi vone Hosi!” Tomasi u hlamula a ku: “A ndzi nge tshembi handle ka loko ndzo vona timbhovo ta swipikiri emavokweni yakwe, ndzi nghenisa ritiho ra mina eka tona ndzi tlhela ndzi nghenisa ni voko ra mina etsheveni rakwe.”—Yohane 20:25.

Endzhaku ka masiku ya nhungu, vadyondzisiwa va tlhela va hlengeletana va ti pfalerile kambe sweswi Tomasi se u kona. Yesu u humelela exikarhi ka vona hi miri lowu vonakaka kutani a va xeweta a ku: “Onge mi nga va ni ku rhula.” Loko a hundzulukela eka Tomasi, Yesu u ri: “Nghenisa ritiho ra wena laha, u languta ni mavoko ya mina, u nghenisa ni voko ra wena etsheveni ra mina, u tshika ku kanakana, u kholwa.” Tomasi a huwelela a ku: “Hosi yanga ni Xikwembu xanga!” (Yohane 20:26-28) Sweswi a nga ha kanakani leswaku Yesu wa hanya tanihi xivumbiwa xa le tilweni lexi nga muyimeri wa Yehovha Xikwembu.

Yesu u ri: “Xana u tshemba hi leswi u ndzi voneke? Va tsaka lava tshembaka hambiloko va nga vonanga nchumu.”—Yohane 20:29.