Kuma Vuxokoxoko Hinkwabyo

Xiphiqo

Hakanyingi vanhu va va ni xihlawuhlawu hikwalaho ka leswi va tweke mhaka leyi nga riki ntiyiso hi vanhu van’wana. Xiya swikombiso leswi landzelaka:

Emitirhweni vathori van’wana va ehleketa leswaku vavasati a va nge swi koti ku tirha mitirho leyi lavaka matimba, vuswikoti hambi ku ri vutlhari.
Khale le Yuropa, Vayuda a va hehliwa hi ku chela chefu eswihlobyeni ni ku hangalasa mavabyi. Hi nkarhi wa ku fuma ka Manazi Vayuda va tlhele va phyarhekiwa hi mavunwa. Va tlhele va hehliwa hi ku wisa ikhonomi eJarimani. Sweswo swi endle leswaku Vayuda va vengiwa swinene lerova ni namuntlha swa ha ri tano.
Vanhu vo tala va vula leswaku vanhu lava nga ni vulema byo karhi va tshama va hlundzukile kumbe va karihile.

Vanhu lava tshembaka leswi, va nga ha vula ni swikombiso leswi seketelaka mavonelo ya vona. Loko va hlangana ni munhu loyi a nga yimiki na vona va vula leswaku a nga na mhaka na nchumu.

Nawu Wa Le Bibeleni

“A hi swinene leswaku munhu a nga vi na vutivi.”—SWIVURISO 19:2.

Hi dyondza yini eka ndzimana leyi? Loko hi nga ri ni vuxokoxoko hinkwabyo hi nga endla swiboho leswi hoxeke. Hikwalaho loko hi tshemba mavarivari hi nga lavisisanga ntiyiso swi nga endla hi avanyisa vanhu hi ndlela leyi hoxeke.

Xana Bibele Yi Hi Khutaza Ku Va Ni Xihlawuhlawu?

Van’wana va vula leswaku Bibele yi hi dyondzisa ku va ni xihlawuhlawu. Kambe i yini leswi Bibele yi swi vulaka hi xihlawuhlawu?

Hinkwerhu ha fana: Xikwembu hi ku tirhisa “munhu un’we xi endle tinxaka hinkwato ta vanhu.”—Mitirho 17:26.
Xikwembu a xi na xihlawuhlawu: “Xikwembu a xi na xihlawuhlawu, kambe eka tiko rin’wana ni rin’wana munhu loyi a xi chavaka a tlhela a endla leswinene wa amukeleka eka xona.”—Mitirho 10:34, 35.
Xikwembu xi tiva mbilu ya munhu ku nga ri ndlela leyi a langutekaka ha yona: “Hikuva Xikwembu a xi voni hi ndlela leyi munhu a vonaka ha yona, munhu u vona ntsena leswi voniwaka hi matihlo, kambe Yehovha u vona leswi nga embilwini.”—1 Samuwele 16:7.a

a Yehovha i vito ra Xikwembu hilaha swi tsariweke ha kona eBibeleni.

Ndlela Leyi Ku Tiva Ntiyiso Swi Nga Hi Pfunaka Ha yona

Loko hi tiva ntiyiso hi vanhu vo karhi, a hi nge ma tshembi mavarivari ya mavunwa lama hi ma twaka hi vona. Loko se hi swi xiya leswaku vanhu volavo vo phyarhekiwa mavunwa a hi nge hatli hi swi tshemba.

Ntokoto: Jovica (Balkans)

Jovica loyi ku vulavuriweke ha yena eka magazini lowu, u kule a ri karhi a twa vanhu, mahungu ni switori swa le ka thelevhixini leswi vulavulaka ku biha hi vanhu va rixaka leriya ri tekeriwaka ehansi. Jovica u ri: “Sweswo swi endle leswaku ndzi va ni xihlawuhlawu ni ku tlhela ndzi venga rixaka rero naswona a ndzi nga titwi nandzu hi swona.

“Kambe loko ndzi ri evusocheni a swo ndzi tswii, ku tshama ni ku tirha ni masocha ya rixaka leri ndzi ri vengaka. Hi ku famba ka nkarhi ndzi sungule ku va tiva ku antswa. Ndzi sungule ku dyondza ririmi ra vona ni ku yingisela tinsimu ta vona. Ndzi sungule ku va rhandza ni ku cinca ndlela leyi a ndzi va teka ha yona. Ndza swi tiva leswaku loko ndzo tshama ndzi khondla mavoko ndzi nga tlhela ndzi va ni xihlawuhlawu. Hikwalaho ndzi papalata ku hlalela mahungu lama vulavulaka ku biha hi rixaka rero. Ndzi tlhela ndzi papalata tifilimi ni vanhu lava endlaka mafenya hi ku gwarha vanhu volavo. Ndza swi tiva leswaku xihlawuhlawu xi nga endla ndzi va ni mahlundzu ni rivengo.”

Leswi U Nga Swi Endlaka

Tsundzuka leswaku leswi vanhu va swi vulaka hi vanhu va rixaka ro karhi a hi mikarhi hinkwayo swi nga ntiyiso hi munhu un’wana ni un’wana loyi a humaka eka rixaka rero.
Tsundzuka leswaku a wu tivi swilo hinkwaswo hi vanhu volavo.
Tikarhatele ku kuma ntiyiso.