Vona Leswinene Eka Van’wana

Xiphiqo

Ku titeka u antswa swi nga endla u va ni xihlawuhlawu. Munhu wa makatla u lava van’wana va twa hi yena. U titeka a antswa naswona u tekela vanhu van’wana ehansi. Hinkwerhu xi nga hi phasa xirimbana lexi. Encyclopædia Britannica yi ri: “Vanhu va mindhavuko yo hambanahambana hi ndlela yo karhi va nga ha vona onge ndlela leyi va hanyaka ha yona, swakudya swa vona, ndlela leyi va ambalaka ha yona mikhuva ya vona, leswi va pfumelaka eka swona ni swin’wana swo fana na sweswo, swi va endla va antswa ku tlula vanhu va mindhavuko yin’wana.” Hi nga ri papalata njhani langutelo leri?

Nawu Wa Le Bibeleni

“Hi ku titsongahata mi teka van’wana va ri lava tlakukeke eka n’wina.” —VAFILIPIYA 2:3.

Hi dyondza yini eka ndzimana leyi? Leswaku hi papalata ku tikukumuxa hi fanele hi titsongahata. Loko hi titsongahata swi hi pfuna ku amukela leswaku swi kona leswi van’wana va hi tlulaka hi swona. A ri kona rixaka leri kotaka ku endla swilo hinkwaswo.

Xiya xikombiso xa Stefan. U kulele etikweni ra Makhomunisi kambe u tshike ku venga vanhu lava humaka ematikweni lama nga riki Makhomunisi. U ri: “Ku teka van’wana va ri lava tlakukeke eka mina swi ndzi pfunile leswaku ndzi tshika xihlawuhlawu. A ndzi tivi swilo hinkwaswo. Ku na swo karhi ndzi nga swi dyondzaka eka van’wana.”

Leswi U Nga Swi Endlaka

Tsundzuka leswaku a wu koti swilo hinkwaswo, pfumela loko u endle swihoxo. Ku ni swilo leswi van’wana va swi endlaka kahle leswi wena swi ku tsandzaka. U nga tibyeli ku vanhu va rixaka ro karhi va fana hinkwavo.

Ematshan’weni yo va ni langutelo leri hoxeke hi munhu loyi a humaka etikweni ro karhi, tivutise:

Tsundzuka leswaku ku ni swilo leswi van’wana va kotaka ku swi endla kahle leswi wena swi ku tsandzaka.

‘Xana leswi ndzi nga swi rhandziki hi munhu yoloye swi lo hoxa kumbe hileswi hi nga faniki?’
‘Xana swi kona swihoxo leswi munhu yoloye a nga swi vonaka eka mina?’
‘Hi swihi swilo leswi a kotaka ku swi endla leswi mina ndzi nga swi kotiki?’

Loko u hlamule swivutiso leswi hi ku tshembeka, u ta kota ku tshika xihlawuhlawu ni ku tlhela u dyondza swilo leswinene eka munhu yoloye.

Ntokoto: Nelson (United states)

“Loko ndza ha ri ntsongo ndzi kulele endhawini leyi ku teleke rixaka ro karhi. Loko ndzi ri ni malembe ya 19 ndzi rhurhele edorobeni lerikulu leswaku ndzi ya tirha efektri, a ndzi tirha ni ku tshama ni vanhu va tinxaka ni mindhavuko yo hambanahambana.

“Loko ndzi ya ndzi endla xinghana ni vanhu lava ndzi tirhaka na vona, ndzi sungule ku swi vona leswaku nhlonge ya munhu, ririmi leri a ri vulavulaka ni rixaka leri a humaka eka rona a swi ndzi byeli nchumu hi munhu yoloye, a ndzi nge swi tivi leswaku wa tshembeka, u tirha hi matimba kumbe ndlela leyi a titwaka ha yona loko ndzi nga si n’wi tiva ku antswa.

“Ndzi teke nsati wa rixaka rin’wana loyi a humaka etikweni rin’wana, swi ndzi tsakisile ku dya swakudya swa le tikweni ra ka vona ni ku yingisela vuyimbeleri bya kona. Ndzi dyondze leswaku rixaka rin’wana ni rin’wana ku ni swilo leswinene hi rona nileswi nga riki leswinene. Ku vula ntiyiso swi ndzi pfunile leswaku ndzi va munhu wo antswa ni ku dyondza swo karhi eka tinxaka tin’wana.”