22 Vontlhe lava va nga hlawulilwe kota vagadhi va tinyangwa va wa hi 212. Va wa hi lomu ka maaldheya yabye hi kuya hi lezvi va nga tsalelisilwe zvona mabhukwini ya tixaka tabye.+ Dhavhidha na Samuweli, a muwoni,+ hi vona va nga va yimisa a kuva vagadhi va tinyangwa hi kota ya kutsumbeka kabye. 23 Vona ni vana vabye va wa nyikilwe ntiro wa ku gadha a tinyangwa ta yindlu ya Jehovha,+ ku nga tabhernakeli. 24 A vagadhi va tinyangwa va wa kumeka ka mune wa matlhelo — mutsuwuka-gambo, ni mupela-gambo, ni n’walungu,* ni dzongeni.*+ 25 Zvikhati ni zvikhati, a vamakabye vabye va wa fanele kuta hi maaldheyeni yabye kasi va ta tira navo hi 7 wa masiku. 26 Ku wa hi ni mune wa tihosana* ta vagadhi va tinyangwa ti nga hi ntirweni wa vanhu vo tsumbeka. A tihosana leto ti wa hi vaLevhi, niku ti wa hi vahlayisi va tisala* ni vahlayisi va titshomba ta yindlu ya Nungungulu wa lisine.+ 27 Va wa ku pilapila wusiku gontlhe na va hi matshan’wini yabye matlhelweni wontlhe ya yindlu ya Nungungulu wa lisine hakuva va wa hi vagadhi; hi vona kambe va nga tshama ni khiya niku va wa vhulula a yindlu mixo ni mixo.