3 Ka khati gin’wani, i no nghena sinagogeni, a kuma wanuna wa canja go limala.+ 2 Hikwalaho, va wa mu cuwukela khwatsi kasi ku wona lezvaku i ta hanyisa wanuna loye hi sabhadho ke, kasi va fela ku mu nyika nandzu. 3 I no byela wanuna loye wa canja go limala, aku: “Suka uta laha cikari.” 4 Hi kulandzela, i no va wutisa aku: “Zva vhumelelwa hi nayo a ku maha zvazvinene kutani zvakubiha hi sabhadho, a ku ponisa wutomi* kutani ku daya ke?”+ Kanilezvi a va mu hlamulangi. 5 Andzhako ka loku a va cuwukile na a swirekile ni ku bayiseka nguvhu hi kota ya kutlanyala ka timbilu tabye,+ i no byela wanuna loye, aku: “Tshambuluta canja ga wena.” I no gi tshambuluta, a canja gakwe gi se hanya. 6 Hi kota ya lezvo, a vaFarisi va no huma va ya tekela ku tlhangana ni valandzeli va Herodhi+ va xuxa cikungo kasi ku mu daya.

6 Ka sabhadho gin’wani,+ Jesu i no nghena sinagogeni a sangula ku gondzisa. Kwalomo ku wa hi ni wanuna a nga limalile canja ga cinene.+ 7 A vatsali ni vaFarisi va wa mu cuwukela khwatsi kasi ku wona lezvaku i ta hanyisa hi sabhadho ke, kasi va fela ku mu nyika nandzu. 8 Hambulezvo, na a tiva maalakanyo yabye,+ i no byela wanuna loye wa canja go limala, aku: “Suka, u yima laha cikari.” I no suka a yima laho. 9 Hi kulandzela, Jesu i te ngalo kabye: “Vavanuna, ndza mu wutisa: Zva vhumelelwa hi nayo a ku maha zvazvinene kutani zvakubiha hi sabhadho, a ku ponisa wutomi* kutani ku gi lovisa ke?”+ 10 Andzhako ka loku a cuwukile vontlhe lava va nga hi matlhelweni yakwe, i no byela wanuna loye, aku: “Tshambuluta canja ga wena.” I no maha lezvo, a canja gakwe gi se hanya. 11 Kanilezvi va no vhindluka hi zanga, va sangula ku bhulisana hi ku va ta mu maha yini Jesu.