Mitsengo

5 Jehovha i no engeta a byela Mosi, aku: 2 “Laya a vaIzrayeli lezvaku va humesa handle ka wugovelo ni wihi munhu a nga ni hlokonho,+ ni vontlhe lava va humako wubovhu,+ ni vontlhe vangahlazvekangiko hi kota ya munhu* a fileko.+ 3 Kani wanuna kutani wasati, mu humeseni handle. Va humeseni handle ka wugovelo kasi va nga nyenyezisi+ a wugovelo ga lava ndzi tshamako cikari kabye.”+ 4 Hikwalaho, a vaIzrayeli va no maha lezvo, va va humesa handle ka wugovelo. Kota lezvi Jehovha a nga leletele Mosi, a vaIzrayeli va no zvi mahisa zvalezvo.

5 Jehovha i no engeta a byela Mosi, aku: 6 “Byela a vaIzrayeli, uku: ‘Loku a wanuna kutani wasati a maha ni cihi ciwonho ca lezvi zvi mahiwako hi vanhu, a nga tsumbeki mahlweni ka Jehovha, a munhu loye* i tava ni nandzu.+ 7 I fanele ku wulela+ a ciwonho leci a mahileko, a tlhelisela a ntsengo wu ringanako kota hakhelo ya nandzu wakwe a tlhela a engetela a cipandze ca wutlhanu ca ntsengo wa cona.+ I ta nyikela a ntsengo lowo ka loyi a mu wonheleko. 8 Kanilezvi loku loyi a wonhelweko a nga hi na xaka ga laha kusuhani ga ku amukela a hakhelo leyo, yi ta yisiwa ka Jehovha niku yi ta lumba mupristi, ahandle ka yivhu ya matsune ya muphahlo wa ku kombela ku tsetselelwa zviwonho leyi a mupristi a to mu mahela hi yona a muphahlo wa ku kombela ku tsetselelwa zviwonho.+

9 “‘Yontlhe a minyikelo yo basa+ ya vaIzrayeli leyi yi nyikelwako ka mupristi yi tava yakwe.+ 10 A zvilo zvi basileko zva munhu mun’we ni mun’wani zvi ta simama kuva zvakwe. Ni cihi leci a munhu a nyikelako ka mupristi ci ta lumba mupristi.’”

11 Jehovha i no engeta a byela Mosi, aku: 12 “Byela a vaIzrayeli, uku: ‘Lezvi hi lezvi zvi to mahiwa loku a sati wa wanuna wo kari a hambuka, a nga tsumbeki ka nuna wakwe, 13 a mun’wani wanuna a hlengela masango naye+ kanilezvi a nuna wakwe a nga zvi tivi zvi tlhela zvi nga poleki, laha ka ku a wasati loye a ti nyenyezisa kanilezvi ku nga hi na vakustumunyu va mu wonileko, ne na a nga kumiwangi: 14 Loku a nuna a lusela a sati wakwe a tlhela a kanakanela kutsumbeka kakwe, na ku hi ku hakunene i ti nyenyezisile, kutani loku a nuna a lusela a sati wakwe a tlhela a kanakanela kutsumbeka kakwe kuveni a nga ti nyenyezisangi, 15 a wanuna loye i fanele ku famba ni sati wakwe ka mupristi zvin’we ni munyikelo wa sati wakwe wa cipandze ca wukhume ca efa* ya mapa ya sevhadha. A nga chululi mafura hehla ka wona hambu ku chela hlakati yo nuhela hehla ka wona, hakuva lowo munyikelo wa tindzhoho wa ciluse, a munyikelo wa tindzhoho wu alakanyisako nandzu.

16 “‘A mupristi i ta neha wasati laha phambeni a ta mu yimisa mahlweni ka Jehovha.+ 17 A mupristi i ta teka a mati yo basa lomu ka cibya ca wumba, a nusa a ntshuri wo kari lahasi ka tabhernakeli a wu chela lomu matini. 18 A mupristi i ta yimisa wasati mahlweni ka Jehovha, a mu tlhatlha misisi, a chela a munyikelo wa tindzhoho wa cialakanyiso mandleni yakwe, ku nga munyikelo wa tindzhoho wa ciluse.+ Canjeni gakwe, a mupristi i tava ni mati yo bava ma tisako ciruko.+

19 “‘Hi kulandzela, a mupristi i ta hlambanyisa wasati, aku kakwe: “Loku ku nga hi na mun’wani wanuna a hlengeleko masango na wena na wa ha hi hasi ka wufumeli ga nuna wa wena,+ ni loku u nga hambukangi u ti nyenyezisa, tlhatlheka ka wuyelo ga mati lawa yo bava ma tisako ciruko. 20 Kanilezvi loku u hambukile na wa ha hi hasi ka wufumeli ga nuna wa wena u ti nyenyezisa ni loku u hlengele masango ni mun’wani wanuna+ wo kala a nga hi nuna wa wena . . .” 21 A mupristi i ta hlambanyisa a wasati hi cihlambanyo ci patsako a ciruko hi ku byela wasati, aku: “Jehovha i wa ku mahe cikombiso leci a vanhu va to ci kumbuka loku va ruka ni loku va hlambanya, hi ku Jehovha a puvisa* a thanga* ga wena ni ku vhimbisa a khwiri ga wena. 22 A mati lawa ma tisako ciruko ma ta nghena lomu ka marumbu ya wena ma vhimbisa a khwiri ga wena ni ku puvisa* a thanga* ga wena.” A wasati i taku: “Amen! Amen!”*

23 “‘Andzhako ka lezvo, a mupristi i ta tsala a zviruko lezvo bhukwini, a zvi hlazva lomu matini yo bava zvi vhinyeka. 24 Hi kulandzela, a mupristi i ta nwisa wasati a mati lawo yo bava ma tisako ciruko. A mati lawo ma tisako ciruko ma ta nghena lomu ndzeni kakwe ma ku bavisa. 25 A mupristi i ta teka a munyikelo wa tindzhoho wa ciluse+ canjeni ga wasati, a wu ndziwilita wuya phambeni ni ndzhako mahlweni ka Jehovha a gumesa a wu tshineta kusuhani ni alati. 26 A mupristi i ta nusa a canja ga munyikelo wa tindzhoho a wu hisa laha alatini+ kasi wu yimela a munyikelo wontlhe. Andzhako ka lezvo, i ta mu nwisa mati a wasati. 27 A cikhati leci a mupristi a to mu nwisa mati a wasati, loku a ti nyenyezisile ni loku a nga tsumbekangi ka nuna wakwe, a mati lawa ma tisako ciruko ma ta nghena ndzeni kakwe mava nchumu wo bava; i ta vhimba khwiri a tlhela a puva* thanga.* A wasati i tava ciruko cikari ka vanhu vakwe. 28 Kanilezvi loku a wasati a nga ti nyenyezisangi, na a basile, i ta tlhatlheka ka tsayiselelo lowo niku zvi ta koteka ku a xura nyimba a pswala vana.

29 “‘Lowu i nayo wa ciluse+ wu tirako loku a wasati a hambuka ni ku ti nyenyezisa na a hi hasi ka wufumeli ga nuna wakwe, 30 kutani loku a wanuna a lusela a sati wakwe a tlhela a alakanyela lezvaku a sati wakwe a nga tsumbekangi. I taya a ya yimisa a sati wakwe mahlweni ka Jehovha niku a mupristi i ta maha kakwe zvontlhe lezvi zvi wuliwako hi nayo lowu. 31 A wanuna i ta tlhatlheka ka nandzu kanilezvi a sati wakwe i ta rwala a nandzu wakwe.’”