LEVHI

1 Jehovha i no vitana Mosi a wulawula naye hi lomu tendeni ga mutlhangano,+ aku: 2 “Byela a vaIzrayeli,* uku: ‘Loku a wokari cikari ka n’wina a lava ku maha munyikelo ka Jehovha hi zvifuyo, i fanele ku nyikela hi homu, kutani yivhu, kutani mbuti ya lomu ntlhambini.+

3 “‘Loku a nyikela munyikelo wa kuhiswa hi homu, i wa nyikele a dhuna ga ginene.+ I fanele ku nyikela hi kuzvirandza+ mahlweni ka Jehovha laha nyangweni ya tenda ga mutlhangano. 4 I ta tlhateka canja gakwe laha ka hloko ya cifuyo ca munyikelo wa kuhiswa, niku wu ta amukelwa kasi wu vhuna yena lezvaku a mahelwa a muphahlo wa ku kombela ku tsetselelwa zviwonho.

5 “‘Hi kulandzela, a cidhunana ca homu ci ta dawa mahlweni ka Jehovha, niku a vana va Aroni, va nga vapristi,+ va ta nyikela a nkhata va tlhela va wu n’watsekela matlhelweni wontlhe ya alati+ legi gi nga nyangweni ya tenda ga mutlhangano. 6 A cifuyo ca munyikelo wa kuhiswa ci fanele ku yewuliwa bhebhe ci tlhela ci phaphulelwa.+ 7 A vana va Aroni, va nga vapristi, va fanele ku dzivela ndzilo laha alatini+ va veketela tihunyi hehla ka ndzilo. 8 A vana va Aroni, va nga vapristi, va ta tlhatekela a zvipandze zvi tsemelelweko zva munyikelo,+ ni hloko, ni mafura* laha ka tihunyi leti ti nga hehla ka ndzilo lowu wu nga laha alatini. 9 A marumbu ya kona ni masondzo zvi fanele ku hlazviwa hi mati niku a mupristi i fanele ku zvi hisa zvontlhe laha alatini kota munyikelo wa kuhiswa, wu nga munyikelo wu hisiwako hi ndzilo, wa masema yo nuhela ma tsakisako Jehovha.+

10 “‘Loku a nyikela munyikelo wa kuhiswa hi cifuyo ca lomu ntlhambini,+ co kota yivhana ya matsune kutani cimhongwana, i fanele ku nyikela a cifuyo ca cinene ca matsune.+ 11 Ci fanele ku dayelwa tlhelweni ga n’walungu* ga alati mahlweni ka Jehovha niku a vana va Aroni, va nga vapristi, va ta n’watsekela a nkhata wa kona matlhelweni wontlhe ya alati.+ 12 Ci ta phaphulelwa; andzhako ka lezvo, a mupristi i ta ci teka zvin’we ni hloko ni mafura,* a zvi tlhateka hehla ka tihunyi leti ti nga hehla ka ndzilo lowu wu nga laha alatini. 13 I ta hlazva a marumbu ni masondzo hi mati niku a mupristi i ta zvi nyikela zvontlhe a zvi hisa laha alatini kota munyikelo wa kuhiswa, wu nga munyikelo wu hisiwako hi ndzilo, wa masema yo nuhela ma tsakisako Jehovha.

14 “‘Kanilezvi loku a nyikela a zvinyanyani ka Jehovha kota munyikelo wa kuhiswa, i ta nyikela hi matuva kutani mavhinyani ya zvipomba.+ 15 A mupristi i ta ci nyikela laha alatini niku i ta ci tsema hloko hi cikamba a ci hisa laha alatini, kanilezvi a nkhata wa kona wu ta halatiwa laha tlhelweni ga alati. 16 I ta susa felelo ga cona ni mawoya a zvi hoxa ka tlhelo ga mutsuwuka-gambo ga alati, laha ku hoxiwako khuma.*+ 17 I ta ci pandza hi laha cikari ka tipapa, kanilezvi a nga ci avanyisi hi zvipandze zvimbiri. Andzhako ka lezvo, a mupristi i ta ci hisa laha alatini hehla ka tihunyi leti ti nga laha ndzilweni kota munyikelo wa kuhiswa, wu nga munyikelo wu hisiwako hi ndzilo, wa masema yo nuhela ma tsakisako Jehovha.

2 “‘Loku a munhu a nyikela a munyikelo wa tindzhoho+ ka Jehovha, a munyikelo wakwe wu fanele kuva wa mapa ma sililweko khwatsi niku i fanele ku chela mafura ni hlakati yo nuhela hi le hehla ka wona.+ 2 Andzhako ka lezvo, i ta ma neha ka vana va Aroni, va nga vapristi, ni mupristi i ta nusa canja ga mapa lawo ma sililweko khwatsi ma nga ni mafura ni yontlhe hlakati yo nuhela a ma hisa laha alatini kasi ma yimela a munyikelo wontlhe,+ wu nga munyikelo wu hisiwako hi ndzilo, wa masema yo nuhela ma tsakisako Jehovha. 3 Ni cihi ci salako ka munyikelo wa tindzhoho ci lumba Aroni ni vana vakwe+ kota nchumu wo basabasa+ wu tako hi ka minyikelo yi mahelwako Jehovha ya ku hisiwa hi ndzilo.

4 “‘Loku u nyikela a munyikelo wa tindzhoho wu wocilweko lomu ka forno, wu fanele kuva wa mapa ma sililweko khwatsi, na wu hi wa tipawa to khwatsi tiphera ti nga hiko na comelo, ti mahilweko hi mapa ma vhuvilweko ni mafura, kutani wa tipawa ta zviphamana ti nga hiko na comelo, ti totilweko mafura.+

5 “‘Loku a munyikelo wa wena wu hi munyikelo wa tindzhoho wu wocilweko lomu ka pani,+ wu fanele kuva wa mapa ma sililweko khwatsi ma nga hiko na comelo, ma vhuvilweko ni mafura. 6 Wu fanele ku khemelelwa niku u ta chulula mafura hi le hehla ka wona.+ Lowu munyikelo wa tindzhoho.

7 “‘Loku a munyikelo wa wena wu hi munyikelo wa tindzhoho wu bhikilweko lomu paneleni, wu fanele ku mahiwa hi mapa ma sililweko khwatsi ma vhuvilweko ni mafura. 8 U fanele ku tisa a munyikelo wa tindzhoho ka Jehovha wu mahilweko hi zvilo lezvi, wu ta nyikelwa ka mupristi, yena a famba nawo kusuhani ni alati. 9 A mupristi i ta susa cipandze co kari ca munyikelo wa tindzhoho kasi ci yimela a munyikelo wontlhe+ a ci hisa laha alatini kota munyikelo wu hisiwako hi ndzilo, wa masema yo nuhela ma tsakisako Jehovha.+ 10 Lezvi zvi salako ka munyikelo wa tindzhoho zvi lumba Aroni ni vana vakwe kota nchumu wo basabasa wu tako hi ka minyikelo ya ku hisiwa hi ndzilo yi mahelwako Jehovha.+

11 “‘Mu nga nyikeli munyikelo wa tindzhoho ka Jehovha wu nga ni comelo,+ hakuva a mu faneli ku hisa comelo kutani wulombe kota munyikelo wu hisiwako hi ndzilo wu mahelwako Jehovha.

12 “‘Mu nga zvi nyikela ka Jehovha kota munyikelo wa mihandzu yo sangula,+ kanilezvi a zvi faneli ku nehiwa laha alatini kota masema yo nuhela.

13 “‘A minyikelo yontlhe ya tindzhoho leyi u nyikelako yi fanele ku cheliwa munyu; ku nga tshuki ku vhumaleka a munyu wa civhumelwano ca Nungungulu wa wena lomu ka minyikelo ya wena ya tindzhoho. Yontlhe a minyikelo ya wena u ta yi lunga hi munyu.+

14 “‘Loku u nyikela munyikelo wa tindzhoho ka Jehovha hi mihandzu yo sangula yo buvha, u fanele ku nyikela a mipon’wani yiswa yi wocilweko laha ndzilweni, yi sililweko khwatsi, kota munyikelo wa tindzhoho wa mihandzu ya wena yo sangula yo buvha.+ 15 U fanele ku chela mafura ni hlakati yo nuhela hi le hehla ka yona. Lowu munyikelo wa tindzhoho. 16 A mupristi i ta teka a cipandze co kari ca mipon’wani yi sililweko ni mafura zvin’we ni yontlhe hlakati yo nuhela, a zvi hisa kasi zvi yimela a munyikelo wontlhe,+ kota munyikelo wu hisiwako hi ndzilo wu mahelwako Jehovha.

3 “‘Loku a munyikelo wakwe wu hi muphahlo wa kuhlengela,*+ na a nyikela hi homu, kani ya matsune kutani ya kati, i fanele ku nyikela homu ya yinene mahlweni ka Jehovha. 2 I ta tlhateka canja gakwe laha ka hloko ya homu ya munyikelo wakwe yi gumesa yi dawa laha nyangweni ya tenda ga mutlhangano; a vana va Aroni, va nga vapristi, va ta n’watsekela a nkhata wa kona matlhelweni wontlhe ya alati. 3 I ta nyikela a cipandze ca muphahlo wa kuhlengela kota munyikelo wu hisiwako hi ndzilo wu mahelwako Jehovha:+ Mafura+ lawa ma fenengetako a marumbu, ma nga mafura wontlhe lawa ma namareleko laha ka marumbu, 4 ni tiswa timbiri zvin’we ni mafura lawa ma nga ka tona laha kusuhani ni tinyonga. I ta susa ni mafura ya laha ka civindzi zvin’we ni tiswa.+ 5 A vana va Aroni va ta zvi hisa laha alatini hi le hehla ka munyikelo wa kuhiswa lowu wu tlhatekilweko laha ka tihunyi leti ti nga hehla ka ndzilo;+ lowu munyikelo wu hisiwako hi ndzilo, wa masema yo nuhela ma tsakisako Jehovha.+

6 “‘Loku a munyikelo wakwe ka Jehovha wa muphahlo wa kuhlengela ci hi cifuyo ca lomu ntlhambini, i ta nyikela cifuyo ca cinene, ca matsune kutani kati.+ 7 Loku a nyikela a yivhana ya matsune kota munyikelo wakwe, i ta yi nyikela mahlweni ka Jehovha. 8 I ta tlhateka canja gakwe laha ka hloko ya yivhana ya munyikelo wakwe yi gumesa yi dawa laha nyangweni ya tenda ga mutlhangano. A vana va Aroni va ta n’watsekela a nkhata wa kona matlhelweni wontlhe ya alati. 9 I ta nyikela a mafura ya muphahlo wa kuhlengela kota munyikelo wu hisiwako hi ndzilo wu mahelwako Jehovha.+ I ta tsema mudhoza* wontlhe wo kuluka hi laha kusuhani ni longo, a susa mafura lawa ma fenengetako a marumbu, ma nga mafura wontlhe lawa ma namareleko laha ka marumbu, 10 ni tiswa timbiri zvin’we ni mafura lawa ma nga ka tona laha kusuhani ni tinyonga. I ta susa ni mafura ya laha ka civindzi zvin’we ni tiswa.+ 11 A mupristi i ta zvi hisa laha alatini kota zvakuga,* wu nga munyikelo wu hisiwako hi ndzilo wu mahelwako Jehovha.+

12 “‘Loku a nyikela hi mbuti, i ta yi nyikela mahlweni ka Jehovha. 13 I ta tlhateka canja gakwe laha ka hloko ya yona yi gumesa yi dawa laha nyangweni ya tenda ga mutlhangano. A vana va Aroni va ta n’watsekela a nkhata wa kona matlhelweni wontlhe ya alati. 14 A cipandze leci a to ci nyikela kota munyikelo wu hisiwako hi ndzilo wu mahelwako Jehovha mafura lawa ma fenengetako a marumbu, ma nga mafura wontlhe lawa ma namareleko laha ka marumbu,+ 15 ni tiswa timbiri zvin’we ni mafura lawa ma nga ka tona laha kusuhani ni tinyonga. I ta susa ni mafura ya laha ka civindzi zvin’we ni tiswa. 16 A mupristi i ta zvi hisa laha alatini kota zvakuga,* wu nga munyikelo wu hisiwako hi ndzilo wa masema yo nuhela. A mafura wontlhe ma lumba Jehovha.+

17 “‘Leci cileletelo ca kala kupindzuka ka zvizukulwana zva n’wina, kontlhe lomu mu tshamako kona: Mu nga tshuki muga ni wahi mafura kutani nkhata.’”+

4 Jehovha i no engeta a byela Mosi, aku: 2 “Byela vaIzrayeli uku: ‘Loku a munhu* a wonha hi kuphazama,+ a maha zvilo lezvi Jehovha a layileko lezvaku zvi nga mahiwi, ku ta mahiwa lezvi:

3 “‘Loku a mupristi loyi a totilweko+ a wonha,+ a maha ku a vanhu vava ni nandzu hi kota ya ciwonho leci a ci mahileko, i fanele ku tisa cidhunana ca cinene ca homu ka Jehovha kota munyikelo wa ciwonho leci a ci mahileko.+ 4 I ta tisa cidhunana ca homu laha nyangweni ya tenda ga mutlhangano+ mahlweni ka Jehovha niku i ta tlhateka canja gakwe laha hlokweni ya cidhunana a gumesa a ci daya mahlweni ka Jehovha.+ 5 Andzhako ka lezvo, a mupristi loyi a totilweko+ i ta teka nkhata wo kari wa cidhunana ca homu a nghena nawo lomu tendeni ga mutlhangano. 6 A mupristi i ta peta litiho lomu ka nkhata+ a doneketela 7 wa makhati+ mahlweni ka Jehovha laha phambeni ka kortina ga wutshamu go basa. 7 Ahandle ka lezvo, a mupristi i ta tota nkhata wo kari ka timhondzo ta alati ga libani lo nuhela,+ legi gi nga mahlweni ka Jehovha lomu tendeni ga mutlhangano. A nkhata wontlhe lowu wu salako i ta wu chulula laha tshakweni ga alati ga munyikelo wa kuhiswa+ legi gi nga laha nyangweni ya tenda ga mutlhangano.

8 “‘Andzhako ka lezvo, a mupristi i ta susa a mafura wontlhe ya homu ya munyikelo wa ciwonho, a ku patsa ni mafura lawa ma fenengetako a marumbu ni mafura lawa ma namareleko laha ka marumbu, 9 ni tiswa timbiri zvin’we ni mafura lawa ma nga ka tona laha kusuhani ni tinyonga. I ta susa ni mafura ya laha ka civindzi ni tiswa,+ 10 a ku khwatsi hi lezvi zvi susiwako ka homu ya muphahlo wa kuhlengela.+ A mupristi i ta zvi hisa laha hehla ka alati ga munyikelo wa kuhiswa.

11 “‘Kanilezvi a bhebhe ga kona, ni nyama ya kona yontlhe, ni hloko, ni masondzo, ni marumbu, ni swanyi+ — 12 zvontlhe lezvi zvi salako laha ka homu — i ta zvi yisa le handle ka wugovelo, ka wutshamu gi basileko, laha ku hoxiwako kona khuma,* a ya zvi hisa hi ndzilo laha hehla ka tihunyi.+ Zvi fanele ku hiselwa laha ku hoxiwako kona khuma.

13 “‘Loku a hlengeletano yontlhe ya ka Izrayeli yi wonha hi kuphazama,+ yi kuma nandzu, kanilezvi va nga zvi poli lezvaku va mahile nchumu lowu Jehovha a va layileko lezvaku va nga mahi,+ 14 a ciwonho leco ci gumesa ci tiveka, a bandla gi fanele ku nyikela cidhunana ca homu kota munyikelo wa ciwonho, va ci neha mahlweni ka tenda ga mutlhangano. 15 A madhota ya hlengeletano ma ta tlhateka mandla laha ka hloko ya cidhunana ca homu mahlweni ka Jehovha ci gumesa ci dawa mahlweni ka Jehovha.

16 “‘Andzhako ka lezvo, a mupristi loyi a totilweko i ta teka nkhata wo kari wa cidhunana ca homu a nghena nawo lomu tendeni ga mutlhangano. 17 A mupristi i ta peta litiho lomu ka nkhata a doneketela 7 wa makhati mahlweni ka Jehovha laha phambeni ka kortina.+ 18 I ta tota nkhata wo kari ka timhondzo ta alati+ legi gi nga mahlweni ka Jehovha lomu tendeni ga mutlhangano; a nkhata wontlhe lowu wu salako i ta wu chulula laha tshakweni ga alati ga munyikelo wa kuhiswa legi gi nga laha nyangweni ya tenda ga mutlhangano.+ 19 I ta susa a mafura wontlhe a ma hisa laha alatini.+ 20 I ta maha zvo fana ni lezvi a zvi mahileko ka homu leyi yin’wani ya munyikelo wa ciwonho. Hi zvalezvo a to zvi mahisa zvona. A mupristi i ta va mahela a muphahlo wa ku kombela ku tsetselelwa zviwonho,+ niku va ta tsetselelwa futsi. 21 I ta teka a homu a famba nayo le handle ka wugovelo a ya yi hisa a ku fana ni leyi yo sangula.+ Lowu munyikelo wa ciwonho wu mahelwako bandla.+

22 “‘Loku a hosana+ yi wonha hi kuphazama, yi maha a cin’we ca zvilo zvontlhe lezvi Jehovha, a Nungungulu wa yona, a layako lezvaku zvi nga mahiwi, yiva ni nandzu, 23 kutani loku yi pola a ciwonho yi ci mahileko hi ku hambunyeta a cileletelo, yi fanele ku tisa a cimhongwana ca cinene kota munyikelo wa yona. 24 I ta tlhateka canja gakwe laha hlokweni ya cimhongwana a gumesa a ci daya laha a cifuyo ca munyikelo wa kuhiswa ci dayelwako kona mahlweni ka Jehovha.+ Lowu munyikelo wa ciwonho. 25 A mupristi i ta peta litiho lakwe lomu ka nkhata wa munyikelo wa ciwonho a wu tota ka timhondzo+ ta alati ga munyikelo wa kuhiswa; a nkhata lowu wu salako i ta wu chulula laha tshakweni ga alati ga munyikelo wa kuhiswa.+ 26 I ta hisa a mafura wontlhe ya cimhongwana laha alatini a ku fana ni mafura ya cifuyo ca muphahlo wa kuhlengela.+ A mupristi i ta mu mahela muphahlo wa ku kombela ku tsetselelwa zviwonho, niku i ta tsetselelwa.

27 “‘Loku a wokari* cikari ka vanhu va tiko a wonha hi kuphazama, a kuma nandzu hi ku maha a cin’we ca zvilo lezvi Jehovha a layako lezvaku zvi nga mahiwi,+ 28 kutani loku a pola a ciwonho a ci mahileko, i fanele ku tisa a cimbutana ca kati ca cinene kota munyikelo wakwe wa ciwonho leci a ci mahileko. 29 I ta tlhateka canja gakwe laha hlokweni ya munyikelo wa ciwonho, a gumesa a daya a munyikelo wa ciwonho ka wutshamu galegi wu dayelwako ka gona a munyikelo wa kuhiswa.+ 30 A mupristi i ta peta litiho lakwe lomu ka nkhata wa cimbutana a wu tota ka timhondzo ta alati ga munyikelo wa kuhiswa; a nkhata wontlhe lowu wu salako i ta wu chulula laha tshakweni ga alati.+ 31 I ta susa mafura wontlhe+ kota lezvi zvi mahiwako ka cifuyo ca muphahlo wa kuhlengela;+ a mupristi i ta zvi hisa laha alatini kota masema yo nuhela ma tsakisako Jehovha. A mupristi i ta mu mahela muphahlo wa ku kombela ku tsetselelwa zviwonho, niku i ta tsetselelwa futsi.

32 “‘Kanilezvi loku a humesa hi yivhana kota munyikelo wakwe wa ciwonho, i wa nyikele a yivhana ya yinene ya kati. 33 I ta tlhateka canja gakwe laha hlokweni ya yivhana ya munyikelo wa ciwonho, a gumesa a yi daya kota munyikelo wa ciwonho laha a munyikelo wa kuhiswa wu dayelwako kona.+ 34 A mupristi i ta peta litiho lakwe lomu ka nkhata wa munyikelo wa ciwonho a wu tota ka timhondzo ta alati ga munyikelo wa kuhiswa;+ a nkhata wontlhe lowu wu salako i ta wu chulula laha tshakweni ga alati. 35 I ta susa mafura wontlhe ya yivhana kota lezvi zvi mahiwako ka yivhana ya matsune ya muphahlo wa kuhlengela; a mupristi i ta zvi hisa laha alatini hi le hehla ka minyikelo yi mahelwako Jehovha ya ku hisiwa hi ndzilo.+ A mupristi i ta mu mahela muphahlo wa ku kombela ku tsetselelwa zviwonho, niku i ta tsetselelwa futsi.+

5 “‘Loku a munhu* azwa gezu ga ku vitanisa vanhu kasi va kustumunya*+ kanilezvi a nga wuli lezvi a nga zvi hanya, kutani ku zvi wona, kutani ku zvi tiva, wa wonha; i ta rwala nandzu wa kona.

2 “‘Kutani loku a munhu* a henya ni cihi cilo ci nga hlazvekangiko, kani cirumbi ca cihari ca khwati ci nga hlazvekangiko, kani cirumbi ca cifuyo ci nga hlazvekangiko, kutani cirumbi ca zviharana zvi nga hlazvekangiko zvi makanyako laha misaveni,+ i tava a nga hlazvekangi, ava ni nandzu, hambu loku a mahile lezvo na a nga zvi tivi. 3 Loku a wokari, hi kuphazama, a tshuka a henya a kungahlazveki ka munhu+ — ni wihi nchumu wu nga hlazvekangiko lowu wu nga wa ta mu maha a nga hlazveki — a gumesa a zvi tiva, i tava ni nandzu.

4 “‘Kutani loku a wokari* a hatlisela ku hlambanya ku maha nchumu — kani wa wunene, kani wa kubiha, hambu wu no tshamisa kuyini — na a nga zvi tivi, kanilezvi a gumesa a pola lezvaku i hatlisele ku hlambanya, i tava ni nandzu.*+

5 “‘Loku ava ni nandzu ka cin’we ca zvilo lezvi, i fanele ku wulela+ lezvi a nga wonhisa zvona. 6 Ahandle ka lezvo, i ta neha munyikelo wa nandzu ka Jehovha hi kota ya ciwonho leci a ci mahileko,+ ku nga cifuyo ca kati ca lomu ntlhambini, ku ngava yivhana ya kati kutani cimbutana ca kati, kasi a ta nyikela munyikelo wa ciwonho. Hi kulandzela, a mupristi i ta mu mahela a muphahlo wa ku kombela ku tsetselelwa ciwonho cakwe.

7 “‘Kanilezvi loku a nga zvi koti ku nyikela hi yivhu, i wa nehe a matuva mambiri kutani mavhinyani mambiri ya zvipomba+ ka Jehovha kasi zviva munyikelo wa nandzu wa ciwonho cakwe. A gin’we gi tava ga munyikelo wa ciwonho, a gin’wani giva ga munyikelo wa kuhiswa.+ 8 I ta famba nawo ka mupristi. A mupristi i ta sangula hi ku nyikela legi ga munyikelo wa ciwonho. I ta gi tsema hloko hi cikamba hi laha phambeni ka nkolo, kanilezvi a nga yi sukuruti. 9 I ta doneketela a nkhata wo kari wa munyikelo wa ciwonho laha tlhelweni ga alati; lowu wu salako i ta wu tsika wu khulungela laha tshakweni ga alati.+ Lowu munyikelo wa ciwonho. 10 I ta nyikela a cinyanyani leci cin’wani kota munyikelo wa kuhiswa na a landza zvileletelo zva mamahela ya kona.+ A mupristi i ta mu mahela muphahlo wa ku kombela ku tsetselelwa a ciwonho leci a ci mahileko, niku i ta tsetselelwa futsi.+

11 “‘Makunu loku a nga zvi koti ku nyikela hi matuva mambiri kutani mavhinyani mambiri ya zvipomba, i wa nehe a munyikelo wa ciwonho cakwe hi cipandze ca wukhume ca efa*+ ya mapa ma sililweko khwatsi kota munyikelo wa ciwonho. A nga faneli ku chela mafura ni hlakati yo nuhela hehla ka wona, hakuva lowu munyikelo wa ciwonho. 12 I ta famba nawo ka mupristi. A mupristi i ta nusa canja ga mapa lawo, kasi ma yimela a munyikelo wontlhe, a ma hisa laha alatini hehla ka minyikelo yi mahelwako Jehovha ya ku hisiwa hi ndzilo. Lowu munyikelo wa ciwonho. 13 A mupristi i ta mu mahela a muphahlo wa ku kombela ku tsetselelwa a ciwonho leci a ci mahileko, ku ngava ni cihi ca zviwonho lezvi, niku i ta tsetselelwa futsi.+ Lezvi zvi salako ka munyikelo zvi tava zva mupristi+ a ku fana ni lezvi zvi mahiwako ka munyikelo wa tindzhoho.’”+

14 Jehovha i no engeta a byela Mosi, aku: 15 “Loku a munhu* wo kari a nga tsumbeki, hi ku phazama a hambunyeta nayo wa zvilo zvo basa zva Jehovha,+ i fanele ku neha yivhu ya yinene ya matsune ka Jehovha yi hlawulilweko lomu ntlhambini kota munyikelo wa nandzu,+ leyi a ntsengo wa yona hi maxekeli* ya prata wu gemiwako hi kuya hi xekeli ga wutshamu go basa.*+ 16 I ta riha a ntsengo wa ciwonho leci a maheleko a wutshamu go basa a tlhela a engetela a cipandze ca wutlhanu ca ntsengo wa cona.+ I ta zvi nyikela ka mupristi kasi a mupristi a mu mahela a muphahlo wa ku kombela ku tsetselelwa a ciwonho+ hi yivhu ya matsune ya munyikelo wa nandzu, niku i ta tsetselelwa futsi.+

17 “Loku a munhu* wo kari a wonha hi ku maha zvilo lezvi Jehovha a layileko lezvaku zvi nga mahiwi, hambu loku a zvi mahile na a nga zvi tivi, i wonhile; i ta rwala nandzu wa kona.+ 18 I fanele ku neha yivhu ya yinene ya matsune ya lomu ntlhambini ka mupristi hi kuya hi ntsengo wu gemilweko wa munyikelo wa nandzu.+ Makunu a mupristi i ta mu mahela a muphahlo wa ku kombela ku tsetselelwa a ciwonho leci a nga ci mahangiko hi womu, leci a ci mahileko na a nga zvi poli, niku i ta tsetselelwa futsi. 19 Lowu hi wona munyikelo wa nandzu wa munhu loyi a wonhileko ka Jehovha.”

6 Jehovha i no engeta a byela Mosi, aku: 2 “Loku a munhu* a wonha a tlhela a nga tsumbeki mahlweni ka Jehovha,+ hi ku kalavela muakelani wakwe ka zvilo lezvi a nga nyikilwe kuva a zvi hlayisa,+ kutani a nga khomisilwe, kutani a yivela muakelani wakwe kutani ku mu kanganyisa, 3 kutani a kuma nchumu wu nga lahlekile kanilezvi aku a nga wu wonangi, ni loku o hlambanya mawunwa hi cin’we ca zviwonho lezvi a nga zvi mahako,+ i fanele ku maha lezvi: 4 Loku a wonhile a tlhela ava ni nandzu, i fanele ku tlhelisa lezvi a nga yiva, kutani lezvi a nga tekela munhu, kutani lezvi a zvi tekileko hi kukanganyisa, kutani lezvi a khomisilweko, kutani lezvi zvi nga lahlekile a gumesa a zvi kuma, 5 kutani ni wihi nchumu lowu a hlambanyileko mawunwa xungetano hi wona; i fanele ku hakhela a nchumu lowo hi kumbhelela+ a tlhela a engetela a cipandze ca wutlhanu ca ntsengo wa kona. I ta nyikela ka n’winyi wa kona ka siku legi a nandzu wakwe wu to tiviwa hi gona. 6 I ta neha ka mupristi a yivhu ya yinene ya matsune ya lomu ntlhambini kota munyikelo wa nandzu wakwe ka Jehovha hi kuya hi ntsengo wu gemilweko wa munyikelo wa nandzu.+ 7 A mupristi i ta mu mahela a muphahlo wa ku kombela ku tsetselelwa a ciwonho mahlweni ka Jehovha, niku i ta tsetselelwa ni cihi a ci mahileko leci ci mu kumisileko nandzu.”+

8 Jehovha i no engeta a byela Mosi, aku: 9 “Byela Aroni ni vana vakwe, uku: ‘A nayo wa munyikelo wa kuhiswa hi lowu:+ A munyikelo wa kuhiswa wu ta tshama a wusiku gontlhe laha khumbarini hehla ka alati kala ni mixo, niku a ndzilo wu ta simama ku vhura laha alatini. 10 A mupristi i ta boha tinguwo takwe to hlawuleka ta wukene,*+ ni cimolowani* ca wukene+ a fenengeta wumbyiri gakwe. Andzhako ka lezvo, i ta wola khuma*+ ga munyikelo wa kuhiswa lowu wu ngaswa hi ndzilo laha hehla ka alati a gi veka tlhelweni ga alati. 11 Hi kulandzela, i ta tlhatlha tinguwo takwe+ a boha tin’wani, a teka khuma a famba nago ka wutshamu gi basileko le handle ka wugovelo.+ 12 A ndzilo wu ta simama ku vhura hehla ka alati. Wu nga timeki. Mixo ni mixo, a mupristi i ta dzivela tihunyi+ hehla ka alati a tlhatekela munyikelo wa kuhiswa hehla ka tona; i ta hisa mafura ya miphahlo ya kuhlengela hehla ka wona.+ 13 A ndzilo wu ta tshama na wu vhura contlhe cikhati laha alatini. Wu nga tshuki wu timeka.

14 “‘A nayo wa munyikelo wa tindzhoho hi lowu:+ N’wina, vana va Aroni, mu fanele ku wu nyikela mahlweni ka Jehovha, phambeni ka alati. 15 A mun’we wabye i ta nusa canja ga mapa ma sililweko khwatsi ma nga ni mafura ni yontlhe hlakati yo nuhela yi nga hehla ka munyikelo wa tindzhoho a zvi hisa laha alatini kasi zvi yimela a munyikelo wontlhe kota masema yo nuhela ma tsakisako Jehovha.+ 16 Aroni ni vana vakwe va taga lezvi zvi to sala.+ Va ta maha hi zvona a tipawa to kala comelo vaga laha wutshan’wini go basa. Va ta zvi gela laha tsendzeleni* wa tenda ga mutlhangano.+ 17 Zvi nga wociwi na zvi hi ni comelo.+ Ndzi va nyikile lezvi kota ciavelo cabye ci humako ka minyikelo ya mina ya ku hisiwa hi ndzilo.+ Zvilo zvo basabasa,+ a ku fana ni munyikelo wa ciwonho ni munyikelo wa nandzu. 18 Vontlhe a vavanuna cikari ka vana va Aroni va ta zviga.+ Leci ciavelo cabye ca kala kupindzuka zvizukulwaneni zva n’wina zvontlhe ci tako hi ka minyikelo yi mahelwako Jehovha ya ku hisiwa hi ndzilo.+ Zvontlhe lezvi zvi to khumba minyikelo zvi tava lezvi zvi basileko.’”

19 Jehovha i no engeta a byela Mosi, aku: 20 “A munyikelo lowu Aroni ni vana vakwe va to nyikela ka Jehovha ka siku legi a to totiwa hi gona+ hi lowu: Cipandze ca wukhume ca efa*+ ya mapa ma sililweko khwatsi, kota munyikelo wo khandzakanya wa tindzhoho;+ va ta nyikela khihlanya ni mixo, ni khihlanya ni gambo. 21 Wu ta katingiwa hi mafura lomu ka pani.+ U ta wu neha na wu vhuvilwe khwatsi ni mafura u ta wu nyikela na wu khemelelwe kota munyikelo wa tindzhoho wu wocilweko wa masema yo nuhela ma tsakisako Jehovha. 22 A mupristi a totilweko loyi a to mu landzela cikari ka vana vakwe+ i ta maha a munyikelo lowu. Leci cileletelo ca kala kupindzuka: A munyikelo wontlhe wu ta hisiwa mahlweni ka Jehovha. 23 Wontlhe a munyikelo wa tindzhoho wa mupristi wu fanele kuva wo mbhelela. Wu nga giwi.”

24 Jehovha i no engeta a byela Mosi, aku: 25 “Byela Aroni ni vana vakwe, uku: ‘A nayo wa munyikelo wa ciwonho hi lowu:+ Ka wutshamu legi a munyikelo wa kuhiswa wu dayelwako ka gona+ hi kwalaho a munyikelo wa ciwonho wu to dayelwa kona mahlweni ka Jehovha. I nchumu wo basabasa. 26 A mupristi loyi a nyikelako munyikelo wa ciwonho hi yena a toga.+ Wu ta giwa laha wutshan’wini go basa laha tsendzeleni* wa tenda ga mutlhangano.+

27 “‘Zvontlhe lezvi zvi to khumba a nyama ya munyikelo zvi tava lezvi zvi basileko, ni loku a munhu a ti tlhambuketela nkhata wo kari wa yona laha ka nguwo yakwe, u fanele ku hlazva nguwo leyo yi tlhambuketelweko nkhata laha wutshan’wini go basa. 28 A cibya ca wumba leci yi to bhikelwa ka cona ci fanele ku fayetelwa kanilezvi loku yi bhikelwa lomu ka cibya ca kobre, a cibya leco ci fanele ku kutliwa ci tlhela ci hlazviwa hi mati.

29 “‘A vavanuna vontlhe cikari ka vapristi va ta yiga.+ I nchumu wo basabasa.+ 30 Hambulezvo, a ku na munyikelo wa ciwonho wu faneleko ku giwa loku a nkhata wo kari wa wona wu nehiwa lomu tendeni ga mutlhangano kasi ku maha a muphahlo wa ku kombela ku tsetselelwa a zviwonho lomu ka wutshamu go basa.+ Wu fanele ku hisiwa hi ndzilo.

7 “‘A nayo wa munyikelo wa nandzu hi lowu:+ I nchumu wo basabasa. 2 Va ta daya a munyikelo wa nandzu ka wutshamu legi a minyikelo ya kuhiswa yi dayelwako ka gona niku a nkhata wa kona+ wu fanele ku n’watsekelwa matlhelweni wontlhe ya alati.+ 3 A mupristi i ta nyikela a mafura ya kona wontlhe+ a ku patsa ni mudhoza* wo kuluka, ni mafura lawa ma fenengetako a marumbu, 4 ni tiswa timbiri zvin’we ni mafura lawa ma nga ka tona laha kusuhani ni tinyonga. I ta susa ni mafura ya laha ka civindzi zvin’we ni tiswa.+ 5 A mupristi i ta zvi hisa laha alatini kota munyikelo wu hisiwako hi ndzilo wu mahelwako Jehovha.+ Lowu munyikelo wa nandzu. 6 A vavanuna vontlhe cikari ka vapristi va taga a nyama ya kona.+ Va ta yi gela wutshan’wini go basa. I nchumu wo basabasa.+ 7 A nayo wa munyikelo wa ciwonho hi walowu wa wun’we ni wa munyikelo wa nandzu; a munyikelo wu lumba a mupristi loyi a mahako a muphahlo wa ku kombela ku tsetselelwa zviwonho.+

8 “‘Loku a mupristi a mahela munhu a munyikelo wa kuhiswa, i ta sala ni bhebhe+ ga munyikelo wa kuhiswa lowu wu nyikelweko.

9 “‘Yontlhe a minyikelo ya tindzhoho leyi yi wociwako lomu ka forno, kutani yi bhikiwako lomu ka panela, kutani yi katingiwako lomu ka pani+ yi lumba a mupristi loyi a yi nyikelako. Yi tava yakwe.+ 10 Kanilezvi a minyikelo yontlhe ya tindzhoho leyi yi vhuvilweko ni mafura+ kutani leyi ya kuwoma+ yi ta lumba vontlhe a vana va Aroni. Va ta avelana mpimo wo fana.

11 “‘A nayo wa muphahlo+ wa kuhlengela, lowu a munhu a nga nyikelako ka Jehovha, hi lowu: 12 Loku a wu nyikela kota cikombiso ca kubonga, a muphahlo wa kubonga+ i ta wu nyikela zvin’we ni tipawa to khwatsi tiphera, ti nga hiko na comelo ti vhuvilweko ni mafura, ni tipawa ta zviphamana ti nga hiko na comelo ti totilweko mafura, ni tipawa to khwatsi tiphera ti mahilweko hi mapa ma sililweko khwatsi, ma chelilweko khwatsi mafura ma tlhela ma vhuviwa khwatsi. 13 I ta nyikela a munyikelo wakwe zvin’we ni tipawa to khwatsi tiphera, ti nga ni comelo ni miphahlo ya kuhlengela kota cikombiso ca kubonga. 14 Ka munyikelo lowo i ta tlhatula a pawa yin’we ka lixaka lin’we ni lin’wani la munyikelo a yi nyikela kota cipandze ci basileko ka Jehovha. Ci tava ca mupristi loyi a to n’watsekela a nkhata wa miphahlo ya kuhlengela.+ 15 A nyama ya miphahlo ya kuhlengela leyi a nyikelako kota cikombiso ca kubonga yi fanele ku giwa ka siku galegi a yi nyikelako hi gona. A nga veki nchumu kala ni mixo.+

16 “‘Loku a muphahlo wa munyikelo wakwe wu hi cifungo+ kutani munyikelo wa kuzvirandza,+ wu fanele ku giwa ka siku galegi a mahako hi gona muphahlo; lezvi zvi salako zvi nga giwa ka siku gi landzelako. 17 Kanilezvi ni cihi ci salako ka nyama kala ka siku ga wunharu ci fanele ku hisiwa hi ndzilo.+ 18 Hambulezvo, loku a nyama yo kari ya muphahlo wakwe wa kuhlengela yi giwa hi siku ga wunharu, loyi a wu nyikeleko a nga ta amukelwa. A munyikelo wakwe wu nga ta vhuna nchumu; i nchumu wo nyenyeza niku a munhu* loyi a gako nyama yo kari ya wona i ta rwala nandzu wa kona.+ 19 A nyama leyi yi khumbako a nchumu wu nga hlazvekangiko yi nga giwi. Yi fanele ku hisiwa hi ndzilo. Vontlhe lava va basileko va ngaga nyama yi basileko.

20 “‘Kanilezvi ni wihi munhu* a nga hlazvekangiko loyi a gako a nyama ya muphahlo wa kuhlengela lowu wu lumbako Jehovha, a munhu* loye i fanele ku tsemiwa* cikari ka vanhu vakwe.+ 21 Loku a munhu* a khumba nchumu wu nga hlazvekangiko, kani kungahlazveki ka munhu,+ kutani cihari ci nga hlazvekangiko,+ kutani ni wihi nchumu wu nga hlazvekangiko ni wo nyenyeza,+ a gumesa aga a nyama yo kari ya muphahlo wa kuhlengela lowu wu lumbako Jehovha, a munhu* loye i fanele ku tsemiwa* cikari ka vanhu vakwe.’”

22 Jehovha i no engeta a byela Mosi, aku: 23 “Byela vaIzrayeli, uku: ‘Mu ngagi ni wahi mafura+ ya dhuna, kutani ya yivhana ya matsune, kutani ya mbuti. 24 A mafura ya cihari ci kumilweko na ci file ni ya cihari ci delweko hi cin’wani cihari ma nga tiriselwa zvin’wani, kanilezvi mu nga tshuki muga.+ 25 Hakuva ni wihi a gako mafura ya cihari leci a nyikelako ka Jehovha kota munyikelo wu hisiwako hi ndzilo i fanele ku tsemiwa* cikari ka vanhu vakwe.

26 “‘Mu ngagi ni wihi nkhata+ ni kwihi lomu mu hanyako kona, kani i nkhata wa zvinyanyani kutani wa zvihari. 27 Ni wihi munhu* a gako nkhata i fanele ku tsemiwa*+ cikari ka vanhu vakwe.’”

28 Jehovha i no engeta a byela Mosi, aku: 29 “Byela vaIzrayeli, uku: ‘Ni wihi a nyikelako ka Jehovha a muphahlo wakwe wa kuhlengela, i ta neha a cipandze ca muphahlo wakwe wa kuhlengela kota munyikelo ka Jehovha.+ 30 I ta neha mafura+ zvin’we ni cifuva hi mandla yakwe kota munyikelo wu hisiwako hi ndzilo wu mahelwako Jehovha, niku i ta zvi yisa phambeni ni ndzhako kota munyikelo wa kundziwilitelwa+ mahlweni ka Jehovha. 31 A mupristi i ta hisa mafura laha alatini+ kanilezvi a cifuva ci tava ca Aroni ni vana vakwe.+

32 “‘A nenge wa cinene mu ta nyika mupristi kota cipandze co basa ca miphahlo ya n’wina ya kuhlengela.+ 33 A n’wana wa Aroni loyi a nyikelako nkhata wa miphahlo ya kuhlengela i ta kuma nenge wa cinene kota ciavelo cakwe.+ 34 Hakuva ndza teka a cifuva ca munyikelo wa kundziwilitelwa ni nenge wa cipandze co basa ka miphahlo ya kuhlengela ya vaIzrayeli ndzi nyika mupristi Aroni ni vana vakwe kota cileletelo ca kala kupindzuka ka vaIzrayeli.+

35 “‘Leci cipandze ca minyikelo yi mahelwako Jehovha ya ku hisiwa hi ndzilo leci ci nga fanele ku susiwa kasi ci lumba a vapristi, ku nga Aroni ni vana vakwe, kusukela ka siku legi va yimisilweko hi gona kasi va tirela Jehovha kota vapristi.+ 36 Jehovha i no laya lezvaku va nyikiwa a cipandze leci hi vaIzrayeli ka siku legi a nga va tota hi gona.+ Leci cileletelo ca kala kupindzuka zvizukulwaneni zvabye.’”

37 Lowu i nayo wa munyikelo wa kuhiswa,+ ni wa munyikelo wa tindzhoho,+ ni wa munyikelo wa ciwonho,+ ni wa munyikelo wa nandzu,+ ni wa muphahlo wa kuyimisiwa+ ni wa muphahlo wa kuhlengela,+ 38 kota lezvi Jehovha a layileko Mosi le Citsungeni ca Sinayi,+ ka siku legi a nga laya a vaIzrayeli lezvaku va nyikela a minyikelo yabye ka Jehovha le ciwuleni ca Sinayi.+

8 Jehovha i no engeta a byela Mosi, aku: 2 “Teka Aroni ni vana vakwe,+ ni tinguwo,+ ni mafura ya ku tota,+ ni dhuna ga homu ya munyikelo wa ciwonho, ni tiyivhu timbiri ta vamatsune, ni cindzala* ca tipawa to kala comelo,+ 3 u tsombanisa a hlengeletano yontlhe laha nyangweni ya tenda ga mutlhangano.”

4 Mosi i no maha zvalezvi Jehovha a nga mu leletele; a hlengeletano yi no tsombana laha nyangweni ya tenda ga mutlhangano. 5 Makunu Mosi i no byela a hlengeletano, aku: “Lezvi hi lezvi Jehovha a hi leleteleko a ku maha.” 6 Hikwalaho, Mosi i no byela Aroni ni vana vakwe lezvaku va tshinela a gumesa a va hlambisa hi mati.+ 7 Andzhako ka lezvo, i no mu bohisa nguwo yo leha,+ a mu bohisa bhandi,+ a mu bohisa nghanju yo kala mawoko,+ a mu vekela efodhe,+ a yi tiyisa hi libhandi li lukilweko+ la efodhe, a li boha li tiya ciwunwini cakwe. 8 Hi kulandzela, i no mu bohisa phaketi ga laha cifuveni*+ a gumesa a chela a Urima ni Tumima+ lomu ka phaketi lego. 9 Andzhako ka lezvo, i no mu bohisa turbhanti*+ hlokweni yakwe, a vekela a cixapana co phatima ca ouro laha phambeni ka turbhanti, ci nga cikombiso co basa ca kutinyikela,*+ kota lezvi Jehovha a nga leletele Mosi.

10 Hi kulandzela, Mosi i no teka mafura ya ku tota a tota tabhernakeli ni zvontlhe zvi nga hi ka gona,+ a zvi basisa. 11 Andzhako ka lezvo, i no doneketela mafura ya matsongwani laha ka alati, 7 wa makhati. I no tota alati ni zvontlhe zvibya zva gona, ni basiya ni cikhatelo ca kona kasi a zvi basisa. 12 Hi kugumesa, i no chulula mafura yo kari ya ku tota hlokweni ya Aroni, a mu tota kasi a mu basisa.+

13 Hi kulandzela, Mosi i no tshineta a vana va Aroni a ta va bohisa tinghanju, ni mabhandi, ni zva ku fenengeta tihloko tabye,+ kota lezvi Jehovha a nga leletele Mosi.

14 Andzhako ka lezvo, i no neha a dhuna ga homu ga munyikelo wa ciwonho; Aroni ni vana vakwe va no tlhateka mandla yabye laha hlokweni ya dhuna lego ga munyikelo wa ciwonho.+ 15 Mosi i no yi daya a gumesa a peta litiho lakwe lomu ka nkhata+ a tota timhondzo ta alati ka matlhelo wontlhe. I no basisa a alati ka ciwonho kanilezvi a nkhata lowu wu nga sele i no wu chulula laha tshakweni ga alati, a gi basisa kasi a miphahlo ya ku kombela ku tsetselelwa zviwonho yi mahelwa ka gona. 16 Andzhako ka lezvo, Mosi i no teka mafura wontlhe lawa ma fenengetako marumbu, ni mafura ya laha ka civindzi, ni tiswa timbiri ni mafura ya tona, a zvi hisa laha alatini.+ 17 Hi kulandzela, Mosi i no teka zvipandze lezvi zvin’wani zva homu, ku nga bhebhe, ni nyama, ni swanyi, a ya zvi hisa hi ndzilo le handle ka wugovelo,+ kota lezvi Jehovha a nga mu leletele.

18 Makunu i no teka a yivhu ya matsune ya munyikelo wa kuhiswa a yi neha kusuhani; Aroni ni vana vakwe va no tlhateka mandla yabye laha hlokweni ya yivhu.+ 19 Mosi i no yi daya a n’watsekela a nkhata wa kona matlhelweni wontlhe ya alati. 20 I no phaphulela yivhu leyo, niku Mosi i no teka a hloko, ni zvipandze lezvi a phaphuleleko, ni mafura* a zvi hisa. 21 Mosi i no hlazva marumbu ni masondzo hi mati, a hisa yivhu yontlhe laha alatini. Lowu wu wa hi munyikelo wa kuhiswa wa masema yo nuhela. Wu wa hi munyikelo wu hisiwako hi ndzilo wu mahelwako Jehovha, kota lezvi Jehovha a nga leletele Mosi.

22 Andzhako ka lezvo, i no tisa a yivhu ya wumbiri ya matsune, yi nga yivhu ya kuyimiswa.+ Aroni ni vana vakwe va no tlhateka mandla yabye laha hlokweni ya yivhu.+ 23 Mosi i no yi daya, a teka a nkhata wo kari wa yona a tota ndleve ya cinene ya Aroni hi lahasi ka yona, ni likhudzu la canja gakwe ga cinene, ni likhudzu la nkondzo wakwe wa cinene. 24 Hi kulandzela, Mosi i no tisa a vana va Aroni a ta va tota nkhata lomu ka tindleve tabye ta cinene hi lahasi ka tona, ni lomu ka tikhudzu ta mandla yabye ya cinene, ni lomu ka tikhudzu ta mikondzo yabye ya cinene; kanilezvi a nkhata lowu wu nga sele Mosi i no wu n’watsekela matlhelweni wontlhe ya alati.+

25 Andzhako ka lezvo, i no teka mafura, ni mudhoza* wo kuluka, ni mafura wontlhe lawa ma fenengetako marumbu, ni mafura ya laha ka civindzi, ni tiswa timbiri ni mafura ya tona, ni nenge wa cinene.+ 26 Lomu ka cindzala* ca tipawa to kala comelo, leci ci nga hi mahlweni ka Jehovha, i no teka pawa yin’we yo khwatsi i phera yi nga hiko na comelo,+ ni pawa yin’we ya mafura yo khwatsi i phera,+ ni pawa yin’we ya ciphamana. Hi kulandzela, i no ti tlhateka le hehla ka mafura ni le hehla ka nenge wa cinene. 27 Andzhako ka lezvo, i no teka zvontlhe a zvi tlhateka mandleni ya Aroni ni ya vana vakwe a sangula ku zvi yisa phambeni ni ndzhako kota munyikelo wa kundziwilitelwa mahlweni ka Jehovha. 28 Mosi i no zvi teka mandleni yabye a zvi hisa laha alatini hi le hehla ka munyikelo wa kuhiswa. Lowu wu wa hi muphahlo wa kuyimiswa wa masema yo nuhela. Wu wa hi munyikelo wu hisiwako hi ndzilo wu mahelwako Jehovha.

29 Andzhako ka lezvo, Mosi i no teka cifuva a ci yisa phambeni ni ndzhako kota munyikelo wa kundziwilitelwa mahlweni ka Jehovha.+ A cifuva ca yivhu ya munyikelo wa kuyimiswa ci nova ciavelo ca Mosi, kota lezvi Jehovha a nga leletele Mosi.+

30 Mosi i no teka mafura yo kari ya ku tota+ ni nkhata wo kari lowu wu nga hi laha alatini a n’watsekela Aroni ni tinguwo takwe, ni vana vakwe, lava va nga hi na yena, ni tinguwo tabye. Hi ndlela leyo, i no basisa Aroni ni tinguwo takwe, ni vana vakwe+ ni tinguwo tabye.+

31 Andzhako ka lezvo, Mosi i no byela Aroni ni vana vakwe, aku: “Bhikani+ a nyama leyi laha nyangweni ya tenda ga mutlhangano, mu yi gela kwalaho ni tipawa leti ti nga lomu ka cindzala* ca kuyimiswa, kota lezvi ndzi leletelweko ku: ‘Aroni ni vana vakwe va ta yiga.’+ 32 A nyama leyi yi to sala ni tipawa ta kona mu ta zvi hisa hi ndzilo.+ 33 Mu nga suki laha nyangweni ya tenda ga mutlhangano hi 7 wa masiku, kala a masiku ya kuyimiswa ka n’wina ma mbhela, hakuva zvi ta teka a 7 wa masiku kasi mu yimiswa kota vapristi.*+ 34 Jehovha i leletele lezvaku hi maha lezvi hi mahileko nyamutlha kasi hi maha muphahlo wa ku kombela lezvaku mu tsetselelwa zviwonho.+ 35 Mu ta tshama 7 wa masiku+ laha nyangweni ya tenda ga mutlhangano, wusiku ni mumu, na mu maha a mitiro leyi mu nyikilweko hi Jehovha,+ kasi mu ngafi; hakuva hi zvalezvo ndzi leletelweko.”

36 Aroni ni vana vakwe va no maha zvontlhe lezvi Jehovha a nga leletele Mosi.

9 Hi siku ga wu 8,+ Mosi i no vitana Aroni ni vana vakwe ni madhota ya ka Izrayeli. 2 I no byela Aroni, aku: “Teka role u ti mahela hi gona a munyikelo wa ciwonho+ ni yivhu ya matsune u maha hi yona a munyikelo wa kuhiswa. A zvifuyo lezvo zvi fanele kuva zvo hanya khwatsi. U ta zvi nyikela mahlweni ka Jehovha. 3 Kanilezvi u ta byela a vaIzrayeli, uku: ‘Tekani mhongo ya munyikelo wa ciwonho, ni role, ni yivhana ya matsune, zva munyikelo wa kuhiswa, zvi nga ni lembe gin’we, na zvi hanya khwatsi, 4 ni dhuna ga homu ni yivhu ya matsune, zva miphahlo ya kuhlengela,+ kasi mu maha hi zvona a muphahlo mahlweni ka Jehovha, ni munyikelo wa tindzhoho+ wu vhuvilweko ni mafura, hakuva Jehovha i ta woneka ka n’wina nyamutlha.’”+

5 Hikwalaho, va no teka lezvi Mosi a nga va leletele va famba nazvo tendeni ga mutlhangano. Makunu a hlengeletano yontlhe yi no tshinela yi yima mahlweni ka Jehovha. 6 Mosi aku: “Lezvi hi lezvi Jehovha a mu leleteleko a ku maha kasi a kungangamela ka Jehovha ku woneka ka n’wina.”+ 7 Hi kulandzela, Mosi i no byela Aroni, aku: “Tshinela laha alatini u nyikela a munyikelo wa wena wa ciwonho,+ ni munyikelo wa wena wa kuhiswa, u maha muphahlo wa ku kombela ku tsetselelwa a zviwonho zva wena+ ni zva va ngango wa wena, u gumesa u va mahela munyikelo a vanhu+ u tlhela u va mahela muphahlo wa ku kombela ku tsetselelwa a zviwonho zvabye,+ kota lezvi Jehovha a leleteleko.”

8 Aroni i no tekela ku tshinela laha alatini a daya a role ga munyikelo wa ciwonho hi kota ya zviwonho zvakwe.+ 9 A vana va Aroni va no mu nyika nkhata,+ a peta litiho lomu ka nkhata a wu tota ka timhondzo ta alati. A nkhata lowu wu nga sele i no wu chulula laha tshakweni ga alati.+ 10 I no hisa a mafura, ni tiswa, ni mafura ya laha ka civindzi laha alatini zviva munyikelo wa ciwonho, kota lezvi Jehovha a nga leletele Mosi.+ 11 I no hisa a nyama ni bhebhe hi ndzilo le handle ka wugovelo.+

12 Hi magumo, Aroni i no daya a munyikelo wa kuhiswa; a vana vakwe va no mu nyiketa nkhata a n’watsekela matlhelweni wontlhe ya alati.+ 13 Va no mu nyika a zvipandze zva munyikelo wa kuhiswa ni hloko, a zvi hisa laha alatini. 14 A ku tsika lezvo, i no hlazva marumbu ni masondzo a zvi hisa hehla ka munyikelo wa kuhiswa laha alatini.

15 Andzhako ka lezvo, i no va mahela munyikelo a vanhu. I no teka a mbuti leyi yi nga hi ya munyikelo wa ciwonho wa vanhu a yi daya, a maha hi yona a munyikelo wa ciwonho, a ku fana ni lezvi a nga mahile ka leyi yo sangula. 16 I no nyikela a munyikelo wa kuhiswa, a wu nyikela hi ku landza a mamahela ya kona.+

17 Hi kulandzela, i no nyikela a munyikelo wa tindzhoho.+ I no nusa canja ga munyikelo wa tindzhoho a wu hisa laha alatini, ahandle ka munyikelo wa kuhiswa wa ni mixo.+

18 Andzhako ka lezvo, i no daya a dhuna ga homu ni yivhu ya matsune zva muphahlo wa kuhlengela wa vanhu. A vana va Aroni va no gumesa va mu nyiketa a nkhata a n’watsekela matlhelweni wontlhe ya alati.+ 19 Va no teka a mafura ya dhuna ga homu,+ ni mudhoza* wo kuluka wa yivhu ya matsune, ni mafura lawa ma fenengetako a zviro zva lomu ndzeni, ni tiswa ni mafura ya laha ka civindzi,+ 20 va zvi tlhateka hehla ka zvifuva zva zvihari. Andzhako ka lezvo, i no hisa mafura laha alatini.+ 21 Kanilezvi Aroni i no teka zvifuva ni nenge wa cinene a zvi yisa phambeni ni ndzhako kota munyikelo wa kundziwilitelwa mahlweni ka Jehovha, kota lezvi Mosi a nga leletele.+

22 Aroni i no tlakusa a mandla yakwe ma kongoma vanhu a va katekisa+ a gumesa a chika andzhako ka loku a mahile a munyikelo wa ciwonho, ni munyikelo wa kuhiswa, ni miphahlo ya kuhlengela. 23 Hi kugumesa, Mosi na Aroni va no nghena tendeni ga mutlhangano va gumesa va huma va katekisa vanhu.+

Hi kulandzela, a kungangamela ka Jehovha ku no woneka ka vanhu vontlhe;+ 24 ku no huma ndzilo hi ka Jehovha+ wu ta hisa a munyikelo wa kuhiswa ni mafura lawa ma nga hi laha alatini. Laha a vanhu vontlhe va nga zvi wona, va no sangula ku banguleka va tlhela vawa lahasi hi tinghohe tabye.+

10 Hi ndzhako ka cikhati, Nadhabhe na Abhihu,+ a vana va Aroni, a mun’we ni mun’we i no teka a cibya cakwe ca ku woka hi cona ndzilo a chela ndzilo ni libani+ hi le hehla ka wona. Hi kulandzela, va no sangula ku nyikela a ndzilo wo kala wu nga hi laha nayweni+ mahlweni ka Jehovha; va no maha lezvi a nga kala a nga va leletelangi ku maha. 2 Zvalezvo ku nota ndzilo hi ka Jehovha wu ta va hisa;+ hikwalaho, va nofa mahlweni ka Jehovha.+ 3 Mosi i no byela Aroni, aku: “Jehovha i te ngalo: ‘Ndzi ta basisiwa cikari ka lava va nga kusuhani na mina,+ niku ndzi ta dhumisiwa mahlweni ka vanhu vontlhe.’” Aroni i no miyela a ku hwi.

4 Hikwalaho, Mosi i no vitana Mixayeli na Elizafane, a vana va Uziyeli,+ a tio wa Aroni, aku kabye: “Tanani seno, mu ta susa a vamakabye va n’wina mahlweni ka wutshamu go basa, mu va yisa le handle ka wugovelo.” 5 Hikwalaho, va nota va ta va teka va huma navo na va ha bohile a tinguwo tabye vaya navo le handle ka wugovelo, kota lezvi Mosi a nga va leletele.

6 Andzhako ka lezvo, Mosi i no byela Aroni ni vana vakwe lava van’wani, Eleyazari na Itamare, aku: “Mu nga tsiki ku hlayisa a tihloko ta n’wina ne mu nga handzuli a tinguwo ta n’wina,+ hakuva mu ngafa niku Nungungulu a nga zangarela a hlengeletano yontlhe. A vamakabye va n’wina, a yindlu yontlhe ya ka Izrayeli, hi vona va to rila lava Jehovha a va deleko hi ndzilo. 7 Mu nga suki laha nyangweni ya tenda ga mutlhangano kasi mu ngafi, hakuva a mafura ya Jehovha ya ku tota ma le hehla ka n’wina.”+ Hikwalaho, va no maha lezvi zvi nga wuliwa hi Mosi.

8 Makunu Jehovha i no byela Aroni, aku: 9 “Wena ni vana va wena mu nganwi vhinyo kutani byala gin’wani loku mu nghena lomu tendeni ga mutlhangano,+ hakuva mu ngafa. Leci cileletelo ca kala kupindzuka zvizukulwaneni zva n’wina. 10 Lezvo zvi fela ku kuva ni kuhambana cikari ka lezvi zvo basa ni lezvi zvi nga basangiko, ni cikari ka lezvi zvo hlazveka ni lezvi zvi nga hlazvekangiko,+ 11 ni ku gondzisa a vaIzrayeli a milayo yontlhe leyi Jehovha a yi wulileko hi nomu wa Mosi.”+

12 Andzhako ka lezvo, Mosi i no byela Aroni ni vana vakwe lava va nga sele, Eleyazari na Itamare, aku: “Ka minyikelo ya kuhiswa yi mahelwako Jehovha, tekani lezvi zvi nga sala zva munyikelo wa tindzhoho muga kota tipawa to kala comelo, mu zvi gela kusuhani ni alati,+ hakuva zvilo zvo basabasa.+ 13 Mu fanele ku zvi gela wutshan’wini go basa,+ hakuva ciavelo ca n’wina ni ca vana va n’wina ci tako hi ka minyikelo yi mahelwako Jehovha ya ku hisiwa hi ndzilo, hakuva hi zvalezvo ndzi leletelweko. 14 Mu taga a cifuva ci nyikelweko kota munyikelo wa kundziwilitelwa, ni nenge wu nyikelweko kota cipandze co basa,+ wutshan’wini gi basileko, n’wina ni vafana va n’wina, ni vanhanyana va n’wina,+ hakuva a zvilo lezvi zva miphahlo ya kuhlengela ya vaIzrayeli zvi nyikilwe n’wina kota ciavelo ca n’wina ni ca vana va n’wina. 15 Va ta tisa a nenge wa cipandze co basa, ni cifuva ca munyikelo wa kundziwilitelwa zvin’we ni minyikelo ya mafura ya ku hisiwa hi ndzilo, kasi va ta ndziwilitela a munyikelo wa kundziwilitelwa wuya phambeni ni ndzhako mahlweni ka Jehovha. Zvi tava ciavelo ca n’wina ni ca vana va n’wina kala kupindzuka,+ kota lezvi Jehovha a leleteleko.”

16 Mosi i no lavetela a mbuti ya munyikelo wa ciwonho+ ka matlhelo wontlhe a gumesa a pola ku yi wa hisilwe. Hikwalaho, i no zangarela Eleyazari na Itamare, a vana va Aroni lava va seleko, aku: 17 “Hikuyini mu nga kala kuga a munyikelo wa ciwonho laha wutshan’wini go basa+ kota lezvi wu nga nchumu wo basabasa ke? Kasi a nga nyikangi n’wina lezvaku mu fela ku rwala a nandzu wa hlengeletano mu tlhela mu yi mahela muphahlo wa ku kombela ku tsetselelwa zviwonho mahlweni ka Jehovha ke? 18 Hi nga wonani! A nkhata wa kona a wu tisiwangi lomu wutshan’wini go basa.+ Mu wa fanele ku ngha mu gile a munyikelo wa ciwonho laha wutshan’wini go basa, kota lezvi ndzi leletelweko.” 19 Aroni i no hlamula Mosi, aku: “Phela hi nyamutlha va nga nyikela a munyikelo wabye wa ciwonho ni munyikelo wabye wa kuhiswa mahlweni ka Jehovha,+ hambulezvo ndzi humelelwe hi zvilo lezvi. Loku ndzi wa noga a munyikelo wa ciwonho nyamutlha, ina na zvi mu tsakisile Jehovha ke?” 20 Neti Mosi a ngazwa lezvo, i no xalala.

11 Makunu Jehovha i no byela Mosi na Aroni, aku: 2 “Byelani a vaIzrayeli, muku: ‘A zvihari lezvi mu ta ngaga cikari ka zvihari lezvi zvi nga laha misaveni hi lezvi:+ 3 A zvihari zvontlhe lezvi zvi nga ni zvinyondzwani zvo avanyeka zvi maha zvimbiri, lezvo na ku hi ku zva bhisa zvi tlhela zvi cakunya ga wumbiri, mu ngaga.

4 “‘Kanilezvi ka zvihari lezvi zvi bhisako zvi tlhela zvi cakunya ga wumbiri kutani lezvi zvi nga ni zvinyondzwani zvo avanyeka, lezvi mu nga faneliko kuga hi lezvi: A kameli, hakuva ga bhisa gi tlhela gi cakunya ga wumbiri kanilezvi a gi na zvinyondzwani zvo avanyeka. A gi hlazvekangi ka n’wina.+ 5 Ni manjhengwe,+ hakuva wa bhisa a tlhela a cakunya ga wumbiri kanilezvi a nga na zvinyondzwani zvo avanyeka. A nga hlazvekangi ka n’wina. 6 Ni vhundla, hakuva wa bhisa wu tlhela wu cakunya ga wumbiri kanilezvi a wu na zvinyondzwani zvo avanyeka. A wu hlazvekangi ka n’wina. 7 Ni khumba,+ hakuva gi na ni zvinyondzwani zvo avanyeka kanilezvi a gi bhisi gi tlhela gi cakunya ga wumbiri. A gi hlazvekangi ka n’wina. 8 Mu ngagi ni yihi nyama ya zvihari lezvo hambu ku zvi henya loku zvi file. A zvi hlazvekangi ka n’wina.+

9 “‘Ka zvihari zvontlhe zva lomu matini, mu ngaga ni cihi ci nga ni zvipapilo* ni magwaru, kani ca lomu bimbini kutani ca lomu congweni, mu ngaga.+ 10 Kanilezvi zvontlhe lezvi zvi nga lomu mabimbini ni lomu micongweni zvi nga hiko na zvipapilo* ni magwaru, cikari ka zvontlhe lezvi zvi makanyako ni zvihari* zvin’wani zvi hanyako lezvi zvi nga lomu matini, zvilo zvo nyenyeza ka n’wina. 11 Zvi fanele kuva zvilo zvo nyenyeza ka n’wina niku mu ngagi ni yihi nyama ya zvona;+ nyenyani a zvirumbi zva zvona. 12 Zvontlhe lezvi zvi nga lomu matini na zvi nga hi na zvipapilo* ni magwaru, zvilo zvo nyenyeza ka n’wina.

13 “‘A zvivangwa zvi hahako lezvi mu faneleko ku zvi nyenya zva ku a zvi faneli ku giwa, hi lezvi: A gama,+ ni likotani, ni cimhungu,+ 14 ni mangavhi wo pswhuka, ni tixaka tontlhe ta vamangavhi va ntima, 15 ni tixaka tontlhe ta zvikunguwa, 16 ni mbhuwu,* ni cikhovha, ni cinyanyani ca bimbi,* ni tixaka tontlhe ta magama, 17 ni cikotlwani, ni cituto, ni khuhunhu, 18 ni khalahunye,* ni gumba,* ni khoti, 19 ni sekwa, ni tixaka tontlhe ta vanyamungondzwani, ni gongondzwani, ni khoha.* 20 A zvivangwa zvontlhe zva tipapa* zvi makanyako misaveni, lezvi zvi fambako hi mune wa minenge, zvilo zvo nyenyeza ka n’wina.

21 “‘Ka zvivangwa zva tipapa zvi makanyako laha misaveni, lezvi zvi fambako hi mune wa minenge, mu ngaga ntsena lezvi zvi nga ni minenge yimbiri yo tlula hi yona yi nga ni madingo, yo leha ku hundza leyi yin’wani. 22 Cikari ka zvona mu ngaga lezvi: A tixaka tontlhe ta humbi* yo hanya hi ku fambafamba, ni tixaka tin’wani ta humbi ya ku giwa,+ ni vanyatote, ni bhandzala. 23 A zvivangwa zvontlhe lezvi zvin’wani zva tipapa zvi makanyako laha misaveni, lezvi zvi nga ni mune wa minenge, zvilo zvo nyenyeza ka n’wina. 24 Zvi nga mu nyenyezisa. Ni wihi a zvi henyako na zvi file, i tava a nga hlazvekangi kala ni gambo.+ 25 Ni wihi loyi a rwalako a cirumbi ca zvona i fanele ku hlazva tinguwo takwe+ niku i tava a nga hlazvekangi kala ni gambo.

26 “‘Ni cihi cihari ci nga ni zvinyondzwani zvo avanyeka kanilezvi na zvi nga avanyekangi zvi maha zvimbiri, lezvo na ku hi ku a ci bhisi ci tlhela ci cakunya ga wumbiri, a ci hlazvekangi ka n’wina. Ni wihi a ci henyako i tava a nga hlazvekangi.+ 27 A zvihari zvontlhe zva mune wa minenge lezvi zvi fambako lomu hehla ka tisinya, a zvi hlazvekangi ka n’wina. Ni wihi a zvi henyako loku zvi file, i tava a nga hlazvekangi kala ni gambo. 28 Loyi a rwalako a cirumbi ca zvona i fanele ku hlazva tinguwo takwe+ niku i tava a nga hlazvekangi kala ni gambo.+ A zvi hlazvekangi ka n’wina.

29 “‘A zviharana zvi makanyako laha misaveni, lezvi zvi kalako zvi nga hlazvekangi ka n’wina hi lezvi: a bhurwani, ni kondlo,+ ni tixaka tontlhe ta zvibaratata, 30 ni dhamarela, ni kwahli, ni cibaratata, ni makokolombani, ni luvhani. 31 A zviharana lezvi zvi makanyako a zvi hlazvekangi ka n’wina.+ Ni wihi a zvi henyako na zvi file, i tava a nga hlazvekangi kala ni gambo.+

32 “‘Ni cihi leci zvi to wela ka cona loku zvifa — ku ngava cibya ca sinya, kutani nguwo, kutani bhebhe, kutani sakwa — ci tava ci nga hlazvekangi. Ni cihi cibya leci zvi to wela ka cona ci fanele ku petiwa lomu matini niku ci tava ci nga hlazvekangi kala ni gambo. Andzhako ka lezvo, ci tava ci hlazvekile. 33 Loku zvi wela lomu ka cibya ca wumba, mu fanele ku ci fayetela niku ni zvihi lezvi zvi nga hi ka cona zvi tava zvi nga hlazvekangi.+ 34 Ni zvihi zvakuga lezvi zvi to donelwa hi mati ma nga hi ka cibya leco, zvi tava zvi nga hlazvekangi; ni zvihi zvilo zva ku nwiwa lezvi zvi tova ka cibya leco, zvi tava zvi nga hlazvekangi. 35 Ni cihi leci ci to welwa hi cirumbi ca zvona, ci tava ci nga hlazvekangi; hambu loku yi hi forno kutani fogawu ya yitsongwani, zvi fanele ku khungumulelwa, hakuva a zvi hlazvekangi niku zvi ta tshama na zvi nga hlazvekangi ka n’wina. 36 Hambulezvo loku zvi wela ka cibuka ca mati kutani lomu thangini ga mati, gi ta simama kuva go hlazveka, kanilezvi ni wihi loyi a henyako a zviharana lezvo na zvi file, i tava a nga hlazvekangi. 37 Loku zvi wela mbewu yi kalako yi nga se byaliwa na zvi file, a mbewu leyo yi ta simama kuva yo hlazveka. 38 Kanilezvi loku a mbewu yi tsakamisiwa, a cirwana co kari ca zviharana lezvi zvi fileko ci yi wela, a mbewu leyo a yi hlazvekangi ka n’wina.

39 “‘Loku a cin’we ca zvihari lezvi zvo giwa cifa, ni wihi loyi a henyako cirumbi ca cona i tava a nga hlazvekangi kala ni gambo.+ 40 Ni wihi a toga ni yihi nyama ya zvona i fanele ku hlazva tinguwo takwe, niku i tava a nga hlazvekangi kala ni gambo.+ Ni wihi loyi a rwalako a cirumbi ca zvona i fanele ku hlazva tinguwo takwe, niku i tava a nga hlazvekangi kala ni gambo. 41 Zvontlhe a zviharana zvi makanyako laha misaveni zvilo zvo nyenyeza.+ A zvi faneli ku giwa. 42 Mu ngagi ni cihi cihari ca ku famba hi khwiri, kutani ni cihi ciharana ca ku famba hi mune wa minenge, kutani ni zvihi zviharana zvi makanyako zva minenge yo tala, hakuva zvilo zvo nyenyeza.+ 43 Mu nga ti nyenyezisi hi ni zvihi zviharana zvi makanyako, ne mu nga ti bihisi hi zvona muva vangahlazvekangiko.+ 44 Hakuva hi mina Jehovha, a Nungungulu wa n’wina;+ makunu ti basiseni, mu basa+ hakuva mina ndzi basile.+ Hikwalaho, mu nga ti nyenyezisi hi ni zvihi zviharana zva laha misaveni zva ku famba hi mitlawa. 45 Hakuva hi mina Jehovha, loyi a mu humesileko tikweni ga Gibhite, kasi ndziva Nungungulu wa n’wina.+ Hikwalaho, basani+ hakuva mina ndzi basile.+

46 “‘Lowu i nayo xungetano hi zvihari zva mune wa minenge, ni zvivangwa zvi hahako, ni zvihari* zvontlhe zvi hanyako lezvi zvi hlambelako lomu matini, ni zviharana* zvontlhe zvi makanyako laha misaveni, 47 kasi kuva ni kuhambana cikari ka zvihari zvi nga hlazvekangiko ni lezvi zvo hlazveka, ni cikari ka zvihari zvi hanyako zvi ringanako ku giwa ni lezvi zvi nga ringaniko ku giwa.’”+

12 Jehovha i no engeta a byela Mosi, aku: 2 “Byela a vaIzrayeli, uku: ‘Loku a wasati a xura nyimba a pswala mufana, i tava a nga hlazvekangi hi 7 wa masiku, a ku fana ni loku a wona masiku yakwe.+ 3 Hi siku ga wu 8, a n’wanana loye i ta mahiwa wukwera.*+ 4 A wasati loye i ta simama ku ti basisa ka nkhata ndzeni ka 33 wa masiku ma to landzela. A nga faneli ku henya ni wihi nchumu wo basa hambu ku nghena lomu wutshan’wini go basa kala a masiku yakwe ya ku ti basisa ma mbhela.

5 “‘Loku a pswala nhanyana, i tava a nga hlazvekangi hi 14 wa masiku, a ku fana ni loku a wona masiku yakwe. I ta simama ku ti basisa ka nkhata ndzeni ka 66 wa masiku ma to landzela. 6 Loku a masiku ya ku ti basisa kakwe ma mbhela — andzhako ka ku pswala n’wanana wa mufana kutani wa nhanyana — i ta neha a yivhana ya matsune ya lembe gin’we kasi ku maha hi yona munyikelo wa kuhiswa,+ ni vhinyani ga cipomba kutani tuva kasi ku maha hi gona munyikelo wa ciwonho, a ta nyika mupristi laha nyangweni ya tenda ga mutlhangano. 7 A mupristi i ta zvi nyikela mahlweni ka Jehovha, a mu mahela muphahlo wa ku kombela ku tsetselelwa zviwonho, niku a wasati loye i ta basiswa ka kuhuma nkhata. Lowu i nayo xungetano hi wasati loyi a pswalako n’wana, ku ngava wa mufana kutani wa nhanyana. 8 Kanilezvi loku a nga zvi koti ku nyikela hi yivhu, i wa nehe a matuva mambiri kutani mavhinyani mambiri ya zvipomba;+ a gin’we gi tava ga munyikelo wa kuhiswa, a gin’wani giva ga munyikelo wa ciwonho. Makunu a mupristi i ta mu mahela muphahlo wa ku kombela ku tsetselelwa zviwonho zvakwe, niku yena i ta basiswa.’”

13 Jehovha i no engeta a byela Mosi na Aroni, aku: 2 “Loku a munhu a vhimba, a huma cilondza kutani sakaveti laha ka hlonge ya nyama yakwe, lezvi zvi nga vako cikombiso ca ku i na ni mababyi ya hlokonho,*+ i fanele ku nehiwa ka mupristi Aroni, kutani ka mun’we wa vana vakwe, va nga vapristi.+ 3 A mupristi i ta hlola a mababyi lawa ma nga laha ka hlonge ya munhu loye. Loku a mawoya ya laha ku nga thapelwa hi mababyi ma cicile mava yo basa ni loku ku hi ku laha ku nga thapelwa hi mababyi ku kelekile ku hundza hlonge, leyo i hlokonho. A mupristi i ta yi hlola a gumesa a mu byela ku a nga hlazvekangi. 4 Kanilezvi loku a sakaveti legi gi nga laha ka hlonge yakwe gi hi go basa, na gi nga kelekangi gi hundza hlonge, ni loku a mawoya ya gona ma nga cicangi mava yo basa, a mupristi i ta byela a munhu loyi a thapelweko hi mababyi lezvaku a tshama yece 7 wa masiku.+ 5 A mupristi i ta mu hlola hi siku ga wu 7. Loku a wona lezvaku a mababyi lawo ma nyimile niku a ma andzangi laha ka hlonge, i ta byela a munhu loye lezvaku a tshama kambe yece 7 wa masiku.

6 “A mupristi i ta mu hlola kambe hi siku ga wu 7. Loku a mababyi ma kari ma mbhela ni loku ma nga andzangi laha ka hlonge, a mupristi i ta mu byela lezvaku i hlazvekile;+ leco ci wa hi cilondza ntsena. Andzhako ka lezvo, a munhu loye i ta hlazva tinguwo takwe, ava wo hlazveka. 7 Kanilezvi loku a cilondza ci andza, andzhako ka loku a yile ka mupristi a ya byeliwa ku i hlazvekile, i ta tlhela kambe* ka mupristi. 8 A mupristi i ta ci hlola; loku a kuma lezvaku ci andzile laha ka hlonge, i ta mu byela lezvaku a nga hlazvekangi. Leyo i hlokonho.+

9 “Loku a munhu a ngheniwa hi hlokonho, i fanele ku yisiwa ka mupristi; 10 a mupristi i ta mu hlola.+ Loku laha ka hlonge yakwe ku hi ni wutshamu gi nga vhimba gi tlhela giva go basa, a mawoya ya laha ko vhimba mava yo basa, ku tlhela kuva ni cilondza co vhuleka+ laha ko vhimba, 11 a hlonge ya munhu loye yi na ni hlokonho ya hombe. A mupristi i ta mu byela ku a nga hlazvekangi. A nga ta byela a munhu loye lezvaku a tshama yece,+ hakuva a nga hlazvekangi. 12 Makunu loku a hlokonho yi woneka laha ka hlonge yontlhe, ni loku a mababyi lawo ma pomele munhu kusukela hlokweni kala mikondzweni, kala laha zvi kotekako ku a mupristi a ku wona, 13 ni loku a mupristi a mu hlola a wona lezvaku a hlokonho yi pomele a hlonge yakwe yontlhe, i ta byela a munhu loyi a babyako lezvaku i hlazvekile.* Yontlhe a hlonge yakwe yi cicile yiva yo basa; a munhu loye i hlazvekile. 14 Kanilezvi a siku legi ku to woneka a cilondza co vhuleka laha ka hlonge, i tava a nga hlazvekangi. 15 Loku a mupristi a wona a cilondza leco co vhuleka, i ta mu byela lezvaku a nga hlazvekangi.+ A cilondza co vhuleka a ci hlazvekangi. I hlokonho.+ 16 Kanilezvi loku a cilondza leco co vhuleka co tlhela ci cica civa co basa, i ta tlhela ka mupristi. 17 A mupristi i ta mu hlola.+ Loku a cilondza ci cicile civa co basa, a mupristi i ta byela a munhu loyi a babyako lezvaku i hlazvekile.

18 “Loku a munhu a huma cidlayi laha ka hlonge yakwe ci gumesa ci hola, 19 kanilezvi laha ku nga hi ni cidlayi ku tlhela ku vhimba, ku maha ko basa kutani ku huma sakaveti go pswhukisa ku kwalala, i fanele kuya ka mupristi. 20 A mupristi i ta gi hlola.+ Loku a sakaveti lego gi woneka ku gi kelekile gi hundza hlonge, ni loku a mawoya ya gona ma cicile mava yo basa, a mupristi i ta mu byela lezvaku a nga hlazvekangi. Leyo i hlokonho yi nga huma hi laha ku nga hi ni cidlayi. 21 Kanilezvi loku a mupristi a hlola a sakaveti a wona lezvaku a gi na mawoya yo basa, ni loku gi nga kelekangi gi hundza hlonge, na gi kari gi fuva, i ta byela a munhu loye lezvaku a tshama yece 7 wa masiku.+ 22 Kanilezvi loku gi woneka khwatsi lezvaku gi andzile laha ka hlonge, a mupristi i ta mu byela lezvaku a nga hlazvekangi. Lawo mababyi. 23 Kanilezvi loku a sakaveti lego gi tshama kwalaho ka kun’we gi nga andzi, cidlayi ci kukutelako ntsena. A mupristi i ta mu byela lezvaku i hlazvekile.+

24 “Loku a munhu a hi ni cibawa ca kuswa hi ndzilo, a cibawa leco ci maha sakaveti go pswhukisa ku kwalala kutani ku basa, 25 a mupristi i ta gi hlola. Loku a mawoya ya gona ma cicile mava yo basa, ku woneka ku gi kelekile gi hundza hlonge, i hlokonho yi nga huma hi laha ka cibawa. A mupristi i ta mu byela lezvaku a nga hlazvekangi. Leyo i hlokonho. 26 Kanilezvi loku a mupristi a hlola a sakaveti lego a wona lezvaku a gi na mawoya yo basa, a gi etangi gi hundza hlonge, ni lezvaku gi kari gi fuva, a mupristi i ta mu byela lezvaku a tshama yece hi 7 wa masiku.+ 27 A mupristi i ta mu hlola kambe hi siku ga wu 7. Loku zvi woneka khwatsi lezvaku a sakaveti lego gi andzile laha ka hlonge, a mupristi i ta mu byela lezvaku a nga hlazvekangi. I hlokonho. 28 Kanilezvi loku a sakaveti lego gi tshama kwalaho ka kun’we gi nga andzi, kuvhimba ka cibawa ntsena. A mupristi i ta mu byela lezvaku i hlazvekile, hakuva cibawa ci kukutelako.

29 “Loku a wanuna kutani wasati a telwa hi mababyi laha ka hloko kutani laha ka cilevhu, 30 a mupristi i ta hlola a mababyi lawo.+ Loku ma woneka ku ma kelile ma hundza hlonge, a misisi yi maha ya wusafarawu* yi tlhela yi vevuka, a mupristi i ta mu byela lezvaku a nga hlazvekangi. Lawo mababyi ya hlonge ya hloko kutani ya hlonge ya cilevhu. Leyo i hlokonho ya hloko kutani ya cilevhu. 31 Kanilezvi loku a mupristi a wona lezvaku a mababyi a ma kelangi ma hundza hlonge, ni loku a wutshamu legi gi thapelweko gi nga hi na misisi ya ntima, a mupristi i ta byela a munhu loye a thapelweko hi mababyi lezvaku a tshama yece 7 wa masiku.+ 32 A mupristi i ta hlola a mababyi hi siku ga wu 7. Loku a wutshamu legi gi nga thapelwa hi mababyi gi nga andzangi, ni loku gi nga milangi misisi ya wusafarawu,* lezvo a wutshamu lego na gi nga kelekangi gi hundza hlonge, 33 a munhu loye i fanele ku halula misisi kanilezvi a wutshamu legi gi thapelweko i fanele ku gi tsika na gi nga haluliwangi. A mupristi i ta byela a munhu loye lezvaku a tshama yece 7 wa masiku.

34 “Hi siku ga wu 7, a mupristi i ta hlola kambe a wutshamu legi gi thapelweko. Loku a mababyi ya hlonge ya hloko ni ya hlonge ya cilevhu ma nga andzangi ni loku ma nga woneki ku ma kelile ma hundza hlonge, a mupristi i ta mu byela lezvaku i hlazvekile. I ta hlazva tinguwo takwe ava wo hlazveka. 35 Kanilezvi loku a mababyi ma andza, andzhako ka loku a byelilwe ku i hlazvekile, 36 a mupristi i ta mu hlola; loku a mababyi ma andzile laha ka hlonge, a nga ta ha lavetela misisi ya wusafarawu;* a munhu loye a nga hlazvekangi. 37 Kanilezvi loku a hlola a kuma lezvaku a mababyi a ma andzangi niku ku milile misisi ya ntima, a mababyi ma n’walele. A mupristi i ta byela a munhu loye lezvaku i hlazvekile.+

38 “Loku a wanuna kutani wasati a huma masakaveti yo basa laha ka hlonge, 39 a mupristi i ta ma hlola.+ Loku a masakaveti lawa ma humileko laha ka hlonge ma sangula ku kwalala, lezvo zvirumbani zvo kala mhango zvi humileko laha ka hlonge. A munhu loye i hlazvekile.

40 “Loku a wanuna a mbhela misisi ya hloko yakwe a sala ni pandla, i hlazvekile. 41 Loku a mbhela misisi ya hloko yakwe laha phambeni ava ni pandla, i hlazvekile. 42 Kanilezvi loku ku huma cilondza co pswhukisa ku kwalala laha ka hlonge ya pandla yakwe kutani laha cikandzeni cakwe, leyo i hlokonho yi humako laha ka hlonge ya hloko yakwe kutani laha cikandzeni cakwe. 43 A mupristi i ta mu hlola. Loku a wutshamu legi gi nga vhimba ga pandla ya hloko yakwe kutani ga laha cikandzeni cakwe gi pswhukisile ku kwalala gi tlhela gi fana ni hlokonho laha ka hlonge yakwe, 44 i na ni hlokonho. A nga hlazvekangi niku a mupristi i fanele ku mu byela lezvaku a nga hlazvekangi hi kota ya mababyi lawa ma nga laha hlokweni yakwe. 45 A munhu loyi a babyako hi hlokonho i fanele ku boha tinguwo to handzukela a tlhela a nga hlayisi hloko yakwe, niku i fanele ku fenengeta a nomu wakwe,* a banguleka, aku: ‘A ndzi hlazvekangi! A ndzi hlazvekangi!’ 46 I ta simama a nga hlazvekangi ka masiku wontlhe lawa a to ngha na a babya. Kota lezvi a nga hlazvekangiko, i fanele ku tshama yece. I ta tshama le handle ka wugovelo.+

47 “Loku a hlokonho yi thapela a tinguwo, ti ngava ta woya kutani ta wukene,* 48 kutani tihindza ta tinguwo ti lukilweko ta wukene,* kutani ta woya, kutani bhebhe, kutani ni wihi nchumu wu mahilweko hi bhebhe, 49 ni loku a sakaveti ga wuthapa ga kuya ka wusafarawu* kutani go pswhuka ga mababyi lawo gi humelela laha ka nguwo, kutani laha ka bhebhe, kutani laha ka tihindza ta tinguwo ti lukilweko, kutani ka ni wihi nchumu wu mahilweko hi bhebhe, leyo i hlokonho niku yi fanele ku kombiwa a mupristi. 50 A mupristi i ta hlola a mababyi lawo, a tsawukanisa a nchumu lowu wu nga ni cikombiso ca hlokonho hi 7 wa masiku.+ 51 Loku a hlola mababyi hi siku ga wu 7 a wona lezvaku ma andzile laha ka nguwo, kutani laha ka tihindza ta tinguwo ti lukilweko, kutani laha ka bhebhe (kova ni kwihi laha a bhebhe lego gi tiriselwako kona), leyo i hlokonho ya hombe; a zvilo lezvo a zvi hlazvekangi.+ 52 I fanele ku hisa a nguwo leyo kutani tihindza ta tinguwo ti lukilweko (ti ngava ta woya kutani ta wukene*), kutani ni wihi nchumu wa bhebhe lowu wu thapelweko hi mababyi, hakuva i hlokonho leyi ya hombe. A nchumu lowo wu fanele ku hisiwa hi ndzilo.

53 “Kanilezvi loku a mupristi a hlola a wona lezvaku a mababyi a ma andzangi laha ka nguwo, kutani laha ka tihindza ta tinguwo ti lukilweko, kutani laha ka nchumu wa bhebhe, 54 a mupristi i ta laya lezvaku va hlazva a nchumu lowo wu thapelweko a gumesa a wu tsawukanisa wu mbheta masiku man’wani ya 7. 55 Hi kulandzela, i ta hlola a nchumu lowo wu thapelweko hi mababyi, andzhako ka kuva wu hlazvilwe khwatsi. Loku laha ku thapelweko hi mababyi ku simamisa zvalezvo, hambu loku a mababyi ma nga andzangi, a nchumu lowo a wu hlazvekangi. U fanele ku wu hisa hi ndzilo hakuva wu gilwe, ndzeni ni handle.

56 “Kanilezvi loku a mupristi a hlola a cipandze leci ci thapelweko hi mababyi a wona lezvaku ma mbhela, andzhako ka kuva a nchumu lowo wu hlazvilwe khwatsi, i ta dungurula cipandze leco laha ka nguwo, kutani ka bhebhe, kutani ka tihindza ta tinguwo ti lukilweko. 57 Hambulezvo loku a mababyi ma ha simama ku woneka ka cipandze cin’wani laha ka nguwo, kutani laha ka tihindza ta tinguwo ti lukilweko, kutani ni ka wihi nchumu wa bhebhe, mo endzeleka. Ni wihi nchumu wu thapelweko, u fanele ku wu hisa hi ndzilo.+ 58 Kanilezvi loku ma mbhela a mababyi lawa ma thapeleko a nguwo, kutani tihindza ta tinguwo ti lukilweko, kutani ni wihi nchumu wa bhebhe lowu u hlazvako, wu fanele ku hlazviwa ga wumbiri hi kona wu to hlazveka.

59 “Lowu i nayo xungetano hi hlokonho laha ka nguwo ya woya, kutani ya wukene,* kutani ka tihindza ta tinguwo ti lukilweko, kutani ka ni wihi nchumu wa bhebhe, kasi ku tiva ku wu hlazvekile kutani a wu hlazvekangi.”

14 Jehovha i no engeta a byela Mosi, aku: 2 “A nayo lowu wu faneleko ku landzelwa ka siku legi a munhu wa hlokonho a basisiwako, a cikhati leci a to yisiwa ka mupristi hi, lowu:+ 3 A mupristi i taya le handle ka wugovelo a ya mu hlola. Loku a hlokonho yi mbhelile, 4 a mupristi i ta mu byela lezvaku ata ni zvinyanyani zvimbiri zvo hlazveka, ni dhavi ga sedhare, ni lihindza lo pswhuka, ni hisope* kasi a ta basisiwa.+ 5 A mupristi i ta laya lezvaku a cinyanyani cin’we ci dayelwa ka cibya ca wumba ci nga ni mati ma khilweko cibukeni. 6 Kanilezvi a mupristi i fanele ku teka a cinyanyani leci ci hanyako, ni dhavi ga sedhare, ni lihindza lo pswhuka ni hisope, a zvi dun’weka lomu ka nkhata wa cinyanyani leci ci delweko ka mati ma khilweko cibukeni. 7 I ta mu n’watsekela nkhata a 7 wa makhati a munhu loyi a ti basisako ka hlokonho a gumesa a mu byela lezvaku i hlazvekile. Hi kulandzela, i ta tsikeleta a cinyanyani leci co hanya le khwatini.+

8 “A munhu loyi a ti basisako i fanele ku hlazva tinguwo takwe, a halula misisi yakwe yontlhe a tlhela a hlamba hi mati, hi kona a to hlazveka. Andzhako ka lezvo, a nga nghena lomu wugovelweni kanilezvi i ta tshama 7 wa masiku lahandle ka tenda gakwe. 9 Hi siku ga wu 7, i ta halula misisi yontlhe ya hloko yakwe, ni malevhu yakwe ni tisiyi takwe. Loku a halulile misisi yakwe yontlhe i ta hlazva tinguwo takwe a tlhela a hlamba hi mati, hi kona a to hlazveka.

10 “Hi siku ga wu 8, i ta teka a tiyivhana timbiri ta tinene ta vamatsune,+ ni yivhana ya yinene ya kati ya lembe gin’we, ni zvipandze zvinharu zva wukhume zva efa* ya mapa ma sililweko khwatsi ma vhuvilweko ni mafura, kota munyikelo wa tindzhoho,+ ni loga* yin’we ya mafura.+ 11 A mupristi loyi a to mu byela lezvaku i hlazvekile i ta hendleleta a munhu loye a ti basisako zvin’we ni minyikelo mahlweni ka Jehovha laha nyangweni ya tenda ga mutlhangano. 12 A mupristi i ta teka a yivhana ya matsune a yi nyikela kota munyikelo wa nandzu+ zvin’we ni loga* ya mafura a zvi yisa phambeni ni ndzhako kota munyikelo wa kundziwilitelwa mahlweni ka Jehovha.+ 13 Andzhako ka lezvo, i ta daya a yivhana ya matsune laha ka wutshamu go basa, gi nga wutshamu legi a munyikelo wa ciwonho ni munyikelo wa kuhiswa yi talako ku dayelwa ka gona,+ hakuva a ku fana ni munyikelo wa ciwonho, a munyikelo wa nandzu wu lumba a mupristi.+ I nchumu wo basabasa.+

14 “Hi kulandzela, a mupristi i ta teka a nkhata wo kari wa munyikelo wa nandzu a tota a ndleve ya cinene ya loyi a ti basisako hi lahasi ka yona, ni likhudzu la canja gakwe ga cinene, ni likhudzu la nkondzo wakwe wa cinene. 15 A mupristi i ta teka mafura+ yo kari lomu ka loga a chulula lomu ka canja gakwe ga cibhabha. 16 A mupristi i ta peta a litiho lakwe la cinene lomu ka mafura lawa ma nga canjeni gakwe ga cibhabha, a doneketela mafura yo kari lahasi 7 wa makhati mahlweni ka Jehovha. 17 Andzhako ka lezvo, a mupristi i ta teka a mafura yo kari ka lawa ma seleko lomu canjeni gakwe a tota a ndleve ya cinene ya loyi a ti basisako hi lahasi ka yona, ni likhudzu la canja gakwe ga cinene, ni likhudzu la nkondzo wakwe wa cinene kwalaha a nga tota nkhata wa munyikelo wa nandzu. 18 A mupristi i ta teka mafura lawa ma seleko lomu ka canja gakwe a ma chulula hlokweni ya loyi a ti basisako, a mu mahela muphahlo wa ku kombela ku tsetselelwa zviwonho mahlweni ka Jehovha.+

19 “A mupristi i ta maha muphahlo wa munyikelo wa ciwonho,+ a mu mahela muphahlo wa ku kombela ku tsetselelwa zviwonho loyi a ti basisako ka kungahlazveki kakwe. Andzhako ka lezvo, i ta daya a cifuyo ca munyikelo wa kuhiswa. 20 A mupristi i ta nyikela a munyikelo wa kuhiswa ni munyikelo wa tindzhoho+ laha alatini niku i ta mu mahela muphahlo wa ku kombela ku tsetselelwa zviwonho+ loyi a ti basisako, hi kona a to hlazveka.+

21 “Kanilezvi loku a hi cisiwana, na a nga hi na zva ku enela zva ku nyikela hi zvona, i ta teka a yivhana ya matsune kota munyikelo wa nandzu yiva ya munyikelo wa kundziwilitelwa kasi a ti mahela muphahlo wa ku kombela ku tsetselelwa zviwonho zvin’we ni cipandze ca wukhume ca efa* ya mapa ma sililweko khwatsi ma vhuvilweko ni mafura kota munyikelo wa tindzhoho, ni loga yin’we ya mafura, 22 ni matuva mambiri kutani mavhinyani mambiri ya zvipomba, hi kuya hi makotela yakwe. A gin’we gi tava ga munyikelo wa ciwonho, legi gin’wani giva ga munyikelo wa kuhiswa.+ 23 Hi siku ga wu 8,+ ku nga siku legi a wuliwako hi gona a ku munhu wo hlazveka, i ta zvi neha ka mupristi laha nyangweni ya tenda ga mutlhangano mahlweni ka Jehovha.+

24 “A mupristi i ta teka a yivhana ya matsune ya munyikelo wa nandzu+ ni loga ya mafura a zvi yisa phambeni ni ndzhako kota munyikelo wa kundziwilitelwa mahlweni ka Jehovha.+ 25 Andzhako ka lezvo, i ta daya a yivhana ya matsune ya munyikelo wa nandzu, ni mupristi i ta teka a nkhata wo kari wa munyikelo wa nandzu a tota a ndleve ya cinene ya loyi a ti basisako hi lahasi ka yona, ni likhudzu la canja gakwe ga cinene, ni likhudzu la nkondzo wakwe wa cinene.+ 26 A mupristi i ta chulula mafura yo kari lomu canjeni gakwe ga cibhabha,+ 27 niku hi litiho lakwe la cinene, a mupristi i ta n’watsekela a mafura yo kari ka lawa ma nga canjeni gakwe ga cibhabha 7 wa makhati mahlweni ka Jehovha. 28 A mupristi i ta teka mafura yo kari ka lawa ma nga canjeni gakwe a tota a ndleve ya cinene ya loyi a ti basisako hi lahasi ka yona, ni likhudzu la canja gakwe ga cinene, ni likhudzu la nkondzo wakwe wa cinene, a tota kwalomu a nga tota nkhata wa munyikelo wa nandzu. 29 A mupristi i ta chela mafura lawa ma seleko lomu canjeni gakwe hlokweni ya loyi a ti basisako, a mu mahela muphahlo wa ku kombela ku tsetselelwa zviwonho mahlweni ka Jehovha.

30 “I ta nyikela tuva gin’we kutani vhinyani gin’we ga cipomba, hi kuya hi makotela yakwe,+ 31 ku nga leci a to ci kota, kota munyikelo wa ciwonho, legi gin’wani kota munyikelo wa kuhiswa+ zvin’we ni munyikelo wa tindzhoho. A mupristi i ta mu mahela muphahlo wa ku kombela ku tsetselelwa zviwonho loyi a ti basisako, mahlweni ka Jehovha.+

32 “Lowu i nayo xungetano hi loyi a nga hi ni hlokonho kanilezvi na a nga zvi koti ku kuma a zvilo lezvi zvi lavekako kasi a wuliwa ku i hlazvekile.”

33 Andzhako ka lezvo, Jehovha i no byela Mosi na Aroni, aku: 34 “A cikhati leci mu to nghena tikweni ga Khanani,+ legi ndzi mu nyikako kota tshomba,+ loku ndzi tsika yindlu lomu tikweni ga n’wina yi thapelwa hi hlokonho,+ 35 a n’winyi wa yindlu leyo i fanele kuya ka mupristi, a yaku: ‘A yindlu ya mina yi thapelwe hi mababyi yo kari.’ 36 A mupristi i ta laya lezvaku ku humeselwa zvontlhe zvi nga lomu ndlwini na a nga seta a ta wona mababyi lawo, kasi a ngati a ta wula lezvaku zvontlhe lezvi zvi nga lomu ndlwini a zvi hlazvekangi. Andzhako ka lezvo, a muprsiti i tata a ta hlola yindlu. 37 I ta hlola wutshamu legi gi nga ni mababyi. Loku lomu ka makhurisi ya yindlu ku hi ni ka wuthapa ga kuya ka wusafarawu,* kutani ko pswhukisa ku kwalala na ku bovorele ku hundza khurisi, 38 a mupristi i ta huma lomu ndlwini aya nyangweni ya yindlu a gumesa a vhala yindlu lezvaku yi tshama a 7 wa masiku.+

39 “Andzhako ka lezvo, a mupristi i ta wuya hi siku ga wu 7 a ta yi hlola. Loku a mababyi ma andzile lomu ka makhurisi ya yindlu, 40 a mupristi i ta laya lezvaku va susa a maribye lawa ma nga ni mababyi va ya ma hoxa le handle ka dhoropa, ka wutshamu gi nga hlazvekangiko. 41 Hi kulandzela, i ta laya lezvaku a yindlu yi khwayiwa kontlhe lomu ndzeni; a rebhoko ni argamasa lezvi zvi nga khungumulwa zvi fanele ku hoxiwa le handle ka dhoropa, ka wutshamu gi nga hlazvekangiko. 42 Andzhako ka lezvo, va ta vekela man’wani maribye wutshan’wini ga lawa ma susilweko a gumesa a laya lezvaku a yindlu leyo yi rebhokariwa hi yin’wani argamasa.

43 “Hambulezvo, loku a mababyi ma tlhela ma vhundzumuka lomu ndlwini andzhako ka loku yi susilwe maribye, yi khwayilwe yi tlhela yi rebhokarisiwa, 44 a mupristi i ta nghena a yi hlola. Loku a mababyi ma andzile lomu ndlwini, i hlokonho ya hombe+ yi nga lomu ndlwini. A yindlu leyo a yi hlazvekangi. 45 I ta va byela lezvaku va khungumula yindlu leyo — a maribye ya yona, ni mapulango ya yona, ni rebhoko yontlhe ni argamasa ya yindlu — zvi rwaliwa zvi ya hoxiwa le handle ka dhoropa, ka wutshamu gi nga hlazvekangiko.+ 46 Kanilezvi ni wihi loyi a nghenako lomu ndlwini ka ni gihi siku legi yi vhalilweko+ i tava a nga hlazvekangi kala ni gambo;+ 47 ni wihi loyi a etlelako lomu ndlwini leyo i fanele ku hlazva tinguwo takwe, niku ni wihi loyi a gelako lomo i fanele ku hlazva tinguwo takwe.

48 “Kanilezvi loku a mupristi ata a ta wona lezvaku a mababyi a ma andzangi lomu ndlwini andzhako ka kuva yi rebhokarisilwe, i ta wula lezvaku a yindlu yi hlazvekile hakuva a mababyi ma n’walele. 49 Kasi ku basisa yindlu ka kungahlazveki,* a mupristi i ta teka zvinyanyani zvimbiri, ni dhavi ga sedhare, ni lihindza lo pswhuka, ni hisope.+ 50 I ta daya cinyanyani cin’we ka cibya ca wumba ci nga ni mati ma khilweko cibukeni. 51 Andzhako ka lezvo, i ta teka dhavi ga sedhare, ni hisope, ni lihindza lo pswhuka, ni cinyanyani leci ci hanyako a zvi dun’weka nkhateni wa cinyanyani leci ci delweko ka mati ma khilweko cibukeni, a n’watsekela 7 wa makhati mahlweni ka yindlu.+ 52 I ta basisa yindlu ka kungahlazveki* hi nkhata wa cinyanyani, ni mati ma khilweko cibukeni, ni cinyanyani leci co hanya, ni dhavi ga sedhare, ni hisope, ni lihindza lo pswhuka. 53 Hi kulandzela, i ta tsika a cinyanyani leci co hanya le handle ka dhoropa ci ti fambela niku i ta mahela yindlu a muphahlo wa ku kombela ku tsetselelwa zviwonho, hi kona yi to hlazveka.

54 “Lowu i nayo xungetano hi ni yihi hlokonho, ni mababyi ya hlonge ya hloko kutani ya hlonge ya cilevhu,+ 55 ni hlokonho ya laha ka nguwo+ kutani ya laha ka yindlu,+ 56 ni wa loku munhu a vhimba, ni loku a huma zvilondza ni masakaveti,+ 57 kasi ku tiva ku hi rini a nchumu wo kari wu kalako wu nga hlazvekangi niku hi rini wu hlazvekileko.+ Lowu i nayo xungetano hi hlokonho.”+

15 Jehovha i no engeta a byela Mosi na Aroni, aku: 2 “Byelani vaIzrayeli, muku: ‘Loku a wanuna a huma wubovhu hi laha ka ciro cakwe ca wubeleki,* a wubovhu lego gi ta mu maha a nga hlazveki.+ 3 A munhu loye a nga hlazvekangi hi kota ya wubovhu; kani ga simama ku huma hi laha ka ciro cakwe ca wubeleki kutani ka vhaleka, i simama a nga hlazvekangi.

4 “‘Ni wihi mubhedhi lowu a to etlela ka wona loyi a humako wubovhu wu tava wu nga hlazvekangi niku ni cihi a to tshamela ci tava ci nga hlazvekangi. 5 Loyi a to khumba a mubhedhi wakwe i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo.+ 6 Ni wihi loyi a tshamelako nchumu wu tshamelweko hi loyi a humako wubovhu i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo. 7 Ni wihi loyi a khumbako loyi a humako wubovhu i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo. 8 Loku loyi a humako wubovhu a phelela munhu wo hlazveka, a munhu loye i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo. 9 Ni cihi cigabhatsa* ci tshamelwako hi loyi a humako wubovhu a ci hlazvekangi. 10 Ni wihi loyi a khumbako ni cihi leci ci tshamelweko hi loyi a humako wubovhu i tava a nga hlazvekangi kala ni gambo; ni wihi loyi a susako zvilo lezvo i ta hlazva a tinguwo takwe a tlhela a hlamba hi mati niku i tava a nga hlazvekangi kala ni gambo. 11 Loku loyi a humako wubovhu+ a khumba mun’wani munhu na a nga hlambangi mandla yakwe hi mati, a munhu loye i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo. 12 Ni cihi cibya ca wumba ci khumbiwako hi loyi a humako wubovhu ci fanele ku fayetelwa niku ni cihi cibya ca sinya ci fanele ku hlazviwa hi mati.+

13 “‘Loku a wubovhu gi nyima ku huma, a munhu loye ava wo hlazveka, i ta hlaya 7 wa masiku ya kubasiswa kakwe. I ta hlazva a tinguwo takwe a tlhela a hlamba hi mati ma khilweko cibukeni, hi kona a to hlazveka.+ 14 Hi siku ga wu 8, i ta teka a matuva mambiri kutani mavhinyani mambiri ya zvipomba+ a famba nawo nyangweni ya tenda ga mutlhangano mahlweni ka Jehovha a ya ma nyikela ka mupristi. 15 A mupristi i ta ma nyikela, a gin’we kota munyikelo wa ciwonho, legi gin’wani giva ga munyikelo wa kuhiswa, a mu mahela muphahlo wa ku kombela ku tsetselelwa zviwonho mahlweni ka Jehovha hi kota ya ku huma wubovhu.

16 “‘Makunu loku a wanuna a huma a mbewu ya wununa, i fanele ku hlamba miri wakwe wontlhe hi mati niku i tava a nga hlazvekangi kala ni gambo.+ 17 I fanele ku hlazva hi mati ni yihi nguwo kutani ni wihi nchumu wa bhebhe lowu wu donelweko hi mbewu ya wununa niku zvi tava zvi nga hlazvekangi kala ni gambo.

18 “‘Loku a wanuna a etlela ni wasati ku huma a mbewu ya wununa, va fanele ku hlamba hi mati niku va tava va nga hlazvekangi kala ni gambo.+

19 “‘Loku a wasati a huma nkhata mirini wakwe, i ta tshama 7 wa masiku na a nga hlazvekangi hi lezvi a nga lomu ka ku wona masiku yakwe.+ Ni wihi a to mu khumba i tava a nga hlazvekangi kala ni gambo.+ 20 Ni cihi a to etlela ka cona na a hi lomu ka ku wona masiku yakwe a ci hlazvekangi niku ni cihi a to tshamela a ci hlazvekangi.+ 21 Ni wihi a to khumba a mubhedhi wakwe, i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo. 22 Ni wihi loyi a to khumba ni wihi nchumu wu tshamelweko hi wasati loye i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo. 23 Loku a tshamele mubhedhi kutani nchumu wun’wani, loyi a to zvi khumba i tava a nga hlazvekangi kala ni gambo.+ 24 Loku a wanuna a etlela ni wasati loye, a khumba nkhata wa masiku yakwe,+ i tava a nga hlazvekangi hi 7 wa masiku niku ni wihi mubhedhi a to etlela ka wona wu tava wu nga hlazvekangi.

25 “‘Loku a wasati a huma nkhata hi masiku yo tala+ yo kala ma nga hi lawa a tolovelako ku wona hi wona masiku yakwe,+ kutani loku a huma nkhata hi cikhati co leha co hundza leci ca loku a wona masiku yakwe, i tava a nga hlazvekangi ka masiku wontlhe lawa a humako nkhata, a ku fana ni loku a hi lomu ka ku wona masiku yakwe. 26 Ni wihi mubhedhi a to etlela ka wona loku a ha huma nkhata wu tava wu nga hlazvekangi, a ku fana ni lowu a etlelako ka wona loku a hi lomu ka ku wona masiku yakwe+ niku ni wihi nchumu lowu a to tshamela wu tava wu nga hlazvekangi, a ku fana ni lezvi zvi mahekako loku a hi lomu ka ku wona masiku yakwe. 27 Ni wihi loyi a zvi khumbako i tava a nga hlazvekangi; i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo.+

28 “‘Hambulezvo, loku a wasati a nyima ku huma nkhata, ava wo hlazveka, i ta hlaya 7 wa masiku ya kubasiswa kakwe. Andzhako ka lezvo, hi kona a to hlazveka.+ 29 Hi siku ga wu 8, i ta teka a matuva mambiri kutani mavhinyani mambiri ya zvipomba+ a famba nawo ka mupristi nyangweni ya tenda ga mutlhangano.+ 30 A mupristi i ta nyikela a gin’we giva munyikelo wa ciwonho, legi gin’wani giva munyikelo wa kuhiswa, a mu mahela muphahlo wa ku kombela ku tsetselelwa zviwonho mahlweni ka Jehovha hi kota ya kungahlazveki kakwe ka ku huma nkhata.+

31 “‘Hi kumaha loko, mu ta tsawukanisa a vaIzrayeli ni kungahlazveki kabye kasi va ngafi kungahlazvekeni kabye hi ku nyenyezisa a tabhernakeli ga mina, legi gi nga cikari kabye.+

32 “‘Lowu i nayo xungetano hi wanuna loyi a humako wubovhu, ni wanuna loyi a nga hlazvekangiko hi kota ya lezvi a humako a mbewu ya wununa,+ 33 ni wasati loku a hi lomu ka ku wona masiku yakwe,+ ni wanuna loyi a humako wubovhu kutani wasati loyi a humako nkhata,+ ni wanuna loyi a etlelako ni wasati loyi a nga hlazvekangiko.’”

16 Jehovha i no wulawula na Mosi andzhako ka kufa ka vana vambiri va Aroni lava va ngafa hi lezvi va nga tshinela mahlweni ka Jehovha.+ 2 Jehovha i no byela Mosi, aku: “Byela makabye wa wena Aroni lezvaku a nga ngheni ni ka cihi cikhati lomu wutshan’wini go basa,+ lomu ndzeni ka kortina+ mahlweni ka Arke* ga Civhumelwano kasi a ngafi,+ hakuva ndzi ta woneka hehla ka tapa+ ya Arke lomu ka refu.+

3 “Lezvi Aroni a faneleko ku neha loku a nghena lomu wutshan’wini go basa hi lezvi: Cidhunana ca homu kasi ku maha hi cona a munyikelo wa ciwonho+ ni yivhu ya matsune kasi ku maha hi yona a munyikelo wa kuhiswa.+ 4 I fanele ku boha a nguwo yo leha yo basa ya wukene,*+ a fenengeta wumbyiri gakwe hi cimolowani* ca wukene+ niku i fanele ku boha bhandi ga wukene+ ni turbhanti* ya wukene+ hlokweni yakwe. Leto tinguwo to basa.+ I ta ranga hi ku hlamba hi mati+ a gumesa a boha tinguwo leto.

5 “A hlengeletano ya ka Izrayeli+ yi ta mu nyika zvimhongwana zvimbiri zva munyikelo wa ciwonho ni yivhu ya matsune ya munyikelo wa kuhiswa.

6 “Andzhako ka lezvo, Aroni i ta nyikela a dhuna ga homu ya munyikelo wa ciwonho, legi gi lumbako yena, a maha muphahlo wa ku kombela ku tsetselelwa zviwonho zvakwe+ ni zva va ngango wakwe.

7 “Hi kulandzela, i ta teka a timhongo leti ta timbiri a ti yimisa mahlweni ka Jehovha nyangweni ya tenda ga mutlhangano. 8 Aroni i taba tihlolo a bela timhongo leti ta timbiri kasi ku tiva leyi yi tova ya Jehovha ni leyi yi tova ya Azazeli.* 9 Aroni i ta nyikela a mhongo leyi yi khomilweko hi hlolo+ lezvaku ya Jehovha a maha hi yona a munyikelo wa ciwonho. 10 Kanilezvi a mhongo leyi yi khomilweko hi hlolo lezvaku ya Azazeli yi fanele ku nehiwa na yi hanya yi ta yima mahlweni ka Jehovha lezvaku va maha muphahlo wa ku kombela ku tsetselelwa zviwonho hehla ka yona, kasi yi yisiwa ka Azazeli lomu ciwuleni.+

11 “Aroni i ta nyikela a dhuna ga homu ya munyikelo wa ciwonho, legi gi lumbako yena, a maha muphahlo wa ku kombela ku tsetselelwa zviwonho zvakwe ni zva va ngango wakwe. Andzhako ka lezvo, i ta daya a dhuna ga homu ya munyikelo wa ciwonho, legi gi lumbako yena.+

12 “Hi kulandzela, i ta teka cibya ca ku woka hi cona ndzilo+ na ci tele hi makhala ya ndzilo ya laha alatini+ mahlweni ka Jehovha ni mandla mambiri ya libani la linene lo nuhela+ a famba nazvo lomu ndzeni ka kortina.+ 13 I ta chela libani laha ka makhala ya ndzilo mahlweni ka Jehovha+ niku a refu ga musi wa libani gi ta fenengeta a tapa ya Arke+ ga Civhumelwano+ kasi a ngafi.

14 “A mupristi i ta doneketela a nkhata wo kari wa dhuna ga homu+ hi litiho lakwe laha mahlweni ka tapa ya Arke hi tlhelo ga mutsuwuka-gambo, a tlhela a doneketela a nkhata wo kari hi litiho lakwe 7 wa makhati mahlweni ka tapa.+

15 “Hi kulandzela, i ta daya a mhongo ya munyikelo wa ciwonho, leyi yi lumbako vanhu,+ a nghena ni nkhata wa kona lomu ndzeni ka kortina,+ a maha hi nkhata+ lowo zvalezvi a nga maha hi nkhata wa dhuna ga homu; i ta n’watsekela a nkhata lowo tlhelweni ga tapa ni mahlweni ka tapa.

16 “I fanele ku maha muphahlo wa ku kombela ku tsetselelwa zviwonho a mahela wutshamu go basa hi kota ya mitiro yi nga hlazvekangiko ya vaIzrayeli, ni zvihambuko zvabye, ni zviwonho zvabye.+ Hi zvalezvo a faneleko ku mahela tenda ga mutlhangano legi gi tshamako cikari kabye, cikari ka mitiro yabye ya kungahlazveki.

17 “A ku na mun’wani munhu a faneleko kuva lomu tendeni ga mutlhangano hi cikhati leci a yako a ya maha muphahlo wa ku kombela ku tsetselelwa zviwonho lomu wutshan’wini go basa, kala a huma. I ta ti mahela muphahlo wa ku kombela ku tsetselelwa zviwonho zvakwe, ni zva va ngango wakwe,+ ni zva bandla gontlhe ga ka Izrayeli.+

18 “Andzhako ka lezvo, i ta huma aya alatini+ legi gi nga mahlweni ka Jehovha, a ya gi mahela muphahlo wa ku kombela ku tsetselelwa zviwonho. I ta tota nkhata wo kari wa dhuna ga homu ni nkhata wo kari wa mhongo lomu ka matlhelo wontlhe ya timhondzo ta alati. 19 I ta tlhela a gi doneketela nkhata wo kari hi litiho lakwe 7 wa makhati, a gi hlazva ni ku gi basisa ka mitiro ya kungahlazveki ya vaIzrayeli.

20 “Loku a mbhetile ku maha muphahlo wa ku kombela ku tsetselelwa zviwonho+ wa ku mahela a wutshamu go basa, ni tenda ga mutlhangano, ni alati,+ i ta tlhela a nyikela a mhongo leyi yo hanya.+ 21 Aroni i ta tlhateka mandla yakwe laha hlokweni ya mhongo leyi yo hanya, a wulela zvihoxo zvontlhe zva vaIzrayeli, ni zvihambuko zvabye zvontlhe ni zviwonho zvabye zvontlhe. I ta zvi veka hlokweni ya mhongo+ a gumesa a yi rumela ciwuleni hi canja ga munhu a yimiselweko lezvo.* 22 A mhongo yi ta rwala a zvihoxo zvabye zvontlhe+ yi famba nazvo wutshan’wini go kala vaaki.+ A munhu loye i taya a ya tsika mhongo leyo lomu ciwuleni.+

23 “Andzhako ka lezvo, Aroni i ta nghena lomu tendeni ga mutlhangano a tlhatlha a tinguwo ta wukene* leti a nga boha a cikhati leci a nga nghena lomu wutshan’wini go basa, a ti tsika kwalomo. 24 I fanele ku hlamba hi mati+ lomu wutshan’wini go basa a gumesa a boha tinguwo takwe.+ Hi kulandzela, i ta huma lahandle a ta nyikela a munyikelo wakwe wa kuhiswa+ ni munyikelo wa kuhiswa wa vanhu,+ a maha muphahlo wa ku kombela ku tsetselelwa zviwonho zvakwe ni zva vanhu.+ 25 I ta hisa a mafura ya munyikelo wa ciwonho laha alatini.

26 “A munhu loyi a nga famba ni mhongo ya Azazeli+ i fanele ku hlazva tinguwo takwe a tlhela a hlamba hi mati; andzhako ka lezvo, hi kona a to nghena lomu wugovelweni.

27 “A dhuna ga homu ya munyikelo wa ciwonho ni mhongo ya munyikelo wa ciwonho, lezvi a nkhata wa kona wu nga nehiwa lomu wutshan’wini go basa kasi ku maha muphahlo wa ku kombela ku tsetselelwa zviwonho, zvi ta tekiwa zvi yisiwa le handle ka wugovelo; a mabhebhe ya zvona, ni nyama ya zvona, ni swanyi wa zvona, zvi ta hisiwa hi ndzilo.+ 28 Loyi a to zvi hisa i fanele ku hlazva tinguwo takwe a tlhela a hlamba hi mati; andzhako ka lezvo, hi kona a to nghena lomu wugovelweni.

29 “Leci ci tava cileletelo ca n’wina ca kala kupindzuka: Ka hweti ya wu 7, hi siku ga wu 10 ga hweti, mu fanele ku ti xanisa,* niku a mu faneli ku tira nchumu,+ kani muIzrayeli kutani muluveli loyi a hanyako cikari ka n’wina. 30 Ka siku lego, mu ta mahelwa a muphahlo wa ku kombela ku tsetselelwa zviwonho+ kasi mu byeliwa lezvaku mu hlazvekile. Mu tava mu hlazvekile ka zviwonho zva n’wina zvontlhe mahlweni ka Jehovha.+ 31 Ka n’wina, lego i sabhadho ga kuhumula ko mbhelela niku mu fanele ku ti xanisa.*+ Leci cileletelo ca kala kupindzuka.

32 “A mupristi loyi a to totiwa+ a tlhela a yimisiwa* kota mupristi+ cikhundleni ca papayi wakwe+ i ta maha muphahlo wa ku kombela ku tsetselelwa zviwonho a gumesa a boha tinguwo ta wukene,*+ ti nga tinguwo to basa.+ 33 I ta maha muphahlo wa ku kombela ku tsetselelwa zviwonho a mahela wutshamu go basa,+ ni tenda ga mutlhangano+ ni alati.+ I ta maha muphahlo wa ku kombela ku tsetselelwa zviwonho zva vapristi ni zva bandla gontlhe.+ 34 Leci ci tava cileletelo ca n’wina ca kala kupindzuka,+ kasi ku mahiwa a muphahlo wa ku kombela ku tsetselelwa zviwonho zva vaIzrayeli, khati gin’we lembe ni lembe,+ hi kota ya zviwonho zvabye zvontlhe.”

Hikwalaho, i no maha kota lezvi Jehovha a nga leletele Mosi.

17 Jehovha i no engeta a byela Mosi, aku: 2 “Byela Aroni, ni vana vakwe ni vaIzrayeli vontlhe, uku: ‘Jehovha i ndzi leletele lezvi:

3 “‘“Loku a munhu wo kari wa yindlu ya ka Izrayeli a daya a dhuna ga homu, kutani yivhana ya matsune, kutani mbuti lomu wugovelweni kutani loku a yi dayela le handle ka wugovelo, 4 wutshan’wini ga ku yi neha laha nyangweni ya tenda ga mutlhangano kasi ku ta yi nyikela kota munyikelo ka Jehovha mahlweni ka tabhernakeli ga Jehovha, i tava ni nandzu wa nkhata. A munhu loye i halatile nkhata niku i fanele ku tsemiwa,* cikari ka vanhu vakwe. 5 Lezvi zvi mahela ku a miphahlo leyi zvezvi a vaIzrayeli va yi mahako laha libalangeni, va yi neha ka Jehovha, va ta nyika a mupristi laha nyangweni ya tenda ga mutlhangano. Va fanele ku yi nyikela ka Jehovha kota miphahlo ya kuhlengela.+ 6 A mupristi i ta n’watsekela a nkhata wa kona laha alatini ga Jehovha legi gi nga laha nyangweni ya tenda ga mutlhangano a tlhela a hisa mafura ya kona kota masema yo nuhela ma tsakisako Jehovha.+ 7 Hikwalaho, a va ha faneli ku maha miphahlo va mahela a madhimoni yo fana ni timbuti*+ lawa va mahako nawo wubhayi.+ Leci ci tava cileletelo ca kala kupindzuka zvizukulwaneni zva n’wina zvontlhe.”’

8 “U fanele ku va byela lezvi: ‘Ni wihi munhu wa yindlu ya ka Izrayeli kutani ni wihi muluveli loyi a hanyako cikari ka n’wina loyi a nyikelako munyikelo wa kuhiswa kutani muphahlo 9 kanilezvi a ngati nawo laha nyangweni ya tenda ga mutlhangano a ta wu nyikela ka Jehovha, i fanele ku tsemiwa,* cikari ka vanhu vakwe.+

10 “‘Loku a munhu wo kari wa yindlu ya ka Izrayeli kutani ni wihi muluveli loyi a hanyako cikari ka n’wina aga ni wihi nkhata,+ a nghohe ya mina yi ta vhukela a munhu* loye a gako nkhata niku ndzi ta mu tsema* cikari ka vanhu vakwe. 11 Hakuva a wutomi* ga zvivangwa gi lomu nkhateni+ lowu ndzi mu nyikileko kasi mu ti mahela hi wona a muphahlo wa ku kombela ku tsetselelwa zviwonho laha alatini,+ hakuva a nkhata hi wona wu mahako a muphahlo wa ku kombela ku tsetselelwa zviwonho+ hi kota ya wutomi* legi gi nga ka wona. 12 Hi caleco ci ndzi mahileko ndzi byela a vaIzrayeli, ndziku: “I hava* ni mun’we wa n’wina hambu ni muluveli mun’we a hanyako cikari ka n’wina+ a faneleko kuga nkhata.”+

13 “‘Loku a muIzrayeli wo kari kutani muluveli wo kari a hanyako cikari ka n’wina, a hi lomu kuhloteni, a kuma cihari ca khwati kutani cinyanyani ci giwako, i fanele ku halata a nkhata wa kona+ a tlhela a wu setela hi misava. 14 Hakuva a wutomi* ga zvontlhe zvivangwa i nkhata wa kona; a wutomi* gi lomu ka nkhata. Hikwalaho, ndzi byelile vaIzrayeli, ndziku: “Mu ngagi nkhata wa ni cihi civangwa, hakuva a wutomi* ga zvontlhe zvivangwa i nkhata wa kona. Ni wihi loyi a gako nkhata, i ta tsemiwa.”*+ 15 Loku a munhu* wo kari, ku ngava muIzrayeli wa mabeleko kutani muluveli, aga a cihari ci kumilweko na ci file kutani ci delweko hi civandza,+ i fanele ku hlazva a tinguwo takwe a tlhela a hlamba hi mati niku i tava a nga hlazvekangi kala ni gambo,+ hi kona a to hlazveka. 16 Kanilezvi loku a nga hlazvi tinguwo takwe ni loku a nga hlambi, i ta rwala nandzu wakwe.’”+

18 Jehovha i no engeta a byela Mosi, aku: 2 “Byela a vaIzrayeli, uku: ‘Hi mina Jehovha, a Nungungulu wa n’wina.+ 3 Mu nga pimanyisi a mahanyela ya le tikweni ga Gibhite, lomu mu nga hanya kona, hambu ku maha lezvi va mahako le tikweni ga Khanani, lomu ndzi mu yisako kona.+ Mu nga landzeli zvileletelo zvabye. 4 Mu fanele ku ingisa zviboho zva mina zva kulamula, mu tlhela mu hlayisa milayo ya mina mu famba hi yona.+ Hi mina Jehovha, a Nungungulu wa n’wina. 5 Mu fanele ku hlayisa milayo ya mina ni zviboho zva mina zva kulamula; ni wihi loyi a mahako lezvi, i ta hanya hi kota ya zvona.+ Hi mina Jehovha.

6 “‘I hava cikari ka n’wina a faneleko ku tshinelela xaka gakwe ga laha kusuhani kasi ku hlengela nago masango.*+ Hi mina Jehovha. 7 U nga hlengeli masango ni papayi wa wena hambu ku hlengela masango ni mamani wa wena. Yena i mamani wa wena, hikwalaho u nga hlengeli naye masango.

8 “‘U nga hlengeli masango ni sati wa papayi wa wena.+ Lezvo ku mu wisa tingana a papayi wa wena.*

9 “‘U nga hlengeli masango ni makabye wa wena wa cisati, kani i nhanyana wa papayi wa wena kutani i nhanyana wa mamani wa wena; a ngava a pswalilwe kwalaha kaya kutani le handle.+

10 “‘U nga hlengeli masango ni nhanyana wa mufana wa wena kutani ni nhanyana wa nhanyana wa wena, hakuva vona wumbyiri ga wena.

11 “‘U nga hlengeli masango ni nhanyana wa sati wa papayi wa wena, a nga n’wana wa papayi wa wena, hakuva makabye wa wena wa cisati.

12 “‘U nga hlengeli masango ni makabye wa cisati wa papayi wa wena, hakuva i nkhata wun’we ni papayi wa wena.+

13 “‘U nga hlengeli masango ni makabye wa cisati wa mamani wa wena, hakuva i nkhata wun’we ni mamani wa wena.

14 “‘U nga mu wisi tingana a makabye wa cinuna* wa papayi wa wena hi ku hlengela masango ni sati wakwe, hakuva i tiyani wa wena.+

15 “‘U nga hlengeli masango ni katamwane wa wena.+ Yena i sati wa mufana wa wena, hikwalaho u nga hlengeli naye masango.

16 “‘U nga hlengeli masango ni sati wa makabye wa wena,+ hakuva lezvo ku mu wisa tingana a makabye wa wena.*

17 “‘U nga hlengeli masango ni mamani ni nhanyana wakwe.+ U nga teki a nhanyana wo pswaliwa hi mufana wa wasati loye kutani nhanyana wo pswaliwa hi nhanyana wakwe kasi ku hlengela naye masango. Lawo maxaka yakwe; leyo i hlamba yo tshisa.*

18 “‘U nga teki a makabye wa sati wa wena a maha katakuloni wakwe,+ u hlengela naye masango kuveni a sati wa wena wa ha hanya.

19 “‘U nga tshineli ka wasati na a nga hlazvekangi hi kota ya ku wona masiku yakwe kasi u hlengela naye masango.+

20 “‘U nga ti nyenyezisi hi ku hlengela masango ni sati wa wanuna-kuloni.*+

21 “‘U nga vhumeli ne a n’wana mun’we wa wena a nyikelwa* ka Moloki.+ U nga nyenyezisi a vito ga Nungungulu wa wena hi ndlela leyo.+ Hi mina Jehovha.

22 “‘U nga etleli ni wanuna-kuloni a ku khwatsi hi loku u etlela ni wasati.+ Lowo i nchumu wo nyenyeza.

23 “‘A wanuna a nga ti nyenyezisi hi ku hlengela masango ni cihari hambu wasati a nga ti nyikeli ka cihari kasi ku hlengela naco masango.+ Lezvo ku hambunyeta a ntumbuluko.

24 “‘Mu nga ti nyenyezisi hi cin’we ca zvilo lezvi hakuva a matiko lawa ndzi ma hlongolileko mahlweni ka n’wina ma ti nyenyezisile hi zvilo lezvi zvontlhe.+ 25 Hikwalaho, a tiko a gi hlazvekangi; ndzi ta neha tsayiselelo hehla ka gona hi kota ya zvigoho zva gona niku gi ta hlata lava va hanyako ka gona.+ 26 Kanilezvi n’wina mu fanele ku hlayisa milayo ya mina ni zviboho zva mina zva kulamula.+ Mu nga mahi ni cin’we ca zvilo lezvi zvo nyenyeza, kani muIzrayeli wa mabeleko kutani muluveli loyi a hanyako cikari ka n’wina.+ 27 Hakuva zvontlhe a zvilo lezvi zvo nyenyeza zvi mahilwe hi vanhu lava va nga ranga hi vona va hanya tikweni legi.+ Hikwalaho, a tiko a gi hlazvekangi. 28 Makunu n’wina, a tiko gi nga taza gi mu hlata hi kuva mu gi nyenyezisile, a ku fana ni lezvi gi nga hlata a matiko lawa ma nga hanya ka gona. 29 Loku a wokari a maha cin’we ca zvilo lezvi zvo nyenyeza, vontlhe lava va zvi mahako va fanele ku tsemiwa* cikari ka vanhu vabye. 30 Mu fanele ku hlayisa milayo ya mina; mu nga mahi ni wihi mukhuwo wo nyenyeza wa leyi yi nga kari yi mahiwa na mu nga se chikela,+ kasi mu nga ti nyenyezisi hi yona. Hi mina Jehovha, a Nungungulu wa n’wina.’”

19 Jehovha i no engeta a byela Mosi, aku: 2 “Byela a hlengeletano yontlhe ya ka Izrayeli, uku: ‘Basani, hakuva mina Jehovha, a Nungungulu wa n’wina, ndzi basile.+

3 “‘A mun’we ni mun’wani wa n’wina i fanele kuva ni cichavo hi* mamani wakwe ni papayi wakwe+ niku mu fanele ku hlayisa a masabhadho ya mina.+ Hi mina Jehovha, a Nungungulu wa n’wina. 4 Mu nga khozeli vanungungulu va nga vhuniko nchumu+ kutani ku ti mahela vanungungulu va nyekisilweko.+ Hi mina Jehovha, a Nungungulu wa n’wina.

5 “‘Makunu loku mu mahela Jehovha a muphahlo wa kuhlengela,+ wu maheni hi ndlela leyi yi faneleko kasi mu amukelwa.+ 6 A muphahlo wu fanele ku giwa ka siku galegi wu mahiwako hi gona ni ka siku gi landzelako, kanilezvi lezvi zvi to sala kala ka siku ga wunharu zvi fanele ku hisiwa hi ndzilo.+ 7 Kanilezvi, ni cihi ca muphahlo ci to giwa hi siku ga wunharu, ci tava nchumu wo nyenyeza wu to kala ku amukelwa. 8 Loyi a toga i ta rwala a nandzu wa kona, hakuva i chakisile a nchumu wo basa wa Jehovha. A munhu* loye i fanele ku tsemiwa* cikari ka vanhu vakwe.

9 “‘Loku u tshovela lomu tikweni ga n’wina, u nga tshoveli kala le magumo ya simu ga wena ne u nga kutsuli lezvi zvi salako a cikhati leci u tshovelako.+ 10 Ahandle ka lezvo, u nga khayi lezvi zvi to sala civhineni* ca wena kutani ku rolela mauvha lawa ma mbambameleko civhineni ca wena. Zvi siyele cisiwana+ ni muluveli. Hi mina Jehovha, a Nungungulu wa n’wina.

11 “‘Mu nga yivi,+ mu nga kalaveli,+ mu nga kanganyisani. 12 Mu nga hlambanyi mawunwa hi vito ga mina,+ hi ku maha lezvo mu chakisa a vito ga Nungungulu wa n’wina. Hi mina Jehovha. 13 U nga teki zva muakelani hi mano,+ ne u nga yivi.+ U nga tshami wusiku gontlhe ni muholo wa mutiri a tholilweko kala ni mixo.+

14 “‘U nga rukateli ciwiri kutani ku veka cikhunguvanyiso mahlweni ka cikhumu,+ kanilezvi chava a Nungungulu wa wena.+ Hi mina Jehovha.

15 “‘Mu nga hambunyeti nongameto kulamuleni ka n’wina. U nga yimeleli cisiwana hi lezvi ntsena ci nga cisiwana kutani ku sekela loyi wo ganya.+ U fanele ku lamula a muakelani wa wena hi nongameto.

16 “‘U nga fambi u xwanya mahlevo cikari ka vanhu va wena.+ U nga mahi kustumunyu wa ku dayisa a munhu-kuloni.*+ Hi mina Jehovha.

17 “‘U nga vengi a makabye wa wena mbilwini ya wena.+ U nga tsiki ku kawuka a munhu-kuloni+ kasi u nga hlengeli naye a ciwonho cakwe.

18 “‘U nga ti photeli+ hambu ku va vekela civiti a vanhu va ka n’wina. Randza munhu-kuloni a ku fana ni lezvi u ti randzisako zvona.+ Hi mina Jehovha.

19 “‘Mu fanele ku hlayisa milayo ya mina: U nga tlhanganisi a matsune ni kati wa zvifuyo zva wena zva tixaka to hambana; u nga byali simu ga wena hi timbewu ta tixaka timbiri;+ u nga bohi nguwo yo mahiwa hi tihindza ta tixaka timbiri to hambana.+

20 “‘Loku a wanuna a hlengela masango ni wasati a nga citiri ci tsumbisilweko kuva sati wa mun’wani wanuna kanilezvi na ci nga se tlhatlhiswa kutani ku nyikwa kutlhatlheka, va fanele ku tsayisiwa. Hambulezvo, va nga dawi hakuva loyi wa wasati i wa nga se tlhatlheka. 21 Loyi wa wanuna i fanele ku neha a munyikelo wakwe wa nandzu ka Jehovha laha nyangweni ya tenda ga mutlhangano, yi nga yivhu ya matsune ya munyikelo wa nandzu.+ 22 A mupristi i ta mu mahela muphahlo wa ku kombela ku tsetselelwa zviwonho mahlweni ka Jehovha hi yivhu ya matsune ya munyikelo wa nandzu hi kota ya ciwonho leci a mahileko niku i ta tsetselelwa a ciwonho leci a mahileko.

23 “‘A cikhati leci mu to nghena tikweni, mu byala ni yihi sinya ya mihandzu, mu fanele ku wona mihandzu ya kona kota yi nga hlazvekangiko ni yo betelwa. Hi malembe manharu, a mihandzu leyo yi ta betelwa* ka n’wina. Mu nga yigi. 24 Kanilezvi hi lembe ga wumune, yontlhe a mihandzu ya kona yi tava leyi yi basileko niku ci tava cikhati ca kutsaka mahlweni ka Jehovha.+ 25 Hi lembe ga wutlhanu, mu ngaga a mihandzu ya kona kasi mu engetela a pfuno wa kona ka lezvi mu to tshovela. Hi mina Jehovha, a Nungungulu wa n’wina.

26 “‘Mu ngagi ni wihi nchumu wu nga ni nkhata.+

“‘Mu nga hlahluvi hambu ku maha masalamuso.+

27 “‘Mu nga haluli* a misisi ya lomu matlhelweni ya tihloko ta n’wina hambu ku hungulela a malevhu ya n’wina ma sala na ma swarile.+

28 “‘Mu nga ti tsemeleli lomu mirini wa n’wina hi kota ya munhu a fileko,*+ ne mu nga ti mahi matatuaji* mirini wa n’wina. Hi mina Jehovha.

29 “‘U nga nyenyezisi a nhanyana wa wena hi ku mu maha cibhayi+ kasi a tiko gi nga mahi wubhayi, gi tala hi mahanyela yo biha.+

30 “‘Mu fanele ku hlayisa a masabhadho ya mina+ mu tlhela muva ni cichavo hi* wutshamu ga mina go basa. Hi mina Jehovha.

31 “‘Mu ngayi tin’angeni+ ni ka vavhumbi,+ mu ti nyenyezisa hi vona. Hi mina Jehovha, a Nungungulu wa n’wina.

32 “‘U ta suka u yima mahlweni ka munhu wa wuvhu,+ uva ni cichavo ka munhu wa hombe,+ u chava a Nungungulu wa wena.+ Hi mina Jehovha.

33 “‘Loku mu hanya ni muluveli tikweni ga n’wina, mu nga mu xanisi.+ 34 A muluveli loyi a hanyako na n’wina mu woniseni ku khwatsi munhu a pswalilweko cikari ka n’wina;+ mu fanele ku mu randza a ku fana ni lezvi mu ti randzisako zvona, hakuva n’winawu mu wa hi valuveli tikweni ga Gibhite.+ Hi mina Jehovha, a Nungungulu wa n’wina.

35 “‘Mu nga tirisi tipimo to kanganyisa ta ku pima a kuleha, ni kubindza ni ta ku pima a kutala ka zvilo.+ 36 Mu fanele ku tirisa zvikalo zvi nga kalaveliko, ni tipimo ta lisine ta ku pima a kubindza, ni ta ku pima zvilo zvo woma,* ni ta ku pima zvilo zvo hluluka.*+ Hi mina Jehovha, a Nungungulu wa n’wina, loyi a mu humesileko tikweni ga Gibhite. 37 Hikwalaho, mu fanele ku hlayisa yontlhe milayo ya mina ni zvontlhe zviboho zva mina zva kulamula mu tlhela mu zvi landzela.+ Hi mina Jehovha.’”

20 Jehovha i no engeta a byela Mosi, aku: 2 “Byela a vaIzrayeli, uku: ‘Ni wihi a muIzrayeli kutani muluveli a hanyako lomu Izrayeli loyi a nyikelako ni wihi n’wana wakwe ka Moloki i wa dawe.+ A vanhu va lomu tikweni va fanele ku mu gandla hi maribye kala afa. 3 A nghohe ya mina yi ta vhukela a munhu loye ndzi mu tsema* cikari ka vanhu vakwe, hakuva i nyikele a n’wana wakwe ka Moloki niku i bihisile a wutshamu ga mina go basa+ a tlhela a nyenyezisa a vito ga mina go basa. 4 Loku a vanhu va lomu tikweni va ti vhala mahlo ha womu ka lezvi zvi mahiwako hi munhu loye, laha a nyikelako a n’wana wakwe ka Moloki, va nga mu dayi,+ 5 mina ha ndzoce ndzi ta vhukela* a munhu loye ni ngango wakwe.+ Ndzi ta tsema* a munhu loye cikari ka vanhu vakwe zvin’we ni vontlhe lava va ti patsako naye ka ku maha wubhayi na Moloki.

6 “‘A munhu* loyi a yako tin’angeni+ ni ka vavhumbi+ kasi a ya maha navo wubhayi ga moya, hakunene ndzi ta vhukela munhu* loye ndzi mu tsema* cikari ka vanhu vakwe.+

7 “‘Ti basiseni, mu basa+ hakuva hi mina Jehovha, a Nungungulu wa n’wina. 8 Mu fanele ku hlayisa a milayo ya mina, mu yi maha.+ Hi mina Jehovha loyi a mu basisako.+

9 “‘Loku a munhu a rukatela* papayi wakwe kutani mamani wakwe i fanele ku dawa.+ Kota lezvi a rukateleko a papayi wakwe kutani mamani wakwe, a nkhata wakwe wu tava hehla kakwe.

10 “‘Makunu xungetano hi wanuna loyi a mahako wubhayi ni sati wa mun’wani wanuna, ina, loyi a mahako wubhayi ni sati wa muakelani wakwe, i fanele ku dawa, yena ni loyi wa wasati.+ 11 A wanuna loyi a etlelako ni sati wa papayi wakwe i mu wisa tingana a papayi wakwe.*+ Hi wumbiri gabye va fanele ku dawa. A nkhata wabye wu tava hehla kabye. 12 Loku a wanuna a etlela ni katamwane wakwe, hi wumbiri gabye va fanele ku dawa. Vona va hambunyetile ntumbuluko. A nkhata wabye wu tava hehla kabye.+

13 “‘Loku a wanuna a etlela ni wanuna-kuloni a ku khwatsi hi loku a etlela ni wasati, hi wumbiri gabye va mahile zvilo zvo nyenyeza.+ Va fanele ku dawa. A nkhata wabye wu tava hehla kabye.

14 “‘Loku a wanuna a teka a nhanyana ni mamani wa kona, leyo i hlamba yo tshisa.*+ Hi wunharu gabye va fanele ku hisiwa ndzilweni+ kasi a mahanyela lawo ya tingana ma nga simami cikari ka n’wina.

15 “‘Loku a wanuna a hlengela masango ni cihari, i fanele ku dawa, niku mu fanele ku daya cihari leco.+ 16 Loku a wasati a tshinelela cihari kasi ku hlengela naco masango,+ dayani a wasati loye ni cihari ca kona. Va fanele ku dawa futsi. A nkhata wabye wu tava hehla kabye.

17 “‘Loku a wanuna a hlengela masango ni makabye wakwe wa cisati, kani i nhanyana wa papayi wakwe kutani i nhanyana wa mamani wakwe, a mun’we ni mun’wani wabye a wona wumbyiri ga mun’wani, lezvo tingana.+ Va fanele ku dawa* na va woniwa hi vanhu va tiko gabye. A wanuna loye i funungulile a wumbyiri ga makabye wakwe wa cisati. I ta rwala nandzu wa kona.

18 “‘Loku a wanuna a etlela ni wasati a nga lomu ka ku wona masiku yakwe, a hlengela masango naye, loyi wa wanuna ni loyi wa wasati va funungulile a kuhuma ka nkhata wakwe.+ Hi wumbiri gabye va fanele ku tsemiwa* cikari ka vanhu vabye.

19 “‘U nga hlengeli masango ni makabye wa cisati wa mamani wa wena kutani ni makabye wa cisati wa papayi wa wena, hakuva lezvo zvi wa tava ku gi wisa tingana a xaka ga wena.+ Lava va mahako lezvo va ta rwala a nandzu wa kona. 20 A wanuna loyi a etlelako ni sati wa tio wakwe i funungulile a wumbyiri ga tio wakwe.+ Va ta rwala a nandzu wa kona. Va tafa na va nga hi na vana. 21 Loku a wanuna a teka sati wa makabye wakwe, lowo i nchumu wo hlamukisa.+ I funungulile a wumbyiri ga makabye wakwe wa cinuna. Va tafa na va nga hi na vana.

22 “‘Mu fanele ku hlayisa yontlhe a milayo ya mina ni zvontlhe a zviboho zva mina zva kulamula+ mu zvi maha,+ kasi a tiko legi ndzi mu yisako mu ya aka ka gona gi nga mu hlati.+ 23 Mu nga landzeli a milayo ya matiko lawa ndzi ma hlongolileko mahlweni ka n’wina,+ hakuva ma mahile zvilo lezvi zvontlhe niku zva ndzi hlamukisa.+ 24 Hi cigelo leco, ndzi te ngalo ka n’wina: “Mu ta fumela tiko gabye, niku ndzi ta mu nyika giva tshomba ya n’wina, a tiko legi gi khulungako a masi ni wulombe.+ Hi mina Jehovha, a Nungungulu wa n’wina, loyi a mu hlawulileko cikari ka matiko.”+ 25 Mu fanele ku veka kuhambana cikari ka cihari co hlazveka ni ci nga hlazvekangiko, ni cikari ka cinyanyani ci nga hlazvekangiko ni leci co hlazveka.+ Mu nga ti nyenyezisi* hi cihari ne hambu hi cinyanyani kutani hi ni cihi cihari co famba hi khwiri laha misaveni leci ndzi ngaku mu fanele ku ci wona kota ci nga hlazvekangiko.+ 26 Basani mahlweni ka mina, hakuva mina Jehovha, ndzi basile+ niku ndzi mu hambanisile ni matiko kasi muva vanhu va mina.+

27 “‘Ni wihi wanuna kutani wasati a ti mahako n’anga kutani muvhumbi i fanele ku dawa.+ A vanhu va fanele ku va gandla hi maribye kala vafa. A nkhata wabye wu tava hehla kabye.’”

21 Jehovha i no engeta a byela Mosi, aku: “Byela a vapristi, a vana va Aroni, uku: ‘A mupristi a nga ti nyenyezisi hi munhu* a fileko cikari ka vanhu vakwe.+ 2 Kanilezvi a nga maha lezvo hi xaka gakwe ga laha kusuhani, ku ngava mamani wakwe, papayi wakwe, mufana wakwe, nhanyana wakwe kutani makabye wakwe wa cinuna. 3 A nga ti nyenyezisa hi makabye wakwe wa cisati loku a hi nhwana,* na a tshama kusuhani naye, lezvo na a nga se chadha. 4 A nga ti nyenyezisi, a ti chakisa hi cirumbi ca sati wa wanuna a lumbako vanhu vakwe. 5 Va nga haluli a tihloko tabye+ kutani ku tsema malevhu yabye ya lomu matlhelweni hambu ku ti tsemelela lomu mirini wabye.+ 6 Va fanele ku basa mahlweni ka Nungungulu wabye;+ va nga chakisi a vito ga Nungungulu wabye,+ hakuva hi vona va nyikelako a minyikelo yi mahelwako Jehovha ya ku hisiwa hi ndzilo, yi nga pawa* ya Nungungulu wabye; hikwalaho, va fanele ku basa.+ 7 Va nga chadhi ni cibhayi+ hambu ni wasati a nyenyezisilweko kutani ni wasati a tlhatlhileko wukati* ni nuna wakwe,+ hakuva a mupristi i basile ka Nungungulu wakwe. 8 Mu basiseni+ hakuva hi yena a nyikelako a pawa ya Nungungulu wa n’wina. I fanele ku basa ka n’wina, hakuva mina Jehovha, loyi a mu basisako, ndzi basile.+

9 “‘Makunu loku a nhanyana wa mupristi a ti nyenyezisa hi ku maha wubhayi, i nyenyezisa a papayi wakwe. I ta hisiwa ndzilweni.+

10 “‘Loyi a nga mupristi wa hombe cikari ka vamakabye vakwe, loyi a totilweko a mafura ya ku tota hlokweni yakwe+ a tlhela a yimisiwa* kasi a boha a tinguwo ta wupristi,+ a nga tsiki ku hlayisa hloko yakwe ne a nga handzuli tinguwo takwe.+ 11 A nga tshuki a tshinela ka munhu a fileko.*+ A nga ti nyenyezisi hambu kova hi papayi wakwe kutani mamani wakwe. 12 A nga humi lomu wutshan’wini go basa ne a nga nyenyezisi a wutshamu go basa ga Nungungulu wakwe,+ hakuva a cikombiso ca kutinyikela, ma nga mafura ya ku tota ya Nungungulu wakwe,+ ci hehla kakwe. Hi mina Jehovha.

13 “‘Loku a teka sati, i wa teke nhwana.*+ 14 A nga chadhi ni noni,* ne ni wasati a tlhatlhileko wukati* ni nuna wakwe, kutani a nyenyezisilweko, ne cibhayi; kanilezvi i wa teke a nhwana* cikari ka vanhu vakwe ava sati wakwe. 15 A nga nyenyezisi a pswalo* wakwe cikari ka vanhu vakwe,+ hakuva hi mina Jehovha, loyi a mu basisako.’”

16 Jehovha i no engeta a byela Mosi, aku: 17 “Byela Aroni, uku: ‘Ni wihi munhu wa pswalo* wa wena zvizukulwaneni zvontlhe loyi a nga ni wulima go kari a nga tshineli kasi ku nyikela pawa ya Nungungulu wakwe. 18 Loku ku hi ni munhu wo kari a nga ni wulima, a nga tshineli: Kani cikhumu, kutani cilima, kutani munhu a nga ni nghohe yo byekela, kutani a nga ni ciro cin’we co leha nguvhu, 19 kutani a bayisilweko* nkondzo kutani canja, 20 kutani a nga ni lundza, kutani wo koma nguvhu,* kutani a nga ni tihlo gi nga ni wulima, kutani a tlhukurelweko, kutani a nga ni mababyi ya hlonge,* kutani a fayilweko a zviro zvakwe zva wununa.+ 21 Ni wihi munhu wa pswalo* wa mupristi Aroni a nga ni wulima a nga tshineli kasi ku nyikela minyikelo yi mahelwako Jehovha ya ku hisiwa hi ndzilo. Kota lezvi a nga ni wulima, a nga tshineli kasi ku nyikela a pawa ya Nungungulu wakwe. 22 A ngaga a pawa ya Nungungulu wakwe ya kuta hi ka zvilo zvo basabasa+ ni ka zvilo zvo basa.+ 23 Kanilezvi a ngati kusuhani ni kortina+ hambu ku tshinela laha ka alati,+ hakuva i na ni wulima; a nga faneli ku nyenyezisa a wutshamu ga mina go basa,+ hakuva hi mina Jehovha, loyi a va basisako.’”+

24 Hikwalaho, Mosi i no byela Aroni, ni vana vakwe ni vontlhe a vaIzrayeli a timhaka leti.

22 Jehovha i no engeta a byela Mosi, aku: 2 “Byela Aroni ni vana vakwe lezvaku va fanele ku ti wonela ka lezvi va zvi tirisisako zvona a* zvilo zvo basa zva vaIzrayeli niku va nga nyenyezisi a vito ga mina go basa+ hi kota ya zvilo lezvi va ndzi basiselako.+ Hi mina Jehovha. 3 Va byele lezvi: ‘Ni wihi munhu wa pswalo wa n’wina, zvizukulwaneni zva n’wina zvontlhe, a tshinelako ka zvilo zvo basa lezvi a vaIzrayeli va zvi basiselako Jehovha, na a nga hlazvekangi, a munhu* loye i ta tsemiwa* mahlweni ka mina.+ Hi mina Jehovha. 4 Ni wihi munhu wa pswalo wa Aroni loyi a nga ni hlokonho+ kutani a humako a wubovhu+ a ngagi a zvilo zvo basa kala a hlazveka+ — ne wanuna a henyileko a munhu a nga hlazvekangiko hi kota ya munhu* a fileko,+ kutani wanuna a humako a mbewu ya wununa,+ 5 kutani wanuna a henyileko zviharana zvi makanyako zvi nga hlazvekangiko,+ kutani loyi a henyileko a munhu a nga hlazvekangiko hi ni cihi cigelo, loyi a nga mu mahako a nga hlazveki.+ 6 A munhu* loyi a henyileko a cin’we ca zvilo lezvi i tava a nga hlazvekangi kala ni gambo; a ngagi ne cin’we ca zvilo zvo basa kanilezvi i fanele ku hlamba hi mati.+ 7 Loku a gambo gi pela i tava a hlazvekile. Andzhako ka lezvo, a ngaga a zvilo zvo basa hakuva i zvakuga zvakwe.+ 8 Ahandle ka lezvo, a ngagi cihari ci fileko hi coce kutani ci delweko hi zvihari zva khwati, a ti nyenyezisa hi cona.+ Hi mina Jehovha.

9 “‘Va fanele ku hlayisa milayo ya mina kasi va nga weli ciwonhweni hi ku tsika ku yi hlayisa, vafa hi kota ya lezvo, hakuva va nyenyezisile a zvilo zvo basa. Hi mina Jehovha, loyi a va basisako.

10 “‘A ku na munhu a nga vhumelelwiko* a faneleko kuga a zvilo zvo basa.+ A ku na mupfhumba wa mupristi a tako hi ka gin’wani tiko ne mutiri a tholilweko a faneleko kuga zvilo zvo basa. 11 Kanilezvi loku a mupristi a xava munhu* wo kari hi mali yakwe, a munhu loye a ngaga a zvilo zvo basa. A tikhumbi leti ti pswalilweko ngangweni wakwe tonawu ti ngaga a zvakuga zvakwe.+ 12 Loku a nhanyana wa mupristi a chadha ni munhu wo kala a nga hi mupristi, a nhanyana loye a ngagi a zvilo zvo basa zva minyikelo. 13 Kanilezvi loku a nhanyana wa mupristi a maha noni* kutani a tlhatlha wukati* ni nuna wakwe, na a nga hi na vana, a gumesa a tlhela kaya ka papayi wakwe, a ku khwatsi hi wusweni gakwe, a ngaga zvakuga zva papayi wakwe;+ kanilezvi a ku na munhu a nga vhumelelwiko* a faneleko kuga.

14 “‘Makunu loku a wanuna a phazama aga a zvilo zvi basileko i ta tlhelisa zvilo lezvo ka mupristi a tlhela a engetela a cipandze ca wutlhanu ca ntsengo wa zvona.+ 15 Hikwalaho, va nga nyenyezisi a zvilo zvi basileko lezvi a vaIzrayeli va nyikelako ka Jehovha+ 16 va ti nehela a tsayiselelo hi kota ya nandzu wabye hi kuga a zvilo zvabye zvi basileko, hakuva hi mina Jehovha, loyi a va basisako.’”

17 Jehovha i no engeta a byela Mosi, aku: 18 “Byela Aroni, ni vana vakwe, ni vontlhe a vaIzrayeli, uku: ‘Loku a wanuna wa muIzrayeli kutani muluveli a hanyako lomu Izrayeli a nyikela ka Jehovha a munyikelo wa kuhiswa+ kasi ku tatisa cifungo kutani a wu nyikela kota munyikelo wa kuzvirandza,+ 19 i wa nyikele hi cifuyo ca cinene ca matsune+ ca lomu ntlhambini wa tihomu, kutani wa tiyivhana, kutani wa timbuti, kasi a amukeleka. 20 Mu nga nyikeli nchumu wu nga ni cisolo+ hakuva mu nga ta amukeleka hi wona.

21 “‘Loku a wanuna a nyikela ka Jehovha a muphahlo wa kuhlengela+ kasi ku tatisa cifungo kutani a wu nyikela kota munyikelo wa kuzvirandza, i wa nyikele hi cifuyo ca cinene, yi ngava homu, kutani mbuti, kutani yivhu, kasi a amukeleka. Zvi ngavi ni wulima ne gitsongwani. 22 Mu nga nyikeli cifuyo ca kufa matihlo, kutani co bayisiwa, kutani ci tsemilweko, kutani ci nga ni tihlungu, kutani ci nga ni cigwere, kutani ci nga ni mababyi laha ka bhebhe;* mu nga nyikeli ni cihi cifuyo ci nga ni mababyi lawo ka Jehovha kutani ku nyikela munyikelo wa tshamela lego laha alatini mu mahela Jehovha. 23 Mu nga nyikela a dhuna ga homu kutani yivhu yi nga ni ciro co leha nguvhu kutani co koma nguvhu kota munyikelo wa kuzvirandza, kanilezvi yi nga ta amukeleka kota munyikelo wa cifungo. 24 Mu ga nyikeli ka Jehovha a cifuyo ci bayisilweko a zviro zva cona zva wununa hi ku fayiwa, kutani ku manyiwa, kutani ku kokiwa zvi chupuka, kutani ku tsemiwa; mu nga nyikeli a zvifuyo zva tshamela lego lomu tikweni ga n’wina. 25 Mu nga nyikeli ni cihi cifuyo ca tshamela lego ca kuta hi ka muluveli, kota pawa ya Nungungulu wa n’wina, hakuva zvi bihisilwe niku zvi na ni wulima. Zvi nga ta amukeleka.’”

26 Jehovha i no engeta a byela Mosi, aku: 27 “Loku ku pswaliwa cihon’wana ca dhuna, kutani yivhana ya matsune, kutani cimbutana, ci ta simama ni mamani wa cona 7 wa masiku.+ Kanilezvi a kusukela ka siku ga wu 8 kuya mahlweni, ci nga amukeleka kota munyikelo, wu nga munyikelo wu hisiwako hi ndzilo wu mahelwako Jehovha. 28 U nga dayi homu kutani yivhu ni n’wana wa kona hi siku gin’we.+

29 “Loku mu nyikela a muphahlo wa kubonga ka Jehovha,+ wu nyikeleni hi ndlela ya ku mu amukeleka. 30 Wu fanele ku giwa ka siku galego. Mu nga veki nchumu kala ka mixo yi landzelako.+ Hi mina Jehovha.

31 “Mu fanele ku hlayisa a zvileletelo zva mina mu tlhela mu zvi maha.+ Hi mina Jehovha. 32 Mu nga nyenyezisi a vito ga mina,+ hakuva ndzi fanele ku basisiwa cikari ka vaIzrayeli.+ Hi mina Jehovha, loyi a mu basisako,+ 33 loyi a mu humesileko tikweni ga Gibhite kasi ava Nungungulu wa n’wina.+ Hi mina Jehovha.”

23 Jehovha i no engeta a byela Mosi, aku: 2 “Byela a vaIzrayeli, uku: ‘A mibuzo ya Jehovha ya zvikhati zvi yimisilweko+ leyi mu faneleko ku huwelela,+ migotsovanyano yo basa. A mibuzo ya mina ya zvikhati zvi yimisilweko hi leyi:

3 “‘Mu nga tira a 6 wa masiku, kanilezvi a siku ga wu 7 i sabhadho ga kuhumula ko mbhelela,+ wu nga gotsovanyano wo basa. Mu nga tiri nchumu. Gi tava sabhadho ga Jehovha ni kwihi lomu mu to tshama kona.+

4 “‘A mibuzo ya Jehovha ya zvikhati zvi yimisilweko, yi nga migotsovanyano yo basa, leyi mu faneleko ku yi huwelela hi zvikhati zvi yimiselweko yona, hi leyi: 5 Hi hweti yo sangula, ka siku ga wu 14 ga hweti,+ na gi ku pswite,* i Phasika+ gi mahelwako Jehovha.

6 “‘Hi siku ga wu 15 ga hweti leyo, Mubuzo wa Tipawa to kala Comelo wu mahelwako Jehovha.+ Mu taga tipawa to kala comelo a 7 wa masiku.+ 7 Hi siku go sangula, mu ta maha gotsovanyano wo basa.+ Mu nga tiri ntiro wo bindza. 8 Kanilezvi hi 7 wa masiku, mu ta nyikela munyikelo wu hisiwako hi ndzilo wu mahelwako Jehovha. A siku ga wu 7 gi tava ga gotsovanyano wo basa. Mu nga mahi ntiro wo bindza.’”

9 Jehovha i no engeta a byela Mosi, aku: 10 “Byela a vaIzrayeli, uku: ‘A cikhati leci mu to nghena tikweni legi ndzi mu nyikako, loku mu mbheta a kutshovela, mu ta teka a nyandza ya mihandzu yo sangula+ ya lezvi mu to tshovela mu heleketa ka mupristi.+ 11 A mupristi i ta ndziwilitela a nyandza leyo yiya phambeni ni ndzhako mahlweni ka Jehovha kasi mu amukeleka. A mupristi i ta yi ndziwilitela hi siku gi gamelako a sabhadho. 12 Ka siku legi a nyandza leyo yi ndziwilitelwako hi gona, mu ta nyikela ka Jehovha a yivhana ya matsune ya lembe gin’we kota munyikelo wa kuhiswa. 13 A munyikelo wa kona wa tindzhoho wu tava wa zvipandze zvimbiri zva wukhume zva efa* ya mapa ma sililweko khwatsi ma vhuvilweko ni mafura kota munyikelo wu hisiwako hi ndzilo wa masema yo nuhela wu mahelwako Jehovha. A munyikelo wa kona wa zvakunwa wu tava wa cipandze ca wumune ca hini* ya vhinyo. 14 Mu ngagi ni yihi pawa, kutani tindzhoho to katingiwa, kutani timbewu ta tiswa kala ka siku lego, kala mu heleketa munyikelo wa Nungungulu wa n’wina. Leci cileletelo ca kala kupindzuka zvizukulwaneni zva n’wina zvontlhe ni kwihi lomu mu to tshama kona.

15 “‘Mu ta hlaya a 7 wa masabhadho kusukela ka siku legi gi gamelako a sabhadho, kusukela ka siku legi mu to heleketa hi gona a nyandza ya munyikelo wa kundziwilitelwa.+ Mu ta hlaya a mavhiki yo enela. 16 Mu ta hlaya 50 wa masiku+ kala ka siku gi gamelako a sabhadho ga wu 7. Andzhako ka lezvo, mu ta nyikela a munyikelo wa tindzhoho ta tiswa mahlweni ka Jehovha.+ 17 Mu ta neha tipawa timbiri hi lomu matshan’wini ya n’wina kota munyikelo wa kundziwilitelwa. A tipawa leto ti ta mahiwa hi zvipandze zvimbiri zva wukhume zva efa* ya mapa ma sililweko khwatsi. Ti ta wociwa na ti hi ni comelo+ kota mihandzu yo sangula yo buvha ka Jehovha.+ 18 Mu ta nyikela a tipawa leto zvin’we ni 7 wa tiyivhana ta tinene ta vamatsune, a yin’we ni yin’wani na yi hi ni lembe gin’we, ni cidhunana ca homu, ni tiyivhu timbiri ta vamatsune.+ Zvi ta nyikelwa ka Jehovha kota munyikelo wa kuhiswa zvin’we ni munyikelo wa kona wa tindzhoho, ni minyikelo ya zvakunwa, kota munyikelo wu hisiwako hi ndzilo wa masema yo nuhela ma tsakisako Jehovha. 19 Mu ta nyikela a cimbutana cin’we kota munyikelo wa ciwonho+ ni tiyivhana timbiri ta vamatsune, a yin’we ni yin’we na yi hi ni lembe gin’we, kota muphahlo wa kuhlengela.+ 20 A mupristi i ta ndziwilitela a tiyivhana leto ta timbiri ta vamatsune zvin’we ni tipawa ta mihandzu yo sangula yo buvha zviya phambeni ni ndzhako kota munyikelo wa kundziwilitelwa mahlweni ka Jehovha. Zvi tava zvilo zvo basa ka Jehovha niku zvi tava zva mupristi.+ 21 Ka siku lego, mu ta huwelela+ a gotsovanyano wa n’wina wo basa. Mu nga mahi ntiro wo bindza. Leci cileletelo ca kala kupindzuka zvizukulwaneni zva n’wina zvontlhe ni kwihi lomu mu to tshama kona.

22 “‘Loku mu tshovela lomu tikweni ga n’wina, u nga tshoveli kala le magumo ya simu ga wena ne u nga kutsuli lezvi zvi salako a cikhati leci u tshovelako.+ Zvi siyele cisiwana+ ni muluveli.+ Hi mina Jehovha, a Nungungulu wa n’wina.’”

23 Jehovha i no engeta a byela Mosi, aku: 24 “Byela a vaIzrayeli, uku: ‘Ka hweti ya wu 7, hi siku go sangula ga hweti, gi tava siku ga kuhumula ko mbhelela, gi nga siku ga cialakanyiso gi tivisiwako hi kubiwa ka mpundzu;+ i gotsovanyano wo basa. 25 Mu nga tiri ntiro wo bindza niku mu ta nyikela munyikelo wu hisiwako hi ndzilo wu mahelwako Jehovha.’”

26 Jehovha i no engeta a byela Mosi, aku: 27 “Kanilezvi, a siku ga wu 10, ka hweti leyi ya wu 7, i Siku ga Muphahlo wa ku Kombela ku Tsetselelwa Zviwonho.+ Mu ta maha a gotsovanyano wo basa mu tlhela mu ti xanisa,*+ mu nyikela munyikelo wu hisiwako hi ndzilo wu mahelwako Jehovha. 28 Mu nga tiri nchumu ka siku lego hakuva i siku ga muphahlo wa ku kombela ku tsetselelwa zviwonho kasi mu tsetselelwa zviwonho+ mahlweni ka Jehovha, a Nungungulu wa n’wina. 29 Ni wihi munhu* loyi a to kala ku ti xanisa* ka siku lego, i ta tsemiwa,* cikari ka vanhu vakwe.+ 30 Ni wihi munhu* loyi a to tira nchumu ka siku lego, ndzi ta mu lovisa cikari ka vanhu vakwe. 31 Mu nga tiri nchumu. Leci cileletelo ca kala kupindzuka zvizukulwaneni zva n’wina zvontlhe ni kwihi lomu mu to tshama kona. 32 I sabhadho ga kuhumula ko mbhelela ka n’wina niku ni gambo ga siku ga wu 9 mu ta ti xanisa.*+ Mu fanele ku hlayisa sabhadho, kusukela ni gambo kala ka gambo gin’wani.”

33 Jehovha i no engeta a byela Mosi, aku: 34 “Byela a vaIzrayeli, uku: ‘Hi siku ga wu 15 ka hweti leyi ya wu 7, Mubuzo wa Michacha wa 7 wa masiku wu mahelwako Jehovha.+ 35 Ka siku go sangula, ku tava ni gotsovanyano wo basa; mu nga tiri ntiro wo bindza. 36 Hi 7 wa masiku mu ta nyikela munyikelo wu hisiwako hi ndzilo wu mahelwako Jehovha. Ka siku ga wu 8 mu ta maha a gotsovanyano wo basa+ niku mu ta nyikela munyikelo wu hisiwako hi ndzilo wu mahelwako Jehovha. Lowu mutlhangano wo basa. Mu nga tiri ntiro wo bindza.

37 “‘A mibuzo ya Jehovha ya zvikhati zvi yimisilweko,+ leyi mu faneleko ku yi huwelela kota migotsovanyano yo basa+ kasi ku nyikela munyikelo wu hisiwako hi ndzilo wu mahelwako Jehovha, hi leyi: Munyikelo wa kuhiswa,+ ni munyikelo wa tindzhoho+ wa muphahlo, ni minyikelo ya zvakunwa,+ hi kuya hi longoloko wa siku ni siku. 38 A minyikelo leyi yi ta mahiwa ahandle ka leyi yi nyikelwako ka masabhadho ya Jehovha,+ ni zvinyikiwo zva n’wina,+ ni minyikelo ya n’wina ya zvifungo,+ ni minyikelo ya n’wina ya kuzvirandza,+ leyi mu to yi nyikela ka Jehovha. 39 Kanilezvi hi siku ga wu 15, ka hweti ya wu 7, na mu hlengeletile lezvi mu to tshovela lomu tikweni, mu ta maha mubuzo wa Jehovha hi 7 wa masiku.+ A siku go sangula i siku ga kuhumula, ni siku ga wu 8 gonawu i siku ga kuhumula ko mbhelela.+ 40 Ka siku go sangula mu ta teka mihandzu ya tisinya to saseka, ni matluka ya micindzu,+ ni madhavi ya tisinya to tlhuma, ni ya tisinya ti milako lomu nkoveni, mu tsaka+ mahlweni ka Jehovha, a Nungungulu wa n’wina, hi 7 wa masiku.+ 41 Mu ta mahela Jehovha a mubuzo lowo hi 7 wa masiku lomu ka lembe.+ Mu ta wu maha hi hweti ya wu 7, kota cileletelo ca kala kupindzuka zvizukulwaneni zva n’wina zvontlhe. 42 Mu ta tshama lomu michacheni hi 7 wa masiku.+ Vontlhe a vaIzrayeli va mabeleko va ta tshama lomu michacheni 43 kasi a zvizukulwana zva n’wina lezvi zva ha tako zvi tiva+ lezvaku ndzi mahile lezvaku a vaIzrayeli va tshama lomu michacheni a cikhati leci ndzi nga va humesa tikweni ga Gibhite.+ Hi mina Jehovha, a Nungungulu wa n’wina.’”

44 Hikwalaho, Mosi i no wulawula ni vaIzrayeli xungetano hi mibuzo ya Jehovha ya zvikhati zvi yimisilweko.

24 Jehovha i no engeta a byela Mosi, aku: 2 “Byela a vaIzrayeli lezvaku va neha mafura ya manene ya olivha ya tikandiya kasi ti tshama na ti vhura contlhe cikhati.+ 3 Hi tlhelo ga le handle ga kortina ga Wukustumunyu, lomu tendeni ga mutlhangano, Aroni i ta maha zvontlhe kasi a tikandiya ti tshama na ti vhura mahlweni ka Jehovha contlhe cikhati, kusukela ni gambo kala ni mixo. Leci cileletelo ca kala kupindzuka zvizukulwaneni zva n’wina zvontlhe. 4 Aroni i ta maha lezvaku a tikandiya ti tshama na ti longile ku lumekiwa laha ka nenge wa tikandiya+ wo mahiwa hi ouro ya yinene kasi ti tshama na ti vhura mahlweni ka Jehovha contlhe cikhati.

5 “U ta teka a mapa ma sililweko khwatsi u maha hi wona a 12 wa tipawa to wociwa to khwatsi tiphera. A pawa yin’we ni yin’wani yi wa mahiwe hi zvipandze zvimbiri zva wukhume zva efa.* 6 U ta ti veka hi mitlawa yimbiri hehla ka meza ya ouro ya yinene mahlweni ka Jehovha,+ a wun’we ni wun’wani wu tava ni 6 wa tipawa.+ 7 U ta chela hlakati yo nuhela ya yinene hehla ka ntlawa wun’we ni wun’wani. Yi ta tira kota pawa yi yimelako a munyikelo wontlhe+ wu hisiwako hi ndzilo wu mahelwako Jehovha. 8 Ka sabhadho ni sabhadho, i ta veka a tipawa hi kukhandzakanya mahlweni ka Jehovha.+ Leci civhumelwano ca kala kupindzuka ndzi mahako ni vaIzrayeli. 9 Ti tava ta Aroni ni vana vakwe+ niku va ta ti gela lomu wutshan’wini go basa+ hakuva i nchumu wakwe wo basabasa wu tako hi ka minyikelo yi mahelwako Jehovha ya kuhisiwa hi ndzilo kota cileletelo ca kala kupindzuka.”

10 Cikari ka vaIzrayeli ku wa hi ni mufana loyi a papayi wakwe a nga hi muGibhite,+ a mamani wakwe na a hi muIzrayeli. A mufana loye i nolwa ni wanuna wa muIzrayeli lomu wugovelweni. 11 A mufana wa wasati loye i no chepeta a Vito* a tlhela a gi rukatela.*+ Hikwalaho, va no mu neha ka Mosi.+ A vito ga mamani wakwe ku wa hi Xelomite, a nhanyana wa Dhibri, wa lixaka la ka Dhani. 12 Va no mu vhalela, va rindzela kala Jehovha a va byela lezvi a to lamulisiwa zvona.+

13 Andzhako ka lezvo, Jehovha i no byela Mosi, aku: 14 “Humesani a munhu loye a rukateleko aya le handle ka wugovelo niku vontlhe lava va nga muzwa va fanele ku tlhateka mandla yabye hlokweni yakwe. Hi kulandzela, a hlengeletano yontlhe yi ta mu gandla hi maribye.+ 15 U ta byela a vaIzrayeli, uku: ‘Loku a munhu a rukatela a Nungungulu wakwe, i ta rwala ciwonho cakwe. 16 Hikwalaho, loyi a rukatelako a vito ga Jehovha i fanele ku dawa.+ A hlengeletano yontlhe yi ta mu gandla hi maribye. A muluveli i ta dayiswa a ku khwatsi muIzrayeli wa mabeleko loku a chepeta a Vito legi.

17 “‘Loku a munhu a susa wutomi ga munhu-kuloni,* yenawu i fanele ku dawa.+ 18 Ni wihi loyi a bako a cifuyo a ci daya i fanele ku hakhela, wutomi hi wutomi.* 19 Loku a munhu a bayisa a munhu-kuloni i fanele ku bayisiwawu.+ 20 A kutshoviwa ciro ku ta hakhelwa hi ku tshova ciro, a tihlo hi tihlo, a tino hi tino. Lezvi a nga mu bayisisa zvona mun’wani yenawu i fanele ku bayisiswa zvezvo.+ 21 A munhu loyi a toba a cihari cifa i ta hakhela,+ kanilezvi loyi a bako munhu-kuloni afa i ta dawa.+

22 “‘Cileletelo cin’we basi ci to tira ka n’wina, kani muluveli kutani muIzrayeli wa mabeleko,+ hakuva hi mina Jehovha, a Nungungulu wa n’wina.’”

23 Andzhako ka lezvo, Mosi i no wulawula ni vaIzrayeli, va gumesa va humesa loyi a nga rukatele vaya naye le handle ka wugovelo va ya mu gandla hi maribye.+ Hikwalaho, a vaIzrayeli va no maha zvalezvi Jehovha a nga leletele Mosi.

25 Jehovha i no engeta a byela Mosi le Citsungeni ca Sinayi, aku: 2 “Byela vaIzrayeli, uku: ‘Laha mu to chikela tikweni legi ndzi mu nyikako gona,+ a tiko gi ta hlayisa sabhadho ga Jehovha.+ 3 Hi 6 wa malembe u ta byala timbewu lomu masin’wini ya wena u tlhela u thena a civhina* ca wena ni ku hlengeleta a pfuno wa misava.+ 4 Kanilezvi a lembe ga wu 7 gi tava sabhadho ga kuhumula ko mbhelela ka misava; i sabhadho ga Jehovha. U nga byali timbewu lomu masin’wini ya wena kutani ku thena civhina ca wena. 5 U nga tshoveli lezvi zvi salako zvi mila andzhako ka kutshovela, ne u nga hlengeleti a mauvha ya mivhina* ya wena yo kala ku theniwa. Gi fanele kuva lembe ga kuhumula ko mbhelela ka misava. 6 Kanilezvi mu ngaga a zvakuga lezvi zvi milako lomu tikweni hi lembe ga sabhadho. Wena, ni khumbi ya wena ya cinuna ni ya cisati, ni mutiri wa wena a tholilweko, ni vahlavha lava va akileko cikari ka wena, mu ngaga, 7 a ku patsa ni zvifuyo ni zvihari zva khwati zva lomu tikweni ga wena. Zvontlhe lezvi zvi humako lomu tikweni zvi nga giwa.

8 “‘U ta hlaya a 7 wa masabhadho ya malembe, ma nga 7 wa malembe ma wuyetilweko 7 wa makhati; a masiku ya 7 wa masabhadho ya malembe ma ta ringana a 49 wa malembe. 9 Andzhako ka lezvo, mu taba a linanga li vhuma hi hweti ya wu 7, hi siku ga wu 10 ga hweti leyo. Hi Siku ga Muphahlo wa ku Kombela ku Tsetselelwa Zviwonho,+ mu taba a linanga li zwala kontlhe lomu tikweni ga n’wina. 10 Mu fanele ku basisa a lembe ga wu 50 mu tlhela mu huwelela a kutlhatlheka lomu tikweni ga n’wina ka vontlhe a vaaki va gona.+ Gi tava lembe ga Jubhilewu ka n’wina; a mun’we ni mun’wani i ta tlhelela tshombeni yakwe ni ngangweni wakwe.+ 11 A lembe lego ga wu 50 gi tava Jubhilewu ka n’wina. Mu nga ta byala timbewu kutani ku tshovela lezvi zvi to sala zvi ti milela ka lezvi zvi to wetetela a cikhati mu tshovelako ne hambu a ku hlengeleta a mauvha ya mivhina* yo kala ku theniwa.+ 12 Lego i lembe ga Jubhilewu. Gi tava lembe go basa ka n’wina. Mu ngaga ntsena lezvi zvi to mila hi zvoce lomu masin’wini.+

13 “‘Ka lembe lego ga Jubhilewu a mun’we ni mun’wani i ta tlhelela tshombeni yakwe.+ 14 Loku mu mu xavisela zvilo a munhu-kuloni kutani loku mu xava zvilo kakwe, mu nga xololani.+ 15 U ta xava zvilo ka munhu-kuloni na u chela kota hi malembe lawa ma hundzako andzhako ka lembe ga Jubhilewu, niku i ta ku xavisela hi kuya hi malembe ya kutshovela lawa ma seleko.+ 16 Loku ka ha sele malembe yo tala, a nga engetela a ntsengo lowu a ku xaviselako hi wona, kanilezvi loku ku sele malembe matsongwani i ta hungula ntsengo wa kona, hakuva i ntsengo wa lezvi zvi to bhindzulwa a ku xaviselako. 17 Ku ngavi ni munhu cikari ka n’wina a xololako a munhu-kuloni;+ chavani a Nungungulu wa n’wina+ hakuva hi mina Jehovha, a Nungungulu wa n’wina.+ 18 Loku mu maha lezvi ndzi mu leleteleko mu tlhela mu hlayisa a zviboho zva mina zva kulamula, mu ta hanya kuruleni lomu tikweni.+ 19 A misava yi ta humesa mihandzu ya yona+ muga mu xura mu hanya ka yona hi kurula.+

20 “‘Kanilezvi loku mu tshuka muku: “Hi taga yini hi lembe ga wu 7 loku hi nga byali nchumu ne ku tshovela?”+ 21 Tivani lezvaku ndzi ta mu katekisa hi lembe ga wu 6 niku a misava yi ta pfuna zvakuga zvo enela kasi muga hi malembe manharu.+ 22 Mu ta byala timbewu hi lembe ga wu 8 na mu kari muga lezvi mu nga tshovela kale kala hi lembe ga wu 9. Mu ta tshovela zva zviswa na ma haga lezvi zva kale.

23 “‘A petso wu nga xaviselwi magumo+ hakuva a misava yi lumba mina+ niku ka mina n’wina mu valuveli ni vahlavha.+ 24 Lomu tikweni ga n’wina gontlhe a kuve ni fanelo ya ku tlhatlhisa a petso lowu wu xavisilweko.

25 “‘Loku a makabye wa wena ava wusiwaneni, a xavisa a cipandzana ca petso wakwe, a xaka gakwe ga laha kusuhani gi fanele ku ta tlhatlhisa lezvi a makabye wakwe a xavisileko.+ 26 Loku a munhu a nga hi na mutlhatlhisi, kanilezvi a gumesa a hlukela, a kuma zva ku wu tlhatlhisa hi zvona, 27 i ta hlaya a ntsengo wu ringanako a malembe ya kusukela laha a nga xavisa petso a gumesa a tlhelisa ntsengo wu ringanako a malembe ma nga sala ka loyi a nga wu xava, hi kona a to tlhelela petsweni wakwe.+

28 “‘Kanilezvi loku a nga hi na ca ku wu tlhatlhisa hi cona, wu ta simama ni muxavi kala hi lembe ga Jubhilewu;+ i ta tlheliselwa hi lembe ga Jubhilewu, hi kona a to tlhelela petsweni wakwe.+

29 “‘Loku a munhu a xavisa a muti lomu dhoropeni gi bhiyelweko, a fanelo yakwe ya ku wu tlhatlhisa yi ta simama kala kumbheleni ka lembe, kusukela ka siku legi a to mbhetisa hi gona ku xavisa. A fanelo yakwe ya ku wu tlhatlhisa+ yi ta tira ndzeni ka lembe gontlhe. 30 Kanilezvi loku ku hundza lembe gontlhe na a nga zvi kotangi a ku tlhatlhisa a yindlu leyo yi nga lomu dhoropeni gi bhiyelweko, yi tava tshomba ya muxavi zvizukulwaneni zvakwe zvontlhe. Yi nga ta tlheliswa hi lembe ga Jubhilewu. 31 Hambulezvo, a tiyindlu to tshama ka tona leti ti nga le handle ka dhoropa gi bhiyelweko ti ta woniwa kota cipandze ca masimu ya le handle ka dhoropa. A fanelo ya kutlhatlhisa yi ta simama ku tira ka tonawu. Ti fanele ku tlhatlhiswa hi lembe ga Jubhilewu.

32 “‘Xungetano hi tiyindlu ta vaLevhi lomu madhoropeni yabye,+ a vaLevhi va tava ni fanelo ya ku ti tlhatlhisa. 33 Loku a muLevhi a nga tlhatlhisi a yindlu leyi a xavisileko, a yindlu leyo yi nga lomu dhoropeni gabye yonawu yi ta tlheliswa hi lembe ga Jubhilewu,+ hakuva a tiyindlu ta lomu madhoropeni ya vaLevhi i tshomba yabye cikari ka vaIzrayeli.+ 34 Ahandle ka lezvo, a wutshamu ga wuriselo+ legi gi nga lomu matlhelweni ya madhoropa yabye gi nga xavisiwi hakuva i tshomba yabye ya kala kupindzuka.

35 “‘Loku a makabye wa wena, loyi u gamekeneko naye, ava cisiwana a nga zvi koti ku ti hlayisa, u ta mu hlayisa+ a ku khwatsi muluveli ni muhlavha+ kasi a simama ku hanya na wena. 36 U nga lavi majuro kutani ku bhindzula ka yena.+ Chava a Nungungulu wa wena;+ a makabye wa wena i ta simama a hanya zvin’we na wena. 37 U nga mu pembi mali hi ku lava majuro+ kutani ku mu nyika zvakuga hi ku fela ku bhindzula. 38 Hi mina Jehovha, a Nungungulu wa n’wina, loyi a mu humesileko tikweni ga Gibhite+ kasi ku mu nyika a tiko ga Khanani, ndzi fela kuva Nungungulu wa n’wina.+

39 “‘Loku a makabye wa wena, loyi u gamekeneko naye, ava cisiwana laha ka kuza a ti xavisa ka wena,+ u nga mu kurumeti ku tirisa ku khwatsi i khumbi.+ 40 Mu khomise a ku khwatsi mutiri a tholilweko+ kutani muhlavha. I ta ku tirela kala ku chikela lembe ga Jubhilewu. 41 Andzhako ka lezvo, i ta suka, yena ni vana vakwe, a tlhela maxakeni yakwe. I ta tlhela tshombeni ya vakokwani vakwe.+ 42 Hakuva a vaIzrayeli malandza ya mina lawa ndzi ma humesileko tikweni ga Gibhite.+ Va nga ti xavisi a ku khwatsi hi lezvi a khumbi yi xavisiswako zvona. 43 U nga mu xanisi;+ u ta chava a Nungungulu wa wena.+ 44 A tikhumbi ta wena ta cinuna ni ta cisati u ta ti kuma ka matiko lawa u gamekeneko nawo. U nga xava ka wona a tikhumbi ta cinuna ni ta cisati. 45 Hambu ka vahlavha lava va tshamako na n’wina,+ mu nga xava tikhumbi cikari ka vana vabye, ni cikari ka mingango leyi va yi wumbileko tikweni ga n’wina; vona va tava tshomba ya n’wina. 46 Mu nga va nyikela ka vana va n’wina kota tshomba yabye ya kala kupindzuka andzhako ka n’wina. Mu nga va maha zvitiri, kanilezvi a vamakabye va n’wina, a vaIzrayeli, mu nga va xanisi.+

47 “‘Kanilezvi loku a muluveli kutani muhlavha a nga cikari ka n’wina a ganya, a makabye wa n’wina loyi a nga cikari ka n’wina ava cisiwana aza a ti xavisa ka muluveli loye kutani ka muhlavha a hanyako cikari ka n’wina, kutani ka ciro ca ngango wa muluveli loye, 48 i ta simama kuva ni fanelo ya ku ti tlhatlhisa andzhako ka loku a ti xavisile. A mun’we wa vamakabye vakwe a nga mu tlhatlhisa,+ 49 kutani tio wakwe, kutani n’wana wa tio wakwe, kutani ni gihi xaka ga laha kusuhani legi gi lumbako a ngango wakwe, gi nga mu tlhatlhisa.

“‘Loku a ganya, a nga ti tlhatlhisa hi yece.+ 50 Yena ni loyi a nga mu xava va ta hlayela zvin’we a cikhati ca kusukela ka lembe legi a nga ti xavisa hi gona kala ka lembe ga Jubhilewu;+ a mali leyi a to xavisiwa hi yona yi ta ringana a ntsengo wa malembe.+ A ntsengo wa masiku lawa a tirileko ndzeni ka cikhati leco wu ta hlayiwa hi kuya hi muholo wa mutiri a tholilweko.+ 51 Loku ka ha sele malembe yo tala, i ta humesa a mali yi ringanako a malembe lawo. 52 Kanilezvi loku ku sele malembe ma tsongwani kala ka lembe ga Jubhilewu, i ta hlaya hi yece a gumesa a hakhela a ntsengo wa ku ti tlhatlhisa wu ringanako malembe lawa ma seleko. 53 I fanele ku tirela a muxavi lembe ni lembe kota mutiri a tholilweko; u nga tsiki a muxavi a mu xanisa.+ 54 Hambulezvo, loku a nga zvi koti a ku ti tlhatlhisa hi yece, i ta tlhatlheka hi lembe ga Jubhilewu,+ yena ni vana vakwe.

55 “‘Hakuva a vaIzrayeli malandza ya mina. Malandza ya mina ndzi ma humesileko tikweni ga Gibhite.+ Hi mina Jehovha, a Nungungulu wa n’wina.

26 “‘Mu nga ti maheli vanungungulu va nga vhuniko nchumu+ ne mu nga ti yimiseli a zvifananiso zvi kehlilweko+ kutani mapilari yo basa* hambu ku ti yimisela a ribye ga cifananiso+ lomu tikweni ga n’wina mu gi khizamela,+ hakuva hi mina Jehovha, a Nungungulu wa n’wina. 2 Mu fanele ku hlayisa a masabhadho ya mina mu tlhela muva ni cichavo hi wutshamu go basa. Hi mina Jehovha.

3 “‘Loku mu simama ku famba hi zvileletelo zva mina mu tlhela mu hlayisa a milayo ya mina ni ku yi maha,+ 4 ndzi ta mu nisela tivhula hi tinguva ta kona.+ A misava yi ta humesa a mihandzu ya yona,+ ni tisinya ti ta pswala a mihandzu. 5 A nguva ya kuhula yi ta famba kala cikhatini ca ku khayela mauvha, ni cikhati ca ku khayela mauvha ci ta famba kala ka nguva ya kubyala. Mu taga zvakuga* zva n’wina mu xura mu hanya kuruleni lomu tikweni ga n’wina.+ 6 Ndzi ta veka kurula lomu tikweni;+ mu ta etlela khwatsi na mu nga dzukiswi hi munhu;+ ndzi ta tlhatlhisa tiko ka zvivandza zva khwati, ni cipadha ca yimpi ci nga ta nghena lomu tikweni ga n’wina. 7 Mu ta hlongolisela a valala va n’wina mu va daya hi cipadha. 8 A ntlhanu wa va ka n’wina va ta hlongolisela a 100, ni 100 va ka n’wina va ta hlongolisela a 10 000. A valala va n’wina va ta wisiwa hi cipadha mahlweni ka n’wina.+

9 “‘Ndzi ta mu mahela wuxinji, ndzi mu andzisa, ndzi mu maha mu talelana;+ ndzi ta hlayisa a civhumelwano ca mina na n’wina.+ 10 Na ma haga lezvi zva mawongwe, zva lembe gi nga hundza, zvi ta lava ku mu zvi humesela kasi mu chela zva zviswa. 11 Ndzi ta veka a tabhernakeli ga mina cikari ka n’wina+ niku ndzi* nga ta mu tsika. 12 Ndzi ta famba cikari ka n’wina ndziva Nungungulu wa n’wina+ niku n’wina mu tava vanhu va mina.+ 13 Hi mina Jehovha, a Nungungulu wa n’wina, loyi a mu humesileko tikweni ga Gibhite kasi mu nga ha tshuki muva tikhumbi tabye; ndzi tshovile a kanga wa n’wina ndzi mu maha mu famba na mu ololokile mu ku pswi.

14 “‘Kanilezvi loku mu nga ndzi ingisi kutani ku hlayisa yontlhe a milayo leyi,+ 15 ni loku mu tsika a zvileletelo zva mina,+ mu tlhela mu venga a zviboho zva mina zva kulamula laha ka kuza mu nga hlayisi yontlhe a milayo ya mina, ni loku mu tshova a civhumelwano ca mina,+ 16 mina ndzi ta mu maha lezvi: Ndzi ta mu tsayisa hi hlomulo, ni ndele, ni feveri yo hisa, zvi maha ku a matihlo ya n’wina ma nga woni khwatsi ni wutomi* ga n’wina giva mhangweni. Mu ta byala timbewu ta n’wina mahala, hakuva ti ta giwa hi valala va n’wina.+ 17 A nghohe ya mina yi ta mu vhukela mu hluliwa hi valala va n’wina;+ mu ta kandzihelwa hi lava va mu vengako+ niku mu ta tsutsuma na mu nga hlongoliwi hi munhu.+

18 “‘Loku mu humelelwa hi zvontlhe lezvi kanilezvi mu nga ndzi ingisi, ndzi ta mu tsayisa kambe 7 wa makhati hi kota ya zviwonho zva n’wina. 19 Ndzi ta mu maha mu tsika a ku ti nonohisa ni matshandza ya n’wina, ndzi maha a matilo ya n’wina ma fana ni simbi,+ ni misava ya n’wina yi fana ni kobre. 20 Mu ta xakela ntamu wa n’wina, hakuva a tiko ga n’wina gi nga ta humesa nchumu,+ ni tisinya ta tiko ti nga ta pswala mihandzu.

21 “‘Loku mu simama ku ndzi fularela mu tlhela mu ala ku ndzi ingisa ndzi ta mu tsayisa kambe 7 wa makhati hi kuya hi zviwonho zva n’wina. 22 Ndzi ta rumela a zvivandza zva khwati cikari ka n’wina+ zvi ta khadamula a vanana va n’wina+ ni ku hihirita a zvifuyo zva n’wina, zvi hungula a ntsengo wa n’wina; a maruwa ya n’wina ma tava ciwula.+

23 “‘Loku mu humelelwa hi zvontlhe lezvi kanilezvi mu nga vhumeli a kukawuka ka mina,+ mu simama ku ndzi fularela, 24 minawu ndzi ta mu fularela ndzi tlhela ndzi mu tsayisa kambe 7 wa makhati hi kota ya zviwonho zva n’wina. 25 Ndzi ta kuca a valala va n’wina lezvaku va ta mu vhukela kasi ku mu tsayisa hi cipadha hi kuva mu tshovile a civhumelwano.+ Loku mu tsutsumela lomu madhoropeni ya n’wina ndzi ta rumela mababyi cikari ka n’wina+ niku mu ta nyikelwa canjeni ga nala.+ 26 Loku ndzi hahlula a tshala* ga n’wina ga zvakuga,*+ a 10 wa vavasati va ta woca a tipawa ta n’wina lomu ka forno yin’we va mu pimela a cipandze leci mu toga;+ mu taga kanilezvi mu nga ta xura.+

27 “‘Loku mu humelelwa hi zvontlhe lezvi kanilezvi mu nga ndzi ingisi mu tlhela mu simama ku ndzi fularela, 28 ndzi ta engetela ku mu zangarela,+ ndzi mu tsayisa kambe 7 wa makhati hi kota ya zviwonho zva n’wina. 29 Hikwalaho, mu taga a nyama ya vafana va n’wina ni ya vanhanyana va n’wina.+ 30 Ndzi ta hahlula a matshamu ya n’wina yo tlakuka ma basileko+ ni maalati yo hisela ka wona a libani, ndzi tlhatekela a zvirumbi zva n’wina hehla ka zvifananiso zva n’wina zva manyala*+ ndzi tlhela ndziva* ni livengo la hombe hi n’wina.+ 31 Ndzi ta nyikela a madhoropa ya n’wina ka cipadha.+ A matshamu ya n’wina yo basa ndzi ta ma maha ciwula niku ndzi nga tazwa masema yo nuhela ya miphahlo ya n’wina. 32 Ndzi ta maha a tiko giva ciwula,+ ni valala va n’wina lava va tshamako ka gona va ta hlamala nguvhu.+ 33 Ndzi ta mu hangalasa cikari ka matiko,+ ndzi hlomula cipadha ci mu hlongolisela.+ A tiko ga n’wina gi tava ciwula,+ ni madhoropa ya n’wina ma ta hahlulwa.

34 “‘Ka cikhati leco, a tiko gi ta hakhela a masabhadho ya gona ka masiku wontlhe lawa gi to sala goce. Ka cikhati leco a tiko gi ta humula,* kota lezvi gi faneleko ku hakhela a masabhadho ya gona.+ 35 Wontlhe a masiku lawa a tiko gi tova ciwula gi ta humula hakuva a gi humulangi hi cikhati ca masabhadho ya n’wina laha mu nga tshama ka gona.

36 “‘Lava va to pona,+ ndzi ta va maha va tsemeka mihlanha matikweni ya valala vabye; hi kuzwa a guwa ga tluka loku gi biwa hi moya va ta suka va tsutsuma; va ta tsutsumisa ku khwatsi munhu a tsutsumako cipadha, vawa na va nga hlongoliwi hi munhu.+ 37 Va ta phinganyetana vawa a ku fana ni lava va tsutsumako a cipadha, hambu lezvi va kalako va nga hlongoliwi hi munhu. A valala va n’wina mu nga ta va tiyela.+ 38 Mu ta lova cikari ka matiko,+ niku a matiko ya valala va n’wina ma ta mu mita. 39 Lava va to sala cikari ka n’wina va ta hleleleka matikweni ya valala va n’wina+ hi kota ya cigoho ca n’wina. Kunene, va ta hleleleka hi kota ya zvigoho zva vapapayi vabye.+ 40 Va ta wulela a cigoho cabye,+ va wulela a cigoho ni kungatsumbeki ka vapapayi vabye, va tlhela va vhumela lezvaku a va tsumbekangi hi ku ndzi fularela.+ 41 Hikwalaho, minawu ndzi no va zangarela+ ndzi va yisa tikweni ga valala vabye.+

“‘Kuzvilava hi kona a timbilu tabye to nonoha* ti to ti koramisa+ va hakhela cigoho cabye. 42 Ndzi ta alakanya a civhumelwano ca mina na Jakobe,+ ni civhumelwano ca mina na Isaka,+ ni civhumelwano ca mina na Abrahama+ ndzi tlhela ndzi alakanya a tiko. 43 A cikhati leci va to siya tiko goce, gi ta sala gi hakhela a masabhadho ya gona,+ gi sala goce na gi hi ciwula. Hi cikhati leco, va ta hakhela a cigoho cabye, hakuva va tsikile a zviboho zva mina zva kulamula va tlhela va venga a zvileletelo zva mina.+ 44 Kanilezvi, hambu loku va humelelwa hi zvontlhe lezvi na va hi tikweni ga valala vabye, mina ndzi nga ta tshuka ndzi va tsikela magumo+ ne hambu ku va chokola laha ka kuza ndzi va lovisa, hakuva zvi wa ta tshova a civhumelwano ca mina+ zvin’we navo, hakuva hi mina Jehovha, a Nungungulu wabye. 45 Kasi va vhuneka ndzi ta alakanya a civhumelwano leci ndzi mahileko ni vakokwani vabye+ lava ndzi va humesileko tikweni ga Gibhite kuwoneni ka matiko,+ kasi ndziva Nungungulu wabye. Hi mina Jehovha.’”

46 Lezvi zvileletelo, ni zviboho zva kulamula, ni milayo leyi Jehovha a yi yimisileko cikari ka yena ni vaIzrayeli le Citsungeni ca Sinayi hi ku tirisa Mosi.+

27 Jehovha i no engeta a byela Mosi, aku: 2 “Byela a vaIzrayeli, uku: ‘Loku a munhu a maha cifungo co hlawuleka+ ca ku nyikela ka Jehovha a mali yi ringanako a ntsengo wa munhu,* 3 a ntsengo wu yimisilweko wa wanuna wa kusukela ka 20 kala ka 60 wa malembe wu tava 50 wa maxekeli* ya prata, hi kuya hi xekeli ga wutshamu go basa.* 4 Kanilezvi loku a hi wasati, a ntsengo wu yimisilweko wu tava 30 wa maxekeli. 5 Loku a hi wanuna wa kusukela ka 5 kala ka 20 wa malembe, a ntsengo wu yimisilweko wu tava 20 wa maxekeli; loku a hi wasati, wu tava 10 wa maxekeli. 6 Loku a hi n’wanana wa mufana wa tanga ya kusukela ka hweti yin’we kala ka ntlhanu wa malembe, a ntsengo wu yimisilweko wu tava ntlhanu wa maxekeli ya prata; loku a hi n’wanana wa nhanyana, wu tava maxekeli manharu ya prata.

7 “‘Loku a hi wanuna wa kusukela ka 60 wa malembe kuya hehla, a ntsengo wu yimisilweko wu tava 15 wa maxekeli; loku a hi wasati, wu tava 10 wa maxekeli. 8 Kanilezvi loku a munhu a hi cisiwana nguvhu laha ka kuza a nga zvi koti ku humesa ntsengo lowu wu yimisilweko,+ i ta yima mahlweni ka mupristi; a mupristi i ta mu gemela a ntsengo wa kona. A mupristi i ta hlola hi kuya hi lezvi a munhu loyi a mahako cifungo a to zvi kota ku humesa.+

9 “‘Loku ku mahilwe a cifungo ca ku nyikela hi cin’we ca zvifuyo lezvi zvi ringanako ku nyikelwa ka Jehovha, ni cihi ci nga nyikelwako ka Jehovha ci tava nchumu wu basileko. 10 A nga ci vhaleti kutani ku cicisa ca cinene hi co biha kutani co biha hi ca cinene. Kanilezvi loku a cicisa cifuyo co kari hi cin’wani, leci co sangula ni leci a cicisako hi cona, hi wumbiri ga zvona, zvi tava lezvi zvi basileko. 11 Loku ci hi cifuyo ci nga hlazvekangiko,+ leci ci nga faneliko ku nyikelwa ka Jehovha, i ta ci yimisa mahlweni ka mupristi. 12 A mupristi i ta gema a ntsengo wa kona hi kuya hi wunene ga cona.* A ntsengo lowu wu to yimisiwa hi mupristi wu nga ta cica. 13 Kanilezvi loku a tshuka a lava ku ci tlhatlhisa, i ta engetela a cipandze ca wutlhanu ka ntsengo wa cona wu yimisilweko.+

14 “‘Makunu loku a munhu a lava ku basisa yindlu yakwe kota nchumu wu basileko ka Jehovha, a mupristi i ta gema a ntsengo wa kona hi kuya hi wunene ga yona.* A ntsengo lowu a mupristi a to gema wu tava walowo.+ 15 Kanilezvi loku a munhu loyi a basisako a yindlu yakwe a lava ku yi tlhatlhisa, i ta engetela a cipandze ca wutlhanu ka mali ya yona yi yimisilweko, hi kona yi tova yakwe.

16 “‘Loku a munhu a basisela Jehovha a cipandze co kari ca simu gakwe, a ntsengo wa kona wu ta yimisiwa hi kuya hi mpimo wa mbewu wu ringanako ku byala cipandze leco wu eneta. Loku a cipandze leco ci byaliwa hi homeri* ya sevhadha a ntsengo wa cona wu tava 50 wa maxekeli ya prata. 17 Loku a basisa simu gakwe hi lembe ga Jubhilewu,+ a ntsengo lowu wu yimisilweko wu nga ta cica. 18 Loku a basisa simu gakwe andzhako ka lembe ga Jubhilewu, a mupristi i ta mu gemela a ntsengo hi kuya hi malembe lawa ma seleko kala ku chikela gin’wani lembe ga Jubhilewu, niku a ntsengo wu yimisilweko wu fanele ku hunguliwa.+ 19 Kanilezvi loku loyi a basisileko simu a lava ku gi tlhatlhisa, i ta engetela a cipandze ca wutlhanu ka mali ya gona yi yimisilweko, hi kona gi to tlhela giva gakwe. 20 Kanilezvi loku a nga tlhatlhisi a simu, a simu gi gumesa gi xaviselwa mun’wani munhu, gi nga ta ha tlhatlhiswa kambe. 21 Loku a simu gi tlhatlheka hi lembe ga Jubhilewu gi tava nchumu wu basileko ka Jehovha kota simu legi gi nyikelweko kakwe. Gi tava tshomba ya vapristi.+

22 “‘Loku a munhu a basisela Jehovha a simu legi a gi xavileko na gi nga hi simu ga tshomba yakwe,+ 23 a mupristi i ta mu yimisela a ntsengo wa kona hi kuya hi malembe lawa ma seleko kala ku chikela gin’wani lembe ga Jubhilewu niku a ntsengo lowu wu yimisilweko i ta wu nyikela ka siku galego.+ I nchumu wu basileko ka Jehovha. 24 Hi lembe ga Jubhilewu, a simu gi ta tlhela ka loyi a gi xavileko ka yena, ka loyi a misava yi mu lumbako.+

25 “‘A mitsengo yontlhe yi fanele ku yimisiwa hi kuya hi xekeli ga wutshamu go basa. A xekeli gi fanele ku ringana 20 wa magera.*

26 “‘Kanilezvi i hava a faneleko a ku basisa a matewula ya zvifuyo, hakuva ma pswaliwa na ma hi matewula ya Jehovha.+ Kani matewula ya homu kutani ya yivhu ma sina ma hi ya Jehovha.+ 27 Loku ma hi matewula ya cin’we ca zvifuyo zvi nga hlazvekangiko, a ci tlhatlhisako maringano ni ntsengo lowu wu yimisilweko, i ta engetela a cipandze ca wutlhanu ka ntsengo lowo.+ Kanilezvi loku ci nga tlhatlhiswi ci ta xavisiwa hi kuya hi ntsengo lowu wu yimisilweko.

28 “‘Hambulezvo, kani hi cihi leci a munhu a ci nyikelako ka Jehovha kala kupindzuka* ka lezvi a nga nazvo, kani munhu, kutani cifuyo, kutani simu, zvi nga tshuki zvi xavisiwa kutani ku tlhatlhisiwa. Zvontlhe lezvi zvi nyikelweko zvilo zvo basabasa ka Jehovha.+ 29 Ahandle ka lezvo, i hava munhu loyi a konelweko* ku loviswa a to tlhatlhiswa.+ I fanele ku dawa.+

30 “‘A cipandze ca wukhume+ ca zvontlhe lezvi a misava yi bhindzulako, kani i pfuno wa lomu masin’wini, kani mihandzu ya tisinya, ci lumba Jehovha. I nchumu wu basileko ka Jehovha. 31 Loku a munhu a lava ku tlhatlhisa ni wihi a nchumu wakwe wa wukhume, i ta engetela a cipandze ca wutlhanu ka ntsengo wa wona. 32 Xungetano hi zvontlhe zva wukhume zva tihomu, ni tiyivhu, ni timbuti, zvontlhe lezvi zvi risiwako, zvi nga zva wukhume zva zvifuyo, zvi fanele kuva nchumu wu basileko ka Jehovha. 33 A nga faneli ku ci hlola kasi ku tiva ku cinene kutani ci bihile ne hambu ku ci cicisa. Kanilezvi loku a ci cicisa, leci co sangula ni leci a cicisako hi cona, hi wumbiri ga zvona, zvi tava lezvi zvi basileko.+ A zvi nge tlhatlhiswi.’”

34 Lezvi zvileletelo lezvi Jehovha a nyikileko Mosi le Citsungeni ca Sinayi kasi a ya byela a vaIzrayeli.+