DHEWUTERONOME

1 Lawa magezu lawa Mosi a byelileko a vaIzrayeli vontlhe cipandzeni ca Jordhani, lomu ciwuleni, tivaleni ti nga mahlweni ka Sufa, cikari ka Parani, ni Tofela, ni Labani, ni Hazerote, ni Dhizahaba. 2 (A ku suka hi Horebhe uya Kadhexe-Bharneya+ i pfhuka wa 11 wa masiku hi ndlela ya le Citsungeni ca Seyire.) 3 Hi siku go sangula, ka hweti ya wu 11, ka lembe ga wu 40,+ Mosi i no byela a vaIzrayeli* a timhaka tontlhe leti Jehovha a nga mu leletele ku a va byela. 4 Lezvi zvi mahekile andzhako ka loku a hlulile Sihoni,+ a hosi ya vaAmori, leyi yi nga tshama le Hexbhoni, ni loku a hlulile Ogi,+ a hosi ya Bhaxani, le Edreyi, leyi yi nga tshama Axtarote.+ 5 Mosi i no sangula ku tlhamusela nayo+ lowu le cipandzeni ca Jordhani, tikweni ga Mowabhi, aku:

6 “Jehovha, a Nungungulu wa hina, i wulawulile na hina le Horebhe, aku: ‘Makunu mu tshamile cikhati co nyawula tikweni legi ga zvitsunga.+ 7 Jikani mu tlhela tikweni ga zvitsunga ga vaAmori,+ mu kongoma ka vontlhe vaakelani vabye le Arabha,+ tikweni ga zvitsunga, ni Xefela, ni Negebhe, ni mbhirini ya bimbi,+ gi nga tiko ga vaKhanani, ni Lebhanoni*+ kala congweni wa hombe, wu nga Congo wa Eufrate.+ 8 Ma zvi wona, a tiko ndzi gi vekile mahlweni ka n’wina. Nghenani mu teka a tiko legi Jehovha a hlambanyileko ku nyika vapapayi va n’wina, Abrahama, na Isaka,+ na Jakobe,+ ni pswalo* wabye andzhako kabye.’+

9 “Ka cikhati caleco, ndzi no mu byela, ndziku: ‘Ndzi nga ta zvi kota a ku mu rwala ndzoce.+ 10 Jehovha, a Nungungulu wa n’wina, i mu andzisile; nyamutlha mu tele a ku fana ni tinyeleti ta matilo.+ 11 Jehovha, a Nungungulu wa vakokwani va n’wina, i wa mu andzise+ hi ka 1000 wa makhati a ku hundza lezvi mu nga ha zvona niku i wa mu katekise kota lezvi a mu tsumbisileko.+ 12 Ndzi nga zvi kotisa kuyini a ku wu rwala ndzoce a ndzhwalo wa n’wina, ni kubindza ka n’wina, ni tiholova ta n’wina ke?+ 13 Hlawulani vavanuna va nga ni wutivi, ni vo tlhariha, ni vo buvha va tixaka ta n’wina kasi ndzi va yimisa kota tihosana hehla ka n’wina.’+ 14 N’wina mu no ndzi hlamula, muku: ‘Lezvi u nga hi byela ku maha zvi nene.’ 15 Hikwalaho, ndzi no teka tihloko ta tixaka ta n’wina, a vavanuna va nga ni wutivi, vo buvha, ndzi va yimisa kota tihosana hehla ka n’wina, vava varangeli va mitlawa ya 1000 wa vanhu, ni varangeli va mitlawa ya 100 wa vanhu, ni varangeli va mitlawa ya 50 wa vanhu, ni varangeli va mitlawa ya 10 wa vanhu, ni tihosana ta n’wina ta tixaka.+

16 “Ka cikhati caleco, ndzi no leletela a valamuli va n’wina, ndziku: ‘Loku muzwa mhaka cikari ka vamakabye va n’wina, lamulani hi kululama+ cikari ka munhu ni makabye wakwe kutani cikari kakwe ni muluveli.+ 17 Mu nga lamuli hi ku cuwuka nghohe+ ya munhu. Ingiselani a wamutsongwani a ku khwatsi hi loyi wahombe.+ Mu nga chavisiwi hi munhu,+ hakuva a kulamula ku lumba Nungungulu.+ Loku a mhaka yo kari yi mu tsandza, mu ta yi neha ka mina ndzi ta yizwa.’+ 18 Ka cikhati caleco, ndzi no mu leletela zvontlhe lezvi mu faneleko ku maha.

19 “Andzhako ka lezvo, hi no suka hi le Horebhe hi tsemakanya contlhe a ciwula leciyani ca hombe ni co tshisa,+ leci mu ci wonileko ndleleni ya kuya tikweni ga zvitsunga ga vaAmori+ kota lezvi Jehovha, a Nungungulu wa hina, a nga hi leletele. Hi kugumesa, hi no chikela le Kadhexe-Bharneya.+ 20 Ndzi no mu byela lezvi: ‘Makunu mu chikele tikweni ga zvitsunga ga vaAmori legi Jehovha, a Nungungulu wa hina, a hi nyikako. 21 Wa zvi wona, Jehovha, a Nungungulu wa wena, i ku nyikile tiko. Kandziha, u ya gi teka, kota lezvi Jehovha, a Nungungulu wa vakokwani va wena, a ku byelileko.+ U nga chavi hambu ku tsemeka hlanha.’

22 “Hambulezvo, n’wentlhe mu no ndzi tshinelela, mu taku: ‘A hi rumeleni vavanuna mahlweni ka hina va ya hi hlolela tiko va wuya va ta hi byela kasi hi tiva ku hi ta famba hi kwihi niku madhoropa ya tshamela muni hi toya hi ya ma kuma.’+ 23 A mawonela lawo ma wa wonekisa ku khwatsi ma nene ka mina, hikwalaho ndzi no hlawula 12 wa vavanuna cikari ka n’wina, mun’we hi lixaka.+ 24 Va no suka va kandziha kala tikweni ga zvitsunga+ va ya chikela Nkoveni wa Exkole, va gi piyara. 25 Va no teka mihandzu yo kari ya tiko va hi wuyela nayo niku va no hi wuyela ni mahungu yaku: ‘A tiko legi Jehovha, a Nungungulu wa hina, a hi nyikako gi nene.’+ 26 Kanilezvi mu no ala ku kandziha, mu hluwukela a cileletelo ca Jehovha, a Nungungulu wa n’wina.+ 27 Mu no simama ku ngurangura lomu matendeni ya n’wina, muku: ‘Jehovha i hi humesile tikweni ga Gibhite hi ku hi venga kasi a ta hi nyikela canjeni ga vaAmori lezvaku va hi hihirita. 28 Kasi hiya ka wutshamu go tshamisa kuyini? A vamakabye va hina va hi tshovile timbilu+ hi ku wula lezvi: “Vona vanhu va ntamu ni vo leha a ku hundza hina; a madhoropa yabye ya hombe niku ma vhikelwe khwatsi kala le matilweni.+ Hi wonile ni vana va Anake+ seyo.”’

29 “Hikwalaho, ndzi te ngalo ka n’wina: ‘Mu nga rurumeli ne mu nga chavi hi kota yabye.+ 30 Jehovha, a Nungungulu wa n’wina, i ta famba mahlweni ka n’wina, a mu lwela,+ a ku khwatsi hi lezvi a mahileko le Gibhite na mu zvi wona.+ 31 U zvi wonile le ciwuleni lezvi Jehovha, a Nungungulu wa wena, a ku tlakulisileko zvona — a ku fana ni lezvi a wanuna a mu tlakulisako zvona a n’wana wakwe — kontlhe lomu mu nga fambafamba kona kala mu chikela ka wutshamu legi.’ 32 Kanilezvi ka zvontlhe lezvo, a mu kholwangi ka Jehovha, a Nungungulu wa n’wina,+ 33 loyi a nga kari a famba mahlweni ka n’wina laha ndleleni, kasi ku mu lavela a wutshamu ga ku mu ta gova ka gona. Ni wusiku i wa woneka hi ndzilo, ni mumu a woneka hi refu kasi a mu komba a ndlela leyi mu nga fanele ku famba hi yona.+

34 “Ka contlhe cikhati leco, Jehovha i nozwa lezvi mu nga kari mu wulawula, hikwalaho i no swireka, a hlambanya,+ aku: 35 ‘I hava ni mun’we wa cizukulwana leci ca kubiha a to wona a tiko ga ginene legi ndzi hlambanyileko ku nyika vapapayi va n’wina,+ 36 ahandle ka Kalebhi, a n’wana wa Jefune. Yena i ta gi wona niku ndzi ta mu nyika, yena ni vana vakwe, a tiko legi a nga fambafamba ka gona, hakuva i landzele Jehovha hi mbilu yontlhe.*+ 37 (Jehovha i zile a ndzi zangarela hi kota ya n’wina, aku: “Wenawu u nga ta ku nghena.+ 38 Joxuwa, a n’wana wa Nuni, loyi a yimako mahlweni ka wena,+ hi yena a to nghena tikweni.+ Mu tiyise*+ hakuva hi yena a to rangela Izrayeli a nghena a teka tiko.”) 39 Ahandle ka lezvo, a vanana va n’wina, lava mu nga wula lezvaku va ta maha muphango,+ ni vafana va n’wina lava nyamutlha va kalako va nga tivi zvazvinene ni zvakubiha, hi vona va to nghena niku ndzi ta va nyika tiko giva gabye.+ 40 Kanilezvi n’wina jikani mu tlhela ciwuleni hi ndlela ya tlhelo ga Bimbi go Pswhuka.’+

41 “Zvalezvo mu te ngalo ka mina: ‘Hi wonhele Jehovha. Hi ta kandziha zvezvi hi yalwa kota lezvi Jehovha, a Nungungulu wa hina, a hi leleteleko!’ Hikwalaho, a mun’we ni mun’wani wa n’wina i no teka a matlhari yakwe ya yimpi na mu alakanya ku zvi ta mu olovela ku kandziha citsunga.+ 42 Kanilezvi Jehovha i te ngalo ka mina: ‘Va byele, uku: “Mu nga kandzihi mu yalwa, hakuva ndzi nga tava na n’wina.+ Loku mu kandziha, mu ta hluliwa hi valala va n’wina.”’ 43 Hikwalaho, ndzi no wulawula na n’wina kanilezvi a mu ingisangi. Mu no hluwukela a cileletelo ca Jehovha, mu ala mu zama ku kandziha citsunga hi kani. 44 Makunu a vaAmori lava va nga kari va tshama citsungeni leco, va no huma va ta tlhangana na n’wina va mu hlongolisela a ku khwatsi tinyoxi ti tsutsumisako vanhu. Va no mu hangalasa le Seyire kala le Horma. 45 Hikwalaho, mu no wuya mu ta sangula ku rila mahlweni ka Jehovha, kanilezvi Jehovha a nga mu ingisangi ne ku chela kota ka n’wina. 46 Hi caleco ci nga mu maha mu simama ku tshama le Kadhexe a cikhati contlhe leci mu tshamileko seyo.

2 “Andzhako ka lezvo, hi no jika hiya ciwuleni hi ndlela ya Bimbi go Pswhuka, kota lezvi Jehovha a nga ndzi byelile.+ Hi no famba masiku yo tala, hi rendzeleka a Citsunga ca Seyire. 2 Hi kugumesa, Jehovha i te ngalo ka mina: 3 ‘Mu rendzelekile a citsunga leci hi cikhati co leha. Makunu fambani n’walungu.* 4 Byela vanhu, uku: “Mu ta hundza hi mbhinganweni wa vamakabye va n’wina, a vana va Esawu,+ lava va tshamako le Seyire.+ Vona va ta mu chava+ niku mu fanele ku ti wonela nguvhu. 5 Mu nga va dhumeli,* hakuva ndzi nga ta mu nyika nchumu tikweni gabye, ne hambu ka ku veka nkondzo; a Citsunga ca Seyire ndzi nyikile Esawu kota tshomba yakwe.+ 6 Mu ta xava zvakuga kabye hi mali, mu hakhela ni mati lawa mu tonwa.+ 7 Hakuva Jehovha, a Nungungulu wa wena, i ku katekisile ka zvontlhe lezvi u mahileko. Yena wa li tiva khwatsi a lipfhumba la wena lomu ciwuleni leci ca hombe. Ka malembe lawa ya 40 a wu vhumalangi nchumu hakuva Jehovha, a Nungungulu wa wena, i wa hi zvin’we na wena.”’+ 8 Hikwalaho, hi no hundza hi ka vamakabye va hina, a vana va Esawu,+ lava va nga tshama le Seyire, hi tsika ndlela ya Arabha, hi tlhela hi potsa ni Elate ni Eziyoni-Gebhera.+

“Hi kulandzela, hi no jika hi famba hi ndlela ya ciwula ca Mowabhi.+ 9 Makunu Jehovha i te ngalo ka mina: ‘U nga dhumeli Mowabhi kutani kulwa naye, hakuva ndzi nga ta ku nyika ne cipandze cin’we ca tiko gakwe kota tshomba, hakuva a tiko ga Are ndzi gi nyikele ka vana va Loti kota tshomba.+ 10 (A kaleloko, leyo ku wa tshama a vaEmima,+ a vanhu va ntamu, vo tala, ni vo leha a ku fana ni vaAnake. 11 A vaRefayime+ vonawu va wa woniswa ku khwatsi vaAnake+ niku a vaMowabhi va wa tolovela ku va vitana ku vaEmima. 12 A kaleloko, a vaHori+ va wa tshama Seyire, kanilezvi a vana va Esawu va no va wutlela tiko, va va hihirita, vona va sala va tshama wutshan’wini gabye,+ a ku khwatsi hi lezvi a vaIzrayeli va to maha tikweni legi gi tova tshomba yabye, leyi Jehovha a to va nyika.) 13 Makunu fambani mu tsemakanya a Nkova wa Zeredhe.’ Hikwalaho, hi no tsemakanya a Nkova wa Zeredhe.+ 14 A kusukela le Kadhexe-Bharneya kala hi ya tsemakanya a Nkova wa Zeredhe, hi mbhetile 38 wa malembe, kala a cizukulwana contlhe ca vavanuna vontlhe lava va nga hi valwi va yimpi ci lova lomu wugovelweni kota lezvi Jehovha a nga hlambanyile kabye.+ 15 A canja ga Jehovha gi wa va vhukela kasi gi va fuvisa lomu wugovelweni kala va lova.+

16 “Zvalezvi a vavanuna vontlhe lava va nga hi valwi va yimpi va ngafa cikari ka vanhu,+ 17 Jehovha i no engeta aku ka mina: 18 ‘Nyamutlha u ta hundza hi lomu tikweni ga Mowabhi, ku nga Are. 19 Loku u chikela kusuhani ka vaAmoni, u nga va xanisi ne ku va vhuka, hakuva ndzi nga ta ku nyika ne nchumu tikweni ga vaAmoni kota tshomba, hakuva ndzi gi nyikile a vana va Loti kota tshomba yabye.+ 20 Legi gonawu gi wa woniwa kota tiko ga vaRefayime.+ (A kaleloko, a vaRefayime va wa tshama lomo niku a vaAmoni va wa tala ku va vitana ku vaZamzumima. 21 Va wa hi vanhu va ntamu, vo tala, ni vo leha a ku fana ni vaAnake+ kanilezvi Jehovha i no va hihirita mahlweni ka vaAmoni, va va hlongola va sala va tshama wutshan’wini gabye. 22 Hi zvalezvo a nga mahela a vana va Esawu, lava zvezvi va tshamako Seyire,+ laha a nga hihirita a vaHori+ mahlweni kabye kasi va va wutlela tiko gabye va sala va tshama wutshan’wini gabye kala ni nyamutlha lezvi. 23 A vaAvhima va wa tshama zvidhoropaneni kala Gaza.+ Va hanyile seyo kala va hihiritwa hi vaKaftore,+ lava va nga huma hi Kaftore,* va sala va tshama wutshan’wini gabye.)

24 “‘Sukani mu famba mu tsemakanya Nkova wa Arnoni.+ Wa zvi wona! Ndzi nyikele Sihoni,+ a muAmori, a hosi ya Hexbhoni, canjeni ga wena. Hikwalaho, sangula ku teka tiko gakwe ulwa naye. 25 Ka siku lego, ndzi ta maha lezvaku a vanhu vontlhe va nga lahasi ka matilo, lava va tozwa mahungu xungetano hi wena, vava ni hlenekera ni ku ku chava. Va ta jujeka kupima ni ku rurumela* hi kota ya wena.’+

26 “Makunu ndzi no rumela zvirun’wa hi le ciwuleni ca Kedhemote+ zviya ka hosi Sihoni, le Hexbhoni, ni mahungu ya kurula, yaku:+ 27 ‘Ndzi tsike ndzi tsemakanya hi lomu tikweni ga wena. Ndzi ta famba hi ruwa. Ndzi nga ta hambukela cineneni kutani cibhabheni.+ 28 Ndzi taga ntsena a zvakuga ni kunwa ntsena a mati lawa u to ndzi xavisela. Wena ndzi tsike ndzi hundza hi mikondzo 29 — hi zvalezvo va nga ndzi mahela a vana va Esawu lava va tshamako le Seyire ni vaMowabhi lava va tshamako le Are — kala ndzi tlhatuka a Jordhani ndzi nghena tikweni legi Jehovha, a Nungungulu wa hina, a hi nyikako.’ 30 Kanilezvi Sihoni, a hosi ya Hexbhoni, a nga hi tsikangi hi hundza, hakuva Jehovha, a Nungungulu wa n’wina, i no mu tsika a nonohisa a moya wakwe+ ni mbilu yakwe kasi a mu nyikela canjeni ga n’wina, kota lezvi zvi nga ha zvona nyamutlha.+

31 “Andzhako ka lezvo, Jehovha i te ngalo ka mina: ‘Ndzi sina ndzi sangulile ku ku nyika Sihoni ni tiko gakwe. Sangula ku teka tiko gakwe.’+ 32 A cikhati leci Sihoni a nga huma zvin’we ni vanhu vakwe vontlhe kasi ku ta tlhangana na hina alwa na hina le Jahaza,+ 33 Jehovha, a Nungungulu wa hina, i no mu nyikela canjeni ga hina; hikwalaho hi no mu hlula, yena ni vana vakwe zvin’we ni vontlhe a vanhu vakwe. 34 Ka cikhati caleco, hi no wutla wontlhe a madhoropa yakwe, hi lovisa a dhoropa gontlhe, a ku patsa ni vavanuna, ni vavasati, ni vanana. A hi tsikangi ne mun’we a pona.+ 35 Lezvi ntsena hi nga phanga zviva zva hina zvifuyo zvin’we ni muphango wa madhoropa lawa hi nga wutla. 36 A kusukela le Arowera,+ legi gi nga le mbhirini ya Nkova wa Arnoni (a ku patsa ni dhoropa legi gi nga le nkoveni) kala Gileyadhe, gi hava dhoropa gi ngava ni ntamu ku hundza hina. Jehovha, a Nungungulu wa hina, i ma nyikele wontlhe canjeni ga hina.+ 37 Kanilezvi a mu tshinelelangi a tiko ga vaAmoni,+ a mbhiri yontlhe ya Nkova wa Jabhoke+ ni madhoropa ya tiko ga zvitsunga kutani ni gihi wutshamu legi Jehovha, a Nungungulu wa hina, a beteleko.

3 “Andzhako ka lezvo, hi no jika hi kandziha hi Ndlela ya Bhaxani. Makunu Ogi, a hosi ya Bhaxani, i no huma ni vanhu vakwe vontlhe a hi khinga kasi a talwa na hina le Edreyi.+ 2 Hikwalaho, Jehovha i no ndzi byela, aku: ‘U nga mu chavi, hakuva ndzi ta mu nyikela canjeni ga wena, yena ni vanhu vakwe vontlhe, ni tiko gakwe, u mu maha zvalezvi u nga maha Sihoni, a hosi ya vaAmori, loyi a nga tshama le Hexbhoni.’ 3 Hikwalaho, Jehovha, a Nungungulu wa hina, i no nyikela Ogi, a hosi ya Bhaxani, ni vontlhe a vanhu vakwe canjeni ga hina, hi simama ku va hlasela kala ku nga sali ni mun’we. 4 Hi no wutla wontlhe a madhoropa yakwe. A ku na dhoropa ni gin’we hi nga kala ku va tekela. Ma wa hi 60 wa madhoropa tikweni gontlhe ga Argobha, wu nga mufumo wa Ogi le Bhaxani.+ 5 Wontlhe a madhoropa lawa ma wa vhikelwe khwatsi hi mimuro yo tlakuka, ni tivati, ni zvikwinyaro zvin’we ni zvidhoropana zvo tala le handle. 6 Kanilezvi hi no ma konela kuloviswa+ a ku khwatsi hi lezvi hi nga maha ka hosi Sihoni wa le Hexbhoni, hi lovisa a madhoropa wontlhe a ku patsa ni vavanuna, ni vavasati, ni vanana.+ 7 Hi no teka zvifuyo zvontlhe ni muphango wa madhoropa zviva zva hina.

8 “Ka cikhati caleco, hi no teka tiko ga tihosi timbiri ta vaAmori,+ leti ti nga hi cipandzeni ca Jordhani, kusukela Nkoveni wa Arnoni kala Citsungeni ca Hermoni,+ 9 (a citsunga leci a vaSidhoni va nga ci vitana ku Siriyoni, a vaAmori vaku Senira), 10 wontlhe a madhoropa ya le wutshan’wini go tlakuka, ni Gileyadhe gontlhe, ni Bhaxani gontlhe kala Saleka ni Edreyi,+ a madhoropa ya mufumo lowu wu nga lumba Ogi le Bhaxani. 11 Hakuva Ogi, a hosi ya Bhaxani, i wa hi yena wo gumesa a nga sele ka vaRefayime. A kaxawu yakwe yi wa mahilwe hi simbi* niku ya ha hi kona le Rabha wa vaAmoni. Yi na ni 9 wa mikono* a kuleha, ni mune wa mikono a kuanama hi kuya hi nkono lowu va nga tala ku pima hi wona. 12 Ka cikhati caleco, hi no teka a tshomba ya tiko legi: Kusukela ka tiko ga Arowera,+ legi gi gamekeneko ni Nkova wa Arnoni, ni khihlanya ga tiko ga zvitsunga ga Gileyadhe. A madhoropa ya kona ndzi no ma nyikela ka va ka Rubheni ni ka va ka Gadhi.+ 13 A cipandze leci ci nga sele ca Gileyadhe ni tiko gontlhe ga Bhaxani ga mufumo wa Ogi, ndzi no zvi nyikela ka khihlanya ga lixaka la ka Manase.+ A cipandze contlhe ca Argobha, leci ci lumbako a tiko ga Bhaxani, ci wa tiviwa kota tiko ga vaRefayime.

14 “Jayira,+ a n’wana wa Manase, i no teka a cipandze contlhe ca Argobha+ kala mbhinganweni wa vaGexure ni vaMaakate.+ A zvidhoropana zvontlhe zva Bhaxani i no zvi chula a vito gakwe, ku nga Havhote-Jayira,*+ kala ni nyamutlha lezvi. 15 Ndzi no nyikela a tiko ga Gileyadhe ka Makira.+ 16 Kusukela le Gileyadhe kala le Nkoveni wa Arnoni ndzi nyikile a va ka Rubheni ni va ka Gadhi+ — a mbhingano hi laha cikari ka nkova — zvi famba kala Jabhoke, ku nga nkova lowu wu nga mbhingano wa vaAmoni, 17 ni Arabha, ni Congo wa Jordhani ni mbhiri ya kona, kusukela le Kinereta kala le Bimbini ga Arabha, gi nga Bimbi ga Munyu,* lahasi ka Pisga, hi tlhelo ga mutsuwuka-gambo.+

18 “Hi kulandzela, ndzi no mu nyika a cileletelo leci: ‘Jehovha, a Nungungulu wa n’wina, i mu nyikile a tiko legi kasi mu gi fumela. Vontlhe a vavanuna va n’wina va ta hloma va tlhatuka a Jordhani mahlweni ka vamakabye va n’wina, a vaIzrayeli.+ 19 Ntsena a vasati va n’wina, ni vana va n’wina, ni zvifuyo zva n’wina (hakuva ndza zvi tiva lezvaku mu na ni zvifuyo zvo tala) va ta simama va tshama lomu madhoropeni lawa ndzi mu nyikileko, 20 kala Jehovha a va nyika kuhumula a vamakabye va n’wina, a ku fana ni lezvi a mu maheleko n’wina, kasi vonawu va fumela a tiko legi Jehovha, a Nungungulu wa n’wina, a to va nyika le tlhatuko wa Jordhani. Andzhako ka lezvo, a mun’we ni mun’wani wa n’wina i ta wuya tshombeni yakwe leyi ndzi mu nyikileko.’+

21 “Ka cikhati caleco, ndzi no leletela Joxuwa,+ ndziku: ‘U zvi wonile hi mahlo ya wena lezvi Jehovha, a Nungungulu wa wena, a zvi mahileko ka tihosi leti ta timbiri. Jehovha i ta maha zvalezvo ka mifumo yontlhe leyi u to hundza hi ka yona.+ 22 Mu nga va chavi hakuva Jehovha, a Nungungulu wa n’wina, hi yena a mu lwelako.’+

23 “Ka cikhati caleco, ndzi no khongotela Jehovha, ndziku: 24 ‘O Jehovha, Hosi ya Hombe, u sangulile ku komba a nandza ga wena a wukulu ga wena ni canja ga wena ga ntamu,+ hakuva hi wihi a nungungulu le matilweni kutani laha misaveni loyi a mahako mitiro ya ntamu a ku fana na wena ke?+ 25 Ndzi kombela ku u ndzi tsika ndzi tlhatuka ndzi ya wona a tiko ga ginene gi nga le tlhatuko wa Jordhani, a tiko legi ga ginene ga zvitsunga ni Lebhanoni.’+ 26 Kanilezvi Jehovha i wa ha ndzi zangarele hi kota ya n’wina,+ hikwalaho a nga ndzi ingisangi. Jehovha i te ngalo ka mina: ‘Zvi ringene! U nga ha tshuki u bhula na mina kambe hi mhaka leyi. 27 Kandziha le hehla ka Pisga,+ u cuwuka mupela-gambo, ni n’walungu,* ni dzongeni,* ni mutsuwuka-gambo, u wona tiko hi matihlo ya wena, hakuva u nga ta tlhatuka a congo lowu wa Jordhani.+ 28 Yimisa Joxuwa+ kota murangeli, u mu tiyisa hlanha ni ku mu nyika ntamu hakuva hi yena a to tlhatuka+ mahlweni ka vanhu lava niku hi yena a to va maha vaga a tshomba ya tiko legi u yako u ya gi wona.’ 29 Zvontlhe lezvi zvi mahekile na ha ha tshama nkoveni wu cuwukeneko ni Bhet-Peyori.+

4 “Makunu, wena Izrayeli, ingisa a milayo ni zviboho zva kulamula lezvi ndzi ku gondzisako kasi u zvi hlayisa u fela ku hanya,+ u nghena u fumela a tiko legi Jehovha, a Nungungulu wa vakokwani va wena, a ku nyikako. 2 Mu nga engeteli nchumu ka magezu lawa ndzi mu leletelako, hambu ku hungula nchumu ka wona;+ hlayisani a zvileletelo zva Jehovha, a Nungungulu wa n’wina, lezvi ndzi mu leletelako.

3 “A mahlo ya n’wina ma zvi wonile lezvi Jehovha a nga maha mhakeni ya Bhaali wa Peyori; Jehovha, a Nungungulu wa n’wina, i hihiritile cikari ka n’wina a vanhu vontlhe lava va landzeleko Bhaali wa Peyori.+ 4 Kanilezvi n’wina mu namarelako ka Jehovha, a Nungungulu wa n’wina, nyamutlha n’wentlhe ma hanya. 5 Ma zvi wona, ndzi mu gondzisile a milayo ni zviboho zva kulamula+ kota lezvi Jehovha, a Nungungulu wa mina, a ndzi leleteleko kasi mu zvi hlayisa tikweni legi mu to ya gi fumela. 6 Mu fanele ku zvi landzela khwatsi,+ hakuva zvi ta komba ku mu vanhu vo tlhariha+ ni vo zwisisa+ mahlweni ka matiko lawa ma to zvizwa na ku wulawuliwa hi yontlhe a milayo leyi, maku: ‘A tiko legi ga hombe hakunene i tiko ga vanhu vo tlhariha ni vo zwisisa.’+ 7 Hakuva hi gihi tiko ga hombe gi nga ni vanungungulu va nga kusuhani ka gona a ku fana ni lezvi Jehovha, a Nungungulu wa hina, a nga kusuhani ka hina contlhe cikhati leci hi mu vitanako ke?+ 8 Kona hi gihi tiko ga hombe gi nga ni milayo yo lulama ni zviboho zva kulamula zvo fana ni Nayo wontlhe lowu ndzi wu vekako mahlweni ka n’wina nyamutlha ke?+

9 “Ntsena ti wonele, u chela kota hi wena wutsumbu* kasi u nga rivali a zvilo lezvi a mahlo ya wena ma zvi wonileko ni lezvaku zvi nga suki mbilwini ya wena ka masiku wontlhe ya kuhanya ka wena. U fanele ku zvi tivekisa kambe ka vana va wena ni ka vazukulu va wena.+ 10 Ka siku legi u nga yimile mahlweni ka Jehovha, a Nungungulu wa wena, le Horebhe, Jehovha i te ngalo ka mina: ‘Tsombanisa a vanhu mahlweni ka mina kasi vazwa a timhaka ta mina+ va fela ku gondza ku ndzi chava+ ka masiku wontlhe lawa va hanyako laha misaveni va tlhela va gondzisa vana vabye.’+

11 “Hikwalaho, mu no tshinela mu ta yima lahasi ka citsunga. A citsunga ci wo vhura ndzilo kala le matilweni;* ku wa phumile, na ku hi ni refu ni munyama wo tshisa.+ 12 Jehovha i no sangula ku wulawula na n’wina hi lomu ndzilweni.+ Mu zwile magezu kanilezvi a mu wonangi nchumu+ — mu nozwa gezu ntsena.+ 13 I no mu byela civhumelwano cakwe+ leci a mu leleteleko a ku ci hlayisa — ku nga Khume ga Milayo.*+ Andzhako ka lezvo, i no yi tsala ka timbila timbiri ta maribye.+ 14 Ka cikhati caleco, Jehovha i no ndzi leletela lezvaku ndzi mu gondzisa milayo ni zviboho zva kulamula lezvi mu faneleko ku zvi hlayisa tikweni legi mu to nghena mu gi fumela.

15 “Hikwalaho, kota lezvi mu nga kala ku wona nchumu ka siku legi Jehovha a nga wulawula na n’wina le Horebhe, hi lomu cikari ka ndzilo, chelani kota ka n’wina wutsumbu* 16 kasi mu nga ti nyenyezisi hi ku ti mahela ni cihi cifananiso ci kehlilweko ca ni gihi tshamela, ku ngava cifananiso ca cinuna kutani ca cisati,+ 17 ni cifananiso ca ni cihi cihari ca laha misaveni kutani cifananiso ca ni cihi cinyanyani ci hahako le tilweni,+ 18 ni cifananiso ca ni cihi cikokakoka* ca laha misaveni kutani cifananiso ca ni yihi njhanjhi ya lomu matini lahasi ka misava.+ 19 Loku u tlakusa mahlo ya wena le matilweni, u wona gambo, ni hweti ni tinyeleti — wontlhe a mabutho ya matilo — u nga zvi naveli, u zvi khozela ne ku zvi tirela.+ Jehovha, a Nungungulu wa wena, i zvi nyikele ka wontlhe a matiko lawa ma nga lahasi ka matilo. 20 Kanilezvi n’wina, hi n’wina lava Jehovha a nga mu teka a mu humesa lomu ka ndzhimbo* wa ku nyekisa tisimbi, a tikweni ga Gibhite, kasi muva vanhu vakwe, a tshomba yakwe,+ kota lezvi mu nga zvona nyamutlha.

21 “Jehovha i no ndzi zangarela hi kota ya n’wina,+ a hlambanya lezvaku ndzi nga ta tlhatuka Jordhani hambu ku nghena tikweni ga ginene legi Jehovha, a Nungungulu wa wena, a ku nyikako kota tshomba.+ 22 Ndzi tafa tikweni legi; ndzi nga ta tlhatuka Jordhani+ kanilezvi n’wina mu ta tlhatuka mu ya fumela a tiko legi ga ginene. 23 Ti woneleni kasi mu nga rivali a civhumelwano ca Jehovha, a Nungungulu wa n’wina, leci a ci mahileko na n’wina,+ ne mu nga ti maheli cifananiso ci kehlilweko ca ni wihi nchumu lowu Jehovha, a Nungungulu wa n’wina, a mu beteleko.+ 24 Hakuva Jehovha, a Nungungulu wa n’wina, i ndzilo wu khadamulako,+ a Nungungulu loyi a londzako ku khozelwa yece.+

25 “Loku u pswala vana ni vazukulu, na mu hanyile cikhati co leha tikweni mu gumesa mu ti wonha hi ku maha cifananiso ci kehlilweko+ ca ni gihi tshamela ni ku maha zvakubiha mahlweni ka Jehovha, a Nungungulu wa n’wina, kasi ku mu zangarisa,+ 26 nyamutlha ndza teka matilo ni misava kota vakustumunyu va ku mu kecara lezvaku futsi mu ta hatlisa mu lova ka tiko legi mu tlhatukako Jordhani mu ya gi fumela. Mu nga ta tshama cikhati co leha ka gona kanilezvi mu ta loviswa mu ku bhi.+ 27 Jehovha i ta mu hangalasa cikari ka matiko+ niku va tsongwani cikari ka n’wina va to pona+ matikweni lawa Jehovha a to ngha a mu yisile ka wona. 28 Kwaseyo mu ta tirela a vanungungulu va tisinya ni va maribye vo mahiwa hi mandla ya vanhu,+ a vanungungulu va ku a va woni, ne a va ingisi, ne a vagi, ne a vazwi masema.

29 “Loku u hlota Jehovha, a Nungungulu wa wena, na u hi kwaseyo, kunene u ta mu kuma,+ loku u mu vitana hi mbilu ya wena yontlhe ni muhefemulo* wa wena wontlhe.+ 30 Ka cikhati leco, laha u tova kuxanisekeni ka hombe na u humelelwe hi zvontlhe a zvilo lezvi, u ta tlhelela ka Jehovha, a Nungungulu wa wena, u ingisa gezu gakwe.+ 31 Hakuva Jehovha, a Nungungulu wa wena, i Nungungulu wa wuxinji.+ A nga ta ku tsika ne ku ku lovisa hambu ku rivala civhumelwano leci a hlambanyileko ka vakokwani va wena.+

32 “Makunu, wutisa xungetano hi masiku ya kale, mahlweni ka nguva ya wena, kusukela ka siku legi Nungungulu a nga vanga munhu laha misaveni; lavetela kusukela ka magemeta-musi man’we ya matilo kala ka man’wani magemeta-musi ya matilo. Ku tshukile ku humelela a zvilo zvo kulisa lezvi hambu ku tshuka ku zwala zvilo zvo kota lezvi ke?+ 33 Xana kuve ni van’wani vanhu va tshukileko vazwa a gezu ga Nungungulu hi lomu ndzilweni, a ku khwatsi hi lezvi wena u gi zwileko, va simama va hanya ke?+ 34 Kona Nungungulu i tshukile a zama ku wutla vanhu cikari ka tiko hi kulamula, ni zviwoniso, ni zvihlamaliso,+ ni yimpi,+ ni canja ga ntamu,+ ni woko gi nawulutilweko ni mitiro yo chavisa+ a ku fana ni lezvi Jehovha, a Nungungulu wa n’wina, a mu maheleko le Gibhite na mu zvi wona ke? 35 N’wina mu kombilwe a zvilo lezvi kasi mu zvi tiva lezvaku Jehovha hi yena a Nungungulu wa lisine;+ a ku na mun’wani ahandle ka yena.+ 36 I ku mahile uzwa gezu gakwe hi le matilweni kasi ku ku kawuka; laha misaveni i ku wonisile a ndzilo wakwe wa hombe u tlhela uzwa a magezu yakwe na ma huma hi lomu ndzilweni.+

37 “Kota lezvi a randzileko a vakokwani va wena a hlawula a pswalo* wabye andzhako kabye,+ i ku humesile Gibhite hi ntamu wa hombe. 38 I no hlongola mahlweni ka wena a matiko ya hombe ni ya ntamu a ku hundza wena, kasi a ku nghenisa tikweni gabye ni ku ku nyika gona kota tshomba, a ku khwatsi hi lezvi zvi nga zvona nyamutlha.+ 39 Makunu zvi tive nyamutlha u tlhela u zvi hlayisa mbilwini ya wena lezvaku Jehovha i Nungungulu wa lisine le hehla matilweni ni lahasi misaveni.+ A ku na mun’wani.+ 40 Hlayisa milayo yakwe ni zvileletelo zvakwe lezvi ndzi ku nyikako nyamutlha kasi zvi ku fambela khwatsi, wena ni vana va wena andzhako ka wena, u fela ku tshama cikhati co leha tikweni legi Jehovha, a Nungungulu wa wena, a ku nyikako.”+

41 Ka cikhati caleco, Mosi i no hlawula madhoropa manharu hi tlhelo ga mutsuwuka-gambo wa Jordhani,+ 42 kasi loku a munhu a phazama a daya munhu-kulobye na ku hi ku i wa nga mu vengi,+ a tsutsumela ka gin’we ga madhoropa lawo kasi a hanya.+ 43 A madhoropa ya kona hi lawa: Bhezera,+ le ciwuleni ka wutshamu go tlakuka, kasi giva ga va ka Rubheni; ni Ramote,+ le Gileyadhe, kasi giva ga va ka Gadhi; ni Golani,+ le Bhaxani, kasi giva ga va ka Manase.+

44 Lowu i Nayo+ lowu Mosi a wu vekileko mahlweni ka vanhu va ka Izrayeli. 45 Lezvi zvikhumbuxeto, ni milayo ni zviboho zva kulamula lezvi Mosi a nyikileko a vaIzrayeli andzhako ka ku huma hi Gibhite,+ 46 le cipandzeni ca Jordhani, nkoveni lowu wu cuwukeneko ni Bhet-Peyori,+ tikweni ga Sihoni, a hosi ya vaAmori, loyi a nga tshama Hexbhoni,+ loyi Mosi ni vaIzrayeli va nga mu hlula andzhako ka ku huma hi Gibhite.+ 47 Va no fumela a tiko gakwe ni tiko ga Ogi,+ a hosi ya Bhaxani, a tihosi timbiri ta vaAmori leti ti nga hi cipandzeni ca mutsuwuka-gambo wa Jordhani, 48 kusukela Arowera,+ legi gi nga mbhirini ya Nkova wa Arnoni, kala Citsungeni ca Siyoni, ku nga Hermoni,+ 49 ni Arabha gontlhe, cipandzeni ca mutsuwuka-gambo wa Jordhani, kala Bimbini ga Arabha,* lahasi ka Pisga.+

5 Andzhako ka lezvo, Mosi i no vitanisa a vaIzrayeli vontlhe, a taku kabye: “O Izrayeli, zwana a milayo ni zviboho zva kulamula lezvi ndzi mu tivisako nyamutlha. Mu fanele ku zvi gondza mu tlhela mu zvi maha. 2 Jehovha, a Nungungulu wa hina, i mahile civhumelwano na hina le Horebhe.+ 3 Jehovha a nga mahangi a civhumelwano leci ni vakokwani va hina kanilezvi i ci mahile na hina, hontlheni hina hi hanyako nyamutlha. 4 Jehovha i wulawulile na n’wina nghohe ni nghohe le citsungeni na a hi lomu ndzilweni.+ 5 Ka cikhati leco, ndzi wa yimile hi laha cikari ka n’wina na Jehovha+ kasi ndzi mu tlhamusela a mhaka ya Jehovha, hakuva mu wa chava hi kota ya ndzilo, hikwalaho a mu kandzihangi citsunga.+ I te ngalo:

6 “‘Hi mina Jehovha, a Nungungulu wa wena, loyi a ku humesileko tikweni ga Gibhite, a ndlwini ya wukhumbi.+ 7 U nga tshuki uva ni van’wani vanungungulu ahandle ka mina.*+

8 “‘U nga ti maheli cifananiso ci kehlilweko+ kutani nchumu wo fana ni cihi cilo ci nga le hehla matilweni, kutani lahasi misaveni, kutani lomu matini lahasi ka misava. 9 U nga zvi khizameli ne u nga vhumeli ku kucetelwa u zvi tirela,+ hakuva mina Jehovha, a Nungungulu wa wena, ndzi Nungungulu loyi a londzako ku khozelwa yece,+ loyi a nehako tsayiselelo wa cigoho ca vapapayi hehla ka vana vabye, kala ka cizukulwana ca wunharu ni kala ka cizukulwana ca wumune ca lava va ndzi vengako,+ 10 kanilezvi a kombisako lirandzo li nga mbheliko kala ka cizukulwana ca wu 1000 ca lava va ndzi randzako ni ku hlayisa a zvileletelo zva mina.

11 “‘U nga hlakani hi vito ga Jehovha, a Nungungulu wa wena,+ hakuva Jehovha a nga ta tsika ku tsayisa ni wihi loyi a hlakanako hi vito gakwe.+

12 “‘Hlayisa a siku ga sabhadho kasi u gi basisa, kota lezvi Jehovha, a Nungungulu wa wena, a ku leleteleko.+ 13 U ta maha mitiro ya wena yontlhe hi 6 wa masiku,+ 14 kanilezvi a siku ga wu 7 i sabhadho ga Jehovha, a Nungungulu wa wena.+ U nga tiri nchumu,+ wena, hambu mufana wa wena, ne nhanyana wa wena, ne khumbi ya wena ya cinuna ne ya cisati, ne dhuna ga wena ga homu, ne mbongola ya wena, ne ni cin’we ca zvifuyo zva wena, ne muluveli wa wena loyi a nga cikari ka madhoropa* ya wena,+ kasi a khumbi ya wena ya cinuna ni khumbi ya wena ya cisati ti fela ku humula a ku fana na wena.+ 15 Alakanya lezvaku u wa hi khumbi tikweni ga Gibhite ni lezvaku Jehovha, a Nungungulu wa wena, i ku humesile leyo hi canja ga ntamu ni woko gi nawulutilweko.+ Hi caleco ci mahileko ku Jehovha, a Nungungulu wa wena, a ku leletela lezvaku u hlayisa a siku ga sabhadho.

16 “‘Kombisa cichavo ka papayi wa wena ni ka mamani wa wena,+ kota lezvi Jehovha, a Nungungulu wa wena, a ku leleteleko, kasi u hanya a cikhati co leha u tlhela u kateka* tikweni legi Jehovha, a Nungungulu wa wena, a ku nyikako.+

17 “‘U nga dayi.+

18 “‘U nga mahi wubhayi.+

19 “‘U nga yivi.+

20 “‘U nga nyiki wukustumunyu ga mawunwa ga ku vhukela a munhu-kuloni.+

21 “‘U nga naveli a sati wa wanuna-kuloni.+ U nga naveli hi makangwa a yindlu ya munhu-kuloni, ne a simu gakwe, ne khumbi yakwe ya cinuna ne ya cisati, ne dhuna gakwe ga homu, ne mbongola yakwe, hambu ni wihi nchumu wa munhu-kuloni.’+

22 “Jehovha i wulile a zvileletelo* lezvi ka bandla gontlhe ga n’wina le citsungeni, hi lomu ndzilweni, ni lomu ka refu, ni lomu ka munyama wo tshisa,+ hi gezu ga hombe niku a nga engetelangi nchumu. Hi kulandzela, i no zvi tsala laha ka timbila timbiri ta maribye a ndzi nyika.+

23 “Kanilezvi zvalezvi mu ngazwa a gezu na gi huma hi lomu munyameni, a citsunga na ci kari ci vhura ndzilo,+ tontlhe a tihloko ta tixaka ta n’wina ni madhota va no tshinela ka mina. 24 N’wina mu te: ‘Jehovha, a Nungungulu wa hina, i hi kombile a kungangamela kakwe ni wukulu gakwe niku hi zwile a gezu gakwe na gi huma hi lomu ndzilweni.+ Nyamutlha hi zvi wonile lezvaku Nungungulu a nga wulawula ni munhu, a munhu loye a simama a hanya.+ 25 Makunu hi lava ku fela yini ke? Hakuva a ndzilo lowu wa hombe wu nga hi khadamula. Loku hi simama kuzwa a gezu ga Jehovha, a Nungungulu wa hina, hi lisine hi tafa. 26 Hakuva himani cikari ka vanhu* vontlhe a zwileko a gezu ga Nungungulu a hanyako na gi wulawula hi lomu ndzilweni a ku fana na hina kanilezvi a simama a hanya ke? 27 Tshinela wena u yazwa tontlhe a timhaka leti Jehovha, a Nungungulu wa hina, a lavako ku wula. Ku tava wena u to wuya u ta hi byela zvontlhe lezvi Jehovha, a Nungungulu wa hina, a to ku byela. Hina hi ta ingisela hi tlhela hi maha.’+

28 “Hikwalaho, Jehovha i nozwa timhaka leti mu nga ndzi byela. Jehovha i te ngalo ka mina: ‘Ndzi ti zwile a timhaka leti a vanhu lava va ku byelileko. Zvontlhe lezvi va nga wula zvi nene.+ 29 Mayiwako loku contlhe cikhati va wova ni timbilu ta cichavo hi mina+ ni ku hlayisa zvontlhe a zvileletelo zva mina;+ zvi wa ta va fambela khwatsi, vona ni vana vabye kala kupindzuka!+ 30 Famba u ya va byela, uku: “Tlhelani matendeni ya n’wina.” 31 Kanilezvi wena u fanele ku yima laha na mina kasi ndzi ku byela zvontlhe a zvileletelo, ni milayo, ni zviboho zva kulamula lezvi u faneleko ku va gondzisa kasi va zvi hlayisa tikweni legi ndzi va nyikako lezvaku va gi fumela.’ 32 Makunu, n’wina, ti woneleni mu maha kota lezvi Jehovha, a Nungungulu wa n’wina, a mu leleteleko.+ Mu nga hambuki muya cineneni kutani cibhabheni.+ 33 Fambani hi kumbhelela hi ndlela leyi Jehovha, a Nungungulu wa n’wina, a mu leleteleko ku famba hi yona+ kasi mu hanya, mu humelela, mu tlhela mu endzelekisa masiku ya n’wina tikweni legi mu to gi fumela.+

6 “Makunu lezvi zvileletelo, ni milayo, ni zviboho zva kulamula lezvi Jehovha, a Nungungulu wa n’wina, a leleteleko lezvaku mu gondzisiwa kasi mu zvi hlayisa a cikhati leci mu to tlhatuka mu nghena tikweni legi mu to ya gi fumela. 2 I mahile lezvo kasi u chava Jehovha, a Nungungulu wa wena, ni ku hlayisa yontlhe a milayo yakwe ni zvileletelo zvakwe lezvi ndzi ku leletelako — wena, ni n’wana wa wena, ni zukulu wa wena+ — masikwini wontlhe ya kuhanya ka wena, kasi u hanya a cikhati co leha.+ 3 Makunu demba ndleve, wena Izrayeli, u tlhela u zvi landzela khwatsi kasi u kateka, mu tlhela mu tala tikweni gi khulungako a masi ni wulombe, kota lezvi Jehovha, a Nungungulu wa vakokwani va wena, a ku tsumbisileko.

4 “Ingisa, wena Izrayeli: Jehovha, a Nungungulu wa hina, i Jehovha mun’we.+ 5 Randza Jehovha, a Nungungulu wa wena, hi mbilu ya wena yontlhe, ni muhefemulo*+ wa wena wontlhe, ni ntamu wa wena wontlhe.+ 6 A timhaka leti ndzi ku leletelako nyamutlha ti fanele kuva mbilwini ya wena, 7 niku u fanele ku ti gondzisa* vana va wena,+ u wulawula hi tona loku u tshamile lomu ndlwini ya wena, ni loku u kari u famba laha ndleleni, ni loku u etlela, ni loku u vhuka.+ 8 Ti bohe canjeni ga wena tiva cialakanyiso niku ti fanele kuva cikombiso cikandzeni* ca wena.+ 9 Ti tsale lomu ka tiaro ta yindlu ya wena ni lomu tinyangweni ta wena.

10 “A cikhati leci Jehovha, a Nungungulu wa wena, a to ku nghenisa ka tiko legi a hlambanyileko ka vakokwani va wena, Abrahama, na Isaka, na Jakobe, a ku ku nyika gona+ — a madhoropa ya hombe ni ya manene lawa ma nga akiwangiko hi wena,+ 11 ni tiyindlu to tala hi tixaka tontlhe ta zvilo zva zvinene lezvi u nga zvi tirelangiko, ni mathangi lawa u nga kelangiko, ni zvivhina* ni miolivha leyi u nga byalangiko — loku u gile u xura,+ 12 ti wonele kasi u nga rivali Jehovha+ loyi a ku humesileko tikweni ga Gibhite, a ndlwini ya wukhumbi. 13 U fanele ku chava Jehovha, a Nungungulu wa wena,+ niku hi yena u faneleko ku mu tirela,+ u hlambanya hi vito gakwe.+ 14 U nga landzeli van’wani vanungungulu, ne mun’we wa vanungungulu va matiko lawa ma ku randzeleko,+ 15 hakuva Jehovha, a Nungungulu wa wena, loyi a nga cikari ka wena, i Nungungulu loyi a londzako ku khozelwa yece.+ Loku wo landzela a van’wani vanungungulu, a zanga ya Jehovha, a Nungungulu wa wena, yi ta vhura yi ku vhukela,+ a ku lovisa laha misaveni.+

16 “Mu nga ringi Jehovha, a Nungungulu wa n’wina,+ a ku khwatsi hi lezvi mu nga mu ringa le Masa.+ 17 Ti karateleni ku hlayisa a zvileletelo zva Jehovha, a Nungungulu wa n’wina, ni zvikhumbuxeto zvakwe, ni milayo yakwe, lezvi a mu leleteleko ku zvi hlayisa. 18 Maha zvakululama ni zvazvinene mahlweni ka Jehovha, u fela ku kateka u tlhela u nghena u fumela a tiko ga ginene legi Jehovha a hlambanyileko ka vakokwani va wena,+ 19 hi ku hlongola vontlhe a valala va wena mahlweni ka wena, kota lezvi Jehovha a tsumbisileko.+

20 “Laha a n’wana wa wena a to ku wutisa cikhatini ci tako, aku: ‘Zvi wula yini a zvikhumbuxeto, ni milayo, ni zviboho zva kulamula lezvi Jehovha, a Nungungulu wa hina, a mu leleteleko?’ 21 u ta byela a n’wana wa wena, uku: ‘Hi wa hi tikhumbi ta Faro le Gibhite, kanilezvi Jehovha i no hi humesa le Gibhite hi canja ga ntamu. 22 Jehovha i no simama ku rumela zviwoniso, ni zvihlamaliso zva hombe ni zvi hahlulako, hehla ka Gibhite,+ ni hehla ka Faro, ni hehla ka wontlhe a ngango wakwe na hi zvi wona.+ 23 I no hi humesa seyo kasi a hi tisa laha a fela ku hi nyika a tiko legi a hlambanyileko ka vakokwani va hina.+ 24 Makunu Jehovha i no hi leletela a ku hlayisa yontlhe a milayo leyi hi tlhela hi chava Jehovha, a Nungungulu wa hina, kasi zvi hi fambela khwatsi kala kupindzuka,+ hi fela ku simama hi hanya,+ kota lezvi ha ha hanyako ni nyamutlha. 25 Hi ta wuliwa vo lulama loku hi landzela khwatsi a zvileletelo lezvi zvontlhe hi ku ingisa Jehovha, a Nungungulu wa hina, kota lezvi a hi leleteleko.’+

7 “Laha Jehovha, a Nungungulu wa wena, a to ku nghenisa ka tiko legi u lavako ku nghena u gi fumela,+ i ta tlhela a hlongola matiko ya vanhu vo tala mahlweni ka wena:+ A vaHiti, ni vaGirgaxi, ni vaAmori,+ ni vaKhanani, ni vaPerezi, ni vaHivhi ni vaJebhusi,+ ma nga 7 wa matiko ya vanhu vo tala ni ya ntamu a ku hundza wena.+ 2 Jehovha, a Nungungulu wa wena, i ta ma nyikela ka wena, niku wena u ta ma hlula.+ U fanele ku ma lovisa.+ U nga mahi civhumelwano nawo ne u nga ma zweli wusiwana.+ 3 U nga mahi navo a wuxaka ga kutekana.* U nga nyikeli a vanhanyana va wena ka vafana vabye kutani ku teka vanhanyana vabye vava vasati va vafana va wena.+ 4 Hakuva va ta hambukisa a vafana va wena va ndzi fularela va ya tirela van’wani vanungungulu.+ Makunu a zanga ya Jehovha yi ta vhura hehla ka n’wina, a ku lovisa hi kuhatlisa.+

5 “Kanilezvi lezvi mu to maha ka matiko lawo hi lezvi: Khungumulelani a maalati yabye, mu fayetela a mapilari yabye yo basa,*+ mu tsemelela a tisinya tabye to basa*+ mu tlhela mu hisa a zvifananiso zvabye zvi kehlilweko.+ 6 Hakuva n’wina mu vanhu va basileko ka Jehovha, a Nungungulu wa n’wina, niku Jehovha, a Nungungulu wa n’wina, i mu hlawulile kasi muva vanhu vakwe, ina, a tshomba yakwe yo hlawuleka, cikari ka matiko wontlhe lawa ma nga laha misaveni.+

7 “A hi ku khwatsi mu wa no tala ku hundza matiko wontlhe a kuza Jehovha a mu kombisa lirandzo a tlhela a mu hlawula,+ hakuva mu wa hi n’wina va vatsongwani nguvhu ka wontlhe matiko.+ 8 Kanilezvi kuve hi kota ya lezvi Jehovha a mu randzileko ni lezvi a hlayisileko a cihlambanyo leci a mahileko ka vakokwani va n’wina.+ Hikwalaho, Jehovha i mu humesile hi canja ga ntamu kasi a ku tlhatlhisa ndlwini ya wukhumbi,+ canjeni ga Faro, a hosi ya Gibhite. 9 Wena wa zvi tiva khwatsi lezvaku Jehovha, a Nungungulu wa wena, i Nungungulu wa lisine ni wo tsumbeka, a hlayisako civhumelwano cakwe ni lirandzo li nga mbheliko kala ka 1000 wa zvizukulwana zva lava va mu randzako ni ku hlayisa a zvileletelo zvakwe.+ 10 Kanilezvi lava va mu vengako, i ta va tlhelisela nghoheni yabye hi ku va lovisa.+ A nga ta hlwela ku vhukela lava va mu vengako; i ta va tlhelisela nghoheni yabye. 11 Hikwalaho, ti wonele u hlayisa a zvileletelo, ni milayo, ni zviboho zva kulamula lezvi ndzi ku leletelako nyamutlha, u zvi maha.

12 “Loku u simama ku demba ndleve ka zvileletelo lezvi zva kulamula ni loku u zvi hlayisa u tlhela u zvi maha, Jehovha, a Nungungulu wa wena, i ta hlayisa a civhumelwano ni lirandzo li nga mbheliko leli a hlambanyileko ka vakokwani va wena. 13 I ta ku randza, a ku katekisa ni ku ku andzisa. I ta ku katekisa hi vanana vo tala,+ ni pfuno wa misava ya wena — a timbewu ta wena, ni vhinyo ya wena ya yiswa, ni mafura ya wena+ — ni marole ya tihomu ta wena, ni tiyivhana ta tiyivhu ta wena, a tikweni legi a hlambanyileko ka vakokwani va wena a ku ku nyika gona.+ 14 U tava loyi a katekileko nguvhu ka matiko wontlhe.+ I hava wanuna kutani wasati cikari ka wena a to vhumala n’wana, ne hambu a mitlhambi ya wena yi nga ta tshama yi nga hi na vana.+ 15 Jehovha i ta fuvisa mababyi wontlhe cikari ka wena niku a nga ta tisa hehla ka wena ne wubabyi gin’we go tshisa ga lawa u ma tivileko Gibhite.+ Kanilezvi i ta ma tisa hehla ka vontlhe lava va ku vengako. 16 U ta lovisa* a matiko wontlhe lawa Jehovha, a Nungungulu wa wena, a to ma nyikela ka wena.+ U* nga va tsetsi+ ne u nga tireli vanungungulu vabye,+ hakuva lezvo zvi tava ntlhamu ka wena.+

17 “Loku u wula mbilwini ya wena, uku: ‘A matiko lawa ma hi hundza hi kutala. Ndzi ta ma hlongolisa kuyini ke?’+ 18 u nga ma chavi.+ Ti alakanyise lezvi Jehovha, a Nungungulu wa wena, a mahileko ka Faro ni ka Gibhite gontlhe,+ 19 ni kulamula ka hombe loku u ku wonileko hi mahlo ya wena, ni zviwoniso, ni zvihlamaliso,+ ni canja ga ntamu, ni woko gi nawulutilweko, legi Jehovha, a Nungungulu wa wena, a ku humesileko hi gona.+ Jehovha, a Nungungulu wa wena, i ta maha zvalezvo ka wontlhe matiko lawa u ma chavako.+ 20 Jehovha, a Nungungulu wa wena, i ta rumela gome* hehla kabye, kala lava va to sala+ ni lava va to fihlala va lova mahlweni ka wena. 21 U ngavi ni hlenekera hi kota yabye, hakuva Jehovha, a Nungungulu wa wena,+ i zvin’we na wena, a Nungungulu wa hombe ni wo chaviseka.+

22 “Jehovha, a Nungungulu wa wena, i ta hlongola a matiko lawa hi kutsongwani-kutsongwani mahlweni ka wena.+ U nga ta vhumelelwa ku ma lovisa hi kuhatlisa, kasi a zvihari zva khwati zvi nga pswalelani zvi ku vhukela. 23 Jehovha, a Nungungulu wa wena, i ta ma nyikela ka wena u ma hlula hi kumbhelela kala ma hihiritwa.+ 24 I ta nyikela tihosi ta kona canjeni ga wena;+ wena u ta fuvisa a mavito ya tona lahasi ka matilo.+ I hava a to yima mahlweni ka wena+ kala u va fuvisa.+ 25 Mu fanele ku hisa hi ndzilo a zvifananiso zvi kehlilweko zva vanungungulu vabye.+ U nga naveli prata ni ouro yi nga ka zvona hambu ku teka yiva ya wena,+ kasi yi ngavi ntlhamu ka wena, hakuva zvilo zvo nyenyeza ka Jehovha, a Nungungulu wa wena.+ 26 U nga nghenisi a nchumu wo nyenyeza lomu ndlwini ya wena, hi ndlela leyo u hundzuka nchumu wu konelweko kuloviswa a ku fana nawo. U fanele ku zvi nyenya nguvhu u tlhela u zvi venga hi kumbhelela, hakuva zvilo zvi konelweko kuloviswa.

8 “Chelani kota mu hlayisa zvileletelo zvontlhe lezvi ndzi mu nyikako nyamutlha, kasi mu simama mu hanya+ ni ku andza mu tlhela mu nghena mu fumela tiko legi Jehovha a hlambanyileko ka vakokwani va n’wina.+ 2 Alakanya a ndlela yo leha leyi Jehovha, a Nungungulu wa wena, a ku fambisileko hi yona a malembe lawa ya 40 lomu ciwuleni,+ kasi a ku gondzisa a kutikoramisa, a ku ringa,+ na a lava ku tiva lezvi zvi nga hi mbilwini ya wena,+ kasi a wona ku u ta hlayisa a zvileletelo zvakwe ke. 3 Hikwalaho, i no ku gondzisa a kutikoramisa hi ku ku tsika u xoka hi ndlala,+ ni ku ku wundla hi mana+ ya ku ne wena, hambu a vapapayi va wena va wa nga ma tivi, kasi u zvi tiva lezvaku a munhu a nga hanyi hi pawa yoce, kanilezvi hi timhaka tontlhe ti humako non’wini wa Jehovha.+ 4 A tinguwo leti u nga kari u boha a ti hlakalangi, ne hambu mikondzo ya wena a yi vhimbangi ka malembe lawa ya 40.+ 5 Wa zvi tiva khwatsi mbilwini ya wena lezvaku Jehovha, a Nungungulu wa wena, i wa ku kawuka a ku fana ni munhu a kawukako a n’wana wakwe.+

6 “Makunu hlayisa a zvileletelo zva Jehovha, a Nungungulu wa wena, hi ku famba tindleleni takwe ni ku mu chava. 7 Hakuva Jehovha, a Nungungulu wa wena, i kari a ku nghenisa tikweni ga ginene,+ a tiko gi nga ni minonga ya mati,* ni zvibuka, ni tihlowo ta mati* ma khulungako lomu nkoveni ni tikweni ga zvitsunga, 8 a tiko ga trigo ni sevhadha, ni ga mivhina,* ni ga mikuwu, ni ga miromazeira,+ a tiko ga mafura ya olivha, ni wulombe,+ 9 a tiko ga ku a zvakuga zvi nga ta mbhela niku u nga ta vhumala nchumu, a tiko legi a maribye ya kona ma nga simbi, legi u to kela kobre lomu zvitsungeni zva gona.

10 “Loku uga u xura, dhumisa Jehovha, a Nungungulu wa wena, hi kota ya tiko ga ginene legi a ku nyikileko.+ 11 Ti wonele kasi u nga rivali Jehovha, a Nungungulu wa wena, hi ku tsika ku hlayisa a zvileletelo zvakwe, ni zviboho zvakwe zva kulamula, ni milayo yakwe leyi ndzi ku leletelako nyamutlha. 12 Laha u toga u xura, u aka tiyindlu ta tinene u tshama ka tona,+ 13 ni laha a tihomu ta wena ni tiyivhu ta wena ti to pswalelana, ni laha a prata ya wena ni ouro ya wena zvi to engeteleka uva ni zvilo zvontlhe, 14 u nga tsiki mbilu ya wena yi ti tlakusa+ yi ku maha u rivala Jehovha, a Nungungulu wa wena, loyi a ku humesileko tikweni ga Gibhite, a ndlwini ya wukhumbi,+ 15 loyi a ku tsemakanyisileko ciwula ca hombe ni co tshisa, ci nga ni tinyoka ta wuxungu*+ ni tihume, ni misava yo woma yo kala mati. I humesile mati hi ka ribye go tiya ma khulunga,+ 16 a ku wundla hi mana+ lomu ciwuleni, ya ku a vapapayi va wena va wa nga ma tivi, kasi a ku gondzisa a kutikoramisa+ ni ku ku ringa u fela ku vhuneka cikhatini ci tako.+ 17 Loku u wula mbilwini ya wena, uku: ‘Ndzi kumile a tshomba leyi hi ntamu wa mina ni ntamu wa canja ga mina’,+ 18 alakanya lezvaku hi Jehovha, a Nungungulu wa wena, loyi a ku nyikako ntamu wa ku ti lavela titshomba,+ a fela ku tatisa civhumelwano cakwe leci a hlambanyileko ka vakokwani va wena, kota lezvi zvi wonekako nyamutlha.+

19 “Loku wo tshuka u rivala Jehovha, a Nungungulu wa wena, u landzela van’wani vanungungulu, u va tirela u tlhela u va khizamela, ndza mu tlharihisa nyamutlha lezvaku hakunene mu ta lova.+ 20 Loku mu nga ingisi a gezu ga Jehovha, a Nungungulu wa n’wina, mu ta lova a ku fana ni matiko lawa Jehovha a ma lovisako mahlweni ka n’wina.+

9 “Ingisa, wena Izrayeli, nyamutlha wo tlhatuka Jordhani+ u ya nghena u hlongola matiko ya hombe ni ya ntamu a ku hundza wena,+ a madhoropa ma vhikelweko khwatsi ya ku chikela ni le matilweni,+ 2 a tiko ga vanhu va ntamu ni vo leha, a vana va Anake,+ lava u va tivako ni kuzwa lungu yabye, yaku: ‘Himani wa ku a nga tiyela a vana va Anake ke?’ 3 Hikwalaho, zvi tive nyamutlha lezvaku Jehovha, a Nungungulu wa wena, i ta famba mahlweni ka wena.+ Yena i ndzilo wu khadamulako+ niku i ta va hihirita. I ta va khozisa mahlweni ka wena kasi u hatla u va hlongola ni ku va lovisa, kota lezvi Jehovha a ku tsumbisileko.+

4 “Laha Jehovha, a Nungungulu wa wena, a to va hlongola mahlweni ka wena, u nga wuli mbilwini ya wena, uku: ‘Jehovha i ndzi nghenisile kasi ndzi fumela tiko legi hi lezvi ndzi nga munhu wa kululama.’+ A hi lezvo, Jehovha i hlongola matiko lawa+ mahlweni ka wena hi kota ya kubiha ka wona. 5 A hi kululama ka wena ni kutsumbeka ka mbilu ya wena zvi ku mahako u nghena kasi u fumela tiko gabye. Kanilezvi Jehovha, a Nungungulu wa wena, i hlongola a matiko lawa mahlweni ka wena hi kota ya kubiha ka wona+ kasi a tatisa a mhaka leyi yena, Jehovha, a hlambanyileko ka vakokwani va wena, Abrahama,+ na Isaka+ na Jakobe.+ 6 Zvi tive lezvaku Jehovha a nga ku nyiki a tiko legi ga ginene kasi u gi fumela hi kota ya kululama ka wena, hakuva n’wina mu vanhu va tinhamu to nonoha.+

7 “Alakanya — u nga tshuki u rivala — lezvi u nga mu vhukisa zvona Jehovha, a Nungungulu wa wena, le ciwuleni.+ Kusukela ka siku legi mu nga huma hi Gibhite kala mu ta chikela ka wutshamu legi, mu hluwukele Jehovha.+ 8 Hambu le Horebhe mu vhukile Jehovha niku Jehovha i no mu zangarela nguvhu laha ka kuza a lava ni ku mu hihirita.+ 9 Laha ndzi nga kandziha citsunga kasi ndzi ya amukela a timbila ta maribye,+ ti nga timbila ta civhumelwano leci Jehovha a mahileko na n’wina,+ ndzi no tshama a 40 wa masiku ni 40 wa wusiku+ citsungeni na ndzi ngagi zvakuga ne kunwa mati. 10 Andzhako ka lezvo, Jehovha i no ndzi nyika a timbila timbiri ta maribye ti tsalilweko hi litiho la Nungungulu. Ka timbila leto, ku wa hi ni magezu wontlhe lawa Jehovha a nga mu byelile le citsungeni hi lomu ndzilweni, hi siku ga mutlhangano.*+ 11 Kumbheleni ka 40 wa masiku ni 40 wa wusiku, Jehovha i no ndzi nyika a timbila timbiri ta maribye, ti nga timbila ta civhumelwano; 12 Hi kulandzela, Jehovha i te ngalo ka mina: ‘Suka, u relela hi kuhatlisa, hakuva a vanhu va wena lava u va humesileko Gibhite va wonhile.+ Va hatlisile ku hambuka ndleleni leyi ndzi va leleteleko a ku famba hi yona. Va ti mahele cifananiso ca simbi.’*+ 13 Makunu Jehovha i te ngalo ka mina: ‘Ndza zvi wona ku a vanhu lava vanhu va tinhamu to nonoha.+ 14 Ndzi tsike ndzi va hihirita ndzi fuvisa a vito gabye lahasi ka matilo, ndzi gumesa ndzi ku maha tiko ga ntamu ni ga vanhu vo tala.’+

15 “Andzhako ka lezvo, ndzi no hundzuluka ndzi relela hi le citsungeni, a citsunga na ci kari ci vhura ndzilo,+ na ndzi welele a timbila timbiri ta civhumelwano mandleni ya mina.+ 16 Laha ndzi nga cuwuka, ndzi no wona lezvaku mu wa wonhile ka Jehovha, a Nungungulu wa n’wina! Mu wa ti mahele a cihon’wana ca simbi.* Mu wa hatlisile ku hambuka ndleleni leyi Jehovha a nga mu leletele a ku famba hi yona.+ 17 Hikwalaho, ndzi no teka a timbila leto ta timbiri ndzi ti hoxa hi mandla ya mina, ndzi ti faya na mu zvi wona.+ 18 Makunu ndzi no khizama mahlweni ka Jehovha a 40 wa masiku ni 40 wa wusiku, a ku khwatsi hi kusanguleni. A ndzi gangi zvakuga ne kunwa mati+ hi kota ya zviwonho zvontlhe lezvi mu zvi mahileko hi ku maha lezvi zvi bihileko mahlweni ka Jehovha, mu mu zangarisa. 19 Hakuva ndzi wa chava hi kota ya zanga ya hombe ya Jehovha leyi yi nga kari yi mu vhukela+ aza a lava ni ku mu hihirita. Hambulezvo, ka khati lego kambe, Jehovha i no ndzizwa.+

20 “Jehovha i wa mu zangarele nguvhu Aroni laha ka kuza a lava ku mu lovisa,+ kanilezvi ndzi no kombelela Aroni ka khati lego kambe. 21 Makunu ndzi no teka leci ci nga mu maha mu wonha — ku nga cihon’wana+ leci mu nga ci mahile — ndzi ci hisa ndzilweni; ndzi no ci sila, ndzi ci gaya ci ku bhi kala ci maha a mapa yo kala ni ndzhoho, ndzi ma hoxa cicongwaneni leci ci relelako hi le citsungeni.+

22 “Ahandle ka lezvo, le Tabhera,+ ni le Masa,+ ni le Kibrot-Hatava,+ mu vhukile Jehovha a zangara. 23 Laha Jehovha a nga mu rumela muya Kadhexe-Bharneya,+ aku: ‘Kandzihani mu ya teka tiko legi ndzi to mu nyika mu gi fumela!’ mu no engeta mu hluwukela a cileletelo ca Jehovha, a Nungungulu wa n’wina;+ a mu kombisangi kukholwa+ kakwe ne a mu mu ingisangi. 24 Mu va ku hluwukela Jehovha cima ndzi mu tiva.

25 “Hikwalaho, ndzi no khizama mahlweni ka Jehovha a 40 wa masiku ni 40 wa wusiku;+ ndzi no simama na ndzi khizamisile lezvo hakuva Jehovha i wa wulile lezvaku i ta mu lovisa. 26 Ndzi no sangula ku khongotela Jehovha, ndziku: ‘O Jehovha, Hosi ya Hombe, u nga lovisi vanhu va wena. I tshomba ya wena+ leyi u yi tlhatlhisileko hi wukulu ga wena u yi humesa Gibhite hi canja ga ntamu.+ 27 Alakanya malandza ya wena, Abrahama, na Isaka na Jakobe.+ U nga cheli kota hi kunonoha ka vanhu lava, hambu hi kubiha kabye ni ciwonho cabye+ 28 kasi a vanhu va tiko legi u hi humesileko ka gona va nga wuli, vaku: “Ehe, Jehovha a nga zvi kotangi a ku va nghenisa ka tiko legi a nga va tsumbisile. I va humesile hi ku va venga kasi a ya va daya le ciwuleni.”+ 29 Hakuva vanhu va wena ni tshomba ya wena,+ lava u va humesileko hi ntamu wa hombe ni woko ga wena gi nawulutilweko.’+

10 “Ka cikhati leco, Jehovha i te ngalo ka mina: ‘Vatla timbila timbiri ta maribye to fana ni leti to sangula,+ u kandziha citsunga uta seno ka mina; maha ni arke* ga mapulango. 2 Ndzi ta tsala laha ka timbila leto a magezu lawa ma nga hi ka leti to sangula, leti u nga faya; a timbila leto u ta ti veka lomu ka arke.’ 3 Hikwalaho, ndzi no maha arke hi mapulango ya akasia ndzi tlhela ndzi vatla timbila timbiri ta maribye to fana ni leti to sangula, ndzi kandziha citsunga na ndzi hi ni timbila leto ta timbiri mandleni ya mina.+ 4 Hi kulandzela, i no tsala laha ka timbila a magezu lawa a nga tsalile kusanguleni,+ a Khume ga Milayo,*+ leyi Jehovha a nga yi wulile ka n’wina le citsungeni hi lomu ndzilweni+ ka siku ga mutlhangano;*+ Jehovha i no gumesa a ndzi nyika a timbila leto. 5 Andzhako ka lezvo, ndzi no hundzuluka ndzi relela hi le citsungeni+ ndzi ta veka timbila lomu ka arke legi ndzi nga mahile. Ta ha hi kwalomo, kota lezvi Jehovha a leleteleko.

6 “A vaIzrayeli va no suka hi le Bheerote Bhene-Jaakani vaya Mosera. Aroni i no fela seyo a lahliwa.+ A n’wana wakwe Eleyazari i no sangula ku tira kota mupristi cikhundleni cakwe.+ 7 Va no suka hi laho vaya Gudgodha, va suka Gudgodha vaya Jotbhatha,+ tikweni ga minonga ya mati.*

8 “Ka cikhati caleco, Jehovha i no veka a lixaka la ka Levhi+ hi tlhelo kasi li rwala a arke ga civhumelwano ca Jehovha+ ni ku yima mahlweni ka Jehovha kasi ku mu tirela ni ku katekisa vanhu hi vito gakwe,+ kota lezvi va mahako kala ni nyamutlha. 9 Hi cigelo leco, Levhi a nga nyikiwangi ciavelo kutani tshomba cikari ka vamakabye vakwe. A tshomba yakwe hi Jehovha, kota lezvi Jehovha, a Nungungulu wa wena, a nga ku byelile.+ 10 Ndzi no tshama citsungeni a ku khwatsi hi lezvi ndzi nga mahile kusanguleni, 40 wa masiku ni 40 wa wusiku,+ na Jehovha i no ndzizwa kambe ka khati lego.+ Jehovha a nga zvi lavangi a ku ku lovisa. 11 Makunu Jehovha i no ndzi byela, aku: ‘Ti longisele ku suka, u rangela vanhu kasi va nghena va fumela a tiko legi ndzi hlambanyileko ka vakokwani vabye a ku va nyika gona.’+

12 “Makunu wena Izrayeli, kasi zvini lezvi Jehovha, a Nungungulu wa wena, a ku kombelako ke?+ Hi lezvi ntsena: ‘Chava Jehovha, a Nungungulu wa wena,+ u famba tindleleni takwe tontlhe,+ u mu randza, ni ku tirela Jehovha, a Nungungulu wa wena, hi mbilu ya wena yontlhe, ni muhefemulo* wa wena wontlhe,+ 13 ni ku hlayisa a milayo ni zvileletelo zva Jehovha lezvi ndzi ku leletelako nyamutlha kasi zvi ku vhuna.+ 14 A matilo ma lumba Jehovha, a Nungungulu wa wena, hambu a matilo ya matilo,* ni misava ni zvontlhe zvi nga ka yona.+ 15 Kanilezvi Jehovha i tshinele ntsena ka vakokwani va n’wina a va randza niku i hlawulile n’wina mu nga pswalo wabye+ cikari ka matiko wontlhe, kota lezvi zvi wonekako nyamutlha. 16 Makunu basisani a timbilu ta n’wina+ mu tsika ku ti nonohisa tinhamu.+ 17 Hakuva Jehovha, a Nungungulu wa n’wina, i Nungungulu wa vanungungulu+ ni Hosi ya tihosi, a Nungungulu wa hombe, ni wa ntamu, ni wo chaviseka, loyi a nga hiko na cihlawulela+ ne a nga vhumeliko ku xavelelwa. 18 I lamula hi nongameto ka n’wanana a nga hiko na papayi* ni ka noni*+ niku i randza a muluveli,+ a mu nyika zvakuga ni tinguwo. 19 N’winawu randzani valuveli hakuva mu wa hi valuveli tikweni ga Gibhite.+

20 “U fanele ku chava Jehovha, a Nungungulu wa wena, u mu tirela,+ u namarela kakwe, u tlhela u hlambanya hi vito gakwe. 21 Hi yena u faneleko ku mu dhumisa.+ Hi yena a Nungungulu wa wena, loyi a mahileko a zvilo zvontlhe lezvi zva hombe ni zvo hlamalisa lezvi u zvi wonileko hi mahlo ya wena.+ 22 A vapapayi va wena va relele vaya Gibhite+ na va hi 70 wa vanhu,* kanilezvi zvezvi, Jehovha, a Nungungulu wa wena, i ku andzisile u tala a ku fana ni tinyeleti ta matilo.+

11 “Randza Jehovha, a Nungungulu wa wena;+ contlhe cikhati maha lezvi a zvi lavako ka wena, u hlayisa milayo yakwe, ni zviboho zvakwe zva kulamula, ni zvileletelo zvakwe. 2 Ma zvi tiva lezvaku nyamutlha ndzi wulawula na n’wina, a ndzi wulawuli ni vana va n’wina lava va nga kala ku ku tiva kutani ku wona a kulaya ka Jehovha, a Nungungulu wa n’wina,+ ni wukulu gakwe,+ ni canja gakwe ga ntamu,+ ni woko gakwe gi nawulutilweko. 3 A va wonangi a zviwoniso ni mitiro leyi a yi mahileko le Gibhite, ka Faro, a hosi ya Gibhite, ni ka gontlhe tiko gakwe;+ 4 kutani lezvi a mahileko mabutho ya Gibhite, a mahaxi ya Faro ni tikareta takwe ta yimpi, lezvi zvi nga mitiwa hi mati ya Bimbi go Pswhuka a cikhati leci va nga kari va mu hlongolisela. Jehovha i no va lovisa khatigin’we zvi mbhela.*+ 5 A va zvi wonangi lezvi a mu maheleko le ciwuleni kala mu ta chikela ka wutshamu legi, 6 kutani lezvi a mahileko ka Dhatani na Abhiramu, a vana va Eliyabhe, a n’wana wa Rubheni, a cikhati leci a misava yi nga vhululeka mahlweni ka vaIzrayeli vontlhe yi va mita zvin’we ni mingango yabye, ni matenda yabye ni zvihari zvontlhe lezvi va nga hi nazvo.+ 7 A mahlo ya wena ma zvi wonile zvontlhe a zvilo zva hombe lezvi Jehovha a zvi mahileko.

8 “Hlayisani a zvileletelo zvontlhe lezvi ndzi mu nyikako nyamutlha, kasi muva ni ntamu, mu kota ku tlhatuka mu nghena tikweni legi mu yako mu ya gi fumela, 9 ni lezvaku mu fela ku hanya masiku yo tala+ tikweni legi Jehovha a hlambanyileko ku nyika vakokwani va n’wina ni pswalo* wabye,+ a tiko gi khulungako a masi ni wulombe.+

10 “A tiko legi u yako u ya gi fumela a gi fani ni tiko ga Gibhite, legi mu humileko ka gona, laha u nga kari u byala mbewu ya wena u gumesa u regara hi nkondzo* wa wena a ku fana ni cisin’wana ca matsawu. 11 Kanilezvi a tiko legi mu lavako ku tlhatuka mu nghena ka gona mu gi fumela i tiko ga zvitsunga ni mindzhelelo,+ legi gi nwako a mati ya vhula ya le matilweni;+ 12 i tiko legi Jehovha, a Nungungulu wa wena, a gi hlayisako. A mahlo ya Jehovha, a Nungungulu wa wena, ma tshama hehla ka gona contlhe cikhati, kusukela kusanguleni ka lembe kala kumbheleni ka gona.

13 “Loku mu ti karatela ku ingisa a zvileletelo zva mina lezvi ndzi mu leletelako nyamutlha mu tlhela mu randza Jehovha, a Nungungulu wa n’wina, mu mu tirela hi mbilu ya n’wina yontlhe, ni muhefemulo* wa n’wina wontlhe,+ 14 ndzi ta gi nisela vhula a tiko ga n’wina hi cikhati ci yimisilweko, a vhula yo sangula ni yo gumesa; u ta hlengeleta a timbewu ta wena, ni vhinyo ya wena ya yiswa, ni mafura ya wena.+ 15 Ndzi ta milisa byanyi lomu mafusini ya wena kasi a mitlhambi ya wena yiga; wenawu u taga u xura.+ 16 Ti woneleni kasi mu nga tsiki a timbilu ta n’wina ti mu kucetela ku hambuka mu ya khozela van’wani vanungungulu ni ku va khizamela.+ 17 Hakuva a zanga ya Jehovha yi nga vhura yi mu vhukela, a vhala matilo ku ngani vhula,+ ni misava yi nga humesi a pfuno wa yona, mu hatla mu lova tikweni ga ginene legi Jehovha a mu nyikako.+

18 “Chelani a timhaka ta mina lomu timbilwini ta n’wina ni mihefemulweni* ya n’wina, ti boheni canjeni ga n’wina kasi tiva cialakanyiso; ti wa fane ni cikombiso zvikandzeni zva n’wina.*+ 19 Ti gondziseni ka vana va n’wina, mu wulawula hi tona loku mu tshamile lomu tindlwini ta n’wina, ni loku mu famba laha ndleleni, ni loku mu etlela ni loku mu vhuka.+ 20 Ti tsale lomu ka tiaro ta yindlu ya wena ni lomu tinyangweni ta wena, 21 kasi n’wina ni vana va n’wina mu hanya masiku yo tala+ tikweni legi Jehovha a hlambanyileko a ku nyika a vakokwani va n’wina,+ a ku khwatsi hi masiku wontlhe lawa a matilo ma tova hehla ka misava.

22 “Loku mu hlayisa hi kutsumbeka a cileletelo leci ndzi mu nyikako ni ku maha lezvi ci wulako, mu randza Jehovha, a Nungungulu wa n’wina,+ ni ku famba tindleleni takwe tontlhe ni ku namarela kakwe,+ 23 Jehovha i ta hlongola wontlhe a matiko lawo mahlweni ka n’wina+ niku mu ta fumela a matiko ya hombe, lawa ma mu hundzako hi kutala.+ 24 Ni gihi wutshamu mu to veka a nkondzo wa n’wina ka gona gi tava ga n’wina:+ Kusukela ciwuleni kala Lebhanoni, ni kusukela Congweni, ku nga Congo wa Eufrate, kala bimbini ga mutsuwuka-gambo.* Leyo yi tava mimbhingano ya tiko ga n’wina.+ 25 I hava a to yima mahlweni ka n’wina.+ Jehovha, a Nungungulu wa n’wina, i ta va chela kuchava ni kururumela hi kota ya n’wina tikweni gontlhe legi mu to famba ka gona,+ kota lezvi a mu tsumbisileko.

26 “Nyamutlha ndza veka mahlweni ka n’wina a makatekwa ni ciruko:+ 27 A makatekwa loku mu ingisa a zvileletelo zva Jehovha, a Nungungulu wa n’wina, lezvi ndzi mu leletelako nyamutlha,+ 28 ni ciruko loku mu nga ingisi a zvileletelo zva Jehovha, a Nungungulu wa n’wina,+ mu hambuka ndleleleni leyi ndzi mu leletelako ku famba hi yona nyamutlha mu tlhela mu landzela a vanungungulu mu nga va tiviko.

29 “Laha Jehovha, a Nungungulu wa wena, a to ku nghenisa tikweni legi u yako u ya gi fumela, wula* cikatekiso Citsungeni ca Gerezima ni ciruko Citsungeni ca Ebhale.+ 30 A zvitsunga lezvi zvi le tlhatuko wa Jordhani hi le mupela-gambo, a tikweni ga vaKhanani lava va hanyako le Arabha, phambeni ka Gilgali, kusuhani ni tisinya ta hombe ta More.+ 31 Hakuva mu ta tlhatuka Jordhani mu nghena mu teka a tiko legi Jehovha, a Nungungulu wa n’wina, a mu nyikako.+ Laha mu to teka a tiko mu tshama ka gona, 32 chelani kota mu hlayisa milayo yontlhe ni zviboho zva kulamula lezvi ndzi zvi vekako mahlweni ka n’wina nyamutlha.+

12 “Leyi milayo ni zviboho zva kulamula lezvi mu faneleko ku chela kota ka zvona mu zvi hlayisa ka masiku wontlhe lawa mu to hanya ka tiko legi Jehovha, a Nungungulu wa vakokwani va n’wina, a to mu nyika kasi mu gi fumela. 2 Mu ta hahlulela a matshamu wontlhe lawa a matiko lawa mu to ma hlongola ma nga kari ma va tirela kona a vanungungulu vabye,+ kani hi lomu zvitsungeni zvo leha, kutani ka zvitsungana, kutani lahasi ka ni yihi sinya yo tlhuma. 3 Mu ta hahlulela a maalati yabye, mu khungumulela a mapilari yabye yo basa,*+ mu hisetela a tisinya tabye to basa,* mu fayetela a zvifananiso zvi kehlilweko zva vanungungulu vabye,+ mu tlhela mu fuvisa a mavito ya vanungungulu lavo ka wutshamu lego.+

4 “N’wina mu nga mu khozelisi lezvo Jehovha, a Nungungulu wa n’wina.+ 5 Kanilezvi hlotani Jehovha, a Nungungulu wa n’wina, muya ni kwihi laha a ku hlawulako kasi ku yimisa a vito gakwe ni wutshamu gakwe ga ku tshama kona cikari ka tontlhe tixaka ta n’wina.+ 6 Hi kwaseyo mu to ya nyikela kona a minyikelo ya n’wina ya kuhiswa,+ ni miphahlo ya n’wina, ni zvipandze zva n’wina zva wukhume,+ ni munyikelo wu humako canjeni ga n’wina,+ ni minyikelo ya n’wina ya zvifungo, ni minyikelo ya n’wina leyi mu nyikelako hi kuzvirandza,+ ni matewula ya tihomu ta n’wina ni ya tiyivhu ta n’wina.+ 7 N’wina ni mingango ya n’wina mu ta zvi gela laho mahlweni ka Jehovha, a Nungungulu wa n’wina,+ mu tsaka hi zvontlhe lezvi mu zvi kotileko ku maha,+ hakuva Jehovha, a Nungungulu wa wena, i tava a ku katekisile.

8 “Mu nga mahisi lezvi hi mahisako zvona laha nyamutlha, zva ku a munhu ni munhu a ti mahela lezvi a zvi wonako na zvi lulamile mahlweni kakwe,* 9 hakuva a mu se nghena wutshan’wini ga kuhumula+ ni tshombeni leyi Jehovha, a Nungungulu wa wena, a ku nyikako. 10 Laha mu to tlhatuka Jordhani+ mu ya hanya tikweni legi Jehovha, a Nungungulu wa n’wina, a mu nyikako kasi mu gi fumela, hakunene i ta mu humuta ka vontlhe a valala va n’wina lava va mu randzeleko; mu ta hanya kuruleni.+ 11 Zvontlhe lezvi ndzi mu leletelako mu ta zvi teka mu famba nazvo ka wutshamu legi Jehovha, a Nungungulu wa n’wina, a to gi hlawula kasi a vito gakwe gi tshama ka gona,+ zvi nga lezvi: A minyikelo ya n’wina ya kuhiswa, ni miphahlo ya n’wina, ni zvipandze zva n’wina zva wukhume,+ ni munyikelo wu humako canjeni ga n’wina, ni minyikelo ya n’wina yontlhe ya zvifungo lezvi mu fungako ka Jehovha. 12 Mu ta tsaka mahlweni ka Jehovha, a Nungungulu wa n’wina,+ n’wina ni vafana va n’wina, ni vanhanyana va n’wina, ni tikhumbi ta n’wina ta cinuna ni ta cisati, ni vaLevhi lava va nga cikari ka madhoropa* ya n’wina, hakuva a va nyikiwangi ciavelo kutani tshomba cikari ka n’wina.+ 13 Ti wonele kasi u nga nyikeli a minyikelo ya wena ya kuhiswa ka ni gihi wutshamu u to gi kuma.+ 14 U ta nyikela a minyikelo ya wena ya kuhiswa ntsena ka wutshamu legi Jehovha a to gi hlawula ka lin’we la tixaka ta n’wina. Kwalaho u ta maha zvontlhe lezvi ndzi ku leletelako.+

15 “Kanilezvi ni ka cihi cikhati leci u* to lava nyama, u nga daya cihari uga a nyama ya kona+ ka wontlhe madhoropa* ya wena, u tsakela a makatekwa lawa Jehovha, a Nungungulu wa wena, a ku nyikileko. A munhu a nga hlazvekangiko ni loyi a hlazvekileko va ngaga a ku fana ni loku uga a mhuti kutani hlangu. 16 Kanilezvi mu ngagi a nkhata;+ wu halateni lahasi a ku khwatsi i mati.+ 17 Lomu madhoropeni* ya wena, u nga ta vhumelelwa kuga a cipandze ca wukhume ca timbewu ta wena, ni kunwa a vhinyo ya wena ya yiswa, ni mafura ya wena, ni kuga a matewula ya tihomu ta wena ni ya tiyivhu ta wena,+ hambu ni yihi minyikelo ya wena ya zvifungo lezvi u fungako, ni minyikelo ya wena leyi u nyikelako hi kuzvirandza kutani munyikelo wu humako canjeni ga wena. 18 U taga zvilo lezvi mahlweni ka Jehovha, a Nungungulu wa wena, ka wutshamu legi Jehovha, a Nungungulu wa wena, a to gi hlawula+ — wena ni mufana wa wena, ni nhanyana wa wena, ni nandza ga wena ga cinuna ni ga cisati, ni muLevhi loyi a nga ndzeni ka madhoropa* ya wena; u ta tsaka mahlweni ka Jehovha, a Nungungulu wa wena, hi zvontlhe lezvi mu zvi kotileko ku maha. 19 Ti wonele kasi u nga rivali a muLevhi+ ka masiku wontlhe lawa u to hanya tikweni ga wena.

20 “Laha Jehovha, a Nungungulu wa wena, a to anamisa a tiko ga wena,+ kota lezvi a ku tsumbisileko,+ wena* u xuva kuga nyama, uku: ‘Ndzi lava nyama’, u ngaga nyama ni ka cihi cikhati u yi xuvako.+ 21 Loku a wutshamu legi Jehovha, a Nungungulu wa wena, a gi hlawulako kasi a veka a vito gakwe+ gi kumeka kule na wena, u ta daya a tihomu to kari ta wena kutani tiyivhu to kari ta wena leti Jehovha a ku nyikileko, kota lezvi ndzi ku leleteleko, uga nyama ya kona lomu ndzeni ka madhoropa* ya wena ni ka cihi cikhati u to yi lava. 22 U ngaga a nyama leyo a ku khwatsi hi loku uga mhuti ni hlangu;+ a munhu a nga hlazvekangiko ni loyi a hlazvekileko va ngaga a nyama leyo. 23 Ntsena lezvaku ti yimisele a ku ngagi nkhata,+ hakuva a nkhata wutomi;*+ u ngagi nyama ni wutomi* ga kona. 24 U nga wugi. Wu halate lahasi a ku khwatsi i mati.+ 25 U nga wugi kasi zvi ku fambela khwatsi, wena ni vana va wena andzhako ka wena, hi ku ngha na mu maha zvakululama mahlweni ka Jehovha. 26 Laha u toya ka wutshamu legi Jehovha a to gi hlawula, u fanele ku teka ntsena a zvilo zvo basa lezvi zvi ku lumbako ni minyikelo ya wena ya zvifungo. 27 U taya u ya nyikela seyo a minyikelo ya wena ya kuhiswa, ku nga nyama ni nkhata,+ laha alatini ga Jehovha, a Nungungulu wa wena; a nkhata wa miphahlo ya wena wu fanele ku halatiwa laha reveni ga alati+ ga Jehovha, a Nungungulu wa wena, kanilezvi u ngaga a nyama ya kona.

28 “Chela kota u hlayisa wontlhe a magezu lawa ndzi ku leletelako kasi zvi ku fambela khwatsi contlhe cikhati, wena ni vana va wena andzhako ka wena, hi ku ngha na u maha zvazvinene ni zvakululama mahlweni ka Jehovha, a Nungungulu wa wena.

29 “Laha Jehovha, a Nungungulu wa wena, a to hihirita a matiko lawa u to ma hlongola,+ ni laha u to ngha u akile ka wona, 30 ti wonele kasi u nga phasiwi andzhako ka kuva ma hihiritilwe mahlweni ka wena. U nga wutisi nchumu hi vanungungulu vabye, uku: ‘A matiko lawa ma wa va khozelisa kuyini a vanungungulu vabye? Minawu ndzi ta maha zvalezvo.’+ 31 U nga mahi lezvo ka Jehovha, a Nungungulu wa wena, hakuva va mahela vanungungulu vabye a zvilo zvontlhe zvo nyenyeza lezvi Jehovha a zvi vengako. Vaza va hisa vafana vabye ni vanhanyana vabye laha ndzilweni, va hisela vanungungulu vabye.+ 32 Mu fanele ku chela kota, mu hlayisa tontlhe a timhaka leti ndzi mu leletelako.+ Mu nga engeteli nchumu hambu ku hungula nchumu ka tona.+

13 “Loku ku humelela muphrofeti kutani munhu a vhumbako hi miloro cikari ka n’wina a maha ciwoniso kutani nchumu wo hlamalisa, 2 a ciwoniso leco kutani nchumu lowo wo hlamalisa lowu a wulawulileko hi wona ka wena wu tatiseka, na aku: ‘A hi landzele a van’wani vanungungulu’, lava u nga va tiviko, ‘hi va tirela’, 3 u nga ingiseli a magezu ya muphrofeti loye kutani ya mulori loye,+ hakuva Jehovha, a Nungungulu wa n’wina, o mu ringa+ kasi a tiva lezvaku ma mu randza Jehovha, a Nungungulu wa n’wina, hi mbilu ya n’wina yontlhe, ni muhefemulo* wa n’wina wontlhe ke.+ 4 Landzelani Jehovha, a Nungungulu wa n’wina, mu mu chava, mu hlayisa a zvileletelo zvakwe mu tlhela mu ingisa a gezu gakwe. Mu tireleni mu tlhela mu namarela kakwe.+ 5 Kanilezvi a muphrofeti loye kutani a mulori loye i fanele ku dawa,+ hakuva i kucetele vanhu lezvaku va hluwukela Jehovha, a Nungungulu wa n’wina — loyi a ku humesileko tikweni ga Gibhite a tlhela a ku tlhatlhisa ndlwini ya wukhumbi — a fela ku ku hambukisa ndleleni leyi Jehovha, a Nungungulu wa wena, a ku leleteleko a ku famba hi yona. U fanele ku fuvisa a zvilo zvo biha cikari ka wena.+

6 “Loku a makabye wa wena, a nga n’wana wa mamani wa wena, kutani mufana wa wena, kutani nhanyana wa wena, kutani sati wa mbilu ya wena, kutani munghana wa wena wa hombe a zama ku ku kucetela cihundleni, aku: ‘A hi fambe hi ya tirela van’wani vanungungulu’,+ ku nga vanungungulu va ku ne wena a wu va tivi ne a vakokwani va wena a va va tivangi, 7 a vanungungulu va matiko lawa ma mu randzeleko, kani mu gamekene nawo kutani mu tsawukene nawo, kusukela ka magemeta-musi man’we ya misava kala ka man’wani magemeta-musi ya misava, 8 u nga vhumeli kutani ku mu ingisela,+ ne u nga mu tsetsi kutani ku mu zwela wusiwana, ne ku mu vhikela; 9 kanilezvi mu daye, u nga mu nyenyeleti.+ Ranga hi wena u mu gandla hi maribye kasi ku mu daya, andzhako ka lezvo, hi kona a vanhu vontlhe va to mu gandla hi maribye.+ 10 Mu gandle hi maribye kala afa,+ hakuva i zamile ku ku hambukisa ka Jehovha, a Nungungulu wa wena, loyi a ku humesileko tikweni ga Gibhite, ndlwini ya wukhumbi. 11 Makunu vontlhe a vaIzrayeli va ta zvizwa va chava niku va nga ta ha tshuka va maha kambe a nchumu wo biha wo fana ni lowu cikari ka wena.+

12 “Loku u tshuka uzwa, ka gin’we ga madhoropa lawa Jehovha, a Nungungulu wa wena, a ku nyikako kasi u hanya ka wona, na ku wuliwa ku ngalo: 13 ‘Ku humelele a vanyamijiri cikari ka wena kasi va hambukisa a vahanyi va dhoropa gabye, vaku: “A hi fambe hi ya tirela a van’wani vanungungulu”, ku nga vanungungulu u nga va tiviko’, 14 hlolisisa a mhaka leyo, u yi kela u tlhela u wutisisa khwatsi.+ Loku zvi tiyile lezvaku lisine a ku a nchumu lowo wo nyenyeza wu mahekile cikari ka wena, 15 u ta daya a vahanyi va dhoropa lego hi cipadha. Gi lovise* hi cipadha,+ zvin’we ni zvontlhe zvi nga ka gona, a ku patsa ni zvifuyo. 16 Andzhako ka lezvo, u ta hlengeleta wontlhe a muphango wa gona laha cikari ka prasa,* u hisa dhoropa lego hi ndzilo; a muphango wa kona wu tava munyikelo wa murumba ka Jehovha, a Nungungulu wa wena. Gi tava nhulu ya maribye kala kupindzuka. Gi nga tshuki gi aketwa. 17 A canja ga wena gi nga teki nchumu wu faneleko ku loviswa,+ kasi Jehovha a bohlisa a zanga yakwe, a mu mahela wuxinji ni ku mu kombisa tipswalo a tlhela a mu andzisa, kota lezvi a hlambanyileko ka vakokwani va n’wina.+ 18 Ingisa* Jehovha, a Nungungulu wa wena, hi ku hlayisa zvileletelo zvakwe lezvi ndzi ku leletelako nyamutlha, hi ndlela leyo, u maha zvakululama mahlweni ka Jehovha, a Nungungulu wa wena.+

14 “N’wina mu vana va Jehovha, a Nungungulu wa n’wina. Mu nga ti tsemeleli+ ne mu nga haluli tisiyi* ta n’wina hi kota ya munhu a fileko.+ 2 Hakuva n’wina mu vanhu va basileko+ ka Jehovha, a Nungungulu wa n’wina, niku Jehovha i mu hlawulile kasi muva vanhu vakwe, a tshomba yakwe yo hlawuleka, cikari ka matiko wontlhe lawa ma nga laha misaveni.+

3 “Mu ngagi ne nchumu wun’we wo nyenyeza.+ 4 A zvihari lezvi mu toga hi lezvi:+ A homu, ni yivhu, ni mbuti, 5 ni hlangu, ni mhuti, ni mangulo, ni mbuti ya khwati, ni nhongo, ni yivhu ya khwati, ni yivhu ya lomu zvitsungeni. 6 Mu ngaga ni cihi cihari ci nga ni zvinyondzwani zvo avanyeka zvi maha zvimbiri, ci bhisako ci tlhela ci cakunya ga wumbiri. 7 Kanilezvi, mu ngagi a zvihari lezvi zvi landzelako, lezvi zvi bhisako zvi tlhela zvi cakunya ga wumbiri kutani zvi nga ni zvinyondzwani zvo avanyeka, zvi nga lezvi: A kameli, ni vhundla, ni manjhengwe, hakuva zva bhisa zvi tlhela zvi cakunya ga wumbiri kanilezvi a zvi na zvinyondzwani zvo avanyeka. A zvi hlazvekangi ka n’wina.+ 8 Ni khumba gonawu hakuva gi na ni zvinyondzwani zvo avanyeka kanilezvi a gi bhisi gi tlhela gi cakunya ga wumbiri. A gi hlazvekangi ka n’wina. Mu ngagi a nyama ya gona kutani ku gi henya loku gi file.

9 “Ka zvontlhe lezvi zvi hanyako lomu matini, mu ngaga lezvi: Ni cihi ci nga ni zvipapilo* ni magwaru, mu ngaga.+ 10 Kanilezvi mu ngagi ni wihi nchumu wo kala zvipapilo* ni magwaru. A wu hlazvekangi ka n’wina.

11 “Mu ngaga ni cihi cinyanyani ci hlazvekileko. 12 Kanilezvi lezvi mu nga faneliko kuga hi lezvi: A gama, ni likotani, ni cimhungu,+ 13 ni mangavhi wo pswhuka, ni mangavhi wa ntima, ni tixaka tontlhe ta vamangavhi, 14 ni tixaka tontlhe ta zvikunguwa, 15 ni mbhuwu,* ni cikhovha, ni cinyanyani ca bimbi,* ni tixaka tontlhe ta magama, 16 ni cikotlwani, ni khuhunhu, ni khalahunye,* 17 ni gumba,* ni khoti, ni cituto, 18 ni sekwa, ni tixaka tontlhe ta vanyamungondzwani, ni gongondzwani, ni khoha.* 19 A zvivangwa zvontlhe zva tipapa zvi makanyako misaveni* zvonawu a zvi hlazvekangi ka n’wina. Zvi nga giwi. 20 Mu ngaga ni cihi civangwa co hlazveka ci hahako.

21 “Mu ngagi nyama ya ni cihi cihari ci kumilweko na ci file.+ U nga nyika a muluveli loyi a nga cikari ka madhoropa* ya wena aga, kutani ku ci xavisa ka muluveli. Hakuva n’wina mu vanhu vo basa ka Jehovha, a Nungungulu wa n’wina.

“U nga khoni cimbutana hi masi ya mamani wa cona.+

22 “Lembe ni lembe u fanele ku nyikela zva wukhume ka zvontlhe lezvi a timbewu ta wena ti humesako lomu masin’wini.+ 23 U taga a cipandze ca wukhume ca timbewu ta wena, ni ca vhinyo ya wena ya yiswa, ni ca mafura ya wena, ni matewula ya tihomu ta wena ni ya tiyivhu ta wena mahlweni ka Jehovha, a Nungungulu wa wena, ka wutshamu legi a to gi hlawula kasi a vito gakwe gi tshama ka gona,+ u fela ku gondza ku chava Jehovha, a Nungungulu wa wena, contlhe cikhati.+

24 “Kanilezvi loku a pfhuka wu lehile nguvhu ka n’wina, mu nga zvi koti a ku rwala zvilo lezvo mu famba nazvo ka wutshamu legi Jehovha, a Nungungulu wa wena, a to gi hlawula kasi a vito gakwe gi tshama ka gona,+ hi kota ya lezvi ku nga kule (hakuva Jehovha, a Nungungulu wa wena, i ta ku katekisa), 25 u nga zvi xavisa, u endza ni mali ya kona uya ka wutshamu legi Jehovha, a Nungungulu wa wena, a to gi hlawula. 26 Hi mali leyo, u ta xava ni cihi u* to ci lava — a tihomu, ni tiyivhu, ni timbuti, ni vhinyo ni gin’wani byala, ni cihi ci ku tsakisako; u taga zvilo lezvo mahlweni ka Jehovha, a Nungungulu wa wena, u tsaka, wena ni ngango wa wena.+ 27 U nga rivali a muLevhi loyi a hanyako cikari ka madhoropa ya wena,+ hakuva a nga nyikiwangi ciavelo kutani tshomba cikari ka n’wina.+

28 “Khati ni khati ku mbhelako a malembe manharu, u ta neha a zvipandze zvontlhe zva wukhume zva pfuno wa lembe lego u ta zvi veka cikari ka madhoropa ya wena.+ 29 Makunu a vaLevhi, lava va nga kala ku nyikiwa ciavelo kutani tshomba cikari ka wena, ni muluveli, ni n’wanana a nga hiko na papayi* ni noni,* lava va nga cikari ka madhoropa ya wena, va tata va taga kala va xura,+ kasi Jehovha, a Nungungulu wa wena, a ku katekisa ka zvontlhe lezvi u mahako.+

15 “Khati ni khati ku mbhelako 7 wa malembe, u ta tlhatlhisa ni cihi ci nga mangaveni.+ 2 A kutlhatlhisa loko ku ta mahekisa lezvi: Ni wihi loyi a pembisileko nchumu i ta tlhatlhisa muakelani wakwe ka mangava lawa a mahileko. A nga londzi muakelani wakwe kutani makabye wakwe lezvaku a mu hakhela hakuva ku ta huwelelwa a kutlhatlhisa ka Jehovha.+ 3 U nga londza muluveli lezvaku a ku hakhela,+ kanilezvi ni cihi leci a makabye wa wena a ku dhevhako u fanele ku nga ha cheli kota hi cona. 4 Hambulezvo, i hava cikari ka n’wina a faneleko kuva cisiwana, hakuva Jehovha i ta ku katekisa+ tikweni legi Jehovha, a Nungungulu wa wena, a ku nyikako kota tshomba kasi u gi fumela, 5 kanilezvi ntsena loku u ingisa a gezu ga Jehovha, a Nungungulu wa wena, hi kutsumbeka u tlhela hlayisa khwatsi zvontlhe a zvileletelo lezvi ndzi ku nyikako nyamutlha.+ 6 Hakuva Jehovha, a Nungungulu wa wena, i ta ku katekisa kota lezvi a ku tsumbisileko; u ta pembisa ka matiko yo tala, kanilezvi wena u nga taza u lava ku pemba.+ U ta fumela matiko yo tala kanilezvi wona ma nga ta ku fumela.+

7 “Loku a mun’we wa vamakabye va wena ava cisiwana ka gin’we ga madhoropa ya tiko legi Jehovha, a Nungungulu wa wena, a ku nyikako, u nga nonohisi mbilu ya wena hambu ku felela ka makabye wa wena a nga cisiwana.+ 8 U fanele ku hana, u mu vhululela a canja ga wena,+ u mu lomba zvontlhe lezvi a zvi lavako kutani lezvi a zvi vhumalako. 9 Ti wonele kasi u nga byali maalakanyo yo biha mbilwini ya wena, yaku: ‘A lembe ga wu 7, gi nga lembe ga kutlhatlhisa, gi tshinele’,+ u tsika ku hana ka makabye wa wena wa cisiwana, u nga mu nyiki nchumu. Loku a rila ka Jehovha hi kota ya wena, u tava ni ciwonho.+ 10 Mu nyike hi kuzvirandza;+ u nga mu nyiki a mbilu ya wena na yi nga zvi lavi.* Jehovha, a Nungungulu wa wena, i ta katekisa yontlhe a mitiro ya wena ni zvontlhe lezvi u to maha.+ 11 Contlhe cikhati ku tava ni zvisiwana lomu tikweni.+ Hikwalaho, ndza ku leletela, ndziku: ‘Vhulula canja ga wena u hana ka makabye wa wena a vhumalako tlhelo cisiwana lomu tikweni ga wena.’+

12 “Loku u xaviselwe a mun’we wa vamakabye va wena, a muHebheru wa cinuna kutani wa cisati, na a ku tirele a 6 wa malembe, hi lembe ga wu 7 u ta mu tlhatlha.+ 13 Loku u mu tlhatlha, u nga mu tsiki a famba hi mandla. 14 Kombisa wuhana, u mu nyika zvokari zva ntlhambi wa wena, ni zva wutshamu ga wena go hulela kona timbewu, ni zva cigowolo ca wena ca mafura ni ca vhinyo. Mu nyike kota lezvi Jehovha, a Nungungulu wa wena, a ku katekisileko. 15 Alakanya lezvaku u wa hi khumbi tikweni ga Gibhite ni lezvaku Jehovha, a Nungungulu wa wena, i ku tlhatlhisile. Hi caleco ci ndzi mahako ndzi ku leletela a ku maha lezvi nyamutlha.

16 “Kanilezvi loku yena aku ngalo ka wena: ‘A ndzi lavi ku ku tsika!’, hi lezvi a ku randzako — wena ni ngango wa wena — kota lezvi a tsakako hi kuva zvin’we na wena,+ 17 u ta teka litlhawo u mu bhoxa ndleve na a khigetele laha livatini. I tava khumbi ya wena wutomini gontlhe. U ta maha zvalezvo ni ka khumbi ya wena ya cisati. 18 U ngazwi ku luza loku u mu tlhatlha, a ku tsika a famba, hakuva a ntiro lowu a nga ku mahela ka 6 wa malembe wa hombe a ku fana ni ntiro wu wuyetilweko kumbiri wa mutiri a tholilweko, niku Jehovha, a Nungungulu wa wena, i ku katekisile ka zvontlhe lezvi zvi mahilweko.

19 “A matewula wontlhe ya vamatsune, ya tihomu ta wena, ni ya tiyivhu ta wena, ni ya timbuti ta wena u ta ma basisela Jehovha, a Nungungulu wa wena.+ U nga mahi ni wihi ntiro hi matewula ya tihomu ta wena ne u nga tsemi woya ga matewula ya tiyivhu ta wena kutani ya timbuti ta wena. 20 Lembe ni lembe, wena ni ngango wa wena mu ta zvi gela mahlweni ka Jehovha, a Nungungulu wa wena, ka wutshamu legi Jehovha a to gi hlawula.+ 21 Kanilezvi loku ci hi ni cisolo — ku ngava wulima, kufa matihlo kutani ni cihi cin’wani cisolo ca hombe — u nga mahi hi cona muphahlo ka Jehovha, a Nungungulu wa wena.+ 22 U ta ci gela lomu cikari ka madhoropa* ya wena; a munhu a nga hlazvekangiko ni loyi wo hlazveka, va ngaga a ku khwatsi hi loku vaga mhuti kutani hlangu.+ 23 Kanilezvi u ngagi nkhata wa kona;+ wu halate lahasi a ku khwatsi i mati.+

16 “Hlayisa a hweti ya Abhibhi,* u kulungela a Phasika ka Jehovha, a Nungungulu wa wena,+ hakuva a hweti ya Abhibhi i hweti leyi Jehovha, a Nungungulu wa wena, a ku humesileko hi yona Gibhite ni wusiku.+ 2 U ta nyikela a muphahlo wa Phasika ka Jehovha, a Nungungulu wa wena,+ hi cifuyo ca lomu ntlhambini wa wena wa tiyivhu, ni wa timbuti, ni wa tihomu+ ka wutshamu legi Jehovha a to gi hlawula kasi a vito gakwe gi tshama ka gona.+ 3 U nga wugi ni nchumu wu nga ni comelo.+ Hi 7 wa masiku, u fanele kuga a pawa yi nga hiko na comelo, yi nga pawa ya hlomulo, hakuva u humile tikweni ga Gibhite hi cihatla.+ Maha lezvo wutomini ga wena gontlhe kasi u alakanya a siku legi u nga huma hi gona Gibhite.+ 4 Ku nga kumiwi comelo ka wena lomu cipandzeni ca wena contlhe ndzeni ka 7 wa masiku.+ Ka nyama leyi u to maha hi yona a muphahlo ni gambo hi siku go sangula, ku nga sali nchumu wu tshama wusiku gontlhe kala ka mixo yi landzelako.+ 5 U nga ta vhumelelwa ku maha muphahlo wa Phasika ka ni gihi dhoropa legi Jehovha, a Nungungulu wa wena, a ku nyikako. 6 Kanilezvi wu fanele ku mahelwa ka wutshamu legi Jehovha, a Nungungulu wa wena, a to gi hlawula kasi a vito gakwe gi tshama ka gona. U ta nyikela muphahlo wa Phasika ni gambo, zvalezvi a gambo gi to pela,+ kota lezvi zvi nga maheka ka siku legi u nga huma hi gona Gibhite. 7 U ta wu bhika u gela+ ka wutshamu legi Jehovha, a Nungungulu wa wena, a to gi hlawula.+ Ni mixo u nga tlhela matendeni ya wena. 8 U taga tipawa to kala comelo hi 6 wa masiku. Hi siku ga wu 7, ku tava ni mutlhangano wo basa wa Jehovha, a Nungungulu wa wena. U nga tiri nchumu hi siku lego.+

9 “U ta hlaya 7 wa mavhiki. U ta sangula ku hlaya a 7 wa mavhiki ka khati go sangula legi u to nghenisa sikela* lomu masin’wini.+ 10 Hi kulandzela, u ta kulungela a Mubuzo wa Mavhiki wu mahelwako Jehovha, a Nungungulu wa wena,+ hi ku neha munyikelo wa kuzvirandza wu humako hi canjeni ga wena, hi kuya hi lezvi Jehovha, a Nungungulu wa wena, a ku katekisisileko zvona.+ 11 Tsaka mahlweni ka Jehovha, a Nungungulu wa wena, wena, ni mufana wa wena, ni nhanyana wa wena, ni khumbi ya wena ya cinuna, ni khumbi ya wena ya cisati, ni muLevhi loyi a hanyako cikari ka madhoropa* ya wena, ni muluveli loyi a hanyako cikari ka wena, ni n’wanana a nga hiko na papayi,* ni noni,* lava va nga cikari ka wena, ka wutshamu legi Jehovha, a Nungungulu wa wena, a to gi hlawula kasi a vito gakwe gi tshama ka gona.+ 12 Alakanya lezvaku u wa hi khumbi le Gibhite.+ Makunu ingisa zvileletelo lezvi u tlhela u zvi hlayisa.

13 “U ta maha Mubuzo wa Michacha+ hi 7 wa masiku a cikhati leci u to hlengeleta a mihandzu ya wutshamu ga wena go hulela kona timbewu ni ya cigowolo ca wena ca mafura ni ca vhinyo. 14 Tsaka mubuzweni wa wena,+ wena, ni mufana wa wena, ni nhanyana wa wena, ni khumbi ya wena ya cinuna, ni khumbi ya wena ya cisati, ni muLevhi, ni muluveli, ni n’wanana a nga hiko na papayi ni noni,* lava va nga cikari ka madhoropa ya wena. 15 Hi 7 wa masiku, u ta kulungela mubuzo+ wu mahelwako Jehovha, a Nungungulu wa wena, ka wutshamu legi Jehovha a to gi hlawula, hakuva Jehovha, a Nungungulu wa wena, i ta katekisa wontlhe a pfuno wa wena ni zvontlhe lezvi u zvi mahako.+ Wena u ta tsaka nguvhu.+

16 “Vontlhe a vavanuna va fanele ku ti wonekelisa mahlweni ka Jehovha, a Nungungulu wa wena, makhati manharu hi lembe, ka wutshamu legi a to gi hlawula: Ka Mubuzo wa Tipawa to kala Comelo,+ ni ka Mubuzo wa Mavhiki,+ ni ka Mubuzo wa Michacha.+ I hava ni mun’we wabye a faneleko kuta mahlweni ka Jehovha na a nga hi na nchumu. 17 A mun’we ni mun’wani wabye i wa nehe a cinyikiwo cakwe hi kuya hi makatekwa lawa Jehovha, a Nungungulu wa wena, a mu nyikileko.+

18 “Yimisa valamuli+ ni tihosana ka lixaka lin’we ni lin’wani ka wontlhe a madhoropa* lawa Jehovha, a Nungungulu wa wena, a ku nyikako. Va wa lamule a vanhu hi kululama. 19 “U nga hambunyeti nongameto,+ ne u ngavi ni cihlawulela+ hambu ku vhumela ku xavelelwa, hakuva a kuxavelela ku vhala mahlo ya lava vo tlhariha+ niku ku nga soholota a magezu ya vanhu vo lulama. 20 Hlota nongameto,+ ina, a nongameto, u fela ku simama u hanya ni ku fumela a tiko legi Jehovha, a Nungungulu wa wena, a ku nyikako.

21 “U nga byali ni yihi sinya kasi yiva sinya yo basa*+ kusuhani ni alati legi u to mahela Jehovha, a Nungungulu wa wena.

22 “Ne u nga ti yimiseli a pilari go basa,*+ wu nga nchumu wu vengiwako hi Jehovha, a Nungungulu wa wena.

17 “U nga mu maheli muphahlo Jehovha, a Nungungulu wa wena, hi dhuna ga homu kutani hi yivhu yi nga ni wulima kutani wun’wani nchumu wu solekako, hakuva wu tava nchumu wo nyenyeza ka Jehovha, a Nungungulu wa wena.+

2 “A hi zvi veke laha ka ku ka gin’we ga madhoropa lawa Jehovha, a Nungungulu wa wena, a ku nyikako ku kumiwa wanuna kutani wasati a mahako zvakubiha mahlweni ka Jehovha, a Nungungulu wa wena, a tlhela a tshova civhumelwano cakwe,+ 3 a hambuka a ya khozela van’wani vanungungulu ni ku va khizamela kutani ku khizamela gambo, kutani hweti, kutani butho gontlhe ga le matilweni,+ zvi nga zvilo zva ku a ndzi leletelangi.+ 4 Loku u bikelwa a mhaka leyo kutani u yizwa, u fanele ku yi hlolisisa khwatsi. Loku zvi tiyiswa ku lisine lezvaku a nchumu lowo wo nyenyeza wu mahilwe+ lomu Izrayeli, 5 u ta humesa a wanuna loye kutani wasati loye a mahileko a nchumu lowo wo biha aya handle, tinyangweni ta dhoropa; a wanuna loye kutani wasati loye i fanele ku gandliwa hi maribye kala afa.+ 6 A munhu loyi a faneleko ku dawa i ta dawa na zvi tiyiswa hi nomu wa vakustumunyu vambiri kutani vanharu.+ A nga dawi na zvi tiyisiwa hi nomu wa kustumunyu mun’we.+ 7 A vakustumunyu va fanele ku ranga hi vona va tlhateka canja gabye hehla kakwe kasi ku mu daya, hi kona a vanhu vontlhe va to landzela. Fuvisa kubiha cikari ka wena.+

8 “Loku ku vhuka mhaka yi ku karatelako nguvhu ku yi xuxa ka gin’we ga madhoropa ya wena, kani i mhaka yi yelanako ni kuhalatiwa ka nkhata,+ kani cikhalo ci vhuxilweko, kutani tihanyi ti mahilweko, kutani yin’wani mhaka yi vhuxako kukanetisana, suka uya ka wutshamu legi Jehovha, a Nungungulu wa wena, a to gi hlawula.+ 9 Yana ka vapristi va vaLevhi ni ka valamuli+ lava va to ngha va tira ka masiku lawo u ya wula cikhalo ca wena; vona va ta ku byela ciboho ca kulamula.+ 10 Andzhako ka lezvo, u fanele ku landzela a ciboho leci va to ku nyika ka wutshamu legi Jehovha a to gi hlawula. Chela kota u maha zvontlhe lezvi va to ku leletela. 11 Maha hi kuya hi nayo lowu va to ku komba ni hi kuya hi ciboho leci va to ku byela.+ U nga hambuki ka ciboho leci va to ku nyika uya cineneni kutani cibhabheni.+ 12 A munhu loyi a kanyisako hi ku nga ingisi a mupristi loyi a tirelako Jehovha, a Nungungulu wa wena, kutani mulamuli i fanele kufa.+ Fuvisa kubiha lomu Izrayeli.+ 13 A vanhu vontlhe va ta zvizwa va chava, va nga ha kanyisi kambe.+

14 “Laha u to nghena tikweni legi Jehovha, a Nungungulu wa wena, a ku nyikako, ni laha u to gi fumela, lezvo na u kari u tshama ka gona, uku: ‘I chukwana ndzi ti yimisela a hosi a ku fana ni matiko wontlhe lawa ma ndzi randzeleko’,+ 15 mhakeni leyo u fanele ku yimisa a hosi leyi Jehovha, a Nungungulu wa wena, a to yi hlawula.+ A hosi leyi u to yi yimisa yi fanele ku huma cikari ka vamakabye va wena. A wu vhumelelwi a ku ti yimisela a munhu wa gin’wani tiko a nga hiko makabye wa wena. 16 Hambulezvo, a hosi a yi faneli ku ti lavela mahaxi yo tala+ kutani ku maha vanhu va tlhela Gibhite kasi va ya lava man’wani mahaxi,+ hakuva Jehovha i te ngalo: ‘Mu nga ha tlheli kambe hi ndlela leyi.’ 17 Ne a yi faneli ku teka a vasati vo tala kasi a mbilu ya yona yi nga hambukisiwi,+ hambu ku ti hlengeletelela a prata yo tala ni ouro yo tala.+ 18 Loku yi tshama citshan’wini ca yona ca wuhosi mufun’weni wa yona, yi fanele ku ti tsalela a kopiya ya Nayo lomu ka bhuku,* yi sukelako ka leyi yi hlayisiwako hi vapristi va vaLevhi.+

19 “A kopiya leyo yi ta tshama ni hosi niku i fanele ku yi lera a masiku wontlhe ya kuhanya kakwe,+ kasi a gondza ku chava Jehovha, a Nungungulu wa wena, ni ku hlayisa a timhaka tontlhe ta Nayo lowu ni zvileletelo lezvi hi ku zvi maha.+ 20 Loku a maha lezvo, a mbilu yakwe yi nga ta ti tlakusa hehla ka vamakabye vakwe ne a nga ta hambuka ka cileletelo, aya cineneni kutani cibhabheni, kasi a simama hi cikhati co leha mufun’weni wakwe, yena ni vana vakwe cikari ka Izrayeli.

18 “A vapristi va vaLevhi ni lixaka lontlhe la ka Levhi va nga ta nyikiwa ciavelo kutani tshomba zvin’we na Izrayeli. Va taga lezvi zvi humako ka miphahlo leyi yi hisiwako hi ndzilo yi mahelwako Jehovha, hakuva vona i tshomba yakwe.+ 2 Hikwalaho, a va faneli kuva ni tshomba cikari ka vamakabye vabye. Jehovha hi yena a tshomba yabye kota lezvi a nga va byela.

3 “Lezvi a vapristi va to zvi amukela hi ka vanhu hi lezvi: ‘Ni wihi loyi a mahako muphahlo hi dhuna ga homu kutani hi yivhu, i ta teka a woko, ni tihlaya, ni khwiri a nyika mupristi. 4 U ta mu nyika ni mihandzu yo sangula ya timbewu ta wena, ni ya vhinyo ya wena ya yiswa, ni ya mafura ya wena, ni woya go sangula legi u to tsema ka ntlhambi wa wena.+ 5 Jehovha, a Nungungulu wa wena, i mu hlawulile yena ni vana vakwe cikari ka tixaka tontlhe kasi a tira vitweni ga Jehovha contlhe cikhati.+

6 “Kanilezvi loku a muLevhi wo kari a huma ka gin’we ga madhoropa ya wena lomu Izrayeli, legi a nga hanya ka gona,+ a lava kuya ka wutshamu legi Jehovha a to gi hlawula,*+ 7 i ta tirela seyo vitweni ga Jehovha, a Nungungulu wakwe, a ku fana ni vontlhe a vamakabye vakwe, a vaLevhi, lava va nga seyo mahlweni ka Jehovha.+ 8 I ta amukela a ciavelo ca zvakuga co fana ni leci cabye,+ ahandle ka lezvi a zvi kumako hi ku xavisa a titshomba ta vakokwani vakwe.

9 “Laha u to nghena tikweni legi Jehovha, a Nungungulu wa wena, a ku nyikako, u nga gondzi ku pimanyisa a mitiro yo nyenyeza ya matiko lawo.+ 10 Ku nga kumiwi munhu cikari ka wena a hundzisako a mufana wakwe kutani nhanyana wakwe hi lomu ndzilweni,+ ni loyi a vhumbako,+ ni loyi a tirisako masalamuso,+ ni loyi a hlahluvako,+ ni muloyi,+ 11 ni loyi a hutsutsako van’wani, ni loyi a yako tin’angeni,+ kutani muvhumbi,+ kutani ni wihi a wutisako tinguluve.*+ 12 Hakuva ni wihi a mahako zvilo lezvi cinyenyeko ka Jehovha, niku Jehovha, a Nungungulu wa wena, i hlongola a matiko lawa mahlweni ka wena hi kota ya mitiro leyi yo nyenyeza. 13 U ngavi ni nandzu mahlweni ka Jehovha, a Nungungulu wa wena.+

14 “A matiko lawa u ma hlongolako ma wa tala ku ingisela lava va tirisako masalamuso+ ni kuvhumba,+ kanilezvi Jehovha, a Nungungulu wa wena, a nga ku vhumelelangi a ku maha zvilo zvo kota lezvo. 15 Jehovha, a Nungungulu wa wena, i ta ku yimisela muphrofeti wa ku fana na mina hi cikari ka vamakabye va wena. Mu ingiseni.+ 16 Lowu i hlamulo wa lezvi u nga kombela Jehovha, a Nungungulu wa wena, le Horebhe ka siku ga mutlhangano,*+ laha u ngaku: ‘U nga ha ndzi tsiki kambe ndzizwa a gezu ga Jehovha, a Nungungulu wa mina, ne ndzi nga ha woni a ndzilo lowu wa hombe, kasi ndzi ngafi.’+ 17 Makunu Jehovha i te ngalo ka mina: ‘Lezvi va nga wula zvi nene. 18 Ndzi ta va yimisela muphrofeti wo fana na wena hi cikari ka vamakabye vabye,+ ndzi chela a magezu ya mina non’wini wakwe;+ i ta va byela zvontlhe lezvi ndzi mu leletelako.+ 19 A munhu loyi a to kala ku ingisela a magezu ya mina lawa a muphrofeti loye a to wulawula hi vito ga mina hakunene ndzi ta mu maha a ti hlamulela.+

20 “‘Loku a muphrofeti wo kari a zvi sukela a wulawula timhaka hi vito ga mina to kala ndzi nga mu leletelangi ku wula kutani a wulawula hi vito ga van’wani vanungungulu, a muphrofeti loye i fanele kufa.+ 21 Kanilezvi loku u wula mbilwini ya wena, uku: “Hi ta zvi tivisa kuyini lezvaku a timhaka leto a ti wuliwangi hi Jehovha ke?” 22 Loku a muphrofeti a wulawula hi vito ga Jehovha, a gezu ga kona gi nga tatiseki kutani ku maheka, a hi Jehovha a nga wula gezu lego. A muphrofeti loye i no zvi sukela a wula. U nga mu chavi.’

19 “Laha Jehovha, a Nungungulu wa wena, a to lovisa matiko lawa Jehovha, a Nungungulu wa wena, a ku nyikako a cipandze ca wona, ni laha u to va hlongola u sala u tshama madhoropeni yabye ni mitini yabye,+ 2 u ta pambula a madhoropa manharu laha cikari ka tiko legi Jehovha, a Nungungulu wa wena, a ku nyikako kasi u gi fumela.+ 3 U ta avanyisa a tiko legi Jehovha, a Nungungulu wa wena, a ku nyikako kasi u gi fumela hi zvipandze zvinharu u tlhela u maha maruwa kasi ni wihi mudayi a fela ku tsutsumela ka gin’we ga madhoropa lawo.

4 “Lezvi zvi to maheka mhakeni ya mudayi loyi a tsutsumelako leyo kasi ku ponisa wutomi gakwe hi lezvi: Loku aba munhu-kuloni hi kuphazama, na ku hi ku i wa nga mu vengi hi kale+ 5 — hi cikombiso, loku a famba ni munhu-kuloni a lava tihunyi lomu khwatini a gumesa a tlakusa chapo hi canja gakwe kasi ku tsema sinya, a chapo gi tlumuka laha ka mbhinyi gi yaba a munghana wakwe afa, a mudayi i fanele ku tsutsumela ka gin’we ga madhoropa lawo a fela ku hanya.+ 6 Loku zvi nga hi lezvo, a muphoteli wa nkhata,+ zangeni yakwe,* a nga hlongola a mu kuma laha ndleleni a mu daya loku a pfhuka wa kuya dhoropeni wu lehile kuveni i wa nga faneli ku dawa hakuva i wa nga mu vengi.+ 7 Hikwalaho, ndza mu leletela, ndziku: ‘Pambulani a madhoropa manharu.’

8 “Loku Jehovha, a Nungungulu wa wena, a anamisa mimbhingano ya tiko ga wena, kota lezvi a hlambanyileko ka vakokwani va wena,+ ni loku a ku nyikile gontlhe tiko legi a tsumbisileko ku nyika vakokwani va wena+ 9 — loku u ingisa hi kutsumbeka zvontlhe a zvileletelo lezvi ndzi ku nyikako nyamutlha, u randza Jehovha, a Nungungulu wa wena, u tlhela u famba tindleleni takwe contlhe cikhati+ — u ta engetela man’wani madhoropa ya manharu ka lawa ya manharu.+ 10 Hi ndlela leyo, ku nga ta halatiwa a nkhata wu nga hiko na nandzu+ lomu tikweni ga wena legi Jehovha, a Nungungulu wa wena, a ku nyikako kota tshomba ne u nga tava ni nandzu wa nkhata.+

11 “Kanilezvi loku ku hi ku a munhu wo kari i wa venga a munhu-kulori+ niku i wa lavetela tindlela ta ku mu daya, makunu a mu bayisa afa, a gumesa a tsutsumela ka gin’we ga madhoropa lawa, 12 a madhota ya dhoropa gakwe ma ta mu vitanisa hi seyo ma mu hendleleta mandleni ya muphoteli wa nkhata. Yena i fanele ku dawa.+ 13 U* nga mu tsetsi. Susa a nandzu wa nkhata wu halatilweko na wu nga hi na nandzu lomu Izrayeli+ kasi zvontlhe zvi ku fambela khwatsi.

14 “Laha u to amukela a tshomba ya wena tikweni legi Jehovha, a Nungungulu wa wena, a ku nyikako kasi u gi fumela, u nga rurisi cikhongwani ca mbhingano wa muakelani wa wena+ laha a vakokwani va wena va nga ci zimile kona.

15 “A kustumunyu mun’we a nga eneli kasi ku kona* munhu hi ni cihi cihoxo kutani ciwonho leci a mahileko.+ A mhaka yi fanele ku tiyisiwa hi nomu wa vakustumunyu vambiri kutani vanharu.+ 16 Loku a kustumunyu a nga ni makungo ya hava a kustumunyela munhu a mawunwa, a mu lumbeta ku i hambunyetile zvokari,+ 17 a vanhu lava va vambiri va holovako va ta yima mahlweni ka Jehovha, ku nga mahlweni ka vapristi ni valamuli lava va to ngha va tira ka masiku lawo.+ 18 A valamuli va ta yi hlolisisa khwatsi.+ Loku a munhu loyi a kustumunyileko a hi kustumunyu wa mawunwa ni loku a lumbetile a makabye wakwe, 19 u ta mu maha zvalezvi a nga lava ku zvi mahiwa ka makabye wakwe.+ Fuvisa kubiha cikari ka wena.+ 20 Lava va to sala va ta zvizwa va chava niku va nga ta ha tshuka va maha kambe a nchumu wo biha wo fana ni lowu cikari ka wena.+ 21 U* nga mu tsetsi:+ A wutomi* gi ta hakhelwa hi wutomi,* a tihlo hi tihlo, a tino hi tino, a canja hi canja, a nkondzo hi nkondzo.+

20 “Loku mu huma muya yimpini mu yalwa ni valala va n’wina mu wona lezvaku a mahaxi yabye, ni tikareta tabye, ni mabutho yabye zvi tele a ku hundza lezvi zva n’wina, mu nga va chavi, hakuva Jehovha, a Nungungulu wa n’wina, loyi a mu humesileko tikweni ga Gibhite i zvin’we na n’wina.+ 2 Loku mu lava ku sangula kulwa, a mupristi i fanele ku tshinela ka vanhu a wulawula navo.+ 3 I ta va byela lezvi: ‘Zwana, wena Izrayeli, mu lava kulwa yimpi ni valala va n’wina. Mu ngavi ni hlenekera. Mu nga chavi hambu ku tsemeka hlanha, ne ku rurumela hi kota yabye, 4 hakuva Jehovha, a Nungungulu wa n’wina, i famba na n’wina kasi alwa ni valala va n’wina, a mu lwela ni ku mu ponisa.’+

5 “A tihosana tonawu ti wa wutise vanhu, tiku: ‘Himani a akileko a yindlu ya yiswa a kalako a nga se yi kangula ke? I wa tlhele ndlwini yakwe, a nga tshuka afa yimpini, a yindlu yakwe yi sala yi kanguliwa hi mun’wani. 6 Himani a byalileko civhina,* a kalako a nga se sangula ku tshovela mihandzu ya cona? I wa tlhele ndlwini yakwe, a nga tshuka afa yimpini, a mihandzu ya civhina cakwe yi sala yi tshovelwa hi mun’wani. 7 Himani a wutileko wasati kanilezvi a kalako a nga se chadha naye? I wa tlhele ndlwini yakwe,+ a nga tshuka afa yimpini, a noivha yakwe yi sala yi chadha ni mun’wani wanuna.’ 8 A tihosana kambe ti fanele ku wutisa vanhu, tiku: ‘Himani a chavako, a nga ni hlenekera?+ I wa tlhele ndlwini yakwe kasi a nga mahi a vamakabye vakwe va tsemeka hlanha a ku fana na yena.’*+ 9 Laha a tihosana ti to mbheta a ku wulawula ni vanhu, ti wa yimise a varangeli va mabutho kasi va rangela vanhu.

10 “Loku u tshinela ka dhoropa go kari kasi kulwa nago, u fanele ku ranga hi ku gi xuvela kurula.+ 11 Loku a vanhu va gona va ku hlamula hi kurula va tlhela va ku vhululela tinyangwa ta gona, vontlhe a vanhu u to va kuma ka gona va tava va wena kasi va ku mahela mitiro ya cikurumeta va tlhela va ku tirela.+ 12 Kanilezvi loku va ala ku maha kurula na wena va tlhela va huma kasi kulwa na wena, randzela a dhoropa gabye. 13 Jehovha, a Nungungulu wa wena, hakunene i ta gi nyikela mandleni ya wena. Daya a vavanuna vontlhe va nga ka gona hi cipadha. 14 Hambulezvo, a vavasati, ni vanana, ni zvifuyo, ni zvontlhe lezvi zvi nga ka dhoropa lego, wontlhe a muphango wa gona, u nga phanga zviva zva wena.+ U taga a muphango wa valala va wena lowu Jehovha, a Nungungulu wa wena, a ku nyikileko.+

15 “U ta maha zvalezvo ka wontlhe a madhoropa lawa ma nga kule na wena, ma nga hiko madhoropa ya matiko lawa ma nga kusuhani na wena. 16 Kanilezvi ka madhoropa ya matiko lawo, lawa Jehovha, a Nungungulu wa wena, a ku nyikako kota tshomba, u nga tsiki ni cin’we ci hefemulako ci hanya.+ 17 Wutshan’wini ga lezvo, u fanele ku va lovisa va ku bhi — a vaHiti, ni vaAmori, ni vaKhanani, ni vaPerezi, ni vaHivhi, ni vaJebhusi+ — kota lezvi Jehovha, a Nungungulu wa wena, a ku leleteleko, 18 kasi va nga ku gondzisi a ku landzela a mitiro yabye yontlhe yo nyenyeza leyi va mahelako a vanungungulu vabye, va ku wonhisa ka Jehovha, a Nungungulu wa wena.+

19 “Loku u randzela dhoropa kasi u gi wutla na u kari ulwa nago hi masiku yo tala, u nga dayi a tisinya ta kona hi ku ti kingelela hi chapo. U ngaga a mihandzu ya tona kanilezvi u nga ti tsemeleli.+ Ina u wa ta randzela a sinya ya khwati a ku khwatsi hi lezvi u nga wa ta maha hi munhu ke? 20 U nga daya ntsena a sinya leyi u zvi tivako ku a yi giwi. U nga yi tsema u maha hi yona a libhiyo la ku randzela a dhoropa legi gi hlomileko yimpi kasi ku ku vhukela, kala giwa.

21 “Loku ku kumiwa munhu na a delwe le handle ka dhoropa tikweni legi Jehovha, a Nungungulu wa wena, a ku nyikako kasi u gi fumela, na zvi nga tiveki ku hi mani a nga mu daya, 2 a madhota ya wena ni valamuli va wena+ va ta huma va ya pima a pfhuka wa kusukela laha a cirumbi ci nga kona kala ka madhoropa lawa ma ci randzeleko. 3 Makunu a madhota ya dhoropa legi gi nga kusuhani ni cirumbi ma fanele ku teka cihon’wana ca kati ca ku a ci se tlhatekiwa kanga ne a ci se tira wun’wani ntiro; 4 a madhota ya dhoropa lego ma fanele ku teka a cihon’wana leco ca kati ma relela naco le nkoveni wu nga ni mati ma khulungako, ka wutshamu ga ku a gi se rimiwa ne a gi se byaliwa nchumu; ma ta tshova a nhamu ya cona kwaleyo nkoveni.+

5 “A vapristi, va nga vaLevhi, va ta tshinela, hakuva Jehovha, a Nungungulu wa wena, i va hlawulile kasi va mu tirela+ ni ku katekisa vanhu vitweni ga Jehovha.+ Va ta wula lezvi a timhaka tontlhe ti yelanako ni wugevenga ti faneleko ku xuxisiwa zvona.+ 6 Makunu wontlhe a madhota ya dhoropa legi gi nga kusuhani ni cirumbi ma ta hlamba mandla ya wona+ hehla ka cihon’wana ca kati leci ci tshovilweko nhamu le nkoveni. 7 Ma ta huwelela, maku: ‘A mandla ya hina a ma halatangi nkhata lowu ne a mahlo ya hina a ma zvi wonangi a cikhati leci wu nga halatiwa. 8 O, Jehovha, u nga va rwexi nandzu a vanhu va wena, a vaIzrayeli, lava u va tlhatlhisileko,+ ne u nga tsiki a nandzu wa nkhata lowu wu halatilweko na wu nga hi na nandzu wuva cikari ka vanhu va wena, a va ka Izrayeli.’+ Hi kumaha loko, va nga tava ni nandzu wa nkhata. 9 Hi ndlela leyo, u ta susa a nandzu wa nkhata wu halatilweko na wu nga hi na nandzu cikari ka wena hi ku maha zvakululama mahlweni ka Jehovha.

10 “Loku uya yimpini u yalwa ni valala va wena, Jehovha, a Nungungulu wa wena, a ku hlulela vona, wena u va khoma va maha tikhumbi ta wena,+ 11 makunu u wona a wasati wo saseka cikari ka tikhumbi, u mu navela u lava ku mu teka ava sati wa wena, 12 u nga mu neha mutini wa wena. I ta halula hloko yakwe, a tsema zvikamba zvakwe, 13 a tlhatlha tinguwo takwe ta wukhumbi, niku i ta tshama mutini wa wena. I ta rila a papayi wakwe ni mamani wakwe a hweti yontlhe.+ Andzhako ka lezvo, u nga hlengela naye masango; wena u tava nuna wakwe, yena ava sati wa wena. 14 Kanilezvi loku a nga ku tsakisi, mu tsike aya+ ni kwihi a ku* lavako. Kanilezvi u nga mu xavisi hi mali kutani ku mu xanisa, hakuva u mu wisile tingana.

15 “Loku a wanuna a hi ni vasati vambiri, a randza mun’we a ku hundza loyi mun’wani,* vontlhe na va mu pswalele vana va vafana, a n’wana loyi wa matewula na a hi wa wasati loyi wo kala ku randziwa,+ 16 ka siku legi a va avelako tshomba a vafana vakwe, a nga vhumelelwi a ku teka a n’wana wa wasati loyi a mu randzako a mu maha matewula yakwe, a kalavela a n’wana wa wasati loyi wo kala ku randziwa, a nga yena n’wana wa matewula. 17 I fanele ku wona a n’wana wa wasati loyi wo kala ku randziwa kota matewula hi ku mu nyika ciavelo ci wuyetilweko kumbiri ca zvontlhe lezvi a nga nazvo, hakuva hi yena a masangulo ya ntamu wakwe wa kupswala. A fanelo ya wutewula yi lumba yena.+

18 “Loku a munhu a hi ni n’wana wa kani na a hi muhluwuki, loyi a nga ingisiko a papayi wakwe ne mamani wakwe,+ na va zamile ku mu kawuka kanilezvi a ala ku va ingisa,+ 19 a papayi wakwe ni mamani wakwe va ta mu khoma va famba naye ka madhota laha nyangweni ya dhoropa gakwe 20 va ya byela a madhota ya dhoropa gakwe, vaku: ‘A n’wana loyi wa hina i na ni kani niku muhluwuki; wa ala a ku hi ingisa. I khobomu*+ niku cidhakwa.’+ 21 Makunu vontlhe a vanhu va dhoropa va fanele ku mu gandla hi maribye kala afa. Fuvisa kubiha cikari ka wena niku vontlhe a vaIzrayeli va ta zvizwa va chava.+

22 “Loku a munhu a mahile ciwonho ci ringanako ku a konelwa ku dawa, a gumesa a dawa+ a tlhela a hayekiwa mhandzeni,+ 23 a cirumbi cakwe ci nga tshami a wusiku gontlhe laha mhandzeni.+ Kanilezvi u fanele ku mu lahla ka siku galego, hakuva a munhu loyi a hayekilweko i rukatelwe hi Nungungulu.+ U nga nyenyezisi a tiko legi Jehovha, a Nungungulu wa wena, a ku nyikako kota tshomba.+

22 “Loku u wona a dhuna ga homu kutani yivhu ya makabye wa wena na yi lahlekile, u nga yi tsiki ha womu.+ Yi helekete ka makabye wa wena. 2 Kanilezvi loku a makabye wa wena a nga tshami kusuhani na wena kutani u nga mu tivi, u ta teka a cifuyo leco u famba naco kaya; u ta tshama naco kala a makabye wa wena a famba a ci lavetela. Andzhako ka lezvo, u ta mu tlhelisela.+ 3 U ta maha zvalezvo loku u kuma mbongola yakwe, ni tinguwo takwe, hambu ni cihi leci a makabye wa wena a to lahla wena u ci kuma. U nga mahisi ku khwatsi a wu zvi wonangi.

4 “Loku u wona a mbongola ya makabye wa wena kutani dhuna ga homu ga makabye wa wena na gi wile laha ndleleni, u nga mahisi ku khwatsi a wu gi wonangi; mu vhune a ku vhuxa cifuyo leco.+

5 “A wasati a nga faneli ku boha tinguwo ta cinuna, ne a wanuna a nga faneli ku boha tinguwo ta cisati, hakuva ni wihi loyi a mahako lezvo cinyenyeko ka Jehovha, a Nungungulu wa wena.

6 “Loku u kuma cisaka ca cinyanyani laha ndleleni na ci hi ni mavhinyani kutani matandza, kani hi lomu sinyeni kutani hi lahasi, a mamani wa kona na a fukamele mavhinyani kutani matandza, u nga teki mamani ni mavhinyani ya kona.+ 7 Hlongola a mamani wa kona u sala u teka a mavhinyani. Maha lezvi kasi zvi ku fambela khwatsi u tlhela u hanya cikhati co leha.

8 “Loku u aka yindlu, yi bhiyele a langwa* la yona+ kasi u nga nehi a nandzu wa nkhata ndlwini ya wena loku a munhu awa hi ka yona.

9 “U nga byali timbewu ta tixaka timbiri lomu civhineni* ca wena,+ hakuva wontlhe a pfuno wa mbewu leyi u to byala ni pfuno wa civhina zvi nga tekiwa zvi yisiwa wutshan’wini go basa.

10 “U nga rimi hi homu ni mbongola zvi panilweko ka kanga wun’we.+

11 “U nga bohi a tinguwo to mahiwa hi woya gi patsilweko ni wukene.*+

12 “U ta maha a machakafula lomu ka mune wa tichoka ta nguwo leyi u bohako.+

13 “Loku a wanuna a teka sati, a hlengela naye masango a gumesa a mu venga,* 14 a tlhela a mu lumbeta lezvaku i na ni mahanyela ma nga hlazvekangiko ni ku chakisa vito gakwe hi ku wula lezvi: ‘Ndzi tekile wasati loyi, kanilezvi laha ndzi nga hlengela naye masango a ndzi wonangi cikombiso ca lezvaku i wa hi nhwana,’* 15 a papayi ni mamani va nhanyana loye va fanele ku kombisa lezvi zvi tiyisekisako a wunhwana* ga nhanyana ka madhota laha nyangweni ya dhoropa. 16 A papayi wa nhanyana i ta byela madhota, aku: ‘Inaloyi ndzi mu nyikile a nhanyana wa mina kasi ava sati wakwe kanilezvi wa mu venga* 17 a tlhela a mu lumbeta lezvaku i na ni mahanyela ma nga hlazvekangiko, aku: “Ndzi wonile lezvaku a nhanyana wa wena a nga na cikombiso ca lezvaku i wa hi nhwana.” Makunu hi leci a citiyisekiso ca lezvaku a nhanyana wa mina i wa hi nhwana.’ Hi kulandzela, va ta andlala nguwo mahlweni ka madhota ya dhoropa. 18 A madhota ya dhoropa+ ma ta khoma wanuna loye ma mu tsayisa.+ 19 Va ta mu hakhelisa a multa wa 100 wa maxekeli* va nyika a papayi wa nhanyana, hakuva a wanuna loye i chakisile a nhwana lomu Izrayeli;+ a nhanyana loye i ta simama kuva sati wakwe. A wanuna loye a nga ta vhumelelwa ku tlhatlha wukati* naye wutomini gakwe gontlhe.

20 “Kanilezvi loku ku hi ku a kulumbetwa loko lisine na ku nga hi na citiyisekiso ca lezvaku a nhanyana loye i wa hi nhwana, 21 va ta humesa nhanyana loye aya nyangweni ya muti wa papayi wakwe niku a vanhu va dhoropa gakwe va ta mu gandla hi maribye kala afa, hakuva i mahile nchumu wa tingana+ lomu Izrayeli hi ku maha wubhayi na a ha hi mutini wa papayi wakwe.+ Fuvisa wubihi cikari ka wena.+

22 “Loku ku kumiwa wanuna na a etlele ni sati wa mun’wani wanuna, hi wumbiri gabye va fanele ku dawa, a wanuna loyi a etleleko ni wasati zvin’we ni wasati wa kona.+ Fuvisa wubihi lomu Izrayeli.

23 “Loku a nhwana wo kari a wutilweko hi wanuna a tlhangana ni mun’wani wanuna lomu dhoropeni a etlela naye, 24 mu ta va humesa laha nyangweni ya dhoropa lego hi wumbiri gabye mu va gandla hi maribye kala vafa; gandlani nhanyana hakuva a nga bangi tinyandha lomu dhoropeni, ni wanuna loye hakuva i mu wisile tingana a sati wa wanuna-kuloni.+ Fuvisa wubihi cikari ka wena.

25 “Kanilezvi loku a wanuna a tlhangana ni nhanyana loyi a wutilweko le handle ka dhoropa a mu pfinya a etlela naye, a wanuna loyi a etleleko ni nhanyana loye hi yena yece a to dawa; 26 a nhanyana u nga mu mahi nchumu, hakuva a nga mahangi ciwonho ci ringanako ku a dawa. A mhaka leyi ya fana ni loku a munhu a vhukela munhu-kuloni a mu daya.+ 27 A nhanyana loye a wutilweko i kumilwe le handle ka dhoropa niku i bile tinyandha kanilezvi ku wa nga hi na munhu wa ku mu lamulela.

28 “Loku a wanuna a kuma nhanyana wo kala a nga wutiwangi, a mu pfinya a etlela naye va gumesa va poliwa,+ 29 a wanuna loyi a etleleko ni nhanyana loye i ta nyikela a 50 wa maxekeli ya prata ka papayi wakwe niku a nhanyana i ta maha sati wakwe.+ Kota lezvi a mu wisileko tingana a nhanyana loye, a nga ta vhumelelwa ku tlhatlha wukati* naye wutomini gakwe gontlhe.

30 “A ku na wanuna a faneleko ku teka a sati wa papayi wakwe, kasi a nga mu wisi tingana a papayi wakwe.*+

23 “A ku na wanuna a thenilweko hi ku fayiwa zviro zvakwe zva wununa kutani a tsemilweko ciro cakwe ca wubeleki a to nghena bandleni ga Jehovha.+

2 “A n’wana a pswalilweko hi wubhayi* a nga ngheni bandleni ga Jehovha.+ Hambu ka cizukulwana ca wu 10, i hava wa pswalo wakwe a to nghena bandleni ga Jehovha.

3 “A muAmoni kutani muMowabhi a nga faneli ku nghena bandleni ga Jehovha.+ Hambu ka cizukulwana ca wu 10, i hava wa pswalo wabye a to tshuka a nghena bandleni ga Jehovha, 4 hakuva a va mu khingangi ni zvakuga ni mati kasi ku ta mu vhuna a cikhati leci mu nga hi ndleleni ya ku huma hi Gibhite+ ni lezvi va nga thola Bhalami, a n’wana wa Bheyori wa le Petora, le Mezopotamia, kasi a ku rukatela.*+ 5 Kanilezvi Jehovha, a Nungungulu wa wena, i no ala a ku ingisa Bhalami.+ Wutshan’wini ga lezvo, Jehovha, a Nungungulu wa wena, i no cica a ciruko civa cikatekiso,+ hakuva Jehovha, a Nungungulu wa wena, i wa ku randza.+ 6 U nga tshuki u va vhunetela a ku va hanya kuruleni ni ku humelela ka wontlhe masiku ya wena.+

7 “U nga vengi a muEdhomi, hakuva makabye wa wena.+

“U nga vengi a muGibhite, hakuva u wa hi muluveli tikweni gakwe.+ 8 A cizukulwana ca wunharu ca vana vabye ci nga nghena bandleni ga Jehovha.

9 “Laha u to ngha u govile kasi kulwa ni valala va wena, potsa a kungahlazveki kontlhe.*+ 10 Loku a wanuna a tshuka a nga hlazveki hi kota ya lezvi a humileko a mbewu ya wununa ni wusiku,+ i wa hume lahandle ka wugovelo, a nga ngheni lomu wugovelweni. 11 Ni gambo, i wa hlambe hi mati; andzhako ka lezvo, a nga tlhela wugovelweni kupeleni ka gambo.+ 12 U tava ni wutshamu ga cihundla* le handle ka wugovelo laha u to ti rumela kona. 13 U tava ni mbhanya cikari ka feramenta ya wena kasi loku uya khwatini, u ya kela hi wona u ti ruma, andzhako ka lezvo u setela a chaka ga wena. 14 Hakuva Jehovha, a Nungungulu wa wena, wa fambafamba lomu wugovelweni ga wena+ kasi a ku tlhatlhisa ni ku nyikela a valala va wena canjeni ga wena. Hikwalaho, a wugovelo ga wena gi fanele ku basa,+ kasi a nga woni nchumu wo nyenyeza ka wena a tsika ku famba na wena.

15 “U nga tlhelisi khumbi ka n’winyi wa yona loku yi tsutsuma ka n’winyi wa yona yita ka wena. 16 Yi nga tshama cikari ka wena ni ka gihi wutshamu legi yi to gi hlawula madhoropeni ya wena, ni kwihi laha yi ku lavako. U nga yi xanisi.+

17 “Ku ngavi ni nhanyana wa ka Izrayeli a ti mahako cibhayi ca tempeli,+ ne mufana wa ka Izrayeli a ti mahako cibhayi ca tempeli.+ 18 U nga nehi lomu ndlwini ya Jehovha, a Nungungulu wa wena, a mali yi hakhelweko* cibhayi ca tempeli ca wasati kutani mali yi hakhelweko a cibhayi ca tempeli ca wanuna* kasi ku tatisa cifungo, hakuva a zvilo lezvo, hi wumbiri ga zvona, zvilo zvo nyenyeza ka Jehovha, a Nungungulu wa wena.

19 “U nga mu hakhelisi majuro a makabye wa wena,+ kani majuro ya mali, kani ya zvakuga kutani ya ni wihi nchumu wu londziwako majuro. 20 U nga londza a majuro ka muluveli,+ kanilezvi a makabye wa wena u nga mu hakhelisi majuro,+ kasi Jehovha, a Nungungulu wa wena, a ku katekisa ka zvontlhe lezvi u to maha tikweni legi u yako u ya gi fumela.+

21 “Loku u maha cifungo ka Jehovha, a Nungungulu wa wena,+ u nga hlweli ku ci tatisa,+ hakuva Jehovha, a Nungungulu wa wena, hakunene i ta ku londza. Loku u nga ci tatisi wo wonha.+ 22 Kanilezvi loku u nga fungi, u nga tava ni nandzu wa ciwonho.+ 23 Maha lezvi a nomu wa wena wu nga wula+ niku u fanele ku tatisa lezvi a nomu wa wena wu fungileko kota munyikelo wa kuzvirandza ka Jehovha, a Nungungulu wa wena.+

24 “Loku u nghena lomu civhineni ca muakelani wa wena, gana mauvha ma ringanako ku u xura kanilezvi u nga cheli ne gin’we lomu ka cibya ca wena.+

25 “Loku u nghena lomu ka simu ga timbewu ga muakelani wa wena, u nga hulula timbewu ti buvhileko hi canja ga wena kanilezvi u nga nghenisi sikela* lomu ka timbewu ta muakelani wa wena.+

24 “Loku a wanuna a chadha ni wasati kanilezvi a nga mu tsakisi hi kota ya lezvi a kumileko cilo co nyenyeza ka wasati loye, i fanele ku mu tsalela papilo ga ku tlhatlha wukati*+ a mu nyika a gumesa a mu hlongola laha kaya kakwe.+ 2 Andzhako ka loku a sukile laha kaya kakwe, a ngava sati wa mun’wani wanuna.+ 3 Loku a wanuna loyi wa wumbiri a mu venga,* a mu tsalela a papilo ga ku tlhatlha wukati a mu nyika a gumesa a mu hlongola laha kaya kakwe kutani loku a wanuna loye wa wumbiri a chadhileko naye afa, 4 a nuna wakwe wo sangula loyi a mu hlongolileko a nga ta vhumelelwa a ku tlhela a mu teka kambe kota sati wakwe andzhako ka loku a nyenyezisilwe, hakuva lowo i nchumu wo nyenyeza ka Jehovha. U nga nghenisi ciwonho tikweni legi Jehovha, a Nungungulu wa wena, a ku nyikako kota tshomba.

5 “Loku a wanuna a ha hi ku chadha, a ngayi yimpini ne ku nyikiwa wun’wani ntiro. I ta tlhatlheka a lembe gin’we, a tshama laha kaya a tsakisa sati wakwe.+

6 “I hava a faneleko ku khomela mun’wani a cigayo ca mandla kutani ribye ga le hehla ga cigayo kota citiyisekiso hi lezvi a mu dhevhako,+ hakuva zvi wa tava ku teka wutomi* ga munhu giva citiyisekiso.

7 “Loku ku poliwa lezvaku a wokari i khomile a makabye wakwe wa muIzrayeli, a mu xanisa a tlhela a mu xavisa,+ a khamba lego gi fanele kufa.+ Fuvisa wubihi cikari ka wena.+

8 “Loku ku humelela hlokonho,* chela kota u landzela zvontlhe a zvileletelo lezvi a vapristi va vaLevhi va to mu nyika.+ Chelani kota mu zvi landzelisa zvalezvi ndzi nga va leletelisa zvona. 9 Alakanya lezvi Jehovha, a Nungungulu wa wena, a nga maha Miriyamu lomu ndleleni a cikhati leci mu nga kari mu huma hi Gibhite.+

10 “Loku u mu lomba cokari a muakelani wa wena,+ u nga ngheni lomu ndlwini yakwe kasi ku mu tekela leci a ku khomisileko kota citiyisekiso. 11 Nyima le handle, loyi u nga mu lomba i ta huma ni citiyisekiso a ta ku nyika. 12 Loku a hi cisiwana u nga etleli ni leci a ku khomisileko kota citiyisekiso.+ 13 Mu tlhelisele leci a ku khomisileko kota citiyisekiso neti gi pela; makunu yena i taya kuetleleni na a hi ni kumba wakwe+ a tlhela a ku katekisa; lezvo zvi ta ku maha uva wo lulama mahlweni ka Jehovha, a Nungungulu wa wena.

14 “U nga kalaveli a mutiri a tholilweko loyi a nga muvhumali tlhelo cisiwana, ku ngava mun’we wa vamakabye va wena kutani muluveli a nga tikweni ga wena cikari ka madhoropa* ya wena.+ 15 Mu nyike a muholo wakwe ka siku galego,+ a gambo na gi nga se pela, hakuva i wusiwaneni niku a wutomi* gakwe gi khegela ka muholo wakwe. Loku u nga mahi lezvo, i ta rila ka Jehovha hi kota ya wena niku wena u tava ni nandzu wa ciwonho.+

16 “A vapapayi a va faneli ku dayiswa hi mitiro ya vana vabye, ni vana a va faneli ku dayiswa hi mitiro ya vapapayi vabye.+ A mun’we ni mun’wani i ta dawa ntsena hi kota ya ciwonho cakwe.+

17 “U nga soholoti a nongameto laha u xuxako a mhaka ya muluveli kutani ya n’wanana a nga hiko na papayi,*+ ne u nga yi khomeli nguwo a noni* hi kota ya lezvi u nga yi lomba cokari.+ 18 Alakanya lezvaku u wa hi khumbi le Gibhite niku Jehovha, a Nungungulu wa wena, i ku tlhatlhisile leyo.+ Hi caleco ci ndzi mahako ndzi ku leletela a ku maha lezvi.

19 “Loku u rivala a nyandza lomu masin’wini, laha u tshovelako a simu ga wena, u nga tlheli u ya teka. Zvi wa tsikelwe muluveli, ni n’wanana a nga hiko na papayi, ni noni+ kasi Jehovha, a Nungungulu wa wena, a ku katekisa ka zvontlhe lezvi u mahako.+

20 “A cikhati leci u phophako a olivha wa wena u nga phophi ga wumbiri lomu ka madhavi ya kona. Lezvi zvi to sala zvi ta tshama kasi zviva zva muluveli, ni n’wanana a nga hiko na papayi,* ni noni.*+

21 “A cikhati leci u khayelako a mauvha ya civhina* ca wena, u nga tlheli hi ndzhako u khayela lawa ma seleko. Ma ta salela muluveli, ni n’wanana a nga hiko na papayi ni noni. 22 Alakanya lezvaku u wa hi khumbi tikweni ga Gibhite. Hi caleco ci ndzi mahako ndzi ku leletela a ku maha lezvi.

25 “Loku ku humelela mazunga cikari ka vavanuna, va ta ya ti wonekelisa mahlweni ka valamuli;+ va ta va lamula, loyi wo lulama va taku a nga na nandzu, loyi wakubiha vaku i na ni nandzu.+ 2 Loku loyi a nga ni nandzu a ringana ku biwa,+ a mulamuli i ta mu baramisa lahasi a biwa mahlweni kakwe. A ntsengo wa timhika leti a to biwa wu wa ringane ni kubiha loku a ku mahileko. 3 A nga muba kala 40 wa timhika,+ kanilezvi a nga hundzisi laho. Loku o simama ku muba timhika to tala ku hundza leto, a makabye wa wena i tawa tingana mahlweni ka wena.

4 “U nga bohi nomu wa homu a cikhati leci yi hulako timbewu.+

5 “Loku a vakamakabye va cinuna va hanya zvin’we, a mun’we wabye afa na a nga hi na n’wana, a sati wa matsuva a nga faneli ku chadha ni munhu wa le handle ka ngango lowo. A kunyadho wakwe i waye kakwe, a ya mu teka a maha sati wakwe, a mu hlambela.+ 6 A n’wana wa matewula loyi a wasati loye a to pswala i ta vhuxa vito ga matsuva+ kasi a vito gakwe gi nga vhinyiwi lomu Izrayeli.+

7 “Makunu loku a wanuna a nga zvi lavi ku chadha ni sati loyi a siyilweko hi makabye wakwe, a sati wa matsuva i fanele kuya madhoteni le nyangweni ya dhoropa, a yaku: ‘A makabye wa nuna wa mina wa ala ku vhuxa vito ga makabye wakwe lomu Izrayeli. A nga vhumeli ku ndzi hlambela.’ 8 A madhota ya dhoropa gakwe ma wa mu vitanise ma ta wulawula naye. Loku a simama aku: ‘A ndzi zvi lavi a ku chadha naye,’ 9 makunu a sati loyi a siyilweko hi makabye wakwe i ta tshinela kakwe mahlweni ka madhota, a mu tlhatlha sandalia nkondzweni wakwe,+ a mu phelela lomu nghoheni, aku: ‘Ku wa mahiwe lezvi ka wanuna loyi a to kala ku vhuxa yindlu ya makabye wakwe.’ 10 Andzhako ka lezvo, a vito gakwe* lomu Izrayeli gi ta vitaniwa ku ngalo: ‘Yindlu ya loyi a tlhatlhilweko sandalia.’

11 “Loku a vavanuna vambiri valwa, a sati wa mun’we wabye a zvi nghenela kasi ku vhikela a nuna wakwe ka loyi a mu bako, a nawuluta a canja gakwe a mu khoma a zviro zvakwe zvo fihlala, 12 tsema a canja gakwe. U* nga mu tsetsi.

13 “U ngavi ni maribye mambiri yo hambana ya ku pima hi wona cikhwameni ca wena,+ a ga hombe ni ga gitsongwani. 14 U ngavi ni zvibya zvimbiri zvo hambana zva ku pima hi zvona* ndlwini ya wena,+ a ca hombe ni ca citsongwani. 15 Tshama ni pezo ya lisine ni yo tsumbeka zvin’we ni lipimo la lisine ni lo tsumbeka, u fela ku hanya masiku yo tala tikweni legi Jehovha, a Nungungulu wa wena, a ku nyikako.+ 16 Hakuva ni wihi munhu a nga lulamangiko a mahako zvilo lezvo cinyenyeko ka Jehovha, a Nungungulu wa wena.+

17 “Alakanya lezvi Amaleki a nga ku maha lomu ndleleni na mu huma hi Gibhite.+ 18 I no ku landza, a ku kuma lomu ndleleni, a vhukela vontlhe lava va nga sele ndzhako vata hi kutikoka, laha u nga karele ni ku rereka. A nga chavangi Nungungulu. 19 Laha Jehovha, a Nungungulu wa wena, a to ngha a ku nyikile kuhumula ka vontlhe a valala va wena lava va ku randzeleko tikweni legi Jehovha, a Nungungulu wa wena, a ku nyikako kota tshomba lezvaku u gi teka,+ u ta fuvisa Amaleki a nga ha kumbukiwi kambe lahasi ka matilo.+ U nga rivali lezvo.

26 “Laha hi kugumesa u to nghena tikweni legi Jehovha, a Nungungulu wa wena, a ku nyikako kota tshomba, ni laha u to ngha u gi tekile u hanya ka gona, 2 u ta pambula a mihandzu yo sangula ka wontlhe a pfuno wa misava lowu u to hlengeleta tikweni ga wena legi Jehovha, a Nungungulu wa wena, a ku nyikako, u yi chela cindzaleni* u famba nayo wutshan’wini legi Jehovha, a Nungungulu wa wena, a to gi hlawula kasi a vito gakwe gi tshama ka gona.+ 3 U taya ka mupristi loyi a to ngha a tira ka masiku lawo, u yaku kakwe: ‘Nyamutlha ndza bika ka Jehovha, a Nungungulu wa wena, lezvaku ndzi nghenile tikweni legi Jehovha a hlambanyileko ka vakokwani va hina a ku hi nyika gona.’+

4 “A mupristi i ta teka a cindzala* canjeni ga wena a ci veka mahlweni ka alati ga Jehovha, a Nungungulu wa wena. 5 Hi kulandzela, u ta wula mahlweni ka Jehovha, a Nungungulu wa wena, uku: ‘A papayi wa mina i wa hi muAramu+ wa mupepetseki,* kanilezvi i no relela Gibhite+ ni ntsengo wu tsongwani wa vanhu ngangweni wakwe, a ya hanya seyo kota muluveli.+ Kanilezvi kwaseyo i nova tiko ga hombe ni ga ntamu ni ga vanhu vo tala.+ 6 A vaGibhite va no hi xanisa ni ku hi mahela xapi va tlhela va hi maha tikhumbi ti nga teki.+ 7 Hikwalaho, hi no sangula ku rila mahlweni ka Jehovha, a Nungungulu wa vakokwani va hina, niku Jehovha i nozwa a gezu ga hina a wona a kuxaniseka ka hina, ni hlomulo wa hina, ni xapi leyi hi nga kari hi mahelwa.+ 8 Hi kugumesa, Jehovha i no hi humesa Gibhite hi canja ga ntamu ni woko gi nawulutilweko,+ ni mitiro yo chavisa, ni zviwoniso ni zvihlamaliso.+ 9 Hi kulandzela, i no hi neha ka wutshamu legi, a hi nyika a tiko legi, a tiko gi khulungako a masi ni wulombe.+ 10 Makunu ndza neha a mihandzu yo sangula ya pfuno wa misava leyi Jehovha a ndzi nyikileko.’+

“U ta veka a cindzala* ca mihandzu mahlweni ka Jehovha, a Nungungulu wa wena, u khizama mahlweni ka Jehovha, a Nungungulu wa wena. 11 Wena, ni muLevhi, ni muluveli a nga cikari ka wena, mu ta tsaka hi kota ya zvontlhe a zvilo zva zvinene lezvi Jehovha, a Nungungulu wa wena, a nyikileko wena ni ngango wa wena.+

12 “Loku u mbheta ku pambula a zvawukhume+ zva wontlhe a pfuno wa wena hi lembe ga wunharu, gi nga lembe ga zva wukhume, u ta nyika a muLevhi, ni muluveli, ni n’wanana a nga hiko na papayi* ni noni;* va taga kala va xura lomu ndzeni ka madhoropa* ya wena.+ 13 Makunu u ta wula mahlweni ka Jehovha, a Nungungulu wa wena, uku: ‘Ndzi humesile a cipandze co basa lomu ndlwini ya mina ndzi nyika a muLevhi, ni muluveli, ni n’wanana a nga hiko na papayi ni noni,+ kota lezvi u ndzi leleteleko. A ndzi hambunyetangi ne ku kanyisa a zvileletelo zva wena. 14 A ndzi gangi na ndzi hi cirilweni, ne ku henya a cin’we ca zvona na ndzi nga hlazvekangi, ne ku nyikela cin’we ca zvona ka vafileko. Ndzi ingisile a gezu ga Jehovha, a Nungungulu wa mina, ndzi maha zvontlhe lezvi u ndzi layileko. 15 Makunu cuwuka seno hasi, na u hi wutshan’wini ga wena go basa, le matilweni, u katekisa a vanhu va wena, a va ka Izrayeli, ni tiko legi u hi nyikileko,+ khwatsi hi lezvi u hlambanyileko ka vakokwani va hina,+ gi nga tiko gi khulungako a masi ni wulombe.’+

16 “Nyamutlha, Jehovha, a Nungungulu wa wena, wa ku laya lezvaku u hlayisa a zvileletelo lezvi ni zviboho lezvi zva kulamula. Zvi ingise u tlhela u zvi maha hi mbilu ya wena yontlhe+ ni muhefemulo* wa wena wontlhe. 17 Nyamutlha u kumile a mhaka ya Jehovha ya lezvaku i tava Nungungulu wa wena laha u fambako tindleleni takwe ni ku hlayisa a zvileletelo zvakwe,+ ni milayo yakwe,+ ni zviboho zvakwe zva kulamula,+ ni laha u ingisako a gezu gakwe. 18 Niku nyamutlha, Jehovha i kumile mhaka ya n’wina ya lezvaku mu tava vanhu vakwe, a tshomba yakwe yo hlawuleka,*+ kota lezvi a mu tsumbisileko, ni lezvaku mu ta ingisa yontlhe a milayo yakwe 19 niku i ta mu tlakusa hehla ka matiko wontlhe lawa a ma mahileko,+ kota lezvi a tsumbisileko, a mu nyika wudhumo, ni nduma ni wudzundzo loku mu simama a kuva vanhu va basileko mahlweni ka Jehovha, a Nungungulu wa n’wina.”+

27 Makunu Mosi i no laya vanhu na a hi zvin’we ni madhota ya ka Izrayeli, aku: “Ingisani yontlhe milayo leyi ndzi mu nyikako nyamutlha. 2 Ka siku legi mu to tlhatuka Jordhani mu nghena tikweni legi Jehovha, a Nungungulu wa n’wina, a mu nyikako, mu ta yimisa a maribye ya hombe mu ma penda hi mhemba.*+ 3 Laha u to ngha u tlhatukile Jordhani, tsala ka wona wontlhe a magezu ya Nayo lowu kasi u nghena tikweni legi Jehovha, a Nungungulu wa wena, a ku nyikako, a tiko gi khulungako a masi ni wulombe, kota lezvi Jehovha, a Nungungulu wa vakokwani va wena, a ku tsumbisileko.+ 4 Laha u to ngha u tlhatukile Jordhani, yimisa a maribye lawa Citsungeni ca Ebhale+ u ma penda hi mhemba, kota lezvi ndzi ku leletelako nyamutlha. 5 Ka wutshamu lego, mu akele ni alati Jehovha, a Nungungulu wa wena, gi nga alati ga maribye. U nga tirisi a feramenta ya simbi hehla ka wona.+ 6 Aka alati ga Jehovha, a Nungungulu wa wena, hi maribye ya murumba, u nyikela a minyikelo ya kuhiswa ka Jehovha, a Nungungulu wa wena, hehla ka gona. 7 U ta maha ni miphahlo ya kuhlengela*+ u yi gela laho,+ u ti tsakela mahlweni ka Jehovha, a Nungungulu wa wena.+ 8 Tsala a timhaka tontlhe ta Nayo lowu hehla ka maribye lawo ti woneka khwatsi.”+

9 Hi kulandzela, Mosi ni vapristi va vaLevhi va no wulawula ni vaIzrayeli vontlhe, vaku: “Miyela, Izrayeli, u ingisela. Nyamutlha u mahile tiko ga Jehovha, a Nungungulu wa wena.+ 10 Hikwalaho, ingisa a gezu ga Jehovha, a Nungungulu wa wena, u hlayisa a milayo yakwe+ ni zvileletelo zvakwe lezvi ndzi ku layako nyamutlha.”

11 Ka siku lego, Mosi i no laya vanhu, aku: 12 “Laha mu to ngha mu tlhatukile Jordhani, a tixaka leti ti to yima Citsungeni ca Gerezima+ ti katekisa vanhu hi leti: Va ka Simeyoni, ni va ka Levhi, ni va ka Judha, ni va ka Isakari, ni va ka Josefa, ni va ka Bhenjamini. 13 Lava va to yima Citsungeni ca Ebhale+ va wula ciruko hi lava: Va ka Rubheni, ni va ka Gadhi, ni va ka Axeri, ni va ka Zebhuloni, ni va ka Dhani, ni va ka Naftali. 14 A vaLevhi va ta byela vontlhe a vaIzrayeli hi gezu ga hombe, vaku:+

15 “‘I rukatelwe a munhu loyi a mahako cifananiso ci kehlilweko+ kutani cifananiso ca simbi*+ — ci nga cilo co nyenyeza ka Jehovha,+ ci nga ntiro wa mandla ya meseri,* — a gumesa a ci fihla.’ (Ni vanhu vontlhe va ta hlamula, vaku: ‘Amen!’*)

16 “‘I rukatelwe loyi a chepetako a papayi wakwe kutani mamani wakwe.’+ (A vanhu vontlhe va ta wula, vaku: ‘Amen!’)

17 “‘I rukatelwe loyi a rurisako cikhongwani ca mbhingano wa muakelani wakwe.’+ (A vanhu vontlhe va ta wula, vaku: ‘Amen!’)

18 “‘I rukatelwe loyi a pengisako cikhumu ndleleni ya cona.’+ (A vanhu vontlhe va ta wula, vaku: ‘Amen!’)

19 “‘I rukatelwe loyi a soholotako nongameto+ laha a xuxako a mhaka ya muluveli, ni ya n’wanana a nga hiko na papayi* kutani ya noni.’*+ (A vanhu vontlhe va ta wula, vaku: ‘Amen!’)

20 “‘I rukatelwe loyi a etlelako ni sati wa papayi wakwe, hakuva i mu wisa tingana a papayi wakwe.’*+ (A vanhu vontlhe va ta wula, vaku: ‘Amen!’)

21 “‘I rukatelwe loyi a etlelako ni cihi cihari.’+ (A vanhu vontlhe va ta wula, vaku: ‘Amen!’)

22 “‘I rukatelwe loyi a etlelako ni makabye wakwe wa cisati, a nga nhanyana wa papayi wakwe kutani nhanyana wa mamani wakwe.’+ (A vanhu vontlhe va ta wula, vaku: ‘Amen!’)

23 “‘I rukatelwe loyi a etlelako ni mukokati wakwe.’+ (A vanhu vontlhe va ta wula, vaku: ‘Amen!’)

24 “‘I rukatelwe loyi a jumako muakelani wakwe a mu daya.’+ (A vanhu vontlhe va ta wula, vaku: ‘Amen!’)

25 “‘I rukatelwe loyi a vhumelako ku xavelelwa kasi a daya munhu* a nga hiko na nandzu.’+ (A vanhu vontlhe va ta wula, vaku: ‘Amen!’)

26 “‘I rukatelwe loyi a to tsika ku hlayisa timhaka ta Nayo lowu, a nga ti mahi.’+ (A vanhu vontlhe va ta wula, vaku: ‘Amen!’)

28 “Loku u ingisa khwatsi a gezu ga Jehovha, a Nungungulu wa wena, hi ku landzela a milayo yontlhe leyi ndzi ku leletelako nyamutlha u nga pswhapswhanyisi ne cin’we, hakunene Jehovha, a Nungungulu wa wena, i ta ku tlakusa hehla ka matiko wontlhe ya laha misaveni.+ 2 A makatekwa lawa wontlhe ma tata hehla ka wena ma tlhela ma ku rangela+ hi ku ngha u simama ku ingisa a gezu ga Jehovha, a Nungungulu wa wena:

3 “U ta katekiswa lomu dhoropeni, u tlhela u katekiswa le handle ka dhoropa.+

4 “Ku ta katekiswa ni vana va wena*+ ni handzu wa misava ya wena ni pswalo wa zvifuyo zva wena, a marole ya wena ni tiyivhana ta wena.+

5 “Ci ta katekiswa a cindzala* ca wena+ ni ngelo wa wena lowu u vhuvelako ka wona mapa.+

6 “U ta katekiswa a cikhati leci u nghenako, u tlhela u katekiswa a cikhati leci u humako.

7 “Jehovha i ta ku nyika kuhlula hehla ka valala va wena lava va to ku vhukela.+ Va tata hi ndlela yin’we va talwa na wena, kanilezvi va ta tsutsuma mahlweni ka wena hi 7 wa tindlela.+ 8 Jehovha i ta laya makatekwa lezvaku mava matshaleni ya wena+ ni ka mitiro ya wena yontlhe, niku hakunene i ta ku katekisa tikweni legi Jehovha, a Nungungulu wa wena, a ku nyikako. 9 Jehovha i ta ku yimisa lezvaku uva tiko gakwe gi basileko,+ kota lezvi a hlambanyileko ka wena,+ hi kota ya lezvi u simamako ku hlayisa a milayo ya Jehovha, a Nungungulu wa wena, ni ku famba tindleleni takwe. 10 A matiko wontlhe ya laha misaveni ma ta kurumeteka ku zvi wona lezvaku u vitanwa hi vito ga Jehovha,+ ma ku chava.+

11 “Jehovha i ta ku nyika vana va talela ga cima ni zvifuyo zvo tala ni misava yo nona+ tikweni legi Jehovha a hlambanyileko ka vakokwani va wena a ku ku nyika gona.+ 12 Jehovha i ta ku vhululela a tshala gakwe ga ginene, ma nga matilo, kasi gi gi nisela vhula a tiko ga wena hi tinguva ta yona+ ni ku katekisa zvontlhe lezvi u mahako. U ta pembisa ka matiko yo tala, kanilezvi wena u nga ta pemba nchumu.+ 13 Jehovha i ta ku maha hloko, ku nga hi mudhoza;* u tava hehla,+ ku nga hi lahasi, loku u simama ku ingisa a milayo ya Jehovha, a Nungungulu wa wena, leyi ndzi ku leletelako nyamutlha lezvaku u yi hlayisa ni ku yi maha. 14 U nga hambuki ka timhaka tontlhe leti ndzi ku leletelako nyamutlha, uya cineneni kutani cibhabheni,+ u landzela van’wani vanungungulu kasi ku va tirela.+

15 “Kanilezvi, loku u nga ingisi a gezu ga Jehovha, a Nungungulu wa wena, hi ku chela kota u hlayisa yontlhe a milayo yakwe ni zvileletelo zvakwe lezvi ndzi ku nyikako nyamutlha, zvontlhe a zviruko lezvi zvi tata hehla ka wena zvi ku rangela:+

16 “U ta welwa hi ciruko lomu dhoropeni, u tlhela u welwa hi ciruko le handle ka dhoropa.+

17 “Ci ta welwa hi ciruko a cindzala* ca wena+ ni ngelo wa wena lowu u vhuvelako ka wona mapa.+

18 “Va ta welwa hi ciruko a vana va wena*+ ni handzu wa misava ya wena ni marole ya wena ni tiyivhana ta wena.+

19 “U ta welwa hi ciruko a cikhati leci u nghenako, u tlhela u welwa hi ciruko a cikhati leci u humako.

20 “Jehovha i ta rumela ciruko hehla ka wena, ni vhilinganya ni tsayiselelo ka yontlhe mitiro ya wena kala u hihiritwa ni ku loviswa hi cihatla hi kota ya mitiro ya wena ya kubiha ni lezvi u nga ndzi tsika.+ 21 Jehovha i ta ku maha u namarelwa hi mababyi kala a ku lovisa u ku bhi tikweni legi u yako ka gona u ya gi teka.+ 22 Jehovha i ta kuba hi ndele, ni feveri yo hisa,+ ni kuvhimba, ni kuhisa ka miri, ni cipadha,+ ni moya wa kuhisa,* ni kukuruka.+ Zvi ta ku hlongolisela kala u lova. 23 A matilo ma nga hehla ka hloko ya wena ma tava kobre, ni misava lahasi ka wena yi tava simbi.+ 24 Jehovha i ta hundzula vhula ya tiko ga wena yiva tsutsungwani ni ntshuri, lezvi zvi tona hehla ka wena na zvita hi le matilweni kala u hihiritwa u ku bhi. 25 Jehovha i ta ku tsika u hluliwa hi valala va wena.+ U ta huma a ku yalwa navo hi ndlela yin’we, kanilezvi u ta tsutsuma mahlweni kabye hi 7 wa tindlela. U tava nchumu wo tshisa ka mifumo yontlhe ya laha misaveni.+ 26 A zvirumbi zva wena zvi tava zvakuga zva zvinyanyani zvontlhe zva tilo ni zvihari zvontlhe zva laha misaveni, niku i hava a to zvi hlongola.+

27 “Jehovha i ta kuba hi zvidlayi zva Gibhite, ni mababyi ya kwilakwila,* ni kutlhukurela, ni zvirumbani, a mababyi ya ku a wu nge tiriwi u hanya. 28 Jehovha i ta kuba hi lihlanyi ni wukhumu+ ni kupepuka. 29 U ta famba hi kuphiphitela na gi hi dhina, a ku khwatsi cikhumu ci fambako hi kuphiphitela lomu munyameni.+ U nga ta humelela ni ka cihi u mahako, niku u ta kalavelwa ni ku yivelwa contlhe cikhati na ku nga hi na wa ku ku ponisa.+ 30 U ta wuta wasati, kanilezvi a mun’wani wanuna i ta mu pfinya. U ta aka yindlu, kanilezvi u nga ta tshama ka yona.+ U ta byala civhina,* kanilezvi u nga ta ringa a mihandzu ya cona.+ 31 A dhuna ga wena ga homu gi ta dawa mahlweni ka wena, kanilezvi a nyama ya kona u nga ta yi ringa. A mbongola ya wena yi ta yiviwa mahlweni ka wena, kanilezvi yi nga ta wuya ka wena. A tiyivhu ta wena ti ta nyikelwa ka valala va wena, kanilezvi u nga tava ni wa ku ku ponisa. 32 A vafana va wena ni vanhanyana va wena va ta nyikelwa ka gin’wani tiko+ na u zvi wona hi mahlo, niku u ta va xuva contlhe cikhati, kanilezvi a mandla ya wena ma nga tava ni ntamu. 33 A mihandzu ya misava ya wena ni zvontlhe u zvi bhindzulako zvi ta giwa hi vanhu u nga va tiviko,+ niku u ta kalavelwa ni ku xanisiwa contlhe cikhati. 34 U ta hlanyisiwa hi lezvi a mahlo ya wena ma to zvi wona.

35 “Jehovha i ta kuba hi zvidlayi zvo bayisa ni zvi nga chumekiko madzolweni ya wena ni minengeni ya wena, kusukela lahasi ka nkondzo wa wena kala ka tshavatshava ga hloko ya wena. 36 Jehovha i ta ku teka zvin’we ni hosi leyi u to yi yimisa hehla ka wena a ku yisa ka tiko legi wena ni vakokwani va wena mu nga gi tiviko;+ kwaseyo, u ta ya tirela van’wani vanungungulu, va nga vanungungulu va tisinya ni va maribye.+ 37 U tava nchumu wo tshisa, u chepetiwa* u tlhela uva cihlekiso cikari ka matiko wontlhe lawa Jehovha a to ku yisa ka wona.+

38 “U ta byala timbewu to tala masin’wini, kanilezvi u ta tshovela zvitsongwani,+ hakuva zvi ta giwa hi humbi.* 39 U ta byala zvivhina u tlhela u zvi hlakulela, kanilezvi u nga tanwa a vhinyo ya kona ne ku hlengeleta nchumu,+ hakuva zvi ta giwa hi zviwungwani. 40 U tava ni miolivha cipandzeni ca wena contlhe, kanilezvi u nga ta tola mafura ya yona hakuva a maolivha ma ta tlhatlheka. 41 U ta pswala vafana ni vanhanyana, kanilezvi va nga ta simama kuva va wena, hakuva va taya wukhumbini.+ 42 A mabutho ya zvidodwani ma ta pomela a tisinya ta wena tontlhe ni mihandzu ya misava ya wena. 43 A muluveli loyi a nga cikari ka wena i ta simama ku tlakuka a ku hundza nguvhu, kuveni wena u ta simama ku relela uya hasi nguvhu. 44 I ta pembisa ka wena, kanilezvi wena u nga ta mu pemba nchumu.+ I tava hloko, kuveni wena u tava mudhoza.*+

45 “Zvontlhe a zviruko lezvi+ zvi tata hehla ka wena, zvi ku landza zvi tlhela zvi ku rangela kala u hihiritwa,+ hakuva a wu ingisangi a gezu ga Jehovha, a Nungungulu wa wena, u hlayisa a milayo yakwe ni zvileletelo zvakwe lezvi a ku nyikileko.+ 46 Zvi ta simama ka wena ni ka pswalo wa wena kota cikombiso ni citlharihiso ca kala kupindzuka,+ 47 hakuva a wu tirelangi Jehovha, a Nungungulu wa wena, hi kutsaka ni mbilu yi xaleleko a cikhati leci u nga hi ni zvontlhe na zvi ku talele.+ 48 Jehovha i ta rumela valala va wena va ta ku vhukela, niku wena u ta va tirela+ na u xoka hi ndlala+ ni tora na u bohile mazacha, lezvo na u vhumala zvontlhe. I ta vekela kanga wa simbi nhan’wini ya wena kala a ku hihirita u ku bhi.

49 “Jehovha i ta ku vitanela a tiko ga le kule,+ hi magemeta-musi ya misava. Gi ta ku vhukela hi cihatla a ku khwatsi i gama,+ gi nga tiko legi a lirimi la gona u to kala ku li zwisisa,+ 50 a tiko gi ti kombako ku ga leva, gi to kala ku chela kota hi vakhosaheleko ne ku tsetsa vaswa.+ 51 Va taga a vana va zvifuyo zva wena ni mihandzu ya misava ya wena kala u hihiritwa. Va nga ta ku siyela ndzhoho, ne vhinyo yiswa kutani mafura, hambu ni marole kutani tiyivhana kala va ku lovisa.+ 52 Va ta ku randzela, va ku vhalela lomu ndzeni ka madhoropa* ya wena wontlhe tikweni ga wena gontlhe kala a mimuro ya wena yo tlakuka ni yi vhikelweko khwatsi leyi u yi tsumbako yiwa. Ina, hakunene va ta ku randzela madhoropeni ya wena wontlhe tikweni ga wena gontlhe legi Jehovha, a Nungungulu wa wena, a ku nyikileko.+ 53 U taga a vana va wena,* a nyama ya vafana va wena ni vanhanyana va wena+ lava Jehovha, a Nungungulu wa wena, a ku nyikileko, hi kota ya lezvi a valala va wena va ku randzeleko u vhumala ni ko huma hi kona, ni hi kota ya hlomulo lowu va ku vangelako.

54 “Hambu a wanuna wo hanya mafureni ni wo hatla a khumbeka ka vontlhe cikari ka wena a nga ta mu zwela wusiwana a makabye wakwe wa cinuna kutani a sati wa mbilu yakwe kutani vafana vakwe lava va seleko. 55 A nga ta va avela ne yitsongwani a nyama ya vana vakwe leyi a toga, hakuva a nga na cin’wani hi kota ya lezvi a valala va mu randzeleko a vhumala ni ko huma hi kona, ni hlomulo lowu a valala va wena va to wu vanga madhoropeni ya wena.+ 56 Ni wasati wa ku hanya mafureni ni wo hatla a khumbeka cikari ka wena, wa ku i wa nga ta tshuka a pimisa ku kandzihela lahasi hi nkondzo wakwe hi lezvi a hanyako mafureni,+ a nga ta mu zwela wusiwana a nuna wa mbilu yakwe kutani mufana wakwe kutani nhanyana wakwe, 57 ne a nga ta va avela a gulu legi gi humako hi cikari ka minenge yakwe ni vana lava a to pswala. I ta zvi gela kufihlaleni hi kota ya lezvi a valala va mu randzeleko a vhumala ni ko huma hi kona, ni hi kota ya hlomulo lowu a valala va wena va wu vangako madhoropeni ya wena.

58 “Loku u nga cheli kota u hlayisa a timhaka tontlhe ta Nayo lowu ti tsalilweko bhukwini legi+ ni loku u nga chavi a vito legi go ngangamela ni go chaviseka,+ gi nga vito ga Jehovha,+ a Nungungulu wa wena, 59 Jehovha i ta kuba hi mitungu yo tshisa, wena ni pswalo wa wena, a mitungu ya hombe yo kala yi nga hundzi,+ ni mababyi yo karata yo kala ma nga hundzi. 60 I ta tlhela a ku tisela a mababyi wontlhe ya Gibhite lawa u nga ma chava, niku hakunene ma ta ku namarela. 61 A ku tsika lezvo, Jehovha i ta neha hehla ka wena wontlhe a mababyi kutani mitungu yi nga tsaliwangiko bhukwini ga Nayo lowu kala u hihiritwa u ku bhi. 62 Hambu lezvi mu nga talisa ku khwatsi tinyeleti ta matilo,+ mu ta sala na mu hi ntsengo wu tsongwani nguvhu,+ hakuva a wu ingisangi a gezu ga Jehovha a Nungungulu wa wena.

63 “Khwatsi hi lezvi Jehovha a nga tsaka hi ku mu katekisa ni ku mu andzisa, Jehovha i ta tsaka kambe hi ku mu lovisa ni ku mu hihirita; mu ta tsuwulwa tikweni legi u yako u ya gi teka.

64 “Jehovha i ta ku hangalasa cikari ka matiko wontlhe, kusukela magemeta-musi man’we ya misava kala ka man’wani magemeta-musi ya misava,+ niku kwaseyo u ta ya tirela vanungungulu va tisinya ni va maribye, lava wena ni vakokwani va wena mu nga va tiviko.+ 65 U nga tava ni kurula cikari ka matiko lawo+ ne wutshamu ga ku veka mikondzo ya wena yi humula. Kanilezvi kwaseyo, Jehovha i ta ku nyika mbilu yo karateka+ ni matihlo ma firimelako ni kuvhumala co maha.+ 66 A wutomi ga wena gi tava mhangweni ya hombe, u rurumela hi kuchava wusiku ni mumu; u nga ta zvi tiva ku u ta pona ke. 67 Ni mixo u taku: ‘Mayiwako loku gi wova wusiku!’ ni wusiku uku: ‘Mayiwako loku gi wova mixo!’, hi kota ya ku rurumela hi kuchava mbilwini ya wena ni hi kota ya lezvi a mahlo ya wena ma to zvi wona. 68 Hakunene Jehovha i ta ku tlhelisa Gibhite hi citimela, hi ndlela leyi ndzi nga ku byela ku: ‘U nga ta ha yi wona kambe’ niku seyo mu ta ti xavisa ka valala va n’wina kota tikhumbi ta cinuna ni ta cisati, kanilezvi i hava a to mu xava.”

29 Leti timhaka ta civhumelwano leci Jehovha a layileko Mosi lezvaku a ci maha ni vanhu va ka Izrayeli tikweni ga Mowabhi, ahandle ka civhumelwano leci a ci mahileko zvin’we navo le Horebhe.+

2 Makunu Mosi i no vitanisa a vaIzrayeli vontlhe, aku kabye: “Mu zvi wonile zvontlhe lezvi Jehovha a mahileko matihlweni ya n’wina tikweni ga Gibhite, a mahela Faro ni malandza yakwe wontlhe ni tiko gakwe gontlhe,+ 3 a kulamula ka hombe loku a mahlo ya wena ma ku wonileko, ku nga zviwoniso zva hombe ni zvihlamaliso.+ 4 Kanilezvi Jehovha a nga mu nyikangi a mbilu ya ku zwisisa ni mahlo ya ku wona ne tindleve ta kuzwa kala ni nyamutlha lezvi.+ 5 ‘Ka 40 wa malembe lawa ndzi nga mu rangela lomu ciwuleni,+ a tinguwo ta n’wina a ti hlakalangi mirini wa n’wina, ni masandalia ya n’wina a ma hlakalangi mikondzweni ya n’wina.+ 6 A mu gangi pawa, a mu nwangi vhinyo ne byala ga lin’wani lixaka, kasi mu zvi tiva lezvaku hi mina Jehovha, a Nungungulu wa n’wina.’ 7 Hi kugumesa, mu no chikela ka wutshamu legi; makunu Sihoni, a hosi ya Hexbhoni,+ na Ogi, a hosi ya Bhaxani,+ va nota va talwa na hina kanilezvi hi no va hlula.+ 8 Andzhako ka lezvo, hi no teka tiko gabye hi gi nyikela kota tshomba ka va ka Rubheni, ni va ka Gadhi, ni ka khihlanya ga lixaka la ka Manase.+ 9 Hikwalaho, hlayisani a timhaka ta civhumelwano leci mu ti ingisa, mu fela ku humelela ka zvontlhe mu mahako.+

10 “N’wina n’wentlhe mu yimile laha nyamutlha mahlweni ka Jehovha, a Nungungulu wa n’wina, a tihloko ta tixaka ta n’wina, ni madhota ya n’wina, ni tihosana ta n’wina, ni vavanuna vontlhe va ka Izrayeli, 11 ni vanana va n’wina, ni vasati va n’wina,+ ni muluveli wa wena+ loyi a nga cikari ka wugovelo ga wena, kusukela ka loyi a ku tshovelako tihunyi kala ka loyi a ku khelako mati. 12 Makunu u yimile laha kasi u nghena ka civhumelwano ca Jehovha, a Nungungulu wa wena, ni ka cihlambanyo cakwe leci Jehovha, a Nungungulu wa wena, a mahako na wena nyamutlha+ 13 kasi a fela ku ku yimisa nyamutlha kota tiko gakwe,+ yena ava Nungungulu wa wena,+ kota lezvi a ku tsumbisileko ni lezvi a hlambanyileko ka vakokwani va wena, Abrahama,+ na Isaka,+ na Jakobe.+

14 “A ndzi mahi a civhumelwano leci ni cihlambanyo leci na n’wina n’wece, 15 kanilezvi ndzi ci maha ni lava va yimileko laha na hina nyamutlha mahlweni ka Jehovha, a Nungungulu wa hina, ni lava va nga hiko laha na hina nyamutlha. 16 (Hakuva n’wina ma zvi tiva khwatsi lezvi hi nga hanyisa zvona tikweni ga Gibhite ni lezvi hi nga tsemakanyisa zvona cikari ka matiko yo hambanahambana lipfhumbeni la hina.+ 17 Mu wonile a zvilo zvabye zvo nyenyeza ni zvifananiso zvabye zva manyala,*+ zva tisinya, ni zva maribye, ni zva prata, ni zva ouro, lezvi zvi nga hi cikari kabye.) 18 Ti woneleni lezvaku nyamutlha ku nga tshuki kuva ni wanuna kutani wasati, ne ngango kutani lixaka cikari ka n’wina, loyi a mbilu yakwe yi fularelako Jehovha, a Nungungulu wa hina, a ya tirela a vanungungulu va matiko lawo+ ni lezvaku ku nga tshuki kuva ni mutsu wu pswalako handzu wa vhenene ni wo bava.+

19 “Kanilezvi loku a wokari azwa timhaka ta cihlambanyo leci, a ti kukumukisa mbilwini yakwe, aku: ‘Ndzi tava ni kurula hambu lezvi ndzi simamako ndzi famba tindleleni ta mbilu ya mina’, hi ndlela leyo a gohetela zvontlhe* zvi nga ndleleni yakwe, 20 Jehovha a nga ta mu tsetselela.+ Kanilezvi a zanga ya hombe ya Jehovha yi ta vhurela munhu loye, ni zviruko zvontlhe zvi tsalilweko bhukwini legi zvi tata hehla kakwe futsi,+ niku Jehovha hakunene i ta vhinya a vito ga munhu loye lahasi ka matilo. 21 Jehovha i ta mu phendla ka tixaka tontlhe ta ka Izrayeli a mu veka tlhelweni kasi a welwa hi khombo hi kuya hi zviruko zvontlhe zva civhumelwano leci, lezvi zvi tsalilweko bhukwini legi ga Nayo.

22 “Laha a cizukulwana ca ha tako ca vana va wena ni muluveli a tako hi tikweni ga le kule va to wona a mitungu ya tiko legi, a mababyi lawa Jehovha a ma nehileko hehla ka gona — 23 a solufa,* ni munyu, ni ndzilo, laha ka kuza a tiko gontlhe ku nga ha byaliwi kutani ku mila nchumu, ne byanyi gi nga ha baleki ka gona, a ku fana ni kulovisiwa ka Sodhoma ni Gomora,+ ni Adma ni Zebhoyime,+ a madhoropa lawa Jehovha a ma lovisileko zangeni yakwe ni khulweni gakwe — 24 vona ni wontlhe a matiko va taku: ‘Hikuyini Jehovha a mahileko lezvi ka tiko legi ke?+ Kona cini ci nga vhindlusa a zanga leyi ya hombe yi vhurako?’ 25 Vona va taku: ‘Hi lezvi va tsikileko civhumelwano ca Jehovha,+ a Nungungulu wa vakokwani vabye, leci a mahileko navo a cikhati leci a nga va humesa tikweni ga Gibhite.+ 26 Va no tirela van’wani vanungungulu va va khizamela, a vanungungulu va ku va wa nga va tivi niku i wa nga va chusangi lezvaku va va khozela.+ 27 Makunu a zanga yi vhurako ya Jehovha yi no vhukela a tiko lego, yi neha hehla ka gona a zviruko zvontlhe zvi tsalilweko bhukwini legi.+ 28 Hikwalaho, Jehovha i no va tsuwula tikweni gabye zangeni yakwe+ ni khulweni gakwe ni hi kukwata ka hombe a va yisa tikweni gin’wani legi va nga ka gona nyamutlha.’+

29 “A zvilo zvi fihleleko zvi lumba Jehovha, a Nungungulu wa hina,+ kanilezvi a zvilo zvi vhululilweko zvi lumba hina ni vana va hina kala kupindzuka, kasi hi hlayisa tontlhe timhaka ta Nayo lowu.+

30 “Laha tontlhe a timhaka leti ti tota ka wena, a makatekwa ni zviruko lezvi ndzi vekileko mahlweni ka wena,+ u ti alakanya*+ na u hi matikweni wontlhe lawa Jehovha, a Nungungulu wa wena, a to ngha a ku hangalasile ka wona,+ 2 makunu wena u tlhelela ka Jehovha, a Nungungulu wa wena,+ u ingisa gezu gakwe hi ku landza zvontlhe lezvi ndzi ku leletelako nyamutlha, wena ni vana va wena, hi mbilu ya wena yontlhe ni muhefemulo* wa wena wontlhe,+ 3 Jehovha, a Nungungulu wa wena, i ta ku wuyisa hi wukhumbini,+ a ku mahela wuxinji+ a tlhela a ku tlhanganisa hi ka wontlhe matiko lawa Jehovha, a Nungungulu wa wena, a to ngha a ku hangalasile ka wona.+ 4 Hambu loku a vanhu va wena va hangalakile kala magumo ya matilo, Jehovha, a Nungungulu wa wena, i ta ku tlhanganisa hi ka matshamu lawo a ku wuyisa.+ 5 Jehovha, a Nungungulu wa wena, i ta ku wuyisa tikweni legi a vapapayi va wena va nga gi teka, niku wena u ta gi fumela; i ta ku katekisa a ku andzisa nguvhu a ku hundza a vapapayi va wena.+ 6 Jehovha, a Nungungulu wa wena, i ta basisa a mbilu ya wena ni mbilu ya pswalo wa wena+ kasi u randza Jehovha, a Nungungulu wa wena, hi mbilu ya wena yontlhe ni muhefemulo* wa wena wontlhe, u fela ku hanya.+ 7 Makunu Jehovha, a Nungungulu wa wena, i ta neha zvontlhe a zviruko lezvi hehla ka valala va wena lava va ku vengileko ni ku ku xanisa.+

8 “U ta tlhelela ka Jehovha, u ingisa gezu gakwe ni ku hlayisa zvontlhe a zvileletelo zvakwe lezvi ndzi ku leletelako nyamutlha. 9 Jehovha, a Nungungulu wa wena, i ta ku katekisa u vhuvhuma nguvhu ka yontlhe mitiro ya mandla ya wena,+ a andzisa vana va wena, ni zvifuyo zva wena, ni pfuno wa misava ya wena, hakuva Jehovha i ta tlhela a xalala hi ku ku maha u vhuvhuma a ku khwatsi hi lezvi a nga xalele hi vakokwani va wena.+ 10 Hakuva ka cikhati leco, u ta ingisa a gezu ga Jehovha, a Nungungulu wa wena, u hlayisa milayo yakwe ni zvileletelo zvakwe zvi tsalilweko bhukwini legi ga Nayo niku u ta tlhelela ka Jehovha, a Nungungulu wa wena, hi mbilu ya wena yontlhe ni muhefemulo* wa wena wontlhe.+

11 “A cileletelo leci ndzi ku nyikako nyamutlha a ci karati ne a ci kule.+ 12 A ci le matilweni, ko kala uku: ‘Himani a to kandziha aya matilweni a ya hi tekela cona kasi hi ta cizwa ni ku ci hlayisa ke?’+ 13 Ne a ci le tlhatuko wa bimbi, ko kala uku: ‘Himani a to hi tlhatukela bimbi a ya hi tekela cona kasi hi ta cizwa ni ku ci hlayisa ke?’ 14 Hakuva a mhaka yi kusuhani nguvhu na wena, yi non’wini wa wena ni mbilwini ya wena,+ u fela ku maha lezvi yi wulako.+

15 “Cuwuka, nyamutlha ndza veka mahlweni ka wena a wutomi ni zvazvinene, a kufa ni zvakubiha.+ 16 Loku u ingisa a milayo ya Jehovha, a Nungungulu wa wena, leyi ndzi ku leletelako nyamutlha, hi ku randza Jehovha, a Nungungulu wa wena,+ u famba tindleleni takwe, ni ku hlayisa a milayo yakwe, ni zvileletelo zvakwe ni zviboho zvakwe zva kulamula, u ta hanya+ u endzeleka niku Jehovha, a Nungungulu wa wena, i ta ku katekisa tikweni legi u yako u ya gi fumela.+

17 “Kanilezvi loku a mbilu ya wena yi hambuka,+ u nga ingisi, u vhumela ku xengiwa u ya khizamela van’wani vanungungulu ni ku va tirela,+ 18 ndza ku byela nyamutlha ndziku u ta lova futsi.+ U nga ta hanya masiku yo tala tikweni legi u tlhatukako Jordhani u ya gi fumela. 19 Nyamutlha ndza vitana matilo ni misava kota vakustumunyu va ku mu vhukela va lezvaku ndzi vekile mahlweni ka wena, a wutomi ni kufa, a makatekwa ni ciruko.+ Makunu hlawula wutomi u fela ku hanya,+ wena ni vana va wena,+ 20 hi ku randza Jehovha, a Nungungulu wa wena,+ u ingisa gezu gakwe ni ku namarela kakwe,+ hakuva hi yena a wutomi ga wena niku ha yena u ta hanya masiku yo tala tikweni legi Jehovha a hlambanyileko ku nyika vakokwani va wena Abrahama, na Isaka, na Jakobe.”+

31 Makunu Mosi i no huma a ya hlawutela timhaka leti ka vaIzrayeli vontlhe, 2 aku kabye: “Nyamutlha ndzi na ni 120 wa malembe.+ Ndzi nga ta ha mu rangela,* hakuva Jehovha i te ngalo ka mina: ‘U nga ta tlhatuka Jordhani loyi.’+ 3 Jehovha, a Nungungulu wa wena, hi yena a to tlhatuka mahlweni ka wena a hihirita matiko lawa mahlweni ka wena, u ma hlongola.+ Joxuwa hi yena a to ku rangela u tlhatuka,+ kota lezvi Jehovha a wulileko. 4 Jehovha i ta va maha zvalezvi a nga maha Sihoni+ na Ogi,+ a tihosi ta vaAmori, ni tiko gabye, a cikhati leci a nga va hihirita.+ 5 Jehovha i ta ma nyikela mandleni ya n’wina; mu ta maha ka wona hi ku landza a zvileletelo zvontlhe lezvi ndzi mu nyikileko.+ 6 Tiya hlanha uva ni ntamu.+ U nga chavi hambu ku rurumela hi hlenekera mahlweni kabye,+ hakuva Jehovha, a Nungungulu wa wena, hi yena a fambako na wena; a nga ta ku tsika hambu ku ku fularela.”+

7 Makunu Mosi i no vitana Joxuwa a ta mu byela lezvi mahlweni ka vontlhe va ka Izrayeli, aku: “Tiya hlanha uva ni ntamu,+ hakuva hi wena u to nghenisa vanhu lava tikweni legi Jehovha a hlambanyileko ka vakokwani vabye a ku va nyika gona; hi wena u to va nyika gona kota tshomba.+ 8 Jehovha hi yena a fambako mahlweni ka wena, niku i ta simama kuva zvin’we na wena;+ a nga ta ku tsika hambu ku ku fularela. U nga chavi ne ku tsemeka hlanha.”+

9 Makunu Mosi i no tsala Nayo lowu+ a nyika vapristi, va nga vaLevhi, lava va rwalako a arke* ga civhumelwano ca Jehovha, ni madhota wontlhe ya ka Izrayeli. 10 Mosi i no va leletela, aku: “Khati ni khati ku mbhelako 7 wa malembe, hi cikhati ci yimisilweko ka lembe ga kutlhatlhisa,+ Mubuzweni wa Michacha,+ 11 laha vontlhe a va ka Izrayeli va ti wonekelisako mahlweni ka Jehovha,+ a Nungungulu wa wena, ka wutshamu legi a to gi hlawula, u ta lera a Nayo lowu kasi vontlhe va ka Izrayeli va wuzwa.+ 12 Tsombanisa vanhu,+ a vavanuna, ni vavasati, ni vanana,* ni muluveli a nga cikari ka madhoropa* ya wena kasi vazwa ni ku gondza ha Jehovha, a Nungungulu wa wena, va mu chava ni ku chela kota va hlayisa a timhaka tontlhe ta Nayo lowu. 13 Makunu a vana vabye lava va nga kala va nga wu tivi a Nayo lowu va ta ingisela+ va tlhela va gondza a ku chava Jehovha, a Nungungulu wa wena, wontlhe masiku lawa va to hanya tikweni legi u tlhatukako Jordhani u ya gi fumela.”+

14 Jehovha i no byela Mosi, aku: “Makunu ci tshinele a cikhati ca ku ufa.+ Vitana Joxuwa mu ya ti wonekelisa* tendeni ga mutlhangano, ndzi fela ku mu yimisa kota murangeli.”+ Hikwalaho, Mosi na Joxuwa va no ya ti wonekelisa tendeni ga mutlhangano. 15 Jehovha i no woneka tendeni hi lomu ka mhinga ya refu, ni mhinga ya refu yi no yima laha nyangweni ya tenda.+

16 Makunu Jehovha i no byela Mosi, aku: “U laha kusuhani ni kufa,* niku a vanhu lava va ta sangula ku maha wubhayi ga moya ni vanungungulu va matiko lawa ma va randzeleko tikweni legi va yako ka gona.+ Va ta ndzi tsika+ va tshova civhumelwano ca mina leci ndzi mahileko navo.+ 17 Ka cikhati caleco, a zanga ya mina yi ta va vhurela.+ Ndzi ta va tsika+ ndzi va fihlela a nghohe ya mina+ kala va loviswa. Andzhako ka ku welwa hi makhombo yo tala ni hlomulo wa hombe,+ va taku: ‘Ina a hi welwi hi makhombo lawa hi lezvi a Nungungulu wa hina a nga hiko cikari ka hina ke?’+ 18 Kanilezvi ndzi ta simama ku fihla a nghohe ya mina ka siku lego hi kota ya kontlhe kubiha loku va ku mahileko hi ku hambuka vaya ka van’wani vanungungulu.+

19 “Makunu tsalani a lisimu leli+ mu li gondzisa a vaIzrayeli.+ Li ngheniseni minon’wini yabye, kasi a lisimu leli liva kustumunyu wa mina wa ku vhukela a vanhu va ka Izrayeli.+ 20 Laha ndzi to va nghenisa tikweni legi ndzi hlambanyileko ka vakokwani vabye+ — a tiko gi khulungako a masi ni wulombe+ — vaga kala va xura va tlhela va kuluka,+ va ta hambuka vaya ka van’wani vanungungulu va va tirela, va kanyisa mina va tlhela va tshova civhumelwano ca mina.+ 21 A cikhati leci va to welwa hi makhombo yo tala ni hlomulo wa hombe,+ a lisimu leli li tava kustumunyu kabye (hakuva a vana vabye a va faneli ku li rivala), hakuva ndzi sina ndzi ma tiva a maalakanyo ya timbilu tabye+ hambu lezvi ndzi kalako ndzi nga se va nghenisa tikweni legi ndzi hlambanyileko ku va nyika.”

22 Hikwalaho, Mosi i no tsala lisimu leli ka siku lego a li gondzisa vaIzrayeli.

23 Makunu i* no yimisa Joxuwa,+ a n’wana wa Nuni, kota murangeli, aku: “Tiya hlanha uva ni ntamu,+ hakuva hi wena u to nghenisa vaIzrayeli tikweni legi ndzi hlambanyileko kabye+ niku ndzi ta simama kuva zvin’we na wena.”

24 Zvalezvi Mosi a nga mbheta ku tsala timhaka tontlhe ta Nayo lowu bhukwini,+ 25 Mosi i no nyika cileletelo leci ka vaLevhi lava va rwalako a arke ga civhumelwano ca Jehovha, aku: 26 “Tekani a bhuku legi ga Nayo+ mu gi veka tlhelweni ga arke+ ga civhumelwano ca Jehovha, a Nungungulu wa n’wina. Gi tava kustumunyu wa ku ku vhukela na gi hi wutshan’wini lego. 27 Hakuva ndza ku tiva a kuhluwuka ka wena+ ni kunonoha ka nhamu ya wena.+ Loku mu mu hluwukelisile lezvi Jehovha na ndza ha hanya cikari ka n’wina, a ndza ha wuli hi loku makunu ndzi file! 28 Ndzi tsombaniseleni a madhota wontlhe ya tixaka ta n’wina ni tihosana ta n’wina, ndzi fela ku wulawula a timhaka leti tindleveni tabye, ndzi vitana matilo ni misava kota vakustumunyu va ku va vhukela.+ 29 Hakuva ndza zvi tiva khwatsi lezvaku andzhako ka kufa ka mina, hakunene mu ta maha zvakubiha+ mu hambuka ndleleni leyi ndzi mu leleteleko. Ni makhombo ma ta mu wela futsi+ masikwini ma ha tako, hakuva mu ta maha zvakubiha mahlweni ka Jehovha, mu mu khunguvanyisa hi mitiro ya mandla ya n’wina.”

30 Mosi i no phinda a magezu ya lisimu leli, kusukela kusanguleni kala magumo, na a zwiwa hi bandla gontlhe ga ka Izrayeli, aku:+

 3 Hakuva ndzi ta huwelela a vito ga Jehovha.+

Wulawulani hi wukulu ga Nungungulu wa hina!+

 5 Hi vona va nga maha zvahava.+

A hi vana vakwe, a cihoxo ca vona venyi.+

Cizukulwana co biha ni co gombonyeka!+

15 A cikhati leci Jexuruni* a nga kuluka, i no hluwuka a khava n’winyi wakwe.

U no nona, u kuluka, u tala hi mafura.+

29 Loku ku wo khwatsi va tlharihile!+ Va wa ta ehleketa hi zvilo lezvi.+

Va wa ta alakanyela hi mawuyawuya ya kona.+

Va wa suke va yima va mu vhuna.

Va wa mahe wuchavelo ga n’wina.

Ndza daya, ndzi tlhela ndzi hanyisa.+

44 Hikwalaho, Mosi i nota a ta phinda a magezu wontlhe ya lisimu leli na a zwiwa hi vanhu,+ na a hi zvin’we na Hoxeya,*+ a n’wana wa Nuni. 45 Andzhako ka loku Mosi a mbhetile ku wulawula a timhaka leti tontlhe ka vontlhe va ka Izrayeli, 46 i te ngalo kabye: “Hlayisani a timhaka tontlhe ta citlharihiso ca mina leci ndzi mu nyikako nyamutlha timbilwini ta n’wina,+ mu fela ku leletela vana va n’wina lezvaku va chela kota va hlayisa a timhaka tontlhe ta Nayo lowu.+ 47 Hakuva leti a hi timhaka to kala lisima ka n’wina, kanilezvi wutomi ga n’wina;+ hi timhaka leti, mu ta hanya masiku yo tala tikweni legi mu tlhatukako Jordhani mu ya gi fumela.”

48 Jehovha i no wulawula na Mosi ka siku galego, aku: 49 “Kandziha citsungeni leci ci nga cipandzeni ca Abharime,+ a Citsunga ca Nebho,+ ci nga tikweni ga Mowabhi, ci cuwukeneko ni Jeriko, u wona a tiko ga Khanani, legi ndzi nyikako va ka Izrayeli kota tshomba.+ 50 U tafa citsungeni leci u lavako ku kandziha, u hlengeletwa ka vanhu va wena,* a ku fana na Aroni, a makabye wa wena, a fileko Citsungeni ca Hora+ a hlengeletwa ka vanhu vakwe, 51 hakuva hi wumbiri ga n’wina, a mu tsumbekangi ka mina cikari ka vaIzrayeli matini ya Meribha+ wa Kadhexe, ciwuleni ca Zini, hakuva a mu ndzi basisangi mahlweni ka vanhu va ka Izrayeli.+ 52 U ta wona tiko hi le kule, kanilezvi u nga ta nghena tikweni legi ndzi nyikako a vanhu va ka Izrayeli.”+

33 Leci cikatekiso leci Mosi, a munhu wa Nungungulu wa lisine, a nga ci wula ka vaIzrayeli na a nga sefa.+ 2 I te ngalo:

 7 Na a katekisa Judha, i te ngalo:+

 8 Xungetano hi Levhi, i te ngalo:+

12 Xungetano hi Bhenjamini, i te ngalo:+

13 Xungetano hi Josefa, i te ngalo:+

18 Xungetano hi Zebhuloni, i te ngalo:+

19 Va ta vitanisa matiko le citsungeni.

Hi seyo va ta nyikela a miphahlo ya kululama.

20 Xungetano hi Gadhi, i te ngalo:+

“I katekile loyi a vhululako mimbhingano ya Gadhi.+

A tihosana ta vanhu ti ta hlengeletana.

22 Xungetano hi Dhani, i te ngalo:+

“Dhani i role ga nghala.+

I ta tlula hi le Bhaxani.”+

23 Xungetano hi Naftali, i te ngalo:+

Fumela a tlhelo ga mupela-gambo ni le dzongeni.”*

24 Xungetano hi Axeri, i te ngalo:+

“Axeri i katekile hi kuva ni vana.

29 Wa tsaka wena Izrayeli!+

34 Makunu Mosi i no suka hi tivaleni ta Mowabhi a ya kandziha Citsungeni ca Nebho,+ le hehla ka Pisga,+ ci cuwukeneko ni Jeriko.+ Jehovha i no mu komba tiko gontlhe kusukela Gileyadhe kala Dhani,+ 2 ni tiko gontlhe ga Naftali, ni tiko ga Efrayime ni ga Manase, ni tiko gontlhe ga Judha kala bimbini ga mupela-gambo,*+ 3 ni Negebhe,+ ni Dhistrito,*+ a ku patsa ni nkova wa Jeriko, a dhoropa ga micindzu, kala Zoware.+

4 Makunu Jehovha i te ngalo kakwe: “Legi i tiko legi ndzi hlambanyileko ka Abrahama, ni ka Isaka, ni ka Jakobe, ndziku: ‘Ndzi ta nyika a pswalo* wa wena.’+ Ndzi ku tsikile u gi wona hi matihlo ya wena, kanilezvi u nga ta tlhatuka u nghena ka gona.”+

5 Andzhako ka lezvo, Mosi, a nandza ga Jehovha, i nofa kwalaho, tikweni ga Mowabhi, khwatsi hi lezvi Jehovha a nga wulile.+ 6 I no mu lahla lomu nkoveni wu nga tikweni ga Mowabhi, wu cuwukeneko ni Bhet-Peyori; i hava a ku tivako laha a cilahla cakwe ci nga kona kala ni nyamutlha lezvi.+ 7 Mosi i wa hi ni 120 wa malembe a cikhati leci a ngafa.+ A mahlo yakwe ma wa ha wona khwatsi, ni ntamu wakwe wu wa nga se mbhela. 8 A vanhu va ka Izrayeli va no rila Mosi, tivaleni ta Mowabhi, a 30 wa masiku.+ Makunu a masiku ya ku rila Mosi ma no mbhela.

9 Joxuwa, a n’wana wa Nuni, i wa tele hi moya wa wutlhari, hakuva Mosi i wa tlhatekile a canja gakwe hehla kakwe;+ a vaIzrayeli va no sangula ku mu ingisa va maha kota lezvi Jehovha a nga leletele Mosi.+ 10 Kanilezvi a ka ha tshukangi ku humelela muphrofeti, lomu Izrayeli, wo fana na Mosi,+ loyi Jehovha a nga mu tiva nghohe ni nghohe.+ 11 I no maha zviwoniso zvontlhe ni zvihlamaliso lezvi Jehovha a nga mu rumele ku ya zvi maha tikweni ga Gibhite — mahlweni ka Faro, ni ka wontlhe malandza yakwe, ni ka tiko gakwe gontlhe.+ 12 Ahandle ka lezvo, Mosi i no tira hi canja ga ntamu ni ku kombisa a mitiro yi chavekako mahlweni ka vontlhe va ka Izrayeli.+