JOXUWA

1 Andzhako ka kufa ka Mosi, a nandza ga Jehovha, Jehovha i no byela Joxuwa,*+ a n’wana wa Nuni tlhelo nandza+ ga Mosi, aku: 2 “Mosi, a nandza ga mina, i file.+ Makunu suka u tlhatuka Jordhani, wena ni vanhu lava vontlhe, uya ka tiko legi ndzi nyikako a vanhu va ka Izrayeli.+ 3 Ndzi ta mu nyika a matshamu wontlhe lawa a nkondzo wa n’wina wu to kandzihela ka wona, khwatsi hi lezvi ndzi tsumbisileko Mosi.+ 4 A tiko ga n’wina gi ta sukela ciwuleni kala Lebhanoni ni congweni wa hombe, wu nga Congo wa Eufrate — a tiko gontlhe ga vaHiti+ — kala Bimbini ga Hombe,* le mupela-gambo.+ 5 I hava a to tiya a ku yima mahlweni ka wena masikwini wontlhe ya kuhanya ka wena.+ A ku khwatsi hi lezvi ndzi nga hi na Mosi, ndzi tava na wenawu.+ Ndzi nga ta ku tsika hambu ku ku fularela.+ 6 Tiya hlanha uva ni ntamu,+ hakuva hi wena u to rangela a vanhu lava va ya fumela a tiko legi ndzi hlambanyileko ka vakokwani vabye a ku va nyika gona.+

7 “Wena tiya hlanha uva ni ntamu nguvhu, u tlhela u landzela khwatsi a Nayo wontlhe lowu Mosi, a nandza ga mina, a ku leleteleko. U nga hambuki ka wona uya cineneni kutani cibhabheni,+ u fela ku tlhariha ni kwihi lomu u toya kona.+ 8 A bhuku legi ga Nayo gi nga suki non’wini wa wena;+ gi lere hi gezu ga lahasi,* mumu ni wusiku, u fela ku ti karatela ku maha zvontlhe zvi tsalilweko ka gona.+ Loku u maha lezvo, u ta humelela ndleleni ya wena, u tlhela u tlhariha.+ 9 A ndzi ku leletelangi, ndziku: Tiya hlanha uva ni ntamu? U nga tsemeki hlanha ne u nga chavi, hakuva Jehovha, a Nungungulu wa wena, i zvin’we na wena ni kwihi u yako kona.”+

10 Makunu Joxuwa i no leletela a tihosana ta vanhu, aku: 11 “Fambani lomu wugovelweni gontlhe, mu nyika a cileletelo leci ka vanhu, muku: ‘Longiselani timbuva, hakuva ndzeni ka masiku manharu mu ta tlhatuka Jordhani mu nghena mu teka a tiko legi Jehovha, a Nungungulu wa n’wina, a mu nyikako kota tshomba.’”+

12 Joxuwa i no byela a va ka Rubheni, ni va ka Gadhi, ni khihlanya ga lixaka la ka Manase, aku: 13 “Alakanyani lezvi Mosi, a nandza ga Jehovha, a nga mu leletela,+ aku: ‘Jehovha, a Nungungulu wa n’wina, wa mu nyika kuhumula niku i mu nyikile a tiko legi. 14 A vasati va n’wina, ni vana va n’wina, ni zvifuyo zva n’wina, zvi ta tshama tikweni legi Mosi a mu nyikileko tlhelweni legi* ga Jordhani,+ kanilezvi n’wina n’wentlhe, masochwa ya tinhenha,+ tlhatukani na mu hlomile a kulwa yimpi mu famba mahlweni ka vamakabye va n’wina.+ Mu fanele ku va vhuna 15 kala Jehovha a va nyika kuhumula a vamakabye va n’wina, a ku khwatsi hi lezvi a nyikileko n’wina, ni lezvaku vonawu va teka a tiko legi Jehovha, a Nungungulu wa n’wina, a va nyikako. Andzhako ka lezvo, mu ta wuya ka tiko legi mu nyikilweko a ku tshama ka gona ni ku gi teka kota tshomba, a tiko legi Mosi, a nandza ga Jehovha, a mu nyikileko tlhelweni ga mutsuwuka-gambo wa Jordhani.’”+

16 Va no hlamula Joxuwa, vaku: “Hi ta maha zvontlhe lezvi u hi leleteleko, niku hi taya ni kwihi u to hi ruma kuya kona.+ 17 A ku khwatsi hi lezvi hi ingisileko zvontlhe lezvi Mosi a nga wula, hi ta ku ingisawu. Leci hi kombelelako ku Jehovha, a Nungungulu wa wena, ava zvin’we na wena a ku khwatsi hi lezvi a nga hi zvin’we na Mosi.+ 18 Ni wihi loyi a kanyisako* a zvileletelo zva wena a tlhela a nga ingisi tontlhe a timhaka leti u mu leletelako, i ta dawa.+ Wena tiya hlanha uva ni ntamu.”+

2 Makunu Joxuwa, a n’wana wa Nuni, i no rumela a vavanuna vambiri cihundleni hi le Xitime+ kota zvipiyawu. I te ngalo kabye: “Fambani mu ya hlola tiko, nguvhunguvhu a tiko ga Jeriko.” Hikwalaho, va no famba va ya nghena ndlwini ya wasati wa cibhayi wa ku hi Rahabhi,+ va se tshama laho. 2 A hosi ya Jeriko yi no byeliwa ku ngalo: “Ku tile a vavanuna va ka Izrayeli a wusiku legi kasi ku ta piyara tiko.” 3 Laha yi ngazwa lezvo, a hosi ya Jeriko yi no rumela gezu ka Rahabhi, gaku: “Humesa a vavanuna lava va tileko va nga lomu ndlwini ya wena, hakuva va tela ku ta piyara tiko gontlhe.”

4 Kanilezvi a wasati i no teka a vavanuna lavo va vambiri a va fihla. Hi kulandzela, i te: “Kunene a vavanuna va wa tile ka mina, kanilezvi ndzi wa nga zvi tivi a ku vata hi kwihi. 5 A cikhati leci gi nga phuma, laha a nyangwa ya dhoropa yi nga lava ku vhaliwa, a vavanuna va no huma va famba. A ndzi ku tivi lomu va ngaya kona, kanilezvi loku mu va landza hi kuhatlisa, mu ta va kuma.” 6 (Kanilezvi i wa kandzihile navo le langweni,* a ya va fihla lomu ka tinyandza ta tihlanga ta wukene* ti nga hi le langweni.) 7 Hikwalaho, a vavanuna va no va landza va kongoma lomu a vanhu va tlhatukako hi kona a Congo wa Jordhani;+ a livati la dhoropa li no vhaliwa zvalezvi a vavanuna lavo va nga huma.

8 Na zvi nga se etlela a zvipiyawu, a wasati i no kandziha aya ka zvona le langweni. 9 I te ngalo kabye: “Ndza zvi tiva lezvaku Jehovha i ta mu nyika a tiko legi+ niku hina ha mu chava.+ Vontlhe a vahanyi va tiko legi va mbhelile ntamu hi kota ya n’wina,+ 10 hakuva hi zwile lezvi Jehovha a nga ma pswhisisa zvona a mati ya Bimbi go Pswhuka mahlweni ka n’wina a cikhati leci mu nga huma hi Gibhite+ ni lezvi mu nga maha a tihosi timbiri ta vaAmori, Sihoni+ na Ogi,+ lava n’wina mu va lovisileko tlhelweni legi gin’wani* ga Jordhani. 11 A cikhati leci hi ngazwa lezvo, a timbilu ta hina ti no nyeka; i hava a tiyako hlanha hi kota ya n’wina, hakuva Jehovha, a Nungungulu wa n’wina, i Nungungulu le hehla matilweni ni lahasi misaveni.+ 12 Makunu ndza mu kombela lezvaku mu hlambanya ka mina ha Jehovha lezvaku kota lezvi ndzi mu kombisileko lirandzo li nga mbheliko, n’winawu mu ta kombisa lirandzo li nga mbheliko ka ngango wa papayi wa mina. Ndzi nyikeni a cikombiso co tsumbeka. 13 Ponisani a wutomi ga papayi wa mina, ni ga mamani wa mina, ni ga vamakabye va mina va cinuna ni va cisati, ni ga vontlhe lava va nga navo, mu ponisa mihefemulo* ya hina kufeni.”+

14 Laha va ngazwa lezvo, a vavanuna va te ngalo kakwe: “Hi ta nyikela a wutomi ga hina hi kota ya legi ga n’wina!* Loku u nga wuli nchumu xungetano hi ntiro wa hina, hi ta ku komba lirandzo li nga mbheliko hi tlhela hi tsumbeka ka wena a cikhati leci Jehovha a to hi nyika a tiko legi.” 15 Andzhako ka lezvo, i no va chisa hi lingoti hi laha janeleni, hakuva a yindlu yakwe yi wa hi laha tlhelweni ga muro wa dhoropa. Hi lisine, i wa tshama le hehla ka muro.+ 16 Hi kulandzela, i no va byela lezvi: “Fambani tikweni ga zvitsunga mu ya fihlala kona masiku manharu kasi lava va mu hlotako va nga mu kumi. Makunu loku lava va mu hlotako va wuyile, mu nga khoma ndlela mu famba.”

17 A vavanuna va te ngalo kakwe: “Hi tava hi tlhatlhekile ka nandzu wa cihlambanyo leci u nga hi mahisa+ 18 loku a cikhati leci hi to nghena tikweni legi, u ngha u nga bohangi a lingoti leli lo pswhuka laha janeleni legi u nga hi chisa hi gona. Tsombanisa a papayi wa wena, ni mamani wa wena, ni vamakabye va wena ni vontlhe va ngango wa papayi wa wena lomu ndlwini ya wena.+ 19 Loku a wokari a huma lomu ndlwini ya wena aya handle, a nkhata wakwe wu tava hehla ka hloko yakwe; hina hi tava hi tlhatlhekile ka nandzu. Kanilezvi loku a khombo go tshuka gi wela wokari a nga zvin’we na wena lomu ndlwini, a nkhata wakwe wu tava hehla ka tihloko ta hina. 20 Kanilezvi loku u paluxa a ntiro wa hina,+ hi tava hi tlhatlhekile ka nandzu wa cihlambanyo leci u nga hi mahisa.” 21 I no hlamula, aku: “Ku wa maheke zvalezvi mu nga wula.”

I no va tsika va famba, va se goxometa ndlela va ti fambela. Andzhako ka lezvo, i no sala a boha a lingoti lo pswhuka laha janeleni. 22 Hikwalaho, va no suka vaya tikweni ga zvitsunga va ya tshama seyo masiku manharu kala lava va nga va hlota va wuya. Lava va nga va hlota va no va lavetela maruweni wontlhe kanilezvi a va va kumangi. 23 A vavanuna lavo va vambiri va no relela hi tikweni ga zvitsunga va tlhatuka congo vaya ka Joxuwa, a n’wana wa Nuni. Va no mu hlawutela zvontlhe lezvi zvi nga va humelele. 24 Makunu va no byela Joxuwa, vaku: “Jehovha i hi nyikile a tiko legi gontlhe.+ Kunene vontlhe a vahanyi va tiko legi va mbhelile ntamu hi kota ya hina.”+

3 Makunu Joxuwa i no vindzuka ni mixo, yena ni vontlhe a vaIzrayeli,* va suka hi Xitime+ va famba va ya chikela Jordhani. Va no tshama wusiku laho na va nga se tlhatuka.

2 Andzhako ka masiku manharu, a tihosana+ ti no famba lomu wugovelweni gontlhe 3 ti laya a vanhu, tiku: “Zvalezvi mu to wona a arke ga civhumelwano ca Jehovha, a Nungungulu wa n’wina, na gi rwelwe hi vapristi va vaLevhi,+ sukani laha mu nga kona mu gi landzela. 4 Kanilezvi tsawukanani nago hi pfhuka wa cipimo ca 2000 wa mikono;* mu nga tshineli kusuhani ka gona a ku hundza lezvo, kasi mu tiva ndlela leyi mu to famba hi yona, hakuva a mu se tshuka mu famba hi ndlela leyo.”

5 Makunu Joxuwa i no byela vanhu, aku: “Ti basiseni,+ hakuva a mandziko Jehovha i ta maha zvilo zvo hlamalisa cikari ka n’wina.”+

6 Hi kulandzela, Joxuwa i no byela vapristi, aku: “Tekani a arke+ ga civhumelwano mu ranga mahlweni ka vanhu.” Hikwalaho, va no teka a arke ga civhumelwano va ranga mahlweni ka vanhu.

7 Jehovha i no byela Joxuwa, aku: “Nyamutlha ndzi ta sangula ku ku tlakusa kuwoneni ka vontlhe a vaIzrayeli,+ va fela ku zvi tiva lezvaku ndzi tava zvin’we na wena+ a ku khwatsi hi lezvi ndzi nga hi zvin’we na Mosi.+ 8 U ta nyika a cileletelo leci ka vapristi lava va rwalako a arke ga civhumelwano, uku: ‘A cikhati leci mu to chikela mbhirini ya Congo wa Jordhani, yimani mu ku pshwe lomu matini ya Jordhani.’”+

9 Makunu Joxuwa i no byela a vaIzrayeli, aku: “Tanani laha mu tazwa a magezu ya Jehovha, a Nungungulu wa n’wina.” 10 Joxuwa i te ngalo kabye: “Hi kota ya lezvi, mu ta zvi tiva lezvaku ku na ni Nungungulu a hanyako cikari ka n’wina,+ ni lezvaku hakunene i ta hlongola a vaKhanani, ni vaHiti, ni vaHivhi, ni vaPerezi, ni vaGirgaxi, ni vaAmori, ni vaJebhusi mahlweni ka n’wina.+ 11 Ma zvi wona! A arke ga civhumelwano ca Hosi ya misava yontlhe ga ranga mahlweni gi ya nghena lomu Jordhani. 12 Makunu hlawulani a 12 wa vavanuna cikari ka tixaka ta ka Izrayeli, wanuna mun’we hi lixaka,+ 13 niku zvalezvi a mikondzo ya vapristi lava va rwalako a Arke ga Jehovha, a Hosi ya misava yontlhe, yi to henya a mati ya Congo wa Jordhani, a mati ya Jordhani lawa ma tako hi le hehla, ma ta tsemeka ma yima ma ku khwatsi i khurisi.”+

14 Hikwalaho, a cikhati leci a vanhu va nga suka matendeni yabye, na va nga se tlhatuka a Jordhani, a vapristi lava va rwalako a arke+ ga civhumelwano va no ranga mahlweni ka vanhu. 15 Zvalezvi a vapristi lava va nga rwala a Arke va nga chikela Jordhani va peta a mikondzo yabye matini ya lomu mbhirini (Jordhani i tala a tlhela a hlata+ masikwini wontlhe ya kutshovela), 16 a mati lawa ma tako hi le hehla ma no yima. Ma no kukumuka ma maha khurisi le kule nguvhu, le Adhamu, gi nga dhoropa gi nga kusuhani ni Zaretane, niku a mati lawa ma relelako ma kongoma Bimbini ga Arabha, gi nga Bimbi ga Munyu,* ma no koka ma mbhela. Ma no nyima ku tsutsuma, a vanhu va tlhatuka hi ka wutshamu gi cuwukeneko ni Jeriko. 17 A cikhati leci a vapristi lava va nga rwala a arke ga civhumelwano ca Jehovha va nga simama na va yimile laha ka misava yo woma,+ cikari ka Jordhani, a vaIzrayeli vontlhe va wo tlhatuka hi laha ka misava yo woma,+ kala a tiko gontlhe gi mbheta ku tlhatuka a Jordhani.

4 Zvalezvi a tiko gontlhe gi nga mbheta a ku tlhatuka Jordhani, Jehovha i no byela Joxuwa, aku: 2 “Hlawula a 12 wa vavanuna cikari ka vanhu, wanuna mun’we hi lixaka,+ 3 u va leletela, uku: ‘Tekani a 12 wa maribye cikari ka Jordhani, ka wutshamu legi a mikondzo ya vapristi yi nga yimile ka gona,+ mu rwala mu famba nawo mu ya ma veka ka wutshamu legi mu to gova ka gona ni wusiku.’”+

4 Hikwalaho, Joxuwa i no vitanisa a 12 wa vavanuna lava a nga va yimisile cikari ka vaIzrayeli, wanuna mun’we hi lixaka, 5 Joxuwa aku ngalo kabye: “Rangani mahlweni ka Arke ga Jehovha, a Nungungulu wa n’wina, cikari ka Jordhani, a mun’we ni mun’wani i fanele ku pinga ribye katleni gakwe, hi kuya hi ntsengo wa tixaka ta vaIzrayeli, 6 kasi mava cikombiso cikari ka n’wina. Loku hi kufamba ka cikhati a vana va n’wina va mu wutisa, vaku: ‘Hikuyini mu nga ni maribye lawa?’+ 7 va hlamuleni muku: ‘Hi lezvaku a mati ya Jordhani ma no nyimiswa mahlweni ka arke+ ga civhumelwano ca Jehovha. A cikhati leci gi nga tlhatuka a Jordhani, a mati ya Jordhani ma no nyimiswa. A maribye lawa ma tava cialakanyiso ca kala kupindzuka ka vanhu va ka Izrayeli.’”+

8 Hikwalaho, a vaIzrayeli va no maha zvalezvi Joxuwa a nga va leletele. Va no teka a 12 wa maribye cikari ka Jordhani, a ku khwatsi hi lezvi Jehovha a nga leletele Joxuwa, kasi ma ringana a ntsengo wa tixaka ta vaIzrayeli. Va no ma teka va famba nawo ka wutshamu legi va nga wa ta gova ka gona ni wusiku, va ma yimisa laho.

9 Joxuwa yenawu i no yimisa a 12 wa maribye cikari ka Jordhani ka wutshamu legi a mikondzo ya vapristi lava va nga rwala a arke ga civhumelwano yi nga yimile ka gona,+ niku a maribye lawo ma kwalaho kala ni nyamutlha lezvi.

10 A vapristi lava va nga rwala a Arke va no simama na va yimile cikari ka Jordhani kala zvontlhe lezvi Jehovha a nga leletele Joxuwa lezvaku a byela vanhu a ku va maha zvi maheka hi kuyelana ni zvontlhe lezvi Mosi a nga leletele Joxuwa. Na ku kari ku maheka lezvo, a vanhu va wo tlhatuka hi kuhatlisa. 11 Zvalezvi a vanhu vontlhe va nga mbheta ku tlhatuka, a Arke ga Jehovha ni vapristi va no tlhatuka kuwoneni ka vanhu.+ 12 A va ka Rubheni, ni va ka Gadhi ni khihlanya ga lixaka la ka Manase va no tlhatukawu na va hlomile a kulwa yimpi,+ va ranga mahlweni ka vaIzrayeli lava van’wani, a ku khwatsi hi lezvi Mosi a nga va leletele.+ 13 Ku no tlhatuka a cipimo ca 40 000 wa masochwa ma hlomileko kulwa yimpi mahlweni ka Jehovha ma kongoma tivaleni ta Jeriko.

14 Ka siku lego, Jehovha i no tlakusa Joxuwa kuwoneneni ka vontlhe a vaIzrayeli,+ niku va no mu kombisa cichavo co eta* masikwini wontlhe ya kuhanya kakwe, a ku khwatsi hi lezvi va nga kombisile cichavo co eta ka Mosi.+

15 Jehovha i no byela Joxuwa, aku: 16 “Byela a vapristi lava va rwalako a Arke+ ga Wukustumunyu lezvaku va huma lomu Jordhani.” 17 Hikwalaho, Joxuwa i no byela vapristi, aku: “Humani lomu Jordhani.” 18 A cikhati leci a vapristi lava va nga rwala a arke+ ga civhumelwano ca Jehovha va nga huma hi cikari ka Jordhani ni laha a mikondzo ya vapristi yi nga kandzihela laha misaveni yo woma, a mati ya Jordhani ma no vhuxetela ku tsutsuma ma tlhela ma hlata lomu timbhirini,+ a ku khwatsi hi kusanguleni.

19 A vanhu va no tlhatuka Jordhani hi siku ga wu 10 ka hweti yo sangula, va ya gova le Gilgali+ mbhinganweni wa mutsuwuka-gambo wa Jeriko.

20 Xungetano hi 12 wa maribye lawa va nga ma tekile lomu Jordhani, Joxuwa i no ma yimisa le Gilgali.+ 21 I no byela a vaIzrayeli, aku: “Cikhatini ci tako, laha a vana va n’wina va to wutisa a vapapayi vabye, vaku: ‘Ma wula yini a maribye lawa?’+ 22 mu ta tlhamusela a vana va n’wina, muku: ‘Izrayeli i no tlhatuka Jordhani hi laha ka misava yo woma+ 23 a cikhati leci Jehovha, a Nungungulu wa n’wina, a nga pswhisa a mati ya Jordhani mahlweni kabye kala va tlhatuka, a ku khwatsi hi lezvi Jehovha, a Nungungulu wa n’wina, a nga maha Bimbi go Pswhuka, a cikhati leci a nga gi pswhisa mahlweni ka hina kala hi tlhatuka.+ 24 I mahile lezvi kasi a matiko wontlhe ya laha misaveni ma zvi tiva lezvaku a canja ga Jehovha gi na ni ntamu,+ ni lezvaku mu fela ku chava Jehovha, a Nungungulu wa n’wina, contlhe cikhati.’”

5 Zvalezvi a tihosi tontlhe ta vaAmori,+ leti ti nga hi tlhelweni ga mupela-gambo wa Jordhani, ni tihosi tontlhe ta vaKhanani,+ leti ti nga hi mbhirini ya bimbi, ti ngazwa lezvaku Jehovha i pswhisile a mati ya Jordhani mahlweni ka vaIzrayeli kala va tlhatuka, a timbilu tabye ti no nyeka+ va tlhela va tsemeka hlanha hi kota ya vaIzrayeli.+

2 Ka cikhati leco, Jehovha i no byela Joxuwa, aku: “Maha mikwana hi maribye u va maha wukwera*+ kambe a vavanuna va ka Izrayeli, hi khati ga wumbiri.” 3 Hikwalaho, Joxuwa i no maha mikwana hi maribye a va maha wukwera* a vavanuna va ka Izrayeli le Gibheyat-Haaralote.*+ 4 Leci ci nga maha ku Joxuwa a va maha wukwera* hi leci: A vavanuna vontlhe va nga huma hi Gibhite, a vavanuna vontlhe va nga hi valwi va yimpi,* va wa file lomu ciwuleni na va hi lipfhumbeni andzhako ka ku huma hi Gibhite.+ 5 A vanhu vontlhe lava va nga huma hi Gibhite va wa mahilwe wukwera,* kanilezvi a vanhu vontlhe lava va nga pswaliwa lomu ciwuleni na va hi lipfhumbeni andzhako ka ku huma hi Gibhite va wa nga mahiwangi wukwera. 6 A vaIzrayeli va wa fambile a 40 wa malembe+ lomu ciwuleni kala a tiko gontlhe gifa, ku nga vavanuna va kulwa yimpi va humileko hi Gibhite lava va nga kala ku ingisa a gezu ga Jehovha.+ Jehovha i no hlambanya kabye lezvaku i wa nga ta tshuka a va tsika va wona a tiko+ legi Jehovha a hlambanyileko ka vakokwani vabye a ku nyika hina,+ gi nga tiko gi khulungako a masi ni wulombe.+ 7 Hikwalaho, i no yimisa vana vabye wutshan’wini gabye.+ Hi valava Joxuwa a nga va maha wukwera.* Va wa hi makhuna hakuva va wa nga va mahangi wukwera na va ha hi lomu lipfhumbeni.

8 A cikhati leci va nga mbheta a ku va maha wukwera* a vavanuna vontlhe va tiko, va no simama kwalaha va nga hi kona lomu wugovelweni kala va hola.

9 Makunu Jehovha i no byela Joxuwa, aku: “Inyamutlha ndzi susile ka n’wina a tingana ta Gibhite.” Hikwalaho, a wutshamu lego gi vitaniwa ku Gilgali*+ kala ni nyamutlha lezvi.

10 A vaIzrayeli va no simama na va govile Gilgali; va noga Phasika hi siku ga wu 14 ga hweti+ ni wusikwana, tivaleni ta Jeriko. 11 Ka siku gi nga gamela Phasika, ka siku galego, va no sangula a kuga pfuno wa tiko, ti nga tipawa to kala comelo+ ni timbewu to katingiwa. 12 A mana ma no nyima ka siku gi nga landzela, a cikhati leci va ngaga a timbewu to kari ta tiko. A ka ha vangi ni mana ya ku a vaIzrayeli vaga,+ kanilezvi hi lembe lego, va no sangula kuga a pfuno wa tiko ga Khanani.+

13 A cikhati leci Joxuwa a nga hi kusuhani ni Jeriko, i no tlakusa mahlo a wona wanuna+ na a yimile mahlweni kakwe, na a welele cipadha canjeni gakwe.+ Joxuwa i no tshinela kakwe, a mu wutisa, aku: “U wa ka hina kutani u tlhelweni ga valala va hina ke?” 14 I no hlamula, aku: “Ahihi, kanilezvi ndzi tile laha kota hosana ya butho ga Jehovha.”+ Laha a ngazwa lezvo, Joxuwa i no khizama awa lahasi hi nghohe, aku kakwe: “Zvini lezvi a hosi ya mina yi nga nazvo yi lavako ku byela a nandza ga yona ke?” 15 A hosana ya butho ga Jehovha yi no hlamula Joxuwa, yiku: “Tlhatlha masandalia mikondzweni ya wena, hakuva a wutshamu legi u yimileko ka gona gi basile.” Joxuwa i no tekela ku maha zvalezvo.+

6 A Jeriko gi wa vhalilwe gi tiya gi ku nde hi kota ya vaIzrayeli; i hava a nga huma niku i hava a nga nghena.+

2 Hi kulandzela, Jehovha i no byela Joxuwa, aku: “Ndzi nyikele Jeriko, ni hosi ya gona, ni masochwa ya gona ya tinhenha, mandleni ya wena.+ 3 N’wina n’wentlhe vavanuna lava mu lwako yimpi mu fanele ku marxara mu rendzelekela dhoropa, mu gi rendzeleka khati gin’we. Mu ta maha lezvo hi 6 wa masiku. 4 Yimisa a 7 wa vapristi lezvaku va welela a 7 wa tinanga* ta tiyivhu mahlweni ka Arke. Kanilezvi hi siku ga wu 7, mu fanele ku marxara mu rendzelekela dhoropa 7 wa makhati niku a vapristi va fanele kuba tinanga.+ 5 A cikhati leci ku to biwa a linanga* la yivhu — zvalezvi mu tozwa a kuvhuma ka linanga — a vanhu vontlhe va fanele ku kanyuluka hi gezu ga hombe a ku khwatsi hi loku va hi yimpini. Makunu a muro wa dhoropa wu tawa lahasi+ niku a vanhu va fanele ku nghena, loyi ni loyi a kongoma mahlweni.”

6 Hikwalaho, Joxuwa, a n’wana wa Nuni, i no tsombanisa a vapristi, aku ngalo kabye: “Tekani a arke ga civhumelwano, niku a 7 wa vapristi va fanele ku welela a 7 wa tinanga ta tiyivhu mahlweni ka Arke ga Jehovha.”+ 7 Hi kulandzela, i no byela a vanhu, aku: “Fambani mu ya marxara mu rendzeleka dhoropa; a butho gi hlomileko+ gi wa range mahlweni ka Arke ga Jehovha.” 8 Niku a ku khwatsi hi lezvi Joxuwa a nga byelile vanhu, a 7 wa vapristi va nga welele a 7 wa tinanga* ta tiyivhu mahlweni ka Jehovha va no ranga na vaba tinanga, niku a arke ga civhumelwano ca Jehovha gi no va landzela. 9 A butho gi hlomileko gi no ranga mahlweni ka vapristi lava va ngaba tinanga,* ni ntlawa wa lendzhako wu no landzela Arke na ku kari ku biwa tinanga ti nga nyimi.

10 Joxuwa i wa layile vanhu, aku: “Mu nga kanyuluki hambu ku zwata magezu ya n’wina. Ne ku nga humi gezu hi minon’wini ya n’wina kala ka siku legi ndzi to mu byela ku: ‘Kanyulukani!’, hi kona mu to kanyuluka.” 11 I no maha lezvaku a Arke ga Jehovha gi rendzeleka dhoropa gi tlhanganisa, gi gi rendzeleka khati gin’we. Andzhako ka lezvo, va no wuya wugovelweni va ta tshama wusiku laho.

12 Ka mixo yi nga landzela, Joxuwa i no vindzuka a vhuka, ni vapristi va no teka a Arke+ ga Jehovha. 13 Makunu a 7 wa vapristi va nga welele a 7 wa tinanga* ta tiyivhu va no ranga mahlweni ka Arke ga Jehovha, na vaba tinanga ti nga nyimi. A butho gi hlomileko gi no ranga mahlweni kabye, a ntlawa wa lendzhako na wu landzela a Arke ga Jehovha na ku biwa tinanga ti nga nyimi. 14 Va no marxara va rendzeleka dhoropa khati gin’we ka siku ga wumbiri, andzhako ka lezvo, va no wuya wugovelweni. Va no maha lezvo hi 6 wa masiku.+

15 Hi siku ga wu 7, va no vindzuka ni mixo, zvalezvi a wuronga gi nga huma, va rendzelekela dhoropa a ku khwatsi hi man’wani masiku, va gi rendzeleka 7 wa makhati. Kuve ka siku lego goce va nga marxara va rendzelekela dhoropa a 7 wa makhati.+ 16 Ka khati ga wu 7, laha a vapristi va ngaba tinanga,* Joxuwa i no byela vanhu, aku: “Kanyulukani,+ hakuva Jehovha i nyikele dhoropa mandleni ya n’wina! 17 A dhoropa ni zvontlhe zvi nga ka gona zvi fanele ku nyikelwa kulovisweni;+ zvontlhe zvi lumba Jehovha. Ntsena Rahabhi,+ loyi wa cibhayi, a nga tsikiwa a hanya, yena ni vontlhe va nga lomu ndlwini yakwe, hakuva i fihlile a zvirun’wa lezvi hi nga zvi rumele.+ 18 Kanilezvi tsawukanani ni lezvi zvi konelweko kuloviswa,+ kasi mu nga naveli a cilo ci konelweko kuloviswa mu ci teka,+ mu maha lezvaku a wugovelo ga ka Izrayeli giva cilo ci konelweko kuloviswa, mu gi nehela khombo.+ 19 Kanilezvi yontlhe a prata, ni ouro, ni zvontlhe a zvibya zva kobre ni zva simbi zvi basile ka Jehovha.+ Zvi fanele a kuya tshombeni ya Jehovha.”+

20 Makunu a cikhati leci ku nga biwa tinanga, a vanhu va no kanyuluka.+ Zvalezvi a vanhu va ngazwa a kuvhuma ka linanga, va kanyuluka hi gezu ga hombe ga ku khwatsi hi loku va hi yimpini, a muro wu nowa lahasi.+ Andzhako ka lezvo, a vanhu va no nghena dhoropeni, loyi ni loyi a kongoma mahlweni, va teka dhoropa. 21 Zvontlhe zvi nga hi lomu dhoropeni va no zvi konela kuloviswa hi cipadha: A vavanuna ni vavasati, a vaswa ni vakhosaheleko, ni tihomu, ni tiyivhu ni timbongola.+

22 Joxuwa i no byela a vavanuna vambiri lava va nga piyarile tiko, aku: “Fambani ndlwini ya cibhayi mu ya humesa a wasati loye ni vontlhe lava va nga vakwe, a ku khwatsi hi lezvi mu hlambanyileko kakwe.”+ 23 Hikwalaho, a zvipiyawu lezvo zva majaha zvi noya zvi ya humesa Rahabhi zvin’we ni papayi wakwe, ni mamani wakwe, ni vamakabye vakwe, ni vontlhe lava va nga hi vakwe; ina, va no humesa a ngango wakwe wontlhe+ va famba navo ka wutshamu ga le handle ka wugovelo ga ka Izrayeli na va vhikelekile.

24 Hi kulandzela, va no hisa dhoropa ni zvontlhe zvi nga hi ka gona, kanilezvi a prata, ni ouro, ni zvibya zva kobre ni zva simbi va no zvi nyikela tshombeni ya yindlu ya Jehovha.+ 25 Ntsena Rahabhi, loyi wa cibhayi, ni va ngango wa papayi wakwe ni vontlhe lava va nga hi vakwe hi vona lava Joxuwa a nga va tsika va hanya;+ i hanya Izrayeli kala ni nyamutlha lezvi,+ hakuva i fihlile a zvirun’wa lezvi Joxuwa a nga zvi rumele zvi ya piyara Jeriko.+

26 Ka cikhati leco, Joxuwa i no hlambanya,* aku: “I wa rukatelwe mahlweni ka Jehovha a munhu loyi a to suka a yima a aketa dhoropa legi ga Jeriko. I ta zima ciseketelo ca gona a hakhela hi matewula yakwe, ni ku vekela tivati ta gona a hakhela hi cigumandzeni cakwe.”+

27 Hikwalaho, Jehovha i wa hi zvin’we na Joxuwa,+ ni nduma yakwe yi no hangalaka misaveni yontlhe.+

7 Kanilezvi a vaIzrayeli a va tsumbekangi mhakeni ya lezvi zvi nga konelwe kuloviswa, hakuva Akana+ a n’wana wa Karmi, a n’wana wa Zabdhi, a n’wana wa Zera, wa lixaka la ka Judha, i no teka a zvilo zvo kari ka lezvi zvi nga konelwe kuloviswa.+ Hikwalaho, a zanga ya Jehovha yi no vhura yi vhurela a vaIzrayeli.+

2 Makunu Joxuwa i no rumela a vavanuna hi Jeriko vaya Ayi,+ loyi a gamekeneko ni Bhet-Avhene ni mutsuwuka-gambo wa Bheteli,+ aku kabye: “Kandzihani mu ya piyara tiko.” Hikwalaho, a vavanuna va no famba va ya piyara a tiko ga Ayi. 3 Laha va nga wuya ka Joxuwa, va te ngalo kakwe: “A zvizi zvi lava ku a vanhu vontlhe va kandziha. A cipimo ca 2000 kutani 3000 wa vavanuna va ringana kasi ku hlula Ayi. U nga karaliseli a vanhu vontlhe hi ku va ruma va famba, hakuva a vahanyi va seyo va tsongwani.”

4 Hikwalaho, ku no famba a cipimo ca 3000 wa vavanuna, kanilezvi va no ya tsutsuma a vavanuna va Ayi.+ 5 A vavanuna va Ayi va no daya 36 wa vavanuna; va no hlongolisela a vaIzrayeli kusukela laha nyangweni ya dhoropa kala le Xebharime.* Hikwalaho, a timbilu ta vanhu ti no nyeka ti ku khwatsi i mati.

6 Hi kota ya lezvo, Joxuwa i no handzula a tinguwo takwe awa lahasi hi nghohe mahlweni ka Arke ga Jehovha kala ni gambo, yena zvin’we ni madhota ya ka Izrayeli, va ti paletela lithuri tihlokweni tabye. 7 Joxuwa i te ngalo: “O, Jehovha, Hosi ya Hombe, hikuyini u ngata na hina gontlhe legi u hi tlhatukisa Jordhani? U hi tlhatukisele ku ta hi nyikela canjeni ga vaAmori kasi hi lovisiwa ke? Zvi wa nga hi chukwana loku u wa hi tsikile hi ti tshamela tlhelweni legi gin’wani* ga Jordhani? 8 Ndzi tsetselele Jehovha, ndzi ta wula yini lezvi Izrayeli a tsutsumileko mahlweni ka* valala vakwe ke? 9 A cikhati leci a vaKhanani ni vontlhe a vahanyi va tiko legi va to zvizwa, va ta hi randzela va vhinya a vito ga hina laha misaveni. Makunu wena u ta maha yini hi vito ga wena ga hombe ke?”+

10 Jehovha i no hlamula Joxuwa, aku: “Vhuka! U ti wisela yini hi nghohe ya wena ke? 11 Izrayeli i wonhile. Va hambunyetile a civhumelwano ca mina+ leci ndzi va leleteleko ku va ci hlayisa. Va tekile a zvilo zvo kari ka lezvi zvi konelweko kuloviswa,+ va zvi yiva+ va ya zvi fihla cikari ka titshomba tabye.+ 12 Hikwalaho, a vaIzrayeli va nga ta zvi kota a ku yima mahlweni ka valala vabye. Va ta fularela a valala vabye va va tsutsuma, hakuva va hundzukile vava nchumu wu konelweko kuloviswa. Ndzi nga ta hava na n’wina kambe ahandle ka loku mu fuvisa cikari ka n’wina leci ci konelweko kuloviswa.+ 13 Suka u yima u basisa vanhu!+ Va byele, uku: ‘Ti basiseleni ga mandziko, hakuva Jehovha, a Nungungulu wa Izrayeli, i ngalo: “Ku na ni cilo ci konelweko kuloviswa cikari ka wena, Izrayeli. U nga ta zvi kota a ku yima mahlweni ka valala va wena kala u susa cikari ka wena leci ci konelweko kuloviswa. 14 Mu ta ti wonekelisa ni mixo hi lixaka ni lixaka; a lixaka leli Jehovha a to li hlawula+ li ta tshinela kusuhani hi ngango ni ngango; a ngango lowu Jehovha a to wu hlawula wu ta tshinela kusuhani hi muti ni muti, ni muti lowu Jehovha a to wu hlawula wu ta tshinela kusuhani hi munhu ni munhu. 15 Makunu loyi a to kumiwa ni lezvi zvi konelweko kuloviswa i ta hisiwa hi ndzilo,+ yena ni zvontlhe lezvi zvi mu lumbako, hakuva i hambunyetile a civhumelwano+ ca Jehovha niku i mahile a nchumu wa tingana lomu Izrayeli.”’”

16 Hikwalaho, Joxuwa i no vindzuka ka mixo yi nga landzela a vitanisa a vaIzrayeli va tshinela, lixaka hi lixaka, ku se hlawuliwa a lixaka la ka Judha. 17 I no tshineta a mingango ya ka Judha, ku se hlawuliwa a ngango wa va ka Zera.+ Andzhako ka lezvo, i no tshineta a ngango wa va ka Zera, wanuna hi wanuna, ku se hlawuliwa Zabdhi. 18 Hi kugumesa, i no tshineta a muti wa va ka Zabdhi kusuhani, wanuna hi wanuna, ku se hlawuliwa Akana, a n’wana wa Karmi, a n’wana wa Zabdhi, a n’wana wa Zera, wa lixaka la ka Judha.+ 19 Makunu Joxuwa i no byela Akana, aku: “N’wananga, ndzi kombela ku u dzundza Jehovha, a Nungungulu wa Izrayeli, u wulela a ciwonho ca wena kakwe. Ndzi kombela ku u ndzi byela lezvi u nga maha. U nga ndzi fihleli nchumu.”

20 Akana i no hlamula Joxuwa, aku: “Kunene hi mina ndzi nga wonhela Jehovha, a Nungungulu wa Izrayeli, niku lezvi ndzi nga maha hi lezvi: 21 A cikhati leci ndzi nga wona, cikari ka muphango, a nguwo ya yinene ya wuhosi ya le Xinari,+ ni 200 wa maxekeli* ya prata ni bhara ya ouro yi pezako 50 wa maxekeli, ndzi no zvi navela ndzi se zvi teka. Zvi fihlilwe tendeni ga mina, zvi kelelwe lomu hasi, ni mali hi le hasi ka zvona.”

22 Zvalezvo Joxuwa i no rumela zvirun’wa, zvi tsutsuma zviya tendeni. Lomu tendeni ku wa fihlilwe a nguwo ni mali hi lahasi ka yona. 23 Hikwalaho, va no humesa a zvilo lomu tendeni va famba nazvo ka Joxuwa ni ka vontlhe a vaIzrayeli va ya zvi veka mahlweni ka Jehovha. 24 Joxuwa ni vontlhe a vaIzrayeli lava a nga hi navo va no khoma Akana,+ a n’wana wa Zera, ni prata, ni nguwo ya wuhosi, ni bhara ya ouro,+ zvin’we ni vafana vakwe, ni vanhanyana vakwe, ni tihomu takwe, ni timbongola takwe, ni mitlhambi yakwe, ni tenda gakwe, ni zvontlhe zvi nga hi zvakwe va famba nazvo Nkoveni wa Akora.+ 25 Joxuwa i te ngalo: “Hikuyini u hi neheleko khombo?+ Jehovha i ta ku nehela khombo nyamutlha.” Makunu vontlhe a va ka Izrayeli va no mu gandla hi maribye+ va gumesa va va hisa hi ndzilo.+ Hikwalaho, va no gandla vontlhe hi maribye. 26 Va no tlhatekela maribye hehla kakwe ma maha nhulu ya hombe, leyi yi nga kona kala ni nyamutlha lezvi. Hi kota ya lezvo, a zanga yi vhurako ya Jehovha yi no bohla.+ Hi caleci ci mahako ku a wutshamu lego gi vitaniwa ku i Nkova wa Akora* kala ni nyamutlha lezvi.

8 Makunu Jehovha i no byela Joxuwa, aku: “U nga chavi hambu ku tsemeka hlanha.+ Teka a vavanuna vontlhe va lwako yimpi u kandziha u yalwa ni Ayi. Ndzi nyikele a hosi ya Ayi, ni vanhu va yona, ni dhoropa ga yona, ni tiko ga yona canjeni ga wena.+ 2 Maha Ayi ni hosi ya gona zvalezvi u nga maha Jeriko ni hosi ya gona,+ ntsena lezvaku mu nga phanga a zvilo zva gona ni zvifuyo zva gona zviva zva n’wina. Tumbelani mu lavelela a dhoropa hi lendzhako.”

3 Hikwalaho, Joxuwa ni vavanuna vontlhe va lwako yimpi va no kandziha va yalwa ni Ayi. Joxuwa i no hlawula a 30 000 wa masochwa lawa ya tinhenha a ma rumela ni wusiku. 4 I no ma leletela, aku: “Mu ta tumbela mu lavelela a dhoropa hi lendzhako. Mu ngayi kule nguvhu ni dhoropa niku n’wentlhe tshamani na mu longile. 5 Mina ni vanhu vontlhe lava va nga na mina hi ta tshinela dhoropeni niku a cikhati leci va to huma kasi ku talwa na hina a ku khwatsi hi kusanguleni,+ hina hi ta va tsutsuma. 6 A cikhati leci va to hi landza, hina hi ta va koka va huma dhoropeni, hakuva va taku: ‘Vo hi tsutsuma a ku khwatsi hi kusanguleni.’+ Hi zvalezvo, hi ta va tsutsuma. 7 Makunu mu ta vhumbunuka hi laha mu to ngha na mu tumbele kona, mu teka dhoropa; Jehovha, a Nungungulu wa n’wina, i ta gi nyikela ka n’wina. 8 Zvalezvi mu to teka dhoropa, gi hiseni hi ndzilo.+ Mu ta maha zvalezvi Jehovha a wulileko. Leci hi cona cileletelo ndzi mu nyikako.”

9 Hi kulandzela, Joxuwa i no va ruma vaya ka wutshamu legi va nga wa ta tumbela ka gona; va no ya lavelela hi laha cikari ka Bheteli ni Ayi, hi le mupela-gambo wa Ayi, kuveni Joxuwa i no tshama wusiku lego ni vanhu lava van’wani.

10 Andzhako ka loku Joxuwa a vhukile ni mixo nguvhu a tlhanganisa* mabutho, yena ni madhota ya ka Izrayeli, va no ma rangela maya Ayi. 11 A vavanuna vontlhe+ va kulwa yimpi lava va nga hi zvin’we naye va no kandziha va kongoma mahlweni ka dhoropa. Va no gova hi le n’walungu* wa Ayi, a nkova wuva laha cikari kabye ni Ayi. 12 Ka cikhati leco, i wa hlawulile a cipimo ca 5000 wa vavanuna a va veka va tumbela va lavelela+ cikari ka Bheteli+ ni Ayi, hi le mupela-gambo wa dhoropa. 13 Hikwalaho, a vanhu va no zima a wugovelo legi ga hombe hi le n’walungu wa dhoropa,+ a ntlawa wa lendzhako wuva hi le mupela-gambo wa dhoropa.+ Joxuwa i no pileka wusiku lego na a famba kala cikari ka nkova.

14 Zvalezvi a hosi ya Ayi yi nga zvi wona, yona zvin’we ni vavanuna va dhoropa va no vindzuka ni mixo va hatlisa va huma va ya tlhangana ni vaIzrayeli kasi valwa navo ka wutshamu go kari gi cuwukeneko ni ciwula. Kanilezvi yi wa nga zvi tivi lezvaku ku na ni ntlawa wu tumbeleko wu lavelela hi lendzhako ka dhoropa. 15 A cikhati leci a vavanuna va Ayi va nga va dhumela, Joxuwa ni vaIzrayeli vontlhe va no tsutsuma hi ruwa va cuwuka ciwuleni.+ 16 A vanhu vontlhe lava va nga hi lomu dhoropeni va no vitaniwa kasi va va hlongolisela; a cikhati leci va nga hlongolisela Joxuwa, va no kokiwa vaya kule ni dhoropa. 17 I hava wanuna a nga sele lomu Ayi ni lomu Bheteli a nga kala ku huma a hlongola Izrayeli. Va no siya a dhoropa na gi no ha, va hlongolisela Izrayeli.

18 Makunu Jehovha i no byela Joxuwa, aku: “Tlakusa a tlhari legi gi nga canjeni ga wena gi cuwuka Ayi,+ hakuva ndzi ta mu nyikela canjeni ga wena.”+ Hikwalaho, Joxuwa i no tlakusa a tlhari legi gi nga hi canjeni gakwe gi cuwuka dhoropeni. 19 A cikhati leci a nga tlakusa a canja gakwe, a ntlawa lowu wu nga tumbele wu lavelela wu no vhumbunuka hi kuhatlisa hi laha wu nga hi kona wu tsutsuma wu nghena dhoropeni wu gi teka. Zvalezvo va no hisa dhoropa hi ndzilo.+

20 A cikhati leci a vavanuna va Ayi va nga hundzuluka va cuwuka ndzhako va wona musi wa dhoropa na wu tuvika wuya tilweni, a va ha vangi ni ntamu wa ku tsutsuma vaya ni ka gihi tlhelo. Makunu a vanhu lava va nga kari va tsutsuma va cuwuka ciwuleni, va no jikela lava va nga va hlongolisela. 21 Laha Joxuwa ni vontlhe vaIzrayeli va nga wona lezvaku lava va nga tumbele va lavelela va tekile dhoropa, ni laha va nga wona a musi wa dhoropa na wu tuvika, va no hundzuluka va dhumela a vavanuna va Ayi. 22 Lava van’wani va no huma hi lomu dhoropeni va va khinga. Hi ndlela leyo, a vavanuna va Ayi va no phasiwa laha cikari; ku wa hi ni vaIzrayeli vo kari ka tlhelo legi ni van’wani ka tlhelo legiya. Va no va hihirita va ku bhi, i hava a nga pona kutani ku tsutsuma.+ 23 Kanilezvi va no khoma a hosi ya Ayi+ na ya ha hanya va famba nayo ka Joxuwa.

24 Andzhako ka loku a vaIzrayeli va mbhetile ku daya vontlhe a vahanyi va Ayi le handle, ciwuleni leci va nga va hlongolisele ka cona, ni laha a wa kugumesa wabye a nga delwe hi cipadha, vontlhe a vaIzrayeli va no tlhela Ayi va ya gi chindza hi cipadha. 25 Vontlhe lava va nga dawa ka siku lego, kusukela ka wanuna kala ka wasati, va wa hi 12 000, va nga vanhu vontlhe va Ayi. 26 Joxuwa a nga reletangi a canja gakwe legi a nga tlakusile hi gona a tlhari,+ kala a lovisa* a vahanyi vontlhe va Ayi.+ 27 Hambulezvo, Izrayeli i no teka a zvifuyo ni muphango wa dhoropa lego zviva zvakwe, hi ku landza zvileletelo lezvi Jehovha a nga nyikile Joxuwa.+

28 Hi kulandzela, Joxuwa i no hisa Ayi a gi maha nhulu ya maribye ya kala kupindzuka,+ zvi nga zvalezvi gi nga tshamisa zvona kala ni nyamutlha lezvi. 29 I no hayeka a hosi ya Ayi laha mhandzeni* kala ni gambo. Laha a gambo gi nga lava ku pela, Joxuwa i no laya lezvaku a cirumbi cakwe ci chisiwa laha mhandzeni.+ Va no ci hoxa laha nyangweni ya dhoropa va tlhatekela a maribye ma maha nhulu ya hombe hehla ka cona, leyi ya ha hiko kwalaho kala ni nyamutlha lezvi.

30 Kuve ndzhako ka lezvo, laha Joxuwa a nga aka Alati Citsungeni ca Ebhale,+ a akela Jehovha, a Nungungulu wa Izrayeli, 31 kota lezvi Mosi, a nandza ga Jehovha, a nga leletele a vaIzrayeli ni ku khwatsi hi lezvi zvi tsalilweko bhukwini ga Nayo+ wa Mosi, zvaku: “I alati ga maribye ya murumba, lawa ma nga pandziwangiko hi feramenta ya simbi.”+ Hehla ka gona, va no nyikela a minyikelo ya kuhiswa ka Jehovha zvin’we ni miphahlo ya kuhlengela.*+

32 I no tsala laha ka maribye a kopiya ya Nayo+ lowu Mosi a nga tsalile mahlweni ka vaIzrayeli.+ 33 A vaIzrayeli vontlhe, a madhota yabye, ni tihosana, ni valamuli vabye, va wa yimile ka matlhelo mambiri ya Arke mahlweni ka vapristi va vaLevhi lava va nga rwala a arke ga civhumelwano ca Jehovha. Laho ku wa hi ni valuveli zvin’we ni vaIzrayeli va mabeleko.+ A khihlanya gabye gi wa yimile mahlweni ka Citsunga ca Gerezima, niku a khihlanya legi gin’wani gi wa hi mahlweni ka Citsunga ca Ebhale+ (a ku khwatsi hi lezvi Mosi, a nandza ga Jehovha, a nga sina a leletele),+ kasi ku katekisa a vanhu va ka Izrayeli. 34 Andzhako ka lezvi, i no lera a magezu wontlhe ya Nayo+ hi gezu ga hombe, a makatekwa+ ni zviruko,+ hi ku landza zvontlhe lezvi zvi tsalilweko bhukwini ga Nayo. 35 Ku hava ni gezu gin’we, ka wontlhe lawa Mosi a nga leletele, legi Joxuwa a nga kala ku lera hi gezu ga hombe mahlweni ka bandla gontlhe ga ka Izrayeli,+ a ku patsa ni vavasati, ni vanana, ni valuveli+ lava va nga hanya* cikari kabye.+

9 Laha a tihosi tontlhe leti ti nga hi le mupela-gambo wa Jordhani+ ti ngazwa lezvi zvi nga humelele, leti ti nga hi le tikweni ga zvitsunga, le Xefela, mbhirini yontlhe ya Bimbi ga Hombe,*+ ni mahlweni ka Lebhanoni — a vaHiti, ni vaAmori, ni vaKhanani, ni vaPerezi, ni vaHivhi, ni vaJebhusi+ — 2 ti no maha a civhumelwano ca kulwa na Joxuwa na Izrayeli.+

3 A vahanyi va le Gibheyoni+ vonawu va nozwa lezvi Joxuwa a nga mahile a dhoropa ga Jeriko+ ni ga Ayi.+ 4 Hikwalaho, va no tirisa tipulani, va chela timbuva lomu ka tisakwa to hlakala va rwexa a timbongola tabye, zvin’we ni tinghotso ta vhinyo to hlakala ti nga phuxukile ti tlhela ti rungelwa zviziva; 5 lomu mikondzweni yabye, va no boha a masandalia yo hlakala ma nga rungelwe zviziva va tlhela va boha tinguwo to hlakala. A tipawa tontlhe leti va nga tekile va maha hi tona timbuva ti wa womile ti tlhela ti fuhlukela.* 6 Va noya ka Joxuwa wugovelweni le Gilgali,+ va ya byela yena ni vavanuna va ka Izrayeli, vaku: “Hita hi tikweni ga le kule. Makunu mahani civhumelwano na hina.” 7 Kanilezvi a vavanuna va ka Izrayeli va no byela vaHivhi+ lavo, vaku: “Kuzvilava mu hanya kusuhani na hina. Makunu hi nga mahisa kuyini a civhumelwano na n’wina ke?”+ 8 Va no hlamula Joxuwa, vaku: “Hi malandza* ya wena.”

Hi kulandzela, Joxuwa i no va wutisa, aku: “Hi n’wina vamani, kona muta hi kwihi?” 9 Va no mu hlamula, vaku: “A malandza ya wena mata hi tikweni ga le kule nguvhu+ hi kota ya vito ga Jehovha, a Nungungulu wa wena, hakuva hi zwile a nduma yakwe ni zvontlhe lezvi a nga maha le Gibhite+ 10 ni zvontlhe lezvi a nga maha a tihosi timbiri ta vaAmori leti ti nga hi tlhelweni legi gin’wani* ga Jordhani, ku nga hosi Sihoni,+ wa Hexbhoni, na hosi Ogi,+ wa Bhaxani, loyi a nga hi le Axtarote. 11 Hikwalaho, a madhota ya hina ni vaaki vontlhe va tiko ga hina va no hi byela lezvi: ‘Tekani timbuva ta lipfhumba mu famba mu ya tlhangana navo. Va byeleni muku: “Hi tava malandza ya n’wina;+ makunu mahani a civhumelwano na hina.”’+ 12 A tipawa leti hi nga teka kota timbuva ta hina ti wa ha hisa a siku legi hi nga suka mitini ya hina hita ka n’wina. Makunu wa ti wona a ku ti womile ti tlhela ti fuhlukela.+ 13 Ni tinghotso leti hi chelile a vhinyo na ta ha hi tiswa, kanilezvi makunu ti phuxukile.+ A tinguwo ta hina ni masandalia ya hina zvi hlakele hi kota ya lezvi a pfhuka wu lehileko nguvhu.”

14 Hi kota ya lezvo, a vavanuna va ka Izrayeli va no teka* timbuva to kari tabye, kanilezvi a va wutisangi Jehovha.+ 15 Hikwalaho, Joxuwa i no maha navo kurula+ ni civhumelwano ca ku va tsika va hanya, niku a tihosana ta hlengeletano ti no zvi tiyisa hi cihlambanyo.+

16 Kumbheleni ka masiku manharu, andzhako ka ku maha navo civhumelwano, va nozwa lezvaku va wa hanya kusuhani navo, va wa hi vaakelani vabye. 17 Makunu a vaIzrayeli va no suka va ya chikela madhoropeni yabye hi siku ga wunharu; a madhoropa yabye ku wa hi Gibheyoni,+ ni Kefira, ni Bheerote, ni Kiriyat-Jeyarime.+ 18 Kanilezvi a vaIzrayeli a va va dhumelangi, hakuva a tihosana ta hlengeletano ti wa hlambanyile kabye hi Jehovha,+ a Nungungulu wa Izrayeli. Hikwalaho, a hlengeletano yontlhe yi no sangula ku ngurangurela a tihosana. 19 Hi kota ya lezvo, a tihosana tontlhe ti no byela a hlengeletano yontlhe, tiku: “Kota lezvi hi hlambanyileko kabye hi Jehovha, a Nungungulu wa Izrayeli, a hi vhumeletwi a ku va maha zvahava. 20 Hi ta maha lezvi: Hi ta va tsika va hanya, kasi hi nga zangarelwi hi kota ya lezvi hi hlambanyileko kabye.”+ 21 A tihosana ti no engeta, tiku: “Va tsikeni va hanya, kanilezvi va wave vatshovi va tihunyi ni vakhi va mati va hlengeletano yontlhe.” Hi zvalezvi a tihosana ti nga va tsumbisa.

22 Makunu Joxuwa i no va vitana a ta va wutisa, aku: “Hikuyini mu nga hi kanganyisa, muku: ‘Hita hi ka wutshamu ga le kule nguvhu’, kuveni hi lisine mu hanya cikari ka hina ke?+ 23 Kusukela lezvi mu rukatelwe,+ niku mu tava tikhumbi contlhe cikhati, muva vatshovi va tihunyi ni vakhi va mati va yindlu ya Nungungulu wa mina.” 24 Va no hlamula Joxuwa, vaku: “Hi lezvaku a malandza ya wena ma byelilwe zviku dlunya lezvaku Jehovha, a Nungungulu wa wena, i leletele Mosi, a nandza gakwe, a ku mu nyika gontlhe a tiko legi ni ku hihirita vontlhe a vaaki va gona mahlweni ka n’wina.+ Hikwalaho, hi no mu chava hi kota ya wutomi* ga hina;+ hi caleci ci nga hi maha hi maha lezvi.+ 25 Hi le mandleni ya wena. Hi mahe ni cihi u ci wonako na ci hi cinene ni kululama.” 26 Hi zvalezvo a nga maha kabye; i no va ponisa mandleni ya vaIzrayeli, hikwalaho, a va va dayangi. 27 Kanilezvi ka siku lego, Joxuwa i no va maha vatshovi va tihunyi ni vakhi va mati va hlengeletano+ ni va alati ga Jehovha ka wutshamu legi Yena a nga wa ta gi hlawula,+ niku va simama ku maha lezvo kala ni nyamutlha lezvi.+

10 Zvalezvi Adhoni-Zedheki, a hosi ya Jerusalema, a ngazwa lezvaku Joxuwa i tekile Ayi a tlhela a gi konela kuloviswa, a maha Ayi ni hosi ya gona+ zvalezvi a nga maha Jeriko ni hosi ya gona,+ ni lezvaku a vahanyi va Gibheyoni va mahile kurula na Izrayeli+ va tshama cikari kabye, 2 i no rurumela hi kuchava,+ hakuva Gibheyoni gi wa hi dhoropa ga hombe, a ku khwatsi gin’we ga madhoropa ya wuhosi. Gi wa hi ga hombe a ku hundza Ayi,+ niku vontlhe a vavanuna va gona va wa hi valwi va yimpi. 3 Hikwalaho, Adhoni-Zedheki, a hosi ya Jerusalema, i no rumela mahungu ka Hohamu, a hosi ya Hebroni,+ ni ka Piramu, a hosi ya Jarmute, ni ka Jafiya, a hosi ya Lakixe, ni ka Dhebhira, a hosi ya Egloni,+ aku: 4 “Tanani mu ta ndzi vhuna, hi dhumela Gibheyoni, hakuva i mahile kurula na Joxuwa ni vaIzrayeli.”+ 5 Hi kota ya lezvo, a ntlhanu wa tihosi ta vaAmori+ — ku nga hosi ya Jerusalema, ni hosi ya Hebroni, ni hosi ya Jarmute, ni hosi ya Lakixe ni hosi ya Egloni — ti no tlhangana ti famba zvin’we ni mabutho ya tona ti ya gova kasi tilwa ni Gibheyoni.

6 Makunu a vavanuna va Gibheyoni va no rumela gezu ka Joxuwa, wugovelweni le Gilgali,+ vaku: “U nga tsiki a tikhumbi ta wena.+ Tana hi kuhatlisa! Hi tlhatlhise, u hi vhuna! A tihosi tontlhe ta vaAmori ta le tikweni ga zvitsunga ti tlhangene kasi ti hi vhukela.” 7 Hikwalaho, Joxuwa i no suka hi Gilgali zvin’we ni vontlhe a vavanuna va kulwa yimpi ni masochwa ya tinhenha.+

8 Makunu Jehovha i no byela Joxuwa, aku: “U nga va chavi,+ hakuva ndzi va nyikele ka wena.+ Ne mun’we wabye a nga ta tiya mahlweni ka wena.”+ 9 Joxuwa i no va dhumela hi citshuketi, andzhako ka ku famba wusiku gontlhe na a suka hi Gilgali. 10 Jehovha i no va vhilinganyisa mahlweni ka Izrayeli;+ Izrayeli i no va hihirita le Gibheyoni, a va hlongolisela hi ndlela leyi yi kandzihako yiya Bhet-Horoni, a va hlasela kala Azeka ni le Makedha. 11 A cikhati leci va nga tsutsuma Izrayeli na va hi ndzhelelweni wa Bhet-Horoni, Jehovha i no nisa a maralala ya hombe hi le tilweni hehla kabye kala Azeka, niku va no lova. Hi lisine, a votala hi lava va nga dawa hi maralala a ku hundza lava va nga dawa hi cipadha ca vaIzrayeli.

13 Hikwalaho, a gambo gi no nyima ni hweti yi nga fambi kala a vanhu va ti photela ka valala vabye. Xana lezvo a zvi tsaliwangi bhukwini ga Jaxari ke?+ A gambo gi no nyima cikari ka tilo gi nga hatlisi ku pela hi cipimo ca siku gontlhe. 14 Ku wa nga se tshuka kuva ni siku go fana ni lego, ne a ga ha tshukangi giva kona kambe, laha Jehovha a nga ingisa a gezu ga munhu,+ hakuva Jehovha i wa lwela Izrayeli.+

15 Andzhako ka lezvo, Joxuwa zvin’we ni vontlhe a va ka Izrayeli va no tlhela wugovelweni le Gilgali.+

16 Na ku kari ku maheka lezvo, a tihosi leto ta ntlhanu ti no tsutsuma ti ya fihlala lomu mhakweni ya le Makedha.+ 17 Joxuwa i no byeliwa ku ngalo: “A tihosi leti ta ntlhanu ti kumilwe na ti fihlele lomu mhakweni ya le Makedha.”+ 18 Hikwalaho, Joxuwa i te: “Wumbulutani a maribye ya hombe kala non’wini wa mhako, mu yimisa vavanuna kasi va va gadha. 19 Kanilezvi n’wina van’wani mu nga nyimi. Hlongoliselani a valala va n’wina mu va hlasela hi lendzhako.+ Mu nga va tsiki va nghena madhoropeni yabye, hakuva Jehovha, a Nungungulu wa n’wina, i va nyikele mandleni ya n’wina.”

20 Andzhako ka loku Joxuwa ni vaIzrayeli va mbhetile ku va hihirita va ku bhi, a ku tsika lava va nga huluka va nghena madhoropeni ma vhikelweko khwatsi, 21 a vanhu vontlhe va no tlhela ka Joxuwa wugovelweni le Makedha na va nga khwetsiwangi. I hava a nga xinyata a wula gezu* a vhukela va ka Izrayeli. 22 Andzhako ka lezvo, Joxuwa i te ngalo: “Vhululani a nomu wa mhako mu humesa a tihosi leti ta ntlhanu mu ti neha ka mina.” 23 Hikwalaho, va no humesa a tihosi leto ta ntlhanu lomu mhakweni va ti neha kakwe: A hosi ya Jerusalema, ni hosi ya Hebroni, ni hosi ya Jarmute, ni hosi ya Lakixe, ni hosi ya Egloni.+ 24 A cikhati leci va nga neha a tihosi leti ka Joxuwa, i no vitanisa a vavanuna vontlhe va ka Izrayeli, a byela a vakomandante va vavanuna va yimpi lava va nga fambile naye, aku: “Tshinelani mu ta kandzihela a tinhamu ta tihosi leti.” Hikwalaho, va no tshinela va kandzihela a tinhamu ta tona.+ 25 Joxuwa i te ngalo kabye: “Mu nga chavi hambu ku tsemeka hlanha.+ Tiyani hlanha muva ni ntamu, hakuva hi zvalezvi Jehovha a to maha a valala va n’wina vontlhe lava mu lwako navo.”+

26 Andzhako ka lezvo, Joxuwa i no va tlhava a va daya a gumesa a va hayeka ka ntlhanu wa timhandze.* Va no simama na va hayekilwe timhandzeni kala ni gambo. 27 Laha gi ngaya kupeleni, Joxuwa i no laya lezvaku va hawuliwa timhandzeni+ va hoxelwa mhakweni leyi va nga fihlele ka yona. Andzhako ka lezvo, ku no vekelwa a maribye ya hombe non’wini wa mhako, lawa ma ha hiko kwalaho kala ni nyamutlha lezvi.

28 Ka siku lego, Joxuwa i no teka Makedha+ a tlhela a mu hlasela hi cipadha. I no lovisa* a hosi ya kona ni vontlhe* va nga hi ka gona, a nga siyi ne mun’we wa ku pona.+ I no maha a hosi ya Makedha+ zvalezvi a nga mahile a hosi ya Jeriko.

29 Makunu Joxuwa i no suka ni vontlhe va ka Izrayeli hi Makedha kala Libna a yalwa ni Libna.+ 30 Gonawu, Jehovha i no gi nyikela zvin’we ni hosi ya kona+ canjeni ga Izrayeli. Va no gi hlasela hi cipadha zvin’we ni vontlhe va nga hi ka gona, va nga siyi ne mun’we wa ku pona. Hikwalaho, va no maha a hosi ya gona zvalezvi va nga mahile a hosi ya Jeriko.+

31 Hi kulandzela, Joxuwa, zvin’we ni vontlhe a va ka Izrayeli, i no suka hi Libna a famba kala Lakixe+ a ya gova kona alwa nago. 32 Jehovha i no nyikela Lakixe canjeni ga Izrayeli, va gi teka hi siku ga wumbiri. Va no gi hlasela hi cipadha zvin’we ni vontlhe va nga hi ka gona,+ a ku khwatsi hi lezvi va nga mahile Libna.

33 Makunu Horama, a hosi ya Gezera,+ i no kandziha kasi ku ya vhunetela Lakixe, kanilezvi Joxuwa i no mu hlasela zvin’we ni vanhu vakwe kala ku nga sali ne mun’we wa ku pona.

34 Hi kulandzela, Joxuwa, zvin’we ni vontlhe a va ka Izrayeli, i no suka hi Lakixe a famba kala Egloni+ a ya gova kona, alwa nago. 35 Va no gi teka ka siku lego va tlhela va gi hlasela hi cipadha. Ka siku lego, va no va konela kuloviswa vontlhe va nga hi ka gona, a ku khwatsi hi lezvi va nga mahile Lakixe.+

36 Andzhako ka lezvo, Joxuwa, zvin’we ni vontlhe a va ka Izrayeli, i no kandziha hi Egloni a famba kala Hebroni+ a yalwa nago. 37 Va no gi teka va tlhela va gi hlasela hi cipadha, zvin’we ni hosi ya gona, ni zvidhoropana zva gona, ni vontlhe va nga hi ka gona, va nga siyi ne mun’we wa ku pona. A ku khwatsi hi lezvi a nga mahile Egloni, i no gi konela kuloviswa zvin’we ni vontlhe va nga hi ka gona.

38 Hi kugumesa, Joxuwa, zvin’we ni vontlhe va ka Izrayeli, i no hundzuluka a kongoma Dhebhira+ a yalwa nago. 39 I no gi teka zvin’we ni hosi ya gona, ni zvidhoropana zva gona zvontlhe; va no va hlasela hi cipadha, va va konela kuloviswa vontlhe va nga hi ka gona+ va nga siyi ne mun’we wa ku pona.+ I no maha Dhebhira ni hosi ya gona zvalezvi a nga mahile Hebroni, ni Libna ni hosi ya gona.

40 Joxuwa i noba a teka a wutshamu gontlhe ga tiko ga zvitsunga, ku nga Negebhe, ni Xefela+ ni mindzhelelo ya kona, a hlula tihosi tabye tontlhe, a nga siyi ne mun’we wa ku pona. I no zvi konela kuloviswa zvontlhe zvi nga hefemula,+ a ku khwatsi hi lezvi Jehovha, a Nungungulu wa Izrayeli, a nga layile.+ 41 Joxuwa i no va khozisa kusukela Kadhexe-Bharneya+ kala Gaza,+ ni tiko gontlhe ga Goxeni+ kala Gibheyoni.+ 42 Joxuwa i no khoma a tihosi leti tontlhe a tlhela a teka a tiko gabye hi khatigin’we, hakuva hi Jehovha, a Nungungulu wa Izrayeli, a nga lwela Izrayeli.+ 43 Andzhako ka lezvo, Joxuwa zvin’we ni vontlhe va ka Izrayeli va no tlhela wugovelweni le Gilgali.+

11 Zvalezvi Jabhini, a hosi ya le Hazori, a ngazwa lezvo, i no rumela gezu ka Jobhabhe, a hosi ya Madhoni,+ ni ka hosi ya le Ximroni, ni ka hosi ya le Akxafa,+ 2 ni ka tihosi ta le tikweni ga zvitsunga ga n’walungu,* ni ta le tivaleni* hi le dzongeni* wa Kinereta, ni ta le Xefela, ni ta le mindzhelelweni ya Dhora+ le mupela-gambo, 3 ni ka vaKhanani+ le mutsuwuka-gambo ni mupela-gambo, ni ka vaAmori,+ ni ka vaHiti, ni ka vaPerezi, ni ka vaJebhusi tikweni ga zvitsunga, ni ka vaHivhi+ lahasi ka Hermoni,+ tikweni ga Mizpa. 4 Hikwalaho, tontlhe a tihosi leti ti no huma ni mabutho ya tona, ci nga citshungu ca hombe ca vanhu vo talisa ku khwatsi tindzhoho ta misava yi nga mbhirini ya bimbi, zvin’we ni mahaxi ya talela ga cima ni tikareta ta yimpi. 5 Tontlhe a tihosi leti ti no xuxa cikungo ca ku ti tlhangana, ti famba ti ya gova zvin’we, kusuhani ni mati ya Merome kasi tilwa na Izrayeli.

6 Hi kota ya lezvo, Jehovha i no byela Joxuwa, aku: “U nga chavi hi kota yabye,+ hakuva a mandziko hi cikhati caleci ndzi ta nyikela vontlhe va dawa hi Izrayeli. U fanele ku tsemelela a misiha ya minenge ya mahaxi yabye+ u tlhela u hisa tikareta tabye hi ndzilo.” 7 Joxuwa ni vontlhe a vavanuna va kulwa yimpi va no va dhumela hi citshuketi kusuhani ni mati ya Merome. 8 Jehovha i no va nyikela canjeni ga Izrayeli;+ va no va hlula va tlhela va va hlongolisela kala Sidhoni wa Hombe,+ ni Misrefot-Mayime,+ ni mutsuwuka-gambo wa Nkova wa Mizpa. Va no va hihirita kala ku nga sali ne mun’we wa ku pona.+ 9 Makunu Joxuwa i no va maha zvalezvi Jehovha a nga mu byelile: I no tsemelela a misiha ya minenge ya mahaxi yabye a tlhela a hisa tikareta tabye hi ndzilo.+

10 A ku tsika lezvo, Joxuwa i no wuya a ta teka Hazori a tlhela a daya a hosi ya kona hi cipadha,+ hakuva a kaleloko Hazori i wa hi tsindza ga mifumo leyi yontlhe. 11 Va no daya vontlhe va nga hi ka gona hi cipadha, va va konela kuloviswa.+ A va siyangi ne cin’we ci hefemulako.+ I no guma a hisa Hazori hi ndzilo. 12 Joxuwa i no teka a madhoropa wontlhe ya tihosi leti, a hlula a tihosi ta kona tontlhe a tlhela a ti daya hi cipadha.+ I no va konela kuloviswa+ a ku khwatsi hi lezvi Mosi, a nandza ga Jehovha, a nga leletele. 13 Hambulezvo, Izrayeli a nga hisangi ne dhoropa gin’we ka lawa ma nga hi ka matshamu yo tlakuka ahandle ka Hazori; kuve Hazori goce gi nga hisiwa hi Joxuwa. 14 A vaIzrayeli va no phanga a zvilo zvontlhe zva madhoropa lawo ni zvifuyo zviva zvabye.+ Kanilezvi va no hihirita a vanhu vontlhe hi cipadha kala va ku bhi.+ A va siyangi ne mun’we wa ku hefemula.+ 15 A ku khwatsi hi lezvi Jehovha a nga leletele Mosi, a nandza gakwe, Mosi yenawu i no leletela Joxuwa,+ niku Joxuwa i no zvi maha. A nga siyangi ne cin’we ka zvontlhe lezvi Jehovha a nga leletele Mosi.+

16 Joxuwa i no teka a tiko legi gontlhe, a tiko ga zvitsunga, ni Negebhe gontlhe,+ ni tiko gontlhe ga Goxeni, ni Xefela,+ ni Arabha,+ ni tiko ga zvitsunga ga Izrayeli ni Xefela wa gona, 17 kusukela Citsungeni ca Halake leci ci tlakukileko ci cuwuka Seyire kala Bhaali-Gadhi,+ Nkoveni wa Lebhanoni, hi le tshinyeni ga Citsunga ca Hermoni;+ i no khoma a tihosi ta kona tontlhe, a ti hlula a tlhela a ti daya. 18 Joxuwa i nolwa ni tihosi leti tontlhe hi cikhati co leha. 19 Gi hava dhoropa gi nga maha kurula ni vaIzrayeli ahandle ka vaHivhi lava va nga hanya le Gibheyoni.+ Va no teka a madhoropa wontlhe lawa man’wani hi kulwa.+ 20 Kuve Jehovha a nga tsika a timbilu tabye ti nonoha,+ va fela kulwa na Izrayeli, kasi a va lovisa na a nga va zweli wusiwana.+ Va wa fanele ku hihiritwa, a ku khwatsi hi lezvi Jehovha a nga leletele Mosi.+

21 Ka cikhati leco, Joxuwa i no swiyela a vaAnake+ tikweni ga zvitsunga, kusukela Hebroni, ni Dhebhira, ni Anabhe, ni tikweni gontlhe ga zvitsunga ga ka Judha ni tikweni gontlhe ga zvitsunga ga ka Izrayeli. Joxuwa i no va konela kuloviswa, vona zvin’we ni madhoropa yabye.+ 22 A ku salangi muAnake tikweni ga Izrayeli; va no sala+ ntsena le Gaza,+ ni le Gati,+ ni le Axdhodhe.+ 23 Hikwalaho, Joxuwa i no khozisa a tiko gontlhe kota lezvi Jehovha a nga tsumbisile Mosi.+ Hi kulandzela, Joxuwa i no gi nyikela ka Izrayeli kota tshomba kasi a gi avela ka tixaka takwe, hi kuya hi cipandze ci ringanako a lixaka ni lixaka.+ Ni tiko gi no humula yimpi.+

12 A tihosi ta tiko leti a vaIzrayeli va nga ti hlula va teka a tiko ga tona kota tshomba tlhelweni ga mutsuwuka-gambo wa Jordhani, kusukela Nkoveni wa Arnoni+ kala Citsungeni ca Hermoni+ ni tlhelo gontlhe ga mutsuwuka-gambo wa Arabha hi leti:+ 2 Hosi Sihoni,+ wa vaAmori, loyi a nga hanya le Hexbhoni a tlhela a fuma kusukela Arowera,+ mbhirini ya Nkova wa Arnoni,+ ni kusukela cikari ka nkova, ni khihlanya ga Gileyadhe kala Nkoveni wa Jabhoke, wu nga mbhingano wa vaAmoni. 3 I wa fumela kambe a Arabha kala tlhelweni ga mutsuwuka-gambo wa Bimbi ga Kinereta*+ ni kala tlhelweni ga mutsuwuka-gambo wa Bimbi ga Arabha, gi nga Bimbi ga Munyu,* zvi famba zvi kongoma Bhet-Jeximote ni dzongeni* lahasi ka Pisga.+

4 Va no teka ni cipandze ca Ogi,+ a hosi ya Bhaxani, a nga hi mun’we wa tihosi to gumesa ka tihosi ta vaRefayime,+ loyi a hanyileko Axtarote ni Edreyi 5 a tlhela a fuma Citsungeni ca Hermoni, ni le Saleka, ni Bhaxani gontlhe,+ zvi famba kala mbhirini ya vaGexure, ni vaMaakate,+ ni khihlanya ga Gileyadhe kala cipandzeni ca Sihoni, a hosi ya Hexbhoni.+

6 Mosi, a nandza ga Jehovha, zvin’we ni vaIzrayeli va no va hlula.+ Andzhako ka lezvo, Mosi, a nandza ga Jehovha, i no nyikela a tiko gabye kota tshomba ka va ka Rubheni, ni ka va ka Gadhi, ni ka khihlanya ga lixaka la ka Manase.+

7 Leti tihosi ta tiko leti Joxuwa zvin’we ni vaIzrayeli va nga ti hlula le tlhelweni ga mupela-gambo wa Jordhani, kusukela Bhaali-Gadhi,+ le Nkoveni wa Lebhanoni,+ zvi famba kala Citsungeni ca Halake,+ leci ci tlakukileko ci cuwuka Seyire.+ Andzhako ka lezvo, Joxuwa i no nyikela a tiko gabye ka tixaka ta Izrayeli kota tshomba hi kuya hi zviavelo zvabye,+ 8 matikweni ya zvitsunga, ni Xefela, ni Arabha, ni lomu matshan’wini ya lahasi, ni lomu zviwuleni ni le Negebhe+ — a tiko ga vaHiti, ni vaAmori,+ ni vaKhanani, ni vaPerezi, ni vaHivhi, ni vaJebhusi:+

13 Makunu Joxuwa i wa khosahele niku i wa hi ni malembe yo tala.+ Hikwalaho, Jehovha i no mu byela lezvi: “U khosahele niku u na ni malembe yo tala; kanilezvi ka ha hi ni cipandze ca hombe ca tiko ca ha lavako ku tekiwa.* 2 A tiko legi ga ha lavako ku tekiwa hi legi:+ A zvipandze zvontlhe zva vaFilistiya ni zvontlhe zva vaGexure,+ 3 (kusukela wokweni ga Nilo,* legi gi nga mutsuwuka-gambo wa* Gibhite, zvi kandziha kala n’walungu* wa mbhingano wa Ekroni, leci ci nga woniwa kota cipandze ca vaKhanani)+ a ku patsa ni zvipandze zva ntlhanu wa tihosi ta vaFilistiya,+ zvi nga zva vaGaza, ni zva vaAxdhodhe,+ ni zva vaAxkeloni,+ ni zva vaGati+ ni zva vaEkroni;+ lezvi zva vaAvhima+ 4 le dzongeni;* a tiko gontlhe ga vaKhanani; Meyara, loyi a lumbako a vaSidhoni,+ kala le Afeka zvi famba kala mbhinganweni wa vaAmori; 5 a tiko gontlhe ga vaGebhali+ ni mutsuwuka-gambo wontlhe wa Lebhanoni, kusukela Bhaali-Gadhi, le tshinyeni ga Citsunga ca Hermoni kala Lebho-Hamate;*+ 6 ni vaaki vontlhe va tiko ga zvitsunga, kusukela Lebhanoni+ kala Misrefot-Mayime,+ ni vaSidhoni vontlhe.+ Ndzi ta va hlongola mahlweni ka vaIzrayeli.+ Wena u to gi avela ntsena ka Izrayeli kota tshomba, kota lezvi ndzi ku leleteleko.+ 7 Makunu avela tiko legi kota tshomba ka 9 wa tixaka ni ka khihlanya ga lixaka la ka Manase.”+

8 A khihlanya legi gin’wani ga lixaka, zvin’we ni va ka Rubheni ni va ka Gadhi va amukele a tshomba yabye leyi Mosi a nga va nyika tlhelweni ga mutsuwuka-gambo wa Jordhani, a ku khwatsi hi lezvi Mosi, a nandza ga Jehovha, a nga va nyikile:+ 9 Kusukela Arowera,+ loyi a nga mbhirini ya Nkova wa Arnoni,+ ni kusukela dhoropeni legi gi nga cikari ka nkova, ni matshamu wontlhe yo tlakuka ya Medhebha, kala Dhibhoni; 10 ni madhoropa wontlhe ya Sihoni, a hosi ya vaAmori, loyi a nga fumela Hexbhoni kala mbhinganweni wa vaAmoni;+ 11 ni Gileyadhe, ni cipandze ca vaGexure ni ca vaMaakate,+ ni contlhe Citsunga ca Hermoni ni Bhaxani+ gontlhe kala le Saleka,+ 12 wu nga mufumo wontlhe wa Ogi, le Bhaxani, loyi a nga fuma le Axtarote ni le Edreyi. (Ive yin’we ya tihosi to gumesa ta vaRefayime.)+ Mosi i no va hlula a tlhela a va hlongola.+ 13 Kanilezvi a vaIzrayeli a va hlongolangi+ a vaGexure ni vaMaakate. Hikwalaho, Gexure na Maakate va hanya cikari ka Izrayeli kala ni nyamutlha lezvi.

14 Lixaka la vaLevhi loce a nga kala ku li nyika tshomba.+ A minyikelo ya kuhisiwa hi ndzilo yi mahelwako Jehovha, a Nungungulu wa Izrayeli, hi yona tshomba yabye,+ kota lezvi a va tsumbisileko.+

15 Hi kulandzela, Mosi i no li nyika tshomba a lixaka la ka Rubheni hi mingango ya lona. 16 A cipandze cabye ci wa sukela Arowera, loyi a nga mbhirini ya Nkova wa Arnoni, ni dhoropa gi nga cikari ka nkova, ni matshamu wontlhe yo tlakuka ma nga kusuhani ni Medhebha; 17 Hexbhoni ni zvontlhe a zvidhoropana zvakwe+ zvi nga ka wutshamu go tlakuka, ni Dhibhoni, ni Bhamote-Bhaali, ni Bhet-Bhaali-Meyoni,+ 18 ni Jahaza,+ ni Kedhemote,+ ni Mefaate,+ 19 ni Kiriyatayime, ni Sibma,+ ni Zeret-Xahare, le citsungeni ca le nkoveni, 20 ni Bhet-Peyori, a mindzhelelo ya Pisga,+ ni Bhet-Jeximote,+ 21 wontlhe a madhoropa ma nga ka wutshamu go tlakuka, ni wontlhe a mufumo wa Sihoni, a hosi ya vaAmori, loyi a fumileko le Hexbhoni.+ Mosi i mu hlulile+ zvin’we ni tihosana ta vaMidhiyani, ti nga leti: Evhi, na Rekemu, na Zuri, na Hura, na Rebha,+ ti nga tihosana leti ti nga hi hasi ka Sihoni, leti ti nga hanya lomu tikweni. 22 Cikari ka lava a vaIzrayeli va nga va daya hi cipadha, ku wa hi na Bhalami,+ a muvhumbi,+ a n’wana wa Bheyori. 23 A mbhingano wa va ka Rubheni ku wa hi Jordhani; a cipandze leci ci wa hi tshomba ya va ka Rubheni hi mingango yabye ni madhoropa yabye ni maaldheya yabye.

24 Ahandle ka lezvo, Mosi i no li nyika tshomba a lixaka la ka Gadhi, va nga va ka Gadhi hi mingango yabye, 25 niku a cipandze cabye ci wa patsa Jazera+ ni wontlhe a madhoropa ya Gileyadhe ni khihlanya ga tiko ga va ka Amoni+ kala Arowera, loyi a cuwukeneko ni Rabha,+ 26 na ci sukela Hexbhoni+ kala Ramat-Mizpa ni Bhetonima, ni kusukela Mahanayime+ kala mbhinganweni wa Dhebhira; 27 niku le nkoveni ci wa patsa Bhet-Harani, ni Bhet-Nimra,+ ni Sukote,+ ni Zafoni, ci nga cipandze leci cin’wani ca mufumo wa Sihoni, a hosi ya Hexbhoni,+ a Jordhani na a maha mbhingano kusukela magumo ya ndzhelelo wa Bimbi ga Kinereta*+ hi le tlhelweni ga mutsuwuka-gambo wa Jordhani. 28 Leyi yive tshomba ya va ka Gadhi hi mingango yabye, zvin’we ni madhoropa yabye ni maaldheya yabye.

29 Ahandle ka lezvo, Mosi i no gi nyika tshomba a khihlanya ga lixaka la ka Manase, a nyika a khihlanya ga lixaka la ka Manase hi mingango yabye.+ 30 A cipandze cabye ci wa sukela Mahanayime+ ciba gontlhe ga Bhaxani, wontlhe a mufumo wa Ogi, a hosi ya Bhaxani, ni zvontlhe a zvidhoropana zva matenda ya Jayira+ le Bhaxani, 60 wa zvona. 31 A khihlanya ga Gileyadhe, ni Axtarote, ni Edreyi,+ ma nga madhoropa ya mufumo wa Ogi, le Bhaxani, ma nova ya vana va Makira,+ a n’wana wa Manase, ku nga khihlanya ga vana va Makira, hi kuya hi mingango yabye.

32 Leti tive titshomba leti Mosi a nga va nyika tivaleni ta Mowabhi, tlhatuko wa Jordhani, hi le mutsuwuka-gambo wa Jeriko.+

33 Kanilezvi Mosi a nga li nyikangi tshomba a lixaka la vaLevhi.+ Jehovha, a Nungungulu wa Izrayeli, hi yena tshomba yabye, kota lezvi a va tsumbisileko.+

14 Lezvi hi lezvi a vaIzrayeli va zvi tekileko kota tshomba tikweni ga Khanani, legi mupristi Eleyazari na Joxuwa, a n’wana wa Nuni, ni tihloko ta tiyindlu ta vapapayi ta tixaka ta ka Izrayeli va va nyikileko kota tshomba.+ 2 A tshomba ya 9 wa tixaka ni khihlanya yi avelwe hi tihlolo,+ a ku khwatsi hi lezvi Jehovha a nga leletele hi ku tirisa Mosi.+ 3 Mosi i wa ti nyikile a tshomba a tixaka timbiri ni khihlanya tlhelweni legi gin’wani* ga Jordhani,+ kanilezvi a vaLevhi i wa nga va nyikangi tshomba cikari kabye.+ 4 A vana va Josefa va no hlayiwa kota tixaka timbiri,+ ku nga Manase na Efrayime;+ a vaLevhi a va nyikwangi cipandze kota tshomba lomu tikweni, ntsena a madhoropa+ ya ku aka ka wona ni wuriselo gi ringanako a zvifuyo zvabye ni titshomba tabye.+ 5 Hikwalaho, a vaIzrayeli va no avela tiko kota lezvi Jehovha a nga leletele Mosi.

6 Makunu a vavanuna va ka Judha va no tshinela ka Joxuwa le Gilgali,+ Kalebhi,+ a n’wana wa Jefune, a muKenazi, aku kakwe: “Wena wa zvi tiva khwatsi lezvi Jehovha a nga byela+ Mosi, a munhu wa Nungungulu wa lisine,+ xungetano hi wena na mina le Kadhexe-Bharneya.+ 7 Ndzi wa hi ni 40 wa malembe a cikhati leci Mosi, a nandza ga Jehovha, a nga ndzi ruma hi Kadhexe-Bharneya ndzi ya piyara tiko,+ ndzi gumesa ndzi wuya ni mubiko wa lisine ni wo tsumbeka.*+ 8 Hambu lezvi a vamakabye va mina lava ndzi nga fambile navo va nga tshova timbilu* ta vanhu, mina ndzi landzele Jehovha, a Nungungulu wa mina hi mbilu yontlhe.*+ 9 Mosi i no hlambanya ka siku lego, aku: ‘A tiko legi a mikondzo ya wena yi fambafambileko ka gona gi tava tshomba ya wena ni ya vana va wena kala kupindzuka, hakuva u landzele Jehovha, a Nungungulu wa mina, hi mbilu yontlhe.’+ 10 Makunu a ku khwatsi hi lezvi a nga tsumbisa,+ Jehovha i ndzi hlayisile ndzi hanya+ ka malembe lawa ya 45, kusukela loku Jehovha a mahile citsumbiso leci ka Mosi a cikhati leci Izrayeli a nga fambafamba lomu ciwuleni;+ hi mina loyi nyamutlha ndzi na ni 85 wa malembe. 11 Ni nyamutlha ndza ha tiyile a ku khwatsi hi siku legi Mosi a nga ndzi ruma. A ntamu wa mina zvalezvi wa ha fana ni lowu ndzi nga hi nawo cikhatini leco, kasi kuya yimpini ni ku maha yin’wani mitiro. 12 Hikwalaho, ndzi nyike a tiko legi ga zvitsunga, legi Jehovha a nga tsumbisa ka siku lego. Hambu lezvi ka siku lego u ngazwa lezvaku ku wa hi ni vaAnake+ ka wutshamu lego ni madhoropa ya hombe ma vhikelweko khwatsi,+ hakunene* Jehovha i tava na mina,+ niku ndzi ta va hlongola a ku khwatsi hi lezvi Jehovha a nga tsumbisa.”+

13 Hikwalaho, Joxuwa i no mu katekisa a nyikela Hebroni kota tshomba ka Kalebhi, a n’wana wa Jefune.+ 14 Hi caleco ci mahileko ku Hebroni ava tshomba ya Kalebhi, a n’wana wa Jefune, a muKenazi, kala ni nyamutlha lezvi, hakuva i landzele Jehovha, a Nungungulu wa Izrayeli, hi mbilu yontlhe.+ 15 A kaleloko, Hebroni i wa vitaniwa ku Kiriyat-Arbha+ (Arbha i wa hi wa hombe cikari ka vaAnake). Ni tiko gi no humula yimpi.+

15 A cipandze leci ci weleko+ ka lixaka la ka Judha, kasi civa ca mingango ya lona, ci wa famba kala mbhinganweni wa Edhomi,+ Ciwuleni ca Zini, kala magumo ya Negebhe, hi le dzongeni.* 2 A mbhingano wabye wa le dzongeni wu wa sukela mbhirini ya Bimbi ga Munyu,*+ kusukela ka yipswha* yi cuwukileko le dzongeni. 3 Wu wa famba wuya dzongeni wu cuwuka tsungeni wa Akrabhima,+ wu hundza hi Zini, wu gumesa wu kandziha hi dzongeni wuya Kadhexe-Bharneya.+ Wu wa hundza hi Hezroni, wu kandziha wuya Adhari wu gumesa wu jika wuya Karka. 4 Hi kulandzela, wu wa hundza hi Azmoni+ wu famba kala Nkoveni wa Gibhite,+ wu ya mbhelela Bimbini.* Lowu wu wa hi mbhingano wabye wa seno dzongeni.

5 A mbhingano wa tlhelo ga mutsuwuka-gambo ku wa hi Bimbi ga Munyu* kala laha a Jordhani a chululako kona. A mbhingano wa tlhelo ga n’walungu* wu wa sukela ka yipswha* ya bimbi, laha a Jordhani a chululako kona.+ 6 A mbhingano wu wa kandziha wuya Bhet-Hogla,+ wu hundza hi n’walungu wa Bhet-Arabha,+ wu tlhela wu kandziha wuya ribyeni ga Bohani,+ a n’wana wa Rubheni. 7 A mbhingano wu wa kandziha wuya Dhebhira, Nkoveni wa Akora,+ wu gumesa wu jika wu cuwuka n’walungu wa Gilgali,+ loyi a nga mahlweni ka tsunga wa Adhumima, dzongeni wa nkova, wu hundza wuya matini ya En-Xemexe+ wu ya mbhelela En-Rogeli.+ 8 A mbhingano wu wa kandziha kala Nkoveni wa N’wana wa Hinome+ wu famba kala ndzhelelweni wa le dzongeni wa vaJebhusi,+ ku nga Jerusalema,+ niku a mbhingano wu wa kandziha wuya madembeleni ya citsunga ci nga mupela-gambo, mahlweni ka Nkova wa Hinome, magumo ka Nkova wa Refayime, hi tlhelo ga n’walungu. 9 A mbhingano wu wa tsema kusukela hehla ka citsunga kala cibukeni ca mati ya Neftowa+ wu famba kala madhoropeni ya Citsunga ca Efroni; a mbhingano wu wa simama kala Bhaala, ku nga Kiriyat-Jeyarime.+ 10 Hi Bhaala, a mbhingano wu wa rendzeleka wu cuwuka mupela-gambo kala Citsungeni ca Seyire niku wu wa hundza hi ndzhelelweni wa n’walungu wa Citsunga ca Jeyarime, ku nga Kesalona, wu relela kala Bhet-Xemexe+ wu tlhela wu hundza wuya Timna.+ 11 A mbhingano wu wa simama kala ndzhelelweni wa le n’walungu wa Ekroni,+ wu famba kala Xikeroni wu hundza wuya Citsungeni ca Bhaala wu tlhela wu simama kala Jabneeli, wu ya mbhelela bimbini.

12 A mbhingano wa mupela-gambo ku wa hi mbhiri ya Bimbi ga Hombe.*+ Leyi yive mimbhingano ya vana va Judha ka wontlhe matlhelo hi mingango yabye.

13 Kalebhi,+ a n’wana wa Jefune, i no nyikwa ciavelo cikari ka vana va Judha hi ku landza cileletelo leci Jehovha a nga nyikile Joxuwa; i no nyikwa Kiriyat-Arbha (Arbha i wa hi papayi wa Anake), ku nga Hebroni.+ 14 Hikwalaho, Kalebhi i no hlongola a vana vanharu va Anake ka wutshamu lego,+ ku nga Xexayi, na Ahimani, na Talmayi,+ va nga vana va Anake. 15 Hi kulandzela, i no suka hi laho a yalwa ni vahanyi va le Dhebhira.+ (A kale Dhebhira i wa vitaniwa ku Kiriyat-Seferi.) 16 Makunu Kalebhi i te: “A wanuna loyi a to hlula a dhoropa ga Kiriyat-Seferi, a gi teka, ndzi ta mu nyika a nhanyana wa mina, Aksa, ava sati wakwe.” 17 Otniyeli,+ a n’wana wa Kenazi,+ a makabye wa Kalebhi, i no gi teka. Hikwalaho, i no mu nyika a nhanyana wakwe, Aksa,+ ava sati wakwe. 18 A cikhati leci a ngaya kaya, i no kurumeta nuna wakwe lezvaku a kombela simu ka papayi wakwe. Makunu Aksa i no chika mbongoleni* yakwe, Kalebhi a mu wutisa ku: “U lava yini?”+ 19 Yena aku: “Ndzi kombela cikatekiso, hakuva u ndzi nyikile petso le dzongeni;* ndzi nyike kambe ni Gulote-Mayime.”* Hikwalaho, i no mu nyika Gulote wa le Tsungeni ni Gulote wa le Ndzhelelweni.

20 Leyi yive tshomba ya lixaka la ka Judha, hi mingango yabye.

21 A madhoropa lawa ma nga hi mbhirini ya le dzongeni wa lixaka la ka Judha, a ku cuwuka mbhinganweni wa cipandze ca Edhomi,+ mave lawa: Kabzeeli, ni Edhera, ni Jagura, 22 ni Kina, ni Dhimona, ni Adhadha, 23 ni Kedhexe, ni Hazori, ni Itnane, 24 ni Zife, ni Telema, ni Bheyalote, 25 ni Hazor-Hadhata, ni Keriyot-Hezroni, ku nga Hazori, 26 ni Amema, ni Xema, ni Moladha,+ 27 ni Hazar-Gadha, ni Hexmoni, ni Bhet-Peleti,+ 28 ni Hazar-Xuwale, ni Bherexebha,+ ni Bhiziyotiya, 29 ni Bhaala, ni Iyima, ni Ezema, 30 ni Eltoladhe, ni Kesili, ni Horma,+ 31 ni Ziklagi,+ ni Madmana, ni Sansana, 32 ni Lebhayoti, ni Xilhima, ni Ayina, ni Rimoni+ — wontlhe ma wa hi 29 wa madhoropa zvin’we ni maaldheya ya kona.

33 A madhoropa ma nga hi le Xefela,+ hi lawa: Extawoli, ni Zora,+ ni Axna, 34 ni Zanowa, ni En-Ganima, ni Tapuwa, ni Enama, 35 ni Jarmute, ni Adhulamu,+ ni Soko, ni Azeka,+ 36 ni Xaarayime,+ ni Adhitayime, ni Gedhera ni Gedherotayime* — 14 wa madhoropa ni maaldheya ya kona.

37 Zenani, ni Hadhaxa, ni Migdhal-Gadhi, 38 ni Dhileyana, ni Mizpa, ni Jokteeli, 39 ni Lakixe,+ ni Bhozkate, ni Egloni, 40 ni Kaboni, ni Lamama, ni Kitlixe, 41 ni Gedherote, ni Bhet-Dhagoni, ni Naama, ni Makedha+ — 16 wa madhoropa ni maaldheya ya kona.

42 Libna,+ ni Etera, ni Axane,+ 43 ni Jifta, ni Axna, ni Nezibha, 44 ni Keila, ni Akzibha, ni Marexa — 9 wa madhoropa ni maaldheya ya kona.

45 Ekroni ni zvidhoropana zva kona ni maaldheya ya kona; 46 a kusukela Ekroni zvi cuwuka mupela-gambo, zvontlhe zvi nga tlhelweni ga Axdhodhe ni maaldheya ya kona.

47 Axdhodhe+ ni zvidhoropana zva kona ni maaldheya ya kona; Gaza+ ni zvidhoropana zva kona ni maaldheya ya kona, zvi famba kala Nkoveni wa Gibhite, ni Bimbini ga Hombe,* ni wutshan’wini ga laha kusuhani.+

48 Le tikweni ga zvitsunga ku wa hi na Xamira, ni Jatiri,+ ni Soko, 49 ni Dhana, ni Kiriyat-Sana, ku nga Dhebhira, 50 ni Anabhe, ni Extemo,+ ni Anima, 51 ni Goxeni,+ ni Holoni, ni Gilo+ — 11 wa madhoropa ni maaldheya ya kona.

52 Arabhiya, ni Dhuma, ni Exana, 53 ni Janima, ni Bhet-Tapuwa, ni Afeka, 54 ni Humta, ni Kiriyat-Arbha, ku nga Hebroni,+ ni Ziyora — 9 wa madhoropa ni maaldheya ya kona.

55 Mawone,+ ni Karmeli, ni Zife,+ ni Juta, 56 ni Jezreeli, ni Jokdheyama, ni Zanowa, 57 ni Kayine, ni Gibheya, ni Timna+ — 10 wa madhoropa ni maaldheya ya kona.

58 Halhule, ni Bhet-Zura, ni Gedhora, 59 ni Maarati, ni Bhet-Anoti, ni Eltekoni — 6 wa madhoropa ni maaldheya ya kona.

60 Kiriyat-Bhaali, ku nga Kiriyat-Jeyarime,+ ni Rabha — madhoropa mambiri ni maaldheya ya kona.

61 Le ciwuleni ku wa hi na Bhet-Arabha,+ ni Midhini, ni Sekaka, 62 ni Nibxane, ni Dhoropa ga Munyu, ni En-Gedhi+ — 6 wa madhoropa ni maaldheya ya kona.

63 Xungetano hi vaJebhusi,+ lava va nga hanya Jerusalema,+ a vavanuna va ka Judha a va zvi kotangi ku va hlongola;+ hikwalaho, a vaJebhusi va ha simama ku hanya zvin’we ni vanhu va ka Judha le Jerusalema kala ni nyamutlha lezvi.

16 A cipandze leci ci avelweko+ a vana va Josefa+ na zvi kombiwa hi tihlolo ci wa sukela Jordhani, kusuhani ni Jeriko kala matini ma nga mutsuwuka-gambo wa Jeriko, ciba ciwula ci kandzihako hi Jeriko ci famba kala tikweni ga zvitsunga ga Bheteli.+ 2 Ci wa famba kusukela Bheteli, loyi a lumbako Luza, ci simama kala mbhinganweni wa vaArke, le Atarote, 3 ci gumesa ci relela ci kongoma mupela-gambo, ci cuwuka mbhinganweni wa vaJafleti kala mbhinganweni wa Bhet-Horoni+ wa le Ndzhelelweni ni Gezera,+ ci ya mbhelela bimbini.

4 Hikwalaho, a vana va Josefa,+ ku nga Manase na Efrayime, va no teka cipandze cabye ca tiko.+ 5 A mbhingano wa vana va Efrayime hi mingango yabye, wu wa hi lowu: A mbhingano wa tshomba yabye ka tlhelo ga mutsuwuka-gambo wu wa sukela Atarot-Adhari+ wu famba kala Bhet-Horoni wa le Tsungeni.+ 6 A mbhingano wu wa famba kala bimbini. Mikmetati+ i wa kumekela n’walungu,* niku a mbhingano wu wa rendzeleka wu cuwuka mutsuwuka-gambo kala Taanat-Xilo, niku wu waba tlhelo ga mutsuwuka-gambo kala Janowa. 7 Hi kulandzela, wu wa relela kusukela Janowa wuya Atarote ni Naara, wu chikela Jeriko+ wu tlhela wu simama kala Jordhani. 8 Hi le Tapuwa,+ a mbhingano wu wa simama wu cuwuka mupela-gambo wa Nkova wa Kana wu ya mbhelela bimbini.+ Leyi i tshomba ya lixaka la ka Efrayime hi mingango yabye; 9 a vana va Efrayime va wa hi ni madhoropa kambe lomu cikari ka tshomba ya vana va Manase, wontlhe madhoropa ni maaldheya ya kona.+

10 Kanilezvi a va hlongolangi a vaKhanani lava va nga hanya Gezera;+ a vaKhanani va ha hanya cikari ka va ka Efrayime kala ni nyamutlha lezvi,+ na va mahiswa a mitiro ya cikurumeta.+

17 Hi kulandzela, a hlolo+ yi no wela ka lixaka la ka Manase,+ hakuva i wa hi yena matewula ya Josefa.+ Kota lezvi Makira,+ a matewula ya Manase tlhelo papayi wa Gileyadhe, a nga hi mulwi wa yimpi, i no nyikiwa Gileyadhe ni Bhaxani.+ 2 A hlolo yi no wela ka vana lava van’wani va Manase hi mingango yabye: A vana va Abhiyezeri,+ ni vana va Heleke, ni vana va Asriyeli, ni vana va Xekemi, ni vana va Heferi, ni vana va Xemidha. Lava va wa hi vana va cinuna va Manase, a n’wana wa Josefa, hi mingango yabye.+ 3 Kanilezvi Zelofehadhe,+ a n’wana wa Heferi, a n’wana wa Gileyadhe, a n’wana wa Makira, a n’wana wa Manase i wa nga hi na vana va vafana, i wova ni vana va vanhanyana basi. A mavito ya vanhanyana vakwe hi lawa: Mahla, na Nowa, na Hogla, na Milka, na Tirza. 4 Hikwalaho, va noya ka mupristi Eleyazari,+ ni ka Joxuwa, a n’wana wa Nuni, ni ka tihosana, va yaku: “Kuve Jehovha loyi a nga leletela Mosi lezvaku a hi nyika tshomba cikari ka vamakabye va hina.”+ Hikwalaho, i no va nyika tshomba cikari ka vamakabye va papayi wabye hi ku landza cileletelo ca Jehovha.+

5 Ku wa hi ni 10 wa maaldheya kambe ma weleko ka va ka Manase, a ku tsika a tiko ga Gileyadhe ni ga Bhaxani, lawa ma nga hi tlhelweni legi gin’wani* ga Jordhani,+ 6 hakuva a vanhanyana va Manase va amukele tshomba zvin’we ni vafana vakwe, niku a tiko ga Gileyadhe gi nova tshomba ya vana lava van’wani va Manase.

7 A mbhingano wa va ka Manase wu wa sukela Axeri kala Mikmetati,+ loyi a cuwukeneko ni Xekemi,+ niku a mbhingano wu wa simama wuya dzongeni* kala tikweni legi ku nga hanya a vaaki va En-Tapuwa. 8 A tiko ga Tapuwa+ gi nova ga va ka Manase, kanilezvi a dhoropa ga Tapuwa legi gi nga hi mbhinganweni wa cipandze ca va ka Manase gi no lumba a vana va Efrayime. 9 A mbhingano wu wa relela wuya Nkoveni wa Kana, hi le dzongeni wa nkova. Ku wa hi ni madhoropa ya va ka Efrayime cikari ka madhoropa ya va ka Manase;+ niku a mbhingano wa cipandze ca va ka Manase wu wa hi tlhelweni ga n’walungu* ga nkova niku wu wa mbhelela bimbini.+ 10 A cipandze ca le dzongeni ci wa hi ca va ka Efrayime, niku a cipandze ca le n’walungu ci wa hi ca va ka Manase; a bimbi gi wa hi gona mbhingano wabye.+ Hi le n’walungu, va* wa famba kala ka va ka Axeri; hi le mutsuwuka-gambo, va wa famba kala ka va ka Isakari.

11 Ka zvipandze zva va ka Isakari ni zva va ka Axeri, Manase i no nyikwa Bhet-Xeyani ni zvidhoropana zva kona, ni Ibleyama+ ni zvidhoropana zva kona, ni vahanyi va Dhora+ ni zvidhoropana zva kona, ni vahanyi va En-Dhora+ ni zvidhoropana zva kona, ni vahanyi va Taanaka+ ni zvidhoropana zva kona, ni vahanyi va Megidho ni zvidhoropana zva kona. A manharu cikari ka matiko lawa ma wa hi ka matshamu ya zvitsungana.

12 Kanilezvi a vana va Manase a va zvi kotangi ku teka madhoropa lawa; a vaKhanani va no simama ku hanya ka tiko legi.+ 13 A cikhati leci a vaIzrayeli va ngava ni ntamu, va no va mahisa mitiro ya cikurumeta a vaKhanani,+ kanilezvi a va va hlongolangi hi kumbhelela.+

14 A vana va Josefa va no wutisa Joxuwa, vaku: “Hikuyini u nga hi* nyika ciavelo cin’we kota tshomba+ ni tiko ga hina giva gin’we basi ke? Hina hi tele, hakuva Jehovha wa hi katekisa kala lezvi.”+ 15 Joxuwa i no va hlamula, aku: “Loku mu tele nguvhu, fambani lomu khwatini mu ya ti xakatsela wutshamu tikweni ga vaPerezi+ ni ga vaRefayime,+ kota lezvi a tiko ga zvitsunga ga Efrayime+ gi nga gitsongwani nguvhu ka n’wina.” 16 A vana va Josefa va no hlamula, vaku: “A tiko ga zvitsunga a gi hi eneli, niku a vaKhanani vontlhe lava va hanyako tikweni ga nkova va na ni tikareta ta yimpi+ ti nga ni masikela* ya simbi,* lava va nga le Bhet-Xeyani+ ni zvidhoropaneni zva kona ni lava va nga le Nkoveni wa Jezreeli.”+ 17 Hikwalaho, Joxuwa i no byela va yindlu ya ka Josefa, ku nga Efrayime na Manase, aku: “N’wina mu tele nguvhu niku mu na ni ntamu wa hombe. Mu nga ta amukela ciavelo cin’we basi,+ 18 kanilezvi a tiko ga zvitsunga gonawu gi tava ga n’wina.+ Hambu lezvi gi nga khwati, mu ta xakatsa, niku gi tava mbhingano wa cipandze ca n’wina. Hakuva mu ta hlongola vaKhanani, hambu lezvi va nga ni ntamu ni lezvi va nga ni tikareta ta yimpi ti nga ni masikela* ya simbi.”*+

18 Makunu a hlengeletano yontlhe ya vaIzrayeli yi no tlhangana le Xilo,+ va gwimba a tenda ga mutlhangano laho,+ hakuva a tiko gi wa khozisilwe mahlweni kabye.+ 2 Kanilezvi ku wa ha hi ni 7 wa tixaka ta vaIzrayeli ti nga kala ti nga se amukela a tshomba ya tona. 3 Hikwalaho, Joxuwa i no wutisa a vaIzrayeli, aku: “Kala rini na ma ha honisa a ku ya teka a tiko legi Jehovha, a Nungungulu wa vakokwani va n’wina, a mu nyikileko?+ 4 Hlawulani a vavanuna vanharu ka lixaka ni lixaka kasi ndzi va ruma; va fanele kuya va ya fambafamba lomu tikweni gontlhe va tsala mapa wa cipandze leci ci tova tshomba yabye. Andzhako ka lezvo, va ta wuya ka mina. 5 Va fanele ku pandzelela a tiko hi 7 wa zvipandze.+ Judha i ta simama ka cipandze cakwe le dzongeni,*+ a yindlu ya Josefa yi ta simama ka cipandze ca yona le n’walungu.*+ 6 Tsalani a mapa wa tiko mu gi pandzelela hi 7 wa zvipandze, mu wuya nazvo ka mina. Mina ndzi ta mu bela tihlolo+ mahlweni ka Jehovha, a Nungungulu wa hina. 7 Kanilezvi a vaLevhi va nga ta nyikiwa ciavelo cikari ka n’wina,+ hakuva a wupristi ga Jehovha hi yona tshomba yabye;+ Gadhi, na Rubheni, ni khihlanya ga lixaka la ka Manase+ va sina va amukele a tshomba yabye tlhelweni ga mutsuwuka-gambo wa Jordhani, leyi Mosi, a nandza ga Jehovha, a va nyikileko.”

8 A vavanuna va no ti longisela ku famba, niku Joxuwa i no leletela a vavanuna lava va nga fanele ku tsala a mapa wa tiko, aku: “Fambani mu ya fambafamba lomu tikweni mu tsala a mapa wa gona mu gumesa mu wuya ka mina, mina ndzi ta mu bela tihlolo mahlweni ka Jehovha kwalaha Xilo.”+ 9 Hikwalaho, a vavanuna va noya va ya fambafamba lomu tikweni va tsala a mapa wa gona. Va no gi pandzelela hi 7 wa zvipandze hi kuya hi madhoropa ya gona, va zvi tsala lomu bhukwini. Andzhako ka lezvo, va no tlhela ka Joxuwa wugovelweni le Xilo. 10 Hi kulandzela, Joxuwa i no va bela tihlolo le Xilo mahlweni ka Jehovha.+ Kwalaho, Joxuwa i no avela tiko ka vaIzrayeli hi kuya hi zviavelo zvabye.+

11 A hlolo yi no khoma a lixaka la ka Bhenjamini hi mingango yabye; a cipandze leci va nga kombiwa hi hlolo ci wa hi cikari ka vanhu va ka Judha+ ni vanhu va ka Josefa.+ 12 Hi le n’walungu, a mbhingano wabye wu wa sangulela Jordhani wu famba kala n’walungu wa ndzhelelo wa Jeriko;+ wu wa kandziha citsunga wu cuwuka mupela-gambo wu famba kala ciwuleni ca Bhet-Avhene.+ 13 A ku suka hi laho, a mbhingano wu wa simama kala Luza, hi le dzongeni wa ndzhelelo wa Luza, ku nga Bheteli;+ a mbhingano wu wa relela kala Atarot-Adhari+ hi le citsungeni ci nga le dzongeni wa Bhet-Horoni wa le Ndzhelelweni.+ 14 A mbhingano wu wa famba hi tlhelo ga mupela-gambo wu gumesa wu jika wu cuwuka dzongeni kusukela citsungeni leci ci cuwukeneko ni Bhet-Horoni hi le dzongeni; wu wa mbhelela Kiriyat-Bhaali, ku nga Kiriyat-Jeyarime,+ a dhoropa ga ka Judha. Legi i tlhelo ga mupela-gambo.

15 Hi tlhelo ga le dzongeni, a mbhingano wu wa sukela mbhirini ya Kiriyat-Jeyarime wu famba wu cuwuka mupela-gambo; wu wa simama kala cibukeni ca mati ya Neftowa.+ 16 A mbhingano wu wa relela kala mbhirini ya citsunga leci ci cuwukeneko ni Nkova wa N’wana wa Hinome,+ leyi yi nga Nkoveni wa Refayime,+ hi le n’walungu, wu relela kala Nkoveni wa Hinome, wu famba kala ndzhelelweni wa vaJebhusi,+ hi le dzongeni, wu tlhela wu relela kala En-Rogeli.+ 17 Wu waba wu cuwuka n’walungu wu famba kala En-Xemexe, andzhako ka lezvo, wu famba kala Gelilote, legi gi cuwukeneko ni tsunga wa Adhumima,+ wu relela kala ribyeni+ ga Bohani,+ a n’wana wa Rubheni. 18 Wu wa simama kala ndzhelelweni wa le n’walungu wu cuwukeneko ni Arabha, wu relela kala Arabha. 19 A mbhingano wu wa simama kala ndzhelelweni wa n’walungu wa Bhet-Hogla+ wu ya mbhelela ka yipswha* ya le n’walungu ya Bimbi ga Munyu,*+ mbhirini ya le dzongeni ya Jordhani. Lowu wu wa hi mbhingano wa le dzongeni. 20 Tlhelweni ga mutsuwuka-gambo, a mbhingano ku wa hi Jordhani. Leyi yi wa hi mimbhingano ya tshomba ya vana va Bhenjamini ka wontlhe matlhelo, hi mingango yabye.

21 A madhoropa ya lixaka la ka Bhenjamini hi mingango yabye ma wa hi lawa: Jeriko, ni Bhet-Hogla, ni Emeki-Keziza, 22 ni Bhet-Arabha,+ ni Zemarayime, ni Bheteli,+ 23 ni Avhima, ni Para, ni Ofra, 24 ni Kefar-Amonayi, ni Ofni, ni Gebha+ — 12 wa madhoropa ni maaldheya ya kona.

25 Gibheyoni,+ ni Rama, ni Bheerote, 26 ni Mizpa, ni Kefira, ni Moza, 27 ni Rekemu, ni Irpeeli, ni Tarala, 28 ni Zela,+ ni Elefa, ni Jebhusi, ku nga Jerusalema,+ ni Gibheya,+ ni Kiriyati — 14 wa madhoropa ni maaldheya ya kona.

Leyi yive tshomba ya vana va Bhenjamini, hi mingango yabye.

19 Makunu a hlolo ya wumbiri+ yi no khoma Simeyoni, a lixaka la ka Simeyoni+ hi mingango yabye. A tshomba yabye yi wa hi cikari ka tshomba ya Judha.+ 2 A tshomba yabye ku wa hi Bherexebha,+ ni Xebha, ni Moladha,+ 3 ni Hazar-Xuwale,+ ni Bhala, ni Ezema,+ 4 ni Eltoladhe,+ ni Bhetuli, ni Horma, 5 ni Ziklagi,+ ni Bhet-Markabhote, ni Hazar-Susa, 6 ni Bhet-Lebhayoti,+ ni Xaruheni — 13 wa madhoropa ni maaldheya ya kona; 7 Ayina, ni Rimoni, ni Etera, ni Axane+ — mune wa madhoropa ni maaldheya ya kona; 8 zvin’we ni maaldheya wontlhe lawa ma nga rendzelekele a madhoropa lawa kala Bhaalate-Bheeri, ku nga Rama wa le dzongeni. Leyi yive tshomba ya lixaka la ka Simeyoni, hi mingango yabye. 9 A tshomba ya vana va Simeyoni yi wa khemilwe ka ciavelo ca Judha, hakuva a cipandze ca Judha ci wa hi ca hombe nguvhu kabye. Hikwalaho, a vana va Simeyoni va no nyikwa cipandze cikari ka tshomba ya va ka Judha.+

10 Hi kulandzela, a hlolo ya wunharu+ yi no khoma a vana va Zebhuloni,+ hi mingango yabye, niku a mbhingano wa tshomba yabye wu wa famba kala Saridhe. 11 A mbhingano wabye wu wa kandziha wu cuwuka mupela-gambo kala Marala, wuba Dhabhexete wu famba kala nkoveni wu cuwukeneko ni Jokneyame. 12 A ku suka hi Saridhe wu wa famba wu kongoma mutsuwuka-gambo kala mbhinganweni wa Kisloti-Tabhora, wu hundza wuya Dhabherati+ wu gumesa wu kandziha kala Jafiya. 13 Hi laho, wu wa simama wu cuwuka mutsuwuka-gambo kala Gat-Heferi+ ni Et-Kazini, wu hundza wuya Rimoni wu gumesa wu simama kala Neya. 14 A mbhingano wu wa gi rendzeleka hi le n’walungu* wu famba kala Hanatoni wu ya mbhelela Nkoveni wa Ifta-Eli, 15 ni Katati, ni Nahalali, ni Ximroni,+ ni Idhala, ni Bhetlehema+ — 12 wa madhoropa ni maaldheya ya kona. 16 Leyi yive tshomba ya vana va Zebhuloni, hi mingango yabye.+ Lawa mave madhoropa ni maaldheya ya kona.

17 A hlolo ya wumune+ yi no khoma Isakari,+ a vana va Isakari, hi mingango yabye. 18 A mbhingano wabye wu wa famba kala Jezreeli,+ ni Kesuloti, ni Xunemu,+ 19 ni Hafarayime, ni Xiyoni, ni Anaharati, 20 ni Rabhiti, ni Kixiyoni, ni Ebhezi, 21 ni Remeti, ni En-Ganima,+ ni En-Hadha, ni Bhet-Pazeze. 22 A mbhingano wu wa chikela Tabhora,+ ni Xahazima, ni Bhet-Xemexe, wu ya mbhelela Jordhani — 16 wa madhoropa ni maaldheya ya kona. 23 Leyi yive tshomba ya lixaka la ka Isakari, hi mingango yabye,+ a madhoropa ni maaldheya ya kona.

24 Hi kulandzela, a hlolo ya wutlhanu+ yi no khoma a lixaka la ka Axeri,+ hi mingango yabye. 25 A mbhingano wabye ku wa hi Helkate,+ ni Hali, ni Bhetene, ni Akxafa, 26 ni Alameleki, ni Amadhi, ni Mixali. Hi tlhelo ga mupela-gambo, wu wa famba kala Karmeli+ ni Xihore-Libnati, 27 wu wa tlhela wu cuwuka mutsuwuka-gambo kala Bhet-Dhagoni, wuba Zebhuloni ni Nkova wa Ifta-Eli hi le n’walungu, wu famba kala Bhet-Emeka ni Neyeli wu gumesa wu simama kala Kabhule hi le cibhabheni, 28 ni kala Ebroni, ni Rehobha, ni Hamoni, ni Kana wu simama kala Sidhoni wa Hombe.+ 29 A mbhingano wu wa tlhela wuya Rama wu famba kala dhoropeni ga Tire gi vhikelweko khwatsi.+ A mbhingano wu wa tlhela hi ndzhako wuya Hosa, wu ya mbhelela bimbini cipandzeni ca Akzibha, 30 ni Uma, ni Afeka,+ ni Rehobha+ — 22 wa madhoropa ni maaldheya ya kona. 31 Leyi yive tshomba ya lixaka la ka Axeri, hi mingango yabye.+ Lawa mave madhoropa ni maaldheya ya kona.

32 A hlolo ya wu 6+ yi no khoma a vana va Naftali, va nga vana va Naftali hi mingango yabye. 33 A mbhingano wabye wu wa sukela Helefi, sinyeni ya hombe le Zaananime,+ wu hundza hi Adhami-Nekebha ni Jabneeli wu famba kala Lakuma wu ya mbhelela Jordhani. 34 A mbhingano wu wa tlhela wu cuwuka mupela-gambo kala Aznote-Tabhore. A ku suka hi laho, wu wa famba kala Hukoki, wu chikela ka Zebhuloni hi le dzongeni, ni ka Axeri hi le mupela-gambo, ni ka Judha le Jordhani, hi tlhelo ga mutsuwuka-gambo. 35 A madhoropa ma vhikelweko khwatsi mave Zidhima, ni Zera, ni Hamate,+ ni Rakati, ni Kinereta, 36 ni Adhama, ni Rama, ni Hazori,+ 37 ni Kedhexe,+ ni Edreyi, ni En-Hazora, 38 ni Ironi, ni Migdhal-Ela, ni Horema, ni Bhet-Anate, ni Bhet-Xemexe+ — 19 wa madhoropa ni maaldheya ya kona. 39 Leyi yive tshomba ya lixaka la ka Naftali, hi mingango yabye,+ a madhoropa ni maaldheya ya kona.

40 A hlolo ya wu 7+ yi no khoma a lixaka la ka Dhani,+ hi mingango yabye. 41 A mbhingano wa tshomba yabye ku wa hi Zora,+ ni Extawoli, ni Ir-Xemexe, 42 ni Xaalabhini,+ ni Ayijaloni,+ ni Ithla, 43 ni Eloni, ni Timna,+ ni Ekroni,+ 44 ni Elteke, ni Gibhetoni,+ ni Bhaalate, 45 ni Jehudha, ni Bhene-Bheraki, ni Gat-Rimoni,+ 46 ni Me-Jarkoni, ni Rakoni, a mbhingano na wu cuwukene ni Jopa.+ 47 Kanilezvi a cipandze ca va ka Dhani ci wa hi citsongwani nguvhu kabye.+ Hikwalaho, va no kandziha va yalwa ni Lexema+ va gi teka va tlhela va gi hlasela hi cipadha. Va no gi fumela va tshama ka gona, va cica a vito ga gona ga Lexema va gi chula ku Dhani, gi nga vito ga kokwani wabye Dhani.+ 48 Leyi yive tshomba ya lixaka la ka Dhani, hi mingango yabye. Lawa mave madhoropa ni maaldheya ya kona.

49 Hi ndlela leyo, va no mbheta ku pandzelela tiko kota tshomba hi zvipandze zva gona. Hi kulandzela, a vaIzrayeli va no mu nyika tshomba Joxuwa, a n’wana wa Nuni, cikari kabye. 50 Hi kulaya ka Jehovha, va no mu nyika a dhoropa legi a nga kombela, ku nga Timnati-Sera,+ tikweni ga zvitsunga ga Efrayime. I no aka dhoropa a ti tshamela ka gona.

51 Leti tive titshomba leti mupristi Eleyazari, na Joxuwa, a n’wana wa Nuni, ni tihloko ta tiyindlu ta vapapayi ta tixaka ta ka Izrayeli va nga avela+ hi tihlolo le Xilo+ mahlweni ka Jehovha, nyangweni ya tenda ga mutlhangano.+ Hi ndlela leyo, va no mbheta ku avelela tiko.

20 Makunu Jehovha i no byela Joxuwa, aku: 2 “Byela a vaIzrayeli, uku: ‘Ti hlawuleleni a madhoropa ya wuchavelo+ lawa ndzi wulawulileko ha wona na n’wina hi ku tirisa Mosi, 3 kasi ku loyi a dayako munhu hi kuphazama kutani hi mhango* a tsutsumela ka wona. Ma tava wuchavelo ga n’wina ka muphoteli wa nkhata.+ 4 I fanele ku tsutsumela ka gin’we ga madhoropa lawo,+ a ya yima nyangweni ya dhoropa+ a tlhamusela a mhaka yakwe tindleveni ta madhota ya dhoropa lego. Ma fanele ku mu amukela lomu dhoropeni ma mu nyika a wutshamu ga ku a hanya ka gona cikari kabye. 5 Loku a muphoteli wa nkhata a mu landza, va nga nyikeli a mudayi canjeni gakwe, hakuva a nga dayangi munhu-kuloni ha womu ne i wa nga mu vengi hi kale.+ 6 I fanele ku tshama dhoropeni lego kala a yima mahlweni ka hlengeletano a lamuliwa+ a tlhela a simama lomo kala kufa a mupristi wa hombe+ loyi a tirako ka masiku lawo. Andzhako ka lezvo, a mudayi a nga tlhelela dhoropeni legi a tsutsumileko hi ka gona niku a nga nghena dhoropeni gakwe ni ndlwini yakwe.’”+

7 Hikwalaho, va no hlawula* Kedhexe+ le Galileya, tikweni ga zvitsunga ga Naftali; na Xekemi,+ tikweni ga zvitsunga ga Efrayime; na Kiriyat-Arbha,+ ku nga Hebroni, tikweni ga zvitsunga ga Judha. 8 Cipandzeni ca Jordhani, mutsuwuka-gambo wa Jeriko, va no hlawula Bhezera,+ lomu ciwuleni, ka wutshamu go tlakuka ka lixaka la ka Rubheni; na Ramote+ le Gileyadhe, ka lixaka la ka Gadhi; na Golani+ le Bhaxani, ka lixaka la ka Manase.+

9 Lawa ma nova madhoropa lawa ma yimiselweko a vaIzrayeli vontlhe ni valuveli lava va nga hanya cikari kabye, kasi ni wihi loyi a nga daya munhu* hi kuphazama a tsutsumela ka wona+ kasi a nga dawi hi canja ga muphoteli wa nkhata, na a nga se yima mahlweni ka hlengeletano a lamuliwa.+

21 A tihloko ta tiyindlu ta vapapayi ta vaLevhi ti no tshinela ka mupristi Eleyazari,+ ni ka Joxuwa, a n’wana wa Nuni, ni ka tihloko ta tiyindlu ta vapapayi ta tixaka ta ka Izrayeli, 2 va ta wulawula navo le Xilo,+ tikweni ga Khanani, vaku: “Hi ku tirisa Mosi, Jehovha i leletele lezvaku hi nyikiwa madhoropa ya ku tshama ka wona zvin’we ni wuriselo ga zvifuyo zva hina.”+ 3 Hikwalaho, hi kulaya ka Jehovha, a vaIzrayeli va no nyika vaLevhi a madhoropa lawo+ ni wuriselo ga wona na va ma susa kwalomu tshombeni yabye.+

4 A hlolo yi no khoma a mingango ya va ka Kohate+ niku a vaLevhi lava va nga hi vana va mupristi Aroni va no nyikwa a 13 wa madhoropa na zvi kombiwa hi tihlolo, na ma huma hi ka lixaka la ka Judha,+ ni lixaka la ka Simeyoni,+ ni lixaka la ka Bhenjamini.+

5 A va ka Kohate lava van’wani va no amukela* a 10 wa madhoropa hi ka mingango ya lixaka la ka Efrayime,+ ni lixaka la ka Dhani, ni khihlanya ga lixaka la ka Manase.+

6 A va ka Gerxoni+ va no amukela a 13 wa madhoropa hi ka mingango ya lixaka la ka Isakari, ni lixaka la ka Axeri, ni lixaka la ka Naftali, ni khihlanya ga lixaka la ka Manase le Bhaxani.+

7 A va ka Merari,+ hi mingango yabye, va no amukela a 12 wa madhoropa hi ka lixaka la ka Rubheni, ni lixaka la ka Gadhi, ni lixaka la ka Zebhuloni.+

8 Hi ndlela leyo, a vaIzrayeli va no nyika vaLevhi a madhoropa lawo ni wuriselo ga wona na zvi kombiwa hi tihlolo, a ku khwatsi hi lezvi Jehovha a nga leletele hi ku tirisa Mosi.+

9 Hikwalaho, ka lixaka la ka Judha ni lixaka la ka Simeyoni, va no va nyika a madhoropa lawa ma kumbukiwako laha hi mavito;+ 10 ma no nyikelwa ka vana va Aroni va nga lumba a mingango ya va ka Kohate, va nga vaLevhi, hakuva kuve vona vo sangula ku khomiwa hi hlolo. 11 Va no va nyika Kiriyat-Arbha+ (Arbha i wa hi papayi wa Anake), ku nga Hebroni,+ tikweni ga zvitsunga ga ka Judha ni wuriselo ga kona legi gi nga gi randzele. 12 Kanilezvi a masimu ya dhoropa ni maaldheya ya kona va no nyika Kalebhi, a n’wana wa Jefune, kota tshomba yakwe.+

13 A vana va mupristi Aroni va no nyikwa a dhoropa ga wuchavelo ka mudayi,+ ku nga Hebroni+ ni wuriselo ga kona zvin’we ni Libna+ ni wuriselo ga kona, 14 ni Jatiri+ ni wuriselo ga kona, ni Extemowa+ ni wuriselo ga kona, 15 ni Holoni+ ni wuriselo ga kona, ni Dhebhira+ ni wuriselo ga kona, 16 ni Ayina+ ni wuriselo ga kona, ni Juta+ ni wuriselo ga kona, ni Bhet-Xemexe ni wuriselo ga kona — 9 wa madhoropa ma humako hi ka tixaka leti ta timbiri.

17 Ka lixaka la ka Bhenjamini: Gibheyoni+ ni wuriselo ga kona, ni Gebha ni wuriselo ga kona,+ 18 ni Anatote+ ni wuriselo ga kona, ni Almoni ni wuriselo ga kona — mune wa madhoropa.

19 A madhoropa wontlhe ma nga nyikwa a vana va Aroni, va nga vapristi, ma wa hi 13 wa madhoropa ni wuriselo ga wona.+

20 A mingango leyi yin’wani ya va ka Kohate cikari ka vaLevhi yi no nyikiwa madhoropa hi lixaka la ka Efrayime, na zvi kombiwa hi tihlolo. 21 Va no va nyika a dhoropa ga wuchavelo ka mudayi,+ ku nga Xekemi+ ni wuriselo ga kona, tikweni ga zvitsunga ga ka Efrayime, ni Gezera+ ni wuriselo ga kona, 22 ni Kibzayime ni wuriselo ga kona, ni Bhet-Horoni+ ni wuriselo ga kona — mune wa madhoropa.

23 Ka lixaka la ka Dhani: Elteke ni wuriselo ga kona, ni Gibhetoni ni wuriselo ga kona, 24 ni Ayijaloni+ ni wuriselo ga kona, ni Gat-Rimoni ni wuriselo ga kona — mune wa madhoropa.

25 Ka khihlanya ga lixaka la ka Manase: Taanaka+ ni wuriselo ga kona, ni Gat-Rimoni ni wuriselo ga kona — madhoropa mambiri.

26 A madhoropa wontlhe ni wuriselo ga wona lawa a mingango leyi yin’wani ya va ka Kohate yi nga amukela ma wa hi 10.

27 A va ka Gerxoni,+ va nga va mingango ya ka Levhi, va no amukela hi ka khihlanya ga lixaka la ka Manase a dhoropa ga wuchavelo ka mudayi, ku nga Golani,+ le Bhaxani, ni wuriselo ga kona, ni Bhexetera ni wuriselo ga kona — madhoropa mambiri.

28 Hi ka lixaka la ka Isakari:+ Kixiyoni ni wuriselo ga kona, ni Dhabherati+ ni wuriselo ga kona, 29 ni Jarmute ni wuriselo ga kona, ni En-Ganima ni wuriselo ga kona — mune wa madhoropa.

30 Hi ka lixaka la ka Axeri:+ Mixali ni wuriselo ga kona, ni Abdhoni ni wuriselo ga kona, 31 ni Helkate+ ni wuriselo ga kona, ni Rehobha+ ni wuriselo ga kona — mune wa madhoropa.

32 Hi ka lixaka la ka Naftali: A dhoropa ga wuchavelo+ ka mudayi, ku nga Kedhexe+ le Galileya ni wuriselo ga kona, ni Hamoti-Dhora ni wuriselo ga kona, ni Kartani ni wuriselo ga kona — madhoropa manharu.

33 A madhoropa wontlhe ya va ka Gerxoni hi mingango yabye ma wa hi 13 wa madhoropa ni wuriselo ga wona.

34 A mingango ya va ka Merari,+ va nga vaLevhi lava van’wani, va no amukela hi ka lixaka la ka Zebhuloni:+ Jokneyame+ ni wuriselo ga kona, ni Karta ni wuriselo ga kona, 35 ni Dhimna ni wuriselo ga kona, ni Nahalali+ ni wuriselo ga kona — mune wa madhoropa.

36 Hi ka lixaka la ka Rubheni: Bhezera+ ni wuriselo ga kona, ni Jahaza ni wuriselo ga kona,+ 37 ni Kedhemote ni wuriselo ga kona, ni Mefaate ni wuriselo ga kona — mune wa madhoropa.

38 Hi ka lixaka la ka Gadhi:+ A dhoropa ga wuchavelo ka mudayi, ku nga Ramote le Gileyadhe+ ni wuriselo ga kona, ni Mahanayime+ ni wuriselo ga kona, 39 ni Hexbhoni+ ni wuriselo ga kona, ni Jazera+ ni wuriselo ga kona — wontlhe ma wa hi mune wa madhoropa.

40 A madhoropa wontlhe ma nga nyikiwa a va ka Merari hi mingango yabye, yi nga mingango leyi yin’wani ya vaLevhi, ma wa hi 12 wa madhoropa.

41 A madhoropa wontlhe lawa a vaLevhi va nga amukela lomu tshombeni ya vaIzrayeli ma wa hi 48 zvin’we ni wuriselo ga wona.+ 42 A gin’we ni gin’we ga madhoropa lawa gi wa hi ni wuriselo gi nga gi rendzelekele — hi lezvi a madhoropa lawa wontlhe ma nga tshamisile zvona.

43 Hi ndlela leyo, Jehovha i no nyika Izrayeli gontlhe a tiko legi a nga hlambanyile ku nyika vakokwani vabye;+ va no gi fumela va tshama ka gona.+ 44 Ahandle ka lezvo, Jehovha i no va nyika kuhumula matlhelweni wontlhe, a ku khwatsi hi lezvi a nga hlambanyile ka vakokwani vabye.+ I hava ni mun’we ka valala vabye vontlhe a nga tiya ku yima mahlweni kabye.+ Jehovha i no nyikela valala vabye vontlhe canjeni gabye.+ 45 Ka zvitsumbiso zvontlhe zva zvinene lezvi Jehovha a tsumbisileko a yindlu ya Izrayeli, ci hava ci wileko hasi; zvontlhe zvi tatisekile.+

22 Makunu Joxuwa i no vitana a va ka Rubheni, ni va ka Gadhi, ni khihlanya ga lixaka la ka Manase 2 a ta va byela lezvi: “Mu mahile zvontlhe lezvi Mosi, a nandza ga Jehovha, a mu leleteleko+ mu tlhela mu ingisa a gezu ga mina ka zvontlhe lezvi ndzi mu leleteleko.+ 3 A mu tsikangi a vamakabye va n’wina ka contlhe a cikhati leci, kala ni nyamutlha lezvi;+ mu hlayisile a cileletelo ca Jehovha, a Nungungulu wa n’wina.+ 4 Makunu Jehovha, a Nungungulu wa n’wina, i va nyikile kuhumula a vamakabye va n’wina, kota lezvi a va tsumbisileko.+ Hikwalaho, mu nga tlhela matendeni ya n’wina tikweni legi Mosi, a nandza ga Jehovha, a mu nyikileko ku gi fumela tlhelweni legi gin’wani* ga Jordhani.+ 5 Ntsena lezvaku ci hlayiseni khwatsi a cileletelo ni Nayo lowu Mosi, a nandza ga Jehovha, a mu nyikileko,+ hi ku randza Jehovha, a Nungungulu wa n’wina,+ mu famba tindleleni takwe tontlhe,+ mu hlayisa a zvileletelo zvakwe,+ mu namarela kakwe+ ni ku mu tirela+ hi mbilu ya n’wina yontlhe ni muhefemulo* wa n’wina wontlhe.”+

6 Hi kulandzela, Joxuwa i no va katekisa a va tsika va famba, niku va no ti fambela matendeni yabye. 7 A khihlanya ga lixaka la ka Manase, Mosi i wa gi nyikile tshomba le Bhaxani+ niku a khihlanya legi gin’wani ga lixaka leli, Joxuwa i no gi nyika tiko tlhelweni ga mupela-gambo wa Jordhani+ zvin’we ni vamakabye vabye. Ahandle ka lezvo, laha Joxuwa a nga va tsika va famba matendeni yabye i no va katekisa, 8 aku: “Tlhelani matendeni ya n’wina ni titshomba to tala, ni zvifuyo zvo tala nguvhu, ni prata ni ouro, ni kobre ni simbi, ni tinguwo ta talela ga cima.+ Avelanani ni vamakabye va n’wina a muphango+ lowu mu wu tekileko ka valala va n’wina.”

9 Andzhako ka lezvo, a va ka Rubheni, ni va ka Gadhi ni khihlanya ga lixaka la ka Manase va no suka ka vaIzrayeli lava van’wani, va suka Xilo tikweni ga Khanani, va tlhela tikweni ga Gileyadhe,+ gi nga tiko legi va gi amukeleko kasi va gi fumela ni ku tshama ka gona, hi ku landza a cileletelo ca Jehovha leci a va nyikileko hi ku tirisa Mosi.+ 10 A cikhati leci va nga chikela cipandzeni ca Jordhani, tikweni ga Khanani, a va ka Rubheni, ni va ka Gadhi, ni khihlanya ga lixaka la ka Manase va no aka alati ka wutshamu lego mbhirini ya Jordhani, a alati ga hombe ni go koka kupima. 11 Hi kufamba ka cikhati, a vaIzrayeli lava van’wani va nozwa+ ku: “A va ka Rubheni, ni va ka Gadhi, ni khihlanya ga lixaka la ka Manase va akile alati mbhinganweni wa tiko ga Khanani cipandzeni ca Jordhani, tlhelweni legi gi lumbako a vaIzrayeli.” 12 Laha a va ka Izrayeli va ngazwa lezvo, a hlengeletano yontlhe ya va ka Izrayeli yi no tsombana le Xilo+ kasi ku yalwa navo.

13 Hi kulandzela, a va ka Izrayeli va no rumela Fineyasi,+ a n’wana wa mupristi Eleyazari, aya ka va ka Rubheni, ni ka va ka Gadhi, ni ka khihlanya ga lixaka la ka Manase tikweni ga Gileyadhe. 14 I no famba zvin’we ni 10 wa tihosana, hosana yin’we ka yindlu yin’we ni yin’wani ya vapapayi ka tontlhe a tixaka ta ka Izrayeli, a mun’we ni mun’wani na a hi hloko ya yindlu ya vapapayi vakwe cikari ka makume ya mazana ya Izrayeli.+ 15 Laha va nga chikela ka va ka Rubheni, ni ka va ka Gadhi, ni ka khihlanya ga lixaka la ka Manase tikweni ga Gileyadhe, va te ngalo kabye:

16 “A hlengeletano yontlhe ya Jehovha yi ngalo: ‘Hikuyini mu mahileko a zvilo lezvi zva kungatsumbeki+ mu vhukela a Nungungulu wa Izrayeli ke? Nyamutlha mu tsikile a ku landzela Jehovha hi ku ti akela alati ni ku hluwukela Jehovha.+ 17 Xana a cihoxo leci hi mahileko le Peyori citsongwani ke? A hi se ti basisa ka cona kala ni nyamutlha lezvi, hambu lezvi a khombo gi weleko a hlengeletano ya Jehovha.+ 18 Makunu lezvi mu lava ku tsika a ku landzela Jehovha! Loku nyamutlha mu hluwukela Jehovha, a mandziko i ta zangarela a hlengeletano yontlhe ya ka Izrayeli.+ 19 Loku ku hi lezvaku a tiko legi gi nga tshomba ya n’wina a gi hlazvekangi, tlhatukani muta tikweni ga tshomba ya Jehovha,+ lomu a tabhernakeli ga Jehovha gi tshamako kona,+ mu ta aka cikari ka hina, kanilezvi mu nga hluwukeli Jehovha ne mu nga hi mahi vahluwuki hi ku ti akela gin’wani alati ahandle ka alati ga Jehovha, a Nungungulu wa hina.+ 20 A cikhati leci Akana,+ a n’wana wa Zera, a nga maha zvilo zva kungatsumbeki xungetano hi lezvi zvi nga konelwe kuloviswa, xana a zanga a yi welangi a hlengeletano yontlhe ya ka Izrayeli ke?+ Phela a hi yena yece a ngafa hi kota ya cihoxo cakwe.’”+

21 Laha va ngazwa lezvo, a va ka Rubheni, ni va ka Gadhi, ni khihlanya ga lixaka la ka Manase va no hlamula a tihloko ta makume ya mazana ya va ka Izrayeli, vaku:+ 22 “Jehovha, a Nungungulu wa vanungungulu! Jehovha,+ a Nungungulu wa vanungungulu! Wa zvi tiva niku Izrayeli yenawu i ta zvi tiva. Loku ku hi lezvaku hi no hluwuka hi tlhela hi nga tsumbeki ka Jehovha, mu nga hi nyenyeleti ka siku legi. 23 Loku ku hi lezvaku hi ti akele alati hi ku fela ku tsika ku landzela Jehovha ni ku nyikela minyikelo ya kuhiswa, ni minyikelo ya tindzhoho, ni miphahlo ya kuhlengela hehla ka gona, Jehovha i ta hi tsayisa.+ 24 Kanilezvi hi zvi mahile hi ku chava zvilo zvin’wani, hakuva hi waku: ‘Cikhatini ci tako, a vana va n’wina va ta byela a vana va hina, vaku: “N’wina mu nghena kwihi ka Jehovha, a Nungungulu wa Izrayeli ke? 25 Jehovha i vekile Jordhani kota mbhingano cikari ka hina na n’wina va ka Rubheni ni va ka Gadhi. A mu na ciavelo ka Jehovha.” A vana va n’wina va ta betela a vana va hina a ku khozela* Jehovha.’

26 “Hikwalaho, hi te: ‘A hi akeni alati, na gi nga hi ga minyikelo ya kuhiswa kutani miphahlo, 27 kanilezvi kasi giva kustumunyu cikari ka n’wina na hina+ ni vana* va hina andzhako ka hina, ga lezvaku hi ta maha ntiro wa hina ka Jehovha mahlweni kakwe hi minyikelo ya hina ya kuhiswa, ni miphahlo ya hina, ni miphahlo ya kuhlengela,+ kasi cikhatini ci tako, a vana va n’wina va nga byeli a vana va hina, vaku: “A mu na ciavelo ka Jehovha.”’ 28 Hikwalaho, hi te: ‘Loku vo tshuka va wula lezvo ka hina ni ka vana* va hina cikhatini ci tako, hina hi taku: “Wonani a cifananiso* ca alati ga Jehovha leci a vakokwani va hina va mahileko, na ci nga hi ca minyikelo ya kuhiswa kutani miphahlo, kanilezvi kasi civa kustumunyu cikari ka hina na n’wina.”’ 29 A zvive kule na hina a ku hluwukela Jehovha ni ku tsika a ku landzela Jehovha+ nyamutlha hi ku aka alati ga minyikelo ya kuhiswa, ni minyikelo ya tindzhoho, ni miphahlo, ahandle ka alati ga Jehovha, a Nungungulu wa hina, legi gi nga mahlweni ka tabhernakeli gakwe!”+

30 Laha mupristi Fineyasi, ni tihosana ta hlengeletano, ni tihloko ta makume ya mazana ya ka Izrayeli lava va nga hi naye va ngazwa a timhaka leti a vana va Rubheni, ni va Gadhi ni va Manase va nga wula, va no xalala.+ 31 Hikwalaho, Fineyasi, a n’wana wa mupristi Eleyazari, i no byela a vana va Rubheni, ni va Gadhi, ni va Manase, aku: “Nyamutlha ha zvi tiva lezvaku Jehovha i cikari ka hina, hakuva a mu mahangi nchumu wu kombisako kungatsumbeki mahlweni ka Jehovha. Makunu mu ponisile a vaIzrayeli canjeni ga Jehovha.”

32 Andzhako ka lezvo, Fineyasi, a n’wana wa mupristi Eleyazari, ni tihosana va no suka hi ka va ka Rubheni ni va ka Gadhi a tikweni ga Gileyadhe va tlhela tikweni ga Khanani; va no tlhela ni mubiko ka vaIzrayeli lava van’wani. 33 A vaIzrayeli va no xalala hi mubiko lowo. Hi kulandzela, a vaIzrayeli va no dhumisa Nungungulu niku a va ha wulangi nchumu xungetano hi kuya va yalwa ni va ka Rubheni ni va ka Gadhi kasi ku lovisa a tiko legi va nga tshama ka gona.

34 Hikwalaho, a va ka Rubheni ni va ka Gadhi va no gi chula vito a alati,* hakuva “i kustumunyu cikari ka hina wa lezvaku Jehovha i Nungungulu wa lisine”.

23 Andzhako ka masiku yo tala Jehovha na a nyikile Izrayeli a kuhumula+ ka vontlhe a valala lava va nga hi matlhelweni yakwe, laha Joxuwa a nga khosahele na a hi ni malembe yo tala,+ 2 Joxuwa i no vitanisa a vaIzrayeli vontlhe,+ ni madhota yabye, ni tihloko tabye, ni valamuli vabye ni tihosana tabye,+ a taku kabye: “Makunu ndzi khosahele niku ndzi na ni malembe yo tala. 3 Mu zvi wonile ha n’wece zvontlhe lezvi Jehovha, a Nungungulu wa n’wina, a nga maha ka wontlhe matiko lawa hi kota ya n’wina, hakuva Jehovha, a Nungungulu wa n’wina, hi yena a nga kari a mu lwela.+ 4 Ma zvi wona, ndzi mu avele hi tihlolo+ a matiko lawa ma seleko kota tshomba ya tixaka ta n’wina,+ zvin’we ni wontlhe a matiko lawa ndzi ma lovisileko,+ kusukela Jordhani kala Bimbini ga Hombe,* hi le mupela-gambo. 5 Ni lezvaku kuve Jehovha, a Nungungulu wa n’wina, loyi a nga simama ku va hlongola mahlweni ka n’wina,+ a va yisa kule hi kota ya n’wina, n’wina mu teka a tiko gabye kota tshomba, a ku khwatsi hi lezvi Jehovha, a Nungungulu wa n’wina, a mu tsumbisileko.+

6 “Hikwalaho, mu fanele ku tiya nguvhu hlanha kasi mu ingisa ni ku hlayisa a timhaka tontlhe leti ti tsalilweko bhukwini ga Nayo+ wa Mosi, hi ku nga tshuki mu hambuka ka wona muya cineneni kutani cibhabheni+ 7 ni ku nga tshuki mu ti patsa ni matiko+ lawa ma seleko cikari ka n’wina. Ne mu nga tshuki mu kumbuka a mavito ya vanungungulu vabye+ ne ku hlambanya hi wona; mu nga tshuki mu va tirela ne ku va khizamela.+ 8 Kanilezvi namarelani ka Jehovha, a Nungungulu wa n’wina,+ a ku khwatsi hi lezvi mu mahako kala ni nyamutlha lezvi. 9 Jehovha i ta hlongola a matiko ya hombe ni ya ntamu mahlweni ka n’wina,+ hakuva i hava a zvi kotileko a ku yima mahlweni ka n’wina kala ni nyamutlha lezvi.+ 10 A wanuna mun’we basi wa ka n’wina i ta hlongola a 1000,+ hakuva Jehovha, a Nungungulu wa n’wina, wa mu lwela,+ a ku khwatsi hi lezvi a mu tsumbisileko.+ 11 Hikwalaho, tlharihani contlhe cikhati+ hi ku randza Jehovha, a Nungungulu wa n’wina.+

12 “Kanilezvi loku mu tlhelela ndzhako, mu namarela ka matiko lawa ma ha seleko+ cikari ka n’wina mu maha nawo a wuxaka ga ku tekana*+ mu tlhela mu ti patsa nawo, wonawu ma ti patsa na n’wina, 13 zvi tiveni lezvaku Jehovha, a Nungungulu wa n’wina, a nga ta simama ku mu hlongolela a matiko lawo.+ Ma tava ntlhamu, ni lizinga, ni limhika mihlanheni ya n’wina,+ ni mimizwa matihlweni ya n’wina kala mu lova tikweni legi ga ginene legi Jehovha, a Nungungulu wa n’wina, a mu nyikako.

14 “Kota lezvi mu zvi wonako, ndzi laha kusuhani ni kufa;* ma zvi tiva khwatsi hi mbilu ya n’wina yontlhe ni muhefemulo* wa n’wina wontlhe lezvaku a ku na gezu ni gin’we ka zvontlhe a zvitsumbiso zva zvinene lezvi Jehovha, a Nungungulu wa n’wina, a mu tsumbisileko gi wileko hasi. Wontlhe ma tatisekile ka n’wina. A ku na gezu ni gin’we ka wona gi wileko hasi.+ 15 Kanilezvi a ku khwatsi hi lezvi a zvitsumbiso zvontlhe zva zvinene lezvi Jehovha, a Nungungulu wa n’wina, a mu tsumbisileko zvi nga tatiseka ka n’wina,+ hi zvalezvo, Jehovha i ta neha hehla ka n’wina a makhombo wontlhe lawa a tsumbisileko niku i ta mu hihirita ka tiko legi ga ginene legi Jehovha, a Nungungulu wa n’wina, a mu nyikileko.+ 16 Loku mu hambunyeta a civhumelwano ca Jehovha, a Nungungulu wa n’wina, leci a mu layileko lezvaku mu ci hlayisa, ni loku mu ya tirela a van’wani vanungungulu, mu va khizamela, a zanga ya Jehovha yi ta vhura hehla ka n’wina+ niku mu ta lova hi kuhatlisa tikweni ga ginene legi a mu nyikileko.”+

24 Joxuwa i no tsombanisa a tixaka tontlhe ta ka Izrayeli le Xekemi a tlhela a vitanisa a madhota ya ka Izrayeli, ni tihloko tabye, ni valamuli vabye ni tihosana tabye+ va ta yima mahlweni ka Nungungulu wa lisine. 2 Joxuwa i no byela a vanhu vontlhe, aku: “Lezvi hi lezvi Jehovha, a Nungungulu wa Izrayeli, a wulako: ‘A vakokwani va n’wina,+ a ku patsa na Tera, a papayi wa Abrahama ni papayi wa Nahori, a kaleloko+ va wa hanya tlhelweni legi gin’wani ga Congo,* niku va wa tirela van’wani vanungungulu.+

3 “‘Hi kufamba ka cikhati, ndzi no teka kokwani wa n’wina, Abrahama,+ tlhelweni legi gin’wani ga Congo* ndzi mu fambafambisa tikweni gontlhe ga Khanani ndzi tlhela ndzi andzisa a pswalo* wakwe.+ Ndzi no mu nyika Isaka;+ 4 Isaka ndzi no mu nyika Jakobe na Esawu.+ Andzhako ka cikhati, Esawu ndzi no mu nyika Citsunga ca Seyire kota tshomba yakwe;+ Jakobe ni vana vakwe va no relela vaya Gibhite.+ 5 Hi kufamba ka cikhati, ndzi no rumela Mosi na Aroni,+ niku ndzi noba Gibhite hi lezvi ndzi zvi mahileko cikari kabye+ ndzi gumesa ndzi mu humesa. 6 A cikhati leci ndzi nga kari ndzi humesa a vapapayi va n’wina hi Gibhite+ mu kala mu chikela bimbini, a vaGibhite va wo landza vapapayi va n’wina hi le ndzhako na va hi ni tikareta ta yimpi ni vakhileli va mahaxi kala Bimbini go Pswhuka.+ 7 Va no sangula ku rila ka Jehovha;+ hikwalaho i no veka munyama cikari ka n’wina ni vaGibhite a neha bimbi hehla kabye gi ta va fenengeta,+ niku a mahlo ya n’wina ma zvi wonile lezvi ndzi nga maha Gibhite.+ Andzhako ka lezvo, mu no hanya malembe* yo tala lomu ciwuleni.+

8 “‘Ndzi no mu neha tikweni ga vaAmori lava va hanyako tlhelweni legi gin’wani* ga Jordhani, niku vona va nolwa na n’wina.+ Kanilezvi ndzi no va nyikela canjeni ga n’wina kasi mu teka a tiko gabye, ndzi va lovisa mahlweni ka n’wina.+ 9 Makunu Bhalaki, a n’wana wa Zipore, a hosi ya Mowabhi, i no suka alwa na Izrayeli. Hikwalaho, i no vitanisa Bhalami, a n’wana wa Bheyori, kasi ku ta mu rukatela.+ 10 Kanilezvi a ndzi mu ingisangi Bhalami.+ Hikwalaho, i no mu katekisa hi kuphindaphinda,+ mina ndzi mu tlhatlhisa canjeni gakwe.+

11 “‘Hi kulandzela, mu no tlhatuka Jordhani+ mu chikela Jeriko.+ Makunu a varangeli* va Jeriko, ni vaAmori, ni vaPerezi, ni vaKhanani, ni vaHiti, ni vaGirgaxi, ni vaHivhi, ni vaJebhusi va nolwa na n’wina, kanilezvi mina ndzi no va nyikela canjeni ga n’wina.+ 12 Hikwalaho, ndzi no rumela a gome* mahlweni ka n’wina, gi va hlongola mahlweni ka n’wina+ — a ku patsa ni tihosi timbiri ta vaAmori. A ku vangi hi cipadha ca n’wina ne hi wura ga n’wina.+ 13 Hi ndlela leyo, ndzi no mu nyika tiko legi mu nga gi tirelangiko ni madhoropa ya ku a hi n’wina mu nga aka,+ niku mu no tshama ka wona. Muga mihandzu ya zvivhina* ni ya miolivha ya ku a hi n’wina mu nga byala.’+

14 “Hikwalaho, chavani Jehovha mu mu tirela hi kutsumbeka ni lisine,+ mu susa a vanungungulu lava a vakokwani va n’wina va nga va tirela tlhelweni legi gin’wani ga Congo* ni le Gibhite,+ mu tirela Jehovha. 15 Loku zvi woneka na zvi bihile mahlweni ka n’wina a ku tirela Jehovha, hlawulani ha n’wece nyamutlha loyi mu to mu tirela,+ kani vanungungulu lava a vakokwani va n’wina va nga va tirela tlhelweni legi gin’wani ga Congo*+ kutani vanungungulu va vaAmori lava mu hanyako tikweni gabye.+ Kanilezvi mina ni ngango wa mina, hi ta tirela Jehovha.”

16 Laha a vanhu va ngazwa lezvo, va no hlamula vaku: “A zvive kule na hina a ku tsika Jehovha hi tirela van’wani vanungungulu. 17 Hi Jehovha, a Nungungulu wa hina, loyi a nga humesa hina ni vapapayi va hina tikweni ga Gibhite,+ hi ndlwini ya wukhumbi,+ loyi a nga maha zviwoniso lezvi zva hombe matihlweni ya hina+ a tlhela a simama ku hi vhikela ndleleni yontlhe leyi hi fambileko ka yona ni ka matiko wontlhe lawa hi hundzileko hi ka wona.+ 18 Jehovha i hlongolile a matiko wontlhe a ku patsa ni vaAmori lava va nga hanya tikweni legi mahlweni ka hina. Hikwalaho, hinawu hi ta tirela Jehovha, hakuva hi yena Nungungulu wa hina.”

19 Hi kulandzela, Joxuwa i no byela vanhu, aku: “Mu nga ta zvi kota ku tirela Jehovha, hakuva i Nungungulu a basileko;+ i Nungungulu loyi a londzako ku khozelwa yece.+ A nga ta tsetselela a zvihambunyeto* zva n’wina ni zviwonho zva n’wina.+ 20 Loku mu tsika Jehovha mu tirela vanungungulu va vamatiko, yenawu i ta mu jikela a mu lovisa andzhako ka ku mu mahela a zvilo lezvi zva zvinene.”+

21 Kanilezvi a vanhu va no byela Joxuwa, vaku: “Ahihi, hina hi ta tirela Jehovha!”+ 22 Joxuwa i no byela vanhu, aku: “Mu vakustumunyu ha n’wece va lezvaku mu hlawulile a ku tirela Jehovha.”+ Vona vaku: “Hi vakustumunyu.”

23 “Hikwalaho, susani a vanungungulu va vamatiko lava va nga cikari ka n’wina, mu nyikela timbilu ta n’wina ka Jehovha, a Nungungulu wa Izrayeli.” 24 A vanhu va no byela Joxuwa, vaku: “Hi ta tirela Jehovha, a Nungungulu wa hina, niku hi ta ingisa a gezu gakwe!”

25 Hikwalaho, Joxuwa i no maha civhumelwano ni vanhu ka siku lego a tlhela a va yimisela cileletelo ni nayo, le Xekemi. 26 Hi kulandzela, Joxuwa i no tsala timhaka leti bhukwini ga Nayo wa Nungungulu,+ a teka ribye ga hombe+ a gi yimisa lahasi ka sinya ya hombe yi nga kusuhani ni wutshamu go basa ga Jehovha.

27 Joxuwa i no simama ku wulawula ni vanhu, aku: “A ribye legi gi tava kustumunyu wa ku hi vhukela,+ hakuva gi zwile zvontlhe lezvi Jehovha a nga hi byela niku gi tava kustumunyu wa ku mu vhukela kasi mu nga ali a Nungungulu wa n’wina.” 28 Hi ndlela leyo, Joxuwa i no tlhatlha vanhu va famba, a mun’we ni mun’wani a ti yela tshombeni yakwe.+

29 Andzhako ka zvilo lezvi, Joxuwa, a n’wana wa Nuni tlhelo nandza ga Jehovha, i nofa na a hi ni 110 wa malembe.+ 30 Va no mu lahla lomu tikweni legi gi nga hi tshomba yakwe le Timnati-Sera,+ gi nga tikweni ga zvitsunga ga Efrayime, hi tlhelo ga n’walungu ga Citsunga ca Gaaxa. 31 Izrayeli i no simama ku tirela Jehovha masikwini wontlhe ya Joxuwa ni masikwini wontlhe ya madhota lawa ma nga sala ma hanya Joxuwa na a file, lawa ma nga tivile a mitiro yontlhe leyi Jehovha a nga mahele Izrayeli.+

32 A marambu ya Josefa,+ lawa a vaIzrayeli va nga humile nawo hi Gibhite, ma no lahliwa ka cipandze ca simu leci Jakobe a nga xavile ka vana va Hamori,+ a papayi wa Xekemi, hi 100 wa zvipandze zva mali;+ ci nova tshomba ya vana va Josefa.+

33 Eleyazari, a n’wana wa Aroni, yenawu i nofa.+ Hikwalaho, va no mu lahla ka Citsungana ca n’wana wakwe Fineyasi,+ leci a nga nyikilwe tikweni ga zvitsunga ga Efrayime.