VALAMULI

1 Laha Joxuwa a ngafa,+ a vaIzrayeli* va no wutisa Jehovha,+ vaku: “Himani cikari ka hina a to ranga hi yena a kandziha a yalwa ni vaKhanani ke?” 2 Jehovha a hlamula, aku: “Hi Judha a to kandziha.+ Ndza nyikela* tiko canjeni gakwe.” 3 Makunu Judha i no byela makabye wakwe Simeyoni, aku: “A hi kandzihe hontlhe ka cipandze leci ndzi pandzelweko+ hi yalwa ni vaKhanani. Minawu ndzi ta famba na wena ka cipandze leci u pandzelweko.” Hikwalaho, Simeyoni i no famba naye.

4 A cikhati leci Judha a nga kandziha, Jehovha i no nyikela a vaKhanani ni vaPerezi mandleni yabye,+ va hlula a 10 000 wa vavanuna le Bhezeki. 5 Va no kuma Adhoni-Bhezeki, le Bhezeki, valwa naye, va hlula a vaKhanani+ ni vaPerezi.+ 6 Laha Adhoni-Bhezeki a nga tsutsuma, va no mu hlongolisela va mu khoma va mu tsema a tikhudzu ta mandla ni ta mikondzo. 7 Makunu Adhoni-Bhezeki i te: “Ku na ni 70 wa tihosi ti nga tsemiwa a tikhudzu ta mandla ni ta mikondzo leti ti rolelako matlhatlha lahasi ka meza ya mina. Hikwalaho, Nungungulu i ndzi tlhelisele hi kuya hi lezvi ndzi nga maha.” Andzhako ka lezvo, va no mu yisa Jerusalema,+ niku i no ya fela seyo.

8 Ahandle ka lezvo, a vavanuna va ka Judha va nolwa ni Jerusalema va gi hlula,+ va hihirita a vahanyi va gona hi cipadha, va gumesa va gi hisa. 9 Andzhako ka lezvo, a vavanuna va ka Judha va no relela va yalwa ni vaKhanani va nga tshama tikweni ga zvitsunga, ni le Negebhe, ni le Xefela.+ 10 Hikwalaho, a va ka Judha va noya va yalwa ni vaKhanani lava va nga tshama Hebroni (a kale Hebroni i wa vitaniwa ku Kiriyat-Arbha), va daya Xexayi, na Ahimani, na Talmayi.+

11 Va no suka hi laho va yalwa ni vahanyi va Dhebhira.+ (A kale Dhebhira i wa vitaniwa ku Kiriyat-Seferi.)+ 12 Makunu Kalebhi+ i te: “A wanuna loyi a to hlula a dhoropa ga Kiriyat-Seferi, a gi teka, ndzi ta mu nyika a nhanyana wa mina, Aksa, ava sati wakwe.”+ 13 Otniyeli,+ a n’wana wa Kenazi,+ a ndzisana ya Kalebhi, i no gi teka. Hikwalaho, i no mu nyika a nhanyana wakwe, Aksa, ava sati wakwe. 14 A cikhati leci a ngaya kaya, i no kurumeta a nuna wakwe lezvaku a kombela simu ka papayi wakwe. Makunu Aksa i no chika mbongoleni yakwe,* Kalebhi a mu wutisa, aku: “U lava yini?” 15 Yena aku: “Ndzi kombela cikatekiso, hakuva u ndzi nyikile petso le dzongeni;* ndzi nyike kambe ni Gulote-Mayime.”* Hikwalaho, Kalebhi i no mu nyika Gulote wa le Tsungeni ni Gulote wa le Ndzhelelweni.

16 A vana va muKeni,+ a bava wa Mosi,+ va no kandziha hi dhoropeni ga micindzu+ ni vanhu va ka Judha vaya ciwuleni ca Judha, dzongeni* wa Aradhe.+ Va noya seyo va ya aka cikari ka vanhu.+ 17 Kanilezvi Judha ni makabye wakwe Simeyoni va noya va yalwa ni vaKhanani va nga hanya Zefate, va va lovisa va ku bhi.+ Hikwalaho, va no chula dhoropa lego ku i Horma.*+ 18 Andzhako ka lezvo, Judha i no hlula Gaza,+ ni Axkeloni,+ ni Ekroni,+ ni zvitikwana zva kona. 19 Jehovha i wa hi zvin’we na Judha; a va ka Judha va no teka a tiko ga zvitsunga giva tshomba yabye, kanilezvi a va zvi kotangi a ku hlongola a vahanyi va le nkoveni hakuva va wa hi ni tikareta ta yimpi ti nga hi ni masikela* ya simbi.*+ 20 Va no nyikela Hebroni ka Kalebhi kota lezvi Mosi a nga tsumbisile.+ Kalebhi i no hlongola a vana vanharu va Anake+ va nga tshama lomo.

21 Kanilezvi a va ka Bhenjamini a va hlongolangi a vaJebhusi lava va nga tshama Jerusalema, hikwalaho, a vaJebhusi va ha tshama le Jerusalema ni va ka Bhenjamini kala ni nyamutlha.+

22 Ka cikhati caleco, a yindlu ya ka Josefa+ yi no kandziha yi yalwa ni Bheteli, niku Jehovha i wa hi zvin’we navo.+ 23 A yindlu ya ka Josefa yi wa kari yi piyara a Bheteli (a kale a dhoropa legi gi wa vitaniwa ku Luza).+ 24 A zvipiyawu zvi no wona wanuna na a huma hi lomu dhoropeni, zviku kakwe: “Hi nga hi komba a ndlela ya ku nghena lomu dhoropeni, hi ta ku mahela wunene.”* 25 A wanuna loye i no va komba ndlela ya ku nghena lomu dhoropeni. Va no hihirita a dhoropa hi cipadha, kanilezvi va no tsika a wanuna loye a famba ni ngango wakwe wontlhe.+ 26 A wanuna loye i noya tikweni ga vaHiti a ya aka a dhoropa, a gi chula ku Luza; kala nyamutlha ga ha vitanisiwa lezvo.

27 Manase a nga hlongolangi a vahanyi va Bhet-Xeyani ni zvidhoropana zva kona, ni vahanyi va Taanaka+ ni zvidhoropana zva kona, ni vahanyi va Dhora ni zvidhoropana zva kona, ni vahanyi va Ibleyama ni zvidhoropana zva kona, ne hambu a vahanyi va Megidho ni zvidhoropana zva kona.+ A vaKhanani va no simama ku hanya tikweni lego. 28 Laha a vaIzrayeli va ngava ni ntamu, va no mahisa vaKhanani a mitiro ya cikurumeta,+ kanilezvi a va va hlongolangi hi kumbhelela.+

29 Efrayime yenawu a nga hlongolangi a vaKhanani lava va nga tshama le Gezera. A vaKhanani va no simama ku tshama cikari kabye le Gezera.+

30 Zebhuloni a nga hlongolangi a vahanyi va Kitroni ni vahanyi va Nahalola.+ A vaKhanani va no simama ku tshama ni va ka Zebhuloni, na va mahisiwa mitiro ya cikurumeta.+

31 Axeri a nga hlongolangi a vahanyi va le Ako, ni vahanyi va le Sidhoni,+ ni va le Ahlabha, ni va le Akzibha,+ ni va le Helbha, ni va le Afika,+ ni va le Rehobha.+ 32 Hikwalaho, a vaAxeri va no simama ku hanya ni vaKhanani lava va nga akile lomu tikweni, hakuva va wa nga va hlongolangi.

33 Naftali a nga hlongolangi a vahanyi va le Bhet-Xemexe ni vahanyi va le Bhet-Anate,+ kanilezvi va no simama ku hanya ni vaKhanani lava va nga hanya lomu tikweni.+ A vahanyi va le Bhet-Xemexe ni va le Bhet-Anate va no kurumetiwa ku va mahela mitiro ya cikurumeta.

34 A vaAmori va no vhalela a va ka Dhani tikweni ga zvitsunga, va nga va tsiki va relela nkoveni.+ 35 Hikwalaho, a vaAmori va no simama ku hanya Citsungeni ca Heresi, le Ayijaloni+ ni le Xaalbhima.+ Kanilezvi a cikhati leci a ntamu wa yindlu ya ka Josefa wu nga engeteleka, va no kurumetiwa ku maha a mitiro yo bindza. 36 A tiko ga vaAmori gi wa sukela tsungeni wa Akrabhima,+ ni kusukela Sela zvi kwela.

2 Makunu a ngilozi ya Jehovha+ yi no kandziha hi Gilgali+ yiya Bhokima, yi yaku: “Ndzi mu humesile tikweni ga Gibhite muya ka tiko legi ndzi hlambanyileko ku nyika vakokwani va n’wina,+ ndziku: ‘Ndzi nga ta tshuka ndzi tshova a civhumelwano ca mina na n’wina.+ 2 Kanilezvi n’wina mu nga mahi civhumelwano ni vanhu va tiko legi;+ khungumulelani a maalati yabye.’+ Kanilezvi, n’wina a mu ingisangi a gezu ga mina.+ Hikuyini mu nga kala ku ingisa? 3 Hikwalaho, minawu ndzi te: ‘Ndzi nga ta va hlongola mahlweni ka n’wina.+ Va tava ntlhamu ka n’wina+ niku a vanungungulu vabye va ta mu phasa.’”+

4 Laha a ngilozi ya Jehovha yi nga wula timhaka leti ka vaIzrayeli vontlhe, va no sangula ku rila hi gezu ga hombe. 5 Hikwalaho, a wutshamu lego va no gi chula ku Bhokima,* va tlhela va maha muphahlo ka Jehovha.

6 A cikhati leci Joxuwa a nga tlhatlha vanhu kasi va hangalaka, a mun’we ni mun’wani wabye i noya tshombeni yakwe a ya fumela tiko gakwe.+ 7 A vanhu va no simama ku tirela Jehovha masikwini wontlhe ya Joxuwa, ni masikwini wontlhe ya madhota lawa ma nga sala ma hanya Joxuwa na a file, lawa ma nga wonile a mitiro ya hombe leyi Jehovha a nga mahele a vaIzrayeli.+ 8 Makunu Joxuwa, a n’wana wa Nuni, a nandza ga Jehovha, i nofa na a hi ni 110 wa malembe.+ 9 Va no mu lahla lomu tikweni legi gi nga hi tshomba yakwe le Timnati-Heresi,+ tikweni ga zvitsunga ga Efrayime, hi tlhelo ga n’walungu* ga Citsunga ca Gaaxa.+ 10 Contlhe a cizukulwana leco ci no hlengeletwa ka vakokwani va cona,* ku landzela a cin’wani cizukulwana ci nga kala ci nga mu tivi Jehovha ne hambu lezvi a nga mahele Izrayeli.

11 Hikwalaho, a vaIzrayeli va no maha zvakubiha mahlweni ka Jehovha va tlhela va khozela a vaBhaali.+ 12 Hikwalaho, va no fularela Jehovha, a Nungungulu wa vapapayi vabye, loyi a va humesileko tikweni ga Gibhite,+ va landzela a van’wani vanungungulu, ku nga vanungungulu va matiko wontlhe lawa ma nga va randzele,+ va va khizamela, va zangarisa Jehovha.+ 13 Va no fularela Jehovha, va khozela Bhaali ni zvifananiso zva Axtarte.+ 14 Hi kota ya lezvo, a zanga ya Jehovha yi no vhindlukela a vaIzrayeli, a va nyikela ka vaphangi va va phanga+ a tlhela a va nyikela* canjeni ga valala lava va nga hi matlhelweni yabye.+ Va wa nga ha zvi koti ku yima mahlweni ka valala vabye.+ 15 Ni kwihi laha va ngaya kona, a canja ga Jehovha gi wo va vhukela va xaniseka,+ khwatsi hi lezvi Jehovha a nga va byelile ni lezvi Jehovha a nga hlambanyile kabye;+ va wa hi kuxanisekeni ka hombe.+ 16 Hikwalaho, Jehovha i no va nyika a valamuli kasi va va ponisa canjeni ga vaphangi vabye.+

17 Kanilezvi hambu ni valamuli a va va ingisangi. Va wa maha wubhayi ni vanungungulu van’wani, va va khizamela. Va no hatlisa va hambuka ndleleni leyi a vakokwani vabye va nga famba hi yona, lava va nga ingisa a zvileletelo zva Jehovha.+ Vona a va mahangi lezvo. 18 Khati ni khati laha Jehovha a nga va nyika valamuli,+ Jehovha i wa hi zvin’we ni mulamuli loye, a va ponisa canjeni ga valala vabye masikwini wontlhe ya mulamuli loye; hakuva Jehovha i wa va zwela wusiwana+ ka miketo yabye yi nga vangiwa hi vaxanisi vabye+ ni lava va nga va mahela xapi.

19 Kanilezvi loku a mulamuli loye afa, va wa tlhela va maha kubiha ka hombe nguvhu a ku hundza ni vapapayi vabye hi ku landzela vanungungulu van’wani, va va khozela ni ku va khizamela.+ A va cicangi a mahanyela yabye ne hambu a kunonoha ka timbilu tabye. 20 Hi magumo a zanga ya Jehovha yi no vhindlukela a vaIzrayeli,+ aku: “Kota lezvi a tiko legi gi tshovileko a civhumelwano ca mina+ leci ndzi layileko a vakokwani vabye, gi tsika ku ndzi ingisa,+ 21 minawu ndzi nga ta hlongola ne tiko gin’we ka lawa Joxuwa a ma siyileko a cikhati leci a ngafa.+ 22 Lezvo zvi fela ku ringa vaIzrayeli kasi ku wona lezvaku va ta hlayisa a ndlela ya Jehovha+ va famba hi yona a ku fana ni vapapayi vabye ke.” 23 Hikwalaho, Jehovha i no tsika a matiko lawo. A nga hatlisangi a ma hlongola, ne a nga ma nyikelangi canjeni ga Joxuwa.

3 Lawa matiko lawa Jehovha a nga ma tsika ma simama kasi ku ringa a vaIzrayeli vontlhe lava va nga kala ku wona a tiyimpi ta Khanani.+ 2 (I mahile lezvo kasi a zvizukulwana zvi nga landzela zva Izrayeli, lezvi zvi nga kala zvi nga se wona tiyimpi, zvi wona tiyimpi): 3 Ntlhanu wa tihosi ta vaFilistiya,+ ni vontlhe vaKhanani, ni vaSidhoni,+ ni vaHivhi+ lava va nga tshama Citsungeni ca Lebhanoni,+ kusukela Citsungeni ca Bhaali-Hermoni kala le Lebho-Hamate.*+ 4 Ma wa hi ya ku ringa a vaIzrayeli kasi ku wona ku va ta ingisa a zvileletelo zva Jehovha lezvi a nyikileko a vapapayi vabye hi ku tirisa Mosi ke.+ 5 Hikwalaho, a vaIzrayeli va no hanya cikari ka vaKhanani,+ ni vaHiti, ni vaAmori, ni vaPerezi, ni vaHivhi, ni vaJebhusi. 6 Va wa teka vanhanyana va matiko lawo va maha vasati vabye, va nyikela a vanhanyana vabye ka vafana va matiko lawo, va tlhela va sangula ku tirela a vanungungulu vabye.+

7 Hikwalaho, a vaIzrayeli va no maha zvakubiha mahlweni ka Jehovha, va rivala Jehovha, a Nungungulu wabye, va khozela vaBhaali+ ni tisinya to basa.*+ 8 Hi kota ya lezvo, a zanga ya Jehovha yi no vhindlukela a vaIzrayeli, a va nyikela* canjeni ga Kuxani-Rixatayime, a hosi ya Mezopotamia.* A vaIzrayeli va tirele Kuxani-Rixatayime a 8 wa malembe. 9 A cikhati leci a vaIzrayeli va nga kombela ku vhuniwa hi Jehovha,+ Jehovha i no va vhuxela a muhanyisi kasi a tlhatlhisa a vaIzrayeli,+ ku nga Otniyeli,+ a n’wana wa Kenazi, a ndzisana ya Kalebhi. 10 A moya wa Jehovha wu nota hehla kakwe,+ a maha mulamuli wa Izrayeli. A cikhati leci a nga huma aya yimpini, Jehovha i no nyikela Kuxani-Rixatayime, a hosi ya Mezopotamia,* canjeni gakwe. Hikwalaho, i no hlula Kuxani-Rixatayime. 11 Andzhako ka lezvo, a tiko gi no humula a 40 wa malembe. Hi kugumesa, Otniyeli, a n’wana wa Kenazi, i nofa.

12 A vaIzrayeli va no tlhela va maha lezvi zvi nga bihile mahlweni ka Jehovha.+ Hikwalaho, Jehovha i no tsika Egloni, a hosi ya Mowabhi,+ a hlula Izrayeli, hakuva a vaIzrayeli va wa mahile kubiha mahlweni ka Jehovha. 13 Ahandle ka lezvo, i no va tisela a vaAmoni+ ni vaAmaleki.+ Va no dhumela Izrayeli va teka dhoropa ga micindzu.+ 14 A vaIzrayeli va no tirela Egloni, a hosi ya Mowabhi, a 18 wa malembe.+ 15 Andzhako ka lezvo, a vaIzrayeli va no kombela ku vhuniwa hi Jehovha,+ hikwalaho, Jehovha i no va rumelela a muhanyisi,+ ku nga Ehudhi,+ a n’wana wa Gera, wa ka Bhenjamini,+ a nga tira hi cibhabha.+ Hi ndzhako ka cikhati, a vaIzrayeli va no rumela ndzuvo* ha yena ka Egloni, a hosi ya Mowabhi. 16 Ehudhi i no ti mahela a cipadha co tsema seno ni seno, ca nkono* wun’we a ku leha, a ci bohelela nyongeni yakwe ya cinene, hi lahasi ka tinguwo takwe. 17 Ehudhi i no nyikela ndzuvo* ka Egloni, a hosi ya Mowabhi. Egloni loye i wa kulukile nguvhu.

18 Laha Ehudhi a nga mbhetile ku nyikela ndzuvo,* i no suka a famba ni lava va nga rwalile a ndzuvo lowo. 19 Kanilezvi a cikhati leci a nga chikela laha ka zvifananiso zvi kehlilweko* le Gilgali,+ i no tlhela hi ndzhako, a yaku: “Hosi, ndzi na ni mhaka ya cihundla ndzi lavako ku ku byela.” A hosi yiku: “Miyela!” Zvalezvo, wontlhe a malandza yakwe ma no huma. 20 Makunu Ehudhi i no tshinelela hosi na yi tshamile yoce lomu kwartwini ya ku pepela kona ya le hehla ka yindlu, aku: “Ndzi na ni mahungu ya Nungungulu ndzi lavako ku ku byela.” Egloni i no suka laha citshan’wini cakwe ca wuhosi a yima. 21 Ehudhi i no hlomula a cipadha hi canja gakwe ga cibhabha, leci ci nga hi nyongeni yakwe ya cinene, a tlhava a khwiri ga Egloni. 22 A cipadha ci no nghena ni cihindza ca kona, ci fenengetiwa hi mafura, hakuva Ehudhi i wa nga hlomulangi cipadha khwirini ga Egloni, a se huma macimba. 23 Ehudhi i no huma hi vharanda,* a vhala a tivati ta kwartu ya le hehla ka yindlu a tlhela a khotsa. 24 Andzhako ka loku a fambile, a malandza ma no wuya ma ta kuma a tivati ta kwartu ya le hehla ka yindlu na ti khotsilwe. Hikwalaho ma te: “Kuzvilava o ti ruma lomu kwartwini yo pepa ya lomu cikari.” 25 Ma no rindzela maza ma karateka. A cikhati leci ma nga wona lezvaku a nga vhululi a tivati ta kwartu ya le hehla ka yindlu, ma no teka khiya ma vhulula ma kuma a hosi yabye na yi te sudhu lahasi, na yi file!

26 Na ma ha maha mihoni, Ehudhi i no huluka, a hundza hi le ka zvifananiso zvi kehlilweko,*+ a famba kala a ya chikela khwatsi le Seyira. 27 A cikhati leci a nga chikela, i noba linanga*+ le tikweni ga zvitsunga ga Efrayime;+ a vaIzrayeli va no relela hi le tikweni ga zvitsunga, yena a ranga mahlweni kabye. 28 I te ngalo kabye: “Ndzi landzeleni, hakuva Jehovha i nyikele a valala va n’wina, a vaMowabhi, canjeni ga n’wina.” Hikwalaho, a vanhu va no mu landzela, va ya vhala lomu a vanhu va nga tlhatuka hi kona a congo wa Jordhani kasi a vaMowabhi va nga tlhatuki. Va wa nga tsiki munhu a tsemakanya. 29 Ka cikhati caleco va no daya a 10 000 wa vaMowabhi.+ Vontlhe va wa hi vavanuna va ntamu, va tinhenha; ku hava ni mun’we a nga pona.+ 30 Ka siku lego, Mowabhi i no hluliwa hi Izrayeli, a tiko gi humula a 80 wa malembe.+

31 Andzhako ka Ehudhi, ku no landzela Xamgare,+ a n’wana wa Anati, loyi a nga daya a 600 wa vavanuna va vaFilistiya+ hi tlonga* wa tihomu.+ Yenawu i no ponisa Izrayeli.

4 Kanilezvi laha Ehudhi a ngafa, a vaIzrayeli va no engeta va maha zvilo zva kubiha mahlweni ka Jehovha.+ 2 Hikwalaho, Jehovha i no va nyikela* canjeni ga Jabhini, a hosi ya Khanani,+ loyi a nga kari a fuma le Hazori. A murangeli wa butho gakwe ku wa hi Sisera, loyi a nga tshama Haroxete+ wa vamatiko.* 3 A vaIzrayeli va no rila ka Jehovha,+ hakuva Jabhini i wa hi ni 900 wa tikareta ta yimpi ti nga hi ni masikela* ya simbi,*+ niku i wa va xanisile nguvhu a vaIzrayeli+ hi 20 wa malembe.

4 Dhebhora, a muphrofeti wa cisati,+ a sati wa Lapidhota, i wa lamula a vaIzrayeli cikhatini leco. 5 I wa tolovela ku tshama lahasi ka cindzu wa Dhebhora cikari ka dhoropa ga Rama+ ni Bheteli,+ tikweni ga zvitsunga ga Efrayime. A vaIzrayeli va wa kandziha vaya kakwe kasi va ya lamuliwa. 6 Dhebhora i no vitanisa Bharaki,+ a n’wana wa Abhinowame, hi le Kedhexe-Naftali,+ a taku: “Jehovha, a Nungungulu wa Izrayeli, wa ku laya, aku: ‘Suka uya* Citsungeni ca Tabhora; teka 10 000 wa vavanuna va ka Naftali ni va ka Zebhuloni. 7 Ndzi ta ku tisela Sisera, a murangeli wa butho ga Jabhini, ni tikareta takwe ta yimpi ni masochwa yakwe cicongwaneni ca Kixoni,+ ndzi mu nyikela canjeni ga wena.’”+

8 Hi kota ya lezvo, Bharaki i te ngalo kakwe: “Loku hi famba hontlhe, ndzi ta famba, kanilezvi loku hi nga fambi hontlhe, ndzi nga taya.” 9 Dhebhora aku: “Hi ta famba hontlhe. Kanilezvi a pfhumba legi gi nga ta ku nehela wudzundzo hakuva Jehovha i ta nyikela Sisera canjeni ga wasati.”+ Dhebhora i no suka zvin’we na Bharaki vaya Kedhexe.+ 10 Bharaki i no vitanisa Zebhuloni na Naftali+ vaya Kedhexe; a 10 000 wa vavanuna va no mu landzela, niku Dhebhora yenawu i no kandziha naye.

11 Makunu Hebhere, a muKeni, i wa ti hambanisile ni vaKeni,+ a vana va Hobhabha, a bava wa Mosi.+ A tenda gakwe gi wa zimilwe kusuhani ni sinya ya hombe yi nga hi Zaananime, le Kedhexe.

12 Sisera i no tivisiwa lezvaku Bharaki, a n’wana wa Abhinowame, i kandzihile aya Citsungeni ca Tabhora.+ 13 Sisera i no tekela ku hlengeleta tikareta takwe tontlhe ta yimpi — 900 wa tikareta ta yimpi ti nga hi ni masikela* ya simbi* — ni masochwa yakwe wontlhe, ma sukela Haroxete wa vamatiko kala cicongwaneni ca Kixoni.+ 14 Dhebhora aku ka Bharaki: “Suka u famba, hakuva nyamutlha Jehovha i ta nyikela Sisera canjeni ga wena. Kasi a hi Jehovha a rangileko phambeni ka wena ke?” Hikwalaho, Bharaki i no relela hi le Citsungeni ca Tabhora na a landzelwa hi 10 000 wa vavanuna. 15 Jehovha i no vhilinganyisa+ Sisera ni tikareta takwe tontlhe ta yimpi ni butho gakwe gontlhe mahlweni ka cipadha ca Bharaki. Hi kugumesa, Sisera i no chika lomu kareteni yakwe a tsutsuma hi minenge. 16 Bharaki i no hlongolisela a tikareta ta yimpi ni butho ga Sisera kala Haroxete wa vamatiko. Hikwalaho, a butho gontlhe ga Sisera gi no hihiritwa hi cipadha gi ku bhi; a ku salangi ne mun’we.+

17 Kanilezvi Sisera i no tsutsuma hi minenge aya tendeni ga Jayeli,+ a sati wa Hebhere,+ a muKeni, hakuva ku wa hi ni kurula cikari ka Jabhini,+ a hosi ya Hazori, ni yindlu ya Hebhere, a muKeni. 18 Makunu Jayeli i no huma a khinga Sisera, a yaku: “Ngone hosi yanga, ngone seno, u nga chavi.” Hikwalaho, Sisera i no nghena tendeni ga Jayeli, Jayeli a mu fenengeta hi kumba. 19 Sisera aku ka Jayeli: “Ndzi kombela matana ya kunwa hi ku ndzizwa tora.” I no vhulula nghotso ya masi, a mu nyika anwa,+ a gumesa a mu fenengeta kambe. 20 Sisera aku kakwe: “Yima laha nyangweni ya tenda; loku kuta munhu a ta ku wutisa ku: ‘Ku na ni wanuna laha ke?’, uku ‘Ahihi!’”

21 Kanilezvi Jayeli, a sati wa Hebhere, i no teka cikhongwani ca tenda ni hamela. Laha Sisera a nga etlele wurongo ga tshongotshongo hi kukarala, Jayeli i no nyanimela a ya belela cikhongwani hi laha ka tihlaya takwe ci phondla ci zima lahasi, afa.+

22 Bharaki i no chikela seyo na a hlongolisela Sisera, Jayeli a se huma a mu khinga, aku: “Tana ndzi ta ku komba a wanuna loyi u mu lavako.” Bharaki i no nghena na Jayeli a ya kuma Sisera na a file, na a hi ni cikhongwani ci nga belelwe laha ka tihlaya takwe.

23 Ka siku lego, Nungungulu i no hlula Jabhini, a hosi ya Khanani, mahlweni ka vaIzrayeli.+ 24 A canja ga vaIzrayeli gi no simama ku tshikelela Jabhini, a hosi ya Khanani,+ vaza va lovisa Jabhini, a hosi ya Khanani.+

5 Ka siku lego, Dhebhora+ na Bharaki,+ a n’wana wa Abhinowame, va no yimbelela lisimu leli:+

 3 Ingisani, n’wina tihosi! Dembani ndleve, n’wina vafumeli!

Ndzi ta yimbelela ka Jehovha.

Ndzi ta yimbelela a tisimu ta ku dhumisa* Jehovha,+ a Nungungulu wa Izrayeli.+

Dhumisani Jehovha!

Makunu a vanhu va Jehovha va no relela tinyangweni.

12 Vhuka, vhuka Dhebhora!+

Vhuka, vhuka u yimbelela lisimu!+

Suka, Bharaki!+ Suka u rangela lava u va khomileko, wena n’wana wa Abhinowame!

I no rumelwa le nkoveni hi minenge.+

Cikari ka mitlawa ya ka Rubheni ku wa hi ni kuhlola ka hombe ka mbilu.

A mitlawa ya ka Rubheni yi wa hi ni kuhlola ka hombe ka mbilu.

A ti tekangi muphango wa prata.+

U kandzihetele lava va ntamu, O muhefemulo* wanga.

25 Sisera i no mu kombela mati; Jayeli a mu nyika masi.

I no mu nyika masi yo tiya+ lomu ka ngelo wa wuhosi.

A tiko gi no humula a 40 wa malembe.+

6 Kanilezvi a vaIzrayeli va no phinda kambe va maha zvilo zva kubiha mahlweni ka Jehovha.+ Hikwalaho, Jehovha i no va nyikela canjeni ga vaMidhiyani a 7 wa malembe.+ 2 A canja ga vaMidhiyani gi no xanisa vaIzrayeli.+ Hi kota ya vaMidhiyani, a vaIzrayeli va no ti mahela a matshamu yo fihlala kona* lomu zvitsungeni, ni lomu timhakweni, ni ka matshamu zvi karatako ku nghena.+ 3 Loku a vaIzrayeli va byala timbewu, a vaMidhiyani, ni vaAmaleki,+ ni va le Mutsuwuka-gambo,+ va wo va vhukela. 4 Va wata va ta vhukela vaIzrayeli, va wonhetela a timbewu ta tiko kala le Gaza; va wa nga siyi nchumu wa ku a vaIzrayeli vaga; va wa nga siyi ne yivhu, ne homu, ne mbongola.+ 5 Hakuva va wata ni zvifuyo zvabye ni matenda yabye na va tele nguvhu a ku khwatsi i humbi.*+ Vona ni makameli yabye va wa hi tsandza-vahlayi.+ Va wata lomu tikweni kasi ku ta gi hohlota. 6 Hikwalaho, a vaIzrayeli va nova wusiwaneni ga hombe hi kota ya vaMidhiyani, niku a vaIzrayeli va no rila ka Jehovha va kombela ku vhuniwa.+

7 Laha a vaIzrayeli va nga rila ka Jehovha va kombela ku vhuniwa hi kota ya vaMidhiyani,+ 8 Jehovha i no rumela muphrofeti ka vaIzrayeli, a yaku kabye: “Jehovha, a Nungungulu wa Izrayeli, i ngalo: ‘Ndzi mu humesile Gibhite, ndzi mu humesa ndlwini ya wukhumbi.+ 9 Ndzi mu tlhatlhisile canjeni ga Gibhite, ni ka vontlhe lava va nga mu xanisa, ndzi va hlongola mahlweni ka n’wina, ndzi mu nyika a tiko gabye,+ 10 ndziku ka n’wina: “Hi mina Jehovha, a Nungungulu wa n’wina.+ Mu nga tshuki mu chava a vanungungulu va vaAmori va tiko legi mu hanyako ka gona.”+ Kanilezvi n’wina a mu ingisangi a gezu ga mina.’”+

11 Hi ndzhako ka cikhati, a ngilozi ya Jehovha yi nota+ yi ta tshama lahasi ka sinya ya hombe ya Jowaxi, a muAbhiyezeri,+ leyi yi nga hi le Ofra. A n’wana wakwe Gidheyoni+ i wa kari a phopha a trigo lomu cigowolweni kasi a fihlela vaMidhiyani. 12 A ngilozi ya Jehovha yi no woneka kakwe, yiku: “Jehovha i na wena,+ wena musochwa wa nhenha.” 13 Gidheyoni aku ka yona: “Ndzi tsetselele, hosi yanga, kanilezvi loku Jehovha a hi na hina hikuyini hi humelelwako hi zvontlhe lezvi ke?+ Yi kwihi a mitiro yakwe yontlhe yo hlamalisa, leyi a vapapayi va hina va hi hlawuteleko,+ vaku: ‘A hi Jehovha a hi humesileko tikweni ga Gibhite’?+ Makunu Jehovha i hi tsikile+ a hi nyikela canjeni ga vaMidhiyani.” 14 Jehovha i no mu cuwuka, aku: “Famba hi ntamu lowu u nga nawo. U ta ponisa Izrayeli canjeni ga vaMidhiyani.+ Kasi a hi mina ndzi ku rumako ke?” 15 Gidheyoni i no mu hlamula, aku: “O Jehovha, ndzi ta mu ponisisa kuyini Izrayeli ke? A yindlu ya mina hi yona ya yitsongwani ka lixaka la ka Manase, niku hi mina wa nyalidede wa kona lomu ndlwini ya papayi.” 16 Kanilezvi Jehovha i no mu hlamula, aku: “Kota lezvi ndzi tova na wena,+ u ta hlasela a vaMidhiyani a ku khwatsi munhu mun’we.”

17 Andzhako ka lezvo, Gidheyoni i te ngalo kakwe: “Loku u xalala hi mina, ndzi nyike cikombiso ca ku hi wena u wulawulako na mina. 18 Ndzi kombela ku u nga suki laha kala ndzi wuya ni cinyikiwo ca mina ndzi ta ci veka mahlweni ka wena.”+ Yena aku: “Ndzi ta tshama laha kala u wuya.” 19 Gidheyoni i no famba a ya longisela a cimbutana a tlhela a maha tipawa to kala comelo hi efa* ya mapa.+ I no chela nyama lomu ka cindzala* ni muru lomu ka mbita, a wuya nazvo kakwe lahasi ka sinya ya hombe a ta mu nyika.

20 A ngilozi ya Nungungulu wa lisine yi te ngalo kakwe: “Teka nyama ni tipawa to kala comelo u zvi veka le hehla ka ribye legiyani ga hombe, u gumesa u chulula a muru wa kona.” Gidheyoni i no maha lezvo. 21 A ngilozi ya Jehovha yi no nawuluta a nhonga yi nga hi canjeni ga yona yi henya nyama ni tipawa to kala comelo hi le magumo ka nhonga, ku se huma ndzilo hi lomu ka ribye wu hisa nyama ni tipawa to kala comelo.+ Andzhako ka lezvo, a ngilozi ya Jehovha yi no nyamalala mahlweni kakwe. 22 Makunu Gidheyoni i no zvi tiva lezvaku ku wa hi ngilozi ya Jehovha.+

Zvalezvo Gidheyoni aku ngalo: “O Jehovha, Hosi ya hombe, ndzi file mina! Hakuva ndzi wonile a ngilozi ya Jehovha nghohe ni nghohe!”+ 23 Kanilezvi Jehovha aku ngalo kakwe: “A kurula a kuve na wena. U nga chavi,+ u nga tafa.” 24 Hikwalaho, Gidheyoni i no aka a alati ga Jehovha laho, gi vitaniwako ku Jehovha-Xalome*+ kala nyamutlha. Ga ha hi kona le Ofra wa vaAbhiyezeri.

25 Ka wusiku lego, Jehovha i te ngalo ka Gidheyoni: “Teka a cidhunana ca papayi wa wena, leci ca wumbiri ca 7 wa malembe, u khungumula a alati ga Bhaali, legi a papayi wa wena a nga nago, u tsema a sinya yo basa* leyi yi nga kusuhani ni alati.+ 26 Andzhako ka loku u mu akele alati Jehovha, a Nungungulu wa wena, hehla ka khokhola legi hi maribye ma folisilweko, teka a cidhunana leci ca wumbiri u ci nyikela kota munyikelo wa kuhiswa hehla ka tihunyi ta sinya yo basa* leyi u nga yi tsemelela.” 27 Hikwalaho, Gidheyoni i no hlawula 10 wa vavanuna cikari ka malandza yakwe a maha lezvi Jehovha a nga mu byela. Kanilezvi i wa chava a va laha ngangweni wa papayi wakwe ni vanhu va lomu dhoropeni, hikwalaho a nga zvi mahangi ni mumu, i zvi mahile ni wusiku.

28 A cikhati leci a vanhu va lomu dhoropeni va nga vhuka ni mixo, va no wona ku a alati ga Bhaali gi khungumulilwe, a sinya yo basa* leyi yi nga hi reveni ga alati yi tsemilwe, ni lezvaku a cidhunana leci ca wumbiri ci nyikelwe kota muphahlo laha alatini legi gi nga akilwe. 29 Va no wutisana, vaku: “Himani a nga maha lezvi?” Andzhako ka loku va zvi hlolile khwatsi, va te: “Hi Gidheyoni, a n’wana wa Jowaxi, a nga maha lezvi.” 30 Hikwalaho, a vanhu va lomu dhoropeni va no byela Jowaxi, vaku: “Humesa a n’wana wa wena hi ta mu daya, hakuva i khungumulile a alati ga Bhaali a tlhela a tsema a sinya yo basa* yi nga hi kusuhani nago.” 31 Jowaxi+ i no hlamula vontlhe lava va nga kari va mu vhukela, aku: “Hi n’wina mu faneleko ku lwela Bhaali ke? Hi n’wina mu lavako ku mu ponisa ke? Ni wihi a mu lwelako i ta dawa mixo yaleyi.+ Loku yena a hi nungungulu i wa ti lwele ha yece+ kota lezvi a wokari a nga khungumula a alati gakwe.” 32 Ka siku lego, i no chula Gidheyoni a ku hi Jerubhaali,* aku: “Bhaali i wa ti lwele ha yece hakuva i kona a nga khungumula a alati gakwe.”

33 A vaMidhiyani vontlhe,+ ni vaAmaleki,+ ni va le Mutsuwuka-gambo, va no patsana+ va tlhatuka congo vaya Nkoveni wa Jezreeli va ya gova kona. 34 A moya wa Jehovha wu nota hehla ka Gidheyoni,+ a seba linanga,*+ a va ka Abhiyezeri+ va tsombana kakwe va mu landzela. 35 Gidheyoni i no rumela zvirun’wa ka tiko gontlhe ga va ka Manase; vonawu va no tsombana va mu landzela. I no rumela zvirun’wa kambe tikweni ga va ka Axeri, ni va ka Zebhuloni, ni va ka Naftali; vonawu va nota va ta tsombana kakwe.

36 Andzhako ka lezvo, Gidheyoni i no byela Nungungulu wa lisine, aku: “Loku ku hi lezvaku hakunene u ta ponisa a vaIzrayeli hi canja ga mina, kota lezvi u tsumbisileko,+ 37 ndza ha andlala a dzowo ga woya laha ka wutshamu go hulela kona timbewu. Loku a ndzhokati yiwa laha ka dzowo ga woya basi kanilezvi kontlhe lahasi matlhelweni ya gona ku sala ku womile, ndzi ta zvi tiva lezvaku u ta ponisa Izrayeli hi canja ga mina, kota lezvi u tsumbisileko.” 38 Zvi no mahisa zvalezvo. Hi mandziko wa kona, a cikhati a nga vhuka ni mixo a kama a dzowo lego, ku no huma ndzhokati yo tala yo ringana ku tata a ngelo wa hombe hi mati. 39 Kanilezvi Gidheyoni i no byela Nungungulu wa lisine, aku: “A zanga ya wena yi nga ndzi vhindlukeli, ndzi tsike ndzi ku kombela kambe a nchumu wun’we basi. Ndzi kombela ku u ndzi tsika ndzi maha zvin’wani hi dzowo legi ga woya. Ndzi kombela ku a dzowo goce gi woma kanilezvi lahasi kontlhe ku tsakama hi ndzhokati.” 40 Nungungulu i no maha lezvo ka wusiku lego; kontlhe lahasi ku no tsakama hi ndzhokati kanilezvi a dzowo a gi tsakamangi.

7 Andzhako ka lezvo, Jerubhaali, ku nga Gidheyoni,+ ni vanhu vontlhe va nga hi zvin’we naye, va no vindzuka ni mixo va ya gova cibukeni ca Harodhe, a wugovelo ga Midhiyani na gi hi tlhelweni ga n’walungu* ga Gidheyoni, citsungeni ca More, le nkoveni. 2 Jehovha i no byela Gidheyoni, aku: “A vanhu lava u nga navo va tele nguvhu kasi mina ndzi nyikela a vaMidhiyani canjeni gabye.+ Hakuva Izrayeli a nga ti kulisa aku ka mina: ‘A canja ga mina gi ndzi ponisile.’+ 3 Makunu huwelela cikari ka vanhu vontlhe, uku: ‘Ni wihi a chavako ni ku rurumela i wa tlhele kaya.’”+ Hikwalaho, Gidheyoni i no va ringa hi magezu lawo. Laho ku no tlhela a 22 000 wa vanhu, ku sala a 10 000 wa vona.

4 Jehovha i no engeta a byela Gidheyoni, aku: “A vanhu va ha tele nguvhu. Relela navo le matini kasi ndzi ku ringela vona. Loku ndziku ka wena: ‘Loyi i wa fambe na wena’, famba naye; kanilezvi loku ndziku ka wena: ‘Loyi a nga fambi na wena’, u nga fambi naye.” 5 Hikwalaho, Gidheyoni i no teka vanhu a relela navo matini.

Hi kulandzela, Jehovha i no byela Gidheyoni, aku: “Vontlhe lava va nwako mati na va lazva hi tirimi a ku khwatsi timbyana va veke hi tlhelo, ni lava va nwako mati na va khizamile u ta va veka hi tlhelo gin’wani.” 6 A ntsengo wa lava va ngakha mati hi mandla va lazvela wu wa hi 300 wa vavanuna. Lava van’wani va no khizama hi madzolo yabye vanwa mati.

7 Makunu Jehovha i no byela Gidheyoni, aku: “Ndzi ta mu ponisa hi 300 wa vavanuna, lava va nganwa mati hi kulazvela; ndzi ta nyikela a vaMidhiyani canjeni ga n’wina.+ Kanilezvi a vanhu lava van’wani va tsike va tlhela kaya.” 8 Hikwalaho, andzhako ka loku va tekile a timbuva tabye ni tinanga* tabye, Gidheyoni i no va tlhelisa kaya a vavanuna vontlhe lava van’wani va ka Izrayeli, a sala ni 300 wa vavanuna basi. A wugovelo ga vaMidhiyani gi wa hi le hasi kabye, le nkoveni.+

9 Ka wusiku lego, Jehovha i no byela Gidheyoni, aku: “Suka, u dhumela a wugovelo gabye, hakuva ndzi va nyikele canjeni ga wena.+ 10 Kanilezvi loku u chava ku va dhumela, relela wugovelweni gabye na Pura, a nandza ga wena, 11 u ya ingisela lezvi va wulako. Andzhako ka lezvo, u ta tiya hlanha* u dhumela wugovelo.” Laha a ngazwa lezvo, yena ni nandza gakwe, Pura, va no relela kala magumo ka wugovelo ga masochwa.

12 A vaMidhiyani, ni vaAmaleki, ni vontlhe va le Mutsuwuka-gambo+ va wa tatile nkova va ku khwatsi i butho ga humbi.* A makameli yabye ma wa hi tsandza-vahlayi,+ na ma talisile ku khwatsi tindzhoho ta misava yi nga mbhirini ya bimbi. 13 Laha Gidheyoni a nga chikela, i nozwa wanuna na a hlawutela a noro ka munghana wakwe, aku: “Ndzi lorile lezvi: Ku wa hi ni pawa ya redhonda ya sevhadha yi nga khingirikela yiya wugovelweni ga vaMidhiyani. Yi no chikela laha tendeni yi giba, giwa.+ Ina, yi noba a tenda gi jima, giwa lahasi. 14 A munghana wa kona, aku: “Lezvo zvi wula a cipadha ca Gidheyoni,+ a n’wana wa Jowaxi, a wanuna wa ka Izrayeli. Nungungulu i nyikele a vaMidhiyani ni wugovelo gontlhe canjeni gakwe.”+

15 Zvalezvi Gidheyoni a ngazwa a noro ni tlhamuselo wa kona,+ i no khizama lahasi a khozela. Andzhako ka lezvo, i no tlhela wugovelweni ga ka Izrayeli, a yaku: “Sukani mu yima, hakuva Jehovha i nyikele a wugovelo ga vaMidhiyani canjeni ga n’wina.” 16 I no avanyisa a 300 wa vavanuna hi mitlawa yinharu, vontlhe a va nyika tinanga+ ni tifuko ta hombe ta phanga, ti nga hi ni zvihlahle lomu ndzeni ka tona, 17 aku kabye: “Ndzi cuwukeni, mu maha zvalezvi ndzi to maha. A cikhati leci ndzi to chikela mbhirini ya wugovelo, mahani zvalezvi ndzi to maha. 18 Loku mina ni vontlhe lava va nga na mina hiba tinanga, n’winawu banani tinanga matlhelweni wontlhe ya wugovelo, mu banguleka, muku: ‘Hi kota ya Jehovha na Gidheyoni!’”

19 Gidheyoni ni 100 wa vavanuna lava a nga hi navo va no chikela mbhirini ya wugovelo na zviya cikari ka wusiku,* a vagadhi na va ha hi ku mbheta ku cicana. Va noba tinanga+ va tlhela va faya tifuko ta hombe leti va nga welele mandleni yabye.+ 20 Hikwalaho, a mitlawa leyi ya yinharu yi noba tinanga yi tlhela yi faya tifuko ta hombe. Va no khoma a zvihlahle hi canja ga cibhabha, vaba tinanga leti va nga khomile hi canja ga cinene, va banguleka, vaku: “Cipadha ca Jehovha ni ca Gidheyoni!” 21 A mun’we ni mun’wani wabye i no yima wutshan’wini gakwe, va randzela a wugovelo gontlhe. A masochwa wontlhe ya valala ma no sangula ku tsutsuma na maba tinyanda.+ 22 A vavanuna lava va 300 va no simama kuba tinanga, Jehovha a jikisa a cipadha ca valala vabye, va vhukelana hi ca ka vona lomu wugovelweni gontlhe.+ A masochwa ya valala ma no tsutsuma kala le Bhet-Xita, ma hundza maya Zerera, maza ma chikela mbhinganweni wa Abhel-Mehola,+ kusuhani ni Tabhate.

23 A vavanuna va ka Izrayeli va no vitanisiwa hi le tikweni ga Naftali, ni ga Axeri, ni tikweni gontlhe ga Manase,+ va ta hlongolisela a vaMidhiyani. 24 Gidheyoni i no rumela zvirun’wa tikweni gontlhe ga zvitsunga ga Efrayime, aku: “Relelani mu yalwa ni vaMidhiyani, mu vhaletela lomu a vanhu va tlhatukako hi kona kala le Bhet-Bhara ni le Jordhani.” Hikwalaho, a vavanuna vontlhe va ka Efrayime va no hlengeletana, va vhala lomu a vanhu va tlhatukako hi kona kala le Bhet-Bhara ni le Jordhani. 25 Va no tlhela va khoma a tihosana timbiri ta Midhiyani, Orebhi na Zeebhe, va daya Orebhi ka ribye ga Orebhi,+ va gumesa va daya Zeebhe, laha cigowolweni ca vhinyo ca Zeebhe. Va no simama ku hlongolisela a vaMidhiyani.+ Va no gumesa va neha a hloko ya Orebhi ni hloko ya Zeebhe ka Gidheyoni, le tikweni ga Jordhani.

8 Makunu a vavanuna va ka Efrayime va te ngalo kakwe: “Hikuyini u nga maha lezvi, u nga hi vitani a cikhati leci u ngaya u yalwa ni vaMidhiyani ke?”+ Va no mu holovisa nguvhu.+ 2 Kanilezvi Gidheyoni i no va hlamula, aku: “Zvova zvini ndzi nga maha a ku hundza n’wina ke? Kasi a mauvha ma kutsulilweko hi Efrayime+ a ma chukwana a ku hundza a tshovelo wa mauvha wa Abhiyezeri ke?+ 3 Nungungulu i nyikele mandleni ya n’wina a tihosana ta vaMidhiyani, Orebhi na Zeebhe;+ makunu zvini ndzi mahileko zvo ringana ni lezvi zva n’wina ke?” Laha a nga wula magezu lawo, a zanga yabye yi no bohla.

4 Gidheyoni i no chikela Jordhani a tsemakanya. Yena ni 300 wa vavanuna lava a nga hi navo va wa karele, kanilezvi va no simama ku hlongolisela a valala vabye. 5 Hikwalaho, i no byela a vavanuna va Sukote, aku: “Va nyikeni tipawa a vanhu lava ndzi fambako navo, hakuva va karele, niku mina ndzi lomu ko hlongolisela Zebha na Zalmuna, a tihosi ta vaMidhiyani.” 6 Kanilezvi a tihosana ta Sukote ti no hlamula, tiku: “Lezvi u alakanya ku a mandla ya Zebha na Zalmuna ma sina ma hi canjeni ga wena, lezvi u nge hi fanele ku ma nyika tipawa a masochwa ya wena ke?” 7 Gidheyoni aku: “Hi kota ya lezvo, a cikhati leci Jehovha a to nyikela Zebha na Zalmuna canjeni ga mina, ndzi ta mu pfharamulela hi mimizwa ni zvihlehlwani zva lomu ciwuleni.”+ 8 I no suka hi laho aya le Penuweli a ya va kombela zvalezvo vonawu, kanilezvi a vavanuna va le Penuweli va no mu hlamula zvalezvi va nga mu hlamula a vavanuna va le Sukote. 9 Hikwalaho, i no byela a vavanuna va le Penuweli vonawu, aku: “Loku ndzi wuya hi kurula, ndzi ta khungumula a likhokhola* leli.”+

10 Makunu Zebha na Zalmuna va wa hi le Karkora ni masochwa yabye, ma nga hi cipimo ca 15 000 wa wona. Ku wa no sala yalawo basi cikari ka butho gontlhe ga va le Mutsuwuka-gambo,+ hakuva ku wa delwe a 120 000 wa vavanuna va nga hi ni zvipadha. 11 Gidheyoni i no simama ku kwela hi ndlela ya lava va tshamako matendeni, hi tlhelo ga mutsuwuka-gambo wa Noba na Jogbheha,+ a ya dhumela a wugovelo gi nga kala gi nga longangi kulwa. 12 A cikhati leci Zebha na Zalmuna va nga tsutsuma, Gidheyoni i no va hlongolisela a khoma tihosi leti ta timbiri ta vaMidhiyani, Zebha na Zalmuna. Hikwalaho, a wugovelo gontlhe gi nova ka pfilupfilu.

13 Gidheyoni, a n’wana wa Jowaxi, i no wuya hi kulweni hi ndlela ya tsunga wa Heresi. 14 Lomu ndleleni, i no khoma jaha ga le Sukote a gi wutisa zviwutiso. Hikwalaho, a jaha lego gi no mu tsalela a mavito ya tihosana ni madhota ya Sukote, 77 wa vavanuna. 15 Makunu i noya ka vavanuna va le Sukote, a yaku: “Hi loyi Zebha na Zalmuna, lava n’wina mu nga ndzi poyila hi vona, muku: ‘Lezvi u alakanya ku a mandla ya Zebha na Zalmuna ma sina ma hi canjeni ga wena, lezvi u nge hi fanele ku va nyika tipawa a vavanuna va wena va kareleko ke?’”+ 16 I no khoma a madhota ya dhoropa, a teka mimizwa ni zvihlehlwani zva lomu ciwuleni a tsayisa a vavanuna va le Sukote.+ 17 I no khungumula a likhokhola* la le Penuweli,+ a tlhela a daya a vavanuna va dhoropa.

18 I no wutisa Zebha na Zalmuna, aku: “A vavanuna lava mu nga va daya le Tabhora va wa tshamisile kuyini?” Vaku: “Va wa fana na wena; a mun’we ni mun’wani wabye i wa ku khwatsi i n’wana wa hosi.” 19 Yena aku ngalo: “Va wa hi vamakabye va mina, a vana va mamani wa mina. A ku khwatsi hi lezvi Jehovha a hanyako, loku mu wa no va tsika va hanya, ndzi wa nga ta mu daya.” 20 Hi kulandzela, i no byela Jetera, a matewula yakwe, aku: “Suka u va daya.” Kanilezvi a jaha lego a gi hlomulangi a cipadha ca gona hi kuchava hakuva gi wa ha hi n’wanana. 21 Hikwalaho, Zebha na Zalmuna va te ngalo: “Suka hi wece u hi daya, hakuva a ntamu wa munhu wu ringana ni munhu wa kona.”* Hikwalaho, Gidheyoni i no suka a daya Zebha na Zalmuna+ a tlhela a teka zvilo zvo sasekisa hi zvona zvo khwatsi i hweti zvi nga hi lomu ka tinhamu ta makameli yabye.

22 Andzhako ka lezvo, a vavanuna va ka Izrayeli va no byela Gidheyoni, vaku: “Hi fumele, wena, ni n’wana wa wena, ni zukulu wa wena, hakuva u hi ponisile canjeni ga vaMidhiyani.”+ 23 Kanilezvi Gidheyoni i te ngalo kabye: “Mina ndzi nga ta mu fumela, ne hambu a n’wana wa mina a nga ta mu fumela. Jehovha hi yena a to mu fumela.”+ 24 Gidheyoni i no engeta, aku: “Ndzi lava ku mu kombela nchumu wun’we: Ka lezvi mu zvi phangileko, a mun’we ni mun’wani wa n’wina i wa ndzi nyike a phera ya nhovhu.” (Hakuva va wa boha a tiphera ta ouro lomu ka tinhovhu kota lezvi va nga hi vaIxmayeli.)+ 25 A vavanuna lavo va no hlamula, vaku: “Hi ta ku nyika.” Va no andlala a nguwo, a mun’we ni mun’wani wabye a hoxela laho a phera ya laha ka nhovhu yi nga hi ka lezvi a nga phangile. 26 A tiphera ta ouro ta ku boha lomu ka tinhovhu leti a nga va kombela ti wa peza 1700 wa maxekeli* ya ouro, na ku nga hlayiwi a zvilo zvo sasekisa hi zvona zvo khwatsi i hweti, ni tiphera, ni tinguwo to pswhuka ta woya ti nga bohiwa hi tihosi ta vaMidhiyani, ni makordhawu ya makameli.+

27 Gidheyoni i no maha efodhe hi ouro leyo,+ a yi kombisa le Ofra,+ dhoropeni gakwe. A vaIzrayeli vontlhe va no maha laho a wubhayi ga moya nayo,+ niku yi nova ntlhamu ka Gidheyoni ni ka ngango wakwe.+

28 Makunu a vaMidhiyani+ va no khoza mahlweni ka vaIzrayeli; a va ha va xanisangi kambe.* A tiko gi no humula a 40 wa malembe masikwini ya Gidheyoni.+

29 Hikwalaho, Jerubhaali,+ a n’wana wa Jowaxi, i no tlhela kaya kakwe a ya tshama kona.

30 Gidheyoni i no pswala 70 wa vana, hakuva i wa hi ni vasati vo tala. 31 A sati wakwe wa mutsongwani* wa le Xekemi yenawu i no mu pswalela mufana, a mu chula ku hi Abhimeleki.+ 32 Gidheyoni i nofa na a khosahele nguvhu, a lahliwa ka cilahla ca papayi wakwe Jowaxi, le Ofra wa vaAbhiyezeri.+

33 Zvalezvi Gidheyoni a ngafa, a vaIzrayeli va no tlhela va maha wubhayi ga moya ni vaBhaali,+ va yimisa Bhaali-Bherite ava nungungulu wabye.+ 34 A vaIzrayeli a va mu alakanyangi Jehovha, a Nungungulu wabye,+ loyi a nga va tlhatlhisa canjeni ga valala vabye vontlhe lava va nga va randzele;+ 35 ne a va kombisangi lirandzo li nga mbheliko ka yindlu ya Jerubhaali, ku nga Gidheyoni, va mu tlhelisela a wunene gontlhe legi a nga mahela vaIzrayeli.+

9 Hi ndzhako ka cikhati, Abhimeleki,+ a n’wana wa Jerubhaali, i noya ka vamakabye va mamani wakwe le Xekemi a ya byela vona ni ngango wontlhe wa kokwani wakwe,* aku: 2 “Wutisani a varangeli* vontlhe va Xekemi, muku: ‘A ku fumelwa hi vana vontlhe va 70 va Jerubhaali+ ni ku fumelwa hi wanuna mun’we, mu langa yini? Mu nga rivali lezvaku mina na n’wina hi nkhata wun’we.’”*

3 Hikwalaho, a vamakabye va mamani wakwe va noya va ya wulawula ha yena ka varangeli vontlhe va Xekemi; a timbilu tabye ti no kokeka ku landzela Abhimeleki hakuva va waku: “Phela makabye wa hina.” 4 Va no mu nyika a 70 wa zvingerengere zva prata zva lomu ndlwini* ya Bhaali-Bherite.+ Abhimeleki i no teka prata leyo a ya thola hi yona vanyamijiri ni vanhu vo kala cichavo kasi va famba naye. 5 Andzhako ka lezvo, i noya ndlwini ya papayi wakwe le Ofra+ a ya daya a vamakabye vakwe+ laha ka ribye gin’we, a vana va Jerubhaali, va nga hi 70 wa vavanuna. Ku no pona Jothamu yece, a ndzisana ya vana va Jerubhaali, hakuva i wa fihlele.

6 Hi kulandzela, a varangeli vontlhe va Xekemi ni vanhu vontlhe va Bhete-Milo va no tlhangana va yimisa Abhimeleki a maha hosi,+ kusuhani ni sinya ya hombe, kusuhani ni pilari gi nga hi le Xekemi.

7 Laha Jothamu a nga hlawutelwa a mhaka leyi i no tekela ku suka a ya yima le hehla ka Citsunga ca Gerezima+ a va vitana hi gezu ga hombe, aku: “Ndzi ingiseleni, n’wina varangeli va Xekemi, Nungungulu yenawu i ta mu ingisela.

8 “Ka siku go kari, a tisinya ti no suka ti ya hlawula* hosi lezvaku yi ti fumela. Hikwalaho, ti no byela a sinya ya olivha, tiku: ‘Hi fumele.’+ 9 Kanilezvi a sinya ya olivha yi no hlamula, yiku: ‘Ndzi nga zvi randza ndzi tsika a mafura ya mina lawa ma tirisiwako kasi ku dhumisa Nungungulu ni vanhu, ndzi ya ninganika hehla ka tin’wani tisinya ke?’ 10 Makunu, a tisinya ti no byela a nkuwu, tiku: ‘Tana u ta maha hosi ya hina.’ 11 A nkuwu wu ti hlamula, wuku: ‘Ndzi nga zvi randza ndzi tsika kutsombela ka mina ni mihandzu ya mina ya yinene, ndzi ya ninganika hehla ka tisinya tin’wani ke?’ 12 Hi kulandzela, a tisinya ti no byela a vhina,* tiku: ‘Tana u ta maha hosi ya hina.’ 13 A vhina wu ti hlamula, wuku: ‘Ndzi nga zvi randza ndzi tsika a vhinyo ya mina ya yiswa yi tsakisako Nungungulu ni vanhu, ndzi ya ninganika hehla ka tisinya ke?’ 14 Hi kugumesa, a tisinya tontlhe leti tin’wani ti noya ti ya byela sinya ya mimizwa,* tiku: “Tana u ta maha hosi ya hina.’+ 15 A sinya ya mimizwa* yi no hlamula a tisinya, yiku: ‘Loku ku hi ku hakunene mo ndzi hlawula* lezvaku ndziva hosi ya n’wina, tanani mu ta tshama ndzhutini wa mina. Kanilezvi loku mu nga mahi lezvo, ku wa hume ndzilo lomu ka sinya ya mimizwa wu hisa a misedhare ya Lebhanoni.’

16 “Makunu mu alakanya ku mu mahile zvilo zva zvinene ni zva kudzundzeka hi ku mu maha hosi Abhimeleki?+ Kona mu mu mahele wunene Jerubhaali ni ngango wakwe ke? Mu mu mahele lezvi zvi mu faneleko ke? 17 A cikhati leci a papayi wa mina a nga mu lwela,+ i vekile a wutomi* gakwe mhangweni kasi a mu tlhatlhisa canjeni ga vaMidhiyani.+ 18 Kanilezvi nyamutlha mu vhukele a yindlu ya papayi wa mina mu daya vana vakwe, a 70 wa vavanuna, laha ka ribye gin’we.+ Mu tlhelile mu yimisa Abhimeleki, a n’wana a pswalilweko hi khumbi yakwe ya cisati,+ ava hosi ya varangeli va Xekemi hi lezvi a nga makabye wa n’wina. 19 Loku nyamutlha mu mu mahele zvilo zva zvinene ni zva kudzundzeka Jerubhaali ni yindlu yakwe, tsakani na Abhimeleki, yenawu i wa tsake na n’wina. 20 Kanilezvi loku mu nga mahangi khwatsi, a ku hume ndzilo hi ka Abhimeleki wu hisa varangeli va Xekemi ni Bhete-Milo;+ ku wa hume ndzilo kambe hi ka varangeli va Xekemi ni Bhete-Milo wu hisa Abhimeleki.”+

21 Andzhako ka lezvo, Jothamu+ i no tsutsuma a ya Bheera, a ya tshama seyo, hi kota ya makabye wakwe Abhimeleki.

22 Abhimeleki i no fumela a vaIzrayeli a malembe manharu. 23 Nungungulu i no vhuxa livengo* cikari ka Abhimeleki ni varangeli va Xekemi, va se sangula ku mu jikela. 24 Lezvo zvi mahekile kasi a tihanyi leti ti mahelweko a 70 wa vana va Jerubhaali ti photelwa, kasi a nandzu wa nkhata wabye wuva hehla ka Abhimeleki, a makabye wabye, hi lezvi a nga va daya,+ ni hehla ka varangeli va Xekemi, hi lezvi va nga mu vhuna a ku daya a vamakabye vakwe. 25 Hikwalaho, a varangeli va Xekemi va no rumela a vavanuna va ya mu lavelela le hehla ka zvitsunga, niku va wa yivela vontlhe lava va nga hundza hi ruwa lego. Hi ndzhako ka cikhati, Abhimeleki i no byeliwa a mhaka leyo.

26 Gaali, a n’wana wa Ebhedhi, ni vamakabye vakwe va noya Xekemi,+ ni varangeli va Xekemi va no mu tsumba. 27 Va no huma vaya zvivhineni* zvabye va ya khayela mauvha, va ma kamela, va maha mubuzo, va gumesa vaya ndlwini ya nungungulu wabye+ va yaga ni kunwa, va sangula ku ruka Abhimeleki. 28 Gaali, a n’wana wa Ebhedhi, i te ngalo: “Himani Abhimeleki, kona himani Xekemi* va kuza hi va tirela? Kasi a hi n’wana wa Jerubhaali,+ ni muyimeli wakwe a hi Zebhula ke? Tirelani a vavanuna va Hamori, a papayi wa Xekemi! Hikuyini hi tirelako Abhimeleki? 29 Loku ku wa hi mina ndzi rangelako a vanhu lava, ndzi wa ta hlongola Abhimeleki.” A tlhela a byela Abhimeleki, aku: “Engetela a butho ga wena u huma hi talwa.”

30 A cikhati leci Zebhula, a hosana ya dhoropa, a ngazwa magezu ya Gaali, a n’wana wa Ebhedhi, i no vhindluka hi zanga. 31 Hikwalaho, i no rumela zvirun’wa cihundleni zviya ka Abhimeleki, zvi yaku: “Gaali, a n’wana wa Ebhedhi, ni vamakabye vakwe, zvezvi va le Xekemi, va kucetela a vahanyi va dhoropa lezvaku va ku vhukela. 32 Tana ni vavanuna va wena ni wusiku, u ta tshama u rindzela lomu masin’wini. 33 Zvalezvi a gambo gi tsuwukako, vindzuka ni mixo u dhumela dhoropa. Loku Gaali ni vavanuna vakwe vata va talwa na wena, maha zvontlhe u zvi kotako kasi u mu hlula.”*

34 Makunu Abhimeleki ni vanhu vontlhe lava a nga hi navo, va no vhuka ni wusiku va ya rindzela le Xekemi, na va avene hi mune wa mitlawa. 35 Laha Gaali, a n’wana wa Ebhedhi, a nga huma a ya yima laha nyangweni ya dhoropa, Abhimeleki ni vanhu vakwe va no huma hi lomu va nga fihlele kona. 36 A cikhati leci Gaali a nga wona vanhu i no byela Zebhula, aku: “Ku woneka vanhu va relelako hi le zvitsungeni.” Kanilezvi Zebhula aku kakwe: “Mindzhuti ya zvitsunga leyi u yi wonako, a hi vanhu.”

37 Hi ndzhako ka cikhati, Gaali i te ngalo: “Hi nga wona a vanhu va relelako hi laha cikari ka tiko, ni ntlawa wu tako hi ndlela ya sinya ya hombe ya Meyonenime.” 38 Zebhula a hlamula, aku: “Ma kwihi a matshandza ya wena, yaku: ‘Himani Abhimeleki wo kala hi mu tirela?’+ A hi valava u nga va poyila ke? Huma u yalwa navo.”

39 Hikwalaho, Gaali i no huma mahlweni ka varangeli va Xekemi a yalwa na Abhimeleki. 40 Abhimeleki i no hlongolisela Gaali, Gaali a tsutsuma. Ku no dawa vanhu vo tala kala le nyangweni ya dhoropa.

41 Abhimeleki i no simama a hanya le Aruma. Zebhula+ i no hlongola Gaali ni vamakabye vakwe va huma Xekemi. 42 Hi mandziko wa kona a vanhu va no huma vaya masin’wini. Abhimeleki i no byeliwa mhaka leyo. 43 Hikwalaho, i no teka vanhu a va avanyisela hi mitlawa yinharu va tshama va rindzela lomu masin’wini. A cikhati leci a nga wona vanhu na va huma lomu dhoropeni, i no va dhumela a va daya. 44 Abhimeleki ni mitlawa yakwe va no tshinela va ya yima nyangweni ya dhoropa, a mitlawa yimbiri na yi dhumela vontlhe va nga hi le masin’wini yi va daya. 45 Abhimeleki i nolwa ni dhoropa a siku gontlhe, a gi hlula a teka, a daya a vanhu va nga tshama lomo, a gi khungumula+ a tlhela a gi xwanyela munyu.

46 Laha a varangeli vontlhe va likhokhola* la Xekemi va ngazwa lezvo, va no tekela ku tsutsuma vaya khokholeni ga yindlu* ya El-Bherite.+ 47 Zvalezvi Abhimeleki a nga byeliwa lezvaku vontlhe a varangeli va likhokhola* la Xekemi va tlhangene, 48 Abhimeleki ni vavanuna vontlhe lava a nga hi navo va no kandziha Citsungeni ca Zalmoni. Abhimeleki i no teka chapo a tsema dhavi ga sinya a gi tlhateka makatleni yakwe, a gumesa a byela vanhu lava a nga hi navo, aku: “Hatlisani mu maha lezvi mu nga ndzi wona na ndzi maha!” 49 Hikwalaho, a vanhu vontlhe vonawu va no tsema madhavi va landzela Abhimeleki. Va no chetela madhavi laha khokholeni, va gi hisa. Hikwalaho, a vanhu vontlhe va likhokhola* la Xekemi vonawu va nofa; va wa hi cipimo ca 1000 wa vavanuna ni vavasati.

50 Abhimeleki i noya Tebheza, a ya dhumela dhoropa ga Tebheza, a gi teka. 51 Ku wa hi ni likhokhola* lo tiya laha cikari ka dhoropa. A vavanuna vontlhe ni vavasati ni vontlhe a varangeli va dhoropa va no tsutsumela lomo, va ya ti vhalela va tlhela va kandziha le hehla ka likhokhola. 52 Abhimeleki i noya likhokholeni* a ya li dhumela. I no tshinela laha nyangweni ya likhokhola kasi a li hisa hi ndzilo. 53 Makunu, a wasati wo kari i no hoxela a ribye ga le hehla ga cigayo gi taba hloko ya Abhimeleki yi pfotloka.+ 54 Abhimeleki i no tekela ku vitana a nandza legi gi nga mu khomela a matlhari yakwe, aku: “Hlomula a cipadha ca wena u ndzi daya kasi va nga wuli hi mina, vaku: ‘Abhimeleki i delwe hi wasati.’” Hikwalaho, a nandza gakwe gi no mu tlhava afa.

55 Laha a vavanuna va ka Izrayeli va nga wona lezvaku Abhimeleki i file, vontlhe va no tlhela mitini yabye. 56 Hi ndlela leyo, Nungungulu i no tlhelisela Abhimeleki a kubiha loku a nga mahele papayi wakwe, hi lezvi Abhimeleki a nga daya a 70 wa vamakabye vakwe.+ 57 Nungungulu i no tlheliselawu tihlokweni ta vavanuna va Xekemi a kubiha kontlhe loku va nga ku mahile. Hikwalaho, a ciruko ca Jothamu,+ a n’wana wa Jerubhaali,+ ci no tatiseka ka vona.

10 Andzhako ka Abhimeleki, ku no humelela Tola, a n’wana wa Puwa, a n’wana wa Dhodho, a wanuna wa ka Isakari, a ponisa Izrayeli.+ I wa hanya le Xamira le tikweni ga zvitsunga ga Efrayime. 2 I no lamula Izrayeli hi 23 wa malembe, a gumesa afa a lahliwa le Xamira.

3 Andzhako kakwe, ku no humelela Jayira, a muGileyadhe, a lamula Izrayeli hi 22 wa malembe. 4 I wa hi ni 30 wa vana va nga khilela 30 wa timbongola, na va hi ni 30 wa madhoropa, lawa ma ha vitaniwako ku Havhote-Jayira+ kala ni nyamutlha lezvi; ma le tikweni ga Gileyadhe. 5 Andzhako ka lezvo, Jayira i nofa a lahliwa le Kamoni.

6 A vaIzrayeli va no phinda kambe va maha zvilo zva kubiha mahlweni ka Jehovha,+ va sangula ku tirela vaBhaali+ ni zvifananiso zva Axtarte, ni vanungungulu va Aramu,* ni vanungungulu va Sidhoni, ni vanungungulu va Mowabhi,+ ni vanungungulu va vaAmoni,+ ni vanungungulu va vaFilistiya.+ Va no fularela Jehovha va tsika ku mu tirela. 7 A zanga ya Jehovha yi no vhindlukela a vaIzrayeli. Hikwalaho, i no va nyikela* canjeni ga vaFilistiya ni ga vaAmoni.+ 8 Va no korokisa a vaIzrayeli va va xanisa nguvhu ka lembe lego. Hi 18 wa malembe, va no xanisa a vaIzrayeli vontlhe lava va nga hanya tlhelweni ga Jordhani lomu ku nga hi tiko ga vaAmori, le Gileyadhe. 9 A vaAmoni vonawu va wa tlhatuka Jordhani va yalwa na Judha, na Bhenjamini ni yindlu ya ka Efrayime; a vaIzrayeli va wa hi kuxanisekeni ka hombe nguvhu. 10 Makunu a vaIzrayeli va no rila ka Jehovha va kombela ku vhuniwa,+ vaku: “Hi ku wonhele, hakuva hi fularele Nungungulu wa hina hi ya tirela vaBhaali.”+

11 Kanilezvi Jehovha i no hlamula vaIzrayeli, aku: “Kasi a hi mina ndzi nga mu ponisa ka vaGibhite,+ ni ka vaAmori,+ ni ka vaAmoni, ni ka vaFilistiya,+ 12 ni ka vaSidhoni, ni ka vaAmaleki, ni ka vaMidhiyani, a cikhati leci va nga mu xanisa ke? Laha mu nga rila ka mina, ndzi no mu ponisa canjeni gabye. 13 Kanilezvi mu no ndzi fularela mu tirela van’wani vanungungulu,+ hikwalaho ndzi nga ta ha mu ponisa kambe.+ 14 Fambani ka vanungungulu lava mu nga va hlawula, mu ya kombela vona kasi va mu vhuna.+ Va wa mu ponise a cikhati leci mu xanisekako.”+ 15 Kanilezvi a vaIzrayeli va no hlamula Jehovha, vaku: “Hi wonhile. Hi mahe ni cihi u ci wonako na ci hi cinene mahlweni ka wena. Kanilezvi, ha ku kombela, hi ponise nyamutlha.” 16 Va no susa a vanungungulu va vamatiko cikari kabye, va sangula ku tirela Jehovha,+ laha ka ku a nga ha gwenti a ku wona a* kuxaniseka ka Izrayeli.+

17 Makunu a vaAmoni+ va no vitanisiwa va ta gova le Gileyadhe. Hikwalaho, a vaIzrayeli va no hlengeletana va gova le Mizpa. 18 A vanhu va Gileyadhe ni tihosana ta kona va no wutisana, vaku: “Himani a to hi rangela hi yalwa ni vaAmoni?+ Yaloye i tava hosana ya vontlhe lava va tshamako lomu Gileyadhe.”

11 Jefta,+ a muGileyadhe, i wa hi musochwa wa nhenha; i wa hi n’wana wa cibhayi. A papayi wakwe ku wa hi Gileyadhe. 2 A sati wa Gileyadhe yenawu i no mu pswalela vana. A cikhati leci a vana va sati wakwe va nga kula va no hlongola Jefta, vaku: “U nga tava ni tshomba ndlwini ya papayi wa hina hakuva u n’wana wa wasati mun’wani.” 3 Hikwalaho, Jefta i no tsutsuma a vamakabye vakwe a ya tshama tikweni ga Tobha. A vanyamijiri vokari va no patsana na Jefta, va mu landzela.

4 Andzhako ka cikhatana, a vaAmoni va nolwa ni vaIzrayeli.+ 5 Laha a vaAmoni va ngalwa ni vaIzrayeli, a madhota ya Gileyadhe ma no tekela ku landza Jefta le tikweni ga Tobha. 6 Ma no byela Jefta, maku: “Wuya u ta maha a komandante wa hina kasi hilwa ni vaAmoni.” 7 Kanilezvi Jefta i no wutisa a madhota ya Gileyadhe, aku: “Kasi a hi n’wina mu nga ndzi venga nguvhu laha ka kuza mu ndzi hlongola kaya ka papayi wa mina ke?+ Hikuyini mu ndzi telako lezvi mu zwako a kuxaniseka?” 8 A madhota ya Gileyadhe ma no hlamula Jefta, maku: “Hi caleco ci hi mahako hi wuya ka wena. Loku u famba na hina u yalwa ni vaAmoni, u tava murangeli wa hina hontlheni hi tshamako Gileyadhe.”+ 9 Hikwalaho, Jefta i no byela madhota ya Gileyadhe, aku: “Loku mu tlhela na mina ndzi yalwa ni vaAmoni, Jehovha a va nyikela canjeni ga mina, hakunene ndzi tava murangeli wa n’wina!” 10 A madhota ya Gileyadhe ma no hlamula Jefta, maku: “Jehovha i wave kustumunyu cikari ka hina, loku hi nga mahi lezvi u wulako.” 11 Hikwalaho, Jefta i no famba ni madhota ya Gileyadhe. A vanhu va no mu maha murangeli wabye ni komandante wabye. Jefta i no phinda magezu yakwe wontlhe mahlweni ka Jehovha, le Mizpa.+

12 Jefta i no rumela zvirun’wa ka hosi ya vaAmoni,+ zvi yaku: “Cini ndzi nga ku gohela a kuza u dhumela a tiko ga mina?” 13 Hikwalaho, a hosi ya vaAmoni yi no byela a zvirun’wa zva Jefta, yiku: “Hi lezvi a vaIzrayeli va nga teka a tiko ga mina a cikhati leci va nga huma hi Gibhite,+ kusukela le Arnoni+ kala le Jabhoke, zvi famba kala le Jordhani.+ Makunu ndzi tlhelisele a tiko ga mina hi kurula.” 14 Kanilezvi Jefta i no rumela a zvirun’wa zvi tlhela ka hosi ya vaAmoni, 15 zvi yaku:

“Jefta i ngalo: ‘Izrayeli a nga tekangi a tiko ga vaMowabhi,+ ne hambu a tiko ga vaAmoni,+ 16 hakuva a cikhati leci a vaIzrayeli va nga huma hi Gibhite, va fambile hi lomu ciwuleni kala Bimbini go Pswhuka,+ vaza va chikela Kadhexe.+ 17 Na va hi laho, a vaIzrayeli va no rumela zvirun’wa ka hosi ya Edhomi,+ zvi yaku: “Hi tsike hi tsemakanya hi lomu tikweni ga wena”, kanilezvi a hosi ya Edhomi a yi vhumelangi. Va no rumela gezu kambe ka hosi ya Mowabhi,+ kanilezvi yonawu a yi vhumelangi. Hikwalaho, a vaIzrayeli va no simama ku tshama le Kadhexe.+ 18 A cikhati leci a vaIzrayeli va nga ha famba lomu ciwuleni va no potsa a tiko ga Edhomi+ ni tiko ga Mowabhi, va fambela mutsuwuka-gambo wa tiko ga Mowabhi+ va ya nyima le Arnoni. A va tlulangi mbhingano wa Mowabhi,+ hakuva Arnoni i wa hi mbhingano wa Mowabhi.

19 “‘Andzhako ka lezvo, Izrayeli i no rumela zvirun’wa ka Sihoni, a hosi ya vaAmori, a hosi ya Hexbhoni, aku: “Hi tsike hi hundza hi lomu tikweni ga wena hiya tikweni ga hina.”+ 20 Kanilezvi Sihoni i wa nga mu tsumbi Izrayeli, hikwalaho a nga mu tsikangi a hundza hi lomu tikweni gakwe. Makunu Sihoni i no hlengeleta a vanhu vakwe vontlhe a ya gova Jahaza, alwa na Izrayeli.+ 21 Hi kota ya lezvo, Jehovha, a Nungungulu wa Izrayeli, i no nyikela Sihoni ni vanhu vakwe vontlhe canjeni ga vaIzrayeli, hikwalaho a vaIzrayeli va no va hlula va teka a tiko gontlhe legi a vaAmori va nga akile ka gona giva tshomba yabye.+ 22 Hi ndlela leyo, va no teka a tiko gontlhe ga vaAmori kusukela le Arnoni kala le Jabhoke, ni kusukela le ciwuleni kala le Jordhani.+

23 “‘Hi Jehovha, a Nungungulu wa vaIzrayeli, a nga hlongola a vaAmori mahlweni ka vanhu vakwe, a vaIzrayeli.+ Makunu lezvi wena u lava ku hlongola a vaIzrayeli ke? 24 Kasi wena a wu teki ni cihi leci a nungungulu wa wena Kemoxe+ a ku nyikako ke? Hikwalaho, hina hi ta hlongola vontlhe lava Jehovha, a Nungungulu wa hina, a va hlongolako mahlweni ka hina.+ 25 Wena wova chukwana ku hundza Bhalaki,+ a n’wana wa Zipore, a hosi ya Mowabhi ke? I tshukile a phikizana na Izrayeli kutani kulwa naye ke? 26 A cikhati leci a vaIzrayeli va nga tshama 300 wa malembe le Hexbhoni ni zvidhoropaneni zva kona,+ ni le Arowera ni zvidhoropaneni zva kona, ni madhoropeni wontlhe ma nga mbhirini ya Arnoni, hikuyini mu nga kala ku zama ku tlhela mu ma teka ka cikhati leco?+ 27 Mina a ndzi ku gohelangi nchumu; kanilezvi hi wena u wonhako hi ku ndzi dhumela. Jehovha, a Mulamuli,+ i wa lamule nyamutlha cikari ka vaIzrayeli ni vaAmoni.’”

28 Kanilezvi a hosi ya vaAmoni a yi ingisangi a timhaka leti ti nga rumelwa hi Jefta.

29 A moya wa Jehovha wu nota ka Jefta,+ a tsemakanya a tiko ga Gileyadhe, ni ga Manase, aya le Mizpa wa Gileyadhe,+ a gumesa a hundza aya ka vaAmoni.

30 Jefta i no maha cifungo ka Jehovha,+ aku: “Loku u nyikela a vaAmoni canjeni ga mina, 31 ni wihi a to huma hi laha nyangweni ya yindlu ya mina, a ndzi khinga loku ndzi wuya hi kurula na ndzi hlulile a vaAmoni i tava wa Jehovha.+ Ndzi ta mu nyikela ava munyikelo wa kuhiswa.”+

32 Hikwalaho, Jefta i noya a yalwa ni vaAmoni, Jehovha a va nyikela canjeni gakwe. 33 I no va hlasela, a dayela vanhu vo tala kusukela Arowera kala Minite (a hlasela a 20 wa madhoropa), zvi famba kala le Abhela-Keramime. Hikwalaho, a vaAmoni va no hluliwa hi vaIzrayeli.

34 Hi kugumesa, Jefta i no tlhela kaya kakwe le Mizpa.+ A nhanyana wakwe i no huma a mu khinga, na aba mutandanda, a kina! A nhanyana loye i wa hi yena yece a n’wana wa Jefta. I wa nga hi na n’wana wa mufana, saseka yaloyi wa nhanyana basi. 35 Laha Jefta a nga wona a nhanyana wakwe, i no handzula tinguwo takwe, aku: “O, n’wananga! U ndzi pandzile mbilu, hakuva hi wena ndzi nga ku hlongola. Ndzi vhululile a nomu wa mina* ka Jehovha, a ndzi nge tlheleli ndzhako.”+

36 Yena aku: “Papayi, loku u vhululile nomu wa wena* ka Jehovha, ndzi mahe lezvi u tsumbisileko,+ hakuva Jehovha i ku photele ka valala va wena, a vaAmoni.” 37 I no tlhela a byela a papayi wakwe, aku: “Ndzi kombela nchumu wun’we: Ndzi tsike ndziya zvitsungeni ndzi ya tshama ndzoce a tihweti timbiri ni vanghana va mina va cisati ndzi rilela a wunhwana ga mina.”*

38 Yena aku: “Famba!” I no mu tsika a famba kasi a ya tshama tihweti timbiri. Hikwalaho, i noya zvitsungeni ni vanghana vakwe a ya rilela a wunhwana gakwe. 39 Kumbheleni ka tihweti timbiri, i no tlhela ka papayi wakwe, a ta maha lezvi a nga hlambanyile hi yena.+ A nga zangi a hlengela masango ni wanuna. Zvi no maha mukhuwo* le Izrayeli a ku, 40 lembe ni lembe, a vanhanyana va ka Izrayeli vaya va ya dzundza a nhanyana wa Jefta, a muGileyadhe, mune wa masiku hi lembe.

12 Makunu a vavanuna va le Efrayime va no vitanisiwa, va tlhatuka vaya le Zafoni,* va yaku ka Jefta: “Hikuyini u nga kala ku hi vitana hi famba na wena a cikhati leci u nga tlhatuka u yalwa ni vaAmoni ke?+ Hi lava ku ku hisa ni yindlu ya wena.” 2 Kanilezvi Jefta i no va hlamula, aku: “Mina ni vanhu va mina hi wa hi lomu ka yimpi ya hombe ni vaAmoni. Ndzi mu vitanile kasi mu ta ndzi vhuna, kanilezvi a mu ndzi ponisangi canjeni gabye. 3 A cikhati leci ndzi nga wona ku mu nga ta ndzi ponisa, ndzi no veka wutomi ga mina mhangweni,* ndzi yalwa ni vaAmoni,+ Jehovha a se va nyikela canjeni ga mina. Makunu hikuyini mu tako mu talwa na mina nyamutlha?”

4 Andzhako ka lezvo, Jefta i no hlengeleta a vavanuna vontlhe va Gileyadhe,+ valwa ni va ka Efrayime; a vavanuna va Gileyadhe va no hlula a va ka Efrayime, lava va nga te: “N’wina vaGileyadhe mu nga tikweni ga Efrayime ni ga Manase mova ntsena vanhu va tsutsumileko hi ka vaEfrayime.” 5 Gileyadhe i no vhala lomu a vanhu va tlhatukako hi kona a congo wa Jordhani+ mahlweni ka vaEfrayime. Loku a munhu wa le Efrayime a zama ku tsutsuma, aku: “Ndzi tsikeni ndzi tlhatuka”, a vavanuna va Gileyadhe va wa mu wutisa, vaku: “U wa ka Efrayime ke?” Loku aku: “Ahihi!” 6 va waku: “Wula ku Xibholete.” Kanilezvi i waku: “Sibholete”, hakuva i wa nga zvi koti ku wula khwatsi a gezu lego, va se mu khoma va mu daya lomu ka matshamu lawa ku nga tlhatukiwa hi kona a Jordhani. Hikwalaho, ku no dawa a 42 000 wa va ka Efrayime ka cikhati leco.

7 Jefta i no lamula Izrayeli a 6 wa malembe. Andzhako ka lezvo, Jefta, a muGileyadhe, i nofa a lahliwa dhoropeni gakwe le Gileyadhe.

8 Andzhako ka Jefta, Ibzani, wa le Bhetlehema, i no lamula Izrayeli.+ 9 I wa hi ni 30 wa vafana ni 30 wa vanhanyana. I no rumela a vanhanyana vakwe va ya chadha ni vavanuna va le handle ka lixaka lakwe, a tlhela a neha 30 wa vavasati va ta chadha ni vafana vakwe. Ibzani i no lamula Izrayeli a 7 wa malembe. 10 Andzhako ka lezvo, Ibzani i nofa a lahliwa le Bhetlehema.

11 Andzhako ka Ibzani, Eloni, a muZebhuloni, i no lamula Izrayeli. I lamulile Izrayeli a 10 wa malembe. 12 Andzhako ka lezvo, Eloni, a muZebhuloni, i nofa a lahliwa le Ayijaloni, tikweni ga Zebhuloni.

13 Andzhako ka Eloni, Abdhoni, a n’wana wa Hileli, a muPiratoni, i no lamula Izrayeli. 14 Abdhoni i wa hi ni 40 wa vafana ni 30 wa vazukulu, va nga khilela a 70 wa timbongola. I no lamula Izrayeli a 8 wa malembe. 15 Andzhako ka lezvo, Abdhoni, a n’wana wa Hileli, a muPiratoni, i nofa a lahliwa le Piratoni, tikweni ga Efrayime, citsungeni ca vaAmaleki.+

13 A vaIzrayeli va no maha kambe a zvilo zva kubiha mahlweni ka Jehovha,+ Jehovha a va nyikela canjeni ga vaFilistiya+ a 40 wa malembe.

2 Cikhatini leco, ku wa hi ni wanuna wa le Zora,+ wa lixaka la ka Dhani;+ a vito gakwe ku wa hi Manowa;+ a sati wakwe i wa hi ngon’wa, i wa nga hi na n’wana.+ 3 Ka siku go kari, a ngilozi ya Jehovha yi no woneka ka wasati loye, yiku kakwe: “Wa zvi wona, wena u ngon’wa. Kanilezvi u ta xura nyimba u pswala n’wana wa mufana.+ 4 Makunu u nganwi vhinyo kutani byala,+ ne u ngagi nchumu wo kala ku hlazveka.+ 5 U ta xura nyimba u pswala n’wana wa mufana; a likari* li nga tshuki li henya a hloko yakwe,+ hakuva a n’wanana loye i tava muNazira wa Nungungulu kusukela kupswaliweni.* Hi yena a to sangula ku tlhatlhisa a vaIzrayeli canjeni ga vaFilistiya.”+

6 A wasati loye i noya a ya byela nuna wakwe, aku: “Ku tile a munhu wa Nungungulu wa lisine ka mina. I wa ku khwatsi i ngilozi ya Nungungulu wa lisine, niku i wa chavisa nguvhu. A ndzi mu wutisangi ku ita hi kwihi, ne a nga ndzi byelangi a vito gakwe.+ 7 Kanilezvi i ndzi byelile lezvi: ‘U ta xura nyimba u pswala n’wana wa mufana. Makunu u nganwi vhinyo kutani byala, ne u ngagi nchumu wo kala ku hlazveka, hakuva a n’wanana loye i tava muNazira wa Nungungulu kusukela kupswaliweni* kala ka siku legi a tofa hi gona.’”

8 Manowa i no khongotela Jehovha, aku: “O Jehovha, ndzi kombela lezvaku a munhu wa Nungungulu wa lisine loyi u nga mu rumele a wuya kambe a ta hi gondzisa lezvi hi faneleko ku maha hi n’wanana loyi a to pswaliwa.” 9 Hikwalaho, a Nungungulu wa lisine i nozwa Manowa; a ngilozi ya Nungungulu wa lisine yi no wuya kambe ka wasati na a tshamile lomu masin’wini; kanilezvi Manowa, a nuna wakwe, i wa nga hi kona laho. 10 A wasati i no tekela ku tsutsuma a ya byela a nuna wakwe, aku: “A wanuna loyi a nga ndzi tele a siku lego i wonekile kambe ka mina.”+

11 Manowa i no suka a famba ni sati wakwe, aya ka munhu loye a yaku: “Hi wena u nga wulawula ni sati wa mina?” Aku: “Hi mina.” 12 Manowa aku: “Ngha a magezu ya wena ma maheka! Kanilezvi a n’wanana loye i ta hanya wutomi muni? Kona i ta tira yini?”+ 13 Hikwalaho, a ngilozi ya Jehovha yi no byela Manowa, yiku: “A sati wa wena i wa hlayise zvontlhe lezvi ndzi mu byelileko.+ 14 A ngagi mihandzu ya vhina,* a nganwi vhinyo kutani byala,+ ne a ngagi nchumu wo kala ku hlazveka.+ I wa hlayise zvontlhe lezvi ndzi mu layileko.”

15 Makunu Manowa i no byela ngilozi ya Jehovha, aku: “Tshama hi ku longisela cimbutana.”+ 16 A ngilozi ya Jehovha yi no byela Manowa, yiku: “Hambu loku ndzi tshama ndzi nga taga zvakuga zva wena; kanilezvi loku u lava ku zvi nyikela kota munyikelo wa kuhiswa ka Jehovha, zvi nyikele.” Manowa i wa nga zvi tivi ku a munhu loye i ngilozi ya Jehovha. 17 Hi kulandzela, Manowa i no wutisa a ngilozi ya Jehovha, aku: “Hi wena mani,+ kasi hi ku dzundza a cikhati leci zvi to maheka lezvi u nga wula?” 18 A ngilozi ya Jehovha yiku kakwe: “Hikuyini u wutisako a vito ga mina, kuveni ga hlamalisa?”

19 Makunu Manowa i no teka a cimbutana ni munyikelo wa tindzhoho a zvi nyikela ka Jehovha laha ribyeni. I* no maha zvilo zvo hlamalisa, Manowa ni sati wakwe na va zvi cuwukela. 20 Laha a malangavi ya laha alatini ma nga kari ma vhura maya hehla, a ngilozi ya Jehovha yi no tlakukela tilweni hi lomu ka malangavi, Manowa ni sati wakwe na va zvi cuwukela. Zvalezvo, va nowa lahasi hi tinghohe tabye. 21 A ngilozi ya Jehovha a ya ha wonekangi kambe ka Manowa ni sati wakwe. Makunu Manowa i no zvi tiva lezvaku yi wa hi ngilozi ya Jehovha.+ 22 Manowa i no byela sati wakwe, aku: “Hi tshama hi file hakuva hi wonile Nungungulu.”+ 23 Kanilezvi a sati wakwe aku: “Loku Jehovha i wo lava ku hi daya, na a nga amukelangi a munyikelo wa hina wa kuhiswa+ ni munyikelo wa tindzhoho; na a nga hi kombangi zvontlhe lezvi, ne na a nga hi byelangi ni cin’we ca zvilo lezvi.”

24 Hi ndzhako ka cikhati, a wasati i no pswala n’wana wa mufana a mu chula ku hi Samsoni.+ Laha a mufanyana loye a nga kari a kula, Jehovha i no simama ku mu katekisa. 25 Hi kufamba ka cikhati, a moya wa Jehovha wu no sangula ku tira hehla kakwe+ le Mahane-Dhani,+ cikari ka Zora ni Extawoli.+

14 Samsoni i no relela aya le Timna. Kwaseyo i no ya wona a wasati wa muFilistiya.* 2 Hikwalaho, i no ya byela a papayi wakwe ni mamani wakwe, aku: “Le Timna, ndzi wonile wasati wa muFilistiya a nga ndzi koka mahlo, ndzi lava ku mu ya ndzi tekela yena a maha sati wa mina.” 3 Kanilezvi a papayi wakwe ni mamani wakwe va te ngalo: “Wo vhumala wasati cikari ka maxaka ya wena ni cikari ka vanhu vontlhe va tiko ga hina?+ U lava ku ya teka sati cikari ka vaFilistiya, a vanhu vo kala ku mahiwa wukwera* ke?” Samsoni i no byela a papayi wakwe, aku: “Ndzi tekele yena, hakuva hi yena wa munene ka mina.”* 4 A papayi wakwe ni mamani wakwe va wa nga zvi tivi ku a mhaka leyi yita hi ka Jehovha hakuva i* wa lavetela ndlela ya ku vhukela vaFilistiya, hakuva a vaFilistiya va wa fumela a vaIzrayeli cikhatini leco.+

5 Hikwalaho, Samsoni i no relela aya Timna ni papayi wakwe ni mamani wakwe. A cikhati leci a nga chikela zvivhineni* zva Timna, i no telwa hi nghala* na yi bhonga. 6 Zvalezvo a moya wa Jehovha wu no mu nyika ntamu,+ a yi handzula hi laha cikari a ku khwatsi munhu a handzulako a cimbutana hi laha cikari hi mandla yakwe. Kanilezvi a nga byelangi a papayi wakwe ni mamani wakwe lezvi a nga maha. 7 I no gumesa a relela a ya wulawula ni wasati. A wasati loye i wa ha hi yena wa munene matihlweni ya Samsoni.+

8 Hi ndzhako ka cikhati, laha Samsoni a nga kari a tlhela ku ya mu teka vaya kaya,+ i no hambuka a ya wona a cirumbi ca nghala. Laha ka cirumbi leco ku wa hi ni tinyoxi ni wulombe. 9 I no hakula wulombe lego hi mandla aga na a kari a famba. A cikhati a nga kuma a papayi wakwe ni mamani wakwe i no va nyika go kari vaga. Kanilezvi a nga va byelangi lezvaku a wulombe lego i gi hakulile ka cirumbi ca nghala.

10 A papayi wakwe i no relela aya ka wasati. Samsoni i no maha mubuzo seyo, hakuva hi zvalezvo a majaha ma nga tolovela ku maha. 11 A cikhati va nga mu wona va no mu nehela 30 wa majaha kasi ma mu pangalata. 12 Samsoni aku kabye: “Ndza ha mu byela litekatekani. Loku mu zvi kota ku li landzula* ndzeni ka 7 wa masiku ya mubuzo, ndzi ta mu nyika 30 wa tinguwo ta wukene* ni 30 wa zvipani zva tinguwo. 13 Kanilezvi loku mu nga zvi koti ku li landzula, hi n’wina mu to ndzi nyika 30 wa tinguwo ta wukene* ni 30 wa zvipani zva tinguwo.” Vona vaku: “Hi byele litekatekani la wena, hi lava ku lizwa.” 14 Yena aku kabye:

Hi masiku manharu, a va zvi kotangi ku landzula a litekatekani lelo. 15 Hi siku ga wumune, va no byela a sati wa Samsoni, vaku: “Kalavela a nuna wa wena+ a hi landzulela a litekatekani. Loku u nga mahi lezvo, hi ta hisa wena ni va yindlu ya papayi wa wena. Kasi mu wa hi vitanela ku ta hi tekela zva hina ke?” 16 Hikwalaho, a sati wa Samsoni i noya a ya rila kakwe, aku: “Wa ndzi venga; a wu ndzi randzi.+ U va byelile a litekatekani a vanhu va ka hina, kanilezvi a wu ndzi byeli a tlhamuselo wa kona.” Samsoni aku kakwe: “Hambu a papayi wa mina ni mamani wa mina a ndzi va byelangi! U alakanya ku ndzi nga byela wena ke?” 17 Kanilezvi a sati wakwe i no simama ku mu rilela a masiku wontlhe ya mubuzo wa 7 wa masiku. Hi kota ya lezvi a nga mu kurumeta, Samsoni i no karala a mu byela hi siku ga wu 7. Andzhako ka lezvo, a wasati loye i noya ka vanhu vakwe a ya va byela a tlhamuselo wa litekatekani.+ 18 Hi siku ga wu 7, a gambo na gi nga se pela,* a vanhu va lomu dhoropeni va te ngalo kakwe:

Samsoni i no va hlamula, aku:

19 A moya wa Jehovha wu no mu nyika ntamu,+ a relela aya Axkeloni+ a ya daya 30 wa vavanuna va vaFilistiya, a teka tinguwo tabye a ya nyika lava va nga landzulile a litekatekani.+ I no tlhela ka papayi wakwe na a zangarile nguvhu.

20 A sati wa Samsoni+ i no nyikelwa ka gin’we ga majaha lawa ma nga pangalata Samsoni.+

15 Andzhako ka cikhatana, hi masiku ya ku tshovela trigo, Samsoni i noya vhuxela a sati wakwe, a mu yela ni cimbutana. I te ngalo: “Ndzi lava kuya ka sati wa mina lomu kwartwini.” Kanilezvi a papayi wa sati wakwe a nga mu tsikangi a nghena. 2 A papayi wa sati wakwe i te ngalo: “Ndzi wa alakanya ku ‘wa mu venga’,+ hikwalaho ndzi mu nyikele ka jaha legi gi nga ku pangalata.+ A ndzisana yakwe a yi sasekangi ku hundza yena ke? Teka yona, u tsika yena.” 3 Samsoni aku: “A khati legi, a vaFilistiya va nga ndzi soli loku ndzi va lamata.”

4 Hikwalaho, Samsoni i noya khomela a 300 wa tinghowo.* Hi kulandzela, i no teka zvihlahle, a bohelela tinghowo hi timbiri-timbiri hi midhoza, a gumesa a vekela cihlahle cin’we laha cikari ka midhoza leyo a nga yi bohelele. 5 I no gumesa a lumeka ndzilo lomu ka zvihlahle a tsika a tinghowo* ti nghena lomu masin’wini ya timbewu ta vaFilistiya. I no hisa zvontlhe, kusukela ka tinyandza ta timbewu leti ti nga tsemelelwe kala ka leti ti nga ha yimile, zvin’we ni zvivhina* ni miolivha.

6 A vaFilistiya va no wutisa, vaku: “Himani a nga maha lezvi?” Va no byeliwa ku: “Hi Samsoni, a mwane wa muTimna, hi lezvi a nga teka a sati wakwe a mu nyikela ka jaha legi gi nga mu pangalata”.+ Hi kota ya lezvo, a vaFilistiya va no kandziha va ya hisa a wasati loye ni papayi wakwe.+ 7 Samsoni aku kabye: “Kota lezvi mu nga maha lezvi, ndzi nga ta mu tsika kala ndzi ti photela ka n’wina.”+ 8 Makunu i no va daya hi mun’we mun’we, a hlasela vanhu vo tala. Andzhako ka lezvo, i no relela a ya tshama ka mhako* ya ribye ga Etame.

9 Andzhako ka cikhati, a vaFilistiya va no kandziha va ya gova Judha, va tata a tiko ga Lehi.+ 10 A vavanuna va ka Judha va no va wutisa, vaku: “Hikuyini mu tako mu ta hi vhukela?” Vona vaku: “Hi tela ku ta khoma* Samsoni, hi mu maha zvalezvi a nga hi maha.” 11 Hikwalaho, a 3000 wa vavanuna va ka Judha va no relela kala mhakweni* ya ribye ga Etame, va ya byela Samsoni, vaku: “A wu zvi tivi ku hi fumelwa hi vaFilistiya ke?+ Makunu hikuyini u hi maheleko lezvi?” I te ngalo kabye: “Ndzi va mahile zvalezvi va nga ndzi maha.” 12 Kanilezvi va te ngalo kakwe: “Hi tele ku ta ku khoma* hi ku nyikela canjeni ga vaFilistiya.” Zvonake Samsoni aku: “Hlambanyani lezvaku mu nga ta ndzi dhumela.” 13 Va te ngalo kakwe: “Ahihi, hi to ku boha ntsena hi ku nyikela canjeni gabye, kanilezvi hi nga ta ku daya.”

Hikwalaho, va no mu boha hi tingoti timbiri ta tiswa va mu humesa lomu mhakweni. 14 A cikhati leci a nga chikela le Lehi, a vaFilistiya va no kanyuluka na va giyagiya laha va nga mu wona. Zvonake a moya wa Jehovha wu no mu nyika ntamu,+ a tingoti ti nga bohile a mawoko ti ku khwatsi tihindza ta wukene* ti swako hi ndzilo, ti nyeka tiwa lahasi.+ 15 I no kuma a hlaya yiswa ya mbongola ya matsune, a rola a daya hi yona a 1000 wa vavanuna.+ 16 Zvonake Samsoni i te ngalo:

“Hi hlaya ya mbongola ndzi mahile nhulu, ina, a tinhulu timbiri!

Hi hlaya ya mbongola ndzi dele a 1000 wa vavanuna.”+

17 Zvalezvi a nga mbheta ku wulawula, i no hoxa a hlaya leyo a tlhela a chula a wutshamu lego ku Ramat-Lehi.*+ 18 Andzhako ka lezvo, i nozwa tora ga hombe, a rila ka Jehovha, aku: “Hi wena u nyikileko a nandza ga wena a kuhlula loku ka hombe. Kanilezvi u lava ku ndzi tsika ndzifa hi tora, ndzi wela canjeni ga vanhu vo kala ku mahiwa wukwera* ke?” 19 Hikwalaho, Nungungulu i no pandza a nkele wu nga hi le Lehi, ku khulunga mati hi ka wona.+ Laha a nganwa, a moya* wakwe wu no wuya kakwe, a se tiya. Hikwalaho, i no chula a wutshamu lego ku En-Hakore.* Ga ha hi kona le Lehi kala nyamutlha.

20 Samsoni i no lamula a vaIzrayeli a 20 wa malembe masikwini ya vaFilistiya.+

16 Ka khati go kari, Samsoni i noya Gaza. Na a hi kwaseyo i no wona a wasati wa cibhayi, a se nghena laha kaya kakwe. 2 Va no byela vahanyi va Gaza, vaku: “Samsoni i lomu ka hina.” Hikwalaho, va no mu randzela va mu lavelela wusiku gontlhe laha nyangweni ya dhoropa. Va no miyela wusiku gontlhe, na va ti byela lezvi: “Hi ta mu daya ni mixo.”

3 Kanilezvi Samsoni i no etlela kala laha cikari ka wusiku. Laha cikari ka wusiku i no vhuka a khoma a tivati ta nyangwa ya dhoropa ni timhandze ta kona ta timbiri a ti simula ni cikwinyaro ca kona. I no ti rwala makatleni yakwe a famba nato kala le hehla ka citsunga ci cuwukeneko ni Hebroni.

4 Andzhako ka lezvo, i no randzana ni wasati wa le Nkoveni wa Soreka; a vito gakwe i wa hi Dhelila.+ 5 Makunu a tihosi ta vaFilistiya ti nota ka Dhelila ti taku: “Mu kalavele*+ a ku byela leci ci mu nyikako a ntamu wa hombe lowu a nga nawo ni lezvi hi nga mahako kasi hi mu hlula, hi mu boha, hi mu mbheta ntamu. Loku u maha lezvo, a mun’we ni mun’wani wa hina i ta ku nyika a 1100 wa zvingerengere zva prata.”

6 Hi ndzhako ka cikhati, Dhelila i no byela Samsoni, aku: “Hi nga ndzi byela lomu a ntamu wa wena wa hombe wu tako hi kona ni lezvi u nga bohiwako hi zvona u hluliwa.” 7 Samsoni aku kakwe: “Loku va ndzi boha hi 7 wa tisinga* ta tiswa, to kala ti nga se woma, ndzi ta mbhela ntamu ndzi fana ni vanhu van’wani.” 8 Hikwalaho, a tihosi ta vaFilistiya ti no mu tela ni 7 wa tisinga* ta tiswa, to kala ti nga se woma, a mu boha hi tona. 9 A vaFilistiya va no nghena va fihlala lomu kwartwini, Dhelila a banguleka, aku: “Samsoni, a vaFilistiya!” Zvalezvo i no phewula a tisinga* leto a ku khwatsi tihindza ta wukene* loku ti hisiwa hi ndzilo.+ A cihundla ca ntamu wakwe a ci tivekangi.

10 Makunu Dhelila i no byela Samsoni, aku: “U ndzi fayelisele, u ndzi hembela. Ndzi byele: U nga bohiwa hi yini?” 11 Aku kakwe: “Loku va ndzi boha hi tingoti ta tiswa ti kalako ti nga se tirisiwa, ndzi ta mbhela ntamu ndzi fana ni vanhu van’wani.” 12 Dhelila i no teka tingoti ta tiswa a mu boha hi tona a gumesa a banguleka, aku: “Samsoni, a vaFilistiya!” (A valaveleli va wa fihlele lomu kwartwini.) Zvalezvo i no phewula a tingoti ti nga bohile a mawoko yakwe a ku khwatsi o phewula a tihindza.+

13 Andzhako ka lezvo, Dhelila i no byela Samsoni, aku: “Kala lezvi wa ha ndzi fayelisela u ndzi hembela.+ Ndzi byele: U nga bohiwa hi yini?” Yena aku: “Tsondzela a misisi ya mina ya 7 yi lukilweko, hi lihindza la ku luka hi lona.” 14 Makunu i no yi tiyisa hi cikhongwani a gumesa a banguleka, aku: “Samsoni, a vaFilistiya!” Samsoni i no vhuka hi lomu wurongweni, a hlomula a cikhongwani ca ku luka hi cona ni lihindza la kona.

15 Dhelila aku kakwe: “U wulisa kuyini ku ‘ndza ku randza’,+ kuveni a mbilu ya wena yi kule na mina? Wontlhe a makhati lawa ya manharu u ndzi fayelisele, u nga ndzi byeli lomu a ntamu wa wena wa hombe wu tako hi kona.”+ 16 Kota lezvi siku ni siku a nga tshama hi ku mu kulumela, a mu karata, Samsoni i* no rereka a lava ni kufa.+ 17 Hi kugumesa, i no mu vhululela mbilu yakwe, aku: “A ndzi se tshuka ndzi tsemiwa misisi, hakuva ndzi muNazira wa Nungungulu kusukela kupswaliweni.*+ Loku ndzo tsemiwa misisi, a ntamu wa mina wu ta mbhela, ndzi rereka ndzi fana ni vontlhe a vanhu van’wani.”

18 Laha Dhelila a nga wona lezvaku i mu vhululele a mbilu yakwe, i no tekela ku vitanisa tihosi+ ta vaFilistiya, aku: “Ka khati legi ngonani hakuva i ndzi vhululele a mbilu yakwe.” Hikwalaho, a tihosi ta vaFilistiya ti nota kakwe na ti hi ni mali. 19 I no mu etlelisa lomu madzolweni yakwe; a vitana munhu a ta mu tsema a misisi yakwe ya 7 yi nga lukilwe. Dhelila i no sangula ku mu hlula hakuva a ntamu wakwe wu wa mbhela. 20 I no gumesa a banguleka, aku: “Samsoni, a vaFilistiya!” Samsoni i no vhuka hi lomu wurongweni, aku: “Ndzi ta huluka a ku fana ni makhati man’wani,+ ndzi ti tlhatlhisa.” Kanilezvi i wa nga zvi tivi lezvaku Jehovha i mu tsikile. 21 Hikwalaho, a vaFilistiya va no mu khoma va mu bhoxa a matihlo. Andzhako ka lezvo, va no relela naye Gaza; va no mu boha hi machini mambiri ya kobre. Samsoni i no maha mugayi wa timbewu lomu paxweni. 22 Kanilezvi a misisi yakwe yi no sangula ku kula kambe andzhako ka loku yi tsemilwe.+

23 A tihosi ta vaFilistiya ti no tlhangana ti maha a muphahlo wa hombe ka nungungulu wa tona, Dhagoni,+ ni ku kulungela, hakuva ti waku: “A nungungulu wa hina i nyikele a nala wa hina, Samsoni, canjeni ga hina!” 24 Laha a vanhu va nga mu wona va no dhumisa a nungungulu wabye, vaku: “A nungungulu wa hina i nyikele a nala wa hina canjeni ga hina, loyi a nga hlasela a tiko ga hina+ a tlhela a daya a vanhu va hina vo tala.”+

25 Kota lezvi a timbilu tabye ti nga tsakile, va te ngalo: “A hi vitaneni Samsoni a ta hi hlekisela.” Hikwalaho, va no vitanisa Samsoni hi le paxweni kasi a ta va hlekisela. Va no mu yimisa laha cikari ka mapilari. 26 Hi kulandzela, Samsoni i no byela a cifanyana leci ci nga mu khometele hi woko, aku: “Ndzi tsike ndzi henya a mapilari lawa ma tiyisako yindlu kasi ndzi tiya hi wona.” 27 (A yindlu leyo yi wa tele hi vavanuna ni vavasati. Tontlhe a tihosi ta vaFilistiya ti wa hi lomo. Le hehla ka yindlu ku wa hi ni cipimo ca 3000 wa vavanuna ni vavasati va nga kari va cuwukela Samsoni na a va hlekisela.)

28 Samsoni+ i no vitana Jehovha, aku: “Jehovha, Hosi ya Hombe, ndzi alakanye u ndzi nyika ntamu+ a khati legi basi. O Nungungulu, ndzi tsike ndzi ti photela ka vaFilistiya, ndzi photela a gin’we ga matihlo ya mina ya mambiri.”+

29 Makunu Samsoni i no khoma a mapilari mambiri ya laha cikari lawa ma nga kari ma tiyisa yindlu, a tiya hi wona, a gin’we hi woko ga cinene a gin’wani hi woko ga cibhabha. 30 Samsoni i no banguleka, aku: “Ndzi tsike ndzifa* ni vaFilistiya!” I no nikinya a mapilari hi ntamu wakwe wontlhe, a yindlu yi wela a tihosi ni vanhu vontlhe va nga hi lomo.+ Hikwalaho, i no daya vanhu vo tala kufeni kakwe a ku hundza lava a nga va daya na a ha hanya.+

31 Andzhako ka lezvo, a vamakabye vakwe ni vontlhe va ngango wa papayi wakwe va no relela va ta mu teka, va ya mu lahla laha cilahleni ca papayi wakwe Manowa,+ cikari ka Zora+ ni Extawoli. Samsoni i no lamula a vaIzrayeli a 20 wa malembe.+

17 Ku wa hi ni wanuna wa le tikweni ga zvitsunga ga Efrayime,+ a nga vitaniwa ku hi Mika. 2 I no byela mamani wakwe, aku: “A 1100 wa zvingerengere zva prata, lezvi u nga yivelwa, ndzi gumesa ndzi kuzwa na u wula ciruko hi zvona, zvi na mina. Hi mina ndzi nga teka.” A mamani wakwe aku: “Ngha Jehovha a katekisa a n’wana wa mina!” 3 Hikwalaho, i no tlhelisa a 1100 wa zvingerengere zva prata ka mamani wakwe, kanilezvi a mamani wakwe i te: “Handle ko kanakana a prata ya mina ndzi ta yi basisela Jehovha kasi a n’wana wa mina a maha hi yona a cifananiso ci kehlilweko ni cifananiso ca simbi.*+ Makunu ndza ku tlhelisela a prata leyi.”

4 Laha Mika a nga tlhelisa prata ka mamani wakwe, a mamani wakwe i no teka a 200 wa zvingerengere zva prata a zvi nyikela ka munyekisi wa prata, a maha cifananiso ci kehlilweko ni cifananiso ca simbi,* zvi vekiwa lomu ndlwini ya Mika. 5 Mika loyi i wa hi ni yindlu ya vanungungulu. I wa mahile a efodhe+ ni zvifananiso zva terafime*+ a tlhela a hlawula a mun’we wa vana vakwe a mu maha mupristi wakwe.+ 6 Masikwini lawo ku wa nga hi na hosi le Izrayeli.+ A munhu ni munhu i wa maha lezvi zvi nga lulamile kuwoneni kakwe.+

7 Ku wa hi ni jaha ga le Bhetlehema+ wa Judha, ga lixaka la ka Judha. Gi wa hi muLevhi,+ niku gi wa hi ni cikhati co leha na gi tshama seyo. 8 A jaha lego gi no suka dhoropeni ga Bhetlehema wa Judha gi famba gi lava ko tshama kona. Na gi hi lomu lipfhumbeni la gona, gi no chikela tikweni ga zvitsunga ga Efrayime, laha mutini wa Mika.+ 9 Mika aku kakwe: “Uta hi kwihi?” Gi hlamula, giku: “Ndzi muLevhi wa le Bhetlehema wa Judha; ndzi famba ndzi lavetela ko tshama.” 10 Mika aku kakwe: “Tshama na mina, uva papayi* wa mina ni mupristi wa mina. Ndzi ta ku nyika a 10 wa zvingerengere zva prata hi lembe, ni tinguwo, ni zvakuga.” Hikwalaho, a muLevhi i no nghena laha mutini. 11 Makunu a muLevhi i no vhumela ku tshama ni wanuna loye. A jaha lego gi no mahisa ku khwatsi mun’we wa vana vakwe. 12 Ahandle ka lezvo, Mika i no yimisa a muLevhi loye lezvaku a mu tirela kota mupristi wakwe.+ Yena i no tshama laha kaya ka Mika. 13 Mika aku: “Makunu ndza zvi tiva lezvaku Jehovha i ta ndzi katekisa hi kota ya lezvi a muLevhi a mahileko mupristi wa mina.”

18 Masikwini lawo ku wa nga hi na hosi le Izrayeli.+ Ka masiku yalawo, a lixaka la ka Dhani+ li wa lavetela a wutshamu* ga ku hanya kona, hakuva kala ka cikhati leco va wa nga se amukela a tshomba cikari ka tixaka ta ka Izrayeli.+

2 A va ka Dhani va no rumela a ntlhanu wa vavanuna va ntamu va lixaka labye, va le Zora ni Extawoli,+ kasi va ya piyara tiko ni ku gi cuwukisisa. Va no va byela, vaku: “Fambani mu ya cuwukisisa tiko.” Loku va chikele tikweni ga zvitsunga ga Efrayime, mutini wa Mika,+ va no etlela laho. 3 Na va hi kusuhani ni muti wa Mika, va nozwa a gezu* ga jaha legi ga muLevhi, va gi tiva. Hikwalaho, va no gi yela va yaku: “Himani a nga ku tisa seno? Zvini u tirako laha? Kona u tshamela yini kwalaha?” 4 Gi no va hlamula, giku: “Mika i ndzi mahele lezvi ni lezvi a tlhela a ndzi thola kasi ndziva mupristi wakwe.”+ 5 Vaku ka gona: “Hi kombela ku u wutisa Nungungulu a ku a lipfhumba la hina li ta famba khwatsi ke.” 6 A mupristi aku kabye: “Fambani hi kurula. Jehovha i na n’wina lipfhumbeni la n’wina.”

7 Hikwalaho, a vavanuna lava va ntlhanu va no suka va famba va ya chikela Layixa.+ Va no wona lezvaku a vanhu va dhoropa lego va wa tlhatlhekile a ku fana ni vaSidhoni. Va wa rulile niku va wa nga chavi nchumu.+ Ku wa nga hi na mufumeli wa tihanyi wa ku va xanisa lomu tikweni. Va wa tshama kule ni vaSidhoni niku va wa nga tolovelani ni munhu.

8 A cikhati leci va nga tlhela ka vamakabye vabye le Zora ni le Extawoli,+ a vamakabye vabye va no va wutisa, vaku: “Zvi fambisile kuyini?” 9 Va no hlamula, vaku: “A hi yeni hi ya va dhumela, hakuva hi wonile lezvaku a tiko legiyani gi nene nguvhu. Ma ha kanakanela yini? Mu nga hlweli ku ya teka tiko giva tshomba ya n’wina. 10 Loku mu chikela, mu ta kuma vanhu va nga chaviko nchumu+ niku a tiko ga kona ga hombe. Nungungulu i nyikele tiko lego canjeni ga n’wina. Tikweni lego, a ku vhumaleki nchumu wu nga laha misaveni.”+

11 Andzhako ka lezvo, ku no suka a 600 wa vavanuna va lixaka la ka Dhani hi le Zora ni Extawoli,+ va nga hlomile kasi kulwa yimpi. 12 Va no kandziha va ya gova Kiriyat-Jeyarime+ wa Judha. Hi caleco ci mahako ku a wutshamu lego gi nga mupela-gambo wa Kiriyat-Jeyarime gi vitaniwa ku Mahane-Dhani*+ kala nyamutlha. 13 Va no suka laho vaya tikweni ga zvitsunga ga Efrayime, va chikela mutini wa Mika.+

14 A ntlhanu wa vavanuna lava va nga yile va ya piyara a tiko ga Layixa+ va no byela a vamakabye vabye, vaku: “Mu wa zvi tiva ku lomu ka tiyindlu leti ku na ni efodhe, ni zvifananiso zva terafime,* ni cifananiso ci kehlilweko, ni cifananiso ca simbi* ke?+ Wonani co maha.” 15 Hikwalaho, va no nyima laho, a ntlhanu wa vavanuna va nghena ndlwini ya jaha ga muLevhi,+ laha mutini wa Mika, va gi losa. 16 A vavanuna lava va 600 va ka Dhani+ va nga hlomile kasi kulwa yimpi va wa nyimile laha mahlweni ka nyangwa. 17 A ntlhanu wa vavanuna lava va nga yile va ya piyara a tiko+ va no nghena va teka a cifananiso ci kehlilweko, ni efodhe,+ ni zvifananiso zva terafime,*+ ni cifananiso ca simbi.*+ (A mupristi+ i wa yimile laha mahlweni ka nyangwa ni 600 wa vavanuna va hlomileko kasi kulwa yimpi.) 18 Va no nghena lomu ndlwini ya Mika va teka a cifananiso ci kehlilweko, ni efodhe, ni zvifananiso zva terafime,* ni cifananiso ca simbi.* A mupristi aku kabye: “Zvini mu mahako?” 19 Vaku kakwe: “Miyela, uku hwi,* uta seno ka hina u ta maha papayi* ni mupristi wa hina. Hi cihi ca cinene ka wena — kuva mupristi wa yindlu ya munhu mun’we+ kutani kuva mupristi wa lixaka ni ngango wa ka Izrayeli?”+ 20 Hikwalaho, a mupristi i no xalala hi zvona, a teka efodhe, ni zvifananiso zva terafime,* ni cifananiso ci kehlilweko+ a famba zvin’we ni vanhu lavo.

21 Va no tlhavinyeta lipfhumba labye, va rangisa vanana, ni zvifuyo, ni zvilo zvabye zva lisima. 22 Laha a va ka Dhani va nga fambile a pfhukanyana kusukela mutini wa Mika, a vaakelani va Mika va no hlengeletana va va landza. 23 Laha va nga banguleka va vitana a va ka Dhani, a va ka Dhani va no hundzuluka va wutisa Mika, vaku: “I mhaka muni? Hikuyini u nga hlengeleta a vanhu lava?” 24 Mika aku: “Mu tekile vanungungulu va mina lava ndzi nga maha, mu tlhela mu famba ni mupristi kambe. Ndzi sele ni yini? Hikuyini mu ndzi wutisako ku: ‘I mhaka muni u nga nayo?’” 25 A va ka Dhani va no hlamula, vaku: “U nga hi bangulekeli, hakuva u nga tshekulelwa hi vanhu va zangarileko, va daya wena ni va ngango wa wena.” 26 Hikwalaho, a va ka Dhani va no ti fambela. Laha Mika a nga wona lezvaku va na ni ntamu a ku mu hundza, i no ti tlhelela kaya kakwe.

27 Andzhako ka ku teka lezvi Mika a nga zvi mahile, zvin’we ni mupristi wakwe, va noya Layixa,+ ka vanhu vo rula va nga chaviko nchumu,+ va ya va hihirita hi cipadha va tlhela va hisa dhoropa hi ndzilo. 28 I hava a nga gi lamulela, hakuva gi wa hi kule ni Sidhoni niku a vanhu va kona va wa nga tolovelani ni munhu; ahandle ka lezvo, gi wa hi le nkoveni wa Bhet-Rehobha.+ Hi kulandzela, va no aketa dhoropa va tshama ka gona. 29 Ahandle ka lezvo, a dhoropa lego va no gi chula ku Dhani,+ ku nga vito ga papayi wabye Dhani, a n’wana wa Izrayeli.+ Kanilezvi a kale ka kona a dhoropa lego gi wa vitaniwa ku Layixa.+ 30 Andzhako ka lezvo, a va ka Dhani va no ti yimisela a cifananiso ci kehlilweko.+ Jonatani,+ a n’wana wa Gerxomi,+ a n’wana wa Mosi, zvin’we ni vana vakwe, va nova vapristi va lixaka la ka Dhani kala siku legi a vahanyi va tiko va ngaya wukhumbini. 31 Va no yimisa a cifananiso ci kehlilweko leci Mika a nga maha, ci tshama laho wontlhe a masiku lawa a yindlu ya Nungungulu wa lisine yi nga hi le Xilo.+

19 Masikwini lawo ku nga kala ku nga hi na hosi le Izrayeli,+ a muLevhi wo kari a nga tshama ka wutshamu ga le kule, le tikweni ga zvitsunga ga Efrayime,+ i no teka wasati le Bhetlehema+ wa Judha a maha sati wakwe wa mutsongwani.* 2 Kanilezvi a sati loye wa mutsongwani a nga tsumbekangi kakwe. I no mu tsika a tlhela kaya ka papayi wakwe le Bhetlehema wa Judha, a ya tshama seyo mune wa tihweti. 3 Makunu a nuna wakwe i no suka a mu landza kasi a ya mu khongotela a wuya; i no teka nandza gakwe ga cinuna ni timbongola timbiri. A wasati loye i no mu amukela laha kaya ka papayi wakwe. A cikhati leci a papayi wakwe a nga mu wona, i no tsaka. 4 Hikwalaho, a bava wakwe, a papayi wa nhanyana, i no mu khongotela lezvaku a tshama naye masiku manharu; va waga ni kunwa, a tlhela a etlela laho.

5 Ka siku ga wumune, a cikhati leci va nga vindzuka ni mixo va lava ku famba, a papayi wa nhanyana i no byela a mwane wakwe, aku: “Gana cokari u ta kuma ntamu, andzhako ka lezvo mu ta famba.” 6 Hikwalaho, va no tshama, niku hi wumbiri gabye va noga ni kunwa zvin’we. Andzhako ka lezvo, a papayi wa nhanyana i te ngalo kakwe: “Etlela laha, u tsakisa mbilu ya wena.” 7 A cikhati leci a nga vhuka a lava ku khoma ndlela, a bava wakwe i no mu khongotela lezvaku a tshama. Hikwalaho, i no tlhela a etlela laho kambe.

8 Hi siku ga wutlhanu i no vindzuka ni mixo kasi a famba, a papayi wa nhanyana aku: “Gana cokari u ta kuma ntamu.” Va no tshama va hlwela kala gi lava ku pela, na vaga zvin’we hi wumbiri gabye. 9 Laha a wanuna loye a nga suka a lava ku famba ni sati wakwe wa mutsongwani* zvin’we ni nandza gakwe, a bava wakwe, a papayi wa nhanyana, i te ngalo kakwe: “Gi lava ku phuma! Etlela laha wusiku legi. A siku giya kumbheleni. Etlela laha, u tsakisa mbilu ya wena. A mandziko mu ta vindzuka mu famba kaya.”* 10 Hambulezvo, a wanuna loye i no ala ku tlhela a etlela kambe. Hikwalaho, i no suka a famba kala Jebhusi, ku nga le Jerusalema.+ I wa hi ni timbongola timbiri, ni sati wakwe wa mutsongwani,* ni nandza gakwe.

11 Gi no sangula ku pela na va hi kusuhani ni Jebhusi. Hikwalaho, a nandza gi no wutisa a n’winyi wa gona, giku: “A hi chukwana hi nyima ka dhoropa legi ga vaJebhusi hi etlela kona ke?” 12 Kanilezvi a n’winyi wakwe i te ngalo kakwe: “Hi nga nyimeni ka dhoropa ga vamatiko vo kala va nga hi vaIzrayeli. A hi fambeni kala Gibheya.”+ 13 I no engeta a byela a nandza gakwe, aku: “A hi zameni ku chikela Gibheya kutani le Rama, hi ta etlela ka gin’we ga madhoropa lawo.”+ 14 Hikwalaho, va no simama ku famba, a gambo gi va pelela na va lava ku chikela le Gibheya wa va ka Bhenjamini.

15 Va no hambuka laho, va nghena kasi va etlela Gibheya. Loku va nghenile lomu dhoropeni, va no tshama laha prasa* ya dhoropa, kanilezvi i hava a ngata a ta va teka a famba navo kaya kakwe kasi va ya etlela.+ 16 Ku no gumesa ku chikela wanuna wo khosahala ni wusiku na a wuya hi masin’wini. A wanuna loye i wa hi wa le tikweni ga zvitsunga ga Efrayime,+ niku ku wa hundza cikhati na a tshama lomu Gibheya. Kanilezvi a vahanyi va dhoropa va wa hi va ka Bhenjamini.+ 17 A cikhati leci a wanuna loye wo khosahala a nga tlakusa matihlo a wona a muendzi laha prasa* ya dhoropa, i te ngalo: “Uya kwihi, kona uta hi kwihi?” 18 Yena aku: “Hita hi Bhetlehema wa Judha niku hiya ka wutshamu ga le kule le tikweni ga zvitsunga ga Efrayime, ku nga lomu ndzi tako hi kona. Ndzi wa yile Bhetlehema wa Judha,+ makunu ndziya ndlwini ya Jehovha,* kanilezvi i hava a nga ndzi amukela kaya kakwe. 19 Hi na ni byanyi go enela a timbongola ta hina,+ ni zvakuga+ ni vhinyo zvi ringanako mina, ni wasati, ni nandza ga hina. Ci hava ci kiyelako.” 20 Kanilezvi a wanuna loye wo khosahala aku: “A kurula a kuve na wena! Ndzi ta ku nyika ni cihi u to ci lava. Ntsena ku u nga etleli laha prasa.”* 21 Hikwalaho, i no mu teka a famba naye mutini wakwe, a tlhela a ti nyika zvakuga a timbongola. Va no hlamba mikondzo, vaga ni kunwa.

22 Na va ha hi lomu kutsakeni, ku no chikela a vanyamijiri va lomu dhoropeni va randzela a muti, va sangula ku bungutela livati na va byela a wanuna loye wo khosalaha, a n’winyi wa muti, vaku: “Humesa a wanuna loyi a nga lomu ndlwini ya wena hi ta hlengela naye masango.”+ 23 A n’winyi wa muti i no huma aku kabye: “Ahihi va ka hina, mu nga mahi a kubiha loku. A wanuna loyi mupfhumba wa mina. Mu nga mahi a zvilo lezvo zva tingana. 24 Hi loyi a n’wana wa mina wa nhwana* ni sati wa mutsongwani* wa wanuna loyi; nyimani ndzi mu tisela vona mu ta va maha zvilo zva tingana loku mu lava lezvo.*+ Kanilezvi mu nga mahi a zvilo lezvo zva tingana ka wanuna loyi.”

25 Kanilezvi a vavanuna lavo a va vhumelangi. Hikwalaho, a wanuna loye i no khoma a sati wakwe wa mutsongwani*+ a mu humesa handle, a mu nyikela kabye. Va no mu pfinya, va mu xakela a wusiku gontlhe kala hi phindzulani. Laha gi nga kari gica va no mu tsika a famba. 26 Na ga ha hi mixo nguvhu, a wasati loye i nota a tawa laha nyangweni ya yindlu, laha a n’winyi wakwe a nga hi kona, a etlela laho kala gica. 27 A cikhati leci a n’winyi wakwe a nga vhuka ni mixo a vhulula tivati ta yindlu a huma lahandle kasi ku simama ni lipfhumba lakwe, i no wona a wasati, a sati wakwe wa mutsongwani,* na a etlele kusuhani ni livati, a mandla yakwe na ma hi laha nyangweni, 28 aku kakwe: “Vhuka hi famba.” Kanilezvi a ku vangi ni hlamulo. I no mu teka a mu tlhateka laha ka mbongola a famba kaya kakwe.

29 A cikhati leci a nga chikela kaya, i no teka mukwana a khoma a sati wakwe wa mutsongwani* a mu tsemelela hi ciro ni ciro, hi 12 wa zvipandze, a gumesa a rumela cipandze cin’we ka tiko ni tiko ga ka Izrayeli. 30 Vontlhe lava va nga zvi wona, va te ngalo: “Kusukela a siku legi a vaIzrayeli va nga huma tikweni ga Gibhite kala nyamutlha a ku se tshuka ku maheka a zvilo zvo khwatsi hi lezvi ne hambu a ku woniwa. Zvi hloleni, mu bhula hi zvona,+ mu hi byela lezvi hi faneleko ku maha.”

20 Hikwalaho, a vaIzrayeli vontlhe, kusukela le Dhani+ kala le Bherexebha ni va le tikweni ga Gileyadhe+ ni hlengeletano yontlhe, va nota va ta hlengeletana hi kungo gin’we* mahlweni ka Jehovha le Mizpa.+ 2 Makunu a tihosana ta vanhu ni tixaka tontlhe ta ka Izrayeli ti no yima bandleni ga vanhu va Nungungulu. Va wa hi 400 000 wa masochwa yo famba hi minenge, ma nga hi ni zvipadha.+

3 A va ka Bhenjamini va nozwa lezvaku a va ka Izrayeli va yile Mizpa.

A va ka Izrayeli vaku: “Hi nga hi byelani, kasi a zvilo lezvi zvo tshisa zvi mahekisile kuyini?”+ 4 A wanuna wa muLevhi,+ a nuna wa wasati loyi a nga dawa, i no va hlamula, aku: “Ndzi chikele Gibheya+ wa Bhenjamini ni sati wa mina wa mutsongwani* kasi ndzi etlela kona. 5 A vahanyi* va Gibheya va no ndzi vhukela va randzela muti ni wusiku. Va wa lava ku ndzi daya, kanilezvi va no pfinya sati wa mina wa mutsongwani,* afa.+ 6 Hikwalaho, ndzi no teka a cirumbi cakwe ndzi ci tsemelela hi zvipandze, ndzi zvi rumela matikweni wontlhe ma nga tshomba ya Izrayeli,+ hakuva va mahile a zvilo zvo nyenyeza ni zva tingana lomu Izrayeli. 7 Makunu n’wina n’wentlhe va ka Izrayeli nyikani a mawonela ya n’wina ni wusungukati+ ga n’wina.”

8 A vanhu vontlhe va no zwanana ka cilo cin’we,* vaku: “A nga kona cikari ka hina a to tlhela tendeni gakwe kutani ndlwini yakwe. 9 A vanhu va le Gibheya hi ta va maha lezvi: Hi taba tihlolo, hi yalwa navo.+ 10 Ka tixaka tontlhe ta ka Izrayeli hi ta hlawula a 10 wa vavanuna cikari ka 100, ni 100 wa vavanuna cikari ka 1000, ni 1000 wa vavanuna cikari ka 10 000, va fela ku hlengeleta timbuva ta masochwa, kasi ku vhukela vanhu va Gibheya wa Bhenjamini, hi kota ya zvilo zva tingana lezvi va nga maha lomu Izrayeli.” 11 Hikwalaho, vontlhe a va ka Izrayeli va no hlengeletana va bohana* va vhukela dhoropa.

12 Hi kulandzela, a tixaka ta ka Izrayeli ti no rumela vavanuna ka vavanuna vontlhe va lixaka la ka Bhenjamini, va yaku: “Hikuyini ku nga maheka a zvilo lezvi zvo tshisa cikari ka n’wina? 13 Makunu hi nyikeni a vavanuna lavo va vanyamijiri va le Gibheya+ hi va daya hi susa kubiha lomu Izrayeli.”+ Kanilezvi a va ka Bhenjamini va no ala a ku ingisa a vamakabye vabye, a vaIzrayeli.

14 Makunu a va ka Bhenjamini va no huma hi lomu madhoropeni va ya hlengeletana le Gibheya kasi kulwa ni va ka Izrayeli. 15 Ka siku lego, a va ka Bhenjamini va no hlengeleta a 26 000 wa vavanuna va nga hi ni zvipadha, va lomu madhoropeni yabye, na ku nga hlayiwi lava va 700 va nga zvi kota khwatsi kulwa. 16 Ka butho lego, ku wa hi ni 700 wa vavanuna va milangelwa, va nga tirisa libhabha. Vontlhe a vavanuna lavo va wa zvi kota ku phanda ribye hi cipelupelu* vaba sisi va nga phukwi.

17 A va ka Izrayeli va no hlengeleta a 400 000 wa vavanuna va hlomileko zvipadha,+ na ku nga hlayiwi a va ka Bhenjamini; a mun’we ni mun’wani wabye i wa zvi tiva khwatsi kulwa. 18 Va no suka, va kandziha Bheteli kasi va ya wutisa Nungungulu.+ A vanhu va ka Izrayeli va te ngalo: “Himani ka hina a to hi rangela hi yalwa ni va ka Bhenjamini ke? Jehovha a hlamula, aku: “Hi Judha a to rangela.”

19 Andzhako ka lezvo, a vaIzrayeli va no vhuka ni mixo va ya gova le Gibheya.

20 A va ka Izrayeli va no huma kasi va yalwa ni va ka Bhenjamini; va no fola kasi kulwa navo le Gibheya. 21 Hikwalaho, a va ka Bhenjamini va no huma hi lomu Gibheya va ta daya 22 000 wa va ka Izrayeli ka siku lego. 22 Kanilezvi a masochwa ya ka Izrayeli ma no tiya hlanha, ma tlhela kambe ma ya fola kasi kulwa ka wutshamu galegi ma nga folile kona ka siku go sangula. 23 A vaIzrayeli va no kandziha va ya rila mahlweni ka Jehovha kala gi phuma, va wutisa Jehovha, vaku: “Hi tlhela kambe hi yalwa ni vamakabye va hina, a va ka Bhenjamini ke?”+ Jehovha aku: “Kandzihani mu yalwa navo.”

24 Hikwalaho, a vaIzrayeli va no tshinelela va ka Bhenjamini hi siku ga wumbiri. 25 A va ka Bhenjamini vonawu va no huma hi le Gibheya va ya tlhangana navo hi siku ga wumbiri va hihirita a 18 000 wa va ka Izrayeli,+ vontlhe va nga hlomile zvipadha. 26 Hikwalaho, vontlhe va ka Izrayeli va no kandziha vaya Bheteli, va ya rila va tshama laho mahlweni ka Jehovha.+ Ka siku lego, va no pfhunga*+ kala ni wusiku, va maha minyikelo ya kuhiswa,+ ni minyikelo ya kuhlengela+ mahlweni ka Jehovha. 27 Andzhako ka lezvo, a va ka Izrayeli va no wutisa Jehovha+ hakuva masikwini lawo a arke* ga civhumelwano ca Nungungulu wa lisine gi wa hi seyo. 28 Masikwini lawo, Finiyasi,+ a n’wana wa Eleyazari, a n’wana wa Aroni, hi yena a nga kari a tira* mahlweni ka arke. Va no wutisa, vaku: “Hi famba kambe hi yalwa ni vamakabye va hina a va ka Bhenjamini kutani hi zvi tsika ke?”+ Jehovha aku: “Kandzihani, hakuva a mandziko ndzi ta va nyikela canjeni ga n’wina.” 29 Makunu Izrayeli i no rumela a vavanuna va ya lavelela+ matlhelweni wontlhe ya Gibheya.

30 A vaIzrayeli va no kandziha va yalwa ni va ka Bhenjamini hi siku ga wunharu, va fola kasi kulwa ni Gibheya a ku khwatsi hi makhati man’wani.+ 31 Laha a va ka Bhenjamini va nga huma a ku ya tlhangana ni butho, va no kokelwa va huma lomu dhoropeni.+ A ku khwatsi hi makhati man’wani, va no sangula ku va dhumela va daya a vavanuna vo kari lomu maruweni lawa a gin’we ga kona gi yako Bheteli, ni legi gin’wani gi yako Gibheya; ku nofa cipimo ca 30 wa va ka Izrayeli laha libalangeni.+ 32 Hikwalaho, a va ka Bhenjamini va te ngalo: “Ha va hlula a ku khwatsi hi makhati man’wani.”+ Kanilezvi a vaIzrayeli va waku: “A hi hlehleni, hi va kokela kule ni dhoropa vata lomu maruweni.” 33 Hikwalaho, a vavanuna vontlhe va ka Izrayeli va no suka hi lomu va nga hi kona va fola kasi kulwa le Bhaali-Tamari kuveni a vaIzrayeli lava va nga lavelela kusuhani ni Gibheya vo huma va dhumela dhoropa. 34 Hikwalaho, a 10 000 wa vavanuna va nga zvi kota khwatsi kulwa cikari ka vontlhe va ka Izrayeli va nota va ta yima mahlweni ka Gibheya, a yimpi yi hisa. Kanilezvi a va ka Bhenjamini va wa nga zvi tivi lezvaku a khombo gi laha kusuhani.

35 Jehovha i no hlula a va ka Bhenjamini+ mahlweni ka vaIzrayeli. Ka siku lego, a vaIzrayeli va no daya 25 100 wa vavanuna va ka Bhenjamini, va nga hlomile zvipadha.+

36 Hambulezvo, a va ka Bhenjamini va wa alakanya ku a va ka Izrayeli va ta hluliwa a cikhati leci va nga hlehla mahlweni ka va ka Bhenjamini,+ kanilezvi va wa hlehla hakuva va wa tsumba lava va nga va vekile va lavelela kasi kulwa ni Gibheya.+ 37 Lava va nga kari va lavelela va no tekela ku suka va dhumela Gibheya, va hangalaka va hihirita a dhoropa gontlhe hi cipadha.

38 Makunu a va ka Izrayeli va wa bhulile ni vavanuna lava va nga fihlele va lavelela a dhoropa lezvaku va ta va nyika cikombiso hi ku tuvikisa musi lomu dhoropeni.

39 A cikhati leci a vaIzrayeli va nga hlehla yimpini, a va ka Bhenjamini va no sangula ku va dhumela va daya 30 wa va ka Izrayeli,+ vaku: “Handle ko kanakana ha va hlula kambe a ku fana ni khati gi nga hundza.”+ 40 Kanilezvi ku no woneka cikombiso lomu dhoropeni ca ku tuvika musi. A cikhati leci a va ka Bhenjamini va nga hundzuluka va cuwuka, va no wona a malangavi ya dhoropa gontlhe na ma tlakukela tilweni. 41 Laha a va ka Izrayeli va nga hundzuluka, a va ka Bhenjamini va no mbhela ntamu hi ku wona lezvaku va welwe hi khombo. 42 Hikwalaho, va no hlehla mahlweni ka va ka Izrayeli va tsutsumela ciwuleni, kanilezvi a yimpi yi no va landza. Lava va nga kari va huma hi lomu madhoropeni vonawu va no daya a va ka Bhenjamini. 43 Va no randzela a va ka Bhenjamini, va va hlongolisela va nga va tsiki, va va chindza kwalaha phambeni ka Gibheya hi tlhelo ga mutsuwuka-gambo. 44 Hi kugumesa, ku nofa 18 000 wa vavanuna va ka Bhenjamini; vontlhe va wa hi masochwa ya tinhenha.+

45 A vavanuna va ka Bhenjamini va no hundzuluka va tsutsumela ciwuleni le ribyeni ga Rimoni,+ a vaIzrayeli va daya a 5000 wabye lomu maruweni, va va hlongolisela kala le Gidhomi; va no engeta va daya 2000 wa vavanuna. 46 Ka siku lego, ku nofa a 25 000 wa vavanuna va ka Bhenjamini va nga hi ni zvipadha,+ vontlhe na va hi masochwa ya tinhenha. 47 Kanilezvi a 600 wa vavanuna va no tsutsumela ciwuleni, le ribyeni ga Rimoni. Va no tshama mune wa tihweti lomu ribyeni ga Rimoni.

48 A va ka Izrayeli va no dhumela va ka Bhenjamini va hihirita lava va nga hi lomu dhoropeni hi cipadha, a vavanuna ni zvifuyo, ni zvontlhe zvi nga sele. Va no hisa ni madhoropa wontlhe lawa va nga hundza hi ka wona.

21 A vaIzrayeli va wa hlambanyile le Mizpa,+ vaku: “I hava cikari ka hina a to nyikela a nhanyana wakwe ka wanuna wa ka Bhenjamini lezvaku ava sati wakwe.”+ 2 Hikwalaho, a vanhu va nota Bheteli+ va ta tshama laho mahlweni ka Nungungulu wa lisine kala gi phuma, na vaba mikosi ni ku rila nguvhu. 3 Va waku: “O, Jehovha, Nungungulu wa Izrayeli, hikuyini ku mahekileko zvilo lezvi lomu Izrayeli? Hikuyini ku lavako ku vhumaleka lixaka lin’we nyamutlha lomu Izrayeli?” 4 Ka siku gi nga landzela, a vanhu va no vhuka ni mixo va aka alati laho, va nyikela a minyikelo ya kuhiswa ni minyikelo ya kuhlengela.+

5 Andzhako ka lezvo, a vaIzrayeli va te: “Ka tixaka tontlhe ta ka Izrayeli, hi lihi a lixaka li nga kala kuta li ta hlengeletana mahlweni ka Jehovha?” Hakuva va wa hlambanyile hi cifungo ca hombe lezvaku ni wihi loyi a to kala kuta ka Jehovha le Mizpa i ta dawa. 6 A va ka Izrayeli va no va zwela wusiwana a vamakabye vabye, a va ka Bhenjamini, hi kota ya lezvi zvi nga va humelela, vaku: “Nyamutlha ku tsemilwe lixaka lomu Izrayeli. 7 Hi ta kuyini kasi hi va nyika vasati a vavanuna lava va seleko, lezvi hi hlambanyileko hi Jehovha+ lezvaku hi nga ta va nyika a vanhanyana va hina vava vasati vabye ke?”+

8 Va no wutisa, vaku: “Himani cikari ka tixaka ta ka Izrayeli a nga kala kuta ka Jehovha le Mizpa ke?”+ Ku no woneka lezvaku ku wa nga tangi ne mun’we wa le Jabhexe-Gileyadhe lomu wugovelweni, lomu a hlengeletano yi nga hi kona. 9 A cikhati leci ku nga hlayiwa vanhu, va no wona lezvaku ku wa nga tangi ne muhanyi mun’we wa le Jabhexe-Gileyadhe. 10 Hikwalaho, a hlengeletano yi no rumela seyo a 12 000 wa vavanuna va tinhenha ta ntamu, yi va laya, yiku: “Fambani mu ya daya a vahanyi va Jabhexe-Gileyadhe hi cipadha, ni vavasati ni vanana.+ 11 Mahani lezvi: Dayani a vavanuna vontlhe, ni vavasati vontlhe lava va hlengeleko masango ni wanuna.” 12 Va no kuma 400 wa vanhwana* cikari ka vahanyi va Jabhexe-Gileyadhe, va nga kala va nga se hlengela masango ni wanuna. Hikwalaho, va no famba navo wugovelweni le Xilo,+ tikweni ga Khanani.

13 Andzhako ka lezvo, a hlengeletano yontlhe yi no rumela a mahungu ka va ka Bhenjamini le ribyeni ga Rimoni+ ya ku kuva ni kurula. 14 Hikwalaho, a va ka Bhenjamini va no wuya. Va no va nyika a vavasati lava va nga va ponisa cikari ka vavasati va le Jabhexe-Gileyadhe,+ kanilezvi a va kumangi va ku eneta vontlhe. 15 A vanhu va no va zwela wusiwana a va ka Bhenjamini+ hi kota ya lezvi zvi nga va humelele, hakuva Jehovha i wa vangile kuhambana cikari ka tixaka ta ka Izrayeli. 16 A madhota ya hlengeletano maku ngalo: “Hi ta kuyini kasi hi va nyika vasati a vavanuna lava va seleko, lezvi ku delweko a vavasati vontlhe va ka Bhenjamini?” 17 Va hlamula, vaku: “A va ka Bhenjamini lava va ponileko va fanele kuva ni tshomba, kasi ku nga fuviswi lixaka lomu Izrayeli. 18 Kanilezvi hi nga ta va nyika a vanhanyana va hina vava vasati vabye, hakuva a va ka Izrayeli va hlambanyile, vaku: ‘I rukatelwe loyi a to va nyika sati a va ka Bhenjamini.’”+

19 Va no gumesa vaku: “Lembe ni lembe ku mahiwa mubuzo wa Jehovha le Xilo,+ a nga tlhelweni ga n’walungu* wa Bheteli ni mutsuwuka-gambo wa ruwa legi gi sukako hi le Bheteli giya Xekemi ni dzongeni* wa Lebhona.” 20 Hikwalaho, va no laya a vavanuna va ka Bhenjamini, vaku: “Fambani mu ya tumbela mu lavelela lomu zvivhineni.* 21 Loku mu wona a vanhanyana va Xilo na va huma va ta kina,* a mun’we ni mun’wani wa n’wina i wa hume lomu zvivhineni a khoma sati cikari ka vanhanyana va Xilo, mu gumesa mu tlhela tikweni ga Bhenjamini. 22 Loku a vapapayi vabye kutani a vamakabye vabye vata va ta hi khalela, hi taku: ‘Hi maheleni wuxinji hi kota yabye, hakuva a hi va kumangi a vavasati yimpini+ va ku nyika a mun’we ni mun’wani wabye niku n’winawu na mu nga va nyikangi vasati mu nga kumi nandzu.’”+

23 Hikwalaho, a vavanuna va ka Bhenjamini va no maha zvalezvo, a mun’we ni mun’wani a teka sati cikari ka vavasati lava va nga kari va kina. Andzhako ka lezvo, va no tlhela tshombeni yabye, va ya aketa madhoropa yabye+ va tshama kona.

24 Ka cikhati leco, a vaIzrayeli va no suka hi laho va hangalaka, loyi ni loyi aya lixakeni lakwe ni ngangweni wakwe. A mun’we ni mun’wani wabye i no suka hi laho aya tshombeni yakwe.

25 Masikwini lawo, ku wa nga hi na hosi le Izrayeli.+ A munhu ni munhu i wa maha lezvi zvi nga lulamile kuwoneni kakwe.