BHUKU GA WUMBIRI GA SAMUWELI

1 Andzhako ka kufa ka Sawule, laha Dhavhidha a nga wuyile hi le ko hlula* a vaAmaleki, i no tshama masiku mambiri le Ziklagi.+ 2 Hi siku ga wunharu, ku nota wanuna hi le wugovelweni ga Sawule na a hi ni tinguwo to handzuka ni misava lomu hlokweni yakwe. I no tshinela ka Dhavhidha awa lahasi, a khizama.

3 Dhavhidha i no mu wutisa, aku: “Uta hi kwihi?” A hlamula aku: “Ndzi hulukile hi le wugovelweni ga vaIzrayeli.” 4 Dhavhidha aku: “Zvini zvi nga maheka? Ndzi byele.” Yena aku: “A vanhu va tsutsumile le yimpini niku ku delwe vanhu vo tala. Hambu Sawule ni n’wana wakwe Jonatani va file.”+ 5 Makunu Dhavhidha i no wutisa jaha legi gi nga mu tela ni mahungu, aku: “U zvi tivisa kuyini ku Sawule ni n’wana wakwe Jonatani va file?” 6 A jaha lego gi no hlamula giku: “Zvi kotlene na ndzi hi Citsungeni ca Gilbhowa,+ ndzi se wona Sawule na a khigele laha ka tlhari gakwe, a tikareta ni vakhileli va mahaxi na va tshinela kusuhani kakwe.+ 7 A cikhati leci a nga hundzuluka a ndzi wona, i no ndzi vitana. Mina ndziku: ‘Hi mina loyi!’ 8 I no ndzi wutisa, aku: ‘Hi wena mani?’ Ndziku: ‘Ndzi muAmaleki.’+ 9 A gumesa aku: ‘Tshinela u ndzi daya hakuva ndzizwa kubayisa ka hombe, hambulezvo ndza ha hanya.’* 10 Hikwalaho, ndzi no tshinela kakwe ndzi mu daya+ hakuva ndzi wa zvi tiva lezvaku lezvi a nga bayisiswa zvona a nga ta hanya. Andzhako ka lezvo, ndzi no teka a cidlodlo* ci nga hi hlokweni yakwe ni pulsera gi nga hi wokweni gakwe, ndzita nazvo laha ka hosi ya mina.”

11 Hi kota ye lezvo, Dhavhidha i no handzula a tinguwo takwe, ni vavanuna vontlhe lava a nga hi navo va no maha zvalezvo. 12 Va noba tinyandha, va rila, va tlhela va pfhunga*+ kala ni gambo hi kota ya Sawule, ni n’wana wakwe Jonatani, ni vanhu va Jehovha, ni yindlu ya ka Izrayeli,+ hakuva va wa delwe hi cipadha.

13 Dhavhidha i no wutisa a jaha legi gi nga mu tela ni mahungu, aku: “Uta hi kwihi?” Giku: “Ndzi n’wana wa muluveli, wa muAmaleki.” 14 Dhavhidha aku kakwe: “Hikuyini u nga kala ku chava a ku tlakusa a canja ga wena u daya a totilweko wa Jehovha?”+ 15 Makunu Dhavhidha i no vitana a gin’we ga majaha yakwe, aku: “Tshinela u mu daya.” Hikwalaho, gi no mu tlhava afa.+ 16 Dhavhidha aku kakwe: “A nkhata wa wena a wuve hlokweni ya wena n’winyi, hakuva u ti konile hi nomu wa wena, uku: ‘Hi mina ndzi nga daya a totilweko wa Jehovha.’”+

17 Dhavhidha i no yimbelela a lisimu la cirilo, a rila Sawule ni n’wana wakwe Jonatani,+ 18 a tlhela a wula lezvaku a va ka Judha va fanele ku gondzisiwa a lisimu leli laku: “Wura”, li tsalilweko ka bhuku ga Jaxari,+ laku:

19 “Yowe, a kusaseka ka wena Izrayeli ku n’walele hehla ka zvitsunga zva wena.+

Hi nga wonani lezvi a tinhenha ti nga wisa zvona!

25 Hi nga wonani lezvi a tinhenha ti nga wisa zvona yimpini!

Jonatani i file hehla ka zvitsunga zva wena!+

A lirandzo la wena li wa ndzi tsakisa a ku hundza ni lirandzo la vavasati.+

2 Andzhako ka lezvo, Dhavhidha i no wutisa Jehovha,+ aku: “Ndzi kwela ndziya ka gin’we ga madhoropa ya Judha ke?” Jehovha aku: “Kwela.” Dhavhidha a mu wutisa, aku: “Ndziya kwihi ka kona?” Aku: “Famba Hebroni.”+ 2 Hikwalaho, Dhavhidha i no kwela aya Hebroni ni vasati vakwe va vambiri, Ahinowame+ wa le Jezreeli; na Abhigayili,+ loyi a nga felwe hi nuna wakwe Nabhali, a muKarmeli. 3 Dhavhidha i no famba kambe ni vavanuna lava a nga hi navo,+ a mun’we ni mun’wani ni ngango wakwe, va ya tshama madhoropeni ma nga randzele Hebroni. 4 Andzhako ka lezvo, a vavanuna va ka Judha va nota laho va ta tota Dhavhidha ava hosi ya yindlu ya ka Judha.+

Va no byela Dhavhidha, vaku: “A vavanuna va Jabhexe-Gileyadhe hi vona va nga lahla Sawule.” 5 Hikwalaho, Dhavhidha i no rumela a zvirun’wa ka vavanuna va le Jabhexe-Gileyadhe, aku: “Jehovha i wa mu katekise, hakuva mu yi kombisile a lirandzo li nga mbheliko a hosi ya n’wina Sawule, hi ku yi lahla.+ 6 Jehovha i wa kombise lirandzo li nga mbheliko ka n’wina a tlhela a tsumbeka ka n’wina. Minawu ndzi ta mu mahela wunene hi kota ya lezvi mu nga maha.+ 7 Makunu tiyisani a mandla ya n’wina mu tiya hlanha, hakuva Sawule, a hosi ya n’wina, i file, niku a yindlu ya ka Judha yi ndzi totile lezvaku ndziva hosi yabye.”

8 Kanilezvi Abneri,+ a n’wana wa Neri, a murangeli wa butho ga Sawule, i wa tekile Ixbhoxete,+ a n’wana wa Sawule, a tlhatuka naye aya Mahanayime+ 9 a ya mu maha hosi ya Gileyadhe,+ ni ya vaAxuri, ni ya Jezreeli,+ ni ya Efrayime,+ ni ya Bhenjamini ni ya vaIzrayeli vontlhe. 10 Ixbhoxete, a n’wana wa Sawule, i wa hi ni 40 wa malembe a cikhati a nga maha hosi ya ka Izrayeli. I no fuma malembe mambiri. Kanilezvi a yindlu ya ka Judha yi no seketela Dhavhidha.+ 11 A ntsengo wa masiku lawa Dhavhidha a nga fuma le Hebroni hehla ka yindlu ya ka Judha i 7 wa malembe ni 6 wa tihweti.+

12 Hi ndzhako ka cikhati, Abneri, a n’wana wa Neri, ni malandza ya Ixbhoxete, a n’wana wa Sawule, va no suka hi Mahanayime+ vaya Gibheyoni.+ 13 Jowabe,+ a n’wana wa Zeruya,+ ni malandza ya Dhavhidha vonawu va no suka va ya tlhangana navo le citivaneni ca Gibheyoni. A ntlawa wun’we wu wa hi ka tlhelo gin’we ga citivana, lowu wun’wani wu hi ka tlhelo legi gin’wani ga citivana. 14 Hi kugumesa, Abneri i no byela Jowabe, aku: “A ku suke a majaha malwa* mahlweni ka hina.” Jowabe aku: “A ma suke.” 15 Hikwalaho, va no suka va tlhatuka hi mitsengo yo fana. Ku no hlawuliwa 12 wa va ka Bhenjamini va ntlawa wa Ixbhoxete, a n’wana wa Sawule, ni 12 wa malandza ya Dhavhidha. 16 Va no suka va khomana hi tihloko, a mun’we ni mun’wani a tlhava laha reveni ga nala wakwe hi cipadha, vontlhe vawa khati gin’we lahasi, vafa. Hikwalaho, a wutshamu lego gi nga le Gibheyoni gi no vitaniwa ku Helkate-Hazurime.

17 A yimpi yi nga vhuka ka siku lego yi nova ya hombe nguvhu. Hi kugumesa, Abneri ni vavanuna va ka Izrayeli va no hluliwa hi malandza ya Dhavhidha. 18 Laho, ku wa hi ni vana vanharu va Zeruya,+ ku nga Jowabe,+ na Abhixayi,+ na Asaheli.+ Asaheli i wa tsutsuma nguvhu a ku khwatsi i mhuti laha libalangeni. 19 Asaheli i no hlongolisela Abneri, a ku gwe hi le ndzhako kakwe, a nga jiki aya cineneni ne cibhabheni. 20 A cikhati leci Abneri a nga hundzuluka a cuwuka ndzhako, i no wutisa, aku: “Hi wena Asaheli ke?” Yena aku: “Ina, hi mina.” 21 Abneri aku kakwe: “Jika uya cineneni kutani cibhabheni u ya khoma a gin’we ga majaha u ti tekela ni cihi u to ci lava.” Kanilezvi Asaheli i no simama ku mu hlongolisela. 22 Hikwalaho, Abneri i no phinda a byela Asaheli, aku: “Hi nga tsika ku ndzi hlongolisela. Ndzi wa ta ku dayela yini ke? Ndzi wa ta tiyisa kuyini a ku cuwuka a nghohe ya makabye wa wena Jowabe?” 23 Kanilezvi Asaheli i no ala, hikwalaho Abneri i no mu tlhava khwiri hi se ndzhako ka tlhari,+ gi phondla gi huma hi se ndzhako, awa a fela kwalaho. Vontlhe lava va nga kari va hundza hi laho a nga wele kona Asaheli va wo nyima.

24 Jowabe na Abhixayi va no simama ku hlongolisela Abneri. Laha a gambo gi nga kari gi pela, va no chikela citsungeni ca Ama, leci ci cuwukeneko ni Giya, ndleleni yi yako ciwuleni ca Gibheyoni. 25 Niku a va ka Bhenjamini va no hlengeletana ka Abneri, va maha ntlawa wun’we wa masochwa, va yima le hehla ka citsungana. 26 Abneri i no banguleka a byela Jowabe, aku: “A cipadha ci ta hlasela kala rini? A wu zvi woni lezvaku a magumo ya kona ma ta bayisa nguvhu? Hi rini u to byela vanhu lezvaku va tsika a ku hlongolisela a vamakabye vabye ke?” 27 Jowabe aku: “A ku khwatsi hi lezvi a Nungungulu wa lisine a hanyako, loku u wa nga wulangi nchumu, a vanhu na va tsikile ku hlongolisela a vamakabye vabye ntsena ni mixo.” 28 Jowabe i noba linanga,* a vavanuna vakwe va tsika ku hlongolisela a vaIzrayeli, a yimpi yi mbhela.

29 Abneri ni vavanuna vakwe va no famba hi lomu Arabha+ a wusiku gontlhe, va tlhatuka Jordhani, va tsemakanya a nkova wontlhe,* va gumesa va chikela le Mahanayime.+ 30 Loku Jowabe a tsikile ku hlongolisela Abneri, i no hlengeleta vanhu. Ka malandza ya Dhavhidha ku wa kiyela 19 wa wona, a ku patsa na Asaheli. 31 Kanilezvi a malandza ya Dhavhidha ma wa hlulile a va ka Bhenjamini ni vavanuna va Abneri, kufa 360 wa vavanuna vabye. 32 Va no teka Asaheli+ va mu lahla cilahleni ca papayi wakwe, leci ci nga le Bhetlehema.+ Andzhako ka lezvo, Jowabe ni vavanuna vakwe va no famba a wusiku gontlhe, va ya chikela Hebroni na gica.+

3 A yimpi cikari ka yindlu ya Sawule ni yindlu ya Dhavhidha yi no simama hi cikhati co leha. Dhavhidha i no engetela ku tiya ava ni ntamu,+ kanilezvi a yindlu ya Sawule yi no tlhelela ndzhako, yi mbhela ntamu.+

2 Ka cikhati caleco, Dhavhidha i no pswalelwa vafana le Hebroni.+ A matewula yakwe kuve Amnoni,+ a pswalilweko hi Ahinowame,+ wa le Jezreeli; 3 a wa wumbiri kuve Kileyabhe, a pswalilweko hi Abhigayili,+ loyi a nga felwe hi nuna wakwe Nabhali, a muKarmeli; a wa wunharu kuve Absalome,+ a n’wana wa Maaka, a nhanyana wa Talmayi,+ a hosi ya Gexure; 4 a wa wumune kuve Adhonija,+ a n’wana wa Hagite; a wa wutlhanu kuve Xefatiya, a n’wana wa Abhitali; 5 a wa wu 6 kuve Itreyama, a pswalilweko hi Egla, a sati wa Dhavhidha. Lava kuve vana lava Dhavhidha a pswalelweko le Hebroni.

6 Laha a yimpi ya yindlu ya Sawule ni yindlu ya Dhavhidha yi nga kari yi simama, Abneri+ i no tiyisa nguvhu a cikhundla cakwe lomu ndlwini ya Sawule. 7 Sawule i wa hi ni sati wa mutsongwani* a nga vitaniwa ku hi Rizpa,+ a n’wana wa Aya. Ixbhoxete+ i no wutisa Abneri, aku: “Hikuyini u nga etlela ni sati wa mutsongwani* wa papayi wa mina?”+ 8 Laha Abneri a ngazwa a magezu ya Ixbhoxete i no kukumukelana hi zanga, aku: “Ndzova mbyana* ya ka Judha ke? Kala nyamutlha lezvi, ndzi kombisile lirandzo li nga mbheliko ka yindlu ya papayi wa wena, Sawule, ni ka vamakabye vakwe, ni ka vanghana vakwe. A ndzi ku nyikelangi canjeni ga Dhavhidha, kanilezvi nyamutlha wa ndzi xuxisa hi kota ya cihoxo ci yelanako ni wasati. 9 Nungungulu i wa tsayise Abneri a tlhela a engeta loku ndzi nga maheli Dhavhidha lezvi Jehovha a nga hlambanya kakwe,+ 10 zvaku i ta susa a mufumo ndlwini ya Sawule, a tiyisa a citshamu ca wuhosi ca Dhavhidha hehla ka Izrayeli na Judha, kusukela le Dhani kala le Bherexebha.”+ 11 Ixbhoxete a nga ha mu hlamulangi nchumu Abneri, hakuva i wa mu chava.+

12 Abneri i no tekela ku rumela zvirun’wa ka Dhavhidha, aku: “Kasi a tiko legi ga mani?” A engeta aku: “Maha civhumelwano na mina, ndzi ta maha zvontlhe lezvi ndzi to zvi kota* kasi ndzi hundzulusa a vaIzrayeli vontlhe va yima na wena.”+ 13 Dhavhidha aku: “Zvi sasekile, ndzi ta maha civhumelwano na wena. I nchumu wun’we basi ndzi ku kombelako: U ngati ka mina na u nga se ranga hi ku neha Mikali,+ a n’wana wa Sawule, a cikhati u tota u ta ndzi wona.” 14 Dhavhidha i no rumela zvirun’wa ka Ixbhoxete,+ a n’wana wa Sawule, aku: “Ndzi nyike a sati wa mina Mikali, loyi ndzi nga mu lowola hi 100 wa mabhebhe ya le magumo ka zviro zva wubeleki zva vavanuna va vaFilistiya.”+ 15 Hikwalaho, Ixbhoxete i no rumela vanhu va ya mu teka ka nuna wakwe, Paltiyeli,+ a n’wana wa Layixa. 16 Kanilezvi a nuna wakwe i no sukawo a mu landza na a rila, a famba naye kala Bhahurima.+ Abneri aku kakwe: “Tlhela!” A se tlhela.

17 Kanilezvi Abneri i no rumela gezu ka madhota ya ka Izrayeli, aku: “Kale na mu lava ku Dhavhidha a maha hosi ya n’wina. 18 Makunu mu maheni hosi, hakuva Jehovha i te ngalo ka Dhavhidha: ‘Hi canja ga nandza ga mina Dhavhidha,+ ndzi ta ponisa a vanhu va mina, a va ka Izrayeli, canjeni ga vaFilistiya ni canjeni ga vontlhe a valala vabye.’” 19 Andzhako ka lezvo, Abneri i no wulawula ni va ka Bhenjamini.+ I noya le Hebroni a ya wulawula na Dhavhidha kambe cihundleni, a mu byela lezvi a vaIzrayeli ni yindlu yontlhe ya ka Bhenjamini va nga bohile ku maha.

20 A cikhati leci Abneri ni 20 wa vavanuna lava a nga hi navo va nga chikela ka Dhavhidha, le Hebroni, Dhavhidha i no maha mubuzo a mahela Abneri ni vavanuna lava a nga hi navo. 21 Abneri i no byela Dhavhidha, aku: “Ndzi tsike ndzi hlengeleta a vaIzrayeli vontlhe ka hosi ya mina, kasi va maha civhumelwano na wena, u fumela kontlhe lomu u* to ku lava.” Hikwalaho, Dhavhidha i no mu tsika a famba, a ti fambela hi kurula.

22 Zvalezvo, a malandza ya Dhavhidha na Jowabe va no wuya hi yimpini, na va hi ni muphango wa hombe. Abneri i wa nga ha hi na Dhavhidha, le Hebroni, hakuva Dhavhidha i wa mu tsikile a famba hi kurula. 23 A cikhati leci Jowabe+ ni butho gontlhe legi a nga hi nago va nga chikela, a vanhu va no byela Jowabe, vaku: “Abneri,+ a n’wana wa Neri,+ i wa tile ka hosi kanilezvi a hosi yi mu tsikile a famba hi kurula.” 24 Hikwalaho, Jowabe i noya ka hosi, a yaku: “Zvini u nga maha? Abneri i wa tile ka wena; makunu hikuyini u nga mu tsika a famba hi kurula? 25 Wena wa mu tiva khwatsi Abneri, a n’wana wa Neri! I wa tela ku ta ku kalavela, a tiva wontlhe a mafambela ya wena ni zvontlhe u mahako.”

26 Hikwalaho, Jowabe i no suka ka Dhavhidha a ruma vanhu va landza Abneri, va ya mu kuma le hloweni ya Sira va wuya naye; kanilezvi Dhavhidha i wa nga tivi nchumu hi mhaka leyo. 27 Laha Abneri a nga tlhela le Hebroni,+ Jowabe i no mu teka hi tlhelo vaya nyangweni ya dhoropa kasi a ya wulawula naye cihundleni. Kanilezvi i no mu tlhava khwiri, afa.+ I mahile lezvo hi kota ya lezvi a nga dele a* makabye wakwe Asaheli.+ 28 Laha Dhavhidha a ngazwa mhaka leyo hi ndzhako ka cikhati i te ngalo: “Mina ni mufumo wa mina a hi na nandzu mahlweni ka Jehovha kala kupindzuka hi kota ya nandzu wa nkhata+ wa Abneri, a n’wana wa Neri. 29 A nandzu wa kona a wuve hehla ka hloko ya Jowabe+ ni ka yindlu yontlhe ya papayi wakwe. A yindlu ya Jowabe yi wa tshame na yi hi ni vanhu va humako wubovhu,*+ ni va hlokonho,+ ni vavanuna va swulako,* ni vo dawa hi cipadha, ni va ku vhumala zvakuga!”+ 30 Hikwalaho, Jowabe ni makabye wakwe Abhixayi+ va no daya Abneri+ hi lezvi a nga dele a makabye wabye Asaheli yimpini,+ le Gibheyoni.

31 Makunu Dhavhidha i no byela Jowabe ni vanhu vontlhe a nga hi navo, aku: “Handzulani a tinguwo ta n’wina, mu boha tisakwa mu rilela Abneri.” Hosi Dhavhidha i wata hi le ndzhako ka lihlaka* la mufi. 32 Va no lahla Abneri le Hebroni. A hosi yi no rila hi gezu ga hombe laha cilahleni ca Abneri, niku a vanhu vontlhe va no rilawu. 33 A hosi yi no yimbelela a lisimu la ku rila Abneri, yiku:

“Hikuyini Abneri a nga fisa ku khwatsi cipumbu?

U dayisilwe ku khwatsi u no dawa hi zvigevenga.”*+

Makunu a vanhu vontlhe va no tlhela va mu rila kambe.

35 Hi ndzhako ka cikhati, a vanhu vontlhe va nota ka Dhavhidha va ta mu nyika a pawa ya cirilo* na ka ha hi hlikanhi, kanilezvi Dhavhidha i no hlambanya, aku: “Nungungulu i wa ndzi tsayise a tlhela a engeta loku ndziga pawa kutani nchumu wun’wani a gambo na gi nga se pela!”+ 36 A vanhu vontlhe va no zvi wona, va tsaka hi zvona. A ku khwatsi hi zvontlhe lezvi a hosi yi nga kari yi maha, zvi no tsakisa a vanhu vontlhe. 37 Hikwalaho, ka siku lego, a vanhu vontlhe ni vaIzrayeli vontlhe va no zvi tiva lezvaku a hosi yi wa nga hi na nandzu wa kudawa ka Abneri, a n’wana wa Neri.+ 38 A hosi yi no byela a malandza ya yona, yiku: “A mu zvi woni lezvaku nyamutlha ku wile a hosana ni munhu wa hombe lomu Izrayeli ke?+ 39 Nyamutlha a ndzi na ntamu hambu lezvi ndzi nga totiwa a kuva hosi,+ niku a vavanuna lava, a vana va Zeruya,+ va na ni tihanyi ta hombe nguvhu.+ Jehovha i wa tlhelisele a wakubiha hi kubiha ka yena n’winyi.”+

4 A cikhati leci Ixbhoxete,+ a n’wana wa Sawule, a ngazwa lezvaku Abneri i file le Hebroni,+ i no tsemeka hlanha,* niku vontlhe a vaIzrayeli va no karateka. 2 Ku wa hi ni vavanuna vambiri va nga rangela a mitlawa ya vaphangi ya n’wana wa Sawule: A mun’we i wa hi Bhaana, loyi mun’wani ku wa hi Rekabe. Va wa hi vana va Rimoni, a muBheerote, wa lixaka la ka Bhenjamini. (Hakuva Bheerote+ yenawu i wa hlayiwa ka va ka Bhenjamini. 3 A vaBheerote va wa tsutsumile vaya Gitayime,+ niku va tshama seyo kota valuveli kala nyamutlha.)

4 Makunu Jonatani,+ a n’wana wa Sawule, i wa hi ni mufana a nga limalile minenge.+ A mufana loye i wa hi ni ntlhanu wa malembe a cikhati leci ku ngata a mahungu hi le Jezreeli, xungetano hi Sawule na Jonatani.+ A muhlayisi wakwe i no mu tlakula a tsutsuma, kanilezvi laha a nga kari a tsutsuma hi kuchava, a n’wanana i nowa a limala. A vito gakwe ku wa hi Mefibhoxete.+

5 A vana va Rimoni, a muBheerote, Rekabe na Bhaana, va no nghena lomu ndlwini ya Ixbhoxete hi cikhati leci a mumu wu nga hisa nguvhu, va mu kuma na a humula ni hlikanhi. 6 Va no nghena lomu ndlwini a ku khwatsi vo lava ku nusa trigo, va mu tlhava khwiri; andzhako ka lezvo, Rekabe ni makabye wakwe Bhaana+ va no huma va tsutsuma. 7 A cikhati leci va nga nghena lomu ndlwini, Ixbhoxete i wa etlele laha mubhedhini lomu kwartwini yakwe, va se mu tlhava afa, va gumesa va mu tsema hloko. Andzhako ka lezvo, va no teka hloko yakwe va famba nayo wusiku gontlhe hi ruwa gi yako Arabha. 8 Va no neha a hloko ya Ixbhoxete+ ka Dhavhidha le Hebroni, va ta byela hosi, vaku: “Hi leyi a hloko ya Ixbhoxete, a n’wana wa Sawule, a nala wa wena,+ loyi a nga kari a hlota a wutomi* ga wena.+ Nyamutlha, Jehovha i photele a hosi ya hina ka Sawule ni pswalo wakwe.”

9 Kanilezvi Dhavhidha i no hlamula Rekabe ni makabye wakwe Bhaana, a vana va Rimoni, a muBheerote, aku: “A ku khwatsi hi lezvi Jehovha a hanyako, loyi a nga ndzi tlhatlhisa* kuxanisekeni kontlhe,+ 10 a cikhati leci a wokari a ngata a taku: ‘Sawule i file’,+ na a ti byela ku o ndzi nehela a mahungu ya manene, ndzi no mu khoma ndzi mu daya+ le Ziklagi. Hi walowo a nchachazelo lowu ndzi nga nyika a mubiki wa mahungu! 11 Makunu a ndza ha wuli hi lezvi a vanhu vo biha va nga daya a munhu wo lulama lomu ndlwini yakwe, lezvo laha mubhedhini wakwe! Ndzi nga ta londza a nkhata wakwe canjeni ga n’wina,+ ndzi mu lovisa laha misaveni ke?” 12 Dhavhidha i no laya a majaha yakwe+ lezvaku ma va daya. Ma no va tsema mawoko ni minenge ma va hayeka+ kusuhani ni citivana ca le Hebroni. Kanilezvi ma no teka a hloko ya Ixbhoxete ma yi lahla laha cilahleni ca Abneri, le Hebroni.

5 Hi kufamba ka cikhati, a tixaka tontlhe ta ka Izrayeli ti noya ka Dhavhidha le Hebroni,+ ti yaku: “Hina na wena hi nkhata wun’we.*+ 2 A kale, laha Sawule a nga hi hosi ya hina, hi wena u nga kari u rangela Izrayeli tiyimpini takwe.*+ Niku Jehovha i te ngalo ka wena: ‘U ta risa a vanhu va mina, a vaIzrayeli, niku u tava murangeli wa Izrayeli.’”+ 3 Hikwalaho, a madhota wontlhe ya ka Izrayeli ma noya ka hosi Dhavhidha le Hebroni niku hosi Dhavhidha i no maha civhumelwano nawo+ le Hebroni mahlweni ka Jehovha. Andzhako ka lezvo, ma no tota Dhavhidha kota hosi ya Izrayeli.+

4 Dhavhidha i wa hi ni 30 wa malembe a cikhati leci a nga maha hosi, niku i no fuma a 40 wa malembe.+ 5 Le Hebroni i no fuma a 7 wa malembe ni 6 wa tihweti hehla ka Judha, le Jerusalema+ a fuma a 33 wa malembe hehla ka Izrayeli ni Judha. 6 A hosi ni vavanuna va yona va noya Jerusalema va ya dhumela a vaJebhusi lava va nga hanya tikweni lego. Kanilezvi a vaJebhusi+ lavo va no poyila Dhavhidha, vaku: “U nga ta tshuka u ku nghena lomu! Hambu a zvikhumu ni zvilima zvi ta ku hlongola.” Va wa ti byela lezvi: ‘Dhavhidha a nga ta tshuka a ku nghena lomu.’+ 7 Hambulezvo, Dhavhidha i no teka a khokhola ga Ziyoni, legi zvezvi gi nga Dhoropa ga Dhavhidha.+ 8 Ka siku lego, Dhavhidha i te ngalo: “Lava va hlaselako a vaJebhusi va wa fambe hi musele wa lomu hasi wa ku famba mati va ya daya a ‘zvilima ni zvikhumu’, lezvi zvi vengiwako nguvhu hi Dhavhidha!”* Hi zvona zvi mahako lezvaku ku wuliwa ku: “A zvikhumu ni zvilima zvi nga ta tshuka zvi nghena lomu ndlwini.” 9 Makunu Dhavhidha i no ya hanya khokholeni, legi gi nga chuliwa ku* i Dhoropa ga Dhavhidha. Na Dhavhidha i no sangula ku aka matlhelweni yakwe wontlhe, kusukela Milo*+ kala lomu ndzeni ka dhoropa.+ 10 Hikwalaho, Dhavhidha i no simama ku endzeleka ava ni ntamu,+ niku Jehovha, a Nungungulu wa mabutho, i wa hi zvin’we naye.+

11 Hiramu,+ a hosi ya Tire, i no rumela a zvirun’wa ka Dhavhidha, ni mapulango ya sedhare,+ ni vavatli, ni vameseri va ku aka a mimuro. Va no sangula ku aka a yindlu* ya Dhavhidha.+ 12 Dhavhidha i no zvi tiva lezvaku Jehovha i mu yimisile a tiya kota hosi hehla ka Izrayeli,+ a tlhela a tlakusa a mufumo wakwe+ hi kota ya vanhu Vakwe, a vaIzrayeli.+

13 Dhavhidha i no teka van’wani vasati va vatsongwani*+ ni vasati le Jerusalema, andzhako ka loku a sukile Hebroni. Dhavhidha i no pswalelwa van’wani vafana ni vanhanyana.+ 14 A mavito ya lava a nga pswalelwa Jerusalema hi lawa: Xamuwa, na Xobhabha, na Natani,+ na Solomoni,+ 15 na Ibhara, na Elixuwa, na Nefega, na Jafiya, 16 na Elixama, na Eliyadha, na Elifelete.

17 A cikhati leci a vaFilistiya va ngazwa lezvaku Dhavhidha i totilwe kota hosi ya Izrayeli,+ vontlhe a vaFilistiya va nota va ta hlota Dhavhidha.+ Laha Dhavhidha a nga zvizwa, i no relela aya lomu khokholeni.+ 18 Makunu a vaFilistiya va nota va ta hangalaka va tata a Nkova wa Refayime.+ 19 Dhavhidha i no wutisa Jehovha,+ aku: “Ndzi kandziha ndzi yalwa ni vaFilistiya ke? U ta va nyikela canjeni ga mina ke?” Jehovha aku ka Dhavhidha: “Kandziha, hakuva hakunene ndzi ta nyikela vaFilistiya canjeni ga wena.”+ 20 Hikwalaho, Dhavhidha i no chikela le Bhaali-Perazimu, a va hlasela laho, aku: “Jehovha i hangalasile a valala va mina+ mahlweni ka mina, a ku khwatsi i mati ma vhulako a musele.” Hikwalaho, i no chula wutshamu lego ku Bhaali-Perazimu.*+ 21 A vaFilistiya va no siya zvifananiso zvabye laho niku Dhavhidha ni vavanuna vakwe va no zvi teka.

22 Hi ndzhako ka cikhati, a vaFilistiya va no wuya kambe va ta tata a Nkova wa Refayime.+ 23 Dhavhidha i no wutisa Jehovha, kanilezvi yena, aku: “U nga va dhumeli hi le mahlweni. Kanilezvi jika uya hi le ndzhako kabye, u ya va dhumela hi le phambeni ka mibhalsameiro. 24 Laha u tozwa a guwa go khwatsi vanhu va fambako le hehla ka mibhalsameiro, va dhumele futsi hakuva Jehovha i tava a rangile mahlweni ka wena kasi a lovisa a butho ga vaFilistiya.” 25 Hikwalaho, Dhavhidha i no mahisa zvalezvi Jehovha a nga mu layisile zvona, a hihirita a vaFilistiya+ kusukela le Gebha+ kala Gezera.+

6 Dhavhidha i no tlhela a hlengeleta a masochwa wontlhe ya ka Izrayeli lawa ya ku zvi kota khwatsi kulwa, 30 000 wa vavanuna. 2 Dhavhidha ni vavanuna vontlhe lava a nga hi navo va no suka vaya Bhaale-Judha kasi va ya teka a Arke* ga Nungungulu wa lisine,+ legi a vanhu va khongelako ka gona a vito ga Jehovha wa mabutho,+ loyi a tshamileko citshan’wini ca wuhosi hehla* ka makerubhima.+ 3 Hambulezvo, va no pakela a Arke ga Nungungulu wa lisine lomu ka kareta ya yiswa+ kasi va gi humesa mutini wa Abhinadhabha,+ lowu wu nga hi le citsungeni; Uza na Ahiyo, a vana va Abhinadhabha, hi vona va nga kari va fambisa a kareta leyo ya yiswa.

4 Hikwalaho, va no humesa a Arke ga Nungungulu wa lisine mutini wa Abhinadhabha, lowu wu nga hi le citsungeni. Ahiyo hi yena a nga rangile mahlweni ka Arke. 5 Dhavhidha ni yontlhe yindlu ya ka Izrayeli va wa kulungela mahlweni ka Jehovha hi tixaka tontlhe ta zvichaya-chaya zvo mahiwa hi mapulango ya junipero, ni zvitende, ni zvichaya-chaya zvin’wani zva tingoti,+ ni mitandanda,+ ni tinjhele, ni tingomana.+ 6 Kanilezvi a cikhati leci va nga chikela le Nakoni, ka wutshamu go hulela kona timbewu, Uza i no nawuluta a canja gakwe a khoma a Arke ga Nungungulu wa lisine,+ hakuva kutsongwani a tihomu ti wa lava ku gi wisa. 7 Hi kota ya lezvo, a zanga ya Jehovha yi no vhindlukela Uza, niku a Nungungulu wa lisine i no mu daya+ kwalaho hi kota ya lezvi a nga kala ku kombisa cichavo,+ a fela kwalaho tlhelweni ga Arke ga Nungungulu wa lisine. 8 Kanilezvi Dhavhidha i no zangara* hi lezvi a zanga ya Jehovha yi nga vhindlukele Uza. A wutshamu lego gi vitaniwa ku Perezi-Uza* kala ni nyamutlha lezvi. 9 Hikwalaho, ka siku lego, Dhavhidha i no chava Jehovha,+ aku: “Gi ta tisa kuyini a Arke ga Jehovha ka mina ke?”+ 10 Dhavhidha i wa nga ha zvi lavi ku neha a Arke ga Jehovha Dhoropeni ga Dhavhidha,+ lomu a nga tshama kona. Kanilezvi i no laya lezvaku gi yisiwa mutini wa Obhed-Edhomi,+ a muGati.

11 A Arke ga Jehovha gi no tshama tihweti tinharu mutini wa Obhed-Edhomi, a muGati; Jehovha i no simama ku katekisa Obhed-Edhomi ni ngango wakwe wontlhe.+ 12 Va no byela hosi Dhavhidha, vaku: “Jehovha wa katekisa a yindlu ya Obhed-Edhomi ni zvilo zvakwe zvontlhe hi kota ya Arke ga Nungungulu wa lisine.” Hikwalaho, Dhavhidha i noya a ya teka a Arke ga Nungungulu wa lisine mutini wa Obhed-Edhomi a famba nago Dhoropeni ga Dhavhidha hi kutsaka.+ 13 A cikhati leci lava va nga rwele+ a Arke ga Jehovha va nga bile a 6 wa mazambo, i no maha muphahlo hi homu ni cihari co nona.

14 Dhavhidha i wa hi lomu ko kina hi ntamu wakwe wontlhe mahlweni ka Jehovha; niku Dhavhidha i wa bohile a efodhe ya wukene.*+ 15 Dhavhidha ni yindlu yontlhe ya ka Izrayeli va wa neha a Arke+ ga Jehovha na va kulungela hi kutsaka+ na vaba linanga.*+ 16 Kanilezvi a cikhati leci a Arke ga Jehovha gi nga chikela Dhoropeni ga Dhavhidha, Mikali, a nhanyana wa Sawule,+ i no hlomela hi janela a wona hosi Dhavhidha na a tlulatlula ni ku kina mahlweni ka Jehovha, a sangula ku mu chepeta mbilwini yakwe.+ 17 Hikwalaho, va no teka a Arke ga Jehovha va gi veka laha ka wutshamu ga gona lomu ndzeni ka tenda legi Dhavhidha a nga gi gwimbile kasi gi tshama kona.+ Andzhako ka lezvo, Dhavhidha i no maha minyikelo ya kuhiswa+ ni miphahlo ya kuhlengela*+ mahlweni ka Jehovha.+ 18 Laha Dhavhidha a nga mbheta ku maha minyikelo ya kuhiswa ni miphahlo ya kuhlengela, i no katekisa a vanhu vitweni ga Jehovha wa mabutho. 19 Ahandle ka lezvo, Dhavhidha i no avela vanhu vontlhe, a citshungu contlhe ca va ka Izrayeli, a vavanuna ni vavasati, a mun’we ni mun’we a nyikiwa a pawa yo khwatsi i phera, ni bholu* ya ticindzu, ni bholu ya mauvha yo woma. Andzhako ka lezvo, a vanhu vontlhe va no suka va famba, a mun’we ni mun’wani a ti yela kaya kakwe.

20 A cikhati leci Dhavhidha a nga tlhela kasi a ya katekisa a ngango wakwe, Mikali, a nhanyana wa Sawule,+ i no huma a mu khinga, aku: “A hosi ya ka Izrayeli a yi no ku ti dzundza nyamutlha hi ku ti funungula mahlweni ka tikhumbi ta cisati ta malandza ya yona a ku khwatsi munhu wo hlanya!”+ 21 Zvalezvo Dhavhidha i no hlamula Mikali, aku: “Mina ndzi wa kulungela mahlweni ka Jehovha, loyi a nga hlawula mina wutshan’wini ga papayi wa wena ni vontlhe va yindlu yakwe, a ndzi yimisa a kuva murangeli wa vanhu va Jehovha, a vaIzrayeli.+ Hikwalaho, ndzi ta kulungela mahlweni ka Jehovha, 22 ndzi ti koramisa nguvhu ku hundza lezvi, ndzi tlhela ndziva wa lahasi mahlweni ka mina n’winyi. Kanilezvi ndzi ta dzundziwa hi tikhumbi ta cisati leti u nga ti wula.” 23 Hikwalaho, Mikali, a nhanyana wa Sawule,+ i noza afa na a nga hi na n’wana.

7 Laha a hosi yi nga tshamile lomu ndlwini* ya yona,+ Jehovha na a yi nyikile kuhumula mahlweni ka valala va yona vontlhe lava va nga yi randzele, 2 a hosi yi no byela muphrofeti Natani,+ yiku: “Hi nga wona, mina ndzi tshama lomu ndlwini ya misedhare+ kuveni a Arke* ga Nungungulu wa lisine gi tshama lomu tendeni.”+ 3 Natani i no hlamula hosi, aku: “Famba u ya maha ni cihi ci nga mbilwini ya wena, hakuva Jehovha i zvin’we na wena.”+

4 Ka wusiku galego, a mhaka ya Jehovha yi nota ka Natani, yi taku: 5 “Famba u ya byela a nandza ga mina Dhavhidha, uku: ‘Jehovha i ngalo: “Kasi hi wena u to ndzi akela yindlu yo tshama ka yona ke?+ 6 Hakuva a ndzi se tshama lomu ndlwini kusukela a siku legi ndzi nga humesa a vaIzrayeli Gibhite kala nyamutlha,+ kanilezvi ndzi tshama hi ku rurarura,* na ndzi tshama lomu tendeni ni lomu tabhernakelini.+ 7 Ka cikhati contlhe leci ndzi nga fambafamba ni vaIzrayeli vontlhe, ndzi wa tshukile ndzi wutisa ka mun’we wa varangeli va lixaka la ka Izrayeli lava ndzi va yimisileko kasi va risa a vanhu va mina, a vaIzrayeli, ndziku: ‘Hikuyini mu nga kala ku ndzi akela a yindlu ya misedhare ke?’”’ 8 Makunu byela a nandza ga mina Dhavhidha, uku: ‘Jehovha wa mabutho i ngalo: “Ndzi ku tekile lomu wuriselweni na u risa ntlhambi+ kasi u tava murangeli wa vanhu va mina, a vaIzrayeli.+ 9 Ndzi tava na wena ni kwihi lomu u toya kona,+ ndzi tlhela ndzi lovisa* a valala va wena vontlhe mahlweni ka wena.+ Ndzi ta ku maha uva ni vito gi dhumileko+ a ku fana ni vito ga vanhu va dhumileko va laha misaveni. 10 Ndzi ta hlawula wutshamu ga ku veka a vanhu va mina, a vaIzrayeli. Va ta tshama ka gona niku va nga ta ha dzukisiwa kambe; a vanhu va kubiha va nga ta ha va xanisa kambe a ku khwatsi hi kale,+ 11 kusukela a siku legi ndzi nga yimisa a valamuli+ hehla ka vanhu va mina, a vaIzrayeli. Ndzi ta ku nyika kurula mahlweni ka valala va wena vontlhe.+

“‘“A ku tsika lezvo, Jehovha i ku tivisa lezvaku Jehovha i ta ku mahela yindlu.*+ 12 Laha a masiku ya wena ma to mbhela,+ u humula ni vakokwani va wena, ndzi ta vhuxa a pswalo* wa wena andzhako ka wena, ku nga n’wana wa wena, ndzi yimisa a mufumo wakwe wu tiya.+ 13 Hi yena a to gi akela yindlu a vito ga mina,+ niku ndzi ta yimisa a citshamu ca wuhosi ca mufumo wakwe ci tiya kala kupindzuka.+ 14 Ndzi tava papayi wakwe, na yena i tava n’wana wa mina.+ Loku a goha, ndzi ta mu kawuka hi nhonga ya vanhu ni timhika ta vana va vanhu.*+ 15 A lirandzo la mina li nga mbheliko li nga ta susiwa kakwe a ku khwatsi hi lezvi ndzi li susileko ka Sawule,+ loyi ndzi mu susileko mahlweni ka wena. 16 A yindlu ya wena ni mufumo wa wena zvi ta tiya mahlweni ka wena kala kupindzuka; ni citshamu ca wena ca wuhosi ci ta yimisiwa ci tiya kala kupindzuka.”’”+

17 Natani i no hlawutela Dhavhidha a timhaka leti tontlhe ni muwoniso lowu wontlhe.+

18 Makunu hosi Dhavhidha i no nghena a tshama mahlweni ka Jehovha, aku: “O Jehovha, Hosi ya Hombe, ndzova mina mani? Kona a yindlu ya mina yova yini, ko kala u ndzi chiketa laha?+ 19 A ku tsika zvontlhe lezvi u ndzi maheleko, O Jehovha, Hosi ya Hombe, wena u tlhela u wula lezvaku a yindlu ya nandza ga wena yi ta simama kala ka cikhati ca le kule ca ha tako; niku leci cileletelo* ka vanhu vontlhe, O Jehovha, Hosi ya Hombe. 20 A nandza ga wena Dhavhidha ga ha ta ku byela yini? Hakuva wena wa ndzi tiva khwatsi,+ O Jehovha, Hosi ya Hombe. 21 Hi kota ya gezu ga wena ni kurandza ka mbilu ya wena, u mahile a zvilo zvontlhe lezvi zva hombe u tlhela u zvi tivisa ka nandza ga wena.+ 22 Hi zvalezvo zvi ku mahako uva wa hombe futsi,+ O Jehovha, Hosi ya Hombe. A ku na mun’wani wo fana na wena+ niku a ku na Nungungulu ahandle ka wena;+ zvontlhe lezvi hi zvi zwileko hi tindleve ta hina zvi tiyisa a mhaka leyi. 23 Hi gihi gin’wani tiko laha misaveni gi fanako ni vanhu va wena, a vaIzrayeli ke?+ Nungungulu i no va tlhatlhisa kota vanhu vakwe,+ a ti mahela vito+ hi ku va mahela zvilo zva hombe zvo hlamalisa.+ U hlongolile a matiko ni vanungungulu vabye hi kota ya vanhu va wena, lava u ti tlhatlhiseleko vona Gibhite. 24 U yimisile a vanhu va wena, a vaIzrayeli, vava vanhu va wena kala kupindzuka;+ niku wena Jehovha uve Nungungulu wabye.+

25 “O Jehovha Nungungulu, makunu maha lezvi u nga tsumbisa xungetano hi nandza ga wena ni yindlu ya gona kala kupindzuka, niku maha kota lezvi u tsumbisileko.+ 26 A vito ga wena gi wa tlakusiwe kala kupindzuka,+ kasi a vanhu vaku: ‘Jehovha wa mabutho i Nungungulu wa Izrayeli’; a yindlu ya nandza ga wena Dhavhidha yi wa yimisiwe yi tiya mahlweni ka wena.+ 27 Hakuva wena, Jehovha wa mabutho, wena Nungungulu wa Izrayeli, u tivisile a nandza ga wena, uku: ‘Ndzi ta ku akela yindlu.’*+ Hi cigelo leco, a nandza ga wena ga tiya a ku maha mukhongelo lowu ka wena. 28 O Jehovha, Hosi ya Hombe, wena u Nungungulu wa lisine; ni magezu ya wena lisine,+ niku u tsumbisile a zvilo lezvi zva zvinene ka nandza ga wena. 29 Hikwalaho, zvi wa ku tsakise a ku katekisa a yindlu ya nandza ga wena niku yi wa simame kala kupindzuka mahlweni ka wena,+ hakuva wena Jehovha, Hosi ya Hombe, u tsumbisile lezvo. A yindlu ya nandza ga wena yi wa katekisiwe hi zvikatekiso zva wena kala kupindzuka.”+

8 Andzhako ka cikhati co kari, Dhavhidha i no hlula vaFilistiya+ a va khozisa;+ Dhavhidha i no teka a tiko ga Metega-Ama canjeni ga vaFilistiya.

2 I no hlula a vaMowabhi+ a va etlelisa lahasi, a va pima hi lingoti. I no pima a vanhu va ringanako tingoti timbiri, a va daya; a pima van’wani vo ringana lingoti lin’we, a va tsika va hanya.+ A vaMowabhi va nova malandza ya Dhavhidha va humesa ndzuvo* kakwe.+

3 Dhavhidha i no hlula Hadhadhezera, a n’wana wa Rehobha, a hosi ya Zobha,+ laha Hadhadhezera a ngaya a ya tiyisa a wuhosi gakwe cipandzeni ca Congo wa Eufrate.+ 4 Dhavhidha i no khoma a 1700 wa vakhileli va mahaxi ni 20 000 wa masochwa ya ku famba hi minenge. Dhavhidha i no tsemelela a misiha ya mahaxi wontlhe ya tikareta ta yimpi a siya a 100 wa wona basi.+

5 Laha a vaSiriya va le Dhamasku+ va ngata va ta vhuna Hadhadhezera, a hosi ya le Zobha, Dhavhidha i no daya a 22 000 wa vaSiriya.+ 6 Dhavhidha i no yimisa a ntlawa wa masochwa le Siriya wa Dhamasku, niku a vaSiriya va nova malandza ya Dhavhidha, va humesa ndzuvo* kakwe. Jehovha i wa mu nyika a kuhlula Dhavhidha ni kwihi lomu a ngaya kona.+ 7 Ahandle ka lezvo, Dhavhidha i no teka a zvitlhangu zva redhonda zva ouro ka malandza ya Hadhadhezera a zvi neha Jerusalema.+ 8 Le Bheta ni le Bherotayi, a madhoropa ya Hadhadhezera, hosi Dhavhidha i no teka a kobre yo tala.

9 Makunu hosi Toyi, wa le Hamate,+ i nozwa lezvaku Dhavhidha i hlulile a butho gontlhe ga Hadhadhezera.+ 10 Hikwalaho, Toyi i no rumela a n’wana wakwe Joramu ka hosi Dhavhidha kasi a ya tiva kuvhuka kakwe ni ku mu dzundza hi lezvi a ngalwa na Hadhadhezera a mu hlula, hakuva Hadhadhezera i wa tala kulwa na Toyi. Joramu i nota ni zvibya zva prata, ni zva ouro, ni zva kobre. 11 Hosi Dhavhidha i no zvi basisela Jehovha, zvin’we ni prata ni ouro leyi a nga yi basisile, leyi a nga yi tekile ka matiko wontlhe lawa a nga ma khozisile+ 12 — ku nga Siriya, ni Mowabhi,+ ni vaAmoni, ni vaFilistiya,+ ni vaAmaleki+ — zvin’we ni muphango wa Hadhadhezera,+ a n’wana wa Rehobha, a hosi ya Zobha. 13 Ahandle ka lezvo, Dhavhidha i no dhuma nguvhu a cikhati leci a nga wuya hi ka ku hlasela a 18 000 wa vaEdhomi Nkoveni wa Munyu.+ 14 I no yimisa a mitlawa ya masochwa le Edhomi. Kontlhe le Edhomi i no yimisa a mitlawa ya masochwa, niku a vaEdhomi vontlhe va nova malandza ya Dhavhidha.+ Jehovha i wa mu nyika kuhlula Dhavhidha ni kwihi lomu a ngaya kona.+

15 Dhavhidha i no simama ku fumela Izrayeli yentlhe.+ Dhavhidha i wa fuma hi nongameto ni kululama+ kasi ku vhuna vanhu vakwe vontlhe.+ 16 Jowabe,+ a n’wana wa Zeruya, i wa hi murangeli wa butho; Jehoxafati,+ a n’wana wa Ahiludha, i wa hi muhlayisi wa timhaka. 17 Zadhoki,+ a n’wana wa Ahitubha, na Ahimeleki, a n’wana wa Abhiyatari, va wa hi vapristi; Seraya i wa hi matsalani. 18 Bhenaya,+ a n’wana wa Jehoyadha, i wa hi murangeli wa vaKereti ni vaPeleti.+ A vana va Dhavhidha va nova tihosana.*

9 Andzhako ka lezvo, Dhavhidha i te ngalo: “I kona a ha seleko lomu ndlwini ya Sawule kasi ndzi fela ku mu kombisa lirandzo li nga mbheliko hi kota ya Jonatani ke?”+ 2 Makunu ku wa hi ni nandza ga yindlu ya Sawule gi nga vitaniwa ku hi Zibha.+ Hikwalaho, va no mu vitanisa aya ka Dhavhidha. A hosi yi no mu wutisa, yiku: “Hi wena Zibha ke?” Yena aku: “Hi mina nandza ga wena.” 3 A hosi yi engeta, yiku: “I kona a ha seleko lomu ndlwini ya Sawule kasi ndzi fela ku mu kombisa a lirandzo li nga mbheliko la Nungungulu ke?” Zibha a hlamula hosi, aku: “Ku sele a n’wana mun’we wa Jonatani; i limele a minenge yontlhe ya yimbiri.”+ 4 A hosi yi mu wutisa, yiku: “I kwihi?” Zibha a hlamula hosi, aku: “I lomu ndlwini ya Makira,+ a n’wana wa Amiyeli, le Lo-Dhebhara.”

5 Hosi Dhavhidha i no tekela ku rumela vanhu va ya mu teka le ndlwini ya Makira, a n’wana wa Amiyeli, le Lo-Dhebhara. 6 A cikhati leci Mefibhoxete, a n’wana wa Jonatani, a n’wana wa Sawule, a nga chikela ka Dhavhidha, i no tekela kuwa hi nghohe a korama. Dhavhidha aku: “Mefibhoxete!” Yena aku: “Hi legi a nandza ga wena.” 7 Dhavhidha aku kakwe: “U nga chavi, hakuva hakunene ndzi ta ku kombisa a lirandzo li nga mbheliko+ hi kota ya papayi wa wena Jonatani. Ndzi ta ku tlhelisela a mipetso yontlhe ya kokwani wa wena Sawule, niku contlhe cikhati u ta gela* mezeni ya mina.”+

8 Laha a ngazwa lezvo, i no korama, aku: “Gova yini a nandza ga wena, a kuza u cuwuka a mbyana ya kufa+ yo kota mina ke?” 9 A hosi yi no vitanisa Zibha, a nandza ga Sawule, yi taku kakwe: “Zvontlhe lezvi zvi nga hi zva Sawule ni yindlu yakwe yontlhe ndza zvi nyikela ka zukulu wa hosi ya wena.+ 10 U ta mu rimela masimu — wena, ni vana va wena, ni malandza ya wena — u hlengeletela a pfuno wa kona kasi a vanhu va yindlu ya zukulu wa hosi ya wena va kuma zvakuga. Kanilezvi Mefibhoxete, a zukulu wa hosi ya wena, i ta gela mezeni ya mina contlhe cikhati.”+

Zibha i wa hi ni 15 wa vana ni 20 wa malandza.+ 11 Zibha aku ka hosi: “A nandza ga wena gi ta maha zvontlhe lezvi a hosi ya mina yi nga laya a nandza ga yona a ku maha.” Hikwalaho, Mefibhoxete i waga mezeni ya Dhavhidha* a ku khwatsi mun’we wa vana va hosi. 12 Mefibhoxete i wa hi ni cifanyana kambe ci nga vitaniwa ku hi Mika;+ vontlhe lava va nga hanya mutini wa Zibha va no maha malandza ya Mefibhoxete. 13 Mefibhoxete i wa tshama le Jerusalema hakuva wontlhe masiku i wa gela mezeni ya hosi,+ niku i wa limalile a minenge yontlhe ya yimbiri.+

10 Hi ndzhako ka cikhati, a hosi ya vaAmoni+ yi nofa. Hanuna, a n’wana wakwe, i nova hosi cikhundleni cakwe.+ 2 Makunu Dhavhidha i te: “Ndzi ta mu kombisa a lirandzo li nga mbheliko Hanuna, a n’wana wa Nahaxi, a ku khwatsi hi lezvi a papayi wakwe yenawu a nga ndzi kombisa a lirandzo li nga mbheliko.” Hikwalaho, Dhavhidha i no rumela a malandza yakwe kasi ma ya mu chavelela hi lezvi a nga felwe hi papayi wakwe. Kanilezvi laha a malandza ya Dhavhidha ma nga chikela tikweni ga vaAmoni, 3 a tihosana ta vaAmoni ti no byela Hanuna, a hosi yabye, tiku: “U alakanya lezvaku Dhavhidha o dzundza a papayi wa wena hi ku rumela vanhu va ta ku chavelela ke? A wu zvi woni ku Dhavhidha i rumele a malandza yakwe kasi ma ta hlola tiko ni ku gi piyara ma tlhela ma gi hahlula ke?” 4 Hikwalaho, Hanuna i no khoma malandza ya Dhavhidha a ma tsema khihlanya ga malevhu+ a tlhela a tsema tinguwo tabye hi laha cikari ti gama hi lomu tinyongeni ta wona, a gumesa a ma hlongola. 5 A cikhati leci Dhavhidha a nga byeliwa lezvo, i no tekela ku rumela vavanuna va ma khinga hakuva ma wa mahilwe zvilo zva tingana nguvhu. A hosi yi te ngalo kabye: “Tshamani Jeriko+ kala a malevhu ya n’wina ma kula, hi kona mu to wuya.”

6 Hi kufamba ka cikhati, a vaAmoni va no wona lezvaku va byalile livengo cikari kabye na Dhavhidha, hikwalaho, a vaAmoni va no rumela vanhu va ya thola vaSiriya va le Bhet-Rehobha+ ni vaSiriya va le Zobha,+ 20 000 wa masochwa yo famba hi minenge. Va no thola kambe ni hosi ya Maaka+ yi nga hi ni 1000 wa vavanuna, ni 12 000 wa vavanuna va le Ixtobha.*+ 7 Laha Dhavhidha a ngazwa lezvo, i no rumela Jowabe ni butho gontlhe zvin’we ni masochwa yakwe ya ntamu nguvhu.+ 8 A vaAmoni va no huma va fola laha nyangweni ya dhoropa kasi kulwa, kanilezvi a vaSiriya va le Zobha ni Rehobha, zvin’we na Ixtobha* na Maaka, va wa yimile voce laha libalangeni.

9 A cikhati leci Jowabe a nga wona lezvaku a masochwa ya valala ma mu tela hi phambeni ni ndzhako, i no hlawula a masochwa yo kari lawa ya tinhenha ya vaIzrayeli, a ma folisa kasi malwa ni vaSiriya.+ 10 A vavanuna lava van’wani i no va nyikela canjeni ga makabye wakwe Abhixayi+ kasi a va folisa valwa ni vaAmoni.+ 11 Hi kulandzela i te ngalo: “Loku a vaSiriya va ndzi peza, tana u ta ndzi tlhatlhisa; kanilezvi loku a vaAmoni va ku peza, ndzi tata ndzi ta ku tlhatlhisa. 12 Hi fanele kuva ni ntamu ni ku tiya hlanha+ hi lwela a vanhu va hina ni madhoropa ya Nungungulu wa hina; Jehovha i ta maha lezvi zvi nga zvinene mahlweni kakwe.”+

13 Jowabe ni vavanuna vakwe va noya mahlweni kasi va yalwa ni vaSiriya, niku a vaSiriya va no tsutsuma mahlweni kakwe.+ 14 A cikhati leci a vaAmoni va nga wona lezvaku a vaSiriya va tsutsumile, va no tsutsuma Abhixayi va nghena dhoropeni. Andzhako ka kulwa ni vaAmoni, Jowabe i no tlhela Jerusalema.

15 Laha a vaSiriya va nga wona lezvaku va hlulilwe hi vaIzrayeli, va no hlengeletana kambe.+ 16 Hikwalaho, Hadhadhezera+ i no vitanisa a vaSiriya va nga hi tlhatukweni wa Congo;*+ va nota Helama na va rangelwa hi Xobhaka, a murangeli wa butho ga Hadhadhezera.

17 A cikhati leci Dhavhidha a nga byeliwa mahungu lawo, i no tekela ku hlengeleta a vaIzrayeli vontlhe va tlhatuka Jordhani va chikela Helama. A vaSiriya va no fola va khinga Dhavhidha valwa naye.+ 18 Kanilezvi a vaSiriya va no tsutsuma a vaIzrayeli; na Dhavhidha i no daya a 700 wa vakhileli va tikareta ni 40 000 wa vakhileli va mahaxi va vaSiriya; i no bayisa Xobhaka, a murangeli wa butho gabye, a fela kwalaho.+ 19 A cikhati leci a tihosi tontlhe, a malandza ya Hadhadhezera, ti nga wona lezvaku ti hlulilwe hi Izrayeli, ti no tekela ku maha kurula na Izrayeli ti fumelwa hi yena;+ ni vaSiriya a va ha tiyangi kambe a ku vhuna a vaAmoni.

11 Kusanguleni ka lembe,* a cikhati leci a tihosi ti humako tiya yimpini, Dhavhidha i no rumela Jowabe ni malandza yakwe ni gontlhe a butho ga Izrayeli kasi va ya lovisa a vaAmoni; va noya va ya randzela a tiko ga Rabha,+ kanilezvi Dhavhidha i wa sele Jerusalema.+

2 Ka siku go kari, na gi ku phum,* Dhavhidha i no vhuka hi laha mubhedhini wakwe, a fambafamba le hehla ka langwa* la yindlu* ya hosi. Na a hi kwale langweni la yindlu, i no wona wasati na a hlamba; a wasati loye i wa sasekile nguvhu. 3 Dhavhidha i no ruma munhu a ya wutisa ku hi mani wasati loye. Vaku kakwe: “A hi Bhatexebha,+ a nhanyana wa Eliyama,+ a sati wa Uriya,+ a muHiti ke?”+ 4 Hi kulandzela, Dhavhidha i no rumela zvirun’wa zvi ya mu teka.+ Hikwalaho, Bhatexebha i nota kakwe, Dhavhidha a etlela naye.+ (Lezvo zvi mahekile Bhatexebha na a hi lomu ka ku ti basisa a kungahlazveki kakwe.*)+ Andzhako ka lezvo, i no tlhela kaya kakwe.

5 A wasati loye i no xura nyimba, a se rumela mahungu ka Dhavhidha, aku: “Ndzi na ni nyimba.” 6 Makunu Dhavhidha i no rumela mahungu ka Jowabe, aku: “Rumela Uriya, a muHiti, ata ka mina.” Hikwalaho, Jowabe i no rumela Uriya ka Dhavhidha. 7 A cikhati leci Uriya a nga chikela kakwe, Dhavhidha i no mu wutisa ku o yini Jowabe, ni lezvaku a masochwa mo yini, niku a yimpi yi fambisa kuyini. 8 Dhavhidha i no byela Uriya, aku: “Ti fambele kaya u ya humula.”* Zvalezvi Uriya a nga suka laha ndlwini ya hosi, va no mu rumelela a cinyikiwo ci ngata hi ka hosi.* 9 Hambulezvo, Uriya i no etlela laha nyangweni ya yindlu ya hosi zvin’we ni malandza wontlhe lawa man’wani ya hosi yakwe; a nga relelangi aya kaya kakwe. 10 Hikwalaho, va no byela Dhavhidha, vaku: “Phela Uriya a nga yangi kaya kakwe.” Laha a ngazwa lezvo, Dhavhidha i no wutisa Uriya, aku: “Kasi a wo wuya zvezvi hi lipfhumbeni ke? Hikuyini u nga kala kuya kaya ka wena?” 11 Uriya i no hlamula Dhavhidha, aku: “A Arke,*+ ni va ka Izrayeli, ni va ka Judha, va lomu michacheni; a hosi ya mina Jowabe ni malandza ya hosi ya mina va govile laha libalangeni. Makunu mina ndzi nga fambisa kuyini kaya ka mina ndzi yaga, ndzinwa, ndzi etlela ni sati wa mina ke?+ A ku khwatsi hi lezvi wena u hanyako,* ndzi nga ta maha lezvo!”

12 Hi kulandzela Dhavhidha i no byela Uriya, aku: “Tshama laha nyamutlha kambe, a mandziko ndzi ta ku tsika u famba.” Hikwalaho, Uriya i no tshama le Jerusalema a siku lego ni siku gi nga landzela. 13 Andzhako ka lezvo, Dhavhidha i no mu vitanisa kasi a taga naye ni kunwa naye, a mu popisa. Kanilezvi laha gi nga ku phum, Uriya i no suka a ya etlela mubhedhini wakwe ni malandza ya hosi yakwe; a nga relelangi aya kaya kakwe. 14 Ni mixo, Dhavhidha i no tsala papilo ga kuya ka Jowabe, a gi rumela hi canja ga Uriya. 15 Ka papilo lego i wa tsalile lezvi: “Folisani Uriya hi le phambeni, laha a yimpi yi hisako nguvhu, mu gumesa mu hlehla, mu mu siya yece kasi va mu tlhava afa.”+

16 Jowabe i wa sina a gi hlolile khwatsi a dhoropa niku i no yisa Uriya laha a nga ku tiva lezvaku ku na ni masochwa ya tinhenha. 17 A cikhati leci a vavanuna va lomu dhoropeni va nga huma va yalwa na Jowabe, ku no dawa a malandza yo kari ya Dhavhidha, niku Uriya, a muHiti, i wa hi cikari ka lava va ngafa.+ 18 Makunu Jowabe i no hlawutela Dhavhidha a mahungu wontlhe ya yimpi. 19 Jowabe i no leletela cirun’wa, aku: “Laha u to mbheta ku hlawutela a mahungu wontlhe ya yimpi ka hosi, 20 loku a hosi yi zangara, yiku: ‘Hikuyini mu ngaya mu yalwa laha kusuhani nguvhu ni dhoropa? Mu wa nga zvi tivi ku va ta mu fula na va hi le hehla ka muro ke? 21 Kasi himani a nga daya Abhimeleki,+ a n’wana wa Jerubhexete?+ A hi wasati a nga hoxela a ribye ga le hehla ga cigayo na a hi le hehla ka muro gi mu daya le Tebheza ke? Hikuyini mu nga tshinela laha kusuhani nguvhu ni muro?’ Makunu wena hlamula, uku: ‘A nandza ga wena Uriya, a muHiti, gonawu gi file.’”

22 Hikwalaho, a cirun’wa ci no famba ci ya hlawutela Dhavhidha zvontlhe lezvi Jowabe a nga ci rumile ku wula. 23 Makunu a cirun’wa ci no byela Dhavhidha, ciku: “A vavanuna vabye va no hi peza; va no huma va talwa na hina laha libalangeni. Kanilezvi hi no va susumeta kala nyangweni ya dhoropa. 24 Makunu a vaphandi va mipaxa va no fula malandza ya wena na va hi le hehla ka muro; ku nofa a malandza yo kari ya hosi, niku a nandza ga wena Uriya, a muHiti, gonawu gi file.”+ 25 Makunu Dhavhidha i no leletela a cirun’wa, aku: “Famba u ya byela Jowabe, uku: ‘A mhaka leyi yi nga ku karati; a cipadha a ci hlawuli, ci daya ni wihi munhu. Lwana ni dhoropa hi ntamu wa wena wontlhe u gi hlula.’+ Tlhela u mu tiyisa.”

26 A cikhati leci a sati wa Uriya a ngazwa lezvaku a nuna wakwe Uriya i file, i no sangula ku rila a nuna wakwe. 27 Zvalezvi a masiku ya cirilo ma nga mbhela, Dhavhidha i no mu vitanisa ata mutini wakwe, a ta maha sati wakwe,+ a mu pswalela mufana. Kanilezvi, lezvi Dhavhidha a nga mahile zvi no mu swira nguvhu* Jehovha.+

12 Hikwalaho, Jehovha i no ruma Natani+ aya ka Dhavhidha.+ Natani i noya ka Dhavhidha a yaku: “Ku wa hi ni vavanuna vambiri ka dhoropa go kari, a mun’we wo ganya ni mun’wani wa cisiwana. 2 Loyi wo ganya i wa hi ni tiyivhu ni tihomu to tala nguvhu;+ 3 kanilezvi loyi wa cisiwana i wa nga hi na nchumu, i wova ni yivhana yin’we basi ya kati a nga yi xavile.+ I no yi wundla yi kula na yi hi zvin’we naye ni vana vakwe. Yi waga a zvakuga zvalezvi zva zvi tsongwani a nga hi nazvo, yinwa kwalomu ka kopo yakwe, yi etlela cifuveni cakwe. Yi wa tlhela yi ku khwatsi i nhanyana wakwe. 4 Ka siku go kari, a wanuna loyi wo ganya i no endzelwa hi mupfhumba, hambulezvo a nga lavangi ku teka a yivhu yin’we kutani homu yin’we ka zvifuyo zvakwe a dayela a mupfhumba loye a nga mu endzele. Kanilezvi, i no teka a yivhana ya wanuna loyi wa cisiwana a dayela a mupfhumba loye.”+

5 Hi kota ya lezvo, Dhavhidha i no zangara nguvhu, a zangarela a wanuna loye, aku ka Natani: “A ku khwatsi hi lezvi Jehovha a hanyako,+ a wanuna loyi a mahileko lezvo i fanele kufa! 6 Niku i fanele ku hakhela a yivhana hi ntsengo wu wuyetilweko mune wa makhati,+ hi kota ya lezvi a nga maha lezvo, a nga mu zweli wusiwana.”

7 Hi kulandzela, Natani i no byela Dhavhidha, aku: “A wanuna wa kona hi wena! Jehovha, a Nungungulu wa Izrayeli, i ngalo: ‘Mina ndzi ku totile kasi uva hosi ya Izrayeli+ ndzi tlhela ndzi ku tlhatlhisa canjeni ga Sawule.+ 8 Ndzi wa lava ku ku nyika a yindlu ya hosi ya wena,+ ni ku veka a vasati va hosi ya wena+ cifuveni ca wena. Ndzi ku nyikile a yindlu ya ka Izrayeli ni ya ka Judha.+ A ku tsika zvontlhe lezvo ndzi ku maheleko, ndzi wa ha lava ku ku mahela zvin’wani zvo hundza lezvo.+ 9 Hikuyini u nga kanyisa a gezu ga Jehovha, u maha lezvi zvi bihileko mahlweni kakwe ke? U dele Uriya, a muHiti, hi cipadha!+ Andzhako ka loku u mu dayile hi cipadha ca vaAmoni+ u no teka a sati wakwe a maha sati wa wena.+ 10 Makunu a cipadha ci nga ta tshuka ci suka ndlwini ya wena,+ hakuva u ndzi kanyisile hi ku teka a sati wa Uriya, a muHiti, a maha a sati wa wena.’ 11 Jehovha i ngalo: ‘Ndzi ta ku nehela makhombo ma tota hi kwalomu ndlwini ya wena;+ ndzi ta teka a vasati va wena ndzi va nyikela ka mun’wani wanuna+ na u zvi wona; i ta etlela ni vasati va wena ni hlikanhi.+ 12 Hambu lezvi wena u nga zvi maha cihundleni,+ mina ndzi ta zvi maha mahlweni ka vaIzrayeli vontlhe, lezvo ni hlikanhi.’”

13 Dhavhidha aku ka Natani: “Ndzi wonhele Jehovha.”+ Natani aku ka Dhavhidha: “Jehovha i tsetselele a ciwonho ca wena.+ U nga tafa.+ 14 Hambulezvo, kota lezvi u nga mu kanyisa nguvhu Jehovha mhakeni leyi, a n’wana loyi a ha hi ku pswaliwako a nga ta hanya; hakunene i tafa.”

15 Andzhako ka lezvo, Natani i no tlhela kaya kakwe.

Jehovha i noba n’wanana wa Dhavhidha loyi a nga pswalilwe hi sati wa Uriya, a sangula ku babya. 16 Dhavhidha i no khongotela a Nungungulu wa lisine hi kota ya n’wanana. Dhavhidha i no pfhunga* nguvhu; i wa nghena lomu ndlwini yakwe a etlela lahasi a wusiku gontlhe.+ 17 Hikwalaho, a madhota ya yindlu yakwe ma nota ma ta yima laha kakwe ma zama ku mu sukisa lahasi, kanilezvi i no ala a tlhela a nga vhumeli kuga nawo. 18 Hi siku ga wu 7 a n’wanana i nofa, kanilezvi a malandza ya Dhavhidha ma wa chava ku mu byela ku a n’wanana i file. Hakuva ma waku: “Hambu a cikhati leci a n’wanana a nga ha hanya, hi nga wulawula naye a nga hizwi, ahati lezvi ke, hi ta mu byelisa kuyini ku a n’wanana i file? A nga tshuka a maha zvilo zvo tshisa.”

19 A cikhati leci Dhavhidha a nga wona lezvaku a malandza yakwe ma hlevelana, i no zvi pola lezvaku a n’wanana i file. Dhavhidha i no wutisa a malandza yakwe, aku: “A n’wanana i nofa ke?” Ma hlamula, maku: “Ina, i file.” 20 Hikwalaho, Dhavhidha i no suka lahasi, a ya hlamba, a tola mafura,+ a cica tinguwo, aya ndlwini+ ya Jehovha a ya khizama. Andzhako ka lezvo, i noya ndlwini* yakwe a ya kombela ku va mu nehela zvakuga, aga. 21 A malandza yakwe ma no mu wutisa, maku: “Zvi wula kuyini zvezvo u mahako? A cikhati leci a n’wanana a nga ha hanya u wa pfhunga u tshama hi kurila; kanilezvi zvalezvi a n’wanana a ngafa u no suka uga zvakuga.” 22 I no va hlamula, aku: “A cikhati leci a n’wanana a nga ha hanya, ndzi wa pfhunga,+ ndzi tshama hi ku rila hakuva ndzi waku: ‘Himani a zvi tivako, kuzvilava Jehovha i ta ndzi mahela wuxinji a tsika n’wanana a hanya?’+ 23 Makunu lezvi a n’wanana a fileko ndza ha ta pfhungela yini? Ndzi nga mu vhuxa ke?+ Hi mina ndzi toya lomu a nga kona,+ kanilezvi yena a nga ta wuya ka mina.”+

24 Dhavhidha i no chavelela sati wakwe Bhatexebha.+ I noya kakwe a ya etlela naye. Hi kufamba ka cikhati, i no pswala n’wana wa mufana va mu chula ku hi Solomoni.*+ Jehovha i wa mu randza.+ 25 Makunu i no rumela a gezu hi nomu wa muphrofeti Natani+ kasi a chuliwa ku hi Jedhidhiya,* hi kota ya Jehovha.

26 Jowabe i no simama kulwa ni Rabha+ wa vaAmoni,+ a teka a dhoropa ga wuhosi.*+ 27 Hikwalaho, Jowabe i no rumela zvirun’wa zvi ya byela Dhavhidha, zviku: “Ndzi lwile ni Rabha+ niku ndzi tekile a dhoropa ga mati.* 28 Makunu hlengeleta a masochwa lawa ma seleko u ta randzela a dhoropa ulwa nago u gi teka, kasi gi nga tekiwi hi mina, a wudzundzo ga kona gi kumiwa hi mina.”*

29 Hikwalaho, Dhavhidha i no hlengeleta a masochwa wontlhe aya Rabha, a yalwa ni dhoropa lego a gi teka. 30 Makunu i no teka a cidlodlo* hlokweni ya Malkamu. Ci wa peza a talenta* yin’we ya ouro niku ci wa hi ni maribye ya lisima. A cidlodlo leco ci no tlhatekiwa hlokweni ya Dhavhidha. I no teka kambe ni muphango wo tala+ lomu dhoropeni.+ 31 I no khoma vanhu va nga hi ka gona a va sahisa maribye, ni ku va tirisa hi feramenta ya tisimbi to kariha, ni machapo, ni ku maha zvitini. Hi zvalezvo a nga maha ka madhoropa wontlhe ya vaAmoni. Hi kugumesa, Dhavhidha ni masochwa wontlhe va no tlhela Jerusalema.

13 Makunu Absalome, a n’wana wa Dhavhidha, i wa hi ni makabye wa cisati wo saseka, wa ku hi Tamari,+ niku Amnoni,+ a n’wana wa Dhavhidha, i wa mu navela. 2 Amnoni i no karateka laha ka kuza a babya hi kota ya makabye wakwe Tamari, hakuva i wa nga se etlela ni wanuna niku zvi wa ku khwatsi Amnoni a nga na ndlela ya ku mu maha nchumu. 3 Makunu Amnoni i wa hi ni munghana a nga vitaniwa ku hi Jehonadhabha,+ a n’wana wa Ximeya,+ a makabye wa Dhavhidha; Jehonadhabha i wa tlharihile nguvhu. 4 Hikwalaho, i no wutisa Amnoni, aku: “Hikuyini wena, n’wana wa hosi, u xukuvalako nguvhu siku ni siku? Hikuyini u kalako u nga ndzi byeli?” Amnoni aku: “Ndzo navela Tamari, a makabye wa cisati+ wa makabye wa mina Absalome.” 5 Jehonadhabha aku kakwe: “Etlela mubhedhini wa wena u mahisa ku khwatsi wo babya. A cikhati leci a papayi wa wena a tota a ta ku vhuxela, mu byele uku: ‘Ndzi kombela lezvaku Tamari, a makabye wa mina, ata a ta ndzi nyika zvakuga. Loku a longisela a zvakuga zvi nyikiwako vababyi* mahlweni ka mina, ndzi taga lomu canjeni gakwe.’”

6 Hikwalaho, Amnoni i no etlela a mahisa ku khwatsi o babya, niku a hosi yi nota yi ta mu vhuxela. Amnoni i no byela hosi, aku: “Ndzi kombela lezvaku Tamari, a makabye wa mina, ata a ta maha tibholu* timbiri to khwatsi i mbilu mahlweni ka mina kasi ndzi taga lomu canjeni gakwe.” 7 Makunu Dhavhidha i no rumela gezu ka Tamari, le ndlwini, aku: “Famba le ndlwini ya makabye wa wena Amnoni u ya mu longisela zvakuga.”* 8 Hikwalaho, Tamari i noya ndlwini ya makabye wakwe Amnoni, lomu a nga etlele kona. I no teka mapa a ma vhuva a maha tibholu a ti bhika mahlweni kakwe. 9 Hi kulandzela, i no humesa a tibholu lomu ka mbita a mu nyika, kanilezvi Amnoni i no ala kuga, aku: “Vontlhe va nga lomu a va hume!” Hikwalaho, vontlhe va no huma.

10 Amnoni i no byela Tamari, aku: “Ngone ni zvakuga* lomu kwartwini kasi ndzi taga lomu canjeni ga wena.” Hikwalaho, Tamari i no teka a tibholu to khwatsi i mbilu leti a nga ti mahile a famba nato ka makabye wakwe Amnoni, lomu kwartwini. 11 A cikhati leci a nga nghena nato kasi aga, i no mu khoma, aku: “Makabye wa mina, etlela na mina.” 12 Kanilezvi Tamari i te ngalo kakwe: “Ahihi makabye wa mina! U nga ndzi wisi tingana, hakuva a zvilo lezvi a zvi mahiwi lomu Izrayeli.+ U nga mahi a zvilo lezvi zva tingana.+ 13 Ndzi ta kuyini hi tingana leto? Wenawu u ta woniwa kota cilo leco lomu Izrayeli. Kanilezvi wulawula ni hosi, hakuva yi nga ta ala ku ndziva sati wa wena.” 14 Kanilezvi Amnoni i no ala ku mu ingisa; i no mu peza hi ntamu, a mu wisa tingana hi ku mu pfinya. 15 Andzhako ka lezvo, Amnoni i no sangula ku mu venga hi livengo la hombe nguvhu. I no mu venga nguvhu a ku hundza lezvi a nga mu randzisile zvona. Amnoni aku kakwe: “Suka u famba!” 16 Tamari aku kakwe: “Makabye wa mina, u nga mahi lezvo! Hakuva a ku ndzi hlongola zvi bihile nguvhu a ku hundza lezvi u ndzi mahileko!” Kanilezvi Amnoni i no ala ku mu ingisa.

17 Amnoni i no vitana a nandza gakwe ga jaha, aku: “Susa a munhu loyi laha ka mina, u khotsa livati.” 18 (Tamari i wa bohile a nghanju yo hlawuleka,* hakuva a vana va hosi va vanhwana* va wa boha a tinguwo ta tshamela lego.) Hikwalaho, a nandza gakwe gi no mu humesa, gi khotsa livati. 19 Tamari i no ti cheletela a khuma lomu hlokweni yakwe,+ a handzula a nghanju ya yinene leyi a nga bohile, a suka a famba na a rwele mawoko, na a rila nguvhu.

20 Makunu a makabye wakwe Absalome+ i no mu wutisa, aku: “Kasi a hi Amnoni, a makabye wa wena, loyi a nga hi na wena ke? Miyela makabye wa mina. Amnoni makabye wa wena.+ U nga tsiki a mhaka leyi yi kuga.” Tamari i no tshama le ndlwini ya makabye wakwe Absalome, a nga wonani ni vanhu. 21 A cikhati leci hosi Dhavhidha a ngazwa tontlhe timhaka leti, i no zangara nguvhu.+ Kanilezvi i wa nga lavi ku tlhava a mbilu ya n’wana wakwe Amnoni hakuva i wa mu randza hi kota ya lezvi a nga hi matewula yakwe. 22 Absalome a nga wulangi nchumu wo biha kutani wo saseka ka Amnoni, hakuva Absalome i wa mu venga+ Amnoni hi kota ya lezvi a nga mu wisile tingana a makabye wakwe Tamari.+

23 Loku ku hundzile a malembe mambiri yo tala, a vatsemi va woya ga tiyivhu ta Absalome va wa hi le Bhaali-Hazora, kusuhani ni le Efrayime,+ niku Absalome i no ramba a vana vontlhe va hosi.+ 24 Hikwalaho, Absalome i noya ka hosi, a yaku: “A nandza ga wena gi lomu ka ku tsema a woya ga tiyivhu ta gona. Ndzi kombela ku wena hosi ni malandza ya wena hi famba zvin’we.” 25 Kanilezvi a hosi yi no hlamula Absalome, yiku: “Ahihi n’wananga. Loku ho famba hontlheni, hi tava ndzhwalo ka wena.” Hambu lezvi a nga simama ku mu kurumeta, a nga vhumelangi ku famba, kanilezvi i no mu katekisa. 26 Makunu Absalome i te ngalo: “Loku wena u nga zvi lavi, tsika Amnoni, a makabye wa mina, a famba na hina.”+ A hosi yiku: “Hikuyini u lavako ku famba naye?” 27 Kanilezvi Absalome i no simama ku mu kurumeta, aza a vhumela ku Amnoni ni vana vontlhe va hosi va famba naye.

28 Absalome i no leletela a malandza yakwe, aku: “Cuwukelani khwatsi. Laha a mbilu ya Amnoni yi to ngha yi tsakile hi vhinyo, ndzi taku: ‘Dayani Amnoni!’ Mu dayeni futsi. Mu nga chavi nchumu. Kasi a hi mina ndzi mu rumako ke? Tiyani hlanha muva ni ntamu.” 29 Hikwalaho, a malandza ya Absalome ma no maha Amnoni zvalezvi Absalome a nga ma rumile; zvalezvo a vana vontlhe lava van’wani va hosi va no suka, a mun’we ni mun’wani a khilela a mula gakwe a tsutsuma. 30 Na va ha hi lomu ndleleni, ku no chikela mahungu ka Dhavhidha, yaku: “Absalome i dele a vana vontlhe va hosi, i hava a nga pona.” 31 Makunu a hosi yi no suka yi yima yi handzula a tinguwo ta yona yi etlela lahasi niku a malandza yakwe wontlhe ma wa yimile kusuhani kakwe na ma handzulele a tinguwo ta wona.

32 Kanilezvi Jehonadhabha,+ a n’wana wa Ximeya,+ a makabye wa Dhavhidha, i te ngalo: “A hosi ya mina yi nga alakanyi lezvaku va dele a majaha wontlhe ya hosi, hakuva hi Amnoni yece a ngafa.+ Hi Absalome a nga laya lezvaku va mu daya, hakuva i wa fungile lezvo+ kusukela a siku legiyani Amnoni a nga mu wisa tingana+ a makabye wakwe Tamari.+ 33 Makunu a hosi ya mina yi nga cheli kota hi mahungu lawa yaku: ‘Vontlhe a vana va hosi va file’; hi Amnoni yece a ngafa.”

34 Hi cikhati caleco, Absalome i no tsutsuma.+ Andzhako ka lezvo, a murindzeli i no tlakusa mahlo a wona vanhu vo tala na vata hi ruwa gi nga hi lendzhako kakwe, kusuhani ni citsunga. 35 Makunu Jehonadhabha+ i no byela hosi, aku: “Hi nga wona! A vana va hosi va wuyile. Hi zvalezvi a nandza ga wena gi nga wula.” 36 Zvalezvi Jehonadhabha a nga mbheta ku wulawula, a vana va hosi va no nghena na va rila nguvhu; a hosi ni wontlhe a malandza ya yona vonawu va no rila nguvhu. 37 Kanilezvi Absalome i no tsutsuma aya ka Talmayi,+ a n’wana wa Amihudhi, a hosi ya le Gexure. Dhavhidha i no mbheta masiku yo tala na a rila n’wana wakwe. 38 Andzhako ka loku Absalome a tsutsumile aya le Gexure,+ i no tshama malembe manharu kwaseyo.

39 Hi kugumesa, hosi Dhavhidha i no xuva kuya ka Absalome hakuva a mbilu yakwe yi wa rulile makunu* ka kufa ka Amnoni.

14 Makunu Jowabe, a n’wana wa Zeruya,+ i no zvi tiva lezvaku a mbilu ya hosi yi xuva Absalome.+ 2 Hikwalaho, Jowabe i no rumela vanhu vaya Tekowa+ va ya vitana a wasati wo tlhariha nguvhu, a taku kakwe: “Mahisa ku khwatsi u lomu ka cirilo, u boha tinguwo ta cirilo u tlhela u nga toli mafura.+ Ti mahise ku khwatsi u wasati a nga ni masiku yo tala na a rila munhu a fileko, 3 u gumesa u nghena ka hosi u yi byela lezvi ndzi to ku leletela.” Jowabe i no mu byela lezvi a nga fanele ku ya wula.

4 A wasati wa muTekowa i noya ka hosi a yawa lahasi hi nghohe yakwe, a khizama, aku: “Hosi, ndzi vhune!” 5 A hosi yiku kakwe: “I mhaka muni?” A wasati aku: “Mayo! Ndzi noni;* a nuna wa mina i file. 6 Mina nandza ga wena ndzi wa hi ni vafana vambiri. Makunu va nolwa le masin’wini na ku nga hi na wa ku va lamula. Hikwalaho, a mun’we i noba loyi mun’wani a mu daya. 7 Makunu lezvi a ngango wontlhe wu vhukela mina nandza ga wena, wuku: ‘Hi nyike loyi a nga daya a makabye wakwe hi mu dayawu hi photela a wutomi* ga makabye wakwe loyi a nga mu daya,+ hambu loku ku nga sali a mugi wa tshomba!’ Va lava ku tima a khala go gumesa legi ndza ha seleko nago,* va fuvisa a vito ga nuna wa mina ni pswalo wakwe laha misaveni.”

8 A hosi yi no byela a wasati, yiku: “Tlhela kaya ka wena. Ndzi ta leletela lezvaku a mhaka ya wena yi lulamiswa.” 9 A wasati wa muTekowa a hlamula hosi, aku: “Hosi yanga, a nandzu wa kona a wuve hehla ka mina ni ka yindlu ya papayi wa mina, kanilezvi a hosi ni citshamu ca yona ca wuhosi zvi ngavi ni nandzu.” 10 A hosi yiku: “Loku a wokari a tshuka a wulawula kambe na wena, tana naye laha ka mina; a nga ta ha tshuka a ku karata kambe.” 11 Kanilezvi a wasati i te ngalo: “O hosi, alakanya Jehovha, a Nungungulu wa wena, kasi a muphoteli wa nkhata+ a nga nehi khombo, a daya a n’wana wa mina.” A hosi yiku: “A ku khwatsi hi lezvi Jehovha a hanyako,+ ne sisi wun’we wa n’wana wa wena wu nga tawa lahasi.” 12 A wasati aku: “Tsika a nandza ga wena gi wula a gezu ka hosi ya mina.” A hosi yiku: “Wula!”

13 A wasati aku: “Hikuyini, wena u alakanyileko ku maha lezvo, u vhukela a vanhu va Nungungulu ke?+ Loku a hosi yi wulawulisa lezvi ya ti kona ha yoce, hakuva a hosi a yi landzi a n’wana wa yona loyi a hlongolilweko.+ 14 Hakunene hi tafa hi tlhela hi fana ni mati ma halatilweko lahasi, ya ku loku ma halaka ma halakile. Kanilezvi, Nungungulu i wa nga ta susa wutomi* ga munhu, niku wa lavetela tindlela ta ku loyi a hlongolilweko a nga simami a hambana naye kala kupindzuka. 15 Ndzi tile ndzi ta wula a timhaka leti ka hosi ya mina hakuva a vanhu va ndzi dzukisele. Hikwalaho, a nandza ga wena gi te ngalo: ‘Ndza ha byela a hosi, kuzvilava a hosi yi ta hlamula a cikombelo ca nandza ga yona. 16 Kuzvilava a hosi yi tazwa a nandza ga yona yi gi tlhatlhisa canjeni ga munhu loyi a lavako ku lovisa mina ni n’wana wa mina wa mun’we tshombeni leyi Nungungulu a hi nyikileko.’+ 17 A nandza ga wena gi waku: ‘A gezu ga hosi ya mina gi wa pepise a moya wa mina’, hakuva a hosi ya mina yi fana ni ngilozi ya Nungungulu hi ku zvi kota ku hambanisa a zvazvinene ni zvakubiha. Jehovha, a Nungungulu wa wena, i wave zvin’we na wena.”

18 Makunu a hosi yi no hlamula wasati, yiku: “U nga ndzi fihleli nchumu ka lezvi ndzi to ku wutisa.” A wasati aku: “Wulawula, hosi yanga.” 19 A hosi yiku: “Hi Jowabe a nga ku byela zvontlhe lezvi u nga wula ke?”+ A wasati aku: “O, hosi yanga, a ku khwatsi hi lezvi wena u* hanyako, hi zvona u wulako,* hosi yanga. A nandza ga wena Jowabe hi gona gi nga ndzi leletela gi tlhela gi byela a nandza ga wena a timhaka tontlhe leti. 20 A nandza ga wena Jowabe gi mahile lezvo kasi ku hundzulusa mhaka, kanilezvi a hosi ya mina yi tlharihile a ku fana ni ngilozi ya Nungungulu wa lisine, niku ya zvi tiva zvontlhe lezvi zvi mahekako lomu tikweni.”

21 Makunu a hosi yi te ngalo ka Jowabe: “Zvi lulamile, ndzi ta maha lezvi u nga wula.+ Famba u ya teka jaha Absalome u wuya naye.”+ 22 Zvalezvo Jowabe i nowa lahasi hi nghohe yakwe a khizama, a dzundza hosi, aku: “Nyamutlha a nandza ga wena ga zvi tiva lezvaku ndzi kumile thomo mahlweni ka wena, hosi yanga, hakuva a hosi yi hlamulile a cikombelo ca nandza ga yona.” 23 Hi kulandzela, Jowabe i no suka aya Gexure+ a ya teka Absalome a wuya naye Jerusalema. 24 Kanilezvi a hosi yi te ngalo: “I wa tlhele ndlwini yakwe, a ngati a ta wona a nghohe ya mina.” Hikwalaho, Absalome i no tlhela ndlwini yakwe; a nga wonangi a nghohe ya hosi.

25 Kontlhe lomu Izrayeli ku wa nga hi na wanuna a nga babaziwa nguvhu hi kusaseka a ku fana na Absalome. Kusukela cipameni ca nkondzo wakwe kala hlokweni yakwe ku wa nga hi na cisolo laha kakwe. 26 Loku a tsema misisi yakwe yi wa peza 200 wa maxekeli* hi kuya hi pezo ya ribye ya laha wuhosini.* (I wa tsema kumbheleni ka lembe ni lembe hakuva yi wa mu bindza nguvhu.) 27 Absalome i no pswalelwa a vafana vanharu+ ni nhanyana mun’we, loyi a nga vitaniwa ku hi Tamari. A nhanyana loye i wa sasekile nguvhu.

28 Absalome i no tshama malembe mambiri yo tala le Jerusalema kanilezvi a nga yi wonangi a nghohe ya hosi.+ 29 Absalome i no vitanisa Jowabe kasi a mu rumela ka hosi kanilezvi Jowabe a nga yangi. I no mu vitanisa kambe, hi khati ga wumbiri, kanilezvi i no ala kambe. 30 Hi kugumesa, Absalome i no byela a malandza yakwe, aku: “A simu ga Jowabe gi gamekene ni legi ga mina niku gi na ni sevhadha. Fambani mu ya gi hisa.” Hikwalaho, a malandza ya Absalome ma noya ma ya hisa a simu lego hi ndzilo. 31 Makunu Jowabe i no suka aya ndlwini ya Absalome, a yaku: “Hikuyini a malandza ya wena ma nga hisa a simu ga mina ke?” 32 Absalome aku: “Ndzi ku vitanisile, ndziku: ‘Ngone ndzi ta ku rumela ka hosi u ya yi wutisa ku: “Kasi ndzi wa wuyela yini hi Gexure?+ Zvi wa nga hi chukwana loku ndzi wa no ti tshamela kwaseyo? Makunu ndzi tsike ndzi wona a nghohe ya hosi; ni loku ndzi hi ni nandzu i wa ndzi daye.”’”

33 Hikwalaho, Jowabe i noya ka hosi a ya yi byela a timhaka leti. Makunu a hosi yi no vitanisa Absalome. Absalome i no nghena ka hosi a khizama, awa lahasi hi nghohe mahlweni ka hosi. A hosi yi no pswopswa Absalome.+

15 Andzhako ka zvontlhe lezvo, Absalome i no ti lavela a kareta ni mahaxi ni 50 wa vavanuna kasi va tsutsuma mahlweni kakwe.+ 2 Absalome i wa vhuka ni mixo a ya yima laha kusuhani ni ruwa gi yako nyangweni ya dhoropa.+ Ni ka cihi cikhati laha a munhu a nga hi ni mhaka ya ku yi yisa ka hosi kasi yi ya lamuliwa,+ Absalome i wo mu vitana, aku: “Uta hi ka dhoropa muni?” A munhu loye a hlamula, aku: “A nandza ga wena gi huma hi ka lin’we la tixaka ta ka Izrayeli.” 3 Absalome aku kakwe: “A mhaka ya wena ya zwala niku yi lulamile kanilezvi a ku na munhu le wuhosini wa kuzwa a mhaka ya wena.” 4 Absalome i wa tlhela aku: “Loku a ndzo mahiwa mulamuli lomu tikweni, ni wihi munhu a nga ni zvikhalo kutani timhaka i wa tata ka mina, ndzi ta mu xuxela mhaka yakwe hi kululama.”

5 Ni loku a wokari ata kusuhani kakwe kasi a ta mu khizamela, Absalome i wa nawuluta a canja gakwe a mu khoma, a mu pswopswa.+ 6 Absalome i wa maha lezvo ka vontlhe a vaIzrayeli lava va nga kari vata ka hosi va ta xuxelwa timhaka; hikwalaho Absalome i no simama ku koka timbilu ta vaIzrayeli.+

7 Andzhako ka mune wa malembe,* Absalome i no byela hosi, aku: “Ndzi kombela kuya le Hebroni+ ndzi ya tatisa cifungo leci ndzi nga ci maha ka Jehovha. 8 Hakuva a nandza ga wena gi mahile a cifungo leci+ a cikhati leci ndzi nga tshama le Gexure,+ tikweni ga Siriya, ndziku: ‘Loku Jehovha a ndzi wuyisa Jerusalema, ndzi ta maha munyikelo ka* Jehovha.’” 9 Makunu a hosi yi te ngalo kakwe: “Famba hi kurula.” Hikwalaho, i no suka aya Hebroni.

10 Makunu Absalome i no rumela zvipiyawu ka tixaka tontlhe ta ka Izrayeli, aku: “Zvalezvi mu tozwa a kuvhuma ka linanga,* huwelelani, muku: ‘Absalome i mahile hosi le Hebroni!’”+ 11 Absalome i no famba ni 200 wa vavanuna va le Jerusalema; va no rambiwa va famba na va nga zvi tivi lezvi zvi nga kari zvi maheka. 12 Ahandle ka lezvo, a cikhati leci Absalome a nga nyikela miphahlo, i no vitanisa Ahitofeli,+ a muGiloni, a sungukati ga Dhavhidha,+ hi le dhoropeni gakwe ga Gilo.+ A cikungo leco ci no simama ku tiya; ni vanhu lava va nga yima na Absalome va wo engetela.+

13 Hi ndzhako ka cikhati, ku nota munhu ka Dhavhidha, a taku: “A timbilu ta vanhu va ka Izrayeli ti yima na Absalome.” 14 Zvalezvo Dhavhidha i no byela a malandza yakwe wontlhe lawa a nga hi nawo le Jerusalema, aku: “Sukani hi tsutsuma+ hakuva i hava a to pona ka Absalome! Hatlisani hakuva a nga hi kuma a hi nehela khombo, a hlasela a dhoropa hi cipadha!”+ 15 A malandza ya hosi ma no yi hlamula, maku: “Ni cihi leci a hosi ya hina yi to hlawula ku maha, hina malandza ya wena hi longile ku maha.”+ 16 Hikwalaho, a hosi yi no huma ni vontlhe va ngango wa yona, kanilezvi yi no siya a 10 wa vasati va vatsongwani*+ kasi va sala va hlayisa muti.* 17 A hosi yi no simama ku famba na yi landzelwa hi vanhu vontlhe, va ya nyima le Bhet-Merake.

18 Wontlhe a malandza yakwe lawa a nga suka nawo,* ni vontlhe a vaKereti, ni vaPeleti,+ ni vaGati,+ 600 wa vavanuna lava va nga mu landzela kusukela le Gati,+ va wa hundza hi laha ka hosi yi va hlola.* 19 Makunu a hosi yi te ngalo ka Itayi,+ a muGati: “Hikuyini wenawu u fambako na hina? Tlhela u ya tshama ni hosi yiswa, hakuva wena u muluveli u khomilweko tikweni ga n’wina. 20 U chikele tolo. Makunu nyamutlha ndzi nga ku teka u pepetseka na hina, u famba loku zvi lava ku ndzi famba u tlhela uya lomu zvi lavako ku ndziya kona ke? Teka a vamakabye va wena mu tlhela. Jehovha i wa ku kombise lirandzo li nga mbheliko a tlhela a tsumbeka ka wena!”+ 21 Kanilezvi Itayi i no hlamula hosi, aku: “A ku khwatsi hi lezvi Jehovha a hanyako ni ku khwatsi hi lezvi a hosi ya mina yi hanyako, ni kwihi laha a hosi ya mina yi tova kona, kani kufeni kutani kuhanyeni, a nandza ga wena gi tava kwalaho!”+ 22 Makunu Dhavhidha i no byela Itayi,+ aku: “Famba, u tlhatuka.” Hikwalaho, Itayi, a muGati, i no tlhatuka zvin’we ni vanhu vakwe vontlhe ni vanana.

23 Vontlhe lomu tikweni va wo rila hi gezu ga hombe a cikhati leci a vanhu vontlhe va nga kari va tlhatuka. A hosi yi wa yimile kusuhani ni Nkova wa Kidroni,+ a vanhu vontlhe na va tlhatuka va kongoma ruwa legi gi yako ciwuleni. 24 Zadhoki+ yenawu i wa hi kwalaho, ni vontlhe a vaLevhi+ lava va nga rwele a arke*+ ga civhumelwano ca Nungungulu wa lisine;+ va no veka a Arke ga Nungungulu wa lisine lahasi; Abhiyatari+ i no chikela a cikhati leci a vanhu vontlhe lava va nga huma hi lomu dhoropeni va nga kari va mbhetisa ku tlhatuka. 25 Kanilezvi a hosi yi te ngalo ka Zadhoki: “Tlhelisa a Arke ga Nungungulu wa lisine dhoropeni.+ Loku ndzi kuma thomo mahlweni ka Jehovha, i ta ndzi wuyisa ndzi ta wona a arke ni wutshamu ga gona.+ 26 Kanilezvi loku yena aku: ‘A ndza ha xalali hi wena’, i wa mahe ka mina ni cihi a ci wonako na ci hi cinene mahlweni kakwe.” 27 A hosi yi no byela mupristi Zadhoki, yiku: “Kasi wena a wu muwoni ke?+ Tlhela dhoropeni hi kurula ni vana va n’wina va vambiri lava mu nga navo, Ahimaza, a n’wana wa wena, na Jonatani,+ a n’wana wa Abhiyatari. 28 Ndzi ta tshama lomu va tlhatukako hi kona kusuhani ni ciwula ndzi rindzela, kala ndzi kuma gezu hi le ka n’wina.”+ 29 Hikwalaho, Zadhoki na Abhiyatari va no teka a Arke ga Nungungulu wa lisine va tlhela nago Jerusalema va ya tshama seyo.

30 A cikhati leci Dhavhidha a nga kari a kandziha a Citsunga ca* maOlivha,+ i no kandziha na a rila, na a fenengetile a hloko yakwe, na a nga bohangi zvilato. A vanhu vontlhe lava a nga hi navo vonawu va wa fenengetile a tihloko tabye, va kandziha na va rila. 31 Dhavhidha i no byeliwa ku: “Ahitofeli mun’we wa lava va mahako cikungo+ na Absalome.”+ Dhavhidha aku: “O Jehovha,+ cica a wusungukati ga Ahitofeli giva wupumbu!”+

32 A cikhati leci Dhavhidha a nga chikela le hehla ka citsunga, laha a vanhu va nga tolovela ku khozela Nungungulu, i no kuma Huxayi,+ a muArke,+ na a mu rindzele, a nguwo yakwe yo leha na yi handzukile, na a hi ni misava hlokweni yakwe. 33 Hambulezvo Dhavhidha i te ngalo kakwe: “Loku u famba na mina, u tava ndzhwalo ka mina. 34 Kanilezvi loku u tlhela dhoropeni u ya byela Absalome, uku: ‘Hosi, mina ndzi nandza ga wena; a kale ndzi wa hi nandza ga papayi wa wena, kanilezvi zvezvi ndzi nandza ga wena’,+ u ta ndzi cicela a wusungukati ga Ahitofeli.+ 35 Mupristi Zadhoki na mupristi Abhiyatari va tava zvin’we na wena. Zvontlhe lezvi u to zvizwa lomu ndlwini ya hosi u ta byela mupristi Zadhoki na mupristi Abhiyatari.+ 36 Seyo va na ni vana vabye va vambiri, Ahimaza,+ a n’wana wa Zadhoki, na Jonatani,+ a n’wana wa Abhiyatari. Zvontlhe lezvi mu to zvizwa rumani vona va ta ndzi byela.” 37 Makunu Huxayi, a munghana* wa Dhavhidha,+ i no chikela lomu dhoropeni a cikhati leci Absalome a nga kari a nghena lomu Jerusalema.

16 A cikhati leci Dhavhidha a nga hundzile kutsongwani le hehla ka citsunga,+ Zibha,+ a nandza ga Mefibhoxete,+ i wa hi laho a mu rindzela, na a hi ni timbongola timbiri ti nga rwele 200 wa tipawa, ni 100 wa tibholu* ta mauvha yo woma, ni 100 wa tibholu ta mihandzu ya cimumu,* ni fuko ya hombe ya vhinyo.+ 2 A hosi yi no wutisa Zibha, yiku: “Hikuyini u ngata ni zvilo lezvi?” Zibha aku: “Ndzi tile ni timbongola leti kasi ti ta khilelwa hi va ngango wa hosi; a tipawa ni mihandzu ya cimumu zvi ta giwa hi majaha, a vhinyo ya lava va to karala lomu ciwuleni.”+ 3 A hosi yiku: “I kwihi a n’wana* wa hosi ya wena?”+ Zibha a hlamula hosi, aku: “I sele le Jerusalema hakuva i te: ‘Nyamutlha a yindlu ya Izrayeli yi ta ndzi tlhelisela a mufumo wa papayi wa mina.’”+ 4 Makunu a hosi yi no byela Zibha, yiku: “Zvontlhe lezvi zvi lumbako Mefibhoxete zva wena.”+ Zibha aku: “Ndza korama mahlweni ka wena. Ngha ndzi kuma thomo mahlweni ka wena, hosi yanga.”+

5 A cikhati leci hosi Dhavhidha a nga chikela le Bhahurima, a wanuna wo kari wa laha ngangweni wa yindlu ya Sawule, a nga vitaniwa ku hi Ximeyi,+ a n’wana wa Gera, i no tshinelela hosi na a yi ruka.+ 6 I wa hoxetela maribye ka Dhavhidha ni ka malandza wontlhe ya hosi Dhavhidha, ni ka vanhu vontlhe, ni ka vavanuna va tinhenha va nga hi tlhelweni gakwe ga cinene ni ga cibhabha. 7 Ximeyi i wa mu ruka, aku: “Famba, famba! Munhu ndziwena u nga ni nandzu wa nkhata! Munhu ndziwena wo kala ku vhuna nchumu! 8 Jehovha i ku tlhelisele a nandzu wontlhe wa nkhata hi kota ya yindlu ya Sawule, loyi u seleko u fuma cikhundleni cakwe; kanilezvi Jehovha i nyikele wuhosi canjeni ga n’wana wa wena Absalome. Makunu a khombo gi ku wele hakuva u munhu a nga ni nandzu wa nkhata!”+

9 Makunu Abhixayi, a n’wana wa Zeruya,+ i no byela a hosi, aku: “Hikuyini a mbyana leyi ya kufa+ yi rukako a hosi ya mina?+ Ndzi tsike ndzi ya mu tsema a hloko.”+ 10 Kanilezvi a hosi yi te ngalo: “I mhaka muni ndzi nga nayo na n’wina vana va Zeruya?+ Mu tsikeni a ndzi ruka,+ hakuva hi Jehovha a nga mu byela,+ aku: ‘Ruka Dhavhidha!’ Makunu himani a to mu wutisa ku ‘hikuyini u mahako lezvi?’” 11 Hi kulandzela, Dhavhidha i no byela Abhixayi ni malandza yakwe wontlhe, aku: “Hambu ku i n’wana wa mina, loyi a nga nkhata wun’we na mina,* a hlotako a wutomi* ga mina,+ a ndza ha wuli hi muBhenjamini!+ Mu tsikeni a ndzi ruka hakuva i rumilwe hi Jehovha! 12 Kuzvilava Jehovha i ta wona hlomulo wa mina,+ niku Jehovha i ta ndzi tlhelisela wunene wutshan’wini ga zviruko lezvi ndzi rukatelwako nyamutlha.”+ 13 Makunu Dhavhidha ni vavanuna vakwe va no simama ku famba hi ruwa, kanilezvi Ximeyi i wa famba hi tlhelo ga citsunga na a mu ruka,+ a mu hoxetela maribye ni ku mu paletela lithuri lo tala.

14 Hi kugumesa, a hosi ni vontlhe a vanhu lava yi nga hi navo va no chikela lomu va ngaya kona na va karele nguvhu, va humula.

15 Ka cikhati caleco, Absalome ni vontlhe a vaIzrayeli va no chikela Jerusalema na a hi zvin’we na Ahitofeli.+ 16 A cikhati leci Huxayi,+ a muArke,+ a munghana* wa Dhavhidha, a ngata ka Absalome, i no byela Absalome, aku: “Hosi, hanya nguvhu!+ Hosi, hanya nguvhu!” 17 Absalome aku ka Huxayi: “Hi zvalezvi u kombisako zvona a lirandzo la wena li nga mbheliko ka munghana wa wena ke? Hikuyini u nga kala ku famba ni munghana wa wena?” 18 Makunu Huxayi i no hlamula Absalome, aku: “Ahihi; mina ndzi yima ni loyi a hlawulilweko hi Jehovha, a tlhela a hlawuliwa hi vanhu lava, ni vavanuna vontlhe va ka Izrayeli. Hi yaloye ndzi to tshama naye. 19 Ndza engeta kambe, ndziku: Himani ndzi faneleko ku mu tirela? A hi n’wana wakwe ke? A ku khwatsi hi lezvi ndzi nga tirela a papayi wa wena, wenawu ndzi ta ku tirela.”+

20 Absalome i no byela Ahitofeli, aku: “Ndzi nyike wusungukati.+ Hi maha yini?” 21 Ahitofeli a hlamula Absalome, aku: “Hlengela masango ni vasati va vatsongwani*+ va papayi wa wena, lava a va siyileko kasi va hlayisa muti.*+ A vanhu vontlhe lomu Izrayeli va ta zvizwa lezvaku u ti mahile cilo co nyenyeza ka papayi wa wena, niku lava va ku seketelako va ta tiya.” 22 Hikwalaho, va no mu gwimbela tenda Absalome le hehla ka yindlu,+ a hlengela masango ni vasati va vatsongwani* va papayi wakwe+ mahlweni ka vaIzrayeli vontlhe.+

23 Masikwini lawo, a wusungukati legi gi nga nyikiwa hi Ahitofeli+ gi wa ku khwatsi i* gezu ga Nungungulu wa lisine. Hi zvalezvo Dhavhidha na Absalome va nga gi wonisa zvona a wusungukati ga Ahitofeli.

17 Ahitofeli i no byela Absalome, aku: “Ndzi tsike ndzi hlawula a 12 000 wa vavanuna ndzi landza Dhavhidha a wusiku legi. 2 Ndzi ta mu hlasela na a karele, na a mbhelile ntamu,*+ ndzi mu dzukisa; vontlhe a vanhu lava a nga navo va ta tsutsuma ndzi sala ndzi daya hosi yoce.+ 3 Andzhako ka lezvo, ndzi ta wuyisa a vanhu vontlhe ka wena; kasi ku a vanhu vontlhe va wuya ka wena zvi taya hi lezvi zvi to humelela a wanuna loyi u mu hlotako. Makunu a vanhu vontlhe va tava kuruleni.” 4 A mhaka leyo yi no tsakisa Absalome ni wontlhe a madhota ya ka Izrayeli.

5 Hambulezvo Absalome i te ngalo: “Vitanani Huxayi yenawu,+ a muArke, kasi hi tazwa lezvi a nga nazvo.” 6 Hikwalaho, Huxayi i nota ka Absalome. Absalome aku kakwe: “Ahitofeli i nyikile a wusungukati legi. Hi landzela wusungukati gakwe ke? Loku zvi nga ringani, wula ga wena.” 7 Huxayi i no byela Absalome, aku: “Ka khati legi, a wusungukati ga Ahitofeli a hi gi nene!”+

8 Huxayi i no engeta, aku: “Wena wa zvi tiva khwatsi lezvaku a papayi wa wena ni vavanuna vakwe tinhenha,+ niku va jujekile* a ku fana ni urso gi lahlekelweko hi vana va gona lomu khwatini.+ A ku tsika lezvo, a papayi wa wena mulwi wa hombe wa tiyimpi,+ hikwalaho a nga ta etlela zvin’we ni vanhu. 9 Zvalezvi hi wulawulako, i fihlele lomu timhakweni* kutani ka wutshamu gin’wani;+ loku a ranga hi yena a hi dhumela, lava va to zvizwa va taku: ‘A vanhu va Absalome va hlulilwe!’ 10 Makunu hambu loyi a tiyileko hlanha, a nga ni mbilu yo khwatsi ya nghala,+ hakunene i ta nyeka hi kuchava, hakuva a va ka Izrayeli vontlhe va zvi tiva lezvaku a papayi wa wena i nhenha+ niku a vavanuna lava a nga navo vanhu va ku tiya hlanha. 11 A wusungukati ga mina hi legi: “Hlengeleta a vaIzrayeli vontlhe, kusukela Dhani kala Bherexebha,+ va tala a ku khwatsi tindzhoho ta misava yi nga mbhirini ya bimbi,+ u va rangela vaya kulweni. 12 Hi ta mu dhumela ni kwihi a nga kona, hi mu pomela a ku khwatsi i ndzhokati leyi yi wako lahasi; i hava ni mun’we wabye a to pona, ne yena, ne hambu a vavanuna lava a nga navo. 13 Loku a tsutsumela dhoropeni, a vaIzrayeli vontlhe va tata ni tingoti dhoropeni lego hi ta gi kokela nkoveni kala ku nga sali ne ni ribye gin’we.”

14 Hi kulandzela, Absalome ni vavanuna vontlhe va ka Izrayeli va te ngalo: “A wusungukati ga Huxayi, a muArke, gi nene+ a ku hundza legi ga Ahitofeli!” Hakuva Jehovha i wa bohile* ku chipisa a wusungukati ga ginene ga Ahitofeli+ kasi Jehovha a neha khombo ka Absalome.+

15 Andzhako ka lezvo, Huxayi i no byela mupristi Zadhoki na mupristi Abhiyatari,+ aku: “Ahitofeli i mu nyikile a wusungukati legi Absalome ni madhota ya ka Izrayeli, kanilezvi mina ndzi mu nyikile legi. 16 Hatlisani mu rumela gezu ka Dhavhidha mu mu tlharihisa, muku: ‘A wusiku legi u nga tshami lomu va tlhatukako hi kona kusuhani ni ciwula, kanilezvi tlhatuka, u nga mahi mihoni, kasi wena hosi ni vanhu lava u nga navo mu nga loviswi.’”+

17 Jonatani+ na Ahimaza+ va wa tshamile le En-Rogeli.+ Hikwalaho, ku no suka a nandza ga cisati gi ya va byela mahungu lawo, vonawu va suka va famba va ya byela hosi Dhavhidha hakuva va wa nga tiyi a ku woniwa na va nghena lomu dhoropeni. 18 Kanilezvi va no woniwa hi jaha go kari, gi ya byela Absalome. Hikwalaho, hi wumbiri gabye va no hatlisa va famba va ya chikela mutini wa wanuna wo kari le Bhahurima+ loyi a nga hi ni hlowo laha tsendzeleni* wa muti wakwe, va nghena lomo. 19 A sati wa wanuna loye i no andlala nguwo a fenengeta a nomu wa hlowo, a aneka a timbewu ti dulilweko hehla ka nguwo leyo; i hava a nga zvi tiva. 20 A malandza ya Absalome ma no chikela laha kaya ka wasati loye ma mu wutisa, maku: “I kwihi Ahimaza na Jonatani?” A wasati aku: “Va hundzile va kongoma le matini.”+ Makunu a vavanuna lavo va no va hlota kanilezvi a va va kumangi. Hikwalaho, va no tlhela Jerusalema.

21 Laha a vavanuna lavo va nga fambile, Ahimaza na Jonatani va no huma hi lomu hloweni va famba va ya hlawutela hosi Dhavhidha, vaku: “Sukani mu tlhatuka a congo hi kuhatlisa hakuva Ahitofeli i nyikile a wusungukati legi hi n’wina.”+ 22 Zvalezvo Dhavhidha ni vanhu vontlhe lava a nga hi navo va no suka va tlhatuka a Jordhani. Gi te gica ni mixo a vanhu vontlhe na va tlhatukile a Jordhani.

23 Laha Ahitofeli a nga wona lezvaku a wusungukati gakwe a gi tirangi, i no khilela mbongola a tlhela kaya kakwe, le dhoropeni gakwe.+ Andzhako ka loku a va nyikile a zvileletelo a va ngango wakwe,+ i no ti boha.+ Hikwalaho, i nofa a lahliwa cilahleni ca vakokwani vakwe.

24 Ka cikhati caleco, Dhavhidha i noya Mahanayime.+ Absalome i no tlhatuka a Jordhani zvin’we ni vavanuna vontlhe va ka Izrayeli. 25 Absalome i no yimisa Amasa+ cikhundleni ca Jowabe kasi a rangela butho.+ Amasa i wa hi n’wana wa muIzrayeli wa ku hi Itara, loyi a nga etlele na Abhigayili,+ a n’wana wa Nahaxi, a makabye wa Zeruya, a mamani wa Jowabe. 26 A vaIzrayeli na Absalome va no gova tikweni ga Gileyadhe.+

27 Zvalezvi Dhavhidha a nga chikela Mahanayime, Xobhi, a n’wana wa Nahaxi, wa le Rabha+ wa vaAmoni, na Makira,+ a n’wana wa Amiyeli wa le Lo-Dhebhara, na Bharzilayi,+ a muGileyadhe wa le Rogelima, 28 va nota ni masango, ni tibasiya, ni magalango, ni trigo, ni sevhadha, ni mapa, ni tindzhoho to katingiwa, ni tidzumani,* ni tinyawa,* ni tindzhoho ti womisilweko, 29 ni wulombe, ni matega, ni tiyivhu, ni keijo. Va nota ni zvontlhe lezvo va ta nyika Dhavhidha ni vanhu vontlhe lava a nga hi navo kasi vaga,+ hakuva va waku: “A vanhu va na ni ndlala, va karele, seno kambe vazwa tora lomu ciwuleni.”+

18 Hi kulandzela, Dhavhidha i no hlaya a vavanuna lava a nga hi navo, a gumesa a yimisa a varangeli va mitlawa ya 1000 wa vanhu ni ya 100 wa vanhu hehla kabye.+ 2 Dhavhidha i no rumela a mitlawa yinharu ya vavanuna: A wun’we wu wa rangelwa hi Jowabe,+ a wun’wani wu rangelwa hi Abhixayi,+ a makabye wa Jowabe, a n’wana wa Zeruya,+ ni lowu wun’wani wu rangelwa hi Itayi,+ a muGati. A hosi yi no byela a vavanuna lavo, yiku: “Minawu ndzi ta famba na n’wina.” 3 Kanilezvi vona vaku ngalo kakwe: “U nga fambi,+ hakuva loku hina hi tsutsuma va nga ta chela kota hi hina; ni loku a khihlanya ga hina gifa va nga ta chela kota hi hina, hakuva wena u ringana a 10 000 wa hina.+ Hikwalaho, zvi wa tava chukwana ku u hi vhuna na u hi kwalomu dhoropeni.” 4 A hosi yi no va hlamula, yiku: “Ndzi ta maha ni cihi mu ci wonako na ci hi cinene.” Hikwalaho, a hosi yi no yima tlhelweni ga nyangwa ya dhoropa, a vanhu vontlhe va huma hi mitlawa ya 100 ni ya 1000. 5 A hosi yi no laya Jowabe, na Abhixayi, na Itayi, yiku: “Gi khomeni khwatsi jaha Absalome hi kota ya mina.”+ A vavanuna vontlhe va no zvizwa a cikhati leci a hosi yi nga nyika a cileletelo leci ka tihosana tontlhe xungetano hi Absalome.

6 A vanhu va no huma handle va khinga a vaIzrayeli va yalwa navo lomu khwatini ga Efrayime.+ 7 Kwaseyo a vaIzrayeli+ va no hluliwa hi malandza ya Dhavhidha,+ ku dawa a vanhu vo tala ka siku lego — 20 000 wa vavanuna. 8 A yimpi yi no hangalaka lomu tikweni gontlhe. Ahandle ka lezvo, a khwati gi no hihirita a vanhu vo tala nguvhu ka siku lego a ku hundza lava va nga dawa hi cipadha.

9 Hi kugumesa, Absalome i no tlhangana ni malandza ya Dhavhidha na a khilele a mula; a mula gi no nghena hi lomu ka madhavi yo khwela ya sinya ya hombe. Makunu a hloko ya Absalome yi no khwekela lomu sinyeni ya hombe, a cikila laha cikari ka tilo ni misava, kanilezvi a mula legi a nga khilele gi no simama ku famba. 10 A munhu wo kari i no zvi wona, a ya byela Jowabe,+ aku: “Ndzi wonile Absalome na a cikila lomu ka sinya ya hombe.” 11 Jowabe i no hlamula a wanuna loye, aku: “U mu wonile? Makunu hikuyini u nga kala ku mu daya awa lahasi? Na ndzi ku nyikile a 10 wa zvingerengere zva prata ni libhandi na ndzi xalele.” 12 Kanilezvi a wanuna loye i no hlamula Jowabe, aku: “Hambu loku ndzi wo nyikiwa* a 1000 wa zvingerengere zva prata ndzi wa nga ta tlakusa a canja ga mina hehla ka n’wana wa hosi, hakuva hi zvi zwile lezvi a hosi yi nga leletela wena, na Abhixayi, na Itayi, yiku: ‘Mu nga tsiki munhu a gi maha zvobiha jaha Absalome.’+ 13 Loku ndzi wa no tsika ku ingisa ndzi susa wutomi* gakwe, na zvi nga fihlalangi ka hosi niku wena na u nga ndzi lwelangi.” 14 Makunu Jowabe aku: “Ndzi nga ta luza a cikhati ca mina hi ku wulawula na wena!” Hikwalaho, i no teka a mipaxa* yinharu a fula Absalome hi laha mbilwini na a ha hanya lomu hehla ka sinya ya hombe. 15 Hi kulandzela, ku nota a 10 wa malandza lawa ma nga welela a matlhari ya Jowabe ma ta tlhava Absalome kala afa.+ 16 Jowabe i noba a linanga,* a vavanuna vontlhe va wuya hi ka ku hlongolisela a vaIzrayeli; hikwalaho Jowabe i no va nyimisa. 17 Va no teka Absalome va mu hoxela lomu nkeleni wa hombe lomu khwatini va wungeletela a nhulu ya hombe ya maribye hehla kakwe.+ Vontlhe a vaIzrayeli va no tsutsuma vaya mitini yabye.

18 Na a ha hanya, Absalome i wa ti mahele a pilari le Nkoveni wa Hosi,+ hakuva i waku: “A ndzi na n’wana wa mufana wa ku i ta sala a maha cialakanyiso ca vito ga mina.”+ Hikwalaho, i no gi chula a vito gakwe. Kala ni nyamutlha lezvi ga ha vitaniwa ku Cialakanyiso ca Absalome.

19 Ahimaza,+ a n’wana wa Zadhoki, i te: “Ndzi tsike ndzi tsutsuma ndzi ya byela hosi hakuva Jehovha i yi mahele kululama, a yi tlhatlhisa ka valala va yona.”+ 20 Kanilezvi Jowabe aku kakwe: “Nyamutlha u nga ta heleketa mahungu. U ta heleketa gin’wani siku, na ku nga hi nyamutlha, hakuva ku file a n’wana wa hosi.”+ 21 Jowabe i no byela a muKuxe,+ aku: “Famba u ya byela a hosi lezvi u nga zvi wona.” A muKuxe i no korama mahlweni ka Jowabe a gumesa a tsutsuma a famba. 22 Ahimaza, a n’wana wa Zadhoki, i no tlhela a byela Jowabe, aku: “Hambu loku ko humelela yini, ndzi tsike ndzi tsutsumawu ndzi landza a muKuxe.” Kanilezvi, Jowabe i te: “N’wananga, u lava ku fambela yini kuveni a ku na mahungu ya ku u ya wula ke?” 23 Hambulezvo, Ahimaza i te ngalo: “Hambu loku ko humelela yini, ndzi tsike ndzi tsutsuma ndzi famba.” Hikwalaho, Jowabe i te ngalo: “Tsutsuma!” Ahimaza i no tsutsuma hi ndlela ya dhistrito ya Jordhani, a rangela a muKuxe.

24 Dhavhidha i wa tshamile laha cikari ka tinyangwa timbiri ta dhoropa.+ A murindzeli+ i no kandziha le hehla ka langwa* la nyangwa ya muro. I no cuwuka a wona munhu a nga kari a tsutsuma yece. 25 Hikwalaho, a murindzeli i no banguleka a tivisa hosi. A hosi yiku: “Lezvi a tako yece zvi komba ku ita ni mahungu.” Laha a ngaya a tshinela kusuhani, 26 a murindzeli i no wona a wanuna mun’wani na ata hi kutsutsuma. A murindzeli i no vitana a mugadhi wa nyangwa, aku: “Ku woneka a wanuna mun’wani a tako hi kutsutsuma na a hi yece!” A hosi yiku: “Yenawu ita ni mahungu.” 27 A murindzeli aku: “A matsutsumela ya loyi wo sangula ma fana ni lawa ya Ahimaza,+ a n’wana wa Zadhoki.” Hikwalaho, a hosi yi te ngalo: “Ahimaza munhu wa munene; ita ni mahungu ya manene.” 28 Ahimaza i no banguleka a byela hosi, aku: “Ku rulile!” I no korama mahlweni ka hosi hi nghohe yakwe, aku: “Ngha Jehovha, a Nungungulu wa wena a dhumiswa, loyi a nga nyikela a vavanuna lava va nga hluwukela* a hosi ya mina!”+

29 Kanilezvi a hosi yi te ngalo: “Ga ha vhuka khwatsi jaha Absalome ke?” Ahimaza aku: “Ndzi wonile a gujeguje ya hombe a cikhati leci Jowabe a nga ruma a nandza ga hosi, na mina nandza ga wena, kanilezvi a ndzi zvi tivangi ku i gujeguje ya yini.”+ 30 Hikwalaho, a hosi yi te ngalo: “Hambuka u yima tlhelweni.” Hikwalaho, i no hambuka a yima tlhelweni.

31 Makunu a muKuxe i no chikela,+ aku: “Ngha a hosi ya mina yi amukela a mahungu lawa: Nyamutlha Jehovha i nehile kululama, a ku tlhatlhisa canjeni ga vontlhe lava va nga ku hluwukela.”+ 32 Kanilezvi a hosi yi no wutisa a muKuxe, yiku: “Ga ha vhuka khwatsi jaha Absalome ke?” A muKuxe aku: “A valala vontlhe va hosi ya mina ni vontlhe lava va ku hluwukeleko na va lava ku ku maha zvahava va wa fane ni jaha legi!”+

33 A hosi yi no karateka nguvhu hi mhaka leyo, yi kandziha le kwartwini ya le langweni,* le hehla ka nyangwa, yi ya rila na yi fambafamba, yiku: “A n’wana wa mina Absalome, a n’wana wa mina, Absalome n’wananga! I chukwana loku ku wa nofa mina, n’wananga Absalome, n’wananga!”+

19 Va no byela Jowabe, vaku: “A hosi ya rila, yi rilela Absalome.”+ 2 Hikwalaho, a kuhlula ka siku lego ku no cica ku maha cirilo ka vanhu vontlhe, hakuva va nozwa lezvaku a hosi ya rila a n’wana wa yona. 3 Ka siku lego, a vanhu va no wuya lomu dhoropeni+ hi kunyanimela a ku khwatsi vanhu va nga ni tingana hi kuva va tsutsumile yimpini. 4 A hosi yi no ti fenengeta nghohe yi rila hi gezu ga hombe, yiku: “A n’wana wa mina Absalome! Absalome n’wananga, n’wananga!”+

5 Makunu Jowabe i noya ka hosi lomu ndlwini, a yaku: “Nyamutlha u ma wisile tingana a malandza ya wena wontlhe, lawa nyamutlha ma ponisileko a wutomi* ga wena, ni wutomi* ga vafana va wena,+ ni vanhanyana va wena,+ ni vasati va wena, ni vasati va wena va vatsongwani.*+ 6 Wena u randza lava va ku vengako, u venga lava va ku randzako, hakuva nyamutlha u zvi kombisile kubaseni lezvaku a varangeli va wena ni malandza ya wena a hi va nchumu ka wena. Hakuva ndza tiyiseka lezvaku loku nyamutlha ku wa no sala Absalome yece a hanya, hina van’wani hifa, na u tsakile. 7 Makunu suka, u huma u ya tangalisa a timbilu ta malandza ya wena, hakuva ndza hlambanya hi Jehovha lezvaku loku u nga humi, a ku na munhu a to sala na wena a wusiku legi. Lezvo zvi ta ku bihela nguvhu a ku hundza a kubiha kontlhe loku u kumeneko nako kusukela wujaheni ga wena kala nyamutlha.” 8 Hikwalaho, a hosi yi no suka yi ya tshama laha nyangweni ya dhoropa; ni vanhu vontlhe va no byeliwa ku: “A hosi yi tshamile laha nyangweni.” Makunu a vanhu vontlhe va nota mahlweni ka hosi.

Kanilezvi a vaIzrayeli va wa tsutsumile, loyi ni loyi a ti yela kaya kakwe.+ 9 A vanhu vontlhe tixakeni tontlhe ta ka Izrayeli va wa kanetisana, vaku: “A hosi yi hi ponisile mandleni ya valala va hina,+ yi tlhela yi hi tlhatlhisa ka vaFilistiya, kanilezvi makunu yi tsutsumile tiko hi kota ya Absalome.+ 10 Absalome loyi hi nga mu tota lezvaku a hi fumela+ i file le yimpini.+ Makunu hikuyini mu nga mahiko nchumu kasi ku wuyisa hosi ke?”

11 Hosi Dhavhidha i no rumela gezu ka mupristi Zadhoki+ na mupristi Abhiyatari,+ aku: “Byelani a madhota ya ka Judha,+ muku: ‘Hikuyini mu lavako kuva n’wina vo gumesa a ku wuyisa hosi mutini wa yona, kuveni a magezu ya vaIzrayeli vontlhe ma chikele ka hosi mutini wa yona ke? 12 N’wina mu vamakabye va mina; n’wina na mina hi nkhata wun’we.* Hikuyini mu lavako kuva n’wina vo gumesa a ku wuyisa hosi?’ 13 Byelani Amasa,+ muku: ‘Kasi n’wina na mina a hi nkhata wun’we ke? Nungungulu i wa ndzi tsayise a tlhela a engeta loku ndzi nga ku yimisi cikhundleni ca Jowabe lezvaku uva murangeli wa butho ga mina.’”+

14 Hikwalaho, i no cica a timbilu ta vavanuna vontlhe va ka Judha ti ku khwatsi munhu mun’we, va rumela gezu ka hosi, vaku: “Wuya ni malandza ya wena wontlhe.”

15 A hosi yi no wuya yi ta chikela Jordhani, niku a vanhu va ka Judha va nota Gilgali+ va ta tlhangana ni hosi kasi va yi heleketa yi tlhatuka a Jordhani. 16 Makunu Ximeyi,+ a n’wana wa Gera, a muBhenjamini wa le Bhahurima, i no hatlisa a relela ni vavanuna va ka Judha a khinga hosi Dhavhidha, 17 na a hi ni 1000 wa vavanuna va ka Bhenjamini. Zibha yenawu,+ a nandza ga yindlu ya Sawule, i no hatlisa a relela aya Jordhani, a rangela hosi, na a hi ni vana vakwe va 15, ni 20 wa malandza yakwe. 18 I* no tlhatuka hi laha va tlhatukako hi kona kasi a ya wuyisa a va ngango wa hosi ni ku maha zvontlhe lezvi a hosi yi zvi lavako. Kanilezvi a cikhati leci a hosi yi nga lava ku tlhatuka Jordhani, Ximeyi, a n’wana wa Gera, i nowa lahasi mahlweni ka hosi, 19 aku: “Hosi yanga, u nga ndzi nyiki nandzu, ne u nga alakanyi a kubiha loku a nandza ga wena gi ku maheleko+ a siku legi a hosi ya mina yi nga huma lomu Jerusalema. A hosi yi nga cheli kota hi zvona, 20 hakuva a nandza ga wena ga zvi tiva khwatsi lezvaku ndzi wonhile; hikwalaho, nyamutlha hi mina wo sangula ka yindlu yontlhe ya ka Josefa ndzi nga huma ndzi khinga a hosi ya mina.”

21 Zvalezvo Abhixayi,+ a n’wana wa Zeruya,+ i te ngalo: “Kasi Ximeyi a nga faneli ku dawa hi lezvi a nga rukatela a totilweko wa Jehovha ke?”+ 22 Kanilezvi Dhavhidha i te ngalo: “Mu nghena kwihi ka zvona, n’wina vana va Zeruya,+ lezvi mu ndzi vhukelako nyamutlha? Ku nga ta dawa munhu nyamutlha lomu Izrayeli. Kasi ndzo kala ndzi nga zvi tivi lezvaku nyamutlha ndzi yimisilwe a kuva hosi ya Izrayeli?” 23 Makunu a hosi yi no byela Ximeyi, yiku: “U nga tafa.” A hosi yi no hlambanya kakwe.+

24 Mefibhoxete,+ a zukulu wa Sawule, yenawu i nota a ta tlhangana ni hosi. I wa nga hlambangi mikondzo, ne ku tsema malevhu, ne hambu ku hlazva a tinguwo takwe kusukela a siku legi a hosi yi nga famba hi gona kala a siku legi yi nga wuya hi gona hi kurula. 25 A cikhati leci a nga chikela* Jerusalema na a tela ku ta tlhangana ni hosi, a hosi yi te ngalo kakwe: “Mefibhoxete, hikuyini u nga kala ku famba na mina?” 26 Yena aku: “Hosi yanga, a nandza ga mina+ gi no ndzi kalavela. Hakuva a nandza ga wena gi te: ‘Ndzi ta va byela va ndzi longisela a mbongola ya mina kasi ndzi khilela ndzi famba ni hosi’, hakuva a nandza ga wena cilima.+ 27 Kanilezvi yena i no wulawula kubiha hi nandza ga wena mahlweni ka wena, hosi yanga.+ Hambulezvo, a hosi ya mina yi fana ni ngilozi ya Nungungulu wa lisine. Hikwalaho, maha ni cihi u ci wonako na ci hi cinene. 28 Vontlhe a va ngango wa papayi wa mina na va delwe hi wena hosi yanga, kanilezvi u tekile a nandza ga wena u gi veka cikari ka lava va gako mezeni ya wena.+ Makunu ndza ha ta kombela yini kambe ka hosi?”

29 Kanilezvi a hosi yi te ngalo kakwe: “Basi, u nga ha wuli nchumu. Ndzi bohile lezvaku wena na Zibha mu pandzelana simu.”+ 30 Mefibhoxete i no byela hosi, aku: “Mu tsike a teka gontlhe, kota lezvi a hosi ya mina yi wuyileko mutini wa yona hi kurula.”

31 Bharzilayi,+ a muGileyadhe, i no relela hi le Rogelima aya Jordhani kasi a ya heleketa a hosi kala congweni wa Jordhani. 32 Bharzilayi i wa khosahele nguvhu; i wa hi ni 80 wa malembe. Hi yena a nga yi nyika zvakuga a hosi a cikhati leci yi nga hi le Mahanayime,+ hakuva i wa ganyile nguvhu. 33 Hikwalaho, a hosi yi no byela Bharzilayi, yiku: “Tlhatuka na mina; ndzi taya ndzi ya ku nyika zvakuga le Jerusalema.”+ 34 Kanilezvi Bharzilayi i te ngalo ka hosi: “Ndza ha ta hanya masiku mangani lezvi, ko kala ndzi famba ni hosi Jerusalema? 35 Nyamutlha ndzi na ni 80 wa malembe.+ Ndza ha zvi kota a ku hambanisa a zvazvinene ni zvakubiha ke? Mina nandza ga wena ndza ha zvi kota a kuzwa a kunandziha ka lezvi ndzi gako ni lezvi ndzi nwako ke? Kona ndza ha zvi kota a ku ingisela a magezu ya vayimbeleli va cinuna ni va cisati ke?+ Makunu a nandza ga wena gi ta yi engetelela yini a ndzhwalo a hosi ya mina? 36 Zvi enele ka mina nandza ga wena lezvi ndzi nga heleketa a hosi kala laha Jordhani. Hikuyini a hosi yi lavako a ku ndzi nyika a nchachazelo lowu ke? 37 Tsika a nandza ga wena gi tlhela; ndzi tsike ndzi ya fela dhoropeni ga mina kusuhani ni cilahla ca papayi wa mina ni mamani wa mina.+ Kanilezvi hi legi a nandza ga wena Kimhame.+ I wa tlhatuke ni hosi ya mina; u ta mu mahela ni cihi u ci wonako na ci hi cinene.”

38 Hikwalaho, a hosi yi te ngalo: “Kimhame i ta tlhatuka na mina; ndzi ta mu mahela ni cihi u ci wonako na ci hi cinene; ni cihi u to ndzi kombela ndzi ta ku mahela.” 39 A vanhu vontlhe va no sangula ku tlhatuka a Jordhani. Makunu laha a hosi yi nga lava ku tlhatuka, yi no pswopswa Bharzilayi+ yi mu katekisa; Bharzilayi i no tlhela kaya. 40 A cikhati leci a hosi yi nga tlhatuka yiya Gilgali,+ Kimhame i no tlhatuka nayo. A vanhu vontlhe va ka Judha ni khihlanya ga vanhu va ka Izrayeli va no tlhatukisa hosi.+

41 A vavanuna vontlhe va ka Izrayeli va no tshinela ka hosi, vaku: “Hikuyini a vamakabye va hina, a vavanuna va ka Judha, va nga ku yiva va tlhatukisa a hosi le Jordhani, ni va ngango wakwe, ni vavanuna vontlhe va Dhavhidha ke?”+ 42 A vavanuna vontlhe va ka Judha va no hlamula a vavanuna va ka Izrayeli, vaku: “Hi mahile lezvo hakuva a hosi i xaka ga hina.+ Makunu cini ci mu bayisako ka zvona? Ci kona ca hosi hi ngaga ke, kutani hi nyikilwe nchumu hi hosi ke?”

43 Kanilezvi a vavanuna va ka Izrayeli va no hlamula a vavanuna va ka Judha, vaku: “Hina hi 10 wa tixaka, hikwalaho, hi na ni fanelo ya ku mu mahela lezvo Dhavhidha a ku hundza n’wina. Makunu mu hi kanyisele yini? Ku wa nga hi hina hi nga fanele ku ranga hi wuyisa a hosi ya hina ke?” Kanilezvi a magezu ya vavanuna va ka Judha ma no hlula a ya vavanuna va ka Izrayeli.

20 Makunu ku no humelela a wanuna wa nyamijiri, wa ku hi Xebha,+ a n’wana wa Bhikiri, a muBhenjamini. I noba linanga,*+ a gumesa aku: “A hi na ciavelo na Dhavhidha, ne a hi na tshomba ni n’wana wa Jese.+ Wena Izrayeli, a mun’we ni mun’wani i waye ka vanungungulu vakwe!”*+ 2 Zvalezvo a vavanuna vontlhe va ka Izrayeli va no tsika ku landzela Dhavhidha va landzela Xebha, a n’wana wa Bhikiri;+ kanilezvi a vavanuna va ka Judha va no namarela ka hosi yabye, kusukela Jordhani kala Jerusalema.+

3 Laha Dhavhidha a nga chikela ndlwini* yakwe le Jerusalema,+ i no teka a 10 wa vasati va vatsongwani* lava a nga va siyile va hlayisa yindlu,+ a va veka lomu ndlwini yi nga kari yi wonelelwa. I wa va nyika zvakuga, kanilezvi a nga ha etlelangi kambe navo.+ Va no tshama lomu va nga vhalelwe kona kala a siku legi va ngafa hi gona, va hanyisa ku khwatsi tinoni* hambu lezvi a nuna wabye a nga ha hanya.

4 Makunu a hosi yi no byela Amasa,+ yiku: “Vitanisa a vavanuna va ka Judha ndzeni ka masiku manharu, niku wenawu u fanele kuva kona.” 5 Hikwalaho, Amasa i no suka a ya hlengeleta a va ka Judha, kanilezvi i no hlwela ku wuya, kuza ku hundza a cikhati leci a nga nyikilwe. 6 Dhavhidha i no byela Abhixayi,+ aku: “Xebha,+ a n’wana wa Bhikiri, i ta tshuka a hi nehela khombo ga hombe a ku hundza legi Absalome a nga hi nehela.+ Teka a malandza ya hosi ya wena u mu landza kasi a nga kumi a madhoropa ma vhikelweko khwatsi a fihlala hi nga ha mu kumi.” 7 Makunu a vavanuna va Jowabe,+ ni vaKereti, ni vaPeleti,+ ni vavanuna vontlhe va tinhenha va no suka va mu landzela. Va no huma Jerusalema va landza Xebha, a n’wana wa Bhikiri. 8 A cikhati leci va nga hi kusuhani ni ribye ga hombe le Gibheyoni,+ Amasa+ i nota a va khinga. Jowabe i wa bohile a tinguwo takwe ta yimpi, na a hi ni cipadha cakwe lomu cikhwameni ci nga hi laha nyongeni yakwe. Laha Jowabe a nga tshinela, a cipadha ci nowa.

9 Jowabe aku ka Amasa: “Makabye wa mina, wa ha vhuka khwatsi ke?” Jowabe i no khoma a cilevhu ca Amasa hi woko ga cinene a ku khwatsi o lava ku mu pswopswa. 10 Amasa a nga ti wonelangi ka cipadha leci ci nga hi canjeni ga Jowabe, hikwalaho, Jowabe i no mu tlhava khwiri,+ a kubuka marumbu lahasi. I no mu tlhava khati gin’we afa; a zvi lavangi ku a phinda kambe. Andzhako ka lezvo, Jowabe ni makabye wakwe Abhixayi va no landza Xebha, a n’wana wa Bhikiri.

11 A gin’we ga majaha ya Jowabe gi no nyima kusuhani na Amasa, giku: “Ni wihi loyi a nga tlhelweni ga Jowabe, ni loyi a lumbako Dhavhidha i wa landze Jowabe!” 12 Ka cikhati leco, Amasa i wo puluwundza nkhateni wakwe laha cikari ka ruwa. Laha a wanuna loye a nga wona lezvaku a vanhu vontlhe vo nyima, i no susa Amasa laha ruweni a mu tshineta lomu khwatini, a mu fenengeta hi nguwo, hakuva i wonile lezvaku a vanhu vontlhe vo nyima loku va chikela laha a nga hi kona. 13 Laha a nga mu susile laha ruweni, a vanhu vontlhe va no hundza va landzela Jowabe kasi va hlongolisela Xebha,+ a n’wana wa Bhikiri.

14 Xebha i no tsemakanya hi lomu tixakeni tontlhe ta Izrayeli aya Abhela wa Bhet-Maaka.+ A vaBhikiri va no hlengeletana va mu landzela.

15 Jowabe ni vavanuna vakwe va nota va ta randzela Xebha le Abhela wa Bhet-Maaka. Va no maha rampa kasi va zvi kota ku dhumela a dhoropa, hakuva gi wa bhiyelwe. A vavanuna vontlhe va Jowabe va no kela lahasi ka muro kasi wuwa. 16 Ku no huma a wasati wo tlhariha a vitana na a hi lomu dhoropeni, aku: “Vavanuna, ingiselani mhaka leyi, ingiselani! Byelani Jowabe, muku: ‘Ngone seno ndzi ta wulawula na wena.’” 17 Hikwalaho, Jowabe i no tshinela kakwe. A wasati aku: “Hi wena Jowabe ke?” Yena aku: “Hi mina.” A wasati aku: “Zwana a magezu ya nandza ga wena.” Jowabe aku: “Ndza kuzwa.” 18 A wasati i no engeta aku: “A kale va wa tolovela ku wula ku: ‘Kombelani wusungukati le Abhela’, niku a mhaka yi wa tsemiwa kwalaho. 19 Mina ndzi yimela a vanhu vo rula ni vo tsumbeka va Izrayeli. U lava ku lovisa a dhoropa legi gi nga mamani lomu Izrayeli. Hikuyini u lavako ku fuvisa* a tshomba ya Jehovha?”+ 20 Jowabe i no hlamula, aku: “Zvi le kule na mina a ku hlasela a dhoropa legi, ndzi gi fuvisa. 21 A ndzi telangi lezvo. Ndzi tele Xebha,+ a n’wana wa Bhikiri, wa le tikweni ga zvitsunga ga Efrayime,+ loyi a nga hluwukela hosi Dhavhidha. Loku mu nyikela a wanuna loye basi ndzi ta suka lomu dhoropeni.” A wasati a hlamula Jowabe, aku: “Hi ta ku hoxela a hloko ya wanuna loye hi le hehla ka muro!”

22 A wasati loye wo tlhariha i no famba a ya byela a vanhu vontlhe. Hikwalaho, va no tsema a hloko ya Xebha, a n’wana wa Bhikiri, va yi hoxela ka Jowabe. Zvalezvo Jowabe i noba linanga,* a vanhu va hangalaka va suka laha dhoropeni, a mun’we ni mun’wani a ti yela kaya kakwe.+ Jowabe yenawu i no tlhela ka hosi le Jerusalema.

23 Makunu Jowabe hi yena a nga rangela a butho gontlhe ga ka Izrayeli;+ Bhenaya,+ a n’wana wa Jehoyadha,+ i wa rangela a vaKereti ni vaPeleti.+ 24 Adhorama+ i wa hi murangeli wa lava va nga khomilwe kasi va maha mitiro ya cikurumeta; Jehoxafati,+ a n’wana wa Ahiludha, i wa hi muhlayisi wa timhaka. 25 Xevha i wa hi matsalani; Zadhoki+ na Abhiyatari+ va wa hi vapristi. 26 Ira, a muJayira, yenawu i nova hosana ya* Dhavhidha.

21 Masikwini ya Dhavhidha ku nova ni ndlala+ yi nga mbheta malembe manharu yo landzelana. Makunu Dhavhidha i no wutisa Jehovha, Jehovha aku: “Sawule ni yindlu yakwe va na ni nandzu wa nkhata hakuva i dele a vaGibheyoni.”+ 2 Hikwalaho, a hosi yi no vitana a vaGibheyoni+ yi ta wulawula navo. (A vaGibheyoni va wa nga hi vaIzrayeli kanilezvi va wa hi misalela ya vaAmori,+ lava a vaIzrayeli va nga hlambanyile lezvaku va nga ta va daya,+ kanilezvi Sawule i no zama ku va lovisa kutitsitsiriteni kakwe hi vanhu va ka Izrayeli ni va ka Judha.) 3 Dhavhidha i no wutisa vaGibheyoni, aku: “Ndzi mu mahela yini, kona ndzi nga kuyini kasi hi tsetselelwa a zviwonho zva hina, kasi mu katekisa a tshomba ya Jehovha?” 4 A vaGibheyoni vaku kakwe: “A mhaka hi nga nayo na Sawule ni yindlu yakwe a hi ya prata kutani ouro;+ ne a hi nge dayi munhu lomu Izrayeli.” Hikwalaho, yena i te: “Ni cihi mu to wula ndzi ta mu mahela.” 5 Vona vaku ka hosi: “Ka wanuna loyi a nga hi hihirita, a hi mahela cikungo ca ku hi fuvisa ni kwihi lomu hi nga hanya kona lomu Izrayeli+ — 6 hi nyikeni a 7 wa vana vakwe hi ta hayeka a zvirumbi zvabye+ mahlweni ka Jehovha le Gibheya+ wa Sawule, loyi a hlawulilweko hi Jehovha.”+ A hosi yiku: “Ndzi ta va nyikela.”

7 Kanilezvi a hosi yi no mu zwela wusiwana Mefibhoxete,+ a n’wana wa Jonatani, a n’wana wa Sawule, hi kota ya cihlambanyo leci Dhavhidha na Jonatani,+ a n’wana wa Sawule, va nga mahile mahlweni ka Jehovha. 8 Hikwalaho, a hosi yi no teka Armoni na Mefibhoxete, a vana vambiri va Rizpa,+ a nhanyana wa Aya, lava a nga pswalele Sawule, ni ntlhanu wa vana va Mikali,*+ a nhanyana wa Sawule, lava a nga pswalele Adriyeli,+ a n’wana wa Bharzilayi, a muMehola. 9 Dhavhidha i no va nyikela ka vaGibheyoni, va hayeka zvirumbi zvabye le citsungeni mahlweni ka Jehovha.+ Vontlhe va 7 va nofa khati gin’we; va no dawa ka masiku yo sangula ya kutshovela, kusanguleni ka kutshovelwa ka sevhadha. 10 Rizpa,+ a n’wana wa Aya, i no ti tekela a sakwa a andlala laha ribyeni kusukela kusanguleni ka kutshovela kala cikhatini leci a vhula ya le tilweni yi nga nela a zvirumbi; a nga tsikangi a zvinyanyani zva matilo zvi khapama a zvirumbi zvabye ni hlikanhi, ne a nga tsikangi a zvihari zva khwati zvi tshinela kusuhani ni wusiku.

11 Dhavhidha i no byeliwa lezvi zvi nga mahiwa hi Rizpa, a sati wa mutsongwani* wa Sawule, a n’wana wa Aya. 12 Hikwalaho, Dhavhidha i noya a ya teka a marambu ya Sawule ni marambu ya n’wana wakwe Jonatani ka varangeli* va Jabhexe-Gileyadhe.+ Va wa yivile a zvirumbi le prasa* ya Bhet-Xane, laha a vaFilistiya va nga zvi hayekile kona a siku legi va nga daya Sawule le Gilbhowa.+ 13 Dhavhidha i noya a ya teka a marambu ya Sawule ni ya n’wana wakwe Jonatani a wuya nawo. Va no tlhela va hlengeleta a marambu ya vavanuna lava va nga delwe.*+ 14 Andzhako ka lezvo, va no lahla a marambu ya Sawule ni ya n’wana wakwe Jonatani le tikweni ga Bhenjamini, le Zela,+ cilahleni ca Kixi,+ a papayi wakwe. Laha va nga mahile zvontlhe lezvi a hosi yi nga va layile, Nungungulu i nozwa a kurila kabye ka ku kombelela tiko.+

15 Ku no tlhela kuva ni yimpi cikari ka vaFilistiya ni vaIzrayeli.+ Hikwalaho, Dhavhidha ni malandza yakwe va no relela va yalwa ni vaFilistiya, kanilezvi Dhavhidha i no karala nguvhu. 16 Ixibhe-Bhenobhe, wa pswalo wa vaRefayime,+ loyi a tlhari gakwe ga kobre gi nga peza a 300 wa maxekeli,*+ a nga hi ni cipadha ca ciswa, i wa lava ku daya Dhavhidha. 17 Zvalezvo Abhixayi,+ a n’wana wa Zeruya, i nota a ta mu vhuna,+ a tlhava a muFilistiya a mu daya. Makunu a vavanuna va Dhavhidha va no hlambanya kakwe, vaku: “U nga ha humi kambe u famba na hina yimpini,+ u nga hi timela kandiya ya Izrayeli!”+

18 Andzhako ka lezvo, ku no tlhela ku vhuka a yimpi ni vaFilistiya+ le Goba. Ka khati lego, Sibhekayi,+ a muHuxate, i no daya Safa, loyi a nga hi wa pswalo wa vaRefayime.+

19 Ku no vhuka yin’wani yimpi ni vaFilistiya+ le Goba. Elhanana, a n’wana wa Jaare-Oregime, a muBhetlehema, i no daya Goliyate, a muGati, loyi a tlhari gakwe gi nga hi ni nhonga yo fana ni ya valuki.+

20 Ku no tlhela ku vhuka yin’wani yimpi le Gati. Laho ku wa hi ni wanuna wa kulela go hlamalisa, wa 6 wa titiho ka canja gin’we ni gin’wani ni 6 wa titiho ka nkondzo wun’we ni wun’wani, ti ku 24 a ku patsa tontlhe; niku yenawu i wa hi wa pswalo wa vaRefayime.+ 21 I wa tshamela ku poyila Izrayeli.+ Hikwalaho, Jonatani, a n’wana wa Ximeyi,+ a makabye wa Dhavhidha, i no mu daya.

22 Lava va mune va wa hi va pswalo wa vaRefayime va le Gati. Va no dawa hi canja ga Dhavhidha ni canja ga malandza yakwe.+

22 Dhavhidha i no yimbelela a magezu ya lisimu leli+ ka Jehovha, a siku legi Jehovha a nga mu ponisa canjeni ga valala vakwe vontlhe+ ni canjeni ga Sawule.+ 2 I te ngalo:

“Jehovha i ribye ga mina, ni khokhola ga mina,+ ni mutlhatlhisi wa mina.+

13 Hi lomu kuwonekeleni ku nga mahlweni kakwe ku wa vhura makhala ya ndzilo.

Nungungulu citlhangu ca vontlhe lava va chavelako kakwe.+

32 Hakuva himani a nga Nungungulu, ahandle ka Jehovha?+

Kona himani a nga ribye ahandle ka Nungungulu wa hina ke?+

44 U ta ndzi tlhatlhisa ka zvisolo zva vanhu va mina.+

47 Jehovha wa hanya! Gi wa dzundziwe a Ribye ga mina!+

I wa tlakusiwe a Nungungulu wa ribye ga kuhanyiswa ka mina.+

23 Leti timhaka to gumesa ta Dhavhidha:+

 5 Xana a yindlu ya mina a yi tshamisangi lezvo mahlweni ka Nungungulu ke?

8 Lawa mavito ya masochwa ya Dhavhidha lawa ya tinhenha:+ Joxeb-Bhaxebhete, a muTakemoni, a hloko ya tinhenha tinharu.+ Ka khati go kari, i no daya a 800 wa vavanuna hi tlhari gakwe. 9 Andzhako kakwe ku wa gamela Eleyazari,+ a n’wana wa Dhodho,+ a n’wana wa Ahohe. I wa hi mun’we wa masochwa manharu lawa ya tinhenha ma nga hi na Dhavhidha a cikhati leci va nga vhuka a vaFilistiya. A vaFilistiya va wa tlhangene laho kasi kulwa, niku laha a vavanuna va ka Izrayeli va nga tlhelela ndzhako, 10 yena i no yima a hlasela a vaFilistiya kala a woko gakwe gi karala, ni canja gakwe gi tsindzivala hi ku khoma cipadha.+ Makunu ka siku lego, Jehovha i no va nyika kuhlula ka hombe;+ a vanhu va no wuya hi le ndzhako ka Eleyazari, va phanga a zvilo zva lava va nga delwe.

11 Andzhako kakwe ku wa gamela Xama, a n’wana wa Age, a muHarare. A vaFilistiya va no hlengeletana le Lehi, laha ku nga hi ni simu gi nga tele hi tinyawa;* ni vanhu va no tsutsuma hi kota ya vaFilistiya. 12 Kanilezvi yena i no yima cikari ka simu a gi vhikela, a simama ku hihirita a vaFilistiya. Hikwalaho, Jehovha i no va nyika a kuhlula ka hombe.+

13 A tinhenha tinharu ka leti ta 30 ti no relela ka Dhavhidha mhakweni ya Adhulamu+ hi cikhati ca kutshovela, a butho ga vaFilistiya na gi govile Nkoveni wa Refayime.+ 14 Cikhatini leco, Dhavhidha i wa hi khokholeni,+ niku ku wa hi ni ntlawa wa masochwa ya vagadhi ya vaFilistiya le Bhetlehema. 15 Dhavhidha i no wula kuxuva kakwe, aku: “Mayiwako loku ndzi wo kuma mati ya hlowo ya le nyangweni ya Bhetlehema ndzinwa!” 16 Hi kota ya lezvo, a masochwa manharu ya tinhenha ma noya ma ya nghena hi kani wugovelweni ga vaFilistiya, makha mati hloweni ya le nyangweni ya Bhetlehema ma wuya nawo ka Dhavhidha; kanilezvi Dhavhidha i no ala kunwa mati lawo, a ma halata mahlweni ka Jehovha.+ 17 I te ngalo: “O Jehovha, a zvive kule na mina a kuva ndzi maha lezvi! Ndzi nganwa a nkhata+ wa vavanuna lava va vekileko a wutomi* gabye mhangweni ke?” Hikwalaho, i no ala kunwa. Lezvi zvilo zvi mahilweko hi masochwa yakwe ya manharu ya tinhenha.

18 Abhixayi,+ a makabye wa Jowabe, a n’wana wa Zeruya,+ i wa hi hloko ya tin’wani tinhenha ta tinharu. I no daya a 300 wa vavanuna hi tlhari gakwe niku ive ni nduma yo fana ni ya leti ta tinharu.+ 19 Hambu lezvi a nga hlawulekile a ku hundza lava van’wani va vanharu ni lezvi a nga hi hosana yabye, a nga chikelangi ka cikhundla ca lava va vanharu vo sangula.

20 Bhenaya,+ a n’wana wa Jehoyadha, i wa hi wanuna wo tiya hlanha, loyi a nga maha zvilo zvo tala zvo hlamalisa le Kabzeeli.+ I no daya vana vambiri va Ariyeli, wa le Mowabhi, niku i no relela hloweni hi siku ga gapongo, a ya daya nghala.+ 21 Ahandle ka lezvo, i no daya muGibhite wa kulela go hlamalisa. Hambu lezvi a muGibhite a nga hi ni tlhari canjeni gakwe, i noya kakwe ni nhonga a ya wutla a tlhari canjeni ga muGibhite a gumesa a mu daya hi tlhari ga yena n’winyi. 22 Lezvi zvi mahilwe hi Bhenaya, a n’wana wa Jehoyadha, niku i wa hi ni nduma yo fana ni leyi ya masochwa lawa ya manharu ya tinhenha. 23 Hambu lezvi a nga hlawulekile nguvhu a ku hundza lava va 30, a nga chikelangi ka cikhundla ca lava va vanharu. Hambulezvo, Dhavhidha i no mu yimisa a kuva murangeli wa vagadhi vakwe.

24 Asaheli,+ a makabye wa Jowabe, i wa hi mun’we wa lava va 30: Elhanana, a n’wana wa Dhodho, wa le Bhetlehema;+ 25 na Xama, a muHarodhe; na Elika, a muHarodhe; 26 na Helezi,+ a muPalte;+ na Ira, a n’wana wa Ikexa, a muTekowa; 27 na Abhiyezeri,+ a muAnatote;+ na Mebhunayi, a muHuxate; 28 na Zalmoni, a muAhohe; na Maharayi,+ a muNetofate; 29 na Helebha, a n’wana wa Bhaana, a muNetofate; na Itayi, a n’wana wa Ribhayi, wa le Gibheya wa va ka Bhenjamini; 30 na Bhenaya,+ a muPiratoni; na Hidhayi, wa le mikoveni ya Gaaxa;+ 31 na Abhi-Albhoni, a muArabha; na Azmavhete, a muBhahurima; 32 na Eliyabha, a muXaalbhoni; ni vana va Jaxeni; na Jonatani; 33 na Xama, a muHarare; na Ahiyamu, a n’wana wa Xarare, a muHarare; 34 na Elifelete, a n’wana wa Ahasibhayi, a n’wana wa muMaakate; na Eliyama, a n’wana wa Ahitofeli,+ a muGiloni; 35 na Hezro, a muKarmeli; na Paarayi, a muArbhite; 36 na Igali, a n’wana wa Natani, wa le Zobha; na Bhani, a muGadhi; 37 na Zeleke, a muAmoni; na Naharayi, a muBheerote, a muweleli wa matlhari ya Jowabe, a n’wana wa Zeruya; 38 na Ira, a muItri; na Garebhe, a muItri;+ 39 na Uriya,+ a muHiti. Vontlhe va wa hi 37 wa vona.

24 A zanga ya Jehovha yi no va vhindlukela kambe a vaIzrayeli+ a cikhati leci a wokari a nga kucetela Dhavhidha lezvaku a va vhukela, aku: “Famba u ya hlaya+ a va ka Izrayeli ni va ka Judha.”+ 2 Hikwalaho, a hosi yi no byela Jowabe,+ a murangeli wa butho, loyi a nga hi zvin’we naye, aku: “Famba tixakeni tontlhe ta ka Izrayeli, kusukela Dhani kala Bherexebha,+ u tsalela vanhu, kasi ndzi fela ku tiva a ntsengo wa vanhu.” 3 Kanilezvi Jowabe i te ngalo ka hosi: “Ngha Jehovha, a Nungungulu wa wena, a andzisa a vanhu hi 100 wa makhati, niku a mahlo ya hosi ya mina ma wa zvi wone. Kanilezvi hikuyini a hosi ya mina yi lavako ku maha a zvilo zvo kota lezvi ke?”

4 Kanilezvi a gezu ga hosi gi nova ni ntamu a ku hundza legi ga Jowabe ni varangeli va butho. Hikwalaho, Jowabe ni varangeli va butho va no suka mahlweni ka hosi va ya tsalela a vanhu va ka Izrayeli.+ 5 Va no tlhatuka Jordhani, va ya gova Arowera,+ hi tlhelo ga cinene ga* dhoropa, cikari ka nkova, va famba va kongoma a vaGadhi ni Jazera.+ 6 Andzhako ka lezvo, va noya Gileyadhe+ ni le tikweni ga Tatim-Hodxi; va no suka hi laho vaya Dhani-Jaani, va famba kala Sidhoni.+ 7 Hi kulandzela, va noya khokholeni ga Tire+ ni madhoropeni wontlhe ya vaHivhi+ ni vaKhanani, va gumesa va chikela Negebhe+ wa Judha, le Bherexebha.+ 8 Va no fambafamba tikweni gontlhe, va chikela Jerusalema andzhako ka 9 wa tihweti ni 20 wa masiku. 9 Jowabe i no hendleleta hosi a ntsengo wa vanhu lava va nga tsalelwe. Izrayeli i wa hi ni 800 000 wa tinhenha ti hlomileko zvipadha; a vavanuna va ka Judha va wa hi 500 000.+

10 Kanilezvi Dhavhidha i no biwa hi livhalo+ andzhako ka loku a hlayile vanhu. Makunu Dhavhidha i no byela Jehovha, aku: “Ndzi wonhile+ nguvhu hi ku maha lezvi. Makunu Jehovha, tsetselela a cigoho ca nandza ga wena+ hakuva ndzi mahile a wupumbu ga hombe nguvhu.”+ 11 Laha Dhavhidha a nga vhuka ni mixo, a mhaka ya Jehovha yi nota ka muphrofeti Gadhi,+ a muwoni wa Dhavhidha, yi taku: 12 “Famba u ya byela Dhavhidha, uku: ‘Jehovha i ngalo: “Ndza ku nyika mawonela manharu. Hlawula legi ndzi faneleko ku gi neha ka wena.”’”+ 13 Hikwalaho, Gadhi i noya ka Dhavhidha, a yaku kakwe: “Laha ka 7 wa malembe ya ndlala lomu tikweni ga wena,+ ni ku mbheta a tihweti tinharu na u tsutsuma valala va wena na va ku hlongolisela,+ ni masiku manharu ya ntungu lomu tikweni ga wena, u langa yini?+ Makunu pimisa khwatsi, u ndzi byela lezvi ndzi faneleko a kuya ndzi ya hlamula Loyi a ndzi rumileko.” 14 Hikwalaho, Dhavhidha i no hlamula Gadhi, aku: “Ndza karateka nguvhu hi mhaka leyi. I chukwana hi wela canjeni ga Jehovha,+ hakuva a wuxinji gakwe ga hombe nguvhu;+ kanilezvi u nga ndzi tsiki ndzi wela canjeni ga munhu.”+

15 Hi kulandzela, Jehovha i no rumela ntungu+ lomu tikweni ga Izrayeli, kusukela ni mixo kala ka cikhati ci yimisilweko. Hikwalaho, ku nofa+ a 70 000 wa vanhu kusukela le Dhani kala le Bherexebha.+ 16 A cikhati leci a ngilozi yi nga nawuluta a canja ga yona kasi ku lovisa Jerusalema, Jehovha i no ti laya hi khombo lego,+ a byela a ngilozi leyi yi nga kari yi lovisa vanhu, aku: “Zvi ringene! Makunu tlhelisa a canja ga wena!” A ngilozi ya Jehovha yi wa hi kusuhani ni wutshamu go hulela kona timbewu ga Arawuna,+ a muJebhusi.+

17 Laha Dhavhidha a nga wona a ngilozi leyi yi nga kari yi lovisa vanhu, i no byela Jehovha, aku: “Hi mina ndzi nga wonha, niku hi mina ndzi nga maha zvahava; kanilezvi a tiyivhu leti+ zvini ti nga maha? A canja ga wena a give hehla ka mina ni ka yindlu ya papayi wa mina.”+

18 Hikwalaho, ka siku lego, Gadhi i nota ka Dhavhidha, a taku: “Kandziha u ya mu akela alati Jehovha laha ka wutshamu go hulela kona timbewu ga Arawuna, a muJebhusi.”+ 19 Hikwalaho, Dhavhidha i no kandziha kota lezvi Jehovha a nga mu leletele hi nomu wa Gadhi. 20 Laha Arawuna a nga cuwuka a wona hosi ni malandza ya yona na va kandziha vata kakwe, Arawuna i no tekela ku huma, a ya khizama mahlweni ka hosi a korama lahasi hi nghohe. 21 Arawuna i no wutisa, aku: “Hosi yanga, u tela yini ka nandza ga wena ke?” Dhavhidha aku: “Ndzi tela ku ta xava a wutshamu ga wena go hulela kona timbewu kasi ndzi mu akela alati Jehovha kasi a ntungu lowu wu mbhetako vanhu wu nyima.”+ 22 Kanilezvi Arawuna i te ngalo ka Dhavhidha: “A hosi ya mina yi wa teke yi nyikela lezvi zvi nga zvinene matihlweni ya yona. Hi leti a tihomu u maha hi tona a muphahlo wa kuhiswa, ni citlhata ca ku hula timbewu, ni kanga wa tihomu kasi u maha tihunyi. 23 Zvontlhe lezvi ndza zvi nyikela ka wena hosi.” Arawuna i no byela hosi, aku: “Jehovha, a Nungungulu wa wena, i wa ku mahele wuxinji.”

24 Hambulezvo, a hosi yi no byela Arawuna, yiku: “Ahihi, ndzi fanele kuya hi ku gi xava ka wena hi mali. Ndzi nga ta nyikela miphahlo ya kuhiswa ka Jehovha, a Nungungulu wa mina, na ndzi nga hakhelangi nchumu.” Hikwalaho, Dhavhidha i no xava a wutshamu go hulela kona timbewu ni tihomu hi 50 wa maxekeli* ya prata.+ 25 Dhavhidha i no mu akela alati+ Jehovha ka wutshamu lego, a maha miphahlo ya kuhiswa ni miphahlo ya kuhlengela. Makunu Jehovha i nozwa a kurila kabye ka ku kombelela tiko,+ ni ntungu wu no nyima lomu Izrayeli.