CIZIMBA CA SOLOMONI
1 Lisimu la tisimu,* a lisimu la Solomoni:+
2 “Ndzi pswopswe hi kupswopswa ka nomu wa wena,
Hakuva a lirandzo la wena li nandziha a ku hundza vhinyo.+
3 A masema ya mafura ya wena ma nuhela.+
A vito ga wena gi fana ni mafura yo nuhela ma chululweko.+
A vanhanyana va ku randza hi kona.
4 Ndzi koke, hi tsutsuma.
A hosi yi ndzi nehile lomu tindlwini ta yona!
A hi tsake hi nengela zvin’we.
A hi dhumise* a lirandzo la wena, leli li nandzihako a ku hundza vhinyo.
Hakunene a vanhanyana va ku randza hi kona.
5 Ndzi wa ntima, kanilezvi ndzi sasekile, O n’wina vanhanyana va Jerusalema,
A ku khwatsi matenda ya le Kedhare+ ni tinguwo ta tenda+ ga Solomoni.
6 Mu nga ndzi cuwuki hi lezvi ndzi nga wa ntima,
Hakuva ndzi noswa hi gambo.
A vana va mamani wa mina va ndzi zangarele;
Va no ndzi ruma ku ya hlayisa a zvivhina,*
Kanilezvi leci ca mina n’winyi a ndzi ci hlayisangi.
7 Hi nga ndzi byela, murandziwa, wena ndzi fako hi wena,*
U risa kwihi a ntlhambi wa wena?+
A ntlhambi wa wena wu zumba kwihi ni hlikanhi?
Hikuyini ndzi nga wa ta fana ni wasati a ti vhalileko nghohe hi vhewu,*
Cikari ka mitlhambi ya vanghana va wena ke?”
8 “Loku u nga zvi tivi, wena loyi u sasekileko a ku hundza a vavasati vontlhe,
Landza a makhandzu ya ntlhambi
U risa a zvimbutana zva wena kusuhani ni matenda ya varisi.”
9 “O murandziwa, ndzi ku fananisa ni pswele ga* haxi cikari ka tikareta ta Faro.+
10 “A marama ya wena ma sasekiselwe ma saseka nguvhu,*
Ni nhamu ya wena yi sasekiselwe hi makordhawu.
11 Hi ta ku mahela zvilo zva ouro zva ku ku sasekisa hi zvona*
Zvi nameketelweko prata.”
13 Ka mina, a murandziwa wa mina i fana ni cikhwama ca mira yo nuhela+
Leci ci mbhetako a wusiku cikari ka mavele ya mina.
15 “A wu no ku saseka murandziwa wa mina.
Phela a wu no ku saseka! A matihlo ya wena ma fana ni lawa ya zvipomba.”+
16 “Murandziwa, a wu no ku saseka; a wo ku ndzi tsakisa.+
A mubhedhi wa hina wu cikari ka matluka.
2 “A ku fana ni khon’wa cikari ka mimizwa,
I tshamisile lezvo a murandziwa wa mina cikari ka vanhanyana.”
3 “A ku fana ni masiyeira* cikari ka tisinya ta khwati,
I tshamisile lezvo a murandziwa wa mina cikari ka majaha.
Ndza zvi navela nguvhu a ku tshama laha ndzhutini wakwe,
A handzu wakwe wa tsombela lomu non’wini wa mina.
4 I ndzi nehile lomu ndlwini ya mubuzo,*
A bhandera gakwe hehla ka mina ku wa hi lirandzo.
5 Ndzi tangaliseni hi tibholu* ta mauvha yo woma,+
Mu ndzi tiyisa hi maçã,
Hakuva ndza babya hi lirandzo.
6 A woko gakwe ga cibhabha gi lahasi ka hloko ya mina,
Ni woko gakwe ga cinene ga ndzi bharasara.+
7 Ndza mu hlambanyisa, n’wina vanhanyana va Jerusalema,
Hi timhuti+ ni timbavala ta lomu khwatini, ndziku:
Mu nga zami ku ndzi khindlimuxela lirandzo hambu ku li vhuxa na li nga se zvi lava.+
8 Hi ngazwa a zvigingi zva murandziwa wa mina!
Hi loye, wata!
Na a kandziha zvitsunga, a tlulatlula lomu ka zvitsungana.
9 A murandziwa wa mina i fana ni mhuti; i fana ni cimbavalana.+
Hi gaya! I yimile le ndzhako ka khurisi ga hina,
A cuwuka hi lomu majaneleni,
A hlomela hi lomu mavangeni.
10 A murandziwa wa mina wa wulawula, aku ka mina:
‘Tana, murandziwa wa mina.
Murandziwa wa mina wo saseka, tana hi famba.
11 Hi nga wona, a nguva ya cirami* yi hundzile!
A tivhula ti nyimile, ti hundzile.
12 A zvitsangi zvi balekile lomu tikweni.+
A cikhati ca ku thena ci chikele,+
Ni lisimu la tuva la zwala lomu tikweni ga hina.+
13 A mihandzu yo sangula ya nkuwu yi buvhile,+
Ni mivhina* ya pfepfa; a zvitsangi zva kona zva nuhela.
Vhuka uta, murandziwa wa mina.
Murandziwa wa mina wo saseka, tana hi famba.
14 O cipomba ca mina, leci ci nga lomu mikovotlweni ya maribye,+
Lomu timhakweni ta maribye,
Khwatsi ndzi ku wona, ndzizwa gezu ga wena,+
Hakuva a gezu ga wena ga ndzi tsakisa, ni nghohe ya wena yi sasekile.’”+
15 “Hi khomeleni tinghowo,*
A zvinghowana lezvi zvi wonhetelako a zvivhina,*
Hakuva a zvivhina zva hina zva pfepfa.”
16 “A murandziwa wa mina wa mina, na mina ndzi wakwe.+
17 Na ku nga se sangula kuba zvimoyana zva siku,* ni mindzhuti yi tsutsuma,
Hatlisa u wuya, murandziwa wa mina,
A ku fana ni mhuti+ kutani cimbavalana+ lomu zvitsungeni lezvi zvi nga cikari ka hina.*
Ndzi no mu lavetela, kanilezvi a ndzi mu kumangi.+
2 Ndzi ta vhuka ndzi rendzelekela dhoropa;
Lomu maruweni ni lomu maprasa,*
Ndzi lavetela loyi ndzi* mu randzako.
Ndzi no mu lavetela, kanilezvi a ndzi mu kumangi.
3 A varindzeli lava va nga fambafamba lomu dhoropeni va no ndzi kuma.+ Ndzi no va wutisa ku:
‘Mu mu wonile loyi ndzi* mu randzako ke?’
4 Zvalezvi ndzi nga va hundza
Ndzi no kuma loyi ndzi* mu randzako.
Ndzi no mu khoma, ndzi nga mu tsiki a famba
Kala ndzi mu nghenisa lomu ndlwini ya mamani wa mina,+
Lomu kwartwini ya loyi a nga ndzi pswala.
5 Ndza mu hlambanyisa, n’wina vanhanyana va Jerusalema,
Hi timhuti ni timbavala ta lomu khwatini, ndziku:
Mu nga zami ku ndzi khindlimuxela lirandzo hambu ku li vhuxa na li nga se zvi lava.”+
6 “Cini leci ci tako hi le ciwuleni ca ku khwatsi i musi wa marefu,
Ci nuhelako a mira ni hlakati yo nuhela,
Ni tipowa tontlhe to nuhela ta vaxavisi ke?”+
7 “Hi nga wonani! Macira* ya Solomoni.
Ma randzelwe hi 60 wa tinhenha,
Ti hlawulilweko cikari ka tinhenha ta ka Izrayeli;+
8 Vontlhe va hlomile zvipadha;
Vontlhe va gondzisilwe kulwa yimpi,
A mun’we ni mun’we i na ni cipadha ciwunwini cakwe
Kasi ku mu vhikela ka timhango ta wusiku.”
10 A timhandze ta kona i prata,
Ni zviseketelo zva kona i ouro.
A citulo ca kona ci mahilwe hi woya go pswhuka;
Lomu cikari ku sasekiselwe khwatsi
Hi vanhanyana va Jerusalema.”
11 “Humani, n’wina vanhanyana va Ziyoni,
Mu ya wona hosi Solomoni
A bohileko a cidlodlo* ca muchadho leci a mahelweko hi mamani wakwe+
Sikwini ga muchadho wakwe,
Hi siku ga kutsaka ka mbilu yakwe.”
4 “A wu no ku saseka, murandziwa wa mina!
Phela a wu no ku saseka!
A matihlo ya wena ma vhalilweko hi vhewu* ma fana ni lawa ya zvipomba.
A misisi ya wena yo khwatsi i ntlhambi wa timbuti
Wu relelako zvitsunga zva Gileyadhe.+
2 A matino ya wena ma fana ni ntlhambi wa tiyivhu ta ha hi ku tsemiwako a woya
Leti ti wuyako hi kuhlambisiweni,
Tontlhe na ti hi ni mahahla;
Ku hava ni yin’we yi lahlekelweko hi yivhana ya yona.
3 A minomu ya wena yi fana ni lihindza lo pswhuka,
Ni magezu ya wena ma tsakisa.
A ku fana ni cikhemu ca romã,
Ma tshamisile lezvo a marama ya wena ma fenengetilweko hi vhewu.
4 A nhamu ya wena+ yi fana ni likhokhola* la Dhavhidha,+
Li akilweko hi maribye ma folisilweko khwatsi
Laha ku hayekiwako kona a 1000 wa zvitlhangu,
Zvontlhe na zvi hi zvitlhangu zva redhonda zva tinhenha.+
5 A mavele ya wena ya mambiri ma fana ni zvimhutana zvimbiri,
A mahahla ya mhuti,+
Lawa ma gako cikari ka makhon’wa.”
6 “Na ku nga se sangula kuba zvimoyana zva siku,* ni mindzhuti yi tsutsuma,
Ndzi ta khoma ndlela ndziya citsungeni ca mira,
Ni le citsunganeni ca hlakati yo nuhela.”+
8 A hi suke Lebhanoni hi relela zvin’we, noivha ya mina,
A hi relele zvin’we hi le Lebhanoni.+
Relela hi madembeleni ya Amana,*
Hi madembeleni ya Senira, a madembeleni ya Hermoni,+
Hi lomu a tinghala ti fihlalako kona, ni lomu zvitsungeni zva tiyingwe.
9 U tekile a mbilu ya mina,+ wena makabye wa mina ni noivha ya mina;
U tekile a mbilu ya mina hi ku ku cuwuka basi,
Hi cipandzana cin’we ca kordhawu ga wena.
10 A lirandzo la wena a li no ku saseka,+ wena makabye wa mina ni noivha ya mina!
A lirandzo la wena li nandziha a ku hundza vhinyo,+
Ni kunuhela ka mafura ya wena ku hundza a tixaka tontlhe ta tiperfume!+
11 A minomu ya wena, noivha ya mina, yi donadona a wulombe ga zvihahla.+
Lahasi ka lirimi la wena ku tele hi wulombe ni masi;+
A kunuhela ka tinguwo ta wena ku fana ni kunuhela ka Lebhanoni.
12 A makabye wa mina ni noivha ya mina i fana ni jardhim yi khotsilweko,
Ina, a jardhim yi khotsilweko, a cibuka ca mati ci vhalilweko.
13 A zvidhavana zva wena* i paradhise* ga miromazeira
Yi nga ni mihandzu ya yi nene nguvhu, ni hena,* ni tisinya ta nardho,*
14 Ni nardho,+ ni citsangi ca khwati,* ni lihlanga lo nuhela,+ ni kanela,*+
Ni tixaka tontlhe ta tisinya ta hlakati yo nuhela, ni mira, ni mhangani,+
Zvin’we ni tiperfume tontlhe ta tinene.+
15 Wena u cibuka ca mati ya jardhim, a hlowo ya mati ya manene,
Ni micongo yi khulungako hi le Lebhanoni.+
U ta kupetela a jardhim ya mina,
Kasi a kunuhela ka yona ku zwala.”
“A murandziwa wa mina i wa nghene lomu jardhim yakwe
Aga a mihandzu ya yona ya yinene.”
5 “Ndzi nghenile lomu jardhim ya mina,+
O makabye wa mina ni noivha ya mina!
Ndzi hlengeletele a mira ni tisinya ta mina to nuhela.+
Ndzi gile a zvihahla zva wulombe ni wulombe ga mina,
Ndzinwa a vhinyo ya mina ni masi ya mina.”+
“Vanghana va mina vo randzeka, ganani,
Munwa, mu popiwa hi lirandzo!”+
2 “Ndzi etlele, kanilezvi a mbilu ya mina ya hanyanya.+
Ku zwala a guwa ga murandziwa wa mina a gongondzako!
‘Ndzi vhulele, O makabye wa mina, wena murandziwa wa mina,
Cipomba ca mina co kala cisolo!
Hakuva a hloko ya mina yi tsakamile hi ndzhokati,
Ni misisi ya mina yi tsakamile hi civera ca wusiku.’+
3 Ndzi tlhatlhile a nghanju ya mina.
Ndzi nga tlhela ndzi boha ke?
Ndzi hlambile a mikondzo ya mina.
Ndzi nga tlhela ndzi yi chakisa ke?
4 A murandziwa wa mina i humesile a woko gakwe hi laha ka bhoxo ga livati,
A mbilu ya mina yi sangula kuba hi kota yakwe.
5 Ndzi no vhuka kasi ndzi ya vhulela a murandziwa wa mina;
A mandla ya mina ma wa donadona a mira,
Ni titiho ta mina ti wa xililika a mafura ya mira,
Ma tsakamisa a cikhomo ca cikwinyaro.
6 Ndzi no mu vhululela livati a murandziwa wa mina,
Kanilezvi a murandziwa wa mina i wa sukile, a ti fambela.
Ndzi no mbhela ntamu hi lezvi a nga fambile.*
Ndzi no mu lavetela, kanilezvi a ndzi mu kumangi.+
Ndzi no mu vitana, kanilezvi a nga ndzi hlamulangi.
7 A varindzeli lava va nga fambafamba lomu dhoropeni va no ndzi kuma,
Va ndziba, va ndzi bayisa.
A varindzeli va muro va no ndzi tlhatlhela a vhewu* ya mina.
8 Ndza mu hlambanyisa, n’wina vanhanyana va Jerusalema, ndziku:
Loku mu mu kuma a murandziwa wa mina
Mu byeleni lezvaku ndza babya hi lirandzo.”
9 “A murandziwa wa wena i va hundza hi yini a van’wani vavanuna,
Wena loyi u sasekileko a ku hundza vontlhe vavasati?
A murandziwa wa wena i va hundza hi yini a van’wani vavanuna,
A kuza u hi mahisa a cihlambanyo leci?”
10 “A murandziwa wa mina i sasekile niku i pswhukile;
Laha ka 10 000 wa vanhu ku woneka yena yece.
11 A hloko yakwe i ouro, a ouro ya yi nene khwatsi.
A misisi yakwe yo swomborokela yi ninganikisa a ku khwatsi madhavi ya cindzu,*
Yi timisile ku khwatsi cikunguwa.
12 A matihlo yakwe ma fana ni zvipomba lomu micongweni ya mati,
Zvi hlambako lomu ka masi,
Lezvi zvi tshamileko ka citivana ci teleko hi mati.*
13 A marama yakwe ma fana ni ndzima ya tisinya to nuhela,+
A fusi ga zvitsangi zvo nuhela.
A minomu yakwe makhon’wa; yi donadona a mafura ya mira.+
14 A titiho ta mandla yakwe i ouro; ti nameketelwe krizolite.
A miri wakwe matino ya ndlovhu ma kutlilweko, lawa ma fenengetilweko hi safira.
15 A minenge yakwe mapilari ya marmore ma zimilweko hehla ka ouro ya yinene nguvhu.
A miri wakwe wu fana ni Lebhanoni; wu sasekisile ku khwatsi misedhare.+
16 A nomu wakwe wa tsombela nguvhu,
Zvontlhe laha kakwe zvi sasekile.+
Loyi hi yena murandziwa wa mina, loyi ndzi fako hi yena, n’wina vanhanyana va Jerusalema.”
6 “I yile kwihi a murandziwa wa wena,
O wena loyi u sasekileko a ku hundza vontlhe vavasati?
A murandziwa wa wena i fambile hi kwihi?
Hi ta famba na wena hi mu lavetela.”
2 “A murandziwa wa mina i relele aya jardhim yakwe,
Aya tindzimeni takwe ta tisinya to nuhela,
A ya risa ntlhambi lomu masin’wini,
Ni ku khaya makhon’wa.+
3 Mina ndzi wa murandziwa wa mina,
Ni murandziwa wa mina wa mina.+
I risa cikari ka makhon’wa.”+
4 “Murandziwa wa mina,+ wena u sasekile a ku fana ni Tirza,*+
U sasekile a ku khwatsi i Jerusalema,+
U sasekile nguvhu a ku khwatsi mabutho ma rendzelekeleko a mabhandera ya wona.+
5 U nga ndzi cuwuki+
Hakuva ndzo dhanadhana.
A misisi ya wena yi fana ni ntlhambi wa timbuti
Ti relelako a mindzhelelo ya Gileyadhe.+
6 A matino ya wena ma fana ni ntlhambi wa tiyivhu
Leti ti wuyako hi kuhlambisiweni,
Tontlhe na ti hi ni mahahla;
Ku hava ni yin’we yi lahlekelweko hi yivhana ya yona.
7 A ku fana ni cikhemu ca romã,
Ma tshamisile lezvo a marama ya wena ma fenengetilweko hi vhewu.*
8 Hambu loku ku hi ni 60 wa vazindza,*
Ni 80 wa vasati va vatsongwani,*
Ni vanhanyana va tsandza-vahlayi,+
9 Mun’we basi a nga cipomba ca mina,+ co kala cisolo.
Hi yena yece laha ka mamani wakwe.
Hi yena a randziwako nguvhu hi* loyi a nga mu pswala.
Loku a vanhanyana va mu wona ve i katekile;
Ina, hambu a vazindza ni vasati lava va vatsongwani* va mu dzundza.
10 ‘Himani loyi a ngangamelako* a ku khwatsi wuronga,
Loyi a sasekileko a ku khwatsi i hweti yo tala,
A basileko a ku fana ni kuwoninga ka gambo,
A sasekileko nguvhu a ku khwatsi mabutho ma rendzelekeleko a mabhandera ya wona ke?’”+
11 “Ndzi relele lomu sin’wini ga mina ga mikanyi*+
Kasi ndzi wona lezvi zvi nga milile lomu nkoveni,
Ni ku wona lezvaku a vhina* wu hlukile* ke,
Ni lezvaku a miromazeira yi pfepfile ke.
12 Na ndzi nga se zvi pola,
A kunavela* ka mina ku no ndzi yisa
Tikareteni ta vanhu va mina vo chaviseka.”
13 “Wuya, wuya, wena muXulamite!
Wuya, wuya,
Kasi hi ta ku wona!”
“Mu mu hlamalela yini a muXulamite?”+
“I fana ni loku a wugovelo gimbiri gi kina!”*
7 “A yi no ku saseka a mikondzo ya wena lomu ka masandalia ya wena,
Wena nhanyana wo dzundzeka!
A tinyonga ta wena ti tshamisile ku khwatsi zvilo zvo ti sasekisa hi zvona,
A ntiro wa mandla ya meseri.
2 A nkovhu wa wena wu fana ni kopo
Leyi contlhe cikhati yi tshamako na yi hi ni vhinyo yi jutilweko.
A khwiri ga wena i nhulu ya timbewu ta trigo,
Yi randzelweko hi makhon’wa.
3 A mavele ya wena ya mambiri ma fana ni zvimhutana zvimbiri,
A mahahla ya mhuti.+
4 A nhamu ya wena+ yi fana ni likhokhola* la matino ya ndlovhu.+
A matihlo ya wena+ ma fana ni mativa ya le Hexbhoni,+
Lawa ma nga kusuhani ni nyangwa ya Bhate-Rabhim.
A nhovhu ya wena yi fana ni likhokhola la Lebhanoni
Leli li cuwukeneko ni Dhamasku.
5 A hloko ya wena yi sasekisile ku khwatsi citsunga ca Karmeli,+
Ni misisi ya wena yo swomborokela+ yi fana ni woya go pswhuka.+
A hosi ya kokiwa mahlo* hi misisi ya wena yo leha ni yo saseka.
6 A wu no ku saseka; a wo ku tsakisa,
O murandziwa wa mina, wena u hundza zvontlhe zvi tsakisako!
7 A miri wa wena wu fana ni cindzu,
Ni mavele ya wena ma fana ni zvitata zva ticindzu.+
8 Ndzi te: ‘Ndzi ta kandziha lomu ka cindzu
Ndzi ya khoma a mihanga ya mihandzu.’
A mavele ya wena ma wa fane ni zvitata zva mauvha,
Ni kuhefemula ka wena ku wa fane ni kunuhela ka maçã.
9 A nomu wa wena wu wa fane ni vhinyo ya yinene.”
“Yi wa relele khwatsi lomu nkolweni wa murandziwa wa mina,
Yi retemuka minon’wini ya lava va etleleko.
10 Mina ndzi wa murandziwa wa mina,+
Na yena i lava mina basi.
12 A hi vindzuke hiya zvivhineni*
Kasi hi ya wona ku a vhina* wu hlukile* ke,
Ni lezvaku a zvitsangi zvi balekile ke,+
Ni lezvaku a miromazeira ya pfepfa ke.+
Ndzi taya ndzi ya ku komba a lirandzo la mina seyo.+
13 A mandragora*+ ma humesa a kunuhela ka wona;
Lomu tinyangweni ta hina ku na ni tixaka tontlhe ta mihandzu ya yinene.+
A ya yiswa ni ya kale,
Ndzi ku vekele yona, wena murandziwa wanga.
8 “O, loku ku wo khwatsi u makabye wa mina,
Loyi a an’wileko a mavele ya mamani wa mina!
Loku ndzi ku kuma le handle ndzi wa ta ku pswopswa;+
I hava a nga wa ta ndzi hleka.
Ndzi wa ta ku nyika a vhinyo yo nuhela unwa,
A dosi ga maromã.
3 A woko gakwe ga cibhabha gi wa tava lahasi ka hloko ya mina,
Ni woko gakwe ga cinene gi wa ta ndzi bharasara.+
4 Ndza mu hlambanyisa, n’wina vanhanyana va Jerusalema, ndziku:
Mu nga zami ku ndzi khindlimuxela lirandzo hambu ku li vhuxa na li nga se zvi lava.”+
5 “Himani loyi a tako hi le ciwuleni,
Na a khigele a murandziwa wakwe ke?”
“Ndzi ku vhuxile na u hi lahasi ka masiyeira,*
Laha a mamani wa wena a nga lun’wa kona hi nyimba ya wena,
Laha loyi a nga ku pswala a nga lun’wa kona.
6 Ndzi namekete mbilwini ya wena kota cifungo,
Ndziva cifungo laha wokweni ga wena,
Hakuva a lirandzo li na ni ntamu wo fana ni kufa,+
Ni lirandzo lo tiya li na ni ntamu a ku fana ni Cilahla;*
A kuhisa ka lona i ndzilo wu vhurako, a langavi ga Jah.*+
7 A mati ma vhindlukileko a ma nge zvi koti ku tima a lirandzo,+
Ne hambu a micongo a yi nge zvi koti a ku li kukuleta.+
Loku a munhu i wo nyikela tontlhe a titshomba ta yindlu yakwe hi kota ya lirandzo,
Ti* wa ta chepetiwa nguvhu.”
8 “Hi na ni makabye wa cinhanyetana,+
A kalako a nga se huma mavele.
Hi ta kuyini hi makabye wa hina
A siku legi a to tsumbisiwa ku chadha ke?”
9 “Loku a hi muro,
Hi ta aka a libhiyo la prata hehla kakwe,
Kanilezvi loku a hi livati,
Hi ta mu vhala hi bakwa ya sedhare.”
10 “Mina ndzi muro,
Ni mavele ya mina ma fana ni tikhokhola.*
Hikwalaho, matihlweni yakwe,
Ndzi fana ni loyi a kumileko kurula.
11 Solomoni i wa hi ni civhina*+ le Bhaali-Hamoni.
I no ci nyikela mandleni ya vahlayisi.
A mun’we ni mun’wani wabye i wa mu nyika a 1000 wa zvingerengere zva prata hi mihandzu ya cona.
12 Ndzi na ni civhina ca mina n’winyi.
A 1000 wa zvingerengere zva prata zva wena Solomoni,
Ni 200 zva lava va hlayisako a mihandzu ya cona.”
13 “Wena loyi u tshamako lomu tijardhim,+
A vanghana va ingisela a gezu ga wena.
Ndzi tsike ndzi gi zwawo.”+
14 “Hatlisa, murandziwa wa mina,
U tsutsuma a ku khwatsi u mhuti+
Kutani cimbavalana
Ci nga hehla ka zvitsunga zva tisinya to nuhela.”
Kutani: “Lisimu lo hundza a tisimu tontlhe”.
Kutani: “A hi hlawutele”.
A zvivhina masimu ya tisinya leti ti pswalako mauvha.
Kutani: “wena loyi a muhefemulo wa mina wu ku randzako nguvhu”.
Kutani: “vhewu ya cirilo”. A vhewu i nguwo yo vangamela yi tiriselwako ku ti fenengeta hloko kutani nghohe.
Kutani: “pswele ga mina ga”.
Zvi nga maha na zvi wula ku: “ma sasekile cikari ka miluko ya misisi ya wena”.
Kutani: “a masindza ya ouro”.
Hi kukongoma: “nardho”.
Kutani: “sinya yo nuhela”.
Kutani: “yindlu ya hina ya hombe”.
Kutani: “denga; terraço”.
Hi kukongoma: “açafrão”.
A masiyeira i sinya leyi yi pswalako maçã.
Hi kukongoma: “ndlwini ya vhinyo”.
Kutani: “zvikhekhetselo”.
Kutani: “nguva ya tivhula”.
A mivhina tisinya leti ti pswalako mauvha.
Kutani: “zvidhula”.
A zvivhina masimu ya tisinya leti ti pswalako mauvha.
Hi kukongoma: “A siku na gi nga se hefemula”.
Zvi nga maha na zvi wula ku: “zvitsungeni zva mageva.” Kutani: “zvitsungeni zva Bhetera”.
Kutani: “a muhefemulo wa mina wu”.
Kutani: “a muhefemulo wa mina wu”.
Kutani: “a muhefemulo wa mina wu”.
Kutani: “a muhefemulo wa mina wu”.
A macira citulo co vhaliwa le hehla, ci nga tirisiwa ku rwala hi cona a munhu wo chaviseka.
A macira citulo co vhaliwa le hehla, ci nga tirisiwa ku rwala hi cona a munhu wo chaviseka.
Kutani: “korowa ya zvitsangi; simbu ya zvitsangi”.
A vhewu i nguwo yo vangamela yi tiriselwako ku ti fenengeta hloko kutani nghohe.
Kutani: “torre”.
Hi kukongoma: “A siku na gi nga se hefemula”.
Kutani: “Anti-Lebhanoni”.
Zvi nga maha na zvi wula ku: “A miri wa wena”.
Kutani: “jardhim”.
Kutani: “sinya yo nuhela”.
A nardho i sinya yo nuhela.
Hi kukongoma: “açafrão”.
Kutani: “kinamona”.
Kutani: “norte”.
Kutani: “sul”.
Zvi nga maha na zvi wula ku: “A muhefemulo wa mina wu wa lava ku titivala a cikhati a nga wulawula na mina”.
A vhewu i nguwo yo vangamela yi tiriselwako ku ti fenengeta hloko kutani nghohe.
Zvi nga maha na zvi wula ku: “zvitata zva ticindzu”.
Zvi nga maha na zvi wula ku: “lomu timbhirini ta cibuka ca mati”.
Kutani: “Dhoropa go Tsakisa”.
A vhewu i nguwo yo vangamela yi tiriselwako ku ti fenengeta hloko kutani nghohe.
Hi kukongoma: “Hi yena a basileko ka”.
Hi kukongoma: “cuwukako hasi”.
Kutani: “nogueiras”.
A vhina i sinya leyi yi pswalako mauvha.
Kutani: “wu balekile”.
Kutani: “muhefemulo”.
Kutani: “ni kukina ka Mahanayime”.
Kutani: “torre”.
Kutani: “yi phasilwe”.
Kutani: “tisinya to nuhela”.
A zvivhina masimu ya tisinya leti ti pswalako mauvha.
A vhina i sinya leyi yi pswalako mauvha.
Kutani: “balekile”.
A mandragora mihandzu ya sinya yo kari leyi a vavasati va nga kari vaga na va alakanya lezvaku yi ta va vhulula marumbu.
A masiyeira i sinya leyi yi pswalako maçã.
Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
A ku “Jah” i vito gi komisilweko gaku Jehovha.
Zvi nga maha na zvi wula ku: “I”.
Kutani: “torres”.
A civhina i simu ga tisinya leti ti pswalako mauvha.