MIKOSI
א [álefe]*
1 Hi nga wona lezvi gi nga salisa zvona goce a dhoropa legi gi nga tele hi vanhu!+
A dhoropa legi gi nga hi gona go tala hi vanhu cikari ka mifumo gi salisile ku khwatsi i noni!*+
Loyi a nga hi muzindza* cikari ka maprovhinsia i mahisiwa mitiro ya cikurumeta!+
ב [bete]
2 I rila nguvhu ni wusiku;+ a mihloti yakwe yi xililika lomu nghoheni yakwe.
Ku hava ni cigango cin’we cakwe ci tako ci ta mu chavelela.+
Vontlhe vanghana vakwe va mu kanganyisile;+ va mahile valala vakwe.
ג [guímel]
3 Judha i yile wukhumbini;+ wa xaniseka niku i ka wukhumbi go bindza.+
I ta tshama cikari ka matiko;+ a nga kumi wutshamu ga kuhumula.
Vontlhe lava va mu xanisako va mu khomile a cikhati leci a nga hi kuka-ratekeni.
ד [dálete]
4 A maruwa ya kuya Ziyoni ma rila hakuva i hava a tako mubuzweni.+
Tontlhe a tinyangwa takwe ti hahlulilwe;+ a vapristi vakwe va keta.
A vanhwana* vakwe va rila, niku wa karateka nguvhu.
ה [hê]
5 Lava va mu vengako hi vona va nga tihosi takwe;* a valala vakwe va hanya kuruleni.+
Hakuva Jehovha i mu nehele hlomulo hi kota ya zvihambunyeto zvakwe zvo tala.+
A vanana vakwe va yile wukhumbini na va guliwa hi nala.+
ו [vau]
6 A wudzundzo gontlhe gi sukile ka nhanyana wa Ziyoni.+
A tihosana takwe ti fana ni timbavala ti nga kumiko wuriselo;
Ti famba na ti karele mahlweni ka loyi a ti hlongoliselako.
ז [zaine]
7 Masikwini ya kuxaniseka kakwe, na a vhumala ko tshama, Jerusalema wa alakanya
A zvilo zvontlhe zva lisima lezvi zvi nga hi zvakwe masikwini ya kaleloko.+
A cikhati leci a vanhu vakwe va nga wela canjeni ga nala, yena na a nga hi na muvhuni,+
A valala va no mu wona, va hleka a kuwa kakwe.+
ח [hete]
8 Jerusalema i wonhile nguvhu,+
Hikwalaho, ive nchumu wo nyenyeza.
Vontlhe lava va nga kari va mu dzundza, zvezvi va mu chepeta hakuva va wonile a wumbyiri gakwe.+
Wa keta+ a hlehla na awa tingana.
ט [tete]
9 A kungahlazveki kakwe ku lomu ka tisaya takwe.
A nga alakanyangi zvamandziko.+
A kuwa kakwe ku hlamalisile; a nga na muchaveleli.
O Jehovha, wona kukarateka ka mina hakuva a nala i ti tlakusile.+
י [iode]
10 A nala i tlhatekile a mandla yakwe hehla ka titshomba takwe tontlhe,+
Hakuva i wonile matiko na ma nghena wutshan’wini gakwe go basa,+
Lawa u ma beteleko a ku nghena bandleni ga wena.
כ [cafe]
11 Vontlhe a vanhu vakwe va keta; va lavetela zvakuga.*+
Va nyikele a zvilo zvabye zva lisima kasi va kuma ca kuga va simama va hanya.*
O Jehovha, cuwuka u wona lezvaku ndzi hundzukile ndziva wasati* a nga vhuniko nchumu.
ל [lâmede]
12 Xana lezvi a hi nchumu ka n’wina n’wentlhe vahundzi va ndlela?
Cuwukani mu zvi wona!
Ku kona a kubayisa kun’wani ko fana ni loku ndzi tsayisilweko hi kona ke,
A kubayisa loku Jehovha a ndzi bileko hi kona sikwini ga zanga yakwe yi vhurako?+
מ [meme]
13 Hi le hehla, i rumele a ndzilo wuta ka marambu ya mina,+ a hlula wontlhe.
I andlalile likoka* mikondzweni ya mina, a ndzi kurumeta ku tlhelela ndzhako.
I ndzi mahile wasati a tsikilweko.
Gontlhe siku, ndza babya.
נ [nune]
14 A zvihambunyeto zva mina zvi bohilwe kota kanga, zvi fasiwa hi canja gakwe.
Zvi vekilwe nhan’wini ya mina niku ndzi mbhelile ntamu.
Jehovha i ndzi nyikele canjeni ga lava ndzi nga zvi kotiko ku va hlula.+
ס [sâmeque]
15 Jehovha i ti hoxile handle tontlhe a tinhenha leti ti nga hi cikari ka mina.+
I ndzi vitanisele a hlengeletano kasi yi talwa na mina yi chindza a majaha ya mina.+
Jehovha i kandzihetele a nhwana* wa Judha lomu cigowolweni ca vhinyo.+
ע [aine]
16 Ndza rila hi kota ya zvilo lezvi;+ a matihlo ya mina ma khulunga mihloti.
Hakuva vontlhe lava va nga ringana ku ndzi chavelela ni ku ndzi tangalisa* va kule na mina.
A vana va mina va le hlomulweni hakuva a nala i hlulile.
פ [pê]
17 Ziyoni i tlakusile a mandla yakwe;+ a nga na munhu wa ku mu chavelela.
Jehovha i layile ku a valala vontlhe lava va randzeleko Jakobe va mu vhukela.+
Jerusalema ive nchumu wo nyenyeza ka vona.+
צ [tsadê]
18 Jehovha i lulamile,+ hakuva ndzi no tsika ku ingisa zvileletelo zvakwe.*+
N’wina matiko wontlhe, zwanani, mu wona a kubayisa loku ndzi ku zwako.
A vanhwana* va mina ni vafana va mina va yile wukhumbini.+
ק [cofe]
19 Ndzi vitanile a zvigango zva mina, kanilezvi zvi ndzi kanganyisile.+
Lomu dhoropeni, a vapristi va mina ni madhota ya mina va lovile,
ר [rexe]
20 O Jehovha, wona lezvaku ndzi lomu hlomulweni wa hombe.
A marumbu ya mina ma vila.
A mbilu ya mina ya karateka lomu ndzeni ka mina hakuva a ndzi ingisangi.+
Le handle, a cipadha ca daya;+ lomu ndlwini ku fana ni kufa.
ש [chim]
21 A vanhu vazwa a kuketa ka mina; a ku na wa ku ndzi chavelela.
Vontlhe a valala va mina va zwile a khombo ga mina.
Va tsaka hi lezvi u gi vangileko.+
Kanilezvi u ta neha a siku legi u gi huweleleko,+ laha vonawu va to fana na mina.+
ת [tau]
22 A kubiha kabye kontlhe ku wa chikele mahlweni ka wena, u va tsayisa nguvhu,+
A kufana ni lezvi minawu u nga ndzi tsayisa hi kota ya zvontlhe zvihambunyeto zva mina.
Hakuva a miketo ya mina yi tele, ni mbilu ya mina ya babya.
א [álefe]
2 Jehovha i fenengetile a nhanyana wa Ziyoni hi refu ga zanga yakwe!
I hoxile a kusaseka ka Izrayeli hi le tilweni kuwa lahasi misaveni.+
A nga alakanyangi a cikhegetelo ca mikondzo yakwe+ sikwini ga zanga yakwe.
ב [bete]
2 Jehovha i mitile a matshamu wontlhe ya Jakobe, a nga ma zwelangi wusiwana.
Zangeni yakwe, i khungumulile a matshamu ma bhiyelweko ya nhanyana wa Judha.+
I wisile mufumo wakwe+ ni tihosana takwe lahasi, a va nyenyezisa.+
ג [guímel]
3 Zangeni yakwe yi vhurako, i mbhetile a ntamu wontlhe* wa Izrayeli.
I susile a canja gakwe ga cinene laha a nala a nga tshinela,+
I vhurele Jakobe a ku khwatsi i ndzilo wu hisako zvontlhe zvi nga matlhelweni.+
ד [dálete]
4 Yena i kondlile* a wura gakwe a ku khwatsi i nala; a canja gakwe ga cinene gi longile a ku dhumela a ku khwatsi i nala;+
I dayele vontlhe lava va nga tsakisa matihlo.+
I chululile a zanga yakwe a ku fana ni ndzilo+ hehla ka tenda ga nhanyana wa Ziyoni.+
ה [hê]
5 Jehovha i khwatsi i nala;+
I mitile Izrayeli.
I mitile a tikhokhola* takwe tontlhe; I khungumulele a matshamu yakwe wontlhe ma vhikelweko khwatsi.
I andzisile a cirilo ni mikosi ya nhanyana wa Judha.
ו [vau]
6 I khoma a chacha wakwe hi tihanyi+ a ku khwatsi cibarakana lomu masin’wini.
I fuvisile a mibuzo yakwe.+
Jehovha i mahile a mibuzo ni masabhadho zvi rivaliwa lomu Ziyoni.
Zangeni yakwe yi vhurako, a nga chelangi kota hi hosi ni mupristi.+
ז [zaine]
7 Jehovha i tsikile a alati gakwe;
I fularele a wutshamu gakwe go basa.+
I nyikele a makhurisi ya tikhokhola* takwe ti tiyisilweko khwatsi canjeni ga nala.+
Va tlakusile a magezu yabye lomu ndlwini ya Jehovha+ a ku khwatsi i siku ga mubuzo.
ח [hete]
8 Jehovha i bohile ku lovisa a muro wa nhanyana wa Ziyoni.+
I gwimbile a lingoti la ku pima hi lona.+
A nga tlhelisangi a woko gakwe lezvaku gi nga lovisi.*
Wa yi vangela cirilo a rampa ni muro.
Zvontlhe zvi mbhetilwe ntamu.
ט [tete]
9 A tinyangwa takwe ti wile lahasi misaveni.+
I lovisile a zvikwinyaro zvakwe a tlhela a zvi tshoveletela.
A hosi yakwe ni tihosana takwe ti lomu cikari ka matiko.+
A ku na nayo;* hambu a vaphrofeti vakwe a va woni miwoniso yi tako hi ka Jehovha.+
י [iode]
10 A madhota ya nhanyana wa Ziyoni ma tshamile lahasi ma ku kape.+
Ma ti cheletela ntshuri tihlokweni ta wona ma tlhela ma boha tisakwa.+
A vanhwana* va Jerusalema va koramisile a tihloko tabye lahasi.
כ [cafe]
11 A matihlo ya mina ma karele hi ku halata mihloti.+
A marumbu ya mina ma vila.
A civindzi ca mina ci halatilwe lahasi hi kota ya kuwa ka nhanyana wa vanhu va mina,+
Hi kota ya zvivanana ni tinyamani* zvi titivalako lomu maprasa* ya dhoropa.+
ל [lâmede]
12 Va wutisa vamamani vabye, vaku: “Zvi kwihi a zvakuga* ni vhinyo?”,+
Na va kari va titivala a ku khwatsi munhu a bayisilweko lomu maprasa* ya dhoropa,
A wutomi* gabye na gi kari gi mbhela mawokweni ya vamamani vabye.
מ [meme]
13 Cini ndzi nga ci tirisako kota kustumunyu,
Ndzi nga ku fananisa ni yini, wena nhanyana wa Jerusalema?
Kona ndzi nga ku fananisa ni yini kasi ku ku chavelela, wena nhwana* wa Ziyoni?
Hakuva a khombo ga wena ga hombe a ku khwatsi i bimbi.+ Himani wa ku a nga ku hanyisa ke?+
נ [nune]
14 A miwoniso leyi a vaphrofeti va wena va yi wonileko va ku byela, mawunwa niku a yi vhuni nchumu;+
A va ku kombangi cigoho ca wena kasi u ngayi wukhumbini,+
Kanilezvi va no simama ku ku byela miwoniso ya mawunwa ni timhaka ti hambukisako.+
ס [sâmeque]
15 Vontlhe a vahundzi va ndlela vaba mandla va ku chepeta.+
Vaba minoti hi kuhlamala,+ va mu ninginisela tihloko tabye a nhanyana wa Jerusalema, vaku:
“Hi galegi a dhoropa legi va nga kari vaku: ‘Gi mbhelele hi kusaseka, a litsako la misava yontlhe’?”+
פ [pê]
16 Vontlhe a valala va wena va ku ahlamele a nomu wabye.
Vaba noti, va getsela a matino yabye, vaku: “Hi mu mitile.+
Hi galegi a siku legi hi nga gi rindzela!+ Gi chikele, hi gi wonile!”+
ע [aine]
17 Jehovha i mahile lezvi a nga zvi xuva.+ I tatisile a mhaka yakwe,+
Lezvi a nga leletela kaleloko.+
I hahlulile na a nga zweli wusiwana.+
I tsikile a nala a tsaka hi wena; i tlakusile a ntamu* wa lava va ku vengako.
צ [tsadê]
18 A timbilu tabye ti rilela Jehovha, O wena muro wa nhanyana wa Ziyoni!
A mihloti yi wa khulunge a ku khwatsi i congo, mumu ni wusiku.
U nga humuli, u nga tsiki a tihlo ga wena gi etlela.
ק [cofe]
19 Vhuka u rila ni wusiku, kusanguleni ka cikhati ca kurindzela.
Chulula a mbilu ya wena a ku khwatsi i mati mahlweni ka nghohe ya Jehovha.
Mu tlakusele a mandla ya wena hi kota ya wutomi* ga vana va wena,
Lava va titivalako lomu mahandzakanyeni wontlhe ya maruwa hi kota ya ndlala.+
ר [rexe]
20 O Jehovha, cuwuka, u wona loyi u nga mu tsayisa nguvhu.
Xana a vavasati va wa fanele kuga a pswalo* wabye, a vana lava va nga va pswala?+
Xana a vapristi ni vaphrofeti va wa fanele ku dawa lomu wutshan’wini go basa ga Jehovha ke?+
ש [chim]
21 A vafana ni zvikhosana va file va mbambamela lomu maruweni.+
A vanhwana* ni majaha va wisilwe hi cipadha.+
U va dele sikwini ga zanga ya wena; u va hihiritile na u nga zweli wusiwana.+
ת [tau]
22 A ku khwatsi i siku ga mubuzo,+ u vitanisile kuchava hi matlhelweni wontlhe.
Sikwini ga zanga ya Jehovha, i hava a nga huluka kutani ku pona;+
A nala i lovisile lava ndzi nga va pswala* ndzi tlhela ndzi va wundla.+
א [álefe]
3 Ndzi munhu a wonileko hlomulo hi kota ya nhonga ya zanga yakwe.
2 I ndzi hlongolile niku i ndzi fambisa munyameni na ku nga hi kuwonekeleni.+
3 Wa ndzi vhukela hi kuphindaphinda hi canja gakwe gontlhe siku.+
ב [bete]
4 I khanyanisile a nyama ya mina ni miri wa mina;
I tshovile a marambu ya mina.
5 I ndzi bhiyele; i ndzi randzele hi vhenene yo bava+ ni zvikarato.
6 I ndzi kurumetile ku tshama munyameni a ku khwatsi vanhu lava va fileko kaleloko.
ג [guímel]
7 I ndzi bhiyele hi muro kasi ndzi nga zvi koti ku huluka;
I ndzi bohile hi machini yo bindza ya kobre.+
8 A cikhati leci ndzi mu rilelako na ndzi nga tivi ni co maha, i ala* mukhongelo wa mina.+
9 I vhalile a tindlela ta mina hi maribye ma vatlilweko;
I gombonyekisile maruwa ya mina.+
ד [dálete]
10 Wa ndzi xiyelela a ku khwatsi i urso, a ku khwatsi i nghala yi fihleleko.+
12 I kondlile* a wura gakwe a tlhela a ndzi potiyela hi paxa.
ה [hê]
13 I tlhavile a tiswa ta mina hi mipaxa* ya cikhwama cakwe.
14 Ndzi mahile cihlekiso ka matiko wontlhe ni lisimu labye gontlhe siku.
15 I ndzi tatile hi zvilo zva kubava, a ndzi popa hi sinya ya kubava.+
ו [vau]
16 I tshova a matino ya mina hi zviribyana,
A ndzi khanyanisa hi kuchava lomu khumeni.+
17 Wena wa ndzi tsona* kurula; ndzi rivele a zvazvinene.
18 Hikwalaho, ndzi ngalo: “A wudzundzo ga mina gi mbhelile, ni kutsumba ka mina ka Jehovha konawu ku mbhelile.”
ז [zaine]
19 Alakanya lezvaku ndza xaniseka niku a ndzi na ko tshama;+ alakanya lezvaku ndziga a sinya ya kubava ni vhenene yo bava.+
20 Hakunene u* ta zvi alakanya u korama ka mina.+
21 Ndza zvi alakanya lezvo mbilwini ya mina; hikwalaho ndzi ta rindzela.+
ח [hete]
22 A hi lovangi hi kota ya lirandzo li nga mbheliko la Jehovha,+
Hakuva a wuxinji gakwe a gi tshuki gi mbhela.+
23 Gi mahiwa giswa mixo ni mixo;+ a kutsumbeka ka wena ka hombe.+
24 Ndzi* te ngalo: “Jehovha ciavelo ca mina,+ hikwalaho ndzi ta rindzela kakwe.”+
ט [tete]
25 Jehovha mu nene ka loyi a mu tsumbako,+ ka munhu* loyi a simamako ku mu hlota.+
26 Zvi nene a ku rindzela kuhanyisa ka Jehovha+ na u miyele.*+
27 Zvi nene ku a munhu a rwala kanga wusweni gakwe.+
י [iode]
28 Loku Nungungulu a mu tlhateka kanga, i wa tshame yece a miyela.+
29 I wa vekele nomu wakwe ntshurini,+ kuzvilava ka ha hi ni kutsumba.+
30 I wa nyikele rama gakwe ka loyi a mu bako; i wa rukatelwe nguvhu.
כ [cafe]
31 Hakuva Jehovha a nga ta hi tsikela magumo.+
32 Hambu lezvi a nga hi nehela hlomulo, i ta tlhela a hi mahela wuxinji hi kuya hi lirandzo lakwe la hombe li nga mbheliko.+
33 Hakuva a zvi mbilwini yakwe a ku xanisa kutani ku va vangela hlomulo a vana va vanhu.+
ל [lâmede]
34 A ku sila zvontlhe a zvibochwa zva misava lahasi ka mikondzo,+
35 Ni ku alela munhu a kululama mahlweni ka Loyi a Tlakukileko ku Hundza Vontlhe,+
36 Ni ku kalavela munhu ka mhaka yakwe,
— Jehovha a nga zvi lavi a zvilo lezvo.
מ [meme]
37 Himani a nga wulako a mhaka yi maheka loku Jehovha a nga layangi ke?
38 Ka nomu wa Loyi a Tlakukileko ku Hundza Vontlhe
A ku humi a zvilo zva kubiha ni zvilo zva kusaseka hi khatigin’we.
39 Hikuyini a munhu a hanyako a khalako hi mawu-yawuya ya ciwonho cakwe ke?+
נ [nune]
40 A hi hloleni, hi kambisisa a tindlela ta hina+ hi tlhelela ka Jehovha.+
41 A hi tlakuseni a timbilu ta hina ni mandla ya hina ka Nungungulu le matilweni, hiku:+
42 “Hi wonhile, hi tsika ku ingisa+ niku a wu hi tsetselelangi.+
ס [sâmeque]
43 Hi zanga ya wena, u hi vhalile hi nga tshineli ka wena;+
U hi hlongolisele, u hi daya na u nga hi zweli wusiwana.+
44 U hi vhalele hi refu lezvaku hi nga tshineli ka wena, kasi a mukhongelo wa hina wu nga tsemakanyi.+
45 U hi maha fendze ni chaka cikari ka matiko.”
פ [pê]
46 Vontlhe a valala va hina va hi ahlamela minomu yabye va hi vhukela.+
47 A kuchava ni mitlhamu hi cona ciavelo ca hina,+ ni kuhahlulwa ni kuloviswa.+
48 Hi lomu matihlweni ya mina, ku khulunga a micongo ya mati hi kota ya kuhahlulwa ka nhanyana wa vanhu va mina.+
ע [aine]
49 A matihlo ya mina ma rila ma nga karali, ma nga nyimi,+
50 Kala Jehovha a cuwuka hi le tilweni a zvi wona.+
51 A matihlo ya mina ma ndzi vangela* hlomulo hi kota ya vontlhe a vanhanyana va dhoropa ga mina.+
צ [tsadê]
52 A valala va mina va ndzi hlotile mahala a ku khwatsi ndzi cinyanyani.
53 Va miyetile a wutomi ga mina lomu nkeleni; va ndzi hoxetele maribye.
54 A mati ma kukumukile ma fenengeta a hloko ya mina, mina ndziku: “Ndzi file!”
ק [cofe]
55 O Jehovha, ndzi vitanile a vito ga wena hi lomu kueteni ka nkele.+
56 Zwana a gezu ga mina; u nga ti vhali tindleve loku ndzi rila ndzi kombela ku vhuniwa kasi ndzi tlhatlhiswa.
57 Ka siku legi ndzi nga ku vitana, u no tshinela, uku: “U nga chavi.”
ר [rexe]
58 Wena Jehovha, u yimele a mhaka ya mina* u tlhatlhisa a wutomi ga mina.+
59 Wena Jehovha, u ku wonile a kubiha loku ndzi mahelweko. Ndzi mahele kululama.+
60 U ku wonile kontlhe a kutiphotela kabye, zvontlhe a zvikungo zvabye lezvi va ndzi lukeleko.
ש [sim kutani chim]
61 U zvi zwile a zviruko zvabye, O Jehovha, zvontlhe a zvikungo zvabye lezvi va ndzi lukeleko,+
62 A minomu ya valala va mina ni lezvi va ndzi hlevako hi zvona gontlhe siku.
63 Hi nga va wona, kani va no tshama kani va no yima, vo ndzi poyila lomu ka tisimu tabye!
ת [tau]
64 O Jehovha, wena u ta va tlhelisela hi kuya hi mitiro yabye.
65 U ta nonohisa a timbilu tabye, civa cona a ciruko ca wena hehla kabye.
66 U ta va hlongolisela zangeni ya wena u va lovisa lahasi ka matilo ya Jehovha.
א [álefe]
4 Zvi mahisile kuyini ku a ouro ya yinene leyi yi nga phatima yi kuruka!+
Zvi mahisile kuyini ku a maribye yo basa+ ma mbambamela mahandza-kanyeni wontlhe ya maruwa!+
ב [bete]
2 Zvi mahisile kuyini ku a vana va lisima va Ziyoni, lava va nga hi va lisima a ku khwatsi i ouro yi hlutilweko,
Va mahisa ku khwatsi tifuko ta wumba,
Wu nga ntiro wa mandla ya muwumbi!
ג [guímel]
3 Hambu a makhanga ma an’wisa a vanana va wona,
Kanilezvi a nhanyana wa vanhu va mina i na ni xapi+ a ku khwatsi timbhuwu* ta lomu ciwuleni.+
ד [dálete]
4 A lirimi la tinyamani* ta ha an’wako li namarela le hehla ka nomu wa tona hi kota ya tora.
A vanana va kombela pawa,+ kanilezvi i hava a va nyikako.+
ה [hê]
5 Lava va nga tolovele kuga mafehlefehle zvezvi va mbambamela hi ndlala lomu maruweni.+
Lava va nga wundliwa na va boha tinguwo to dhura*+ zvezvi va etlela lomu khumeni.
ו [vau]
6 A tsayiselelo* wa nhanyana wa vanhu va mina wa hombe a ku hundza a tsayiselelo wa ciwonho ca Sodhoma,+
A dhoropa legi gi nga hahlulwa hi cikhatana, ku ngavi ni canja ga ku gi vhuna.+
ז [zaine]
7 A vaNazira vakwe+ va wa basile a ku hundza ni gapongo, va wa basile a ku hundza ni masi,
Va wa pswhukile a ku hundza ni makorali; va wa ku khwatsi i safira yi kutlilweko.
ח [hete]
8 Makunu a tinghohe tabye ti hundza ni siti hi ku tima;
Va kohliwa lomu maruweni.
A nyama yabye yi khanyene lomu ka marambu yabye;+ yo khwatsi tihunyi ta ku woma.
ט [tete]
9 Lava va delweko hi cipadha va chukwana a ku hundza lava va delweko hi ndlala,+
Lava va khanyanako ni kufa hi ku vhumala zvakuga lomu masin’wini a ku khwatsi va no tlhaviwa.
י [iode]
10 A mandla ya vavasati va ku zwela wusiwana ma bhikile a vana vabye.+
Va va mahile zvakuga zvabye zva cirilo cikhatini ca kuhahlulwa ka nhanyana wa vanhu va mina.+
כ [cafe]
11 Jehovha i humesile a khulo gakwe;
I chululile a zanga yakwe yi vhurako.+
I lumekile a ndzilo le Ziyoni wu hisa a zviseketelo zvakwe.+
ל [lâmede]
12 A tihosi ta misava ni vontlhe a vahanyi va tiko va wa nga kholwi
Lezvaku a nala ni loyi a va vengako va ta zvi kota ku nghena lomu tinyangweni ta Jerusalema.+
מ [meme]
13 Lezvo zvi mahekile hi kota ya zviwonho zva vaphrofeti vakwe, ni zvigoho zva vapristi vakwe,+
Lava va nga halata a nkhata wa valulamileko cikari kakwe.+
נ [nune]
14 Va pepetseka lomu maruweni a ku khwatsi zvikhumu.+
Va nyenyezisilwe hi nkhata,+
Laha ka ku a nga kona a khumbako a tinguwo tabye.
ס [sâmeque]
15 Va va bangulekela vaku: “Fambani! Vangabasangiko ndzin’wina! Fambani! Fambani! Mu nga hi henyi!”
Hakuva a va na muti, vo pepetseka.
A vanhu va matiko va te: “A va nge tshami na hina.*+
פ [pê]
16 A nghohe ya Jehovha yi va hangalasile;+
A nga ta ha va mahela wuxinji.
A vanhu va nga ta ha va kombisa cichavo a vapristi+ ne hambu ku ma mahela wuxinji a madhota.”+
ע [aine]
17 A matihlo ya hina ma karele mahala hi ku rindzela ku kutani hi ta kuma kuvhuniwa.+
Hi rindzele, hi rindzela a ku vhuniwa hi tiko ga ku a gi nge zvi koti ku hi ponisa.+
צ [tsadê]
18 Hi wa gadhiwa a zambo ni zambo hi ngaba+ laha ka ku zvi nga ha koteki a ku hi famba lomu maprasa* ya hina.
A kugumesa ka hina ku tshinele; a masiku ya hina ma mbhelile; a magumo ya hina ma chikele.
ק [cofe]
19 Lava va nga hi hlongolisela va wa tsutsuma nguvhu a ku hundza ni magama ya tilo.+
Va hi hlongolisele lomu zvitsungeni, va hi jumelela lomu ciwuleni.
ר [rexe]
20 Loyi a totilweko wa Jehovha,+ loyi a nga kuhefemula ka tinhovhu ta hina, i khomilwe lomu nkeleni wabye wa hombe,+
Loyi hi nga wulawula hi yena hiku: “Hi ta hanya ndzhutini wakwe cikari ka matiko.”
ש [sim]
21 Tsaka u nengela, wena nhanyana wa Edhomi,+ u hanyako tikweni ga Uza.
Kanilezvi wenawu u ta nyikiwa kopo,+ u popiwa, u kombisa a wumbyiri ga wena.+
ת [tau]
22 A tsayiselelo wa cigoho ca wena, wena nhanyana wa Ziyoni, wu mbhelile.
A nga ta ha ku yisa kambe wukhumbini.+
Kanilezvi i ta alakanya a cigoho ca wena, wena nhanyana wa Edhomi.
I ta funungula a zviwonho zva wena.+
5 O Jehovha, alakanya lezvi zvi hi weleko.
Cuwuka, u wona a tingana ta hina.+
2 A tshomba ya hina yi nyikelwe ka vambe vanhu, ni tiyindlu ta hina ka vamatiko.+
3 Hi mahile vana vo felwa hi papayi; a vamamani va hina va fana ni tinoni.*+
4 Zvi lava ku hi xava a mati ya hina venyi kasi hinwa,+ niku a tihunyi ta hina venyi hi ti kuma hi mali.
5 Lava va hi hlongoliselako va lomu mikolweni ya hina;
Hi karele, kanilezvi a hi tsikiwi hi humula.+
6 Ha nawuluta a canja ga hina ka Gibhite+ ni Asiriya+ kasi hi kuma zvakuga zvo enela kuga.
7 A vakokwani va hina lava va wonhileko a va ha hi kona kanilezvi hina ha rwala a zvigoho zvabye.
8 Zvezvi hi fumelwa hi malandza; a nga kona wa ku hi tlhatlhisa canjeni gabye.
9 Hi kota ya cipadha lomu ciwuleni, hi veka wutomi* ga hina mhangweni kasi hi kuma pawa.+
10 A mimiri ya hina ya hisa a ku khwatsi i ndzhimbo* hi kota ya kubayisa ka ndlala.+
11 A vasati va wisilwe tingana* le Ziyoni, ni vanhwana* lomu madhoropeni ya Judha.+
12 A tihosana ti hayekilwe hi mandla,+ ni madhota a ma kombisiwangi cichavo.+
13 A majaha ma rwala cigayo ca mandla, ni vafana vawa ni tinyandza ta tihunyi.
14 A madhota a ma ha hi kona laha nyangweni ya dhoropa;+ a majaha a ma ha chayi a mimuzka ya wona.+
15 A litsako a la ha hi kona timbilwini ta hina; a kukina ku hundzukile ku maha cirilo.+
16 A cidlodlo* ci wile hlokweni ya hina. Khombo ga hina, hakuva hi wonhile!
17 Hi kota ya lezvo, a timbilu ta hina ta babya,+
Niku hi kota ya zvilo lezvi, a matihlo ya hina a ma ha woni khwatsi,+
18 Hakuva a Citsunga ca Ziyoni ci hahlulilwe;+ zvezvi a tinghowo* ti fambafamba lomo.
19 O Jehovha, wena u tshama citshan’wini ca wuhosi kala kupindzuka.
A citshamu ca wena ca wuhosi ci simama ka cizukulwana ni cizukulwana.+
20 Hikuyini u hi rivalako kala kupindzuka, u hi tsika hi cikhati co leha ke?+
21 O Jehovha, hi wuyise ka wena; hi ta tekela ku wuya ka wena.+
Ma vhuxe luswa a masiku ya hina a ku fana ni kale.+
22 Kanilezvi wena u hi tsikele magumo.
Wa ha simama ku hi zangarela nguvhu.+
A cipimo 1 kala 4 tisimu ta cirilo ti tsalilweko hi ku landza a maletra ya ciHebheru.
Kutani: “wasati wo felwa hi nuna”.
Kutani: “virgens”.
Hi kukongoma: “hloko yakwe”.
Hi kukongoma: “pawa”.
Kutani: “kasi va vhuxa muhefemulo”.
A wasati loyi ku wuliwa Jerusalema.
Kutani: “juya”.
Kutani: “virgem”.
Kutani: “ku tangalisa a muhefemulo wa mina”.
Hi kukongoma: “a nomu wakwe”.
Kutani: “virgens”.
Kutani: “kasi va vhuxa muhefemulo”.
Hi kukongoma: “a timhondzo tontlhe”.
Hi kukongoma: “kandzihele”.
Kutani: “torres”.
Kutani: “torres”.
Hi kukongoma: “gi nga miti”.
Kutani: “gondziselelo”.
Kutani: “virgens”.
Kutani: “zvihlangi”.
Kutani: “tindzhoho”.
Kutani: “muhefemulo”.
Kutani: “virgem”.
Hi kukongoma: “limhondzo”.
Kutani: “muhefemulo”.
Kutani: “handzu”.
Kutani: “virgens”.
Kutani: “ndzi nga va pswala na va hanya khwatsi”.
Kutani: “betela; vhala”.
Zvi nga maha na zvi wula ku: “i ndzi maha ndzi ku khwatsi ndzi simu go kala ku byaliwa nchumu”.
Hi kukongoma: “kandzihele”.
Hi kukongoma: “vana”.
Kutani: “wa tsona muhefemulo wa mina a”.
Kutani: “a muhefemulo wa wena wu”.
Kutani: “A muhefemulo wa mina wu”.
Kutani: “muhefemulo”.
Kutani: “hi lihlazva-mbilu”.
Kutani: “ma vangela a muhefemulo wa mina a”.
Kutani: “ya muhefemulo wa mina”.
Kutani: “avestruzes”.
Kutani: “zvihlangi”.
Hi kukongoma: “to pswhuka”.
Hi kukongoma: “cigoho”.
Kutani: “A va nge luveli lomu ka hina”.
Kutani: “vavasati vo felwa hi vanuna”.
Kutani: “muhefemulo”.
Kutani: “fornalha”.
Kutani: “va pfinyilwe”.
Kutani: “virgens”.
Kutani: “korowa”.
Kutani: “zvidhula”.