PAPILO GA PAWULE KA VA LE ROMA

1 Pawule, a nandza ga Kristu Jesu, loyi a vitanelweko kuva mupostoli a tlhela a hlawuliwa kasi ku kanela mahungu ya manene ya Nungungulu,+ 2 lawa a nga ma tsumbisa kaleloko hi nomu wa vaphrofeti vakwe lomu ka Mitsalo yo basa 3 xungetano hi N’wana wakwe, loyi a humileko hi ka pswalo* wa Dhavhidha hi ka nyama,+ 4 kanilezvi a kombiswa hi ntamu lezvaku i N’wana wa Nungungulu+ hi kuya hi moya wo basa hi ku vhuxiwa hi ka vafileko,+ — ina, Jesu Kristu, a Hosi ya hina. 5 Hi ka yena hi amukele a tipswalo ni wupostoli,+ kasi kuva ni kuingisa hi kukholwa cikari ka matiko wontlhe+ vitweni gakwe, 6 ku nga matiko lawa n’winawu mu vitanilweko hi ka wona lezvaku mu ta lumba Jesu Kristu. 7 Ndza mu tsalela n’wina n’wentlhe mu nga le Roma, n’wina mu randziwako hi Nungungulu, mu vitanelweko a kuva vobasa, ndziku:

A tipswalo ni kurula zvi tako hi ka Nungungulu, a Papayi wa hina, ni ka Hosi Jesu Kristu, a zvive na n’wina.

8 A co sangula, ndzi bonga Nungungulu ha Jesu Kristu hi kota ya n’wina n’wentlhe, hakuva va wulawula hi kukholwa ka n’wina tikweni gontlhe. 9 Hakuva Nungungulu loyi ndzi mu tirelako hi moya wa mina hi ku kanela mahungu ya manene xungetano hi N’wana wakwe, wa ndzi kustumunyela lezvaku a ndzi tsiki ku mu kumbuka mikhongelweni ya mina contlhe cikhati,+ 10 na ndzi khongotela lezvaku loku zvi koteka ka cikhati leci, hi kugumesa, ndzi zvi kota kuta ka n’wina loku Nungungulu a zvi randza. 11 Hakuva ndza xuva nguvhu ku mu wona, kasi ndzi mu nyika a cinyikiwo ca moya lezvaku mu tiyisiwa; 12 kutani ku, kasi hi tiyisana+ hi kukholwa ka hina hontlhe, a ka n’wina ni ka mina.

13 Vamakabye, ndzi lava ku mu zvi tiva lezvaku ndzi zvi lavile makhati yo tala a ku mu endzela kasi ndzi ta kuma mihandzu ka n’winawu a ku khwatsi hi ka man’wani matiko, kanilezvi zvi kona zva ha ndzi tsandzekisako kala lezvi. 14 Ndzi na ni mangava ka vaGreki ni ka vamatiko,* a ka lava vo tlhariha ni ka zvipumbu; 15 hikwalaho, ndza zvi lava nguvhu a ku ta chumayela mahungu ya manene ni ka n’winawu seyo Roma.+ 16 A ndziwi tingana hi kota ya mahungu ya manene,+ hakuva hi lisine i ntamu wa Nungungulu wa ku hanyisa ni wihi a kholwako,+ a muJudha+ kuranga ni muGreki kambe.+ 17 Hakuva ka wona a kululama ka Nungungulu ka wonekeliswa hi kukholwa na ku wonekeliselwa kukholwa,+ kota lezvi ku tsalilweko ku ngalo: “Kanilezvi a wakululama i ta hanya hi kota ya kukholwa.”+

18 Hakuva a zanga ya Nungungulu+ ya kombisiwa hi le tilweni hehla ka kontlhe a kungakholwi ni kungalulami ka vanhu lava va vhalelako lisine+ hi ndlela yi nga lulamangiko, 19 hakuva lezvi zvi faneleko ku tiviwa xungetano hi Nungungulu zva woneka khwatsi ka vona, hakuva Nungungulu i zvi wonekelisile kabye.+ 20 Hakuva a matshamela yakwe ma nga wonekiko — hambu a ntamu wakwe wa pindzukelwa+ ni wunungungulu gakwe+ — ma woneka maku dlunya kusukela kuvangiweni ka tiko, hakuva ma kombisiwa hi zvilo lezvi a zvi mahileko,+ hikwalaho a va na ku ti phendla. 21 Hakuva hambu lezvi va nga mu tiva Nungungulu, a va mu dhumisangi kota Nungungulu ne ku mu bonga, kanilezvi a maalakanyo yabye ma nova yo kala ku vhuna nchumu, niku a timbilu tabye ti nga tlharihangiko ti nova munyameni.+ 22 Hambu lezvi va nga ti byela ku va tlharihile, va no maha zvipumbu 23 va hundzula a kungangamela ka Nungungulu a nga loviko* ku ku khwatsi cifananiso ca munhu wa ku wa lova, ni ca zvinyanyani, ni zvihari zva mune wa minenge, ni zvikokakoka.*+

24 Hikwalaho, hi ku yelana ni kunavela ka timbilu tabye, Nungungulu i no va nyikela ka kungahlazveki, kasi va nyenyezisa a mimiri yabye. 25 Va cicisile a lisine la Nungungulu hi mawunwa, va khozela ni ku tirela civangwa va tsika Muvangi loyi a dhumiswako kala kupindzuka. Amen. 26 Hikwalaho, Nungungulu i no va nyikela kunaveleni ko nyenyeza ka masango,+ hakuva a vavasati vabye va no ti cica va maha zvo hambana ni lezvi va mahelweko zvona;+ 27 ni vavanuna vonawu va no tsika ku etlela ni vavasati kota lezvi va mahelweko zvona, va sangula ku vhura hi ku navelana hi ca ka vona, a vavanuna va etlela ni vavanuna va maha zvo nyenyeza,+ va amukela a tsayiselelo* wu ringanako a ciwonho cabye.+

28 Kota lezvi va nga ala ku tiva Nungungulu,* Nungungulu i no va nyikela maalakanyweni ma solekako, va maha lezvi zvi nga faneliko.+ 29 Va wa tele hi kungalulami kontlhe,+ ni kuwonha, ni makangwa,*+ ni kubiha, ni ku tala hi matshoho,+ ni kudaya,+ ni tiholova, ni kukanganyisa,+ ni mona,+ va hi vahlevi, 30 ni valumbeti,+ va venga Nungungulu, va nga hi na cichavo, va hi vamatshandza, ni vo ti kukumukisa, ni vasangulisi va zvakubiha, lava va nga ingisiko vapswali,+ 31 vo kala kuzwisisa,+ ni va nga tsumbekiko, lava va nga randziko a maxaka yabye, ni vo kala wuxinji. 32 Hambu lezvi va wu tivako khwatsi a nayo wo lulama wa Nungungulu, wa lezvaku lava va mahako a zvilo lezvo va fanele kufa,+ va simama ku zvi maha va tlhela va sekela lava va zvi mahako.

2 Hikwalaho, wena munhu, hambu u hi wena mani,+ loku u lamula a wu na ku ti phendla; hakuva a cikhati leci u lamulako mun’wani wo ti kona ha wece, hakuva wena loyi u lamulako wa maha a zvilo zvalezvo.+ 2 Makunu ha zvi tiva lezvaku a kulamula ka Nungungulu ku yelana ni lisine niku kulwa ni lava va mahako a zvilo lezvo.

3 Wena u lamulako lava va mahako zvilo lezvo, kuveni wenawu wa maha, u alakanya lezvaku u ta pona kulamula ka Nungungulu ke? 4 Kutani wo kanyisa a kutala ka tipswalo+ takwe, ni kutimisela kakwe,+ ni lihlazva-mbilu+ lakwe ke? A wu zvi tivi lezvaku Nungungulu i ku kombisa tipswalo takwe na a lava lezvaku u ti sola ke?+ 5 Kanilezvi kota lezvi u ti nonohisako, ni lezvi a mbilu ya wena yi alako ku hundzuluka, wo ti hlengeletelela a khulo sikwini ga khulo ni ga kuwonekeliswa ka kulamula ko lulama ka Nungungulu.+ 6 I ta tlhelisela a mun’we ni mun’wani hi kuya hi mitiro yakwe:+ 7 a wutomi ga pindzukelwa ka lava va hlotako a kungangamela, ni wudzundzo, ni kungaboli,+ hi ku timisela mitirweni ya yinene; 8 hambulezvo, lava va vangako mazunga ni lava va nga ingisiko lisine, kanilezvi va ingisa a kungalulami, va ta welwa hi zanga ni khulo.+ 9 A kuxaniseka ni hlomulo zvi tava ka vanhu* vontlhe va mahako zvakubiha, a ka muJudha kuranga ni ka muGreki kambe; 10 kanilezvi a kungangamela ni wudzundzo ni kurula zvi tava ka vontlhe va mahako zvazvinene, a ka muJudha kuranga+ ni ka muGreki kambe.+ 11 Hakuva Nungungulu a nga na cihlawulela.+

12 Hakuva vontlhe lava va wonhileko na va nga hi na nayo va tafa na va nga hi na nayo;+ kanilezvi vontlhe lava va wonhileko na va hi lahasi ka nayo va ta lamuliwa hi nayo.+ 13 Hakuva lava va zwako a nayo a hi vona va lulamileko mahlweni ka Nungungulu, kanilezvi lava va landzelako a nayo hi vona va to wuliwa volulama.+ 14 Hakuva a cikhati leci a vanhu va matiko, lava va nga hava nayo,+ va mahako lezvi zvi nga nayweni na va nga byeliwangi hi munhu, a vanhu lavo, hambu lezvi va nga hava nayo, i nayo ha voce. 15 Va kombisa ha voce lezvaku a mitiro ya nayo yi tsalilwe timbilwini tabye, a livhalo labye li va mahela wukustumunyu, niku hi* maalakanyo yabye va koneka hambu ni ku tlhatlhiwa. 16 Lezvi zvi ta maheka sikwini legi Nungungulu, hi ku tirisa Kristu Jesu, a to lamula mitiro leyi a vanhu va yi mahako kufihlaleni,+ kota lezvi ma wulako a mahungu ya manene lawa ndzi ma kanelako.

17 Makunu loku wena u hi ni vito ga muJudha,+ na u tsumba nayo ni ku ti tlakusa hi Nungungulu, 18 ni loku u tiva kurandza kakwe, ni ku tiva zvilo zva zvinene nguvhu hi lezvi u gondzisilweko Nayo,+ 19 na u kholwa lezvaku u mukombi wa ndlela ka zvikhumu, ni kuwonekela ka lava va nga munyameni, 20 ni mukawuki wa zvipumbu, ni mugondzisi wa vanana, na u hi ni ciseketelo* ca wutivi ni lisine zvi nga Nayweni; 21 makunu wena loyi u gondzisako mun’wani, a wu ti gondzisi ke?+ Wena loyi u chumayelako, uku: “U nga yivi”,+ wa yiva ke? 22 Wena loyi u nge: “U nga mahi wubhayi”,+ wa maha wubhayi ke? Wena loyi u nyenyako zvifananiso, wa yiva lomu titempeleni ke? 23 Wena loyi u ti kulisako hi kota ya nayo, wa mu wisa tingana Nungungulu hi ku hambunyeta Nayo ke? 24 Hakuva “a vito ga Nungungulu ga rukatelwa cikari ka vamatiko hi kota ya n’wina”, kota lezvi zvi tsalilweko.+

25 A wukwera*+ gona ga vhuna loku u ingisa nayo;+ kanilezvi loku u hi muhambunyeti wa nayo, hambu loku u mahilwe wukwera zvi fana ni loku u nga mahiwangi. 26 Kanilezvi, loku loyi a nga kala ku mahiwa wukwera*+ a hlayisa zvileletelo zvo lulama zvi nga Nayweni, a wukhuna* gakwe gi ta woniwa kota wukwera, a hi zvona ke?+ 27 Loku loyi a nga kala ku mahiwa wukwera* hi ka nyama a hlayisa Nayo, i ta lamula wena loyi u hambunyetako Nayo, hambu lezvi u nga ni nayo wu tsalilweko, na u mahilwe wukwera. 28 Hakuva a muJudha wa lisine a hi loyi wa lahandle,+ ne hambu a wukwera a hi legi ga nyama.+ 29 Kanilezvi a muJudha wa lisine+ hi loyi a nga muJudha hi lomu mbilwini,+ ni wukwera* gakwe hi legi ga mbilu gi mahilweko hi moya na ku nga hi nayo wu tsalilweko.+ A munhu loye i dzundziwa hi Nungungulu, na ku nga hi vanhu.+

3 Makunu a muJudha i va pala hi yini van’wani? Kona a wukwera* gi na ni bhindzu muni? 2 Gi na ni bhindzu hi tindlela tontlhe. A co sangula, hi ku a vaJudha va nyikilwe a timhaka to basa ta Nungungulu.+ 3 Xana lezvo zvi wula yini? Loku a vokari va nga kholwangi, ina a kungakholwi kabye ku nga maha kutsumbeka ka Nungungulu ku nga vhuni nchumu ke? 4 Kokwihi! Ngha Nungungulu a kumiwa na a hi wa lisine,+ hambu loku a vanhu vontlhe va kumiwa na va hi vahembi,+ kota lezvi ku tsalilweko ku: “Kasi u fela ku kumeka na u lulamile timhakeni ta wena, u hlula loku u hi kulamulweni.”+ 5 Kanilezvi, loku a kungalulami ka hina ku kombisa a kululama ka Nungungulu, hi ta kuyini? Nungungulu i no kala kululama loku a kombisa a zanga yakwe ke? (Ndzi wulawula kota munhu.) 6 Kokwihi! Loku zvi wa hi lezvo, Nungungulu i wa ta gi lamulisa kuyini a tiko?+

7 Kanilezvi, loku a mawunwa ya mina ma kombekisa nguvhu a lisine la Nungungulu kasi a kuliswa, hikuyini ndza ha lamulwako kota muwonhi? 8 Hikuyini hi nga wuliko ku: “A hi maheni zvakubiha kasi kuta zvazvinene” ke? (Kota lezvi a vokari va hi hembelako vaku ha wula.) A kulamulwa ka vanhu lavo ku landza kululama.+

9 Makunu ke, hi va hundza hi yini van’wani? A hi va hundzi hi nchumu! Hakuva hi sina hi wulile lezvaku a vaJudha ni vaGreki hi wumbiri gabye va lahasi ka ciwonho;+ 10 kota lezvi ku tsalilweko ku: “A ku na munhu wo lulama, a ku kala ni mun’we;+ 11 i hava a nga ni wutlhari; i hava a hlotako Nungungulu. 12 Vontlhe va hambukile vaya tlhelweni, vontlhe a va vhuni nchumu; i hava a nga ni tipswalo, ne mun’we.”+ 13 “A nkolo wabye cilahla ci ahlamileko; hi tirimi tabye va kanganyisa.”+ “A wuxungu ga tinyoka gi minon’wini yabye.”+ 14 “A nomu wabye wu tele hi zviruko ni kubava.”+ 15 “A mikondzo yabye yi tsutsumela ku ya halata nkhata.”+ 16 “A kuhahlula ni wusiwana zvi tindleleni tabye, 17 a va yi tivi a ndlela ya kurula.”+ 18 “A ku na kuchava Nungungulu matihlweni yabye.”+

19 Ha zvi tiva ku zvontlhe lezvi a Nayo wu zvi wulako wu byela lava va nga lahasi ka Nayo, kasi a minomu yontlhe yi miyetwa, ni tiko gontlhe gi konelwa ku tsayisiwa mahlweni ka Nungungulu.+ 20 Hikwalaho, i hava a to wuliwa wolulama mahlweni kakwe hi ku maha mitiro ya nayo,+ hakuva a nayo wu hi komba hi kumbhelela lezvaku cini a ciwonho.+

21 Makunu, na zvi ngayi hi nayo, ku wonekelisilwe a kululama ka Nungungulu+ loku a Nayo ni Vaphrofeti va kustumunyako hi kona,+ 22 ina, a kululama ka Nungungulu loku ku tako hi ku kholwa ka Jesu Kristu, ka vontlhe lava va kholwako. Hakuva a ku na kuhambana.+ 23 Hakuva vontlhe va wonhile niku va tsandzeka ku kombisa a kungangamela ka Nungungulu,+ 24 niku va wuliwa vo lulama hi lezvi a va kombisileko tipswalo+ hi ku va tlhatlhisa hi hakhelo ya kutlhatlhisa yi rihilweko hi Kristu Jesu,+ loyi a mu nyikeleko kota cinyikiwo.+ 25 Nungungulu i no mu nyikela kota cinyikiwo ca ku hlazva zviwonho+ hi kukholwa nkhateni wakwe.+ I mahile lezvo kasi ku kombisa kululama kakwe, hakuva kutimiseleni kakwe, Nungungulu i wa tsetselela a zviwonho zvi mahilweko kale. 26 I mahile lezvo kasi ku kombisa a kululama kakwe+ nguveni leyi, kasi ava wo lulama hambu a cikhati leci a mu hlayelako kululama loyi a kholwako ka Jesu.+

27 Makunu ci kwihi a cigelo ca kutikulisa ke? Ci fuvisilwe! Ci fuvisilwe hi nayo muni? Hi lowu wa mitiro ke?+ Ahihi! Ci fuvisilwe hi nayo wa kukholwa. 28 Hakuva ha tiyisa lezvaku a munhu i wuliwa ku i lulamile hi kota ya kukholwa na ku nga hi hi kota ya mitiro ya nayo.+ 29 Kona yena ova Nungungulu wa vaJudha voce ke?+ Kasi a hi Nungungulu wa vanhu va matiko kambe ke?+ Ina, wa vamatiko kambe.+ 30 Kota lezvi a nga Nungungulu mun’we,+ i ta va hlayela kululama lava va mahilweko wukwera*+ loku va kholwa, ni lava vo kala va nga mahiwangi wukwera a va hlayela kululama+ hi kota ya kukholwa kabye. 31 Makunu, ha fuvisa nayo hi kukholwa ka hina ke? Ahihi! Ho tiyisa a nayo.+

4 Loku zvi hi lezvo, hi ta ku zvini lezvi Abrahama, a kokwani wa hina hi ka nyama, a zvi kumileko? 2 Hi cikombiso, loku Abrahama i wa wulilwe wa kululama hi kota ya mitiro, na a vile ni cigelo ca ku ti kulisa, kanilezvi na ku nga hi mahlweni ka Nungungulu. 3 Kasi a Mitsalo yi yini ke? Yi ngalo: “Abrahama i no kholwa ka Jehovha,* niku lezvo zvi no hlayelwa kakwe kota kululama.”+ 4 Makunu ka loyi a tirako, a hakhelo yakwe a yi hlayiwi kota tipswalo, kanilezvi kota nchumu a dhevhiwako.* 5 Hi tlhelo gin’wani, ka loyi a kalako ku tira, kanilezvi na a kholwa ka Loyi a mu hlayelako kululama loyi a nga kholwiko, a kukholwa kakwe ku hlayiwa kota kululama.+ 6 A ku khwatsi hi lezvi Dhavhidha yenawu a wulawulako hi litsako la munhu loyi Nungungulu a mu hlayelako kululama na a nga cuwuki hi mitiro, aku: 7 “Va tsaka lava a mitiro yabye ya kuhambunyeta nayo yi tsetselelweko, ni lava a zviwonho zvabye zvi fenengetilweko;* 8 wa tsaka a munhu loyi Jehovha* a to kala ku chela kota hi ciwonho cakwe.”+

9 Kasi a litsako leli li kumiwa hi lava va mahilweko wukwera* voce, kutani li kumiwa kambe hi lava vo kala ku mahiwa wukwera ke?+ Hakuva hi ngalo: “A kukholwa ka Abrahama ku no hlayelwa kakwe kota kululama.”+ 10 I hlayelwe kululama na a tshamisile kuyini? Na a mahilwe wukwera,* kutani na a nga se mahiwa? Na a nga se mahiwa wukwera. 11 I no amukela cikombiso+ — ku nga wukwera* — kota cifungo* ca kululama hi kota ya kukholwa loku a nga hi nako na a nga se mahiwa wukwera, lezvaku ava papayi wa vontlhe lava va kholwako+ na va nga mahiwangi wukwera, kasi vonawu va wuliwa vo lulama; 12 ni lezvaku ava papayi wa pswalo wu mahilweko wukwera,* na ku nga hi wa lava va namarelako ka wukwera ntsena, kanilezvi ni wa lava va fambako hi kufaneleko hi ndlela ya kukholwa loku a papayi wa hina, Abrahama,+ a nga hi nako na a nga se mahiwa wukwera.

13 Hakuva a ku vangi hi ka Nayo Abrahama kutani pswalo* wakwe va nga amukela a citsumbiso ca lezvaku i wa tava mugi wa tshomba ya tiko,+ kanilezvi kuve hi kululama ku kumiwako hi kukholwa.+ 14 Hakuva loku ku hi ku lava va namarelako nayweni hi vona vagi va tshomba, a kukholwa a ka ha vhuni nchumu, ni citsumbiso a ca ha tiri. 15 Hi lisine, a Nayo wu vanga zanga,+ kanilezvi laha ku nga hava nayo, a ku na kuhambunyeta nayo.+

16 Hikwalaho, a citsumbiso ci kumiwa hi kukholwa, kasi ci fela kuva ca tipswalo,+ lezvaku ci fela ku tiya ka pswalo* wakwe wontlhe,+ na ku nga hi ka lava va ingisako nayo voce, kanilezvi ni ka lava va namarelako ka kukholwa loku Abrahama, a papayi wa hontlheni, a nga hi nako.+ 17 (A ku khwatsi hi lezvi ku tsalilweko ku: “Ndzi ku mahile papayi wa matiko yo tala.”)+ Zvi mahekile mahlweni ka Nungungulu loyi Abrahama a nga kholwa ka yena, loyi a hanyisako vafileko ni ku wulawula hi zvilo zvi kalako zvi nga hi kona a ku khwatsi hi loku zvi hi kona.* 18 Hambu lezvi zvi nga kala zvi nga ha tsumbisi, kanilezvi na a khegela ka kutsumba, i no kholwa lezvaku i tava papayi wa matiko yo tala, kota lezvi zvi nga sina zvi wulilwe, zvaku: “A pswalo* wa wena wu ta tshamisa zvezvi.”+ 19 Hambu lezvi a kukholwa kakwe ku nga kala ku mbhela ntamu, i wa wona a miri wakwe a ku khwatsi makunu wu file (kota lezvi a nga hi ni cipimo ca 100 wa malembe),+ ni marumbu ya Sara wonawu ma wa ku khwatsi ma file.+ 20 Kanilezvi hi kota ya citsumbiso ca Nungungulu, a nga tlhelelangi ndzhako hi kungakholwi; kanilezvi i nova ni ntamu hi kukholwa kakwe, a dhumisa Nungungulu 21 na a kholwa hi kumbhelela lezvaku lezvi Nungungulu a nga tsumbisile i wa hi ni ntamu kambe wa ku zvi maha.+ 22 Hikwalaho, “lezvo zvi no hlayelwa kakwe kota kululama.”+

23 Hambulezvo, a magezu lawa yaku “zvi no hlayelwa kakwe”, ma wa nga tsalelwi yena yece,+ 24 kanilezvi ma wa tsalelwa na hinawu hi to wuliwa volulama hi lezvi hi kholwako ka Nungungulu loyi a vhuxileko Jesu, a Hosi ya hina, hi ka vafileko.+ 25 I nyikelwe hi kota ya zvihambunyeto zva hina,+ a gumesa a vhuxiwa kasi hi wuliwa volulama.+

5 Hikwalaho, kota lezvi makunu hi wulilweko vanhu vo lulama hi kota ya kukholwa,+ a hi ti buzeni hi kurula* na Nungungulu ha Jesu Kristu, a Hosi ya hina,+ 2 loyi hinawu hi kumileko hi yena tipswalo hi kukholwa, leti hi nga ka tona zvalezvi;+ a hi tsakeni* hi kota ya ku tsumba ku hlengela kungangameleni ka Nungungulu. 3 Na ku nga hi lezvo basi, a hi tsakeni* hambu loku hi hi kuxanisekeni,+ na hi tiva lezvaku a kuxaniseka ku pswala kutimisela;+ 4 a kutimisela ku pswala ciyimo ci amukelekako;+ a ciyimo ci amukelekako ci pswala kutsumba,+ 5 niku a kutsumba a ku hi wisi tingana,+ hakuva a lirandzo la Nungungulu li chululilwe timbilwini ta hina hi moya wo basa lowu hi nyikilweko.+

6 Hakuva, hakunene, na ha hi ni gome,+ Kristu i no fela vanhu va nga kholwiko hi cikhati ci yimisilweko. 7 Hakuva zva karata ku a munhu a fela munhu wo lulama; hambu lezvi a wokari kuzvilava a nga xinyatako a fela munhu wa munene. 8 Kanilezvi Nungungulu i komba ku wa hi randza hi ndlela leyi: Na ha hi vawonhi, Kristu i no hi fela.+ 9 A ha ha wuli lezvi makunu hi wulilweko vo lulama hi kota ya nkhata wakwe,+ hi ta poniswa zangeni hi kota ya yena.+ 10 Hakuva loku hi tlhelile hi zwanana na Nungungulu hi kota ya kufa ka N’wana wakwe na ha hi valala,+ a ha ha wuli lezvi makunu hi zwananako naye, hi ta poniswa hi wutomi gakwe. 11 Ahandle ka lezvo, ha tsaka kambe na Nungungulu hi kota ya Hosi ya hina Jesu Kristu, loyi a hi zwananisileko na Nungungulu.+

12 Hikwalaho, a ku khwatsi hi lezvi hi kota ya munhu mun’we a ciwonho ci nga nghena tikweni, ni kufa hi kota ya ciwonho,+ hizvalezvo a kufa ku no thapela vanhu vontlhe hakuva vontlhe va wonhile+ . . . 13 Hakuva a ciwonho cive kona tikweni a Nayo na wu nga seva kona, kanilezvi a vanhu a va hlayelwi kuwonha loku ku nga hi na nayo.+ 14 Hambulezvo, a kufa ku no fuma kusukela ka Adhamu kala ka Mosi, hambu hehla ka lava va nga kala ku wonhisa lezvi Adhamu a nga hambunyetisa zvona, loyi a nga fana ni loyi a nga hata.+

15 Kanilezvi a cinyikiwo a ci fani ni cihambunyeto. Hakuva loku a votala va file hi kota ya cihambunyeto ca munhu mun’we, a ha ha wuli hi tipswalo ta Nungungulu ni cinyikiwo* cakwe ci tileko hi ka tipswalo ta munhu mun’we,+ ku nga Jesu Kristu, zva andza* ka votala!+ 16 Ahandle ka lezvo, lezvi zvi humelelako hi cinyikiwo* a zvi fani ni lezvi zvi humeleleko hi kota ya munhu mun’we a nga wonha.+ Hakuva a kulamula loku ku tileko hi kota ya cihambunyeto cin’we kuve kukoniwa,+ kanilezvi a cinyikiwo leci ci tileko hi kota ya zvihambunyeto zvo tala cive kuhlayelwa kululama.+ 17 Hakuva loku a kufa ku fumile hi kota ya cihambunyeto ca munhu mun’we,+ a ha ha wuli hi lava va amukelako a tipswalo ta talela ga cima ni cinyikiwo* ca kululama,+ va ta fuma+ wutomini hi kota ya munhu mun’we, ku nga Jesu Kristu!+

18 Hikwalaho, a ku khwatsi hi lezvi a cihambunyeto cin’we ci nga maha lezvaku a vanhu va tixaka tontlhe va koneka,+ hizvalezvo kambe, hi kota ya cimaho cin’we ca kululama a vanhu va tixaka tontlhe+ va hlayelwa kululama loku ku yisako wutomini.+ 19 Hakuva a ku khwatsi hi lezvi a kungaingisi ka munhu mun’we ku nga maha votala vava vawonhi,+ hizvalezvo kambe, a kuingisa ka munhu mun’we ku ta maha votala va wuliwa vo lulama.+ 20 Makunu a Nayo wu nota kasi ku ta andzisa a zvihambunyeto.+ Kanilezvi laha a ciwonho ci nga andza, a tipswalo tonawu ti no andza nguvhu. 21 Kasi zvi kuyini? Kasi ku, a ku khwatsi hi lezvi a ciwonho ci nga fuma zvin’we ni kufa,+ ni tipswalo tonawu ti fela ku fuma hi kululama loku ku yisako wutomini ga pindzukelwa ha Jesu Kristu, a Hosi ya hina.+

6 Makunu hi ta kuyini? Hi ta simama ciwonhweni kasi a tipswalo ti fela ku andza ke? 2 Kokwihi! Kota lezvi hi fileko hi tlhelo ga ciwonho,+ hi ta simamisa kuyini ku hanya ka cona ke?+ 3 Kutani mo kala mu nga zvi tivi lezvaku hontlheni hi bhabhatiselweko ka Kristu Jesu+ hi bhabhatiselwe kufeni kakwe ke?+ 4 Hikwalaho, hi no lahliwa zvin’we naye hi kubhabhatiswa ka hina kakwe,+ kasi ku, a ku khwatsi hi lezvi Kristu a vhuxilweko hi ka vafileko hi kungangamela ka Papayi, hizvalezvo na hinawu hi fela ku famba hi mahanyela maswa.+ 5 Loku hi tlhanganisilwe zvin’we naye hi ku fisa ku khwatsi hi yena,+ hakunene hi ta tlhanganiswa zvin’we naye kambe hi ku vhuxisiwa ku khwatsi hi yena.+ 6 Hakuva ha zvi tiva lezvaku a mahanyela ya hina ya kale ma belelwe zvin’we naye mhandzeni+ lezvaku a miri wa hina wa kuwonha wu fela ku mbhetiwa ntamu,+ kasi hi nga havi malandza ya ciwonho.+ 7 Hakuva loyi a fileko i tlhatlhilwe* ka ciwonho cakwe.

8 Ahandle ka lezvo, loku hi file zvin’we na Kristu, ha kholwa lezvaku hi ta hanya zvin’we naye kambe. 9 Hakuva ha zvi tiva ku lezvi makunu Kristu a nga vhuxiwa hi ka vafileko+ a nga hafi kambe;+ a kufa a ka ha fumi hehla kakwe. 10 Hakuva a kufa loku a fileko, i fele ku fuvisa ciwonho khati gin’we zvi enela,+ kanilezvi a wutomi legi a hanyako, i hanyela Nungungulu. 11 Hizvalezvo na n’winawu, ti woneni na mu file hi tlhelo ga ciwonho, kanilezvi na mu hanyela Nungungulu ha Kristu Jesu.+

12 Hikwalaho, mu nga tsiki ciwonho ci simama ku fuma mimirini ya n’wina ya ku yafa,+ lezvaku mu ingisa a kunavela ka yona. 13 Ne mu nga nyikeli a mimiri* ya n’wina ciwonhweni kota matlhari ya kungalulami, kanilezvi ti nyikeleni ka Nungungulu kota lava va humileko kufeni vaya wutomini mu tlhela mu nyikela a mimiri* ya n’wina ka Nungungulu kota matlhari ya kululama.+ 14 Hikwalaho, a ciwonho ci nga fumi hehla ka n’wina hakuva a mu lahasi ka nayo+ kanilezvi mu lahasi ka tipswalo.+

15 Hi ta kuyini ke? Hi ta wonha hi lezvi hi nga lahasi ka tipswalo na ku nga hi lahasi ka nayo?+ Kokwihi! 16 Kasi a mu zvi tivi lezvaku loku mu ti nyikela ka wokari kota tikhumbi kasi mu mu ingisa, mu tikhumbi ta loyi mu mu ingisako+ — kani ta ciwonho+ leci ci yisako kufeni+ kutani ta kuingisa loku ku yisako kululameni ke? 17 Kanilezvi i wa bongiwe Nungungulu hakuva hambu lezvi mu nga hi tikhumbi ta ciwonho, mu no ingisa na zvi sukela mbilwini a gondziselelo leyi mu nyikilweko. 18 Kota lezvi mu tlhatlhisilweko ka ciwonho,+ mu malandza ya kululama.+ 19 Ndzi wulawula kota munhu hi kota ya lezvi a nyama ya n’wina yi nga ni gome; hakuva a ku fana ni lezvi mu nga nyikele a zviro zva n’wina zviva tikhumbi ta kungahlazveki ni ta ku hambunyeta nayo lezvi zvi yisako ka kuhambunyeta nayo, makunu lezvi, nyikelani a zviro zva n’wina zviva malandza ya kululama loku ku yisako kubaseni.+ 20 Hakuva a cikhati leci mu nga hi tikhumbi ta ciwonho, mu wa tlhatlhekile hi tlhelo ga kululama.

21 Kasi mu wa bhindzula yini cikhatini leco? Mu wa bhindzula a zvilo lezvi makunu zvi mu wisako tingana, hakuva a magumo ya zvilo lezvo kufa.+ 22 Kanilezvi, lezvi makunu mu tlhatlhisilweko ciwonhweni mu maha malandza ya Nungungulu, ma pswala mihandzu ya kubasa,+ niku a magumo ya kona wutomi ga pindzukelwa.+ 23 Hakuva a hakhelo ya ciwonho kufa,+ kanilezvi a cinyikiwo leci Nungungulu a nyikako wutomi ga pindzukelwa+ ha Kristu Jesu, a Hosi ya hina.+

7 Kasi mo kala mu nga zvi tivi, vamakabye, (hakuva ndzi wulawula ni lava va wu tivako nayo) lezvaku a Nayo wu fumela munhu na a ha hanya ke? 2 Hi cikombiso, a wasati a chadhileko i bohilwe hi nayo ka nuna wakwe loku a nuna wakwe a ha hanya; kanilezvi loku a nuna wakwe afa, i tlhatlhekile ka nayo wa nuna wakwe.+ 3 Hikwalaho, loku a nuna wakwe a ha hanya, i ta wuliwa ku cibhayi loku ava wa mun’wani wanuna.+ Kanilezvi loku a nuna wakwe afa, i tlhatlhekile ka nayo wa nuna wakwe, hikwalaho, a nga tava cibhayi loku ava wa mun’wani wanuna.+

4 Hikwalaho, vamakabye va mina, n’winawu mu file hi tlhelo ga Nayo hi kota ya miri wa Kristu, kasi mu lumba mun’wani,+ ku nga loyi a vhuxilweko hi ka vafileko+ kasi mu mu pswalela mihandzu Nungungulu.+ 5 Hakuva laha hi nga ha hanya hi ka nyama, a kunavela ka kuwonha loku ku vhuxilweko hi Nayo ku wa tira mimirini* ya hina ku pswala mihandzu yi yisako kufeni.+ 6 Kanilezvi makunu hi tlhatlhisilwe ka Nayo,+ hakuva hi file ka lezvi zvi nga hi bohelele, kasi hiva malandza hi tshamela giswa ga ka moya,+ na ku nga hi tshamela ga kale ga nayo wu tsalilweko.+

7 Makunu hi ta kuyini? A Nayo ciwonho ke? Kokwihi! Phela loku ku wa nga hi Nayo, na ndzi nga ci tivangi ciwonho.+ Hi cikombiso, na ndzi nga ku tivangi kunavela loku a Nayo wu wa nga wulangi ku: “U nga naveli”.+ 8 Kanilezvi a ciwonho, na ci nyikiwa ndlela hi cileletelo, ci no ndzi vangela kunavela ka tixaka tontlhe, hakuva laha a nayo wu nga hi hava a ciwonho ci wa file.+ 9 Kunene ndzi wa ti hanyela na ndzi nga hi na nayo. Kanilezvi laha ku nga chikela cileletelo, a ciwonho ci no vhuka ci hanya, kanilezvi mina ndzi nofa.+ 10 Makunu ndzi no wona lezvaku a cileletelo leci ci nga fanele ku ndzi yisa wutomini,+ ci ndzi yisa kufeni. 11 Hakuva hi kota ya cileletelo, a ciwonho ci no kuma ndlela ya ku ndzi kanganyisa, ci ndzi daya. 12 Hikwalaho, a Nayo wona wu basile, ni cileletelo conawu ci basile, ci lulamile niku ci nene.+

13 Makunu lezvi zvi nga zvinene zvi ndzi yisile kufeni ke? Kokwihi! Kanilezvi a ciwonho ci ndzi yisile kona kasi ci kombekiswa kubaseni kota ciwonho, ci pswala kufa ndzeni ka mina hi lezvi zvi nga zvinene,+ lezvaku hi kota ya cileletelo, a ciwonho ci hundzeleta a ku wonha.+ 14 Hakuva ha zvi tiva lezvaku a Nayo wa moya, kanilezvi mina ndzi munhu wa nyama a xavisilweko ciwonhweni.+ 15 Hakuva lezvi ndzi mahako a ndzi zvi tivi. Hakuva a ndzi mahi lezvi ndzi zvi randzako, kanilezvi ndzi maha lezvi ndzi zvi vengako. 16 Kanilezvi loku ndzi maha lezvi ndzi nga zvi randziko, ndza vhumela lezvaku a Nayo wu nene. 17 Makunu a ka ha hi mina ndzi mahako, kanilezvi ciwonho leci ci tshamileko ndzeni ka mina.+ 18 Hakuva ndza zvi tiva lezvaku ka mina — ku nga nyameni ya mina — a ku na nchumu wa wunene; hakuva ndza xuva ku maha zvazvinene kanilezvi a ndzi na ntamu wa ku zvi maha.+ 19 Hakuva a ndzi mahi zvazvinene lezvi ndzi zvi xuvako, kanilezvi a zvakubiha lezvi ndzi zvi vengako hi zvona ndzi mahako. 20 Makunu loku ndzi maha lezvi ndzi nga zvi randziko, a ka ha hi mina ndzi mahako, kanilezvi ciwonho leci ci tshamileko ndzeni ka mina.

21 Mhakeni ya mina, ndzi wona a nayo lowu: Loku ndzi xuva ku maha zvakululama, a zvakubiha zvi kona ka mina.+ 22 Kunene ndza tsaka nayweni wa Nungungulu hi munhu loyi ndzi nga yena hi le ndzeni,+ 23 kanilezvi ndzi wona a nayo wun’wani mirini* wa mina lowu wu lwako ni nayo wa kupima ka mina,+ wu ndzi kokela wukhumbini ga nayo wa kuwonha+ lowu wu nga zvirweni zva mina. 24 A khombo ga mina vasan’wina! Himani a to ndzi tlhatlhisa mirini lowu wu ndzi yisako kufeni ke? 25 I wa bongiwe Nungungulu ha Jesu Kristu, a Hosi ya Hina! Hakuva, hi kupima ka mina, ndzi nandza ga nayo wa Nungungulu, kanilezvi hi nyama ya mina, ndzi khumbi ya nayo wa ciwonho.+

8 Hikwalaho, lava va nga zvin’we na Kristu Jesu a va koniwi. 2 Hakuva a nayo wa moya lowu wu nyikako wutomi ha Kristu Jesu wu ku tlhatlhisile+ ka nayo wa ciwonho ni wa kufa. 3 Lezvi a Nayo wu nga tsandzeka ku maha+ hi lezvi wu nga hi ni gome+ hi kota ya nyama, Nungungulu i zvi mahile hi ku rumela N’wana wakwe+ na a hi ka ciyimo co khwatsi ca nyama ya kuwonha+ kasi ku ta fuvisa ciwonho, hi ndlela leyo a kona ciwonho nyameni, 4 kasi a zvileletelo zvo lulama zva Nayo zvi fela ku tatiseka ka hina+ lava hi nga fambiko hi ka nyama kanilezvi hi ka moya.+ 5 Hakuva lava va hanyako hi ka nyama va veka kupima kabye ka zvilo zva nyama,+ kanilezvi lava va hanyako hi ka moya va veka kupima kabye ka zvilo zva moya.+ 6 Hakuva a ku veka kupima nyameni zvi wula kufa,+ kanilezvi a ku veka kupima moyeni zvi wula wutomi ni kurula;+ 7 hakuva a ku veka kupima nyameni wulala na Nungungulu,+ hakuva a nyama a yi ingisi a nayo wa Nungungulu, a yi zvi koti ne ni kutsongwani. 8 Hikwalaho, lava va hanyako hi ka nyama a va nge mu tsakisi Nungungulu.

9 Hambulezvo, n’wina a mu hanyi hi ka nyama, mu hanya hi ka moya+ loku a moya wa Nungungulu hakunene wu tshama ka n’wina. Kanilezvi loyi a nga hava moya wa Kristu, a hi wa Kristu. 10 Kanilezvi loku Kristu a hi zvin’we na n’wina,+ a miri wu file hi kota ya ciwonho, hambulezvo a moya wutomi hi kota ya kululama. 11 Makunu loku a moya wa loyi a nga vhuxa Jesu hi ka vafileko wu tshama ka n’wina, yena loyi a nga vhuxa Kristu Jesu hi ka vafileko+ i ta hanyisa kambe ni mimiri ya n’wina ya ku yafa+ hi moya wakwe lowu wu tshamako ka n’wina.

12 Makunu-ke, vamakabye, a ku na leci hi kurumetwako hi ka nyama, lezvaku hi hanya hi ka nyama;+ 13 hakuva loku mu hanya hi ka nyama, mu tafa futsi; kanilezvi loku mu daya a mitiro ya nyama+ hi moya, mu ta hanya.+ 14 Hakuva vontlhe lava va rangelwako hi moya wa Nungungulu hakunene i vana va Nungungulu.+ 15 Hakuva a mu amukelangi a moya wa wukhumbi lowu wu nga wa ta mu vangela kuchava kambe, kanilezvi mu amukele a moya wa ku mu amukela kota vana, ku nga moya walowu hi vitanako hi wona, hiku: “Abha,* Papayi!”+ 16 A moya ha woce wa kustumunya zvin’we ni moya wa hina+ lezvaku hi vana va Nungungulu.+ 17 Makunu loku hi hi vana, hi vagi va tshomba kambe — a vagi va tshomba va Nungungulu, kanilezvi na hi hi vagi va tshomba+ zvin’we na Kristu — loku hi xaniseka zvin’we naye,+ kasi hi fela ku kuliswa zvin’we naye.+

18 Hakuva ndzi alakanya ku a kuxaniseka ka cikhati leci a hi ka nchumu loku ku ringaniswa ni kungangamela loku ku to wonekeliswa ka hina.+ 19 Hakuva a zvivangwa zvi rindzela hi kuxuva ka hombe a kuwonekeliswa ka vana va Nungungulu.+ 20 Hakuva a zvivangwa zvi vekilwe ka ciyimo ci nga nyawuliko,+ na ku nga hi hi kurandza ka zvona, kanilezvi ka loyi a nga zvi veka, hi kota ya kutsumba 21 ka lezvaku a zvivangwa zvi ta tlhatlhiswa+ ka wukhumbi ga kubola, zviva ni kutlhatlheka ka kungangamela ka vana va Nungungulu. 22 Hakuva ha zvi tiva lezvaku a zvivangwa zvontlhe zva ha simama ku keta ni kuzwa kubayisa kala makunu. 23 Na ku nga hi lezvo basi, kanilezvi na hinawu, lava hi nga ni mihandzu yo ranga, ku nga moya, ha keta ndzeni ka hina+ na hi kari hi rindzela hi mahlo yo pswhuka a ku mahiwa vana,+ ku nga kutlhatlhiswa ka mimiri ya hina hi hakhelo ya kutlhatlhisa. 24 Hakuva hi hanyisilwe kutsumbeni loku; kanilezvi a ku tsumba zvilo lezvi u zvi wonako a hi kutsumba, hakuva a munhu a nga tsumbisa kuyini a cilo leci a ci wonako ke? 25 Kanilezvi loku hi tsumba+ lezvi hi nga zvi woniko,+ hi simama ku zvi rindzela hi mahlo yo pswhuka na hi timisela.+

26 Hizvalezvo, a moya wonawu wa hi vhunetela gomeni ga hina;+ hakuva ha tshuka hi nga zvi tivi ni zva ku zvi kombela mikhongelweni ya hina, kanilezvi a moya ha woce wa hi kombelela ka miketo yi nga wulekiko.* 27 Kanilezvi loyi a hlolako timbilu+ wa zvi tiva lezvi a moya wu zvi wulako, hakuva wu kombelela vobasa hi kuyelana ni kurandza ka Nungungulu.

28 Ha zvi tiva lezvaku Nungungulu i maha lezvaku a mitiro yakwe yontlhe yi tirisana kasi ku vhuneka lava va randzako Nungungulu, ku nga lava va vitanelweko kungo gakwe;+ 29 hakuva lava a nga ranga hi vona a va tiva, i rangile a maha makungo ya lezvaku va mahiwa hi mufananiso wa N’wana wakwe+ kasi ava matewula+ cikari ka vamakabye vo tala.+ 30 Makunu lava a nga va mahele makungo ya ku va hlawula,+ hi valava a nga va vitana;+ niku lava a nga va vitana, hi valava a nga va wula ku vanhu vo lulama.+ Hi kugumesa, lava a nga va wula ku vanhu vo lulama, hi valava a nga va tlakusa.+

31 Makunu hi ta wula yini hi zvilo lezvi ke? Loku Nungungulu a hi na hina, himani a to hi vhukela?+ 32 Kota lezvi a nga kala ku felela hambu a N’wana wakwe kanilezvi a mu nyikela hi kota ya hina hontlhe,+ ina a nga ta hi nyika hi kutlhatlheka a zvilo zvontlhe zvin’we naye ke? 33 Himani a to kecara a vahlawulilweko va Nungungulu?+ Nungungulu hi yena a va hlayelako kululama.+ 34 Himani a to va kona? Kristu Jesu hi yena a fileko, niku a ku hundza lezvo, hi yena a vhuxilweko, loyi a nga reveni ga cinene ga Nungungulu,+ ku nga yena kambe a hi yimelako.+

35 Himani a to hi hambanisa ni lirandzo la Kristu ke?+ Ku tava hlomulo, kutani kukarateka, kutani kuxanisiwa, kutani ndlala, kutani wuna, kutani mhango, kutani cipadha ke?+ 36 Khwatsi hi lezvi ku tsalilweko ku ngalo: “Hi kota ya wena ha dawa gontlhe siku; hi woniswa ku khwatsi hi tiyivhu ti yako kudaweni.”+ 37 Kanilezvi, ka zvontlhe lezvi, ha hlula ni ku hlula+ hi kota ya loyi a hi randzileko. 38 Hakuva ndza kholwa lezvaku hambu ku hi kufa, hambu wutomi, hambu tingilozi, hambu mifumo, hambu zvilo zvi nga kona, hambu zvilo zva ha tako, hambu mintamu,+ 39 hambu zvilo zva le hehla, hambu zvilo zva lomu kueteni, ne hambu cin’wani civangwa, zvi nga ta zvi kota ku hi hambanisa ni lirandzo la Nungungulu, leli li nga ka Kristu Jesu, a Hosi ya hina.

9 Ndzi wula lisine ka Kristu; a ndzi hembi, kota lezvi a livhalo la mina li kustumunyako zvin’we na mina ka moya wo basa, 2 lezvaku ndza karateka nguvhu ni kuzwa kubayisa ko kala ku nga mbheli mbilwini ya mina. 3 Hakuva ndzi wa ta vhumela ku kuva mina ndzi hambanisiwako na Kristu kota loyi a rukatelweko kasi ku vhuneka vamakabye va mina, a maxaka ya mina hi ka nyama, 4 ku nga vaIzrayeli. Hi vona va mahilweko vana,+ va nyikiwa kungangamela, ni zvivhumelwano,+ ni Nayo,+ ni ntiro wo basa,+ ni zvitsumbiso.+ 5 A vakokwani va lumba vona,+ na Kristu i humile hi kabye hi ka nyama.+ Nungungulu loyi a nga hehla ka zvontlhe i wa bongiwe kala kupindzuka. Amen.

6 Kanilezvi a hi ku khwatsi a mhaka ya Nungungulu yi no tsandzeka. Hakuva a hi vontlhe lava va humako ka Izrayeli, va nga “Izrayeli” wa lisine.+ 7 Ne a hi vontlhe va nga vana hi lezvi va humako ka pswalo* wa Abrahama;+ wutshan’wini ga lezvo: “Leci ci to wuliwa ku i pswalo* wa wena ci ta huma hi ka Isaka.”+ 8 Ku nga lezvaku, lava va nga vana hi ka nyama a hi vona lava hakunene va nga vana va Nungungulu,+ kanilezvi a vana va citsumbiso+ hi vona va wuliwako ku i pswalo.* 9 Hakuva a mhaka ya citsumbiso yi waku: “Ndzi ta wuya hi cikhati caleci, niku Sara i ta ngha a hi ni n’wana wa mufana.”+ 10 Lezvo a zvi mahekangi ka cikhati leco basi, kanilezvi zvi mahekile kambe a cikhati leci Rebheka a nga xura nyimba ya mahahla hi ka kokwani wa hina Isaka;+ 11 hakuva a vanana lavo na va nga se pswaliwa ne ku maha zvazvinene kutani zvakubiha, kasi a kungo ga Nungungulu xungetano hi kuhlawula gi fela ku simama ku nga khegeli ka mitiro, kanilezvi ka Loyi a vitanako, 12 Rebheka i no byeliwa ku: “Loyi wa nhondzo i tava nandza ga loyi wa ndzisana.”+ 13 A ku khwatsi hi lezvi ku tsalilweko ku ngalo: “Ndzi randzile Jakobe, kanilezvi ndzi venga Esawu.”+

14 Makunu hi ta wula yini ke? Ku kona a kungalulami ka Nungungulu ke? Kokwihi!+ 15 Hakuva i ngalo ka Mosi: “Ndzi ta mu mahela wuxinji loyi ndzi to mu mahela wuxinji, ndzi mu zwela wusiwana loyi ndzi to mu zwela wusiwana.”+ 16 Hikwalaho, a zviyi hi kurandza ka munhu kutani hi kutikarata kakwe,* kanilezvi zviya hi Nungungulu, loyi a nga ni wuxinji.+ 17 Hakuva a mutsalo wu ngalo ka Faro: “Kuve hi kota ya cigelo leci ndzi ku tsikileko u simama: Kasi ndzi fela ku kombisa ntamu wa mina hi laha ka wena ni lezvaku a vito ga mina gi kanelwa misaveni yontlhe.”+ 18 Hikwalaho, i na ni wuxinji ka ni wihi a mu lavako, kanilezvi i tsika ni wihi a mu lavako a ti nonohisa.+

19 Makunu u taku ka mina: “Hikuyini a ha kumako zvihoxo ka vanhu? Himani wa ku a nga vhalela a kurandza kakwe ke?” 20 Kanilezvi hi wena mani wo kala u kanetisana na Nungungulu?+ Ina a cibya leci ci wumbilweko ci nga byela muwumbi wa cona, ciku: “Hikuyini u nga ndzi wumbisa lezvi ke?”+ 21 Kasi a muwumbi a nga na ntamu hehla ka wumba,+ wa ku wumba hi wumba galegi ga gin’we a cibya ca ntiro wo dzundzeka, ni cin’wani ca ntiro wu nga dzundzekiko ke? 22 Makunu hi nga kuyini hi Nungungulu loyi wa ku hambu lezvi a nga lava ku kombisa zanga yakwe ni ntamu wakwe, i no timiselela a zvibya zva zanga hi lihlazva-mbilu la hombe hambu lezvi zvi nga ringana ku loviswa ke? 23 U ta kuyini wena loku ku hi lezvaku Nungungulu i mahile lezvo kasi ku kombisa wukulu ga kungangamela kakwe zvibyeni zva wuxinji,+ lezvi a nga zvi longisela wudhumo hi kale, 24 ku nga hina lava a hi vitanileko, na ku nga hi ka vaJudha voce, kanilezvi ni ka vamatiko+ kambe ke? 25 Lezvo hi lezvi a zvi wulako ni ka Hoseya, aku: “Lava va nga hiko vanhu va mina+ ndzi ta va vitana ku ‘vanhu va mina’ ni loyi a nga kala a nga randziwi, ndzi ta mu vitana ku ‘murandziwa’;+ 26 lomu va nga byelilwe ku ‘a mu vanhu va mina’, kwalaho va ta vitaniwa ku i ‘vana va Nungungulu a hanyako’.”+

27 Ahandle ka lezvo, Isaya yenawu i wula lezvi xungetano hi Izrayeli: “Hambu loku a ntsengo wa vana va Izrayeli wu ku khwatsi misava ya bimbi, misalela basi yi to ponisiwa.+ 28 Hakuva Jehovha* i ta lamula vanhu va hanyako misaveni, a tsema mhaka hi cihatla.”+ 29 A ku tsika lezvo, Isaya i phrofetile, aku: “Loku Jehovha* wa mabutho i wa nga hi siyelangi a pswalo,* na hi fanile ni Sodhoma hi tlhela hi fana ni Gomora.”+

30 Makunu hi ta wula yini ke? Hi ngalo a vanhu va matiko, hambu lezvi va nga kala va nga hloti a kululama,+ va ku kumile, ku nga kululama loku ku kumiwako hi kukholwa;+ 31 kanilezvi Izrayeli, hambu lezvi a nga hlota a nayo wa kululama, a nga wu kumangi. 32 Hikuyini? Hakuva va wa nga wu laveteli hi kukholwa, kanilezvi va wa wu lavetela hi mitiro. Va ti gumulile hi “ribye legi gi wisako”;+ 33 khwatsi hi lezvi ku tsalilweko ku ngalo: “Ndza veka a ribye+ ga cikhunguvanyiso le Ziyoni, ni ribye legi gi wisako; kanilezvi loyi a kholwako ka gona a nga tawa tingana.”+

10 Vamakabye, a kurandza ka mbilu ya mina ni leci ndzi ci kombelako ka Nungungulu hi lezvaku hakunene va ponisiwa.+ 2 Ndza va kustumunyela lezvaku va tirela Nungungulu hi kutitsitsirita,+ kanilezvi na ku nga hi hi wutivi ga lisine. 3 Hakuva lezvi va nga ku tiviko a kululama ka Nungungulu+ va ti yimisela kululama kabye,+ va ala ku ingisa a milayo yo lulama ya Nungungulu.+ 4 Hakuva Kristu hi yena magumo ya Nayo,+ kasi ni wihi a kombisako kukholwa a kuma kululama.+

5 Hakuva Mosi i tsala xungetano hi kululama loku ku tako hi ka Nayo, aku: “A munhu loyi a mahako zvilo lezvi, i ta hanya hi kota ya zvona.”+ 6 Kanilezvi a kululama loku ku tako hi kota ya kukholwa, ku ngalo: “U nga wuli mbilwini ya wena,+ uku: ‘Himani a to kandziha aya tilweni?’+ zvi wulako ku, kasi a ya chisa Kristu, 7 kutani ku: ‘Himani a to relela nkeleni wo eta wo kala magumo?’+ zvi wulako ku, kasi a ya humesa Kristu hi ka vafileko.” 8 Kasi a Mitsalo yi yini? Yi ngalo: “A mhaka yi kusuhani na wena, yi non’wini wa wena ni mbilwini ya wena”,+ ku nga “mhaka” ya kukholwa leyi hi kanelako. 9 Hakuva loku u vhumela hi nomu wa wena mahlweni ka vanhu lezvaku Jesu i Hosi,+ ni loku u kombisa kukholwa mbilwini ya wena lezvaku Nungungulu i mu vhuxile hi ka vafileko, u ta ponisiwa. 10 Hakuva hi mbilu, a munhu i kombisa kukholwa kasi a hlayelwa kululama, a vhumela hi nomu mahlweni ka vanhu kasi a hanyiswa.

11 Hakuva a mutsalo wu ngalo: “I hava a kholwako kakwe a towa tingana.”+ 12 Hakuva a ku na kuhambana cikari ka muJudha ni muGreki.+ A Hosi ya vona vontlhe yin’we, leyi yi nga ni zvilo zvo tala kasi ku nyika* vontlhe lava va khongelako ka yona. 13 Hakuva “ni wihi a khongelako vitweni ga Jehovha* i ta ponisiwa.”+ 14 Kanilezvi va ta khongelisa kuyini ka yena loyi va nga kholwangiko kakwe ke? Kona va ta kholwisa kuyini ka yena loyi va nga zwangiko nchumu ha yena ke? Va ta zvi zwisa kuyini na ku nga hi na loyi a chumayelako ke? 15 Kona va ta chumayelisa kuyini na va nga rumiwangi ke?+ A ku khwatsi hi lezvi ku tsalilweko ku ngalo: “A yi no kusaseka a mikondzo ya lava va kanelako a mahungu ya manene!”+

16 Hambulezvo, a hi vontlhe va nga ingisa mahungu ya manene. Hakuva Isaya i ngalo: “Jehovha,* himani a nga kholwa a zvilo lezvi a zvi zwileko ka hina?”*+ 17 Hikwalaho, a kukholwa kuta hi kuzwa.+ A mhaka leyi yi zwiwako, mahungu lawa ma wulawulako hi Kristu. 18 Kanilezvi ndza wutisa, ndziku: Va no kala ku zvizwa ke? Va zvi zwile, hakuva “a guwa gabye gi hangalakile misaveni yontlhe, ni mahungu yabye kala magemeta-musi ya misava.”+ 19 Ndza wutisa kambe, ndziku: A vaIzrayeli va no kala ku zvi tiva ke?+ A kuranga, Mosi i ngalo: “Ndzi ta mu vhuxela ciluse hi vanhu va ku ne a hi tiko; ndzi mu zangarisa hi tiko gi nga hiko na kupimisisa.”+ 20 Kanilezvi Isaya i xinyata, aku: “Ndzi no kumiwa hi lava va nga kala va nga ndzi laveteli;+ ndzi ti kombekisa ka lava va nga kala va nga wutiseli hi mina.”+ 21 Kanilezvi xungetano hi Izrayeli, i ngalo: “Gontlhe siku ndzi nawulutile a mandla ya mina ka vanhu va nga ingisiko ni va timbilu to nonoha.”+

11 Makunu ndza wutisa: Kasi Nungungulu i no ala a vanhu vakwe ke?+ Kokwihi! Hakuva minawu ndzi muIzrayeli, wa pswalo* wa Abrahama, lixakeni la Bhenjamini. 2 Nungungulu a nga alangi a vanhu vakwe lava a nga ranga hi vona a va tiva.+ Kasi a mu zvi tivi lezvi a mutsalo wu wulako xungetano hi Elija a cikhati leci a nga khongela ka Nungungulu a wuleta a vaIzrayeli ke? 3 I te ngalo: “Jehovha,* va dele a vaphrofeti va wena, va khungumulela ni maalati ya wena; ku no sala mina ndzoce, niku lezvi va hlota a wutomi* ga mina.”+ 4 Hambulezvo, zvini lezvi Nungungulu a nga mu hlamula? I te: “Ndzi ti siyele a 7000 wa vanhu lava a madzolo yabye ma nga kala ku khizamela Bhaali.”+ 5 Hizvalezvo, ni ka cikhati leci kambe, ku na ni misalela+ yi hlawulilweko hi tipswalo. 6 Kanilezvi loku zviya hi tipswalo+ a zva hayi hi mitiro,+ hakuva loku zvi hi lezvo, a tipswalo a ta ha hi tipswalo.

7 Makunu hi ta kuyini ke? Lezvi Izrayeli a zvi lavetelako hi kutitsitsirita a nga zvi kumangi, kanilezvi zvi kumilwe hi vahlawulilweko.+ Lava van’wani va ti nonohisile,+ 8 a ku khwatsi hi lezvi ku tsalilweko ku ngalo: “Nungungulu i va nyikile moya wa wurongo ga tshongotshongo,+ ni matihlo yo kala ma nga woni, ni tindleve ti nga ingisiko kala ni nyamutlha lezvi.”+ 9 Dhavhidha yenawu i ngalo: “Ngha a meza yabye yiva lizinga, ni ntlhamu, ni cikhunguvanyiso, ni tsayiselelo kabye. 10 A matihlo yabye ma wa phume kasi va nga woni, ni mihlanha yabye yi wa korame contlhe cikhati.”+

11 Makunu ndza wutisa: Kasi va no ti gumula va wela magumo ke? Kokwihi! Kanilezvi hi kota ya kuhambuka kabye, a vanhu va matiko va ponisiwa kasi a vaJudha vava ni ciluse.+ 12 Loku a kuhambuka kabye ku neha titshomba ka tiko, ni loku a kuhunguleka kabye ku neha titshomba ka vanhu va matiko,+ a ha ha wuli hi titshomba leti ti tova kona loku a ntsengo wabye wu enele!

13 Makunu lezvi ndzi wulawula na n’wina vanhu va matiko. Kota lezvi ndzi nga mupostoli wa matiko,+ ndza dzundza* a ntiro wa mina+ 14 na ndziku kuzvilava ndzi ta va vhuxela ciluse a va ka hina, ndzi ponisa vokari cikari kabye. 15 Hakuva loku a kuhoxiwa kabye+ ku vhululile ndlela ya lezvaku a tiko gi tlhela gi zwanana na Nungungulu, a kuamukelwa kabye ku tava yini ke, loku ku nga hi kuhanya ka lava va nga file? 16 A ku tsika lezvo, loku a cipandzana ca mapa ma vhuvilweko leci ci yimelako mihandzu yo sangula ci basile, a mapa wontlhe ma vhuvilweko wonawu ma basile; ni loku a mutsu wu basile, a madhavi wonawu ma basile.

17 Kanilezvi, loku a madhavi yo kari ma phatlulilwe, ku ya tekiwa wena u nga olivha wa khwati u ta tlhomekiwa cikari ka wona u ti buza hi kunona ka mutsu wa olivha, 18 u nga gwireli* madhavi lawa ma phatlulilweko. Loku u ma gwirela,*+ alakanya lezvaku a hi wena u nga rwala mutsu, kanilezvi a mutsu hi wona wu nga rwala wena. 19 Makunu u taku: “A madhavi ma phatlulilwe kasi ku tlhomekiwa mina.”+ 20 Zvona hi zvona! Ma phatlulilwe hi kota ya kungakholwi ka wona,+ kanilezvi wena u yimile hi kota ya kukholwa ka wena.+ U nga ti kukumukisi, kanilezvi chava. 21 Hakuva loku Nungungulu a nga tsikangi a madhavi lawa ma nga pswalelwa laho, wenawu a nga ta ku tsika. 22 Hikwalaho, chela kota hi wunene ga Nungungulu+ ni kutsayisa kakwe. I tsayisa lava va wileko,+ kanilezvi wena wa ku mahela wunene, saseka lezvaku u fanele ku simama wuneneni gakwe; loku u nga mahi lezvo, wenawu u ta tsemiwa. 23 Phela vonawu loku va tsika kungakholwi kabye va ta tlhomekiwa,+ hakuva Nungungulu i na ni ntamu wa ku tlhela a va tlhomeka. 24 Hakuva loku wena u tsemilwe ka olivha wa khwati u ta tlhomekiwa ka olivha wa lomu masin’wini, ku nga zvilo zvi hambeneko ni ntumbuluko, a ha ha wuli hi ku a madhavi lawa ma nga pswalelwa laho ma tlhela ma tlhomiwa ka olivha wa wona!

25 Hakuva a ndzi lavi ku mu kohlwa a cihundla leci co basa,+ vamakabye, kasi mu nga alakanyi ku mu tlharihile: A vaIzrayeli vo kari va ti nonohisile kala a ntsengo wontlhe wa vanhu va matiko wu nghena, 26 hi ndlela leyo, a vaIzrayeli vontlhe+ va ta ponisiwa. Hakuva ku tsalilwe ku ngalo: “Ku tata a mutlhatlhisi* hi le Ziyoni,+ a ta susa ka Jakobe a mitiro ya kungakholwi. 27 Leci ci tava civhumelwano ndzi to maha navo+ a cikhati leci ndzi to susa a zviwonho zvabye.”+ 28 Kunene, loku zvita ka mahungu ya manene, vona valala kasi n’wina mu vhuneka, kanilezvi loku zvita ka ku hlawuliwa hi Nungungulu, va randziwa hi kota ya vakokwani vabye.+ 29 Hakuva a zvinyikiwo ni kuvitana ka Nungungulu zvilo zva ku a nga ta ti laya hi zvona. 30 Hakuva a ku khwatsi hi lezvi a kale mu nga kala mu nga ingisi Nungungulu,+ kanilezvi zvezvi mu mahelwa wuxinji+ hi kota ya kungaingisi kabye,+ 31 hizvalezvo kambe na vonawu makunu a va ingisangi, kasi hi wuxinji legi gi mahelweko n’wina vonawu va fela ku mahelwa wuxinji. 32 Hakuva Nungungulu i nyikele vontlhe vava tikhumbi ta kungaingisi,+ kasi vontlhe a va mahela wuxinji.+

33 A ti no kueta a titshomba, ni wutlhari, ni wutivi ga Nungungulu! A kulamula kakwe a ku na ku pimiwa, ni tindlela takwe a ti na ku tiviwa hi munhu! 34 Hakuva “himani a ma tivako a maalakanyo ya Jehovha?* Kona himani a tshukileko a mu nyika wusungukati ke?”+ 35 “Himani a rangileko a mu nyika nchumu kasi Yena a fela ku mu tlhelisela ke?”+ 36 Hakuva a zvilo zvontlhe zvita hi ka yena, zvi mahilwe hi yena na zvi mahelwa yena. A wudzundzo a give ka yena kala kupindzuka. Amen.

12 Hikwalaho, ndza mu khongotela, vamakabye, hi wuxinji ga Nungungulu, lezvaku mu nyikela mimiri ya n’wina+ kota muphahlo wu hanyako, wo basa+ ni wu amukelekako ka Nungungulu, mu maha ntiro wo basa hi ntamu wa kupima ka n’wina.+ 2 Tsikani ku wumbiwa hi tiko legi,* kanilezvi hundzuluswani hi ku cica a kupima ka n’wina kuva kuswa,+ kasi mu tiva a kurandza ka Nungungulu,+ loku ka kunene, ku amukelekako, ni kumbheleleko.

3 Hakuva hi kota ya tipswalo leti ndzi nyikilweko, ndza byela a mun’we ni mun’wani wa n’wina lezvaku a nga ti alakanyeli ku hundza mpimo,+ kanilezvi a ehleketa hi ndlela yi kombisako ku i na ni kupima ku nene, hi kuya hi lipimo la kukholwa loku Nungungulu a mu nyikileko.*+ 4 Hakuva a ku khwatsi hi lezvi hi nga ni zviro zvo tala ka miri mun’we,+ ni lezvi a zviro lezvo zvi nga tiriko a ntiro walowu wa wun’we, 5 hi zvalezvo na hinawu, hambu lezvi hi nga tala, hi miri mun’we ka Kristu, kanilezvi a mun’we ni mun’wani wa hina ciro ka mun’wani.+ 6 Kota lezvi hi nga ni zvinyikiwo zvo hambana hi kuya hi tipswalo leti hi nyikilweko,+ loku ku hi kuphrofeta, a hi phrofeteni hi kuya hi lipimo la kukholwa ka hina; 7 loku wu hi ntiro, a hi simameni ntirweni lowu; loyi a gondzisako, i wa simame kugondziseni kakwe;+ 8 ni loyi a tiyisako* van’wani, i wa va tiyise;*+ loyi a avelako,* i wa mahe lezvo hi kutlhatlheka;*+ loyi a rangelako, i wa chele kota*+ ka zvona; ni loyi a mahelako van’wani wuxinji, i wa zvi mahe na a tsakile.+

9 A lirandzo la n’wina li ngavi la ku fayelisela.+ Vengani zvakubiha,+ mu namarela ka zvazvinene. 10 Randzanani hi lirandzo la wumakabye. Loyi ni loyi i wa range hi yena a mu nyika wudzundzo mun’wani.+ 11 Ti tsitsiriteni, mu nga lolohi.*+ Vhurani moyeni,+ mu tirela Jehovha* kota tikhumbi.+ 12 Tsakani kutsumbeni, mu timisela kuxanisekeni.+ Khongelani mu nga tsiki.+ 13 Nyikani vobasa lezvi va zvi vhumalako,+ mu randza ku amukela vapfhumba.+ 14 Simamani ku katekisa lava va mu xanisako;+ va katekiseni mu nga va rukateli.*+ 15 Tsakani ni lava va tsakako, mu rila ni lava va rilako. 16 Wonani van’wani kota lezvi mu ti wonisako zvona; mu nga veki kupima ka zvilo zvi tlakukileko, kanilezvi vekani kupima ka* zvilo zva nyalidede.+ Mu nga alakanyi ku mu tlharihile.+

17 Mu nga tlheliseli munhu kubiha hi kubiha.+ Chelani kota hi lezvi zvi nga zvinene kuwoneni* ka vanhu vontlhe. 18 Loku zvi maheka, ni loku n’wina mu zvi kota, hanyani hi kurula ni vanhu vontlhe.+ 19 Mu nga ti photeli varandzekako, zvi tsikeleni a zanga ya Nungungulu;+ hakuva ku tsalilwe ku ngalo: “‘A kuphota ka mina; hi mina ndzi to tlhelisela’, ku wula Jehovha.”*+ 20 Kanilezvi “loku a nala wa wena azwa ndlala, mu nyike ca kuga; loku azwa tora, mu nyike ca kunwa; hakuva hi ku maha lezvo, u ta wungeletela makhala ya ndzilo hlokweni yakwe”.*+ 21 Mu nga vhumeli ku hluliwa hi zvakubiha, kanilezvi simamani ku hlula zvakubiha hi zvazvinene.+

13 Ngha a vanhu* vontlhe va ti koramisa ka wuhosi,+ hakuva a ku na wuhosi gi nga kala ku yimisiwa hi Nungungulu;+ a wuhosi legi gi nga kona gi yimisilwe hi Nungungulu ka zvikhundla zva gona zvi pimilweko.+ 2 Hikwalaho, ni wihi loyi a vhukelako wuhosi ilwa ni lulamiselo ga Nungungulu; lava va gi vhukelako va ta ti nehela kulamulwa hehla kabye. 3 Hakuva a vafumeli a va chaviwi hi lava va mahako zvazvinene, kanilezvi va chaviwa hi lava va mahako zvakubiha.+ Wa zvi lava a kuva u nga chavi mufumo ke? Simama ku maha zvazvinene,+ wu ta ku dzundza; 4 hakuva a hosi i nandza ga Nungungulu gi yimiselweko ku ku mahela zvazvinene. Kanilezvi loku u maha zvakubiha chava, hakuva a hosi a yi khomi cipadha mahala. I nandza ga Nungungulu, a nga muphoteli kasi ku kombisa zanga* hehla ka loyi a mahako zvakubiha.

5 Hikwalaho, ku na ni cigelo ca hombe ca kuva mu ti koramisa, na ku nga hi hi kota ya zanga basi, kanilezvi hi kota ya livhalo la n’wina kambe.+ 6 Hi zvona zvi mu mahako mu hakhela mikhupo; hakuva vona malandza ya Nungungulu, ma ti tsitsiritako ntirweni lowu contlhe cikhati. 7 Nyikani vontlhe lezvi zvi va fanelako: a khupo ka loyi a londzako khupo;+ a ndzuvo* ka loyi a londzako ndzuvo; a kuchaviwa ka loyi a londzako ku kuchaviwa;+ a wudzundzo ka loyi a londzako a wudzundzo.+

8 Mu nga dhevhi nchumu ka munhu, ntsena lezvaku randzanani;+ hakuva ni wihi loyi a randzako munhu-kulobye i tatisa nayo.+ 9 Hakuva a nayo lowu waku: “U nga mahi wubhayi,+ u nga dayi,+ u nga yivi,+ u nga naveli”,+ kutani wun’wani nayo, yontlhe yi tlhanganisilwe ka magezu lawa, yaku: “Randza muakelani wa wena a ku fana ni lezvi u ti randzisako zvona.”+ 10 A lirandzo a li mahi kubiha ka muakelani;+ hikwalaho, a lirandzo ku tatisa nayo.+

11 Mahani a zvilo lezvi hakuva ma zvi tiva ku hi ka nguva muni, lezvaku makunu cikhati ca ku mu vhuka wurongweni,+ hakuva a kuponisiwa ka hina ku laha kusuhani a ku hundza cikhati leci hi nga sangula ku kholwa. 12 A wusiku gi hundzile cikari, ni siku gi tshinele. Hikwalaho, a hi tsikeni a mitiro ya munyama,+ hi hloma matlhari ya kuwonekela.+ 13 A hi fambeni ka zvazvinene,+ a ku khwatsi hi loku gi hi mumu, na ku nga hi ka mibuzo ya vhilinganya, ni wudhakwa, ni wubhayi, ni mahanyela ya tingana,*+ ni kuholovisana, ni ciluse.+ 14 Kanilezvi ambalani Hosi Jesu Kristu,+ mu nga ti maheli makungo ya ku xurisa kunavela ka nyama.+

14 Amukelani loyi a nga ni gome kukholweni kakwe,+ kanilezvi mu nga lamulani ka timhaka leti mu nga ni mawonela yo hambana. 2 A wokari i na ni kukholwa ku mu vhumelelako kuga zvilo zvontlhe, kanilezvi loyi a nga ni gome iga matsawu basi. 3 Ngha loyi a gako a nga chepeti loyi a nga giko; ni loyi a nga giko a nga lamuli loyi a gako,+ hakuva Nungungulu i mu amukele. 4 Hi wena mani wo kala u lamula a nandza ga mun’wani ke?+ Loku gi yima kutani kuwa,+ zvi tivana ni n’winyi wa gona. Kunene gi ta yima hakuva Jehovha* i na ni ntamu wa ku gi yimisa.

5 A munhu i wona siku go kari kota ga lisima ku hundza gin’wani;+ kuveni a mun’wani i wontlhe masiku ma fana.+ A mun’we ni mun’wani i wa tiyiseke hi kumbhelela maalakanyweni yakwe. 6 Loyi a hlayisako siku go kari i gi hlayisela Jehovha.* Ni loyi a gako i gela Jehovha* hakuva i bonga Nungungulu.+ Loyi a nga giko a ngagi hi kota ya Jehovha,* hambulezvo yenawu i bonga Nungungulu.+ 7 Kunene, i hava cikari ka hina a ti hanyelako wutsumbu gakwe,+ ne a nga kona a ti felako. 8 Hakuva loku hi hanya, hi hanyela Jehovha,*+ ni loku hifa, hi fela Jehovha.* Hikwalaho, kani ha hanya kani hafa hi lumba Jehovha.*+ 9 Kuve hi cigelo leco Kristu a ngafa a tlhela a hanya, kasi ava Hosi ya vafileko ni vahanyako.+

10 Makunu hikuyini u lamulako a makabye wa wena?+ Kona hikuyini u chepetako a makabye wa wena ke? Hakuva hontlheni hi ta yima mahlweni ka citshamu ca kulamula ca Nungungulu.+ 11 Hakuva ku tsalilwe ku ngalo: “‘A ku khwatsi hi lezvi ndzi hanyako’,+ ku wula Jehovha,* ‘a madzolo wontlhe ma ta ndzi khizamela, ni tirimi tontlhe ti ta vhumela Nungungulu kubaseni.”+ 12 Hikwalaho, a mun’we ni mun’wani wa hina i ta ti hlamulela mahlweni ka Nungungulu.+

13 Hikwalaho, hi nga ha lamulani,+ kanilezvi a hi ti yimiseleni ku nga veki cikhunguvanyiso mahlweni ka makabye kutani cilo ca ku mu wisa.+ 14 Ndza zvi tiva niku ndza kholwa ka Hosi Jesu lezvaku a ku na cilo ci nga hlazvekangiko cona ha coce;+ ntsena loku a wokari a alakanya lezvaku a cilo co kari a ci hlazvekangi, ka yena a ci hlazvekangi. 15 Hakuva loku a makabye wa wena a khunguvanyeka hi kota ya zvakuga, a wa ha fambi hi lirandzo.+ U nga mu hohloti* hi zvakuga zva wena loyi Kristu a nga mu fela.+ 16 Hikwalaho, mu nga tsiki a zvilo zva zvinene lezvi mu mahako va wulawula kubiha hi zvona. 17 Hakuva a Mufumo wa Nungungulu a hi kuga ni kunwa,+ kanilezvi kululama, ni kurula ni kutsaka hi moya wo basa. 18 Hakuva ni wihi a mu tirelisako lezvi Kristu, wa amukeleka ka Nungungulu niku wa tsakelwa hi vanhu.

19 Hikwalaho, a hi hloteni zvilo lezvi zvi vangako kurula+ ni lezvi zvi akako a mun’we ni mun’wani.+ 20 Tsikani ku hohlola a ntiro wa Nungungulu hi kota ya zvakuga.+ Kunene, a zvilo zvontlhe zvi hlazvekile, kanilezvi zvi bihile loku a munhu aga kasi lezvo zvi ta khunguvanyisa mun’wani.+ 21 I chukwana ku ngagi nyama ne kunwa vhinyo kutani ku nga mahi nchumu wu to khunguvanyisa makabye wa wena.+ 22 A kukholwa loku u nga nako ku hlayise mahlweni ka Nungungulu. Wa tsaka a munhu loyi a nga ti koniko hi lezvi a alakanyako ku zvi lulamile. 23 Kanilezvi loku aga na a kanakana, i sina a konekile, hakuva a ngagi hi kukholwa. Kunene, ni cihi leci ci nga seketelwiko ka kukholwa ciwonho.

15 Kanilezvi hina lava hi nga ni ntamu hi fanele ku rwala a gome ga lava va nga hiko na ntamu,+ hi nga ti tsakisi hina venyi.+ 2 A mun’we ni mun’wani wa hina i wa tsakise a muakelani wakwe kasi a vhuneka ni ku mu aka.+ 3 Hakuva hambu Kristu a nga ti tsakisangi,+ khwatsi hi lezvi ku tsalilweko ku ngalo: “A zviruko zva lava va ku rukatelako zvi wela mina.”+ 4 Hakuva a timhaka tontlhe ti tsalilweko kale ti tsalelwe ku gondzisa hina+ kasi hi kota ya kutimisela+ ni kuchavelela loku hi nyikiwako hi Mitsalo hiva ni kutsumba.+ 5 Makunu ngha a Nungungulu loyi a nyikako kutimisela ni kuchavelela a mu nyika a kupima ko fana ni loku Kristu Jesu a nga hi nako, 6 kasi hi wumun’we+ ni gezu* gin’we mu dhumisa Nungungulu tlhelo Papayi wa Hosi ya hina Jesu Kristu.

7 Hikwalaho, amukelanani,+ a ku khwatsi hi lezvi Kristu yenawu a mu amukeleko,+ kasi ku dhumiswa Nungungulu. 8 Hakuva ndza mu byela lezvaku Kristu i mahile nandza ga lava va mahilweko wukwera*+ kasi ku komba lezvaku Nungungulu i na ni lisine, ni ku tiyisa zvitsumbiso lezvi a zvi mahileko ka vakokwani vabye,+ 9 ni lezvaku a matiko ma fela ku dhumisa Nungungulu hi kota ya wuxinji gakwe,+ khwatsi hi lezvi ku tsalilweko ku ngalo: “Hi cigelo leco, ndzi ta ku dhumisa kubaseni cikari ka matiko, ndzi yimbelela tisimu ti dhumisako vito ga wena.”+ 10 Niku i engeta aku: “Tsakani, n’wina matiko, zvin’we ni vanhu vakwe.”+ 11 A tlhela aku: “Dhumisani Jehovha,* n’wentlhe n’wina matiko; ni vanhu vontlhe va wa dhumise yena.”+ 12 Isaya i tlhela aku: “Ku tava ni mutsu wa Jese,+ ku nga loyi a humako ku ta fumela matiko;+ ni matiko ma ta tsumba yena.”+ 13 Nungungulu loyi a nyikako kutsumba i wa mu tate hi kutsaka kontlhe ni kurula hi lezvi mu mu tsumbako, kasi mu fela ku tala mu halakela hi kutsumba loku mu ku kumako hi ntamu wa moya wo basa.+

14 Vamakabye va mina, ndza kholwa lezvaku n’winawu mu tele hi wunene, ni kutiva kontlhe, ni lezvaku ma zvi kota ku lulekana.* 15 Hambulezvo, ndzi mu tsalele ndzi mu alakanyisa kambe hi timhaka tin’wani na ndzi nga jikajiki, hi kota ya tipswalo leti ndzi kombisilweko hi Nungungulu 16 ta ku ndziva citiri ca Kristu Jesu ka matiko.+ Ndzi tira ntiro wo basa wa ku kanela mahungu ya manene ya Nungungulu,+ kasi a matiko lawa mava cinyikiwo co amukeleka ci basisilweko hi moya wo basa.

17 Hikwalaho, ndzi na ni cigelo ca ku tizwa matshandza ka Kristu Jesu hi kota ya ntiro wa mina ka Nungungulu. 18 Hakuva a ndzi tiyi ku wula zvin’wani zvilo ahandle ka lezvi Kristu a mahileko hi ku tirisa mina kasi a matiko ma fela ku ingisa, hi magezu ya mina ni mitiro, 19 ni ntamu wa zviwoniso ni zvihlamaliso,+ ni ntamu wa moya wa Nungungulu, kasi ndzi chumayela a mahungu ya manene hi kumbhelela xungetano hi Kristu,+ kusukela Jerusalema ni lomu matlhelweni ya kona kala Ilurikumi. 20 Kunene, hi ndlela leyi, ndzi no ti mahela makungo ya ku nga chumayeli a mahungu ya manene lomu a vito ga Kristu gi nga sina gi tiviwa, kasi ndzi nga aki hehla ka ciseketelo ca mun’wani munhu; 21 kanilezvi khwatsi hi lezvi ku tsalilweko ku: “Lava va nga kala ku byeliwa nchumu xungetano hi yena, va ta wona, ni lava va nga kala kuzwa, va ta zwisisa.”+

22 Lezvi kambe hi zvona zvi ndzi thindekisileko makhati yo tala a ku mu endzela. 23 Kanilezvi makunu a ndza ha hi na wutshamu gi kalako gi nga se chumayelwa ka zvipandze lezvi, niku ka hundza malembe yo tala* na ndzi xuva ku mu endzela. 24 Hikwalaho, ndza tsumba lezvaku ndzi ta hundza ndzi mu wona loku ndziya Espanya. Ndzi ta tshamanyana na n’wina hi wonana mu gumesa mu ndzi heleketanyana. 25 Kanilezvi zvezvi ndziya Jerusalema ndzi ya vhuna vobasa.+ 26 Hakuva a vamakabye va le Makedhoniya ni le Akaya, hi kuzvirandza, va hlengile zvilo zvabye kasi ku vhuna vobasa lava va vhumalako le Jerusalema.+ 27 Va mahile lezvo hi kuzvirandza, niku kunene va wa va dhevha; hakuva loku a vamatiko va avelwe a titshomba ta moya ta vobasa, a vamatiko vonawu va fanele ku vhuna vobasa hi zvilo zvabye zva nyama.+ 28 Hikwalaho, loku ndzi mbhetile ku maha lezvi ni ku va hendleleta a hlengo lowu, ndzi ta hundza hi seyo ka n’wina na ndziya Espanya. 29 A ku tsika lezvo, ndza zvi tiva lezvaku a cikhati leci ndzi tota ka n’wina, ndzi tata ni makatekwa yo tala ya Kristu.

30 Makunu, ndza mu khongotela vamakabye hi Hosi ya hina Jesu Kristu ni lirandzo la moya, lezvaku mu ti tsitsirita zvin’we na mina mikhongelweni ka Nungungulu hi kota ya mina,+ 31 kasi ndzi tlhatlhiswa+ ka vangakholwiko le Judhiya ni lezvaku a ntiro wa mina lowu ndzi mahelako Jerusalema wu amukeleka ka vobasa,+ 32 kasi loku Nungungulu a zvi randza, ndzi fela kuta ka n’wina na ndzi tsakile hi ta tiyisana. 33 Ngha Nungungulu loyi a nyikako kurula ava na n’wina n’wentlhe.+ Amen.

16 Ndza mu tsalela ha* Febhe, a makabye wa hina wa cisati, loyi a tirako bandleni ga Kenkreya,+ 2 lezvaku mu mu amukela Hosini hi ndlela yi faneleko vobasa, mu mu vhuna ka zvontlhe lezvi a to zvi lava,+ hakuva yenawu i vhunetele votala, a ku patsa na mina.

3 Rungulani Priska na Akwila,+ a vatiri-kulori ka Kristu Jesu, 4 lava va nga veka wutomi* gabye mhangweni hi kota ya mina.+ A hi mina ndzoce ndzi va bongako, ni mabandla wontlhe ya matiko ma va bonga. 5 Rungulani ni bandla legi gi nga laha mutini wabye.+ Mu rungula na Epenetusi loyi ndzi mu randzako, a nga mun’we wa mihandzu yo sangula ka Kristu le Azia. 6 Rungulani Mariya, loyi a mu tireleko nguvhu. 7 Rungulani Andronikusi na Juniyasi, a maxaka ya mina+ tlhelo zvibochwa-kulori, a vavanuna vo tiveka khwatsi cikari ka vapostoli, va nga va kale na va hi ka Kristu a ku hundza mina.

8 Rungulani Ampliyatusi, loyi ndzi mu randzako Hosini. 9 Mu rungula na Urbhanusi, loyi hi tirelako Kristu zvin’we naye, na Stakusi loyi ndzi mu randzako. 10 Rungulani Apelesi, loyi a amukelekako ka Kristu. Mu rungula ni va ka Aristubhulusi. 11 Rungulani Herodhiyoni a xaka ga mina. Mu rungula ni va ka Narkisusi lava va nga Hosini. 12 Rungulani Trifena na Trifoza, a vavasati va ti tsitsiritako Hosini. Rungulani na Persisi, loyi hi mu randzako hakuva wa ti tsitsirita Hosini. 13 Rungulani Rufusi, a nandza go hlawuleka Hosini, ni mamani wakwe, a nga mamani wa minawu. 14 Rungulani Asinkritusi, na Flegoni, na Hermesi, na Patrobhasi, na Hermasi, ni vamakabye lava va nga zvin’we navo. 15 Rungulani Filologusi, na Julia, na Nerewusi ni makabye wakwe, na Olimpasi, ni vobasa vontlhe va nga zvin’we navo. 16 Losanani hi kupswopswana ko basa. A mabandla wontlhe ya Kristu ma mu rungula.

17 Makunu ndza mu khongotela, vamakabye, lezvaku mu ti wonela ka lava va vangako kuhambana ni kuva zvikhunguvanyiso hi ku gondzisa zvo hambana ni lezvi mu zvi gondzileko; tsawukanani navo.+ 18 Hakuva a vanhu va tshamela lego a hi malandza ya Kristu, a Hosi ya hina, kanilezvi tikhumbi ta makhwiri yabye.* Va wulawula magezu yo xengetela ni magezu yo nandziha kasi ku kalavela lava vo matha. 19 A vanhu vontlhe va zvi wona lezvaku ma ingisa, hikwalaho ndza tsaka hi kota ya n’wina. Kanilezvi ndzi lava lezvaku muva vo tlhariha ka lezvi zva zvinene, kanilezvi muva vo matha ka lezvi zva kubiha.+ 20 Hakuva a Nungungulu loyi a nyikako kurula i ta gandla Sathani+ lahasi ka mikondzo ya n’wina zvezvanyana. A tipswalo ta Hosi ya hina Jesu a tive na n’wina.

21 Timote, loyi ndzi tirako naye, wa mu rungula, zvin’we na Lukiyusi, na Jasoni, na Sosipateri, a maxaka ya mina.+

22 Mina Tertiyusi, a matsalani wa papilo legi, ndza mu rungula Hosini.

23 Gayusi,+ loyi a nga amukela mina ni bandla gontlhe, wa mu rungula. Erastusi, a mukhomi wa mali ya dhoropa, wa mu rungula; ni makabye wakwe Kwartusi, yenawu wa mu rungula. 24 *——

25 Ka loyi a nga ni ntamu wa ku mu tiyisa hi mahungu ya manene lawa ndzi kanelako ni ku ma chumayela hi Jesu Kristu, xungetano hi kuvhululiwa ka cihundla co basa+ leci ci nga fihlilwe cima ka kale, 26 — kanilezvi leci makunu ci kombekisilweko ni ku tivekisiwa ka matiko wontlhe hi Mitsalo ya zviphrofeto, hi kulaya ka Nungungulu wa pindzukelwa kasi kuva ni kuingisa hi kukholwa — 27 ka Nungungulu loyi a nga yena yece a tlharihileko,+ a wudzundzo a giye ka yena ha Jesu Kristu kala kupindzuka. Amen.