PAPILO GA WUMBIRI GA PAWULE KA VA LE KORINTE

1 Pawule, a mupostoli wa Kristu Jesu hi kurandza ka Nungungulu, na Timote,+ a makabye wa hina, ka bandla ga Nungungulu gi nga le Korinte, zvin’we ni vobasa vontlhe va nga tikweni gontlhe ga Akaya:+

2 A tipswalo ni kurula zvi tako hi ka Nungungulu, a Papayi wa hina, ni ka Hosi Jesu Kristu, a zvive na n’wina.

3 I wa dhumiswe Nungungulu tlhelo Papayi wa Hosi ya hina Jesu Kristu,+ a Papayi wa wuxinji+ ni Nungungulu wa kuchavelela kontlhe,+ 4 loyi a hi chavelelako* kuxanisekeni* ka hina kontlhe,+ kasi hi zvi kota ku chavelela van’wani+ ka ni lihi lixaka la kuxaniseka* hi kuchavelelwa loku hi ku kumako ka Nungungulu.+ 5 Hakuva a ku khwatsi hi lezvi a kuxaniseka ka hina hi kota ya Kristu ku teleko,+ a kuchavelelwa loku hi ku kumako ka Kristu konawu ku tele. 6 Makunu loku hina hi xaniseka,* zvi mahela ku n’wina mu chavelelwa ni ku ponisiwa; ni loku hina hi chavelelwa, zvi mahela ku n’wina mu chavelelwa, ku nga kaloku ku mu vhunako a ku timisela a tixanisa taleti hinawu hi kumanako nato. 7 A kutsumba ka hina hi n’wina ku tiyile hakuva ha zvi tiva lezvaku a ku khwatsi hi lezvi mu nga vahlengeli ka kuxaniseka, mu tava vahlengeli kambe ka kuchavelelwa.+

8 Hakuva vamakabye, a hi lavi lezvaku mu nga tivi a kuxaniseka loku hi kumeneko nako le provhinsia ya Azia.+ Hi wa hi hlomulweni wa hombe nguvhu wo hundza ni ntamu wa hina, laha ka kuza hi nga ha tsumbi ku hi ta hanya.+ 9 Kunene, zvi wa ku khwatsi hi konelwe kufa. Lezvi zvi mahekile kasi hi nga ti tsumbi, kanilezvi hi tsumba Nungungulu+ loyi a vhuxako vafileko. 10 Mhangweni leyo ya hombe yi nga yisa kufeni, i hi tlhatlhisile niku i ta hi tlhatlhisa, ni kutsumba ka hina ku ka yena ka lezvaku i ta simama ku hi tlhatlhisa.+ 11 N’winawu mu nga hi vhuna hi mikhongelo ya n’wina ya ku khongotela hi kota ya hina,+ kasi a votala va fela ku bonga hi kota ya wuxinji legi hi mahelweko laha ku nga hlamuliwa a mikhongelo ya votala.*+

12 Hakuva ha ti dzundza hi cigelo leci: A livhalo la hina la hi kustumunyela lezvaku hi hanyile tikweni legi, nguvhunguvhu cikari ka n’wina, hi mahanyela ma basileko ni kutsumbeka ku tako hi ka Nungungulu, na ku nga hi hi wutlhari ga nyama,+ kanilezvi hi tipswalo ta Nungungulu. 13 Hakuva a hi mu tsaleli tin’wani timhaka ahandle ka leti mu to ti kota ku lera* ni ku ti zwisisa, niku ndza tsumba lezvaku ma ha ta simama ku zwisisa a zvilo lezvi hi kumbhelela,* 14 a ku khwatsi hi lezvi mu zvi zwisisileko kutsongwani lezvaku mu na ni cigelo ca ku tizwa matshandza hi kota ya hina, a ku fana ni lezvi hinawu hi to tizwa matshandza hi kota ya n’wina sikwini ga Hosi ya hina Jesu.

15 Hikwalaho, na ndzi hi ni kutsumba loku, ndzi no maha makungo ya ku sangula hi ku mu endzela kasi mu tsaka kambe hi khati ga wumbiri;* 16 hakuva ndzi wa lava ku hundza ndzi mu vhuxela na ndziya Makedhoniya, ni loku ndzi wuya hi Makedhoniya, kasi mu ndzi heleketanyana na ndziya Judhiya.+ 17 Xana a cikhati leci ndzi nga maha makungo lawo ndzi wo hlakana ke? Kutani ndzo xuva ku maha zvilo hi mawonela ya nyama ke, kasi ndziku: “Ina, hi zvona”, ndzi gumesa ndziku: “Ahihi, a hi zvona” ke? 18 Kanilezvi ndza tiyisa hi kutsumbeka ka Nungungulu lezvaku a timhaka leti hi nga mu byela, hiku: “Ina” a ti hundzukangi tiva “ahihi”. 19 Hakuva a N’wana wa Nungungulu, Jesu Kristu, loyi a nga kanelwa ka n’wina hi hina, ku nga mina, na Silvhanusi,* na Timote,+ a nga mahangi “ina” ni “ahihi”, kanilezvi a “ina” i nova “ina” laha kakwe. 20 Hakuva hambu loku a zvitsumbiso zva Nungungulu zvi no talisa kuyini, zvi mahile “ina” ha yena.+ Hikwalaho, hi wula ku “Amen” ka Nungungulu ha yena,+ niku lezvo zvi mu nehela wudzundzo ha hina. 21 Kanilezvi loyi a tiyisako lezvaku n’wina na hina hi va Kristu ni loyi a hi totileko hi Nungungulu.+ 22 I hi vekele cifungo cakwe+ kambe a tlhela a hi nyika citiyisekiso ca lezvi zva ha tako, ku nga moya,+ lomu timbilwini ta hina.

23 Makunu ndza vitana Nungungulu kota kustumunyu wa mina* wa lezvaku a ndzi seta Korinte hi kota ya ku mu tsetsa. 24 A hi lezvaku ho fumela kukholwa ka n’wina,+ kanilezvi hi zvitiri-kulori kasi n’wina mu tsaka, hakuva mu yimile hi kota ya kukholwa ka n’wina.

2 Hakuva ndzi tiyisile mbilwini ya mina lezvaku a lipfhumba la mina lo landzela ndzi tota ka n’wina li nga tava la kuxukuvala. 2 Hakuva loku ndzi mu xukuvalisa, himani a to ndzi tsakisa loku ku nga hi yaloyi ndzi nga mu xukuvalisa ke? 3 Ndzi tsalile lezvi ndzi nga tsala kasi loku ndzi chikela ndzi nga xukuvalisiwi hi lava va nga fanele ku ndzi tsakisa, hakuva ndza tsumba lezvaku lezvi zvi ndzi tsakisako, hi zvona zvi tsakisako na n’winawu n’wentlhe. 4 Hakuva ndzi no mu tsalela na ndzi xaniseka nguvhu ni ku bayiseka mbilwini ya mina zvin’we ni mihloti yo tala, na ndzi nga maheli ku mu xukuvalisa,+ kanilezvi kasi ku mu komba lezvaku ndza mu randza nguvhu.

5 Makunu loku a wokari a vangile kuxukuvala,+ a nga xukuvalisangi mina, kanilezvi i xukuvalisile n’wina n’wentlhe hi mpimo wo kari — a ndzi lavi ku tshingisa a mhaka leyi. 6 Lezvi a wanuna loye a nga kawukiwa hi votala zvi ringene. 7 Makunu mu fanele ku mu tsetselela ni ku mu chavelela+ kasi a nga reriwi* hi kubayiseka kakwe ka hombe.+ 8 Hikwalaho, ndza mu khongotela lezvaku mu tlhela mu mu komba ku ma mu randza.+ 9 Hi caleco kambe ci ndzi mahileko ndzi mu tsalela: Kasi ku wona lezvaku mu ta nyika zvikombiso zva ku ma ingisa zvilweni zvontlhe ke. 10 Loku mu tsetselela munhu ka cokari, minawu ndza mu tsetselela. Kunene, ni cihi leci ndzi nga tsetselela (loku ndzi tsetselele cokari) cive hi kota ya n’wina mahlweni ka Kristu, 11 kasi hi nga hluliwi* hi Sathani,+ hakuva ha ti tiva a tipulani* takwe.+

12 A cikhati leci ndzi nga chikela Trowasi+ kasi ku kanela mahungu ya manene xungetano hi Kristu, hambu lezvi ndzi nga vhululelwe nyangwa ntirweni wa Hosi, 13 a moya wa mina a wu rulangi hi lezvi ndzi nga vhumala Titusi,+ a makabye wa mina. Hikwalaho, ndzi no va salisa ndzi suka ndziya Makedhoniya.+

14 Kanilezvi i wa bongiwe Nungungulu loyi contlhe cikhati a hi rangelako kuhluleni na hi hi zvin’we na Kristu, loyi kambe a tirisako hina kasi ku hangalasa* a masema ya lezvaku va fela ku mu tiva matshan’wini wontlhe! 15 Hakuva ka Nungungulu, hina hi masema yo nuhela ya Kristu cikari ka lava va ponisiwako ni cikari ka lava va lovako; 16 ka lava vo gumesa, hi masema ya kufa ma yisako kufeni;+ ka lava vo ranga, hi masema ya wutomi ma yisako wutomini. Himani a ringanelwako hi zvilo lezvi? 17 Hi hina, hakuva hina a hi vaxavisi va fambafambako va mhaka ya Nungungulu,+ a ku khwatsi hi lezvi a votala va mahako, kanilezvi hi wulawula lisine kota lava hi rumilweko hi Nungungulu; hi maha lezvo mahlweni ka Nungungulu na hi hi zvin’we na Kristu.

3 Xana ho sangulisa a ku ti dzundza kambe ke? Kutani ho lava mapapilo, a ku fana ni van’wani vanhu, ya ku hi tlhamusela cikari ka n’wina kutani ma tako hi ka n’wina ke? 2 N’wina hi n’wina mu nga papilo ga hina,+ gi tsalilweko timbilwini ta hina, gi tiviwako ni ku leriwa hi vanhu vontlhe. 3 Hakuva zva dlunyateka lezvaku mu papilo ga Kristu gi tsalilweko hi hina lava hi nga malandza,+ na ku nga hi hi tinta, kanilezvi hi moya wa Nungungulu a hanyako; ne a gi tsaliwangi ka timbila ta maribye+ kanilezvi ka timbila ta nyama, lomu timbilwini.+

4 Hi na ni kutsumba loku ka Nungungulu ha Kristu. 5 Na ku nga hi lezvaku hina wutsumbu ho ringanelwa khwatsi hi ku wula nchumu lezvaku wuta hi ka hina wutsumbu, kanilezvi loyi a hi mahako hi ringanelwa khwatsi hi Nungungulu,+ 6 loyi a hi mahako hi ringanelwa khwatsi hi kuva malandza ya civhumelwano ciswa,+ na ci nga hi ca nayo wu tsalilweko,+ kanilezvi ca moya; hakuva a nayo wu tsalilweko wu yisa kufeni,+ kanilezvi a moya wa hanyisa.+

7 Loku ku hi lezvaku a nayo wu yisako kufeni, lowu wu nga kehlilwe maribyeni,+ wu tile ni kungangamela ka kuza a vana va ka Izrayeli va nga zvi koti ku cuwuka a nghohe ya Mosi hi kota ya kungangamela ka nghohe yakwe,+ kuveni a kungangamela loko ku wa ta fuviswa, 8 xana a ntiro wa moya+ wu wa nga tava ni kungangamela ka hombe nguvhu ke?+ 9 Hakuva loku ku hi lezvaku a nayo lowu wu yisako kukoniweni+ wu wa ngangamela,+ a ha ha wuli hi nayo lowu wu yisako kululameni!+ 10 Kunene, hambu leci a kale ci nga ngangamelisilwe ci tlhatlhelwe a kungangamela ka cona hi kota ya kungangamela loku ku ci hundzako.+ 11 Loku ku hi lezvaku leci ci nga lava ku fuviswa ci tile ni kungangamela, a ha ha wuli hi kukula ka kungangamela+ ka leci ci simamako!+

12 Kota lezvi hi nga ni kutsumba loko,+ hi wulawula hi kutiya, 13 na hi nga mahi lezvi Mosi a nga maha zva ku ti fenengeta nghohe yakwe+ hi vhewu* kasi a vana va ka Izrayeli va nga rwadameli a magumo ya lezvi zvi nga lava ku fuviswa. 14 Kanilezvi a maalakanyo yabye ma wa tlanyele.+ Hakuva kala ni nyamutlha lezvi, a vhewu leyi yi simama a ku nga fununguliwi loku ku leriwa a civhumelwano ca kale,+ hakuva yi susiwa ntsena ha Kristu.+ 15 Kunene kala ni nyamutlha lezvi, ni ka cihi cikhati leci Mosi a leriwako,+ a vhewu yi fenengeta a timbilu tabye.+ 16 Kanilezvi loku a munhu a tlhelela ka Jehovha,* a vhewu yo susiwa.+ 17 Jehovha* i Moya,+ niku laha ku nga ni moya wa Jehovha* ku na ni kutlhatlheka.+ 18 Makunu hina hontlhe, hi tinghohe ti nga kala ku fenengetiwa, hi kombisa a kungangamela ka Jehovha* a ku khwatsi hi mawoni.* Ha hundzuluswa hi fanana ni mufananiso lowo, hi ka kungangamela kun’we hiya ka kun’wani, a ku fana ni lezvi Jehovha,* loyi a nga Moya, a mahako.*+

4 Hikwalaho, kota lezvi hi nga ni ntiro lowu hi kota ya tipswalo leti hi kombisilweko, a hi rereki. 2 Kanilezvi hi tsikile a zvilo zva tingana, zvi mahiwako kufihlaleni, hi nga ha fambi hi mano ne hambu ku bihisa a mhaka ya Nungungulu;+ kanilezvi hi ku tivekisa lisine, ha ti dzundza ka livhalo la vanhu vontlhe mahlweni ka Nungungulu.+ 3 Kunene, a mahungu ya manene lawa hi kanelako ma fenengetilwe hi nguwo, ma fenengetilwe ka lava va lovako, 4 cikari ka vona lava a nungungulu wa tiko legi*+ a vhalileko a kupima ka lava va nga kholwiko,+ kasi a kuwonekela ka mahungu ya manene yo ngangamela ha Kristu, loyi a nga mufananiso wa Nungungulu,+ ku nga woningi hehla kabye.+ 5 Hakuva a hi chumayeli xungetano hi hina, kanilezvi xungetano hi Jesu Kristu kota Hosi, ni xungetano hi hina wutsumbu kota malandza ya n’wina hi kota ya Jesu. 6 Hakuva kuve Nungungulu a ngaku: “A kuwonekela ku wa woninge munyameni”,+ niku wa woninga timbilwini ta hina kasi ku ti woningela+ hi wutivi go ngangamela ga Nungungulu hi nghohe ya Kristu.

7 Kanilezvi, hi na ni tshomba leyi+ zvibyeni zva wumba,+ kasi a ntamu wa hombe wo hundza lowu wo toloveleka wuva wa Nungungulu, na wu nga hi wa hina.+ 8 Ha manyiwa hi tindlela tontlhe, kanilezvi a hi manyiwi laha ka kuza hi tsandzeka ni ku ti hundzulusa; ha jujeka kupima, kanilezvi a hizi hi vhumala ni co maha;+ 9 ha xanisiwa, kanilezvi a hi tsikiwi hoce;+ ha wisiwa, kanilezvi a hi lovisiwi.+ 10 Contlhe cikhati ha timisela mirini wa hina a kuxaniseka ku yisako kufeni loku Jesu a nga xanisiwa hi kona,+ kasi a wutomi ga Jesu gi fela ku wonekeliswa kambe ni mirini wa hina. 11 Hakuva hina hi hanyako, contlhe cikhati ha kumana ni kufa+ hi kota ya Jesu, kasi a wutomi ga Jesu gi fela ku wonekeliswa kambe nyameni ya hina leyi yi fako. 12 Hikwalaho, a kufa ku tira ka hina, kanilezvi a wutomi gi tira ka n’wina.

13 Hakuva khwatsi hi lezvi hi nga ni moya wa kukholwa lowu ku tsalilweko ha wona ku ngalo: “Ndzi kombisile kukholwa, hikwalaho ndzi wulawulile”,+ hinawu ha kombisa kukholwa, hikwalaho ha wulawula, 14 na hi tiva lezvaku Loyi a vhuxileko Jesu i ta vhuxa na hinawu zvin’we na Jesu, a hi hendleleta zvin’we na n’wina.+ 15 Hakuva a zvilo lezvi zvontlhe zvi maheka hi kota ya n’wina, kasi a tipswalo ta Nungungulu ti fela ku andza nguvhu hakuva a votala nguvhu va bonga kasi ku dhumiswa Nungungulu.+

16 Hikwalaho, a hi rereki, hambu loku a munhu wa hina wa lahandle a hlakala, hakunene a munhu wa hina wa lomu ndzeni i mahiwa muswa siku ni siku. 17 Hakuva hambu lezvi a kuxaniseka* ku nga ka cikhatana ni lezvi ku vevukako, ku hi pswalela kungangamela ka hombe nguvhu ko kala ku nga hi na kuringaniswa ni ka pindzukelwa;+ 18 na hi nga veki matihlo ya hina ka zvilo zvi wonekako, kanilezvi ka zvilo zvi nga wonekiko.+ Hakuva a zvilo zvi wonekako zva cikhatana, kanilezvi a zvilo zvi nga wonekiko zva kala kupindzuka.

5 Hakuva ha zvi tiva lezvaku loku a yindlu ya hina ya laha misaveni, ku nga tenda legi, yi hahluliwa,+ hi tava ni yindlu hi ka Nungungulu, a yindlu ya pindzukelwa le tilweni, yi nga akiwangiko hi mandla ya vanhu.+ 2 Hakuva ka yindlu leyi, hakunene ha keta, na hi xuva nguvhu a ku ambala leyi ya hina, ya le tilweni,+ 3 kasi loku hi yi ambalile, hi nga kumiwi na hi hi zvimbyiri. 4 Kunene, hina lava hi nga ka tenda legi ha keta ni ku bindziwa, hakuva a hi zvi lavi ku gi tlhatlha, kanilezvi hi lava ku ambala legi gin’wani+ kasi leci ci fako ci fela ku mitiwa hi wutomi.+ 5 Loyi a nga hi longiselela a cilo leci hi Nungungulu,+ loyi a hi nyikileko a moya kota citiyisekiso ca lezvi zva ha tako.+

6 Hikwalaho, ha tiya hlanha contlhe cikhati na hi tiva lezvaku loku ha ha hi ni muti wa hina mirini, hi le kule ni Hosi,+ 7 hakuva hi famba hi kukholwa, na ku nga hi hi kuwona. 8 Kanilezvi hi tiyile hlanha niku ha xuva ku tsawukana ni miri hi ya hanya ni Hosi.+ 9 Hikwalaho, kani hi hanya nayo, kutani hi le kule nayo, hi maha zvontlhe kasi hi amukeleka kakwe. 10 Hakuva hontlheni hi ta yima* mahlweni ka citshamu ca kulamula ca Kristu, kasi a mun’we ni mun’wani a amukela a hakhelo yi ringanako lezvi a zvi mahileko na a ha hi mirini, kani zva zvinene kutani zvakubiha.+

11 Hikwalaho, kota lezvi hi ku tivako a kuchava Hosi, ha simama ku kholwisa vanhu, kanilezvi hina ha tiviwa khwatsi hi Nungungulu. Hambulezvo, ndzi xuva lezvaku a tivhalo ta n’winawu ti hi tiva khwatsi. 12 A hi lezvaku ho tlhela hi ti dzundza cikari ka n’wina kanilezvi ha mu kuca lezvaku mu ti dzundza hi hina, kasi mu zvi kota ku hlamula lava va ti dzundzako hi lezvi va wonekisako zvona hi lahandle+ na ku nga hi lezvi zvi nga lomu mbilwini. 13 Hakuva loku hi hlanyile,+ hi hlanyele Nungungulu; loku hi hi ni kupima ku nene, hi nako hi kota ya n’wina. 14 Hakuva a lirandzo la Kristu la hi susumeta, hakuva hi chikelele magumo yaku: A munhu mun’we i no fela vontlhe,+ hikwalaho vontlhe va wa file. 15 I no fela vontlhe kasi lava va hanyako va nga ha ti hanyeli,+ kanilezvi va hanyela loyi a nga va fela a tlhela a vhuxiwa.

16 Hikwalaho, kusukela lezvi, a ha ha tivi munhu hi ka nyama.+ Hambu loku hi tshukile hi tiva Kristu hi ka nyama, hakunene a ha ha mu tivisi lezvo.+ 17 Hikwalaho, loku a munhu a hi zvin’we na Kristu, yaloye civangwa ciswa;+ a zvilo zva kale zvi hundzile; makunu ku na ni lezvi zva zviswa! 18 Kanilezvi a zvilo zvontlhe zvita hi ka Nungungulu, loyi a hi mahileko hi vhuxeta a kuzwanana ka hina zvin’we naye ha Kristu,+ a tlhela a hi nyika ntiro wa kuzwananisa,+ 19 ku nga lezvaku Nungungulu i wo vhuxeta kuzwanana kakwe ni tiko hi ku tirisa Kristu,+ a nga ha va hlayeli zviwonho zvabye,+ niku i hi nyikile a mahungu ya kuzwananisa.+

20 Hikwalaho, hina hi vaembaxadhori+ va vhaletako Kristu,+ a ku khwatsi hi loku Nungungulu o khongotela vanhu hi ku tirisa hina. Kota vavhaleti va Kristu, ha khongotela, hiku: “Tlhelani mu zwanana na Nungungulu.” 21 Loyi a nga kala ku ci tiva ciwonho,+ i nova ciwonho* hi kota ya hina, kasi hi kota ya yena, hiva kululama ka Nungungulu.+

6 Kota lezvi hi tirisanako naye,+ ha mu khongotela kambe lezvaku mu nga amukeli a tipswalo ta Nungungulu mahala.+ 2 Hakuva i ngalo: “Ndzi ku zwile cikhatini ci amukelekako, ndzi ku vhuna sikwini ga kuhanyisa.”+ Makunu leci hi cona cikhati ci amukelekako khwatsi. Hakunene legi i siku ga kuhanyisa.

3 A hi khunguvanyisi munhu hi nchumu kasi a ntiro wa hina wu nga soliwi;+ 4 kanilezvi hi tindlela tontlhe, hi komba lezvaku hi malandza ya Nungungulu,+ hi ku timisela ka mindzhingo yo tala, ni ka tixanisa, ni ka zvikhati zva kuvhumala, ni ka zvikarato,+ 5 ni kubiweni, ni mapaxweni,+ ni ka mawoyonga, ni ka ku tira yi nga chayi, ni ka masiku ya ku tsandzeka ni ku etlela, ni ka zvikhati zva ndlala;+ 6 hi kuhlazveka, ni wutivi, ni lihlazva-mbilu,+ ni kusasa,+ ni moya wo basa, ni lirandzo li nga hiko lo fayelisela,+ 7 hi magezu ya lisine, ni ntamu wa Nungungulu;+ hi matlhari ya kululama+ canjeni ga cinene* ni ga cibhabha,* 8 hi wudzundzo ni kuchepetiwa, hi ku wulawuliwa kubiha ni ku wulawuliwa zvazvinene. Hi wonisiwa ku khwatsi hi vakanganyisi, kasi lezvo hi vanhu vo tsumbeka, 9 hi wonisiwa ku khwatsi a hi tiviwi, kasi lezvo ha tiviwa, hi khwatsi hofa* kasi lezvo ha hanya,+ hi khwatsi ho tsayisiwa kanilezvi a hi dawi,+ 10 hi khwatsi hi kwatile kuveni hi tshama na hi tsakile, hi khwatsi hi zvisiwana kanilezvi hi ganyisa votala, hi khwatsi a hi na nchumu kasi lezvo hi na ni zvilo zvontlhe.+

11 Hi vhululile a nomu wa hina kasi ku wulawula* na n’wina vaKorinte, niku hi mu vhululele a mbilu ya hina hi kumbhelela. 12 A hi felelangi a lirandzo* la hina ka n’wina,+ kanilezvi n’wina ma felela a lirandzo la n’wina ka hina. 13 Makunu kasi mu hi tlhelisela — ndzi wulawula na n’wina kota vana va mina — n’winawu vhululani timbilu ta n’wina hi kumbhelela.+

14 Mu nga bohiwi kanga mun’we ni vangakholwiko.+ Hakuva kuzwanana muni ku nga kona cikari ka kululama ni kuhambunyeta nayo ke?+ Kutani kuhlengela muni ku nga kona cikari ka kuwonekela ni munyama ke?+ 15 Ahandle ka lezvo, kuzwanana muni ku nga kona cikari ka Kristu na Bheliyali* ke?+ Kuhlengela muni a nga nako loyi a kholwako* ni loyi a nga kholwiko ke?+ 16 Kubohana muni loku a tempeli ya Nungungulu yi nga nako ni zvifananiso ke?+ Hakuva hina hi tempeli ya Nungungulu a hanyako,+ a ku khwatsi hi lezvi Nungungulu a wulileko, aku: “Ndzi ta tshama cikari kabye,+ ndzi fambafamba cikari kabye, niku ndzi tava Nungungulu wabye, vona vava vanhu va mina.”+ 17 “‘Hikwalaho, humani cikari kabye, mu ti hambanisa navo’, ku wula Jehovha,* ‘tsikani ku henya cilo co kala kuhlazveka”;+ “‘ndzi ta mu amukela’”.+ 18 “‘Ndzi tava papayi wa n’wina,+ n’wina muva vafana ni vanhanyana va mina’,+ ku wula Jehovha* wa Ntamu Wontlhe.”

7 Hikwalaho, varandzekako, kota lezvi hi nga ni zvitsumbiso lezvi,+ a hi ti hlazveni kunyenyezeni kontlhe ka nyama ni ka moya,+ hi mbhelelisa a kubasa kuchaveni Nungungulu.

2 Hi vhululeleni wutshamu timbilwini ta n’wina.+ A hi gohelangi munhu, a hi bihisangi munhu, ne a hi xololangi munhu.+ 3 A ndzi wuli lezvo kasi ku mu kona. Hakuva ndzi sina ndzi wulile lezvaku mu lomu timbilwini ta hina, kasi hifa zvin’we ni ku hanya zvin’we. 4 Ndzi wulawula na n’wina hi kutiya ka hombe. Ndza ti dzundza nguvhu hi n’wina. Ndzi chavelelwe hi kumbhelela; ndzo halakela hi kutsaka kukaratekeni ka hina kontlhe.+

5 Kunene, a cikhati leci hi nga chikela Makedhoniya,+ a nyama ya hina a yi rulangi, kanilezvi hi no simama ku xaniseka hi tindlela tontlhe — ku wa hi ni kulwa hi lahandle, ni kuchava hi lomu ndzeni. 6 Kanilezvi Nungungulu loyi a chavelelako lava va tshovekileko timbilu,+ i no hi chavelela hi kuvakona ka Titusi, 7 na ku nga hi hi kuvakona kakwe basi, kanilezvi i hi chavelele kambe hi kuchavelela loku a ku kumileko hi kota ya n’wina, hakuva i no hi byela lezvaku ma zvi xuva nguvhu ku ndzi wona, a hi byela kambe hi kurila ka n’wina ni kukarateka ka n’wina ka hombe* hi mina; hikwalaho, ndzi no engetela ku tsaka.

8 Hakuva hambu loku ndzi mu xukuvalisile hi papilo ga mina,+ a ndzi ti layi. Hambu loku ndzi ti layile kusanguleni (hakuva ndza zvi wona lezvaku a papilo gi mu xukuvalisile, hambu lezvi zvi ngava zva cikhatana), 9 zvezvi ndza tsaka, na ku nga hi hi lezvi ntsena mu nga xukuvala, kanilezvi hi lezvi a kuxukuvala ka n’wina ku nga mu maha mu ti sola. Hakuva mu no xukuvala hi ndlela yi tsakisako Nungungulu, hikwalaho a mu lahlekelwangi hi nchumu hi kota ya hina. 10 Hakuva a kuxukuvala loku ku tsakisako Nungungulu ku pswala a kutisola ku yisako kuhanyisweni, loku a munhu a nga ti layiko hi kona;+ kanilezvi a kuxukuvala ka tiko ku pswala kufa. 11 Hi nga wonani a kupinyama loku a kuxukuvala ka n’wina hi ndlela yi tsakisako Nungungulu ku nga pswala ka n’wina: Mu no ti basisa, mu swireka, muva ni kuchava, muva ni kuxuva ka hombe, ni kupinyama, mu tlhela mu lulamisa cigoho!+ Mu no kombisa hi tindlela tontlhe lezvaku mu basile* mhakeni leyi. 12 Hambu lezvi ndzi nga mu tsalela, a ndzi mahangi lezvo hi kota ya loyi a nga goha,+ ne hambu hi kota ya loyi a nga gohelwa, kanilezvi ndzi mu tsalele kasi ku a kupinyama ka n’wina hi hina ku fela ku woneka cikari ka n’wina mahlweni ka Nungungulu. 13 Hi cigelo leco, hi no chavelelwa.

Kanilezvi, ahandle ka kuchavelelwa loko, hi no tsaka nguvhu kambe hi kota ya kutsaka ka Titusi, hakuva n’wina n’wentlhe mu tangalisile a moya wakwe. 14 Hakuva loku ndzi ti dzundzile mahlweni kakwe ha n’wina, a ndzi wisiwangi tingana; kanilezvi a ku khwatsi hi lezvi a zvilo zvontlhe hi mu byelileko zvi nga lisine, hi zvalezvo kambe ni ku ti dzundza ka hina ka Titusi, konawu lisine. 15 Ahandle ka lezvo, a lirandzo lakwe hi n’wina la kula nguvhu laha a alakanyako a kuingisa ka n’wina n’wentlhe,+ lezvi mu nga mu amukelisa zvona hi kuchava ni kururumela. 16 Ndza tsaka hakuva ndzi nga mu tsumba* zvilweni zvontlhe.

8 Makunu vamakabye, hi lava lezvaku mu tiva a tipswalo ta Nungungulu leti ti nyikilweko a mabandla ya le Makedhoniya.+ 2 Hambu lezvi va nga hi hlomulweni wa ciringo ca hombe, a litsako labye la hombe ni wusiwana gabye gi tshingileko zvi andzisile* a titshomba ta kuhana kabye. 3 Hakuva va mahile lezvi zvi nga hi ntan’wini wabye,+ ina, ndza va kustumunyela lezvaku va mahile ni zvo hundza a ntamu wabye,+ 4 na va simama ku hi khongotela nguvhu, hi kuzvirandza kabye, lezvaku vonawu vava ni thomo ga ku nyika hi matsenya, kasi va hlengela ntirweni wa ku vhunetela vobasa.+ 5 Na ku nga hi ntsena lezvi hi nga zvi rindzele, kanilezvi a kuranga va no ti nyikela ka Hosi ni ka hinawu hi kurandza ka Nungungulu. 6 Hikwalaho, hi no kuca Titusi+ lezvaku a mbhetisa ku hlengisa a cinyikiwo ca n’wina ca cinene, kota lezvi ku nga yena a nga sangula a ntiro lowu cikari ka n’wina. 7 Hambulezvo, a ku khwatsi hi lezvi mu andzileko zvilweni zvontlhe — hi kukholwa, hi kuwulawula, hi kutiva, hi kutitsitsirita kontlhe, ni ka lirandzo la hina hi n’wina — ngha mu andza kambe ni ka cinyikiwo leci ca cinene.+

8 A ndzi wuli lezvi kasi ku mu laya, kanilezvi kasi mu tiva a kupinyama ka van’wani ni ku ringa a kutiya ka lirandzo la n’wina. 9 Hakuva ma ti tiva a tipswalo ta Hosi ya hina Jesu Kristu, lezvaku hambu lezvi a nga ganyile, i no maha cisiwana hi kota ya n’wina,+ kasi n’wina mu fela ku ganya hi wusiwana gakwe.

10 Mhakeni leyi, ndza nyika a mawonela ya mina:+ Zvi fela ku vhuna n’wina, hakuva hi wona lezvaku ku hundza lembe na mu sangulile a ntiro niku a mu sangulangi ntsena kanilezvi mu kombile kambe lezvaku ma xuva ku wu maha. 11 Makunu, mbhetisani lezvi mu nga zvi sangula, kasi a kulonga ka n’wina ka ku maha, ku mbheleliswa hi kuya hi lezvi mu nga nazvo. 12 Hakuva loku a munhu a longile, a cinyikiwo ca amukeleka nguvhu hi kuya hi lezvi a munhu a nga nazvo,+ na ku nga hi lezvi a nga hava. 13 Hakuva a ndzi lavi ku vevukisela van’wani, kanilezvi ndzi bindzisela n’wina; 14 kanilezvi ku fela kuva ni kuringana, kasi lezvi zvi mu taleleko ka cikhati leci zvi fela ku va vhuna kuvhumaleni kabye, ni lezvi vonawu zvi va taleleko zvi fela ku mu vhuna laha mu kiyelelwako kona, kasi kuva ni kuringana. 15 A ku khwatsi hi lezvi ku tsalilweko ku ngalo: “Loyi a nga hi ni zvotala a nga vangi ni zvotala nguvhu, ni loyi a nga hi ni zva zvitsongwani a nga vangi ni zva zvitsongwani nguvhu.”+

16 I wa bongiwe Nungungulu loyi a nyikileko Titusi a mbilu ya ku mu karatekela yo fana ni leyi hinawu hi nga nayo hi n’wina,+ 17 hakuva a nga no vhumela ntsena a kukuca ka hina, kanilezvi kota lezvi a zvi xuvako nguvhu, wata ka n’wina hi kurandza kakwe. 18 Kanilezvi ha mu rumela zvin’we ni makabye loyi a dzundziwako mabandleni wontlhe hi kota ya ntiro wakwe ka mahungu ya manene. 19 Na ku nga hi lezvo ntsena, kanilezvi i yimisilwe kambe hi mabandla lezvaku a fambafamba na hina hi hlayisa a cinyikiwo leci ca cinene kasi ku dhumiswa Hosi ni ku komba lezvaku hi longile a ku vhunetela. 20 Hikwalaho, hi maha lezvaku ku ngavi ni munhu wa ku hi sola ka hlengo lowu wa kuhana hi wu hlayisako.+ 21 Hakuva ‘hi maha zvontlhe hi kutsumbeka, na ku nga hi mahlweni ka Jehovha* yece, kanilezvi ni mahlweni ka vanhu kambe’.+

22 Ahandle ka lezvo, hi va rumela ni makabye wa hina, loyi hi mu hlolileko makhati yo tala hi wona lezvaku munhu wa zvigingi timhakeni to tala, kanilezvi ka cikhati leci, i na ni zvigingi nguvhu hi kota ya lezvi a nga ni kutsumba ka hombe hi n’wina. 23 Loku ku hi ni kukanakana ko kari xungetano hi Titusi, yena munghana wa mina ni citiri-kulori kasi ku vhuna n’wina. Loku ku hi ni kukanakana xungetano hi vamakabye va hina, vona vapostoli va mabandla ni wudzundzo ga Kristu. 24 Hikwalaho, kombani zviku dlunya lezvaku ma va randza,+ mu tlhela mu komba mabandla lezvi zvi hi mahako hi ti dzundza hi n’wina.

9 Makunu, xungetano hi ntiro wa ku vhunetela vobasa,+ a zvizi zvi lava ku ndzi mu tsalela, 2 hakuva ndza ku tiva a kuxuva ka n’wina loku ndzi ti dzundzako hi kona ka va le Makedhoniya, ndziku makunu ka hundza lembe a va le Akaya na va longile, niku a kutitsitsirita ka n’wina ku hlanganyetile votala cikari kambe. 3 Kanilezvi ndza rumela vamakabye kasi a kutidzundza ka hina hi n’wina mhakeni leyi ku ngavi ka mahala, ni lezvaku mu longa hakunene, kota lezvi ndzi wulileko lezvaku mu tava mu longile. 4 Ku nga taku loku a va le Makedhoniya vata na mina hi ta mu kuma na mu nga longangi, hina — loku hi nga lavi ku wula ku n’wina — hiwa tingana hi lezvi hi mu tsumbileko. 5 Hikwalaho, ndzi zvi wonile na zvi laveka a ku kuca a vamakabye lezvaku va ranga vata ka n’wina, na ka ha hi ni cikhati, va ta longisela a cinyikiwo ca n’wina ca kuhana leci mu ci tsumbisileko, kasi ci tshama na ci longile kota cinyikiwo mu ci nyikelako hi matsenya, na ku nga hi hi ku kurumetiwa.

6 Kanilezvi xungetano hi mhaka leyi, loyi a byalako kutsongwani i ta tshovela zvi tsongwani, ni loyi a byalako nguvhu i ta tshovela zvotala.+ 7 A mun’we ni mun’wani i wa nyike lezvi a bohileko mbilwini yakwe, na a nga nguranguri* kutani ku kurumetiwa,+ hakuva Nungungulu i randza loyi a nyikako na a tsakile.+

8 Ahandle ka lezvo, Nungungulu wa zvi kota ku mu andzisela tipswalo takwe tontlhe kasi contlhe cikhati mu nga kiyelelwi hi nchumu zvilweni zvontlhe, mu tlhela muva ni zvotala ntirweni wontlhe wa wunene.+ 9 (Kota lezvi ku tsalilweko ku: “I avela na a nga feleli;* wa nyika zvisiwana. A kululama kakwe ku simama kala kupindzuka.”+ 10 Loyi a nyikako mbewu ka mubyali na a nga feleli, ni zvakuga ka mugi, i ta mu nyika a tlhela a andzisa a mbewu leyi mu to byala, a andzisa ni pfuno wa n’wina wa kululama.) 11 Zvilweni zvontlhe ma ganyiswa kasi mu hana hi tindlela tontlhe, lezvi zvi pswalako a magezu ya ku bonga Nungungulu ha hina; 12 hakuva a ntiro lowu wa kuvhunetela a wu vhuni ntsena hi kufaneleko a vobasa kuvhumaleni kabye,+ kanilezvi wu tlhela wu andzisa a magezu ya ku bonga Nungungulu. 13 Va dhumisa Nungungulu hakuva a ntiro lowu wa kuvhunetela wu komba lezvaku ma ti koramisa ka mahungu ya manene xungetano hi Kristu, lawa mu kaneleko kubaseni, ni lezvaku ma hana ka hlengo lowu mu mahelako vona ni vontlhe.+ 14 Mikhongelweni yabye ya ku mu khongotelela, va komba lezvaku va mu randza hi kota ya tipswalo ta Nungungulu ti nga pimiwiko leti ti nga ka n’wina.

15 I wa bongiwe Nungungulu hi kota ya cinyikiwo cakwe* ci nga tlhamuselekiko.

10 Makunu mina Pawule, ndza mu khongotela hi kurula ni kusasa ka Kristu,+ mina loyi ndzi nga wa nyalidede loku ndzi hi cikari ka n’wina,+ kanilezvi ndzi nga ni hlanha loku ndzi nga hi kona.+ 2 Ndzi khongelela lezvaku laha ndzi tova na n’wina, zvi ngazi zvi lava ku ndzi tiya hlanha ndzi va kawuka hi ntamu lava va hi wonisako ku khwatsi hi famba hi ka nyama, zvi nga lezvi ndzi alakanyako ku ndzi ta zvi maha. 3 Hakuva hambu lezvi hi fambako hi ka nyama, a hilwi yimpi hi kuya hi lezvi hi nga zvona nyameni. 4 Hakuva a matlhari ya yimpi ya hina a hi ya nyama,+ kanilezvi ya ntamu hi kota ya Nungungulu+ kasi ku khungumulela a makhokhola. 5 Hakuva hi hahlulela a maalakanyo ni zvontlhe lezvi zvi tlakukileko zvi vhalelako vanhu a ku tiva Nungungulu,+ hi khozisa maalakanyo wontlhe hi ma maha tikhumbi kasi ma ingisa Kristu; 6 niku hi tava hi longile ku tsayisa a kungaingisi kontlhe+ neti a kuingisa ka n’wina ku mbhelela.

7 Mu cuwuka zvilo kota lezvi zvi wonekisako zvona matihlweni. Loku a munhu a kholwa lezvaku wa Kristu, i wa ehlekete kambe hi mhaka leyi, yaku: Khwatsi hi lezvi a nga wa Kristu, hi zvalezvo kambe na hinawu. 8 Hakuva hambu loku ndzi wo ti dzundza ndzi hundzeletanyana hi kota ya ntamu lowu a Hosi yi hi nyikileko lezvaku hi mu aka hi wona, na ku nga hi ku mu hahlula,+ ndzi wa nga ta wisiwa tingana. 9 Hakuva a ndzi lavi lezvaku zvi wonekisa ku khwatsi ndzo lava ku mu dzukisa hi mapapilo ya mina. 10 Hakuva ve ngalo: “A mapapilo yakwe ma tshinga niku ma na ni ntamu, kanilezvi loku ku hi yena wutsumbu a nga cikari ka hina i na ni gome, niku lezvi a wulawulako zva hlamukisa.” 11 Loyi a wulako lezvo i wa zvi tive lezvaku lezvi hi wulako hi mapapilo na hi nga hi kona, hi zvalezvi hi to maha loku hi hi kona.+ 12 Hakuva a hi tiyi ku ti hlaya zvin’we kutani ku ti ringanisa ni vokari va ti dzundzako ha voce.+ Kanilezvi a cikhati leci va ti hlolako hi mahlolela ya vona venyi ni ku ti ringanisa na vona venyi, va komba lezvaku a va na kuzwisisa.+

13 Hambulezvo, hi nga ta ti dzundza hi tsemakanya mimbhingano ya hina leyi hi tsemelweko, kanilezvi hi ta ti dzundza ndzeni ka mbhingano lowu Nungungulu a hi tsemeleko,* lowu wu fambako kala seyo ka n’wina.+ 14 Phela a hi tsemakanyi a mimbhingano ya hina a ku khwatsi hi loku n’wina mu hi handle, hakuva kuve hina vo ranga ku mu chikelela ni mahungu ya manene xungetano hi Kristu.+ 15 Ahihi, a hi ti dzundzi hi tsemakanya mimbhingano ya hina leyi hi tsemelweko, hi kutitsitsirita ka mun’wani munhu, kanilezvi hi tsumba lezvaku laha a kukholwa ka n’wina ku simamako ku andza, lezvi hi zvi mahileko zvonawu zvi ta simama ku andza, lomu cipandzeni ca hina. Makunu hinawu hi ta engetela ku andza, 16 kasi hi fela ku kanela mahungu ya manene matikweni ya ku hundza seyo mu nga kona, lezvaku hi nga ti dzundzi hi ntiro lowu wu sinako wu mahilwe cipandzeni ca mun’wani munhu. 17 “Kanilezvi loyi a ti kulisako, i wa ti kulise hi Jehovha.”*+ 18 Hakuva loyi a ti dzundzako ha yece a hi yena a amukelekako,+ kanilezvi saseka loyi a dzundziwako hi Jehovha.*+

11 Ndzi xuva lezvaku mu ndzi timisela ka wupumbu gitsongwani. Kunene, ma ndzi timisela! 2 Hakuva ndza lusa ha n’wina hi ciluse co fana ni leci ca Nungungulu, hakuva hi mina ha ndzoce ndzi nga mu tsumbisa a ku chadha ni nuna mun’we kasi ndzi mu hendleleta ka Kristu kota nhwana* a basileko.+ 3 Kanilezvi ndza chava lezvaku, a ku fana ni lezvi a nyoka yi nga kanganyisa Evha hi tipulani ta yona,+ a maalakanyo ya n’wina ma nga tshuka ma gohiwa ma susiwa wuneneni ni kubaseni loku ku lumbako Kristu.+ 4 Hakuva loku kuta munhu ka n’wina, a ta kanela hi mun’wani Jesu wo hambana ni loyi hi mu kaneleko, kutani loku mu amukela wun’wani moya wo hambana ni lowu mu sinako mu wu amukele, kutani man’wani mahungu ya manene yo hambana ni lawa mu ma amukeleko,+ zva mu olovela a ku mu mu timisela. 5 Hakuva ndzi alakanya lezvaku a vapostoli va n’wina lava va ti mahako va vanene a va ndzi pali hi nchumu.+ 6 Kanilezvi hambu loku ndzi nga hi tlhari kuwulawuleni,+ hakunene ndzi tlhari kutiveni; kunene, hi zvi kombisile zviku dlunya ka n’wina hi tindlela tontlhe ni zvilweni zvontlhe.

7 Kutani ndzi no wonha hi ku ti koramisa kasi n’wina mu tlakuswa, hi ku kanela ka n’wina hi kutsaka a mahungu ya manene ya Nungungulu na ndzi nga mu hakhelisi nchumu ke?+ 8 Ndzi phangile man’wani mabandla hi ku ma tsika ma ndzi vhuna kasi ndzi fela ku tirela n’wina.+ 9 Hambulezvo, laha ndzi nga hi kuvhumaleni a cikhati leci ndzi nga hi na n’wina, a ndzi vangi ndzhwalo ka munhu, hakuva a vamakabye lava va ngata hi Makedhoniya va no ndzi nyika lezvi ndzi nga zvi vhumala na va nga feleli.+ Hi tindlela tontlhe, ndzi no zama ku ngavi ndzhwalo niku ndza ha ta simama ku maha lezvo.+ 10 A ku khwatsi hi lezvi a lisine la Kristu li nga ka mina, ndzi nga ta tsika ku wulawula hi zvilo lezvi hi wudzundzo+ matikweni ya Akaya. 11 Hikuyini? Ndzo kala ndzi nga mu randzi ke? Nungungulu wa zvi tiva lezvaku ndza mu randza.

12 Kanilezvi lezvi ndzi mahako ndzi ta simama ku maha,+ kasi ndzi fuvisa a malundza* ya lava va lavetelako cigelo ca kuva va fananiswa na hina ka lezvi* va ti dzundzako hi zvona. 13 Hakuva a vanhu lavo vapostoli va mawunwa, ni vatiri va kanganyisako, va ti cicako va ti maha ku khwatsi vapostoli va Kristu.+ 14 Lezvo a zvi hlamalisi, hakuva hambu Sathani i simama ku ti cica a ku khwatsi i ngilozi ya kuwonekela.+ 15 Hikwalaho, a zvi hlamalisi loku a malandza yakwe wonawu ma ti cica ma ku khwatsi malandza ya kululama. Kanilezvi a kugumesa kabye ku ta yelana ni mitiro yabye.+

16 Ndza engeta, ndziku: Ku ngavi ni munhu a alakanyako ku ndzi cipumbu. Kanilezvi hambu loku mu alakanya lezvo, ndzi amukeleni kota cipumbu, kasi minawu ndzi fela ku ti dzundzanyana. 17 Lezvi ndzi zvi wulako ka cikhati leci, a ndzi wuli na ndzi landza a cikombiso ca Hosi, kanilezvi kota cipumbu ci ti tsumbako kutidzundzeni ka cona. 18 Kota lezvi a votala va ti dzundzako hi ka nyama, minawu ndzi ta ti dzundza. 19 Kota lezvi n’wina “mu tivako” nguvhu, ma timisela lava va zvipumbu na mu tsakile. 20 Kunene, mu timisela ni wihi a mu mahako tikhumbi, ni wihi a mu phangako, ni wihi a mu wutlelako lezvi mu nga nazvo, ni wihi a ti tlakusako hehla ka n’wina, ni wihi a mu bako lomu nghoheni.

21 Ndzi wula lezvi kasi hi wisiwa tingana, hakuva zvi nga tshuka zvi wonekisa ku khwatsi hive ni gome.

Kanilezvi loku a van’wani va hi ni cixinya — lezvo ndzi zvi wula kota cipumbu — minawu ndzi na ni cixinya. 22 Vova vaHebheru ke? Minawu ndzi muHebheru.+ Vova vaIzrayeli ke? Minawu ndzi muIzrayeli. Vova va pswalo* wa Abrahama ke? Minawu ndzi wa pswalo wakwe.+ 23 Vova malandza ya Kristu ke? Ndza hlamula na ndzi ku khwatsi ndzo hlanya, ndziku: Hi mina legi ga hombe ga kona: ndzi tirile ku pala vona,+ ndzi vhalelwe makhati yo tala,+ ndzi biwa makhati ya tsandza-vahlayi, ndziva timhangweni ta kufa makhati yo tala.+ 24 Hi ntlhanu wa makhati, a vaJudha va ndzi bile a 40 wa timhika a ku tsika yin’we,+ 25 ndzi biwa hi tinhonga makhati manharu,+ khati gin’we ndzi gandliwa hi maribye,+ makhati manharu ndzi pandzekelwa hi citimela,*+ ndzi mbheta wusiku ni mumu na ndzi pepetseka lomu bimbini, 26 ndziva tipfhumbeni to tala, ndziva ka timhango micongweni, ndziva timhangweni ta ku wela mandleni ya vaphangi, ndziva timhangweni ta ku lava ku dawa hi va ka hina,+ ndziva timhangweni ta ku lava ku dawa hi vamatiko,+ ndziva timhangweni lomu dhoropeni,+ ndziva timhangweni lomu ciwuleni, ndziva timhangweni lomu bimbini, ndziva timhangweni cikari ka vamakabye va mawunwa, 27 ndzi tira yi nga chayi ni ku koroka, makhati yo tala ndzi pileka kala gica,+ ndzi tshama ni ndlala ni tora,+ ndzi vhumala zvakuga makhati yo tala,+ ndzi biwa hi cirami na ndzi nga hi na ca ku boha.*

28 Ahandle ka zvilo lezvi zva lahandle, ku na ni leci ci ndzi gako* siku ni siku: ku nga ku karatekela mabandla wontlhe.+ 29 Himani a nga ni gome, mina ndzi ngavi ni gome ke? Himani a phinganyetiwako, mina ndzi nga zangari ke?

30 Loku zvi lava ku ndzi ti dzundza, ndzi ta ti dzundza hi zvilo zva gome ga mina. 31 A Nungungulu tlhelo Papayi wa Hosi Jesu, Loyi a faneleko ku dhumiswa kala kupindzuka, wa zvi tiva ku a ndzi hembi. 32 Le Dhamasku, a govhernadhori loyi a nga hi lahasi ka hosi Aretasi i wa gadha a dhoropa ga vaDhamasku, kasi a ndzi khoma, 33 kanilezvi ndzi no releliswa hi cindzala* hi laha janeleni ga khurisi ga dhoropa,+ ndzi huluka mandleni yakwe.

12 Ndzi fanele ku ti dzundza. A zvi vhuni nchumu kanilezvi ndzi ta wulawula hi miwoniso+ ni kuvhululelwa zvi tako hi ka Hosi.+ 2 Ndza tiva munhu a nga zvin’we na Kristu, loyi ka 14 wa malembe ma hundzileko — kani i wa hi mirini kutani i wa hi handle ka miri, a ndzi zvi tivi; Nungungulu wa zvi tiva — a tekilweko a yisiwa ka tilo ga wunharu. 3 Ina, ndza mu tiva munhu loye — kani i wa hi mirini kutani i wa hi handle ka miri, a ndzi zvi tivi; Nungungulu wa zvi tiva — 4 loyi a tekilweko a yisiwa paradhiseni a tlhela azwa magezu ma nga wulekiko ne ma nga faneliko ku wuliwa hi munhu. 5 Ndzi ta ti dzundza hi munhu loye, kanilezvi ndzi nga ta ti dzundza hi zva mina wutsumbu ahandle ka gome ga mina basi. 6 Hakuva hambu loku ndzo lava ku ti dzundza, ndzi wa nga tava cipumbu, hakuva ndzi wa ta wula lisine. Kanilezvi ndza ti khoma ndzi nga mahi lezvo, kasi ku ngavi ni munhu a ndzi nyikako wudzundzo go hundza lezvi a zvi wonako ka mina kutani ku zvizwa ka mina, 7 hi lezvi ntsena ndzi amukelako a kuvhululelwa ka hombe ko kota loku.

Kasi ndzi nga ti tlakusi ku hundza mpimo, ndzi no nyikwa muzwa nyameni,+ ku nga ngilozi ya Sathani, lezvaku yi tshama hi ku ndzi bungutela* kasi ndzi nga ti tlakusi ku hundza mpimo. 8 Ndzi khongotele Hosi makhati manharu xungetano hi mhaka leyi, lezvaku yi wu susa ka mina. 9 Kanilezvi yi no ndzi hlamula, yiku: “A tipswalo ta mina ti enele ka wena, hakuva a ntamu wa mina wu mbheleliswa gomeni.”+ Makunu na ndzi tsakile nguvhu, ndzi ta ti dzundza hi gome ga mina kasi a ntamu wa Kristu wu tshama hehla ka mina kota tenda. 10 Hikwalaho, ndza xalala gomeni, ni kurukatelweni, ni kuvhumaleni, ni kuxanisweni, ni zvikaratweni hi kota ya Kristu. Hakuva loku ndzi hi ni gome, hi kona ndzi nga ni ntamu.+

11 Ndzi mahile cipumbu. Hi n’wina mu nga ndzi kurumeta, hakuva ndzi wa fanele ku dzundziwa hi n’wina. Hakuva a vapostoli va n’wina lava va ti mahako va vanene a va ndzi pali hi nchumu, hambu loku ndzi nga hi nchumu.+ 12 Kunene, a zvikombiso zva wupostoli zvi wonekile cikari ka n’wina hi kutimisela ka hombe,+ ni zviwoniso, ni zvihlamaliso, ni mitiro ya ntamu.+ 13 Hakuva mu paliwa hi yini hi man’wani mabandla, ahandle ka lezvi ndzi nga kala kuva ndzhwalo ka n’wina ke?+ Mahani wuxinji mu ndzi tsetselela a cihoxo leco.

14 Legi i khati ga wunharu ndzi longileko kuta ka n’wina, niku ndzi nga tava ndzhwalo. Hakuva a ndzi lavi zvilo zva n’wina,+ kanilezvi ndzi lava n’wina. Hakuva a ku rindzelwi lezvaku a vana+ va vekela tshomba a vapswali vabye, kanilezvi a vapswali hi vona va faneleko ku vekela tshomba a vana vabye. 15 Hakuva mina, na ndzi tsakile nguvhu, ndzi ta nyikela zvontlhe zva mina, ni ku nyikelwa wutsumbu ga mina gontlhe hi kota ya n’wina.*+ Loku mina ndzi mu randza nguvhu, ndzi fanele ku randziwa kutsongwani ke? 16 Kanilezvi hambu loku zvi no tshamisa kuyini, a ndzi vangi ndzhwalo ka n’wina.+ Hambulezvo, mu wula lezvaku ndzi tirisile “tipulani” niku ndzi mu phasile “hi mano”. 17 Xana ndzi no mu xolola hi mun’we wa lava ndzi va rumeleko ka n’wina ke? 18 Ndzi khongotele Titusi, ndzi mu rumela ni mun’wani makabye. Titusi a nga mu xololangi, a hi zvona ke?+ Kasi a hi fambangi hi moya wun’we ni nkondzo wun’we ke?

19 Contlhe cikhati leci mu wa alakanya lezvaku ho ti yimelela mahlweni ka n’wina ke? Hi wulawula mahlweni ka Nungungulu na hi hi zvin’we na Kristu. Kanilezvi, varandzekako, zvontlhe lezvi hi mahako hi zvi mahela ku aka n’wina. 20 Hakuva ndza chava lezvaku laha ndzi to chikela, ndzi nga mu kumisi lezvi ndzi nga zvi xuvisa zvona, na minawu ndzi ngavi lezvi mu nga zvi xuva, kanilezvi ndzi kuma a tiholova, ni ciluse, ni zanga, ni kuhambana kupima, ni kulumbetana, ni mahlevo, ni kutikukumukisa, ni woyonga. 21 Kuzvilava a cikhati leci ndzi to wuya, a Nungungulu wa mina a nga ndzi tsongahata mahlweni ka n’wina, ndziza ndzi rilela votala lava va nga wonha kale va nga ti soli ka kungahlazveki kabye, ni ka wubhayi,* ni ka mahanyela ya tingana,* lezvi va zvi mahileko.

13 Legi i khati ga wunharu ndzi lavako kuta ka n’wina. “Ni yihi mhaka yi fanele ku tiyisiwa hi nomu wa vakustumunyu vambiri kutani vanharu.”+ 2 Hambu lezvi ka cikhati leci ndzi nga hava, zvi mahisa ku khwatsi ndzi cikari ka n’wina hi khati ga wumbiri, niku ndza ranga ndzi tlharihisa lava va sinako va wonhile ni vontlhe lava van’wani, lezvaku loku ndzo tshuka ndzita kambe ka n’wina, ndzi nga ta va tsetsa, 3 kota lezvi mu hlotako cikombiso ca lezvaku Kristu, loyi a nga hiko wa gome ka n’wina kanilezvi a nga ni ntamu cikari ka n’wina, hakunene wa wulawula hi nomu wa mina. 4 Hakuva, kunene, i delwe laha mhandzeni hi kota ya gome, kanilezvi wa hanya hi kota ya ntamu wa Nungungulu.+ Kunene, hinawu hi na ni gome zvin’we naye, kanilezvi hi ta hanya zvin’we naye+ hi kota ya ntamu wa Nungungulu wu nga ka n’wina.+

5 Tshamani hi ku ti hlola a ku mu kukholweni ke; tshamani hi ku ti kamba a ku mu vanhu va tshamela muni.+ Kutani mo kala mu nga zvi tivi lezvaku Jesu Kristu i zvin’we na n’wina ke? Ahandle ka loku mu nga amukeleki. 6 Ndza tsumba ku mu ta zvi tiva lezvaku hina ha amukeleka.

7 Makunu hi khongela ka Nungungulu lezvaku mu nga mahi cahava, na hi nga feli ku woneka na hi amukeleka, kanilezvi kasi n’wina mu maha zvazvinene, hambu loku hi wonekisa ku khwatsi a hi amukeleki. 8 Hakuva a hi nge mahi nchumu wu lwako ni lisine, kanilezvi ntsena lezvi zvi yimelako lisine. 9 Hakunene ha tsaka ni ka cihi cikhati hi nga ni gome kanilezvi n’wina na mu hi ni ntamu. Hi zvalezvo hi zvi khongelelako, ku nga lezvaku mu ololoxiwa. 10 Hi caleco ci ndzi mahako ndzi tsala a timhaka leti na ndzi hi hava, kasi loku ndzi hi kona zvi ngazi zvi lava ku ndzi wu tirisa hi tihanyi a ntamu lowu a Hosi yi ndzi nyikileko,+ kasi ndzi aka na ku nga hi kuhahlula.

11 Hi kugumesa, vamakabye, simamani ku tsaka, mu ololoxiwa, mu chavelelwa,+ muva ni kupima kun’we,+ mu hanya hi kurula;+ niku a Nungungulu wa lirandzo ni wa kurula+ i tava na n’wina. 12 Losanani hi kupswopswana ka kubasa. 13 A vobasa vontlhe va mu rungula.

14 A tipswalo ta Hosi Jesu Kristu, ni lirandzo la Nungungulu, ni kuhlengela moyeni wo basa, a zvive na n’wina n’wentlhe.