PAPILO GA PAWULE KA VA LE GALATIYA

1 Pawule, a mupostoli, na ku nga hi hi ka vanhu ne hambu ku mahiwa hi munhu, kanilezvi hi Jesu Kristu+ zvin’we na Nungungulu, a Papayi,+ loyi a mu vhuxileko hi ka vafileko, 2 ni vamakabye vontlhe lava va nga na mina, ka mabandla ya le Galatiya:

3 Ngha muva ni tipswalo ni kurula zvi tako hi ka Nungungulu, a Papayi wa hina, ni ka Hosi Jesu Kristu. 4 I no ti nyikela hi kota ya zviwonho zva hina+ kasi a hi tlhatlhisa ka tiko legi ga kubiha*+ hi kurandza ka Nungungulu wa hina tlhelo Papayi;+ 5 a wudzundzo a give ka yena kala kupindzuka ni kupindzuka. Amen.

6 Zva ndzi hlamalisa lezvi mu hatlisileko ku hambuka* ka Loyi a mu vitanileko hi tipswalo ta Kristu mu landzela lin’wani lixaka la mahungu ya manene.+ 7 A hi ku khwatsi kova ni man’wani mahungu ya manene; kanilezvi ku na ni vokari va mu juwungelako+ na va lava ku wonhetela a mahungu ya manene xungetano hi Kristu. 8 Kanilezvi, hambu loku a mun’we wa hina kutani ngilozi ya le tilweni, a kanela ka n’wina kota mahungu ya manene a nchumu wo hambana ni mahungu ya manene lawa hi ma kaneleko ka n’wina, i wa rukatelwe. 9 Kota lezvi hi nga ranga hi wula, ndza phinda kambe, ndziku: Ni wihi a kanelako ka n’wina kota mahungu ya manene a nchumu wo hambana ni lowu mu wu amukeleko, i wa rukatelwe.

10 Xana vanhu ndzi zamako ku va kholwisa kutani hi Nungungulu ke? Kutani ndzo zama ku tsakisa vanhu? Loku ndzi wa ha tsakisa vanhu, na ndzi nga hi nandza ga Kristu. 11 Hakuva ndzi lava ku mu zvi tiva, vamakabye, lezvaku a mahungu ya manene lawa ndzi ma kaneleko ka n’wina a mati hi ka vanhu;+ 12 hakuva a ndzi ma amukelangi hi ka munhu ne a ndzi gondzisiwangi, kanilezvi kuve hi ku vhululelwa hi Jesu Kristu.

13 Kunene, mu ma zwile a mahanyela ya mina ya kale na ndza ha hi ciJudheni,+ lezvaku ndzi gi xanisile hi ndlela ya xapi* a bandla ga Nungungulu, na ndzi zama ku gi fuvisa,+ 14 niku ndzi wa endzeleka nguvhu ciJudheni a ku hundza votala va tanga ya mina lomu tikweni ga mina, hakuva ndzi wa ti tsitsirita nguvhu ka mikhuwo ya vapapayi va mina.+ 15 Kanilezvi laha Nungungulu, loyi a ndzi hlawulileko khwirini ga mamani, a tlhela a ndzi vitana hi tipswalo takwe,+ a nga zvi wona na zvi hi chukwana 16 a ku wonekelisa a N’wana wakwe hi ku tirisa mina kasi ndzi kanela a mahungu ya manene xungetano hi yena ka matiko,+ a ndzi tsutsumelangi ku ya wutisa munhu;* 17 ne a ndzi yangi Jerusalema ka lava va nga ndzi rangela a kuva vapostoli, kanilezvi ndzi noya Arabhiya, ndzi gumesa ndzi tlhela Dhamasku.+

18 Makunu, andzhako ka malembe manharu, ndzi no kandziha ndziya Jerusalema+ ndzi ya vhuxela Khefasi,*+ ndzi tshama naye a 15 wa masiku. 19 Kanilezvi a ndzi wonangi ne mun’we wa vapostoli lava van’wani, saseka Jakobe,+ a makabye wa Hosi. 20 Makunu xungetano hi timhaka leti ndzi mu tsalelako, ndza tiyisa mahlweni ka Nungungulu lezvaku a ndzi hembi.

21 Andzhako ka lezvo, ndzi noya matikweni ya Siriya ni Kilikiya.+ 22 Kanilezvi a mabandla ya le Judhiya, lawa ma nga hi ka Kristu, ma wa nga ndzi tivi hi nghohe. 23 Ma wozwa basi ku: “A wanuna loyi a kale a nga kari a hi xanisa,+ makunu wa chumayela mahungu ya manene xungetano hi kukholwa loku a nga lava ku ku fuvisa.”+ 24 Hikwalaho, va no sangula ku dhumisa Nungungulu hi kota ya mina.

2 Makunu, andzhako ka 14 wa malembe, ndzi no kandziha kambe ndziya Jerusalema na Bharnabhasi,+ ndzi teka kambe na Titusi.+ 2 Ndzi no kandziha ndziya seyo hi kota ya kuvhululelwa, ndzi ya va hlawutela a mahungu ya manene lawa ndzi kanelako cikari ka matiko. Ndzi zvi mahile cihundleni, hambulezvo mahlweni ka vavanuna lava va nga hi vo chaviseka nguvhu, kasi ndzi tiyiseka lezvaku ndzi wa nga tsutsumi kutani a ndzi tsutsumangi mahala. 3 Kanilezvi, hambu Titusi,+ loyi a nga hi na mina, a nga kurumetiwangi ku mahiwa wukwera,*+ hambu lezvi a nga hi muGreki. 4 Kanilezvi a mhaka leyi yi vhukile hi kota ya vamakabye va mawunwa va nghenileko hi kunyanimela,+ kasi ku ta hlola a kutlhatlheka+ loku hi ti buzako hi kona hi lezvi hi nga ka Kristu Jesu, na va zama ku hi maha tikhumbi hi kumbhelela;+ 5 hina a hi ti koramisangi kabye,+ ne zva cikhatana,* kasi a lisine la mahungu ya manene li simama na n’wina.

6 Kanilezvi xungetano hi lava va nga wonekisa ku khwatsi va lisima+ — kani va wa hi yini, ka mina a hi zva nchumu, hakuva Nungungulu a nga cuwuki nghohe — a vavanuna lavo vo chaviseka nguvhu a va ndzi gondzisangi nchumu wa wuswa. 7 Kanilezvi a cikhati leci va nga wona lezvaku ndzi nyikilwe ntiro wa ku kanela mahungu ya manene ka lava va nga kala ku mahiwa wukwera,*+ a ku khwatsi hi lezvi Pedro a nga nyikiwa ku ya kanela ka lava va mahilweko wukwera 8 — hakuva loyi a nga nyika Pedro a ntamu wa kuva mupostoli ka lava va mahilweko wukwera,* i nyikile na minawu a ntamu wa kuva mupostoli ka vamatiko+ — 9 niku laha va nga tiva a tipswalo leti ndzi nga nyikilwe,+ Jakobe,+ na Khefasi,* na Johani, lava va nga ku khwatsi maziki,* va no nawuluta a canja ga cinene, na va nawulutela mina na Bharnabhasi,+ kota cikombiso ca kuva zvitiri-kulobye, kasi hina hiya ka vamatiko, vona vaya ka lava va mahilweko wukwera.* 10 Leci basi va nga hi kombela kuve lezvaku hi alakanya zvisiwana, niku hi zvalezvo minawu ndzi ti tsitsiritelako ku maha.+

11 Hambulezvo, a cikhati leci Khefasi*+ a ngata Antiyokiya,+ ndzi no mu komamisa* nghohe ni nghohe hakuva zvi wa hi laha kubaseni lezvaku i wa maha zvahava.* 12 Hakuva na ku nga se chikela vanhu vo kari va ngata hi ka Jakobe,+ i waga zvin’we ni vanhu va matiko;+ kanilezvi a cikhati leci va nga chikela, i no tsika kuga navo a tlhela a tsawukana navo hi ku chava lava va nga mahilwe wukwera.*+ 13 A vaJudha lava van’wani vonawu va no ti patsa naye ka wufarisi legi,* laha ka kuza Bharnabhasi a ti patsa navo kufariseni* kabye. 14 Kanilezvi a cikhati leci ndzi nga wona lezvaku va wa nga ha longoloki ni lisine la mahungu ya manene,+ ndzi no byela Khefasi* mahlweni ka vontlhe, ndziku: “Loku wena, hambu lezvi u nga muJudha, u hanyisa ku khwatsi u wamatiko, u nga hanyi kota muJudha, u va kurumetela yini a vanhu va matiko a ku hanya hi mikhuwo ya ciJudha ke?”+

15 Hina lava hi nga vaJudha va mabeleko, na hi nga hi vawonhi va humako hi ka matiko, 16 ha vhumela lezvaku a munhu i wuliwa wo lulama, na ku nga hi kota ya mitiro ya nayo, kanilezvi ntsena hi ku kholwa+ ka Jesu Kristu.+ Hikwalaho, hi no kholwa ka Kristu Jesu kasi hi wuliwa volulama hi ku kholwa ka Kristu na ku nga hi hi kota ya mitiro ya nayo, hakuva i hava a to wuliwa wolulama hi ku maha mitiro ya nayo.+ 17 Makunu loku hinawu hi kumiwa na hi hi vawonhi na hi ti karatela ku wuliwa vo lulama hi kota ya Kristu, xana Kristu citiri ca kuwonha ke? Kokwihi! 18 Loku ndzi tlhela ndzi aketa zvalezvi ndzi nga zvi hahlula, ndzi komba lezvaku ndzi muhambunyeti. 19 Hakuva hi kota ya nayo ndzi file hi ka nayo,+ kasi ndzi hanyela Nungungulu. 20 Ndzi belelwe mhandzeni zvin’we na Kristu.+ A ka ha hi mina ndzi hanyako,+ kanilezvi hi Kristu a hanyako ka mina. Kunene, a wutomi legi makunu ndzi gi hanyako nyameni ndzi gi hanya hi ku kholwa ka N’wana wa Nungungulu,+ loyi a ndzi randzileko a tlhela a ti nyikela hi kota ya mina.+ 21 A ndzi ali a tipswalo ta Nungungulu,+ hakuva loku a kululama kuta hi ka nayo, hakunene Kristu i file mahala.+

3 Zvipumbu ndzin’wina vaGalatiya! Himani a nga mu kucetela zvilo lezvi zva hava,+ n’wina lava mu tlhamuselweko zviku dlunya lezvaku Jesu Kristu i belelwe mhandzeni?+ 2 Ndzi lava ku mu wutisa cilo cin’we:* Kasi mu no amukela moya hi kota ya mitiro ya nayo, kutani hi lezvi mu nga kholwa lezvi mu nga zvizwa ke?+ 3 Kasi mu zvipumbu zvo kota lezvi ke? Andzhako ka ku sangula ku famba hi ka moya,* mo mbhetisa hi ka nyama ke?*+ 4 Kasi mu no lwisana ni tixanisa to tala mahala ke? Hakunene a mu xanisekangi mahala. 5 Hikwalaho, xana loyi a mu nyikako a moya ni ku maha mitiro ya ntamu+ cikari ka n’wina, o maha lezvo hi kota ya mitiro ya n’wina ya nayo, kutani hi lezvi mu kholwako lezvi mu nga zvizwa ke? 6 Zva fana na Abrahama: “I no kholwa ka Jehovha,* niku lezvo zvi no hlayelwa kakwe kota kululama”.+

7 Kunene, ma zvi tiva lezvaku lava va kholwako hi vona va nga vana va Abrahama.+ 8 Makunu a Mutsalo, na wu zvi wona hi mahlweni lezvaku Nungungulu i ta va hlayela kululama a vanhu va matiko hi kota ya kukholwa, wu no ranga wu kanela a mahungu ya manene ka Abrahama, wuku: “A matiko wontlhe ma ta katekisiwa hi laha ka wena.”+ 9 Hikwalaho, lava va kholwako va katekiswa zvin’we na Abrahama, loyi a nga hi ni kukholwa.+

10 Vontlhe lava va tsumbako a mitiro ya nayo va rukatelwe, hakuva ku tsalilwe ku ngalo: “I rukatelwe ni wihi loyi kalako a nga simami ka zvontlhe lezvi zvi tsalilweko bhukwini ga Nayo, a tsika ku zvi maha.”+ 11 Ahandle ka lezvo, zvi te dlunya lezvaku, hi nayo, i hava a wuliwako wo lulama mahlweni ka Nungungulu+ hakuva “a wakululama i ta hanya hi kota ya kukholwa”.+ 12 A Nayo a wu seketelwi ka kukholwa. Kanilezvi “ni wihi loyi a mahako zvilo lezvi, i ta hanya hi kota ya zvona”.+ 13 Kristu i no hi xava,+ a hi tlhatlhisa+ ka ciruko ca Nayo hi kuva ciruko wutshan’wini ga hina, hakuva ku tsalilwe ku ngalo: “I rukatelwe ni wihi loyi a hayekilweko mhandzeni.”+ 14 Lezvi zvi mahekile kasi ku a cikatekiso ca Abrahama ci fela ku endzeleka kala ka matiko ha Kristu Jesu,+ kasi hi amukela a moya wu tsumbisilweko+ hi kukholwa ka hina.

15 Vamakabye, ndzi wulawula hi mufananiso wa zvilo zvi mahekako kuhanyeni: Neti a civhumelwano ci tiyisiwa, hambu loku co tiyisiwa hi munhu, i hava a nga ni ntamu wa ku ci vhinya ne hambu ku engetela nchumu ka cona. 16 Makunu a zvitsumbiso zvi no wuliwa ka Abrahama ni ka pswalo* wakwe.+ A Mitsalo a yi wuli ku ngalo: “Ni ka vana* va wena”, a ku khwatsi hi loku ku wuliwa vanhu vo tala. Kanilezvi yi ngalo: “Ni ka pswalo* wa wena”, ku nga munhu mun’we, yena Kristu.+ 17 Ndza engeta, ndziku: A Nayo lowu wu tileko na ku hundzile a 430 wa malembe,+ a wu chipisi a civhumelwano leci ci nga sina ci mahilwe hi Nungungulu, laha ko kala wu fuvisa a citsumbiso. 18 Hakuva loku a tshomba yi nyikiwa hi nayo, a ya ha nyikiwi hi citsumbiso; kanilezvi Nungungulu i yi nyikile hi matsenya ka Abrahama hi citsumbiso.+

19 Makunu hikuyini ku nga ni Nayo? Wu tlhatekelwe kasi a zvihambunyeto zvi woneka kubaseni,+ kala wu chikela a pswalo*+ lowu wu tsumbisilweko a citsumbiso, niku wu kanelwe hi tingilozi+ hi canja ga mutlhanganisi.+ 20 Makunu a ku na mutlhanganisi loku ci hi ca munhu mun’we basi, kanilezvi Nungungulu mun’we ntsena. 21 Makunu hi taku a Nayo walwa ni zvitsumbiso zva Nungungulu ke? Kokwihi! Hakuva loku ku wa no nyikiwa a nayo wu zvi kotako ku nyika wutomi, hakunene a kululama na ku tile hi nayo. 22 Kanilezvi a Mitsalo yi no nyikela zvontlhe wukhumbini ga ciwonho, kasi a citsumbiso ci kumiwako hi ku kholwa ka Jesu Kristu ci nyikiwa lava va kombisako kukholwa.

23 Hambulezvo, na ku nga se chikela a kukholwa, hi wa wundliwa lahasi ka nayo, hiva wukhumbini ga wona, na hi rindzela a kukholwa loku ku nga lava ku wonekeliswa.+ 24 Hikwalaho, a Nayo wuve mugondzisi wa hina, wu hi yisa ka Kristu,+ kasi hi wuliwa vakululama hi kota ya kukholwa.+ 25 Kanilezvi lezvi makunu a kukholwa ku chikeleko,+ a ha ha hi lahasi ka mugondzisi.+

26 Kunene, n’wina n’wentlhe mu vana va Nungungulu+ hi lezvi mu kholwako ka Kristu Jesu.+ 27 Hakuva n’wina n’wentlhe mu bhabhatisilweko ka Kristu, mu ambalile Kristu.+ 28 A ku na muJudha ne muGreki,+ a ku na khumbi ne munhu wo tlhatlheka,+ a ku na wanuna ne wasati,+ hakuva n’wina n’wentlhe mu mun’we ka Kristu Jesu.+ 29 Ahandle ka lezvo, loku mu lumba Kristu, hakunene mu pswalo* wa Abrahama,+ a vagi va tshomba+ hi kota ya citsumbiso.+

4 Makunu ndza wula, ndziku: Loku a mugi wa tshomba a ha hi n’wanana a nga hambani ni khumbi, hambu lezvi a nga hosi ya zvilo zvontlhe, 2 kanilezvi i wundliwa hi vahlayisi ni malandza kala gi chikela siku legi gi yimisilweko hi papayi wakwe. 3 Hizvalezvo na hinawu, laha hi nga ha hi vanana, hi wa hi tikhumbi ta zvilo zvo sangula zva tiko.+ 4 Kanilezvi laha a cikhati ci nga enela, Nungungulu i no rumela N’wana wakwe a pswalilweko hi wasati+ a tlhela ava lahasi ka nayo,+ 5 a fela ku va tlhatlhisa hi ku xava lava va nga lahasi ka nayo,+ kasi hi amukeliwa kota vana.+

6 Makunu kota lezvi mu nga vana, Nungungulu i rumele a moya+ wa N’wana wakwe timbilwini ta hina,+ niku wa vitana, wuku: “Abha,* Papayi!”+ 7 Hikwalaho, wena a wa ha hi khumbi kanilezvi u n’wana; makunu loku u hi n’wana, u mugi wa tshomba kambe hi kurandza ka Nungungulu.+

8 Hambulezvo, na mu nga se mu tiva Nungungulu, mu wa hi tikhumbi ta lava hakunene va nga hiko vanungungulu. 9 Kanilezvi lezvi makunu mu mu tivileko Nungungulu, kutani ku, lezvi mu tiviwako hi Nungungulu, mu tlhelisa kuyini kambe ka zvilo zva gome+ ni zvo sangula zvi nga vhuniko nchumu mu ya ti maha tikhumbi ta zvona kambe ke?+ 10 N’wina ma ti karata nguvhu hi ku hlayisa masiku, ni tihweti,+ ni tinguva ni malembe. 11 Ndza chava ku tshuka ndzi ti karatile mahala cikari ka n’wina.

12 Ndza mu khongotela, vamakabye, ndziku: Mahani ku khwatsi hi mina, hakuva minawu ndzi wa mahile ku khwatsi hi n’wina.+ A mu ndzi gohelangi nchumu. 13 Kanilezvi ma zvi tiva lezvaku kuve hi kota ya mababyi ndzi ngava ni thomo ga ku kanela mahungu ya manene ka n’wina hi khati go sangula. 14 Hambu lezvi a kubabya ka mina ku nga hi ciringo ka n’wina, a mu ndzi chepetangi ne ku ndzi nyenya,* kanilezvi mu no ndzi amukelisa ku khwatsi ndzi ngilozi ya Nungungulu ni ku khwatsi hi mina Kristu Jesu. 15 Li kwihi a litsako leli mu nga hi nalo ke? Hakuva ndza mu kustumunyela ndziku loku zvi wa no koteka, na mu xokolile a matihlo ya n’wina mu ndzi nyika.+ 16 Makunu ndzi mahile a nala wa n’wina hi ku mu byela lisine ke? 17 Va pinyamela ku mu koka muya tlhelweni gabye, kanilezvi a va mu laveli zvazvinene; va lava ku mu hambanisa na mina kasi mu ti tsitsiritela ku va landzela. 18 Hambulezvo, contlhe cikhati zvi nene loku a munhu a pinyamela ku mu kokela ka zvazvinene, na ku nga hi ntsena loku ndzi hi na n’wina, 19 vana vanga,+ n’wina lava ndzi lun’wako kambe hi ku lava ku mu pswala kala Kristu a wumbiwa cikari ka n’wina. 20 Ndzi wa xuva kuva zvin’we na n’wina ka cikhati leci, ndzi tlhela ndzi wulawula hi ndlela yin’wani, hakuva ndzi jujekile kupima hi kota ya n’wina.

21 Hi nga ndzi byelani, n’wina lava mu lavako kuva lahasi ka nayo: A mu zvizwi lezvi a Nayo wu wulako ke? 22 Hi cikombiso, ku tsalilwe lezvaku Abrahama i wa hi ni vana vambiri; a mun’we i pswalilwe hi wasati loyi wa khumbi,+ loyi mun’wani i pswalilwe hi wasati loyi wa kutlhatlheka;+ 23 kanilezvi a n’wana wa wasati loyi wa khumbi i pswalilwe hi ka nyama,+ loyi wa wasati wo tlhatlheka i pswalilwe hi citsumbiso.+ 24 A mhaka leyi mufananiso; hakuva a vavasati lava va yimela zvivhumelwano zvimbiri, a cin’we hi leci ca Citsunga ca Sinayi,+ ci pswalako vana va wukhumbi, ku nga Hagari. 25 Makunu Hagari i yimela Sinayi,+ a citsunga ci nga le Arabhiya, niku i fana ni Jerusalema wa cikhati leci, hakuva i le wukhumbini ni vana vakwe. 26 Kanilezvi Jerusalema loyi wa le hehla i tlhatlhekile, hi yena mamani wa hina.

27 Hakuva ku tsalilwe ku ngalo: “Tsaka, wena wasati wa ngon’wa, wena u nga pswaliko; bana kulungwani hi kutsaka, wena wasati u nga lun’wiko; hakuva a vana va wasati loyi a tsikilweko va tele nguvhu a ku hundza va loyi a nga ni nuna.”+ 28 Makunu n’wina vamakabye, mu vana va citsumbiso a ku fana na Isaka.+ 29 Kanilezvi, a ku khwatsi hi lezvi cikhatini leco loyi a nga pswalilwe hi ka nyama a nga sangula ku xanisa loyi a nga pswalilwe hi ka moya,+ hizvalezvo kambe ni nyamutlha.+ 30 Hambulezvo, yi yini a Mitsalo? “Hlongola a khumbi ya cisati ni n’wana wa yona, hakuva a n’wana wa khumbi a nga tava mugi wa tshomba zvin’we ni n’wana wa wasati wo tlhatlheka.”+ 31 Hikwalaho, vamakabye, hina hi vana, na ku nga hi va wasati wa khumbi, kanilezvi va wasati wo tlhatlheka.

5 Hakuva Kristu i hi tlhatlhisele ku hiva kutlhatlhekeni loko. Hikwalaho, tiyani mu ku nde,+ mu nga ha vhumeli kambe a ku bohiwa kanga wa wukhumbi.+

2 Mina Pawule ndza mu byela lezvaku loku mu mahiwa wukwera,* Kristu a nga tava ni civhuno ka n’wina.+ 3 Ndza kustumunya kambe ka vavanuna vontlhe lava va mahiwako wukwera* lezvaku va fanele ku ingisa a Nayo wontlhe.+ 4 N’wina lava mu ti karatelako ku wuliwa volulama hi ku hlayisa nayo, mu hambene na Kristu;+ mu ti tsawukanisile ni tipswalo takwe. 5 Hakuva hi ka moya, hina ha dokolokela a kululama loku ku rindzelwako, ku tako hi kukholwa. 6 Hakuva ka Kristu Jesu, a ku mahiwa wukwera* kutani ku nga mahiwi wukwera zvontlhe a hi zva nchumu,+ sine kukholwa loku ku tirako hi lirandzo.

7 Mu wa tsutsuma khwatsi.+ Makunu himani a mu vhaleleko a ku simama mu ingisa lisine ke? 8 A kukholwisa ka tshamela legi a kuti hi ka Loyi a mu vitanileko. 9 A comelo gi tsongwani gi vilisa* mapa wontlhe ma vhuvilweko.+ 10 Ndza kholwa lezvaku n’wina lava mu nga Hosini+ mu nga ta pimisa zvo hambana; kanilezvi loyi a mu juwungelako,+ hambu loku a hi mani, i ta amukela a kulamulwa loku ku mu ringanako. 11 Xungetano hi mina, vamakabye, loku ndza ha chumayela wukwera,* hikuyini ndza ha xanisiwako ke? Loku zvi hi lezvo, a ribye ga cikhunguvanyiso ga mhandze ya hlomulo*+ gi fuvisilwe. 12 Ndzi wa xuva lezvaku lava va zamako ku mu juwungela va ti maha mithenwa.*

13 Vamakabye, mu vitanelwe kutlhatlheka, ntsena lezvaku mu nga tirisi a kutlhatlheka loku kota mole wa ku landzela a kunavela ka nyama,+ kanilezvi, hi lirandzo, tirelanani kota tikhumbi.+ 14 Hakuva a Nayo wontlhe wu tatiseka* ka cileletelo cin’we, caku: “Randza muakelani wa wena a ku fana ni lezvi u ti randzisako zvona.”+ 15 Kanilezvi loku mu simama ku lumana ni ku khadamulana,+ ti woneleni mu nga mbhetana ha n’wece.+

16 Kanilezvi ndzi ngalo: Simamani ku famba hi ka moya,+ mu nga ta tshuka mu maha kunavela ka nyama.+ 17 Hakuva a nyama yalwa ni moya ka lezvi yi zvi navelako, ni moya wulwa ni nyama; lezvi zva zvimbiri a zvi kotlani, hi kota ya lezvo, a mu mahi a zvilo lezvi mu zvi lavako.+ 18 Ahandle ka lezvo, loku n’wina mu rangelwa hi moya a mu lahasi ka nayo.

19 A mitiro ya nyama yi te dlunya, yi nga leyi: a wubhayi,*+ ni kungahlazveki, ni mahanyela ya tingana,*+ 20 ni ku khozela zvifananiso, ni wudhimoni,*+ ni wulala, ni kuholova, ni ciluse, ni cizangazangani, ni kungazwanani, ni kuhambana, ni zvitlawatlawana, 21 ni matshoho, ni wudhakwa,+ ni mibuzo ya vhilinganya, ni zvilo zvo fana ni lezvi.+ Ndza ranga ndzi mu tlharihisa hi zvilo lezvi, a ku khwatsi hi lezvi ndzi sinako ndzi mu tlharihisile, ndziku: Lava va mahako a zvilo zvo khwatsi hi lezvi va nga taga a tshomba ya Mufumo wa Nungungulu.+

22 Kanilezvi a handzu wa moya hi lowu: lirandzo, ni kutsaka, ni kurula, ni lihlazva-mbilu,* ni kusasa, ni wunene,+ ni kukholwa, 23 ni kuolova, ni kutikhoma.+ A ku na nayo wu alako a zvilo zvo khwatsi hi lezvi. 24 Ahandle ka lezvo, lava va nga va Kristu Jesu, va belele a nyama ni kumbilukela ka yona ni kunavela ka yona laha mhandzeni.+

25 Loku hi hanya hi ka moya, a hi fambeni hi kufaneleko hi ka moya.+ 26 Hi nga ti kukumukisi,+ hi vhuxa mapalisana ka mun’we ni mun’wani,+ hiva ni matshoho ka mun’we ni mun’wani.

6 Vamakabye, hambu loku a wokari a tshuka aba zambo ga hava na a nga zvi poli, n’wina lava mu ringanelwako hi ka moya, zamani ku ololoxa a munhu loye hi moya wa kuolova.+ Kanilezvi ti wonele+ kasi u nga ringiwi wenawu.+ 2 Simamani ku rwalelana a mindzhwalo ya n’wina yo bindza,+ hi ndlela leyo mu ta tatisa a nayo wa Kristu.+ 3 Hakuva loku a wokari a alakanya lezvaku i nchumu kuveni a hi nchumu,+ o ti kalavela. 4 Kanilezvi a mun’we ni mun’wani i wa hlole a mitiro yakwe,+ hi kona a to kuma cigelo ca ku tsaka hi lezvi a nga zvona, na a nga ti fananisi ni mun’wani munhu.+ 5 Hakuva a mun’we ni mun’wani i ta rwala a ndzhwalo wakwe yena n’winyi.+

6 Ahandle ka lezvo, ngha ni wihi a gondzisiwako a mhaka a mu avela a zvilo zvontlhe zvo saseka loyi a mu gondzisako.+

7 Mu nga ti kanganyisi: Nungungulu a nga kalavelwi. Hakuva leci a munhu a ci byalako, i ta tshovela caleco;+ 8 hakuva loyi a byalelako nyama yakwe, hi ka nyama yakwe i ta tshovela kubola, kanilezvi loyi a byalelako moya, hi ka moya i ta tshovela wutomi ga pindzukelwa.+ 9 Hikwalaho, hi nga tsiki a ku maha zvazvinene, hakuva loku hi nga rereki,* hi ta tshovela hi cikhati ca kona.+ 10 Makunu, loku ha ha hi ni cikhati,* a hi maheni zvazvinene ka vanhu vontlhe, kanilezvi nguvhunguvhu ka va laha ngangweni wa hina wa kukholwa.

11 Hi nga wonani lezvi ma nga kulisa zvona a maletra ya papilo legi ndzi nga mu tsalela hi mandla ya mina!

12 Vontlhe lava va lavako ku ti maha va vanene nyameni hi vona lava va mu kurumetako ku maha wukwera.* Va maha lezvo ntsena kasi va nga xanisiwi hi kota ya mhandze ya hlomulo* ya Kristu. 13 Hakuva hambu lava va mahiwako wukwera* a va hlayisi Nayo,+ kanilezvi va lava lezvaku mu mahiwa wukwera kasi va kuma ca ku ti dzundza hi cona nyameni ya n’wina. 14 Kanilezvi ngha ndzi nga tshuki ndzi ti dzundza hi nchumu, ahandle ka mhandze ya hlomulo* ya Hosi Jesu Kristu,+ loyi ha yena a tiko gi fileko* ka mina, na minawu ndzi fileko ka tiko. 15 Hakuva a ku mahiwa wukwera* kutani ku nga mahiwi wukwera a hi zva nchumu,+ a ca lisima kuva civangwa ciswa.+ 16 A kurula ni wuxinji a zvive ka vontlhe lava va fambako hi kufaneleko nayweni lowu wa mahanyela, ina, a zvive ka Izrayeli wa Nungungulu.+

17 Kusukela lezvi, ngha ku ngavi na munhu a ndzi karatako, hakuva mirini wa mina ndzi na ni zvifungo zvi kombako lezvaku ndzi nandza ga Jesu.+

18 A tipswalo ta Hosi ya hina Jesu Kristu ti wave ni moya lowu n’wina vamakabye mu wu kombisako. Amen.