PAPILO GA PAWULE KA VA LE EFESUSI

1 Pawule, a mupostoli wa Kristu Jesu hi kurandza ka Nungungulu, ka vobasa va nga le Efesusi+ lava va tsumbekileko ka Kristu Jesu:

2 Ngha muva ni tipswalo ni kurula zvi tako hi ka Nungungulu tlhelo Papayi wa hina ni ka Hosi Jesu Kristu.

3 I wa dhumiswe Nungungulu tlhelo Papayi wa Hosi ya hina Jesu Kristu, hakuva i hi katekisile ka Kristu hi makatekwa wontlhe ya moya ya le tilweni,+ 4 hi lezvi a nga hi hlawula a tiko na gi nga se vangiwa lezvaku hiva zvin’we naye,* kasi hiva vobasa, na hi nga hi na noda+ mahlweni kakwe hi lirandzo. 5 Hakuva i no ranga a hi mahela makungo+ ya ku hi maha vana vakwe+ ha Jesu Kristu, hi kuya hi lezvi zvi mu tsakisako ni kurandza kakwe+ 6 kasi ku dhumiswa a tipswalo takwe to ngangamela+ leti a hi kombisileko hi wunene ga a randzekako wakwe.+ 7 Ha yena, ha kuma a kutlhatlhiswa hi hakhelo ya kutlhatlhisa ya nkhata wakwe,+ ina, a kutsetselelwa ka zvihambunyeto zva hina,+ hi kuya hi kutala ka tipswalo takwe.

8 I mahile lezvaku a tipswalo leti ti andza nguvhu ka hina wutlharini gontlhe ni kuzwisiseni* kontlhe 9 hi ku hi tivisa a cihundla co basa+ ca kurandza kakwe. Hi kuya hi lezvi zvi mu tsakisako, yena wutsumbu i no maha makungo 10 ya ku yimisa a xaxameto kumbheleni ka zvikhati zvi yimisilweko, lezvaku a tlhanganisa zvilo zvontlhe ka Kristu, a zvilo zva le tilweni ni zvilo zva laha misaveni.+ Ina, ka yena 11 loyi hi nga zvin’we naye hi tlhela hi yimisiwa kuva vagi va tshomba,+ hina lava a rangileko a hi mahela makungo hi kuya hi kungo ga loyi a tatisako zvilo zvontlhe kota lezvi a zvi lavisako zvona hi kuya hi kurandza kakwe, 12 kasi hina lava hi rangileko hi tsumba ka Kristu hiva wudhumo ga kungangamela kakwe. 13 Kanilezvi n’winawu, mu no mu tsumba andzhako ka loku mu zwile a mhaka ya lisine, a mahungu ya manene ya kuhanyiswa ka n’wina. Andzhako ka loku mu kholwile, Nungungulu i no mu funga,+ ha yena, hi moya wo basa lowu wu tsumbisilweko, 14 lowu wu nga citiyisekiso* ca tshomba ya hina,+ hi kungo ga ku tlhatlhisa a tshomba ya Nungungulu+ hi hakhelo ya kutlhatlhisa,+ kasi zviva wudhumo gakwe go ngangamela.

15 Hikwalaho, na minawu, cima ndzizwa hi kukholwa loku mu nga nako ka Hosi Jesu ni lirandzo leli mu li kombisako ka vobasa vontlhe, 16 a ndzi tsiki ku bonga hi kota ya n’wina. Ndzi simama ku mu kumbuka mikhongelweni ya mina, 17 lezvaku a Nungungulu wa Hosi ya hina Jesu Kristu, a Papayi wa kungangamela, a mu nyika a moya wa wutlhari ni wa kuvhululelwa mhakeni ya wutivi ga lisine xungetano hi yena.+ 18 I no woningela a matihlo ya mbilu ya n’wina kasi mu fela ku tiva lezvaku kutsumba muni loku a mu vitaneleko kona, ni titshomba to ngangamela leti a vekeleko vobasa kota tshomba,+ 19 ni ku tiva a kuhlamalisa ka wukulu ga ntamu wakwe ka hina hi kholwako.+ A wukulu lego ga woneka ka matirela ya ntamu wakwe wa hombe 20 lowu a nga wu tirisa ka Kristu, laha a nga mu vhuxa hi ka vafileko a mu tshamisa reveni gakwe ga cinene+ le tilweni, 21 hehla nguvhu ka mifumo yontlhe, ni mintamu, ni wukulu, ni wuhosi, ni mavito wontlhe ma chulilweko,+ na ku nga hi ka nguva* leyi ntsena, kanilezvi ni ka leyi ya ha tako. 22 I no veka zvilo zvontlhe kambe lahasi ka mikondzo yakwe,+ a mu maha hloko ya zvilo zvontlhe lomu bandleni,+ 23 legi gi nga miri wakwe,+ gi nga kumbhelela ka loyi a tatisako zvilo zvontlhe ka vontlhe.

2 Ahandle ka lezvo, Nungungulu i mu nyikile wutomi, hambu lezvi mu nga file zvihambunyetweni ni zviwonhweni zva n’wina+ 2 lezvi mu nga famba ka zvona kale, mu pimanyisa a mahanyela ya tiko legi,+ mu landzela a mufumeli wa mintamu ya moya,+ wu nga moya+ lowu makunu wu tirako ka vana va kungaingisi. 3 Kunene, hina hontlheni hi wa hanya cikari kabye na hi landzela kunavela ka nyama ya hina,+ hi maha kurandza ka nyama ni ka maalakanyo ya hina+ niku hi ntumbuluko hi wa hi vana va zanga+ a ku fana ni van’wani. 4 Kanilezvi Nungungulu loyi a teleko hi wuxinji,+ hi kota ya lirandzo lakwe la hombe leli a hi randzileko hi lona,+ 5 i no hi nyika wutomi zvin’we na Kristu, hambu a cikhati leci hi nga file zvihambunyetweni zva hina+ — n’wina mu hanyisilwe hi tipswalo. 6 Ahandle ka lezvo, i no hi vhuxa zvin’we naye a tlhela a hi tshamisa zvin’we naye zvitshan’wini zva le tilweni zvin’we na Kristu Jesu,+ 7 kasi ka tinguva* ti tako a fela ku kombisa a kuhlamalisa ka kukula ka tipswalo takwe hi wunene gakwe legi a hi mahelako zvin’we na Kristu Jesu.

8 Hi kota ya tipswalo leti, mu ponisilwe hi kukholwa;+ lezvo a zvi kotekangi hi ntamu wa n’wina, kanilezvi cinyikiwo ca Nungungulu. 9 Ahihi, a zviti hi kota ya mitiro,+ kasi ku ngavi ni munhu a nga ni cigelo ca ku ti kulisa. 10 Hina hi ntiro wa mandla ya Nungungulu,* niku hi vangilwe+ zvin’we na Kristu Jesu+ kasi hi maha mitiro yo saseka leyi Nungungulu a hi yimiseleko yona na ka ha hi mahlweni kasi hi famba ka yona.

11 Hikwalaho, alakanyani lezvaku n’wina vanhu va matiko hi ka nyama, a kale mu wa vitaniwa ku “wukhuna”* hi lava va vitaniwako ku “wukwera”,* legi gi mahiwako nyameni hi mandla ya vanhu. 12 Cikhatini leco, mu wa nga hi zvin’we na Kristu, mu wa tsawukene ni tiko ga Izrayeli, mu wa nga hlayiwi ka zvivhumelwano zva citsumbiso;+ mu wa nga hi na kutsumba ne mu wa nga hi na Nungungulu tikweni.+ 13 Kanilezvi na mu hi ka Kristu Jesu, n’wina lava a kale mu nga hi kule, makunu mu laha kusuhani hi nkhata wa Kristu. 14 Hakuva hi yena kurula ka hina,+ loyi hi ka mitlawa yimbiri a nga maha mun’we,+ a tlhela a khungumula a muro wa laha cikari wu nga kari wu yi hambanisa.+ 15 Hi nyama yakwe, i no fuvisa wulala, wu nga Nayo wa zvileletelo, kasi hi ka mitlawa yimbiri yi nga ka yena a wumba munhu mun’we wa muswa+ ni ku maha kurula, 16 ni ku zwananisa hi kumbhelela na Nungungulu a mitlawa leyi ya yimbiri yiva miri wun’we hi mhandze ya hlomulo,*+ hakuva i dele wulala+ hi wutsumbu gakwe. 17 I nota a ta kanela mahungu ya manene ya kurula ka n’wina lava mu nga hi kule, ni kurula ka lava va nga hi kusuhani, 18 hakuva ha yena, hina va mitlawa leyi ya yimbiri ha zvi kota ku nghena hi kutlhatlheka ka Papayi hi moya wun’we.

19 Hikwalaho, n’wina a ma ha hi vambe vanhu ne valuveli,+ kanilezvi mu zvisumbulwa-kulobye+ ni vobasa tlhelo zviro zva ngango wa Nungungulu,+ 20 niku mu akilwe hehla ka ciseketelo ca vapostoli ni vaphrofeti,+ leci Kristu Jesu wutsumbu a nga yena ribye ga laha khoneni ga ciseketelo.+ 21 Ka yena, a yindlu yontlhe, leyi a zvipandze zva yona zvi tlhanganisilweko khwatsi,+ ya kula kasi yi maha tempeli yo basa ya Jehovha.*+ 22 Ka yena, n’winawu mu kari mu akiwa zvin’we lezvaku muva wutshamu legi Nungungulu a to tshama ka gona hi moya.+

3 Hi cigelo leco, mina Pawule, ndzi nga cibochwa+ ca Kristu Jesu hi kota ya n’wina vanhu va matiko . . . ;* 2 Ndzi alakanya lezvaku mu wu zwile a ntiro wa kuva nandza+ ga tipswalo ta Nungungulu lowu ndzi nyikilweko hi kota ya n’wina, 3 lezvaku ndzi tivisilwe a cihundla co basa hi kuvhululelwa kota lezvi ndzi rangileko ndzi mu tsalela hi magezu ma tsongwani. 4 Hikwalaho, a cikhati leci mu to gondza a timhaka leti, mu ta zvi wona lezvi ndzi ci zwisisisako zvona a cihundla co basa+ ca Kristu. 5 Zvizukulwaneni zvin’wani, a cihundla leci a ci tivisiwangi ka vana va vanhu a ku khwatsi hi lezvi makunu ci tivisiswako zvona hi moya ka vapostoli vakwe vo basa ni vaphrofeti,+ 6 ku nga lezvaku, zvin’we na Kristu Jesu ni hi mahungu ya manene, a vanhu va matiko va wa tava vagi-kulori va tshomba, ni zviro-kulori zva miri,+ ni vahlengeli-kulori va citsumbiso. 7 Ndzi nova nandza hi kota ya cinyikiwo* ca tipswalo ta Nungungulu leti ndzi nyikilweko tona hi kutira ka ntamu wakwe.+

8 Mina ndzi nga mutsongwani ka loyi wa mutsongwani cikari ka vobasa vontlhe,+ ndzi no nyikiwa a tipswalo leti+ kasi ku kanela ka matiko a mahungu ya manene ya titshomba ta Kristu ti nga hiko na kupimiwa, 9 ni ku kombisa ka vanhu vontlhe a matirela ya cihundla co basa+ leci ka tinguva to tala ci nga fihlilwe ka Nungungulu loyi a nga vanga zvilo zvontlhe. 10 Lezvo zvi mahekile kasi ku makunu, hi ku tirisa bandla,+ ku tivisiwa ka mifumo ni wuhosi ga le tilweni a wutlhari ga Nungungulu gi tsalangeneko zva hombe nguvhu.+ 11 Lezvi zvi longoloka ni kungo ga pindzukelwa legi a nga gi maha ha Kristu+ Jesu, a Hosi ya hina, 12 loyi ha yena hi nga ni kutlhatlheka loku kuwulawuleni ni ku nghena hi kutlhatlheka+ na hi hi ni kutsumba hi kota ya lezvi hi kholwako kakwe. 13 Hikwalaho, ndza mu kombela lezvaku mu nga rereki hi ku wona tixanisa leti ti ndzi weleko hi kota ya n’wina, hakuva wudzundzo ka n’wina.+

14 Hi cigelo leco, ndza khizama mahlweni ka Papayi, 15 loyi a mingango yontlhe ya le tilweni ni ya laha misaveni yi chulilweko hi yena. 16 Ndzi khongelela lezvaku, hi kungangamela kakwe ka hombe, a tiyisa a munhu wa n’wina wa lomu ndzeni+ hi ntamu wa moya wakwe, 17 ni lezvaku hi kukholwa ka n’wina, Kristu a tshama timbilwini ta n’wina zvin’we ni lirandzo.+ Ngha mu zima timitsu,+ mu tiya ciseketelweni,+ 18 kasi zvin’we ni vobasa vontlhe, mu zvi kota ku zwisisa hi kumbhelela a kuanama, ni kuleha, ni kutlakuka, ni kueta; 19 ni ku tiva a lirandzo la Kristu+ leli li hundzako a kutiva kontlhe kasi mu tatiswa hi kutala kontlhe loku Nungungulu a nyikako.

20 Makunu ka yena, loyi hi ntamu wakwe lowu wu tirako ka hina,+ a zvi kotako ku maha zvotala nguvhu a ku hundza zvontlhe lezvi hi zvi kombelako kutani ku zvi alakanya,+ 21 a wudzundzo a give ka yena hi ka bandla ni ka Kristu Jesu zvizukulwaneni zvontlhe kala kupindzuka ni kupindzuka. Amen.

4 Hikwalaho, mina loyi ndzi nga cibochwa+ Hosini, ndza mu khongotela lezvaku muva ni mafambela ma faneleko+ a kuvitaniwa loku mu nga vitanelwa kona, 2 hi kutikoramisa kontlhe+ ni kuolova, ni lihlazva-mbilu,+ mu timiselana hi lirandzo,+ 3 mu pinyamela a ku hlayisa a wumun’we ga moya cibohweni ca kurula.+ 4 Kova ni miri wun’we,+ ni moya wun’we,+ a ku khwatsi hi lezvi ku nga ni kutsumba kun’we+ loku mu vitanelweko kona; 5 ni Hosi yin’we,+ ni kukholwa kun’we, ni kubhabhatisa kun’we; 6 ni Nungungulu mun’we, a Papayi wa vontlhe, loyi a nga hehla ka vontlhe, ni ku tira hi ka vontlhe, ni cikari ka vontlhe.

7 Makunu, a mun’we ni mun’wani wa hina i nyikilwe a tipswalo ti ringanako a cinyikiwo* leci Kristu a mu pimeleko.+ 8 Hakuva a Mitsalo yi ngalo: “A cikhati leci a nga tlakukela hehla, i no famba ni zvibochwa; i no nyikela vanhu kota zvinyikiwo.”+ 9 Makunu zvi wula yini lezvi zvaku ‘i no tlakukela hehla’ loku ku nga hi lezvaku i rangile a relela matshan’wini ya lahasi, ku nga misava ke? 10 Loyi a releleko hi yaloyi a tlakukeleko+ hehla nguvhu ka matilo wontlhe,+ lezvaku a nyika kumbhelela zvilweni zvontlhe.

11 I no nyika vokari a kuva vapostoli,+ a van’wani a kuva vaphrofeti,+ a van’wani a kuva vavhangeli,*+ a van’wani a kuva varisi ni vagondzisi,+ 12 kasi ku ololoxa* a vobasa, va tirela van’wani, ni ku aka a miri wa Kristu,+ 13 kala hontlheni hi chikela ka wumun’we ga* kukholwa ni ka wutivi ga lisine hi N’wana wa Nungungulu, hiva ka ciyimo ca munhu a kulileko*,+ hiza hi chikela ka ciyimo ci mbheleleko ca Kristu. 14 Hikwalaho, hi nga ha mahi vanana hi kukuletwa a ku khwatsi hi loku hi kokiwa hi mavingo,* hi yisiwa seno ni seno hi mimoya yontlhe ya tigondzo,+ hi tipulani ta vanhu, ni kukhohlisa ka mano ma kanganyisako. 15 Kanilezvi na hi wulawula lisine, a hi kuleni hi lirandzo zvilweni zvontlhe ka yena loyi a nga hloko, Kristu.+ 16 Hi ka yena, a miri wontlhe+ wu tlhanganisilwe khwatsi wu tlhela wu tiyisiwa hi zviro zvontlhe zvi nyikako lezvi zvi lavekako. Loku a ciro cin’we ni cin’wani ci tira khwatsi, zvi maha ku a miri wu kula laha wu ti akako hi lirandzo.+

17 Hikwalaho, ndza mu byela ni ku mu kustumunyela mahlweni ka Hosi, ndziku: Mu nga ha fambisi ku khwatsi hi lezvi a vanhu va matiko va fambisako zvona,+ manyaleni ya kupima kabye.+ 18 Va munyameni kupimeni kabye, va tsawukene ni wutomi legi gi lumbako Nungungulu, hi kota ya kungativi loku ku nga cikari kabye, hi kota ya kutlanyala ka timbilu tabye. 19 Na va nga ha hi na tingana hi nchumu, va no ti nyikela ka mahanyela ya tingana,*+ kasi va pinyamela ku maha zvilo zvontlhe zvi nga hlazvekangiko.

20 Kanilezvi n’wina a mu gondzangi lezvaku Kristu i tshamisile lezvo, 21 loku hakunene mu mu zwile ni ku gondzisiwa hi yena, a ku khwatsi hi lezvi a lisine li nga ka Jesu. 22 Mu gondzisilwe lezvaku mu fanele ku tlhatlha munhu wa kale+ loyi a longolokako ni mahanyela ya n’wina ya kale ni ku gohiwa hi kunavela kakwe ku khohlisako.+ 23 Simamani ku mahiwa lava vaswa a moyeni wa kupima ka n’wina,+ 24 niku ambalani munhu muswa+ loyi a vangilweko hi kurandza ka Nungungulu ka kululama ka lisine ni kutsumbeka.

25 Hikwalaho, kota lezvi mu tsikileko mawunwa, a mun’we ni mun’wani wa n’wina i wa wulawule lisine ka muakelani wakwe,+ hakuva a mun’we ni mun’wani wa hina ciro ka mun’wani.+ 26 Zangarani, kanilezvi mu nga wonhi;+ a gambo gi nga peli na ma ha zangarile;+ 27 mu nga mu nyiki cikhati* Dhiyabho.+ 28 Loyi a yivako i wa tsike ku yiva, kanilezvi i wa tire hi kutikarata, a maha mitiro ya yinene hi mandla yakwe,+ kasi a kuma zvo avela loyi a vhumalako.+ 29 Ku nga humi gezu go nyenyeza* hi non’wini wa n’wina,+ kanilezvi saseka zvazvinene lezvi zvi akako hi kuya hi cilaveko ca kona, kasi zviva cikatekiso ka lava va zvi zwako.+ 30 Ahandle ka lezvo, mu nga zangarisi* a moya wo basa wa Nungungulu+ lowu mu fungilweko hi wona+ na mu fungelwa a siku ga ku tlhatlhiswa hi hakhelo ya kutlhatlhisa.+

31 Tsikani a civiti contlhe,+ ni zanga, ni khulo, ni guwa, ni kurukatela+ zvin’we ni kubiha kontlhe.+ 32 Kanilezvi mahani va vanene ka mun’we ni mun’wani, mu zwelana wusiwana+ ni ku tsetselelana hi mbilu yontlhe a ku khwatsi hi lezvi Nungungulu yenawu a mu tsetseleleko hi mbilu yontlhe ha Kristu.+

5 Hikwalaho, mahani vapimanyisi va Nungungulu,+ kota vana va randzekako, 2 mu simama ku famba hi lirandzo,+ a ku fana ni lezvi Kristu yenawu a nga hi* randza,+ a ti nyikela hi kota ya hina* ava munyikelo ni muphahlo, a masema yo nuhela ka Nungungulu.+

3 A wubhayi,* ni kungahlazveki ka tixaka tontlhe, ni makangwa, zvi nga tshuki zvi kumbukiwa cikari ka n’wina,+ hakuva a zvi faneli vanhu vo basa;+ 4 ne hambu a mahanyela ya tingana, ni kuwulawula ka hava, ne mafenya ya tihlamba+ — a zvilo lezvi a zvi faneli — kanilezvi saseka magezu ya kubonga.+ 5 Hakuva n’wina ma zvi tiva ni ku zvi zwisisa lezvaku a zvibhayi,*+ ni vanhu va nga hlazvekangiko, ni lava va makangwa+ — ku nga ku khozela zvifananiso — va nga tava ni tshomba Mufun’weni wa Kristu ni wa Nungungulu.+

6 Ku nga tshuki kuva ni munhu a mu kanganyisako hi magezu ya hava, hakuva hi kota ya zvilo lezvi, a zanga ya Nungungulu yata hehla ka vana va kungaingisi. 7 Hikwalaho, mu nga hlengeli navo; 8 hakuva a kale mu wa hi munyama, kanilezvi zvezvi mu kuwonekela+ zvin’we ni Hosi.+ Simamani ku famba kota vana va kuwonekela, 9 hakuva a handzu wa kuwonekela tixaka tontlhe ta wunene, ni kululama, ni lisine.+ 10 Tshamani hi ku hlola kasi mu tiva lezvi zvi amukelekako+ ka Hosi, 11 niku tsikani ku hlengela mitirweni ya munyama yi nga pswaliko mihandzu;+ kanilezvi yi paluxeni yiku dlunya. 12 Hakuva a zvilo lezvi va zvi mahako cihundleni zvi dhanisa ni ku zvi wula. 13 Kanilezvi a zvilo zvontlhe zvi paluxiwako* zvi tivekisiwa hi kuwonekela, hakuva zvontlhe lezvi zvi tivekisiwako kuwonekela. 14 Hikwalaho, ku wuliwa ku ngalo: “Khindlimuka wena u etleleko, u vhuka hi ka vafileko,+ Kristu i ta ku woningela.”+

15 Hikwalaho, ti woneleni nguvhu kasi mu nga fambisi ku khwatsi a mu tlharihangi, kanilezvi kota vatlharihileko, 16 mu ci tirisa khwatsi a cikhati ca n’wina*+ hakuva a masiku ma bihile. 17 Hikwalaho, tsikani kuva zvipumbu, kanilezvi ti karateleni ku tiva ku cini a kurandza ka Jehovha.*+ 18 Ahandle ka lezvo, mu nga popiwi hi vhinyo,+ hakuva yi yisa manyaleni, kanilezvi simamani ku tala hi moya. 19 Wulawulani mun’we ka mun’wani* hi tisimu, ni tisimu ta ku dhumisa Nungungulu, ni tisimu ta moya, mu yimbelela+ ni ku dhumisa+ Jehovha* timbilwini ta n’wina,+ 20 contlhe cikhati mu bonga+ Nungungulu tlhelo Papayi wa hina hi kota ya zvilo zvontlhe hi vito ga Hosi ya hina Jesu Kristu.+

21 Ti koramiseni ka mun’we ni mun’wani+ hi kota ya cichavo hi Kristu. 22 A sati i wa ti koramise ka nuna wakwe+ a ku fana ni lezvi a ti koramisako ka Hosi, 23 hakuva a nuna i hloko ya sati wakwe,+ a ku khwatsi hi lezvi Kristu a nga hloko ya bandla+ ni muhanyisi wa miri lowu. 24 Kunene, a ku khwatsi hi lezvi a bandla gi ti koramisako ka Kristu, a sati yenawu i fanele ku ti koramisa ka nuna wakwe zvilweni zvontlhe. 25 Wena nuna, simama ku randza sati wa wena,+ a ku fana ni lezvi Kristu yenawu a randzileko bandla aza a ti nyikela hi kota ya gona,+ 26 kasi a gi basisa, a gi hlazva hi mati ya mhaka,+ 27 lezvaku a gi yimisa mahlweni kakwe na gi hi ni kungangamela kontlhe, na gi nga hi na noda ne nkonyi, ne cin’wani cilo co fana ni lezvo,+ kanilezvi na gi basile gi nga hi na cisolo.+

28 Hi kufanana, a nuna i fanele ku randza sati wakwe a ku khwatsi hi lezvi a wu randzisako zvona a miri wakwe. A wanuna loyi a randzako a sati wakwe, wa ti randza wutsumbu, 29 hakuva i hava a tshukileko a venga a miri* wakwe, kanilezvi wa wu wundla ni ku wu tshotshota, a ku khwatsi hi lezvi Kristu a mahako ka bandla 30 hakuva hina hi zviro zva miri wakwe.+ 31 “Hi cigelo leco, a wanuna i ta siya papayi wakwe ni mamani wakwe a namarela ka* sati wakwe, lava vambiri va tava nyama yin’we.”+ 32 A cihundla leci co basa+ ca hombe. Kanilezvi ndzi wulawula hi Kristu ni bandla.+ 33 Hambulezvo, a mun’we ni mun’wani wa n’wina i fanele ku randza a sati wakwe+ a ku fana ni lezvi a ti randzisako zvona; hi tlhelo gin’wani, a sati i fanele kuva ni cichavo co eta hi nuna wakwe.+

6 Vanana, ingisani vapswali va n’wina+ Hosini, hakuva lezvo zvi lulamile. 2 “Kombisa cichavo ka papayi wa wena ni ka mamani wa wena”+ — lowu hi wona a nayo wo sangula wu nga ni citsumbiso: 3 “Kasi zvi ku fambela khwatsi,* u hanya cikhati co leha laha misaveni.” 4 N’winawu vapapayi, mu nga zangarisi vanana va n’wina,+ kanilezvi simamani ku va wundla hi kulaya+ ni gondziselelo ya Jehovha.*+

5 N’wina tikhumbi, ingisani venyi va n’wina va vanhu*+ hi kuchava ni kururumela hi timbilu ta n’wina tontlhe, a ku khwatsi hi loku mu ingisa Kristu, 6 na ku nga hi ntsena loku mu woniwa,* kasi ku tsakisa vanhu, + kanilezvi kota malandza ya Kristu ma mahako a kurandza ka Nungungulu hi muhefemulo* wontlhe.+ 7 Tirani hi kutsaka a ku khwatsi hi loku mu tirela Jehovha,*+ na ku nga hi vanhu, 8 hakuva ma zvi tiva lezvaku ni wihi nchumu wa wunene lowu a munhu a mahako i ta tlheliselwa hi Jehovha,*+ kani i khumbi kutani munhu a tlhatlhekileko. 9 N’winawu venyi, simamani ku maha zvalezvo ka tikhumbi ta n’wina, mu nga ti dzukiseli, hakuva ma zvi tiva lezvaku a N’winyi wa tona ni wa n’wina i le matilweni,+ niku a nga na cihlawulela.

10 Hi kugumesa, simamani ku tiyisiwa Hosini ni ntan’wini+ wa yona wa hombe. 11 Hlomani a matlhari wontlhe+ ya Nungungulu kasi mu zvi kota ku yima mu tiya mu ku nde mulwa ni mano* ya Dhiyabho; 12 hakuva hi le kulweni,+ na hi ngalwi ni nkhata ni nyama, kanilezvi hilwa ni mifumo,* ni vafumeli, ni tihosi ta tiko ta munyama lowu, ni mintamu ya mimoya ya kubiha+ ya le tilweni. 13 Hi cigelo leco, hlomani a matlhari wontlhe ya Nungungulu+ kasi muva ni ntamu wa ku yima mu tiya sikwini ga kubiha, niku andzhako ka loku mu mahile zvontlhe, mu zvi kota ku yima mu ku nde.

14 Hikwalaho, tiyani mu ku nde, na mu bohile libhandi la lisine li tiya zviwunwini zva n’wina,+ ni cikatawu ca simbi ca kululama,+ 15 na mu bohile mikondzweni ya n’wina a ku longa a ku kanela a mahungu ya manene ya kurula.+ 16 Ahandle ka zvontlhe lezvi, khomani a citlhangu ca hombe ca kukholwa,+ leci mu to zvi kota ku tima hi cona a mipaxa yontlhe yi vhurako ya loyi wa kubiha.+ 17 Bohani ni kapasete ga kuhanyisa,+ mu khoma cipadha ca moya, yi nga mhaka ya Nungungulu,+ 18 na mu simama ku khongela hi moya hi mikhongelo ya tixaka tontlhe+ ni kukhongotela contlhe cikhati.+ Kasi lezvo zvi koteka, tshamani na mu khindlimukile, mu khongela na mu khongotelela vobasa vontlhe contlhe cikhati. 19 Khongelelani na minawu, lezvaku ndzi nyikiwa magezu a cikhati leci ndzi to vhulula nomu kasi ndzi zvi kota ku wulawula hi kutiya ndzi tivekisa a cihundla co basa ca mahungu ya manene,+ 20 lawa ndzi nga embaxadhori wa wona+ na ndzi bohilwe hi machini, ni lezvaku ndzi zvi kota ku wulawula hi wona hi kutiya, kota lezvi ndzi faneleko ku wulawula.

21 Niku, kasi mu tiva a ciyimo ca mina ni mavhukela ya mina, Tikikusi,+ a makabye a randzekako tlhelo nandza go tsumbeka Hosini, i ta mu hlawutela zvontlhe.+ 22 Hi cigelo leco, ndza mu rumela ka n’wina kasi mu tiva a mavhukela ya hina ni lezvaku a ta chavelela timbilu ta n’wina.

23 Ngha n’wina, vamakabye, muva ni kurula ni lirandzo ni kukholwa zvi tako hi ka Nungungulu, a Papayi, ni ka Hosi Jesu Kristu. 24 Ngha a tipswalo tiva zvin’we ni vontlhe lava va randzako Hosi ya hina Jesu Kristu hi lirandzo li nga wonhekiko.