PAPILO GA PAWULE KA VA LE KOLOSI

1 Pawule, a mupostoli wa Kristu Jesu hi kurandza ka Nungungulu, na Timote+ a makabye wa hina, 2 ka vobasa ni vamakabye va tsumbekileko va nga ka Kristu le Kolosi:

Ngha muva ni tipswalo ni kurula zvi tako hi ka Nungungulu tlhelo Papayi wa hina.

3 Contlhe cikhati, ha bonga Nungungulu, a Papayi wa Hosi ya hina Jesu Kristu, a cikhati leci hi mu khongelelako, 4 hakuva hi zwile hi kukholwa ka n’wina ka Kristu Jesu, ni lirandzo leli mu nga nalo hi vobasa vontlhe 5 hi kota ya kutsumba loku mu vekelweko matilweni.+ Mu sina mu zwile a kutsumba loko mhakeni ya lisine ya mahungu ya manene 6 lawa ma tileko ka n’wina. A ku khwatsi hi lezvi a mahungu ya manene ma pswalako mihandzu ni ku andza tikweni gontlhe,+ ma maha zvalezvo ni ka n’winawu kusukela ka siku legi mu nga mazwa ni ku tiva khwatsi a tipswalo ta lisine ta Nungungulu. 7 Hi zvalezvo mu nga gondza ka mutiri-kulori wo randzeka, Epafrasi,+ a nandza gi tsumbekileko ga Kristu, loyi a hi vhaletako. 8 I hi hlawutele kambe ni lirandzo leli mu nga nalo hi tlhelo ga moya.*

9 Hi cigelo leco kambe, kusukela siku legi hi nga zvizwa, a hi tshukangi hi tsika ku mu khongelela+ ni ku kombela lezvaku mu tala hi wutivi ga lisine+ ga kurandza kakwe zvin’we ni wutlhari gontlhe ni kuzwisisa ka moya,+ 10 kasi mu famba hi ndlela yi fanelako Jehovha,* lezvaku mu mu tsakisa hi kumbhelela, na mu simama ku pswala mihandzu mitirweni yontlhe ya yinene ni ku engetela wutivi ga lisine ga Nungungulu.+ 11 Hi khongelela kambe lezvaku mu tiyiswa hi ntamu wontlhe hi kuya hi ntamu wakwe wo ngangamela+ kasi mu zvi kota ku timisela zvontlhe hi lihlazva-mbilu na mu tsakile, 12 na mu kari mu bonga Papayi, loyi a nga mu maha mu ringanelwa hi ku hlengela tshombeni ya vobasa+ kuwonekeleni.

13 I no hi tlhatlhisa ntan’wini wa munyama,+ a hi rurisa hiya mufun’weni wa N’wana wakwe wo randzeka, 14 loyi hi ka yena hi tlhatlhiswako hi hakhelo ya kutlhatlhisa, ku nga ku tsetselelwa a zviwonho zva hina.+ 15 Hi yena a nga mufananiso wa Nungungulu a nga wonekiko,+ a matewula ya zvivangwa zvontlhe;+ 16 hakuva, hi ku tirisa yena, ku no vangiwa a zvilo zvontlhe lezvi zvin’wani, le tilweni ni laha misaveni, a zvilo zvi woniwako ni zvilo zvi nga woniwiko,+ kani zvitshamu zva wuhosi, kani wufumeli, kani mifumo kutani wuhosi. Zvontlhe lezvi zvin’wani zvi vangilwe hi ku tirisa yena,+ na zvi vangelwa yena. 17 Ahandle ka lezvo, yena i wa hi kona na ku nga seva ni zvilo zvontlhe lezvi zvin’wani,+ niku a zvilo zvontlhe lezvi zvin’wani zvive kona ha yena. 18 Hi yena a nga hloko ya miri, gi nga bandla.+ Hi yena masangulo, a matewula ya kuvhuka hi ka vafileko,+ kasi ava yena wo sangula ka zvilo zvontlhe; 19 hakuva zvi no mu xalalisa Nungungulu lezvaku a kumbhelela kontlhe ku tshama ka yena,+ 20 ni lezvaku ha yena, a zwananisa zvilo zvontlhe lezvi zvin’wani na yena n’winyi,+ a zva laha misaveni ni zva le tilweni, hi ku maha kurula hi nkhata+ lowu a wu halatileko mhandzeni ya hlomulo.*

21 Kunene, n’wina lava a kale mu nga tsawukene na Nungungulu ni kuva valala vakwe hi lezvi mu nga vekile a kupima ka n’wina mitirweni ya kubiha, 22 makunu i mu zwananisile na yena n’winyi hi miri wa nyama wa loyi a fileko, kasi a mu hendleleta na mu basile, na mu nga hi na cisolo ne nandzu mahlweni kakwe.+ 23 Leci ci lavekako ku mu simama kukholweni,+ mu yimisiwa ciseketelweni+ mu tlhela mu tiya,+ mu nga tsawukaniswi ni kutsumba ka mahungu ya manene lawa mu nga mazwa ma tlhela ma chumayelwa ka zvivangwa zvontlhe lahasi ka tilo,+ lawa mina, Pawule, ndzi nga nandza ga wona.+

24 Makunu ndza tsaka kuxanisekeni ka mina hi kota ya n’wina,+ ni ku rwala mirini wa mina lezvi zvi seleko ka zvixaniso zva Kristu hi kota ya miri wakwe,+ gi nga bandla.+ 25 Ndzi nova nandza ga bandla legi hi kuya hi ntiro+ lowu Nungungulu a ndzi nyikileko, hi kota ya n’wina, wa ku chumayela a mhaka ya Nungungulu hi kumbhelela, 26 a cihundla co basa+ leci ci nga fihlilwe kusukela tinguveni* ti hundzileko+ ni ka zvizukulwana zvi hundzileko. Kanilezvi makunu ci vhululelwe a vobasa vakwe,+ 27 lava Nungungulu a nga tsakela ku va tivisa, cikari ka matiko, a titshomba to ngangamela ta cihundla leci co basa,+ leci ku nga Kristu a nga zvin’we na n’wina, a kutsumba ka kungangamela kakwe.+ 28 Hi yena hi mu kanelako, na hi kari hi luleka vontlhe ni ku gondzisa vontlhe hi wutlhari gontlhe, kasi hi fela ku hendleleta a vanhu vontlhe na va mbhelele ka Kristu.+ 29 Hi cigelo leco, hakunene ndza ti tsitsirita, ndzi ti karata hi ntamu wakwe lowu wu tirako hi ntamu ka mina.+

2 Hakuva ndzi lava ku mu zvi tiva lezvaku a yi no ku kula a yimpi leyi ndzi lwelako n’wina, ni lava va nga le Lawodhikeya,+ ni vontlhe lava va nga kala ku ndzi wona hi nghohe.* 2 A kungo ga mina hi lezvaku va tangaliswa timbilwini tabye+ ni kuva va bohana hi lirandzo,+ va tlhela vava ni titshomba tontlhe ti kumiwako hi ku tiyiseka hi kumbhelela ka lezvi va zvi zwisisako, kasi va kuma wutivi ga lisine ga cihundla co basa ca Nungungulu, ku nga Kristu.+ 3 A titshomba tontlhe ta wutlhari ni kutiva ti fihlilwe khwatsi ka yena.+ 4 Ndzi wula lezvi kasi mu nga kanganyisiwi hi munhu hi magezu ma xengako. 5 Hambu lezvi ndzi nga hava hi miri, ndzi na n’wina hi moya, na ndzi tsaka hi ku wona lezvaku ma famba hi nayo+ ni ku wona a kutiya ka kukholwa ka n’wina ka Kristu.+

6 Hikwalaho, a ku khwatsi hi lezvi mu vhumeleko Kristu Jesu, a Hosi, simamani ku famba zvin’we naye 7 mu zima mitsu, mu akiwa ka yena,+ mu tiyiswa kukholweni,+ kota lezvi mu gondzisilweko, mu tlhela mu tala mu halakela hi kubonga.+

8 Ti woneleni kasi ku ngavi na munhu a mu mahako tikhumbi hi filozofiya ni kukanganyisa ka hava+ zvi seketelwako ka mikhuwo ya vanhu ni ka zvilo zvo sangula zva tiko, na ku nga hi ka Kristu; 9 hakuva a kutala kontlhe ka matshamela ya Nungungulu ku tshamile kakwe hi miri.+ 10 Hikwalaho, n’wina mu kumile a kutala ha yena, loyi a nga hloko ya mifumo yontlhe ni mintamu yontlhe.+ 11 Hi kuzwanana ka n’wina naye, n’winawu mu no mahiwa wukwera* hi wukwera legi gi nga mahiwiko hi mandla, kanilezvi a wukwera ga Kristu,+ legi gi mahiwako hi ku tlhatlha a miri wa nyama.+ 12 Hakuva mu lahlilwe zvin’we naye kubhabhatisweni kakwe,+ niku hi kuzwanana ka n’wina naye, mu no vhuxiwa zvin’we naye kambe+ hi kota ya kukholwa ka n’wina ka ntiro wa ntamu wa Nungungulu, loyi a nga mu vhuxa hi ka vafileko.+

13 Ahandle ka lezvo, hambu lezvi mu nga file zvihambunyetweni zva n’wina ni ka wukhuna* ga nyama ya n’wina, Nungungulu i no mu nyika wutomi zvin’we naye.+ I no hi tsetselela hi mbilu yontlhe a zvihambunyeto zva hina zvontlhe,+ 14 a vhinya a papilo+ legi gi nga hi ni zvileletelo+ zvi nga hi vhukela.+ I no gi susa, a gi belela mhandzeni ya hlomulo.*+ 15 I no tlhatlha a mifumo ni wuhosi zvi sala cimbyiri, a zvi kombisa kubaseni kota zvi hlulilweko,+ a zvi rendzelekelisa hi ku tirisa yona* na a giyagiya.

16 Hikwalaho, ku ngavi na munhu a mu lamulako hi kota ya zvilo lezvi mu gako ni kunwa,+ kutani hi mhaka ya ku hlayisa mibuzo, kutani hweti yiswa+ kutani sabhadho.+ 17 A zvilo lezvi i ndzhuti wa lezvi zvi nga hata,+ kanilezvi a zva civiri hi Kristu.+ 18 Mu nga tsiki munhu loyi a tsakiswako hi kutikoramisa ka hava ni lixaka lo kari la wukhozeli ga tingilozi a mu tsandzekisa ku kuma a nchachazelo;+ a munhu loye i ti kulisa hi* lezvi a zvi wonileko. Kunene, a kupima kakwe ka nyama ku ti kulisa mahala, 19 a nga khomi zvi tiya ka hloko,+ ku nga loyi ha yena a miri wontlhe wu wundliwako ni ku tlhanganisiwa hi mahlakala ni misiha, wu kula hi kukula loku ku tako hi ka Nungungulu.+

20 Loku mu file zvin’we na Kristu hi tlhelo ga zvilo zvo sangula zva tiko,+ hikuyini ma ha hanyisako ku khwatsi mova va tiko hi ku simama mu ti koramisa ka zvileletelo lezvi zvaku:+ 21 “U nga zvi khomi, u nga zvi ringi, u nga zvi henyi”, 22 na ku wuliwa zvilo lezvi zvi mbhelako hi ku tirisiwa, hi kuya hi zvileletelo ni tigondzo ta vanhu ke?+ 23 Hambu lezvi a zvilo lezvi zvi wonekisako ku khwatsi wutlhari ka makhozelela ya kurandza ka munhu ni kutikoramisa ka mawunwa, ni ku xanisa miri,+ a zvi vhuni nchumu yimpini ya kulwa ni kunavela ka nyama.

3 Hambulezvo, loku mu vhuxilwe zvin’we na Kristu,+ simamani ku hlota zvilo zva le hehla, ku nga lomu Kristu a tshamileko kona, reveni ga cinene ga Nungungulu.+ 2 Simamani ku veka kupima ka n’wina zvilweni zva le hehla,+ na ku nga hi ka zvilo zva laha misaveni.+ 3 Hakuva mu file, niku a wutomi ga n’wina gi fihlilwe zvin’we na Kristu ka Nungungulu. 4 A cikhati leci Kristu, loyi a nga wutomi ga hina,+ a to kombekisiwa, n’winawu mu ta kombekisiwa zvin’we naye hi kungangamela.+

5 Hikwalaho, dayani a zviro zva miri wa n’wina+ zva laha misaveni mhakeni ya wubhayi,* ni kungahlazveki, ni ku vhura hi ku navela masango,+ ni kunavela ko biha, ni makangwa, ku nga ku khozela zvifananiso. 6 Hi kota ya zvilo lezvi, a zanga ya Nungungulu yata. 7 Hi zvalezvi a hanyela ga n’winawu gi nga tshamisile zvona,* mahanyeleni ya n’wina ya kale.*+ 8 Kanilezvi, makunu tsikani a zvilo lezvi zvontlhe: a khulo, ni zanga, ni kubiha,+ ni magezu yo tlhava,+ ni kurukatela+ ku nga tshuki ku huma non’wini wa n’wina. 9 Mu nga hembelani.+ Tlhatlhani a munhu wa kale+ ni mitiro yakwe, 10 mu ambala a munhu muswa,+ loyi a mahiwako muswa hi wutivi ga lisine a ku khwatsi mufananiso wa Loyi a nga mu vanga.+ 11 Laho a ku na muGreki ne muJudha, a ku na wukwera* ne wukhuna,* a ku na muluveli, a ku na muSkite,* a ku na khumbi ne munhu wa kutlhatlheka; kanilezvi Kristu hi yena zvontlhe ka vontlhe.+

12 Hikwalaho, kota vahlawulilweko va Nungungulu,+ a vabasileko ni varandzekako, ambalani a mbilu ya lirandzo ni kuzwela-wusiwana,+ ni kusasa, ni kutikoramisa,+ ni kuolova,+ zvin’we ni lihlazva-mbilu.+ 13 Simamani ku timiselana ni ku tsetselelana hi mbilu yontlhe+ hambu loku a munhu a hi ni cigelo ca ku sola mun’wani.+ A ku khwatsi hi lezvi Jehovha* a nga mu tsetselela hi mbilu yontlhe, n’winawu mahani zvalezvo.+ 14 Kanilezvi, ahandle ka zvontlhe lezvi, ambalani a lirandzo,+ hakuva a lirandzo ciboho co mbhelela ca wumun’we.+

15 Ahandle ka lezvo, tsikani a kurula ka Kristu ku fuma a timbilwini* ta n’wina,+ hakuva mu vitanelwe a kurula loko mirini wun’we. Ngha mu bonga. 16 Tsikani a mhaka ya Kristu yi andza cikari ka n’wina ni wutlhari gontlhe. Simamani ku gondzisana ni ku tiyisana* hi tisimu,+ ni tisimu ta ku dhumisa Nungungulu, ni tisimu ta moya ti yimbelelwako hi kubonga, mu yimbelela ka Jehovha* timbilwini ta n’wina.+ 17 Ni cihi mu mahako, kani kuwulawula kutani kutira, mahani zvontlhe vitweni ga Hosi Jesu, na mu bonga Nungungulu tlhelo Papayi ha yena.+

18 Wena sati, ti koramise ka nuna wa wena+ kota lezvi zvi faneleko Hosini. 19 Wena nuna, simama ku randza a sati wa wena.+ U nga mu zangareli.+ 20 N’wina vanana, ingisani vapswali va n’wina zvilweni zvontlhe,+ hakuva lezvo zva xalalisa Hosi. 21 N’wina vapapayi, mu nga zangarisi vanana va n’wina+ hakuva va nga mbhela ntamu. 22 N’wina tikhumbi, ingisani venyi va n’wina va vanhu* zvilweni zvontlhe,+ na ku nga hi ntsena loku mu woniwa,* kasi ku tsakisa vanhu, kanilezvi hi mbilu yontlhe, na mu chava Jehovha.* 23 Ni cihi leci mu mahako, ci maheni hi muhefemulo* wontlhe a ku khwatsi hi loku mu tirela Jehovha,*+ na ku nga hi vanhu, 24 hakuva ma zvi tiva lezvaku mu ta amukela tshomba hi ka Jehovha* kota nchachazelo.+ Tirelani a N’winyi, Kristu, kota tikhumbi. 25 Kunene, loyi a mahako zvahava i ta tlheliselwa hi kota ya zvilo zva hava lezvi a mahileko,+ niku a ku na cihlawulela.+

4 N’wina venyi, ti khomeni khwatsi a tikhumbi ta n’wina, mu ti mahela kululama, na mu tiva lezvaku n’winawu mu na ni N’winyi le tilweni.+

2 Simamani ku khongela,+ mu tshama na mu khindlimukile mhakeni leyi na mu kari mu bonga.+ 3 Ka cikhati caleco ca cin’we, khongelelani na hinawu,+ lezvaku Nungungulu a yi vhululela nyangwa a mhaka kasi hi kanela a cihundla co basa xungetano hi Kristu, leci ndzi bohilweko hi machini hi kota ya cona,+ 4 ni lezvaku ndzi kanela a cihundla leci ciku dlunya, kota lezvi ndzi faneleko ku maha.

5 Simamani ku famba hi wutlhari cikari ka va le handle; mu ci tirisa khwatsi a cikhati ca n’wina.*+ 6 Ngha a magezu ya n’wina mava yo tsakisa contlhe cikhati, na ma lungilwe hi munyu,+ kasi mu tiva lezvi mu to mu hlamulisa zvona a mun’we ni mun’wani.+

7 Tikikusi,+ a makabye wa mina wo randzeka ni citiri co tsumbeka tlhelo nandza-kulori Hosini, i ta mu hlawutela a mahungu ya mina wontlhe. 8 Ndza mu rumela ka n’wina kasi mu fela ku tiva a mavhukela ya hina ni ku ta chavelela timbilu ta n’wina. 9 Ita na Onesimusi,+ a makabye wa mina wo tsumbeka ni wo randzeka, loyi a nga mun’we wa va ka n’wina; va ta mu hlawutela zvontlhe zvi mahekako laha.

10 Aristarkusi,+ a cibochwa-kulori, wa mu rungula, na Marku+ yenawu, a primo wa Bharnabhasi, (xungetano hi Marku, mu leletelwe lezvaku mu mu amukela+ loku a mu endzela), 11 na Jesu, loyi a gin’wani vito a nga Justusi. Lava van’we va lava va mahilweko wukwera.* Hi vona voce va nga zvitiri-kulori zva Mufumo wa Nungungulu niku vave cibuka ca kuchavelela ka hombe ka mina. 12 Epafrasi,+ a nandza ga Kristu Jesu, loyi a nga mun’we wa va ka n’wina, wa mu rungula. Contlhe cikhati wa mu khongelela hi kutikisa, kasi hi kugumesa, muva lava va mbheleleko na mu hi ni kukholwa ku tiyileko xungetano hi kurandza kontlhe ka Nungungulu. 13 Hakuva ndza mu kustumunyela lezvaku wa ti karata nguvhu hi kota ya n’wina, ni hi kota ya lava va le Lawodhikeya ni lava va le Hiyerapolisi.

14 Luka,+ a dhokodhela wo randzeka, wa mu rungula, na Dhemasi+ yenawu. 15 Rungulani a vamakabye va le Lawodhikeya, na Ninfasi, ni bandla legi gi nga laha mutini wakwe.+ 16 Andzhako ka loku a papilo legi gi lerilwe cikari ka n’wina, gi waye gi ya leriwa+ ni le bandleni ga Lawodhikeya konawu, na n’winawu lerani legi ga va le Lawodhikeya. 17 Ahandle ka lezvo, byelani Arkipusi,+ muku: “Chela kota hi ntiro lowu u wu amukeleko Hosini, kasi u wu maha.”

18 Hi lawa a marungula ya mina, Pawule, hi canja ga mina wutsumbu.+ Simamani ku alakanya a machini lawa ma ndzi bohileko.+ A tipswalo a tive na n’wina.