PAPILO GO SANGULA GA PAWULE KA VA LE TESALONIKA

1 Pawule, na Silvhanusi,*+ na Timote,+ ka bandla ga va le Tesalonika legi gi nga ka Nungungulu, a Papayi, na Hosi Jesu Kristu:

Ngha muva ni tipswalo ni kurula.

2 Hi bonga Nungungulu contlhe cikhati hi kumbukako n’wina n’wentlhe mikhongelweni ya hina,+ 3 hakuva hi simama ku alakanya a ntiro wa n’wina wo tsumbeka, ni kutitsitsirita ka n’wina ka lirandzo, ni kutimisela ka n’wina hi kota ya kutsumba loku mu nga nako+ ka Hosi ya hina Jesu Kristu mahlweni ka Nungungulu wa hina tlhelo Papayi. 4 Hakuva ha zvi tiva, vamakabye va randziwako hi Nungungulu, lezvaku mu hlawulilwe hi yena, 5 hakuva a mahungu ya manene lawa hi ma chumayeleko a ma tangi ka n’wina hi kuwulawula koce, kanilezvi ma tile hi ntamu kambe, ni moya wo basa, ni kutiyiseka ka hombe, khwatsi hi lezvi mu zvi tivako lezvaku hive vanhu vo tshamisa kuyini cikari ka n’wina kasi mu vhuneka. 6 Mu no maha vapimanyisi va hina+ ni va Hosi,+ hakuva mu amukele a mhaka hi kuxaniseka ka hombe,+ na mu hi ni kutsaka ku tako hi ka moya wo basa, 7 laha ka kuza muva cikombiso ka makholwa wontlhe ya le Makedhoniya ni le Akaya.

8 A mhaka hi ku kuve hi kota ya n’wina a mhaka ya Jehovha* yi nga zwiwa, na ku nga hi Makedhoniya ni le Akaya koce, kanilezvi a kukholwa ka n’wina ka Nungungulu ku hangalakile matshan’wini wontlhe,+ laha ka ku a zva ha laveki ku hi wula nchumu. 9 Hakuva vona wutsumbu va simama ku hlawutela lezvi hi nga tisa zvona ka n’wina hi khati go sangula, ni lezvi mu nga hundzulukisa zvona muya ka Nungungulu, mu tsika a zvifananiso zva n’wina+ kasi muva malandza ya Nungungulu a hanyako ni wa lisine, 10 na mu rindzela a N’wana wakwe hi le tilweni,+ loyi a nga mu vhuxa hi ka vafileko, ku nga Jesu, loyi a hi tlhatlhisako ka zanga leyi yi tako.+

2 Ma zvi tiva khwatsi, vamakabye, lezvaku a hi mu endzelangi mahala.+ 2 Hakuva hambu lezvi hi nga ranga hi ku xaniseka ni ku mahelwa xapi le Filipi,+ kota lezvi mu zvi tivako, hi no tiya hlanha hi ku vhuniwa hi Nungungulu wa hina kasi hi mu byela a mahungu ya manene ya Nungungulu+ na hi vhukelwa zva cima.* 3 Hakuva a wusungukati legi hi mu nyikako a giti hi ka cihoxo kutani hi ka kungahlazveki ne a hi ga kukanganyisa, 4 kanilezvi kota lezvi Nungungulu a pasisileko ku hi nyikiwa a mahungu ya manene, hikwalaho ha wulawula, na ku nga hi ku fela ku tsakisa vanhu, kanilezvi Nungungulu, loyi a hlolako a timbilu ta hina.+

5 Kunene, ma zvi tiva lezvaku a hi zangi hi chovha munhu hi magezu, ne hambu ku farisa hi makangwa;+ Nungungulu i kustumunyu! 6 Ne a hi hi ti lavelangi wudzundzo ga vanhu, ne hi ka n’wina ne hi ka van’wani vanhu, hambu lezvi, kota vapostoli va Kristu, hi nga wa ta ngha hi vile ndzhwalo ka n’wina.+ 7 Kanilezvi, hi nova vanhu va vanene cikari ka n’wina, a ku khwatsi hi mamani a an’wisako ni ku hlayisa khwatsi* a vanana vakwe. 8 Makunu kota lezvi hi mu randzako nguvhu, hi wa longile* ku mu nyika mahungu ya manene ya Nungungulu, na ku nga hi wona woce, kanilezvi ni ku ti nyikela wutsumbu ga hina*+ hi kota ya n’wina hakuva hi no mu randza nguvhu.+

9 Hakunene ma ku alakanya, vamakabye, a kutikarata ka hina ka hombe ni kupinyama ka hina. Hi wa tira wusiku ni mumu kasi hi nga rwexi ne mun’we wa n’wina a ndzhwalo wa ku hi hlayisa+ a cikhati leci hi nga mu chumayela a mahungu ya manene ya Nungungulu. 10 N’wina mu vakustumunyu va hina, na Nungungulu yenawu, va lezvi hi nga hanyisa zvona hi kutsumbeka ni kululama na hi nga hi na nandzu cikari ka n’wina makholwa. 11 Ma zvi tiva khwatsi lezvaku hi wa mu laya ni ku mu chavelela ni ku luleka a mun’we ni mun’wani wa n’wina,+ a ku fana ni lezvi a papayi+ a mahako ka vana vakwe, 12 kasi mu simama ku famba hi ndlela yi fanelako Nungungulu,+ loyi a mu vitanelako Mufun’weni wakwe+ ni kungangameleni kakwe.+

13 Hakunene, hi caleco kambe ci hi mahako hi bonga Nungungulu hi nga tsiki,+ hakuva a cikhati leci mu nga amukela a mhaka ya Nungungulu, leyi mu nga yizwa ka hina, mu no yi amukela, na ku nga hi ku khwatsi i mhaka ya vanhu, kanilezvi kota lezvi hakunene yi nga yona, a mhaka ya Nungungulu, leyi yi tirako kambe ka n’wina, makholwa. 14 Hakuva n’wina, vamakabye, mu mahile vapimanyisi va mabandla ya Nungungulu ma nga ka Kristu Jesu lawa ma nga le Judhiya, hakuva mu no xaniseka mandleni ya va ka n’wina+ a zvilo zvalezvi vonawu va xanisekako hi zvona mandleni ya vaJudha, 15 lava va ngaza va daya Hosi Jesu+ ni vaphrofeti va tlhela va xanisa na hina.+ Ahandle ka lezvo, a va tsakisi Nungungulu, kanilezvi valwa ni lezvi zvi vhunako vanhu vontlhe, 16 kota lezvi va zamako ku hi betela ku wulawula ni vanhu va matiko kasi va ponisiwa.+ Hi ndlela leyo, contlhe cikhati va tata a lipimo la zviwonho zvabye. Kanilezvi, hi kugumesa, a khulo gakwe gi nota hehla kabye.+

17 Kanilezvi a cikhati leci hi nga tsawukaniswa na n’wina, vamakabye, zva cikhatana (hi civiri, na ku nga hi timbilwini ta hina), kota lezvi hi nga mu xuva nguvhu, hi no zama hi tindlela tontlhe a ku wonana na n’wina nghohe ni nghohe. 18 Hi cigelo leco, hi wa xuva ku mu endzela, ina, mina Pawule, ndzi no zama, na ku nga hi khati gin’we basi, kanilezvi mambiri; hambulezvo, Sathani i no hi vhalela ndlela. 19 Hakuva hi kwihi a kutsumba ka hina, ni litsako la hina, ni cidlodlo* ca hina ca kunengela mahlweni ka Hosi ya hina Jesu cikhatini ca kuvakona kakwe ke? A hi n’wina ke?+ 20 Hakunene hi n’wina wudzundzo ga hina ni litsako la hina.

3 Hikwalaho, laha hi nga kala hi nga ha gwenti, hi no zvi wona na zvi hi chukwana a ku sala hoce laha Atensi,+ 2 hi mu rumelela Timote,+ a makabye wa hina tlhelo nandza ga Nungungulu* kukaneleni ka mahungu ya manene xungetano hi Kristu, lezvaku a ta mu tiyisa ni ku mu chavelela kukholweni ka n’wina, 3 kasi ne mun’we wa n’wina a nga tsekatsekiswi hi tixanisa leti. Hakuva kota lezvi mu zvi tivako, a hi na ndlela ya ku vhika tixanisa leto.*+ 4 Hakuva a cikhati leci hi nga ha hi zvin’we na n’wina, hi wa tshamela ku mu tlharihisa na ka hi mahlweni lezvaku hi ta welwa hi tixanisa, niku hi zvalezvo zvi humelelako, kota lezvi mu zvi tivako.+ 5 Hi cigelo leco, laha ndzi nga kala ndzi nga ha gwenti, ndzi no mu rumela kasi ku tiva a kutsumbeka ka n’wina,+ hakuva ndzi wa chava ku, hi ndlela yo kari, a Muringi+ a ngava a mu ringile, ni kutitsitsirita ka hina kuva ka mahala.

6 Kanilezvi Timote wa ha hi ku chikela na a wuya hi seyo ka n’wina,+ niku i hi hlawutele mahungu ya manene xungetano hi kutsumbeka ka n’wina ni lirandzo la n’wina, ni lezvaku ma ha simama ku hi alakanya hi lirandzo niku ma zvi xuva nguvhu ku hi wona a ku fana ni lezvi hinawu hi mu xuvako. 7 Hi cigelo leco, vamakabye, kukaratekeni* ka hina kontlhe ni kuxanisekeni kontlhe, hi no chavelelwa hi kota ya n’wina ni kutsumbeka loku mu ku kombisako.+ 8 Hakuva hina ha kuma ntamu* loku n’wina mu tiya mu ku nde Hosini. 9 Makunu, hi ta mu bongisa kuyini Nungungulu hi kota ya n’wina ni hi kota ya kutsaka ka hombe loku hi nga nako mahlweni ka Nungungulu wa hina hi kota ya n’wina ke? 10 Wusiku ni mumu ha khongotela hi kutitsitsirita kontlhe lezvaku hi zvi kota ku wonana na n’wina nghohe ni nghohe ni ku mu nyika lezvi zvi kiyelako kukholweni ka n’wina.+

11 Makunu, ngha a Nungungulu wa hina tlhelo Papayi, ni Hosi ya hina Jesu, va hi vhululela ndlela ya ku hita ka n’wina. 12 Ahandle ka lezvo, ngha a Hosi yi endzelekisa, ina, yi engetela a lirandzo la n’wina hi mun’we ni mun’wani+ ni hi vanhu vontlhe, a ku khwatsi hi lezvi hinawu hi mahako hi n’wina, 13 kasi a fela ku tiyisa a timbilu ta n’wina, ti basa ti nga hi na kusoleka mahlweni ka Nungungulu wa hina+ tlhelo Papayi, cikhatini ca kuvakona ka Hosi ya hina Jesu+ zvin’we ni vobasa vakwe vontlhe.

4 Hi kugumesa, vamakabye, a ku khwatsi hi lezvi mu amukeleko hi ka hina a zvileletelo zva lezvi mu faneleko ku fambisa zvona kasi mu tsakisa Nungungulu+ — ku nga zvalezvi hakunene mu fambisako zvona — ha mu kombela ni ku mu khongotela hi Hosi Jesu lezvaku mu simama ku zvi maha hi kumbhelela. 2 Hakuva ma zvi tiva a zvileletelo* lezvi hi mu nyikileko ha Hosi Jesu.

3 Hakuva a kurandza ka Nungungulu hi lezvaku mu basa+ ni ku tsika wubhayi.*+ 4 A mun’we ni mun’wani wa n’wina i wa tive ku fumela a miri* wakwe+ hi kubasa+ ni wudzundzo, 5 na ku nga hi ku vhura hi kunavela ko nyenyeza ka masango,+ a ku khwatsi hi vamatiko lava va nga mu tiviko Nungungulu.+ 6 Ku ngavi ni munhu a tsemakanyako a mbhingano wa lezvi zvi faneleko a kalavela makabye wakwe mhakeni leyi, hakuva Jehovha* i londza tsayiselelo ka vontlhe lava va mahako zvilo lezvi, kota lezvi hi sinako hi mu byelile ni ku mu tlharihisa hi ntamu. 7 Hakuva Nungungulu i hi vitanele kubasa, na ku nga hi kungahlazveki.+ 8 Hikwalaho, loyi a kanyisako a mhaka leyi, a nga kanyisi munhu, kanilezvi i kanyisa Nungungulu+ loyi a mu nyikako a moya wakwe wo basa.+

9 Hambulezvo, xungetano hi ku randza a vamakabye,+ a zvizi zvi lava ku hi mu tsalela, hakuva n’wina wutsumbu mu gondzisiwa hi Nungungulu a kuva mu randzana.+ 10 Kunene, hi zvalezvi mu mahako ka vamakabye vontlhe va nga tikweni gontlhe ga Makedhoniya. Kanilezvi ha mu khongotela, vamakabye, lezvaku mu simama ku zvi maha hi kuandzileko nguvhu. 11 Ti karateleni ku hanya hi kurula,+ mu khatalela zva n’wina wutsumbu+ ni ku tira hi mandla ya n’wina,+ kota lezvi hi mu layileko, 12 kasi mu famba hi kufaneleko kuwoneni ka vanhu va le handle,+ mu nga vhumali nchumu.

13 Ahandle ka lezvo, vamakabye, a hi lavi lezvaku mu kohlwa a mhaka ya lava va etleleko kufeni,+ kasi mu nga bayisekisi ku khwatsi hi vanhu laha va yileko, va nga hiko na kutsumba.+ 14 Hakuva loku hi kholwa lezvaku Jesu i file a tlhela a vhuka,+ hizvalezvo kambe, Nungungulu i ta va vhuxa naye lava va etleleko kufeni hi ku tirisa Jesu.+ 15 Hakuva hi mu byela lezvi hi mhaka ya Jehovha,* hiku: Hina, a vahanyako, hi to ngha ha ha hanya cikhatini ca kuvakona ka Hosi hi nga ta va rangela ne ni kutsongwani lava va etleleko kufeni; 16 hakuva a Hosi ha yoce yi ta relela hi le tilweni na yi kari yi vitana hi kulaya, hi gezu ga ngilozi ya hombe+ ni mpundzu wa Nungungulu, niku lava va feleko ka Kristu va ta ranga hi vona va vhuka.+ 17 Andzhako ka lezvo, hina, a vahanyako, lava hi to ngha ha ha hanya, hi ta tekiwa zvin’we navo hi nghenisiwa marefini+ kasi hi ya tlhangana ni Hosi+ ndengelengeni; hi ndlela leyo, hi tava zvin’we ni Hosi contlhe cikhati.+ 18 Hikwalaho, simamani ku chavelelana hi magezu lawa.

5 Vamakabye, xungetano hi zvikhati ni tinguva, a zvizi zvi lava ku mu tsalelwa nchumu. 2 Hakuva ma zvi tiva khwatsi lezvaku a siku ga Jehovha*+ gata a ku khwatsi i khamba ni wusiku.+ 3 Laha va to ngha vaku: “Ku rulile, a matiko ma etlele!”* zvalezvo a kuloviswa kabye ku ta va chikelela hi citshuketi+ a ku fana ni kulun’wa ka wasati wa nyimba ku sangulako hi citshuketi, niku va nga ta pona. 4 Kanilezvi n’wina, vamakabye, a mu lomu munyameni ko kala a siku lego gi mu juma a ku fana ni lezvi a kuwonekela ku jumako khamba, 5 hakuva n’wina n’wentlhe mu vana va kuwonekela ni vana va hlikanhi.+ Hina a hi va wusiku ne hambu va munyama.+

6 Hikwalaho, hi nga etleli a ku khwatsi hi lezvi a van’wani va mahako,+ kanilezvi a hi tshameni na hi khindlimukile,+ hi hi ni kupima ku nene.+ 7 Hakuva lava va etlelako va etlela ni wusiku, ni lava va popiwako va popiwa ni wusiku.+ 8 Kanilezvi hina lava hi nga va hlikanhi, ngha hiva ni kupima ku nene, hi boha a cikatawu ca simbi ca kukholwa ni lirandzo, ni kapasete, gi nga kutsumba ka kuhanyiswa,+ 9 hakuva Nungungulu a nga hi yimiselangi a zanga, kanilezvi a ku kuma kuhanyiswa+ hi Hosi ya hina Jesu Kristu. 10 I no hi fela+ kasi hambu loku hi khindlimukile kutani loku hi etlele,* hi hanya zvin’we naye.+ 11 Hikwalaho, simamani ku tiyisana* ni ku akana,+ zvi nga zvalezvi hakunene mu mahako.

12 Ha mu kombela, vamakabye, lezvaku mu kombisa cichavo ka lava va tirako hi kutikarata cikari ka n’wina, lava va mu rangelako Hosini ni ku mu kawuka; 13 mu va dzundza nguvhu ni ku va randza hi kota ya ntiro wabye.+ Hanyani hi kurula cikari ka n’wina.+ 14 Ahandle ka lezvo, ha mu khongotela, vamakabye, lezvaku mu tlharihisa* lava va vhilinganya,+ mu chavelela lava va tshovekileko timbilu,* mu vhuna lava va gome, muva ni lihlazva-mbilu ka vanhu vontlhe.+ 15 Ti woneleni kasi ku ngavi na munhu a tlheliselako kubiha hi kubiha,+ kanilezvi contlhe cikhati hlotani zvazvinene ka mun’we ni mun’wani ni ka vanhu vontlhe.+

16 Tsakani contlhe cikhati.+ 17 Khongelani mu nga tsiki.+ 18 Bongani hi kota ya zvilo zvontlhe.+ Loku hi kona kurandza ka Nungungulu hi n’wina ka Kristu Jesu. 19 Mu nga timi a ndzilo wa moya.+ 20 Mu nga kanyisi a zviphrofeto.+ 21 Hlolani a zvilo zvontlhe;+ namarelani ka lezvi zvi nga zvi nene. 22 Tsikani a kubiha ka tixaka tontlhe.+

23 Ngha a Nungungulu wa kurula a mu basisa hi kumbhelela. Niku ngha a moya, ni muhefemulo,* ni miri wa n’wina, vamakabye, zvi hlayisiwa zvi nga hi na kusoleka, zviva zvinene matlhelweni wontlhe kala cikhatini ca kuvakona ka Hosi ya hina Jesu Kristu.+ 24 Loyi a mu vitanako i tsumbekile, niku hakunene i ta zvi maha.

25 Vamakabye, simamani ku hi khongelela.+

26 Losani vamakabye vontlhe hi kupswopswana ko basa.

27 Ndza mu hlambanyisa ka Hosi kasi a papilo legi gi lerelwa vamakabye vontlhe.+

28 Ngha a tipswalo ta Hosi ya hina Jesu Kristu tiva na n’wina.