PAPILO GA WUMBIRI GA PAWULE KA VA LE TESALONIKA

1 Pawule, na Silvhanusi* na Timote,+ ka bandla ga va le Tesalonika legi gi nga ka Nungungulu, a Papayi wa hina, ni ka Hosi Jesu Kristu:

2 Ngha muva ni tipswalo ni kurula zvi tako hi ka Nungungulu tlhelo Papayi ni ka Hosi Jesu Kristu.

3 Contlhe cikhati ha kurumeteka ku bonga Nungungulu hi kota ya n’wina, vamakabye. Lezvo zva fanela, hakuva a kukholwa ka n’wina ka kula hi ndlela yo hlamalisa, ni lirandzo leli n’wina n’wentlhe mu nga nalo hi mun’we ni mun’wani la endzeleka.+ 4 Hi caleco ci hi mahako hi tizwa+ matshandza hi n’wina mabandleni ya Nungungulu hi kota ya kutimisela ka n’wina ni kukholwa kuxanisweni ka n’wina kontlhe ni mihlomulweni leyi yi mu welako.*+ 5 Leci citiyisekiso ca kulamula ko lulama ka Nungungulu, ci mu mahako mu hlayelwa lava va ringanelwako hi Mufumo wa Nungungulu, lowu hakunene mu xanisekako hi kota ya wona.+

6 Hakuva zvi lulamile mahlweni ka Nungungulu a ku va tlhelisela hlomulo lava va mu vangelako hlomulo.+ 7 Kanilezvi n’wina, lava mu nga hlomulweni, i ta mu nyika kuhumula zvin’we na hina kuwonekelisweni ka Hosi Jesu+ hi le tilweni ni tingilozi takwe ta ntamu+ 8 ndzilweni wu vhurako, laha a to neha kuphota ka lava va nga mu tiviko Nungungulu ni ka lava va nga ingisiko a mahungu ya manene xungetano hi Hosi ya hina Jesu.+ 9 A vanhu lavo va ta tsayisiwa hi ku lovisiwa kala kupindzuka, va fuvisiwa+ mahlweni ka Hosi ni ka ntamu wakwe wo ngangamela, 10 a cikhati leci a tota a ta dhumisiwa ni vobasa vakwe ni ku ta hlamaliwa sikwini lego cikari ka vontlhe lava va kombisileko kukholwa, hakuva a wukustumunyu legi hi nyikileko gi amukelwe hi kukholwa cikari ka n’wina.

11 Na hi hi ni kungo lego, ha mu khongelela contlhe cikhati lezvaku a Nungungulu wa hina a mu wona na mu ringanelwa hi kuvitana kakwe,+ ni lezvaku, hi ntamu wakwe, a maha hi kumbhelela zvontlhe zvo saseka zvi mu xalalisako ni mitiro yontlhe ya kukholwa, 12 kasi a vito ga Hosi ya hina Jesu gi fela ku dhumisiwa ka n’wina, n’winawu mu dhumisiwa ka yena, hi kota ya tipswalo ta Nungungulu wa hina ni ta Hosi Jesu Kristu.

2 Hambulezvo, vamakabye, xungetano hi kuvakona ka Hosi ya hina Jesu Kristu,+ ni kuva hi tlhanganisiwa zvin’we naye,+ ha mu kombela 2 lezvaku mu nga hatlisi ku jujeka kupima hambu ku dzukiswa hi gezu gi pimisilweko,*+ ne hi mhaka ya ku wuliwa ne hambu hi papilo go khwatsi gita hi ka hina gi wulako ku a siku ga Jehovha*+ gi chikele.

3 Mu nga tsiki munhu a mu hambukisa* hi ni yihi ndlela, hakuva gi nga tata na ku nga rangangi hi ku humelela kudhuka,+ ku gumesa ku wonekeliswa a citlula-milayo,+ a n’wana wa kulova.+ 4 Yena mukaneti niku wa ti tlakusa hehla ka zvontlhe zvi vitaniwako ku vanungungulu kutani lezvi zvi khozelwako, laha ka kuza a tshama tempeleni ya Nungungulu, a ti kombekisa kubaseni kota nungungulu. 5 A mu zvi alakanyi lezvaku na ndza ha hi na n’wina ndzi wa tala ku mu byela a timhaka leti ke?

6 Makunu n’wina ma ci tiva leci ci mu vhalelako; hikwalaho i ta wonekeliswa hi cikhati cakwe ci faneleko. 7 Kunene, a fihlakalo wa citlula-milayo leci wu sina wu tira ni zvalezvi,+ kanilezvi kala loku loyi a wu vhalelako ka cikhati leci a sukile ndleleni. 8 Andzhako ka lezvo, hi kona a citlula-milayo ci to wonekeliswa, leci Hosi Jesu a to ci daya hi moya wa nomu wakwe+ ni ku ci lovisa hi kuwonekeliswa+ ka kuvakona kakwe. 9 Kanilezvi a kuvakona ka citlula-milayo ku kona hi kota ya kutira ka Sathani,+ zvin’we ni mitiro yontlhe ya ntamu, ni zviwoniso ni zvihlamaliso zva mawunwa,+ 10 ni kukhohlisa kontlhe ku nga lulamangiko kasi ku kanganyisa+ lava va lovako, kota tsayiselelo wa lezvi va nga ala ku randza a lisine leli li nga wa ta va maha va ponisiwa. 11 Hi cigelo leco Nungungulu a tsikako a ntamu wa kuhambukisa wu va kanganyisa va kholwa mawunwa,+ 12 kasi vontlhe va fela ku lamuliwa hakuva a va kholwangi lisine kanilezvi va tsakisilwe hi kungalulami.

13 Hambulezvo, contlhe cikhati ha kurumeteka ku bonga Nungungulu hi kota ya n’wina, vamakabye, mu randziwako hi Jehovha,* hakuva kusukela kusanguleni Nungungulu i no mu hlawula+ kasi mu ponisiwa, hi ku mu basisa+ hi moya wakwe ni kukholwa ka n’wina lisineni. 14 Hi zvalezvo a nga mu vitanela zvona hi mahungu ya manene lawa hi kanelako, kasi mu ta kuma kungangamela ka Hosi ya hina Jesu Kristu.+ 15 Hikwalaho, vamakabye, tiyani mu ku nde,+ mu namarela ka mikhuwo leyi mu gondzisilweko,+ kani kuve hi nomu kutani hi papilo gi tako hi ka hina. 16 Ahandle ka lezvo, ngha a Hosi ya hina Jesu Kristu na Nungungulu, a Papayi wa hina, loyi a nga hi randza+ ni ku hi nyika kuchavelela ka pindzukelwa ni kutsumba+ ka kunene hi tipswalo takwe, 17 va chavelela a timbilu ta n’wina ni ku mu tiyisa mitirweni yontlhe ya yinene ni kuwulawuleni.

3 Hi kugumesa, vamakabye, simamani ku hi khongelela,+ kasi a mhaka ya Jehovha* yi simama ku andza hi kuhatlisa+ yi tlhela yi dhumisiwa, a ku khwatsi hi lezvi zvi mahekako ka n’wina, 2 ni lezvaku hi tlhatlhiswa ka vanhu va xapi ni vo biha,+ hakuva a kukholwa a ku kumiwi hi vanhu vontlhe.+ 3 Kanilezvi a Hosi yi tsumbekile, niku yi ta mu tiyisa ni ku mu vhikela ka loyi wa kubiha. 4 Ahandle ka lezvo, ha tiyiseka Hosini xungetano hi n’wina, lezvaku ma landzela niku mu ta simama ku landzela a zvileletelo zva hina. 5 A Hosi yi wa simame ku rangela timbilu ta n’wina hi kumbheleleko lirandzweni la Nungungulu+ ni kutimiseleni+ ha Kristu.

6 Makunu ha mu nyika zvileletelo, vamakabye, vitweni ga Hosi ya hina Jesu Kristu, lezvaku mu tsawukana ni wihi makabye a fambako hi vhilinganya,+ a nga landzeli a mikhuwo* leyi mu* yi amukeleko ka hina.+ 7 Hakuva ma zvi tiva lezvi mu faneleko ku hi pimanyisisa zvona,+ hakuva a hi hanyangi hi vhilinganya cikari ka n’wina, 8 ne a hi gangi ca munhu mahala.*+ Kanilezvi hi no tira yi nga chayi ni ku ti tsitsirita wusiku ni mumu kasi hi nga rwexi ne mun’we wa n’wina a ndzhwalo wa ku hi hlayisa.+ 9 Na ku nga hi ku khwatsi ho kala hi nga hi na fanelo,*+ kanilezvi hi wa lava kuva cikombiso ka n’wina kasi mu hi pimanyisa.+ 10 Kunene, a cikhati leci hi nga hi na n’wina, hi wa tala ku mu laya, hiku: “Loku a munhu a nga zvi lavi ku tira, ngha a ngagi.”+ 11 Hakuva hizwa lezvaku a vokari va famba hi vhilinganya cikari ka n’wina,+ va nga tiri nchumu, kanilezvi va nghenela zvilo zvi nga va lumbiko.+ 12 A vanhu lavo ha va laya ni ku va kuca ka Hosi Jesu Kristu lezvaku va tira hi kurula, vaga zvakuga zva nyuko wabye.+

13 Makunu n’wina vamakabye, mu nga tsiki a ku maha zvazvinene. 14 Kanilezvi loku a wokari a nga ingisi a magezu ya hina ma nga ka papilo legi, markarani a munhu loye, mu tsika ku hlengela naye,+ kasi awa tingana. 15 Hambulezvo, mu nga mu wonisi ku khwatsi i nala, kanilezvi simamani ku mu nyika wusungukati+ kota makabye.

16 Makunu ngha a Hosi ya kurula yi mu nyika kurula contlhe cikhati hi tindlela tontlhe.+ Ngha a Hosi yiva zvin’we na n’wina n’wentlhe.

17 Hi lawa a marungula ya mina, Pawule, hi canja ga mina wutsumbu,+ ci nga cikombiso mapapilweni wontlhe; legi hi gona a tsalela ga mina.

18 A tipswalo ta Hosi ya hina Jesu Kristu a tive zvin’we na n’wina n’wentlhe.