PAPILO GA PAWULE KA MAHEBHERU

1 A kaleloko, Nungungulu i wulawulile ni vakokwani va hina hi ku tirisa vaphrofeti makhati yo tala ni hi tindlela to tala.+ 2 Kanilezvi kugumeseni ka masiku lawa, i wulawulile na hina hi ku tirisa N’wana,+ loyi a mu yimisileko kuva mugi wa tshomba ya zvilo zvontlhe+ ni ku maha ha yena a matshamela ya zvilo.*+ 3 Hi yena a nga mufananiso wa kungangamela ka Nungungulu+ ni cikombiso co mbhelela ca tshamela gakwe,+ niku hi yena a khomileko zvilo zvontlhe hi gezu ga ntamu wakwe. Andzhako ka loku a basisile a zviwonho zva hina,+ i no tshama reveni ga cinene ga Wukulu* ga le hehla.+ 4 Hikwalaho, i nova wahombe a ku hundza tingilozi+ laha ka kuza a kuma a vito ga ginene nguvhu a ku hundza legi ga tona.+

5 Hi cikombiso, hi yihi a ngilozi leyi Nungungulu a nga tshuka a yi byela ku: “Wena u n’wana wa mina, nyamutlha ndzi mahile papayi wa wena”?+ A tlhela aku: “Ndzi tava papayi wakwe, na yena i tava n’wana wa mina” ke?+ 6 Kanilezvi laha a nehako kambe a Matewula yakwe+ misaveni, i ngalo: “Ngha a tingilozi tontlhe ta Nungungulu ti mu khizamela.”

7 Xungetano hi tingilozi i wula lezvi kambe: “I maha tingilozi takwe tiva mimoya, ni malandza yakwe+ mava langavi ga ndzilo.”+ 8 Kanilezvi xungetano hi N’wana, i ngalo: “Nungungulu citshamu ca wena ca wuhosi+ kala kupindzuka ni kupindzuka, ni nhonga ya wuhosi ya Mufumo wa wena i nhonga ya wuhosi ya kululama.* 9 U randzile kululama, u venga a kuhambunyeta nayo. Hi cigelo leco, Nungungulu, a Nungungulu wa wena, i ku totile+ hi mafura ya litsako a ku hundza vanghana va wena.”+ 10 Niku: “Kusanguleni, wena Hosi, u zimile a zviseketelo zva misava, ni matilo mitiro ya mandla ya wena. 11 Zvi ta lova, kanilezvi wena u ta simama; a ku fana ni nguwo, zvontlhe zvi ta hlakala, 12 u ta zvi songa a ku fana ni nguwo; zvi ta ciciwa a ku fana ni tinguwo. Kanilezvi wena a wu cici, ni malembe ya wena ma nga ta tshuka mava ni magumo.”+

13 Kanilezvi hi yihi ngilozi a nga tshuka a yi byela, aku: “Tshama reveni ga mina ga cinene kala ndzi veka valala va wena kota cikhegetelo ca mikondzo ya wena” ke?+ 14 Kasi tona tontlhe a hi mimoya yi mahako a ntiro wo basa,+ yi rumelweko a ku tirela lava va toga a tshomba ya kuhanyiswa ke?

2 Hikwalaho, zva laveka a ku hi chela nguvhu kota a ku hundza kale ka zvilo lezvi hi zvi zwileko,+ kasi hi nga tshuki hi hambuka.+ 2 Hakuva loku a mhaka leyi yi nga wuliwa hi tingilozi+ yi tiyile, ni loku a zvihambuko zvontlhe ni kungaingisi kontlhe zvi tsayisilwe hi kululama,+ 3 hi ta hulukisa kuyini loku hi kanyisa a kuhanyisa ka kulela legi?+ Hakuva a kusangula ku wulilwe hi Hosi ya hina+ ku tlhela ku tiyisiwa ka hina hi lava va nga yizwa, 4 laha Nungungulu a nga ti patsa navo a nyika wukustumunyu hi zviwoniso, ni zvihlamaliso, ni mitiro yo hambanahambana ya ntamu+ ni zvinyikiwo zva moya wo basa zvi avelweko hi kuya hi kurandza kakwe.+

5 Hakuva a ku vangi lahasi ka tingilozi a nga veka misava leyi yi tako,+ leyi hi wulawulako hi yona. 6 Kanilezvi ka mutsalo wo kari, a kustumunyu i wulile lezvi: “Cini munhu loyi wena u mu alakanyako, kutani a n’wana wa munhu loyi wena u mu khatalelako ke?+ 7 U mu mahile ava mutsongwaninyana ka tingilozi; u mu bohisile a cidlodlo* ca kungangamela ni wudzundzo, u mu yimisa hehla ka mitiro ya mandla ya wena. 8 U vekile a zvilo zvontlhe lahasi ka mikondzo yakwe.”+ Hi ku veka zvilo zvontlhe lahasi kakwe,+ Nungungulu a nga siyangi nchumu wu ngavi lahasi kakwe.+ Hambulezvo, ka cikhati leci, a hi se zvi wona lezvaku a zvilo zvontlhe zvi vekilwe lahasi kakwe.+ 9 Kanilezvi hi wona Jesu, loyi a mahilweko ava mutsongwaninyana ka tingilozi,+ makunu na a bohisilwe a cidlodlo* ca kungangamela ni wudzundzo hi lezvi a nga xaniseka hi kufa,+ kasi hi kota ya tipswalo ta Nungungulu, a ringa kufa hi kota ya vanhu vontlhe.+

10 Hakuva zvi wa ringana lezvaku loyi a zvilo zvontlhe zvi mahelweko yena na zvi mahiwa hi yena, a cikhati leci a nehako vana vo tala kungangameleni,+ a mbhelelisa a Hosana ya Hombe ya kuhanyiswa kabye+ hi kuxaniseka.+ 11 Hakuva loyi a basisako ni lava va basisiwako+ vontlhe vata hi ka yaloyi wa mun’we,+ niku hi cigelo leco, a nga na tingana ta ku va vitana ku vamakabye,+ 12 aku: “Ndzi ta kanela a vito ga wena ka vamakabye va mina; ndzi ta ku dhumisa lomu bandleni hi tisimu.”+ 13 A engeta, aku: “Ndzi ta tsumba yena.”+ A tlhela aku: “Mina ni vanana lava Jehovha* a nga ndzi nyika.”+

14 Hikwalaho, kota lezvi a “vanana” va hlengelako a nyama ni nkhata, yenawu i hlengele ka zvilo zvalezvo,+ kasi hi kufa kakwe a fela ku fuvisa loyi a nga ni ntamu wa ku daya,+ ku nga Dhiyabho,+ 15 ni ku fela ku tlhatlhisa vontlhe lava va nga hi tikhumbi kuhanyeni kabye kontlhe hi kota ya ku chava kufa.+ 16 Hakuva hakunene a hi tingilozi a ti vhunetelako, kanilezvi i vhunetela a pswalo* wa Abrahama.+ 17 Hikwalaho, zvi wa lava lezvaku a fana ni “vamakabye” vakwe hi matlhelo wontlhe,+ a fela kuva mupristi wa hombe wa wuxinji ni wo tsumbeka zvilweni zva Nungungulu, lezvaku a nyikela a muphahlo wo enela+ wa zviwonho* zva vanhu.+ 18 Kota lezvi yena wutsumbu a nga xaniseka a cikhati leci a nga ringiwa,+ wa zvi kota a ku ta vhunetela lava va ringiwako.+

3 Hikwalaho, vamakabye vo basa, n’wina vahlengeli va kuvitaniwa ka le tilweni,+ ehleketani hi mupostoli tlhelo mupristi wa hombe loyi hi mu vhumelako — Jesu.+ 2 I no tsumbeka ka Loyi a mu yimisileko,+ a ku fana ni lezvi Mosi yenawu a nga tsumbeka lomu ndlwini yontlhe ya Loye.+ 3 Hakuva yena* wa ringanelwa hi wudzundzo ga hombe+ a ku hundza Mosi, kota lezvi loyi a akako yindlu a nga ni wudzundzo ga hombe a ku hundza yindlu ya kona. 4 Kunene, a yindlu yin’we ni yin’wani yi akiwa hi wokari, kanilezvi loyi a akileko zvilo zvontlhe hi Nungungulu. 5 Mosi i wa tsumbekile kota nandza lomu ndlwini yontlhe ya Loye, zviva wukustumunyu ga lezvi zvi nga wa ta wulawuliwa hi ndzhako ka cikhati, 6 kanilezvi Kristu i no tsumbeka kota n’wana+ hehla ka yindlu ya Nungungulu. Hina hi yindlu Yakwe+ loku hakunene hi khoma zvi tiya kutlhatlhekeni ka hina ka ku wulawula ni kutsumbeni loku hi ti dzundzako hi kona kala magumo.

7 Hikwalaho, a ku khwatsi hi lezvi a moya wo basa wu nge:+ “Nyamutlha, loku muzwa a gezu gakwe, 8 mu nga nonohisi a timbilu ta n’wina a ku fana ni cikhati leci ku nga vhuxiwa zanga yo tshisa, a ku khwatsi hi sikwini ga ciringo le ciwuleni,+ 9 lomu a vakokwani va n’wina va nga ndzi ringa ni ku ndzi phikiza, hambu lezvi va nga wonile a mitiro ya mina hi 40 wa malembe.+ 10 Hi caleco ci nga ndzi maha ndzi zangarela a cizukulwana leco, ndziku: ‘Va tshamela ku lahleka timbilwini tabye, niku a va zangi va tiva a tindlela ta mina.’ 11 Hikwalaho, ndzi no hlambanya zangeni ya mina, ndziku: ‘Va nga ta nghena kuhumuleni ka mina.’”+

12 Ti woneleni, vamakabye, kasi ku nga tshuki ku humelela ne ka mun’we wa n’wina a mbilu yo biha yi nga kholwiko hi ku fularela Nungungulu loyi a hanyako;+ 13 kanilezvi simamani ku tiyisana siku ni siku na ca ha hi kona a cikhati leci ci vitaniwako ku “nyamutlha”,+ kasi ne mun’we wa n’wina a nga nonohiswi hi ntamu wa kukanganyisa ka ciwonho. 14 Hakuva hi ngova vahlengeli na Kristu ntsena loku hakunene hi khoma zvi tiya ka kutsumba ka hina ko sangula kala magumo.+ 15 A ku khwatsi hi lezvi ku wuliwako ku: “Nyamutlha, loku muzwa a gezu gakwe, mu nga nonohisi a timbilu ta n’wina a ku fana ni cikhati leci ku nga vhuxiwa zanga yo tshisa.”+

16 Hi vamani va nga zvizwa, hambulezvo va mu vhuxela zanga yo tshisa ke? Kasi a hi vona vontlhe lava va humileko hi Gibhite na va rangelwa hi Mosi ke?+ 17 Ahandle ka lezvo, hi vamani lava Nungungulu a nga va zangarela a 40 wa malembe?+ Kasi a hi vona lava va nga wonha, a zvirumbi zvabye zvi wela ciwuleni ke?+ 18 Kona hi vamani lava a nga va hlambanyela lezvaku va nga ta nghena kuhumuleni kakwe? Kasi a hi vona lava va nga kala ku ingisa ke? 19 Hikwalaho, ha zvi wona lezvaku va tsandzekile ku nghena hi lezvi va nga kala ku kholwa.+

4 Hikwalaho, kota lezvi a citsumbiso ca ku nghena kuhumuleni kakwe ca ha hiko kona, a hi ti woneleni* kasi ku ngavi ni mun’we wa n’wina a salako ndzhako.+ 2 Hakuva hinawu hi kanelelwe a mahungu ya manene+ a ku fana na vona; kanilezvi a mhaka leyi va nga yizwa a yi va vhunangi nchumu, hakuva a va bohanangi hi kukholwa ni lava va ingiseleko. 3 Hakuva hina lava hi kombisileko kukholwa ha nghena kuhumuleni, a ku khwatsi hi lezvi a nga wula, aku: “Hikwalaho, ndzi no hlambanya zangeni ya mina, ndziku: ‘Va nga ta nghena kuhumuleni ka mina’”,+ hambu lezvi a mitiro yakwe yi nga mbhelile kusukela kuvangiweni ka tiko.+ 4 Hakuva ka mutsalo wo kari i wulile lezvi xungetano hi siku ga wu 7: “Na Nungungulu i no humula hi siku ga wu 7 ka mitiro yakwe yontlhe”,+ 5 a tlhela laha, aku: “Va nga ta nghena kuhumuleni ka mina.”+

6 Hikwalaho, kota lezvi ka ha vhumelelwako vokari a ku nghena kona, ni lezvi lava va nga ranga hi vona va kanelelwa a mahungu ya manene va nga kala ku nghena hi kota ya kungaingisi,+ 7 i tlhela a yimisa a siku go kari na ku hundzile cikhati co leha, ka lisimu la Dhavhidha, hi kuwula ku “nyamutlha”, a ku khwatsi hi lezvi ku sinako ku wulilwe ku: “Nyamutlha, loku muzwa a gezu gakwe, mu nga nonohisi a timbilu ta n’wina.”+ 8 Hakuva loku Joxuwa+ i wa va yisile wutshan’wini ga kuhumula, andzhako ka cikhati Nungungulu na a nga ha wulawulangi hi gin’wani siku. 9 Hikwalaho, ga ha va salele a sabhadho ga kuhumula a vanhu va Nungungulu.+ 10 Hakuva loyi a nga nghena kuhumuleni ka Nungungulu i humulile mitirweni yakwe kambe, a ku fana ni lezvi Nungungulu a nga humula ka leyi yakwe.+

11 Hikwalaho, a hi maheni zvontlhe zvi nga ntan’wini wa hina kasi hi nghena kuhumuleni loko, kasi ku ngavi na munhu a welako ka hanyela lego ga kungaingisi.+ 12 Hakuva a mhaka ya Nungungulu ya hanya niku yi na ni ntamu,+ ya kariha a ku hundza ni cihi cipadha ci tsemako seno ni seno,*+ yi tlhava yi kala yi hambanisa a muhefemulo* ni moya,* ni mahlakala ni mongo, niku ya zvi kota ku hlola a maalakanyo ni mixuvo ya mbilu. 13 A ku na civangwa ci fihleleko kuwoneni kakwe,+ kanilezvi a zvilo zvontlhe zvi funungulilwe* niku zvi te dlunya matihlweni ya loyi hi to ti hlamulela kakwe.+

14 Hikwalaho, kota lezvi hi nga ni mupristi wa hombe nguvhu loyi a tsemakanyileko matilo, ku nga Jesu, a N’wana wa Nungungulu,+ a hi khomisiseni a kuvhumela ka hina kakwe.+ 15 Hakuva a hi na mupristi wa hombe wa ku a nge zvi koti ku hi zwela wusiwana gomeni ga hina,+ kanilezvi hi na ni mupristi a ringilweko hi matlhelo wontlhe a ku fana na hina, hambulezvo na a nga hi na ciwonho.+ 16 Makunu a hi tshineleni citshan’wini ca wuhosi ca tipswalo hi kutlhatlheka kuwulawuleni,+ kasi hi amukela wuxinji ni ku kuma tipswalo ta ku hi vhuna hi cikhati ci faneleko.

5 Hakuva ni wihi mupristi wa hombe a langilweko cikari ka vanhu, i yimisiwa kasi ku yimela vanhu zvilweni zva Nungungulu+ a fela ku nyikela a minyikelo ni miphahlo ya zviwonho.+ 2 Wa zvi kota ku va zwela wusiwana lava va nga hiko na wutivi ni lava va hambunyetako nayo,* hakuva yenawu ilwa ni gome gakwe wutsumbu, 3 niku hi kota ya lezvo, i fanele ku nyikela minyikelo ya zviwonho zvakwe a ku fana ni lezvi a nyikelako ya zviwonho zva vanhu.+

4 A munhu a nga kumi a wudzundzo legi hi ku ti sangulela kakwe, kanilezvi i gi kuma ntsena loku a vitaniwa hi Nungungulu, a ku fana na Aroni.+ 5 Hikwalaho, Kristu yenawu a nga ti dzundzangi+ hi ku ti maha mupristi wa hombe, kanilezvi i dzundzilwe hi Loyi a nga mu byela, aku: “Wena u n’wana wa mina; nyamutlha ndzi mahile papayi wa wena.”+ 6 A ku khwatsi hi lezvi a wulako ka wun’wani mutsalo, aku: “Wena u mupristi kala kupindzuka hi tshamela ga Melkizedheki.”+

7 A cikhati leci a nga hanya laha misaveni,* Kristu i no maha mikhongelo ya kukhongotela ni ku kombela, hi kurila ka hombe ni mihloti,+ ka Loyi a nga hi ni ntamu wa ku mu tlhatlhisa kufeni, niku i no zwiwa hi kota ya lezvi a nga chava Nungungulu. 8 Hambu lezvi a nga hi n’wana, i gondzile ku ingisa ka zvilo lezvi a nga xaniseka hi zvona.+ 9 Andzhako ka loku a mbhelelisilwe,+ i no nyikwa ntiro wa ku neha kuhanyiswa ka pindzukelwa ka vontlhe lava va mu ingisako,+ 10 hakuva i yimisilwe hi Nungungulu kota mupristi wa hombe hi tshamela ga Melkizedheki.+

11 Hi na ni zvotala zvo zvi wula xungetano hi yena, kanilezvi zva karata a ku zvi tlhamusela hakuva ma nonoka ku ingisa. 12 Hakuva hambu lezvi ka cikhati leci* mu nga fanele kuva vagondzisi, ma ha lava munhu kambe wa ku mu gondzisa kusukela kusanguleni a tigondzo to sangula+ ta timhaka to basa ta Nungungulu, niku mu tlhelele mafini na ku nga hi ka zvakuga zvo tiya. 13 Hakuva ni wihi loyi a simamako ku wundliwa hi mafi a nga yi tivi a mhaka ya kululama, hakuva i n’wanana.+ 14 Kanilezvi, a zvakuga zvi tiyileko zvi lumba vanhu va buvhileko, lava va tolovetileko a kupima kabye* hi ku ku tirisa kala va zvi kota ku hambanisa a zvazvinene ni zvakubiha.

6 Hikwalaho, kota lezvi makunu hi hundzileko ka zvigondzo zvo sangula+ xungetano hi Kristu, a hi ti karateleni kuya kubuvheni,+ hi nga ha tlheli hi zima ciseketelo, ku nga ku ti sola mitirweni yi fileko, ni ku kholwa ka Nungungulu, 2 ni gondzo ya kubhabhatisa, ni kutlhatekwa ka mandla,+ ni kuvhuka ka vafileko+ ni kulamula ka pindzukelwa. 3 Lezvo hi ta zvi maha loku Nungungulu hakunene a vhumela.

4 Hakuva xungetano hi lava a kale va nga woningelwe,+ va ringa a cinyikiwo ca mahala ca le tilweni va tlhela vava vahlengeli va moya wo basa, 5 lava va nga ringa a mhaka yo nandziha ya Nungungulu ni mintamu ya matshamela ya zvilo* ma ha tako, 6 kanilezvi va gumesa vawa,+ a zvi koteki ku va tlhelisela kambe kuhundzulukeni hakuva va belela kambe a N’wana wa Nungungulu mhandzeni hi khati ga vonawu, va mu maha cihlekiso ka vanhu.+ 7 Hakuva a misava yi kuma makatekwa ya Nungungulu a cikhati leci yi pswongako a vhula leyi yi tshamelako kuna hehla ka yona yi gumesa yi milisa zvibyalo zvi vhunako lava yi rimelwako vona. 8 Kanilezvi loku yi milisa mimizwa ni mahlehlo, ya aliwa yi tlhela yiva kusuhani ni ku rukatelwa niku hi kugumesa yi ta hisiwa.

9 Kanilezvi ka n’wina, varandzekako, hi na ni kutsumba ka zvilo zva chukwana, a zvilo zvi yelanako ni kuhanyiswa, hambu lezvi hi wulawulisako lezvi. 10 Hakuva Nungungulu a hi loyi a nga lulamangiko wo kala a rivala a ntiro wa n’wina ni lirandzo leli mu nga li kombisa vitweni gakwe+ hi lezvi mu tireleko vobasa, ni lezvi ma ha simamako ku va tirela. 11 Kanilezvi hi xuva ku a mun’we ni mun’wani wa n’wina a kombisa kupinyama kaloku ka kun’we, lezvaku ava ni kutsumba ko tiya+ kala magumo,+ 12 kasi mu ngavi malolo,+ kanilezvi muva vapimanyisi va lava hi kota ya kukholwa ni lihlazva-mbilu va gako a tshomba ya zvitsumbiso.

13 Hakuva a cikhati leci Nungungulu a nga maha citsumbiso cakwe ka Abrahama, kota lezvi ku nga hi hava wahombe ku hundza yena wa ku hlambanya hi yena, i no hlambanya hi wutsumbu gakwe,+ 14 aku: “Hakunene ndzi ta ku katekisa niku hakunene ndzi ta ku andzisa.”+ 15 Hikwalaho, andzhako ka loku Abrahama a kombisile lihlazva-mbilu, i no kuma a citsumbiso leci. 16 Hakuva a vanhu va hlambanya hi munhu wa hombe ku hundza vona, niku a kuhlambanya kabye ku mbheta a kukanetisana kontlhe, hakuva ka vona citiyisekiso ca le nayweni.+ 17 Hi kufanana, a cikhati leci Nungungulu a nga boha ku kombisa hi ndlela yo dlunyateka ka vagi va tshomba ya citsumbiso+ lezvaku a kungo gakwe a gi cici, i no zvi tiyisa hi kuhlambanya, 18 kasi hi ka zvilo zvimbiri zvi nga ciciko lezvi Nungungulu a nga hembiko ka zvona,+ hina, lava hi tsutsumeleko wuponelweni, hi fela kuva ni kutiyiswa ka hombe kasi hi khoma zvi tiya kutsumbeni loku ku vekilweko mahlweni ka hina. 19 Hi na ni kutsumba loku+ kota cirikhiso* ka muhefemulo,* ka lisine ni ko tiya, loku ku nghenako kala lomu ndzeni hi le ndzhako ka kortina,+ 20 lomu a wokari a nga ranga hi yena a nghena hi kota ya hina — a nga Jesu+ — loyi a ngava mupristi wa hombe hi tshamela ga Melkizedheki kala kupindzuka.+

7 Hakuva Melkizedheki loyi, a hosi ya Salema tlhelo mupristi wa Nungungulu Loyi a Tlakukileko ku Hundza Vontlhe, i no tlhangana na Abrahama na a wuya hi le ko daya tihosi, a mu katekisa.+ 2 Abrahama i no mu nyika* zvawukhume ka zvontlhe. A co sangula, a vito gakwe gi hundzuluselwa giku: “Hosi ya Kululama”, a cin’wani ku i hosi ya Salema, zvi wulako ku “Hosi ya Kurula”. 3 Lezvi a kalako a nga hi na papayi ni mamani ne lixaka, ni lezvi a nga hava kusangula ka masiku, ne hambu kugumesa ka kuhanya, kanilezvi na a mahilwe a fana ni N’wana wa Nungungulu, i simama kuva mupristi kala kupindzuka.+

4 Hi nga wonani a kukula ka wanuna loyi, loyi Abrahama, a nyapandze, a nga mu nyika a zvawukhume zva muphango wakwe wa wunene!+ 5 Lisine ku hi kuya hi Nayo, lava va humako hi ka vana va Levhi,+ lava va amukelako a cikhundla ca wupristi, va nyikwa cileletelo ca lezvaku va teka a zvawukhume ka vanhu,+ va nga vamakabye vabye, hambu lezvi va nga pswalo wa* Abrahama. 6 Kanilezvi a wanuna loyi, wo kala a nga humi hi ka lixaka labye, i no teka zvawukhume ka Abrahama a tlhela a katekisa loyi a nga hi ni zvitsumbiso.+ 7 Makunu a zvi na ku kanetiwa lezvaku loyi wa mutsongwani i katekisiwa hi loyi wa hombe. 8 Ka mhaka yo sangula, lava va amukelako zvawukhume vanhu lava va fako, kanilezvi ka mhaka leyi yin’wani, hi loyi a kustumunyelwako lezvaku wa hanya.+ 9 Hikwalaho, ku nga wuliwa lezvaku hambu Levhi, loyi a amukelako a zvawukhume, i humesile zvawukhume hi canja ga Abrahama, 10 hakuva Levhi i wa ha tava pswalo wa* kokwani wakwe a cikhati leci Melkizedheki a nga tlhangana naye.+

11 Makunu loku a kumbhelela ku wa no kumeka hi wupristi ga ka Levhi+ (hakuva gi wa hi nchumu wa lisima Nayweni lowu wu nga nyikilwe vanhu), hikuyini ku nga wa ha ta laveka lezvaku kuta mun’wani mupristi hi tshamela ga Melkizedheki+ na ku nga hi hi tshamela ga Aroni ke? 12 Hakuva loku a wupristi gi ciciwa, a Nayo wonawu wu fanele ku ciciwa.+ 13 Hakuva loyi a timhaka leti ti wulawulako hi yena i tile hi ka lixaka lin’wani, la ku a ku se huma hi ka lona a munhu a nga tshuka a tira alatini.+ 14 Hakuva zva dlunyateka lezvaku a Hosi ya hina yita hi ka lixaka la ka Judha,+ hambulezvo, Mosi a nga wulangi nchumu xungetano hi kuva a vapristi va huma hi ka lixaka lelo.

15 A mhaka leyi yi tlhela yi dlunyateka nguvhu a cikhati leci ku chikelako mun’wani mupristi+ wo fana na Melkizedheki,+ 16 loyi a ngava mupristi na ku nga hi hi cileletelo ca nayo leci ci khegelako ka lixaka,* kanilezvi hi ntamu wa wutomi gi nga lovisiwiko.+ 17 Hakuva ku kustumunyiwa lezvi xungetano hi yena: “Wena u mupristi kala kupindzuka hi tshamela ga Melkizedheki.”+

18 Hikwalaho, a nayo wa kale wu fuvisilwe hakuva wu na ni gome niku a wu vhuni nchumu.+ 19 Hakuva a Nayo a wu mbhelelisangi nchumu,+ kanilezvi a kutsumba ka kunene loku ku nga nghenisiwa+ ku zvi kotile, loku hi tshinelako ha kona ka Nungungulu.+ 20 Ahandle ka lezvo, kota lezvi ku nga kala ku mahiwa ahandle ka cihlambanyo co tiya 21 (kunene, ku na ni vavanuna va nga maha vapristi na ku nga hlambanyiwangi, kanilezvi loyi i mahile mupristi hi kuhlambanya ko tiya xungetano hi yena, ku mahilweko hi Loyi a ngaku: “Jehovha* i hlambanyile, niku a nga ta cica maalakanyo yakwe:* ‘Wena u mupristi kala kupindzuka’”).+ 22 Hizvalezvo, Jesu i nova citiyisekiso ca civhumelwano ca cinene.+ 23 Ahandle ka lezvo, zvi lavile ku kuva ni vapristi vo tala vo landzelana,+ hakuva a kufa ku wa va tsandzekisa a ku simama va tira kota vapristi, 24 kanilezvi, kota lezvi yena a simamako ku hanya kala kupindzuka,+ a wupristi gakwe a gi na vatlhatami. 25 Hikwalaho, wa zvi kota kambe a ku hanyisa hi kumbhelela lava va tshinelako ka Nungungulu ha yena, hakuva yena wa hanya contlhe cikhati kasi ku va khongotelela.+

26 Hakuva zva fanela a kuva hi hi ni mupristi wa hombe wo tshamisa lezvo, wo tsumbeka, a nga hiko na nandzu, a basileko,+ a hambanisilweko ni vawonhi, loyi a tlakusilweko hehla ka matilo.+ 27 A ku hambana ni vapristi lavo, a zvi lavi ku a nyikela miphahlo siku ni siku,+ a sangula hi leyi ya zviwonho zvakwe a gumesa hi leyi ya zviwonho zva vanhu,+ hakuva lezvo i zvi mahile khati gin’we zvi enela, a cikhati leci a nga ti nyikela wutsumbu gakwe.+ 28 Hakuva a Nayo wu yimisa vanhu lava va nga ni gome lezvaku vava vapristi va hombe,+ kanilezvi a mhaka ya kuhlambanya+ ko tiya leyi yi ngata hi ndzhako ka Nayo yi yimisa a N’wana, loyi a nga mbheleliswa+ kala kupindzuka.

8 A tshinya ga timhaka leti hi wulako hi legi: Hi na ni mupristi wa hombe wo tshamisa lezvi,+ a tshamileko reveni ga cinene ga Wukulu le matilweni,+ 2 a nga nandza ga wutshamu go basa+ ni ga tenda ga lisine, gi yimisilweko hi Jehovha,* na ku nga hi hi munhu. 3 Hakuva vontlhe a vapristi va hombe va yimisiwa kasi ku nyikela a minyikelo ni miphahlo; hikwalaho, zvi wa laveka ku loyi yenawu ava ni co nyikela.+ 4 Loku i wa hi laha misaveni, na a nga vangi mupristi,+ hakuva ku sina ku hi ni vanhu va nyikelako minyikelo kota kulaya ka Nayo. 5 A vanhu lava va maha a ntiro wo basa lowu wu nga mufananiso ni ndzhuti+ wa zvilo zva le tilweni;+ khwatsi hi lezvi Mosi, a cikhati leci a nga lava ku aka tenda, a nga nyikwa cileletelo ci ngata hi ka Nungungulu. Hakuva Yena i ngalo: “Chela kota u maha zvontlhe hi ku landza mufananiso lowu u nga kombiwa le citsungeni.”+ 6 Kanilezvi makunu Jesu i no kuma a ntiro wa wunene nguvhu hakuva hi yena kambe a nga mutlhanganyisi+ wa civhumelwano leci ca cinene a ku hundza leci ca kale,+ ci tiyisiwako nayweni hi zvitsumbiso zva zvinene nguvhu.+

7 Loku a civhumelwano co sangula ci wa nga hi na kusoleka, na ku nga ha lavekangi ca wumbiri.+ 8 Hakuva yena i wona cisolo ka vanhu a cikhati leci a nge: “‘A masiku mata’, ku wula Jehovha,* ‘laha ndzi to maha civhumelwano ciswa ni yindlu ya ka Izrayeli ni yindlu ya ka Judha. 9 Ci nga ta fana ni civhumelwano leci ndzi mahileko ni vakokwani vabye ka siku legi ndzi nga va khoma hi canja gabye kasi ndzi va humesa tikweni ga Gibhite,+ hakuva a va simamangi civhumelwanweni ca mina, hikwalaho ndzi no va tsika’, ku wula Jehovha.*

10 “‘Hakuva leci civhumelwano leci ndzi to maha ni yindlu ya ka Izrayeli andzhako ka masiku lawo’, ku wula Jehovha. ‘Ndzi ta veka milayo ya mina maalakanyweni yabye, ndzi yi tsala timbilwini tabye.+ Ndzi tava Nungungulu wabye niku vona va tava vanhu va mina.+

11 “‘Va nga ta ha gondzisana, a mun’we a gondzisa a cisumbulwa-kulobye, ni mun’wani a gondzisa a makabye wakwe, aku: “Tiva Jehovha!”* Hakuva vontlhe va ta ndzi tiva, kusukela ka loyi wa mutsongwani kala ka loyi wa hombe. 12 Hakuva ndzi ta va mahela wuxinji ka mitiro yabye yi nga lulamangiko, niku ndzi nga ta ha zvi alakanya kambe a zviwonho zvabye.’”+

13 Lezvi a nge “civhumelwano ciswa”, i komba lezvaku i chipisile leci ca kale.+ Makunu leci ci chipileko ni ku guga ci laha kusuhani ni ku n’walala.+

9 A civhumelwano ca kale, ci wa hi ni zvileletelo zva le nayweni zva ntiro wo basa ni wutshamu ga cona go basa+ laha misaveni. 2 Hakuva ku wa akilwe a wutshamu go sangula ga tenda, lomu ku nga hi ni nenge wa tikandiya,+ ni meza, ni tipawa ta munyikelo;+ niku gi vitaniwa ku Wutshamu go Basa.+ 3 Kanilezvi le ndzhako ka kortina ga wumbiri,+ ku wa hi ni gin’wani wutshamu ga tenda gi vitaniwako ku Wutshamu go Basabasa.+ 4 Ka wutshamu lego, ku wa hi ni cibya ca ouro co hisela kona libani+ ni arke ga civhumelwano+ gi nga nameketelwe ouro matlhelweni wontlhe,+ lomu ku nga hi ni jaro ya ouro yi nga tshama mana,+ ni nhonga ya Aroni leyi yi nga pfepfile,+ ni timbila+ ta civhumelwano; 5 niku hehla ka gona, ku wa hi ni makerubhima yo ngangamela ma nga khumbunyeta a tapa* ya muphahlo wo enela.+ Kanilezvi leci a hi cikhati ca ku wulawula hi zvilo lezvi hi cin’we cin’we.

6 Loku a zvilo lezvi zvi akisilwe lezvi, a vapristi va nghena ka wutshamu go sangula ga tenda hi kukhandzakanya kasi va maha mitiro yo basa;+ 7 kanilezvi lomu ka wutshamu ga wumbiri ku nghena mupristi wa hombe yece khati gin’we hi lembe,+ kanilezvi a nga ngheni na a nga hi na nkhata,+ lowu a wu nyikelako hi kota ya zviwonho zvakwe+ ni hi kota ya zviwonho lezvi a vanhu+ va zvi mahileko na va nga zvi tivi. 8 Hikwalaho, a moya wo basa wu komba zviku dlunya lezvaku a ndlela yi yako wutshan’wini go basa yi wa nga se kombisiwa a cikhati leci ku nga ha hi ni tenda go sangula.+ 9 A tenda legi mufananiso wa zvilo zva cikhati leci.+ Hi ku landza a lulamiselo legi, ku nyikelwa minyikelo ni miphahlo.+ Hambulezvo, a yi zvi koti ku basisa hi kumbhelela* a livhalo la loyi a mahako mitiro yo basa.+ 10 Yi yelana ntsena ni zvakuga ni zvakunwa ni mikhuwo ya kubasisa ko tsalangana.*+ Zvi wa hi zvileletelo zvi nga yimisilwe hi nayo xungetano hi miri,+ lezvi zvi tirileko kala cikhatini ci yimisilweko ca ku lulameta zvilo.

11 Hambulezvo, a cikhati leci Kristu a ngata kota mupristi wa hombe wa zvilo zva zvinene lezvi zvi nga sina zvi mahekile, i no tsemakanya a tenda ga hombe ni go mbhelela ku hundza wontlhe gi nga mahiwangiko hi mandla ya munhu, ku nga ku a hi ga laha misaveni. 12 I no nghena wutshan’wini go basa na a nga hi na nkhata wa timbuti ni wa zvidhunana zva tihomu, kanilezvi ni nkhata wakwe wutsumbu,+ khati gin’we zvi enela, a hi kumela a kutlhatlhiswa ka pindzukelwa.+ 13 Hakuva loku a nkhata wa timbuti ni wa madhuna ya tihomu,+ ni khuma ga cihon’wana ca kati, zvi n’watsekelwako ka lava va nyenyezileko, zvi va hlazva kasi va basa hi ka nyama,+ 14 a ha ha wuli hi nkhata wa Kristu,+ loyi hi moya wa pindzukelwa a ti nyikeleko ka Nungungulu na a nga hi na cisolo, wu ta basisa a tivhalo ta hina ka mitiro yi fileko+ kasi hi tirela Nungungulu a hanyako!+

15 Hi zvalezvo zvi mu mahako ava mutlhanganisi wa civhumelwano ciswa,+ kasi lava va vitanilweko va fela ku kuma a citsumbiso ca tshomba ya pindzukelwa,+ kota lezvi ku fileko wokari kasi va tlhatlhiswa hi hakhelo ya kutlhatlhisa+ ka zvihambuko lezvi zvi mahilweko lahasi ka civhumelwano ca kale. 16 Hakuva laha ku nga ni civhumelwano, ku laveka lezvaku a munhu loyi a ci mahileko afa, 17 hakuva a civhumelwano ci tiyisiwa hi kufa, kota lezvi ci nga tiriko loku a munhu loyi a ci mahileko a ha hanya. 18 Hikwalaho, a civhumelwano ca kale conawu a ci tirangi* na ku nga hi na nkhata. 19 Hakuva laha Mosi a nga mbhetile ku nyika zvileletelo zvontlhe zva Nayo ka vanhu vontlhe, i no teka a nkhata wa zvidhunana zva tihomu ni wa timbuti, ni mati, ni woya go pswhuka ga tiyivhu, ni hisope,* a n’watsekela a bhuku* ni vanhu vontlhe, 20 aku: “Lowu i nkhata wa civhumelwano leci Nungungulu a mu layileko lezvaku mu ci hlayisa.”+ 21 I no n’watsekela nkhata kambe ka tenda ni ka zvibya zvontlhe zvi tirisiwako ntirweni wo basa.+ 22 Ina, hi kulaya ka Nayo, a kutala ka zvilo zvi basiswa hi nkhata,+ niku ahandle ka kuhalatwa ka nkhata, a ku na kutsetselelwa ka zviwonho.+

23 Hikwalaho, zvi wa laveka lezvaku a zvilo lezvi zvi fananisako+ a zvilo zva le tilweni zvi basiswa hi ndlela leyi,+ kanilezvi a zvilo zva le tilweni zvi lava miphahlo ya yinene nguvhu yo hundza leyo. 24 Hakuva Kristu a nga nghenangi wutshan’wini go basa ga ku mahiwa hi mandla ya munhu,+ legi gi nga mufananiso wa zvilo zva lisine,+ kanilezvi i no nghena tilweni ha koce,+ kasi makunu a hi yimela mahlweni ka Nungungulu.+ 25 A nga mahangi lezvo kasi ku ti nyikela hi kuphindaphinda, a ku khwatsi mupristi wa hombe loyi a nghenako wutshan’wini go basa lembe ni lembe+ na a hi ni nkhata wo kala wu nga hi wa yena n’winyi. 26 Loku zvi wa hi lezvo, na a xanisekile makhati yo tala kusukela kuvangiweni ka tiko. Kanilezvi makunu i no ti wonekelisa khati gin’we zvi enela kugumeseni ka tinguva,* kasi a fuvisa ciwonho hi muphahlo wa yena wutsumbu.+ 27 Niku a ku khwatsi hi lezvi a vanhu va yimelweko hi kufa khati gin’we zvi enela, kanilezvi andzhako ka lezvo va lamuliwa, 28 hizvalezvo kambe na Kristu i no nyikelwa khati gin’we zvi enela kasi a rwala zviwonho zva votala;+ niku ka khati ga wumbiri legi a to woneka, i tava lahandle ka ciwonho,* niku i ta woniwa hi lava va rindzelako a kuhanyiswa kabye hi kuxuva ka hombe.+

10 Kota lezvi a Nayo wu nga ndzhuti+ wa zvilo zva zvinene lezvi zva ha tako,+ kanilezvi na wu nga hi wona wu nga zvilo zva kona, a wu* nge tshuki wu zvi kota ku, hi miphahlo yaleyi ya yin’we yi nyikelwako hi kukhandzakanya lembe ni lembe, wu mbhelelisa lava va tshinelako.+ 2 Loku zvi wa hi lezvo, na va nyimile ku nyikela miphahlo, hakuva loku lava va mahako a ntiro wo basa va basisilwe kan’we, a tivhalo tabye na ti nga ha va alakanyisi kambe lezvaku vawonhi. 3 A ku hambana ni lezvo, a miphahlo leyo cialakanyiso ca zviwonho lembe ni lembe,+ 4 hakuva a nkhata wa tihomu ni wa timbuti a wu zvi koti ku susa zviwonho.

5 Hikwalaho, a cikhati leci a ngata tikweni, i te ngalo: “‘A wu lavangi miphahlo ni minyikelo, kanilezvi u ndzi longiselele a miri. 6 A wu tsakisiwangi hi minyikelo ya kuhiswa ya murumba ne hi minyikelo ya ciwonho.’+ 7 Makunu ndzi te: ‘Ndzi tile (lomu bhukwini go songiwa ku tsalilwe xungetano hi mina) kasi ndzi ta maha a kurandza ka wena, O Nungungulu.’”+ 8 Andzhako ka loku a rangile hiku: “A wu lavangi ku amukela ne a wu tsakisiwangi hi miphahlo ni minyikelo, ne hi minyikelo ya kuhiswa ya murumba hambu hi minyikelo ya ciwonho” — yi nga miphahlo yi nyikelwako hi ku landza Nayo —, 9 i gumesa aku: “Ndzi tile kasi ndzi ta maha a kurandza ka wena.”+ I fuvisa lezvi zvo sangula kasi a yimisa lezvi zva wumbiri. 10 Hi “kurandza” loku,+ hi basisilwe hi kunyikelwa ka miri wa Jesu Kristu khati gin’we zvi enela.+

11 Ahandle ka lezvo, a mupristi mun’we ni mun’wani i yima wutshan’wini gakwe siku ni siku kasi ku maha ntiro wo basa+ ni ku nyikela miphahlo yaleyi ya yin’we hi kukhandzakanya,+ leyi yi nga zvi kotiko ku susa zviwonho hi kumbhelela.+ 12 Kanilezvi a wanuna loyi i no nyikela muphahlo wun’we wa zviwonho khati gin’we zvi enela a tlhela a tshama reveni ga cinene ga Nungungulu,+ 13 kusukela laho zviya mahlweni a rindzela kala a valala vakwe va vekiwa kota cikhegetelo ca mikondzo yakwe.+ 14 Hakuva hi kota ya muphahlo wun’we a wu nyikeleko, i mbhelelisile+ kala kupindzuka lava va basisiwako. 15 Ahandle ka lezvo, a moya wo basa wonawu wa hi kustumunyela, hakuva andzhako ka kuva wu wulile ku ngalo: 16 “‘Leci civhumelwano leci ndzi to maha navo andzhako ka masiku lawo’, ku wula Jehovha.* ‘Ndzi ta veka milayo ya mina timbilwini tabye, ndzi yi tsala maalakanyweni yabye.’”+ 17 Wu gumesa wuku: “Ndzi nga ta ha zvi alakanya kambe a zviwonho zvabye ne zvihambuko zvabye.”+ 18 Makunu loku lezvi zvi tsetselelwe, a ka ha laveki a munyikelo wa ciwonho.

19 Hikwalaho, vamakabye, kota lezvi hi tiyako ku famba hi ndlela ya ku nghena wutshan’wini go basa+ hi kota ya nkhata wa Jesu, 20 yi nga ndlela yiswa ni yo hanya leyi a nga hi vhululela* hi ku tsemakanya a kortina,+ ku nga nyama yakwe, 21 ni lezvi hi nga ni mupristi wa hombe hehla ka yindlu ya Nungungulu,+ 22 a hi tshineleni hi timbilu ti nene ni kukholwa ko mbhelela, a timbilu ta hina na ti n’watsekelwe ti basiswa ka livhalo la kubiha,+ ni mimiri ya hina na yi hlazvilwe hi mati yo basa.+ 23 A hi khomeni zvi tiya ka kuvhumela ka kutsumba ka hina na hi nga tsekatseki,+ hakuva loyi a nga tsumbisa i tsumbekile. 24 A hi khatalelaneni* kasi hi susumetana* lirandzweni ni mitirweni yo saseka,+ 25 na hi nga tsiki ku tlhangana,+ a ku khwatsi mukhuwo wa van’wani, kanilezvi hi tiyisana,+ nguvhunguvhu kota lezvi mu wonako a siku na gi tshinela kusuhani.+

26 Hakuva loku hi wonha ha womu andzhako ka kuva hi amukele a wutivi go mbhelela ga lisine,+ a ka ha hi na wun’wani muphahlo wa zviwonho wu seleko,+ 27 kanilezvi kova ni kurindzela ko tshisa ka kulamulwa ni zanga yi vhurako leyi yi to lovisa valala.+ 28 Ni wihi loyi a hambunyetako a Nayo wa Mosi wafa na a nga tsetsiwi, loku ku kumeka wukustumunyu ga vanhu vambiri kutani vanharu.+ 29 Mu zvi wonisa kuyini? A nga ta kuma tsayiselelo wa hombe nguvhu a munhu loyi a kandzihetelako a N’wana wa Nungungulu, a chepeta a lisima la nkhata wa civhumelwano+ leci a basisilweko hi cona, a tlhela a rukatela ni ku kanyisa a moya wa tipswalo ke?+ 30 Hakuva ha mu tiva Loyi a nga wula, aku: “A kuphota ka mina; hi mina ndzi to tlhelisela.” A tlhela aku: “Jehovha* i ta lamula vanhu vakwe.”+ 31 I nchumu wo tshisa a ku wela mandleni ya Nungungulu a hanyako.

32 Hambulezvo, simamani ku alakanya a masiku ma hundzileko, lawa andzhako ka loku mu woningelwe+ mu nga timisela a kulwa ka hombe ni kuxaniseka. 33 Ka zvin’wani zvikhati mu wa humeswa kubaseni kasi mu rukatelwa ni kuxanisiwa; ka zvin’wani zvikhati mu wa hi tlhelweni ga lava va nga kumana ni zvilo lezvo. 34 Hakuva mu va zwele wusiwana lava va nga hi paxweni mu tlhela mu vhumela hi kutsaka a ku phangiwa zvilo zva n’wina,+ na mu tiva lezvaku mu na ni tshomba ya chukwana ya kala kupindzuka.+

35 Hikwalaho, mu nga tsiki a kutiya-hlana ka n’wina,* loku ku to chachazelwa nguvhu.+ 36 Hakuva zva laveka ku mu timisela,+ kasi loku mu mahile a kurandza ka Nungungulu, mu amukela a kutatiseka ka citsumbiso. 37 Hakuva “ku kiyela kutsongwani”,+ “loyi a tako i ta chikela, a nga ta hlwela”.+ 38 “Kanilezvi a wakululama wa mina i ta hanya hi kota ya kukholwa”,+ niku “loku a tlhelela ndzhako, ndzi* nga ta tsaka hi yena”.+ 39 Kanilezvi hina a hi lava va tlhelelako ndzhako vaya kulovisweni,+ kanilezvi hi hina lava va nga ni kukholwa kasi ku ponisa a wutomi* ga hina.

11 A kukholwa kutsumba ko tiya ka lezvi zvi rindzelwako,+ a cikombiso co dlunyateka* ca zvilo zva lisine zvi nga wonekiko. 2 Hakuva hi kota ya kona, a vanhu va cikhatini ca kaleloko* va no amukela wukustumunyu.

3 Hi kukholwa, ha zvi zwisisa lezvaku a matshamela ya zvilo* ma xaxametilwe hi gezu ga Nungungulu, lezvaku lezvi zvi woniwako zvi tile hi ka lezvi zvi nga woniwiko.

4 Hi kukholwa, Abheli i no nyikela ka Nungungulu a muphahlo wa lisima la hombe a ku hundza lowu wa Kana,+ niku hi kota ya kukholwa loko, i no amukela a wukustumunyu ga lezvaku i wa lulamile, hakuva Nungungulu i amukele* a minyikelo yakwe,+ niku hambu lezvi a fileko, wa ha wulawula+ hi kukholwa kakwe.

5 Hi kukholwa, Enoki+ i no rurisiwa kasi a nga woni kufa, niku a nga kumiwangi ni ka gihi wutshamu hi ku Nungungulu i wa mu rurisile;+ hakuva na a nga se rurisiwa, i amukele a wukustumunyu ga lezvaku i wa tsakisile Nungungulu. 6 A ku tsika lezvo, ahandle ka kukholwa a zvi koteki ku mu tsakisa Nungungulu, hakuva loyi a tshinelako ka Nungungulu i fanele ku kholwa lezvaku i kona niku muchachazeli wa lava va mu hlotako hi mbilu yontlhe.+

7 Hi kukholwa, Nowa,+ andzhako ka ku amukela citlharihiso ca Nungungulu ca zvilo zvi nga kala zvi nga se woniwa,+ i no kombisa kuchava Nungungulu a aka taru+ kasi ku ponisa a ngango wakwe niku hi kota ya kukholwa loko, i no kona tiko,+ ava mugi wa tshomba ya kululama loku ku kumiwako hi kukholwa.

8 Hi kukholwa, Abrahama,+ a cikhati leci a nga vitaniwa, i no ingisa hi ku suka aya ka wutshamu legi a nga wa ta nyikiwa kota tshomba; i no suka a famba hambu lezvi a nga kala a nga ku tivi lomu a ngaya kona.+ 9 Hi kukholwa, i no hanya kota muluveli tikweni ga citsumbiso, a ku khwatsi hi loku a hi tikweni ga vambe,+ na a hanya lomu matendeni+ zvin’we na Isaka na Jakobe, a vagi-kulobye va tshomba ya citsumbiso leco.+ 10 Hakuva i wa rindzela a dhoropa legi gi nga ni zviseketelo zva lisine, legi a mumahi* ni muaki wa gona a nga Nungungulu.+

11 Hi kukholwa, Sara yenawu, hambu lezvi a nga hundzile tangeni ya ku pswala,+ i no kuma ntamu wa ku xura nyimba ya pswalo,* kota lezvi a nga mu wona kota wo tsumbeka Loyi a nga mahile citsumbiso. 12 Hi cigelo leco, hi ka wanuna mun’we loyi a nga wonekisa ku khwatsi i file,+ ku no pswaliwa vana+ vo talisa ku khwatsi tinyeleti ta tilo ni va tsandza-vahlayi a ku khwatsi tindzhoho ta misava yi nga mbhirini ya bimbi.+

13 Vontlhe lava va file kukholweni, hambu lezvi va nga kala ku amukela lezvi zvi tsumbisilweko;+ kanilezvi va zvi wonile hi le kule,+ va zvi vhumela hi kutsaka, va tlhela va wula kubaseni lezvaku valuveli ni vahlavha tikweni lego. 14 Hakuva lava va wulawulisako lezvo va komba zviku dlunya lezvaku va lavetela a wutshamu ga vona wutsumbu hi kutitsitsirita. 15 Hambulezvo, loku va wa no tshama hi ku alakanya a wutshamu legi va nga suka hi ka gona,+ na va kumile mole wa ku tlhela. 16 Kanilezvi zvezvi va lavetela a wutshamu ga ginene legi gi lumbako matilo. Hikwalaho, Nungungulu a nga na tingana ha vona, ta ku vitaniwa ku i Nungungulu wabye,+ hakuva i va longiselele dhoropa.+

17 Hi kukholwa, Abrahama, a cikhati leci a nga ringiwa,+ zvi nga wuliswa ku i no nyikela muphahlo hi Isaka — a wanuna loyi a nga amukela a zvitsumbiso na a tsakile i wa sangulile ku nyikela a n’wana wakwe a pswalilweko yece+ —, 18 hambu lezvi a nga byelilwe ku ngalo: “Leci ci to wuliwa ku i pswalo* wa wena ci ta huma hi ka Isaka.”+ 19 Kanilezvi i no alakanya lezvaku Nungungulu i na ni ntamu wa ku mu vhuxa hambu hi ka vafileko, niku i mu amukele hi ka vafileko hi ndlela yo fananisa.+

20 Hi kukholwa, Isaka yenawu i no katekisa Jakobe+ na Esawu+ xungetano hi zvilo zvi nga hata.

21 Hi kukholwa, Jakobe, a cikhati leci a nga hi kusuhani ni kufa,+ i no katekisa vana va Josefa hi mun’we mun’we,+ a khozela Nungungulu na a khigele nhonga yakwe hi le magumo ka yona.+

22 Hi kukholwa, Josefa, a cikhati leci a nga hi kusuhani ni kufa, i no wulawula hi kuhuma ka vana va ka Izrayeli, a nyika zvileletelo* xungetano hi marambu* yakwe.+

23 Hi kukholwa, Mosi i no fihliwa hi vapswali vakwe hi tihweti tinharu andzhako ka kupswaliwa kakwe,+ hakuva va wonile lezvaku a n’wanana i wa sasekile+ niku a va chavangi a nayo wa hosi.+ 24 Hi kukholwa, Mosi, a cikhati leci a ngava wahombe,+ i no ala ku vitaniwa ku i n’wana wa n’waFaro,+ 25 a hlawula ku xanisiwa ni vanhu va Nungungulu a ku hundza ku ti buza hi litsako la cikhatanyana la ciwonho, 26 hakuva i wa wona a kurukatelwa ka Kristu kota ka lisima nguvhu a ku hundza a titshomba ta Gibhite, hakuva i wa cuwuka mahlweni na a langutela a nchachazelo. 27 Hi kukholwa, i no huma Gibhite,+ kanilezvi na a nga chavi a zanga ya hosi,+ hakuva i no simama ku tiya a ku nde a ku khwatsi hi loku a wona Loyi a nga wonekiko.+ 28 Hi kukholwa, i no maha Phasika, a n’watsekela nkhata kasi a mulovisi a nga henyi a matewula yabye.+

29 Hi kukholwa, va no tsemakanya a Bimbi go Pswhuka a ku khwatsi misava yo woma,+ kanilezvi a cikhati leci a vaGibhite va nga ringisa ku maha lezvo, va no mitiwa hi bimbi.+

30 Hi kukholwa, a mimuro ya Jeriko yi nowa andzhako ka loku a vanhu va yi rendzelekele a 7 wa masiku.+ 31 Hi kukholwa, Rahabhi, loyi wa cibhayi, a nga lovangi ni lava va nga kala ku ingisa, hakuva i amukele zvipiyawu hi kurula.+

32 Ndza ha ta wula yini kambe? Hakuva a cikhati ci wa nga ta ndzi enelela loku ndzi wo simama ku hlawutela xungetano hi Gidheyoni,+ na Bharaki,+ na Samsoni,+ na Jefta,+ na Dhavhidha,+ na Samuweli,+ ni van’wani vaphrofeti. 33 Hi kukholwa, va hlulile mifumo,+ va tisa kululama, va kuma zvitsumbiso,+ va vhala minomu ya tinghala,+ 34 va tima a ntamu wa ndzilo,+ va pona a wukari ga cipadha,+ ni laha va nga hi ni gome va no nyikiwa ntamu,+ vava ni ntamu yimpini,+ va hlula a masochwa ya valala.+ 35 A vavasati va no amukela a vafileko vabye hi kuvhuxiwa hi ka vafileko,+ kanilezvi a van’wani vanhu va no xanisiwa hi ku ala ku tlhatlhisiwa,* na va fela ku kuma a kuvhuxiwa ka chukwana hi ka vafileko. 36 Ina, a van’wani va ringilwe hi ku poyiliwa ni ku biwa; kunene, ni zvo hundza lezvo, hi machini+ ni ku vhalelwa paxweni.+ 37 Va no gandliwa hi maribye,+ va ringiwa, va sahiwa hi laha cikari,* va dawa hi cipadha,+ va fambafamba na va bohile mabhebhe ya tiyivhu ni ya timbuti,+ vava kuvhumaleni, ni hlomulweni,+ ni kuxanisiweni;+ 38 niku a tiko gi wa nga va ringani. Va no pepetseka lomu zviwuleni, ni lomu zvitsungeni, ni lomu timhakweni,+ ni lomu mikeleni ya misava.

39 Kanilezvi hambu lezvi a vanhu lava vontlhe va nga amukela a wukustumunyu gi nene hi kota ya kukholwa kabye, a va zvi amukelangi lezvi va tsumbisilweko, 40 hakuva Nungungulu i wa rangile a wona zvazvinene xungetano hi hina,+ kasi va nga mbheleliswi voce na va nga hi na hina.

12 Makunu kota lezvi hi randzelweko hi refu ga hombe ga vakustumunyu go kota legi, hinawu a hi hoxeni zvontlhe lezvi zvi hi bindzako ni ciwonho leci ci hi phasako hi kuolova,+ niku ngha hi tsutsuma hi kutimisela ka mapalisana ma vekilweko mahlweni ka hina,+ 2 na hi cuwuka khwatsi a Hosana ya Hombe ni Mumbhelelisi wa kukholwa ka hina, Jesu.+ Hakuva hi kota ya kutsaka loku ku nga vekilwe mahlweni kakwe, i no timisela mhandze ya hlomulo* a ngawi tingana niku i tshamile reveni ga cinene ga citshamu ca wuhosi ca Nungungulu.+ 3 Kunene, ehleketani khwatsi hi loyi a nga timisela a magezu yo tala nguvhu ya xapi ma nga wuliwa hi vawonhi,+ lava hi ku maha lezvo va nga ti nehela khombo ha voce, kasi mu nga karali ne ku mbhela ntamu mihefemulweni ya n’wina.+

4 Ka yimpi leyi mu lwako ni ciwonho leco, a mu se tshuka mulwa laha ka kuza a nkhata wa n’wina wu halatiwa. 5 Mu rivakelwe hi kumbhelela a kukhongotela loku mu byelilweko kota vana, kaku: “N’wananga, u nga kanyisi a kulaya ka Jehovha,* ne u nga mbheli ntamu loku a ku kawuka; 6 hakuva Jehovha* i laya loyi a mu randzako, kunene, iba* ni wihi loyi a mu amukelako kota n’wana.”+

7 Mu fanele ku timisela kota cipandze ca kulayiwa* ka n’wina. Nungungulu i mu khoma kota vana.+ Hakuva hi wihi n’wana a kalako a nga layiwi hi papayi wakwe ke?+ 8 Kanilezvi loku ku nga hi n’wina n’wentlhe mu kumileko a kulaya loku, hakunene mu vana va pswalelweko handle, a mu vana va lisine. 9 Ahandle ka lezvo, a vapapayi va hina va nyama* va wa tala ku hi laya, niku hi wa va kombisa cichavo. Makunu hi wa nga faneli ku tekela ku ti koramisa ka Papayi wa wutomi ga hina ga moya kasi hi hanya ke?+ 10 Hakuva va hi layile zva cikhatanyana hi kuya hi lezvi zvi nga woneka na zvi hi zvinene kabye, kanilezvi yena i hi laya kasi hi vhuneka, hi hlengela kubaseni kakwe.+ 11 Kunene, a ku na kulayiwa ku tsakisako hi cikhati ca kona, kanilezvi ka bayisa; hambulezvo hi ndzhako ka cikhati, ku pswala handzu wa kurula ni wa kululama ka lava va gondzisiwako hi kona.

12 Hikwalaho, tiyisani a mandla ma rerekileko ni madzolo ma hlekahlekako,+ 13 mu simama ku lulameta a tindlela ta mikondzo ya n’wina+ kasi leci ci khwitako ci nga khuyuki, kanilezvi ci hanyiswa. 14 Hlotani kurula ni vanhu vontlhe+ ni kubasa+ loku a munhu a nga zvi kotiko ku wona Hosi loku a nga hi nako. 15 Ti woneleni nguvhu kasi ku ngavi ni munhu a tsandzekako ku kuma a tipswalo ta Nungungulu, kasi ku nga mili mutsu wa vhenene wu vanga zvikarato, ni votala va nyenyeziswa hi wona,+ 16 mu ti wonela kasi ku ngavi ni munhu cikari ka n’wina a nga cibhayi,* ne munhu a nga nyikiko lisima a zvilo zvo basa, a ku fana na Esawu, loyi a nga tsika a tifanelo takwe ta wutewula a ti cicisa hi ngelo wa zvakuga.+ 17 Hakuva n’wina ma zvi tiva lezvaku andzhako ka cikhati, laha a nga lava ku kuma tshomba ya kukatekiswa, i no aliwa; hakuva hambu lezvi a nga zama hi tindlela tontlhe hi mihloti a ku kuva ni kucica ka maalakanyo,*+ a nga kotangi nchumu.*

18 Hakuva n’wina a mu tshinelangi ka nchumu zvi kotekako ku wu henya,+ lowu wu nga vhurile ndzilo,+ ni ka refu ga ntima, ni ka munyama wa hombe, ni ka cingulo,+ 19 ni ka kuvhuma ka mpundzu,+ ni ka gezu gi nga wulawula,+ legi a cikhati leci a vanhu va nga gizwa va nga khongotela va kombela lezvaku va nga ha byeliwi nchumu.+ 20 Hakuva va wa nga ha zvi koti a ku timisela a cileletelo leci caku: “Hambu loku cova cihari ci henyako citsunga, ci fanele ku gandliwa hi maribye.”+ 21 Ahandle ka lezvo, lezvi zvi nga woneka zvi wa tshisa nguvhu laha ka kuza Mosi aku: “Ndza chava ni kururumela.”+ 22 Kanilezvi n’wina mu tshinele Citsungeni ca Ziyoni+ ni dhoropeni ga Nungungulu a hanyako, ku nga Jerusalema ga le tilweni,+ ni ka tingilozi ta tsandza-vahlayi,* 23 ni mutlhanganweni wa hombe,+ ni ka bandla ga matewula lawa ma tsalelweko le tilweni, ni ka Nungungulu, a Mulamuli wa vontlhe,+ ni ka wutomi ga moya+ ga valulamileko lava va mbhelelisilweko,+ 24 ni ka Jesu, a mutlhanganisi+ wa civhumelwano ciswa,+ ni ka nkhata wu n’watsekelweko, lowu wu wulawulako khwatsi a ku hundza nkhata wa Abheli.+

25 Ti woneleni, mu nga tsiki a kuzwa loyi a wulawulako. Hakuva loku lava va nga ala a kuzwa loyi a nga va nyika a citlharihiso ca Nungungulu laha misaveni va nga ponangi, a ha ha wuli hi hina, hi nga ta pona loku hi hambuka ka loyi a wulawulako hi le tilweni!+ 26 Cikhatini leco, a gezu gakwe gi no tsekatsekisa misava,+ kanilezvi makunu i tsumbisile lezvi: “Khati gin’we kambe ndzi ta tsekatsekisa misava, na yi nga hi yona basi kanilezvi ni tilo gonawu.”+ 27 Makunu a magezu lawa yaku “khati gin’we kambe” ma komba a kususiwa ka zvilo lezvi zvi tsekatsekisiwako, ku nga zvilo lezvi zvi mahilweko, kasi ku sala lezvi zvi nga tsekatsekiswiko. 28 Hikwalaho, kota lezvi hi to amukela a Mufumo wu nga tsekatsekiswiko, a hi simameni ku amukela tipswalo leti ha tona hi zvi kotako ku mahela Nungungulu a ntiro wo basa wu amukelekako hi kuchava ni kururumela. 29 Hakuva a Nungungulu wa hina i ndzilo wu khadamulako.+

13 Ngha a lirandzo la n’wina la wumakabye li simama.+ 2 Mu nga rivakelwi ku amukela vapfhumba,*+ hakuva hi ku maha lezvo, a vokari va amukele tingilozi na va nga zvi tivi.+ 3 Alakanyani lava va nga mapaxweni,*+ a ku khwatsi mu no vhalelwa zvin’we navo,+ ni lava va xanisiwako, kota lezvi n’winawu mu nga mirini.* 4 A wukati gi wa dzundzeke ka vanhu vontlhe, ni sango ga wukati ngha gi nga nyenyeziswi,+ hakuva Nungungulu i ta lamula a zvibhayi.*+ 5 A mahanyela ya n’wina ma ngavi ya ku randza mali,+ kanilezvi tsakani hi lezvi mu nga nazvo.+ Hakuva i te: “Ndzi nga ta tshuka ndzi ku tsika hambu ku tshuka ndzi ku fularela.”+ 6 Kasi hi tala hi kutiya-hlanha, hiku: “Jehovha* hi yena muvhuni wa mina; ndzi nga ta chava nchumu. A munhu a nga ndzi maha yini ke?”+

7 Alakanyani lava va rangelako cikari ka n’wina,+ lava va mu byelileko a mhaka ya Nungungulu. Laha mu cuwukisisako a wuyelo ga mahanyela yabye, pimanyisani a kukholwa kabye.+

8 Jesu Kristu hi yaloyi wa mun’we, a tolo, ni nyamutlha, ni kala kupindzuka.

9 Mu nga vhumeli ku hambukisiwa hi tigondzo to tsalangana mu nga ti tiviko, hakuva i chukwana a ku a mbilu yi tiyisiwa hi tipswalo a ku hundza ku yi tiyisiwa hi zvakuga,* lezvi zvi nga va vhuniko nchumu lava va ti tsitsiritelako zvona.+

10 Hi na ni alati legi lava va mahako mitiro yo basa lomu tendeni va nga hiko na fanelo ya kuga ka gona.+ 11 Hakuva a nyama ya zvihari lezvi a nkhata wa kona wu yisiwako lomu ndzeni ka wutshamu go basa hi mupristi wa hombe kota munyikelo wa ciwonho, yi hisiwa lehandle ka wugovelo.+ 12 Hikwalaho, Jesu yenawu i no xaniseka lehandle ka nyangwa ya dhoropa+ kasi a fela ku basisa vanhu hi nkhata wakwe wutsumbu.+ 13 Makunu a hi yeni kakwe lehandle ka wugovelo na hi rwele a zviruko lezvi yenawu a zvi rweleko,+ 14 hakuva laha a hi na dhoropa legi gi pindzukako, kanilezvi hi hlota hi kutitsitsirita legi gi tako.+ 15 Ha yena, a hi nyikeni Nungungulu a muphahlo wa kudhumisa contlhe cikhati,+ ku nga handzu wa minomu ya hina+ leyi yi kanelako a vito gakwe kubaseni.+ 16 Ahandle ka lezvo, mu nga rivakelwi ku maha zvazvinene ni ku avela van’wani lezvi mu nga nazvo,+ hakuva Nungungulu wa tsaka hi miphahlo leyo.+

17 Ingisani lava va rangelako cikari ka n’wina,+ mu ti koramisa,+ hakuva va wonelela a mihefemulo ya n’wina, kota lava va to ti hlamulela,+ kasi va tira hi kutsaka na ku nga hi hi kuketa, hakuva lezvo zvi wa tava khombo ka n’wina.

18 Simamani ku hi khongelela hakuva ha tsumba lezvaku hi na ni livhalo li nene,* kota lezvi hi xuvako ku tsumbeka zvilweni zvontlhe.+ 19 Kanilezvi ndza mu khongotela nguvhu lezvaku mu khongela kasi ndzi wuyisiwa ka n’wina zvezvanyana.

20 Makunu ngha a Nungungulu wa kurula, loyi a vhuxileko a murisi wa hombe+ wa tiyivhu hi ka vafileko, a Hosi ya hina, Jesu, hi nkhata wa civhumelwano ca pindzukelwa, 21 a mu hlomisa hi zvilo zvontlhe zva zvinene kasi mu maha kurandza kakwe, ni ku tira ka hina ha Jesu Kristu lezvi zvi tsakisako matihlweni yakwe. A wudzundzo a give ka yena kala kupindzuka ni kupindzuka. Amen.

22 Ndza mu khongotela, vamakabye, lezvaku mu ingisela hi lihlazva-mbilu a mhaka leyi yi tiyisako, hakuva ndzi mu tsalele a papilo go koma. 23 Ndzi lava a ku mu tiva lezvaku a makabye wa hina, Timote, i tlhatlhilwe. Loku ata zvezvi, ndzi tata naye ndzi ta mu wona.

24 Rungulani vontlhe lava va rangelako cikari ka n’wina ni vobasa vontlhe. Lava va nga Italia+ va mu rungula.

25 A tipswalo a tive zvin’we na n’wina n’wentlhe.