PAPILO GO SANGULA GA PEDRO

1 Pedro, a mupostoli+ wa Jesu Kristu, ka vahanyi va cikhatana va hangalakileko le Pontu, ni le Galatiya, ni le Kapadhokiya,+ ni le Azia, ni le Bhituniya, ka vahlawulilweko 2 hi kuya hi lezvi Nungungulu, a Papayi,+ a nga sina a zvi tiva, va basisilweko hi moya,+ hi kungo ga lezvaku vava vo ingisa va tlhela va n’watsekelwa a nkhata wa Jesu Kristu:+

Ngha a tipswalo ni kurula zvi andziswa ka n’wina.

3 I wa dhumiswe Nungungulu tlhelo Papayi wa Hosi ya hina Jesu Kristu, hakuva hi kota ya wuxinji gakwe ga hombe, i hi nyikile a kupswaliwa luswa+ kasi hiva ni kutsumba ko hanya+ hi kota ya lezvi Jesu Kristu a nga vhuxiwa hi ka vafileko,+ 4 hi fela ku kuma a tshomba leyi yi nga boliko, yi nga hiko na noda, ni yi nga mbheliko.+ Yi vekelwe n’wina le tilweni,+ 5 n’wina lava mu hlayisiwako hi ntamu wa Nungungulu, hi kota ya kukholwa kasi mu kuma a kuhanyiswa loku ku longileko ku wonekeliswa cikhatini co gumesa. 6 Hi kota ya lezvo, ma tsaka nguvhu, hambu lezvi zvi nga ha lavako ku, hi cikhatana, mu xanisiwa hi mindzhingo yo tsalangana,+ 7 kasi a kukholwa ka n’wina loku ku ringilweko,+ loku ku nga ka lisima nguvhu a ku hundza a ouro leyi yi lovako hambu loku yi hlolilwe* hi ndzilo, kuva cigelo ca ku dzundziwa, ni ku khesiwa, ni ku dhumiswa cikhatini ca wonekeliswa ka Jesu Kristu.+ 8 Hambu lezvi mu kalako mu nga se tshuka mu mu wona, ma mu randza. Hambu lezvi mu kalako mu nga mu woni zvezvi, ma kombisa kukholwa kakwe niku ma tsaka nguvhu hi kutsaka ku nga tlhamuselekiko ni ko ngangamela, 9 laha mu chikelelako a kungo ga kukholwa ka n’wina, ku nga kuhanyiswa ka n’wina.*+

10 Xungetano hi kuhanyiswa loku, a vaphrofeti lava va phrofetileko hi tipswalo leti mu nyikilweko tona, va no wutisisa khwatsi ha kona, va ku hlolisisa khwatsi.+ 11 Va no simama ku hlola na va lava ku tiva a cikhati co kongoma kutani nguva leyi a moya lowu wu nga hi kabye wu nga kari wu komba xungetano hi Kristu,+ laha wu nga kustumunya na ka ha hi mahlweni hi zvixaniso lezvi Kristu+ a nga wa ta xaniseka hi zvona ni kungangamela loku ku nga wa ta landzela. 12 Va no kombiwa lezvaku a va ti tireli, kanilezvi va tirela n’wina timhakeni leti makunu mu hlawutelweko hi lava va nga mu byela a mahungu ya manene hi moya wo basa wu nga rumelwa hi le tilweni.+ A timhaka leti hi tona leti a tingilozi ti xuvako nguvhu ku ti tiva.

13 Hikwalaho, longiselani a kupima ka n’wina kasi mu tira;+ hlayisani kupima ka n’wina hi kumbhelela,+ mu veka a kutsumba ka n’wina tipswalweni leti mu to nyikiwa kuwonekelisweni ka Jesu Kristu. 14 Kota vana va ingisako, tsikani a ku landzela a* kunavela loku mu nga hi nako kale na mu nga seva ni wutivi, 15 kanilezvi a ku khwatsi hi a Basileko loyi a mu vitanileko, basani mahanyeleni ya n’wina wontlhe,+ 16 hakuva ku tsalilwe ku ngalo: “Basani, hakuva mina ndzi basile.”+

17 Loku mu kombela ka Papayi loyi a lamulako hi kuya hi mitiro ya mun’we ni mun’wani na a ngayi hi nghohe ya munhu,+ hanyani hi ku chava+ cikhatini leci ma ha hiko vahanyi va cikhatana. 18 Hakuva ma zvi tiva lezvaku a ku vangi hi zvilo zvi lovako, hi prata kutani ouro, mu nga tlhatlhisiwa+ mahanyeleni ya n’wina ma nga vhuniko nchumu lawa mu nga tolovetilwe hi vakokwani va n’wina.* 19 Kanilezvi kuve hi nkhata wa lisima,+ wo fana ni nkhata wa yivhana yi nga hiko na cisolo ne cibawa,+ wu nga wa Kristu.+ 20 Kunene, i wa sina a tiviwa a tiko gi nga se vangiwa,+ kanilezvi i wonekelisilwe kumbheleni ka zvikhatini hi kota ya n’wina.+ 21 Ha yena, ma kholwa ka Nungungulu,+ loyi a nga mu vhuxa hi ka vafileko+ a mu nyika a kungangamela,+ kasi a kukholwa ni kutsumba ka n’wina zviva ka Nungungulu.

22 Lezvi makunu mu ti basisileko* hi ku ingisa lisine, kota wuyelo ga kona muva ni lirandzo la wumakabye li nga hiko lo fayelisela,+ randzanani nguvhu na zvi sukela mbilwini.+ 23 Hakuva mu nyikilwe a kupswaliwa luswa,+ na ku nga hi hi mbewu yi bolako, kanilezvi hi mbewu yi nga boliko,*+ hi mhaka ya Nungungulu a hanyako ni wa pindzukelwa.+ 24 Hakuva “a nyama yontlhe* yi fana ni byanyi, ni kungangamela kontlhe ka yona ku fana ni citsangi ca khwati; a byanyi ga wuna ni zvitsangi zva tlhatlheka, 25 kanilezvi a mhaka ya Jehovha* yi simama kala kupindzuka”.+ A “mhaka” ya kona mahungu ya manene lawa ma kanelweko ka n’wina.+

2 Hikwalaho, ti tlhatlhiseni ka kubiha kontlhe,+ ni kukanganyisa, ni kukhohlisa, ni matshoho, ni kulumbetana kontlhe. 2 A ku fana ni zvihlangi zva ha hi ku pswaliwako,+ ti vangeleni kuxuva ka mafi ma nga jutiwangiko ya mhaka kasi mu kula hi wona, mu hanyisiwa,+ 3 kota lezvi mu ringileko mu wona lezvaku a Hosi yi nene.

4 Laha mu tshinelako kakwe, loyi a nga ribye gi hanyako legi gi nga aliwa hi vanhu,+ kanilezvi gi hlawulilweko ni ga lisima ka Nungungulu,+ 5 n’wina, kota maribye ma hanyako, ma akiwa muva yindlu ya moya+ kasi muva vapristi va basileko, lezvaku mu nyikela a miphahlo ya moya+ leyi yi amukelekako ka Nungungulu ha Jesu Kristu.+ 6 Hakuva a Mitsalo yi ngalo: “Cuwukani! Ndza veka le Ziyoni a ribye gi hlawulilweko, a ribye ga lisima ga laha khoneni ga ciseketelo, niku i hava a kombisako kukholwa ka gona a to tshuka awa tingana.”+

7 Hikwalaho, yena wa lisima ka n’wina hakuva n’wina mu makholwa; kanilezvi ka lava va nga kholwiko, “a ribye legi gi nga aliwa hi vaaki+ give gona ribye ga laha khoneni ga lisima ka wontlhe”,*+ 8 ni “ribye ga cikhunguvanyiso, ni ribye legi gi wisako”.+ Va khunguvanyeka hakuva a va ingisi a mhaka. Va yimiselwe zvalezvo. 9 Kanilezvi n’wina mu “lixaka li hlawulilweko, ni vapristi va wuhosi, ni tiko go basa,+ ni vanhu lava va nga tshomba yakwe yo hlawuleka,+ kasi mu kanela a matshamela ya manene”*+ ya Loyi a mu vitanileko hi munyameni muta kuwonekeleni kakwe ko saseka.+ 10 Hakuva a kale mu wa nga hi tiko, kanilezvi zvezvi mu tiko ga Nungungulu;+ a kale mu wa nga mahelwi wuxinji, kanilezvi zvezvi mu mahelwe wuxinji.+

11 Varandzekako, ndza mu khongotela kota lezvi mu nga valuveli ni vanhanyi va cikhatana+ lezvaku mu tsika kunavela ka nyama+ loku ku lwako yimpi na n’wina.*+ 12 Simamani kuva ni mahanyela ma nene cikari ka vamatiko,+ kasi laha va mu lumbetako lezvaku ma maha zvakubiha, va fela kuva vakustumunyu va ku zvi wona hi mahlo va mitiro ya n’wina ya yinene,+ niku kota wuyelo ga kona, va dhumisa Nungungulu sikwini ga kuhlola kakwe.

13 Hi kota ya Hosi, ti koramiseni ka tihubyana tontlhe ti yimisilweko hi vanhu,+ kani hi ka hosi,+ hi kota ya kuva wahombe, 14 kutani vafumeli hakuva va rumilwe hi yena lezvaku va tsayisa lava va mahako kubiha ni ku dzundza lava va mahako zvazvinene.+ 15 Hakuva kurandza ka Nungungulu lezvaku, hi ku maha zvazvinene, mu miyeta a kuwulawula ka hava ka zvipumbu.+ 16 Mahani vanhu vo tlhatlheka,+ hambulezvo mu nga tirisi a kutlhatlheka ka n’wina kota cifenengeto* ca ku maha zvakubiha,+ kanilezvi kasi mu maha malandza ya Nungungulu.+ 17 Dzundzani vanhu va tixaka tontlhe,+ mu randza vamakabye vontlhe,+ mu chava Nungungulu,+ mu dzundza hosi.+

18 A zvitiri zvi wa ti koramise ka venyi va zvona hi cichavo contlhe ci va faneleko,+ na ku nga hi ka lava va vanene ni ka lava vo olova basi, kanilezvi ni ka lava zvi karatako ku va tsakisa. 19 Hakuva zvi nene loku munhu a timisela zviyimo zvo nonoha* ni ku xanisiwa na a nga hi na nandzu hi kota ya livhalo lakwe mahlweni ka Nungungulu.+ 20 Hakuva zvi na ni wudzundzo muni loku mu timisela laha mu biwako hi kuva mu wonhile ke?+ Kanilezvi loku mu timisela a tixanisa hi kota ya ku maha zvazvinene, lezvo zvi sasekile mahlweni ka Nungungulu.+

21 Kunene, mu vitanelwe zvalezvo, hakuva hambu Kristu i xanisekile hi kota ya n’wina,+ a mu siyela a cikombiso kasi mu landzela khwatsi a nkondzo wakwe.+ 22 A nga wonhangi,+ ne kukhohlisa a ku kumiwangi non’wini wakwe.+ 23 A cikhati leci a nga rukatelwa,+ a nga rukatelangiwo.+ Laha a nga kari a xaniseka,+ a nga dzukiselangi, kanilezvi i wa ti nyikela ka Loyi a lamulako+ hi kululama. 24 Yena wutsumbu i no rwala zviwonho zva hina+ mirini wakwe laha mhandzeni,*+ kasi hi fela kufa hi tlhelo ga* zviwonho, hi hanyela a kululama. “Hi kota ya zvilondza zvakwe mu no hanyiswa”.+ 25 Hakuva mu wa fana ni tiyivhu ti lahlekileko,+ kanilezvi zvezvi mu tlhelele ka murisi+ ni muwoneleli wa mihefemulo* ya n’wina.

3 Hi kufanana, wenawu sati, ti koramise ka nuna wa wena,+ kasi loku a nga ingisi mhaka, a fela ku kokiwa hi mahanyela ya sati wakwe, na ku nga hi hi mhaka,+ 2 hi lezvi a ma wonileko hi mahlo a mahanyela ya wena ya manene+ ni cichavo co eta. 3 Ngha a kutisasekisa ka wena ku ngavi ka lahandle — hi malukela ya misisi, ni ku boha tiouro+ kutani tinguwo to dhura — 4 kanilezvi ku wave ka munhu a fihleleko wa mbilu hi tinguwo ti nga hlakaliko ta moya wo rula ni wo olova,+ lowu wu nga wa ntsengo wa hombe mahlweni ka Nungungulu. 5 Hakuva hi zvalezvi a vavasati vo basa va kale lava va nga tsumba Nungungulu va nga ti sasekisisa zvona, va ti koramisa ka vanuna vabye, 6 a ku khwatsi hi Sara a nga ingisa Abrahama, a mu vitana ku i hosi yakwe.+ Wena u tava n’wana wakwe loku u simama ku maha zvazvinene na u nga chavi nchumu.+

7 Hi kufanana, wenawu nuna, hanya ni sati wa wena hi ku mu zwisisa.* Mu dzundze+ kota lezvi a wasati a nga cibya ca wukheta, hakuva yenawu mugi wa tshomba zvin’we na wena+ ya tipswalo ta wutomi, kasi a mikhongelo ya wena yi nga vhalelwi.

8 Hi kugumesa, n’wentlheni mu fanele kuva ni kupima kun’we,+ mu zwelana, mu randzana kota vamakabye, muva ni wuxinji+ ni kutikoramisa.+ 9 Mu nga tlheliseli kubiha hi kubiha+ kutani a kurukatela hi kurukatela.+ Wutshan’wini ga lezvo, tlheliselani hi cikatekiso,+ hakuva mu vitanelwe lezvo kasi n’winawu muga tshomba ya cikatekiso.

10 Hakuva “ni wihi loyi a randzako wutomi ni ku wona a masiku ya manene, i wa hlayise a lirimi lakwe ka zvakubiha+ ni minomu yakwe ka ku wulawula magezu ya kukhohlisa. 11 I wa fularele zvakubiha,+ a maha zvazvinene;+ i wa hlote kurula, a ku landzela.+ 12 Hakuva a matihlo ya Jehovha* ma hehla ka valulamileko, ni tindleve takwe ti ingisela a mikhongelo yabye ya kukhongotela,+ kanilezvi a nghohe ya Jehovha* yi vhukela lava va mahako zvilo zva kubiha”.+

13 Kona himani a to mu mahela kubiha loku mu ti tsitsirita ka zvilo zva zvinene ke?+ 14 Kanilezvi hambu loku mo tshuka mu xaniseka hi kota ya kululama, mu ta tsaka.+ Hambulezvo, mu nga chavi lezvi vona va zvi chavako,* ne mu nga karateki.+ 15 Kanilezvi basisani Kristu kota Hosi timbilwini ta n’wina, contlhe cikhati mu tshama na mu longile a ku hlamula ni wihi munhu a to wutisa a cigelo ca kutsumba ka n’wina, kanilezvi zvi maheni hi kurula+ ni cichavo co eta.+

16 Simamani kuva ni livhalo li nene,+ kasi ni ka cihi cikhati va wulawulako kubiha hi n’wina, lava va wulawulako kubiha hi n’wina va fela kuwa tingana+ hi kota ya mahanyela ya n’wina ya manene kota valandzeli va Kristu.+ 17 Hakuva i chukwana ku xaniseka hi kota ya ku maha zvazvinene,+ loku ku hi kurandza ka Nungungulu a ku zvi vhumelela, a ku hundza a ku xaniseka hi kota ya ku maha zvakubiha.+ 18 Hakuva Kristu i nofa khati gin’we zvi enela hi kota ya zviwonho,+ a munhu wo lulama a fela a vangalulamangiko,+ kasi a fela ku mu yisa ka Nungungulu.+ I no dawa nyameni,+ a vhuxiwa hi ka moya.+ 19 Na a hi ka ciyimo leco, i noya a ya chumayela a mimoya yi nga hi paxweni,+ 20 leyi yi nga tsika ku ingisa a cikhati leci Nungungulu a nga kari a rindzela hi lihlazva-mbilu* masikwini ya Nowa,+ na ka ha akiwa taru,+ legi ka gona, a vanhu va tsongwani, ku nga 8 wa mihefemulo,* va nga ponisiwa lomu matini.+

21 A kubhabhatisa, loku ku fanako ni lezvo, konawu ka mu ponisa ka cikhati leci (na ku nga hi ku susa chaka ga miri, kanilezvi hi ku kombela a livhalo li nene ka Nungungulu)+ hi kuvhuka ka Jesu Kristu. 22 I reveni ga cinene ga Nungungulu,+ hakuva i yile tilweni, zvonake a tingilozi, ni tihosi, ni mintamu zvi no vekiwa lahasi kakwe.+

4 Kota lezvi Kristu a nga xaniseka nyameni,+ n’winawu ti hlomiseni hi kupima ko fana ni loko; hakuva loyi a xanisekako nyameni i tsikile zviwonho,+ 2 lezvaku a cikhati leci ci mu saleleko ca ku hanya nyameni, a nga hanyeli a kunavela ka vanhu,+ kanilezvi a hanyela a kurandza ka Nungungulu.+ 3 Hakuva ci enele a cikhati leci ci hundzileko na mu maha kurandza ka matiko,+ laha mu nga kari mu famba mahanyeleni ya tingana,* ni ku vhura hi kunavela ka kubiha, ni kupopiweni, ni mibuzweni ya vhilinganya, ni mabyaleni, ni manyaleni ya ku khozela a zvifananiso.+ 4 Makunu va hlamala hi lezvi mu nga ha fambiko navo mahanyeleni lawo yo nyenyeza, hikwalaho va wulawula kubiha hi n’wina.+ 5 Kanilezvi a vanhu lava va ta ti hlamulela mahlweni ka loyi a longileko ku lamula a vahanyako ni vafileko.+ 6 Kunene, hi zvalezvo zvi mahako lezvaku a mahungu ya manene ma kanelwa ni ka vafileko,+ kasi hambu lezvi va lamuliwako nyameni hi kuya hi mawonela ya vanhu, va fela ku hanya hi ka moya hi kuya hi mawonela ya Nungungulu.

7 Kanilezvi a kugumesa ka zvilo zvontlhe ku tshinele. Hikwalaho, ngha muva ni kupima ku nene,+ mu tlharihela ku khongela.+ 8 Ahandle ka zvontlhe, randzanani nguvhu+ hakuva a lirandzo li khubhunyeta a zviwonho zvo tala.+ 9 Amukelanani na mu nga nguranguri.+ 10 Hi kuya hi lipimo la cinyikiwo leci a mun’we ni mun’wani a amukeleko, i wa ci tirise kasi ku tirela van’wani kota nandza ga ginene ga tipswalo ta Nungungulu leti ti kombisiwako hi tindlela to tsalangana.+ 11 Loku a munhu a wulawula, i wa mahise ku khwatsi hi loyi a wulawulako timhaka ta Nungungulu; loku a munhu a tirela van’wani, i wa mahe lezvo na a khegela ka ntamu lowu Nungungulu a nyikako;+ kasi zvilweni zvontlhe Nungungulu a dhumiswa+ ha Jesu Kristu. A kungangamela ni ntamu zvi lumba yena kala kupindzuka ni kupindzuka. Amen.

12 Varandzekako, mu nga hlamali hi mindzhingo yo tshisa leyi yi mu welako,+ a ku khwatsi mo kumana ni zvilo mu nga zvi tiviko. 13 Kanilezvi simamani ku tsaka+ ka lipimo leli mu hlengelako hi lona kuxanisekeni ka Kristu,+ kasi n’winawu mu fela ku tsaka mu tlhela mu nengela cikhatini ca kuwonekeliswa ka kungangamela kakwe.+ 14 Loku mu rukiwa* hi kota ya vito ga Kristu, ma tsaka,+ hakuva a moya wa kungangamela, wu nga moya wa Nungungulu, wu tshamile hehla ka n’wina.

15 Hambulezvo, ku ngavi ni munhu cikari ka n’wina a xanisekako hi kuva mudayi, kutani khamba, kutani mugohi, kutani hi ku nghenela zvilo zva vambe.+ 16 Kanilezvi, loku a munhu a xaniseka hi kota ya kuva muKristu, a ngawi tingana,+ kanilezvi i wa simame ku dhumisa Nungungulu hi ku hanya hi vito legi. 17 Hakuva leci hi cona a cikhati ci yimisilweko ca lezvaku a kulamula ku sangula hi ndlwini ya Nungungulu.+ Makunu loku a kulamula ku sangula hi hina,+ zvi ta kuyini ka lava va nga ingisiko mahungu ya manene ya Nungungulu ke?+ 18 “Makunu, loku a wakululama a ponisiwa na zvi karata, zvi ta kuyini hi loyi a nga chaviko Nungungulu ni muwonhi ke?”+ 19 Hikwalaho, lava va xanisekako hi kota ya kurandza ka Nungungulu, va wa simame ku ti nyikela* ka Muvangi wo tsumbeka na va kari va maha zvazvinene.+

5 Hikwalaho, kota dhota-kulobye, a kustumunyu wa kuxaniseka ka Kristu ni muhlengeli wa kungangamela loku ku to wonekeliswa,+ ndza khongotela* a madhota ma nga cikari ka n’wina, ndziku: 2 Risani a ntlhambi wa Nungungulu+ lowu wu nga mandleni ya n’wina, mu tira kota vawoneleli,* na ku nga hi hi ku kurumetwa, kanilezvi hi kuzvirandza mahlweni ka Nungungulu;+ na ku nga hi ku khwatsi mo tirela bhindzu,+ kanilezvi hi kuxuva ka hombe; 3 mu nga ti mahi tihosi hehla ka lava va nga tshomba ya Nungungulu,+ kanilezvi mahani cikombiso ka ntlhambi.+ 4 Niku a cikhati leci a murisi wa hombe+ a to wonekeliswa, mu ta amukela a cidlodlo* ci nga loviko ca kungangamela.+

5 Hi kufanana, n’wina majaha, ti koramiseni ka vavanuna va kulileko.*+ Kanilezvi n’wina n’wentlhe ambalani* a kutikoramisa mun’we ka mun’wani, hakuva Nungungulu wa venga a vamatshandza kanilezvi i va nyika tipswalo lava va ti koramisako.+

6 Hikwalaho, ti koramiseni hasi ka canja ga ntamu ga Nungungulu kasi a fela ku mu tlakusa hi cikhati ci faneleko,+ 7 na mu kari mu hoxela a kukarateka ka n’wina kontlhe hehla kakwe,+ hakuva wa khatala hi n’wina.+ 8 Hlayisani a kupima ka n’wina, mu ti wonela!+ A nala wa n’wina, Dhiyabho, wa fambafamba a ku khwatsi i nghala yi bhongako, na a hlota wa ku mu khadamula.+ 9 Kanilezvi, yimani muku pshwe mulwa naye,+ mu tiya kukholweni, na mu tiva lezvaku a kuxaniseka ko fana ni loko ka humelela a vamakabye va n’wina vontlhe misaveni.+ 10 Hambulezvo, andzhako ka loku mu xanisekile kutsongwani, a Nungungulu wa tipswalo tontlhe, loyi a mu vitaneleko kungangamela kakwe ka pindzukelwa+ zvin’we na Kristu, i ta mbhetisa a gondziselelo ya n’wina. I ta mu tiyisa,+ a mu nyika ntamu,+ ni ku mu zimeka mu tiya. 11 A ntamu a wuve ka yena kala kupindzuka. Amen.

12 Hi canja ga Silvhanusi,*+ loyi ndzi mu wonako kota makabye wo tsumbeka, ndzi mu tsalele magezu lawa ya ma tsongwani kasi ku mu kuca ni ku mu tiyisekisa lezvaku leti hakunene hi tona a tipswalo ta Nungungulu. Tiyani ka tona. 13 A wasati* loyi a nga le Bhabhuloni, a hlawulilweko ku fana na n’wina, wa mu rungula, na Marku,+ a n’wana wa mina. 14 Losanani hi kupswopswana ka lirandzo.

Ngha n’wina n’wentlhe mu nga ka Kristu muva ni kurula.