PAPILO GA WUMBIRI GA PEDRO

1 Simoni Pedro, a nandza ni mupostoli wa Jesu Kristu, ka lava va kumileko a kukholwa ka lisima ko fana ni loku ka hina* hi kota ya kululama ka Nungungulu wa hina ni ka Muhanyisi, Jesu Kristu:

2 Ngha a tipswalo ni kurula zvi andza cikari ka n’wina, hi wutivi ga lisine+ ga Nungungulu ni ga Jesu, a Hosi ya hina, 3 hakuva a ntamu wakwe wa wuNungungulu wu hi nyikile* zvontlhe zvi nyikako wutomi ni ku chava Nungungulu, hi wutivi ga lisine ga Loyi a hi vitanileko+ hi kungangamela kakwe ni wunene. 4 Hi zvilo lezvi, i hi nyikile* a zvitsumbiso zva lisima ni zva hombe nguvhu+ kasi ha zvona mu fela ku hlengela ka tshamela ga wuNungungulu,+ na mu ponile a kubola ka tiko ku vangiwako hi kunavela ko biha.

5 Hi cigelo leco, mahani zvontlhe zvi kotekako+ kasi laha ka kukholwa ka n’wina mu tlhatekela wunene,+ ni wuneneni ga n’wina mu tlhatekela wutivi,+ 6 ni wutivini ga n’wina mu tlhatekela a kutikhoma, ni kutikhomeni ka n’wina+ mu tlhatekela a kutimisela, ni kutimiseleni ka n’wina mu tlhatekela a kuchava Nungungulu,+ 7 ni kuchaveni ka n’wina Nungungulu mu tlhatekela a ku randza vamakabye, ni kurandzeni ka n’wina vamakabye mu tlhatekela lirandzo.+ 8 Hakuva loku a zvilo lezvi zvi hi kona ka n’wina zvi tlhela zvi halakela, zvi ta mu vhalela ku loloha kutani ku nga pswali mihandzu+ xungetano hi wutivi ga lisine ga Hosi ya hina Jesu Kristu.

9 Hakuva ni wihi a kiyelelwako hi zvilo lezvi cikhumu, i ti vhala matihlo kasi a nga woni a kuwonekela*+ a tlhela a rivala a kubasiswa ka zviwonho zvakwe+ zva kale. 10 Hikwalaho, vamakabye, ti tsitsiriteni nguvhu kasi mu tiyisa a kuvitanwa+ ni kuhlawulwa ka n’wina, hakuva loku mu simama ku maha zvilo lezvi, mu nga ta tshuka mu tsandzeka.+ 11 Kunene, loku mu maha lezvo, mu ta ganyisiwa hi ku nyikwa ku nghena Mufun’weni wa pindzukelwa+ wa Hosi ni Muhanyisi wa hina Jesu Kristu.+

12 Hi cigelo leco, contlhe cikhati ndzi xuva ku mu alakanyisa a zvilo lezvi, hambu lezvi mu zvi tivako ni lezvi mu tiyisilweko khwatsi lisineni leli li nga ka n’wina. 13 Kanilezvi, loku ndza ha hi ka tabhernakeli* legi,+ ndzi alakanya lezvaku zvi lulamile a ku mu hlanganyeta hi zvikhumbuxeto,+ 14 na ndzi tiva lezvaku zvezvanyana a tabhernakeli ga mina gi ta susiwa, kota lezvi a Hosi ya hina Jesu Kristu a zvi dlunyatisileko ka mina.+ 15 Contlhe cikhati ndzi ta maha zvontlhe zvi nga ntan’wini wa mina kasi loku ndzi sukile, mu fela ku sala mu alakanya* a zvilo lezvi ha n’wece.

16 Ahihi, a ku vangi hi ku landzela a zvitoriya zva mawun’wa zvi tsambilweko hi tipulani hi nga mu tivisa a ntamu ni kuvakona ka Hosi ya hina Jesu Kristu. Wutshan’wini ga lezvo, hive vakustumunyu va wu wonileko hi mahlo a ntamu wakwe.+ 17 Hakuva i amukele a wudzundzo ni kungangamela hi ka Nungungulu, a Papayi, a cikhati leci a nga byeliwa a magezu lawa hi kungangamela ka hombe: “Loyi i N’wana wa mina ndzi mu randzako, loyi mina wutsumbu ndzi xalalako hi yena.”+ 18 Ina, hi zwile a magezu lawa na mata hi le tilweni a cikhati leci hi nga hi zvin’we naye citsungeni co basa.

19 Hikwalaho, hi na ni mhaka ya kuphrofeta yi tiyisilweko nguvhu ka hina, niku mu maha khwatsi hi ku chela kota ka yona a ku khwatsi i kandiya+ yi woningako munyameni (kala gica, ku woneka mahlahle)+ lomu timbilwini ta n’wina. 20 Hakuva a kuranga tivani lezvaku a ku na kuphrofeta lomu Mitsalweni ku tako hi ka kutlhamusela ka munhu. 21 Hakuva a kuphrofeta a ku tshukangi kuta hi kurandza ka munhu,+ kanilezvi a vanhu va no kanela lezvi va nyikilweko hi Nungungulu, na va susumetiwa* hi moya wo basa.+

2 Hambulezvo, kuve kona kambe a vaphrofeti va mawunwa cikari ka vanhu, a ku khwatsi hi lezvi ku tova ni vagondzisi va mawunwa cikari ka n’wina.+ Va ta nghenisa, hi tipulani, a zvitlawatlawana zvi hohlotako, niku va ta kanyisa hambu ni n’winyi wabye loyi a va xavileko,+ va ti nehela a kuloviswa hi kuhatlisa. 2 Ahandle ka lezvo, a votala va ta landzela a mahanyela yabye ya tingana,*+ niku hi kota ya vona va ta wulawula kubiha hi ndlela ya lisine.+ 3 A ku tsika lezvo, na va susumetwa hi makangwa, va ta mu xolola hi magezu ma kanganyisako. Kanilezvi a kulamulwa kabye, loku ku sinako ku bohilwe kale,+ kata hi cihatla, niku a kulovisiwa kabye a ku etleli.+

4 Kunene, Nungungulu a nga tsikangi ku tsayisa a tingilozi leti ti nga wonha,+ kanilezvi i no ti hoxa lomu Tartaru,*+ a ti boha hi machini* munyameni wa hombe, ti rindzela kulamulwa.+ 5 A nga tsikangi ku tsayisa a tiko ga kale,+ kanilezvi i no ponisa Nowa, a muchumayeli wa kululama,+ zvin’we ni van’wani va 7,+ a cikhati leci a nga tisa ndambi hehla ka tiko ga vanhu va nga chaviko Nungungulu.+ 6 Niku hi ku lovisa a madhoropa ya Sodhoma ni Gomora ma maha khuma, i no ma kona,+ a va vekela cikombiso a vanhu va nga chaviko Nungungulu ca zvilo zva ha tako.+ 7 Kanilezvi i no tlhatlhisa Loti, a munhu wo lulama,+ loyi a nga kari a karateka nguvhu hi kota ya mahanyela ya tingana* ya vahambunyeti va nayo — 8 hakuva siku ni siku, a muhefemulo* wa wanuna loyi wo lulama wu wa xaniseka hi kota ya mitiro ya ku hambunyeta nayo leyi a nga yi wona ni ku yizwa laha a nga ha hanya cikari kabye. 9 Hikwalaho, Jehovha* wa yi tiva a ndlela ya ku va tlhatlhisa ndzhingweni lava va mu chavako,+ ni ku vekisa a vangalulamangiko kasi va lovisiwa* sikwini ga kulamula,+ 10 nguvhunguvhu lava va hlotako ku nyenyezisa a nyama ya van’wani+ ni lava va kanyisako a wuhosi.+

Na va hi ni cixinya ni ku ti nonohisa tinhamu, a va chavi ku wulawula kubiha hi lava vo ngangamela, 11 kuveni a tingilozi, hambu lezvi ti va hundzako hi wunhenha ni ntamu, a ti va kecari hi magezu ya kubiha hi lezvi ti nga ni cichavo hi* Jehovha.*+ 12 Kanilezvi a vavanuna lava, a ku fana ni zvihari zvi nga pimisiko, lezvi zvi pswalelwako ku khomiwa zvi lovisiwa, va wulawula kubiha hi zvilo va nga zvi tiviko.+ Va ta welwa hi kulovisa ku to tisiwa hi mahanyela yabye ma lovisako, 13 va xaniseka kota nchachazelo wa mitiro yabye yo biha.

Zva va xalalisa a ku hanyela a kutitsakisa ko hundzeleta+ hambu ni mumu. Vona tinoda ni zvibawa niku va tsakisiwa nguvhu hi tigondzo tabye ti kanganyisako na va hi lomu mibuzweni zvin’we na n’wina.+ 14 A matihlo yabye ma tele hi wubhayi;+ a va kolwi hi ku wonha, niku va kucetela lava* va nga tiyangiko. A mbilu yabye yi gondzisilwe makangwa. I vana va rukatelweko. 15 Va tsikile a ndlela ya kululama, va lahleka. Va landzele a ndlela ya Bhalami,+ a n’wana wa Bheyori, loyi a nga randza a nchachazelo wa ku maha zvakubiha,+ 16 kanilezvi i no kawukiwa hi lezvi a nga hambunyeta zvakululama.+ A cihari co kala ku wulawula ca ku rwala mindzhwalo ci no wulawula hi gezu ga munhu ci betela a muphrofeti a ku simama ndleleni yakwe ya wupumbu.+

17 A vanhu lava zvibuka zvi nga hiko na mati, ni marefu ma susumetwako hi bhubhutsa ga hombe; va hlayiselwe a munyama wo tshisa nguvhu.+ 18 Va wulawula magezu ya matshandza ma nga vhuniko nchumu. Hi ku vhuvhumisa a kunavela ka nyama+ ni mahanyela ya tingana,* va xengetela lava va ha hiko ku huluka ka lava va hanyako cihoxweni.+ 19 Va va tsumbisa kutlhatlheka, kasi lezvo vona wutsumbu tikhumbi ta kubola,+ hakuva loku a munhu a hluliwa hi mun’wani, i maha khumbi yakwe.*+ 20 Kunene, andzhako ka loku va ponile ka manyala ya tiko+ hi wutivi ga lisine ga Hosi ni Muhanyisi, Jesu Kristu, kanilezvi va tlhelela zvilo lezvi zvi gumesa zvi va hlula, a tshamela gabye go gumesa gi biha nguvhu a ku hundza legi go sangula.+ 21 Na zvi vile chukwana kabye loku va wa nga yi tivangi hi kumbhelela a ndlela ya kululama a ku hundza ku va yi tiva va gumesa va fularela a nayo wo basa lowu va wu amukeleko.+ 22 Lezvi a vingu legi ga lisine gi wulako zvi mahekile kabye, zvaku: “A mbyana yi tlhelele mahlateni ya yona, ni khumba ga kati legi gi nga hlambisiwa gi tlhelile gi ya puluwundza madhakeni.”+

3 Varandzekako, legi makunu i papilo ga wumbiri ndzi mu tsalelako, legi a ka gona, a ku fana ni ka legi go sangula, ndzi hlanganyetako a ntamu wa n’wina wa ku pimisa khwatsi hi ku tirisa cialakanyiso+ 2 kasi mu alakanya lezvi zvi sinako zvi wulilwe hi vaphrofeti vo basa ni nayo wa Hosi tlhelo Muhanyisi, lowu a wu nyikileko hi ku tirisa vapostoli va n’wina. 3 A kusangula, tivani lezvaku a masikwini yo gumesa ku tata a vatseketseli va ta tseketsela, va landzela a kunavela kabye wutsumbu,+ 4 vaku: “Ku kwihi a kuvakona kakwe loku ku tsumbisilweko ke?+ Phela cima a vakokwani va hina va etlela kufeni, a zvilo zva ha tshamisile zvalezvi zvi nga tshamisile zvona kusanguleni ka kuvangiwa.”+

5 Hakuva va kanyisa ha womu a mhaka leyi yaku: A kaleloko ku wa hi ni matilo ni misava yi nga yimile yi tiya lahandle ka mati ni cikari ka mati hi gezu ga Nungungulu;+ 6 niku hi zvilo lezvo, a tiko ga cikhatini leco gi no loviswa laha gi nga talelwa hi mati.+ 7 Kanilezvi hi gezu galegi ga gin’we, a matilo lawa ma nga kona zvezvi ni misava ya kona, zvi vekiselwe ndzilo niku zvi kari zvi vekiwa kala sikwini ga kulamula ni ga kulovisiwa ka vanhu lava va nga chaviko Nungungulu.+

8 Hambulezvo, mu nga rivali a mhaka leyi, varandzekako, yaku a siku gin’we ka Jehovha* gi fana ni 1000 wa malembe, ni 1000 wa malembe ma fana ni siku gin’we.+ 9 Jehovha* a nga nonoki ku tatisa a citsumbiso cakwe,+ a ku khwatsi hi lezvi a vokari va zvi pimisako, kanilezvi i kombisa lihlazva-mbilu hi n’wina hakuva a nga lavi lezvaku ku lova ni mun’we, kanilezvi i xuva lezvaku vontlhe va ti sola.+ 10 Kanilezvi a siku ga Jehovha*+ gi ta tisa ku khwatsi i khamba;+ hi siku lego, a matilo ma ta hundza+ hi guwa ga hombe,* kanilezvi a zvilo lezvi zvi wumbako matilo ni misava zvi ta nyeka hi kuhisa ka hombe, niku a misava ni mitiro yi nga ka yona zvi ta funungulwa.+

11 Kota lezvi a zvilo lezvi zvontlhe zvi to nyekisa lezvi, wonani lezvaku mu fanele kuva vanhu vo tshamisa kuyini mahanyeleni yo basa ni mitirweni ya ku khozela Nungungulu, 12 laha mu rindzelako ni ku alakanya khwatsi* a kuvakona ka siku ga Jehovha,*+ legi a matilo ma to lovisiwa+ hi ndzilo, ni zvilo lezvi zvi wumbako matilo ni misava zvi to nyeka hi kuhisa ka hombe! 13 Kanilezvi ku na ni matilo maswa ni misava yiswa lezvi hi zvi rindzelako hi kuya hi citsumbiso cakwe,+ lomu a kululama ku to tshama kona.+

14 Hikwalaho, varandzekako, kota lezvi mu rindzelako a zvilo lezvi, mahani zvontlhe mu zvi kotako kasi hi kugumesa a ta mu kuma na mu nga hi na noda ne cisolo, kanilezvi na mu hi ni kurula.+ 15 Ahandle ka lezvo, wonani a lihlazva-mbilu la Hosi ya hina kota kuhanyiswa, a ku khwatsi hi lezvi a makabye wa hina wo randzeka, Pawule, yenawu a mu tsaleleko hi wutlhari legi a nyikilweko,+ 16 a wulawula hi zvilo lezvi kota lezvi a mahako ka mapapilo yakwe wontlhe. Hambulezvo, a zvilo zvo kari zvi nga ka wona zva karata ku zvi zwisisa, niku hi zvalezvi lava vo kala ku gondza* ni lava vo kala ku tiya va zvi soholotako, a ku khwatsi hi lezvi va mahako kambe hi Mitsalo yin’wani, va ti kokela kuloviswa.

17 Hikwalaho, varandzekako, kota lezvi mu zvi tivako na ka ha hi mahlweni, ti woneleni lezvaku mu nga hambukisiwi zvin’we navo hi cihoxo ca vahambunyeti va nayo, kasi mu ngawi kutiyeni ka n’wina.+ 18 Kanilezvi simamani ku kula tipswalweni ni wutiveni ga Hosi ya hina ni Muhanyisi, Jesu Kristu. A wudzundzo a give ka yena zvezvi ni kala ka siku ga pindzukelwa. Amen.