PAPILO GO SANGULA GA JOHANI

1 Leci ci nga hi kona kusukela kusanguleni, leci hi ci zwileko, leci hi ci wonileko hi matihlo ya hina, leci hi ci cuwukisileko hi tlhela hi ci henya hi mandla ya hina xungetano hi gezu ga wutomi,+ 2 (ina, a wutomi gi wonekelisilwe, hi gi wonile niku ha nyika wukustumunyu+ ni ku mu hlawutela xungetano hi wutomi ga pindzukelwa+ legi gi nga hi na Papayi, legi gi nga wonekeliswa ka hina), 3 leci hi ci wonileko ni ku cizwa hi caleci hi ci hlawutelako ka n’wina kambe,+ kasi n’winawu mu fela ku hlengela na hina. Kunene, hina hi hlengela zvin’we na Papayi ni N’wana wakwe Jesu Kristu.+ 4 Hi mu tsalela a zvilo lezvi kasi a kutsaka ka hina ku fela ku mbhelela.

5 A mahungu lawa hi ma zwileko kakwe hi lawa hi mu hlawutelako, yaku: Nungungulu kuwonekela,+ niku a munyama a wu kona kakwe ne ni kutsongwani. 6 Loku hiku: “Ha hlengela zvin’we naye”, kuveni ha ha famba munyameni, ho hemba niku a hi hanyi hi lisine.+ 7 Hambulezvo, loku hi famba kuwonekeleni kota lezvi yena wutsumbu a nga kuwonekeleni, hi bohene mun’we ka mun’wani, niku a nkhata wa Jesu, a N’wana wakwe, wa hi basisa zviwonhweni zvontlhe.+

8 Loku hiku: “A hi na ciwonho”, ho ti kalavela,+ niku a lisine a li kona ka hina. 9 Loku hi wulela a zviwonho zva hina, yena i tsumbekile niku i lulamile, hikwalaho i ta hi tsetselela a zviwonho zva hina a hi basisa ka kungalulami kontlhe.+ 10 Loku hiku: “A hi wonhangi”, ha mu maha muhembi, ni mhaka yakwe a yi kona ka hina.

2 Vana vanga, ndza mu tsalela a timhaka leti kasi mu nga wonhi. Kanilezvi loku a wokari a wonha, hi na ni muvhuni loyi a nga zvin’we na Papayi, ku nga Jesu Kristu,+ a munhu wa kululama.+ 2 Hi yena a nga muphahlo wo enela+ wa zviwonho* zva hina+ kasi hi tlhela hi zwanana na Nungungulu, hambulezvo na ku nga hi zva hina hoce kanilezvi ni zva tiko gontlhe.+ 3 Hi kota ya lezvi ha zvi tiva lezvaku ha mu tiva: Loku hi simama ku ingisa milayo yakwe. 4 Loyi a nge: “Ndza mu tiva”, hambulezvo na a nga ingisi milayo yakwe muhembi; ni lisine a li kona kakwe. 5 Kanilezvi ni wihi loyi a ingisako a mhaka yakwe, a lirandzo la Nungungulu li mbhelelisilwe kakwe.+ Hi kota ya lezvi, ha zvi tiva lezvaku hi zvin’we naye.+ 6 Loyi a nge i simama zvin’we naye, i kurumeteka ku simama a fambisa zvalezvi yena a nga fambisa zvona.+

7 Varandzekako, ndza mu tsalela, na ku nga hi nayo wuswa, kanilezvi i nayo wa kale lowu mu nga nawo kusukela kusanguleni.+ A nayo lowu wa kale i mhaka leyi mu nga yizwa. 8 Kanilezvi ndza tlhela ndzi mu tsalela a nayo wuswa, lowu wu nga lisine ka yena ni ka n’wina, hakuva a munyama wa hundza, ni kuwonekela ka lisine ku sina ku woninga.+

9 Loyi a nge i lomu kuwonekeleni kanilezvi na a venga+ a makabye wakwe wa ha hi munyameni.+ 10 Loyi a randzako a makabye wakwe i simama kuwonekeleni,+ niku a ku na ca ku mu khunguvanyisa. 11 Kanilezvi loyi a vengako a makabye wakwe i lomu munyameni, kambe i famba munyameni+ niku a nga ku tivi lomu a yako kona,+ hakuva a munyama wu mu dele matihlo.

12 Ndza mu tsalela, vana vanga, hakuva a zviwonho zva n’wina zvi tsetselelwe hi kota ya vito gakwe.+ 13 Ndza mu tsalela, n’wina vapapayi, hakuva ma mu tiva loyi a nga kona kusukela kusanguleni. Ndza mu tsalela, n’wina majaha, hakuva mu hlulile loyi wa kubiha.+ Ndza mu tsalela, n’wina vanana, hakuva ma mu tiva Papayi.+ 14 Ndza mu tsalela, n’wina vapapayi, hakuva ma mu tiva loyi a nga kona kusukela kusanguleni. Ndza mu tsalela, n’wina majaha, hakuva mu tiyile,+ a mhaka ya Nungungulu yi ka n’wina+ niku mu hlulile loyi wa kubiha.+

15 Mu nga randzi a tiko ne hambu a zvilo zvi nga lomu tikweni.+ Loku a munhu a randza tiko, a lirandzo la Papayi a li kona kakwe;+ 16 hakuva zvontlhe zvi nga lomu tikweni — a kunavela ka nyama+ ni kunavela ka matihlo,+ ni ku gwira hi kota ya lezvi munhu a nga nazvo* — a zviti hi ka Papayi kanilezvi zvita hi lomu tikweni. 17 Ahandle ka lezvo, a tiko ga hundza ni kunavela ka gona,+ kanilezvi loyi a mahako a kurandza ka Nungungulu i simama kala kupindzuka.+

18 Vana vanga, leyi i hora yo gumesa, niku kota lezvi mu zvi zwileko lezvaku wata a mukaneti wa Kristu,+ hambu zvezvi ku humelele vakaneti vo tala va Kristu.+ Hi kota ya lezvo ha zvi tiva lezvaku leyi i hora yo gumesa. 19 Va humile hi kwalomu ka hina, kanilezvi va wa nga hi va ka hina,+ hakuva loku va wa hi va ka hina na va simamile na hina. Kanilezvi va humele kasi zvi woneka lezvaku a hi vontlhe va nga va ka hina.+ 20 N’wina mu na ni kutotiwa mu ku amukeleko hi ka loyi wa kubasa,+ niku n’wentlheni mu na ni wutivi. 21 Ndza mu tsalela, na ku nga hi ku khwatsi mo kala mu nga li tivi a lisine,+ kanilezvi hi lezvi mu li tivako ni lezvi ku nga hiko ni mawunwa ma tako hi ka lisine.+

22 Himani a nga muhembi, loku ku nga hi loyi a alako lezvaku Jesu hi Kristu?+ Loye mukaneti wa Kristu,+ loyi a alako Papayi ni N’wana. 23 Ni wihi loyi a alako a N’wana, a nga na Papayi kambe.+ Kanilezvi loyi a vhumelako a N’wana+ i na na Papayi kambe.+ 24 Makunu n’wina, lezvi mu zvi zwileko kusukela kusanguleni zvi fanele ku simama ka n’wina.+ Loku lezvi mu zvi zwileko kusukela kusanguleni zvi simama ka n’wina, mu ta simama zvin’we kambe ni N’wana mu tlhela muva zvin’we na Papayi. 25 Ahandle ka lezvo, hi zvalezvi yena wutsumbu a nga hi tsumbisa — a wutomi ga pindzukelwa.+

26 Ndzi mu tsalela a zvilo lezvi xungetano hi lava va zamako a ku mu hambukisa. 27 Xungetano hi n’wina, a kutotiwa loku mu ku amukeleko hi ka yena+ ku simama ka n’wina niku a ka ha laveki wa ku mu gondzisa; kanilezvi a kutota loku ku tako hi kakwe, ku nga ka lisine na ku nga hi ka mawunwa, ka mu gondzisa a zvilo zvontlhe.+ A ku khwatsi hi lezvi ku mu gondzisileko, simamani zvin’we naye.+ 28 Hikwalaho, vana vanga, simamani zvin’we naye kasi laha a to wonekeliswa hi fela kuva ni kutlhatlheka kuwulawuleni,+ hi nga hlehli hi tingana cikhatini ca kuvakona kakwe. 29 Loku mu zvi tiva lezvaku i lulamile, ma zvi tiva kambe lezvaku ni wihi loyi a mahako zvakululama i pswalelwe kakwe.+

3 Hi nga wonani lezvi Papayi a nga hi randzisa zvona+ laha ka kuza hi vitaniwa ku hi vana va Nungungulu!+ Hi zvalezvo hi nga zvona. Hi cigelo leco a tiko gi nga hi tiviko+ hakuva a gi mu tivangi.+ 2 Varandzekako, makunu hi vana va Nungungulu,+ kanilezvi a zvi se wonekeliswa lezvi hi tova zvona.+ Ha zvi tiva lezvaku a cikhati leci a to wonekeliswa hi ta fana naye, hakuva hi ta mu wonisa zvalezvi a nga zvona. 3 Ni wihi loyi a nga ni kutsumba loku mahlweni kakwe wa ti basisa,+ a ku khwatsi hi lezvi yena a basileko.

4 Ni wihi loyi a tshamelako ku wonha i tshamela ku hambunyeta nayo kambe, niku a ciwonho ku hambunyeta nayo. 5 Ma zvi tiva kambe lezvaku yena i wonekelisilwe kasi a susa zviwonho zva hina,+ ni lezvaku a ciwonho a ci kona kakwe. 6 Ni wihi loyi a simamako zvin’we naye a nga tshameli ku wonha;+ ni wihi loyi a tshamelako ku wonha a nga mu wonangi, ne a nga mu tivi. 7 Vana vanga, mu nga vhumeli ku hambukisiwa hi munhu; loyi a tshamelako ku maha zvakululama i lulamile, a ku khwatsi hi lezvi yena a lulamileko. 8 Loyi a tshamelako ku wonha ita hi ka Dhiyabho, hakuva Dhiyabho muwonhi kusukela kusanguleni.*+ Hi kota ya kungo legi, a N’wana wa Nungungulu i wonekelisilwe kasi ku fuvisa* a mitiro ya Dhiyabho.+

9 Ni wihi loyi a pswalelweko ka Nungungulu a nga tshameli ku wonha,+ hakuva a mbewu* Yakwe yi simama ka munhu loye, niku a nga tshameli ku wonha hakuva i pswalelwe ka Nungungulu.+ 10 Leci ci kombisako lava va nga vana va Nungungulu ni lava va nga vana va Dhiyabho hi leci: Ni wihi loyi a nga tshameliko ku maha zvakululama a ngati hi ka Nungungulu, ne loyi a nga randziko a makabye wakwe.+ 11 Hakuva lawa mahungu lawa mu ma zwileko kusukela kusanguleni ya lezvaku hi fanele ku randzana,+ 12 hi nga fani na Kana, loyi a tileko hi ka loyi wa kubiha, a daya makabye wakwe.+ Kasi i wa mu dayela yini? Hi lezvi a mitiro yakwe yi nga bihile,+ kuveni a ya makabye wakwe yi wa lulamile.+

13 Mu nga hlamali, vamakabye, hi lezvi a tiko gi mu vengako.+ 14 Ha zvi tiva lezvaku hi hundzile hi kufeni hiya wutomini,+ hakuva ha randza a vamakabye.+ Loyi a nga randziko i simama kufeni.+ 15 Ni wihi loyi a vengako a makabye wakwe mudayi,*+ niku ma zvi tiva lezvaku a wutomi ga pindzukelwa a gi simami ka mudayi.+ 16 Hi kota ya lezvo ha li tiva lirandzo, hakuva yena i no nyikela a wutomi* gakwe hi kota ya hina,+ hikwalaho hinawu ha kurumeteka ku nyikela a wutomi* ga hina hi kota ya vamakabye va hina.+ 17 Kanilezvi ni wihi loyi a nga ni zvilo zva tiko legi, a wona a makabye wakwe a nga kuvhumaleni, hambulezvo a ala ku mu kombisa tipswalo, a lirandzo la Nungungulu li simamisa kuyini kakwe ke?+ 18 Vana vanga, a hi randzeni, na ku nga hi hi magezu kutani hi lirimi,+ kanilezvi hi mitiro+ ni lisine.+

19 Loku hi maha lezvo, hi ta zvi tiva lezvaku hita hi lisineni, niku hi ta kholwisa a timbilu ta hina mahlweni kakwe 20 ka ni cihi leci a timbilu ta hina ti hi konako ka cona, hakuva Nungungulu wa hombe a ku hundza timbilu ta hina niku i tiva zvilo zvontlhe.+ 21 Varandzekako, loku a timbilu ta hina ti nga hi koni, hi na ni kutlhatlheka ka ku wulawula mahlweni ka Nungungulu;+ 22 niku ni cihi leci hi kombelako ha amukela hi kakwe,+ hakuva ha ingisa milayo yakwe ni ku maha lezvi zvi mu tsakisako. 23 Kunene, a nayo wakwe hi lowu: ku nga lezvaku hi kholwa vitweni ga N’wana wakwe Jesu Kristu+ ni ku randzana,+ kota lezvi a hi layileko. 24 Ahandle ka lezvo, loyi a hlayisako milayo yakwe i simama zvin’we naye, yenawu ava zvin’we ni munhu loye.+ Niku, hi moya lowu a hi nyikileko, ha zvi tiva lezvaku i simama zvin’we na hina.+

4 Varandzekako, mu nga kholwi a timhaka tontlhe ti pimisilweko,*+ kanilezvi hlolani a timhaka ti pimisilweko* kasi ku wona lezvaku hakunene tita hi ka Nungungulu ke,+ hakuva a vaphrofeti vo tala va mawunwa va humelele tikweni.+

2 Lezvi hi zvona mu to ti tivisa zvona a timhaka leti ti pimisilweko hi Nungungulu: Tontlhe a timhaka ti pimisilweko ti vhumelako lezvaku Jesu Kristu i tile hi ka nyama, tita hi ka Nungungulu.+ 3 Kanilezvi a timhaka tontlhe ti pimisilweko ti nga vhumeliko Jesu, a titi hi ka Nungungulu.+ Ahandle ka lezvo, leto hi tona a timhaka ti pimisilweko hi mukaneti wa Kristu loyi mu ngazwa lezvaku wata,+ niku zvalezvi i sina a hi lomu tikweni.+

4 Vana vanga, n’wina muta hi ka Nungungulu, niku mu va hlulile,+ hakuva loyi a nga zvin’we na n’wina+ wa hombe a ku hundza loyi a nga zvin’we ni tiko.+ 5 Vona vata hi laha tikweni;+ hi caleco ci va mahako va wulawula zvilo zva laha tikweni, ni tiko ga va ingisela.+ 6 Hina hita hi ka Nungungulu. Ni wihi loyi a tivako Nungungulu wa hi ingisela;+ ni wihi loyi a nga tiko hi ka Nungungulu a nga hi ingiseli.+ Hi ndlela leyo, ha zvi kota ku hambanisa a timhaka ti pimisilweko ta lisine ni timhaka ti pimisilweko ta mawunwa.+

7 Varandzekako, a hi simameni ku randzana,+ hakuva a lirandzo lita hi ka Nungungulu. Ni wihi loyi a randzako i pswalilwe ka Nungungulu niku wa mu tiva Nungungulu.+ 8 Loyi a nga randziko a nga mu tivi Nungungulu, hakuva Nungungulu lirandzo.+ 9 A lirandzo la Nungungulu li kombisilwe ka hina hi ndlela leyi: Nungungulu i no rumela a N’wana wakwe a pswalilweko yece+ ata tikweni kasi hi kuma wutomi ha yena.+ 10 A lirandzo hi leli: A hi lezvaku hina hi no randza Nungungulu, kanilezvi hi yena a nga hi randza, a rumela a N’wana wakwe kota muphahlo wo enela+ wa zviwonho zva hina.*+

11 Varandzekako, loku Nungungulu a hi randzisile lezvi, hinawu hi kurumeteka ku randzana.+ 12 I hava a tshukileko a wona Nungungulu.+ Loku hi simama ku randzana, Nungungulu i simama zvin’we na hina niku a lirandzo lakwe la mbheleliswa ka hina.+ 13 Hi kota ya lezvi, ha zvi tiva lezvaku hi simama zvin’we naye, na yena a tshama zvin’we na hina, hakuva i hi nyikile a moya wakwe. 14 Ahandle ka lezvo, hina wutsumbu hi zvi wonile niku ha kustumunya lezvaku Papayi i rumele a N’wana wakwe kota muhanyisi wa tiko.+ 15 Ni wihi loyi a vhumelako lezvaku Jesu i N’wana wa Nungungulu,+ Nungungulu i simama zvin’we ni munhu loye, ni munhu loye a tshama zvin’we na Nungungulu.+ 16 Hina ha zvi tiva niku ha kholwa lezvaku Nungungulu wa hi randza.+

Nungungulu lirandzo,+ niku loyi a simamako lirandzweni i simama zvin’we na Nungungulu, na Nungungulu a tshama zvin’we naye.+ 17 Hi ndlela leyo, a lirandzo li mbhelelisilwe ka hina kasi hi fela kuva ni kutlhatlheka kuwulawuleni*+ sikwini ga kulamula, hakuva a ku khwatsi hi lezvi yena a nga zvona, hinawu hi tshamisile lezvo tikweni. 18 Lirandzweni a ku na kuchava,+ kanilezvi a lirandzo lo mbhelela li hlongola kuchava, hakuva a kuchava ka hi khomeletela. Kunene, loyi a chavako a nga mbheleliswangi lirandzweni.+ 19 Hina ha randza hakuva yena i rangile a hi randza.+

20 Loku a wokari aku: “Ndza mu randza Nungungulu”, kuveni wa venga a makabye wakwe, muhembi.+ Hakuva loyi a nga randziko a makabye wakwe,+ loyi a mu wonako, a nga zvi koti ku randza Nungungulu, loyi a nga mu woniko.+ 21 Hi amukele a nayo lowu hi kakwe, waku: Ni wihi loyi a randzako Nungungulu, i wa randze kambe ni makabye wakwe.+

5 Ni wihi loyi a kholwako lezvaku Jesu hi Kristu, a munhu loye i pswalilwe hi ka Nungungulu;+ ni wihi loyi a randzako loyi a nga maha ku a pswaliwa, wa randza ni loyi a pswalilweko hi kakwe. 2 Hi ndlela leyo, ha zvi tiva lezvaku hi randza a vana va Nungungulu+ a cikhati leci hi randzako Nungungulu hi tlhela hi hlayisa milayo yakwe. 3 Hakuva a ku randza Nungungulu ku ingisa a milayo yakwe+ niku a milayo yakwe a yi karati.+ 4 Hakuva ni wihi loyi a* pswalilweko hi ka Nungungulu wa hlula tiko.+ Ni kuhlula loku hi kona ku nga hlula tiko, ku nga kukholwa ka hina.+

5 Himani a nga hlulako tiko?+ A hi loyi a kholwako lezvaku Jesu i N’wana wa Nungungulu ke?+ 6 Loyi hi yena a tileko hi mati ni nkhata, Jesu Kristu; na ku nga hi hi mati basi,+ kanilezvi hi mati ni nkhata.+ A moya wa kustumunya,+ hakuva a moya lisine. 7 Hakuva zvinharu zvi nyikako wukustumunyu: 8 a moya,+ ni mati,+ ni nkhata;+ hi wunharu ga zvona zva zwanana.

9 Loku hi vhumela a wukustumunyu ga vanhu, a wukustumunyu ga Nungungulu ga hundza ga vanhu. Hakuva a wukustumunyu ga Nungungulu hi legi: wukustumunyu legi a nyikako xungetano hi N’wana wakwe. 10 Loyi a kholwako ka N’wana wa Nungungulu i na ni wukustumunyu ndzeni kakwe. Loyi a nga kholwiko ka Nungungulu i mu maha muhembi,+ hakuva a nga kholwi ka wukustumunyu legi Nungungulu a gi nyikileko xungetano hi N’wana wakwe. 11 A wukustumunyu ga kona hi legi ga ku Nungungulu i hi nyikile a wutomi ga pindzukelwa,+ niku a wutomi legi gi ka N’wana wakwe.+ 12 Loyi a nga ni N’wana i na ni wutomi legi; loyi a nga hiko na N’wana wa Nungungulu a nga nago a wutomi legi.+

13 Ndza mu tsalela a timhaka leti kasi mu zvi tiva lezvaku mu na ni wutomi ga pindzukelwa,+ n’wina lava mu kholwako vitweni ga N’wana wa Nungungulu.+ 14 A kutsumba loku hi nga nako* mahlweni kakwe+ hi loku kaku kani cini hi kombelako ci yelanako ni kurandza kakwe, wa hizwa.+ 15 Makunu loku hi zvi tiva lezvaku wa hizwa ni ka cihi hi kombelako, ha zvi tiva lezvaku hi ta zvi kuma lezvi hi kombelako, kota lezvi hi zvi kombelako kakwe.+

16 Loku a wokari a wona makabye wakwe na a maha ciwonho ci nga yisiko kufeni, i wa mu kombelele, Nungungulu i ta mu nyika wutomi,+ ina, lava va kalako va nga mahi a ciwonho ci yisako kufeni. Ku na ni ciwonho ci yisako kufeni.+ Xungetano hi ciwonho leco, a ndzi wuli lezvaku i wa mu kombelele. 17 A kungalulami kontlhe ciwonho,+ hambulezvo ku na ni ciwonho leci ci nga yisiko kufeni.

18 Ha zvi tiva lezvaku loyi a pswalilweko hi ka Nungungulu a nga tshameli ku wonha kanilezvi loyi a pswalilweko hi ka Nungungulu* wa mu wonelela, niku loyi wa kubiha a nga na ku mu henya.*+ 19 Hina ha zvi tiva lezvaku hita hi ka Nungungulu, kanilezvi a tiko gontlhe gi le ntan’wini wa loyi wa kubiha.+ 20 Kanilezvi ha zvi tiva lezvaku a N’wana wa Nungungulu i tile+ niku i hi nyikile kuzwisisa* kasi hi kuma wutivi ga loyi a nga wa lisine. Hi zvin’we ni loyi a nga wa lisine+ hi kota ya N’wana wakwe, Jesu Kristu. Loyi hi yena Nungungulu wa lisine ni wutomi ga pindzukelwa.+ 21 Vana vanga, ti woneleni ka zvifananiso.+