KUVHULULELWA KA JOHANI

1 Kuvhululelwa* ka Jesu Kristu, loku Nungungulu a nga mu nyika+ kasi a komba malandza yakwe+ lezvi zvi to maheka zvezvanyana. I no rumela a ngilozi yakwe, a zvi kombisa ha yona hi zviwoniso ka nandza gakwe Johani,+ 2 loyi a nyikileko wukustumunyu ga mhaka leyi Nungungulu a yi nyikileko ni ga wukustumunyu legi Jesu Kristu a gi nyikileko, ina, ni ga zvilo zvontlhe lezvi a zvi wonileko. 3 Wa tsaka loyi a lerako hi gezu ga hombe ni lava va zwako a magezu ya ciphrofeto leci ni lava va mahako lezvi zvi tsalilweko ka cona,+ hakuva a cikhati ci yimisilweko ci laha kusuhani.

4 Johani, ka 7 wa mabandla+ ma nga provhinsia ya Azia:

Ngha muva ni tipswalo ni kurula zvi tako hi ka “Loyi a nga kona, loyi a nga hi kona, ni loyi a tako”,+ ni ka 7 wa mimoya+ yi nga mahlweni ka citshamu cakwe ca wuhosi, 5 ni ka Jesu Kristu “a Kustumunyu wo Tsumbeka”,+ “a matewula ya kuvhuka hi ka vafileko”,+ ni “Mufumeli wa tihosi ta misava”.+

Ka yena loyi a hi randzako,+ loyi a hi tlhatlhisileko zviwonhweni zva hina hi nkhata wakwe+ — 6 a hi yimisa a kuva mufumo+ ni vapristi+ va Nungungulu wakwe tlhelo Papayi — ina, a ka yena a kuve kona kungangamela ni ntamu kala kupindzuka. Amen.

7 Wonani! Wata hi marefu,+ a matihlo wontlhe ma ta mu wona zvin’we ni lava va nga mu tlhava; a tixaka tontlhe ta laha misaveni ti ta tiba zvifuva hi kukarateka hi kota ya yena.+ Ina, Amen.

8 “Hi mina Alfa na Omega”,*+ ku wula Jehovha* Nungungulu, “Loyi a nga kona, loyi a nga hi kona, ni loyi a tako, loyi wa Ntamu Wontlhe”.+

9 Mina Johani, a makabye wa n’wina ni muhlengeli zvin’we na n’wina kuxanisekeni,+ ni mufun’weni,+ ni kutimiseleni+ zvin’we na Jesu,+ ndzi wa hi cihlaleni* ci vitaniwako ku i Patmosi hi kota ya ku wulawula hi Nungungulu ni ku nyika wukustumunyu ha Jesu. 10 Hi kupimiselwa, ndzi nova sikwini ga Hosi; makunu ndzi nozwa a gezu ga hombe hi le ndzhako ka mina, go fana ni kuvhuma ka mpundzu, 11 giku: “Lezvi u zvi wonako zvi tsale bhukwini go songiwa u gi rumela ka 7 wa mabandla: Efesusi,+ ni Smirna,+ ni Pergamumi,+ ni Tiyatira,+ ni Sardhisi,+ ni Filadhelfiya,+ ni Lawodhikeya.”+

12 Ndzi no hundzuluka kasi ndzi wona loyi a nga kari a wulawula na mina; laha ndzi nga hundzuluka, ndzi no wona a 7 wa minenge ya tikandiya ya ouro.+ 13 Laha cikari ka minenge ya tikandiya ndzi no wona a wokari a fanako ni n’wana wa munhu,+ a nga bohile nguwo yo leha yo chikela ni le mikondzweni, ni bhandi ga ouro laha cifuveni cakwe. 14 Ahandle ka lezvo, a hloko yakwe ni misisi yakwe zvi wa basile a ku khwatsi i woya go basa, a ku khwatsi i gapongo, a matihlo yakwe ma wa ku khwatsi i langavi gi vhurako,+ 15 a mikondzo yakwe yi wa ku khwatsi i kobre yi hlutilweko,+ loku yi phatima lomu ka ndzhimbo,* ni gezu gakwe gi wa ku khwatsi i guwa ga mati yo tala. 16 I wa hi ni 7 wa tinyeleti canjeni gakwe ga cinene;+ lomu non’wini wakwe ku no huma a cipadha co leha, co kariha, ci tsemako seno ni seno,+ niku a nghohe yakwe yi wa ku khwatsi i gambo loku gi woninga hi ntamu wa gona wontlhe.+ 17 A cikhati leci ndzi nga mu wona, ndzi nowa mikondzweni yakwe ndzi ku khwatsi ndzi nofa.

Makunu i no ndzi tlhateka a canja gakwe ga cinene, aku: “U nga chavi. Hi mina wa Kusangula+ ni wa Kugumesa,+ 18 ni loyi a hanyako.+ Ndzi wa file,+ kanilezvi makunu ndza hanya kala kupindzuka ni kupindzuka+ niku ndzi na ni makhiya ya kufa ni ya Cilahla.*+ 19 Hikwalaho, tsala a zvilo lezvi u zvi wonileko, ni zvilo lezvi zvi mahekako ni zvilo lezvi zvi to maheka andzhako ka lezvi. 20 Xungetano hi cihundla co basa ca 7 wa tinyeleti leti u ti wonileko canjeni ga mina ga cinene, ni 7 wa minenge ya tikandiya ya ouro, a tlhamuselo wa kona hi lowu: A 7 wa tinyeleti ti yimela a tingilozi ta 7 wa mabandla; a 7 wa minenge ya tikandiya yi yimela a 7 wa mabandla.+

2 “Tsalela a ngilozi+ ya bandla ga Efesusi,+ uku: Loyi a khomileko a 7 wa tinyeleti canjeni gakwe ga cinene, loyi a fambako cikari ka 7 wa minenge ya tikandiya ya ouro, i ngalo:+ 2 ‘Ndza yi tiva a mitiro ya wena, ni kutitsitsirita ka wena, ni kutimisela ka wena, ni lezvaku a wu nyenyeleteli a vanhu va kubiha, niku u ringile lava va ti byelako ku vapostoli+ kasi lezvo a hi vona, u kuma lezvaku vahembi. 3 Wa kombisa kutimisela kambe, u xaniseka hi kota ya vito ga mina,+ niku a wu karali.+ 4 Hambulezvo, ndzi na ni cisolo leci ka wena: u tsikile a lirandzo leli u nga hi nalo kusanguleni.

5 “‘Hikwalaho, alakanya laha u nga wela kona, u ti sola,+ u maha a mitiro leyi u nga kari u yi maha kusanguleni. Loku u nga mahi lezvo, ndzi tata ka wena ndzi ta susa a nenge wa wena wa tikandiya+ wutshan’wini ga wona, ahandle ka loku u ti sola.+ 6 Hambulezvo, ku na ni nchumu lowu wa wunene ka wena: wa venga a mitiro ya ntlawa wa Nikolatani,+ yi nga yaleyi minawu ndzi yi vengako. 7 Loyi a nga ni tindleve i wazwe lezvi a moya wu byelako mabandla, wuku:+ Loyi a hlulako+ ndzi ta mu nyika a kuva aga a sinya ya wutomi+ leyi yi nga paradhiseni ga Nungungulu.’

8 “Tsalela a ngilozi ya bandla ga Smirna, uku: ‘Loyi wa Kusangula ni wa Kugumesa’,+ loyi a nga file a tlhela a hanya, i ngalo:+ 9 ‘Ndza ku tiva a kuxaniseka ka wena ni wusiwana ga wena — kanilezvi u ganyile+ — ni ciruko ca lava va ti byelako ku vaJudha kuveni hi lisine a hi vona, kanilezvi i sinagoga ga Sathani.+ 10 U nga chavi hi kota ya tixanisa leti u to kumana nato zvezvanyana.+ Dhiyabho i ta simama ku vhalela vokari va n’wina paxweni kasi mu fela ku ringiwa hi kumbhelela; mu ta xaniseka a 10 wa masiku. Tsumbeka kala kufeni, ndzi ta ku nyika a cidlodlo* ca wutomi.+ 11 Loyi a nga ni tindleve i wazwe+ lezvi a moya wu byelako mabandla, wuku: Loyi a hlulako+ a nga ta bayisiwa ne ni kutsongwani hi kufa ka wumbiri.’+

12 “Tsalela a ngilozi ya bandla ga Pergamumi, uku: Loyi a khomileko a cipadha co leha, co kariha, ci tsemako seno ni seno, i ngalo:+ 13 ‘Ndza ku tiva laha u tshamako kona, ku nga laha ku nga ni citshamu ca wuhosi ca Sathani; hambulezvo wa ha simama ku khoma zvi tiya vitweni ga mina,+ a wu kanetangi a kukholwa ka wena ka mina,+ hambu masikwini ya Antipasi, a kustumunyu wa mina wo tsumbeka,+ loyi a delweko+ reveni ga n’wina, laha Sathani a tshamako kona.

14 “‘Hambulezvo, ndzi na ni zvisolo zvi tsongwani ka wena: cikari ka wena ku na ni lava va namarelako ka gondzo ya Bhalami,+ loyi a gondzisileko Bhalaki+ a ku veka cikhunguvanyiso mahlweni ka vana va ka Izrayeli, kasi vaga a zvilo zvi phahlelweko ka zvifananiso va tlhela va maha a wubhayi.*+ 15 Hi kufanana, u na ni lava kambe va namarelako ka gondzo ya ntlawa wa Nikolatani.+ 16 Hikwalaho, ti sole. Loku u nga mahi lezvo, ndzi ta hatla ndzita ka wena, ndzi talwa navo hi cipadha co leha ca nomu wa mina.+

17 “‘Loyi a nga ni tindleve i wazwe lezvi a moya wu byelako mabandla,+ wuku: Loyi a hlulako+ ndzi ta mu nyika a mana yo kari ya lawa ma fihlilweko,+ ndzi mu nyika ni ciribyana co basa; ka ciribyana leco ku tsalilwe a vito giswa, gi nga tiviwiko hi munhu ahandle ka loyi a gi amukelako.’

18 “Tsalela a ngilozi ya bandla ga Tiyatira,+ uku: A N’wana wa Nungungulu, loyi a nga ni matihlo yo khwatsi i langavi gi vhurako,+ ni mikondzo yo khwatsi i kobre yi hlutilweko,+ i ngalo: 19 ‘Ndza yi tiva a mitiro ya wena, ni lirandzo la wena, ni kukholwa ka wena, ni ntiro wa wena, ni kutimisela ka wena, ni lezvaku a mitiro ya wena leyi yo gumesa yi hundza leyi u yi mahileko kusanguleni.

20 “‘Hambulezvo, ndzi na ni cisolo leci ka wena: wa nyenyeletela a wasati loye, Jezebheli,+ loyi a ti byelako ku muphrofeti a tlhela a gondzisa ni ku hambukisa a malandza ya mina kasi ma maha wubhayi*+ ma tlhela maga a zvilo zvi phahlelweko ka zvifananiso. 21 Ndzi mu nyikile cikhati ca kuva a ti sola, kanilezvi a nga zvi lavi ku ti sola ka wubhayi* gakwe. 22 Hikwalaho, zvezvanyana ndzi ta mu wisela sangweni ga kubabya, niku lava va mahako wubhayi naye ndzi ta va hoxa kuxanisekeni ka hombe, ahandle ka loku va ti sola mitirweni yakwe. 23 Ndzi ta daya a vana vakwe hi ntungu wu dayako, kasi a mabandla wontlhe ma fela ku zvi tiva lezvaku hi mina loyi ndzi hlolako a maalakanyo ma etileko,* ni timbilu, niku ndzi ta nyika a mun’we ni mun’wani hi kuya hi mitiro yakwe.+

24 “‘Hambulezvo, ka lava van’wani va nga Tiyatira, vontlhe lava va nga landziko a gondzo leyi, va nga kala ku tiva lezvi va nge “zvilo zvo eta zva Sathani”,+ ndzi ngalo: A ndzi mu rwexi a ndzhwalo wun’wani. 25 Ntsena lezvaku simamani ku khoma zvi tiya ka lezvi mu nga nazvo kala ndzita.+ 26 Loyi a hlulako a tlhela a hlayisa a mitiro ya mina kala magumo, ndzi ta mu nyika a ntamu hehla ka matiko,+ 27 niku i ta risa vanhu hi nhonga ya simbi+ kasi va fayetelwa a ku khwatsi zvibya zva wumba, kota lezvi ndzi amukeleko ntamu hi ka Papayi. 28 Niku ndzi ta mu nyika a nyeleti ya ni mixo.+ 29 Loyi a nga ni tindleve i wazwe lezvi a moya wu byelako mabandla.’

3 “Tsalela a ngilozi ya bandla ga Sardhisi, uku: Loyi a nga ni 7 wa mimoya ya Nungungulu+ ni 7 wa tinyeleti,+ i ngalo: ‘Ndza yi tiva a mitiro ya wena, lezvaku u na ni vito ga ku wa hanya, kanilezvi u file.+ 2 Khindlimuka,+ u tiyisa a zvilo lezvi zvi seleko zvi nga lava kufa, hakuva ndzi kumile lezvaku a mitiro ya wena a yi mahiwangi hi kumbhelela* mahlweni ka Nungungulu wa mina. 3 Hikwalaho, simama ku alakanya lezvi u zvi amukeleko ni lezvi u zvi zwileko, u simama ku zvi hlayisa, u ti sola.+ Kunene ahandle ka loku u khindlimuka, ndzi tata a ku fana ni khamba,+ niku u nga ta yi tiva ne ni kutsongwani a hora leyi ndzi tota hi yona ka wena.+

4 “‘Hambulezvo, u na ni vokari* le Sardhisi va nga kala ku nyenyezisa a tinguwo tabye.+ Va ta famba na mina na va bohile tinguwo to basa+ hakuva zva va ringana. 5 Loyi a hlulako,+ i ta bohisiwa a tinguwo to basa+ niku ndzi nga ta tshuka ndzi vhinya a vito gakwe bhukwini ga wutomi,+ kanilezvi ndzi ta tiva vito gakwe mahlweni ka Papayi wa mina ni mahlweni ka tingilozi takwe.+ 6 Loyi a nga ni tindleve i wazwe lezvi a moya wu byelako mabandla.’

7 “Tsalela a ngilozi ya bandla ga Filadhelfiya, uku: Loyi a basileko,+ loyi a nga wa lisine,+ a nga ni khiya ga Dhavhidha,+ loyi a vhululako kasi ku nga vhali munhu, a vhala kasi ku nga vhululi munhu, i ngalo: 8 ‘Ndza yi tiva a mitiro ya wena — ndzi vekile mahlweni ka wena a livati li vhulilweko+ la ku a ku na munhu a zvi kotako ku vhala. Ndza zvi tiva lezvaku u na ni ntamu wa wutsongwani ni lezvaku u hlayisile a mhaka ya mina niku u tsumbekile vitweni ga mina. 9 Ndzi ta maha lezvaku lava va sinagoga ga Sathani — lava va ti wulako ku vaJudha kuveni a hi vona,+ vo hemba — vata va ta khizama mikondzweni ya wena, ndzi tlhela ndzi va maha va zvi tiva lezvaku ndza ku randza. 10 Kota lezvi u hlayisileko a mhaka ya kutimisela ka mina,*+ minawu ndzi ta ku hlayisa ka hora ya kuringwa+ leyi yi tota hehla ka misava yontlhe kasi ku ringa lava va hanyako laha misaveni. 11 Ndzata hi kuhatlisa.+ Khoma zvi tiya ka lezvi u nga nazvo, kasi ku ngavi ni munhu a ku tekelako a cidlodlo* ca wena.+

12 “‘Loyi a hlulako ndzi ta mu maha a ziki* tempeleni ya Nungungulu wa mina niku a nga ta tshuka a huma ka yona. Ndzi ta tsala hehla kakwe a vito ga Nungungulu wa mina,+ ni vito ga dhoropa ga Nungungulu wa mina, ku nga Jerusalema Giswa,+ legi gi relelako hi le tilweni, hi ka Nungungulu wa mina, ni vito ga mina ga giswa.+ 13 Loyi a nga ni tindleve i wazwe lezvi a moya wu byelako mabandla.’

14 “Tsalela a ngilozi ya bandla ga Lawodhikeya,+ uku: Amen,+ a kustumunyu+ wo tsumbeka ni wa lisine,+ a masangulo ya kuvanga ka Nungungulu,+ i ngalo: 15 ‘Ndza yi tiva a mitiro ya wena, lezvaku a wu titimeli ne a wu hisi. Mayiwako loku u wo titimela kutani ku hisa! 16 Makunu kota lezvi u kufumelako, na u nga hisi+ ne ku titimela,+ ndzi ta ku hlata non’wini wa mina. 17 Lezvi u nge: “Ndzi ganyile,+ ndzi na ni titshomba, a ndza ha lavi nchumu”, kanilezvi a wu zvi tivi lezvaku u muxaniseki, ni muvhumali, ni cisiwana, ni cikhumu, ni cimbyiri, 18 Ndza ku khongotela lezvaku u xava ka mina a ouro yi hlutilweko hi ndzilo kasi u fela ku ganya, ni tinguwo to basa kasi u boha u fihla a wumbyiri ga wena,+ ni muri wa ku tota matihlo ya wena+ kasi u fela ku wona.+

19 “‘Vontlhe lava ndzi va randzako ndza va kawuka ndzi tlhela ndzi va laya.+ Hikwalaho, ti tsitsirite, u ti sola.+ 20 Zwanani! Ndzi laha nyangweni ndzi gongondza. Loku a wokari azwa gezu ga mina a vhulula livati, ndzi ta nghena lomu ndlwini yakwe ndzi lalela naye, yenawu a lalela na mina. 21 Loyi a hlulako+ ndzi ta mu nyika a kuva a tshama na mina citshan’wini ca mina ca wuhosi,+ a ku khwatsi hi lezvi mina ndzi hlulileko ndzi tshama+ zvin’we ni Papayi wa mina citshan’wini cakwe ca wuhosi. 22 Loyi a nga ni tindleve i wazwe lezvi a moya wu byelako mabandla.’”

4 Andzhako ka lezvo, ndzi no wona a livati na li vhululekile le tilweni, niku a gezu go sangula ndzi nga gizwa na gi wulawula na mina gi wa ku khwatsi i mpundzu; gi te: “Kandziha uta laha, ndzi ta ku komba a zvilo lezvi zvi to maheka.” 2 Andzhako ka lezvi, ndzi no tekela kuva ntan’wini wa moya, ndzi wona a citshamu ca wuhosi le tilweni ni wokari na a tshamile ka cona.+ 3 Loyi a nga tshamile i wa wonekisa ku khwatsi i ribye ga jasperi+ ni ribye ga sardhisi;* a citshamu ca wuhosi ci wa rendzelekelwe hi wura ga nyazimi gi nga wonekisa ku khwatsi i esmeraldha.+

4 A citshamu ca wuhosi ci wa randzelwe hi 24 wa zvitshamu zva wuhosi; ka zvitshamu lezvo zva wuhosi ndzi no wona a 24 wa madhota na ma tshamile ka zvona,+ ma nga bohile tinguwo to basa, ni zvidlodlo* zva ouro tihlokweni ta wona. 5 Laha citshan’wini ca wuhosi ku wa huma a kuhatima,+ ni magezu, ni kudzindza.+ Ku wa hi ni 7 wa tikandiya ta ndzilo ti nga kari ti vhura phambeni ka citshamu ca wuhosi; a tikandiya leto ti yimela a 7 wa mimoya ya Nungungulu.+ 6 Laha phambeni ka citshamu ca wuhosi ku wa hi ni nchumu wo wonekisa ku khwatsi i bimbi ga vhidro,+ wo khwatsi i kristali.

Laha cikari* ka citshamu ca wuhosi ni lomu mareveni ya cona ku wa hi ni mune wa zvivangwa zvi hanyako+ zvi nga tele hi matihlo phambeni ni ndzhako. 7 A civangwa co sangula ci hanyako ci wa fana ni nghala;+ a civangwa ca wumbiri ci hanyako ci wa fana ni cidhunana ca homu;+ a civangwa ca wunharu ci hanyako+ ci wa hi ni nghohe yo fana ni ya munhu; ni civangwa ca wumune ci hanyako+ ci wa fana ni gama+ gi purumako. 8 A cin’we ni cin’we ca zvivangwa lezvi zva mune zvi hanyako ci wa hi ni 6 wa tipapa ti nga tele hi matihlo matlhelweni wontlhe ni lahasi ka tona.+ Mumu ni wusiku zvi simama ku huwelela, zviku: “I basile, i basile, i basile Jehovha*+ Nungungulu wa Ntamu Wontlhe, loyi a nga hi kona, loyi a nga kona, ni loyi a tako.”+

9 Ni ka cihi cikhati leci a zvivangwa zvi hanyako zvi dzundzako, ni ku dhumisa, ni ku bonga Loyi a tshamileko citshan’wini ca wuhosi, ku nga Loyi a hanyako kala kupindzuka ni kupindzuka,+ 10 a 24 wa madhota+ mawa lahasi mahlweni ka Loyi a tshamileko citshan’wini ca wuhosi ma khozela loyi a hanyako kala kupindzuka ni kupindzuka, ma hoxa a zvidlodlo* zva wona mahlweni ka citshamu ca wuhosi, maku: 11 “Zva ku ringana, Jehovha* Nungungulu wa hina, a ku amukela kungangamela,+ ni wudzundzo,+ ni ntamu,+ hakuva u vangile zvilo zvontlhe,+ niku hi kota ya kurandza ka wena zvi kona niku zvi vangilwe.”

5 Canjeni ga cinene ga Loyi a tshamileko citshan’wini ca wuhosi,+ ndzi no wona a bhuku go songiwa gi nga tsalilwe seno ni seno* na gi lemilwe zvi tiya hi 7 wa zvifungo. 2 Ndzi no wona a ngilozi ya ntamu kambe na yi huwelela hi gezu ga hombe, yiku: “Himani a ringanelwako hi ku vhulula a bhuku go songiwa ni ku namula a zvifungo zva gona ke?” 3 Kanilezvi i hava le tilweni kutani laha misaveni, hambu lahasi ka misava a nga zvi kota ku vhulula a bhuku go songiwa kutani ku wona lezvi zvi nga tsalilwe ka gona. 4 Ndzi no rila nguvhu hakuva ku wa nga hi na munhu a nga ringanelwa hi ku vhulula a bhuku go songiwa kutani ku wona lezvi zvi nga tsalilwe ka gona. 5 Kanilezvi a gin’we ga madhota gi te ngalo ka mina: “Miyela ku rila. Cuwuka! A Nghala ya lixaka la ka Judha,+ a mutsu+ wa Dhavhidha,+ yi hlulile+ kasi yi vhulula a bhuku ni ku namula a 7 wa zvifungo zva gona.”

6 Ndzi no wona a yivhana+ na yi yimile cikari* ka citshamu ca wuhosi, ni cikari ka mune wa zvivangwa zvi hanyako, ni cikari ka madhota,+ na yi ku khwatsi yi delwe.+ Yi wa hi ni 7 wa timhondzo ni 7 wa matihlo — a matihlo lawa ma yimela a 7 wa mimoya ya Nungungulu+ leyi yi rumelweko misaveni yontlhe. 7 Zvalezvo i no tshinela a teka a bhuku go songiwa canjeni ga cinene ga Loyi a nga tshamile citshan’wini ca wuhosi.+ 8 A cikhati leci a nga teka bhuku go songiwa, a mune wa zvivangwa zvi hanyako, ni 24 wa madhota+ va nowa lahasi mahlweni ka Yivhana. A mun’we ni mun’wani wabye i wa hi ni citende ni mingelo ya ouro yi nga tele hi libani. (A libani li yimela a mikhongelo ya vobasa.)+ 9 Va yimbelela a lisimu liswa,+ vaku: “Wena wa ringanelwa hi ku teka a bhuku go songiwa u namula a zvifungo zva gona, hakuva u wa delwe niku hi nkhata wa wena, u xavele Nungungulu a vanhu+ va tixaka tontlhe, ni tirimi, ni mifumo, ni matiko+ 10 u va yimisa a kuva mufumo+ ni vapristi va Nungungulu wa hina,+ niku va ta fumela+ misava.”

11 Ndzi no cuwuka, ndzizwa magezu ya tingilozi to tala ti nga randzele a citshamu ca wuhosi, ni zvivangwa zvi hanyako, ni madhota, niku a ntsengo wa tona wu wa hi makume ya makume ya mazana ma wuyetilweko hi makume ya makume ya mazana,+ 12 na ti banguleka hi gezu ga hombe, tiku: “A Yivhana leyi yi nga delwe+ ya ringanelwa hi ku amukela ntamu, ni titshomba, ni wutlhari, ni wukulu, ni wudzundzo, ni kungangamela, ni makatekwa.”+

13 Ndzi nozwa a zvivangwa zvontlhe zva le tilweni, ni zva laha misaveni,+ ni zva lahasi ka misava, ni zva lomu bimbini, ni zvontlhe zvi nga ka zvona, zviku: “A makatekwa ni wudzundzo+ ni kungangamela ni ntamu a zvive ka Loyi a tshamileko citshan’wini ca wuhosi+ ni ka Yivhana+ kala kupindzuka ni kupindzuka.”+ 14 A mune wa zvivangwa zvi hanyako zvi waku: “Amen!” ni madhota ma nowa lahasi ma khozela.

6 Ndzi zvi wonile laha a Yivhana+ yi nga namula a cin’we ca zvifungo lezvi zva 7,+ ndzizwa a cin’we ca mune wa zvivangwa zvi hanyako+ na ci wula hi gezu go fana ni kudzindza, ciku: “Tana!” 2 Ndzi no cuwuka ndzi wona a haxi go basa,+ niku loyi a nga gi khilele i wa hi ni wura; i no nyikiwa cidlodlo*+ a huma na a hlula kasi a ya mbhetisa kuhlula kakwe.+

3 Laha yi nga namula a cifungo ca wumbiri, ndzi nozwa a civangwa ca wumbiri ci hanyako,+ ciku: “Tana!” 4 Ku no huma gin’wani haxi go pswhukisa ku khwatsi i ndzilo, niku loyi a nga gi khilele i no nyikiwa a ntamu wa ku susa kurula laha misaveni kasi a vanhu va dayana; i no nyikiwa a cipadha ca hombe.+

5 Laha yi nga namula a cifungo ca wunharu,+ ndzi nozwa a civangwa ca wunharu ci hanyako,+ ciku: “Tana!” Ndzi no cuwuka ndzi wona a haxi ga ntima, niku loyi a nga gi khilele i wa khomile cikalo canjeni gakwe. 6 Ndzi nozwa a guwa go khwatsi i gezu cikari ka mune wa zvivangwa zvi hanyako, giku: “A litro* yin’we ya trigo i dhenario,*+ ni tilitro tinharu ta sevhadha i dhenario. U nga wonhi a mafura ya olivha ni vhinyo.”+

7 Laha yi nga namula a cifungo ca wumune, ndzi nozwa a gezu ga civangwa ca wumune ci hanyako,+ giku: “Tana!” 8 Ndzi no cuwuka ndzi wona a haxi go kwalala. Loyi a nga gi khilele i wa vitaniwa ku hi Kufa, niku a Cilahla* ci wa mu landzelela hi laha kusuhani. Va no nyikiwa ntamu hehla ka cipandze ca wumune ca misava, kasi va daya hi cipadha co leha, ni ndlala,+ ni ntungu wu dayako, ni zvivandza zva misava.+

9 Laha yi nga namula a cifungo ca wuntlhanu, ndzi no wona lahasi ka alati+ a mihefemulo*+ ya lava va delweko hi kota ya mhaka ya Nungungulu ni hi kota ya wukustumunyu legi va nga gi nyikile.+ 10 Va no banguleka hi gezu ga hombe, vaku: “Kala rini, Hosi ya Hombe, wena u basileko ni wa lisine,+ na wa ha ti khoma u nga lamuli ni ku photela a nkhata wa hina ka lava va hanyako laha misaveni?”+ 11 A mun’we ni mun’wani wabye i no nyikiwa a nguwo yo basa yo leha,+ va byeliwa a kuva va humula cikhatanyana, kala wu enela a ntsengo wa malandza-kulobye ni vamakabye vabye lava va nga hi kusuhani ni ku dawa a ku khwatsi hi vona.+

12 Ndzi zvi wonile laha yi nga namula a cifungo ca wu 6, kuva ni kutsekatseka ka hombe ka misava, a gambo gi maha ga ntima a ku fana ni sakwa yi mahilweko hi woya,* ni hweti yontlhe yi cica yi fana ni nkhata;+ 13 a tinyeleti ta tilo ti nowa misaveni a ku khwatsi hi loku a sinya ya makuwu yi jujiwa hi moya wa hombe yi wisa a makuwu ya mambisi. 14 A tilo gi no suka a ku khwatsi i bhuku go songiwa gi songiwako,+ niku zvontlhe a zvitsunga ni zvihlale* zvi no susiwa matshan’wini ya zvona.+ 15 Makunu a tihosi ta misava, ni tihosana, ni vakomandante, ni lava vo ganya, ni lava va ntamu, ni tikhumbi tontlhe, ni vanhu vontlhe va tlhatlhekileko, va no fihlala lomu timhakweni ni lomu maribyeni ya zvitsunga.+ 16 Va wa byela zvitsunga ni maribye, vaku: “Wanani hehla ka hina+ mu hi fihla nghoheni ya Loyi a tshamileko citshan’wini ca wuhosi+ ni ka zanga ya Yivhana,+ 17 hakuva a siku ga hombe ga zanga yabye gi chikele.+ Himani wa ku a nga yima ke?”+

7 Andzhako ka lezvo, ndzi no wona a mune wa tingilozi na ti yimile ka mune wa makhona ya misava, na ti khometele a mune wa mimoya ya misava zvi tiya, kasi ku ngabi moya laha misaveni, kutani bimbini, hambu ni ka sinya yin’we. 2 Ndzi no wona a yin’wani ngilozi na yi kandziha hi le mutsuwuka-gambo na yi hi ni cifungo ca Nungungulu a hanyako. Yi no banguleka hi gezu ga hombe ka mune wa tingilozi leti ti nga nyikilwe a ntamu wa ku wonha a misava ni bimbi, 3 yiku: “Mu nga wonhi misava kutani bimbi hambu ni tisinya, kala hi mbheta ku vekela zvifungo+ zvikandzeni* zva malandza ya Nungungulu wa hina.”+

4 Ndzi nozwa a ntsengo wa lava va fungilweko: 144 000+ va fungilweko na va huma ka tixaka tontlhe ta vana va Izrayeli:+

9 Andzhako ka lezvo, ndzi no cuwuka ndzi wona a citshungu ca hombe, ca ku i hava a nga zvi kota ku hlaya, ci humako ka wontlhe matiko, ni tixaka, ni mifumo, ni tirimi,+ na ci yimile mahlweni ka citshamu ca wuhosi ni mahlweni ka Yivhana; va wa bohile a tinguwo to basa ta kuleha,+ niku va wa welele micindzu mandleni yabye.+ 10 Va wa banguleka hi gezu ga hombe, vaku: “A kuhanyiswa ka hina kuta hi ka Nungungulu wa hina, loyi a tshamileko citshan’wini ca wuhosi,+ ni ka Yivhana.”+

11 A tingilozi tontlhe ti wa yimile ti randzela a citshamu ca wuhosi, ni madhota,+ ni mune wa zvivangwa zvi hanyako. Ti nowa lahasi hi tinghohe mahlweni ka citshamu ca wuhosi, ti khozela Nungungulu, 12 tiku: “Amen! A kudhumiswa, ni kungangamela, ni wutlhari, ni kubonga, ni wudzundzo, ni ntamu, ni wukulu, a zvive ka Nungungulu wa hina kala kupindzuka ni kupindzuka.+ Amen.”

13 Hi kota ya lezvo, a gin’we ga madhota gi te ngalo ka mina: “Kasi hi vamani lava va bohileko a tinguwo leti to basa ta kuleha,+ kona vata hi kwihi?” 14 Ndzi no tekela ku gi hlamula, ndziku: “Hosi yanga, hi wena u zvi tivako.” Giku ka mina: “Lava hi lava va humako kuxanisekeni ka hombe.+ Va hlazvile a tinguwo tabye ta kuleha, va ti basisa nkhateni wa Yivhana.+ 15 Hi cigelo leco va nga mahlweni ka citshamu ca wuhosi ca Nungungulu, va mu mahela a ntiro wo basa mumu ni wusiku tempeleni yakwe; Loyi a tshamileko citshan’wini ca wuhosi+ i ta gwimba a tenda gakwe hehla kabye.+ 16 Va nga ta hazwa ndlala ne tora, va nga ta ha tlahuliwa kambe hi gambo hambu hi kuhisa,+ 17 hakuva a Yivhana,+ leyi yi nga cikari* ka citshamu ca wuhosi, yi ta va risa,+ yi va rangela vaya zvibukeni zva mati ya wutomi.+ Niku Nungungulu i ta kulula mihloti yontlhe matihlweni yabye.”+

8 Laha yi nga+ namula a cifungo ca wu 7,+ ku no miyelwa ku ku zwe le tilweni hi cipimo ca khihlanya ga hora. 2 Ndzi no wona a 7 wa tingilozi+ leti ti yimako mahlweni ka Nungungulu; ti no nyikiwa a 7 wa mimpundzu.

3 Ku no chikela a yin’wani ngilozi na yi hi ni cibya ca ouro co hisela kona libani yi ta yima laha alatini.+ Yi no nyikiwa a libani lo tala nguvhu+ lezvaku yi li nyikela zvin’we ni mikhongelo ya vobasa vontlhe laha alatini ga ouro+ gi nga hi mahlweni ka citshamu ca wuhosi. 4 A musi wa libani leli li nga hi canjeni ga ngilozi wu no tuvikela mahlweni ka Nungungulu zvin’we ni mikhongelo+ ya vobasa. 5 Kanilezvi, a ngilozi yi no tekela ku teka cibya co hisela kona libani yi ci tata hi ndzilo wa laha alatini, yi ci hoxa misaveni. Ku nova ni zvingwalangwandla, ni magezu, ni kuhatima,+ ni kutsekatseka ka misava. 6 A 7 wa tingilozi ti nga hi ni 7 wa mimpundzu+ ti no ti longisela kuba mimpundzu.

7 Leyi yo sangula yi noba a mpundzu wa yona. Ku nova ni maralala ni ndzilo wu nga patsene ni nkhata, niku zvi no hoxiwa laha misaveni;+ ku noswa cipandze ca wunharu ca misava, kuswa ni cipandze ca wunharu ca tisinya, ku tlhela kuswa ni byanyi gontlhe go nyuka.+

8 A ngilozi ya wumbiri yi noba a mpundzu wa yona. A nchumu wo fana ni citsunga ca hombe ci vhurako ndzilo wu no hoxiwa bimbini.+ A cipandze ca wunharu ca bimbi ci no cica ci maha nkhata;+ 9 ni cipandze ca wunharu ca zvivangwa zvi hanyako* zva lomu bimbini ci nofa;+ ni cipandze ca wunharu ca zvitimela* ci no pandzekela.

10 A ngilozi ya wunharu yi noba a mpundzu wa yona. Ku nowa nyeleti ya hombe hi le tilweni yi nga vhurisa ku khwatsi cihlahle,* yi wela cipandze ca wunharu ca micongo ni zvibuka zva mati.+ 11 A vito ga nyeleti leyo hi Kubava.* A cipandze ca wunharu ca mati ci no cica ci bava, a vanhu vo tala vafa hi kota ya mati lawo hakuva ma wa cicile ma bava.+

12 A ngilozi ya wumune yi noba a mpundzu wa yona. Ku no biwa a cipandze ca wunharu ca gambo,+ ni cipandze ca wunharu ca hweti, ni cipandze ca wunharu ca tinyeleti, kasi a cipandze ca wunharu ca zvona civa munyama+ ni lezvaku a cipandze ca wunharu ca siku ci ngavi ni kuwonekela, a wusiku gonawu gi mahisa zvalezvo.

13 Ndzi no wona ni kuzwa a gama gi nga kari gi puruma cikari ka tilo, na gi wula hi gezu ga hombe, giku: “Khombo, khombo, khombo+ ka lava va akileko misaveni hi kota ya kubiwa ka mimpundzu leyi yi seleko ya tingilozi tinharu leti ti lavako kuba a mimpundzu ya tona!”+

9 A ngilozi ya wuntlhanu yi noba a mpundzu wa yona.+ Ndzi no wona a nyeleti yi nga wile laha misaveni na yita hi le tilweni; yi no nyikiwa a khiya ga nkele wo eta wo kala magumo.+ 2 Yi no vhulula a nkele wo eta wo kala magumo, ku tuvika musi hi lomu nkeleni wo fana ni musi wa ndzhimbo* wa hombe. A gambo ni moya zvi no maha zva ntima+ hi musi wa nkele lowo. 3 Ku no huma a humbi* hi lomu ka musi yita misaveni,+ yi nyikiwa ntamu walowu a tihume ta laha misaveni ti nga nawo. 4 Yi no leletelwa lezvaku yi nga wonhi a byanyi ga misava, ni zvibyalo zvo nyuka ne hambu tisinya, kanilezvi sine vanhu lava va nga hava cifungo ca Nungungulu zvikandzeni* zvabye.+

5 A humbi yi no layiwa lezvaku yi nga va dayi, kanilezvi yi va xanisa a ntlhanu wa tihweti. A kubayisa ka yona ku wa fana ni loku ka hume+ loku yi lumile munhu. 6 Masikwini lawo, a vanhu va ta hlota kufa, kanilezvi va nga ta tshuka va ku kuma, va ta xuva kufa kanilezvi ku ta va tsutsuma.

7 A humbi leyi yi wa tshamisile ku khwatsi mahaxi ma longiselweko kulwa;+ tihlokweni ta yona ku wa hi ni zvilo zvo fana ni zvidlodlo* zva ouro, niku a tinghohe ta yona ti wa ku khwatsi tinghohe ta vanhu, 8 kanilezvi yi wa hi ni misisi yo fana ni misisi ya vavasati. A matino ya yona ma wa fana ni ya tinghala,+ 9 niku yi wa bohile zvikatawu zvo fana ni zvikatawu zva simbi. A guwa ga tipapa ta yona gi wa ku khwatsi i guwa ga tikareta ti kokiwako hi mahaxi ma tsutsumelako kulweni.+ 10 Ahandle ka lezvo, yi na ni midhoza* yi nga ni tivole a ku fana ni tihume; niku midhozeni ya yona hi kona ku nga ni ntamu wa yona wa ku xanisa a vanhu a ntlhanu wa tihweti.+ 11 Yi na ni hosi yi yi fumelako, yi nga ngilozi ya nkele wo eta wo kala magumo.+ Hi ciHebheru, a vito ga yona hi Abhadhoni,* kanilezvi hi ciGreki hi Apoliyoni.*

12 A khombo gin’we gi hundzile, kanilezvi kata makhombo man’wani ya mambiri+ andzhako ka zvilo lezvi.

13 A ngilozi ya wu 6+ yi noba a mpundzu wa yona.+ Ndzi nozwa gezu na gi huma ka timhondzo ta alati ga ouro+ gi nga mahlweni ka Nungungulu 14 gi byela a ngilozi ya wu 6 leyi yi nga hi ni mpundzu, giku: “Tlhatlha a mune wa tingilozi leti ti bohilweko congweni wa hombe wa Eufrate.”+ 15 Makunu a mune wa tingilozi leti ti longiselelweko a hora, ni siku, ni hweti, ni lembe, ti no tlhatlhiwa kasi ti daya a cipandze ca wunharu ca vanhu.

16 A ntsengo wa vakhileli va mahaxi wu wa hi 200 000 000; ndzi nozwa a ntsengo wabye. 17 Muwonisweni wa mina, a mahaxi ni vakhileli va wona ndzi va wonisile lezvi: Va wa bohile zvikatawu zva mivala yo pswhukisa ku khwatsi i ndzilo, ni azuli wo khwatsi i jakinte, ni amarela* wo khwatsi i solufa;* a tihloko ta mahaxi ti wa fana ni tihloko ta tinghala.+ Ku no huma ndzilo, ni musi, ni solufa hi lomu kanwini ka mahaxi. 18 A cipandze ca wunharu ca vanhu ci no dawa hi zvixaniso lezvi zva zvinharu: ndzilo ni musi ni solufa,* zvi humileko hi lomu kanwini ka mahaxi. 19 Hakuva a ntamu wa mahaxi wu lomu kanwini ka wona ni lomu midhozeni* ya wona, hakuva a midhoza ya wona yi fana ni tinyoka, niku yi na ni tihloko leti ma bayisako hi tona.

20 Kanilezvi a vanhu lava va nga kala ku dawa hi zvixaniso lezvi, a va ti solangi mitirweni ya mandla yabye; a va tsikangi ku khozela madhimoni ni zvifananiso zva ouro, ni zva prata, ni zva kobre, ni zva maribye, ni zva tisinya, zva ku a zvi woni, ne kuzwa, ne hambu ku famba.+ 21 A va ti solangi kudayeni kabye, ni mitirweni yabye ya wuloyi, ni wubhayini* gabye ni kuyiveni kabye.

10 Ndzi no wona a yin’wani ngilozi ya ntamu na yi relela hi le tilweni na yi ambele* refu; ku wa hi ni wura ga nyazimi hehla ka hloko ya yona. A nghohe ya yona yi wa fana ni gambo,+ niku a minenge* ya yona yi wa ku khwatsi mapilari* ya ndzilo. 2 Yi wa hi ni cibhukwana co songiwa canjeni ga yona ci nga tshambulutilwe. Yi no vekela nkondzo wa yona wa cinene hehla ka bimbi kanilezvi lowu wa cibhabha yi no wu vekela laha misaveni. 3 Yi no banguleka hi gezu ga hombe a ku khwatsi i nghala loku yi bhonga.+ A cikhati leci yi nga banguleka, a magezu ya 7 wa zvingwalangwandla+ ma no wulawula.

4 Makunu, a cikhati leci a 7 wa zvingwalangwandla zvi nga wulawula, ndzi wa lava ku tsala, kanilezvi ndzi nozwa a gezu hi le tilweni,+ giku: “Lema a timhaka leti ti wulilweko hi 7 wa zvingwalangwandla, u nga ti tsali.” 5 A ngilozi leyi ndzi nga yi wona na yi yimile bimbini ni laha misaveni yi no tlakusa a canja ga yona ga cinene tilweni, 6 yi hlambanya hi Loyi a hanyako kala kupindzuka ni kupindzuka,+ loyi a vangileko tilo ni lezvi zvi nga ka gona, ni misava ni lezvi zvi nga ka yona, ni bimbi ni lezvi zvi nga ka gona, yiku:+ “Ku nga ta ha hlweliwa kambe. 7 Kanilezvi masikwini lawa a ngilozi ya wu 7+ yi to lava kuba a mpundzu wa yona,+ hakunene ku ta tatiseka a cihundla co basa+ leci Nungungulu a ci kaneleko kota mahungu ya manene ka malandza yakwe, ku nga vaphrofeti.”+

8 Ndzi nozwa gezu hi le tilweni+ na gi wulawula kambe na mina, giku: “Famba u ya teka a bhuku go songiwa gi tshambulutilweko legi gi nga canjeni ga ngilozi leyi yi yimileko bimbini ni laha misaveni.”+ 9 Ndzi noya ka ngilozi ndzi ya yi byela lezvaku yi ndzi nyika a cibhukwana co songiwa. Yi te ngalo ka mina: “Teka uga,+ ci ta bavisa khwiri ga wena, kanilezvi lomu kanwini ka wena ci ta tsombela a ku fana ni wulombe.” 10 Ndzi no teka a cibhukwana co songiwa canjeni ga ngilozi ndziga.+ Lomu kanwini ka mina ci wa tsombela a ku fana ni wulombe,+ kanilezvi laha ndzi nga mbhetile kuga, a khwiri ga mina gi no bava. 11 Va no ndzi byela ku: “Phrofeta kambe xungetano hi vanhu, ni matiko, ni tirimi, ni tihosi to tala.”

11 Ndzi no nyikiwa a lihlanga lo fana ni nhonga*+ na a kari aku: “Suka u pima a wutshamu go basa ga tempeli ya Nungungulu, ni alati, ni lava va khozelako ka yona. 2 Kanilezvi a tsendzele* wa seno handle ka wutshamu go basa ga tempeli wu tsike, u nga wu pimi, hakuva wu nyikilwe a vamatiko. Va ta kandzihetela a dhoropa go basa+ a 42 wa tihweti.+ 3 Ndzi ta maha lezvaku a vakustumunyu va mina va vambiri va phrofeta a 1260 wa masiku na va bohile tisakwa.” 4 Va fananiswa ni tisinya timbiri ta maolivha,+ ni minenge yimbiri ya tikandiya,+ niku va yimile mahlweni ka Hosi ya misava.+

5 Loku a wokari a lava ku va bayisa, ku ta huma ndzilo hi lomu kanwini kabye wu lovisa a valala vabye. Loku a wokari a lava ku va bayisa, i ta dayiswa lezvo. 6 Va na ni ntamu wa ku vhala tilo+ kasi ku ngani vhula+ masikwini ya kuphrofeta kabye. Va na ni ntamu kambe wa ku cica mati ma maha nkhata+ ni kuba misava hi makhombo ya tixaka tontlhe, kota lezvi va zvi lavisako zvona.

7 Loku va mbhetile ku nyika wukustumunyu gabye, a civandza leci ci humako hi lomu nkeleni wo eta wo kala magumo ci talwa navo, ci va hlula, ci tlhela ci va daya.+ 8 A zvirumbi zvabye zvi ta ku chanjala laha ruweni ga hombe ga dhoropa ga hombe, legi hi ka moya gi vitaniwako ku i Sodhoma ni Gibhite, ku nga laha a Hosi yabye yonawu yi nga dayelwa kona mhandzeni. 9 A vanhu va mifumo, ni tixaka, ni tirimi, ni matiko va ta cuwuka zvirumbi zvabye hi masiku manharu ni khihlanya,+ va nga vhumeli lezvaku a zvirumbi zvabye zvi lahliwa. 10 Makunu lava va hanyako misaveni va ta tsaka hi kota yabye va giyagiya, va rumelelana zvinyikiwo, hakuva a vaphrofeti lava va vambiri va wa xanisa lava va hanyako misaveni.

11 Andzhako ka masiku lawa ya manharu ni khihlanya, a moya wa wutomi wu tako hi ka Nungungulu wu no nghena kabye,+ va suka va yima hi mikondzo yabye, niku lava va nga va wona va no khon’wa hi kuchava ka hombe. 12 Va nozwa gezu ga hombe hi le tilweni, giku kabye: “Kandzihani muta seno.” Va no tlakukela tilweni na va hi lomu ka refu, niku a valala vabye va no va wona.* 13 Ka hora leyo, ku nova ni kutsekatseka ka hombe ka misava, ku khungumuka a cipandze ca wukhume ca dhoropa; ku dawa 7000 wa vanhu hi kutsekatseka ka misava. Lava van’wani va no chava, va dhumisa Nungungulu wa le tilweni.

14 A khombo ga wumbiri+ gi hundzile, kanilezvi a khombo ga wunharu gata hi kuhatlisa!

15 A ngilozi ya wu 7 yi noba a mpundzu wa yona.+ Ku no zwala magezu ya hombe hi le tilweni, maku: “A mufumo wa misava wu mahile Mufumo wa Hosi ya hina+ na Kristu wakwe;+ i ta fuma kota hosi kala kupindzuka ni kupindzuka.”+

16 A 24 wa madhota+ lawa ma nga tshamile zvitshan’wini zva wona zva wuhosi mahlweni ka Nungungulu ma nowa hi tinghohe ma khozela Nungungulu, 17 maku: “Ha ku bonga wena Jehovha,* Nungungulu wa Ntamu Wontlhe, loyi a nga kona+ ni loyi a nga hi kona, hakuva u tekile a ntamu wa wena wa hombe, niku u sangulile ku fuma.+ 18 Kanilezvi a matiko ma no zangara, niku a zanga ya wena yi chikele, zvin’we ni cikhati ci yimisilweko ca ku lamula a vafileko ni ku chachazela+ a malandza ya wena, ku nga vaphrofeti,+ ni vobasa, ni lava va chavako a vito ga wena, a vatsongwani ni vahombe, ni ku lovisa lava va wonhako* misava.”+

19 Ku no vhululeka a wutshamu go basa ga tempeli ya Nungungulu le tilweni, ku woneka a arke ga civhumelwano cakwe na gi hi wutshan’wini go basa ga tempeli yakwe.+ Ku nova ni kuhatima, ku zwala magezu, ni zvingwalangwandla, ni kutsekatseka ka misava, kuwa maralala ya hombe.

12 Ku no woneka ciwoniso ca hombe le tilweni ca wasati+ a nga ambele gambo, na ku hi ni hweti lahasi ka mikondzo yakwe; hlokweni yakwe ku wa hi ni cidlodlo* ca 12 wa tinyeleti, 2 niku i wa hi ni nyimba. I wa kari a keta hi kuzwa kubayisa ka kulun’wa hakuva i wa lava ku pswala.

3 Ku no woneka a ciwoniso cin’wani le tilweni ca dragawu wo pswhukisa ku khwatsi i ndzilo,+ na a hi ni 7 wa tihloko ni 10 wa timhondzo ni 7 wa zvidlodlo* tihlokweni takwe. 4 A mudhoza* wakwe wu no hurumuxa a cipandze ca wunharu ca tinyeleti+ ta le tilweni a ti hoxa misaveni.+ Dragawu i no nyima a nga suki mahlweni ka wasati+ loyi a nga hi kusuhani ni ku pswala, kasi a khadamula n’wanana wakwe zvalezvi a to pswaliwa.

5 A wasati i no pswala a n’wana wa mufana+ loyi a to risa matiko wontlhe hi nhonga ya simbi.+ A n’wana wakwe i no wutliwa* aya ka Nungungulu ni le citshan’wini cakwe ca wuhosi. 6 A wasati i no tsutsuma aya ciwuleni, lomu ku nga ni wutshamu legi a longiselweko gona hi Nungungulu lezvaku a wundliwa kona a 1260 wa masiku.+

7 Ku no vhuka a yimpi le tilweni: Mikayeli*+ ni tingilozi takwe va nolwa na dragawu, dragawu yenawu alwa navo na a hi zvin’we ni tingilozi takwe, 8 kanilezvi a va hlulangi,* ne a va ha kumangi wutshamu le tilweni. 9 Hikwalaho, dragawu loyi wa hombe+ i no hoxiwa lahasi, a nyoka leyi ya kale,+ yi vitaniwako ku hi Dhiyabho+ ni Sathani,+ loyi a kanganyisako tiko gontlhe;+ i no hoxiwa lahasi misaveni,+ niku a tingilozi takwe ti no hoxiwa zvin’we naye. 10 Ndzi nozwa a gezu ga hombe hi le tilweni, giku:

“Makunu ku chikele a kuhanyiswa,+ ni ntamu, ni Mufumo wa Nungungulu wa hina,+ ni ntamu wa Kristu wakwe, hakuva a mulumbeti wa vamakabye va hina, loyi a va lumbetako mumu ni wusiku mahlweni ka Nungungulu i hoxilwe lahasi!+ 11 Va mu hlulile+ hi nkhata wa Yivhana+ ni mhaka ya wukustumunyu gabye;+ a va randzangi a mihefemulo* yabye+ hambu mahlweni ka kufa. 12 Hi cigelo leci, tsakani n’wina matilo na n’wina lava mu tshamako ka wona! Khombo ka n’wina misava ni bimbi,+ hakuva Dhiyabho i relele ka n’wina na a zangarile nguvhu hakuva wa zvi tiva lezvaku a cikhati leci ci nga mu salela ci tsongwani.”+

13 Makunu, laha dragawu a nga wona lezvaku i hoxilwe lahasi misaveni,+ i no xanisa a wasati+ loyi a nga pswalile a n’wana wa mufana. 14 Kanilezvi a wasati i no nyikiwa a tipapa timbiri ta gama ga hombe+ a fela ku puruma aya ciwuleni wutshan’wini gakwe, lomu a to wundliwa kona hi cikhati, ni zvikhati, ni khihlanya ga cikhati*+ na a hi kule ni nyoka.+

15 A nyoka yi no hlata mati hi lomu kanwini ma ku khwatsi i congo hi lendzhako ka wasati kasi a mbombomela lomu congweni. 16 Kanilezvi a misava yi no ta vhuna wasati, yi vhulula a nomu wa yona yi mita a congo lowu wu nga hlatiwa hi nomu wa dragawu. 17 Hikwalaho, dragawu i no zangarela wasati, a suka a yalwa ni lava va nga sele va pswalo* wa wasati,+ ku nga lava va ingisako a milayo ya Nungungulu na va hi ni ntiro wa ku nyika wukustumunyu ha Jesu.+

13 Dragawu i no yima laha ka misava ya bimbi.

Ndzi no wona civandza+ ca 10 wa timhondzo ni 7 wa tihloko na ci huma hi lomu bimbini.+ Ci wa bohile a 10 wa zvidlodlo* ka timhondzo ta cona, kanilezvi tihlokweni ta cona ci wa hi ni mavito ya tihlamba. 2 A civandza leci ndzi nga ci wona ci wa fana ni yingwe, kanilezvi a mikondzo ya cona yi wa fana ni ya urso, niku a nomu wa cona wu wa ku khwatsi i nomu wa nghala. Dragawu+ i no nyika civandza a ntamu wakwe, ni citshamu cakwe ca wuhosi, ni wuhosi ga hombe.+

3 Ndzi no wona lezvaku a yin’we ya tihloko ta cona yi wa ku khwatsi yi bayiselwe kufa, kanilezvi a cilondza ca yona ca hombe ci no hola,+ ni misava yontlhe yi no landzela a civandza na yi hlamala. 4 Va no khozela dragawu hi lezvi a nga ci nyika wuhosi a civandza, va tlhela va khozela a civandza hi magezu lawa: “Himani a fanako ni civandza, kona himani a zvi kotako kulwa naco ke?” 5 Ci no nyikiwa nomu wa ku wulawula zvilo zva matshandza ni tihlamba, ci nyikiwa ni ntamu wa ku tira a 42 wa tihweti.+ 6 Ci no vhulula nomu wa cona ci wulawula tihlamba+ hi Nungungulu ni ku rukatela a vito gakwe, ni wutshamu gakwe, hambu ni lava va hanyako tilweni.+ 7 Ci no vhumelelwa kulwa ni vobasa ci va hlula,+ ci tlhela ci nyikiwa ntamu hehla ka tontlhe tixaka, ni mifumo, ni tirimi, ni matiko. 8 Vontlhe lava va hanyako laha misaveni va ta ci khozela. Kusukela kuvangiweni ka tiko, i hava ni mun’we wabye loyi a vito gakwe gi tsalilweko bhukwini go songiwa ga wutomi+ ga Yivhana leyi yi nga dawa.+

9 Loyi a nga ni tindleve i wazwe.+ 10 Loku a munhu a fanele kuya wukhumbini, i taya wukhumbini. Loku a wokari a daya hi cipadha,* i ta dawa hi cipadha.+ Hi cigelo leco zvi lavako ku a vobasa+ vava ni kutimisela+ ni kukholwa.+

11 Ndzi no wona cin’wani civandza na ci huma hi lomu misaveni. Ci wa hi ni timhondzo timbiri to fana ni ta yivhana, kanilezvi ci no sangula ku wulawulisa ku khwatsi hi dragawu.+ 12 Ci fuma hi ntamu wontlhe wa civandza leci co sangula+ kuwoneni ka cona. Ci tlhela ci kurumeta a misava ni lava va hanyako ka yona lezvaku va khozela a civandza co sangula, leci a cilondza ca cona ca hombe ci holileko.+ 13 Ci maha zviwoniso zva hombe, ciza ci relelisa ni ndzilo hi le tilweni wuta laha misaveni kuwoneni ka vanhu.

14 Ci hambukisa lava va hanyako laha misaveni hi zviwoniso lezvi ci vhumelelweko ku maha kuwoneni ka civandza, na ci kari ci byela lava va hanyako laha misaveni lezvaku va ci mahela cifananiso+ a civandza leci ci nga tsemilwe hi cipadha, hambulezvo ci tlhela ci hanya.+ 15 Ci no vhumelelwa ku ci pupuxela a kuhefemula* a cifananiso kasi a cifananiso ca civandza ci fela ku wulawula ci tlhela ci dayisa vontlhe lava va alako ku khozela a cifananiso ca civandza.

16 Ci kurumeta a vanhu vontlhe — a vatsongwani ni vahombe, a zviganyi ni zvisiwana, a vatlhatlhekileko ni tikhumbi — lezvaku va vekiwa cifungo canjeni gabye ga cinene kutani zvikandzeni* zvabye,+ 17 ni lezvaku ku ngavi ni munhu a zvi kotako ku xava kutani ku xavisa, ahandle ka loyi a nga ni cifungo, ku nga vito+ ga civandza kutani numero ya vito ga cona.+ 18 A mhaka leyi yi lava wutlhari: Loyi a nga ni kupimisisa i wa hlayele a numero ya civandza, hakuva i numero ya munhu, niku a numero ya cona i 666.+

14 Ndzi no cuwuka ndzi wona a Yivhana+ na yi yimile Citsungeni ca Ziyoni,+ na yi hi ni 144 000+ lava va tsalilweko a vito ga yona ni vito ga Papayi wa yona+ zvikandzeni* zvabye. 2 Ndzi nozwa a guwa na gita hi le tilweni go fana ni guwa ga mati yo tala ni ku khwatsi kudzindza ka hombe. A guwa legi ndzi nga gizwa gi wa ku khwatsi ga vayimbeleli va bako a zvitende zvabye na va yimbelela. 3 Va wa yimbelela a lisimu lo khwatsi lisimu liswa+ mahlweni ka citshamu ca wuhosi ni mahlweni ka mune wa zvivangwa zvi hanyako+ ni ka madhota.+ I hava a nga zvi kota ku gondza a lisimu lelo la liswa, saseka lava va 144 000+ va xavilweko laha misaveni. 4 Lava hi vona va nga kala ku ti nyenyezisa hi vavasati; kunene va basile.*+ Hi vona va landzelako a Yivhana ni kwihi laha yi yako kona.+ Va xavilwe+ cikari ka vanhu kasi vava mihandzu yo sangula+ ka Nungungulu ni ka Yivhana; 5 ni kukanganyisa a ku kumiwangi minon’wini yabye. A va na cisolo.+

6 Ndzi no wona a yin’wani ngilozi na yi puruma cikari ka tilo,* na yi hi ni mahungu ya manene ya pindzukelwa kasi ku ma kanela ka lava va hanyako misaveni, ka wontlhe matiko ni tixaka ni tirimi ni mifumo.+ 7 Yi wa huwelela hi gezu ga hombe, yiku: “Chavani Nungungulu mu mu dhumisa, hakuva a cikhati cakwe ca ku lamula ci chikele.+ Hikwalaho, khozelani Loyi a nga maha tilo, ni misava, ni bimbi,+ ni zvibuka zva mati.”

8 Ku no landzela a ngilozi yin’wani ya wumbiri, na yiku: “I wile! I wile+ Bhabhuloni loyi wa Hombe,+ loyi a nwisileko a matiko wontlhe a vhinyo ya zanga ya wubhayi* gakwe!”+

9 Ku no landzela a yin’wani ngilozi, ya wunharu, na yi huwelela hi gezu ga hombe, yiku: “Loku a wokari a khozela a civandza+ ni cifananiso ca cona a tlhela a amukela a cifungo ca cona cikandzeni cakwe kutani canjeni gakwe,+ 10 i tanwa ni vhinyo ya cinyenye* ya zanga ya Nungungulu leyi yi chululiwako lomu ka kopo ya khulo Gakwe.+ I ta xanisiwa hi ndzilo ni solufa*+ kuwoneni ka tingilozi to basa ni kuwoneni ka Yivhana. 11 A musi wa kuxanisiwa kabye wu ta tuvika kala kupindzuka ni kupindzuka.+ Lava va khozelako a civandza ni cifananiso ca cona, zvin’we ni lava va amukelako a cifungo ca vito ga cona, a va na kuhumula, mumu ni wusiku.+ 12 Hi cigelo leco zvi lavako ku a vobasa,+ lava va hlayisako a zvileletelo zva Nungungulu ni ku khoma zvi tiya kukholweni+ ka Jesu, vava ni kutimisela.”

13 Ndzi nozwa gezu hi le tilweni, giku: “Tsala uku: Va tsaka a vafileko lava va felako Hosini+ kusukela zvezvi. Ina, a moya wu ngalo: Va wa humule mitirweni yabye yo ti tsitsirita, hakuva lezvi va mahileko zva va landzela.”*

14 Ndzi no cuwuka ndzi wona a refu go basa. Hehla ka gona ku wa tshamile munhu wo fana ni n’wana wa munhu,+ na a hi ni cidlodlo* ca ouro hlokweni yakwe, ni sikela* go kariha canjeni gakwe.

15 Ku no huma a yin’wani ngilozi hi wutshan’wini go basa ga tempeli, yi vitana hi gezu ga hombe loyi a nga tshamile hehla ka refu, yiku: “Nghenisa a sikela ga wena u tshovela, hakuva ci chikele a cikhati ca kutshovela, hakuva a timbewu ta misava ti buvhile ti mbhelela.”+ 16 Loyi a nga tshamile hehla ka refu i no nghenisa a sikela gakwe misaveni, niku a misava yi no tshovelwa.

17 Ku no huma a yin’wani ngilozi kambe hi wutshan’wini go basa ga tempeli leyi yi nga tilweni, niku yonawu yi wa hi ni sikela go kariha.

18 Ku no huma a yin’wani ngilozi kambe hi laha alatini yi nga hi ni ntamu wa ku fumela ndzilo. Yi no vitana hi gezu ga hombe loyi a nga hi ni sikela go kariha, yiku: “Nghenisa a sikela ga wena go kariha u hlengeletela a zvitata zva vhina* wa misava hakuva a mauvha ya wona ma buvhile.”+ 19 A ngilozi yi no nghenisa a sikela ga yona misaveni yi tshovela a vhina wa misava yi wu hoxela lomu cigowolweni ca hombe ca zanga ya Nungungulu.+ 20 A cigowolo ci no kamelwa lahandle ka dhoropa, ku huma a nkhata wo tala nguvhu hi lomu cigowolweni wu tlakuka kala wu chikela lomu ka matomu ya mahaxi, hi pfhuka wa 1600 wa maestadhio.*

15 Ndzi no wona cin’wani ciwoniso le tilweni, ca hombe ni co hlamalisa, ca 7 wa tingilozi+ ti nga hi ni 7 wa zvixaniso. Lezvi hi zvona zvo gumesa, hakuva ha zvona, a zanga ya Nungungulu yi ta chikela magumo.+

2 Ndzi no wona co khwatsi i bimbi ga vhidro+ gi patseneko ni ndzilo; lava va hlulileko+ a civandza ni cifananiso ca cona+ ni numero ya vito ga cona+ va wa yimile mbhirini ya bimbi ga vhidro, na va welele a zvitende zva Nungungulu. 3 Va wa yimbelela a lisimu la Mosi,+ a nandza ga Nungungulu, ni lisimu la Yivhana,+ vaku:

“A mitiro ya wena ya hombe niku ya hlamalisa,+ wena Jehovha* Nungungulu wa Ntamu Wontlhe.+ A tindlela ta wena ti lulamile niku ta lisine,+ wena Hosi ya pindzukelwa.+ 4 Himani loyi hakunene a to kala ku ku chava, wena Jehovha,* a nga dhumisi a vito ga wena ke? Hakuva hi wena wece u tsumbekileko.+ A matiko wontlhe ma tata ma ta khozela mahlweni ka wena,+ hakuva a milayo ya wena yo lulama yi tivisilwe.”

5 Andzhako ka lezvo, ndzi no wona a wutshamu go basa ga tenda ga wukustumunyu+ na gi vhululekile le tilweni,+ 6 ni 7 wa tingilozi ti nga hi ni 7 wa zvixaniso+ ti no huma hi wutshan’wini go basa, na ti bohile wukene* ga ginene ni go hatima ni mabhandi ya ouro zvifuveni zva tona. 7 A cin’we ca mune wa zvivangwa zvi hanyako ci no nyika a 7 wa tingilozi a 7 wa mingelo ya ouro yi nga tele hi zanga ya Nungungulu,+ loyi a hanyako kala kupindzuka ni kupindzuka. 8 A wutshamu go basa gi no tala hi musi hi kota ya kungangamela ka Nungungulu+ ni hi kota ya ntamu wakwe. A ku na munhu a nga zvi kota ku nghena wutshan’wini go basa kala ku mbhela a 7 wa zvixaniso+ zva 7 wa tingilozi.

16 Ndzi nozwa a gezu ga hombe na gi huma hi wutshan’wini go basa+ gi byela a 7 wa tingilozi, giku: “Fambani mu ya chulula a 7 wa mingelo ya zanga ya Nungungulu misaveni.”+

2 Leyi yo sangula yi no ya chulula a ngelo wa yona misaveni.+ Makunu ku no huma zvilondza zvo bayisa ni zvo biha+ ka vanhu lava va nga hi ni cifungo ca civandza+ ni lava va nga kari va khozela a cifananiso ca cona.+

3 Leyi ya wumbiri yi no chulula a ngelo wa yona lomu bimbini.+ A bimbi gi no cica gi maha nkhata+ wo khwatsi hi lowu wa munhu a fileko. A zvivangwa zvontlhe zvi hanyako* zvi nofa, ina, a zvilo zvi nga lomu bimbini.+

4 Leyi ya wunharu yi no chulula a ngelo wa yona lomu micongweni ni lomu zvibukeni zva mati.+ A mati ma no cica ma maha nkhata.+ 5 Ndzi nozwa a ngilozi ya mati, yiku: “Wena Loyi a nga kona, ni loyi a nga hi kona,+ Loyi a tsumbekileko,+ u lulamile hi lezvi u nga neha a kulamula loku,+ 6 hakuva vona va halatile a nkhata wa vobasa ni wa vaphrofeti,+ wena u va nyikile a nkhata lezvaku vanwa;+ lezvo zva va ringana.”+ 7 Ndzi nozwa a alati na giku: “Ina, Jehovha,* Nungungulu wa Ntamu Wontlhe,+ a kulamula ka wena* ka lisine niku ku lulamile.”+

8 Leyi ya wumune yi no chulula a ngelo wa yona ka gambo.+ A gambo gi no nyikiwa ntamu wa ku tlahula vanhu hi ndzilo. 9 Makunu a vanhu va no tlahuliwa hi kuhisa ka hombe, kanilezvi va no rukatela a vito ga Nungungulu, loyi a nga ni ntamu hehla ka zvixaniso lezvi. A va ti solangi va mu dhumisa.

10 Leyi ya wuntlhanu yi no chulula a ngelo wa yona hehla ka citshamu ca wuhosi ca civandza. A mufumo wa cona wu nova munyama,+ va sangula ku ti luma tirimi tabye hi kuzwa kubayisa, 11 kanilezvi va no rukatela a Nungungulu wa tilo hi kuzwa kubayisa ni kuzwa zvilondza, hambulezvo a va ti solangi mitirweni yabye.

12 Leyi ya wu 6 yi no chulula a ngelo wa yona lomu congweni wa hombe wa Eufrate,+ niku a mati ya wona ma nopswha+ kasi ku longiselwa ndlela ya tihosi+ ta le mutsuwuka-gambo.

13 Makunu ndzi no wona a magezu manharu yo biha ma pimisilweko* yo khwatsi makhele na ma huma hi non’wini wa dragawu,+ ni non’wini wa civandza, ni non’wini wa muphrofeti wa mawunwa. 14 Kunene, lawa magezu ma pimisilweko hi madhimoni niku ma maha zviwoniso.+ Ma huma maya ka tihosi ta misava yontlhe ma ya ti tlhanganisela yimpi+ ya siku ga hombe ga Nungungulu wa Ntamu Wontlhe.+

15 “Ndzata kota khamba.+ Wa tsaka loyi a tshamako na a khindlimukile+ na a bohile* tinguwo takwe, kasi a nga fambi na a hi cimbyiri a vanhu va wona a tingana takwe.”+

16 Yi no ti tlhanganisa ka wutshamu legi hi ciHebheru gi vitaniwako ku i Armagedhoni.*+

17 Leyi ya wu 7 yi no chulula a ngelo wa yona laha moyeni. Zvalezvo ku no huma a gezu ga hombe hi ka wutshamu go basa+ hi le citshan’wini ca wuhosi, giku: “Zvi mbhelile!” 18 Ku nova ni kuhatima ka zvingwalangwandla, ni magezu, ni kudzindza, ni kutsekatseka ka hombe ka misava ka ku a ku se tshuka ku maheka cima ku vangiwa munhu laha misaveni.+ Kunene, a kutsekatseka loko ka misava ku wa hi ka hombe nguvhu! 19 A dhoropa ga hombe+ gi no avanyeka hi zvipandze zvinharu, ku khungumuka ni madhoropa ya vamatiko; Nungungulu i no alakanya Bhabhuloni loyi wa Hombe,+ kasi a mu nwisa a kopo ya vhinyo ya khulo ga zanga yakwe.+ 20 Ahandle ka lezvo, a zvihlale* zvontlhe zvi no tsutsuma, ni zvitsunga a zva ha kumiwangi.+ 21 Andzhako ka lezvo, ku nowa maralala ya hombe hi le tilweni, lawa a gin’we ni gin’we gi nga peza a cipimo ca talenta,* ma wela vanhu.+ A vanhu va no rukatela Nungungulu hi kota ya khombo ga maralala,+ hakuva a khombo lego gi wa hi ga hombe nguvhu.

17 A yin’we ya tingilozi leti ta 7 ti nga hi ni 7 wa mingelo+ yi nota ka mina yi taku: “Tana ndzi ta ku komba a kulamulwa ka cibhayi leci ca hombe ci tshamileko hehla ka mati yo tala,+ 2 leci a tihosi ta misava ti mahileko wubhayi*+ naco, ni leci a vaaki va misava va popilweko hi vhinyo ya wubhayi* ga cona.”+

3 Yi no ndzi teka ntan’wini wa moya yi ndzi yisa ciwuleni. Ndzi no wona a wasati na a tshamile hehla ka civandza co pswhuka ci nga tele hi mavito ya tihlamba, leci ci nga hi ni 7 wa tihloko ni 10 wa timhondzo. 4 A wasati loye i wa bohile tinguwo to pswhuka+ ni to pswhukisa kuzvirila, na a ti sasekisele hi ouro ni maribye ya lisima ni maperola.+ Canjeni gakwe, i wa hi ni kopo ya ouro yi nga tele hi zvilo zvo nyenyeza ni zvilo zva chaka zva wubhayi* gakwe. 5 Cikandzeni cakwe, i wa tsalilwe a vito ga fihlakalo, gaku: “Bhabhuloni loyi wa Hombe, a mamani wa zvibhayi+ ni wa zvilo zvo nyenyeza zva laha misaveni.”+ 6 Ndzi no wona lezvaku a wasati i wa popilwe hi nkhata wa vobasa ni nkhata wa vakustumunyu va Jesu.+

Laha ndzi nga mu wona, ndzi no hlamala nguvhu. 7 Hikwalaho, a ngilozi yi te ngalo ka mina: “U hlamalela yini? Ndzi ta ku byela a fihlakalo wa wasati+ ni wa civandza leci a ci khileleko ci nga ni 7 wa tihloko ni 10 wa timhondzo:+ 8 A civandza leci u nga ci wona ci wa hi kona, kanilezvi a ca ha hi kona, hambulezvo ci kusuhani ni ku huma hi nkeleni wo eta wo kala magumo,+ niku ciya kulovisweni. A vaaki va misava — lava a mavito yabye ma nga kala ku tsaliwa bhukwini go songiwa ga wutomi+ kusukela kuvangiweni ka tiko — va ta hlamala hi ku wona civandza, hakuva ci wa hi kona, kanilezvi a ca ha hi kona, hambulezvo ci ta tlhela civa kona.

9 “A mhaka leyi yi lava kupima ku nga ni wutlhari:* A 7 wa tihloko+ ti yimela a 7 wa zvitsunga lezvi a wasati a tshamileko hehla ka zvona. 10 Ku na ni 7 wa tihosi: a ntlhanu ti wile, a yin’we yi kona, leyi yin’wani a yi se chikela; kanilezvi a cikhati leci yi to chikela, yi ta tshama cikhatana basi. 11 A civandza leci ci nga hi kona, kanilezvi ci kalako ci nga ha hi kona,+ cona kambe i hosi ya wu 8, kanilezvi yi huma hi ka leti ta 7, niku yiya kulovisweni.

12 “A 10 wa timhondzo leti u nga ti wona ti yimela a 10 wa tihosi leti ti kalako ti nga se amukela a mufumo, kanilezvi ti amukela ntamu kota tihosi hi hora yin’we zvin’we ni civandza. 13 Ti na ni kupima kun’we, hikwalaho ti nyika civandza a ntamu wa tona ni wuhosi. 14 Ti talwa ni Yivhana,+ kanilezvi kota lezvi yi nga Hosi ya tihosi ni Mufumeli wa vafumeli,+ a Yivhana yi ta ti hlula.+ Lava va nga zvin’we nayo, ku nga lava va vitanilweko ni va hlawulilweko ni vo tsumbeka, vonawu va ta hlula.”+

15 Yi te ngalo ka mina: “A mati lawa u nga ma wona, lawa a cibhayi ci tshamileko hehla ka wona, ma yimela mifumo, ni zvitshungu, ni matiko, ni tirimi.+ 16 A 10 wa timhondzo+ leti u nga ti wona, ni civandza,+ zvi ta venga a cibhayi+ zvi ci phanga zvi ci maha cimbyiri. Va taga a nyama ya cona va tlhela va ci hisa ndzilweni ciswa ci ku bhi.+ 17 Hakuva Nungungulu i chelile timbilwini tabye a ku maha maalakanyo yakwe,+ ina, a ku maha maalakanyo yabye ya man’we, hi ku nyikela a mufumo wabye ka civandza,+ kala a magezu ya Nungungulu ma tatiseka. 18 A wasati+ loyi u nga mu wona i yimela a dhoropa ga hombe legi gi nga ni mufumo hehla ka tihosi ta misava.”

18 Andzhako ka lezvo, ndzi no wona a yin’wani ngilozi na yi relela hi le tilweni na yi hi ni ntamu wa hombe, ni misava yi no woningelwa hi kungangamela ka yona. 2 Yi no banguleka hi gezu ga hombe, yiku: “I wile! I wile Bhabhuloni loyi wa Hombe;+ i cicile ava wutshamu ga madhimoni ni wutumbelo ga mimoya yontlhe ya kubiha* ni ga zvinyanyani zvontlhe zvo kala ku hlazveka ni zvi nyenyiwako!+ 3 Hakuva a matiko wontlhe+ ma nwile a vhinyo ya zanga ya wubhayi* gakwe; a tihosi ta misava ti mahile wubhayi naye,+ niku a vaxavisi* va laha misaveni va ganyisilwe hi titshomba takwe ta talela ga cima leti a ti hlengeletileko na a nga hi na tingana.”

4 Ndzi nozwa a gin’wani gezu na gi huma hi le tilweni, giku: “Humani ka yena, n’wina vanhu va mina,+ loku mu nga lavi ku hlengela naye zviwonhweni zvakwe, ni loku mu nga lavi ku biwa hi zvixaniso zvakwe.+ 5 Hakuva a zviwonho zvakwe zvi tlhatekelene kala tilweni,+ na Nungungulu i alakanyile a mitiro yakwe yi nga lulamangiko.+ 6 Mu tlheliseleni a kubiha loku a nga mahela van’wani,+ ina, mu tlheliseleni kumbiri lezvi a zvi mahileko;+ ka kopo+ leyi a nga dhungela ka yona, mu dhungeleleni kumbiri.+ 7 Ka lipimo leli a nga ti dhumisa ha lona ni ku ti tsakisa nyameni hi titshomba takwe na a nga hi na tingana, mu nyikeni kuxaniseka ni hlomulo hi lipimo lelo. Hakuva i wula lezvi mbilwini yakwe: ‘Ndzi tshamile kota muzindza,* a ndzi noni,* cima ndzi nga ta wona hlomulo.’+ 8 Hi cigelo leco, a zvixaniso zvakwe zvi tata hi siku gin’we: a kufa, ni hlomulo, ni ndlala. I ta hisiwa hi ndzilo+ aswa a ku bhi, hakuva Jehovha* Nungungulu, loyi a mu lamulako, i na ni ntamu.+

9 “A tihosi ta misava, leti ti mahileko wubhayi* naye ni ku hanya naye titshombeni takwe leti a ti hlengeleteleko na a nga hi na tingana, ti ta mu rilela ti tiba zvifuva laha ti to wona a musi wa kuswa kakwe. 10 Ti ta yima hi le kule hi ku chava a kuxanisiwa kakwe, tiku: ‘Yowe, yowe, wena dhoropa ga hombe,+ wena Bhabhuloni, a dhoropa legi ga ntamu, hakuva a kulamulwa ka wena ku chikele hi hora yin’we!’

11 “Ahandle ka lezvo, a vaxavisi va laha misaveni va rila va tlhela va maha hlomulo hi kota ya yena, hakuva a ka ha hi na munhu wa ku xava a zvilo zvabye zvontlhe: 12 a nhundzu yontlhe ya ouro, ni prata, ni maribye ya lisima, ni maperola, ni wukene* ga ginene, ni tinguwo to pswhuka, ni sedha, ni tinguwo to pswhukisa kuzvirila; ni zvontlhe zvo vatliwa hi mapulangu yo nuhela; ni zvilo zva tixaka tontlhe zvo mahiwa hi matino ya tindlovhu, ni zva mapulangu ya manene, ni zva kobre, ni zva simbi, ni zva marmore; 13 ni kanela,* ni titempero ta India, ni libani, ni mafura yo nuhela, ni hlakati yo nuhela, ni vhinyo, ni mafura ya olivha, ni mapa ma sililweko khwatsi, ni trigo, ni tihomu, ni tiyivhu, ni mahaxi, ni tikareta, ni tikhumbi, ni mihefemulo* ya vanhu. 14 Ina, a mihandzu ya yinene leyi u* nga yi dokolokela yi sukile ka wena, niku a mafanjara wontlhe ni zviphatiphati zvi ku mbhelele, zvi nga ta ha kumiwa kambe.

15 “Lava va nga kari va xavisa a zvilo lezvi, lava va ganyisilweko hi yena, va ta yima hi le kule hi ku chava a kuxanisiwa kakwe niku va ta rila va tlhela va maha hlomulo, 16 vaku: ‘Yowe, yowe, wena dhoropa ga hombe, u bohileko a tinguwo ta wukene ga ginene, ni tinguwo to pswhuka, ni tinguwo to pswhukisa kuzvirila, u sasekiselweko nguvhu hi zvilo zva ouro, ni zva maribye ya lisima, ni maperola,+ 17 hakuva, hi hora yin’we, a titshomba leto to tala ti no phangiwa!’

“Ni vamarinyero vontlhe lava va tihosana, ni vontlhe lava va fambako hi zvitimela,* ni vamarinyero, ni vontlhe lava va hanyako hi bimbi, va no yima hi le kule 18 va rila hi ku wona a musi wa kuswa kakwe, vaku: ‘Hi gihi dhoropa gi fanako ni dhoropa ga hombe ke?’ 19 Va no ti paletela ntshuri tihlokweni tabye vaba tihuwa va rila va tlhela va maha hlomulo, vaku: ‘Yowe, yowe, wena dhoropa ga hombe, legi vontlhe lava va nga hi ni zvitimela bimbini va nga ganya hi titshomba ta gona, hakuva gi hahlulilwe hi hora yin’we!’+

20 “Tsaka hi kota ya yena, wena tilo,+ na n’wina vobasa,+ ni vapostoli, ni vaphrofeti, hakuva Nungungulu i ci lamulile hi kota ya n’wina!”+

21 Makunu a ngilozi ya ntamu yi no tlakula a ribye go fana ni ribye ga hombe ga cigayo yi gi hoxela lomu bimbini, yiku: “Hi ndlela leyi, hi kuhoxela ka cihatla, Bhabhuloni, a dhoropa legi ga hombe, i ta hoxiswa lezvi aya hasi, niku a nga ta ha kumiwa kambe.+ 22 Ku nga ta ha zwala kambe ka wena a guwa ga vayimbeleli va bako a zvitende zvabye, ne guwa ga vachayi, ne ga vabi va zvitoliya ne ga vabi va mimpundzu. Ku nga ta ha kumiwa kambe ka wena a meseri wa ni wihi ntiro, ne hambu a guwa ga cigayo gi nga ta ha zwala kambe ka wena. 23 A kuwonekela ka kandiya ku nga ta ha tshuka ku woninga kambe ka wena, ne hambu a gezu ga noivho ni ga noivha gi nga ta ha tshuka gi zwala kambe ka wena; hakuva a vaxavisi va wena va wa hi zviganyi zva hombe zva laha misaveni, niku u hambukisile a matiko wontlhe hi wuloyi ga wena.+ 24 Ina, ku kumilwe ka yena a nkhata wa vaphrofeti, ni wa vobasa,+ ni wa vontlhe lava va delweko laha misaveni.”+

19 Andzhako ka lezvo, ndzi nozwa co khwatsi i gezu ga hombe ga citshungu ca hombe le tilweni, giku: “Dhumisani Jah!*+ A kuhanyisa ni kungangamela ni ntamu zvi lumba Nungungulu wa hina, 2 hakuva a kulamula kakwe lisine niku ku lulamile.+ Hakuva i lamulile a cibhayi leci ca hombe ci nga wonha a misava hi wubhayi* ga cona niku i photele a nkhata wa malandza yakwe lowu wu nga canjeni ga cona.”+ 3 Zvalezvo va no engeta hi khati ga wumbiri, vaku: “Dhumisani Jah!*+ Ni musi wa cona wu ta simama ku tuvika kala kupindzuka ni kupindzuka.”+

4 A 24 wa madhota+ ni mune wa zvivangwa zvi hanyako+ va nowa lahasi va khozela Nungungulu loyi a tshamileko citshan’wini ca wuhosi, vaku: “Amen! Dhumisani Jah!”*+

5 Ku no zwala a gezu kambe na gi huma hi citshan’wini ca wuhosi, giku: “Dhumisani a Nungungulu wa hina, n’wina n’wentlhe malandza yakwe,+ n’wina lava mu mu chavako, a vatsongwani ni vahombe.”+

6 Ndzi nozwa a guwa go khwatsi i gezu ga citshungu ca hombe ni go khwatsi ga mati yo tala ni go khwatsi ga kudzindza ka hombe, giku: “Dhumisani Jah,*+ hakuva Jehovha,* a Nungungulu wa hina wa Ntamu Wontlhe,+ i sangulile ku fuma!+ 7 A hi tsakeni hi nengela hi tlhela hi mu dzundza hakuva a muchadho wa Yivhana wu chikele, ni sati wa yona i ti longisele. 8 Ina, i nyikilwe ku boha tinguwo ta wukene* ga ginene, go phatima, gi nga solekiko, hakuva a wukene ga ginene gi yimela a mitiro yo lulama ya vobasa.”+

9 Yi te ngalo ka mina: “Tsala uku: Va tsaka lava va rambilweko mubuzweni wa muchadho wa Yivhana.”+ Yi no engeta yi ndzi byela, yiku: “Leti timhaka ta lisine ta Nungungulu.” 10 Makunu ndzi nowa lahasi mahlweni ka mikondzo ya yona kasi ndzi yi khozela. Kanilezvi yi te ngalo ka mina: “Ti wonele! U nga mahi lezvo!+ Ndzi nandza a ku fana na wena ni vamakabye va wena lava va nga ni ntiro wa ku nyika wukustumunyu ha Jesu.+ Khozela Nungungulu!+ Hakuva a kungo ga zviphrofeto ku kustumunya hi Jesu.”+

11 Ndzi no cuwuka ndzi wona a tilo na gi vhululekile, ku woneka a haxi go basa.+ Loyi a nga gi khilele i vitaniwa ku hi Kutsumbeka+ ni Lisine;+ wa lamula, alwa yimpi hi kululama.+ 12 A matihlo yakwe i langavi gi vhurako,+ niku i na ni zvidlodlo* zvo tala hlokweni yakwe. I na ni vito gi tsalilweko, legi ku nga hiko na munhu a gi tivako, saseka yena n’winyi. 13 I bohile nguwo yi totelweko* nkhata; i vitaniwa ku i Gezu+ ga Nungungulu. 14 Ahandle ka lezvo, i wa landzelwa hi mabutho ya le tilweni ma bohileko tinguwo ta wukene* ga ginene, go basa, gi nga solekiko na ma khilele mahaxi yo basa. 15 Hi non’wini wakwe, ku no huma a cipadha co leha,+ co kariha, kasi aba hi cona a matiko niku i ta ma risa hi nhonga ya simbi.+ Ahandle ka lezvo, i ta kamela cigowolweni ca vhinyo ya zanga yi tshisako ya Nungungulu wa Ntamu Wontlhe.+ 16 Nguweni yakwe, hi laha ciwunwini, ku tsalilwe a vito gaku: Hosi ya tihosi ni Mufumeli wa vafumeli.+

17 Ndzi no wona a ngilozi kambe na yi yimile laha ka gambo, yi banguleka hi gezu ga hombe ka zvinyanyani zvontlhe zvi purumako cikari ka tilo,* yiku: “Tanani seno mu ta hlengeletana mubuzweni wa hombe wa Nungungulu,+ 18 mu taga a nyama ya tihosi, ni nyama ya vakomandante va masochwa, ni nyama ya lava va ntamu,+ ni nyama ya mahaxi ni ya lava va ma khileleko,+ ni nyama ya vontlhe, a vatlhatlhekileko ni tikhumbi, a vatsongwani ni vahombe.”

19 Ndzi no wona a civandza ni tihosi ta misava ni mabutho yabye na va hlengeletene kasi kulwa yimpi ni loyi a khileleko haxi, ni butho gakwe.+ 20 A civandza ci no khon’wa zvin’we ni muphrofeti wa mawunwa,+ loyi a nga kari a maha zviwoniso phambeni ka cona, a hambukisa hi zvona lava va nga amukela a cifungo ca civandza+ ni lava va nga khozela a cifananiso ca cona.+ Hi wumbiri gabye, va no hoxiwa na va ha hanya tiveni ga ndzilo, legi gi vhurako hi solufa.*+ 21 Kanilezvi lava van’wani va no dawa hi cipadha co leha leci ci nga huma hi lomu non’wini wa loyi a khileleko haxi.+ Ni zvinyanyani zvontlhe zvi no xura hi nyama yabye.+

20 Ndzi no wona a ngilozi na yi relela hi le tilweni na yi hi ni khiya ga nkele wo eta wo kala magumo+ ni chini ga hombe canjeni ga yona. 2 Yi no khoma dragawu,+ a nyoka leyi ya kale,+ a nga Dhiyabho+ ni Sathani,+ yi mu boha a 1000 wa malembe. 3 Yi no mu hoxa nkeleni wo eta wo kala magumo+ yi wu vhala yi tlhela yi wu tiyisa hi cifungo kasi a nga ha kanganyisi matiko kala ku mbhela a 1000 wa malembe. Andzhako ka lezvo, i ta tlhatlhiwa zva cikhatana.+

4 Ndzi no wona a zvitshamu zva wuhosi, niku lava va nga tshamile ka zvona va no nyikiwa ntamu wa ku lamula. Ina, ndzi no wona a mihefemulo* ya lava va nga dawa* hi ku nyika wukustumunyu ha Jesu ni ku wulawula hi Nungungulu, ni lava va nga kala ku khozela civandza kutani cifananiso ca cona ne ku amukela cifungo zvikandzeni zvabye ni canjeni gabye.+ Va no tlhela va hanya, va fuma zvin’we na Kristu+ a 1000 wa malembe. 5 (Lava van’wani va nga file+ a va vhukangi kala ku mbhela a 1000 wa malembe.) Loku hi kona a kuvhuka ko sangula.+ 6 Wa tsaka niku i basile loyi a nga ni ciavelo kuvhukeni ko sangula;+ hehla kabye a kufa ka wumbiri+ a ku na ntamu,+ kanilezvi va tava vapristi+ va Nungungulu ni va Kristu, niku va ta fuma zvin’we naye a 1000 wa malembe.+

7 Zvalezvi a 1000 wa malembe ma to mbhela, Sathani i ta tlhatlhiwa paxweni gakwe. 8 I ta huma a ya kanganyisa matiko ka mune wa makhona ya misava — ku nga Goge na Magoge — a va hlengeleta kasi kulwa. A ntsengo wabye wu fana ni misava ya bimbi. 9 Va no hangalaka misaveni yontlhe va ya randzela a wugovelo ga vobasa ni dhoropa go randzeka. Kanilezvi ku no relela ndzilo hi le tilweni wu ta va hisa va ku bhi.+ 10 Dhiyabho, loyi a nga kari a va kanganyisa, i no hoxiwa tiveni ga ndzilo ni solufa,* ku nga lomu a civandza+ ni muphrofeti wa mawunwa va sinako va hi kona;+ va ta xanisiwa* mumu ni wusiku, kala kupindzuka ni kupindzuka.

11 Ndzi no wona a citshamu ca hombe ca wuhosi co basa ni Loyi a tshamileko ka cona.+ A misava ni tilo zvi no tsutsuma mahlweni kakwe;+ a zva ha kumelwangi wutshamu. 12 Ndzi no wona vafileko, a vahombe ni vatsongwani, na va yimile mahlweni ka citshamu ca wuhosi, ku vhululiwa mabhuku yo songiwa. Kanilezvi ku no vhululiwa a gin’wani bhuku go songiwa, gi nga bhuku go songiwa ga wutomi.+ A vafileko va no lamuliwa hi lezvi zvi tsalilweko mabhukwini yo songiwa hi kuya hi mitiro yabye.+ 13 A bimbi gi no nyikela a vafileko lava va nga hi ka gona, niku a kufa ni Cilahla* zvonawu zvi no nyikela a vafileko lava va nga hi ka zvona; a mun’we ni mun’we i no lamuliwa hi kuya hi mitiro yakwe.+ 14 A kufa ni Cilahla* zvi no hoxiwa tiveni ga ndzilo.+ A tiva ga ndzilo+ gi yimela a kufa ka wumbiri.+ 15 Ahandle ka lezvo, ni wihi loyi a nga kala a nga tsaliwangi bhukwini ga wutomi+ i no hoxiwa tiveni ga ndzilo.+

21 Ndzi no wona a tilo giswa ni misava yiswa,+ hakuva a tilo ga kale ni misava ya kale zvi wa hundzile,+ ni bimbi+ gi wa nga ha hi kona. 2 Ndzi no wona ni dhoropa go basa, ku nga Jerusalema giswa, na gi relela hi le tilweni, hi ka Nungungulu,+ na gi longiselwe kota noivha yi sasekiselweko nuna wa yona.+ 3 Makunu ndzi nozwa a gezu ga hombe na gi huma citshan’wini ca wuhosi, giku: “Wonani! A tenda ga Nungungulu gi cikari ka vanhu. I ta tshama zvin’we navo, vona va tava vanhu vakwe. Nungungulu wutsumbu i tava zvin’we navo.+ 4 I ta kulula mihloti yontlhe matihlweni yabye;+ ku nga ta hava ni kufa,+ hambu ni hlomulo,* kutani kurila, ne kubayisa.+ A zvilo zva kale zvi hundzile.”

5 Loyi a tshamileko citshan’wini ca wuhosi+ i te: “Hi nga wona! Ndzi maha zvilo zvontlhe zviva zviswa.”+ A tlhela aku: “Tsala hakuva a timhaka leti ti tsumbekile niku lisine.” 6 I te ngalo ka mina: “Zvi mbhelile! Hi mina Alfa na Omega,* a masangulo ni magumo.+ Ni wihi loyi a zwako tora ndzi ta mu nyika a kuva anwa cibukeni ca mati ya wutomi mahala.+ 7 Ni wihi loyi a hlulako i taga tshomba ya zvilo lezvi, mina ndzi tava Nungungulu wakwe, yena ava n’wana wa mina. 8 Kanilezvi a matoya, ni vangakholwiko,+ ni lava va manyala chakeni gabye, ni vadayi,+ ni zvibhayi,*+ ni valoyi,* ni vakhozeli va zvifananiso, ni vontlhe vahembi+ va ta kuma ciavelo cabye tiveni gi vhurako ndzilo ni solufa.*+ Loku hi kona a kufa ka wumbiri.”+

9 A yin’we ya 7 wa tingilozi leti ti nga hi ni 7 wa mingelo yi nga tele hi 7 wa zvixaniso lezvi zvo gumesa,+ yi nota ka mina, yi taku: “Tana ndzi ta ku komba a noivha, a sati wa Yivhana.”+ 10 Hikwalaho, yi no ndzi teka ntan’wini wa moya yi ndzi yisa citsungeni ca hombe co leha, yi ya ndzi komba a dhoropa go basa ga Jerusalema na gi relela hi le tilweni, hi ka Nungungulu,+ 11 na gi hi ni kungangamela ka Nungungulu.+ A kuhatima ka gona ku wa ku khwatsi hi loku ka ribye ga lisima ku hundza wontlhe, a ku khwatsi i ribye ga jasperi gi vangamelako ku khwatsi i kristali.+ 12 Gi wa hi ni muro wa hombe wo tlakuka, ni 12 wa tinyangwa, ni 12 wa tingilozi lomu tinyangweni ta gona. Lomu tinyangweni ku wa tsalilwe mavito ya 12 wa tixaka ta vana va Izrayeli. 13 Hi tlhelo ga mutsuwuka-gambo ku wa hi ni tinyangwa tinharu, hi tlhelo ga n’walungu* ku wa hi ni tinyangwa tinharu, hi tlhelo ga dzonga* ku wa hi ni tinyangwa tinharu, ni tlhelweni ga mupela-gambo ku wa hi ni tinyangwa tinharu.+ 14 A muro wa dhoropa wonawu wu wa hi ni 12 wa maribye ya ciseketelo, niku hehla ka wona ku wa hi ni 12 wa mavito ya 12 wa vapostoli+ va Yivhana.

15 Loyi a nga kari a wulawula na mina i wa khomile a lihlanga la ouro kota lipimo kasi a pima dhoropa ni tinyangwa ta gona ni muro wa gona.+ 16 A dhoropa gi wa hi kwadradho, a kuleha ka gona ku wa ringana ni kuanama ga gona. I no pima a dhoropa hi lihlanga a kuma a 12 000 wa maestadhio.* A kuleha ka gona ni kuanama ni kutlakuka zvi wa ringana. 17 I no pima ni muro wa gona a kuma a 144 wa mikono* hi kuya hi lipimo la munhu, leli kambe li nga lipimo la ngilozi. 18 A muro wu wa akilwe hi jasperi,+ niku a dhoropa gi wa hi ga ouro yi hlutilweko khwatsi yi fana ni vhidro go vangamela. 19 A zviseketelo zva muro wa dhoropa zvi wa sasekiselwe hi maribye ya lisima ya tixaka tontlhe: a ciseketelo co sangula ci wa hi ca jasperi, a ca wumbiri ci wa hi ca safira, a ca wunharu ci wa hi ca kalkedhoni, a ca wumune ci wa hi ca esmeraldha, 20 a ca wuntlhanu ci wa hi ca sardhoni, a ca wu 6 ci wa hi ca sardhisi, a ca wu 7 ci wa hi ca krizolite, a ca wu 8 ci wa hi ca bherile, a ca wu 9 ci wa hi ca topazi, a ca wu 10 ci wa hi ca krisoprase, a ca wu 11 ci wa hi ca jakinte, ni ca wu 12 ci wa hi ca ametista. 21 A cin’wani kambe, a 12 wa tinyangwa ti wa hi 12 wa maperola; a nyangwa yin’we ni yin’wani yi wa mahilwe hi perola gin’we. A ruwa ga hombe ga dhoropa gi wa hi ga ouro yi hlutilweko khwatsi, a ku fana ni vhidro go vangamela.

22 A ndzi wonangi tempeli ndzeni ka gona, hakuva Jehovha* Nungungulu wa Ntamu Wontlhe+ hi yena tempeli ya gona, zvin’we ni Yivhana yonawu. 23 A dhoropa legi a gi lavi gambo ne hweti kasi ku gi woningela, hakuva gi woningelwa hi kungangamela ka Nungungulu,+ niku a kandiya ya gona i Yivhana.+ 24 A matiko ma ta famba kuwonekeleni ka gona,+ ni tihosi ta misava ti ta neha kungangamela ka tona ka gona. 25 A tinyangwa ta gona ti nga ta tshuka ti vhaliwa laha hlikanhini, hakuva laho ku nga tava ni wusiku.+ 26 Ku ta nehiwa a kungangamela ni wudzundzo ga matiko ka gona.+ 27 Kanilezvi ni cihi ci nyenyezisilweko ni loyi a mahako mitiro ya manyala ni ya kukhohlisa a nga ta tshuka a nghena ndzeni ka gona;+ ntsena lava va tsalilweko bhukwini go songiwa ga wutomi ga Yivhana hi vona va to nghena.+

22 A ngilozi yi no ndzi komba a congo wa mati ya wutomi+ yo basa a ku khwatsi i kristali, na wu huma hi citshan’wini ca wuhosi ca Nungungulu ni ca Yivhana+ 2 wu khulunga hi laha cikari ka ruwa ga hombe ga dhoropa. Matlhelweni mambiri ya congo ku wa hi ni tisinya ta wutomi ti nga pswala mihandzu a 12 wa makhati hi lembe, hweti ni hweti. A matluka ya tisinya leto ma wa tirela a ku hanyisa matiko.+

3 Ku nga ta hava ni ciruko kambe. Kanilezvi a citshamu ca wuhosi ca Nungungulu ni ca Yivhana+ zvi tava dhoropeni, niku a malandza yakwe ma ta mu mahela a ntiro wo basa. 4 Ma ta wona a nghohe yakwe,+ niku a vito gakwe gi tava zvikandzeni* zvabye.+ 5 A wusiku gi nga ta hava kona kambe,+ va nga ta ha lava a kuwonekela ka kandiya ne ka gambo hakuva Jehovha* Nungungulu i ta va woningela;+ vona va ta fuma kota tihosi kala kupindzuka ni kupindzuka.+

6 A ngilozi yi te ngalo ka mina: “A timhaka leti ti tsumbekile niku lisine;+ ina, Jehovha,* a Nungungulu loyi a pimiseleko vaphrofeti,+ hi yena a nga ruma a ngilozi yakwe kasi ku ya komba a malandza yakwe a zvilo lezvi zvi to maheka lokuloku. 7 Ndzata hi kuhatlisa.+ Wa tsaka loyi a hlayisako a timhaka ta ciphrofeto ca bhuku legi go songiwa.”+

8 Hi mina Johani ndzi ngazwa ni ku wona a zvilo lezvi. Laha ndzi nga zvizwa ni ku zvi wona, ndzi nowa lahasi mikondzweni ya ngilozi leyi yi nga ndzi komba a zvilo lezvi, kasi ndzi yi khozela. 9 Kanilezvi yi te ngalo ka mina: “Ti wonele! U nga mahi lezvo! Ndzi nandza a ku fana na wena ni vamakabye va wena, a vaphrofeti, ni lava va ingisako a timhaka ta bhuku legi go songiwa. Khozela Nungungulu.”+

10 Yi no engeta yiku ka mina: “U nga lemi a timhaka ta ciphrofeto ca bhuku legi go songiwa, hakuva a cikhati ci yimisilweko ci laha kusuhani. 11 Loyi a nga lulamangiko i wa simame kungalulameni, ni loyi a nga manyaleni i wa simame manyaleni yakwe; kanilezvi a wakululama i wa simame kululameni, ni wobasa i wa simame kubaseni.

12 “‘Ndzata hi kuhatlisa, niku a nchachazelo lowu ndzi nyikako wu na mina, kasi ku tlhelisela a mun’we ni mun’wani hi kuya hi ntiro wakwe.+ 13 Hi mina Alfa na Omega,*+ ndzi wa kusangula ni wa kugumesa, a masangulo ni magumo. 14 Va tsaka lava va hlazvako tinguwo tabye,+ kasi va kuma ntamu wa kuya tisinyeni ta wutomi+ ni lezvaku va nghena dhoropeni hi tinyangwa ta gona.+ 15 Le handle ku na ni timbyana,* ni valoyi,* ni zvibhayi,* ni vadayi, ni vakhozeli va zvifananiso, ni vontlhe lava va randzako kuhemba va tlhela va hanya hi kona.’+

16 “‘Mina Jesu, ndzi no ruma a ngilozi ya mina lezvaku yi mu nyika wukustumunyu xungetano hi timhaka leti ti yako mabandleni. Hi mina mutsu, ni pswalo wa Dhavhidha,+ ni nyeleti yo ngangamela ya ni mixo.’”+

17 A moya ni noivha+ ve ngalo: “Tana!” Ni wihi loyi a zvi zwako i wa wule aku: “Tana!” ni wihi loyi a zwako tora i wate;+ ni wihi loyi a zvi lavako i wanwe a mati ya wutomi mahala.+

18 “Ndza nyika wukustumunyu ni ka wihi loyi a zwako timhaka ta ciphrofeto ca bhuku legi go songiwa, ndziku: Loku a wokari o engetela nchumu ka timhaka leti,+ Nungungulu i ta mu engetela a zvixaniso lezvi zvi tsalilweko ka bhuku legi go songiwa;+ 19 ni loku a wokari o susa nchumu ka timhaka ta bhuku go songiwa ga ciphrofeto leci, Nungungulu i ta mu susela ciavelo cakwe tisinyeni ta wutomi+ ni dhoropeni go basa,+ ku nga zvilo zvi tsalilweko bhukwini legi go songiwa.

20 “Loyi a nyikako wukustumunyu ga zvilo lezvi, i ngalo: ‘Ina, ndzata hi kuhatlisa.’”+

“Amen! Tana Hosi Jesu.”

21 Ngha a tipswalo ta Hosi Jesu tiva ni vobasa.