Hosi Yo Sangula Ya Israeli Kala Wukhumbini Le Babuloni

Saule i lo maha hosi yo sangula ya Israeli. Kanilezi Jehova i lo mu ala, zonake ku lo hlawuliwa Davida lezaku a maha hosi wutshanwini gakwe. Hi pola zilo zo tala ha Davida. Na a ha hi munhu muswa, yena i lolwa ni xihotlovila Goliate. Anzhako i lo tsutsuma hi ka Hosi yo lusa, Saule. Kasike a mbhuri Abigaili i lo mu sivela ku maha nchumu wa wupumbu.

Hi kulanzela, hi gonza zilo zo tala ha Solomoni n’wana Davida, loyi a nga valeta wutshamu ga Davida kota hosi ya Israeli. A yinwe ni yinwani ya tihosi tinharu to sangula ta Israeli yi lo fuma a 40 wa malembe. Anzhako ka kufa ka Solomoni, Israeli i lo avanyiswa a maha mifumo mimbiri, wunwe wa le nwalungu ni wunwani wa le dzonga.

A mufumo wa le nwalungu wa 10 wa tixaka wu tshamile a 257 wa malembe mahlweni ka kuloviswa ka wona hi vaAssiria. Zonake loku ku hunzile a 133 wa malembe, a mufumo wa le dzonga wa tixaka timbiri wonawu wu lo loviswa. A ka xikhati lexi a vaIsraeli va lo tekiwa vaya wukhumbini le Babuloni. Hikwalaho a Xipanze xa wuMUNE xi eneta a 510 wa malembe ya matimu, lomo ku mahekako zimaho zo tala zi henyako mbilu kota lezi hi to zi wona.