Tsakela Wutomi Ga Pinzukelwa Misaveni!

A broxura legi gi gandlilwe kasi ku ku vuna ku tiva loyi a nga maha misava ni zontlhe zi nga ka yona. U ta gonza lezaku Nungungulu, loyi a nga maha misava, i na ni vito. Laha kambe hi ta tlhamusela lezaku hikuyini Nungungulu a nga maha munhu niku u nga zi kotisa kuyini ku tsakela wutomi ga pinzukelwa misaveni.

Hi rinzela lezaku ngha mifananiso yinyingi yi ku vuna ku wona chukwana zilo lezo. Kasi ku vuneka nguvu, u fanele ku gonza mitsalo ya Biblia yi nga laha tlhelweni ga wunyingi ga mifananiso. Hi ndlela leyo, u ta ti gonzela zinwe za zitsumbiso zo saseka za Nungungulu, zi nga lomu ka Biblia, ni lezi Nungungulu a nge ngalo u fanele ku maha kasi ku amukela kutatiseka ka zitsumbiso lezo.

Kuzilava u nga navela ku tirisa broxura legi kasi ku vuna vanwani. Loku u hi ni vana, wa zi kota ku gi tirisa kasi ku va vuna ku gonza hi Nungungulu. Loku wena u hanya tikweni gi nga ni vanhu va hombe vo tala va nga zi kotiko ku gonza, wa zi kota ku tirisa mifananiso kasi ku va vuna ku pima makungo ya Nungungulu, lezaku na vonawo va zi kota ku vuna vaakelani vabye.

Hi lisine hi rinzela lezaku ngha a ku gonza mahungu lawa ku ku vululela ndlela ya ku amukela zikatekiso zinyingi, hambu ku komba vanwani lezaku va nga hanyisa kuyini misaveni kala kupinzuka.